ទីកន្លែងសក្ការៈ Archives - Kampuchea Thmey Daily

បារមីអណ្តូងទិព្វមិនចេះរីងស្ងួត នៅតំបន់ប្រាសាទបាគូ កន្លែងដ៏ស័ក្ដិសិទ្ធិសម្រាប់ប្រជាពលរដ្ឋខ្មែរ

Sorn Phanith — Fri, 27 May 2022 00:00:00 +0000

បារមីអណ្ដូងទិព្វ ដែលមិនចេះរីងស្ងួត នៅតំបន់ប្រាសាទគូ ជាមរតកដូនតាសម័យដើមជាជំនឿដ៏ស័ក្ដិសិទ្ធិសម្រាប់ប្រជាពលរដ្ឋ រស់នៅភូមិឃុំកំភុន ស្រុកសេសាន ខេត្តស្ទឹងត្រែង បាននាំគ្នាទៅសុំទឹកអណ្តូង ដើម្បីយកមកលប់លាងមុខមាត់ ប្រោះព្រំកូនចៅ ផ្ទះសម្បែងទៅតាមសាសាប្រពៃណីផ្នែកព្រហ្មញ្ញសាសនា ដែលធ្លាប់ធ្វើពីដើមតរៀងមក។

លោក ខាំ មិញធី ប្រជាពលរដ្ឋនៅឃុំកំភុន បានបញ្ជាក់ថា ជារៀងរាល់ឆ្នាំព្រះសង្ឃ រួមទាំងប្រជាពលរដ្ឋរស់នៅក្នុងស្រុកសេសាន តែងតែប្រារព្ធពិធីធ្វើបុណ្យ នៅប្រសាទបាគូ បងប្អូនប្រជាពលរដ្ឋមានជំនឿថា ការសុំទឹកមន្តពីបារមីប្រាសាទបាគូទៅប្រើប្រាស់ តាមទម្លាប់រៀងៗខ្លួន ដែលគិតថា បានផ្តល់នូវសេចក្តីសុខសប្បាយ ដល់កូនចៅមានសុខភាពជានា គោក្របីគ្មានជំងឺឈឺថ្កាត់ ការងារធ្វើស្រែចម្ការទទួលបានភោគផលច្រើន សម្រាប់ទទួលទានមានបាន។ លោកបន្តថា តាមទម្លាប់នេះ អាជ្ញាធរព្រះសង្ឃ និងពុទ្ធបរិស័ទជិតឆ្ងាយបានមកនាំគ្នាប្រតិបត្តិបែបនេះជារៀងរាល់ឆ្នាំ ព្រោះពួកគាត់និយមថា បារមីបានផ្តល់នូវសេចក្តីសុខ ដោយសារប្រជាពលរដ្ឋឈឺគ្រុនបានមកបែរបន់ ហើយបានធូរស្រាលមកវិញ។ ទឹកអណ្ដូងទិព្វបុរាណនេះ យើងដងយកទៅផ្ទះ ស្រោចកូនក្មេងយើងងូតទឹក ងូតអី ដាក់ទៅដល់ផ្ទះ យើងដាក់ក្នុងថូមួយចាក់ទឹកធម្មតា យើងចាក់ចូលទៅទុកហើយចាក់ចូលគ្នា ចាំកូនចៅ ងូតទៅ បាត់ឈឺ។

ព្រះតេជគុណ វី សុភ័ក្រ ចៅអធិការវត្តហាងខូសួនសង្កត់សាគ្គី មានសង្ឃដីការថា ការធ្វើបែបនេះមានន័យថា ប្រជាពលរដ្ឋយើងបានប្រកាន់ភ្ជាប់នូវជំនឿពីដូនតាយើងមក ព្រោះការនាំគ្នាមកប្រារព្ធពិធីបុណ្យស្រង់ប្រសាទបាគូ មានប្រយោជន៍បានរួមគ្នាថែរក្សានូវមរតកដូនតា ដែលបានបន្សល់ទុកពីដើមតរៀងមក។ ព្រះតេជគុណ ចៅអធិការ មានសង្ឃដីការបន្ថែមថា ដើម្បីឲ្យមានភាពរីកចម្រើនដល់ផ្នែកសាសនាផង យើងបន្តសាមគ្គីគ្នាប្រមូលនូវថវិកាតាមសទ្ធាជ្រះថ្លា ដើម្បីសាងសង់ជាសមិទ្ធផលជាទីសក្ការផ្សេងៗនៅតំបន់នេះ ព្រោះសមិទ្ធផលមួយចំនួនយើងបានស្ថាបនាហើយមកដែរ។

