ទោះប្រទេសភាគច្រើនកំពុងឈឺក្បាលនឹងវិបត្តិដ៏ធ្ងន់ធ្ងរនេះក៏ដោយ ប៉ុន្តែប្រទេសខ្លះក៏មិនសូវជារងគ្រោះធ្ងន់ធ្ងរប៉ុន្មានដែរ ជាក់ស្តែងក្នុងនោះមានប្រទេសចំនួន៤នៅតំបន់អាស៊ីអាគ្នេយ៍ ដែលរងផលប៉ះពាល់ តិចតួច។

បើយោងតាមការផ្សាយរបស់ទស្សនាវដ្តី Time, ប្រទេសទាំង៤នោះមានដូចជា៖

ឡាវ៖ ឡាវត្រូវបានកំណត់ថាជា ប្រទេសដែលរងផលប៉ះពាល់តិចតួច បើធៀបនឹងប្រទេសដទៃ ដោយសារការពឹងផ្អែកខ្ពស់លើថាមពលវារីអគ្គិសនី សម្រាប់ការផលិតអគ្គិសនី និងមានស្ថានភាពហិរញ្ញវត្ថុប្រកបដោយតុល្យភាព។ ទោះបីជានៅតែងាយរងគ្រោះដោយសារបម្រែបម្រួលតម្លៃទំនិញសកលក៏ពិតមែន ប៉ុន្តែចំណាត់ថ្នាក់ឥណទានរយៈពេលវែងរបស់ប្រទេសនេះនៅតែមានស្ថិរភាព។

ម៉ាឡេស៊ី៖ ក្នុងនាមជា ប្រទេសនាំចេញប្រេងនិងឧស្ម័នធម្មជាតិទាំងស្រុង ម៉ាឡេស៊ីមានសមត្ថភាពការពារខ្លួនបានល្អជាង ពីការរំខានដល់ការផ្គត់ផ្គង់រូបវន្ត។ ប្រហែល ២៨% នៃថាមពលរបស់ខ្លួនគឺដំណើរការដោយឧស្ម័ន ដែលភាគច្រើនត្រូវបានរកឃើញនៅក្នុងស្រុក។ លើសពីនេះ មានភាគរយតិចតួចណាស់ ពោលគឺតិចជាង ១៥.៦% ទៅទៀតនៃការនាំចូលប្រេងរបស់ខ្លួន ដែលមានប្រភពមកពីតំបន់ឈូងសមុទ្រពែរ្ស។

ឥណ្ឌូណេស៊ី៖ ទោះបីជាប្រទេសនាំចូលសុទ្ធក៏ដោយ ក៏ការរងឥទ្ធិពលផ្ទាល់របស់ឥណ្ឌូណេស៊ីពីប្រេងនៅតំបន់ឈូងសមុទ្រមានកម្រិតទាប ពោលគឺប្រហែល ២៥% ទៅ ៣៥% ប៉ុណ្ណោះ។ ដើម្បីគ្រប់គ្រងវិបត្តិនេះ រដ្ឋាភិបាលកំពុងជំរុញយ៉ាងខ្លាំងក្លានូវការលាយប្រេងដូងក្នុងស្រុកទៅក្នុងប្រេងម៉ាស៊ូត ដើម្បីកាត់បន្ថយតម្រូវការប្រេងឆៅពីមជ្ឈិមបូព៌ា។

ប្រ៊ុយណេ៖ ក្នុងនាមជាប្រទេសនាំចេញប្រេងនិងឧស្ម័នដ៏សំខាន់ ដែលមានផលិតកម្មលើសឆ្ងាយពីតម្រូវការក្នុងស្រុក, ប្រ៊ុយណេ ប្រឈមនឹងហានិភ័យតិចតួចបំផុតនៃកង្វះខាតប្រេងឥន្ធនៈ។ ផ្ទុយទៅវិញ ការឡើងថ្លៃថាមពលសកល អាចនឹងជួយបង្កើនចំណូលពីការនាំចេញរបស់ខ្លួនថែមទៀតផង៕

អត្ថបទ៖ សុខ សុវណ្ណ

The post តើប្រទេសអាស៊ី​ណា​​​ខ្លះ ​រង​ផល​ប៉ះពាល់តិចបំផុត ពីឥទ្ធិពលសង្គ្រាម​នៅមជ្ឈិមបូព៌ា? appeared first on Kampuchea Thmey Daily.

តាមការផ្សាយរបស់ Aljazeera កាលពីថ្ងៃពុធទី៣ខែធ្នូឆ្នាំ២០២៥, ឥណ្ឌូណេស៊ី ជាកន្លែងដែលរងគ្រោះខ្លាំងជាងគេ ដោយទីនោះបានជួបប្រទះទឹកជំនន់និងបំណាក់ដីដ៏ប្រល័យ។

តួលេខចុងក្រោយបង្ហាញថា ទឹកជំនន់និងបំណាក់ដីនៅឥណ្ឌូណេស៊ី បានសម្លាប់មនុស្សជាង ៦៣០នាក់ ខណៈជាង ៤៦០នាក់ទៀតបាត់ខ្លួន។

ប្រទេសរងគ្រោះធ្ងន់បន្ទាប់ពីឥណ្ឌូណេស៊ី គឺស្រីលង្កា ដែលគ្រោះធម្មជាតិវាយប្រហារចាប់តាំងពីចុងខែវិច្ឆិកាមក បានផ្តាច់ជីវិតមនុស្សជាង ៣៩០នាក់និងជាង៣៣០នាក់ បាត់ខ្លួន។

បន្ទាប់មកគឺថៃ ដែលទឹកជំនន់ ជាពិសេសនៅភាគខាងត្បូង បានបណ្តាលឲ្យមនុស្ស២៦៧នាក់ស្លាប់ ចំណែកនៅវៀតណាម ក៏ធ្ងន់ធ្ងរដែរ ដោយមនុស្សជាង ៩០នាក់ បានបាត់បង់ជីវិត។

សូមជម្រាបថា គ្រោះធម្មជាតិដែលវាយប្រហារទ្វីបអាស៊ីនេះ ជាពិសេសនៅប៉ែកខាងត្បូងនិងអាគ្នេយ៍ គឺបណ្តាលមកពីឥទ្ធិពលព្យុះជាបន្តបន្ទាប់៕

អត្ថបទ៖ សុខ សុវណ្ណ

The post ត្រឹមកន្លះខែ អាស៊ីស្លាប់មនុស្សរាប់ពាន់នាក់ដោយសារគ្រោះធម្មជាតិ appeared first on Kampuchea Thmey Daily.

