ទីក្រុងប៉េកាំង Archives - Kampuchea Thmey Daily

ទឹកជំនន់នៅទីក្រុងប៉េកាំងប្រទេសចិនឆក់យកជីវិតមនុស្ស៣០នាក់

Bun sopheap — Tue, 29 Jul 2025 04:38:26 +0000

យ៉ាងហោចណាស់មនុស្ស ៣០នាក់បានស្លាប់ និងរាប់ម៉ឺននាក់ត្រូវជម្លៀសចេញ ដោយសារទឹកជំនន់ និងភ្លៀងធ្លាក់ខ្លាំងនៅទីក្រុងប៉េកាំង ដោយអ្នកស្លាប់ភាគច្រើននៅ Miyun និង Yanqing ដែលជាសង្កាត់ព្រៃភ្នំរបស់រដ្ឋធានីប្រទេសចិន។ នេះបើយោងតាមការចេញផ្សាយរបស់ទីភ្នាក់ងារព័ត៌មានReuters នៅថ្ងៃទី២៩ខែកក្កដា។

ការបំផ្លាញពីទឹកជំនន់(រូបភាព៖ Reuters)

ភ្លៀងធ្លាក់ខ្លាំងចាប់តាំងពីចុងសប្តាហ៍បាននាំមកនូវទឹកភ្លៀងរហូតដល់ ៥៤៣មីលីម៉ែត្រ នៅក្នុងតំបន់មួយចំនួន។ ប្រជាពលរដ្ឋជាង ៨ម៉ឺននាក់ត្រូវបានជម្លៀស ដោយមានការខូចខាតផ្លូវថ្នល់ ដាច់ចរន្តអគ្គិសនីនៅក្នុងភូមិជាង ១៣០ និងការកើនឡើងកម្ពស់ទឹកទន្លេដែលជំរុញឱ្យមានការរំដោះទឹកពីទំនប់ទឹក។

ជាការឆ្លើយតបប្រធានាធិបតីចិនលោក ស៊ី ជីនពីង បានបញ្ជាឱ្យមានប្រតិបត្តិការជួយសង្គ្រោះពេញលេញ និងវិធានការសុវត្ថិភាពយ៉ាងតឹងរឹង រួមទាំងការផ្អាកសាលារៀន សំណង់ និងសកម្មភាពទេសចរណ៍។ នៅក្នុងខេត្ត Hebei ក្បែរនោះ ក៏មានមនុស្ស ៤ នាក់បានសម្លាប់ និងជាច្រើននាក់ផ្សេងទៀតកំពុងបាត់ខ្លួន បន្ទាប់ពីមានបំណាក់ដី។

ដោយមានការព្យាករណ៍ភ្លៀងធ្លាក់កាន់តែច្រើន អាជ្ញាធរទីក្រុងប៉េកាំងជំរុញឲ្យសាធារណជនស្នាក់នៅក្នុងផ្ទះ និងចៀសវាងតំបន់ងាយនឹងមានទឹកជំនន់៕

ការជម្លៀសប្រជាជនចេញពីតំបន់រងគ្រោះ។ (រូបភាព៖ Reuters)

បំណាក់ដីនៅ Miyun (រូបភាព៖ Reuters)

(រូបភាព៖ Reuters)

អត្ថបទ៖ ប៊ុន សុភាព

The post ទឹកជំនន់នៅទីក្រុងប៉េកាំងប្រទេសចិនឆក់យកជីវិតមនុស្ស៣០នាក់ appeared first on Kampuchea Thmey Daily.

