ការថ្លែងបែបនេះ បានធ្វើឡើងនារសៀលថ្ងៃទី២៩ ខែសីហា ឆ្នាំ២០២៥នេះ ក្នុងពិធីប្រកាសចូលកាន់មុខតំណែងអភិបាលរង នៃគណៈអភិបាលរាជធានីភ្នំពេញ ក្រោមអធិបតីភាព លោកសន្តិបណ្ឌិត ម៉ៅ ច័ន្ទតារា រដ្ឋលេខាធិការប្រចាំការក្រសួងមហាផ្ទៃ តំណាង លោក អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកឃួង ស្រេង អភិបាល នៃគណៈអភិបាលរាជធានីភ្នំពេញ នៅសាលារាជធានីភ្នំពេញ។

ពិធីប្រកាសចូលកាន់មុខតំណែងនេះ គឺលោក ពេញ ធារម្យ អតីតអភិបាលរងខេត្តកំពត ត្រូវបានប្រកាសឱ្យចូលកាន់មុខតំណែងអភិបាលរង នៃគណៈអភិបាលរាជធានីភ្នំពេញ ជំនួសលោក កើត ឆែ អភិបាលរង នៃអភិបាលរាជធានីភ្នំពេញ។

លោកសន្តិបណ្ឌិត ម៉ៅ ច័ន្ទតារា ក៏បានលើកឡើងពីស្ថានភាពនៃ ការប៉ះទង្គិចគ្នារវាងកងទ័ពកម្ពុជាជាមួយនឹងកងទ័ពថៃ កាលពីថ្ងៃទី២៤ដល់ថ្ងៃទី ២៨ កក្កដា ដែលសង្គ្រាមនេះ បានបំផ្លិចបំផ្លាញទ្រព្យសម្បត្តិ អាយុជីវិតកងទ័ពនិងប្រជាពលរដ្ឋស្លូតត្រង់ ជាច្រើននាក់។

លោកក៏បានថ្លែងនូវការអរគុណចំពោះសម្ដេចបវរធិបតីហ៊ុនម៉ាណែតដែលបានស្វែងរកសន្តិភាពជូនកម្ពុជានៅថ្ងៃទី២៨ខែកក្កដា ដែលឈានទៅដល់មានបទឈប់បាញ់ដោយគ្មានលក្ខខណ្ឌ។ លោកបញ្ជាក់ថា៖ បើទោះបីមានបទឈប់បាញ់ក្តី ក៏ប៉ុន្តែស្ថានភាពព្រំដែននៅតែមានបញ្ហាស្មុគស្មាញមិនចេះចប់ បង្កឡើងដោយទាហានថៃឈ្លានពាន។

ក្នុងឱកាសនោះដែរ លោកឃួង ស្រេង បានមានប្រសាសន៍លើកឡើងថា គណៈបញ្ជាការឯកភាពរាជធានីភ្នំពេញ រក្សាបាននូវសន្តិសុខ សុវត្ថិភាពយ៉ាងល្អប្រសើរ មិនឱ្យប្រជាពលរដ្ឋមានការព្រួយបារម្ភឡើយ។ ជាមួយគ្នានេះដែរ ខណៈដែល នៅតាមព្រំដែន មានការប៉ះទង្គិចគ្នាដោយអាវុធ ដែលបង្កឡើងដោយទាហានថៃ រំលោភមកលើបូរណភាពទឹកដីកម្ពុជា រដ្ឋបាលរាជធានីភ្នំពេញ បានគៀងគរសប្បុរជន ឱ្យចូលរួមជាមួយរដ្ឋបាលរាជធានី ក្នុងការបរិចាកគ្រឿងឧបភោគ បរិភោគ សម្ភារៈប្រើប្រាស់ និងថវិកាដើម្បីប្រគល់ជូនទៅបងប្អូនកងទ័ពជួរមុខ និងបងប្អូនជាជនភៀសសឹក។

គ្រឿងឧបភោគ បរិភោគ សម្ភារៈប្រើប្រាស់ និងថវិកាដែលបានមកពីសប្បុរសជន រដ្ឋបាលរាជធានីភ្នំពេញបានយកទៅប្រគល់ជូនដល់កងទ័ពជួរមុខ និងជនភៀសសឹកបានចំនួន២១លើក។