គ្រោះធម្មជាតិដែលកាចសាហាវនិងផ្តាច់ជីវិតមនុស្សច្រើនបំផុតគឺរញ្ជួយដីនៅប្រទេសអាហ្វហ្គានីស្ថាន ដែលវាយប្រហារកាលពីថ្ងៃទី៣១ខែសីហា ដោយសម្លាប់មនុស្សជាង ១ ៤០០នាក់ និងរបួសជាង ៣ ០០០នាក់ទៀត។

ចំណែកនៅប្រទេសប៉ាគីស្ថានឯណោះ គ្រោះទឹកជំនន់ដែលចាប់ផ្តើមខ្លាំងនៅពាក់កណ្តាលខែសីហាក្នុងខេត្ត Khyber Pakhtunkhwa បានឆក់យកជីវិតមនុស្សជាង ៣២០នាក់ និងរាប់រយនាក់ទៀតបាត់ខ្លួន។

រីឯនៅប្រទេសឥណ្ឌា គ្រោះទឹកជំនន់ដ៏សាហាវ បានបង្កទុក្ខវេទនាក្នុងរដ្ឋ Punjab, Uttarakhand និងទីក្រុង Kishtwar ដោយនៅរដ្ឋ Punjab ទឹកបានជន់លិចភូមិជាង ១ ៤០០ សម្លាប់មនុស្ស ជាង ៣០នាក់ ខណៈនៅ Uttarakhand មានមនុស្ស៥នាក់ស្លាប់និងជាង៥០នាក់បាត់ខ្លួន រីឯនៅក្រុង Kishtwar មានមនុស្សស្លាប់៦៧នាក់ ជាង៣០០នាក់របួសនិងប្រហែល២០០នាក់បាត់ខ្លួន។

ងាកមកមើលនៅអាស៊ីអាគ្នេយ៍វិញ, ប្រទេសថៃនិងវៀតណាមសុទ្ធតែរងគ្រោះខ្លាំងដោយសារព្យុះកាជិគីនិងណងហ្វា ជាពិសេសថៃ ដែលត្រូវវាយប្រហារយ៉ាងដំណំ។

នៅថៃ ឥទ្ធិពលនៃព្យុះទាំងពីរ បានបង្កវិនាសកម្មដូចជាបំណាក់ដីនិងទឹកជំនន់ ដែលតួលេខគិតត្រឹមថ្ងៃទី៤ខែកញ្ញាឆ្នាំ២០២៥ មានមនុស្សស្លាប់ចំនួន៧នាក់។ 

ចំណែកនៅវៀតណាម ព្យុះទាំងពីរក៏វាយប្រហារខ្លាំងដែរ ដែលបណ្តាលឲ្យមានភ្លៀងធ្លាក់ខ្លាំងនិងជំនន់ធ្ងន់ធ្ងរ ប៉ុន្តែស្រាលជាងថៃ។

ចុងក្រោយ គឺឥណ្ឌូណេស៊ី, គ្រោះរញ្ជួយដីកម្រិត៥.៨រ៉ិចទ័រ បានវាយប្រហារកោះ Sulawesi បណ្តាលឲ្យមនសុ្ស២នាក់បាត់ជីវិត និង៤៤នាក់រងរបួស ព្រមទាំងបំផ្លាញផ្ទះសម្បែងនិងសំណង់ ហេដ្ឋារចនាសម្ព័ន្ធមួយចំនួន។

សរុបសេចក្តីមក ត្រឹមមួយខែប៉ុណ្ណោះ ទ្វីបអាស៊ីមានមនុស្សស្លាប់រហូតដល់ទៅជិត ២ ០០០នាក់ ដោយសារគ្រោះធម្មជាតិ ដែលនេះគូសបញ្ជាក់ពីបញ្ហាប្រឈមបង្កឡើងដោយបម្រែបម្រួលអាកាសធាតុ ហើយក្រុមអ្នកជំនាញព្រមានថា ធម្មជាតិនឹងកាន់តែសាហាវ នាពេលអនាគត៕

អត្ថបទ៖ សុខ សុវណ្ណ

ចុចអាន៖ ទូទាំងប្រទេសថៃ ត្រូវរងទុក្ខដោយគ្រោះធម្មជាតិដល់សប្តាហ៍ក្រោយ ឯបាងកក ក៏ជន់លិចនិងបាក់ដី

The post គ្រោះធម្មជាតិវាយប្រហារខ្លាំងនៅអាស៊ី ផ្តាច់ជីវិតមនុស្សខ្ទង់ពាន់នាក់ ត្រឹមមួយខែ appeared first on Kampuchea Thmey Daily.

ថ្មីៗនេះប្រទេសជប៉ុនបានកត់ត្រាថ្ងៃក្តៅបំផុតរបស់ខ្លួនដែលមិនធ្លាប់មាននៅ ៤១.៨ ° C នៅទីក្រុង Isesaki ដោយយ៉ាងហោចណាស់មានអ្នកស្លាប់ដោយសារកម្ដៅចំនួន ៥៦នាក់ត្រូវបានរាយការណ៍ចាប់តាំងពីពាក់កណ្តាលខែមិថុនា។ ប្រទេសកូរ៉េខាងត្បូងមានរយៈពេល ២២យប់ជាប់គ្នាក្នុងខែកក្កដា ដែលសីតុណ្ហភាពបានបន្តលើសពី ២៥ អង្សារសេ ដែលជារយៈពេលវែងបំផុតមិនធ្លាប់មាន។ នៅប្រទេសវៀតណាម រដ្ឋធានីហាណូយសីតុណ្ហភាពឡើងដល់លើសពី ៤០°C ជាលើកដំបូងនៅក្នុងខែសីហា។

