ថែរក្សាសន្តិភាព Archives - Kampuchea Thmey Daily

ដើម្បីបុព្វហេតុសន្តិភាព និងមនុស្សធម៌ក្នុងលោក កម្ពុជាបន្តបញ្ជូនទ័ពមួកខៀវ៣កងបន្ថែមទៀតទៅបំពេញបេសកកម្មក្រោមឆ័ត្រUN

Ngoeul Narath — Mon, 09 Feb 2026 02:25:00 +0000

កម្ពុជានៅតែបន្តបញ្ជូនកងទ័ពមួកខៀវ៣កងបន្ថែមទៀតឱ្យទៅបំពេញបេសកកម្មថែរក្សាសន្តិភាពនៅឆ័ត្រក្រោមអង្គការសហប្រជាជាតិ បើទោះបីជាកន្លងមកជួបនូវបញ្ហាប្រឈមជាច្រើន។ កងទ័ពមួកខៀវដែលកម្ពុជាបញ្ជូនទៅបំពេញបេសកកម្មនាលើកនេះ គឺមកកងរាជអាវុធហត្ថលេខ៨៧៤ កងអនុសេនាធំវិស្វកម្មពហុជំនាញលេខ៦៨៣ និងកងកម្ទេចគ្រឿងផ្ទុះលេខ៩៨-ទី៤ ដោយត្រូវទៅបំពេញបេសកកម្មរក្សាសន្តិភាព នៅសាធារណរដ្ឋស៊ូដង់ខាងត្បូង លីបង់ និងអាហ្រ្វិកកណ្តាល។

ពិធីជូនដំណើរកងទ័ពមួកខៀវទាំង៣កង ធ្វើឡើងនៅទីស្តីការក្រសួងការពារជាតិកាលពីថ្ងៃទី៨ ខែកុម្ភៈ ក្រោមវត្តមាន ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ទៀ សីហា ដែលជាប្រធានគណៈកម្មាធិការជាតិ, លោកស្រី Vladanka Andreeva អ្នកសម្របសម្រួលអង្គការសហប្រជាជាតិថ្មីប្រចាំប្រទេសកម្ពុជា និងមន្ត្រីពាក់ព័ន្ធជាច្រើនទៀត។

នាយឧត្តមសេនីយ៍ទៀ សីហា គូសបញ្ជាក់ជាថ្មីថា កម្ពុជានៅតែបន្តបញ្ជូនកងកម្លាំងមួកខៀវរបស់ខ្លួនទៅបំពេញបេសកកម្មនៅក្រៅប្រទេសក្រោមឆត្រអង្គការសហប្រជាជាតិបន្តទៀត ដើម្បីបុព្វហេតុសន្តិភាព និងមនុស្សធម៌ក្នុងលោក បើទោះបីជាដឹងថាកន្លែងដែលត្រូវទៅនោះមានភាពប្រឈមដល់សន្តិសុខ និងសុខភាពនៃការរស់នៅយ៉ាងណាក៏ដោយនោះ។

ឧបនាយករដ្ឋមន្ត្រី ទៀ សីហា រម្លឹកថា អស់រយៈពេល ២០ ឆ្នាំមកហើយ ដែលកម្ពុជាបានចូលរួមបញ្ជូនកងកម្លាំងមួកខៀវជាង១ម៉ឺននាក់ ចេញទៅបំពេញបេសកកម្មរក្សាសន្តិភាពក្រោមឆត្រអង្គការសហប្រជាតិ ក៏ប៉ុន្តែការរក្សាសន្តិភាពកំពុងជួបប្រទះនឹងបញ្ហាប្រឈមនានា ដោយតួអង្គមិនមែនរដ្ឋ បានបង្កសង្រ្គាមឧទ្ទាមវាយប្រហារមកលើកងកម្លាំងរក្សាសន្តិភាព របស់កម្ពុជា ដោយបណ្តាលឱ្យបាត់បង់ជីវិត និងពលីជាច្រើននាក់។ តែទោះជាយ៉ាងណាក៏ដោយកម្ពុជា ពុំបានកែប្រែនូវការប្តេជ្ញាចិត្តរបស់ខ្លួន ក្នុងការបន្តរួមចំណែកដល់បុព្វហេតុដ៏ឧត្តុង្គឧត្តមនៃសន្តិភាពនេះឡើយ។

ឧបនាយករដ្ឋមន្ត្រី ទៀ សីហា សង្កត់ធ្ងន់ថា ÷« ជាក់ស្តែងថ្ងៃនេះ កម្ពុជាបន្តបញ្ជូនកងកម្លាំងរបស់ខ្លួនចំនួន០៣កងទៅបំពេញបេសកកម្ម នៅសាធារណៈរដ្ឋស៊ូដង់ខាងត្បូង លីបង់ និងអាហ្រ្វិកកណ្តាល ទោះបីជាបេសកកម្មនេះ អាចជួបប្រទះអំពើហិង្សានានា ប្រឈមនឹងអស្ថិរភាពដែលបង្កដោយក្រុមជ្រុលនិយម ក្រុមជម្លោះប្រដាប់អាវុធ ឬក៏ក្រុមឧទ្ទាមជាដើម និងអាចជួបហានិភ័យនៃគ្រោះធម្មជាតិ ជំងឺឆ្លងផ្សេងៗ ដែលគំរាមកំហែងដល់សន្តិសុខ សុខភាព ការរស់នៅ និងការបំពេញការងារប្រចាំថ្ងៃរបស់កម្លាំងយើងក៏ដោយ ប៉ុន្តែកងកម្លាំងយើងមិនរាថយឡើយ ដោយហេតុថានេះជាបុព្វហេតុរួមដ៏ថ្លៃថ្លាបំផុត ដើម្បីសន្តិភាព និងមនុស្សធម៌ក្នុងលោក»។