លោកឃួង ស្រេង បានបន្តទៀតថា អនុវត្តតាមការចង្អុល ណែនាំពីសម្តេចធិបតី ហ៊ុន ម៉ាណែត នាយករដ្ឋមន្ត្រី រដ្ឋបាលរាជធានី បានរៀបចំរថយន្តក្រុងសំរាប់ដឹកជញ្ជូនពលករមកពីប្រទេសថៃ ដោយបានប្រើប្រាស់រថយន្តចំនួន៤៨០គ្រឿង។ យើងបានធ្វើការអភិវឌ្ឍរាជធានីឱ្យមានការអភិវឌ្ឍរីកចំរើន ហើយកាលពីថ្ងៃទី១០កក្កដា២០២៥កន្លងមកនេះ ដោយមានការអនុញ្ញាតិដ៏ខ្ពង់ខ្ពស់ពីសម្តេចធិបតី ហ៊ុន ម៉ាណែត យើងបានដាក់ឱ្យប្រើប្រាស់ជា បណ្តោះអាសន្ន ស្ពានអាកាស សម្តេចធិបតី ហ៊ុន ម៉ាណែត។យើងបានបង្កើតឱ្យមានផ្លូវថ្មើរជើងចតុមុខ ដែលទទួលបានការពេញនិយមយ៉ាងខ្លាំងពីភ្ញៀវជាតិនិងបរទេស មកដើរលេងកំសាន្ត ក្នុង១ថ្ងៃសៅរ៍ឬថ្ងៃអាទិត្យពី៨ទៅ១០ម៉ឺននាក់ក្នុងមួយថ្ងៃ រហូតធ្វើឱ្យរាជធានីភ្នំពេញជាប់ចំណាត់ថ្នាក់លេខ២លើពិភពលោក ឈ្មោះថា ជាទីក្រុងប្រជុំដោយភាពរីករាយនៅពេលរាត្រី។

ក្នុងឱកាសនោះដែរ លោកឃួង ស្រេង បានណែនាំឱ្យលោក ពេញ ធារម្យ អភិបាលរងរាជធានីភ្នំពេញថ្មី ត្រូវយកចិត្តទុកដាក់បំពេញការងារ ដោយសហការជាមួយខណ្ឌទាំង១៤ សង្កាត់ទាំង១០៥ អង្គការសង្គមស៊ីវិល ពិសេសគឺសាមគ្គីភាពសាមគ្គីភាពផ្ទៃក្នុងឲ្យបានល្អ។

ក្នុងឱកាសនោះដែរ លោក ពេញ ធារម្យ ដែលត្រូវបានតែងតាំងជាអភិបាលរងរាជធានី បានប្តេជ្ញាចិត្តថា ដើម្បីឆ្លើយតបទៅនឹងទំនុកចិត្តរបស់រាជរដ្ឋាភិបាលក៏ដូចជា ថ្នាក់ដឹកនាំគ្រប់លំដាប់ថ្នាក់ លោកនឹងខិតខំបំពេញការងារ ការពាររាជរដ្ឋាភិបាលទោះក្នុងតម្លៃណាក៏ដោយ ប្តេជ្ញាគោរពតាមគោលការណ៍ណែនាំរបស់រាជរដ្ឋាភិបាលឱ្យបានម៉ឹងម៉ាត់បំផុត។ ប្តេជ្ញាគោរពតាមសេចក្តីសម្រេចនានារបស់ក្រសួងមហាផ្ទៃ។

ចូលរួមអនុវត្តឱ្យបានជោគជ័យនូវគោលនយោបាយភូមិ សង្កាត់សុវត្ថិភាព។ ប្តេជ្ញាធានារក្សាសន្តិសុខ សុវត្ថិភាពនិងរក្សាសន្តិភាពអោយបានទោះបីក្នុងតម្លៃណាក៏ដោយ។ គោរពតាមការណែនាំរបស់លោកឃួង ស្រេង អភិបាលរាជធានីភ្នំពេញឱ្យបានម៉ឹងម៉ាត់បំផុតនិងខិតខំបំពេញការងារប្រកបដោយស្មារតី បុរេសកម្ម៕

ដោយ ៖ ស្រីរ័ត្ន

The post លោកសន្តិបណ្ឌិត ម៉ៅ ច័ន្ទតារា អរគុណក្រុមប្រឹក្សានិង គណៈអភិបាលរាជធានី ដែលសម្រេចលទ្ធផលការងារ appeared first on Kampuchea Thmey Daily.