ផ្ទុយ​ទៅ​វិញ ភ្លៀង​ធ្លាក់​ខ្លាំង​បាន​បណ្តាល​ឲ្យ​មាន​ទឹក​ជំនន់​ស្លាប់​ក្នុង​ប្រទេស​ចិន ឥណ្ឌា និង​ប៉ាគីស្ថាន។ ភាគខាងត្បូងប្រទេសចិនប្រឈមមុខនឹងហានិភ័យទឹកជំនន់ និងការរអិលបាក់ដីយ៉ាងធ្ងន់ធ្ងរ ដោយជើងហោះហើរត្រូវបានលុបចោល និងការរីករាលដាលនៃជម្ងឺ។ នៅក្នុងរដ្ឋ Uttarakhand របស់ប្រទេសឥណ្ឌា ទឹកជំនន់ភ្លាមៗធ្វើឱ្យមនុស្សជាង ១០០ នាក់បាត់ខ្លួន។ នៅក្នុងប្រទេសប៉ាគីស្ថាន មនុស្សជិត៣០០ នាក់ រួមទាំងកុមារជាង១០០ នាក់ បានស្លាប់នៅក្នុងឧប្បត្តិហេតុទាក់ទងនឹងទឹកជំនន់ចាប់តាំងពីខែមិថុនា។ ជាមួយគ្នានេះទីក្រុងហុងកុងក្នុងខែសីហាឆ្នាំនេះមានអាកាសធាតុសើមបំផុតចាប់តាំងពីឆ្នាំ ១៨៨៤ មិនធ្លាប់មាន។

អ្នកវិទ្យាសាស្ត្រព្រមានថា អាស៊ីឡើងកំដៅជិតពីរដងលឿនជាងមធ្យមភាគពិភពលោក ដែលធ្វើឲ្យបញ្ហាអាកាសធាតុកាន់តែកើនឡើង និងមិនអាចទាយទុកជាមុនបាន៕

អត្ថបទ៖ ប៊ុន សុភាព

The post រលកកម្ដៅខ្លាំងនិងទឹកជំនន់ដ៏បំផ្លិចបំផ្លាញកំពុងវាយប្រហារតំបន់អាស៊ី appeared first on Kampuchea Thmey Daily.

ប្រទេសកម្ពុជាក៏នឹងត្រូវអាមេរិកយកពន្ធ៣៦%ផងដែរ ប៉ុន្តែអ្វីដែលគេកត់សម្គាល់គឺថា ក្នុងចំណោមប្រទេសទាំង១៤ដំបូងនេះ គឺមានប្រទេសដល់ទៅ៩ទៅហើយ ដែលស្ថិតនៅតំបន់អាស៊ី។

ដូច្នេះ តើហេតុអ្វីបានជាតំបន់អាស៊ីក្លាយជាគោលដៅចម្បងនៅក្នុងបញ្ជីយកពន្ធដំបូងនេះ?

តាមការបញ្ជាក់ពីសេតវិមាន មានចំណុចសំខាន់ចំនួន៥នៅពីក្រោយការសម្រេចចិត្តរបស់លោកត្រាំ៖

១. ឱនភាពពាណិជ្ជកម្មធំធេងជាមួយអាមេរិក

ហេតុផលចម្បងគឺឱនភាពពាណិជ្ជកម្មដ៏ធំដែលសហរដ្ឋអាមេរិកមានជាមួយបណ្តាប្រទេសនៅអាស៊ី។ លោក ត្រាំ តែងជឿថា ច្រើនប្រទេសនៅអាស៊ីជាពិសេសចិន បាននាំចេញទំនិញមកអាមេរិកច្រើនជាងការនាំចូល ដែលបណ្ដាលឲ្យអាមេរិកខាតបង់ការងារ និងឧស្សាហកម្មក្នុងស្រុក។ ការដាក់ពន្ធគយនេះ គឺដើម្បីព្យាយាមកាត់បន្ថយគម្លាតពាណិជ្ជកម្ម។

២. ការអនុវត្តពាណិជ្ជកម្មមិនត្រឹមត្រូវ

លោកត្រាំចោទថា ប្រទេសជាច្រើននៅអាស៊ី បានអនុវត្តសកម្មភាពពាណិជ្ជកម្មដែលមិនត្រឹមត្រូវ ឬមិនយុត្តិធម៌ រួមមាន៖

• ការលួចកម្មសិទ្ធិបញ្ញា៖ ក្រុមហ៊ុនអាមេរិកត្រូវបានបង្ខំឲ្យចែករំលែកបច្ចេកវិទ្យា ឬកម្មសិទ្ធិបញ្ញា។
• ការឧបត្ថម្ភធនពីសំណាក់រដ្ឋ៖ រដ្ឋាភិបាលផ្តល់ជំនួយយ៉ាងច្រើនដល់ឧស្សាហកម្មរបស់ខ្លួន ដើម្បីឲ្យផលិតផលមានតម្លៃទាបជាងទីផ្សារ។
• ការបង្ខំផ្ទេរបច្ចេកវិទ្យា៖ ក្រុមហ៊ុនអាមេរិកដែលចង់ចូលទីផ្សារប្រទេសទាំងនោះ ត្រូវបានបង្ខំឲ្យផ្ទេរបច្ចេកវិទ្យា។
• ការគ្រប់គ្រងតម្លៃរូបិយប័ណ្ណ៖ ប្រទេសខ្លះរក្សាតម្លៃរូបិយប័ណ្ណរបស់ខ្លួនឲ្យនៅទាប ដើម្បីបង្កើនការនាំចេញ។

៣. បញ្ហាខ្សែសង្វាក់ផ្គត់ផ្គង់ និងការបង្វែរទំនិញ

តំបន់អាស៊ីមានទំនាក់ទំនងជិតស្និទ្ធនៅក្នុងខ្សែសង្វាក់ផ្គត់ផ្គង់សកល។ ប្រសិនបើលោក ត្រាំ ដាក់ពន្ធលើប្រទេសតែមួយ ក្រុមហ៊ុនអាចបង្វែរផលិតកម្មទៅប្រទេសជិតខាងដែលមិនជាប់ពន្ធ ដើម្បីគេចវេស។ ឧទាហរណ៍ ប្រសិនបើដាក់ពន្ធតែលើចិន នោះក្រុមហ៊ុនអាចផ្លាស់ប្តូរការផលិតទៅវៀតណាម ថៃ ឬកម្ពុជាវិញ។ ដូច្នេះ ការដាក់ពន្ធលើប្រទេសជាច្រើនក្នុងពេលតែមួយ គឺដើម្បីទប់ស្កាត់បាតុភូតការបង្វែរទំនិញ ដែលជាការបន្លំប្រភពដើមទំនិញដើម្បីគេចពន្ធ។