គួររម្លឹកថា ក្នុងរយៈពេល២០ឆ្នាំកន្លងមកនេះ ពោលគឺចាប់តាំងពីឆ្នាំ២០០៦ មកដល់ឆ្នាំ២០២៦នេះ កម្ពុជាបញ្ជូនកងកម្លាំងមួកខៀវរបស់ខ្លួនបានចំនួន ១០ ៤៤៥នាក់ ក្នុងនោះមាននារីចំនួន៩៩០នាក់ទៅកាន់១២បេសកកម្ម នៅប្រទេសចំនួន១០ ដែលបច្ចុប្បន្នកងកម្លាំងរក្សាសន្តិភាពកម្ពុជា ចំនួន ៦២៩នាក់ ក្នុងនោះនារី១៣៥នាក់ កំពុងបំបេញបេសកម្មប្រទេសចំនួន៤ និង៥ បេសកកម្ម។

បើតាមនាយឧត្តមសេនីយ៍ទៀ សីហា កងកម្លាំងរបស់កម្ពុជាបានការពារជនស៊ីវិល បោសសម្អាតមីន និងគាំទ្រដល់ការកសាងឡើងវិញនូវសហគមន៍ដែលរងគ្រោះដោយសារសង្រ្គាម៕

The post ដើម្បីបុព្វហេតុសន្តិភាព និងមនុស្សធម៌ក្នុងលោក កម្ពុជាបន្តបញ្ជូនទ័ពមួកខៀវ៣កងបន្ថែមទៀតទៅបំពេញបេសកកម្មក្រោមឆ័ត្រUN appeared first on Kampuchea Thmey Daily.

លោក Michael ចូលថ្វាយបង្គំ សម្តេច គូ សុភាព ក្នុងកម្មវិធីសមាធិសម្រាប់កុមារ នៅវត្តគល់ទទឹង

អ៊ិន ពិសី — Tue, 27 Jan 2026 02:42:19 +0000

ការធ្វើដំណើរមកកាន់ប្រទេសកម្ពុជា ជាលើកទី ៣ ដើម្បីលើកកម្ពស់ និងចូលរួមផ្សព្វផ្សាយពីសន្តិភាព និងសេដ្ឋកិច្ចពាណិជ្ជកម្ម នៅកម្ពុជា លោក Michael B Alfaro កាលពីថ្ងៃទី ២៥ ខែមករា ឆ្នាំ ២០២៦ បានចូលរួមជាមួយ សម្តេចឧត្តមវង្សា គូ សុភាព ក្នុងកម្មវិធីសមាធិសម្រាប់កុមារ ស្ថិតនៅក្នុងបរិវេណវត្តគល់ទទឹង រាជធានីភ្នំពេញ។

នាឱកាសនោះ ទាំង សម្តេច គូ សុភាព និង លោក Michael B Alfaro បានពិភាក្សាគ្នាច្រើន ជុំវិញតួនាទីព្រះពុទ្ធសាសនាខ្មែរ ក្នុងការចូលរួមចំណែករក្សាសុខសន្តិភាពក្នុងប្រទេសកម្ពុជា និងពិភពលោក។ លើសពីនេះទៀត សម្តេច គូ សុភាព បាននាំ លោក Michael ទស្សនកិច្ចជុំវិញទីធ្លាបរិស្ថានវត្ត ដែលមានសោភណភាព និងភាពបៃតង។ លោក Michael កោតសរសើរយ៉ាងខ្លាំងចំពោះ ការរៀបចំវត្តអារាមរបស់ សម្តេច គូ សុភាព។ លោកថា វត្តគល់ទទឹង ពិតជាមានរបៀប និងរៀបចំបរិស្ថានបានយ៉ាងល្អប្រសើរ។

ជុំវិញការមកថ្វាយបង្គំរបស់ ម៉ៃឃល នេះ សម្តេច គូ សុភាព មានថេរដីកាគូសបញ្ជាក់ពីការរៀបចំឲ្យទៅជាអារាមទេសចរណ៍ ដើម្បីលើកកម្ពស់វិស័យទេសចរណ៍កម្ពុជា ជាពិសេសបានស្វែងយល់ពីវិស័យព្រះពុទ្ធសាសនា វប្បធម៌ និងការគោរពបូជារបស់ពលរដ្ឋកម្ពុជា។

លោក Michael បានសម្តែងនូវការសប្បាយរីករាយដែលបានចូលរួមជាមួយ សម្តេច គូ សុភាព ក្នុងកម្មវិធីសមាធិសម្រាប់កុមារ និងទស្សនាស្វែងយល់ពីតួនាទីព្រះពុទ្ធសាសនាក្នុងការថែរក្សាសន្តិភាព និងប្រែក្លាយទៅជាអារាមទេសចរណ៍៕

The post លោក Michael ចូលថ្វាយបង្គំ សម្តេច គូ សុភាព ក្នុងកម្មវិធីសមាធិសម្រាប់កុមារ នៅវត្តគល់ទទឹង appeared first on Kampuchea Thmey Daily.

មនុស្សជាង ៦ពាន់នាក់ ដើរដើម្បីសន្តិភាព រំលឹកគុណដល់រដ្ឋាភិបាល និងវីរកងទ័ពកម្ពុជាប្រឹងប្រែងការពារបូរណភាពទឹកដី

Samean Lay — Sun, 05 Oct 2025 04:54:10 +0000

នៅថ្ងៃទី០៥ ខែតុលា ឆ្នាំ២០២៥ រដ្ឋបាលខេត្តកំពង់ចាម បានសហការជាមួយក្រសួងទេសចរណ៍ និងក្រសួងអប់រំ យុវជន និងកីឡា បានរៀបចំព្រឹត្តិការណ៍ ទិវាដើរពិភពលោក ក្រោមពាក្យស្លោក “ដើរដើម្បីសន្តិភាព»។ ព្រឹត្តិការណថ្មើរជើងនេះ ដើម្បីរំលឹកគុណ និងដឹងគុណដល់រាជរដ្ឋាភិបាលកម្ពុជា និងវីរកងទ័ពជួរមុខដែលបានខិតខំប្រឹងប្រែងការពារបូរណភាពទឹកដីកម្ពុជា និងជួយរក្សាសុខសន្តិភាពជូនប្រជាពលរដ្ឋកម្ពុជា។

