បើតាមអ្នកនាំពាក្យក្រសួងបរិស្ថាន លោក ខ្វៃ អាទិត្យា សរុបទាំង៣ថ្ងៃនៃពិធីបុណ្យចូលឆ្នាំខ្មែរ សំរាមចំនួនជាង ៧ ១៣៤ តោន ត្រូវបានប្រមូលទុកដាក់ទៅទីលានទុកដាក់សំរាមនៅក្នុងរាជធានីភ្នំពេញ។ ដោយឡែកនៅថ្ងៃធម្មតាការប្រមូលទុកដាក់សំរាមដែលបញ្ចេញដោយប្រជាពលរដ្ឋរស់នៅរាជធានីភ្នំពេញ ដោយក្រុមហ៊ុនប្រមូលសំរាមទាំង៣ មានប្រមាណ ពី៤០០០តោន ទៅ៤៥០០តោនក្នុង១ថ្ងៃ ហើយនៅសរុបទូទាំងប្រទេស សំរាមជាង ១ម៉ឺនតោន ត្រូវបានប្រមូលទុកដាក់ទៅទីលានជារៀងរាល់ថ្ងៃ ហើយក្នុងនោះ ២០% ជាសំណល់ប្លាស្ទិក។

លោក ខ្វៃ អាទិត្យា អះអាងថា ការថយចុះនេះកើតឡើងដោយសារការចូលរួមចំណែក យ៉ាងសកម្មរបស់ប្រជាពលរដ្ឋ និងអ្នកពាក់ព័ន្ធ ក្នុងការទុកដាក់សំរាមឱ្យមានរបៀបរៀបរយ និងការកាត់បន្ថយការប្រើប្រាស់ថង់ប្លាស្ទិក។ លោកថា  ការចូលរួមទាំងនេះមិនត្រឹមតែជួយឱ្យទីក្រុង ទីប្រជុំជន តាមមូលដ្ឋាន និងតាមដងផ្លូវ មានសោភ័ណភាពប៉ុណ្ណោះទេ ប៉ុន្តែថែមទាំងជួយការពារបរិស្ថានកម្ពុជា ជាពិសេសការជំរុញចលនាឆ្ពោះទៅការរៀបចំផ្ទះរបស់យើង ប្រទេសកម្ពុជា មាន«ភាពស្អាត តាមរយៈយុទ្ធនាការផ្សេងៗដូចជា “ថ្ងៃនេះខ្ញុំមិនប្រើថង់ប្លាស្ទិកទេ” យុទ្ធនាការ “កម្ពុជាស្អាត ខ្មែរធ្វើបាន” និងយុទ្ធនាការ«ផ្លូវជាតិ គ្មានសំរាមនិងសំណល់ប្លាស្ទិក» ដែលបានដាក់ចេញស្របនឹងយុទ្ធសាស្រ្តចក្រាវិស័យបរិស្ថាន និងគោលនយោបាយយុទ្ធសាស្រ្តរបស់រាជរដ្ឋាភិបាលកម្ពុជា។

លោក ខ្វៃ អាទិត្យា បានបន្ថែមថា កម្ពុជាត្រូវការពង្រឹងការចូលរួមបន្ថែមទៀត ដើម្បីប្រែក្លាយសកម្មភាព ទៅជាចលនា ដើម្បីការផ្លាស់ប្តូរផ្នត់គំនិត របស់ប្រជាពលរដ្ឋ បង្កើនចូលរួមគ្រប់គ្រងសំរាមឱ្យបានត្រឹមត្រូវ ធ្វើការញែកសំរាម ការកែច្នៃសំរាម និងការកាត់បន្ថយការប្រើប្រាស់ប្លាស្ទិក៕

The post ៣ថ្ងៃនៃបុណ្យចូលឆ្នាំ សំរាម ៧ ១៣៤ តោននៅភ្នំពេញ ត្រូវបានប្រមូល៖ អ្នកនាំពាក្យថា ចំនួននេះថយចុះ ព្រោះពលរដ្ឋចេះទុកដាក់ និងបន្ថយការប្រើថង់ប្លាស្ទិក appeared first on Kampuchea Thmey Daily.

