ទីផ្សារអន្តរជាតិ Archives - Kampuchea Thmey Daily

កម្ពុជាបាននាំចេញអង្ករជាង ៩៤ ម៉ឺនតោន គិតជាទឹកប្រាក់ជាង ៦០០ លានដុល្លារក្នុងឆ្នាំ២០២៥

Din Thary — Mon, 05 Jan 2026 10:14:09 +0000

រយៈពេល ១២ ខែ នៃឆ្នាំ២០២៥ កម្ពុជាសម្រេចបានការនាំចេញអង្ករចំនួនជាង ៩៤ ម៉ឺនតោន (៩៤០ ៣២១ តោន) គិតជាទឹកប្រាក់ជាង ៦០០ លានដុល្លារ (៦០២.៤១ លានដុល្លារ)។

ការសម្រេចបានការនាំចេញអង្ករទាំងជាង ៩៤ ម៉ឺនតោន ត្រូវបានធ្វើឡើងតាមរយៈក្រុមហ៊ុននាំចេញអង្ករចំនួន ៦៨ ក្រុមហ៊ុន ទៅកាន់គោលដៅចំនួន ៧៥ ។ ក្នុងនោះ កម្ពុជា បាននាំចេញទៅកាន់បណ្តាប្រទេសនៅក្នុងតំបន់អឺរ៉ុបចំនួន ២៨ បានបរិមាណអង្ករចំនួន ៣៣៩ ៤១៧ តោន គិតជាទឹកប្រាក់ចំនួន ២៥៨.២៨ លានដុល្លារសហរដ្ឋអាមេរិក។

នាំចេញទៅកាន់ប្រទេសចិន និងហុងកុង ចំនួន ២៣១ ១២៥ តោន គិតជាទឹកប្រាក់ចំនួន ១៣៨.៣៦ លានដុល្លារសហរដ្ឋអាមេរិក ទៅកាន់ប្រទេសក្នុងអាស៊ាន ចំនួន ៨ ប្រទេសបានបរិមាណចំនួន ២៧៣ ៦៥៧ តោន គិតជាទឹកប្រាក់ចំនួន ១១៧.៦២ លានដុល្លារសហរដ្ឋអាមេរិក និងទៅកាន់គោលដៅ ៣៧ ប្រទេសផ្សេងទៀតមាន អាហ្វ្រិក មជ្ឈឹម បូព៌ា អាមេរិក កាណាដា អូស្ត្រាលី ញ៉ូហ្សេឡេន បានចំនួន ៩៦ ១២២ តោន គិតជាទឹកប្រាក់ចំនួន ៨៨.១៥ លានដុល្លារសហរដ្ឋអាមេរិក។

ចំពោះប្រភេទអង្ករដែលបាននាំចេញមាន អង្ករក្រអូបចំនួន ៦៤.០២% ប្រភេទអង្ករសគ្រាប់វែង ១៣.៧១% អង្ករចំហុយ ២% អង្ករសរីរាង្គចំនួន ១.៣២% អង្ករបាក់គ្រប់ប្រភេទ ១៨.៥៦% និងអង្ករផ្សេងៗចំនួន ០.៣៩% ។

ប្រទេសកម្ពុជាក៏បាននាំចេញស្រូវចំនួន ៦ ៨៥៩ ៩៣០ តោនស្រូវសើម ដែលគិតជាទឹកប្រាក់ប៉ាន់ប្រមាណបានចំនួន ១៥៧៩.៨៦ លានដុល្លារសហរដ្ឋអាមេរិក។

គូសបញ្ជក់ផងដែរថា ការនាំចេញអង្ករ មានកំណើនសរុបចំនួន ៤៥.៥៩% និងការនាំចេញស្រូវ មានកំណើតសរុបចំនួន ៣២.៤៣% ធៀបទៅរយៈពេលដូចគ្នាក្នុងឆ្នាំ២០២៤៕

The post កម្ពុជាបាននាំចេញអង្ករជាង ៩៤ ម៉ឺនតោន គិតជាទឹកប្រាក់ជាង ៦០០ លានដុល្លារក្នុងឆ្នាំ២០២៥ appeared first on Kampuchea Thmey Daily.