លោក ឈឹម សារឿន អតីតប្រធានការិយាល័យធម្មការស្រុក បានគាំទ្រការផ្តួចផ្តើមសាងសង់កន្លែងទីសក្ការនៅទីនេះ ព្រោះនៅពេលសាងសង់ហើយ យើងបានអភិរក្ស និងគ្រប់គ្រងប្រាសាទបាគូនេះបានត្រឹមត្រូវ ហើយបើមានបងប្អូនសប្បុរសជននានា និងផ្សេងទៀតមានសទ្ធាចង់មកកសាងអ្វីនៅក្នុងតំបន់នេះក៏បានទៅតាមសំណូមពរ។

សូមបញ្ជាក់ថា តំបន់នេះមានវត្ថុបុរាណបន្សល់ទុកតាំងពីសម័យដើមមកមែនដូចជា ទីទួលប្រាសាទបាគូ, សំណាកថ្មធំៗ, ទីកន្លែងបួងសួងសុំកូន, បួងសួងសុំឱ្យរកឃើញរបស់របរវិញ, អណ្ដូង ៩ តឹកមិនរីងត្រជាក់ដូចទឹកអម្រឹត, រណ្តៅកំណប់មាសកែវកងជាដើម៕

អត្ថបទ៖ ងិនលីម

The post បារមីអណ្តូងទិព្វមិនចេះរីងស្ងួត នៅតំបន់ប្រាសាទបាគូ កន្លែងដ៏ស័ក្ដិសិទ្ធិសម្រាប់ប្រជាពលរដ្ឋខ្មែរ appeared first on Kampuchea Thmey Daily.

លោកតាវ័យ៧២ឆ្នាំ ទម្លាយអាថ៌កំបាំង នៅពីក្រោយការដាំដុះ បានផលដូចក្តីប្រាថ្នា តាមរយៈជំនឿអរូបី

Sorn Phanith — Wed, 23 Dec 2020 03:53:40 +0000

រហូតដល់បច្ចុប្បន្ននេះ ជំនឿលើលោកតាខ្វាក់នៅតែមាន សូម្បីអ្នករស់នៅតំបន់លិចទឹកព្រៃរនាម ក្នុងស្រុកឯកភ្នំជាច្រើនអ្នក ក៏នាំគ្នាបន្តប្រកាន់លើជំនឿអរូបីដ៏ស័ក្ដិសិទ្ធិរបស់(លោកតាខ្វាក់)មុនផ្តើមប្រកបមុខរបរធ្វើស្រែឬដាំដំណាំផ្សេងៗ ដើម្បីឲ្យបានផលដូចក្តីរំពឹងទុក តាមការបែរបន់របស់អ្នកភូមិ។