ទីក្រុងប៉េកាំងរងការរញ្ជួយដីកម្រិតស្រាល ផ្អើលអស់ប្រជាជនដែលលង់លក់កណ្តាលយប់

Bun sopheap — Thu, 27 Mar 2025 04:06:21 +0000

រញ្ជួយដីកម្រិតស្រាលមួយបានវាយប្រហារកក្រើកទីក្រុងប៉េកាំង បង្កភាពភ្ញាក់ផ្អើលដល់អ្នកស្រុកប្រញាប់រត់ចេញពីកន្លែងស្នាក់នៅទាំងកណ្ដាលយប់។ នេះបើយោងតាមការចេញផ្សាយរបស់សារព័ត៌មានCNNនៅថ្ងៃទី២៧ខែមីនានេះ។

(រូបភាព៖ CNN)

យោងតាមទីភ្នាក់ងារស្ទាបស្ទង់ភូមិសាស្ត្រសហរដ្ឋអាមេរិក (USGS) គ្រោះរញ្ជួយដីកម្រិត ៤.៥ រ៉ិចទ័រ បានវាយប្រហារជាយក្រុងTianjin នៅយប់រំលងអធ្រាត្រ ម៉ោង ០១:២១ នាទីយប់(ម៉ោងក្នុងស្រុក )ក្នុងជម្រៅ ១០គីឡូម៉ែត្រ។ ប៉ុន្តែបើតាមមជ្ឈមណ្ឌលបណ្តាញរញ្ជួយដីរបស់ប្រទេសចិន បានវាស់វែងការរញ្ជួយដីនេះក្នុងកម្រិត ៤.២ រ៉ិចទ័រ និងជម្រៅ ២០ គីឡូម៉ែត្រ ដោយដាក់ចំណុចកណ្តាលនៃការរញ្ជួយដីនៅក្នុងស្រុក Yongqing ក្នុងខេត្ត Hebei។

ទីភ្នាក់ងាររញ្ជួយដីក្រុងប៉េកាំង បានឲ្យដឹងថា ចំណុចកណ្តាលនៃការរញ្ជួយដីមានចម្ងាយត្រឹមតែ១៣គីឡូម៉ែត្រពីទីក្រុងប៉េកាំងប៉ុណ្ណោះ ដែលធ្វើឲ្យមានការរញ្ជួយយ៉ាងខ្លាំងនៅក្នុងតំបន់មួយចំនួនក្នុងរដ្ឋធានីរបស់ប្រទេសនេះ។ ទោះយ៉ាងណាការរញ្ជួយនេះមិនបានធ្វើឲ្យខូចខាតរចនាសម្ព័ន្ធណាមួយដល់អគារនៅក្នុងទីក្រុងនោះទេ ប៉ុន្តែសម្រាប់ប្រជាជនជាច្រើន ការរញ្ជួយដីនេះខ្លាំងល្មមអាចដាស់ពួកគេឲ្យភ្ញាក់នៅពាក់កណ្តាលយប់ គឺជាបទពិសោធន៍ថ្មីថ្មោងមួយ។

ការរញ្ជួយដីនេះកើតឡើងនៅយប់ថ្ងៃពុធនេះគឺស្ថិតក្នុងចំណោមប្រធានបទពេញនិយមបំផុតនៅលើប្រព័ន្ធផ្សព្វផ្សាយសង្គមរបស់ចិន ដោយអ្នកនៅក្រុងប៉េកាំងជាច្រើនបានបង្ហោះវីដេអូនៃអំពូលភ្លើងលើពិដានរង្គើ និងចែករំលែកបទពិសោធន៍នៃការភ្ញាក់ពីដំណេកទាំងកណ្ដាលយប់ដោយសារបន្ទប់គេងរបស់ពួកគេញ័រ។

គួរបញ្ជាក់ថា ទីក្រុងប៉េកាំង ជាទីក្រុងដែលមានប្រជាជនចំនួន២២លាននាក់ បានរងផលប៉ះពាល់ជាញឹកញាប់ពីការញ័រពីការរញ្ជួយដីកម្រិតស្រាលៗនៅក្បែរនោះ៕

(រូបភាព៖ Weibo)

អត្ថបទ៖ ប៊ុន សុភាព

The post ទីក្រុងប៉េកាំងរងការរញ្ជួយដីកម្រិតស្រាល ផ្អើលអស់ប្រជាជនដែលលង់លក់កណ្តាលយប់ appeared first on Kampuchea Thmey Daily.