បណ្ឌិត គី សេរីវឌ្ឍន៍ មើលឃើញ ៣ ចំណុច ធ្វើឱ្យឧត្ដមភាពប្រកួតប្រជែងរបស់កម្ពុជាលើទីផ្សារនៅមានកម្រិត

Din Thary — Wed, 24 Sep 2025 05:00:40 +0000

លោក បណ្ឌិត គី សេរីវឌ្ឍន៍ អ្នកជំនាញសេដ្ឋកិច្ច នៃរាជបណ្ឌិតសភា មើលឃើញនូវកត្តាសំខាន់ៗចំនួន ៣ ចំណុចដែលធ្វើឱ្យឧត្ដមភាពប្រកួតប្រជែងរបស់កម្ពុជានៅលើទីផ្សារនៅមានកម្រិត បើធៀបទៅនឹងបណ្តាប្រទេសផ្សេងៗ។

ថ្លែងប្រាប់«កម្ពុជាថ្មី» លោក បណ្ឌិត គី សេរីវឌ្ឍន៍ បានមានប្រសាសន៍ថា ពាក់ព័ន្ធនិងឧត្ដមភាពនៃការប្រកួតប្រជែងរបស់កម្ពុជានៅលើទីផ្សារ យើងឃើញថា នៅមានកម្រិតនៅឡើយ។

ជាក់ស្តែង មានកត្តាសំខាន់ៗ ៣ ចំណុច ដែលធ្វើឱ្យកម្ពុជានៅមានកម្រិតនៅឡើយ ទី១ ការិយាធិបតេយ្យ និងអំពើពុករលួយនៅក្នុងប្រព័ន្ធដឹកជញ្ជូន logistic ភស្តុភារកម្មនៅតែខ្ពស់ ដែលធ្វើឱ្យកម្ពុជាបាត់បង់ការប្រកួតប្រជែង។

ទី២ ថ្លៃដើមនៃអគ្គិសនីរបស់កម្ពុជា ក៏នៅតែមានកម្រិតខ្ពស់ដូចគ្នាដែរ បើធៀបជាមួយនឹងបណ្តាប្រទេសផ្សេងៗ និងទី៣ កម្មកររបស់កម្ពុជានៅមិនទាន់មានជំនាញច្បាស់លាស់ ហើយនិងមិនទាន់មាននូវផលិតភាពខ្ពស់ក្នុងការផលិតបើធៀបជាមួយនឹងបណ្តាប្រទេសផ្សេងៗ។

លោកបណ្ឌិត បានសង្កត់ធ្ងន់ថា « ចំណុចទាំង ៣ នេះ យើងឃើញហើយថា ការប្រកួតប្រជែងរបស់យើងគឺនៅមានកម្រិត នៅរួមផ្សំជាមួយការអនុវត្តច្បាប់មិនបានត្រឹមត្រូវ ដែលកត្តាទាំងអស់នេះ គួរតែមានការគិតគូរឡើងវិញ ព្រមទាំងមានការសម្របសម្រួលឱ្យមានការអនុវត្តច្បាប់បានល្អប្រសើរ ត្រឹមត្រូវធានាបានភាពស្មើគ្នា ទាំងអ្នកជំនួញបរទេស និងអ្នកជំនួញក្នុងស្រុក»។

យោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា (GDCE) បានបង្ហាញថា ចាប់ពីខែមករា ដល់ខែសីហា ឆ្នាំ ២០២៥ កម្ពុជានាំចេញទំនិញទៅកាន់ទីផ្សារអន្តរជាតិ គិតជាទឹកប្រាក់មានទំហំ ២០.១៨ ពាន់លានដុល្លារអាម៉េរិក មានការកើនឡើង ១៤.៨% បើធៀបនឹងរយៈពេលដូចគ្នាកាលពីឆ្នាំ២០២៤ ដែលមានទំហំប្រមាណជាង ១៧ ពាន់លានដុល្លារអាម៉េរិក៕

ដោយ៖ ឌិន ថារី

The post បណ្ឌិត គី សេរីវឌ្ឍន៍ មើលឃើញ ៣ ចំណុច ធ្វើឱ្យឧត្ដមភាពប្រកួតប្រជែងរបស់កម្ពុជាលើទីផ្សារនៅមានកម្រិត appeared first on Kampuchea Thmey Daily.