លោកតា សាំង សាន អាយុ៧២ឆ្នាំ រស់នៅក្នុងភូមិស្តីក្រោម ឃុំព្រែកហ្វួង ស្រុកសង្កែ ខេត្តបាត់ដំបង នៅរសៀលថ្ងៃទី២២ ខែធ្នូ ឆ្នាំ២០២០នេះ បានរៀបរាប់ឲ្យដឹងថា លោកតាដឹងក្តីនៅអាយុប្រមាណជាង១០ឆ្នាំ ដែលលោកតាបានចងចាំនិងឃើញលទ្ធផលជាក់ស្តែង តាមរយៈជំនឿ១នេះ ខណៈគ្រួសាររបស់លោកតាតែងតែបានទិន្នផលពីផលដំណាំផ្សេងៗ តាមក្តីរំពឹងទុក ដែលបានបន់ស្រន់គោរពនូវដឹងគុណចំពោះបារមីរបស់(លោកតាខ្វាក់)។ លោកតាបានបន្តថា មុននឹងលោកតាបន្តវេនលើជំនឿនេះ ឪពុកម្តាយរបស់លោកតាមុននឹងធ្វើកិច្ចការងារប្រកបមុខរបរដាំដុះដំណាំធ្វើស្រែឬចម្ការផ្សេងៗជានិច្ចកាល តែងតែបន់ស្រន់រំលឹកគុណសុំការអនុញ្ញាតពីលោកតាខ្វាក់ ដើម្បីសុំឲ្យលោកបើកផ្លូវជួយដល់កូនចៅ បានសម្រេចរាល់ភារកិច្ចលើផលដំណាំផ្សេងៗបានភោគផលច្រើន ដើម្បីទ្រទ្រង់ជីវភាពកូនចៅប្រចាំថ្ងៃនោះនឹងបានដូចក្តីបំណងហើយ។

ដោយលោកតា លើកយកដំណាំមួយប្រភេទ បញ្ជាក់ពីការពិតកាលពីអំឡុងឆ្នាំកន្លងទៅថ្មីៗនេះ គឺ ដំណាំឪឡឹក ខណៈលោកតាមុននឹងដាំ លោកតាបានបួងសួងនឹកគុណដល់បារមីរបស់លោកតាខ្វាក់ សុំឲ្យបានភោគផលច្រើននៅឆ្នាំនោះ ហើយផលឪឡឹកបានហុចច្រើនមែនលក់បានក្នុងមួយហិកតាចំនួន១០លានរៀល ដូចការបែរបន់យ៉ាងពិតប្រាកដមែន។ ក្រោយបានផលដូចបំណងលោកតា ក៏បានសែនជូនដល់បារមីលោកតាខ្វាក់ ដែលបានសន្យាមានដូចជា ចេក ស្រា និងជ្រូកខ្វៃដោយថ្វាយលោកតាខ្វាក់តាមការកំណត់ឬសន្យា។

ប្រភពពីអ្នកភូមិមួយផ្សេងទៀត ទាក់ទិននឹងភាពស័ក្ដិសិទ្ធិរបស់លោកតាខ្វាក់បានរៀបរាប់ថា កាលពីអំឡុងជិត៧០ឆ្នាំមុន គាត់បានឮឪពុកម្តាយនិយាយតំណាលថា ពួកគាត់បានដើរចូលទៅក្នុងព្រៃ ដើម្បីកាប់ឈើក៏បានជួបប្រទះជាមួយហ្វូងសត្វដំរី១ហ្វូងហើយដំរីនោះ ក៏បានដេញពួកគាត់រត់ព្រាតជាមួយគ្នា ដោយសារតែភ័យពេក គាត់ក៏បាននាំគ្នាស្រែកខ្លាំងៗបួងសួងដល់លោកតាខ្វាក់ឲ្យជួយដេញដំរីនិងបញ្ចៀសនូវគ្រោះកាចនេះ ស្រាប់តែភ្លាមៗនោះ ហ្វូងដំរីបានឮឈ្មោះលោកតាខ្វាក់ក៏នាំគ្នាដើរចេញពីពួកគាត់អស់តែម្តងទៅ។ ការដំណាលខាងលើនេះ នៅខណៈដែលកាលណោះឈ្មោះលោកតា(ស្តើង)បាននាំគ្រួសារទៅលេងបងប្អូននៅតំបន់ខាងលើនេះ ហើយបានដេកចំកន្លែង ដែលអ្នកភូមិហៅថា ជាកន្លែងផ្លូវរបស់ព្រលឹងហ្វូងដំរី ដែលមានអ្នកតាកាន់ហើយ ពេលអ្នកភូមិប្រាប់ហើយតែតាស្តើង ដែលទៅលេងសាច់ញាតិនៅភូមិខាងលើមិនជឿហើយបែរជានិយាយចំអកថា គាត់កំពុងតែរកជើងដំរីធ្វើប្រអប់ស្លាមិនបានផងលុះព្រឹកឡើង តាស្តើងបានស្លាប់ទាំងមិនសមហេតុផលនៅក្នុងមុងតែម្តងទៅ ធ្វើឲ្យអ្នកភូមិមានការសោកស្ដាយនឹងកាន់តែមានជំនឿថែមទៀតរហូតដល់បច្ចុប្បន្ន។

