ទ្រព្យសម្បត្តិ Archives - Kampuchea Thmey Daily

លោក ម៉ាឌូរ៉ូ ជាប់ឈ្មោះក្នុងបញ្ជីមេដឹកនាំមានទ្រព្យសម្បត្តិច្រើនបំផុតលើពិភពលោក

Minea Neu — Tue, 06 Jan 2026 04:27:37 +0000

ខណៈពេលដែលមេដឹកនាំពិភពលោកជាច្រើនដែលអាចកាន់អំណាចនយោបាយដ៏ធំរួចហើយក្នុងបណ្តាប្រទេសអភិវឌ្ឍន៍សេដ្ឋកិច្ចរីកចម្រើន មេដឹកនាំទាំងនោះក៏បង្ហាញពីភាពមានបាន ដោយកាន់កាប់ទ្រព្យសម្បត្តិយ៉ាងស្តុកស្តមរកអ្វីគណនាមិនបាន។

សារព័ត៌មាន UK Finance ឱ្យដឹងថា បញ្ជីនៃមេដឹកនាំដែលមានទ្រព្យជាងគេបំផុតមិនត្រឹមតែបង្ហាញពីប្រធានាធិបតី និងនាយករដ្ឋមន្ត្រីនៃប្រទេសអ្នកមានបំផុតក្នុងពិភពលោក ហើយពួកគេដ៏ដឹកនាំប្រទេសឱ្យរីកចម្រើនដូចទ្រព្យសម្បត្តិដែលខ្លួនកាន់កាប់ដែរ។ ផ្ទុយទៅវិញ មានមេដឹកនាំមួយចំនួនមានទ្រព្យសម្បត្តិច្រើន ប៉ុន្តែបែរជាដឹកនាំប្រទេសឱ្យអន់ថយទៅវិញ រងទណ្ឌកម្មសេដ្ឋកិច្ច ប្រទេសកើតកលយុគញឹកញាប់ និងអតិផរណា ប៉ះពាល់ដល់ប្រជាជនយ៉ាងខ្លាំង។

លោក ម៉ាឌូរ៉ូ។ Reuters

តាមការចេញផ្សាយនោះ ក្នុងមេដឹកនាំប្រទេសទាំងនោះក៏មានមហាអំណាចមួយចំនួន ដូចជាប្រធានាធិបតីអាមេរិក លោក ដូ ណាល់ត្រាំ និងប្រធានាធិបតីរុស្ស៊ី លោក វ្ល៉ាឌីមៀរ ពូទីន លោក ស៊ី ជីនពីង ប្រធានាធិបតីចិន និងប្រធានាធិបតីកូរ៉េខាងជើង លោក គីម ជុងអ៊ុន ជាដើម។

តែយ៉ាងណា ប្រធានាធិបតីវ៉េណេស៊ុយអេឡា លោក នីកូឡាស់ ម៉ាឌូរ៉ូ នៅតំបន់អាមេរិកខាងត្បូង ឬហៅថា អាមេរិកឡាទីន ដែលគេប៉ាន់ស្មានថា មានប្រាក់ខែទាបបំផុត ប៉ុន្តែគាត់នៅតែត្រូវបានគេរកឃើញថាលោកមានទ្រព្យសម្បត្តិប្រហែល ២លានដុល្លារ ទោះបីជា មានប្រភពខ្លះទៀត បានកំណត់ទ្រព្យសម្បត្តិរបស់លោកខ្ពស់ជាងនេះច្រើនទៀត។

ដោយធ្វើជាប្រធានាធិបតីលើប្រទេសមួយដែលត្រូវបានរំខានដោយអតិផរណាខ្ពស់ កង្វះខាតស្បៀងអាហារ ថ្នាំពេទ្យ និងការដាច់ចរន្តអគ្គិសនីជាញឹកញាប់ មេដឹកនាំសង្គមនិយមរូបនេះពិតជាអាចទិញទំនិញប្រណីតៗគ្មានដែនកំណត់ផងដែរ។

តែយ៉ាងណា លោក ម៉ាឌូរ៉ូ បានចាប់ផ្តើមជីវិតការងាររបស់លោកក្នុងនាមជាអ្នកបើកបររថយន្តក្រុង មុនពេលក្លាយជាមេដឹកនាំសហជីព និងបានដឹកនាំប្រទេសវ៉េណេស៊ុយអេឡាពីឆ្នាំ២០១៣។ តែពេលវេលានៅក្នុងតំណែងរបស់លោក ត្រូវបានជាប់គាំងដោយភាពចម្រូងចម្រាសនានាជាច្រើន ដោយសារប្រទេសដែលសម្បូរដោយប្រេងឥន្ធនៈរបស់លោកតែងតែឃើញខ្លួនឯងឯកោនៅលើឆាកអន្តរជាតិ។

មិនតែប៉ុណ្ណោះ លោក ម៉ាឌូរ៉ូ បានប្រឈមមុខនឹងការចោទប្រកាន់ពីអំពើពុករលួយជាច្រើនមុនពេលចូលកាន់អំណាចជាប្រធានាធិបតី៕

ប្រែសម្រួល៖ ណឺ មិនា

The post លោក ម៉ាឌូរ៉ូ ជាប់ឈ្មោះក្នុងបញ្ជីមេដឹកនាំមានទ្រព្យសម្បត្តិច្រើនបំផុតលើពិភពលោក appeared first on Kampuchea Thmey Daily.

មកដឹងពីទ្រព្យសម្បត្តិរបស់អតីតមេដឹកនាំស៊ីរី លោក Bashar al-Assad

Huon Dina — Wed, 18 Dec 2024 06:56:54 +0000

ក្រោយរបបផ្ដាច់ការរបស់ប្រធានាធិបតីស៊ីរី លោក បាសា អាល់ អាសាដ (Bashar al-Assad) បានដួលរលំនៅដើមខែធ្នូនេះ កាសែត Financial Times បានរាយការណ៍ដោយដកស្រង់កំណត់ត្រាហិរញ្ញវត្ថុថា លោកបានដឹកជញ្ជូនលុយសុទ្ធសរុប ២៥០ លានដុល្លារ ទៅកាន់ក្រុងមូស្គូនៃប្រទេសរុស្ស៊ី ចន្លោះពីឆ្នាំ ២០១៨-២០១៩។

Financial Times ថា ធនាគារកណ្តាលស៊ីរីដឹកក្រដាសប្រាក់ទម្ងន់ជិត ២ តោន ដែលក្នុងនោះរួមក្រដាសប្រាក់ ១០០ ដុល្លារអាមេរិក និង ៥០០ អឺរ៉ូ ទៅរុស្ស៊ី ហើយក្រោយមកតម្កល់ប្រាក់ទាំងនោះនៅក្នុងធនាគាររុស្ស៊ី ដែលរងទណ្ឌកម្មរបស់លោកខាងលិច។

