តាមសេចក្តីរាយការណ៍ JCS បាន​ឲ្យដឹង​ថា​​ យោធា​កូរ៉េខាងត្បូង​​បានរកឃើញមីស៊ីលដែលបាញ់ចេញពីតំបន់ Sunan នៅភាគខាងជើងនៅម៉ោងប្រហែល ១:២០ រសៀល។ វាជាការបាញ់មីស៊ីលផ្លោងលើកទីបីរបស់កូរ៉េខាងជើងនៅឆ្នាំនេះ។

JCS បាននិយាយថា មីស៊ីលទាំងនោះបានហោះប្រហែល ៣៥០ គីឡូម៉ែត្រ ដោយបន្ថែមថា ការវិភាគបន្ថែមកំពុងដំណើរការ។

JCS បានបន្ថែមថា៖​«ក្រោមឥរិយាបថការពាររួមគ្នាដ៏រឹងមាំរវាងកូរ៉េខាងត្បូង និងសហរដ្ឋអាមេរិក យោធារបស់យើងកំពុងតាមដានយ៉ាងដិតដល់នូវការ​វិវត្តន៍​ផ្សេងៗរបស់កូរ៉េខាងជើង ហើយរក្សាសមត្ថភាព និងឥរិយាបថដែលអាចឆ្លើយតបយ៉ាង​ខ្លាំងចំពោះការញុះញង់ណាមួយ»។

ការបាញ់បង្ហោះចុងក្រោយបំផុតនេះ បានកើតឡើង នៅពេលដែលកូរ៉េខាងត្បូង និងសហរដ្ឋអាមេរិកបានចាប់ផ្តើមសមយុទ្ធ Freedom Shield ប្រចាំឆ្នាំរបស់ពួកគេនៅថ្ងៃចន្ទ សម្រាប់រយៈពេល១១ថ្ងៃ។

កូរ៉េខាងជើងបានថ្កោលទោស​ចំពោះ​ការ​ធ្វើ​សមយុទ្ធយោធារួមគ្នារបស់សម្ព័ន្ធមិត្តជាយូរមកហើយថា ជាការហាត់សមសម្រាប់ការឈ្លានពាន ទោះបីជាទីក្រុងសេអ៊ូល និងទីក្រុងវ៉ាស៊ីនតោនបាននិយាយថា សមយុទ្ធទាំងនេះគឺត្រឹមតែ​ការពារខ្លួន​ប៉ុណ្ណោះ​ក៏ដោយ​​។

កាលពីដើមសប្តាហ៍នេះ លោកស្រី Kim Yo-jong ដែលជាប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង លោក Kim Jong-un បានថ្កោលទោសសមយុទ្ធយោធាដែលកំពុងបន្ត ហើយបានព្រមានអំពី «ផលវិបាកដ៏គួរឱ្យភ័យខ្លាចដែលមិនអាចនឹកស្មានដល់»​។

កូរ៉េខាងជើងក៏បានសាកល្បងមីស៊ីលយុទ្ធសាស្ត្រពីនាវាពិឃាត Choe Hyon ​ក្នុង​ប៉ុន្មានថ្ងៃ​មុន​នេះ ដោយមេដឹកនាំកូរ៉េខាងជើងបានគូសបញ្ជាក់ពីតម្រូវការក្នុងការរក្សា និងពង្រីក «ប្រព័ន្ធទប់ស្កាត់សង្គ្រាមនុយក្លេអ៊ែរដ៏មានឥទ្ធិពល និងអាចទុកចិត្តបាន»​។ នេះបើយោងតាមប្រព័ន្ធផ្សព្វផ្សាយរដ្ឋរបស់ទីក្រុងព្យុងយ៉ាង។

ការបាញ់មីស៊ីលចុងក្រោយរបស់កូរ៉េខាងជើងក៏បានកើតឡើងបន្ទាប់ពីនាយករដ្ឋមន្ត្រី Kim Min-seok បាននិយាយថា ប្រធានាធិបតីសហរដ្ឋអាមេរិក Donald Trump នៅតែមានភាពវិជ្ជមានអំពីការបន្តការសន្ទនាជាមួយមេដឹកនាំកូរ៉េខាងជើង ខណៈពេលដែលទុកពេលវេលាឱ្យបើកចំហ។

ការកត់សម្គាល់របស់នាយករដ្ឋមន្ត្រីបានកើតឡើងចំពេលមានការរំពឹងទុកថា លោក ត្រាំ អាចស្វែងរកការជួបជាមួយ​មេដឹកនាំ​កូរ៉េខាងជើង​​​ក្នុងអំឡុងពេលដំណើរទស្សនកិច្ចរបស់លោកទៅកាន់ប្រទេសចិនសម្រាប់កិច្ចប្រជុំកំពូលជាមួយប្រធានាធិបតីចិន លោក ស៊ី ជីនពីង (Xi Jinping)។ លោក ត្រាំ​ ត្រូវបានគេរាយការណ៍ថា មានគម្រោងធ្វើដំណើរទៅកាន់ប្រទេសចិនចាប់ពីចុងខែមីនាដល់ដើមខែមេសា៕​

សម្រូល​ រ៉ាន់ រើយ​

The post កូរ៉េខាងជើង​បាញ់​មីស៊ី​​​បាលិស្ទិក​១០គ្រាប់​ កំញើញ​សមយុទ្ធ​កូរ៉េខាងត្បូង​និង​អាមេរិក​ appeared first on Kampuchea Thmey Daily.