ប៉េកាំងដាក់ទិសដៅប្រែក្លាយមុខមាត់ទៅជាទីក្រុងសេដ្ឋកិច្ចឌីជីថលគំរូលំដាប់ពិភពលោក

Mean Ratana — Mon, 22 Jan 2024 07:23:31 +0000

រដ្ឋធានីប៉េកាំងប្រកាសដាក់គោលដៅនឹងអភិវឌ្ឍខ្លួនទៅជាទីក្រុងគំរូសេដ្ឋកិច្ចឌីជីថលលំដាប់ពិភពលោក ជាមួយនឹងការធ្វើកំណែទម្រង់គ្រប់វិស័យ ទាំងផលិតកម្ម អភិបាលកិច្ច គុណភាពជីវិតរស់នៅ ។ នេះបើតាមការឲ្យដឹងពីលោក Yin Yong អភិបាលក្រុងចិន បានលើកឡើងកាលពីថ្ងៃអាទិត្យ ទី២១ ខែមករា ក្នុងកិច្ចប្រជុំទីពីរនៃសន្និបាតលើកទី១៦ របស់រដ្ឋធានីប៉េកាំង ។

ប្រភពព័ត៌មាន People Daily របស់ចិនបានបញ្ជាក់ថា ក្នុងរយៈពេលប៉ុន្មានឆ្នាំចុងក្រោយនេះ ទីក្រុងប៉េកាំងបានត្រួសត្រាយវិស័យផ្សេងៗជាមួយនឹងបច្ចេកវិទ្យាគន្លឹះសំខាន់ៗ ទាំងហេថារចនាសម្ព័ន្ធ និងរដ្ឋបាលអភិបាលកិច្ចជាដើម ។

ជាក់ស្តែង កាលពីឆ្នាំ ២០២៣ ប៉េកាំងបានស្ថាបនាមូលដ្ឋានហេថារចនាសម្ព័ន្ធដោយបំពាក់បច្ចេកវិទ្យា 5G ប្រមាណ៣០,០០០ កន្លែង ។ ក្នុងនោះ មានគំរូផលិតផលបញ្ញាសប្បនិម្មិត (AI) ជាតិសម្រាប់បម្រើផលប្រយោជន៍សាធារណជនក្នុងចំនួនដ៏ច្រើន ជាឧទាហរណ៍ ការបើកបង្ហាញពីតំបន់សម្រាប់ការបើកបរ ដឹកជញ្ជូនដោយស្វ័យប្រវត្តិក្នុងបច្ចេកវិទ្យាកម្រិតខ្ពស់ លើផ្ទៃដីប្រមាណ ១៦០ គីឡូម៉ែត្រការ៉េ។

នៅក្នុងឆ្នាំ២០២៣ ផលិតក្នុងស្រុកសរុប (GDP) សម្រាប់រដ្ឋធានីមួយនេះ មានទំហំទឹកប្រាក់ ៤.៤ លានលានយ័ន (ប្រហែលនឹង ៦១.១៦ លានដុល្លារអាមេរិក) កើន ៥.២% ក្នុងមួយឆ្នាំទៅមួយឆ្នាំ ដែលក្នុងនោះសេដ្ឋកិច្ចឌីជីថលបានរួមចំណែកប្រមាណ ៤២.៩% នៃផលិតក្នុងស្រុកសរុបរបស់រដ្ឋធានីនេះ ។ នេះបើតាមទិន្នន័យពីរបាយការណ៍របស់រដ្ឋាភិបាល ។