ការដឹកជញ្ជូនប្រាក់នេះ បានកើតឡើងចំពេលដែលស៊ីរីជំពាក់បំណុលរុស្ស៊ីវ័ណ្ឌក ក្រោយពេលរុស្ស៊ីបញ្ជូនទ័ពដើម្បីការពាររដ្ឋាភិបាលរបស់លោក Assad ខណៈសាច់ញាតិរបស់លោកទិញទ្រព្យសម្បត្តិប្រណិតៗ រួមទាំងអចលនទ្រព្យ នៅក្នុងប្រទេសរុស្ស៊ី។

នេះគ្រាន់តែជាសេចក្ដីរាយការណ៍ចុងក្រោយប៉ុណ្ណោះ។ គេមើលឃើញថា ក្រោយពេលលោក Assad ត្រូវបានផ្ដួលរំលំ ហើយនិរទេសខ្លួនទៅរុស្ស៊ីនៅដើមខែធ្នូនេះ មានការរាយការណ៍ និងការសើរើព្រោងព្រាត ស្ដីពីទ្រព្យសម្បត្តិរបស់លោក ក្រុមគ្រួសារ ក៏ដូចជាសាច់ញាតិ ដែលសរុបជាទឹកប្រាក់រាប់ពាន់លានដុល្លារ។

គិតមកត្រឹមពេលដែលលោក Assad រត់ចោលស្រុក គេមិនដឹងថាទ្រព្យសម្បត្តិរបស់ក្រុមគ្រួសារត្រកូល Assad មានប៉ុន្មានឱ្យប្រាកដជាក់លាក់នោះទេ ខណៈការប៉ាន់ស្មានជាច្រើនត្រូវបានធ្វើឡើង ដោយផ្អែកលើទិន្នន័យរៀងៗខ្លួន។

យ៉ាងណាមិញ របាយការណ៍ពីក្រសួងការបទេសសហរដ្ឋអាមេរិកក្នុងឆ្នាំ ២០២២ បានប៉ាន់ប្រមាណថា អាជីវកម្ម និងទ្រព្យសម្បត្តិដែលមានទំនាក់ទំនងជាមួយត្រកូល Assad អាចមានតម្លៃសរុបច្រើនបំផុតដល់ ១២ ប៊ីលានដុល្លារ និងទាបបំផុតយ៉ាងហោចណាស់ ១ ប៊ីលានដុល្លារ។ នេះបើតាមការចុះផ្សាយរបស់កាសែត The Wall Street Journal។

របាយការណ៍របស់ក្រសួងការបទេសដដែល បានគូសជាលម្អិតផងដែរថា ទ្រព្យសម្បត្តិផ្ទាល់ខ្លួនរបស់លោក Assad និងប្រពន្ធរបស់លោក គឺលោកស្រី Assad Asma ទំនងជាមានចន្លោះពី ១-២ ប៊ីលានដុល្លារ។ គ្រួសាររបស់លោកកាន់កាប់អចលនទ្រព្យនៅទីក្រុងឌូបៃ (អារ៉ាប់រួម) មូស្គូ (រុស្ស៊ី) និងឡុងដ៍ (ចក្រភពអង់គ្លេស) និងមានគណនីធនាគារសម្ងាត់រាប់សិប រួមទាំងគណនីធនាគារប្រាក់ ៥០ លានដុល្លារនៅក្រុងឡុងដ៍ ដែលអាជ្ញាធរអង់គ្លេសបានបង្កក។ នេះបើយោងតាមការចុះផ្សាយរបស់សារព័ត៌មានអាល្លឺម៉ង់ DW។

បើតាម DW ទ្រព្យសម្បត្តិផ្ទាល់ខ្លួនដែលក្រសួងការបរទេសអាមេរិកប៉ាន់ស្មាន ទំនងគ្រាន់តែជាផ្នែកតូចមួយនៃទ្រព្យសម្បត្តិគ្រួសាររបស់លោក Assad ប៉ុណ្ណោះ។ ការប៉ាន់ស្មានខ្លះ បានចង្អុលបង្ហាញថា ត្រកូល Assad មានមាស ២០០ តោន និងទ្រព្យសម្បត្តិតម្លៃប្រហែល ២២ ប៊ីលានដុល្លារ ជាមួយនឹងបណ្ដាញជំនួញទាំងនៅអឺរ៉ុប និងមជ្ឈិមបូព៌ា។ ការប៉ាន់ស្មានផ្សេងៗទៀត បានលើកឡើងថា បូករួមទាំងបណ្តាញទ្រព្យសម្បត្តិលាក់កំបាំងទាំងអស់របស់លោក Assad វាអាចមានរហូតដល់ទៅ ១២២ ប៊ីលានដុល្លារ។

ទោះបីជាការប៉ាន់ស្មានទាំងអស់នេះ មានទំហំខុសគ្នាខ្លាំងក៏ដោយ ក៏ប៉ុន្តែភស្តុតាង និងព័ត៌មានមួយចំនួនស្ដីពីប្រាក់ និងទ្រព្យសម្បត្តិដែលអាជ្ញាធរបរទេសរឹបអូសឬបង្កកទុក ក្នុងករណីពាក់ព័ន្ធនឹងសាច់ញាតិបងប្អូនរបស់លោក Assad សុទ្ធតែបង្ហាញថាពីចំនួនដ៏មហាសាលរួចទៅហើយ។

ជាឧទាហរណ៍ លោក Rami Makhlouf ដែលជាបងប្អូនជីដូនមួយរបស់លោក Assad និងត្រូវបានគេចាត់ទុកថាជាអ្នកមានបំផុតមួយនៅស៊ីរី ទំនងមានទ្រព្យសម្បត្តិចន្លោះពី ៥-១០ ប៊ីលានដុល្លារ។ នេះបើតាមក្រសួងការបរទេសអាមេរិក ដែលស្រង់ការប៉ាន់ស្មានរបស់ «ប្រភពបើកចំហរ»។

ក្នុងឆ្នាំ ២០១៦ អាជ្ញាធរស្វីសបានបង្កកប្រាក់ ៣,២ លានដុល្លារនៅធនាគារស្វីស របស់លោក Hafez Makhlouf ដែលជាប្អូនរបស់លោក Rami Makhlouf ជុំវិញករណីលាងលុយកខ្វក់។

ក្នុងឆ្នាំ ២០១៧ អាជ្ញាធរអេស្ប៉ាញ និងបារាំង បានរឹបអូសទ្រព្យសម្បត្តិប្រហែល ៦៣០ លានដុល្លារ ជាកម្មសិទ្ធិរបស់លោក Rifaat Assad ដែលជាពូរបស់លោក Assad ក្រោយលោកជាប់ឈ្មោះក្នុងការស៊ើបអង្កេតលើបណ្ដាញលាងលុយកង្វក់របស់អឺរ៉ុប។ ការរឹបអូសនោះ រួមបញ្ចូលទាំងសណ្ឋាគារ ភោជនីយដ្ឋាន និងអចលនទ្រព្យផ្សេងៗទៀត។

តើលោក Assad និងបងប្អូនសាច់ញាតិបានប្រាក់ទាំងនោះមកពីណា?