ពិធីនេះត្រូវបានរៀបចំឡើងនៅវេលាម៉ោង៧:០០ នាទីព្រឹក រហូតដល់ម៉ោង ៩:០០នាទីព្រឹក ដោយចេញដំណើរពីវិមានឯករាជ្យខេត្តកំពង់ចាម និងបន្តដំណើរ ឆ្ពោះទៅវេទិការអុំទូក និងត្រឡប់មកវិមានឯករាជ្យវិញ មានចម្ងាយ ៤គីឡូម៉ែត្រ។

ពិធីនេះធ្វើឡើងក្រោមវត្តមានលោក ហួត ហាក់ រដ្ឋមន្ត្រីក្រសួងទេសចរណ៍ និងលោក អ៊ុន ចាន់ដា អភិបាលខេត្តកំពង់ចាម និងថ្នាក់ដឹកនាំខេត្តជាច្រើនទៀត និងព្រះវត្តមានរបស់ព្រះសង្ឃចំនួន ២៥០អង្គ អ្នកឧកញ៉ា លោក លោកស្រី បងប្អូនប្រជាពលរដ្ឋ ក្មួយៗសិស្ស និស្សិត និងមហាជនទូទៅដែលអញ្ជើញមកចូលរួមយ៉ាងច្រើនកុះករសរុបប្រមាណជិត ៦,០០០ នាក់។

ព្រឹត្តិការណ៍ដើរដើម្បីសន្តិភាព នាពេលនេះ ក៏ដើម្បីលើកកម្ពស់ស្មារតី និងថែរក្សាសន្តិភាពនៅកម្ពុជា និងនៅក្នុងសាកលលោកទាំងមូល៕

អត្ថបទ និងរូបភាព៖ ឡេក ចាន់ពេជ្រ

The post មនុស្សជាង ៦ពាន់នាក់ ដើរដើម្បីសន្តិភាព រំលឹកគុណដល់រដ្ឋាភិបាល និងវីរកងទ័ពកម្ពុជាប្រឹងប្រែងការពារបូរណភាពទឹកដី appeared first on Kampuchea Thmey Daily.

ថ្នាក់ដឹកនាំខេត្តព្រះវិហារ ព្រះសង្ឃ និងជនភៀសសឹករាប់ពាន់អង្គ/នាក់ រួមគ្នាដង្ហែរក្បួនថ្មើជើងដើម្បីសន្ដិភាព

កម្ពុជាថ្មី — Sun, 24 Aug 2025 14:45:20 +0000

នៅព្រឹកថ្ងៃទី២៤ ខែសីហា ឆ្នាំ២០២៥នេះ រដ្ឋបាលខេត្តព្រះវិហារ ក្រោមការដឹកនាំរបស់ លោក គីម រិទ្ធី អភិបាលខេត្តព្រះវិហារ បានរៀបចំព្រឹត្តិការណ៍ «ដើរដើម្បីសន្តិភាព» នៅមណ្ឌលសុវត្ថិភាពវត្តពោធិ៍ ៥០០០ដើម ក្នុងឃុំគូលែនត្បូង ស្រុកគូលែន ដោយមានការចូលរួមយ៉ាងច្រើនកុះករពីសំណាក់ថ្នាក់ដឹកនាំ មន្ត្រីរាជការ ព្រះសង្ឃប្រមាណ៥០០អង្គ និងបងប្អូនជនភៀសខ្លួនរាប់ពាន់នាក់។

ព្រឹត្តិការណ៍នេះធ្វើឡើង ដើម្បីឆ្លុះបញ្ចាំងពីស្មារតីសាមគ្គីភាពរបស់ប្រជាជាតិខ្មែរ និងក្ដីសង្ឃឹមចំពោះការទាមទាររកសន្ដិភាពពិតប្រាកដ ទៅកាន់ពិភពលោកឱ្យបានដឹង ក្រោយកម្ពុជារងការឈ្លានពានពីសំណាក់កងទ័ពសៀម។

លោក គីម រិទ្ធី អភិបាលខេត្តព្រះវិហារ បានសម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅ ចំពោះវីរកងទ័ពជួរមុខដ៏អង់អាចក្លាហាន ដែលបានខិតខំយកចិត្តទុកដាក់បំពេញតួនាទីភារកិច្ច ប្រកបដោយការទទួលខុសត្រូវ ក្នុងកិច្ចការរក្សាការពារបូរណភាពទឹកដី អធិបតេយ្យភាព និងធ្វើឲ្យសណ្តាប់ធ្នាប់នៅតាមព្រំដែន មានភាពល្អប្រសើរ ធានាបាននូវសន្តិសុខសុវត្ថិភាព ជូនប្រជាពលរដ្ឋ។

លោកបានគូសបញ្ជាក់ថា ជាការពិតណាស់ ការរៀបចំក្បួនដង្ហែនេះ ធ្វើឡើងក្នុងគោលបំណង ដើម្បីបង្ហាញយ៉ាងច្បាស់នូវស្មារតី ស្នេហាជាតិ សាមគ្គី ឯកភាពជាតិ ជាពិសេសបង្ហាញពីឆន្ទះទៅកាន់ពិភពលោកទាំងមូលពីការស្រលាញ់សន្តិភាពរបស់ប្រជាជនកម្ពុជា។ តាមរយៈសកម្មភាពជាស្មារតីជាតិនិយម ឆន្ទៈមនសិកា ការរួបរួមសាមគ្គីគ្នានាថ្ងៃនេះ ប្រជាជនខ្មែរ សូមបង្ហាញ និងចែករំលែកទៅកាន់ពិភពលោកថា កម្ពុជាស្រលាញ់សន្តិភាព (Cambodia Love Peace Cambodia Needs Peace. Cambodia Wants Peace) ។