ប្រភពដដែលបន្តរឿង១ទៀតថា នៅក្នុងអំឡុងឆ្នាំមួយកន្លងទៅមុន លោកចុះភ្ជួររាស់ធ្វើស្រែលោកបានបន់ស្រន់ដល់លោកតាខ្វាក់ថា ឆ្នាំនេះបើធ្វើស្រូវកើតល្អចំណេញប្រាក់ច្រើនលោកនឹងសង់ស្ពានមួយឆ្លងកាត់ប្រឡាយ ដើម្បីងាយស្រួលដល់បងប្អូនប្រជាពលរដ្ឋក្នុងភូមិ បានឆ្លងកាត់ទៅមកផង ហើយកាលណោះទិន្នផលស្រូវរបស់គាត់ ក៏បានសម្រេចដូចការចង់បានមែន រួចហើយលោកក៏បាននាំគ្នាសាងសង់ឈើមួយ ដែលបន្សល់ទុករហូតដល់បច្ចុប្បន្ននេះតែម្តង។

លោកតា សាំង សាន្ត បន្តបន្ថែមថា បើទោះបីជំនឿអរូបីខាងលើបានកើតមានលើប្រជាជននៅតំបន់ដែនទឹកព្រៃរនាមពេញបន្ទុកយ៉ាងណាក៏ដោយចុះ ក៏គាត់មិនដែលបានឃើញរូបសំណាករបស់អ្នកតាខ្វាក់ឲ្យបានច្បាស់លាស់នៅឡើយទេ។ ខណៈបច្ចុប្បន្ននេះ បានដឹងនិងឃើញត្រឹមតែវិញ្ញាណលោកតាខ្វាក់មកស្ថិតចូលរូបមីងឈ្មោះ(រ៉ើន)នៅភូមិបាក់រទេះ ដែលត្រូវជាមីងរបស់លោកតាតែប៉ុណ្ណោះ ហើយសម័យកាលបច្ចុប្បន្ននេះ អ្នកស្រុកបានត្រឹមតែគូររូបលើដុំថ្មនិងដុំឈើ ដែលមានទម្រង់ជាមនុស្ស ហើយយកជាតំណាងលោកតាខ្វាក់នៅតាមទីកន្លែងផ្សេងៗគ្នាដូចជា នៅក្នុងបរិវេណផ្ទះ លើដីទីទួល ក្រោមដើមឈើធំៗឬនៅតាមជ្រុងដីចម្ការរៀងៗខ្លួនជាដើម សម្រាប់បួងសួងមុនពេលផ្តើមប្រកបធ្វើស្រែចម្ការឬបន់ស្រន់នៅពេលកូនចៅឈឺថ្កាត់ម្តងៗ ផងដែរ៕

អត្ថបទ៖ សៅ សារិទ្ធ

សូមចុចអាន៖ ស្អាងភ្នំបង្កប់រឿងអាថ៌កំបាំង អ្នកស្រុកទាំងព្រហ្មញសាសនា និងព្រះពុទ្ធសាសនា គោរពបូជាតៗគ្នា

The post លោកតាវ័យ៧២ឆ្នាំ ទម្លាយអាថ៌កំបាំង នៅពីក្រោយការដាំដុះ បានផលដូចក្តីប្រាថ្នា តាមរយៈជំនឿអរូបី appeared first on Kampuchea Thmey Daily.