លោក គីម ជុងអ៊ុន បាននិយាយថា៖«ទីក្រុងព្យុងយ៉ាង និងទីក្រុងមូស្គូនៅពីក្រោយអ្នក។ អរគុណចំពោះការបូជា និងការលះបង់របស់អ្នក ភាពជាបងប្អូនខាងយោធា មិត្តភាព និងទំនាក់ទំនងសម្ព័ន្ធមិត្តដែលមិនអាចបំបែកបានរវាងកូរ៉េខាងជើង និងរុស្ស៊ីកំពុងពង្រឹង» ។

មេដឹកនាំកូរ៉េខាងជើងបានអំពាវនាវឱ្យទាហាននៃកងទ័ពប្រជាជនកូរ៉េ (KPA) រក្សាភាពក្លាហាន។

លោក​បាន​បន្ថែម​ថា​៖«​សម្រាប់​ប្រជាជន​រុស្ស៊ី​ជា​ភាតរភាព​ សម្រាប់​ស្មារតី​ខ្ពស់​និង​សេចក្តី​ថ្លៃថ្នូរ​របស់​ប្រជាជន​កូរ៉េ​ សម្រាប់​កិត្តិយស​រឹងមាំ​​នៃ​រដ្ឋ​របស់​យើង​»។

​មេដឹកនាំ​កូរ៉េខាងជើង បាន​បន្តថា៖«​តាងនាមបក្ស និងរដ្ឋរបស់​យើង​ ក្នុងនាមប្រជាពលរដ្ឋ​ មន្ត្រី​ និង​ នាយទាហានរងនៃកងទ័ពទាំងមូល ឪពុកម្តាយ ភរិយា និងកូន ខ្ញុំសូមគោរពជូនពរឆ្នាំថ្មី ដល់មេបញ្ជាការ និងយោធិននៃកងទ័ព​ទាំងអស់នៃប្រតិបត្តិការបរទេស ទោះបីជាពេលនេះ នៅពេលនេះ បងប្អូនកំពុងតស៊ូឆ្ងាយពីមាតុភូមិក៏ដោយ ប៉ុន្តែអ្នកតែងតែនៅជិតបេះដូងនៃបក្ស និងប្រជាជនយើង»​។

​លោក គឹម បាន​បន្តថា៖«ខ្ញុំមានអារម្មណ៍​​ចង់​ឲ្យ​ថាមពល​ខ្លាំង​ចំពោះអ្នក, សមមិត្ត, អ្នកត្រៀមខ្លួនប្រយុទ្ធពេញលេញនៅទីតាំង​ប្រយុទ្ធ​ឆ្ងាយនៅបរទេសតាមបទ​​​បញ្ជា​នៃមាតុភូមិ, សូម្បីតែនៅពេលនេះ នៅពេលដែលប្រទេសទាំងមូលស្ថិតក្នុងអារម្មណ៍រីករាយក្នុងឱកាសឆ្នាំថ្មី»។

លោក គីម ជុងអ៊ុន បានបង្ហាញក្តីសង្ឃឹមសម្រាប់កិច្ចប្រជុំដំបូងជាមួយទាហាន និងមន្រ្តី KPA ហើយបានជំរុញឱ្យពួកគេចងចាំពីសុវត្ថិភាពរបស់ពួកគេ។

តាមការចេញ​ផ្សាយ​របស់​ទីភ្នាក់ងារ​ព័ត៌មានរុស្ស៊ី នៅថ្ងៃទី១២ខែធ្នូ លោក ​គឹម ជុងអ៊ុន បាននិយាយថា ការចូលរួមរបស់កងទ័ពប្រជាជនកូរ៉េក្នុងការរំដោះតំបន់ Kursk ពី​ការ​កាន់​កាប់​របស់​អ៊ុយក្រែន បានសង្កត់ធ្ងន់លើស្ថានភាពរបស់កូរ៉េខាងជើងនៅ​លើ​ឆាក​ពិភពលោក។ កងវរសេនាធំវិស្វករទី ៥២៨ បានត្រឡប់ទៅកូរ៉េខាងជើងវិញ បន្ទាប់ពី​បាន​បំពេញ​បទបញ្ជា​ប្រយុទ្ធ​របស់​បក្ស​ពលករ​កូរ៉េ​នៅ​តំបន់ Kursk ក្នុងពេល​ជាមួយគ្នា។