រោងម៉ាស៊ីនកិនស្រូវធំមួយក្នុងស្រុកថ្មគោល សម្រេចការនាំចេញអង្ករជាង ៣ ម៉ឺនតោន ទៅទីផ្សារអន្តរជាតិ

Din Thary — Fri, 18 Apr 2025 07:51:15 +0000

ម្ចាស់រោងម៉ាស៊ីនកិនស្រូវ ស៊ីធីរ៉ាយស៍ អ៉ីមផត អិចផត ខូ អិលធីឌី (City Rice Import Export Co., Ltd) លោកឧកញ៉ា ឡាយ ឈុនហួបានឱ្យដឹងថា រយៈពេល ៣ ខែ ដើមឆ្នាំ២០២៥ រោងម៉ាស៊ីនរបស់លោកសម្រេចការនាំចេញអង្ករទៅទីផ្សារអន្តរជាតិជាង ៣ ម៉ឺនតោន គិតជាទឹកប្រាក់ប្រមាណ ២០លានដុល្លារអាមេរិក។

ថ្លែងមកកាន់ «កម្ពុជាថ្មី» នៅថ្ងៃទី១៨ ខែមេសា ឆ្នាំ២០២៥ នេះ លោក ឧកញ៉ា ឡាយ បានមានប្រសាសន៍ថា ក្នុងរយៈពេល ៣ខែដំបូងនៃដើមឆ្នាំ២០២៥ នេះ រោងម៉ាស៊ីនកិនស្រូវរបស់លោក សម្រេចការនាំចេញអង្ករទៅកាន់ទីផ្សារអន្តរជាតិប្រមាណ ៣ ម៉ឺនតោន ដែលមានការកើនឡើងប្រមាណជិត ៣០% បើប្រៀបធៀបទៅនិងរយៈពេលដូចគ្នាកាលពីឆ្នាំ មុន។

សរុបទាំង ៣ ម៉ឺនតោន ក្នុងនោះរោងម៉ាស៊ីនបាននាំចេញទៅលើប្រភេទអង្ករមួយចំនួនដូចជា អង្ករផ្ការំដួល, សែនក្រអូប, អង្ករស្រង៉ែ និងប្រភេទអង្ករ ៥៤ ៥១ ជាដើមទៅកាន់ទីផ្សារ។

ជាមួយគ្នានេះ លោកឧកញ៉ា ក៏បានបញ្ជាក់ផងដែរថា កត្តាដែលធ្វើការឱ្យការនាំចេញអង្ករទៅកាន់ទីផ្សារអន្តរជាតិមានការកើនឡើងខ្ពស់ជាងឆ្នាំមុន ដោយសារតែឆ្នាំនេះការប្រមូលផលបានច្រើនជាងឆ្នាំមុន ហើយតម្លៃរបស់ប្រទេសជិតខាងធ្លាក់ចុះខ្លាំង ដូច្នេះនៅពេលដែលអង្ករត្រឡប់ទៅមានតម្លៃដើមវិញដូចក្នុងរយៈពេល ២ ឆ្នាំមុន ធ្វើឱ្យការជួញដូរមានដំណើរការជាធម្មតាវិញ។

គួរជម្រាបថា រយៈពេល ៨ ខែ ឆមាសទី១ ឆ្នាំ២០២៤ ក្រុមហ៊ុន «City Rice Import Export» បាននាំចេញអង្ករប្រមាណជិត ៥ ម៉ឺនតោន ទៅកាន់ទីផ្សារអន្តរជាតិដូចជា ប្រទេសនៅសហភាពអឺរ៉ុប ប្រទេសចិន ម៉ាឡេស៊ី សិង្ហបុរី ឥណ្ឌូណេស៊ី អូស្ត្រាលី ណូវេហ្សេឡង់ ចក្រភពអង់គ្លេស បណ្ដាប្រទេសក្នុងទ្វីបអាហ្វ្រិក និងកោះ New Caledonia ដែលគិតជាទឹកប្រាក់សរុបចំនួន ៣៣ លានដុល្លារអាមេរិក ខណៈបរិមាណនាំចេញមានការកើនឡើងប្រមាណ ១៦% បើប្រៀបធៀបទៅរយៈពេលដូចគ្នាកាលពីឆ្នាំ២០២៣៕

The post រោងម៉ាស៊ីនកិនស្រូវធំមួយក្នុងស្រុកថ្មគោល សម្រេចការនាំចេញអង្ករជាង ៣ ម៉ឺនតោន ទៅទីផ្សារអន្តរជាតិ appeared first on Kampuchea Thmey Daily.