របាយការណ៍ក្រសួងការបរទេសអាមេរិកឆ្នាំ ២០២២ បានលើកឡើងថា បងប្អូនត្រកូល Assad ត្រូវបានចូលរួមដោយផ្ទាល់ ឬដោយប្រយោលនៅក្នុង «ប្រតិបត្តិការសេដ្ឋកិច្ចទ្រង់ទ្រាយធំស្ទើរតែគ្រប់ផ្នែកទាំងអស់របស់ស៊ីរី» ក្នុងនោះរួមមានទាំងក្រុមហ៊ុនសាជីវកម្ម ដែលទទួលបានសិទ្ធិកាន់កាប់ផ្ដាច់មុខលើគម្រោងវិនិយោគ អភិវឌ្ឍ ឬអាជីវកម្មនានារបស់រដ្ឋាភិបាល ក៏ដូចជាក្រុមហ៊ុនសាជីវកម្មវិនិយោគលើវិស័យផ្សេងៗទៀត រួមទាំងអចលនទ្រព្យ។

ជាមួយគ្នានោះ ទ្រព្យសកម្មទាំងឡាយណាដែលមាននៅបរទេស ហើយមិនរងការរឹបអូស ឬបង្កករបស់លោកខាងលិចនោះ ទំនងកាន់កាប់ដោយបុគ្គល ឬក្រុមហ៊ុនក្លែងក្លាយដែលមានតែឈ្មោះ ឬដោយបុគ្គលផ្សេងទៀត ដើម្បីបិទបាំងកម្មសិទ្ធិ និងគេចវេសពីទណ្ឌកម្មរបស់លោកខាងលិច។

របាយការណ៍ដដែលរបស់ក្រសួងបានអះអាងថា គ្រួសាររបស់លោក Assad បានកើបប្រាក់ដោយជាប់ពាក់ព័ន្ធនឹងការជួញដូរគ្រឿងញៀន ការរត់ពន្ធអាវុធ និងការជំរិតយកប្រាក់ ដោយធ្វើសកម្មភាពក្រោមឈ្មោះក្រុមហ៊ុនសាជីវកម្ម ដែលមានរចនាសម្ព័ន្ធដូចជាស្របច្បាប់។

ក្រោយពេលដួលរលំ ហើយរត់ភៀសខ្លួន ទៅរុស្ស៊ី គេមិនដឹងថាលោក Assad បានប្រមូលទ្រព្យសម្បត្តិទៅជាមួយខ្លួនប៉ុន្មាននោះទេ។ ទីភ្នាក់ងារសារព័ត៌មានរ៉យទ័រ បានរាយការណ៍ថា លោក Assad បានរត់ចេញពីប្រទេសទាំងប្រញ៉ាប់ ទាំងមិនបានប្រាប់ជំនួយការជិតស្និតបំផុតរបស់លោក ឬគ្រួសារនោះទេ។ វីដេអូដែលគេថតក្រោយពេលសម្រុកចូលផ្ទះ និងការិយាល័យរបស់លោក បានបង្ហាញថា ក្រុមគ្រួសាររបស់លោកបានបន្សល់ទុករបស់មានតម្លៃជាច្រើន រួមទាំងគ្រឿងសង្ហារឹម ទំនិញប្រណីតៗ និងយានដ្ឋានដែលពោរពេញដោយរថយន្តទំនើប រួមទាំងរថយន្ត Ferrari, Lamborghini, Rolls Royce៕

The post មកដឹងពីទ្រព្យសម្បត្តិរបស់អតីតមេដឹកនាំស៊ីរី លោក Bashar al-Assad appeared first on Kampuchea Thmey Daily.

ល្បិចហុងស៊ុយ ៣យ៉ាង ទាក់ទាញទ្រព្យសម្បត្តិឲ្យហូរចូលកាបូប

សាង ស្រីល័ក្ខ — Fri, 29 Sep 2023 01:00:00 +0000

មិនថាកាបូបដាក់លុយដែលទើបនឹងទិញ ឬធ្លាប់ប្រើជាយូរហើយក្ដី ប្រសិនបើអ្នកចេះវិធីឬគន្លឹះហុងស៊ុយដើម្បីទាក់ទាញហៅទ្រព្យសម្បត្តិ នោះប្រាកដណាស់ថាលុយនឹងរត់មកពេញៗកាបូបជាក់ជាមិនខានទេ។

ខាងក្រោមនេះផងដែរ គ្រូ ណុប នឹងបង្ហាញពីវិធីហៅប្រាក់៣សាមញ្ញបំផុតសម្រាប់លោកអ្នក៖

១ កុំប្រើកាបូបដែលរហែក

ម៉ាកកាបូបមួយចំនួនមានការរចនាដែលមើលទៅលេចធ្លោ និងទំនើប។ ប៉ុន្តែកាបូបដែលមានការរចនាខ្វះខាតឬមិនស្អាត តាមជំនឿថា រន្ធដែលបាក់នឹងធ្វើឲ្យមាសប្រាក់ធ្លាយចេញ។ ប្រសិនបើអ្នកកំពុងស្វែងរកកាបូប គួរតែទិញកាបូបដែលមានការរចនាបិទជិត វានឹងជួយឲ្យលុយនៅជាមួយយើងបានយូរអង្វែង។

២ កុំឲ្យកាបូបរបស់អ្នកទទេ

នៅពេលដែលយើងទទួលបានកាបូបថ្មី យើងតែងទុកលុយចោលជានិច្ច។ ប៉ុន្តែការមានលុយត្រៀមទុក ជានិមិត្តរូបនៃភាពសម្បូរបែប។ ប្រសិនបើមានការសង្គ្រោះបន្ទាន់ណាមួយ ឬត្រូវការសាច់ប្រាក់ភ្លាមៗ យើងក៏មានលុយស្តុកទុកដោយមិនបាច់ភ័យព្រួយ។ ប្រាក់អំណោយដែលយើងដាក់ នឹងជួយយើងឲ្យរួចផុតពីវិបត្តិ។ យ៉ាងហោចណាស់មាន ៥ទៅ១ម៉ឺនរៀលនៅក្នុងកាបូបរបស់អ្នក ដើម្បីសន្តិភាពនៃចិត្ត។