លោក មឿន សុភេទ ត្រូវបានប្រកាសតែងតាំងឱ្យចូលកាន់មុខតំណែងជាប្រធានមន្ទីរបរិស្ថានខេត្តព្រះវិហារថ្មី ជំនួសលោក សុង ច័ន្ទសុជាតិ ដែលត្រូវបានទទួលភារកិច្ចថ្មី នៅក្រសួងបរិស្ថាន។ ក្នុងឱកាសនេះ លោក មឿន សុភេទ បានថ្លែងអំណរគុណចំពោះថ្នាក់ដឹកនាំ ដែលផ្តល់ទំនុកចិត្តលើការងារជាប្រធានមន្ទីរបរិស្ថានខេត្តព្រះវិហារ។ លោក ប្ដេជ្ញាចិត្តចំពោះគណៈអធិបតី ថានឹងបន្តធ្វើកិច្ចការងារនៅក្នុងមន្ទីរបរិស្ថានខេត្តព្រះវិហារ ក៏ដូចជាការងារអភិរក្សធនធានធម្មជាតិនៅក្នុងខេត្តព្រះវិហារ ឲ្យមានប្រសិទ្ធភាពខ្ពស់ថែមទៀត។

ជាមួយគ្នានេះ គណៈអធិបតី បានស្នើឱ្យប្រធានមន្ទីរបរិស្ថានថ្មី នៃខេត្តព្រះវិហារ បន្តធ្វើសកម្មភាពការពារអភិរក្សធនធានធម្មជាតិនានានៅក្នុងខេត្តឲ្យមានប្រសិទ្ធភាពខ្ពស់ ស្របតាមគោលនយោបាយរបស់ប្រមុខនៃរាជរដ្ឋាភិបាលកម្ពុជាក្នុងអាណត្តិទី៧នេះ។

សូមជម្រាបថា ក្នុងពិធីនេះក៏មានការចូលរួមពី លោក ប្រាក់ សុវណ្ណ ប្រធានក្រុមប្រឹក្សាខេត្ត, លោក គីម រិទ្ធី អភិបាល នៃគណៈអភិបាលខេត្ត, លោក លោកស្រីអភិបាលរងខេត្ត មេបញ្ជាការកងកម្លាំងទាំងបី ថ្នាក់ដឹកនាំមន្ទីរ-អង្គភាពជុំវិញខេត្ត អភិបាលក្រុង ស្រុកទាំង០៨ មន្ត្រីរាជការសាលាខេត្ត មន្ត្រីរាជការ មន្រ្តីឧទ្យានុរក្ស និងមន្រ្តីជាប់កិច្ចសន្យា នៃមន្ទីរបរិស្ថានខេត្តជាច្រើនរូបទៀត៕

ដោយ៖ ជុន កុសល

The post លោក មឿន សុភេទ ត្រូវបានប្រកាសចូលកាន់តំណែងជាប្រធានមន្ទីរបរិស្ថាន ខេត្តព្រះវិហារថ្មី appeared first on Kampuchea Thmey Daily.

ក្នុង​ព្រះរាជក្រឹត្យ​ដែល​បានចេញ​នៅថ្ងៃទី១៣ ខែវិច្ឆិកា ឆ្នាំ២០២៤ បានឱ្យដឹងថា អ្នកឧកញ៉ា អ៊ឹង ប៊ុនហ៊ូវ ​ជាពាណិជ្ជករដ៏ឆ្នើម ដែលមានកេរ្តិ៍ឈ្មោះបោះសម្លេង និងគួរឱ្យគោរពមួយរូប នៅក្នុងប្រទេសកម្ពុជា។ អ្នកឧកញ៉ា បានចាប់ផ្តើមជំនួញដោយសហការជាមួយដៃគូ ជាជនជាតិសឹង្ហបូរី នាដើមឆ្នាំ១៩៩២ និងបានបង្កើតសហគ្រាសពាណិជ្ជកម្មដំបូងបំផុត នៅក្នុងឆ្នាំ១៩៩៣ ក្រោមនាមករណ៍ថា អេហ្សិត ឌីស្ទ្រ៊ីប្យ៊ូហ្សិន ជាមួយចក្ខុវិស័យអភិវឌ្ឍជំនួញចម្រុះពី A ដល់ Z។

អ្នកឧកញ៉ា បានវិនិយោគបង្កើតក្រុមហ៊ុនអាជីវកម្មជាច្រើនប្រភេទ លើវិស័យមួយចំនួនក្នុងនោះ អចលនទ្រព្យជាវិស័យស្នូល។ អ្នកឧកញ៉ា គឺជាប្រធានអគ្គនាយក នៃក្រុមហ៊ុន ដូនពេញ (ខេមបូឌា) គ្រុប ជាសម្ព័ន្ធក្រុមហ៊ុនក្នុងស្រុកដ៏ធំមួយ និង ក៏ជាវិនិយោគិននៅតាមបណ្តាប្រទេសទាំងពេលកន្លងមក និងបច្ចុប្បន្នដូចជា ភូមា ឥណ្ឌា សឹង្ហបុរី ចក្រភពអង់គ្លេស កាណាដា និងសហរដ្ឋអាមេរិក ថែមទៀតផង។ អ្នកឧកញ៉ា បានទទួលសញ្ញាបត្រ ថ្នាក់បរិញ្ញាបត្រ លើមុខជំនាញនីតិឯកជន ពីសាកលវិទ្យាល័យពហុបច្ចេកវិទ្យាកម្ពុជា ក្នុងឆ្នាំ២០០៥និងសញ្ញាបត្រថ្នាក់អនុបណ្ឌិត លើមុខជំនាញរដ្ឋបាលសាធារណៈក្នុងឆ្នាំ២០០៧។