កាលពីថ្ងៃទី២៩ ខែធ្នូ លោក Valery Gerasimov នាយកសេនាធិការ​ចម្រុះ​រុស្ស៊ី បាននិយាយថា ទាហានកូរ៉េខាងជើងបានផ្តល់ជំនួយដ៏អស្ចារ្យដល់កងទ័ពរុស្ស៊ីក្នុងអំឡុងពេលដោះមីននៅតំបន់ Kursk ។ កាលពីថ្ងៃទី ១៤ខែវិច្ឆិកា អ្នកនាំពាក្យប្រធានាធិបតីរុស្ស៊ី លោក Dmitry Peskov បាននិយាយថា ប្រទេសរុស្ស៊ីមានអំណរគុណចំពោះវិស្វករ​ទីវាលរបស់កូរ៉េខាងជើងសម្រាប់ការជួយដោយមិនគិតតែពីខ្លួនឯង និងវីរភាពរបស់ពួកគេ។ នៅរដូវក្តៅឆ្នាំ២០២៤ រុស្ស៊ី និងកូរ៉េខាងជើងបានចុះហត្ថលេខាលើកិច្ចព្រមព្រៀងភាពជាដៃគូយុទ្ធសាស្ត្រដ៏ទូលំទូលាយមួយដែលមានឃ្លាស្តីពីជំនួយទៅវិញទៅមកក្នុងករណីមានការវាយប្រហារប្រដាប់អាវុធលើភាគីណាមួយ៕

រ៉ាន់ រើយ​

The post ​គីម ជុងអ៊ុន ផ្ញើសារ​ជូនពរឆ្នាំថ្មី​ដ៏រំជើបរំជួល​​ដល់​ទាហាន​កូរ៉េខាងជើង​នៅ​រុស្ស៊ី​ appeared first on Kampuchea Thmey Daily.

តាមការ​ចេញ​ផ្សាយ​របស់​រ៉យទ័រ នេះជាលើកទីមួយហើយ ដែល​សាធារណរដ្ឋប្រជាធិបតេយ្យប្រជាមានិត​កូរ៉េ (ឬ​ហៅខ្លី​ថា​កូរ៉េ​ខាងជើង) បាន​បញ្ជូនមន្ត្រី​ជាន់​ខ្ពស់​ពីទីក្រុងព្យុងយ៉ាង ដើម្បីថ្លែងសុន្ទរកថានៅ​ក្នុងកិច្ចប្រជុំប្រចាំឆ្នាំរបស់មេដឹកនាំពិភពលោកសម្រាប់មហាសន្និបាត​អង្គការ​សហប្រជាជាតិ ចាប់តាំងពីរដ្ឋមន្ត្រីការបរទេសរបស់ប្រទេសនេះបានធ្វើដំណើរទៅចូល​រួម​ថ្លែង​សុន្ទរកថា​ចុងក្រោយ​​នៅ​ទីក្រុងញូវយ៉កក្នុងឆ្នាំ២០១៨​​។

លោក Kim បានថា៖​«ការដាក់​ការរំសាយអាវុធនុយក្លេអ៊ែរ» លើកូរ៉េខាងជើង គឺស្មើនឹងការទាមទារឱ្យវាចុះចាញ់អធិបតេយ្យភាព និងសិទ្ធិក្នុងការរស់នៅ និងរំលោភលើរដ្ឋធម្មនុញ្ញ។ ​យើង​នឹង​មិន​បោះបង់​អធិបតេយ្យភាព បោះបង់​សិទ្ធិ​រស់រានមានជីវិត និង​បំពាន​រដ្ឋធម្មនុញ្ញ​ឡើយ​»​។

លោកបាននិយាយថា “ដោយសារ​​​ការ​ទប់ស្កាត់សង្រ្គាម​ជាក់ស្តែង​ដែល​​ជំរុញ​​របស់រដ្ឋរបស់យើងនៅក្នុងសមាមាត្រដោយផ្ទាល់ទៅនឹងការគំរាមកំហែងនៃការឈ្លានពានរបស់សហរដ្ឋអាមេរិក និងសម្ព័ន្ធមិត្តរបស់គេ​​ ឆន្ទៈរបស់រដ្ឋសត្រូវក្នុងការបង្កសង្គ្រាមត្រូវបាន​ទប់​ស្កាត់​​​ពេញលេញ​​ ហើយតុល្យភាពនៃអំណាចនៅលើឧបទ្វីបកូរ៉េត្រូវបានធានា»​។

