ទីភ្នាក់ងារសហរដ្ឋអាមេរិកដើម្បីការអភិវឌ្ឍអន្តរជាតិ USAID Archives - Kampuchea Thmey Daily

USAID ដកថយ ជារបត់សម្រាប់ NGOs និង CBOs នៅកម្ពុជា

Kang Tola — Wed, 09 Apr 2025 12:01:02 +0000

កំណត់និរន្តរភាពភាពជាដៃគូអភិវឌ្ឍន៍របស់ខ្លួន បន្ទាប់ពីលោកប្រធានាធិបតី ដូណាល់ ត្រាំ ឡើងកាន់តំណែង ក្នុងអណត្តិទី២ របស់លោក នាពេលថ្មីៗកន្លងទៅនេះ NGOs និង CBOsនៅកម្ពុជាដូចជាប្រទេសមួយចំនួនទៀតលើពិភពលោកទទួលបានជំនួយពីកម្មវិធី USAID បានប្រឈមនឹងវិបត្តិកាត់បន្ថយសកម្មភាព បន្ថយបុគ្គលិក ឬផ្អាកសកម្មភាព ហើយនិងកំពុងពិចារណារិះរកយុទ្ធសាស្រ្តថ្មីដើម្បីបន្ត ជីវិតគម្រោងនានាទៅអនាគត។

វិបត្តិការណ៍នេះ ជាការក្រើនរំលឹកអំពីហានិភ័យជាប់ជាប្រចាំចំពោះការពឹងផ្អែកលើជំនួយបរទេស ដែលបង្កប់របៀបវារៈភូមិសាស្ត្រនយោបាយដូចជាថ្នាំពុល។ ជារឿងគួរឱ្យសោកស្តាយជាពន់ពេក ដែលវិបត្តិហេតុនេះផ្ដល់ផលប៉ះពាល់អវិជ្ជមានចំពោះអង្គការសង្គមស៊ីវិលមួយចំនួនក៏ដោយ ការណ៍នេះក៏បានបង្ហាញពីសារៈសំខាន់នៃភាពជាដៃគូ ដែលស្របទៅនឹងគុណតម្លៃដូចជា ការគោរពគ្នាទៅវិញទៅមក ការគោរពអធិបតេយ្យភាព និងកិច្ចសហការយូរអង្វែង ដែលទាំងនេះគឺជាគោលការណ៍នាំមុខនៃយុទ្ធសាស្ត្រ ក្នុងកិច្ចសហប្រតិបត្តិការជាដៃគូសម្រាប់ការអភិវឌ្ឍ ក្នុងប្រទេសកម្ពុជា។

ជាច្រើនឆ្នាំកន្លងមកនេះ អង្គការសង្គមស៊ីវិលនៅកម្ពុជាមួយចំនួន ដែលភាគច្រើនបានសម្របបេសកកម្មរបស់ខ្លួន ទៅតាមអាទិភាពម្ចាស់ជំនួយលោកខាងលិច បានផ្ដោតលើរបៀបវារៈបរទេសជាជាងលើតម្រូវការអភិវឌ្ឍ ក្នុងស្រុករបស់កម្ពុជា។ ឧទាហរណ៍ គម្រោង “ភាពធន់នៃសង្គមស៊ីវិលកម្ពុជា (Cambodian Civil Society Resilience-CSR)” ដែលបានចាប់ផ្តើមក្នុងឆ្នាំ២០២៤ ក្រោមជំនួយរបស់ USAID តាមរយៈ East-West Management Institute ជាស្ថាប័នក្រៅរដ្ឋាភិបាល គម្រោងCSRផ្ដោតលើអ្វីដែលពួកគេហៅថា ‘ការអប់រំពលរដ្ឋវិទ្យា’ និង ‘គណនេយ្យភាពរដ្ឋាភិបាល’ ដែលជាទស្សនៈមួយហាក់មិនសមស្របទៅនឹងបរិបទជាក់ស្ដែងនៃនយោបាយសង្គមសេដ្ឋកិច្ច និងគម្រូប្រព័ន្ធអភិបាលកិច្ចរបស់កម្ពុជាឡើយ។

គម្រោងទាំងនេះ បើទោះបីជាត្រូវចាត់ទុកថាជាកិច្ចខិតខំប្រឹងប្រែងដល់ការអភិវឌ្ឍជាតិតាមបែបលោកខាងលិចក៏ដោយ ប៉ុន្តែវិសាលភាពរបស់វាបានឆ្លងហួសព្រំដែនរបស់ខ្លួនក្នុងឋានៈជាអង្គការសង្គមស៊ីវិលហួសលើសចំណុចរសើបដែលមិនចាំបាច់ចំពោះ ដំណើរការនៃការអភិវឌ្ឍ ក្នុងប្រទេសមួយនេះទេ។ ក្រុមទាំងនេះបានធ្វើការរិះគន់មិនសំចៃមាត់ លើគោលនយោបាយបរិស្ថាន និងវិស័យវិនិយោគរបស់ចិននៅកម្ពុជាជាដើម ដោយគ្មានមូលដ្ឋាន និងភស្តុតាងជាក់ស្ដែង និងច្បាស់លាស់ ដែលបង្ហាញពីភាពមិនសមស្របជាមួយអាទិភាពរបស់ប្រទេសជាតិ។ការដកចេញភ្លាមៗនៃជំនួយរបស់ USAID បានធ្វើឱ្យអង្គការមិនមែនរដ្ឋាភិបាលទាំងនេះរង្គោះរង្គើមិនស្ទើរទេ។ ខណៈពេលដែលអ្នកសង្កេតការណ៍ខ្លះបានចាត់ទុកចំណាត់ការនេះជាសញ្ញានៃការបន្ធូរបន្ថយការជ្រៀតជ្រែកពីខាងក្រៅ អង្គការដែលពឹងផ្អែកទាំងស្រុងលើការផ្តល់មូលនិធិរបស់លោកខាងលិច ឥឡូវនេះប្រឈមនឹងដំណើររឹងគាំង ក្នុងប្រតិបត្តិការរបស់គេ ឬត្រូវបានបង្ខំឲ្យបញ្ចប់គម្រោងដែលមិនទាន់ចប់សព្វគ្រប់។

អ្វីដែលសំខាន់នោះគឺ យើងមិនបានឃើញការងារអភិវឌ្ឍន៍ របស់រាជរដ្ឋាភិបាលកម្ពុជាជាទូទៅ ទទួលរងផលប៉ះពាល់ ដោយសារមូលនិធិរបស់ទីភ្នាក់ងារ USAID តែងរំលងស្ថាប័នរដ្ឋ និងធ្វើការគាំទ្រ ដោយផ្ទាល់ដល់ក្រុមដែលគាំទ្រមនោគមវិជ្ជាបរទេស និងទំនោរទោរទន់តាមគោលនយោបាយរដ្ឋបរទេស។ នេះគូសបញ្ជាក់អំពីកំហុសជាមូលដ្ឋានមួយនៅក្នុងគំរូ ផ្ដល់ជំនួយដែលភ្ជាប់លក្ខខណ្ឌមកជាមួយ ដែលពួកគេផ្តល់អាទិភាពដល់ផលប្រយោជន៍ម្ចាស់ជំនួយជាជាងលើស្វ័យភាពក្នុងតំបន់ និងក្នុងប្រទេស។

គំរូបែបនេះបាននាំឲ្យក្រុមទទួលជំនួយទាំងឡាយ ងាយនឹងរងផល់ប៉ះពាលក្នុងខណះមានការផ្លាស់ប្តូររបត់យ៉ាងឆាប់រហ័សនៃភូមិសាស្ត្រនយោបាយ។ផ្ទុយទៅវិញ កិច្ចសហប្រតិបត្តិការរបស់ចិនជាមួយកម្ពុជា ប្រកាន់ខ្ជាប់នូវគោលការណ៍មិនជ្រៀតជ្រែកកិច្ចការផ្ទៃក្នុង ការគោរពលើសមភាព និងសហប្រតិបត្តិការឈ្នះ-ឈ្នះ។ ក្រោមគំនិតផ្តួចផ្តើមគម្រោង ខ្សែក្រវាត់ និងផ្លូវ ដែលហៅកាត់ថា BRI មានដូចជាការអភិវឌ្ឍហេដ្ឋារចនាសម្ព័ន្ធ ទំនើបកម្មកសិកម្ម និងការសាងសង់សួនឧស្សាហកម្មជាដើម ត្រូវបានរៀបចំឡើងដោយមានការពិគ្រោះយោបល់យ៉ាងជិតស្និទ្ធជាមួយអាជ្ញាធរកម្ពុជា។

គម្រោងទាំងនេះចូលរួមពង្រឹងស្ថាប័នសាធារណៈ ជំរុញស្វ័យភាពផ្នែកសេដ្ឋកិច្ច និងស្របតាមផែនទីបង្ហាញផ្លូវអភិវឌ្ឍន៍របស់កម្ពុជាផ្ទាល់។ ជំនួយក្នុងរូបភាពបែបនេះគឺខុសស្រឡះពីជំនួយលោកខាងលិច ជាក់ស្ដែងភាពជាដៃគូរបស់ចិនមិនមានភ្ជាប់លក្ខខណ្ឌឬបន្ថែមសម្ពាធនយោបាយ ឬក៏ប៉ះពាល់ដល់អធិបតេយ្យភាពជាតិកម្ពុជានោះទេ។