លោក គីម រិទ្ធី បានបន្ថែមថា ក្រោមការយកចិត្តទុកដាក់ខ្ពស់របស់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចធិបតី ហ៊ុន ម៉ាណែត ទោះបីស្ថិតក្នុងស្ថានភាពណាក៏ ដោយក៏សម្តេច តែងតែនៅរួមសុខទុក្ខជានិច្ចជាមួយប្រជាពលរដ្ឋ ពិសេសជាមួយនាយទាហាន នាយទាហានរង ពលទាហាន និងមិនអាចបំភ្លេចបាននូវ គុណូបការៈ និងការលះបង់ដ៏ធំធេងរបស់វីរៈយុទ្ធជនយើងឡើយ និងបាន ដោះស្រាយបញ្ហា ការលំបាក និងលើកកម្ពស់ជីវភាពរបស់យុទ្ធជន ជាមួយក្រុមគ្រួសារ ដែលនេះបានបង្ហាញពីឆ្លើយ តបទៅនឹងគុណបំណាច់មិនអាចកាត់ថ្លៃបាន របស់បងប្អូនយុទ្ធជនក្នុងបុព្វហេតុជូនប្រទេសជាតិមាតុភូមិ៕

ដោយ៖ជុន កុសល

The post ថ្នាក់ដឹកនាំខេត្តព្រះវិហារ ព្រះសង្ឃ និងជនភៀសសឹករាប់ពាន់អង្គ/នាក់ រួមគ្នាដង្ហែរក្បួនថ្មើជើងដើម្បីសន្ដិភាព appeared first on Kampuchea Thmey Daily.

លោកឃួង ស្រេង៖ សូមឱ្យពលរដ្ឋខ្មែរក្នុង និងក្រៅប្រទេស ចូលរួមជាមួយរាជរដ្ឋាភិបាល ដោយធានាថា ទឹកដីកម្ពុជា មិនបាត់មួយមីលីម៉ែត្រ ហើយក៏មិនត្រូវការទឹកដីអ្នកដទៃដែរ

កម្ពុជាថ្មី — Sun, 10 Aug 2025 11:51:34 +0000

លោក ឃួង ស្រេង អភិបាលរាជធានីភ្នំពេញ បានសូមឱ្យប្រជាពលរដ្ឋខ្មែរទាំងក្នុង និងក្រៅប្រទេស ចូលរួមជាមួយរាជរដ្ឋាភិបាល ហើយត្រូវមានទំនុកចិត្ត ក្រោមការដឹកនាំរបស់សម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត ដែលអាចធានាបានថា ទឹកដីកម្ពុជា មិនបាត់មួយមីលីម៉ែត្រ ហើយក៏មិនត្រូវការទឹកដីអ្នកដទៃ មួយមីលីម៉ែត្រដែរ ។

លោក ឃួង ស្រេងថ្លែងបែបនេះប្រាប់ក្រុមអ្នកសារព័ត៌មាន ក្នុងអំឡុងអញ្ជើញពិនិត្យ លើការរៀបចំការការពារ សន្តិសុខសណ្តាប់ធ្នាប់ ជូនគណៈសង្ឃនាយកកម្ពុជា ក្នុងដំណើរធម្មយាត្រាសន្តិភាព ដែលនិមន្តចេញដំណើរពីរមណីដ្ឋានប្រវត្តិសាស្រ្តវត្តភ្នំ ឆ្ពោះទៅ វិមានឯករាជ្យ នារសៀលថ្ងៃទី១០ ខែសីហា ឆ្នាំ២០២៥នេះ ។ លោក ឃួង ស្រេង បានគូសបញ្ជាក់ថា ក្បួនធម្មយាត្រាសន្តិភាព របស់គណៈសង្ឃនាយកកម្ពុជា ធ្វើឡើងដើម្បីបង្ហាញឱ្យអន្តរជាតិបានឃើញថា គ្រប់ភាគីពាក់ព័ន្ធទាំងអស់ នៅកម្ពុជា ទាំងព្រះសង្ឃ ទាំងគ្រហស្ថ ត្រូវការសន្តិភាព, ការរីកចម្រើន និងស្ថេរភាព ដោយមិនត្រូវការសង្គ្រាមឡើយ ។

លោក ឃួង ស្រេង អភិបាលរាជធានីភ្នំពេញ បានមានប្រសាសន៍លើកឡើងថា គណៈសង្ឃនាយក បានយល់ច្បាស់ថា សាសនា បានកើតឡើង ក្រោមដំបូងសន្តិភាព មានសន្តិភាព ទើបមានសាសនា ។ សាសនា នៅកម្ពុជា ត្រូវបានបាត់បង់ នៅក្នុងរបបប្រល័យពូជសាសន៍ ប៉ុល ពត ប៉ុន្តែបានកើតឡើងវិញ នៅក្រោយថ្ងៃ៧មករា ឆ្នាំ១៩៧៩ និងកំពុងរីកដុះដាល ដោយមានជំនឿពីពុទ្ធសាសនិកនៅកម្ពុជា ប្រមាណជាង៩០% ដែលប្រកាន់យ៉ាងខ្ជាប់ខ្ជួន នូវព្រះពុទ្ធសាសនា ខណៈដែលគ្រប់ទីវត្តអារាមទាំងអស់ កំពុងមានការរីកចម្រើន ។