នៅក្នុងសកម្មភាព ចុះតាមដានការងារនេះ គណៈប្រតិភូបានធ្វើការពិនិត្យយ៉ាងល្អិតល្អន់ទៅលើហេដ្ឋារចនាសម្ព័ន្ធជារួមនៃទីលានទុកដាក់សំរាម ដែលស្ថិតនៅភូមិច្រកម្ទេស សង្កាត់ច្រកម្ទេស ក្រុងបាវិត។ បន្ទាប់ពីការចុះពិនិត្យផ្ទាល់នៅទីតាំង ក៏មានការរៀបចំកិច្ចប្រជុំពិភាក្សាមួយ ដើម្បីបែងចែកភារកិច្ច និងរៀបចំផែនការការងារឱ្យបានហ្មត់ចត់បំផុត សម្រាប់ត្រៀមទទួលគណៈអធិបតីក្នុងពិធីសម្ពោធនាពេលខាងមុខ។

គម្រោងសាងសង់ទីលានទុកដាក់សំរាមនេះ គឺជាសមិទ្ធផលថ្មីស្រឡាងមួយទៀត ក្នុងវិស័យគ្រប់គ្រងបរិស្ថាន និងអនាម័យសម្រាប់ក្រុងបាវិត ដែលជាទីក្រុងសេដ្ឋកិច្ចដ៏សំខាន់ជាប់ព្រំដែន។ ចំពោះទីលាននេះនឹងដើរតួនាទីយ៉ាងសំខាន់ក្នុង៖

 1. ការកែលម្អសោភ័ណភាពទីក្រុង៖ កាត់បន្ថយការបោះចោលសំរាមពាសវាលពាសកាល និងការគរទុកសំរាមមិនមានសណ្តាប់ធ្នាប់។ 2. កិច្ចការពារបរិស្ថាន៖ ប្រើប្រាស់បច្ចេកទេសទុកដាក់ឱ្យបានត្រឹមត្រូវតាមស្ដង់ដារ បច្ចេកទេស ដើម្បីការពារការជ្រាបចូលទឹកស្អុយទៅក្នុងដី និងប្រភពទឹក។ 3. សុខុមាលភាពប្រជាពលរដ្ឋ៖ កាត់បន្ថយផលប៉ះពាល់ក្លិន និងមេរោគផ្សេងៗ ដែលបង្កគ្រោះថ្នាក់ដល់សុខភាពសាធារណៈ។

តាមរយៈការចុះពិនិត្យនាព្រឹកនេះ លោករដ្ឋលេខាធិការ និងលោកអភិបាលរងខេត្ត បានកោតសរសើរដល់ក្រុមការងារសាងសង់ ដែលបានអនុវត្តគម្រោងស្របតាមបទដ្ឋានបច្ចេកទេស។ ទន្ទឹមនឹងនោះ លោកក៏បានផ្ដាំផ្ញើដល់អាជ្ញាធរក្រុងបាវិត និងអង្គភាពពាក់ព័ន្ធ ត្រូវត្រៀមលក្ខណៈឱ្យបានរួចរាល់ទាំងផ្នែកសន្តិសុខ សណ្តាប់ធ្នាប់ និងការតុបតែងលម្អទីតាំង ដើម្បីឱ្យពិធីសម្ពោធដាក់ឱ្យប្រើប្រាស់ជាផ្លូវការអាចប្រព្រឹត្តទៅបានយ៉ាងរលូន និងសមឱឡារិកបំផុត។

សមិទ្ធផលនេះ គឺជាសក្ខីភាពមួយបង្ហាញពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ក៏ដូចជាក្រសួងសាធារណការ និងរដ្ឋបាលខេត្តស្វាយរៀង ក្នុងការលើកកម្ពស់គុណភាពជីវិតរបស់ប្រជាពលរដ្ឋតាមរយៈការអភិវឌ្ឍហេដ្ឋារចនាសម្ព័ន្ធទីក្រុងស្អាត និងមាននិរន្តរភាព៕

ដោយ៖ ភក្ដី

The post ថ្នាក់ដឹកនាំ និងមន្ត្រីពាក់ព័ន្ធ ចុះពិនិត្យទីតាំងត្រៀមរៀបចំពិធីសម្ពោធ ទីលានទុកដាក់សំរាមថ្មី ក្នុងក្រុងបាវិត appeared first on Kampuchea Thmey Daily.