៤. គោលនយោបាយ «អាមេរិកជាចម្បង»

នេះគឺជាផ្នែកមួយនៃគោលនយោបាយ «អាមេរិកជាចម្បង» ដែលផ្ដោតលើការការពារផលប្រយោជន៍សេដ្ឋកិច្ចជាតិរបស់សហរដ្ឋអាមេរិកជាចម្បង។ លោកជឿថា ការប្រើប្រាស់ពន្ធគយជាឧបករណ៍មួយអាចជួយឲ្យសហរដ្ឋអាមេរិកទទួលបានសម្បទានពីដៃគូពាណិជ្ជកម្ម និងពង្រឹងជំហររបស់ខ្លួន។

៥. ការគ្រប់គ្រងរ៉ែសំខាន់ៗ

ថ្មីៗនេះ លោក ត្រាំ ក៏បានលើកឡើងពីការពឹងផ្អែករបស់អាមេរិកលើចិននិងប្រទេសដទៃទៀតសម្រាប់រ៉ែសំខាន់ៗ ដែលជាវត្ថុធាតុដើមចាំបាច់សម្រាប់ឧស្សាហកម្មបច្ចេកវិទ្យាខ្ពស់។ ការគ្រប់គ្រងរបស់ចិនលើធនធានទាំងនេះ ត្រូវបានគេចាត់ទុកជាបញ្ហាសន្តិសុខជាតិ៕

អត្ថបទ៖ សុខ សុវណ្ណ

The post ហេតុអ្វីអាស៊ី គឺជាគោលដៅនៃការយកពន្ធបដិការរបស់លោក ត្រាំ appeared first on Kampuchea Thmey Daily.

ថៃ

ស្ថានការណ៍ឆ្លងរាលដាលជំងឺកូវីដ១៩រលកថ្មី កំពុងវាយលុកខ្លាំងណាស់ ដោយរយៈពេលត្រឹមមួយសប្តាហ៍ប៉ុណ្ណោះ ពោលគឺគិតចាប់ពីថ្ងៃទី១១ដល់១៧ខែឧសភា មានមនុស្សឆ្លងរហូតដល់ទៅ ៣៣ ០៣០ករណី ខណៈគ្រាន់តែរាជធានីបាងកក មានអ្នកឆ្លងដល់ទៅ ៦ ២៩០ករណីទៅហើយ។ ក្នុងនោះក៏មានរបាយការណ៍អំពីមនុស្សស្លាប់២នាក់ផងដែរ ប៉ុន្តែគេជឿថា កាលពីសប្តាហ៍មុន មនុស្សស្លាប់ដោយសារជំងឺកូវីដ១៩អាចមានដល់ទៅជាង១០នាក់ឯណោះ គ្រាន់តែមិនទាន់បញ្ជាក់ជាផ្លូវការ។

ចិន

ចិនឯណោះក៏មិនខុសពីថៃដែរ ដោយមួយសប្តាហ៍គិតត្រឹមថ្ងៃ៣ខែឧសភា ករណីឆ្លងហក់ឡើងសឹងទ្វេដង បើធៀបនឹងរយៈពេលដូចគ្នាទៅនឹងសប្តាហ៍មុន ប៉ុន្តែយ៉ាងណា រដ្ឋាភិបាលទីក្រុងប៉េកាំង មិនបញ្ចេញរបាយការណ៍ជាក់លាក់ឡើយ។ ទោះបែបនេះ​ គេបារម្ភថា វាអាចជាសញ្ញាថា ចិនប្រហែលស្ថិតនៅលើផ្លូវឈានឆ្ពោះទៅរកការផ្ទុះជំងឺដូចទៅនឹងកាលពីរដូវក្តៅមុន។

ហុងកុង

កូវីដ១៩ បានក្លាយជាប្រធានបទដែលគេត្រូវយកចិត្តទុកដាក់ជាថ្មី ដោយបើយោងតាមមជ្ឈមណ្ឌលគ្រប់គ្រងនិងបង្ការជំងឺ (CDC), ក្នុងសប្តាហ៍គិតត្រឹមថ្ងៃទី៣ខែឧសភា អត្រាមនុស្សកើតជំងឺផ្លូវដង្ហើម បានឈានដល់កម្រិតខ្ពស់បំផុតក្នុងឆ្នាំនេះ ដោយក្នុងនោះមាន ៣១នាក់មានស្ថានភាពធ្ងន់ធ្ងរ។

សិង្ហបុរី

ក្រសួងសុខាភិបាលសិង្ហបុរី បានចេញរបាយការណ៍អំពីការឆ្លងកូវីដ២៨% ស្មើនឹង ១៤ ២០០ករណី ក្នុងរយៈពេលមួយសប្តាហ៍គិតត្រឹមថ្ងៃទី៣ខែឧសភា ខណៈអត្រាអ្នកចូលសម្រាកក្នុងមន្ទីរពេទ្យ កើនឡើង៣០% ដែលជំរុញខ្លាំងដោយមេរោគបំប្លែងខ្លួន។

ឥណ្ឌា

ដ្បិតមិនធ្ងន់ធ្ងរតែវាក៏ជាក្តីបាម្ភ បន្ទាប់ពីក្រសួងសុខាភិបាល ប្រកាសពីការឆ្លង៩៣ករណី។ ទោះមិនមើលឃើញសញ្ញានៃហានិភ័យផ្ទុះខ្លាំង ប៉ុន្តែក្រុមអ្នកជំនាញឥណ្ឌា កំពុងតាមដានស្ថានការណ៍យ៉ាងយកចិត្តទុកដាក់៕ 

អត្ថបទ៖ សុខ សុវណ្ណ

ចុចអាន៖ ថៃ កំពុងផ្ទុះកូវីដខ្លាំងណាស់! សប្តាហ៍មុន ឆ្លងជាង ៣ម៉ឺននាក់ ភាគច្រើននៅបាងកក

The post ជំងឺកូវីដ១៩ អុកឡុកអាស៊ី សាជាថ្មី បង្កក្តីបារម្ភខ្លាំង appeared first on Kampuchea Thmey Daily.