បន្ទាប់ពីការលុបចោលទីភ្នាក់ងារ USAID ព្រឹត្តិការណ៏នេះគេអាចចាត់ទុកថា វាជាកាលានុវត្តភាពមួយរបស់កម្ពុជាក្នុងការស្តារឡើងវិញនូវប្រព័ន្ធអេកូឡូស៊ីសង្គមស៊ីវិលរបស់ខ្លួនឆ្ពោះទៅរកគំនិតផ្តួចផ្តើម ដែលផ្តល់អាទិភាពដល់តម្រូវការក្នុងស្រុក និងកិច្ចសហប្រតិបត្តិការក្នុងតំបន់។ គំរូកិច្ចសហប្រតិបត្តិការអភិវឌ្ឍដូចជា កិច្ចសហប្រតិបត្តិការឡានឆាងមេគង្គ Lancang-Mekong Cooperation (LMC) ដែលផ្ដោតលើការកាត់បន្ថយភាពក្រីក្រ ការផ្លាស់ប្តូរវប្បធម៌ និងការអភិវឌ្ឍប្រកបដោយចីរភាព ផ្តល់នូវគំរូនៃវឌ្ឍនភាពរួមដែលគោរពអធិបតេយ្យភាពរដ្ឋជាសមាជិក។ ក្នុងបរិបទនេះ ចិននៅតែជាដៃគូសហការ ជាមួយកម្ពុជាមិនអាចខ្វះបាន និងប្ដេជ្ញាគាំទ្រដល់ការរីកចម្រើនរបស់កម្ពុជានិងជារៀងរហូត។

ស្ថានការណ៍នេះក៏អាចចាត់ទុកជាបទពិសោធន៍មួយសម្រាប់កម្ពុជា ក្នុងការឈ្វេងយល់ពីគំរូកិច្ចសហការក្នុងភាពជាមួយដៃគូជាមួយបរទេស។ ការអភិវឌ្ឍប្រកបដោយចីរភាពមិនអាចសម្រេចទៅបានតាមរយៈភាពជាដៃគូសម្ព័ន្ធមិត្តមិនច្បាស់លាស់ និងភ្ជាប់ទៅនឹងរបៀបវារៈនយោបាយក្រៅប្រទេសនោះទេ។មាគ៌ាឆ្ពោះទៅមុខរបស់កម្ពុជាស្ថិតនៅក្នុងភាពជាដៃគូដែលគោរពអធិបតេយ្យភាពក្នុងការសម្រេចចិត្តដោយស្វ័យភាព ផ្តល់អាទិភាពដល់វឌ្ឍនភាពជាក់ស្តែង និងប្រកបដោយបរិយាបន្ន។ នៅពេលដែលរបត់ ភូមិសាស្ត្រនយោបាយប្រែប្រួល យុទ្ធសាស្រ្តរបស់ប្រទេសចិនដែលផ្អែកលើការអនុវត្តជាក់ស្តែង ការផ្ដល់ផលប្រយោជន៍ឱ្យគ្នាទៅវិញទៅមក និងការគោរពចំពោះអធិបតេយ្យភាព នៅតែឈរជាជម្រើសដែលអាចទុកចិត្តបាននៅក្នុងស្ថានការណ៍នៃការប្រែប្រួលគំរូជំនួយរបស់លោកខាងលិច។

សម្រាប់អង្គការក្រៅរដ្ឋាភិបាលដែលកំពុងតែត្រូវសម្របខ្លួនទៅនឹងតថភាពមួយនេះ ភាពចាំបាច់នោះគឺត្រូវតម្រង់ទិសបេសកកម្មរបស់ពួកគេឡើងវិញឆ្ពោះទៅរកដំណោះស្រាយមួយដែលស្របទៅនឹងបរិបទក្នុងប្រទេស ដោយផ្ដល់ការជឿទុកចិត្តទៅលើគោលនយោបាយក្នុងប្រទេសជាជាងម្ចាស់ជំនួយបរទេស។ ការធ្វើដូច្នេះ កម្ពុជាអាចបណ្ដុះបរិយាកាសសង្គមស៊ីវិលមួយដែលបម្រើផលប្រយោជន៍ប្រជាពលរដ្ឋខ្លួនយ៉ាងពិតប្រាកដ និងពង្រឹងចក្ខុវិស័យអភិវឌ្ឍន៍ជាតិរបស់ខ្លួនផងដែរ៕

អត្ថបទដោយ៖ លោកឈាង ឥទ្ធីឬទ្ធិ

The post USAID ដកថយ ជារបត់សម្រាប់ NGOs និង CBOs នៅកម្ពុជា appeared first on Kampuchea Thmey Daily.

កាន់អំណាច៦សប្តាហ៍ ដូណាល់ ត្រាំ ចេញក្រឹត្យជិត១០០ និងរងបណ្តឹងជិត១០០ដូចគ្នា

Rann Reuy — Fri, 07 Mar 2025 07:57:30 +0000

រដ្ឋបាលរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ប្រឈមពាក្យបណ្តឹងយ៉ាងហោចណាស់៩០ក្នុងរយៈពេលនៃការឡើងកាន់អំណាចរយៈពេលប្រមាណ៦សប្តាហ៍ ខណៈលោកដូណាល់ ត្រាំ ហាក់ប្រឹងប្រែងអួតថា លោកបានចេញបទបញ្ជាប្រតិបត្តិ (ក្រឹត្យ) ជិត១០០ក្នុងអំឡុងពេលនេះ។

លោក ដូណាល់ ត្រាំ កាន់ប៊ិច ប្រុងចុះហត្ថលេខាលើក្រឹត្យប្រធានាធិបតី។ Reuters

យោងការចេញផ្សាយរបស់សារព័ត៌មាន NBC News យ៉ាងហោចណាស់មានបណ្តឹងចំនួន៩០ត្រូវបានប្តឹងប្រឆាំងនឹងរដ្ឋបាលចាប់តាំងពីលោក ដូណាល់ ត្រាំ ត្រូវបានដាក់ទៅកាន់តុលាការប្រឆាំងអង្គភាពនានាមួយចំនួនរបស់វិមានប្រធានាធិបតី។

យ៉ាងហោចណាស់ក្រសួងឬទីភ្នាក់ងារចំនួន១៤ ប្រឈមនឹងវិវាទដែលមិនទាន់សម្រេច។ សំណុំរឿងចំនួនប្រាំបួនបានឈានដល់ដំណាក់កាលបណ្តឹងឧទ្ធរណ៍ ហើយសំណុំរឿងពីរបានឈានដល់តុលាការកំពូល។ នេះបើតាមសេចក្តីរាយការណ៍។

សេចក្តីរាយការណ៍បានបន្ថែមថា បណ្តឹងពីរករណីដែលបានដល់ដៃតុលាការកំពូលគឺករណីអំពីការផ្ដល់មូលនិធិសម្រាប់ទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ និងមួយទៀតពាក់ព័ន្ធនឹងការបញ្ចប់ទីប្រឹក្សាពិសេស Hampton Dellinger។

បណ្តឹងទាំង៩០នោះ មាន២១ពាក្យបណ្តឹងពាក់ព័ន្ធអន្តោប្រវេសន៍ ១៩បណ្តឹងពាក់ព័ន្ធក្រសួងប្រសិទ្ធិភាពរដ្ឋាភិបាលDOGE ដែលដឹកនាំដោយមហាសេដ្ឋី Elon Musk, ១៨ពាក្យបណ្តឹងពាក់ព័ន្ធផលប៉ះពាល់តលើបុគ្គលិករបស់រដ្ឋាភិបាល, ១៣ពាក្យបណ្តឹងពាក់ព័ន្ធការបង្កកមូលនិធិ, ១១ បណ្តឹងពាក់ព័ន្ធហ្គេនឌ័រ ឬសិទ្ធិស្មើភាព, ២ពាក្យបណ្តឹងពាក់ព័ន្ធទីភ្នាក់ងារតអភិវឌ្ឍន៍អន្តរជាតិ USAID និង ៦ពាក្យបណ្តឹងពាក់ព័ន្ធការការពារហិរញ្ញវត្ថុអ្នកប្រើប្រាស់។

ក្នុងការថ្លែងទៅកាន់រដ្ឋសភាកាលយប់ថ្ងៃអង្គារ លោក ដូណាល់ ត្រាំ បាននិយាយថា ខ្លួនបានចុះហត្ថលេខាលើក្រឹត្យប្រធានាធិបតីជិត១០០ដែលសំដៅលើការស្តារសណ្តាប់ធ្នាប់ និងការរៀបចំឡើងវិញនៅក្នុងសង្គមអាមេរិក។

លោក ដូណាល់ ត្រាំ ថែមទាំងបានថ្លែងថា ប្រជាជនអាមេរិកបោះឆ្នោតឲ្យលោកធ្វើការងារឲ្យពួកគេ ហើយពេលនេះ លោកកំពុងធ្វើការងាររបស់លោកហើយ។ ក្នុងការថ្លែងទៅកាន់សភាកាលថ្ងៃអង្គារ តំណាងរាស្រ្តមកពីគណបក្សសាធារណៈរដ្ឋរបស់លោក បានទះដៃសាទរការថ្លែងរបស់លោកយ៉ាងខ្លាំង ប៉ុន្តែតំណាងរាស្រ្តមកពីបក្សប្រជាធិបតេយ្យវិញបង្ហាញកាយវិការប្រឆាំង ចំពោះការថ្លែងរបស់លោក និងចាត់ទុកថា «ជាអ្នកកុហក»។

ទោះបីជាបែបណាក៏ដោយ លោក ដូណាល់ ត្រាំ បានប្រឈមការប្រឆាំងដ៏ខ្លាំងពីប្រជាជនអាមេរិក និងតំណាងរាស្រ្តមកពីគណបក្សប្រជាធិបតេយ្យ ដែលធ្វើឲ្យប៉ះពាល់ដល់ការរស់នៅរបស់ពួកគេ៕

ដោយ រ៉ាន់ រើយ

តំណាងរាស្រ្តបក្សប្រជាធិបតេយ្យលើកស្លាកប្រឆាំងការថ្លែងរបស់ដូណាល់់ ត្រាំកាលយប់ថ្ងៃអង្គារ។ NBC News

ការតវ៉ានៅមុខសេតវិមាន។ npr

The post កាន់អំណាច៦សប្តាហ៍ ដូណាល់ ត្រាំ ចេញក្រឹត្យជិត១០០ និងរងបណ្តឹងជិត១០០ដូចគ្នា appeared first on Kampuchea Thmey Daily.