អ្នកឧកញ៉ា បានចូលរួមវគ្គហ្វឹកហ្វឺនជាច្រើនលើការគ្រប់គ្រងពាណិជ្ជកម្ម នីតិវិនិយោគ ទីផ្សារភាគហ៊ុន និងជំនាញជាច្រើនទៀតចាប់តាំងពីឆ្នាំ២០០១ រហូតមកដល់ឆ្នាំ២០១០។ នៅក្នុងឆ្នាំ២០១១ លោក​អ្នកឧកញ៉ា បានចូលរួមវគ្គសិក្សាអប់រំសម្រាប់អ្នកដឹកនាំប្រតិបត្តិជាន់ខ្ពស់ នៅឯសាលា Harvard Kennedy School លើប្រធានបទស្តីពីហេដ្ឋារចនាសម្ព័ន្ធនៅក្នុងសេដ្ឋកិច្ចទីផ្សារ។ លោក​អ្នកឧកញ៉ា គឺជាបេក្ខភាពបណ្ឌិតរដ្ឋបាលសាធារណៈ នៃរាជបណ្ឌិត្យសភាកម្ពុជា ក្នុងឆ្នាំ២០១៣។ ជាមួយនឹងឧត្តមគតិស្នេហា និងអភិវឌ្ឍន៍ជាតិមាតុភូមិ អ្នកឧកញ៉ា បានចំណាយអស់ពីសមត្ថភាពទាំងកម្លាំងកាយចិត្ត បញ្ញាស្មារតី និងធនធានរបស់ខ្លួន រយៈពេល១០ឆ្នាំ ដើម្បីចូលរួមបម្រើជាតិក្នុងវិស័យសាធារណៈ ដោយចាប់តាំងពីឆ្នាំ២០០៣ រហូតដល់ឆ្នាំ២០០៨ អ្នកឧកញ៉ា បានបំពេញបេសកកម្មក្នុងនាមជាសមាជិកសភាតំណាងរាស្ត្រ នៃរដ្ឋសភាជាតិបន្ទាប់មក នៅឆ្នាំ២០០៨ ឯកឧត្តមអ្នកឧកញ៉ា ត្រូវបានតែងតាំងជារដ្ឋលេខាធិការ នៃក្រសួងសាធារណការ និងដឹកជញ្ជូន រហូតដល់ឆ្នាំ២០១៣។

គួរបញ្ជាក់ថាកន្លងមក អ្នកឧកញ៉ា ក៏ធ្លាប់ទទួលបានការតែងតាំងជា ទីប្រឹក្សារាជរដ្ឋាភិបាល មានឋានៈស្មើ រដ្ឋមន្ត្រី ផងដែរ។ ហើយ ក៏មានកេរ្តិ៍ឈ្មោះល្បីល្បាញក្នុងនាមជាសប្បុរសជនមួយរូប ដែលខ្នះខ្នែងក្នុងកិច្ចការលើកកម្ពស់សុខុមាលភាពសង្គម ដោយប្រើប្រាស់ប្រាក់ផលរបរដែលរកបាន ជួយដល់សង្គមជាតិ តាមរយៈសកម្មភាពនានា ក្នុងវិស័យជាច្រើន ទាំងដោយផ្ទាល់ និងតាមរយៈទីភ្នាក់ងារមនុស្សធម៌ជាតិ និងអន្តរជាតិ។

មិន​ត្រឹមតែ​ប៉ុណ្ណោះ​អ្នកឧកញ៉ា បាន​បរិច្ចាគថវិកាជាច្រើនលានដុល្លារ ដើម្បីបំពេញសេចក្តីខ្វះខាតរបស់ប្រជាពលរដ្ឋ ដែលមានចំណូលទាប ផ្តល់ជំនួយដល់សាលារៀន វត្តអារាម ព្រះវិហារគ្រឹស្តសាសនា គម្រោងអភិវឌ្ឍន៍ និងការការពារបរិស្ថាន កម្មវិធីធនធានទឹកស្អាត គម្រោងស្តារគ្រោះមហន្តរាយ និងក្នុងកំឡុងពេលវិបត្តិជម្ងឺឆ្លងសកលកូវីដ១៩ ជាដើម។ អ្នកឧកញ៉ា ក៏ធ្លាប់​បានផ្តល់ការបរិច្ចាគដល់ការស្រាវជ្រាវផ្នែកមហារីក នៃមន្ទីរពេទ្យ Mayo Clinic ដ៏ល្បីនៅសហរដ្ឋអាមេរិកផងដែរ៕