ចំណែកនៅឆ្នាំ ២០២៤ នេះ ប៉េកាំងនឹងធ្វើឲ្យប្រសើរបន្ថែមនូវបច្ចេកវិទ្យាបញ្ញាសប្បនិម្មិត (AI) ឲ្យក្លាយជាគំរូក្នុងកម្រិតអន្តរជាតិ តាមរយៈការដាក់ចេញសកម្មភាពយុទ្ធសាស្រ្តទៅក្នុងអភិបាលកិច្ចរដ្ឋាភិបាល វិស័យសុខាភិបាល ឧស្សាហកម្ម និងសេវាសម្រាប់សាធារណជន ។

គួររំឭកផងដែរថា សេណារីយ៉ូមួយចំនួន ដែលប៉េកាំងនឹងដាក់អនុវត្តនោះ មានដូចជា ការធ្វើស្វ័យប្រវត្តិកម្មលើការដឹកជញ្ជូន ព្រលានយន្តហោះ ស្ថានីយ៍រថភ្លើង បច្ចេកវិទ្យាសម្អាតផ្លូវក្នុងទីក្រុង ដឹកជញ្ជូនក្នុងវិស័យសុខាភិបាល ព្រមទាំងបំពាក់បច្ចេកវិទ្យាអ៊ីនធឺណិតសម្រាប់មធ្យោបាយផ្សេងៗទៀត ក្នុងទិសដៅបម្រើឲ្យប៉េកាំងក្លាយជាទីក្រុងវៃឆ្លាត ជាប៉ូលសេដ្ឋកិច្ចឌីជីថលគំរូមុខគេកម្រិតពិភពលោកក្នុងពេលឆាប់ៗនេះ ៕

ដោយ៖ មាន រតនា

The post ប៉េកាំងដាក់ទិសដៅប្រែក្លាយមុខមាត់ទៅជាទីក្រុងសេដ្ឋកិច្ចឌីជីថលគំរូលំដាប់ពិភពលោក appeared first on Kampuchea Thmey Daily.

មនុស្ស៣៣នាក់ស្លាប់ ដោយសារភ្លៀងធ្លាក់ខ្លាំងមិនធ្លាប់មាន នៅប៉េកាំង

Sok Sovann — Wed, 09 Aug 2023 07:19:43 +0000

មនុស្សចំនួន៣៣នាក់ត្រូវបានបញ្ជាក់ថាស្លាប់ ខណៈ១៨នាក់ទៀតកំពុងបាត់ខ្លួន បន្ទាប់ពីភ្លៀងធ្លាក់ធ្ងន់ធ្ងរបំផុត មិនធ្លាប់មានពីមុនមកសោះនៅក្នុងទីក្រុងប៉េកាំង។

(រូបថត៖ AP)

រដ្ឋធានីរបស់ប្រទេសចិន បានរងការវាយប្រហារដោយភ្លៀងធ្លាក់ខ្លាំងនារយៈពេលប៉ុន្មានសប្តាហ៍ថ្មីៗនេះ ដោយបំផ្លាញហេដ្ឋារចនាសម្ព័ន្ធ ហើយជន់លិចជាយក្រុងនិងតំបន់ជុំវិញនោះ។

យោងតាមការឲ្យដឹងពីក្រុមមន្ត្រីនៅថ្ងៃពុធទី៩ខែសីហា, មនុស្សចំនួន៣៣នាក់បានស្លាប់ ដោយសារអាកាសធាតុអាក្រក់ក្នុងទីក្រុងប៉េកាំង ដែលភាគច្រើនដោយសារទឹកជំនន់ និងការបាក់រលំអគារ។

(រូបថត៖ AP)

ដោយឡែក កាលពីខែមុន មនុស្សរាប់សិបនាក់ បានស្លាប់ក្នុងគ្រោះទឹកជំនន់នៅទូទាំងភាគខាងជើងប្រទេសចិន ខណៈនៅទីក្រុងប៉េកាំង ការស្លាប់ឬបាត់ខ្លួនមនុស្សចំនួន១៤៧នាក់ត្រូវបានរាយការណ៍ថា បណ្តាលមកពីគ្រោះធម្មជាតិ។