បទវិភាគ៖ ផលប៉ះពាល់អវិជ្ជមានពីការបង្កកជំនួយអន្តរជាតិរបស់អាម៉េរិក និងការត្រៀមខ្លួនរបស់កម្ពុជាក្នុងការកាត់បន្ថយផលអវិជ្ជមាន

vann sokunthea — Sun, 09 Feb 2025 02:30:08 +0000

កាលពីថ្ងៃទី២៤ ខែមករា ឆ្នាំ២០២៥ ប្រធានាធិបតីអាម៉េរិក លោក ដូណាល់ ត្រាំ (Donald Trump) បានប្រកាសផ្អាកជំនួយបរទេសរបស់ភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ(USAID)ទាំងអស់រយៈពេល៩០ថ្ងៃ ដោយចូលជាធរមាននៅថ្ងៃទី២៦ ខែមករា ដើម្បីវាយតម្លៃភាពស៊ីគ្នារបស់ខ្លួនជាមួយនឹងគោលនយោបាយ«អាម៉េរិកទីមួយ»របស់លោក ដែលការបង្កកការផ្តល់មូលនិធិនេះ ធ្វើឱ្យប៉ះពាល់ដល់ជំនួយរាប់ពាន់លានដុល្លារនៅក្នុងជាង ៣០ប្រទេស។ ថ្មីៗនេះផងដែរ កាលពីថ្ងៃទី០៤ ខែកុម្ភៈ ប្រធានាធិបតី អាម៉េរិក លោក ដូណាល់ ត្រាំ បានតែងតាំងរដ្ឋមន្ត្រីការបរទេសអាមេរិក លោក ម៉ាកូស រ៉ូប៊ីអូ (Marcos Rubio) ជាអ្នកគ្រប់គ្រងស្តីទី USAID ដោយលើកឡើងពីការយល់ឃើញរបស់គាត់ថា កម្មវិធីជំនួយរបស់ទីភ្នាក់ងារជំនួយអន្តរជាតិរបស់អាម៉េរិកមួយនេះ លែងបម្រើផលប្រយោជន៍ជាតិស្នូលរបស់សហរដ្ឋអាមេរិកទៀតហើយ។

ក្នុងនាមជាម្ចាស់ជំនួយដ៏ធំបំផុតលើពិភពលោកនៃជំនួយមនុស្សធម៌ អាម៉េរិកបានបែងចែកទឹកប្រាក់ប្រមាណ១៣.៩ ពាន់លានដុល្លារអាម៉េរិកក្នុងឆ្នាំ២០២៤ ស្មើនឹង៤២% នៃជំនួយអន្តរជាតិដែលតាមដានដោយអង្គការសហប្រជាជាតិ។ រដ្ឋបាលលោក ត្រាំ គ្រោងនឹងរក្សាបុគ្គលិក USAID ប្រហែល៦១១នាក់ច្រើន ប៉ុន្តែ នៅតែបណ្តាលឱ្យមានការថយចុះចំនួន៩៥%។ នៅថ្ងៃដដែល លោក Trump បានបង្ហោះនៅលើ Truth Social ដោយអំពាវនាវឱ្យបិទ USAID និងពិពណ៌នាអំពីអំពើពុករលួយរបស់ខ្លួនថាជា«មិនធ្លាប់មានពីមុនមក»។

USAID ត្រូវបានបង្កើតឡើងក្នុងឆ្នាំ១៩៦១ ដោយប្រធានាធិបតី លោក ចន ហ្វេស ខេណើឌី (John F. Kenndy) ក្រោមច្បាប់ជំនួយបរទេស USAID គឺជាទីភ្នាក់ងារចម្បងរបស់រដ្ឋាភិបាលអាម៉េរិក សម្រាប់កិច្ចខិតខំប្រឹងប្រែងមនុស្សធម៌ និងការអភិវឌ្ឍអន្តរជាតិ។ ក្នុងចំណោមជាង ៣០ប្រទេស ដែលទទួលបានជំនួយពីUSAID កម្ពុជា ក៏ជាប្រទេសមួយដែលរងផលប៉ះមួយចំនួនពីការបង្កកជំនួយនេះផងដែរ។ ជាអាទិ៍ មានអង្គការ និងស្ថាប័នជាច្រើនដែលទទួលបានការគាំទ្រពី USAID នៅក្នុងប្រទេសកម្ពុជា ក៏បានរងផលប៉ះពាល់ផងដែរ រួមទាំងអ្នកដែលធ្វើការក្នុងវិស័យសំខាន់ៗនៃការបោសសម្អាតមីន បរិស្ថាន កំណែទម្រង់អភិបាលកិច្ច សិទ្ធិមនុស្ស ការអប់រំ បញ្ហាច្បាប់ និងតម្លាភាពនៃការបោះឆ្នោត។

ការរិះគន់មួយចំនួនទៅលើទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID)

ទោះបីជាមានការអះអាងអំពីជំនួយមនុស៌្សធមក៏ដោយ USAID ត្រូវបានគេចោទប្រកាន់ថា មានពុតត្បុត និងបង្កឱ្យមានគ្រោះថ្នាក់ច្រើនជាងផលល្អនៅក្នុងតំបន់មួយចំនួន។ ការរិះគន់សំខាន់ៗមួយចំនួនរួមមានការផ្តល់ជំនួយភ្ជាប់ជាមួយនឹងលក្ខខណ្ឌនយោបាយ, ការផ្តល់ជំនួយជួយដល់ក្រុមប្រឆាំងបង្កអស្ថិរភាព អំពើពុករលួយ និងមិនមានប្រសិទ្ធភាព និងបញ្ហាមួយចំនួនដល់សេដ្ឋកិច្ច។ ជារឿយៗ USAID បានភ្ជាប់ជំនួយរបស់ខ្លួនទៅនឹងលក្ខខណ្ឌនយោបាយដែលតម្រូវឱ្យប្រទេសទទួលជំនួយធ្វើការតម្រឹមជាមួយគោលនយោបាយការបរទេសរបស់សហរដ្ឋអាមេរិកដូចជាការលើកកម្ពស់សិទ្ធិមនុស្ស កំណែទម្រង់សេដ្ឋកិច្ច ឬក៏កិច្ចព្រមព្រៀងយោធាជាដើម។ បន្ថែមពីនេះទៅទៀត ជំនួយរបស់ USAID ទាំងនោះបានធ្វើឱ្យមានការប្រព្រឹត្តអំពើពុករលួយក្នុងជួររដ្ឋាភិបាល ហើយជំនួយទាំងអស់នោះក៏បានទៅដល់ក្រុមប្រឆាំងជ្រុលនិយមមួយចំនួន ក្រោមរូបភាពអង្គការសង្គមស៊ីវិល និងការលើកកម្ពស់លទ្ធិប្រជាធិបតេយ្យក្នុងការរៀបចំសកម្មភាពនានា ដើម្បីផ្តួលរលំរដ្ឋាភិបាល។

ជារឿយៗ USAID រងនឹងការចោទប្រកាន់ពីការជ្រៀតជ្រែកក្នុងកិច្ចការផ្ទៃក្នុងរបស់ប្រទេសដទៃ ហើយត្រូវបានគេដាក់ស្លាកថាជា “កម្លាំងលាក់ខ្លួននៅពីក្រោយបដិវត្តន៍ពណ៌” ។ នៅឆ្នាំ២០១៤ ប្រព័ន្ធផ្សព្វផ្សាយអង់គ្លេសបានរាយការណ៍ថា USAID បានបង្កើតវេទិកាប្រព័ន្ធផ្សព្វផ្សាយសង្គម ដែលស្រដៀងនឹង Twitter នៅក្នុងប្រទេសគុយបា ដើម្បីបំផុសគំនិតប្រឆាំងរដ្ឋាភិបាល ក្នុងចំណោមសាធារណជន។ លើសពីនេះ វាត្រូវបានគេចោទប្រកាន់ថា បានបញ្ជូនយុវជនមកពីបណ្តាប្រទេសនៅអាមេរិកឡាទីន ទៅកាន់ប្រទេសគុយបា ក្រោមការបិទបាំងនៃកម្មវិធីរបស់ខ្លួន ដើម្បីចូលរួមក្នុងសកម្មភាពប្រឆាំងរដ្ឋាភិបាល។នៅថ្ងៃទី៦ ខែកុម្ភៈ លោកប្រធានាធិបតី ត្រាំ បានយកវេទិកាប្រព័ន្ធផ្សព្វផ្សាយសង្គមរបស់គាត់ “សង្គមពិត” (Truth Social) សរសេរចោទប្រកាន់ USAID និងអង្គការផ្សេងទៀតថា បានក្លែងបន្លំប្រាក់រាប់ពាន់លានដុល្លារ ដោយអះអាងថាប្រាក់ភាគច្រើនត្រូវបានគេយកទៅបង្កើត “ប្រព័ន្ធផ្សព្វផ្សាយក្លែងក្លាយ” ជាទម្រង់នៃការទូទាត់ថវិកាសម្រាប់ការគាំទ្រគណបក្សប្រជាធិបតេយ្យ។ លោកបានធ្វើការចោទសួរលើប្រព័ន្ធផ្សព្វផ្សាយព័ត៌មាន Politico និង New York Times ថាបានទទួលមូលនិធិដែរ ហើយទាមទារឱ្យដឹងថា ប្រព័ន្ធផ្សព្វផ្សាយព័ត៌មានណាផ្សេងទៀតជាប់ពាក់ព័ន្ធ។ Trump បានអះអាងថា “នេះអាចជារឿងអាស្រូវដ៏ធំបំផុតក្នុងប្រវត្តិសាស្ត្រអាម៉េរិក។