៣ កុំរក្សាទុកបង្កាន់ដៃក្នុងកាបូបច្រើនពេក

ការប្រមូលបង្កាន់ដៃផ្សេងៗ ហើយរបស់ដែលមិនចាំបាច់កកកុញនៅក្នុងកាបូបរហូតដល់ណែនពេក។ វាអាចនឹងធ្វើឲ្យលំហូរនៃលុយជាប់គាំង និងរំខាន។ ប្រសិនបើយើងត្រូវរក្សាទុកបង្កាន់ដៃទាំងនោះសម្រាប់ដំណើរការកិច្ចការ វាជាការប្រសើរក្នុងការរក្សាបង្កាន់ដៃឲ្យនៅដាច់ដោយឡែក។ បន្ថែមពីលើការបង្កើតថាមពលអវិជ្ជមានសម្រាប់ហុងស៊ុយរបស់យើង។ ការប្រមូលបង្កាន់ដៃច្រើនពេក នឹងធ្វើឲ្យកាបូបបាត់បង់រូបរាង ធ្វើឲ្យវាមិនទាក់ទាញផងដែរ។

លើសពីនេះទៀតដែរ ការជ្រើសរើសកាបូបនៅក្នុងពណ៌ល្អ ៗ ក៏អាចជួយកែលម្អសំណាងរបស់អ្នកតាមវិធីផ្សេង។ ប៉ុន្តែបើនិយាយពីការចាយលុយ យើងគួរតែមានគម្រោងការឲ្យបានល្អ។ ដឹងពីរបៀបរក្សាទុក ឬបើមានលុយនៅសល់គួរវិនិយោគដើម្បីបន្ថែមវិធីផ្សេងទៀតដល់លុយយើងផងដែរ៕

គ្រូ ណុប

ចុចអាន៖អាហារ៤ប្រភេទជនជាតិចិនជឿថា ហូបក្នុងថ្ងៃកំណើត ជួយឲ្យសុខភាពល្អ និងសំបូរលុយកាក់

ចុចអាន៖មានមូលហេតុអ្វី ដែល ង៉ូវយ៉េង ថ្លៃជាងនំសែនព្រះខែផ្សេងទៀត

The post ល្បិចហុងស៊ុយ ៣យ៉ាង ទាក់ទាញទ្រព្យសម្បត្តិឲ្យហូរចូលកាបូប appeared first on Kampuchea Thmey Daily.

បែកធ្លាយ ចំនួនទឹកប្រាក់ក្នុងធនាគារ Influencer ម៉ាឡេស៊ីម្នាក់ ធ្វើឲ្យអ្នកគាំទ្រស្រឡាំងកាំង

Boa Sokunveary — Thu, 15 Jun 2023 04:55:00 +0000

Cathryn Lee វ័យ ៣៣ ឆ្នាំជាអ្នកលេងព្យាណូជនជាតិម៉ាឡេស៊ី និងជា Influencer ដ៏ល្បីមួយរូបក្នុង Instagram ។ ថ្មីៗនេះ នាងបានបង្ហោះប្រាប់អ្នកគាំទ្រ ៣ លាននាក់របស់ខ្លួនពីបញ្ហា Facebook កាត់លុយគ្មានមូលហេតុ ។

ដោយសារមួយរយៈក្រោយ ករណីកាត់លុយពីធនាគារដោយគ្មានមូលហេតុមានញឹកញាប់ពេក ទើបនាងសម្រេចចិត្តពិនិត្យមើលគណនីរបស់ខ្លួន ហើយដឹងថាបាត់អស់ ៦.១១ ដុល្លារដែរ ។

ពេលនោះ ស្រាប់តែបែកធ្លាយចំនួនទឹកប្រាក់ដ៏ច្រើនសន្ធឹករបស់ Cathryn ធ្វើឲ្យអ្នកគាំទ្រភ្ញាក់ផ្អើលជាខ្លាំង គឺមានចំនួនដល់ទៅ ៨.៧២ លានដុល្លារឯណោះ ។

បន្ទាប់ពីឃើញដូច្នោះ អ្នកគាំទ្រ Cathryn បានបញ្ចេញមតិក្រោមការផុសថា “ទេពធីតាព្យាណូជាអ្នកមាន ជួយចិញ្ចឹមខ្ញុំផង” ចំណែកអ្នកខ្លះទៀតថា នាងមានបំណងបង្អួតទឹកប្រាក់ទៅវិញ ។ យ៉ាងណារូបដែលនាងបង្ហោះត្រូវបានលុបហើយ ព្រោះវាជាអចេតនាប៉ុណ្ណោះ ។

គួរបញ្ជាក់ថា Cathryn មានរហស្សនាមជា “ទេពធីតាព្យាណូ” នៅក្នុង Instagram នាងតែងតែថតរូបសិចស៊ីស្លៀកឈុតក្នុងដើម្បីបង្ហោះឲ្យអ្នកគាំទ្រមើលផងដែរ ។ មនុស្សជាច្រើនសរសើរនាងពីរូបសម្រស់ដ៏ទាក់ទាញ និងជាស្ត្រីមានទេពកោសល្យទាំងព្រម ៕

ប្រែសម្រួល ៖ វារី

ប្រភព ៖ 8days

ចុចអាន ៖ Influencer ម៉ាឡេស៊ី MsPuiyi បង្ហោះរូបឈុតប្រពៃណីវៀតណាម អត់ស្លៀកខោ កំពុងបង្កកំហឹងពីប្រជាជន

The post បែកធ្លាយ ចំនួនទឹកប្រាក់ក្នុងធនាគារ Influencer ម៉ាឡេស៊ីម្នាក់ ធ្វើឲ្យអ្នកគាំទ្រស្រឡាំងកាំង appeared first on Kampuchea Thmey Daily.

បុគ្គលអន្តរជាតិល្បីៗ ៦ រូប មិនទុកទ្រព្យសម្បត្តិឲ្យកូន ទោះមានប្រាក់រាប់លានដុល្លារក៏ដោយ

Boa Sokunveary — Fri, 19 May 2023 09:25:45 +0000

មហាជនមួយចំនួនគិតថា កើតជាកូនបុគ្គលល្បីដែលមានទ្រព្យសម្បត្តិរាប់លានដុល្លារ ប្រាកដជាសោយសុខមួយជីវិតហើយ ប៉ុន្តែផ្ទុយទៅវិញបុគ្គលល្បី ៦ រូបនេះមិនទុកទ្រព្យសម្បត្តិឲ្យកូនរបស់ពួកគេឡើយ ៖

១. Jackie Chan ឬ ឈិន ឡុង

តារាជួរមុខប្រចាំហុងកុងដែលមានឈ្មោះល្បីទូទាំងពិភពលោកគឺ Jackie Chan បាននិយាយដាក់កូនប្រុសថា “បើគាត់មានកំណើត គាត់នឹងអាចរកប្រាក់ដោយខ្លួនឯងបានហើយ ។ បើគាត់អត់កំណើតទេ ដូច្នេះគាត់ចេះតែបំផ្លាញលុយខ្ញុំប៉ុណ្ណោះ” ។

២. Ashton Kutcher និង Mila Kunis

Kutcher និង Kunis បញ្ជាក់ច្បាស់ៗថា កូនៗមិនបានសូម្បីមួយចំណិតពីទ្រព្យរាប់លានដុល្លាររបស់ពួកគេផង ហើយលុយដែលនៅសល់ទាំងប៉ុន្មានរបស់ពួកគេនឹងត្រូវបរិច្ចាគទាំងអស់ ។