ថ្លែងទៅកាន់អង្គសន្និបាតបូកសរុបការងារឆ្នាំ២០២៥ និងទិសដៅការងារបន្តឆ្នាំ២០២៦ រៀបចំនាព្រឹកថ្ងៃទី៩ ខែធ្នូ លោក អ៊ាង សុផល្លែត បានគូសបញ្ជាក់ឱ្យដឹងថា  យុទ្ធនាការពន្លកបៃតង គឺជាគម្រោងដាំដើមឈើដ៏ធំមួយ ដែលត្រូវបានក្រសួងបរិស្ថានចាប់ផ្ដើមឡើង ដើម្បីជំរុញការពង្រីភាពបៃតង។ ជាមួយគ្នានេះ ក្រសួងបរិស្ថានបានពង្រឹងការអនុវត្តច្បាប់តឹងរ៉ឹង និងបានចែកកូនឈើដល់ប្រជាពលរដ្ឋ ក៏ដូចជាសាធារណជនយកទៅដាំដោយឥតគិតថ្លៃ បានចំនួនជាង ៣លាន៤សែនដើមផងដែរ។

តាមរដ្ឋមន្ត្រីក្រសួងបរិស្ថាន សម្រាប់ឆ្នាំ២០២៦ខាងមុខនេះ ក្រសួង បានពង្រីកការចែកកូនឈើនេះ តាមរយៈថ្នាលថ្នាក់តំបន់ដែលបានសាងសង់ហើយ ដែលមាននៅខេត្តចំនួន៥ គឺខេត្តកំពង់ស្ពឺ ខេត្តកោះកុង ខេត្តសៀមរាប ខេត្តមណ្ឌលគីរី និងខេត្តត្បូងឃ្មុំ ដែលថ្នាលថ្នាក់តំបន់នៅខេត្តទាំង៥នេះ អាចផលិតកូនឈើបាន៥លានដើម។ យុទ្ធនាការនេះ ឆ្លើយតបទៅនឹងគោលនយោបាយអភិវឌ្ឍន៍ប្រកបដោយចីរភាពរបស់រាជរដ្ឋាភិបាលកម្ពុជា និងបង្ហាញពីការខិតខំប្រឹងប្រែងក្នុងការបង្កើនគម្របបៃតង ក៏ដូចជាការពារបរិស្ថានផងដែរ។

គួរឱ្យដឹងថា សម្រាប់អង្គសន្និបាតនៅឆ្នាំនេះ ក្រសួងបរិស្ថានបានជ្រើសរើស និងដាក់ចេញនូវប្រធានសំខាន់ៗតាមជំនាញ រួមមាន៖ ១-ភាពស្អាត ២-ការដាំស្តារឡើងវិញ និងការពង្រឹងការអនុវត្តច្បាប់ ៣-ការអភិវឌ្ឍសេដ្ឋកិច្ចបៃតងដើម្បីលើកកម្ពស់ជីវភាពសហគមន៍មូលដ្ឋាន ៤-ពង្រីកការអប់រំផ្សព្វផ្សាយដើម្បី ជំរុញប្រតិបត្តិមេត្រីភាពបរិស្ថាន និងទី៥-ការកសាងរដ្ឋបាលឌីជីថល៕

The post មនុស្ស១៥លាននាក់បានចូលរួមយុទ្ធនាការរបស់ក្រសួងបរិស្ថាន ហើយចូលរួមកាត់បន្ថយថង់ប្លាស្ទិកបាន៨៤% appeared first on Kampuchea Thmey Daily.

រដ្ឋម​ន្ត្រីក្រសួងបរិស្ថាន លើកឡើងដូច្នេះ៖«តាមទីសាធារណៈ ក្នុង១ថ្ងៃ ប្រជាជន​ សិស្សនុសិស្សមិនតិចជាង២ម៉ឺននាក់ទេ ដែលចេញមករើសសំរាម រើសថង់ប្លាស្ទិកពីផ្លូវជាតិ ដើម្បីធ្វើយ៉ាងណាឱ្យកម្ពុជាយើង ដែលជាផ្ទះរបស់គាត់ ផ្ទះរបស់យើងទាំងអស់គ្នាមានភាពស្អាត អស់សំរាមប្លាស្ទិកតាមផ្លូវ តាមទីសាធារណៈ។ ត្រង់កន្លែងនេះខ្ញុំសូមទោស ខ្ញុំខ្មាសដែរ យើងទាំងអស់គ្នាធ្វើឱ្យបរិស្ថានរបស់យើង ប្រទេសរបស់យើងពោរពេញទៅដោយសំរាម ឥឡូវក្មួយៗសិស្សានុសិស្សគាត់ចេញមកសម្អាត ខ្មាសគាត់ ត្រូវតែសុំទោសគាត់ បើយើងមិនពង្រាយសំរាមនោះទេ ក្មួយៗមិនពិបាកទេ ប៉ុន្តែទោះជាយ៉ាងក៏ដោយអរគុណក្មួយ និងប្រជាពលរដ្ឋរបស់យើងដែលចេញរើសសំរាម»។​