កម្ពុជារកចំណូលបានជាង $៤០០ លាន ពីការនាំចេញស្រូវ-អង្ករនា២ខែដំបូងឆ្នាំ ២០២៥

Din Thary — Wed, 12 Mar 2025 07:21:45 +0000

នៅក្នុងរយៈពេល ២ខែ ដំបូង ដើមឆ្នាំ២០២៥ កម្ពុជាសម្រេចបានការនាំចេញអង្ករជាង ១៣ ម៉ឺនតោន (១៣៥ ០៧៤) គិតជាទឹកប្រាក់បានចំនួន ១០៦ លានដុល្លារ ខណៈស្រូវចំនួន ១,៣៩ លានតោន គិតជាទឹកប្រាក់ជាង ៣១៣ លានដុល្លារ។

យោងតាមទិន្នន័យដែលចេញដោយអគ្គនាយកដ្ឋានកសិកម្ម បង្ហាញថា កម្ពុជាសម្រេចបានការនាំចេញអង្ករចំនួន ១៣៥ ០៧៤ តោន នៅក្នុងរយៈពេល ២ ខែដើមឆ្នាំ ២០២៥នេះ ពោលគឺនាំចេញតាមរយៈក្រុមហ៊ុនចំនួន ៤៤ ទៅកាន់គោលដៅចំនួន ៥១។

ក្នុងនោះទៅកាន់បណ្តាប្រទេសនៅក្នុងតំបន់អឺរ៉ុបចំនួន ២៥ បានបរិមាណអង្ករចំនួន ៧៣ ០៤៨ តោន គិតជាទឹកប្រាក់ចំនួន ៥៨.៥៣ លានដុល្លារសហរដ្ឋអាមេរិក។

កម្ពុជាក៏បាននាំចេញទៅកាន់ប្រទេសចិន និងហុងកុង ចំនួន ១៦ ៥០០ តោន គិតជាទឹកប្រាក់ចំនួន ១០,៤៧ លានដុល្លារ, ទៅកាន់ប្រទេសក្នុងអាស៊ាន ចំនួន ៤ ប្រទេស បានចំនួន ២៣ ២៩៧ តោន គិតជាទឹកប្រាក់ចំនួន ១៦,៦៦ លានដុល្លារ និងនាំចេញទៅកាន់គោលដៅ ២០ ប្រទេសផ្សេងទៀតមាន អាហ្វ្រិក មជ្ឈិមបូព៌ា អាមេរិក កាណាដា អូស្ត្រាលី និងញ៉ូហ្សេឡេន បានចំនួន ២២ ២២៩ តោន ដែលគិតជាទឹកប្រាក់ចំនួន ១៩,៨៧ លានដុល្លារ។

កម្ពុជានាំចេញប្រភេទអង្ករមួយចំនួនដូចជា អង្ករក្រអូបចំនួន ៨៦.០៣%, ប្រភេទអង្ករស ធម្មតា ៨.៦៥%, អង្ករចំហ៊ុយ ២.៩៩%, អង្ករសរីរាង្គចំនួន ១.៨៧% និងអង្ករផ្សេងៗចំនួន ០.៤៦% ។

ប្រទេសកម្ពុជា ក៏បាននាំចេញស្រូវចំនួន ១ ៣៩២ ១១៥ តោនស្រូវសើម ដែលគិតជាទឹកប្រាក់បានប្រមាណ ៣១៣ លានដុល្លារ៕

The post កម្ពុជារកចំណូលបានជាង $៤០០ លាន ពីការនាំចេញស្រូវ-អង្ករនា២ខែដំបូងឆ្នាំ ២០២៥ appeared first on Kampuchea Thmey Daily.