ប្រធានាធិបតីអាមេរិក លោក ដូណាល់ ត្រាំ បាននិយាយកាលពីខែមុនថា លោកចង់ជួបមេដឹកនាំកូរ៉េខាងជើង លោក គីម ជុងអ៊ុន​ ជាថ្មី​ទៀត​​នៅឆ្នាំនេះ។ ចាប់តាំងពីការឡើងកាន់តំណែងនៅខែមករារបស់ប្រធានាធិបតី ដូណាល់ ត្រាំ ​ប្រធានាធិបតី​កូរ៉េ​​ខាងជើង លោក គីម ជុងអ៊ុន បានព្រងើយកន្តើយនឹងការអំពាវនាវម្តងហើយម្តងទៀតរបស់លោក ​​ត្រាំ ចង់​​បង្កើត​ឡើង​ឡើងវិញនូវទំនាក់ទំនងការទូតផ្ទាល់ដែលគាត់បានបន្តក្នុងអំឡុងពេលអាណត្តិ ២០១៧-២០២១ របស់គាត់ ដែលមិនមានកិច្ចព្រមព្រៀងដើម្បីបញ្ឈប់កម្មវិធីនុយក្លេអ៊ែររបស់កូរ៉េខាងជើង​នោះ​ទេ​​។

​​ក្រោយ​សង្គ្រាម​​​​ផ្ទុះ​នៅ​​​ប្រទេសអ៊ុយក្រែន​​កាល​​​ដើមឆ្នាំ​២០២២ ​ដោយ​សារតែ​​​​ប្រធានាធិបតី​​រុស្ស៊ី​​លោក វ៉្លាឌីមៀរ ពូទីន បាន​សម្រេ​ច​​​ចិត្តឲ្យ​បើក​ប្រតិបត្តិការ​​យោធា​​ពិសេស​ចូល​លុកលុយ​អ៊ុយក្រែន ពិភពលោក​​​​បាន​ងាក​ទៅ​រក​ការ​រត់ប្រណាំង​សព្វាវុធ​​​វិញ ដោយ​បញ្ច​ប់កិច្ច​ខិតខំ​ប្រឹងប្រែង​​​ជាច្រើនទសវត្សរ៍​ដើម្បី​រំសាយ​​អាវុធ​ ជាពិសេស​អាវុធ​មហាប្រល័យ​​នុយក្លេអ៊ែរ៕

រ៉ាន់ រើយ​

The post ​កូរ៉េខាងជើង​ថា ការ​បោះ​បង់​កម្មវិធី​នុយក្លេអ៊ែរ ​​ជា​ការ​ចុះ​ចាញ់​ appeared first on Kampuchea Thmey Daily.

តាមរយៈវីដេអូដែលចេញផ្សាយកាលពីថ្ងៃចន្ទទី២៨ខែមេសាឆ្នាំ២០២៥ គេឃើញទាហានកូរ៉េខាងជើងពាក់ឯកសណ្ឋានយោធារុស្ស៊ី កំពុងហ្វឹកហាត់ការវាយឆ្មក់ ការបោសសម្អាតលេណដ្ឋាន ការពារបន្ទាយ បាញ់ស៊ីប និងការប្រឆាំងទៅដ្រូនអត្តឃាតរបស់សត្រូវនៅឯទីលានហ្វឹកហាត់ក្នុងខេត្ត Kursk។

ទាហានទាំងនោះក៏មានកាន់កាំភ្លើង AK-12, កាំភ្លើងយន្ត RPK-74, កាំភ្លើងប្រឆាំងរថក្រោះ RPG-7,  កាំភ្លើងស៊ីប SVD, កាំភ្លើងខ្លីពាក់កណ្តាលស្វ័យប្រវត្តិនិងគ្រាប់បែកដៃផងដែរ។

មុននេះ កាសែតរដ្ឋកូរ៉េខាងជើង​ Rodong Sinmun បានចុះផ្សាយនៅទំព័រមុខតែម្តង ដោយបញ្ជាក់ពីការទទួលស្គាល់ជាផ្លូវការថា កូរ៉េខាងជើង ពិតជាបញ្ជូនទ័ពទៅជួយរុស្ស៊ី ប្រយុទ្ធនឹងកងកម្លាំងអ៊ុយក្រែន នៅក្នុងសង្គ្រាមមែន ខណៈការបញ្ជូននេះ ត្រូវបានបញ្ជាដោយមេដឹកនាំ គីម ជុងអ៊ុន ផ្ទាល់តែម្តង។

ក្នុងសេចក្តីថ្លែងការណ៍ដែលចុះផ្សាយដោយកាសែតខាងលើ, គណបក្សពលករកូរ៉េខាងជើង បានចាត់ទុកការដាក់ពង្រាយនោះថា ជាការបង្ហាញអំពីមិត្តភាពសកម្មប្រយុទ្ធដ៏រឹងមាំកម្រិតខ្ពស់បំផុតរវាងកូរ៉េខាងជើងនិងរុស្ស៊ី។

ក្រោយមក វិមានក្រឹមឡាំង ក៏បញ្ជាក់​ថា រុស្ស៊ី​បាន​ត្រៀមផ្តល់ជំនួយយោធាដល់កូរ៉េខាងជើងវិញ ប្រសិនបើចាំបាច់ ស្របតាមកិច្ចព្រមព្រៀងភាពជាដៃគូយុទ្ធសាស្ត្រដែលបានចុះហត្ថលេខារវាងប្រជាជាតិទាំងពីរក្នុងខែវិច្ឆិកា​ឆ្នាំ​២០២៤។

