ទូដែក Archives - Kampuchea Thmey Daily

ក្រុមហ៊ុនកាស៊ីណូ បន្តយកទូដែកជាច្រើនគ្រឿង ចេញពីអគារកាស៊ីណូដែលត្រូវភ្លើងឆេះ

អ៊ិន ពិសី — Tue, 03 Jan 2023 08:33:12 +0000

ប៉ោយប៉ែត ៖ ទូដែកចំនួន ៧ ធំៗ សង្ស័យផ្ទុកទៅដោយរបស់របរមានតម្លៃ អាចជាលុយ និងឯកសារផ្សេងៗរបស់កាស៊ីណូទាំងពីរ ដែលត្រូវភ្លើងឆេះកាលពីចុងឆ្នាំ ២០២២ នាមាត់ច្រកទ្វារអន្តរជាតិប៉ោយប៉ែត ត្រូវបានស្ទូចយកចេញពីក្នុងអគារកាស៊ីណូកំពុងរុះរើឲ្យស្អាតដល់ដី ក្រោយបិទបញ្ចប់ នៃការរុករកជនរងគ្រោះ កាលពីរសៀលថ្ងៃទី ៣១ ខែធ្នូ ឆ្នាំ ២០២២។

លោក លី សារី អភិបាលរងខេត្តបន្ទាយមានជ័យ ដែលទទួលការងារជាអនុប្រធានសម្របសម្រួលក្រុមការងាររុះរើអគារកាស៊ីណូត្រូវភ្លើងឆេះបណ្ដាលឲ្យស្លាប់ ២៦ នាក់ និងរបួស ៥៧ នាក់ បានឲ្យដឹងកាលពីរសៀលថ្ងៃទី ២ ខែមករា ឆ្នាំ ២០២៣ ថា នៅថ្ងៃទី ២ មករា ក្រុមការងារបច្ចេកទេសមានថៃ-កម្ពុជា បាននិងកំពុងរុះរើសំណង់អគារកាស៊ីណូដែលឆេះខូចខាតទាំងស្រុង ស្ទូចយកបានជាបន្តបន្ទាប់ក្នុងពេលមួយព្រឹក យកទូដែកដែលត្រូវឆេះកប់ក្នុងអគារបានចំនួន ៧ ទូដែកធំៗ។

ចំពោះទូដែកដែលក្រុមហ៊ុនស្ទូចយកចេញ មិនត្រូវបានគេឲ្យដឹងថាមានរបស់អ្វីខ្លះនោះឡើយ តែមានបុគ្គលិកកាស៊ីណូខ្លះនិយាយថា ជាឯកសារសំខាន់ៗ និងទ្រព្យសម្បត្តិមានតម្លៃដូចជា លុយជាដើម។

លោក លី សារី បានឲ្យដឹងទៀតថា តាមក្រុមកាស៊ីណូ នៅមានទូដែកមួយចំនួនទៀតដែលត្រូវស្ទូចយកចេញបន្តទៀត។

សម្រាប់រយៈពេល នៃការរុះរើ លោកមិនអាចកំណត់ជាក់លាក់បានទេ តែតាមការវាយតម្លៃរបស់ក្រុមម៉ៅការរុះរើ អាចប្រើពេលមួយខែ។

មុនការរុះរើសំណង់អគារខាងលើ ផ្លូវចូលតំបន់ដែលត្រូវរុះរើ ត្រូវបានហ៊ុមព័ទ្ធដោយស័ង្កសីបិទ ក្នុងនោះផ្លូវចូលច្រកអន្តរជាតិប៉ោយប៉ែតពីខាងកើត នៃរង្វង់មូល ក៏ត្រូវបានបិទដោយស័ង្កសី មិនឲ្យមានការចេញចូល ឬចរាចរ ក្រៅពីក្រុមការងាររុះរើឡើយ។ ដើម្បីកុំឲ្យមានគ្រោះថ្នាក់ជាយថាហេតុផ្សេងៗ។

សូមរំលឹកថា អគ្គិភ័យបានឆាបឆេះអគារកាស៊ីណូដាយមេនរីសត Royal G Club ឬ Grand Diamond City និងកាស៊ីណូ Casino Poipet Resort នាក្រុងប៉ោយប៉ែត កាលពីយប់ម៉ោង ១១ និង ៣០ នាទី ឈានចូលថ្ងៃទី ២៩ ខែធ្នូ ហើយរលត់ គ្រប់គ្រងបានទាំងស្រុងនៅម៉ោង ៤ ទៀបភ្លឺ ថ្ងៃទី ៣០ ខែធ្នូ ឆ្នាំ ២០២២ និងបិទបញ្ចប់ការសង្គ្រោះរុករកជនរងគ្រោះនៅល្ងាចថ្ងៃទី ៣០ ខែធ្នូ ឆ្នាំ ២០២២។ ក្នុងនោះ ខូចខាតសំណង់ ៣ អគារធំៗ ស្ពានថ្មើរជើងឆ្លងផ្លូវ ២ និងទ្រព្យសម្បត្តិ លុយកាក់យ៉ាងច្រើន៕

អត្ថបទ ៖ អ.ពៅ

The post ក្រុមហ៊ុនកាស៊ីណូ បន្តយកទូដែកជាច្រើនគ្រឿង ចេញពីអគារកាស៊ីណូដែលត្រូវភ្លើងឆេះ appeared first on Kampuchea Thmey Daily.