វត្តឈើខ្មៅ ក្រៅពីក្លាយជាគោលដៅទេសចរណ៍សាសនានិងវប្បធម៌ ក៏មានបារមីស័ក្ដិសិទ្ធិផងដែរ

Sorn Phanith — Thu, 10 Dec 2020 04:38:07 +0000

បច្ចុប្បន្នវត្តឈើខ្មៅនៅក្រោមក្រសែភ្នែកភ្ញៀវទេសចរណ៍ជាតិ ក៏ដូចជាអន្តរជាតិ មើលឃើញថា ជាវត្តមានបារមីស័ក្ដិសិទ្ធិ ក្នុងចំណោមវត្តទាំង១០ ដែលបានដាក់បញ្ចូលជាគោលដៅទេសចរណ៍សាសនានិងវប្បធម៌ ដែលវត្ត១នេះ ឋិតលើដែនទឹកបឹងទន្លេសាបខេត្តបាត់ដំបង មានអាយុកាលជាង១៣០ឆ្នាំមកហើយ។

លោកព្រឹទ្ធាចារ្យ សោម លន ដែលជាអតីតព្រះសង្ឃកាលពីវ័យក្មេង ក្នុងព្រះវិហារវត្តឈើខ្មៅ ហើយបច្ចុប្បន្នព្រឹទ្ធាចារ្យរូបនេះ មានអាយុ៨១ឆ្នាំ បានរៀបរាប់ប្រាប់ឲ្យដឹងកាលពីរសៀលថ្ងៃទី៩ ខែធ្នូ ឆ្នាំ២០២០កន្លងមកនេះថា វត្តឈើខ្មៅមានទីតាំងឋិតនៅក្នុងភូមិកោះជីវាំង ឃុំព្រៃចាស់ ស្រុកឯកភ្នំ ខេត្តបាត់ដំបង ហើយវត្តនេះ ត្រូវបានព្រះគ្រូចៅអធិកាវត្ត ជំនាន់មុនៗសាងសង់ឡើងនៅលើដីទួល ហាក់ដូចជាកោះអណ្តែតទឹកដូច្នោះដែរ បើទោះបីទឹកឡើងខ្ពស់ប៉ុណ្ណា ក៏វត្តមួយនេះ មិនដែលលិចលង់ទេ។

លោកព្រឹទ្ធាចារ្យ សោម លន

ព្រឹទ្ធាចារ្យបន្តថា កាលពីជាង១០០ឆ្នាំមុន នៅលើដីទួលដ៏ពូកែស័ក្ដិសិទ្ធិនេះ មានដើមឈើខ្មៅមួយដើមដុះខ្ពស់ត្រដែតលេចធ្លោខ្ពស់ជាងគេ ក្នុងចំណោមដើមឈើជាច្រើនទៀត ក្នុងតំបន់ទីទួលនោះ ទើបប្រជាពលរដ្ឋហៅតៗគ្នាថា(វត្តឈើខ្មៅ)រហូតរៀងមក។ ប្រជាពលរដ្ឋ ដែលមានវ័យចំណាស់ៗនៅទីនោះ ក៏មានមតិប្រហាក់ប្រហែលព្រឹទ្ធាចារ្យផងដែរថា វត្តឈើខ្មៅនេះ កាលពីសម័យមុនក្រៅពីមានបារមីពូកែស័ក្ដិសិទ្ធិ ក៏មានព្រះគ្រូព្រះនាម(សឿ)ជាចៅអធិការវត្ត ក៏មានរឹទ្ធិខ្លាំងពូកែផងដែរ ដែលកាលនោះកងទ័ពបារាំងសេសមានគ្នាមួយកប៉ាល់ចង់ដឹង ហើយក៏មានបំណងមកបៀតបៀនលើវត្តឈើខ្មៅផងដែរ ខណៈដែលបារាំងសេសមានបំណងបែបនេះ ហើយទំនងព្រះគ្រូ(សឿ)បានដឹងជាមុនលោក ក៏បានឈានជើងឡើងលើកប៉ាល់ធ្វើឲ្យកប៉ាល់របស់បារាំសេសនោះផ្អៀងរកកលលិចលង់ ក៏ធ្វើឲ្យកងទ័ពបារាំងភ័យបាក់ស្បាតខ្លបខ្លាចរត់បាតជើងសព្រាតតែម្តង។