គួរបញ្ជាក់ថា ក្រៅពីប្រទេសចិន មនុស្សរាប់លាននាក់បានរងគ្រោះដោយព្រឹត្តិការណ៍អាកាសធាតុកាចសាហាវ និងរលកកម្តៅអូសបន្លាយជុំវិញពិភពលោកក្នុងរយៈពេលប៉ុន្មានសប្តាហ៍ថ្មីៗនេះ ដែលអ្នកវិទ្យាសាស្ត្រនិយាយថា ព្រឹត្តិការណ៍បែបនេះ កាន់តែធ្ងន់ធ្ងរឡើងៗ ដោយសារបម្រែបម្រួលអាកាសធាតុ៕

ប្រែសម្រួល៖ Vann Vann

ប្រភព៖ CNA

ចុចអាន៖ ព្យុះ ខ្សាច់ និងខ្យល់ ពុល ដ៏ គ្រោះថ្នាក់ វាយប្រហារ ទីក្រុង ប៉េកាំង

The post មនុស្ស៣៣នាក់ស្លាប់ ដោយសារភ្លៀងធ្លាក់ខ្លាំងមិនធ្លាប់មាន នៅប៉េកាំង appeared first on Kampuchea Thmey Daily.

អ្នកជំងឺគ្រុនក្ដៅសម្រុកទៅគ្លីនិកទីក្រុង ប៉េកាំង ក្រោយបន្ថូរបន្ថយវិធានការកូវីដ

Sok Chivon — Tue, 13 Dec 2022 03:51:59 +0000

គ្លីនិកគ្រុនក្តៅនៅទីក្រុងប៉េកាំងមានការកើនឡើងអ្នកជំងឺច្រើនជាង ១៦ ដងក្នុងមួយសប្តាហ៍មុន ដែលជាសញ្ញាបង្ហាញថា ជំងឺកូវីដ ១៩ រីករាលដាលយ៉ាងឆាប់រហ័ស បន្ទាប់ពីការបន្ធូរវិធានការកាត់បន្ថយហានិភ័យនៃការឆ្លង ។

មន្ត្រីទីក្រុងបានប្រាប់អ្នកយកព័ត៌មានកាលពីថ្ងៃចន្ទថា ចំនួនអ្នកជំងឺដែលចូលទៅគ្លីនិកគ្រុនក្តៅនៅទីក្រុងប៉េកាំងបានកើនឡើង ១៦ ដង ពោលឡើងដល់ ២២,០០០ នាក់ ។

កាលពីសប្តាហ៍មុន រដ្ឋាភិបាលចិនបានដកវិធានការតឹងរ៉ឹងក្នុងការគ្រប់គ្រងជំងឺកូវីដ ១៩ ហើយលទ្ធផលតេស្ត PCR វិជ្ជមាន នឹងលែងតម្រូវឲ្យដាក់នៅកន្លែងសាធារណៈជាច្រើនទៀតហើយ ។

ទន្ទឹមនោះ បុគ្គលដែលមិនមានរោគសញ្ញា ឬស្រាលត្រូវបានអនុញ្ញាតឲ្យធ្វើចត្តាឡីស័កនៅផ្ទះ ជំនួសឲ្យការបញ្ជូនទៅមន្ទីរពេទ្យ ឬកន្លែងធ្វើចត្តាឡីស័កផ្សេងទៀត ។

ពាក់ព័ន្ធបញ្ហាប្រឈមនឹងការកើនឡើងនៃករណីនេះផងដែរ, អាជ្ញាធរទីក្រុងគ្រោងនឹងបង្កើនចំនួននាយកដ្ឋានព្យាបាលអ្នកជំងឺករណីគ្រុនក្តៅនៅទីក្រុងប៉េកាំងពី ៩៤ ទៅ ៣០៣ កន្លែង ។