សមត្ថកិច្ចចុះស្រាវជ្រាវករណីចោរគាស់ផ្ទះតំណាងចែកចាយ DW យកទូដែកមានប្រាក់ជាង៥០ម៉ឺនដុល្លារ

KC Virak — Wed, 12 May 2021 09:08:41 +0000

ភ្នំពេញ៖ សមត្ថកិច្ចចម្រុះនៃស្នងការនគរបាលរាជធានីភ្នំពេញបានចុះមកស្រាវជ្រាវជុំវិញករណីចោរគាស់ផ្ទះមករា មុំ ដែលជាតំណាងចែកចាយធំក្រុមហ៊ុន DW សាខាបឹងសាឡាង លក់ដុំ និងរាយ ឡេមុខ និងឡេខ្លួន ដែលនាំចូលពីប្រទេសថៃ និងកូរ៉េ នៅព្រឹកថ្ងៃទី១២ ខែឧសភា ឆ្នាំ២០២១នេះ។

ជុំវិញការចុះស្រាវជ្រាវករណីនេះ បន្ទាប់ពីជនរងគ្រោះឈ្មោះ ហេង មករា ភេទស្រី អាយុ៣២ឆ្នាំ ដែលគេស្គាល់ថា មករា មុំ ជាតំណាងចែកចាយធំក្រុមហ៊ុន DW សាខាបឹងសាឡាង បានឡាយបង្ហោះវីដេអូ ពីមន្ទីរពេទ្យ ខណៈនាងព្យាបាលជំងឺកូវីដ-១៩ ដោយបានយំសោក រៀបរាប់ថា ផ្ទះរបស់ខ្លួនត្រូវបានក្រុមចោរគាស់ទូដែកយកប្រាក់ប្រមាណជាង៥០ម៉ឺន ពេល ដែលគាត់បានចាក់សោផ្ទះត្រឹមត្រូវទៅព្យាបាលនៅមជ្ឈមណ្ឌម៉ូឌែន២ ក្នុងសង្កាត់ចាក់អង្រែក្រោម ខណ្ឌមានជ័យ។

មន្ត្រីនគរបាលបានឱ្យដឹងថា ផ្ទះដែលអះអាងថាចោរគាស់នោះ លេខ៣៥B ផ្លូវលេខ២២៨ សង្កាត់បឹងសាឡាង ខណ្ឌទួលគោក រាជធានីភ្នំពេញ មានសមាជិកចំនួន៧នាក់ មានវិជ្ជមានកូវីដ-១៩ ហើយត្រូវបានបញ្ជូនទៅព្យាបាលទាំងអស់ដោយចាកសោផ្ទះទុកចោល។ ចំពោះករណីនេះគេពុំដឹងថា ក្រុមចោរគាស់ផ្ទះមានគ្នាប៉ុន្មាននាក់ឡើយ ហើយ ធ្វើសកម្មភាពតាំងពីពេលណានោះដែរ។

តាមសមត្ថកិច្ចមូលដ្ឋានស៊ើបសួរប្រជាពលរដ្ឋបានឱ្យដឹងថា ហេតុការណ៍ចោរគាស់ផ្ទះ បង្កឱ្យមានការភ្ញាក់ផ្អើលកាលពីល្ងាច ថ្ងៃទី១១ ខែឧសភា ឆ្នាំ២០២១ មានប្រជាពលរដ្ឋហាត់ប្រាណបានឆ្លងកាត់ និងប្រទះឃើញផ្ទះនោះចំហទ្វារ តែមិនមាននរណាម្នាក់ចាប់អារម្មណ៍។ លុះនៅវេលាម៉ោងប្រមាណ១រសៀល ជនសង្ស័យម្នាក់បានជិះម៉ូតូមួយគ្រឿងមកឈប់មុខផ្ទះ បើកទ្វារចូលទៅក្នុងមួយសន្ទុះក្រោយមក មានម៉ូតូកង់៣មួយគ្រឿងបានមកដឹកទំនិញ សង្ស័យថាមកដឹកទូរដែកចេញ តែពុំមាននណាចាប់អារម្មណ៍ ដោយអ្នកជិតខាងស្មានតែម្ចាស់ឱ្យគេមកដឹកទំនិញដូចសព្វដង។

យោងតាមការរៀបរាប់របស់ស្ត្រីជាម្ចាស់ផ្ទះរងគ្រោះបានឡាយបង្ហោះវីដេអូលើបណ្តាញសង្គមបានឱ្យដឹងថា ផ្ទះរបស់គាត់ត្រូវបានចោរចូលគាស់យកទូដែកទង្ងន់១០០គីឡូក្រាមទៅបាត់ ដោយយកប្រាក់ គ្រឿងអលង្ការពេជ្រ កូនជ្រូក សរុបអស់ជាង៥០ម៉ឺនដុល្លារ និងប្លង់ផ្ទះ៣កន្លែង ប្លង់ដី៥កន្លែងយកទៅទាំងអស់។

សូមបញ្ជាក់ផងដែរថា នគរបាលបានចុះទៅត្រួតពិនិត្យផ្ទះកើតហេតុ ធ្វើការស្រាវជ្រាវជុំវិញជនសង្ស័យគាស់ផ្ទះនេះ។ ចំណែកកាមេរ៉ាសុវត្តិភាពត្រូវបានជនសង្ស័យដោះយកដុំទៅបាត់ទាំងអស់៕

អត្ថបទ៖ ស្រីរ័ត្ន

The post សមត្ថកិច្ចចុះស្រាវជ្រាវករណីចោរគាស់ផ្ទះតំណាងចែកចាយ DW យកទូដែកមានប្រាក់ជាង៥០ម៉ឺនដុល្លារ appeared first on Kampuchea Thmey Daily.