ទម្លាយរូបមន្តអំបុកខ្មែរបាត់ដំបងប្រើគ្រឿងផ្សំពិសេស គ្រោងវាយលុកទីផ្សារប្រទេសធំៗចំនួន ៣

Din Thary — Wed, 27 Dec 2023 01:54:01 +0000

កញ្ញា វាសនា វិច្ឆារ៉ាវ៉ា ប្រធានផ្នែកគ្រប់គ្រងក្រុមហ៊ុន «ហេង ច័ន្ទនី អង្គរមាស» បានគូសបញ្ជាក់ថា អំបុកខ្មែរ ៥ រសជាតិរបស់សហគ្រាសកំពុងត្រៀមនាំចេញទៅកាន់ទីផ្សារក្រៅប្រទេសធំៗចំនួន ៣ នាពេលឆាប់ៗខាងមុខនេះ។

បច្ចុប្បន្នសហគ្រាសបានកែច្នៃអំបុកមាន ៥ រសជាតិផ្សេងៗគ្នា ក្នុងនោះមានអំបុកសារាយសមុទ្រ, អំបុកផ្លែឈើចម្រុះ, អំបុកចេកបាត់ដំបង, អំបុកលាយគ្រឿង និងអំបុកធម្មជាតិ។

ប្រធានផ្នែកគ្រប់គ្រងក្រុមហ៊ុន ហេង ច័ន្ទនី អង្គរមាស ដែលមានទីតាំងស្ថិតក្នុងភូមិ រំចេកពីរ សង្កាត់រតនៈ ក្រុងបាត់ដំបង ខេត្តបាត់ដំបងបានថ្លែងមកកាន់ «កម្ពុជាថ្មី» ថា «អំបុកដែលធ្វើឡើងក្នុងសហគ្រាសមានរសជាតិខុសពីអំបុកធម្មតាដែលបុកដោយដៃ ដោយគិតគូរយ៉ាងខ្លាំងពីខ្សែចង្វាក់ផលិតកម្មគោរពទៅតាមស្តង់ដារ ISO និងប្រព័ន្ធ “សប្រាំ” ជាចាំបាច់ដើម្បីរក្សាគុណភាពសុវត្ថិភាព»។

ពាក់ព័ន្ធនឹងវត្ថុធាតុដើមដែលជួយឲ្យអំបុកទទួលបានគុណភាពនិងរសជាតិឆ្ងាញ់ ប្រធានគ្រប់គ្រងរូបនេះបានបង្ហើបថាដោយសារផលិតចេញពីពូជស្រូវពីរប្រភេទគឺពូជស្រូវសែនពិដោរ និងពូជស្រូវសែនក្រអូប ដែលសម្រិតសម្រាំងជាពូជស្រូវល្អបំផុត និងផ្លែឈើយកមកកែច្នៃរួមបញ្ចូលចេញជាអំបុកមានរសជាតិខុសប្លែកពីអំបុកធម្មតា។

ប្រធានគ្រប់គ្រងសហគ្រាសហេង ច័ន្ទនី អង្គរមាសបានឲ្យដឹងបន្ថែមថា ក្រៅពីការផ្គត់ផ្គង់តម្រូវការក្នុងស្រុក អំបុកខ្មែរ ៥ រសជាតិ របស់សហគ្រាសគ្រោងនឹងនាំចេញទៅកាន់ទីផ្សារប្រទេសធំៗចំនួន ៣ មានដួចជា ប្រទេសចិន ប្រទេសកូរ៉េ និងប្រទេសអូស្ត្រាលី។

ទន្ទឹមនេះ អ្នកស្រី ញ៉ែម ច័ន្ទនី អគ្គនាយកក្រុមហ៊ុន «ហេង ច័ន្ទនី អង្គរមាស» បានគូសបញ្ជាក់ថា អំបុកជាប្រភេទអាហារប្រពៃណីទំនៀមទម្លាប់ខ្មែរដែលមានតាំងពីយូរលង់ណាស់មកហើយ ហើយក៏ជាអាហារបម្រុងទ័ពដ៏សំខាន់ក្នុងពេលសឹកសង្រ្គាម។