ស្របពេលជាមួយគ្នានេះ មន្ត្រីទីក្រុងកាលពីថ្ងៃចន្ទក៏បានបញ្ចេញឧបករណ៍ធ្វើតេស្តរហ័សរកកូវីដចំនួន ២៥ លានគ្រឿងផងដែរ ដោយសារតែឧបករណ៍តេស្តទាំងនេះពិបាករកទិញនៅក្នុងរដ្ឋធានី ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ កងទ័ពចិននិងឥណ្ឌា ប៉ះទង្គិចគ្នាមួយប្រ៉ាវនៅព្រំដែន មានរបួសទាំងសងខាង

The post អ្នកជំងឺគ្រុនក្ដៅសម្រុកទៅគ្លីនិកទីក្រុង ប៉េកាំង ក្រោយបន្ថូរបន្ថយវិធានការកូវីដ appeared first on Kampuchea Thmey Daily.

លោក ពូទីន ទៅដល់ទីក្រុង ប៉េកាំង ហើយដើម្បីជួបលោក ស៊ី

Sok Sovann — Fri, 04 Feb 2022 09:02:53 +0000

នៅថ្ងៃសុក្រទី៤ខែកុម្ភៈនេះ ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានទៅដល់ទីក្រុងប៉េកាំងហើយ ជាកន្លែងដែលគាត់ត្រូវបានគេរំពឹងថា នឹងចូលរួមព្រឹត្តិការណ៍កីឡាអូឡាំពិករដូវរងាឆ្នាំ២០២២ និងជួបជាមួយប្រធានាធិបតីចិន លោក ស៊ី ជីនពីង ដើម្បីពិភាក្សាអំពីកិច្ចសហប្រតិបត្តិការកាន់តែជិតស្និទ្ធ ចំពេលមានភាពតានតឹងកើនឡើងជាមួយសហរដ្ឋអាមេរិក។

វិមានក្រឹមឡាំងបាននិយាយកាលពីថ្ងៃពុធថា ប្រទេសរុស្ស៊ី និងចិន នឹងពិភាក្សាគ្នាអំពីទំនាក់ទំនងឧស្ម័ន និងហិរញ្ញវត្ថុកាន់តែជិតស្និទ្ធ ក្នុងអំឡុងដំណើរទស្សនកិច្ចរបស់លោក ពូទីន ហើយគំនិតដែលអូសបន្លាយជាយូរមកហើយសម្រាប់បំពង់បង្ហូរឧស្ម័នថ្មីទៅកាន់ប្រទេសចិន កំពុងត្រូវបានពិនិត្យ។

ទូរទស្សន៍រដ្ឋចិន CCTV នៅរសៀលថ្ងៃសុក្រនេះ បានផ្សាយថា លោកពូទីន បានមកដល់រដ្ឋធានីរបស់ប្រទេសចិនហើយ ហើយកត់សម្គាល់ថា លោកក៏ដូចជាប្រទេសចិនដែរ បានសម្តែងការប្រឆាំងទៅនឹងការយកព្រឹត្តិការណ៍កីឡានេះ ធ្វើជារឿងនយោបាយ។

គួរបញ្ជាក់ថា ពិធីបើកព្រឹត្តិការណ៍កីឡានេះ នឹងធ្វើឡើងនៅយប់ថ្ងៃសុក្រ។

សហរដ្ឋអាមេរិក និងសម្ព័ន្ធមិត្តមួយចំនួនបានប្រកាសធ្វើពហិការផ្នែកការទូត ចំពោះព្រឹត្តិការណ៍នេះ ដើម្បីតវ៉ាចំពោះកំណត់ត្រាសិទ្ធិមនុស្សរបស់ប្រទេសចិន៕

ប្រែសម្រួល៖ Vann Vann

ប្រភព៖ Irish Times

ចុចអាន៖ អាមេរិកចោទរុស្ស៊ី រៀបផែនការបង្កើតលេស ដើម្បីវាយប្រហារអ៊ុយក្រែន

The post លោក ពូទីន ទៅដល់ទីក្រុង ប៉េកាំង ហើយដើម្បីជួបលោក ស៊ី appeared first on Kampuchea Thmey Daily.