ឈានចូលឆ្នាំ២០២៥​ ក្រសួងបរិស្ថាន ដាក់ចេញយុទ្ធនាការសម្អាតផ្លូវជាតិ ក្រោមប្រធានបទ « ផ្លូវជាតិគ្មានសំរាមប្លាស្ទិក» លើដងផ្លូវជាតិសំខាន់ៗ។ តាមរយៈនេះ លោក​ អ៊ាង សុផល្លែត​ អះអាងថានៅលើដងផ្លូវជាតិលេខ៥ ចាប់ពីភ្នំពេញទៅដល់ចុងព្រំប្រទល់ខេត្តកំពង់ឆ្នាំង ដែលអតីតកាលធ្លាប់តែសំរាមហើរពេញផ្លូវ តែបច្ចុប្បន្ននេះប្រែជាគ្មានសំរាមឡើយ។ ចំណែកលើផ្លូវដដែលពីកំណាត់ផ្លូវក្នុងខេត្តពោធិ៍សាត់ ដល់ខេត្តបាត់ដំបង នៅមានសំរាមលើផ្លូវតិចតួច ដែលត្រង់ចំណុចនេះលោក អ៊ាង សុផល្លែត ស្នើឱ្យប្រធានមន្ទីរបរិស្ថានខេត្ត ចេះមើលខេត្តផ្សេង ហើយចូលរួមសម្អាតផ្លូវជាតិ។ រីឯកំណាត់ផ្លូវជាតិលេខ៥ចាប់ពីខេត្តបាត់ដំបងទៅខេត្តបន្ទាយមានជ័យ គឺស្អាត ហើយពីផ្លូវជាតិលេខ៥ទៅខេត្តបន្ទាយមានជ័យគឺកាន់តែស្អាត។

នៅក្នុងនីតិកាលទី៧ នៃរដ្ឋសភានេះ ក្រសួងបរិស្ថាន បានដាក់ចេញនូវយុទ្ធនាការចំនួន៣ជាបន្តបន្ទាប់ ដើម្បីសម្អាត និងកាត់បន្ថយសំរាមក្នុងប្រទេស ក្នុងនោះរួមមាន យុទ្ធនាការកាត់បន្ថយការប្រើប្រាស់ប្លាស្ទិក ក្រោមប្រធានបទ «ថ្ងៃនេះ ខ្ញុំមិនប្រើ ថង់ប្លាស្ទិកទេ» ទី២យុទ្ធនាការ «កម្ពុជាស្អាត ខ្មែរធ្វើបាន»  និងទី៣ យុទ្ធនាការសម្អាតផ្លូវជាតិ ក្រោមប្រធានបទ « ផ្លូវជាតិគ្មានសំរាមប្លាស្ទិក» ដោយយុទ្ធនាការទាំង៣នេះ មានពលរដ្ឋចូលរួមជាង១៤លាននាក់នៅទូទាំងប្រទេសកម្ពុជា។

តាមរយៈយុទ្ធនាការ«ថ្ងៃនេះ ខ្ញុំមិនប្រើ ថង់ប្លាស្ទិកទេ» រដ្ឋមន្ត្រីក្រសួងបរិស្ថាន ឱ្យដឹងថា មានសិស្សានុសិស្ស​ចំនួន៣លាន៦សែននាក់ ចូលរួមប្ដេជ្ញាថាមិនប្រើថង់ប្លាស្ទិក ហើយលោកជឿជាក់ថា កុមារទាំងនេះ នៅថ្ងៃអនាគត​ពេលដែលពួកគេមានស្វាមី មានភរិយា មានកូនៗ ពួកគេនឹងអប់រំគ្នាឱ្យទុកដាក់ ឈប់ប្រើប្រាស់ប្លាស្ទិក។

ថ្លែងប្រាប់ក្រុមអ្នកសារព័ត៌មានក្រោយបើកកិច្ចប្រជុំ លោក អ៊ាង សុផល្លែត ក៏ឱ្យដឹងថា ក្រសួងបរិស្ថាន គ្រោងនឹងយកធុងសំរាមទៅដាក់នៅតាមសាលារៀនបន្ថែម ដើម្បីឱ្យកុមារប្រមូលសំរាមដាក់ នឹងយកសំរាមប្លាស្ទិកទៅដាក់ក្នុងធុង គ្រប់គ្រងឱ្យបានល្អ ងាយស្រួលកែច្នៃឡើងវិញ ឬដុតចោលនៅក្នុងឡតាមដែលស្របតាមបទដ្ឋានបច្ចេកទេសត្រឹមត្រូវ។