​​ផល​ប៉ះពាល់​​​ភ្លាមៗ​​​ពី​​ការ​វាយ​ប្រហារ​ដោយ​ទឹកជំនន់​នេះ​​ត្រូវ​បាន​​​ភា្នក់​ងារ​​​អន្តរជាតិ​​​​វាយ​​តម្លៃ​​​​លើ​ការ​ប៉ះពាល់​​ដោយ​ផ្ទាល់​ដល់​ជីវិត​មនុស្ស ដូច​ជា ក្នុង​​វិស័យ​អប់រំ សុខុមាលភាព​​​ ជាដើម ​ ប៉ុន្តែ​​​​ផល​ប៉ះពាល់​រយៈពេលវែង​ ដូច​ជា អាជីវកម្ម ហេដ្ឋារចនាសម្ព័ន្ធ អសន្តិសុខ​ស្បៀង អតិផរណា មិនទាន់​ត្រូវ​បាន​​បញ្ចេញ​របាយការណ៍​​វាយ​តម្លៃ​នៅឡើយ។

​ខាង​ក្រោម​នេះ​ជា​ការ​សង្ខេប​​ត្រួស​ៗ​​ពី​ហេតុការណ៍​​​​​​​មហន្តរាយ​​គ្រោះ​​ទឹក​ជំនន់​នៅ​តាម​ទ្វីប​​​ផ្សេង​ៗគ្នា។

តំបន់​អាហ្វ្រិក​៖ ទឹកជំនន់​បាន​វាយ​ប្រហារ​​​ប្រទេស​ជាច្រើន​នៅ​ភាគ​ខាងលិច​​​និង​ភូមិភាគកណ្តាល​នៃ​ទ្វីប​​អាហ្វ្រិក ដែល​ធ្វើ​ប៉ះពាល់​ដល់​​ប្រជា​ជន​៤​លាន​នាក់ ដែលភាគច្រើន​ប៉ះពាល់​ដល់​កុមារ។ មនុស្ស​​យ៉ាងហោច​ណាស់៥០​ម៉ឺននាក់បាត់​បង់​ផ្ទះសម្បែង និង បំផ្លាញ​ផ្ទះ​​​ជាង​​៣០ម៉ឺ​ន​។  ទឹកជំនន់​នៅ​តំបន់​អាហ្វ្រិក ចាប់​ពី​ប្រទេស​លីប៊ី​នៅភាគខាងជើង​ ដល់​ប្រទេស​​នីហ្សេរីយ៉ា​​​​នៅ​ភាគខាង​លិច​។ ​ប្រទេសស៊ូដង់ ប្រទេស​នីហ្សេ ប្រទេស​ម៉ាលី ប្រទេសឆាដ និង​ប្រទេសផ្សេង​ៗ​ទៀត​នៅ​អាហ្វ្រិក​កណ្តាល​សុទ្ធ​តែ​​​រង​ផល​ប៉ះពាល់​។

បរិមាណ​ទឹកភ្លៀង​ច្រើនបង្ក​ឱ្យ​មាន​ជំនន់​ទឹកភ្លៀង​​​នៅ​ប្រទេស​នីហ្សេរីយ៉ា ទំនប់​វារី​អគ្គិសនី​​​បាន​​​បាក់​​នៅ​ដើម​ខែ​កញ្ញា​ដែល​ធ្វើ​ឱ្យ​ប៉ះពាល់​ដល់​ប្រជាជន​៤០​ភាគរយ​នៃ​ទីក្រុង Maiduguri ដែល​ប៉ះពាល់​ដល់​ប្រជាជន​​​២០ម៉ឺន​នាក់។ ទឹកជំនន់​​នៅ​ទីក្រុង​នេះ​​​​បាន​​​ប៉ះពាល់​ដល់​សាលា​រៀន៦១ និង​មន្ទីរពេទ្យ​១៣។

ទឹកជំនន់​នៅ​ក្នុង​ប្រទេស​ឆាដ បាន​​បំផ្លិច​បំផ្លាញ​ប្រទេស​នេះ​ខ្លាំង​បំផុត​​ស្ទើរ​ទូទាំង​ប្រទេស​ចាប់​តាំ​ងពី​ចុង​ខែកក្កដា​ ដោយ​ប្រជាជន​៣៤១​ស្លាប់ និង​ប៉ះពាល់​​​ជិត​​១,៥​លាន​​​នាក់​ ខណៈ​ដែល​​ផ្ទះ​៧០០០០​បាន​រង​ការ​បំផ្លាញ។

​តាមរបាយការណ៍​របស់​​​ភ្នាក់ងារ​អង្គការ​សហប្រជាជាតិ UNICEF ប្រទេស​​១៦​​​​ក្នុងចំណោម​២៤ នៅ​ក្នុង​តំបន់​​អាហ្វ្រិក​ខាងលិច និង​អាហ្រ្វិក​កណ្តាល​គឺស្ថិត​ក្នុងចំណោម​​ប្រទេស​​៣០​​ ដែលមាន​ហានិភ័យ​​ការ​ប្រែប្រួល​អាកាសធាតុ​​​ខ្លាំង​បំផុត​ចំពោះ​​​កុមារ​។​​

​ទ្វី​បអឺរ៉ុប​​៖ ទឹកភ្លៀង​យ៉ាង​គំហុក បាន​បណ្តាល​ឱ្យ​ជន់​លិច​​​​ប្រទេស​នៅភូមិភាគ​កណ្តាល​ និង​ភាគខាងកើត​អឺរ៉ុប។ ប្រទេស​អឹរ៉ុប​​​យ៉ាង​ហោច​​៦​ បាន​ជួប​ប្រទះ​​ទឹកជំនន់​ដ៏ខ្លាំង​​នេះ​។  ប្រទេសប៉ូឡូញ​​បាន​វាយ​តម្លៃ​ប៉ះ​ការ​ខូច​ខាត​​រាប់​ពាន់​លាន​ដុល្លារ​​ក្នុងទឹកជំនន់​កាល​ពីសប្តាហ៍​មុន។ ប្រទេស​នេះ​​បាន​ដាក់​ពង្រាយ​​​​ទាហាន​ដល់​ទៅ​១៤០០០នាក់​ដើម្បី​ជួយ​តំបន់​ដែល​​រង​​​គ្រោះ​ដោយសារ​ការ​វាយ​ប្រហារ​​ដោយ​ទឹកជំនន់​នេះ​។ នាយករដ្ឋ​មន្ត្រី​ប៉ូឡូញ​បាន​ប្រកាស​ថា ​​​ផលខូច​ខាត​ដោយសារ​ទឹកជំនន់​នេះ​​​នឹង​មាន​រហូត​ដល់​​ពាន់​លាន​ដុល្លារ។ ​