The post ព្រះមហាក្សត្រ ត្រាស់បង្គាប់តែងតាំង អ្នក​ឧកញ៉ា អុឹង ប៊ុនហ៊ូវ ជាទីប្រឹក្សាសម្ដេចតេជោ ហ៊ុន សែន ប្រធានព្រឹទ្ធសភា មាន​ឋានៈ​ស្មើ​ទេសរដ្ឋមន្ដ្រី appeared first on Kampuchea Thmey Daily.

ការតែងតាំងនេះក្រោមវត្តមានលោកនាយឧត្តមសេនីយ៍ ស ថេត អគ្គស្នងការនៃអគ្គស្នងការដ្ឋាននគរបាលជាតិតំណាងឯកឧត្តមអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងលោក អ៊ាន ឃុន ប្រធានក្រុមប្រឹក្សាខេត្ត ព្រមទាំងលោក ប្រាក់ សោភ័ណ អភិបាលខេត្តសៀមរាប។  

បន្ទាប់ពីប្រគល់ ប្រកាស និងប្រគល់ត្រា តែងតាំងជូនលោកឧត្តមសេនីយ៍ទោ ហួត សុធី ជាស្នងការនៃស្នងការដ្ឋាននគរបាលខេត្តសៀមរាបថ្មីរួចមក រូបលោកបានឡើងធ្វើការប្ដេជ្ញាចិត្តសន្យាថា ស្មោះត្រង់ចំពោះជាតិ សាសនា ព្រះមហាក្សត្រ គោរព និងអនុវត្តដោយស្មោះត្រង់តាមកម្មវិធីនយោបាយរាជរដ្ឋាភិបាលកម្ពុជា ដែលមានសម្ដេចធិបតី ហ៊ុន ម៉ាណែត ជាប្រមុខដឹកនាំ ហើយគោរព និងប្រតិបត្តិយ៉ាងម៉ឺងម៉ាត់ និងដោយសច្ចៈយុត្តិធម៌ចំពោះច្បាប់ បទប្បញ្ញតិ្ត និងបទបញ្ជាផ្សេងៗរបស់ថ្នាក់ដឹកនាំគ្រប់លំដាប់ថ្នាក់ ទៅតាមបទវិន័យរបស់មន្ត្រីនគរជាតិ រក្សាសាមគ្គីភាពផ្ទៃក្នុង និងការិយាល័យពាក់ព័ន្ធផ្សេងៗទៀតឱ្យបានល្អប្រសើរ។

ចំណែក លោក ប្រាក់ សោភ័ណ អភិបាលខេត្តសៀមរាប បានថ្លែងនូវការកោតសរសើរចំពោះការងារដែលអតីតស្នងការខេត្ត និងកងកម្លាំងនគរបាលទាំងអស់ ខិតខំបំពេញភារកិច្ចបានយ៉ាងល្អប្រសើរ ដោយបានផ្តល់សេវាឆាប់រហ័ស និងការពារសុខសុវត្ថិភាពជូនប្រជាពលរដ្ឋតាមបណ្តាមូលដ្ឋានបានយ៉ាងល្អប្រសើរនាពេលកន្លងមកនៅក្នុងឱកាសសៀមរាបសង្រ្កាន្តកន្លងមកនេះ ព្រមទាំងជំរុញឲ្យបន្តលើកិច្ចការងារនេះ ឲ្យកាន់តែល្អទ្វេរឡើងបន្ថែមទៀត។ លោកអភិបាលខេត្ត ក្នុងនាមគណៈបញ្ជាការឯកភាពរដ្ឋបាលខេត្ត បានដាក់នូវវិធានការសំខាន់ៗមួយចំនួនដល់កងកម្លាំងសមត្ថកិច្ច ក្នុងការអនុវត្តឲ្យមានប្រសិទ្ធភាព និងធានាបានសន្តិសុខ សុវត្ថិភាពជូនដល់ប្រជាពលរដ្ឋ ថ្នាក់ដឹកនាំជាន់ខ្ពស់ជាតិ អន្តរជាតិ និង ភ្ញៀវទេសចរដែលចូលមកកាន់ខេត្តសៀមរាប ដែលជាខេត្តប៉ូលទេសចរណ៍ ។