អ្នកនាំពាក្យវិមានក្រឹមឡាំងលោក Dmitry Peskov សង្កត់ធ្ងន់ថា កិច្ចព្រមព្រៀងនេះ មានកាតព្វកិច្ច​​តម្រូវ​ឲ្យ​ប្រទេសទាំងពីរផ្តល់ការគាំទ្រគ្នាទៅវិញទៅមក ក្នុងគ្រាចាំបាច់។ ការចូលរួមរបស់ទាហានកូរ៉េខាងជើងក្នុងកិច្ចខិតខំប្រឹងប្រែងរបស់រុស្ស៊ី ដើម្បីដណ្តើមយកមកវិញនូវតំបន់ព្រំដែន Kursk បានបង្ហាញ​ច្បាស់​អំពីប្រសិទ្ធភាពនៃកិច្ចព្រមព្រៀងភាពជាដៃគូយុទ្ធសាស្ត្រ​នេះ។

របាយការណ៍កន្លង​មក បង្ហាញថា ទាហានកូរ៉េខាងជើងប្រហែល ១០ ០០០​ ទៅ​ ១២ ០០០​នាក់ត្រូវបានដាក់ពង្រាយ ដោយ​ក្នុង​នោះ​មាន​ស្លាប់​និងរបួស​​ប្រហែល ៤ ០០០​នាក់។ ជាការតបស្នងវិញ រុស្ស៊ី បានផ្គត់ផ្គង់សព្វាវុធដល់កូរ៉េខាងជើង ដោយបង្កើនការព្រួយបារម្ភក្នុងចំណោមមន្ត្រីអាមេរិក និងកូរ៉េខាងត្បូងអំពីការផ្ទេរបច្ចេកវិទ្យាយោធាដែលមានសក្តានុពល ដែលអាចបង្កើនសមត្ថភាពនុយក្លេអ៊ែររបស់ទីក្រុងព្យុងយ៉ាង៕

សូមទស្សនាវីដេអូ៖

អត្ថបទ៖ សុខ សុវណ្ណ

ចុចអាន៖ អន្តរជាតិប្រតិកម្មខ្លាំងៗ ក្រោយកូរ៉េខាងជើង ទទួលស្គាល់ បញ្ជូនទ័ពទៅជួយច្បាំងរុស្ស៊ី

The post រុស្ស៊ី ដាច់ចិត្ត ទម្លាយវីដេអូនៃការហ្វឹកហ្វឺនទ័ពកូរ៉េខាងជើង  appeared first on Kampuchea Thmey Daily.

ការទទួលស្គាល់នេះ ត្រូវបានកាសែតរដ្ឋកូរ៉េខាងជើង​ Rodong Sinmun ចុះផ្សាយនៅទំព័រមុខតែម្តង នៅថ្ងៃចន្ទទី២៨ខែមេសាឆ្នាំ២០២៥។

ក្នុងសេចក្តីថ្លែងការណ៍ដែលចុះផ្សាយដោយកាសែតខាងលើ, គណបក្សពលករកូរ៉េខាងជើង បានចាត់ទុកការដាក់ពង្រាយនោះថា ជាការបង្ហាញអំពីមិត្តភាពសកម្មប្រយុទ្ធដ៏រឹងមាំកម្រិតខ្ពស់បំផុតរវាងកូរ៉េខាងជើងនិងរុស្ស៊ី។

ការទទួលស្គាល់នេះកើតឡើងពីរថ្ងៃបន្ទាប់ពីរុស្ស៊ី សរសើរទាហានកូរ៉េខាងជើង ដែលជួយឲ្យកងទ័ពរុស្ស៊ី វាយរំដោះបានតំបន់ Kursk ពីកងកម្លាំងអ៊ុយក្រែន។

អំឡុងពេលរាយការណ៍អំពីប្រតិបត្តិការនៅសមរភូមិទៅកាន់ប្រធានាធិបតីរុស្ស៊ី វ្ល៉ាឌីមៀរ ពូទីន កាលពីថ្ងៃសៅរ៍ទី២៦ខែមេសាឆ្នាំ២០២៥ អគ្គសេនាធិការ Valery Gerasimov បានលើកសរសើរអំពីការរួមចំណែករបស់ទាហានកូរ៉េខាងជើង ដោយអះអាងថា កងទ័ពកូរ៉េខាងជើង បានបង្ហាញពីការតស៊ូនិងវីរភាព ដោយឈរប្រកៀកស្មាជាមួយកងកម្លាំងរុស្ស៊ី។ 