ក្រៅ​ពី​ប្រទេស​ប៉ូឡូញ​ដែលរង​ផល​ប៉ះពាល់​ខ្លាំង​បំផុត គឺ​មាន​ប្រទេស​ហុងគ្រី សាធារណៈរដ្ឋ​ឆេក ប្រទេសអូទ្រីស ប្រទេស​​រ៉ូម៉ានី និងប្រទេសស្លូវ៉ាគី។ ​​​ក្រៅ​ពី​ប្រទេស​ទាំង​នេះ​ដែល​រងគ្រោះ​ដោយសារ​ទឹកជំនន់ ​ប្រទេស​​នៅ​តំបន់​អឺរ៉ុប​ផ្សេងទៀត​បែ​ជា​ជួប​​គ្រោះ​រាំងស្ងួត និង​មហន្តរាយ​ភ្លើងឆេះ​ព្រៃ ដូចជា ប្រទេសក្រិក និង​ ប្រទេស​ព័រទុយហ្គាល់​ជាដើម។​

​សហរដ្ឋ​អាមេរិក៖ តាមសេចក្តី​រាយការណ៍ រដ្ឋ​មួយ​ចំនួន​​​នៅ​សហរដ្ឋ​អាមេរិក​បាន​រងគ្រោះ​ដោយសារ​​​​ទឹកជំនន់​ ខណៈ​កម្មវិធី​​​ធានារ៉ាប់​រង​​​ទឹកជំនន់​ជាតិ បាន​បង្ហាញ​ថា ​ម្ចាស់​អចលន​ទ្រព្យ​ជាង​២៥ម៉ឺន​​​នៅ​សហរដ្ឋអាមេរិក បាន​ដាក់​ពាក្យ​ទាមទារ​សំណង​​​​ដោយសារ​ការ​ខូច​ខាត​បណ្តាល​មក​ពីទឹកជំនន់​។ ករណី​ទាម​​​ទារ​សំណង​មាន​រហូត​ដល់​ជាង​​​៧៥ម៉ឺន​​​ ដេល​មាន​ទឹក​ប្រាក់​រាប់​ពាន់​លាន​ដុល្លារ​។

​តំបន់​អាស៊ី៖​ ទឹកជំនន់​បាន​បង្កផល​ប៉ះពាល់​ខ្លាំង​​នៅ​តំបន់​អាស៊ី​។ អាស៊ីខាងកើត មាន​ចិន កូរ៉េ​ទាំងពីរ និង ជប៉ុន សុទ្ធ​តែ​ទទួល​រង​​​ផល​ប៉ះពាល់​ដោយសារ​ទឹក​ជំនន់ និង​ផល​ប៉ះពាល់​ពី​​ព្យុះ​​ដែល​កើត​ឡើង​ជា​បន្តបន្ទាប់។ ​តំបន់​អាស៊ី​ខាងត្បូង​​​ មាន​ឥណ្ឌា ប៉ាគីស្ថាន អាហ្វហ្គានីស្ថាន នេប៉ាល់ ​បង់ក្លាដែស ​សុទ្ធ​តែ​រងគ្រោះ​ធ្ងន់​ធ្ងរ​​ដោយសារ​ទឹកជំនន់​​ក្នុងរដូវ​មូសុង​វស្សា​​នេះ​​។ ​​ប្រជាជន​​បង់ក្លាដែស​​ ជាង​៥លាន​នាក់​​បាន​រងផល​ប៉ះពាល់​កាល​ពី​​​ដើម​ខែ​កញ្ញា ខណៈប្រជាជន​​ប៉ាគីស្ថានជិត​​១០០០​នាក់​បាន​ស្លាប់​និង​របួស​​​ចន្លោះ​​ថ្ងៃទី​១កក្កដា​ដល់​ទី​១​កញ្ញា​។ ផ្ទះ​ជាង​​២ម៉ឺន​ត្រូវ​បាន​បំផ្លាញ​។

​តំបន់​អាស៊ីអា​គេ្នយ៍៖ ​ប្រទេស​ហ្វីលីពីន វៀតណាម ឡាវ ថៃ និង មីយ៉ាន់ម៉ា​ ជួ​ប​គ្រោះ​មហន្តរាយ​ទឹកជំនន់​ដែល​បង្ក​​​​ការ​ខូចខាត​បំផុត​សម្រាប់​​​តំបន់​អាស៊ី​អាគ្នេយ៍​ក្នុង​រយៈពេល​ដ៏​ខ្លី​​ត្រឹមតែប្រហែល​២សប្តាហ៍​ប៉ុណ្ណោះ​​ពោល​គឺ​នៅ​ដើ​ម​ខែកញ្ញា​នេះ​​។ យោង​​ទីភ្នាក់ងារកុមាររបស់អង្គការសហប្រជាជាតិ UNICEF កុមារចំនួន៦​លាននាក់​រងផលប៉ះពាល់ដោយព្យុះទីហ្វុង​យ៉ាកជី ដែល​អូសបន្លាយពេល​ប្រហែល​​២​សប្តាហ៍។ ក្រៅ​ពី​ផល​ប៉ះពាល់​លើ​កុមារ​ ​ប្រទេស​និមួយៗ​មិនទាន់រាប់​បញ្ជូល​ផលប៉ះពាល់​​លើ​ការ​ខូច​ខាត​ហេដ្ឋារចនាសម្ព័ន្ធ​​ផ្លូវថ្នល់ ផ្លូវដែក ​អាកាសយានដ្ឋាន ស្អាន ជាពិសេស​​គឺ​អាជីវកម្ម​​​​គ្រប់​ប្រភេទ និង​ការ​ខូច​ខាត​​​ដំណាំ​កសិកម្ម​គ្រប់ប្រភេទ​​​ក្នុង​អំឡុង​ពេល​ប្រហែល​២សប្តាហ៍​កន្លងមកនេះ។