ដោយឡែក លោកនាយឧត្តមសេនីយ៍ ស ថេត វិញ បានផ្តល់នូវអនុសាសន៍សំខាន់ៗសម្រាប់លោកស្នងការនគរបាលថ្មី ធ្វើការដឹកនាំកងកម្លាំង ដោយបានលើកនូវគោលដៅសំខាន់ៗចំពោះមុខ។ លោកនាយឧត្តមសេនីយ៍ បានផ្តល់នូវដំបូន្មានល្អៗ សម្រាប់កងកម្លាំងទាំងអស់សម្រាប់យកទៅអនុវត្តនៅក្នុងមូលដ្ឋាន ព្រមទាំងសូមឲ្យមន្ត្រីកងកម្លាំងនគរបាលទាំងអស់ ត្រូវធ្វើការកែប្រែនូវឥរិយាបថរបស់ខ្លួន គោរពនូវក្រមសីលធម៌ជាមន្ត្រីនគរបាលជាតិ ក្នុងការបម្រើសេវាសាធារណៈ​ជូនប្រជាពលរដ្ឋ និងត្រូវអនុវត្តឲ្យខាងតែបាននូវខ្លឹមសារ៩ចំណុចនៃគោលនយោបាយភូមិឃុំមានសុវត្ថិភាព។ នាយឧត្តមសេនីយ៍អគ្គស្នងការ ក៏បានសង្កត់ធ្ងន់ទៅលើការងារគ្រប់គ្រងធនធានមនុស្ស ការងារសន្តិសុខសណ្តាប់ធ្នាប់សង្គម ការងារបង្ក្រាបការចរាចរគ្រឿងញៀន និងក្រុមក្មេងទំនើង ដោយខេត្តសៀមរាប ជាគោលដៅរបស់ភ្ញៀវទេសចរដែលជាប្រភពចំណូលមិនចេះរីងស្ងួតរបស់ជាតិ ក៏ដូចប្រជាពលរដ្ឋខេត្តសៀមរាបផងដែរ ។ 

លោកនាយឧត្តមសេនីយ៍ ស ថេត បានផ្តាំផ្ញើដល់ស្នងការថ្មី ត្រូវអនុវត្តឲ្យបាននូវតួនាទីភារកិច្ចរបស់ខ្លួន ដែលជាសេនាធិការឲ្យគណៈបញ្ជាការឯកភាពរដ្ឋបាលខេត្ត ក្នុងការអនុវត្តគោលនយោបាយភូមិ ឃុំ មានសុវត្ថិភាព ដែលរាជរដ្ឋាភិបាលបានដាក់ចេញសម្រាប់បម្រើប្រយោជន៍ និងក្តីសុខជូនប្រជាពលរដ្ឋ ជាពិសេស កត្តាសំខាន់ចំពោះមុខលើការងារអនុវត្តច្បាប់ចរាចរណ៍ផ្លូវគោក និងពង្រឹងវិន័យ និងលើកកម្ពស់សមត្ថភាពដល់កងកម្លាំងរបស់ខ្លួន ដើមី្បអនុវត្តការងារឲ្យកាន់តែមានប្រសិទ្ធភាពខ្ពស់ ៕

ដោយ៖ គឿន វេត

The post ឧត្តមសេនីយ៍ទោ ហួត សុធី ត្រូវបានតែងតាំងជាស្នងការនគរបាល ខេត្តសៀមរាប ជាផ្លូវការ appeared first on Kampuchea Thmey Daily.

ក្នុងសេចក្តីសម្រេច រដ្ឋមន្រ្តីក្រសួងធម្មការ និងសាសនា បានប្រគល់ភារកិច្ចថ្វាយ-ប្រគេន សម្ដេចព្រះមហាសុមេធាធិបតី កិត្តិឧទ្ទេសបណ្ឌិត នន្ទ ង៉ែត សម្តេចព្រះសង្ឃនាយកនៃកម្ពុជា ទទួលភារកិច្ចជាសម្តេចព្រះមហាសង្ឃរាជស្ដីទីនៃកម្ពុជា។ ចំណែក សម្ដេចព្រះពោធិវង្សកិត្តិបណ្ឌិត អំ លឹមហេង សម្តេចព្រះសង្ឃនាយករងទី១ គណៈមហានិកាយ ទទួលភារកិច្ច ជាសម្តេចព្រះសង្ឃនាយកស្ដីទី គណៈមហានិកាយ នៃកម្ពុជា។

គួរបញ្ជាក់ថា ការសម្រេសតែងតាំងនេះ គឺបន្ទាប់ពីសម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ គណៈមហានិកាយ នៃព្រះរាជាណាចក្រកម្ពុជា ទ្រង់យាងព្រះទិវង្គត នៅថ្ងៃចន្ទ ទី២៦ ខែកុម្ភៈ ឆ្នាំ២០២៤ វេលាម៉ោង១៧៖៤០នាទី ដោយព្រះជរាពាធ ក្នុងព្រះជន្មាយុ ៩៣ព្រះវស្សា នៅវត្តឧណ្ណាលោម រាជធានីភ្នំពេញ៕

The post សម្តេចព្រះសង្ឃនាយក នន្ទ ង៉ែត ទទួលជាសម្តេចព្រះមហាសង្ឃរាជស្តីទី ជំនួសសម្ដេច ទេព វង្ស appeared first on Kampuchea Thmey Daily.