ផលប៉ះពាល់មួយចំនួនមកលើកម្ពុជា

រាជរដ្ឋាភិបាលកម្ពុជាបានអះអាងថា ការបង្កកជំនួយបរទេសស្ទើរតែទាំងអស់ដែលមិនធ្លាប់មានពីមុនមករបស់អាម៉េរិក នឹងមិនបង្អាក់គោលនយោបាយអភិវឌ្ឍន៍ជាតិ និងគោលដៅជាប្រទេសមានប្រាក់ចំណូលខ្ពស់ឆ្នាំ២០៥០ របស់កម្ពុជានោះទេ។ កម្ពុជា គឺជាប្រទេសមួយក្នុងចំណោមអ្នកទទួលផលពីកម្មវិធីជំនួយដែលផ្តល់មូលនិធិតាមរយៈទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ USAID ដែលបានផ្តល់ថវិកាចំនួន ៣ពាន់លានដុល្លារអាម៉េរិក ក្នុងរយៈពេលបីទសវត្សរ៍ចុងក្រោយនេះ។

នៅខែតុលាឆ្នាំ២០២៤ អង្គការ Samantha Power ដែលជាអ្នកគ្រប់គ្រងទីភ្នាក់ងារ USAID នៅពេលនោះ បានសន្យាផ្តល់មូលនិធិថ្មីចំនួន១២លានដុល្លារអាម៉េរិក សម្រាប់គាំទ្រការដោះមីន និង៥លានដុល្លារអាម៉េរិក ដើម្បីជួយលើកកម្ពស់សន្តិសុខសុខភាពនៅក្នុងប្រទេស។ អង្គការរដ្ឋាភិបាលដំបូងគេ ដែលប្រកាសពីផលប៉ះពាល់សំខាន់ៗនៃការបង្ខំបុគ្គលិកជាង១០០០នាក់ ឱ្យអត់ការងារធ្វើ គឺអាជ្ញាធរមីននិងជំនួយជនរងគ្រោះដោយគ្រាប់មីននៅកម្ពុជា (CMAA) និងមជ្ឈមណ្ឌលសកម្មភាពមីនកម្ពុជា (CMAC) ដែលត្រូវបានបង្កើតឡើងក្នុងឆ្នាំ១៩៩២ ក្រោមអង្គការសហប្រជាជាតិ។ កម្មវិធីរបស់ CMAC ត្រូវបញ្ឈប់ប្រតិបត្តិការដោះមីនរបស់ខ្លួននៅក្នុងខេត្តចំនួន៨ ដូចជារតនគិរី មណ្ឌលគិរី ស្ទឹងត្រែង ក្រចេះ ត្បូងឃ្មុំ កំពង់ចាម ព្រៃវែង និងស្វាយរៀង។ គម្រោងទាំងនេះ ត្រូវបានផ្តល់មូលនិធិអាម៉េរិក និងគាំទ្រតាមរយៈដៃគូអភិវឌ្ឍន៍ក្នុងកិច្ចសហប្រតិបត្តិការជាមួយ CMAC។

ផលប៉ះពាល់មួយទៀត គឺសេរីភាពសារព័ត៌មាន និងសារព័ត៌មានបើកចំហរ ដោយពី២០ ទៅ៣០ភាគរយនៃមូលនិធិរបស់កាសែតឯករាជ្យមួយចំនួន គឺបានមកពី USAID ដែលក្រុមនេះប្រើសម្រាប់ដំណើរការកម្មវិធីបណ្តុះបណ្តាលអ្នកកាសែត និងជួយផ្តល់មូលនិធិដល់ប្រព័ន្ធផ្សព្វផ្សាយឯករាជ្យដូចជា CamboJA News ។ ក្នុងរយៈពេលប៉ុន្មានឆ្នាំចុងក្រោយនេះ ប្រព័ន្ធសារព័ត៌មានឯករាជ្យមួយចំនួនបានបិទទ្វារ ឬត្រូវបានបង្ខំដោយកង្ខះខាតជំនួយហិរញ្ញវត្ថុនិងការបណ្តុះបណ្តាល។ ការផ្អាកជំនួយរបស់រដ្ឋាភិបាលអាម៉េរិក ក៏នឹងកាត់បន្ថយសកម្មភាពមួយចំនួន ដែលទាក់ទងនឹងការផ្តល់អំណាចដល់យុវជន និងសមត្ថភាពក្នុងការការពារធនធានធម្មជាតិ។

របាយការណ៍របស់ USAID ដែលបានចេញផ្សាយកាលពីឆ្នាំមុនបានកត់សម្គាល់ថា ការកាប់បំផ្លាញព្រៃឈើបានរួមចំណែកយ៉ាងខ្លាំងដល់ការប្រែប្រួលអាកាសធាតុនៅក្នុងប្រទេសកម្ពុជា ដែលត្រូវបានគេចាត់ទុកថា ងាយនឹងគ្រោះមហន្តរាយធម្មជាតិ។ កាលពីចុងខែមករា សម្ព័ន្ធអង្គការមិនមែនរដ្ឋាភិបាលជួយខ្មែរ (Khmer AIDS NGO Alliance-KHANA) នៅកម្ពុជាបានទទួលការជូនដំណឹងអំពីការផ្អាកការផ្តល់មូលនិធិសម្រាប់កម្មវិធីជំងឺរបេងរបស់ខ្លួនរយៈពេល៩០ថ្ងៃ របស់USAID។ KHANA ដែលរកឃើញ និងកំណត់ចំនួនអត្រាអ្នកកើតជំងឺរបេងប្រហែល១០.០០០ករណីក្នុងមួយឆ្នាំ បានផ្តល់ការព្យាបាលការពារ និងផ្តល់ការថែទាំដល់អ្នកជំងឺនៅតាមជនបទប្រមាណ៣០០នាក់។ ប្រធានប្រតិបត្តិលោក Job Soe Chamron បាននិយាយថា ការផ្អាកការផ្តល់មូលនិធិនឹងធ្វើឱ្យប្រជាជនកម្ពុជានៅជនបទជាច្រើនមិនទទួលបានសេវាថែទាំសុខភាពចាំបាច់។

ការបាត់បង់ជំនួយ USAID របស់កម្ពុជា បានធ្វើឱ្យកម្ពុជាបាត់បង់ជំនួយជាទឹកប្រាក់រាប់លានដុល្លារអាម៉េរិក ជាពិសេស ប៉ះពាល់ជាខ្លាំងដល់គម្រោងអភិវឌ្ឍន៍ជាច្រើនដូចជាសុខុមាលភាព អប់រំ ហេដ្ឋារចនាសម្ព័ន្ធ និងការអភិរក្សធម្មជាតិ ដែលជាគម្រោងសហការជាមួយស្ថាប័នរដ្ឋ និងអង្គការក្រៅរដ្ឋាភិបាលមួយចំនួន។ ការបង្កងជំនួយនះផងដែរ អាចជាកត្តាមួយដែលនឹងកាត់បន្ថយសម្ពាធនយោបាយពីអាម៉េរិកមកលើកម្ពុជាពាក់ព័ន្ធបញ្ហាសិទ្ធិមនុស្ស ប្រជាធិបតេយ្យ និងអភិបាលកិច្ចនានា ហើយក៏ជាឱកាសល្អសម្រាប់ចិនបង្កើនការផ្តល់ជំនួយ និងវិនិយោគបន្ថែមទៅលើគម្រោងដែលអាម៉េរិកបានបង្កកជំនួយ។