ជាជំហានបន្ត ដើម្បីភាពស្អាតនៅលើដី​ រដ្ឋមន្ត្រីអ៊ាង សុផល្លែត ឱ្យដឹងថា ក្រសួងបរិស្ថាន បាននឹងកំពុងសិក្សាទីតាំងទុកដាក់សំរាមនៅទូទាំងប្រទេស ដោយត្រូវសាងសង់បន្ថែម និងកែសម្រួលបច្ចេកទេសចំពោះទីតាំងឡដុតសំរាមដែលមានស្រាប់​ ដែលក្រោយសិក្សារួចរាល់ក្រសួងនឹងដាក់ជូនរដ្ឋាភិបាលពិនិត្យសម្រេច ឬស្វែងរកការជួយគាំទ្រពីដៃគូខាងក្រៅ ដើម្បីភាពស្អាតរយៈពេលវែង៕

ដោយ៖ ង៉ិល ណារ៉ាត់

The post រដ្ឋមន្ត្រីបរិស្ថាន៖ ជារឿងដ៏គួរឱ្យអាម៉ាស់ ដែលមនុស្សចាស់ចោលសំរាមផ្ដេសផ្ដាស តែក្មេងៗជាអ្នកសម្អាត appeared first on Kampuchea Thmey Daily.

​

ទីលានទុកដាក់សំរាម​ដែល​គ្រោង​នឹង​សាងសង់​នេះ មានផ្ទៃដីទំហំ ២១ ហិចតា ស្ថិត​ក្រោម​កិច្ចព្រមព្រៀងឥណទានសម្បទាន ដែល​ជា​គម្រោង​មួយ ស្ថិត​ក្នុង​ចំណោម​គម្រោង​ទាំង ៥ ដែល​រាជរដ្ឋាភិបាលកម្ពុជា​ បានចុះហត្ថលេខាជាមួយ ADB កាល​ពី​ថ្ងៃទី៨ ខែធ្នូ ឆ្នាំ២០២១ ។

​គម្រោង​នឹង​បែងចែក​ដីប្រើប្រាស់ជា២ផ្នែកធំៗគឺ៖ ផ្នែកទី១ សាងសង់រណ្តៅចាក់សំរាមចំនួន៥ រណ្តៅ និងប្រព័ន្ធគ្រប់គ្រងទឹកកខ្វក់ចេញពីសំណល់។ ផ្នែកទី២ សាងសង់​ប៉ុស្តិសន្តិសុខ និងស្លាកសញ្ញាគម្រោង, ធុង​ស្តុក​សំណល់រាវ ​និង​ស្ពានថ្លឹងទម្ងន់ និងការិយាល័យ, ផ្លូវចូលទីតាំងគម្រោង និងផ្លូវក្នុងទីតាំងគម្រោង, ប្រព័ន្ធលូបង្ហូរ, អណ្តូងត្រួតពិនិត្យគុណភាពទឹក, កន្លែងចំណត, កន្លែងចែកចាយ និងផ្គត់ផ្គង់អគ្គិសនី, អគាររដ្ឋបាល, កន្លែងហូបហារ និងកន្លែងសម្រាក, កន្លែងញែកសំរាម, កន្លែងរៀបចំធ្វើជីកំប៉ុស,  ធុងទឹកភ្លៀង, កន្លែងផលិតហ្គាស, ស្រះទឹកភ្លៀង, ទីកន្លែងបន្ថែមសម្រាប់ទីលានញែកសំរាម, កន្លែងសម្អាតរថយន្ត របង និងសួនច្បារដែលមានដាំដើមឈើជាដើម។

ការអនុវត្តនៃគម្រោងខាងលើនេះ​ គឺបានចូលរួមលើកកម្ពស់សោភ័ណភាពក្រុងបាវិត ក្នុងការប្រគួត​ប្រជែងទី​ក្រុងស្អាត ដោយ​ប្រែក្លាយទីក្រុងទៅ​ជា​មជ្ឈមណ្ឌលសេដ្ឋកិច្ច​តាមរយៈ​កែ​លម្អហេដ្ឋារចនាសម្ព័ន្ធបរិស្ថានក្រុង និង​ពង្រឹង​សមត្ថភាពស្ថាប័នរបស់អាជ្ញាធរខេត្ត និងមូលដ្ឋាន។