ម្ចាស់សិប្បកម្មរូបនេះសង្កេតឃើញថា សម័យកាលបច្ចុប្បន្នការទទួលទានអំបុកមានការធ្លាក់ចុះខ្លាំង មានន័យថាអ្នកចូលចិត្តទទួលទានមានតែមនុស្សវ័យចាស់ ប៉ុន្តែចំពោះយុវជនជំនាន់ក្រោយៗហាក់ដូចជាមិនសូវមានការនិយមចូលចិត្ត។ ដូច្នេះដើម្បីជាការចំណែកលើកទឹកចិត្តឲ្យមានការចូលរួមពីសំណាក់អ្នកជំនាន់ក្រោយ និងអាចលើកស្ទួយអំបុកខ្មែរ ទើបអ្នកស្រីសម្រេចយកអំបុកខ្មែរមកកែច្នៃឲ្យមានការទាក់ទាញឡើងវិញ។ មួយវិញទៀត ក៏ចង់បង្ហាញថាអំបុកជាអាហារមួយប្រភេទដែលធ្វើឡើងចេញពីស្រូវរបស់ខ្មែរសុទ្ធសាធ។

សហគ្រាសហេង ច័ន្ទនី អង្គរមាស វិវត្តចេញពីអាជីវកម្មគ្រួសារតាំងពីឆ្នាំ ២០១៧ និងអាចឈានមកជាឧស្សាហកម្មដូចបច្ចុប្បន្ន ក្រៅពីមានកែច្នៃអំបុកក៏មានការផលិតនិងកែច្នៃអាហារក្រៀមជាច្រើនមុខទៀតមានដូចជា ត្រី មាន ៥ ប្រភេទមានត្រីឆ្ងាញ់ធម្មជាតិ, ត្រីឆ្ងាញ់ទន្លេសាប, ត្រីឆ្អើរបាត់ដំបង, ត្រីរសជាតិហិរ, ត្រីរសជាតិល្ង។ ម្សៅចេក ៤ មុខ ដូចជា ម្សៅចេក, កាហ្វេម្សៅចេក, ចេកល្ងសរ និងចេករសជាតិត្រី។ ម្ទេសកែច្នៃចេញដូចជា ម្ទេស ៣ ពណ៌ និងម្ទេសគ្រឿងពិសេសជាដើម សម្រាប់ធ្វើការផ្គត់ផ្គង់តម្រូវការទីផ្សារក្នុងស្រុក និងនាំចេញទៅកាន់ទីផ្សារក្រៅប្រទេស៕

The post ទម្លាយរូបមន្តអំបុកខ្មែរបាត់ដំបងប្រើគ្រឿងផ្សំពិសេស គ្រោងវាយលុកទីផ្សារប្រទេសធំៗចំនួន ៣ appeared first on Kampuchea Thmey Daily.

ខេត្តកំពតកំពុងល្បីមួយទៀត គឺដាំចេកលឿងនាំចេញទៅក្រៅប្រទេស

Din Thary — Thu, 16 Feb 2023 04:19:34 +0000

លោកម៉ៅ ធនិន អភិបាលនៃគណៈអភិបាលខេត្តកំពត ក្នុងសន្និសីទសារព័ត៌មានព្រឹកនេះបានអះអាងថា នាពេលបច្ចុប្បន្ននេះ ទីផ្សារផ្លែចេកខេត្តកំពតនាំចេញទៅលក់នៅទីផ្សារបរទេសហាក់មានសក្ដានុពលខ្លាំង ដោយក្នុងមួយខែៗ អាចនាំចេញរហូតចន្លោះពី ២ ០០០ តោន ទៅ ២ ៥០០តោន។

ថ្លែងនៅក្នុងសន្និសីទសារព័ត៌មាន លោក ម៉ៅ ធនិន បានមានប្រសាសន៍ ខេត្តកំពតជាខេត្តដែលមានភាពសម្បូរបែបខាងវិស័យកសិកម្ម ក៏ដូចជាការដាំដុះដំណាំសម្រាប់ការនាំចេញ។ ជាក់ស្តែងកាលដើមឡើយនៅក្នុងខេត្តកំពតតែងមានភាពល្បីល្បាញខាងដំណាំម្រេច ដែលមានទិន្នផលខ្ពស់សម្រាប់ការនាំចេញ។ ប៉ុន្តែមកដល់បច្ចុប្បន្ននេះ ខេត្តក៏មានដំណាំចេកមួយទៀតដែលកំពុងមានភាពរីកចម្រើនខ្លាំង សម្រាប់ការនាំចេញទៅកាន់ទីផ្សារបរទេស។