ហេតុនេះហើយ ទើបការបង្កករបស់អាម៉េរិកនឹងរុញកម្ពុជាទៅកាន់គៀកនឹងចិន ហើយចិនក៏នឹងបង្កើនជំនួយបន្ថែមមកកម្ពុជា ខណៈពេលដែលប្រទេសទាំងពីរក្រោមក្របខណ្ឌ “ជោគវាសនាសហគមន៍រួម ចិន និងកម្ពុជា” និង “កិច្ចសហប្រតិបត្តិការត្បូងពេជ្រ”។ ជាចុងក្រោយ ប្រសិនជាអាម៉េរិកនឹងបន្ត ឬផ្តល់ជំនួយមកកម្ពុជាក្រោម USAID វិញ ទំហំទឹកប្រាក់នឹងកាត់បន្ថយច្រើនជាមុន ហើយជំនួយទាំងអស់នឹងផ្តោតសំខាន់លើការជំរុញការទាក់ទាញអ្នកវិនិយោគ តាមរយៈការកែទម្រង់ប្រព័ន្ធពន្ធគយ ការធ្វើឌីជីថលលូបនីយកម្មសេដ្ឋកិច្ចនិងហិរញ្ញវត្ថុ និងការបណ្តុះបណ្តាលបច្ចេកទេស និងវិជ្ជាជីវៈជាជាងការផ្តល់ជំនួយដល់អង្គការ សង្គមស៊ីវិលមួយចំនួនដែលផ្តោលើបញ្ហាសិទ្ធិមនុស្ស ប្រជាធិបតេយ្យ និងសិទ្ធិសេរីភាព ដើម្បីជួយដល់ការអភិវឌ្ឍធនធានមនុស្សនិងសេដ្ឋកិច្ចកម្ពុជា ក៏ដូចជាបង្កើតលក្ខខណ្ឌសមស្របទៅនឹងការវិវឌ្ឍបរិបទ សេដ្ឋកិច្ចពិភពលោក និងតម្រូវការទីផ្សារកាងារអន្តរជាតិ។

គោលនយោបាយមួយចំនួនដែលរាជរដ្ឋាភិបាលកម្ពុជាគួរប្រកាន់យក

ដើម្បីកាត់បន្ថយផលប៉ះពាល់រយៈពេលខ្លី និងវែងពីការបង្កកជំនួយរបស់អាម៉េរិក រាជរដ្ឋាភិបាលកម្ពុជា គួរតែសិក្សារៀបចំគោលនយោបាយជាយុទ្ធសាស្រ្ត និងស្វែងរកឱកាសពីផលអវិជ្ជមាននេះ។ វិធានការទាំងនោះរួមមាន៖

ការពង្រឹងការប្រមូលថវិកាជាតិ និងការពឹងផ្អែកលើសេដ្ឋកិច្ចខ្លួនឯងតាមរយៈការពង្រឹងយន្តការប្រមូលពន្ធដារ កែសម្រួលនីតិវិធីក្នុងការប្រកាសពន្ធឬបើកអាជីវកម្ម ធ្វើពពិធកម្មសេដ្ឋកិច្ចបន្ថែម និងការលើកកម្ពុជាសហគ្រាសតូច ឬមធ្យម។
បង្កើតបរិយាកាសអំណោយផល ដើម្បីទាក់ទាញការវិនិយោគបរទេស តាមរយៈការធ្វើឱ្យមានភាពងាយស្រួលដល់ការនីតិវិធីបើកអាជីវកម្មឬក្រុមហ៊ុន កាត់បន្ថយលំហូរការងារការិយាល័យធិបតេយ្យ ពង្រឹងយន្តការច្បាប់សម្រាប់អ្នកវិនិយោគ និងការបង្កើតសួនឧស្សាហ៍កម្មសេដ្ឋកិច្ចទៅតាមប្រទេសឧស្សាហ៍កម្មជាដើម។
ពង្រីក និងពង្រឹងទំនាក់ទំនងជាមួយប្រទេសជាមិត្ត និងដៃគូអភិវឌ្ឍន៍ផ្សេងៗទៀតដូចជាចិន ជប៉ុន កូរ៉េខាងត្បូង អូស្រ្តាលី ឥណ្ឌា ឬសហគមន៍អឺរ៉ុបជាដើម។ បន្ថែមពីនេះកម្ពុជាក៏អាចបង្កើនកិច្ចសហប្រតិបត្តិការក្នុងតំបន់ដូចជាអាស៊ាន និងធនាគារតំបន់ដូចជា ធនាគារអភិវឌ្ឍន៍អាស៊ី។
ពង្រីកភាពជាដៃគូឯកជន-សាធារណៈតាយរយៈការជំរុញគម្រោងអភិវឌ្ឍន៍រួមរវាងស្ថាប័នរដ្ឋ និងឯកជនឬក្រុមហ៊ុន បង្កើនការវិនិយោគលើវិស័យសុខាភិបាល អប់រំ បច្ចេកវិទ្យា និងសេដ្ឋកិច្ចឌីជីថល។
បង្កើនកិច្ចសហប្រតិបត្តិការជាដៃគូអភិវឌ្ឍន៍ជាតិ និងអន្តរជាតិក្នុងការអភិវឌ្ឍន៍ និងបណ្តុះ
បណ្តាលធនធានមនុស្សដើម្បីបង្កើនសមត្ថភាពយុវជនអភិវឌ្ឍជំនាញពលកម្ម និងឆ្លើយតបទៅនឹងការវិវឌ្ឍន៍សេដ្ឋកិច្ចសកល និងទីផ្សារការងារក្នុងតំបន់ និងពិភពលោក។
លើកកម្ពស់ការអភិវឌ្ឍន៍ដោយតម្លាភាព និងបរិយាបន្ន តាមរយៈការកាត់បន្ថយអំពើពុករលួយ ពង្រឹងការអនុវត្តច្បាប់ និងបង្កើតបរិយាកាសធុរកិច្ចល្អប្រសើរ ដែលការពារដល់ប្រយោជន៍អ្នកវិនិយោគ និងជំរុញការប្រកួតប្រជែង។

ជារួមការបង្កកជំនួយរបស់ភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) បានជះឥទ្ធិពលអវិជ្ជមានមួយចំនួនដល់ស្ថាប័នរដ្ឋ និងអង្គការក្រៅរដ្ឋាភិបាលមួយចំនួន ដែលជួយលើកកម្ពស់ដល់ការបណ្តុះបណ្តាលអប់រំ អភិបាលកិច្ច កិច្ចស្រាវជ្រាវនិងអភិរក្សាធម្មជាតិ និងការយល់ដឹងពីសិទ្ធិសេរីភាព និងប្រជាធិបតេយ្យជាដើម។ ក៏ប៉ុន្តែ ការបង្កកជំនួយនេះ នឹងធ្វើឱ្យកម្ពុជាអាចសម្របខ្លួនទៅនឹងការពឹងផ្អែកលើជំនួយបរទេស និងជំរុញការធ្វើពពិធកម្មជំនួយពីប្រទេសដទៃទៀតដូចជាចិន ជប៉ុន កូរ៉េខាងត្បូង អូស្រ្តាលី ឬសហគមន៍អឺរ៉ុបជាដើម ហើយប្រទេស ឬដៃគូអភិវឌ្ឍន៍កម្ពុជាទាំងអស់នោះអាចជំនួសជំនួយបរទេស។ រាជរដ្ឋាភិបាលកម្ពុជាសង្ឃឹមថា អាម៉េរិក ក្រោមរដ្ឋបាលលោកប្រធានាធិបតី ដូណាល់ ត្រាំ នឹងពិចារណាផ្តល់ជំនួយមកកម្ពុជាវិញ ហើយកម្ពុជាត្រៀមខ្លួនរួចជាស្រេចក្នុងការលើកកម្ពស់ និងជំរុញកិច្ចសហប្រតិបត្តិល្អជាមួយអាម៉េរិកទាំងក្នុងកិច្ចការនយោបាយ សេដ្ឋកិច្ច យោធា និងយុទ្ធសាស្រ្ត៕

ដោយ៖ លោក ថុង ម៉េងដាវិត អ្នកសិក្សាស្រាវជ្រាវ និងជាអ្នកវិភាគភូមិសាស្រ្តនយោបាយ និងសន្តិសុខ

The post បទវិភាគ៖ ផលប៉ះពាល់អវិជ្ជមានពីការបង្កកជំនួយអន្តរជាតិរបស់អាម៉េរិក និងការត្រៀមខ្លួនរបស់កម្ពុជាក្នុងការកាត់បន្ថយផលអវិជ្ជមាន appeared first on Kampuchea Thmey Daily.

ក្រោយអាមេរិកផ្អាកជំនួយ៖ ចិនផ្ដល់ជំនួយឥតសំណង៤.៤លានដុល្លារឱ្យកម្ពុជាដោះមីន១ឆ្នាំ

Ngoeul Narath — Thu, 06 Feb 2025 02:24:12 +0000

កាលពីសប្ដាហ៍មុន អគ្គនាយក នៃមជ្ឈមណ្ឌលសកម្មភាពកម្ចាត់មីន (CMAC) បានប្រកាសអំពីការផ្អាកបោសសម្អាត មីននៅខេត្តចំនួន៨ ព្រោះតែសហរដ្ឋអាមេរិកផ្អាកជំនួយ បន្ទាប់មកនៅរាត្រីថ្ងៃទី០៥ ខែកុម្ភៈ អគ្គនាយកមជ្ឈមណ្ឌលសកម្មភាពកម្ចាត់មីន បានប្រកាសថា រដ្ឋាភិបាលចិនផ្តល់ជំនួយឥតសំណងចំនួន៤.៤លានដុល្លារគាំទ្រអង្គភាពសុីម៉ាក់របស់កម្ពុជា ដើម្បីដោះមីនរយៈពេល១ឆ្នាំ នៅខេត្តចំនួន៧។