លោក ឃួង ស្រេង បានបន្ថែមថា ព្រះសង្ឃ ក៏មានការភ័យខ្លាច ការបាត់បង់សន្តិភាព ធ្វើឱ្យប៉ះពាល់ដល់ព្រះពុទ្ធសាសនា ក៏ដូចជាប្រជាពលរដ្ឋពុទ្ធបរិស័ទ របស់ព្រះអង្គ ដូចនេះ ទើបគណៈសង្ឃនាយក បិណ្ឌបាតទៅរាជរដ្ឋាភិបាល សុំធ្វើធម្មយាត្រាសន្តិភាព សុំសន្តិភាព និងសុំការដោះលែងទាហាន ដែលមានអរិភាពជាមួយគ្នាកន្លងមកនេះ។ លោក ឃួង ស្រេង មានប្រសាសន៍ថា “ការធ្វើនេះ ដើម្បីបង្ហាញឱ្យអន្តរជាតិបានឃើញថា គ្រប់ភាគីពាក់ព័ន្ធទាំងអស់ នៅក្នុងព្រះរាជាណាចក្រកម្ពុជា ទាំងព្រះសង្ឃ ទាំងគ្រហស្ថ ទាំងសាសនិក ឬកាតូលិក ឥស្លាមសាសនា ដែលជាប្រជានុរាស្ត្រ នៃព្រះរាជាណាចក្រកម្ពុជា ត្រូវការសន្តិភាព ត្រូវការការរីកចម្រើន ត្រូវការការរស់នៅមួយ ដែលមានស្ថេរភាព ចឹងមិនត្រូវការសង្គ្រាមទេ” ។

បន្ថែមលើនេះ លោក ឃួង ស្រេង ជឿជាក់ថា ក្រោយមានអរិភាពនេះ ទូទាំងសកលលោក បានមើលឃើញច្បាស់ ពីប្រជាជនកម្ពុជា និងមើលឃើញច្បាស់ ពីការដឹកនាំរបស់សម្តេចទាំងទ្វេ គឺសម្តេចតេជោ-សម្តេចធិបតី ក្នុងកិច្ចការដឹកនាំ ដែលមិនជាអ្នកបង្កឱ្យមានបញ្ហា ជាមួយប្រទេសជិតខាងឡើយ តែផ្ទុយទៅវិញ មានតែអ្នកជិតខាងកម្ពុជានោះទេ ដែលធ្វើទង្វើមិនគោរពច្បាប់អន្តរជាតិ ។ ទោះជាយ៉ាងកម្ពុជា នៅតែមានជំនឿយ៉ាងមុតមាំថា យុត្តិធម៌នៅតែមានសម្រាប់កម្ពុជា៕

អត្ថបទ៖ ស្រីរ័ត្ន

The post លោកឃួង ស្រេង៖ សូមឱ្យពលរដ្ឋខ្មែរក្នុង និងក្រៅប្រទេស ចូលរួមជាមួយរាជរដ្ឋាភិបាល ដោយធានាថា ទឹកដីកម្ពុជា មិនបាត់មួយមីលីម៉ែត្រ ហើយក៏មិនត្រូវការទឹកដីអ្នកដទៃដែរ appeared first on Kampuchea Thmey Daily.

បញ្ហាវិវាទកម្ពុជា-ថៃ! សមាគមនាវាយុវជនអាស៊ីអាគ្នេយ៍ អំពាវនាវឱ្យគាំទ្រសន្តិភាព និងដោះស្រាយដោយសន្តិវិធី

Samean Lay — Sat, 26 Jul 2025 06:22:22 +0000

សមាគមនាវាយុវជនអាស៊ីអាគ្នេយ៍ ហៅកាត់ថា SIC សូមចូលរួមរំលែកទុក្ខយ៉ាងក្រៀមក្រំបំផុតចំពោះជនរងគ្រោះ ដែលបាត់បង់ជីវិតនិងរងផលប៉ះពាល់ដោយការប៉ះទង្គិចប្រដាប់អាវុធនាពេលថ្មីៗនេះ នៅតាមព្រំដែនកម្ពុជា-ថៃ និងអំពាវនាវឱ្យគាំទ្រសន្តិភាព ដោះស្រាយដោយសន្តិវិធី។ ការបាត់បង់អាយុជីវិតនិងការកើនឡើងនៃភាពតានតឹងរវាងប្រទេសទាំងពីរ គឺជាបញ្ហាដ៏គួរឱ្យព្រួយបារម្ភ។ នេះបើតាមសេចក្តីថ្លែងការណ៍របស់ SIC ចេញផ្សាយនៅថ្ងៃទី ២៦ កក្កដា ២០២៥។

តាមរយៈសេចក្តីថ្លែងការណ៍ គឺបានអំពាវនាវដល់សហគមន៍ SSEAYP និងយុវជនទាំងឡាយ គាំទ្រសន្តិភាព និងងាកមកដោះស្រាយដោយសន្តវិធី ។ សេចក្តីថ្លែងការណ៍បញ្ជាក់ថា៖« តាមរយៈការរួបរួមគ្នាជាធ្លុងមួយ យើងនឹងអាចឈានទៅបញ្ចប់ជម្លោះ ជំនួសមកវិញនូវស្ថិរភាព សន្តិភាព និងកិច្ចសហប្រតិបត្តិការក្នុងតំបន់»។

កញ្ញា អ៊ឹម រចនា ប្រធានសមាគមនាវាយុវជនអាស៊ីអាគ្នេយ៍ បានធ្វើការអំពាវនាវដល់សហគមន៍ SSEAYP នៅតំបន់អាស៊ាននិងជប៉ុន គាំទ្រសន្តិភាព ឯកភាព និងការចូលរួមក្នុងន័យស្ថាបនា នៅក្នុងបញ្ហាវិវាទរវាងកម្ពុជា និងថៃ។ កញ្ញាសង្កត់ធ្ងន់ថា៖«ពេលនេះ ជាងពេលណាៗទាំងអស់ យុវជនចាំបាច់ត្រូវប្ដេជ្ញាចិត្តរួបរួមគ្នាជាធ្លុងមួយ ដើម្បីឈានទៅបញ្ចប់ជម្លោះ ជំនួសមកវិញនូវស្ថិរភាព សន្តិភាព និងកិច្ចសហប្រតិបត្តិការក្នុងតំបន់»។