យោងតាមសេចក្ដីសម្រេច ស្ដីពី ការតែងតាំងមន្ត្រីគណបក្ស ត្រង់ប្រការ ១ បានសរសេរថា «តែងតាំងឧកញ៉ាបណ្ឌិត សំ​ សុខនឿន ជាទីប្រឹក្សារបស់សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា»។

ចំណែកក្នុងប្រការ ២ បានសរសេរបញ្ជាក់ដែរថា «ខុទ្ធកាល័យ និងគណៈចាត់តាំងនៃគណៈកម្មាធិការកណ្ដាល ស្ថាប័នគណបក្សដែលពាក់ព័ន្ធ និងឧកញ៉ាបណ្ឌិត សំ សុខនឿន ត្រូវប្រតិបត្តិតាមសេចក្ដីសម្រេចនេះ»។

សូមជម្រាបថា លោកឧកញ៉ាបណ្ឌិត សំ សុខនឿន គឺជាប្រធានសមាគមអចលនទ្រព្យសកល ហើយក៏ជាអ្នកជំនួញផ្នែកអចលនទ្រព្យមួយរូប​ ផងដែរ៕

The post សម្តេចតេជោ ហ៊ុន សែន តែងតាំងលោកឧកញ៉ាបណ្ឌិត សំ សុខនឿន ជាទីប្រឹក្សារបស់ សម្ដេច appeared first on Kampuchea Thmey Daily.

ក្រសួងមហាផ្ទៃចេញមកបំភ្លឺបែបនេះ គឺដោយសារកាលពីថ្ងៃទី៣ ខែកុម្ភៈ មានគណនីហ្វេសប៊ុក សារព័ត៌មាន និងបណ្តាញសង្គមមួយចំនួនបានផ្សព្វផ្សាយព័ត៌មានស្តីពីការបញ្ចប់តំណែងមន្ត្រីនគរបាលជាតិ ដែលធ្វើឱ្យសាធារណជនយល់ច្រឡំ ​ព្រោះប្រមូលព័ត៌មានមិនបានគ្រប់ជ្រុងជ្រោយទាក់ទងនឹងការរៀបចំមុខងារសាធារណៈចំពោះនាយនគរបាលថ្នាក់ឧត្តមសេនីយ៍ និងនាយនគរបាលជាន់ខ្ពស់ដែលមានឈ្មោះក្នុងអនុក្រឹត្យលេខ១២២១ ចុះថ្ងៃទី២៥ ខែតុលា ឆ្នាំ២០២៣។

អ្នកនាំពាក្យក្រសួងមហាផ្ទៃ បានបញ្ជាក់ថា ក្រសួងបានង្កើតអគ្គនាយកដ្ឋានធនធានមនុស្ស ហើយមាននាយកដ្ឋាន ចំនួន៤ចំណុះ ហើយនាយកដ្ឋានបុគ្គលិកនៃអគ្គស្នងការដ្ឋាននគរបាលជាតិ បានផ្ទេរមកចំណុះអគ្គនាយកដ្ឋានធនធានមនុស្ស ដោយប្តូរឈ្មោះទៅជានាយកដ្ឋានបុគ្គលិកមន្ត្រីនគរបាលជាតិវិញ។ ក្នុងន័យនេះ ដើម្បីរៀបចំមុខតំណែងស្របតាមរចនាសម្ព័ន្ធថ្មីនៃនាយកដ្ឋាននីមួយៗ នាយនគរបាលជាន់ខ្ពស់ទាំង៩រូប ដែលត្រូវបានបញ្ចប់មុខតំណែងនោះ គឺត្រូវបានផ្ទេរសម្រួលភារកិច្ច និងតែងតាំងមុខតំណែងថ្មីឡើងវិញ ឱ្យទៅបម្រើការងារនៅនាយកដ្ឋាននីមួយៗចំណុះអគ្គនាយកដ្ឋានធនធានមនុស្ស នៃក្រសួងមហាផ្ទៃ។