លោក ហេង រតនា ប្រតិភូរាជរដ្ឋាភិបាលកម្ពុជា ទទួលបន្ទុកអគ្គនាយក នៃមជ្ឈមណ្ឌលសកម្មភាពកម្ចាត់មីន (CMAC) សរសេរលើទំព័រហ្វេសប៊ុកផ្លូវការដូច្នេះ ៖«នៅថ្ងៃទី៥ ខែកុម្ភៈ ឆ្នាំ២០២៥នេះ រដ្ឋាភិបាលនៃសាធារណៈរដ្ឋប្រជាមានិតចិនបានសម្រេចផ្តល់ជំនួយឥតសំណងជូនរាជរដ្ឋាភិបាលដេីម្បីគាំទ្រដល់អង្គភាពCMACក្នុងការបោសសម្អាតមីននៃ”គម្រោងជំនួយចិនលុបបំបាត់គ្រាប់មីននៅកម្ពុជា” (The China-Aided Cambodia Landmine Elimination Projection)មានថវិកាសរុបចំនួន៤.៤០០.០០០ដុល្លារអាមេរិក សម្រាប់រយៈពេល១២ខែ (០១ មីនា ២០២៥-២៨ កុម្ភៈ ២០២៦) »។

តាមអគ្គនាយកមជ្ឈមណ្ឌលសកម្មភាពកម្ចាត់មីន ជំនួយសម្រាប់ដោះមីនរបស់ចិនរយៈពេល១ឆ្នាំនេះ នឹងគាំទ្រកិច្ចប្រតិបត្តិការបោសសម្អាតមីននៅខេត្តចំនួន៧រួមមាន ខេត្តកំពង់ធំ សៀមរាប ឧត្តរមានជ័យ ព្រះវិហារ ស្ទឹងត្រែង និងខេត្តក្រចេះ ព្រមទាំងមណ្ឌលសុនខស្ថិតនៅខេត្តកំពង់ឆ្នាំង។

លោក ហេង រតនា ឱ្យដឹងថា តាមរយៈគម្រោងជំនួយនេះ ក៏នឹងគាំទ្រអ្នកជំនាញបច្ចេកទេសជាង៤០០នាក់របស់អង្គភាពCMAC និងត្រូវអនុវត្តកិច្ចប្រតិបត្តិការសកម្មភាពសំខាន់ៗមួយចំនួនដូចជា៖ ១)ការបោសសម្អាតផ្ទៃដីដែលមានបញ្ហាគ្រាប់មីន និងសំណល់យុទ្ធភណ្ឌមិនទាន់ផ្ទុះសង្រ្គាម ចំនួនជាង៣.៤០០ហិកតា, ២) ការស្រាវជ្រាវព័ត៌មានសំណល់យុទ្ធភណ្ឌមិនទាន់ផ្ទុះសង្ក្រាមនិងគ្រាប់បែកចង្កោម តាមខេត្តគោលដៅខាងលើ, ៣) ពង្រឹងសមត្ថភាពវិទ្យាស្ថានបច្ចេកទេសសុនខ, ៤) ពង្រឹងសមត្ថភាពថ្នាក់ក្រោមជាតិលើការអប់រំគ្រោះថ្នាក់ដោយសារមីន និងសង្គ្រោះជនពិការដោយសារមីន។

លោក ហេង រតនា បន្ថែមថា គម្រោងជំនួយចិនលុបបំបាត់គ្រាប់មីននៅកម្ពុជា ក្នុងឆ្នាំ២០២៥នេះ គឺជាជំនួយឆ្នាំទី៣ នៃដំណាក់កាលទី៣ ដែលមានកញ្ចប់ថវិកាសរុបចំនួន ១៣.២លានដុល្លារសហរដ្ឋអាមេរិក។

គួរឱ្យដឹងថា ក្រោយលោក ដូណាល់ ត្រាំ ឡើងកាន់តំណែងជាប្រធានាធិបតីសហរដ្ឋអាមេរិក, ត្រាំ បានប្រកាសផ្អាកផ្ដល់ជំនួយតាមរយៈ USAID ទៅកាន់ភាគីទទួលជំនួយរយៈពេល៣ខែ។

ក្រោយការផ្អាកនេះ អគ្គនាយក ស៊ីម៉ាក់ លោក ហេង រតនា បានប្រកាសផ្អាកកិច្ចប្រតិបត្តិការបោសសម្អាតមីនបណ្តោះអាសន្នរយៈពេល៨៥ថ្ងៃគិតពីថ្ងៃទី២៥ខែមករា ឆ្នាំ២០២៥ នៅខេត្តចំនួន៨ រួមមានខេត្តកំពង់ចាម ក្រចេះ មណ្ឌលគីរី រតនគីរី ស្ទឹងត្រែង ត្បូងឃ្មុំ ស្វាយរៀង និងខេត្តព្រៃវែង រហូតដល់មានការជូនដំណឹងជាថ្មី។

អនុប្រធានទី១ នៃអាជ្ញាធរមីនកម្ពុជា លោក លី ធុជ អះអាងថា ការផ្អាកផ្ដល់ជំនួយរបស់សហរដ្ឋអាមេរិក បានប៉ះពាល់ដល់បុគ្គលិកដោះមីនកម្ពុជាជាង ១ពាន់នាក់៕

ដោយ៖ ង៉ិល ណារ៉ាត់

ចុចអាន៖ CMAC ផ្អាកដោះមីនបណ្ដោះអាសន្ន នៅខេត្តចំនួន៨ ក្រោយអាមេរិកផ្អាកផ្ដល់ជំនួយ

The post ក្រោយអាមេរិកផ្អាកជំនួយ៖ ចិនផ្ដល់ជំនួយឥតសំណង៤.៤លានដុល្លារឱ្យកម្ពុជាដោះមីន១ឆ្នាំ appeared first on Kampuchea Thmey Daily.

កុមារកម្ពុជាប្រហែល ៦លាននាក់ រងផលប៉ះពាល់សារធាតុពុលពីសំណ

Samean Lay — Mon, 04 Nov 2024 06:58:08 +0000

ទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិប្រចាំកម្ពុជា( USAID Cambodia) បានរកឃើញថា កុមារកម្ពុជាប្រហែល ៦លាននាក់ ឬ ជាង ៧០% នៃកុមារទាំងអស់បានទទួលផលប៉ះពាល់សារធាតុពុលពីសំណ ដែលបង្កឱ្យការលូតលាស់ផ្នែកបញ្ញារបស់កុមារមានភាពយឺតយ៉ាវ ប៉ះពាល់ដល់ការលូតលាស់សរីរាង្គកាយ។

ដើម្បីដោះស្រាយបញ្ហនេះ USAID បានសន្យាផ្តល់មូលនិធិចំនួន ២ លានដុល្លារដល់កម្ពុជា ដើម្បីកាត់បន្ថយផលប៉ះពាល់ជាតិពុលពីសំណ។

អំឡុងយុទ្ធនាការនៃការទប់ស្កាត់សារធាតុពុលពីសំណអន្តរជាតិ អ្នកស្រី Samantha Power នាយិកាទីភ្នាក់ងារជំនួយអាមេរិកសកល (USAID) នៅក្នុងដំណើរទស្សនកិច្ចនៅកម្ពុជា កាលពីចុងខែ តុលា ឆ្នាំ ២០២៤ បានប្រកាសសន្យាផ្តល់មូលនិធិចំនួន ២លានដុល្លារសហរដ្ឋអាមេរិក ដើម្បីការពារ និងកាត់បន្ថយការបំពុលពីការប៉ះពាល់នូវសារធាតុសំណនៅកម្ពុជា។

អ្នកស្រីបញ្ជាក់ថា៖«មូលនិធិមួយចំនួននឹងជួយគាំទ្រដល់ការអង្កេតថ្នាក់ជាតិលើកដំបូង ដើម្បីវាយតម្លៃកម្រិតលោហៈ ធ្ងន់ពណ៌ប្រផេះដែលប៉ះពាល់ដល់កុមារ ស្រ្តីមានផ្ទៃពោះ បរិស្ថាន និងផលិតផលផ្សេងៗ ក្នុងគោលបំណងជួយការពារដល់សុខភាពមនុស្សជំនាន់ក្រោយ»។

គួរជម្រាបថា ប្រទេសកម្ពុជាបានចូលរួមជាសមាជិកជាមួយប្រទេសចំនួន២៥ផ្សេងទៀត ដើម្បីប្រយុទ្ធប្រឆាំងសារធាតុពុលពីសំណ ដើម្បីការពារសុខភាពកុមារទៅអនាគត។ កត្តាដែលបង្កឱ្យមានការពុលពីសំណ បណ្តាលមកពី ថ្នាំលាប កញ្ចក់ គ្រឿងសំអាង គ្រឿងអលង្ការ ប្រដាប់ក្មេងលេង និងសំណល់អេឡិចត្រូនិក ជាដើម៕

The post កុមារកម្ពុជាប្រហែល ៦លាននាក់ រងផលប៉ះពាល់សារធាតុពុលពីសំណ appeared first on Kampuchea Thmey Daily.