៣. Bill Gates

មហាសេដ្ឋីប្រាក់វាល់លានលោក Bill Gates ជឿជាក់ថា ការផ្ដល់ប្រាក់ឲ្យកូនៗច្រើនពេកនឹងបំផ្លាញជីវិតពួកគេទៅវិញទេ ។

៤. Gordon Ramsay

កំពូលចុងភៅដ៏ល្បីល្បាញ Gordon Ramsay ដែលមានកូន ៥ នាក់បាននិយាយថា “ទ្រព្យសម្បត្តិប្រាកជាមិនបានទៅកូនៗរបស់គាត់នោះទេ ហើយមិនមែនខ្ញុំកាចឡើយ តែនេះជារបៀបមិនធ្វើឲ្យកូនខូច” ។

៥. Simon Cowell

លោក Simon Cowell ទម្លាយថា “ខ្ញុំនឹងផ្ទេរលុយរបស់ខ្ញុំឲ្យនរណាម្នាក់ អាចជាមូលនិធិសប្បុរសធម៌សម្រាប់ក្មេងៗ និងសត្វឆ្កែ ប៉ុន្តែខ្ញុំមិនផ្ទេរទ្រព្យសម្បត្តិ តកូនតចៅដាច់ខាត” ។

៦. Mark Zuckerburg

គ្រាន់តែមានកូនដំបូងកាលពីឆ្នាំ ២០១៥ ភ្លាម ម្ចាស់ក្រុមហ៊ុន Meta លោក Mark Zuckerburg និងភរិយាបានប្រកាសថា ពួកគេនឹងបរិច្ចាគប្រាក់ ៩៩ ភាគរយទៅឲ្យមូលនិធិសប្បុរសធម៌ភ្លែត មានន័យថា ប្រាក់ទាំងប៉ុន្មានស្ទើរតែគ្មានចំណែកកូនរបស់ពួកគេទៅហើយ ។

ដូច្នេះតើអ្នកយល់យ៉ាងណាដែរចំពោះការសម្រេចចិត្តរបស់បុគ្គលល្បីទាំង ៦ នាក់នេះ?

ប្រែសម្រួល ៖ វារី

ចុចអាន ៖ មកដឹងពីតារាអន្តរជាតិ ៨ នាក់ ដែលល្បីដោយសារឪពុកម្ដាយ

The post បុគ្គលអន្តរជាតិល្បីៗ ៦ រូប មិនទុកទ្រព្យសម្បត្តិឲ្យកូន ទោះមានប្រាក់រាប់លានដុល្លារក៏ដោយ appeared first on Kampuchea Thmey Daily.

តើមន្ត្រីណាខ្លះជាប់កាតព្វកិច្ចប្រកាសទ្រព្យសម្បត្តិ និងបំណុល តាមរបប ២ឆ្នាំម្ដង?

Thoeun Vansong — Sat, 04 Feb 2023 02:16:32 +0000

កាលពីថ្ងៃទី១ ដល់ថ្ងៃទី៣១ ខែមករា ឆ្នាំ២០២៣ អង្គភាពប្រឆាំងអំពើពុករលួយបានបើកទ្វារទទួលយកឯកសារប្រកាសទ្រព្យសម្បត្តិ និងបំណុល អនុវត្តតាមរបប ២ឆ្នាំម្ដង សម្រាប់ឆ្នាំ២០២៣។

នាយកដ្ឋានប្រកាសទ្រព្យសម្បត្តិ និងបំណុល បានឲ្យដឹង រយៈពេល៣១ថ្ងៃកន្លងទៅនេះ មន្ត្រីដែលបានប្រកាសទ្រព្យសម្បត្តិ និងបំណុល មានចំនួន២២ ៦៤៥ច្បាប់។

បើតាមប្រភពដដែល បានបញ្ជាក់ថា មន្ត្រីនៃក្រសួង-ស្ថាប័នចំនួន៣៥ និងរដ្ឋបាលរាជធានី-ខេត្តទាំង២៥ របស់កម្ពុជាបានមកប្រកាសទ្រព្យសម្បត្តិ និងបំណុល ទាន់ពេលវេលាប្រកបដោយភាពជោគជ័យ និងមិនមានមន្ត្រីណាគេចវេសពីកាតព្វកិច្ចនេះឡើយ។

មាត្រា១៧ នៃច្បាប់ស្ដីពីការប្រឆាំងអំពើពុករលួយ បានកំណត់ថា សមាសភាពបុគ្គលដែលជាប់កាតព្វកិច្ចប្រកាសទ្រព្យសម្បត្តិ និងបំណុល រួមមាន៖ សមាជិកព្រឹទ្ធសភា រដ្ឋសភា រាជរដ្ឋាភិបាល មន្រ្តីសាធារណៈដែលមានអាណត្តិជ្រើសតាំង សមាជិកក្រុមប្រឹក្សាជាតិប្រឆាំងអំពើពុករលួយ ប្រធាន អនុប្រធាន និងមន្រ្តីទាំងអស់នៃអង្គភាពប្រឆាំងអំពើពុករលួយ។

បន្ថែមពីនេះ មានមន្រ្តីរាជការស៊ីវិល មន្ត្រីយោធា នគរបាលជាតិ មន្ត្រីរាជការសាធារណៈដែលតែងតាំងដោយព្រះរាជក្រឹត្យ ឬអនុក្រឹត្យ និងមន្រ្តីផ្សេងទៀតដែលតែងតាំងដោយប្រកាសហើយត្រូវបានកំណត់ឲ្យប្រកាសទ្រព្យសម្បត្តិ និងបំណុលតាមបញ្ជីរៀបចំឡើងដោយអង្គភាពប្រឆាំងអំពើពុករលួយបន្ទាប់ពីបានពិគ្រោះយោបល់ជាមួយក្រុមប្រឹក្សាជាតិប្រឆាំងអំពើពុករលួយ។ ដោយឡែក ថ្នាក់ដឹកនាំសង្គមស៊ីវិល រួមទាំងមន្ត្រីតុលាការ ជាអាទិ៍ ចៅក្រម អយ្យការ សាការី ក្រឡាបញ្ជី និងអាជ្ញាសាលា ជាដើម ក៏ជាប់កាតព្វកិច្ចប្រកាសប្រកាសទ្រព្យសម្បត្តិ និងបំណុលនេះដែរ។

នៅពេលចូលកាន់មុខតំណែង និងនៅពេលចេញពីមុខតំណែងបុគ្គលខាងលើទាំងនេះត្រូវតែប្រកាសទ្រព្យសម្បត្តិរបស់ខ្លួនជាលាយលក្ខណ៍អក្សរ ឬជាទម្រង់អេឡិចត្រូនិច បើទោះបីជាទ្រព្យសម្បត្តិនោះនៅក្រៅប្រទេសក្តី ឬក្នុងប្រទេសក្តី រួមទាំងបំណុលផង ដោយដាក់ជូនអង្គភាពប្រឆាំងអំពើពុករលួយដោយសាមីខ្លួនផ្ទាល់។