ព្យុះដ៏មានឥទ្ធិពលបំផុត​យ៉ាក​ជី បានសម្លាប់​​​ជិត​​១០០០​នាក់​ ក្នុង​នោះ​មាន​ជិត៣០០​នាក់នៅក្នុងប្រទេសវៀតណាម ​ក្រោម​៥០​​​នាក់នៅក្នុងប្រទេសថៃ ​រាប់​សិបនាក់​នៅ​ប្រទេស​ឡាវ និងយ៉ាងហោចណាស់​ ២៣៦​នាក់នៅក្នុងប្រទេសមីយ៉ាន់ម៉ា ដោយ​មិនទាន់​រាប់​បញ្ជូល​ពី​ប្រទេសហ្វីលីពីន និង​ប្រទេសចិន​​ផ​ង។

​​​ផល​ប៉ះពល់សង្គម​​ក្នុង​រយៈពេល​វែង​​​បណ្តាល​​មក​ពី​​​​គ្រោះធម្មជាតិ​នេះ ទំនង​កើត​មាន​​លើ​បញ្ហា​អសន្តិសុខស្បៀង អតិផរណា​​​តម្លៃ​ស្បៀងអាហារ និង​ការ​កើន​ឡើង​​​បញ្ហា​សង្គម​​ជា​ច្រើន​ទៀត ខណៈពិភពលោក​នេះ​​​កំពុង​ប្រឈម​ការ​លំបាក​ជាច្រើន​​ពីសង្គ្រាម​​អ៊ុយក្រែន-រុស្ស៊ី​ដែល​អូស​បន្លាយ​​​​ជិត​​៣ឆ្នាំ សង្គ្រាម​​​នៅ​តំបន់ហ្គាហ្សា​ក្នុង​មជ្ឈិមបូព៌ា​​​ជិត​​១ឆ្នាំ និង​កត្តា​សកលលោក​ជាច្រើន​ទៀត​៕  

The post តើ​​គ្រោះ​មហន្តរាយ​ទឹកជំនន់​​​​​​បង្កវិនាសកម្មអ្វីខ្លះតាមទ្វីប​នីមួយ​ៗ​​? appeared first on Kampuchea Thmey Daily.

​រដូវខ្យល់មូសុង និងព្យុះទីហ្វុងនៅអាស៊ី ហើយការប្រែប្រួលអាកាសធាតុបានធ្វើឱ្យ​ឥទ្ធិពល​​ព្យុះ​ដែល​បោក​បក់​​នៅ​​ក្នុង​តំបន់​អាស៊ី​កាន់តែ​អាក្រក់​​ខ្លាំង ខណៈ​ភ្លៀងធ្លាក់ខ្លាំង បានបង្កបំណាក់ដី និងទឹកជំនន់ បំផ្លាញដំណាំ បំផ្លាញផ្ទះសម្បែង និងឆក់យកជីវិតមនុស្សជាច្រើន។ រដ្ឋាភិបាលប្រទេសនីមួយៗបានព្យាយាមស្ដារនិងជួយសង្គ្រោះដោយ​ចំណាយ​ធនធាន​និង​មធ្យោបាយ​យ៉ាង​ច្រើន ទោះបីជាយ៉ាងណា ពេល​ខ្លះ​ការជួយសង្គ្រោះវា​មិន​គ្រប់​គ្រាន់​ទេ ដោយសារ​តែ​ផល​វិបាក​សោកនាដកម្ម​ដែល​កំពុង​កើត​ឡើង​មានកម្រិតធ្ងន់ធ្ងរ ។

ប្រទេសឥណ្ឌា៖ មនុស្ស១៩៤ នាក់ស្លាប់ និង ១៨៧ នាក់បាត់ខ្លួន

ភ្លៀងធ្លាក់ខ្លាំងបណ្ដាលឲ្យមានបំណាក់ដីក្នុងតំបន់ដាំតែ និងភូមិនានាក្នុងរដ្ឋ Kerala ភាគខាងត្បូងប្រទេសឥណ្ឌាកាលពីព្រឹកថ្ងៃអង្គារ ដោយបំផ្លាញស្ពាន និងផ្ទះសម្បែងប្រជាជនជាច្រើន។ ក្តីសង្ឃឹមនៃការស្វែងរកអ្នកនៅរស់រានមានជីវិតបានធ្លាក់ចុះ ខណៈដែលការស្វែងរកឈានចូលដល់ថ្ងៃទីបួន។

តំបន់​នេះ​ត្រូវ​បាន​គេ​ស្គាល់​ថា​តំបន់ដាំតែ​​ដ៏​ស្រស់​ស្អាត ដោយ​មាន​កម្មករ​ចំការ​រាប់​រយ​នាក់​រស់​នៅ​ក្នុង​ជម្រក​បណ្ដោះ​អាសន្ន​ក្បែរ​នោះ។ ប្រទេស​ឥណ្ឌា​តែងតែ​មាន​ទឹកជំនន់​ធ្ងន់ធ្ងរ​ក្នុង​រដូវ​មូសុង​ដែល​ហូរ​នៅ​ចន្លោះ​ខែមិថុនា​ដល់​ខែកញ្ញា ហើយ​នាំមក​នូវ​ទឹកភ្លៀង​ដ៏​សំខាន់​សម្រាប់​ដំណាំ​។