USAIDវិនិយោគ១២លានដុល្លារ គាំទ្ររដ្ឋាភិបាលកម្ពុជា ក្នុងការបោសសម្អាតមីន និងយុទ្ធភ័ណ្ឌមិនទាន់ផ្ទុះ

Ngoeul Narath — Wed, 23 Oct 2024 14:57:02 +0000

នៅចំពោះមុខសម្ដេចនាយករដ្ឋមន្រ្តីកម្ពុជា លោកស្រី Samantha Power ប្រធានគ្រប់គ្រងទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID)អះអាងថា លោកស្រីនឹងប្រកាសការវិនិយោគចំនួន១២លានដុល្លារអាមេរិក ដើម្បីបន្តគាំទ្រកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការបោសសម្អាតមីន និងយុទ្ធភ័ណ្ឌមិនទាន់ផ្ទុះ។

ក្នុងឱកាសនៃជំនួបពិភាក្សាការងារ លោកស្រី Samantha Power បានកោតសរសើរចំពោះការរីកចម្រើននៅកម្ពុជា ដែលជាប្រទេសមួយធ្លាប់រងគ្រោះ និងហែកហួរដោយសារសង្គ្រាមស៊ីវិលអស់ជាច្រើនទសវត្ស។

លោកស្រីបានវាយតម្លៃខ្ពស់ចំពោះវឌ្ឍនភាព និងភាពជាដៃគូដ៏ល្អប្រសើរកន្លងមករវាងទីភ្នាក់ងារ USAID និងរាជរដ្ឋាភិបាលកម្ពុជា ក្នុងវិស័យជាច្រើន រួមមាន៖ វិស័យសុខាភិបាល (ជាពិសេស ការប្រយុទ្ធប្រឆាំងនឹងជំងឺរបេង និងជំងឺគ្រុនចាញ់), សន្តិសុខស្បៀង និងការបោសសម្អាតមីន។

លោកស្រីបានគូសបញ្ជាក់ថា ទីភ្នាក់ងារ USAID នឹងបន្តកិច្ចសហប្រតិបត្តិការគាំទ្រកម្ពុជា ដើម្បីរួមចំណែកដល់ការអភិវឌ្ឍសង្គម-សេដ្ឋកិច្ចនៅកម្ពុជា និងការលើកកម្ពស់ជីវភាពរបស់ប្រជាពលរដ្ឋ។

ជាការឆ្លើយតប ក្នុងជំនួបដែលធ្វើឡើងនៅវិមានសន្តិភាព សម្ដេចបវរធិបតីបានសម្ដែងនូវការពេញចិត្តចំពោះកិច្ចសហប្រតិបត្តិការដ៏ល្អប្រសើររវាងរាជរដ្ឋាភិបាលកម្ពុជា និង ទីភ្នាក់ងារ USAID ព្រមទាំងថ្លែងអំណរគុណរដ្ឋាភិបាលនិងប្រជាជនសហរដ្ឋអាមេរិក ដែលបានផ្ដល់ការគាំទ្រ និងជំនួយក្នុងការស្ដារ និងកសាងប្រទេសកម្ពុជាចាប់តាំងពីដើមទសវត្សឆ្នាំ១៩៩០ ក៏ដូចជារួមចំណែកអភិវឌ្ឍកម្ពុជា រហូតមកដល់បច្ចុប្បន្ន។

សម្ដេចបវរធិបតី និងលោកស្រី Samantha Power បានពិភាក្សាគំនិតផ្តួចផ្តើមមួយចំនួន ក្នុងការបន្តពង្រឹង និងពង្រីកកិច្ចសហប្រតិបត្តិការ រវាងរាជរដ្ឋាភិបាលកម្ពុជា និង ទីភ្នាក់ងារ USAID លើវិស័យសំខាន់ៗជាច្រើន រួមមាន៖ ពាណិជ្ជកម្ម, ការវិនិយោគ, សុខាភិបាល, អប់រំ, កសិកម្ម, អភិបាលកិច្ចល្អ, សន្ដិសុខ និងការអនុវត្តច្បាប់៕

The post USAIDវិនិយោគ១២លានដុល្លារ គាំទ្ររដ្ឋាភិបាលកម្ពុជា ក្នុងការបោសសម្អាតមីន និងយុទ្ធភ័ណ្ឌមិនទាន់ផ្ទុះ appeared first on Kampuchea Thmey Daily.

គណៈកម្មការទី៣ រដ្ឋសភា គាំទ្រគម្រោងអនាគតបៃតងកម្ពុជា ក្រោមជំនួយរបស់ USAID

Thoeun Vansong — Fri, 29 Sep 2023 04:56:33 +0000

លោក ម៉ា ឈឿន អនុប្រធានគណៈកម្មការទី៣ រដ្ឋសភា បានបង្ហាញការគាំទ្រដល់គម្រោងអនាគតបៃតងកម្ពុជា ក្រោមការផ្ដល់មូលនិធិរបស់ USAID ហើយបានបញ្ជាក់ថា លោកនឹងពិភាក្សាជាមួយសមាជិកគណៈកម្មការទី៣ រដ្ឋសភា ក្នុងករណីភាគីពាក់ព័ន្ធមានសំណើផ្សេងៗ លើគោលនយោបាយគ្រប់គ្រងកាកសំណល់រឹង និងការថែរក្សាអនាម័យបរិស្ថាននៅកម្ពុជា។

ការបញ្ជាក់របស់លោក ម៉ា ឈឿន ធ្វើឡើងក្នុងឱកាសដែលគម្រោងអនាគតបៃតងកម្ពុជា ដែលផ្តល់មូលនិធិដោយទីភ្នាក់ ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) បានរៀបចំសិក្ខាសាលានៃវេទិកាគោលនយោបាយស្ដីពីការបញ្ឈប់ការចោលសំរាមមិនត្រឹមត្រូវនៅកម្ពុជា។ គោលបំណងនៃសិក្ខាសាលានេះ គឺពិភាក្សាអំពីការកែលម្អច្បាប់បច្ចុប្បន្ន អនុសញ្ញា សជណ ក៏ដូចជាប្រកាសទាក់ទងនឹងការគ្រប់គ្រងកាកសំណល់រឹង និងបញ្ឈប់ការចោលសំរាមផ្ដេសផ្ដាសនៅកម្ពុជា ដើម្បីជាធាតុចូលបន្ថែមលើគោលនយោបាយគ្រប់គ្រងសំណង់រឹងនៅកម្ពុជា។

នៅក្នុងពិធីបើកសិក្ខាសាលា នៅព្រឹកថ្ងៃទី២៩ ខែកញ្ញានេះ លោក ម៉ា ឈឿន អ្នកតំណាងរាស្ត្រមណ្ឌលខេត្តកំពង់ចាម និងជាអនុប្រធានគណៈកម្មការទី៣ ផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក នៃរដ្ឋសភា បានគាំទ្រលើយុទ្ធនាការផ្លាស់ប្ដូរឥរិយាបទសង្គមក្នុងការបញ្ឈប់ការចោលសំរាមមិនត្រឹមត្រូវ ដើម្បីរួមចំណែកធ្វើយ៉ាង ណាឱ្យទីក្រុងស្អាត ប្រទេសមានសោភ័ណ្ឌភាព។ លោក ថា នេះជាវេទិកាពិភាក្សា និងផ្លាស់ប្ដូរមតិលើគោលនយោបាយដែលមានស្រាប់ពាក់ព័ន្ធនឹងការបញ្ឈប់ការចោលសំរាម និងពិភាក្សាអំពីចំណុចគន្លឹះសំខាន់ៗជាធាតុចូលបន្ថែមទៀតក្នុងការកសាងគោលនយោបាយថ្មីៗស្របតាមសម័យកាលនៃការអភិវឌ្ឍសង្គមទំនើប សំដៅឈានទៅគ្រប់គ្រងសំណល់រឹងប្រកបដោយនិរន្តរភាព។

លោក ម៉ា ឈឿន បានចាត់ទុកទីក្រុងស្អាត ប្រទេសគ្មានសំរាម គឺជាគោលដៅចម្បងរបស់ទាំងអស់គ្នា ដើម្បីធានាដល់សុខុមាលភាព វិបុលភាព បរិស្ថានស្រស់បំព្រង និងមោទនភាពជាតិ។ បើតាមសមាជិករដ្ឋសភារូបនេះ សិក្ខាសាលានៃពិភាក្សាលើគោលនយោបាយគ្រប់គ្រងកាកសំណល់រឹងពេលនេះ គឺធ្វើឡើងស្របពេលរាជរដ្ឋាភិបាលកម្ពុជា នីតិកាលទី ៧ ក្រោមការដឹកនាំដោយសម្ដេចធិបតី ហ៊ុន ម៉ាណែត កំពុងចាប់ផ្ដើមការងាររបស់ខ្លួនយ៉ាងណាស្វាហាប់ ប្រកបដោយថាមពល។

លោក បន្តថា សិក្ខាសាលានេះ ក៏នឹងក្លាយជាសកម្មភាពបន្តរួមចំណែកថែរក្សាអនាម័យបរិស្ថាន សុខភាពសាធារណៈនៅកម្ពុជាឱ្យកាន់តែប្រសើរឡើងទៀត ដើម្បីលើកកម្ពស់កម្ពុជាស្អាត គឺចាប់ផ្ដើមចេញពីយើងទាំងអស់គ្នា។ ក្នុងនាមជាអនុប្រធានគណៈកម្មការទី៣ រដ្ឋសភា លោក ម៉ា ឈឿន បានប្រកាសគាំទ្រដល់គម្រោងអនាគតបៃតងកម្ពុជា ហើយបានសន្យាយកលទ្ធផលនៃអង្គសិក្ខាសាលានេះ ទៅពិនិត្យពិចារណា និងពិភាក្សាជាមួយសមាជិកគណៈកម្មការទី៣ ប្រសិនមានសំណើ ដែលមានមូលដ្ឋានត្រឹមត្រូវ ច្បាស់លាស់ ដើម្បីពិនិត្យឡើងវិញ ឬកែសម្រួល ឬបង្កើតថ្មីនូវគោលនយោបាយ ឬច្បាប់ណាមួយ ក្នុងគោលបំណងធ្វើឱ្យប្រសើឡើងក្នុងការគ្រប់គ្រងកាកសំណល់រឹង និងបញ្ឈប់ការចោលសំរាមមិនត្រឹមត្រូវនៅកម្ពុជាឱ្យកាន់តែមានប្រសិទ្ធភាព៕

The post គណៈកម្មការទី៣ រដ្ឋសភា គាំទ្រគម្រោងអនាគតបៃតងកម្ពុជា ក្រោមជំនួយរបស់ USAID appeared first on Kampuchea Thmey Daily.