ពាក់ព័ន្ធការចូលរួមរបស់កងទ័ពកូរ៉េខាងជើងនេះ លោក Gerasimov អះអាងថា ទ័ពកូរ៉េខាងជើងកំពុងចូលរួមក្នុងការរំដោះតំបន់ Kursk របស់រុស្ស៊ី ក្រោមកិច្ចព្រមព្រៀងភាពជាដៃគូយុទ្ធសាស្ត្រគ្រប់ជ្រុងជ្រោយរវាងទីក្រុងមូស្គូនិងព្យុងយ៉ាង ដែលបានចូលជាធរមានកាលពីខែធ្នូឆ្នាំមុន។ សន្ធិសញ្ញានេះគឺផ្តល់ជំនួយយោធាទៅវិញទៅមក ក្នុងករណីមានការវាយប្រហារ។

តាមការប៉ាន់ស្មានពីមន្ត្រីអ៊ុយក្រែន, កូរ៉េខាងជើងបានបញ្ជូនទាហានប្រហែល ១១ ០០០ នាក់ទៅប្រទេសរុស្ស៊ី រួមទាំងទ័ពជំនួយបន្ថែម ៣ ០០០នាក់ទៀត។ ដ្បិតដំបូងឡើយ ទ័ពកូរ៉េខាងជើង ពិបាកប្រយុទ្ធដោយសារតែខ្វះបទពិសោធន៍ក្នុងសង្គ្រាមទំនើបជាពិសេសសង្គ្រាមដែនអាកាសក៏ដោយ ប៉ុន្តែពួកគេសម្របខ្លួនបានល្អទៅនឹងលក្ខខណ្ឌនៅលើដី៕

អត្ថបទ៖ សុខ សុវណ្ណ

ចុចអាន៖ រុស្ស៊ី សរសើរទ័ពកូរ៉េខាងជើង ដែលជួយខ្លួនរំដោះបានតំបន់ Kursk 

The post ទីបំផុត កូរ៉េខាងជើង ទទួលស្គាល់ថា ខ្លួនពិតជាបញ្ជូនទ័ព ទៅជួយរុស្ស៊ី មែន appeared first on Kampuchea Thmey Daily.

យោងតាមមន្ត្រីដែលនិយាយក្នុងលក្ខខណ្ឌមិនបញ្ចេញឈ្មោះ បានឲ្យដឹងថា ក្នុងចំណោមទាហានប្រមាណ១១០០០ នាក់​ដែលបានបញ្ជូនពីកូរ៉េខាងជើង មាន៤០០០ នាក់បានរងគ្រោះក្នុងសមរភូមិ។ ទាហានរងគ្រោះទាំងនោះមាន​ស្លាប់ របួស បាត់​ខ្លួន ឬ​ចាប់​ខ្លួន។ ក្នុងចំណោម​៤០០០នាក់ មាន ប្រហែល១០០០នាក់បានស្លាប់នៅក្នុងសង្គ្រាមគិតត្រឹមពាក់កណ្តាល​ខែមករា ខណៈអ្នករងរបួសគេមិនដឹងថាកំពុងសម្រាកព្យាបាលនៅកន្លែងណានោះទេ។

តួលេខនេះចង្អុលបង្ហាញពីការចំណាយដ៏ខ្ពស់មិនធម្មតារវាងសម្ព័ន្ធមិត្តរបស់ប្រធានាធិបតី វ្ល៉ាឌីមៀ ពូទីន គឺលោក គីម ជុងអ៊ុន ខណៈដែលលោកព្យាយាមជួយរុស្ស៊ីក្នុងការបណ្តេញកងកម្លាំងអ៊ុយក្រែនចេញពីប្រទេសរុស្ស៊ី មុនពេលការចរចាបទឈប់បាញ់ដែលអាចកើតមាននៅឆ្នាំក្រោយ។

កងទ័ពកូរ៉េខាងជើងមកពីអង្គភាព «វរជន» ហៅថា Storm Corps ហាក់ដូចជាត្រូវបានបោះចូលទៅក្នុងការប្រយុទ្ធជាមួយនឹងការហ្វឹកហ្វឺនតិចតួចប៉ុណ្ណោះ។ អតីតមេបញ្ជាការរថក្រោះរបស់កងទ័ពអង់គ្លេស លោក Col Hamish de Bretton-Gordon បាននិយាយថា៖«កងទ័ពទាំងនេះគឺជាកងទ័ពដែលមិនសូវត្រូវបានបណ្តុះបណ្តាល និងដឹកនាំដោយមន្រ្តីរុស្ស៊ី ដែលពួកគេមិនយល់»។

ជាមូយគ្នានេះរបាយការណ៍ដែលជាការស៊ើបការណ៍សម្ងាត់របស់កូរ៉េខាងត្បូង ប្រជាជនកូរ៉េខាងជើងមិនទាន់បានត្រៀមខ្លួនសម្រាប់សង្គ្រាមសម័យទំនើបនោះទេ ហើយហាក់ដូចជាងាយរងគ្រោះដោយយន្តហោះគ្មានមនុស្សបើករបស់អ៊ុយក្រែន (FPV) ជាដើម។