បើតាមលោក ចាន់ រិទ្ធិ ប្រធានមន្ទីរកសិកម្មខេត្តកំពតបានបញ្ជាក់ថា មានក្រុមហ៊ុនពីរកំពុងដាំដុះដំណាំចេកលឿងនាំចេញទៅក្រៅប្រទេស។ ក្រុមហ៊ុនទាំងពីរដែលដាំដុះលើផ្ទៃដីជាងមួយពាន់ហិកតា ក្នុងមួយឆ្នាំអាចនាំចេញបានជាង ២០ ម៉ឺនតោន។

ខេត្តកំពតមានល្បីល្បាញលើដំណាំទុរេន និងម្រេច។ ក្រៅពីដំណាំសក្តានុពលរបស់ខេត្ត ដំណាំចេកលឿងក៏កំពុងទទួលការពេញនិយម។ ដោយសារតែខេត្តកំពតជាខេត្តប៉ូលទេសចរណ៍ដ៏ទាក់ទាញ ដូច្នេះទិន្នផលដំណាំកសិកម្មស្ទើរតែទាំងអស់ដែលមាននៅក្នុងខេត្តផ្ទាល់ត្រូវបានផ្គត់ផ្គង់តម្រូវការនូវនឹងកន្លែង ក៏ដូចជាចំពោះភ្ញៀវទេសចរជាតិនិងអន្តរជាតិ៕

The post ខេត្តកំពតកំពុងល្បីមួយទៀត គឺដាំចេកលឿងនាំចេញទៅក្រៅប្រទេស appeared first on Kampuchea Thmey Daily.

កម្ពុជាចាប់ផ្ដើមផ្សព្វផ្សាយ ទេសចរណ៍ ទៅកាន់ទីផ្សារអន្តរជាតិ ផ្តោតលើខ្លឹមសារសុវត្ថិភាព

deth leng — Tue, 28 Sep 2021 06:02:40 +0000

ក្រសួងទេសចរណ៍បានដាក់ចេញនូវយុទ្ធនាការផ្សព្វផ្សាយទេសចរណ៍កម្ពុជា និងអំពាវនាវឱ្យផ្នែកឯកជនក្នុងវិស័យទេសចរណ៍ ចូលរួមផ្សព្វផ្សាយទៅកាន់ទីផ្សារពិភពលោកដោយផ្តោតលើខ្លឹមសារ «សុវត្ថិភាព» ស្របពេលដែលកម្ពុជាក៏ត្រៀមបើកទទួលទេសចរអន្តរជាតិឡើងវិញនាពេលឆាប់ៗខាងមុខផងដែរ។

ការប្រកាសយ៉ាងដូច្នេះ គឺនៅក្នុងសេចក្តីប្រកាសព័ត៌មានស្ដីពីលទ្ធផលនៃការប្រារព្ធពិធីអបអរសាទរ «ទិវាទេសចរណ៍ពិភពលោកឆ្នាំ២០២១» នៅថ្ងៃទី២៧ ខែកញ្ញា ឆ្នាំ២០២១។

ក្រសួងទេសចរណ៍បានអះអាងថា «បច្ចុប្បន្ន កម្ពុជាត្រូវបានទទួលស្គាល់ថា មានភាពជឿនលឿនលើការចាក់វ៉ាក់សាំង ដែលពិភពលោកចាត់ទុកថាជាយុទ្ធសាស្ត្រគន្លឹះនៃការបើកទេសចរណ៍ផ្ទៃក្នុង និងអន្តរជាតិពេញលេញឡើងវិញ។

ក្នុងបរិការណ៍នេះ ក្រសួងទេសចរណ៍នឹងផ្ដោតលើសុវត្ថិភាពជាសារគន្លឹះនៃការផ្សព្វផ្សាយទាក់ទាញទេសចរជាតិ និងអន្តរជាតិ»។