ជាសមាគមយុវជនដែលមានសមាជិកជាង ៦០០នាក់ និងមានបណ្ដាញយ៉ាងទូលំទូលាយនៅក្នុងតំបន់អាស៊ាននិងជប៉ុន, SIC បន្តលើកតម្កើងសន្តិភាព និងការគោរពគ្នាទៅវិញទៅមក។ SIC ជឿជាក់ថា សន្តិភាពពិតប្រាកដ ពិតជាអាចសម្រេចបានតាមរយៈគតិបណ្ឌិតក្នុងការដឹកនាំ និងការប្ដេជ្ញាចិត្តឥតងាករេក្នុងការដោះស្រាយវិវាទដោយសន្តិវិធី និងអនុលោមតាមច្បាប់អន្ដរជាតិ៕

The post បញ្ហាវិវាទកម្ពុជា-ថៃ! សមាគមនាវាយុវជនអាស៊ីអាគ្នេយ៍ អំពាវនាវឱ្យគាំទ្រសន្តិភាព និងដោះស្រាយដោយសន្តិវិធី appeared first on Kampuchea Thmey Daily.

លោក សែម រតនា៖ កម្ពុជា នៅតែបញ្ជូនទ័ពមួកខៀវទៅថែរក្សាសន្តិភាព ទោះជួបការប៉ះទង្គិចប្រដាប់អាវុធ ជំងឺកាចសាហាវ

Ngoeul Narath — Thu, 10 Jul 2025 09:57:56 +0000

ឧត្ដមសេនីយ៍ទោ សែម រតនា អនុប្រធានទី១គណៈកម្មការជាតិនិងជាអគ្គនាយកស្តីទីមជ្ឈមណ្ឌលជាតិរក្សាសន្តិភាព អះអាងថា រដ្ឋាភិបាលកម្ពុជា ដាក់ចេញកម្មវិធីនយោបាយជាអាទិភាព ក្នុងការបន្តបេសកកម្មរក្សាសន្តិភាពក្រោមឆត្រអង្គការសហប្រជាជាតិ ដើម្បីរួមចំណែកជាមួយសហគមន៍អន្តរជាតិ ស្វែងរកសន្តិភាពជូនប្រទេសដទៃលើពិភពលោក ដែលប្រជាជនកំពុងតែរងគ្រោះរងទុក្ខលំបាកព្រោះសង្គ្រាម។ ជាក់ស្ដែង បើទោះបីជាជួបការប៉ះទង្គិចប្រដាប់អាវុធ និងជំងឺកាចសាហាវ ក៏កម្ពុជា នៅតែបញ្ជូនកងទ័ពមួកខៀវក្នុងគោលដៅថែរក្សាសន្តិភាព និងមនុស្សធម៌។

ថ្លែងក្នុងពិធីជូនដំណើរកងទ័ពមួកខៀវកម្ពុជាប្ដូរវេនចំនួន២៤៤រូប ទៅបំពេញបេសកកម្មនៅអាហ្វ្រិកកណ្ដាល នាព្រឹកថ្ងៃទី១០ ខែកក្កដា នេះ ឧត្ដមសេនីយ៍ទោ សែម រតនា សង្កត់ធ្ងន់ដូច្នេះ៖« ទោះបីស្ថានការណ៍សន្តិសុខក្នុងតំបន់បេសកកម្ម ដែល កម្លាំងរក្សាសន្តិភាពកម្ពុជាឈរជើងបាន នឹងកំពុងប្រឈមជារៀងរាល់ថ្ងៃ ជាលក្ខណៈប្រពៃណីផង “Traditional Security” និងមិនប្រពៃណីផង “Non- Traditional Security” ដែលបង្កឡើងដោយតួអង្គមិនមែនរដ្ឋ ការ ប្រយុទ្ធប៉ះទង្គិចគ្នារវាង ក្រុមប្រដាប់អាវុធនានា ការវាយប្រហារ ពួនស្ទាក់ ឬគ្រោះថ្នាក់ដោយជំងឺឆ្លង និងជំងឺកាចសាហាវនានាក្តី ប៉ុន្តែរាជរដ្ឋាភិបាលកម្ពុជា នៅតែបន្តបរិច្ចាគកម្លាំងចូល រួមបេសកកម្មរក្សាសន្តិភាពអង្គការ សហប្រជាជាតិ ដើម្បីរួមវិភាគទានដល់កិច្ច ប្រឹងប្រែងរបស់សហគមន៍ អន្តរជាតិ ដើម្បីបុព្វហេតុសន្តិភាព សន្តិសុខ និងមនុស្សធម៌នៅលើសកលលោក។ »។

អនុប្រធានទី១ នៃគណៈកម្មការកិច្ចការបញ្ជូនកងកម្លាំងចូលរួមបេសកកម្មរក្សាសន្តិភាពអង្គការសហប្រជាជាតិ ឧត្ដមសេនីយ៍ទោ សែម រតនា ថែមទាំងអះអាងទៀតថា កម្ពុជា បានរួមវិភាគទានក្នុងបុព្វហេតុសន្តិភាព ស្ថិរភាព ចូលរួម ប្រយុទ្ធដោះស្រាយ បញ្ហាប្រឈមនានានៅលើពិភពលោក តាមរយៈការចូលរួមកិច្ចប្រជុំវេទិកានានា ទាំងក្នុងក្របខណ្ឌតំបន់ និង អន្តរជាតិ សំដៅចែករំលែកបទពិសោធន៍ និងរួមគ្នាដោះស្រាយបញ្ហាប្រឈមទាំងឡាយដែលពិភពលោកកំពុងជួបប្រទះ ដូចជា ប្រឆាំងនឹង ភេរវកម្ម ឧក្រិដ្ឋកម្មឆ្លងដែន ការប្រែប្រួលអាកាសធាតុ ការជួញដូរគ្រឿង ញៀន និងជំងឺឆ្លង ។ល។