ទោះបីជាបែបនេះក៏ដោយ មេបញ្ជាការយោធាកំពូលរបស់អ៊ុយក្រែន លោកឧត្តមសេនីយ៍ Oleksandr Syrskyi បានព្រមានកាលពីដើមសប្តាហ៍នេះថា ទាហានកូរ៉េខាងជើងកំពុងបង្កបញ្ហាយ៉ាងធ្ងន់ធ្ងរដល់ទាហានអ៊ុយក្រែននៅជួរមុខ។ទាហាកូរ៉េខាងជើងមានច្រើនណាស់ពី១១០០០ ទៅ​១២០០០ នាក់ដែលមានកម្លាំងចិត្តខ្ពស់ និងបានរៀបចំយ៉ាងល្អនិងកំពុងធ្វើសកម្មភាពវាយលុក និងប្រតិបត្តិការដោយផ្អែកលើយុទ្ធសាស្ត្រសូវៀត៕

អត្ថបទ៖ ប៊ុន សុភាព

The post ត្រឹមរយៈពេល៣ខែ ទាហានកូរ៉េខាងជើង​១០០០​នាក់​ស្លាប់​ក្នុងសង្គ្រាមជាមួយអ៊ុយក្រែន appeared first on Kampuchea Thmey Daily.

ដោយសម្អាងលើប្រភពពីចារកម្មកូរ៉េខាងត្បូង សមាជិកសភាលោក Lee Seong-kweun បានប្រាប់ទៅក្រុមអ្នកសារព័ត៌មានថា «ទាហានកូរ៉េខាងជើង ដែលបញ្ជូនទៅជួយប្រយុទ្ធរុស្ស៊ីតទល់ជាមួយអ៊ុយក្រែន បើបូករួមទាំងស្លាប់និងរបួសគឺកើនលើស ៣ ០០០នាក់ហើយ ដោយក្នុងនោះស្លាប់ប្រហែល៣០០នាក់ និងរបួស ២ ៧០០នាក់»។

អ្វីដែលគួរឲ្យកត់សម្គាល់គឺលោកបាននិយាយថា ទាហានទាំងនោះ ត្រូវគេបញ្ជាឲ្យធ្វើអត្តឃាត ជាជាងការដែលត្រូវទ័ពអ៊ុយក្រែន ចាប់យកទៅធ្វើជាឈ្លើយសឹក។ ជាពិសេស គេបានរកឃើញកំណត់ហេតុលើសពទាហានកូរ៉េខាងជើង ដែលសរសេរថា ពួកគេត្រូវតែបំផ្ទុះគ្រាប់បែកឲ្យស្លាប់ខ្លួនឯង មុនពេលត្រូវគេចាប់បានទៀតផង។

ស្របពេលជាមួយគ្នានោះ សមាជិកសភាដដែលបញ្ជាក់ថា កត្តាដែលនាំឲ្យទាហានកូរ៉េខាងជើងស្លាប់ច្រើន គឺដោយសារតែពួកគេមិនសូវយល់អំពីសង្គ្រាមសម័យទំនើប និងត្រូវបានរុស្ស៊ីប្រើប្រាស់។

យ៉ាងណាក្តី ការលើកឡើងទាំងប៉ុន្មានខាងលើនេះ គេមិនទាន់ធានាទេថាតើវាជាការពិតមែនឬក៏អត់?

ការអះអាងនេះ កើតឡើងបន្ទាប់ពីប្រធានាធិបតីអ៊ុយក្រែន លោក វ្ល៉ាឌីមៀរ ហ្សេលេនស្គី ប្រកាសចាប់បានទាហានកូរ៉េខាងជើង២នាក់នៅសមរភូមិ ហើយស្នើសុំដោះដូរពួកគេជាមួយឈ្លើយសឹកអ៊ុយក្រែន នៅក្នុងប្រទេសរុស្ស៊ី។

លោកហ្សេលេនស្គី បង្ហោះសារលើប្រព័ន្ធផ្សព្វផ្សាយសង្គមថា «ចំពោះទាហានកូរ៉េខាងជើង ដែលមិនចង់វិលទៅប្រទេសវិញទេនោះ យើងនឹងមានជម្រើសផ្សេង ប៉ុន្តែនរណាដែលចង់បានសន្តិភាពតាមរយៈការលាតត្រដាងការពិតអំពីសង្គ្រាមនេះ យើងនឹងទុកឱកាសឲ្យ»។

ឆ្នាំមុនទាំងអ៊ុយក្រែននិងកូរ៉េខាងត្បូងសុទ្ធតែអះអាងថា កូរ៉េខាងជើងបានបញ្ជូនទ័ព ១០ ០០០នាក់ទៅជួយប្រយុទ្ធឲ្យរុស្ស៊ី ប៉ុន្តែមួយលើកជាពីរលើក ទីក្រុងមូស្គូតែងបដិសេធថា ព័ត៌មាននេះគឺមិនពិតឡើយ៕

អត្ថបទ៖ សុខ សុវណ្ណ

ចុចអាន៖ អ៊ុយក្រែន ចាប់បានទាហានកូរ៉េខាងជើង២នាក់ យកទៅ សុំដោះដូរជាមួយឈ្លើយសឹកនៅ រុស្ស៊ី

The post កូរ៉េខាងត្បូង អះអាងថា ទ័ពកូរ៉េខាងជើង ៣០០នាក់ស្លាប់ និង ២ ៧០០នាក់របួស នៅអ៊ុយក្រែន appeared first on Kampuchea Thmey Daily.