ជាគោលការណ៍ និងនីតិវិធីនៃការរៀបចំមុខងារមន្ត្រីសាធារណៈ បើអង្គភាពសាម៉ីស្នើសុំតែងតាំងមុខតំណែងថ្មីដែលមានឋានៈទាបជាងតំណែងចាស់ អង្គភាពជំនាញត្រូវតែរៀបចំនីតិវិធីបញ្ចប់មុខតំណែងចាស់ជាមុនសិន ទើបតែងតាំងតំណែងថ្មីដែលមានឋានៈទាបជាងតាមក្រោយ។ ដោយឡែក មន្ត្រីជាន់ខ្ពស់ទាំង៩រូប បន្ទាប់ពីបានបញ្ចប់មុខតំណែងចាស់ នៅថ្ងៃទី២៥ ខែតុលា ឆ្នាំ២០២៣ គឺត្រូវបានក្រសួងមហាផ្ទៃតែងតាំងមុខតំណែងថ្មី តាមរយៈប្រកាសចុះថ្ងៃទី២៦ ខែតុលា ឆ្នាំ២០២៣ ស្របតាមលក្ខណសម្បត្តិ សមត្ថភាពជំនាញ ការគោរពវិន័យ សីលធម៌ល្អ មានឆន្ទៈមោះមុត ខិតខំបំពេញភារកិច្ច និងមានការទទួលខុសត្រូវការងារខ្ពស់។ នេះជាការបញ្ជាក់ពីអ្នកនាំពាក្យក្រសួងមហាផ្ទៃ។

សូមជម្រាបថា កាលពីថ្ងៃទី២៥ ខែតុលា ឆ្នាំ២០២៣ ក្រសួងមហាផ្ទៃបានបញ្ចប់មុខតំណែងអនុប្រធាននាយកដ្ឋានបុគ្គលិក ដែលមានឋានៈប្រធាននាយកដ្ឋានចំនួន៥រូប មានដូចជា លោកស្រី លឹម សុវណ្ណា លោក កៅ មុយឃាង លោក ហាវ ចាន់សិទ្ធី លោក កៅ កេសរៈ និងលោកស្រី ចូវ ណាថេន។ ចំណែកមន្ត្រី ៤រូបទៀត ដែលក្រសួងបញ្ចប់មុខតំណែងនាយកនគរបាលថ្នាក់ឧត្តមសេនីយ៍ និងនាយកនគរបាលជាន់ខ្ពស់ នៃនគរបាលកម្ពុជា មានដូចជា លោក យី ភារ៉ា លោក បឿ លំអង លោក នូ ផារ៉ាត់ និងលោកស្រី ទេព និមល៕

The post ក្រសួងមហាផ្ទៃ បំភ្លឺពីការតែងតាំងតំណែងថ្មីដល់មន្ត្រី៩រូប ដែលបានបញ្ចប់តំណែងកាលពីខែតុលា appeared first on Kampuchea Thmey Daily.

សម្ដេចធិបតី ហ៊ុន ម៉ាណែត មានប្រសាសន៍ថា ការចាត់តាំង និងការតែងតាំងមន្ត្រី ត្រូវឆ្លងកាត់ការវាយតម្លៃឲ្យបានច្បាស់លាស់ ជៀសវាងការអន្តរាគមន៍នានា ដើម្បីដាក់មន្ត្រីឲ្យបំពេញការងារចំគោលដៅ។

សម្ដេចធិបតី ហ៊ុន ម៉ាណែត បានថ្លែងបែបនេះថា «អញ្ចឹង គឺត្រូវមានការវាយតម្លៃ មានយន្ដការវាយតម្លៃ ឲ្យបានច្បាស់លាស់ ជៀសវាងនូវការអន្តរាគមន៍ផ្សេងៗ ដើម្បីរៀបចំមនុស្សឲ្យចំគោលដៅ ផ្អែកលើគុណាធិបតេយ្យ ឆន្ទៈ និងស្នាដៃនៅក្នុងការបម្រើប្រជាពលរដ្ឋ»។

សម្ដេចធិបតី ហ៊ុន ម៉ាណែត បានលើកឡើងថា​ មិនថាតែនៅក្នុងវិស័យអប់រំ សុខាភិបាល រដ្ឋបាលស៊ីវិល និងគ្រប់វិស័យទាំងអស់ ត្រូវធានាទៅលើការចាត់តាំង និងតែងតាំងមន្ត្រី ឲ្យបានចំគោលដៅ៕

The post សម្ដេចធិបតី ហ៊ុន ម៉ាណែត ៖ ការតែងតាំងមន្ត្រី ត្រូវឆ្លងកាត់ការវាយតម្លៃឲ្យបានច្បាស់លាស់ ជៀសវាងការអន្តរាគមន៍នានា appeared first on Kampuchea Thmey Daily.