លោកតាក៏បានបន្តថា ទំនងជាជាប់រឿងរ៉ាវខាងលើនេះឯង ទើបបច្ចុប្បន្នមានភ្ញៀវទេសចរណ៍ជាច្រើនជាតិសាសន៍ពិសេសភ្ញៀវជនជាតិបារាំង បានចាប់អារម្មណ៍ចូលមកទស្សនាកម្សាន្តជាមធ្យមចាប់ពី៥០ទៅ១០០នាក់ ប៉ុន្តែចុងក្រោយនេះ ដោយសារជំងឺផ្លូវដង្ហើមថ្មី បានធ្វើឲ្យចំនួនភ្ញៀវធ្លាក់ទាបទៅវិញមួយរយៈ។

មន្ត្រីនៃមន្ទីរទេសចរណ៍ខេត្ត ក៏បានបញ្ជាក់ផងដែរថា ព្រះវិហារវត្តពិជ័យលង្កា័រហៅវត្តឈើខ្មៅកាលពីកន្លងមកនេះ ក៏ត្រូវបានមន្ទីរនិងក្រសួងទេសចរណ៍រៀបចំដាក់បញ្ចូលក្នុងចំណោមវត្តទាំង១០ជាគោលដៅទេសចរណ៍បែបសាសនានិងវប្បធម៌ផងដែរ ដែលមានអាយុកាល១៣១ឆ្នាំ ហើយខេត្តបាត់ដំបងរយៈពេល១០ខែដើមឆ្នាំ២០២០នេះ មានភ្ញៀវទេសចរណ៍សរុបចំនួន៤៤៨,២១៩នាក់ ក្នុងនោះភ្ញៀវជាតិមានចំនួន៤១៦,០៦២នាក់ និងភ្ញៀវអន្តរជាតិមានចំនួន៣២,១៥៧នាក់៕

អត្ថបទ៖ សៅ សារិទ្ធ

សូមចុចអាន៖ ទីសក្ការបូជាល្បីៗ ដែលពុទ្ធបរិស័ទខ្មែរតែងមានជំនឿល្បីថា ពូកែស័ក្ដិសិទ្ធ!

The post វត្តឈើខ្មៅ ក្រៅពីក្លាយជាគោលដៅទេសចរណ៍សាសនានិងវប្បធម៌ ក៏មានបារមីស័ក្ដិសិទ្ធិផងដែរ appeared first on Kampuchea Thmey Daily.

ទីសក្ការបូជាល្បីៗ ដែលពុទ្ធបរិស័ទខ្មែរតែងមានជំនឿល្បីថា ពូកែស័ក្ដិសិទ្ធ!

Sonya — Sat, 21 Nov 2020 04:12:26 +0000

ជំនឿតាំងពីដូនតានៅតែមានឥទ្ធិពលមកលើផ្នត់គំនិតខ្មែរ និងធ្វើឱ្យមនុស្សជាច្រើនចង់ចូលមកកម្ពុជាដើម្បីទស្សនាទីសក្ការៈដ៏ល្បីទំាងនេះ។
Kpt Plus នឹងបង្ហាញជូនទីកន្លែងសក្ការបូជាចំនួន ៧ ដែលល្បីល្បាញនៅក្នុងប្រទេសកម្ពុជាយើងមកដល់សព្វថ្ងៃនេះ។