ពាក់ព័ន្ធនឹងកាតព្វកិច្ចនៃការប្រកាសទ្រព្យសម្បត្តិ និងបំណុលនេះដែរ ចំពោះករណីបុគ្គលផ្សេងទៀតដែលមិនមានឈ្មោះត្រូវប្រកាសទ្រព្យសម្បត្តិ និងបំណុល ប៉ុន្តែបុគ្គលនោះសង្ស័យថាមានជាប់ពាក់ព័ន្ធអំពើពុករលួយ ក៏តម្រូវឲ្យប្រកាសទ្រព្យសម្បត្តិ និងបំណុលរបស់ខ្លួនផងដែរ បន្ទាប់ពីមានការស៊ើបអង្កេត និងទទួលសេចក្ដីសម្រេចរបស់អង្គភាពប្រឆាំងអំពើពុករលួយ។

ដោយឡែកការរក្សាទុកសំណុំឯកសារនៃអ្នកបានប្រកាសទ្រព្យសម្បត្តិ និងបំណុល គឺអង្គភាពប្រឆាំងអំពើពុករលួយត្រូវទុកជាការសម្ងាត់ខ្ពស់បំផុត និងធ្វើជាទម្រង់អេឡិចត្រូនិកដោយមានលេខសម្ងាត់ ឬធ្វើជាលិខិតដាក់ក្នុងស្រោមសំបុត្រដែលកំណត់ដោយអង្គភាពប្រឆាំងអំពើពុករលួយ។ នៅលើមាត់ស្រោមសំបុត្រដែលបិទជិតត្រូវប្រថាប់ត្រា និងមានចុះហត្ថលេខាដោយប្រធានអង្គភាពប្រឆាំងអំពើពុករលួយ ឬតំណាង ព្រមទាំងមានផ្ដិតម្រាមដៃសាមីខ្លួន។

ក្នុងករណីចាំបាច់នៃការស៊ើបអង្កេតពាក់ព័ន្ធនឹងភាពមិនប្រក្រតី ប្រធានអង្គភាពប្រឆាំងអំពើពុករលួយអាចធ្វើការសម្រេចបើកស្រោមសំបុត្រ ឬបើកមើលឯកសារអេឡិចត្រូនិកនៃការប្រកាសទ្រព្យសម្បត្តិ និងបំណុលបាន។ នីតិវិធីក្នុងការបើកស្រោមសំបុត្រ ឬបើកមើលឯកសារអេឡិចត្រូនិកប្រកាសទ្រព្យសម្បត្តិ និងបំណុល ត្រូវកំណត់ដោយសេចក្ដីសម្រេចរបស់អង្គភាពប្រឆាំងអំពើពុករលួយ៕

ដោយ៖ ធឿន វ៉ាន់សុង

The post តើមន្ត្រីណាខ្លះជាប់កាតព្វកិច្ចប្រកាសទ្រព្យសម្បត្តិ និងបំណុល តាមរបប ២ឆ្នាំម្ដង? appeared first on Kampuchea Thmey Daily.

សមាជិក BST ជាប់ឈ្មោះជាសេដ្ឋី ព្រោះម្នាក់ៗកាន់កាប់ប្រាក់សុទ្ធរាប់សិបលាននៅក្នុងដៃ

Sonya — Mon, 28 Feb 2022 14:10:00 +0000

BTS ជាក្រុមចម្រៀងប្រុសកូរ៉េខាងត្បូងដែលទទួលបានប្រជាប្រិយភាពខ្លាំងក្លាក្នុងរយៈពេលប៉ុន្មានឆ្នាំចុងក្រោយនេះ មិនថាក្នុងប្រទេស និងនៅលើឆាកអន្តរជាតិឡើយ។ ជាមួយនឹងភាពល្បីល្បាញ និងភាពជោគជ័យ សឹងមិនគួរឱ្យជឿ ក្រុម K-pop មួយនេះ ត្រូវបានមនុស្សជាច្រើនចង់ដឹងនូវទ្រព្យសម្បត្តិសុទ្ធរបស់ពួកគេម្នាក់ៗ ដែលរកបានពីវិស័យសិល្បៈ។

សារព័ត៌មាន HubPost បានឱ្យដឹងថា សមាជិកក្រុមនីមួយៗ មិនមែនត្រឹមតែជាតារាកំពូលនោះទេ បច្ចុប្បន្ននេះ ពួកគេសុទ្ធតែជាសេដ្ឋីអស់ហើយ។ ប្រភពនៃប្រាក់ចំណូលរបស់ពួកគេបានពីដំណើរទស្សនកិច្ចផ្ទាល់ ការប្រគុំតន្ត្រី កិច្ចសន្យាជាមួយម៉ាកយីហោរល្បីៗ និងភាគហ៊ុននៅក្នុង Big Hit Entertainment ។ ជាមួយនឹងប្រាក់ចំណូលដ៏ច្រើនបែបនេះ BTS បានក្លាយជាក្រុមចម្រៀងប្រុស ដែលមានបំផុតមួយ នៅលើពិភពលោក។

យោងតាមគេហទំព័រ Business Insider ទ្រព្យសម្បត្តិសុទ្ធរបស់ក្រុមចម្រៀងប្រុស BTS សរុបមាន ៣.៦ ពាន់លានដុល្លារ ខណៈសមាជិកម្នាក់ៗមាន៖

១. J-Hope (Jung Hoseok)

J-Hope ជាសមាជិកដែលមានជាងគេបំផុតរបស់ BTS ហើយ J-Hope ឥឡូវនេះកាន់កាប់ទ្រព្យសម្បត្តិចំនួន ២៦ លានដុល្លារអាមេរិក។ ត្រឡប់ទៅឆ្នាំ ២០១៨ តារាប្រុសរូបនេះ ក៏ជាសមាជិកមានបំផុតនៃក្រុមរបស់ខ្លួន ដែលកាលណោះលោកមានទ្រព្យសម្បត្តិសរុប ១២ លានដុល្លារ ព្រោះតែបទចម្រៀងទោលលើកដំបូងបានទទួលជោគជ័យខ្លាំងក្លា។

គិតត្រឹមពេលនេះ J-Hope រកលុយបានពីការនិពន្ធបទចម្រៀង ការសម្ដែងផ្ទាល់ និងថតផ្សាយពាណិជ្ជកម្ម។