តាមការចុះផ្សាយរបស់ BBC, អ៊ុយក្រែន ចាប់បានទាហានទាំង២នាក់នេះកាលពីថ្ងៃទី៩ខែមករាឆ្នាំ២០២៥ ប៉ុន្តែឥឡូវពួកគេត្រូវបញ្ជូនទៅកាន់ទីក្រុង កៀវ ដើម្បីព្យាបាលរបួស។

ជុំវិញបញ្ហានេះ លោកហ្សេលេនស្គី បានបង្ហោះសារលើប្រព័ន្ធផ្សព្វផ្សាយសង្គមថា «ចំពោះទាហានកូរ៉េខាងជើង ដែលមិនចង់វិលទៅប្រទេសវិញទេនោះ យើងនឹងមានជម្រើសផ្សេង ប៉ុន្តែនរណាដែលចង់បានសន្តិភាពតាមរយៈការលាតត្រដាងការពិតអំពីសង្គ្រាមនេះ យើងនឹងទុកឱកាសឲ្យ»។

ទន្ទឹមនោះ ចារកម្មអ៊ុយក្រែន (SBU) បញ្ជាក់ថា ពេលអ្នកទាំងពីរត្រូវចាប់បាន មានម្នាក់កាន់កាតយោធារុស្ស៊ី ឈ្មោះមនុស្សផ្សេង ដែលចុះបញ្ជីនៅសាធារណរដ្ឋ Tuva រីឯម្នាក់ទៀត មិនមានឯកសារអ្វីទាំងអស់ ហើយពួកគេចេះនិយាយតែភាសាកូរ៉េប៉ុណ្ណោះ។ 

តាមការឲ្យដឹងពី SBU, ដោយមានជំនួយបកប្រែពីភាគីកូរ៉េខាងត្បូង ខ្លួនបានសួរចម្លើយទាហានទាំងពីរ ហើយម្នាក់ដែលមានកាន់កាតយោធារុស្ស៊ីនោះ បាននិយាយថា គាត់កើតក្នុងឆ្នាំ២០០៥ និងបម្រើក្នុងជួរកងទ័ពកូរ៉េខាងជើង ជាទ័ពកាំភ្លើងវែង តាំងពីឆ្នាំ២០២១មក។ 

យ៉ាងណា ទាហានម្នាក់ទៀតនិយាយមិនកើតទេព្រោះរបួសថ្គាម ប៉ុន្តែបានផ្តល់ចម្លើយដោយការសរសេរ ហើយអ៊ុយក្រែងជឿថា គាត់កើតក្នុងឆ្នាំ១៩៩៩ បម្រើក្នុងជួរកងទ័ពកូរ៉េខាងជើង ជាអ្នកបាញ់ស៊ីបចាប់តាំងពីឆ្នាំ២០១៦មក។

ពាក់ព័ន្ធបញ្ហានេះដែរ សារព័ត៌មានអន្តរជាតិជាច្រើន មិនទាន់ហ៊ានធានាឡើយ ចំពោះការអះអាងរបស់អ៊ុយក្រែន។

សូមបញ្ជាក់ជាថ្មី ឆ្នាំមុនទាំងអ៊ុយក្រែននិងកូរ៉េខាងត្បូងសុទ្ធតែអះអាងថា កូរ៉េខាងជើងបានបញ្ជូនទ័ព ១០ ០០០នាក់ទៅជួយប្រយុទ្ធឲ្យរុស្ស៊ី ហើយក្រោយមក សហរដ្ឋអាមេរិក ក៏ប្រកាសថា កងកម្លាំង​កូរ៉េ​ខាង​ជើងស្លាប់ច្រើនណាស់នៅក្នុងសមរភូមិ៕

អត្ថបទ៖ សុខ សុវណ្ណ

ចុចអាន៖ អាមេរិក៖ កូរ៉េ​ខាង​ជើង កំពុង​ទាញ​បទ​ពិសោធន៍​សង្គ្រាម​នៅ​អ៊ុយក្រែន ដើម្បី​ប្រឆាំង​ប្រទេស​ជិត​ខាង

The post អ៊ុយក្រែន ចាប់បានទាហានកូរ៉េខាងជើង២នាក់ យកទៅ សុំដោះដូរជាមួយឈ្លើយសឹកនៅ រុស្ស៊ី appeared first on Kampuchea Thmey Daily.