១. វត្តភ្នំ

ដូចយើងបានដឹងស្រាប់ថាវត្តភ្នំដែលជាឈ្មោះនិងជានិមិត្តរូបនៃរាជធានីភ្នំពេញ ស្ថិតនៅលើកំពូលកូនភ្នំសិប្បនិម្មិតមានកម្ពស់ ២៧ ម៉ែត្រដ៏ល្បីល្បាញមួយ នៅភាគឦសាន្តនៃរាជធានី។ហើយក៏ជាទីសក្ការបូជាដ៏ល្បីល្បាញនិងពូកែស័ក្តិសិទ្ធសម្រាប់បងប្អូនប្រជាជនខ្មែរយើងគ្រប់រូប។ ជាពិសេសអ្នកបន់ស្រន់រកគូព្រេងក៏ពូកែស័ក្ដិសិទ្ធផងដែរ។ តិចថា អត់ដឹង!

២. ព្រះអង្គដងកើ

ទីសក្ការស្ថិតនៅក្បែរមាត់ទន្លេចតុមុខមួយនេះ ប្រជាជនយើងមានជំនឿខ្លាំងណាស់ មិនថាអ្នកតូចអ្នកធំមកពីណាសុទ្ធតែសំចតមកទីនេះ ដើម្បីបួងសួងសុំសេចក្ដីសុខក្នុងក្រុមគ្រួសារ និងប្រកបមុខរបររកស៊ីមានបាន កាក់កប អ្នកខ្លះជំពាក់បំណុលគេសងរួចរាល់ និងបញ្ហាផ្សេងៗ ទៀតជាច្រើន។

៣. ព្រះអង្គចេក ព្រះអង្គចម

អ្នកនៅសៀមរាបប្រាកដជាស្គាល់ទីសក្ការបូជាដ៏ធំនេះមិនខានទេ មិនត្រឹមតែស្ថិតនៅចំកណ្ដាលក្រុងសៀមរាបទេ ព្រះអង្គចេក ព្រះអង្គចមគឺជាទីសក្ការបូជាដែលខ្មែរយើងតែងមានជំនឿតាំងពីយូរលង់ណាស់មកហើយ។ ទីកន្លែងល្បីល្បាញមួយនេះ សូម្បីតែជនបរទេសក៏ទៅបន់ស្រន់សុំសេចក្ដីសុខផងដែរ។

៤. ភ្នំព្រះរាជទ្រព្យ

ទឹកដីឧដុង្គនៃខេត្តកំពង់ស្ពឺ គឺជាទីកន្លែងបូជាដែលមានព្រះពុទ្ធរូបជាច្រើនអង្គព្រមទាំងជំនឿនៃសាសនារបស់ដូនតាខ្មែរពីដើម។ ទីកន្លែងសក្ការមួយនេះល្បីថាពូកែស័ក្តិសិទ្ធ បន់ស្រន់អីតែងបានដូចក្ដីប្រាថ្នាហើយថែមទាំងជាកន្លែងដែលមានខ្យល់អាកាសបរិសុទ្ធថែមទៀតផង។

៥. លោកយាយយ៉ាតនៅប៉ៃលិន

បារមីលោកយាយយ៉ាត សក្ដិសិទ្ធិណាស់ ល្បីល្បាញនៅខេត្តប៉ៃលិនបួងសួងអ្វីតែងសម្រេចក្ដីប្រាថ្នា។ ពិសេសប្រជាពលរដ្ឋ រស់នៅខេត្តប៉ៃលិន ដែលគេតែងមានជំនឿទៅលើបារមីលោកយាយយ៉ាត ហើយក៏កំពុងតែល្បីរន្ទឺ ទូទាំងប្រទេសកម្ពុជា ថែមទាំងល្បីតៗ គ្នារហូតដល់ឯនាយសមុទ្រថែមទៀតផង។

៦. ពុទ្ធគិរីកម្ពុជា

មានទីតាំងនៅស្ថិតនៅខេត្តកណ្ដាល ទីកន្លែងសក្ការបូជាមួយនេះគឺល្បីថាសាកសិទ្ធនិងមានព្រះពុទ្ធរូបដល់ទៅ៨៤០០០អង្គ។ អ្នកដំណើរដែលឆ្លងកាត់ទីនេះគឺមិនដែលអាក់ខានក្នុងការចូលទៅបន់ស្រន់កន្លែងល្បីល្បាញមួយនេះឡើយ។ តិចអត់ស្គាល់គ្នាយើង ជិតៗជាយក្រុងយើងនេះទេ!