គួរ​ជម្រាប​ថា ក្រោមការយកចិត្តទុកដាក់របស់រាជរដ្ឋាភិបាលកម្ពុជា​ បានចុះហត្ថលេខាជាមួយ ADB លើកិច្ច​ព្រម​ព្រៀង​ឥណទានសម្បទាន​សម្រាប់គម្រោងនេះ នៅថ្ងៃទី៨ ខែធ្នូ ឆ្នាំ២០២១  មាន​ចំនួន ១៩៣,២០ លាន​ដុល្លារអាមេរិក។ ក្នុងនោះមាន ឥណទានសម្បទានពី ADB ចំនួន ១៨០  លានដុល្លារអាមេរិក និងការចូលរួមជា​បដិភាគ របស់រាជរដ្ឋាភិបាលកម្ពុជាចំនួន ១៣,២០ លានដុល្លារអាមេរិក​ ហើយមានរយៈពេលអនុវត្តជាង ៦ឆ្នាំ ចូលជាធរមាននៅថ្ងៃទី២៤ ខែកុម្ភៈ ឆ្នាំ២០២២ ហើយគ្រោងបញ្ចប់នៅថ្ងៃទី៣១ ខែឧសភា ឆ្នាំ២០២៨។

ទន្ទឹមនេះ​ ភ្នាក់ងារប្រតិបត្តិគម្រោង សម្រាប់គម្រោងអភិវឌ្ឍន៍ទីក្រុងគួរ​ឱ្យ​ចង់រស់នៅ   គឺជាក្រសួងសាធារណការ និងដឹកជញ្ជូន ដែលត្រូវអនុវត្តអនុគម្រោងចំនួន ៥ ក្នុងនោះ​ ២ អនុគម្រោងស្ថិតក្នុងក្រុងបាវិត​ និង ២ អនុគម្រោងទៀត ស្ថិតក្នុងក្រុងប៉ោយប៉ែត និង​ក្នុងក្រុងកំពត៕

The post ​ទីលានទុកដាក់សម្រាម​គម្រោងទីក្រុងគួរឱ្យចង់រស់នៅ​ក្នុងក្រុងបាវិត បើកការដ្ឋាន​សាងសង់ appeared first on Kampuchea Thmey Daily.

ក្នុងបទសម្ភាសជាមួយសារព័ត៌មានកម្ពុជាថ្មី លោក អ៊ាង សុផល្លែត រដ្ឋមន្រ្តីក្រសួងបរិស្ថាន បានលើកឡើងពីកង្វះខាតទីលានចាក់សំរាមនៅក្នុងខេត្តមួយចំនួន រួមជាមួយបញ្ហាសម្ភារដែលខូចខាត និងមិនមានសម្ភារគ្រប់គ្រាន់។ លោកបន្តថា ជាការពិត ទីលានទុកដាក់សំរាមមិនទាន់មានគ្រប់ខេត្តទេនៅកម្ពុជា ជាអាទិ៍ខេត្តត្បូងឃ្មុំ និងខេត្តដទៃទៀត ហើយទីលានទុកដាក់សំរាមមួយចំនួនក៏មានការខូចខាត និងខ្វះខាតផងដែរ។ ។

លោកបញ្ជាក់ថា៖«អ៊ីចឹង! ដំណាក់កាលនេះ ខ្ញុំបានឱ្យអគ្គនាយកដ្ឋានគាំពារបរិស្ថាន ធ្វើការសិក្សាលម្ពិតទូទាំង​ប្រទេស ថាតើយើងមានទីលានចាក់សំរាមប៉ុន្មាន ខូចខាតប៉ុន្មាន ខ្វះខាត ត្រូវបំពេញបន្ថែមប៉ុន្មាន។ យើងកំពុងធ្វើការសិក្សា ខ្ញុំសង្ឃឹមថា​ចុងខែនេះនឹងចប់សព្វគ្រប់ ហើយផ្តើមអនុវត្តឆាប់ៗខាងមុខនេះ»។

បើតាមលោករដ្ឋមន្រ្តី ទីលានទុកដាក់សំរាមដទៃទៀតដែលខូចខាត និងខ្វះចន្លោះ ក្រសួងនឹងបំពេញបន្ថែម ជួសជុល រៀបចំឱ្យបានស្អាត ដើម្បីឱ្យក្រុមហ៊ុនប្រមូលសំរាម គាត់អាចប្រមូលសំរាមទុកដាក់ឱ្យបានល្អ ហើយមិននាំទៅដល់ការបំពុលបរិស្ថានជុំវិញនោះ។ លោកថ្លែងថា៖« នេះគឺជាការងារដែលយើងកំពុងធ្វើមួយជំហានម្តងៗ ឱ្យទទួលបានជោគជ័យក្នុងរយៈពេល ៥ឆ្នាំ អាណត្តិនេះ»។