រយៈពេល ៤ ថ្ងៃប៉ុណ្ណោះ ជើងហោះហើររបស់ ហុងកុង រងការគំរាមបំផ្ទុះគ្រាប់បែកដល់ទៅ ២ លើក

Sok Chivon — Wed, 15 Sep 2021 04:22:06 +0000

កងកម្លាំងប៉ូលិសហុងកុងបានបញ្ជាក់ជាមួយកាសែត Global Times កាលពីថ្ងៃអង្គារថា គ្រាប់បែកមួយទៀតត្រូវបានគេរាយការណ៍ថា បានបង្កៃនៅលើជើងហោះហើរពីតំបន់រដ្ឋបាលពិសេសហុងកុង (HKSAR) ទៅកាន់ទីក្រុងសៀងហៃកាលពីរសៀលថ្ងៃអង្គារ ។

ទន្ទឹមនោះ គ្មាននរណាម្នាក់រងរបួសនោះទេ ហើយប៉ូលិសកំពុងធ្វើការស៊ើបអង្កេតបន្ថែមពីករណីនេះ ខណៈកាលពីថ្ងៃសៅរ៍ក៏មានករណីគំរាមបំផ្ទុះគ្រាប់បែកស្រដៀងគ្នានេះ ត្រូវបានគេរាយការណ៍ផងដែរទៅកាន់ប៉ូលិសហុងកុងលើជើងហោះហើរពីទីក្រុងហុងកុងទៅកាន់ទីក្រុងប៉េកាំង ។

នៅម៉ោងប្រហែល ២ និង ២២ នាទីរសៀលថ្ងៃអង្គារ ប៉ូលិសបានទទួលរបាយការណ៍មួយដែលអះអាងថា គ្រាប់បែកត្រូវបានគេបង្កៃនៅលើយន្តហោះដែលចាកចេញពីហុងកុងឆ្ពោះទៅចិនដីគោក ហើយគ្មាននរណាម្នាក់ត្រូវបានចាប់ខ្លួននោះទេ ហើយប៉ូលិសកំពុងធ្វើការស៊ើបអង្កេតបន្ថែម ។

ស្របពេលជាមួយគ្នានេះ ប្រព័ន្ធផ្សព្វផ្សាយហុងកុងបានរាយការណ៍ថា ជើងហោះហើរនេះបានត្រឡប់មកហុងកុងវិញកាលពីរសៀលថ្ងៃអង្គារ ។

ប៉ូលិសបាននិយាយថា ការគំរាមបំផ្ទុះគ្រាប់បែកគឺជាឧក្រិដ្ឋកម្មធ្ងន់ធ្ងរ ហើយអ្នកដែលត្រូវបានរកឃើញថាបានប្រព្រឹត្តទោសកំហុសនេះ ប្រឈមនឹងការផាកពិន័យ ៥ ម៉ឺនដុល្លារហុងកុង និងជាប់ពន្ធនាគាររយៈពេល ៣ ឆ្នាំ ៕

ប្រែសម្រួលដោយ ៖ ជីវ័ន្ត

ប្រភព ៖ Global Times

ចុចអាន ៖ ផ្អើលពេញអាកាសយានដ្ឋានក្រុងប៉េកាំង បន្ទាប់ពីរងការគំរាមបំផ្ទុះគ្រាប់បែកលើយន្តហោះ

The post រយៈពេល ៤ ថ្ងៃប៉ុណ្ណោះ ជើងហោះហើររបស់ ហុងកុង រងការគំរាមបំផ្ទុះគ្រាប់បែកដល់ទៅ ២ លើក appeared first on Kampuchea Thmey Daily.