២. SUGA (Min Yoongi)

Suga ក៏ល្បីល្បាញខាងនិពន្ធ និពន្ធបទភ្លេង និងច្រៀងបទចម្រៀងល្បីៗមួយចំនួននៅក្នុងក្រុម BTS ផងដែរ។ ឆ្នាំ២០២២នេះ Suga ក្ដោបក្ដាប់ទ្រព្យសម្បត្តិ ២៥ លានដុល្លារ ជាមួយនឹងប្រាក់ចំណូលតាមប្រភពផ្សេងៗគ្នាមកពីការលក់អាល់ប៊ុម និងថតស្ពតជាដើម។។

៣. RM (Kim Namjoon)

Kim Namjoon ហៅកាត់ថា RM គឺជាសមាជិកមានជាងគេបំផុតលំដាប់ទី៣ របស់ BTS ដែលមានទ្រព្យសម្បត្តិ ២២ លានដុល្លារ។ តារាប្រុសរូបនេះគឺជាអ្នកដឹកនាំក្រុម និងរ៉ាប់រងការខុសត្រូវរបស់ក្រុមទាំងមូល។

RM ជាអ្នកនិពន្ធបទចម្រៀងវ័យក្មេងមួយរូបក្នុងប្រទេសកូរ៉េខាងត្បូង ដែលមកទល់ប្ចុចប្បន្ន លោកនិពន្ធបទចម្រៀងបានចំនួន ១៣០ បទឯណោះ។ ដោយឡែក ប្រាក់ចំណូលរបស់មេក្រុមរូបនេះ ក្រៅពីច្រៀង និងនិពន្ធ លោកចុះកិច្ចសន្យាជាមួយម៉ាកយីហោធំៗមួយចំនួន។

៤. Jimin (Park Jimin)

Jimin គឺជាអ្នកច្រៀង និងជាអ្នករាំនាំមុខសម្រាប់ BTS ។ មិនដូចមិត្តរួមក្រុមផ្សេងទេ Jimin មិនមានប្រភពចំណូលខាងក្រៅឡើយ។ ចំណូលទាំងអស់របស់លោកបានមកតែពីការតែងនិពន្ធ និងការសម្តែងជាមួយសមាជិកក្រុមប៉ុណ្ណោះ។ ទោះជាយ៉ាងណា លោកនៅតែមានទ្រព្យសម្បត្តិសរុប ២០ លានដុល្លារក្នុងដៃ។

៥. JIN (Kim Seokjin)

ជាសមាជិកវ័យចាស់ជាងគេរបស់ BTS តារាចម្រៀង Jin ក៏ល្បីល្បាញខាងនិពន្ធបទចម្រៀង មិនចាញ់គ្នាពី RM នោះទេ។ គិតមកដល់ឆ្នាំ ២០២២ ទ្រព្យសម្បត្តិរបស់ JIN មានចំនួន ២០ លានដុល្លារ។ យ៉ាងណាមិញប្រាក់ចំណូលរបស់លោកមិនមែនបានតែពីអាជីពចម្រៀងទេ។ តាមរបាយការណ៍ជាច្រើនបានបង្ហាញថា Jin បានសហការជាមួយបងប្រុស បើកភោជនីយដ្ឋានធំមួយ ដែលមានទីតាំងនៅកណ្ដាលទីក្រុងសេអ៊ូលតែម្ដង។

៦. Jeon Jungkook (Jeon Jeong-kook)

Jungkook ក៏មានទ្រព្យសម្បត្តិ ២០ លានដុល្លារ ដូចសមាជិកពីរនាក់មុនដែរ។ យោងតាមរបាយការណ៍ថ្មីៗនេះ Jeon បានទិញផ្ទះល្វែងតម្លៃ ៧ លានដុល្លារ នៅទីក្រុងសេអ៊ូល ដែលជាអចលនទ្រព្យថ្លៃបំផុតមួយសម្រាប់តារា K-pop ។ ដូចមិត្តរួមក្រុមដែរ ប្រភពចំណូលសំខាន់ៗរបស់លោករួមមាន ការនិពន្ធបទចម្រៀង ការថតស្ពត និងកុងត្រាជាមួយប្រេនល្បីៗមួយចំនួន។

៧. V (Kim Taehyung)

V គឺជាសិល្បករពហុជំនាញ និងជាសមាជិកដ៏មានប្រជាប្រិយបំផុតក្នុងក្រុម។ លោកមានអ្នកគាំទ្រយ៉ាងច្រើនជុំវិញពិភពលោក ហើយក៏បានបង្ហាញខ្លួនជាតួសម្ដែងក្នុងខ្សែភាពយន្តភាគកូរ៉េរឿង The Poet Warrior Youth។

មិនខុសពីមិត្តរួមក្រុមរបស់លោកដែរ V រកចំណូលបានពីអាជីពច្រៀង និងសម្តែង។ សព្វថ្ងៃនេះ គេជឿថា V មានទ្រព្យសម្បត្តិសរុបពី ១៨-២០ លានដុល្លារអាមេរិក៕

ប្រែសម្រួល៖ សន្យា

ចុចអាន៖ ទម្លាយទ្រព្យសម្បត្តិសុទ្ធរបស់សមាជិក Blackpink កម្រមានអ្នកដឹង

The post សមាជិក BST ជាប់ឈ្មោះជាសេដ្ឋី ព្រោះម្នាក់ៗកាន់កាប់ប្រាក់សុទ្ធរាប់សិបលាននៅក្នុងដៃ appeared first on Kampuchea Thmey Daily.

ស្ដេច ៥អង្គ មានទ្រព្យសម្បត្តិច្រើនបំផុតលើលោក នាឆ្នាំ២០២២

Sonya — Mon, 14 Feb 2022 13:12:49 +0000

កាលពីថ្ងៃទី ១១ ខែកុម្ភៈ ប្រភពពី Wikipedia បានចុះផ្សាយ និងរាយការណ៍បញ្ជីត្រកូលរាជវង្សដែលមានជាងគេបំផុតលើលោក នាឆ្នាំ២០២២ នេះ ដែលក្នុងនោះមានរាជវង្ស ៥អង្គជាមហាសេដ្ឋីនាំមុខគេនោះគឺ៖

៥. ស្ដេច Mohammed VI ប្រទេសម៉ារុក

ទ្រព្យសម្បត្តិប៉ាន់ស្មាន៖ ៨.២ ពាន់លានដុល្លារ

ស្ដេច Mohammed ទី៦ ជាព្រះមហាក្សត្រនៃប្រទេសម៉ារ៉ុកបច្ចុប្បន្ន។ ទ្រង់បានឡើងសោយរាជ្យនៅថ្ងៃទី ២៣ ខែកក្កដា ឆ្នាំ ១៩៩៩ បន្ទាប់ពីការសោយទីវង្គតរបស់បិតាគឺស្តេច Hassan ទី២។

