តំបន់អូរភ្លុកដំរី ស្ថិតនៅខេត្តពោធិ៍សាត់ គឺជាអតីតសមរភូមិដ៏ក្ដៅគគុកមួយក្នុងសង្គ្រាមកម្ពុជា-ថៃ ជុំទី២ រយៈពេល២១ថ្ងៃកាលពីចុងឆ្នាំ២០២៥។ សមរភូមិអូរភ្លុកដំរីយោធាថៃឈ្លានពានបើកការវាយលុកទ្រង់ទ្រាយធំ​ វាយជញ្ជ្រំ ដោយប្រើប្រាស់កាំភ្លើងបាញ់ចេញពីនាវាលើផ្ទៃសមុទ្រ ដ្រូន និងអាវុធធុនធ្ងន់ដទៃទៀត។

ក្រោយមានបទឈប់បាញ់ យោធាថៃបានកាន់កាប់តំបន់ ដោយបានធ្វើសកម្មភាពជាច្រើន រាប់តាំងពីការឈូសឆាយដោយប្រើប្រាស់គ្រឿងចក្រ ធ្វើលេណដ្ឋាន កែប្រែស្ថានភាពជាក់ស្ដែងនៅលើដី បន្តរហូតឥតដាច់មកទល់នឹងខែមេសា ឆ្នាំ២០២៦ នេះ។ សកម្មភាពយោធាថៃឈ្លានពាន ត្រូវបានក្រសួងការបរទេសនៃកម្ពុជា ធ្វើការតវ៉ាជំទាស់ ជាបន្តបន្ទាប់។

តាមរយៈដំណើររបស់អនុព័ន្ធចុះទៅសង្កេតការណ៍នេះ អ្នកនាំពាក្យក្រសួងការពារជាតិ តាមរយៈសេចក្ដីប្រកាសព័ត៌មានចេញថ្ងៃទី២៨ ខែមេសា   បានស្វាគមន៍ចំពោះបណ្តាប្រទេសជាមិត្ត ដែលមានបំណងចូលរួមចុះពិនិត្យ និងសង្កេតការណ៍ដោយផ្ទាល់នៅតាមបណ្តោយព្រំដែនកម្ពុជា-ថៃ ដើម្បីតាមដានការអនុវត្តបទឈប់បាញ់ សំដៅធានាឱ្យបាននូវតម្លាភាព ភាពជឿទុកចិត្តបាន និងភាពត្រឹមត្រូវ។

អ្នកនាំពាក្យអះអាងថា រាជរដ្ឋាភិបាល និងក្រសួងការពារជាតិកម្ពុជា ប្តេជ្ញាចិត្តយ៉ាងម៉ឺងម៉ាត់ ស្មោះត្រង់ សុចរិតក្នុងការគោរព និងអនុវត្តយ៉ាងពេញលេញ និងខ្ជាប់ខ្ជួនបំផុតសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC) ថ្ងៃទី២៧ ខែធ្នូ ឆ្នាំ២០២៥, សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ ថ្ងៃទី២៦ ខែតុលា ឆ្នាំ២០២៥ និងកិច្ចព្រមព្រៀងពាក់ព័ន្ធផ្សេងទៀត ដើម្បីឆ្ពោះទៅការធ្វើឱ្យប្រសើរឡើងវិញឆាប់រហ័ស និងការវិលត្រឡប់ទៅរកប្រក្រតីភាព សន្តិភាព ស្ថិរភាព និងសុវត្ថិភាពជូនប្រជាពលរដ្ឋដែលរស់នៅតាមបណ្តាយព្រំដែនប្រទេសទាំងពីរ៕

ដោយ៖ ង៉ិល ណារ៉ាត់

The post អនុព័ន្ធយោធាប្រទេសធំៗ អាម៉េរិក ចិន  រុស្ស៊ី ជប៉ុន អូស្ត្រាលី ចុះទៅដល់តំបន់អូរភ្លុកដំរី ទីយោធាថៃឈ្លានពានវាតទី appeared first on Kampuchea Thmey Daily.