៧. លោកយាយម៉ៅពេជ្រនិល

ជាប់នៅជើងភ្នំពេជ្រនិលដែលគេស្គាល់គ្រប់គ្នា អ្នកដំណើរណាដែលឆ្លងកាត់តែងចូលទៅបន់ស្រន់សុំក្ដីសុខ ទើបធ្វើឱ្យកិត្តិនាមលោកយាយម៉ៅបានល្បីរន្ទឺកាន់តែខ្លាំងឡើងមកដល់សព្វថ្ងៃនេះ។ ជាពិសេសនៅរៀងរាល់ថ្ងៃបុណ្យចូលឆ្នាំចិន ចូលឆ្នាំខ្មែរប្រពៃណីជាតិ រដូវភ្ជុំបិណ្ឌ ថ្ងៃសៅរ៍ និងថ្ងៃអាទិត្យ មានភ្ញៀវជាតិ អន្តរជាតិចូលមកបន់ស្រន់លោកយាយម៉ៅដ៏ច្រើន ស្ទើរតែរកកន្លែងចតយានយន្តមិនកើត ។

តោះកុំគិតយូរ ចង់បានសេចក្ដីសុខចម្រើនកើតមានដល់ក្រុមគ្រួសារទៅកុំខាន! ជាពិសេសអ្នកដែលមានជំនឿក្នុងព្រះពុទ្ធសាសនាតាំងពីដើមរាងមក។ អ្នកគ្មានគូយូរខែឆ្នាំ អាចនឹងមានឆាប់ៗ បើសិនទៅស្អែកនេះដើម្បីបន់ស្រន់ ៕

អត្ថបទ៖ សាង ស្រីល័ក្ខ

ចុចអាន៖ វត្ថុ៥នេះ មិនអាចទុកក្នុងផ្ទះមនុស្សឆ្នាំមមែបានជាដាច់ខាត

ចុចអាន៖ ដឹងថា ក្នុងដើមឬស្សីមានគជ់មានតម្លៃដែរទេ?

The post ទីសក្ការបូជាល្បីៗ ដែលពុទ្ធបរិស័ទខ្មែរតែងមានជំនឿល្បីថា ពូកែស័ក្ដិសិទ្ធ! appeared first on Kampuchea Thmey Daily.

ទីកន្លែងសក្ការៈ Archives - Kampuchea Thmey Daily

បារមីអណ្តូងទិព្វមិនចេះរីងស្ងួត នៅតំបន់ប្រាសាទបាគូ កន្លែងដ៏ស័ក្ដិសិទ្ធិសម្រាប់ប្រជាពលរដ្ឋខ្មែរ

វត្ត​ឈើខ្មៅ ​ក្រៅពី​ក្លាយ​ជា​គោលដៅ​ទេសចរណ៍​សាសនា​និង​វប្បធម៌ ​ក៏​មាន​បារមី​ស័ក្ដិសិទ្ធិ​ផង​ដែរ​

ទី​សក្ការ​បូជា​ល្បីៗ​ ​ដែល​ពុទ្ធបរិស័ទ​ខ្មែរ​តែង​មាន​ជំនឿល្បីថា ពូកែ​ស័ក្ដិ​សិទ្ធ​!

វត្តឈើខ្មៅ ក្រៅពីក្លាយជាគោលដៅទេសចរណ៍សាសនានិងវប្បធម៌ ក៏មានបារមីស័ក្ដិសិទ្ធិផងដែរ

ទីសក្ការបូជាល្បីៗ ដែលពុទ្ធបរិស័ទខ្មែរតែងមានជំនឿល្បីថា ពូកែស័ក្ដិសិទ្ធ!