ផ្អើលពេញអាកាសយានដ្ឋានក្រុងប៉េកាំង បន្ទាប់ពីរងការគំរាមបំផ្ទុះគ្រាប់បែកលើយន្តហោះ

Sok Sovann — Mon, 13 Sep 2021 07:09:52 +0000

ការគំរាមបំផ្ទុះគ្រាប់បែក បានបង្កឲ្យមានការជម្លៀសអ្នកដំណើរប្រមាណ៣០នាក់ ចេញពីយន្តហោះរបស់ក្រុមហ៊ុន Cathay Pacific ដែលធ្វើដំណើរពីទីក្រុងហុងកុង ហើយទើបតែចុះចតនៅទីក្រុងប៉េកាំង។

ការជម្លៀសនេះបានកើតឡើង បន្ទាប់ពីជើងហោះហើរ CX390 បានចុះចតនៅអាកាសយានដ្ឋានអន្តរជាតិទីក្រុងប៉េកាំងនៅវេលាថ្ងៃត្រង់ថ្ងៃសៅរ៍ ដោយអ្នកដំណើរនិងសមាជិកអាកាសយានិកបានរត់គេច ចេញតាមរយៈច្រកគ្រាអាសន្ន។

ក្រុមហ៊ុនអាកាសចរណ៍បាននិយាយនៅក្នុងសេចក្តីថ្លែងការណ៍មួយ កាលពីថ្ងៃអាទិត្យថា “អ្នកដំណើរមួយចំនួនតូច បានរងរបួសតិចតួចអំឡុងពេលប្រតិបត្តិការ។ ក្រុមហ៊ុនបានផ្តល់ការថែទាំសុខភាពជូនអ្នកដំណើរ ហើយគ្មាននរណាម្នាក់នៅលើយន្តហោះធុន Airbus 330 តម្រូវឲ្យចូលមន្ទីរពេទ្យទេ”។

ប្រភពដែលដឹងអំពីហេតុការណ៍នេះបាននិយាយថា មានអ្នកដំណើរប្រហែល ៣០ នាក់នៅលើយន្តហោះនោះហើយការជម្លៀសបានធ្វើឡើង បន្ទាប់ពីអាជ្ញាធរទទួលបានសារទាក់ទងនឹងការគំរាមកំហែងសន្តិសុខ។

ក្រុមហ៊ុនអាកាសចរណ៍ នឹងបន្តសហការជាមួយអាជ្ញាធរលើការស៊ើបអង្កេតនេះ។

ស្របពេលជាមួយគ្នានោះដែរ ប៉ូលិសក្រុងហុងកុងនិយាយថា ពួកគេបានទទួលទូរស័ព្ទនៅម៉ោងប្រហែល ១០ និង ៤០ នាទីព្រឹកថ្ងៃសៅរ៍ ដោយអះអាងថា គ្រាប់បែកមួយគ្រាប់ ត្រូវបានគេបង្កៃនៅលើជើងហោះហើរដែលឆ្ពោះដំណើរទៅចិនដីគោក។

ទោះបីជាយ៉ាងណាក៏ដោយ កងកម្លាំងបាននិយាយថា ខ្លួនបានចាត់ថ្នាក់ហេតុការណ៍នេះថាជាករណីបោកបញ្ឆោត។ ក្រុមស៊ើបអង្កេតព្រលានយន្តហោះកំពុងតាមដានហើយ មិនមានការចាប់ខ្លួនទេ៕

ប្រែសម្រួល៖ Vann Vann

ប្រភព៖ SCMP

ចុចអាន៖ មិនខ្លាចទេ! តៃវ៉ាន់ធ្វើសមយុទ្ធបាញ់គ្រាប់ពិតស្របពេលមានភាពតានតឹងជាមួយចិន

The post ផ្អើលពេញអាកាសយានដ្ឋានក្រុងប៉េកាំង បន្ទាប់ពីរងការគំរាមបំផ្ទុះគ្រាប់បែកលើយន្តហោះ appeared first on Kampuchea Thmey Daily.