ស្ដេច Mohammed គឺជាពាណិជ្ជករ និងជាម្ចាស់ធនាគារឈានមុខគេរបស់ប្រទេសម៉ារ៉ុក។ ទ្រង់ក៏ជាម្ចាស់ក្រុមហ៊ុនធំៗនាំមុខនៅក្នុងប្រទេសដូចជា ទេសចរណ៍ អចលនទ្រព្យ ផ្សារទំនើប ធានារ៉ាប់រង ទូរគមនាគមន៍ ក្រុមហ៊ុនជីករ៉ែ និងក្រុមហ៊ុនផលិតស្រាបៀរធំបំផុត Heineken ផងដែរ។ ដោយសារមានជំនួញធំទាំងនេះ នៅក្រោមការគ្រប់គ្រង ទើបបានជាស្ដេច Mohammed ទី៦ ក្លាយជាមហាសេដ្ឋីកំពូលរបស់ប្រទេស និងជាប់ជាព្រះមហាក្សត្រមានទ្រព្យច្រើនបំផុតទី៥ នៅលើលោក នាឆ្នាំ ២០២២នេះ។

៤. Khalifa bin Zayed Al Nahyan ព្រះចៅ អាប៊ូ ដាប៊ី ប្រទេសអារ៉ាប់រួម

ទ្រព្យសម្បត្តិប៉ាន់ស្មាន៖ ១៥ ពាន់លានដុល្លារ

ទ្រង់ជាប្រធានាធិបតីនៃប្រទេសអារ៉ាប់រួម និងជាព្រះចៅនៃរាជធានី អាប៊ូ ដាប៊ី (Abu Dahbi) ។ យោងតាម THE BUSINESS STANDARD ចុះផ្សាយថា ទ្រព្យសម្បត្តិរបស់ព្រះចៅអង្គនេះបានមកពីការងារជាប្រធានអាជ្ញាធរវិនិយោគនៅក្រុង អាប៊ូដាប៊ី ដែលគ្រប់គ្រងលើប្រេងនាំចេញ។ យ៉ាងណាក្ដីទ្រង់មានប្រជាប្រិយភាពសុះសាយពាសពេញពិភពលោកដោយសារសកម្មភាពសប្បុរសធម៌របស់ទ្រង់។

៣. ស្តេច Salman Abdulaziz bin Saud ប្រទេសអារ៉ាប៊ីសាអូឌីត

ទ្រព្យសម្បត្តិប៉ាន់ស្មាន៖ ១៨ ពាន់លានដុល្លារ

ព្រះរាជា Salman Abdulaziz bin Saud អាចស្ថិតនៅលំដាប់ទី៣ក្នុងបញ្ជីស្ដេចមានជាងគេតែអង្គឯង។ ប៉ុន្តែប្រសិនបើបូកទ្រព្យគ្រួសារទាំងមូល រាជវង្សអារ៉ាប៊ីសាអូឌីតជាគ្រួសារដែលមានជាងគេបំផុតនៅលើពិភពលោកដែលសម្បត្តិសរុបមានជាង ១ ទ្រីលានដុល្លារ។ ព្រះមហាក្សត្រនៃអារ៉ាប៊ីសាអូឌីត មានប្រភពចំណូលដ៏ធំបំផុតមកពីប្រេង រីឯការវិនិយោគនានាហាក់អាថ៌កំបាំងណាស់។ យ៉ាងណា Wikipedia ផ្សាយថា រាជវង្សនេះជាម្ចាស់វិមានថ្លៃៗ ឡានទំនើប ឧទ្ធម្ភាគចក្រ និងយន្តហោះឯកជនជាច្រើនទៀត។

២. ស្ដេច Sultan Hassanal Bolkiah ប្រទេសប្រ៊ុយណេ

ទ្រព្យសម្បត្តិប៉ាន់ស្មាន៖ ២០-២៨ ពាន់លានដុល្លារ

បន្ទាប់ពីព្រះមហាក្សត្រីអេលីសាបិតទី ២ ស្តេច Sultan Hassanal Bolkiah គឺជាព្រះមហាក្សត្រដែលគ្រងរាជ្យយូរជាងគេទី ២ លើពិភពលោក។ ទ្រង់ក៏ជានាយករដ្ឋមន្រ្តីនៃប្រទេសប្រ៊ុយណេផងដែរ។ ទ្រព្យសម្បត្តិស្ដេចអង្គនេះមានប្រភពមកពីអាជីវកម្មនាំចេញប្រេង និងឧស្ម័នធម្មជាតិក្នុងស្រុក។ ស្តេច Sultan រស់នៅក្នុងវិមានធំជាងគេបំផុតលើលោកឈ្មោះ Istana Nurul Iman ដែលមានបន្ទប់ប្រមាណ ១៧៧៨ បន្ទប់ ហើយទ្រង់ក៏ត្រូវបាន South China Morning Post រាយការណ៍ថា ជាម្ចាស់នៃក្បួនឡាន Rolls Royces ជាង ៦០០ គ្រឿងផងដែរ។

១. ស្តេច Maha Vajiralongkorn ប្រទេសថៃ

ទ្រព្យសម្បត្តិប៉ាន់ស្មាន៖ ៣០-៤៣ ពាន់លានដុល្លារ

ព្រះរាជាព្រះជន្ម ៦៧ ព្រះវស្សាអង្គនេះឡើងគ្រងរាជ្យនៅឆ្នាំ ២០១៩ បន្ទាប់ពីបិតាសោយទិវង្គតកាលពីឆ្នាំ ២០១៦ ។ គ្រួសារទ្រង់កាន់កាប់ដីជាង ១៦,២១០ ហិកតានៅក្នុងប្រទេសថៃ ដោយមានកិច្ចសន្យាជួលចំនួន ៤ ម៉ឺនកន្លែងនៅក្នុងស្រុកដែលក្នុងនោះ ១៧,០០០ កន្លែងនៅរាជធានីបាងកក។ ព្រះមហាក្សត្រអង្គនេះក៏កាន់កាប់ភាគហ៊ុនធំនៅក្នុងក្រុមហ៊ុន ស៊ីម៉ងត៍សៀមគ្រុប និងធនាគារសៀមពាណិជ្ជ។ ទ្រង់ក៏ជាម្ចាស់ត្បូងពេជ្រធំជាងគេបំផុតលើពិភពលោកផងដែរ។ នេះបើតាមការចុះផ្សាយរបស់គេហទំព័រ THE BUSINESS STANDARD៕

ប្រែសម្រួល៖ សន្យា

ចុចអាន៖ នាយករដ្ឋមន្ត្រីក្មេងបំផុត ៧ រូបលើលោក សុទ្ធសឹងជាប់តំណែងដោយការបោះឆ្នោត

ចុចអាន៖ ដើមឆ្នាំ ២០២២ មហាសេដ្ឋីកំពូលប្រចាំប្រទេស នៅអាស៊ីអាគ្នេយ៍ ជាបុគ្គលទាំងនេះ

The post ស្ដេច ៥អង្គ មានទ្រព្យសម្បត្តិច្រើនបំផុតលើលោក នាឆ្នាំ២០២២ appeared first on Kampuchea Thmey Daily.