លោក អ៊ាង សុផល្លែត ក៏សង្កេតឃើញថាការបោះបង់ចោលសំរាមពាសវាលពាសកាល ជាអតីតកាលទៅហើយ ខណៈបច្ចុប្បន្នកាល អ្នកបើកកញ្ចក់ឡានបោះចោលសំរាមចេញក្រៅ អ្នកយកសំរាមបោះចោលតាមផ្លូវក៏ត្រូវវបានកាត់បន្ថយផងដែរ។ លោកចាត់ទុកទង្វើនេះ ជាសញ្ញាវិជ្ជមាន និងបន្តអំពាវដល់សាធារនជនទុកដាក់សំរាមឱ្យបានត្រឹមត្រូវ ជាពិសេសំណល់ប្លាស្ទិក ដែលបង្កហានិភ័យខ្ពស់ដល់សុខភាព។

ដើម្បីដោះស្រាយបញ្ហាសំណល់សំរាម ក្រសួងបរិស្ថាន បានដាក់ចេញនូវយុទ្ធនាការចែកធុងសំរាមនៅតាមសាលារៀនទូទាំងប្រទេស​ មណ្ឌលសុខភាព និងវត្តអារ៉ាម ដើម្បីឱ្យពលរដ្ឋមានកន្លែងទុកដាក់សំរាមបានត្រឹមត្រូវចៀសវាងបោះចោលពាសវាលពាសកាល៕

The post ក្រសួងបរិស្ថាន កំពុងរៀបចំទីលានទុកដាក់សំរាមឱ្យបានត្រឹមត្រូវទូទាំងប្រទេស appeared first on Kampuchea Thmey Daily.

ចំពោះទីលានទុកដាក់សំរាមក្នុងក្រុងក្រចេះ ស្ថិតក្រោមគម្រោងអភិវឌ្ឍន៍ទីក្រុងរបៀង នៃមហាអនុតំបន់មេគង្គ ជំហានទី៤ អនុវត្តការងារសាងសង់ដោយ ក្រុមហ៊ុន K.B.H Construction Co., Ltd. ដោយមានក្រុមហ៊ុន Ramboll Danmark សហការជាមួយ Oriental Consultation Global Co., Ltd. ក្រុមហ៊ុន SCE និង ក្រុមហ៊ុន Tancons (Cambodia) Co., Ltd. ជាទីប្រឹក្សាបច្ចេកទេស និងបានចំណាយថវិកាសាងសង់អស់ ៤ ៩៤៣ ៩៤៨ ដុល្លារអាម៉េរិក ដែលជាកម្ចីឥណទានធនាគារអភិវឌ្ឍន៍អាស៊ី(ADB)។

 ទីលានទុកដាក់សំរាមនេះ ត្រូវបានសាងសង់លើផ្ទៃដី ៦ហិកតា នៃផ្ទៃដីសរុបទំហំ ២៦,៨៨ហិកតា ស្ថិតនៅក្នុងភូមិផ្សារ ឃុំដារ ស្រុកចិត្របុរី ខេត្តក្រចេះ ដែលមានសមត្ថភាពប្រតិបត្តិការក្នុងរយៈពេល ២០ឆ្នាំ សម្រាប់ប្រជាជនក្នុងក្រុងក្រចេះចំនួន ០៤សង្កាត់(សង្កាត់ក្រចេះ ក្រគរ អូរឬស្សី និង រកាកណ្តាល)កន្លែងទុកដាក់សំរាមត្រូវបានរចនាឡើងជារណ្តៅចំនួន១ ក្នុងចំណោមរណ្តៅចំនួន៤ ក្នុងគម្រោង ដែលមានទំហំ ១៣៥,៧៥ម៉ែត្រ x ១២២,៥០ម៉ែត្រ ជម្រៅ ២ម៉ែត្រ ត្រូវជា ១,៦៦ហិកតា។ តាមផែនការរណ្តៅទាំងពីរនេះ នឹងត្រូវបំពេញសំរាមរហូតដល់ ១៥ម៉ែត្រ (គិតចាប់ពីមាត់រណ្តៅ) ដែលអាចផ្ទុកបានបរិមាណសំរាមបានប្រមាណ ១៩៦ ២២០ម៉ែត្រគូប។

ការណ៍ដែលមានទីលានទុកដាក់សំរាមត្រឹមត្រូវ ស្របតាមបទដ្ឋានបច្ចេកទេសបែបនេះ គឺពិតជាបានចូលរួមចំណែក ក្នុងការលើកកម្ពស់គុណភាព សុខុមាលភាពការរស់នៅ របស់បងប្អូននៅក្នុងតំបន់ ក៏ដូចជាតំបន់ជុំវិញ។ ផ្អែកលើសារៈប្រយោជន៍នៃវិស័យអនាម័យ ក្រសួងបាន និងកំពុងសិក្សា និងរៀបចំ ផែនការមេវិស័យទឹកកខ្វក់ និងសេចក្តីព្រាងច្បាប់ស្តីពីប្រព័ន្ធទឹកកខ្វក់ ដែលត្រៀមនឹងដាក់ឱ្យអនុវត្តនាពេលខាងមុខ។