USAID ប្រកាសបើកយុទ្ធនាការបញ្ឈប់ការចោលសំរាមមិនត្រឹមត្រូវ ដើម្បីថែរក្សាបរិស្ថានកម្ពុជា

អុន ស្រីមាន — Sat, 11 Mar 2023 03:06:34 +0000

នៅថ្ងៃទី១០ ខែមីនា ឆ្នាំ២០២៣ ទីភ្នាក់ងារសហរដ្ឋអាមេរិក ដើម្បីអភិវឌ្ឍន៍អន្តរជាតិ (USAID) បានធ្វើពិធីប្រកាសជាផ្លូវការអំពីយុទ្ធនាការផ្លាស់ប្តូរឥរិយាបថសង្គម ស្តីពី “ការបញ្ឈប់ការចោលសំរាមមិនត្រឹមត្រូវ” នៅសណ្ឋាគារ កាំបូឌីយ៉ាណា រាជធានីភ្នំពេញ។

កម្មវិធីនេះ មានការនិមន្តចូលរួមរបស់ព្រះភិក្ខុ វជិរប្បញ្ញោ គូ សុភាព ការចូលរួមពីតំណាងរដ្ឋាភិបាលសហរដ្ឋអាមេរិក ក្រសួងបរិស្ថាន សាលារាជធានីភ្នំពេញ អង្គការដៃគូ សិស្សនិស្សិត និងសិល្បករ សិល្បការិនី ជាច្រើនរូបទៀត។ ការចូលរួមពីគ្រប់ភាគីនេះ គឺជារូបភាពមួយក្នុងការផ្សព្វផ្សាយពីការចោលសំរាមឱ្យបានត្រឹមត្រូវ ដើម្បីការពារ និងថែរក្សាបរិស្ថាននៅកម្ពុជាឱ្យមានផាសុខភាព និងសណ្តាប់ធ្នាប់ល្អក្នុងសង្គម។

លោកស្រី Hanh Nguyen នាយិកាស្តីទី USAID បានលើកឡើងនៅក្នុងពិធីបើកយុទ្ធនាការនេះថា គ្រប់ទីកន្លែងនៅក្នុងពិភពលោក ការចោលសំរាមរឹងនៅតែជាបញ្ហាប្រឈម ខណៈចំនួនប្រជាជនមានការកើនឡើង ការវេចខ្ចប់ផលិតផលនានា និងការចោលសំរាមមិនបានត្រឹមត្រូវ គឺជាបញ្ហាសំខាន់ដែលមិនអាចព្រងើយកន្តើយបានឡើយ។ ជាមួយគ្នានេះ ក្នុងរយៈពេល ១០ឆ្នាំចុងក្រោយនេះ USAID បានរួមចំណែកជាទឹកប្រាក់ប្រមាណជាង ១០០លានដុល្លារ ដើម្បីថែរក្សា និងការពារបរិស្ថាន ធនធានធម្មជាតិរបស់កម្ពុជា។ ចំណែក សហរដ្ឋអាមេរិកវិញ គឺបានចំណាយប្រមាណ ១១ពាន់លានដុល្លារក្នុង១ឆ្នាំៗ ដើម្បីសម្អាតសំរាមនៅទីនោះ។

លោកស្រីនាយិកាមានប្រសាសន៍ថា៖ “ដោយសហការជាមួយសាលារាជធានីភ្នំពេញ និងក្រសួងបរិស្ថាន ក៏ដូចជាអ្នកឧបត្ថម្ភកម្មវិធីរបស់យើងថ្ងៃនេះ យើងកំពុងបានជំរុញផលប្រយោជន៍រួមរបស់យើងនៅក្នុងការថែរក្សាប្រទេសកម្ពុជាឱ្យមានភាពស្អាត”។ លោកស្រីបានបន្តថា យុទ្ធនាការនេះ នឹងត្រូវបានអនុវត្តតាមរយៈវេទិកាប្រព័ន្ធផ្សព្វផ្សាយសង្គមរបស់គម្រាង តាមរយៈសមាជិកក្រុមបៃតង និងអ្នកមានឥទ្ធិពលក្នុងសង្គមដែលយកចិត្តទុកដាក់លើបញ្ហាបរិស្ថាន។ លោកស្រី Hanh Nguyen បានអំពាវនាវឱ្យប្រជាជនចេះបែងចែកសំរាម និងប្រើប្រាស់សម្ភារៈណាដែលអាចកែច្នៃឡើងវិញបាន។ ទន្ទឹមនេះ បញ្ហាសំរាម និងយុទ្ធនាមួយនេះ មិនអាចទទួលបានជោគជ័យឡើយ ប្រសិនជាគ្មានការចូលរួមពីមនុស្សគ្រប់រូប។

ចំណែក លោក គឹម សេត អគ្គនាយកសហគ្រាសគ្រប់គ្រងសំរាមសំណល់រឹងទីប្រជុំជន រាជនាធានីភ្នំពេញ បានថ្លែងអំណរគុណចំពោះកិច្ចខិតខំប្រឹងប្រែងថែរក្សាបរិស្ថានរបស់ USAID និងក្រុមយុវជនស្ម័គ្រចិត្តបៃតង ដែលបានរៀបចំយុទ្ធនាការនេះឡើងមកសម្រាប់បរិស្ថានកម្ពុជា។ តាមរយៈកំណើនប្រជាជននៅក្នុងទីក្រុង និងសកម្មភាពជាច្រើនបានធ្វើឱ្យបរិមាណសំរាមសំណល់រឹងមានការកើនឡើងប្រមាណជាង ៣,៧០០តោនក្នុងមួយថ្ងៃ។ ទាំងនេះ គឺជាកង្វល់ដ៏ធំរបស់រដ្ឋបាលរាជធានីភ្នំពេញដែលត្រូវយកចិត្តទុកដាក់។

លោកមានប្រសាសន៍ថា៖ “កង្វល់ទាំងនេះត្រូវបានដោះស្រាយ ក្រោយមានកំណែទម្រង់របស់រាជរដ្ឋាភិបាលទៅលើការគ្រប់គ្រងសំរាមសំណល់រឹងរាជធានីភ្នំពេញ។ ដោយបានជ្រើសរើសក្រុមហ៊ុនចំនួន៣ឱ្យមានការប្រកួតប្រជែងគ្នាលើការផ្តល់សេវាប្រមូល និងដឹកជញ្ជូនសំរាមសំណល់រឹង ចាប់ដំណើរការតាំងពីឆ្នាំ២០២១មកម្ល៉េះ”។ ជាលទ្ធផល ក្រុមហ៊ុនទាំង៣ បានប្រមូល និងសម្អាតសំរាមបានយ៉ាងល្អតាមទីកន្លែងនីមួយៗក្នុងទីក្រុងទាំងមូល។

រីឯ លោក គិត ច័ន្ទគ្រឹស្នា ទីប្រឹក្សារដ្ឋមន្រ្តីក្រសួងបរិស្ថាន បានលើកឡើងថា ដើម្បីឱ្យទីក្រុងស្អាត គឺមានការចូលរួមពីប្រជាជនគ្រប់រូប។ លោកបានសំណូមពរដល់សាធារណជនគ្រប់រូប គួរប្រើប្រាស់ប្លាស្លិកឱ្យបានត្រឹមត្រូវ និងប្រើចំពោះពេលណាដែលចាំបាច់ប៉ុណ្ណោះ ហើយចំពោះប្លាស្ទិកណាដែលកែច្នៃបាន គួរកែច្នៃឡើងវិញទើបជាការប្រសើរ។

លោកមានប្រសាសន៍ថា៖ “យើងចង់បំបាត់ថង់ប្លាស្ទិក ទាល់តែចូលរួមទាំងអស់គ្នា ទាំងវិស័យឯកជន និងអង្គការ ដូចយើងកំពុងតែធ្វើនេះ គឺអង្គការ USAID គឺធ្វើការច្រើន”។ លោកបន្តថា USAID បានធ្វើការជាច្រើន និងស្អិតរមួតជាមួយក្រសួងបរិស្ថាន។ មួយវិញទៀត បណ្តាញផ្សព្វផ្សាយសង្គម និងអ្នកមានឥទ្ធិពលក្នុងប្រព័ន្ធផ្សព្វផ្សាយ មានតួនាទីសំខាន់ណាស់សម្រាប់ជំរុញ លើកស្ទួយឱ្យមានការប្រើប្រាស់ប្លាស្ទិក និងចោលសំរាមបានត្រឹមត្រូវ។

សូមជម្រាបថា នៅក្នុងពិធីប្រកាសយុទ្ធនាការនេះ ក៏មានការដាក់តាំងបង្ហាញនូវផលិតផលមួយចំនួនដែលបានកែច្នៃពីសំណល់សំរាមប្លាស្ទិក យកមកធ្វើជាសម្ភារៈប្រើប្រាស់ប្រចាំថ្ងៃផ្សេងៗយ៉ាងស្រស់ស្អាតផងដែរ៕

ដោយ៖ អុន ស្រីមាន

The post USAID ប្រកាសបើកយុទ្ធនាការបញ្ឈប់ការចោលសំរាមមិនត្រឹមត្រូវ ដើម្បីថែរក្សាបរិស្ថានកម្ពុជា appeared first on Kampuchea Thmey Daily.