ក្រសួងក៏បានស្នើឲ្យភាគីពាក់ព័ន្ធ ជាពិសេសផ្នែកឯកជនត្រូវចូលរួមរៀបចំការផ្សព្វផ្សាយរបស់ខ្លួន ដោយផ្តោតសំខាន់លើខ្លឹមសារ «កម្ពុជាសុវត្ថិភាព-Cambodia Safe» ហើយបានអំពាវនាវឲ្យប្រតិបត្តិករពាក់ព័ន្ធចូលរួមអនុវត្តវិធានសុវត្ថិភាពទេសចរណ៍ ដើម្បីទទួលបាន «ឡាបែលវិធានសុវត្ថិភាពទេសចរណ៍» ដែលក្រសួងទេសចរណ៍បានដាក់ចុះរួចហើយនោះ។

ក្រសួងទេសចរណ៍បានស្នើឲ្យការីទេសចរណ៍ក្នុងស្រុកបង្កើនបន្ថែមទៀតនូវកញ្ចប់ទេសចរណ៍ប្លែកៗ តាមប្រធានបទផ្សេងៗ (Thematic Tour Package) ដូចជា ដំណើរទស្សនកិច្ចម្ហូបអាហារ ផ្លែឈើ កសិកម្ម ព្រឹត្តិការណ៍ជាក់លាក់មួយចំនួនតាមតំបន់ដែលមានការអនុញ្ញាតជាដើម។

ទន្ទឹមនឹងនេះ ដើម្បីផ្តល់ព័ត៌មានជាក់លាក់ និងទាន់ពេលវេលាអំពីសុវត្ថិភាពគោលដៅទេសចរណ៍ដល់ប្រជាពលរដ្ឋកម្ពុជា ក៏ដូចជាទេសចរអន្តរជាតិ នាយកដ្ឋានជំនាញនៃក្រសួងទេសចរណ៍ ត្រូវរៀបចំធ្វើបច្ចុប្បន្នភាពទិន្នន័យ និងព័ត៌មានស្តីពីការចាក់វ៉ាក់សាំង ការឆ្លង ការអនុវត្តស្តង់ដាប្រតិបត្តិ (SOP) ព្រមទាំងការអនុវត្តវិធានសុខាភិបាល និងរដ្ឋបាលតាមតំបន់គោលដៅទេសចរណ៍ ដោយបង្កើតឲ្យមានថ្នាលតាមដានគោលដៅទេសចរណ៍កម្ពុជា (Cambodia Destination Tracker) ដែលអាចភ្ជាប់ទៅនឹងគេហទំព័រផ្លូវការណាមួយ។

ក្រសួងទេសចរណ៍បានបង្ហាញការវាយតម្លៃទៀតថា «ប្រសិនបើថ្ងៃអនាគត មិនទាន់មានវ៉ាក់សាំងកូវីដ-១៩ចាក់ពីកំណើត នោះវិស័យទេសចរណ៍ត្រូវត្រៀមខ្លួនបង្កើតថ្មី រាប់ចាប់ពីការផលិតយន្តហោះ រហូតដល់ឧបករណ៍ចម្រោះខ្យល់ក្នុងទីតាំងអាជីវកម្មទេសចរណ៍ ដើម្បីទប់ស្កាត់ការឆ្លង។

យ៉ាងណាមិញ ក្រសួងទេសចរណ៍ ក៏ដូចជាស្ថាប័នជាតិ-អន្តរជាតិដទៃទៀតបានបង្ហាញក្ដីសង្ឃឹមថា «មនុស្សតែងរកឃើញដំណោះស្រាយ, វិបត្តិតែងមានទីបញ្ចប់»។

សូមជម្រាបថា បើតាមរបាយការណ៍ក្រសួងការពារជាតិ ដែលចេញផ្សាយនាថ្ងៃទី២៧ ខែកញ្ញា ឆ្នាំ២០២១នេះ បានឲ្យដឹងថា ការចាក់វ៉ាក់សាំងការពារជំងឺកូវីដ១៩ លើកទី១ ជូនកងទ័ព គ្រួសារកងទ័ព និងប្រជាពលរដ្ឋ បានចំនួនសរុប ២,៧៥៦,៨៤៤នាក់ ខណៈចាក់លើកទី២ បានចំនួន ២,៧២១,៦០៤នាក់៕

The post កម្ពុជាចាប់ផ្ដើមផ្សព្វផ្សាយ ទេសចរណ៍ ទៅកាន់ទីផ្សារអន្តរជាតិ ផ្តោតលើខ្លឹមសារសុវត្ថិភាព appeared first on Kampuchea Thmey Daily.