ក្នុងពិធីសម្ពោធដាក់ឱ្យប្រើប្រាស់ជាផ្លូវការ និងពិធីប្រគល់-ទទួលនេះដែរ លោករដ្ឋមន្ត្រី បានថ្លែងអំណរគុណយ៉ាងជ្រាលជ្រៅចំពោះ ធនាគារអភិវឌ្ឍន៍អាស៊ី (ADB) ដែលជាដៃគូអភិវឌ្ឍន៍មួយ តែងតែចូលរួមជាមួយរាជរដ្ឋាភិបាលកម្ពុជា ក្នុងការអភិវឌ្ឍលើគ្រប់វិស័យ តាមរយៈកម្ចីឥណទាន និងបានថ្លែងអំណរគុណដល់ ក្រុមហ៊ុនសាងសង់ ក្រុមហ៊ុនត្រួតពិនិត្យបច្ចេកទេស មន្ត្រីបច្ចេកទេសគម្រោង នៃក្រសួងសាធារណការ និងដឹកជញ្ជូន អាជ្ញាធរខេត្តទាំងពីរ និងបងប្អូនប្រជាពលរដ្ឋ ដែលបានផ្តល់កិច្ចសហការយ៉ាងល្អប្រសើរ ជំរុញឱ្យការងារសាងសង់អាចដំណើរការទៅបានដោយរលូន និងបញ្ចប់តាមផែនការគ្រោងទុក៕

អត្ថបទ៖ ប្រុញ វិធិន

The post ខេត្តក្រចេះ ទទួលបានទីលានទុកដាក់សំរាមថ្មី មានសមត្ថភាពប្រតិបត្តិការ ២០ឆ្នាំ ស្របតាមបទដ្ឋានបច្ចេកទេស appeared first on Kampuchea Thmey Daily.

កាលពីពេលថ្មីៗនេះ លោក រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូនបាន​ដឹកនាំគណៈប្រតិភូក្រសួងចុះត្រួតពិនិត្យការងារប្រគល់-ទទួលអនុគម្រោងសាងសង់ទីលានទុកដាក់សំរាមខេត្តស្ទឹងត្រែង និងខេត្តក្រចេះ ដើម្បីត្រៀមនឹងដាក់សម្ពោធឱ្យប្រើប្រាស់ និងប្រគល់ជូនរដ្ឋបាលខេត្តគ្រប់គ្រងបន្តនាពេលឆាប់ៗខាងមុខនេះ។

អនុគម្រោងនៃការគ្រប់គ្រងសំណល់រឹងទីប្រជុំជនទាំងពីរ ស្ថិតនៅក្នុងគម្រោងអភិវឌ្ឍន៍ក្រុងរបៀងមហាអនុតំបន់ទន្លេមេគង្គ ជំហានទី៤ ដោយប្រើប្រាស់ឥណទានពីធនាគារអភិវឌ្ឍន៍អាស៊ី(ADB)។

ទីលានទុកដាក់សំរាមខេត្តស្ទឹងត្រែង ចាប់ផ្តើមការសាងសង់នៅថ្ងៃទី០៨ ខែមេសា ឆ្នាំ២០២២ និងបានបញ្ចប់ការសាងសង់​នៅថ្ងៃទី៣១ ខែសីហា ឆ្នាំ២០២៣ គ្របដណ្តប់លើផ្ទៃដីសរុប ១៩,៤៦ ហិកតា។ ចំណែកឯទីលានទុកដាក់សំរាមខេត្តក្រចេះ ចាប់ផ្តើមការសាងសង់នៅថ្ងៃទី២១ ខែមីនា ឆ្នាំ២០២២ និងបានបញ្ចប់ការសាងសង់នៅថ្ងៃទី១៣ ខែសីហា ឆ្នាំ២០២៣ គ្របដណ្តប់លើផ្ទៃដីសរុបចំនួន ២៦,៨៨ ហិកតា៕

The post ត្រៀម​ដាក់ឲ្យប្រើប្រាស់​ទីលានទុកដាក់សំរាមថ្មី​​នៅ​ខេត្តស្ទឹងត្រែង និងខេត្តក្រចេះ appeared first on Kampuchea Thmey Daily.