បើតាមរបាយការណ៍របស់ ឧត្តមសេនីយ៍ឯក ហួត គឹមសាន្ត អគ្គនាយករង មជ្ឈមណ្ឌលជាតិរក្សាសន្តិភាព ឱ្យដឹងថារយៈពេល១៩ឆ្នាំ ចាប់ពីឆ្នាំ២០០៦ ដល់បច្ចុប្បន្នកម្ពុជា បានបញ្ជូនកងទ័ពមួកខៀវចំនួន១០ ១៩១នាក់ ក្នុងនោះនារីចំនួន៩៤៦នាក់ ចេញទៅទៅកាន់ប្រទេសចំនួន១០ ក្នុងតំបន់បេសកកម្មចំនួន១២ ដូចជា ស៊ូដង់ ស៊ូដង់ខាងត្បូង លីបង់ ឆាដ សាយប្រឺស ស៊ីរី ម៉ាលី អាហ្រិ្វកកណ្តាល យេមែន និងកុងហ្គោ លើជំនាញបោសសំអាតមីន អាវុធហត្ថ ពេទ្យកម្រិត២ កម្ទេចគ្រាប់មិនទាន់ផ្ទុះ វិស្វកម្មព្រលានយន្តហោះ វិស្វកម្មសំណង់ផ្តេក-បញ្ឈរ នាយទាហានសេនាធិការ និងសង្កេតការណ៍។

អ្នកសម្របសម្រួលអង្គការប្រជាជាតិប្រចាំកម្ពុជា Joseph Scheuer ចាត់ទុកសកម្មភាពរបស់កម្ពុជា ក្នុងការបន្តបញ្ជូនកងទ័ពមួកខៀវទៅថែរក្សាសន្តិភាព ជាពេលនេះ ថាជាការបញ្ជាក់ជាថ្មីនូវការប្តេជ្ញាចិត្តរបស់កម្ពុជាក្នុងការរក្សាស្មារតីនៃធម្មនុញ្ញអង្គការសហប្រជាជាតិ សន្តិភាព សេចក្តីថ្លៃថ្នូរ និងវិបុលភាពសម្រាប់ទាំងអស់គ្នា។

ក្នុងនាមអង្គការសហប្រជាជាតិ លោក Joseph Scheuer ក៏អំណរគុណចំពោះរាជរដ្ឋាភិបាលកម្ពុជា ចំពោះកិច្ចខិតខំប្រឹងប្រែងរបស់ខ្លួនក្នុងការជំរុញរបៀបវារៈសន្តិភាព និងសន្តិសុខ អន្តរជាតិ តាមរយៈការចូលរួមយ៉ាងសកម្ម បេសកកម្មរក្សាសន្តិភាព និងសន្តិសុខ និងការរួមចំណែកយ៉ាងសំខាន់ក្នុង របស់អង្គការសហប្រជាជាតិ។

គួរឱ្យដឹងដែរថា គិតមកដល់ឆ្នាំ២០២៥នេះ កងទ័ពមួកខៀវកម្ពុជាបានស្លាប់ចំនួន១៣រូប ខណៈអ្នកធ្លាប់រងរបួសមាន ១៦រូប អំឡុងពេលបំពេញបេសកកម្មនៅតាមតំបន់គោលដៅផ្សេងៗ៕

ដោយ៖ង៉ិល ណារ៉ាត់

The post លោក សែម រតនា៖ កម្ពុជា នៅតែបញ្ជូនទ័ពមួកខៀវទៅថែរក្សាសន្តិភាព ទោះជួបការប៉ះទង្គិចប្រដាប់អាវុធ ជំងឺកាចសាហាវ appeared first on Kampuchea Thmey Daily.

ទ័ពមួកខៀវ២៤៤រូប បញ្ចប់បេសកម្មរក្សាសន្តិភាពនៅអាហ្វ្រិកកណ្ដាលដោយជោគជ័យ និងវិលមកដល់កម្ពុជាដោយសុវត្ថិភាព

Ngoeul Narath — Thu, 10 Jul 2025 08:58:23 +0000

កងទ័ពមួកខៀវរបស់កម្ពុជាប្ដូរវេនចំនួន២៤៤រូប បានបញ្ចប់បេសកម្មរក្សាសន្តិភាពនៅអាហ្វ្រិកកណ្ដាលរយៈពេល១២ខែ ដោយជោគជ័យ និងបានធ្វើដំណើរមកដល់មាតុប្រទេសវិញដោយសុខសុវត្ថិភាព។ទន្ទឹមនឹងដំណើរវិលមកដល់ប្រទេសកម្ពុជារបស់កងទ័ពមួកខៀវទាំង២៤៤នាក់នាវេលាព្រឹកថ្ងៃនេះ កងទ័ពមួកខៀវចំនួន២៤៤នាក់ថ្មី ជាកងប្ដូរវេន នឹងត្រូវចេញដំណើរទៅបំពេញបេសកកម្មរក្សាសន្តិភាពនៅអាហ្រ្វិកកណ្ដាលបន្តទៀត។

អ្នកសម្របសម្រួលអង្គការសហប្រជាជាតិប្រចាំកម្ពុជាលោក Joseph Scheuer សម្តែងការដឹងគុណចំពោះការខិតខំប្រឹងប្រែង និងការលះបង់កងអនុសេនាធំវិស្វកម្មលេខ៤៨៦ ទាំង២៤៤នាក់ ក្នុងការចូលរួមជាកងទ័ពមួកខៀវ ដែលជាការចាប់ផ្តើមលើដំណើរដ៏លំបាក ប៉ុន្តែមានសារៈសំខាន់ និងក្លាយជារង្វាន់មួយ ដើម្បីជួយដល់សុខុមាលភាពប្រជាជននៃ សាធារណរដ្ឋអាហ្វ្រិកកណ្តាល។