ប្រទេសចិន៖ ស្លាប់៤៨នាក់ និងបាត់ខ្លួន៣៥នាក់

ព្យុះទីហ្វុង Gaemi បានសម្លាប់មនុស្សជាង៣០នាក់នៅក្នុងប្រទេសហ្វីលីពីន និង១០នាក់នៅកោះតៃវ៉ាន់ ខណៈដែលវាបានបោកបក់កាត់ភាគខាងលិចប៉ាស៊ីហ្វិកកាលពីសប្តាហ៍មុន និងនៅតែបន្ត​មាន​ឥទ្ធិពល​នៅ​ក្នុង​ប្រទេសចិន​នៅឡើយ​។ ទឹកភ្លៀង​​​ដ៏ខ្លាំង​បាន​ជន់​លិច​ផ្នែក​ខ្លះ​នៃ​ខេត្ត Hunan អស់​ជា​ច្រើន​ថ្ងៃ ហើយអាជ្ញាធរនៅក្នុងទីក្រុង Zixing ក្បែរនោះបានប្រកាសកាលពីថ្ងៃព្រហស្បតិ៍ថា មនុស្ស ៣០នាក់បានស្លាប់នៅក្នុងទឹកជំនន់​និង​៣៥នាក់ផ្សេងទៀតកំពុងបាត់ខ្លួន។

ក្រសួងធនធានទឹកបាននិយាយនៅសប្តាហ៍នេះថា ប្រទេសចិនបានកត់ត្រាទឹកជំនន់ធំ​ៗ​ចំនួន២៥នៅឆ្នាំនេះ ដែលជាចំនួនច្រើនបំផុតចាប់តាំងពីវាបានចាប់ផ្តើមរក្សាស្ថិតិក្នុងឆ្នាំ១៩៩៨។ ជាមួយគ្នានេះទិន្នន័យប្រវត្តិសាស្ត្របង្ហាញថា ប្រទេសចិនកំពុងមានថ្ងៃក្តៅខ្លាំង និងមានភ្លៀងធ្លាក់ញឹកញាប់ជាងមុន ហើយបើយោងតាមរបាយការណ៍ដែលបានចេញផ្សាយដោយរដ្ឋបាលឧតុនិយមចិនបានព្យាករណ៍ថានឹងមានការកើនឡើងបន្ថែមទៀត ក្នុងរយៈពេល៣០ឆ្នាំខាងមុខ។

រដ្ឋាភិបាលចិនបានដាក់ចេញនូវផែនការបង្ការគ្រោះមហន្តរាយ ដើម្បីព្យាយាមកាត់បន្ថយការខូចខាត តាមរយៈការព្យាយាមជម្លៀសមនុស្សមុនពេលព្យុះចូលមកដល់ ហើយបញ្ជូនជំនួយតាម​ឧទ្ធម្ភាគចក្រទៅកាន់តំបន់ដែលរងគ្រោះ។

ប្រទេសកូរ៉េខាងជើង៖ មានការខូចខាតធ្ងន់ធ្ងរ ប៉ុន្តែមិនមានព័ត៌មានអំពីការស្លាប់

ព្យុះត្រូពិចក៏បានបង្កឲ្យមានភ្លៀងធ្លាក់ខ្លាំងនៅភាគឦសានប្រទេសចិន នៅតាមព្រំដែនជាមួយកូរ៉េខាងជើង ដោយ​ធ្លាក់​ទៅ​លើទន្លេ Yalu ដែលបែងចែកប្រទេសទាំងពីរ។ នៅប្រទេសកូរ៉េខាងជើង ភ្លៀងបានជន់លិចផ្ទះចំនួន ៤១០០ខ្នង ដីស្រែចំនួន៣០០០ និងអគារសាធារណៈជាច្រើន ផ្លូវគោក និងផ្លូវដែក។ឧទ្ធម្ភាគចក្រយោធា និងកងទ័ពជើងទឹក និងទូករដ្ឋាភិបាលផ្សេងទៀតបានជម្លៀសអ្នកស្រុកដែលជាប់គាំង។

ប្រព័ន្ធផ្សព្វផ្សាយរដ្ឋកូរ៉េខាងជើងមិនបានផ្តល់ព័ត៌មានស្តីពីការស្លាប់នោះទេ ទោះបីជាមេដឹកនាំប្រទេស គីម ជុងអ៊ុន បានបង្កប់ន័យថាមានអ្នកស្លាប់បាត់បង់ជីវិតនិងបានស្តីបន្ទោសមន្ត្រីសាធារណៈដែលធ្វេសប្រហែសក្នុងការការពារគ្រោះមហន្តរាយក៏ដោយ ។

ប្រទេសប៉ាគីស្ថាន៖ មនុស្សស្លាប់៣០នាក់

ទីក្រុង​ Lahore ដែល​ជា​ទីក្រុង​ធំ​បំផុត​លំដាប់​ទី​២​នៅ​​ប៉ាគីស្ថាន បាន​ទទួល​រង​គ្រោះ​ទឹក​ជំនន់​ខ្លាំង​ជាង​​​គេ​​​មិន​ធ្លាប់​​មាន​ក្នុង​រយៈពេល​​ច្រើន​ជាង​៤​ទសវត្សរ៍​កន្លង​ទៅ។ ភ្លៀង​បាន​បន្ត​ធ្លាក់​និង​ខ្យល់​បក់បោក​ខ្លាំង​នៅ​ភាគ​ខាង​ជើងប្រទេស បង្ក​ឲ្យ​មាន​ទឹក​ជំនន់ ​ការដួល​រលំអគារ និង​​ហានិភ័យ​នៃ​ការ​ឆ្លក់​​អគ្គិសនី​ស្លាប់។ អាជ្ញាធរ​ប៉ាគីស្ថាន បានព្រមាន​ថា ជំនន់​ទឹក​ភ្លៀង​ភ្លាមៗ​អាច​កើត​មាន​នៅ​ក្នុង​សប្ដាហ៍​នេះ​បន្ត​ទៀត​នៅ​ភាគ​ខាង​ត្បូង​ប្រទេស បន្ទាប់​ពី​បាន​​​​សម្លាប់​មនុស្ស​ចំនួន​៦​នាក់​រួច​មក​ហើយ​​​នៅ​ទីនោះ ខណៈចំនួនអ្នកស្លាប់មកដល់ពេលនេះកើនដល់ ៣០ នាក់៕

អត្ថបទ៖ ប៊ុន សុភាព

The post មនុស្សជាង២០០នាក់បាត់បង់ជីវិតក្នុង​១សប្តាហ៍​ ​​ក្នុងហេតុការណ៍​​អាកាសធាតុ​​អាក្រក់​នៅ​អាស៊ី​​ appeared first on Kampuchea Thmey Daily.