អ្នកសម្របសម្រួលអង្គការប្រជាជាតិចាត់ទុកសកម្មភាពរបស់កម្ពុជា ក្នុងការបន្តបញ្ជូនកងទ័ពមួកខៀវទៅថែរក្សាសន្តិភាព ជាពេលនេះ ថាជាការបញ្ជាក់ជាថ្មីនូវការប្តេជ្ញាចិត្តរបស់កម្ពុជាក្នុងការរក្សាស្មារតីនៃធម្មនុញ្ញអង្គការសហប្រជាជាតិ សន្តិភាព សេចក្តីថ្លៃថ្នូរ និងវិបុលភាពសម្រាប់ទាំងអស់គ្នា។

ឧត្ដមសេនីយ៍ទោ សែម រតនា អនុប្រធានទី១ គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាព អះអាងថា ទោះបីស្ថានការណ៍សន្តិសុខក្នុងតំបន់បេសកកម្ម ដែល កម្លាំងរក្សាសន្តិភាពកម្ពុជាឈរជើងបាន នឹងកំពុងប្រឈមជារៀងរាល់ថ្ងៃ ជាលក្ខណៈប្រពៃណីផង “Traditional Security” និងមិនប្រពៃណីផង “Non- Traditional Security” ដែលបង្កឡើងដោយតួអង្គមិនមែនរដ្ឋ ការ ប្រយុទ្ធប៉ះទង្គិចគ្នារវាង ក្រុមប្រដាប់អាវុធនានា ការវាយប្រហារ ពួនស្ទាក់ ឬគ្រោះថ្នាក់ដោយជំងឺឆ្លង និងជំងឺកាចសាហាវនានាក្តី ប៉ុន្តែរាជរដ្ឋាភិបាល កម្ពុជា នៅតែបន្តបរិច្ចាគកម្លាំងចូល រួមបេសកកម្មរក្សាសន្តិភាពអង្គការ សហប្រជាជាតិ ដើម្បីរួមវិភាគទានដល់កិច្ច ប្រឹងប្រែងរបស់សហគមន៍ អន្តរជាតិ ដើម្បីបុព្វហេតុសន្តិភាព សន្តិសុខ និងមនុស្សធម៌នៅលើសកលលោក។

ក្នុងបុព្វហេតុរក្សាសន្តិភាពនៅលើសកលលោក ប្រទេសកម្ពុជា ឈរលំដាប់លេខរៀងទី២៨ ក្នុងចំណោម១១៩ប្រទេស ដែលបរិច្ចាគកងកម្លាំងទៅចូលរួមបេសកកម្មថែរក្សាសន្តិភាពក្រោមឆត្រអង្គការសហប្រជាជាតិ ចំណែកនៅក្នុងតំបន់អាស៊ាន កម្ពុជាឈរលេខរៀងទី៣ ក្នុងចំណោមប្រទេសដែលបរិច្ចាគកងកម្លាំងច្រើនជាងគេ។ បើនិយាយពីការបរិច្ចាគកងទ័ពមួកខៀវដែលជានារី កម្ពុជាឈលេខរៀងទី១៤ ក្នុងចំណោមប្រទេសទាំង១១៩ ដែលបរិច្ចាគកងទ័ពមួកខៀវ និងឈរលេខ២ នៅក្នុងតំបន់អាស៊ាន។ នេះបើតាមការអះអាងរបស់ឧត្តមសេនីយ៍ឯក ហួត គឹមសាន្ត អគ្គនាយករង មជ្ឈមណ្ឌលជាតិរក្សាសន្តិភាព។

តំណាងអង្គការសហប្រជាជាតិប្រចាំកម្ពុជា ចាត់ទុកការបង្កើនការចូលរួមរបស់ស្ត្រីកម្ពុជា ថាជាការនាំឱ្យប្រតិបត្តិការរក្សា សន្តិភាពកាន់តែមានប្រសិទ្ធភាព និងជំរុញឱ្យមានសន្តិភាពប្រកបដោយនិរន្តរភាព។ លោកក៏អរគុណជាថ្មីម្តងទៀតចំពោះកងរក្សាសន្តិភាពស្ត្រីទាំងអស់សម្រាប់ការលះ បង់របស់អ្នកចំពោះសន្តិភាពអន្តរជាតិ និងសម្រាប់ការធ្វើជាគំរូដ៏ថ្លៃថ្លា។

គួរឱ្យដឹងថា បើតាមរបាយការណ៍របស់ ឧត្តមសេនីយ៍ឯក ហួត គឹមសាន្ត អគ្គនាយករង មជ្ឈមណ្ឌលជាតិរក្សាសន្តិភាព ឱ្យដឹងថារយៈពេល១៩ឆ្នាំ ចាប់ពីឆ្នាំ២០០៦ ដល់បច្ចុប្បន្នកម្ពុជា បានបញ្ជូនកងទ័ពមួកខៀវចំនួន១០ ១៩១នាក់ ក្នុងនោះនារីចំនួន៩៤៦នាក់ ចេញទៅទៅកាន់ប្រទេសចំនួន១០ ក្នុងតំបន់បេសកកម្មចំនួន១២ ដូចជា ស៊ូដង់ ស៊ូដង់ខាងត្បូង លីបង់ ឆាដ សាយប្រឺស ស៊ីរី ម៉ាលី អាហ្រិ្វកកណ្តាល យេមែន និងកុងហ្គោ លើជំនាញបោសសំអាតមីន អាវុធហត្ថ ពេទ្យកម្រិត២ កម្ទេចគ្រាប់មិនទាន់ផ្ទុះ វិស្វកម្មព្រលានយន្តហោះ វិស្វកម្មសំណង់ផ្តេក-បញ្ឈរ នាយទាហានសេនាធិការ និងសង្កេតការណ៍៕