អ្នកស្រុកអង្គរ និយមផលិត និងប្រើប្រាស់ធូបខ្មែរ ក្នុងកិច្ចពិធីនានា

Ken Malis — Tue, 21 May 2024 08:10:26 +0000

សព្វថ្ងៃនេះ ធូបខ្មែរនៅមានការនិយមប្រើប្រាស់តាមវត្តអារាម និងក្នុងកិច្ចពិធីនានានៅក្នុងជីវិតប្រចាំថ្ងៃរបស់ប្រជាជនខ្មែរ ពិសេសអ្នកស្រុកអង្គរ។ ធូបទាំងនេះ ត្រូវបានផលិតដោយអ្នកស្រុកអង្គរផ្ទាល់ ហើយយកវត្ថុធាតុដើមក្នុងតំបន់មកផលិត និងមានគុណភាពល្អ ហើយភាគច្រើនធ្វើឡើងដោយមនុស្សមានវ័យចំណាស់ប៉ុណ្ណោះ។

ការគាំទ្រដោយប្រើប្រាស់ធូបខ្មែរ គឺប្រៀបបានជាការថែរក្សាចំណេះដឹង និងជំនាញបន្តដល់កូនចៅជំនាន់ក្រោយដែលមនុស្សនៅក្នុងតំបន់អង្គរ តែងតែចែករំលែកពីមួយជំនាន់ទៅមួយជំនាន់មិនឱ្យបាត់បង់ ទើបនៅតំបន់អង្គរមានវប្បធម៌សម្បូរបែបនៅរស់ក្នុងជីវភាពប្រចាំថ្ងៃរបស់ប្រជាជនក្នុងភូមិស្រុក។

ចំណែក ក្រុមការងារស្រាវជ្រាវនៃអាជ្ញាធរជាតិអប្សរា តែងតែខិតខំចងក្រងប្រមូលនូវទំនៀមទម្លាប់ប្រពៃណីក្នុងតំបន់អង្គរ មកផ្សព្វផ្សាយ និងគាំទ្រចំពោះការថែរក្សាមរតកវប្បធម៌ទាំងនេះឱ្យមានភាពរស់រវើក ថែមទាំងលើកទឹកចិត្តឱ្យប្រជាជនខ្មែរ ងាកមកគាំទ្រផលិតផលខ្មែរ ដើម្បីលើកស្ទួយជីវភាពប្រជាជនផង និងការអភិរក្សផង៕

ដោយ៖ ជុន កុសល

The post អ្នកស្រុកអង្គរ និយមផលិត និងប្រើប្រាស់ធូបខ្មែរ ក្នុងកិច្ចពិធីនានា appeared first on Kampuchea Thmey Daily.

កុំចូលចិត្តដុតធូបច្រើនៗពេក ពេលស្រូបផ្សែងចូលទៅមានបញ្ហាច្រើនមុខ ថែមទាំងបង្កជាជំងឺមហារីក

សាង ស្រីល័ក្ខ — Fri, 20 Nov 2020 01:40:09 +0000

កុំចូលចិត្តដុតធូបច្រើនៗពេក ពេលស្រូបផ្សែងចូលទៅមានបញ្ហាច្រើនមុខ ថែមទាំងបង្កជាជំងឺមហារីក

ប្រជាជននៅខ្មែរ និងអាស៊ីអាគ្នេយ៍ភាគច្រើនដុតធូបនៅក្នុងពិធីសាសនាផ្សេងៗ តែការដុតធូបច្រើននោះបង្កជាផ្សែងខ្មួលខ្មាញ់ ហើយយើងស្រូបចូលទៅក្នុងខ្លួនបង្កគ្រោះថ្នាក់ទៅវិញ។ វេជ្ជបណ្ឌិតផ្នែកទូទៅ លី ឫទ្ធីគុណ បានឲ្យដឹងថា អ្នកដែលដុតធូបទាំងនោះមិនបានដឹងផលប៉ះពាល់នៃសុខភាពដែលស្រូបផ្សែងចូលទៅឡើយ។

លោកបកស្រាយថា ធូបត្រូវបានគេផលិតឡើងពីវត្ថុធាតុដើមធម្មជាតិ និងផ្សំជាមួយសារធាតុគីមីច្រើនប្រភេទ។ ផ្សែងដែលចេញភាយក្រោយត្រូវកម្ដៅ មានផលប៉ះពាល់ដល់សុខភាពជាច្រើនយ៉ាងដូចជាបញ្ហាផ្លូវដង្ហើម រលាកទងសួត ហើយការស្រូបយកជាតិធូបនេះ គ្រោះថ្នាក់ជាងផ្សែងបារីទៅទៀត។ យូរៗទៅវានឹងបង្កទៅជាជំងឺមហារីកសរីរាង្គផ្សេងៗ។

ធាតុផ្សំខ្លះនៅក្នុងផ្សែងធូប ក្រៅពីសារធាតុបង្កមហារីក ហើយវាក៏ធ្វើឲ្យរលាកផងដែរ។ មានន័យថាវាអាចនាំឲ្យមានជំងឺផ្លូវដង្ហើមដូចជាជំងឺហឺត ឬអាលែកហ្ស៊ី។ ក្រៅពីជំងឺប៉ុន្មានមុខនេះ ការស្រូបផ្សែងចូលយូរៗទៅបណ្ដាលឲ្យរលាកសួត ហើយបូករួមអាលែកហ្ស៊ីរ៉ាំរ៉ៃក៏បណ្ដាលទៅជាមហារីកសួត។

ម្ចាស់សេវាកម្មថែទាំមនុស្សចាស់តាមគេហដ្ឋានបន្ថែមទៀតថា ក្នុងធូបមានផ្សំពីសារធាតុគ្រោះថ្នាក់ជាច្រើនដូចជា៖

– កាបូនឌីអុកស៊ីត
– អ៊ីដ្រូកាបូន
– បង់ហ្សែន

រីឯការរលាកបណ្ដាលមកពីផ្សែងធូបវិញ ក្លាយជារលាករ៉ាំរ៉ៃនៅក្នុងខ្លួនបានដូចគ្នា។ មួយវិញទៀតរលាកដែលបណ្ដាលមកពីហិតផ្សែងធូបច្រើននោះ មិនត្រឹមក្នុងសួតប៉ុណ្ណោះទេ តែវាក៏មាននៅក្នុងថ្លើមផងដែរ។ មូលហេតុបណ្ដាលមកពីដំណើរការរាងកាយ បម្លែងសារធាតុទៅជាមេតាប៉ូលីស ទើបកើតអុកស៊ីតកម្ម។

ក្រៅពីសួត ថ្លើម ផ្សែងធូបក៏នាំឲ្យប៉ះពាល់ដល់សុខភាពបេះដូងដូចជាសរសៃឈាម និងបេះដូងថែមទៀតផង។ សម្រាប់អ្នកមានជំងឺបេះដូងស្រាប់ បើស្រូបផ្សែងទៅអាចបណ្ដាលឲ្យគ្រោះថ្នាក់ធ្ងន់ធ្ងរទៅជាស្ទះសរសៃឈាម ពុកផុយ ឬគាំងបេះដូងតែម្ដង។

បើផលប៉ះពាល់ភ្លាមៗវិញផ្សែងធូបនាំឲ្យរកាំភ្នែក ឈឺក្បាល វិលមុខ ស្ងួតស្បែក រលាកបំពង់ក ពិសេសអ្នកមានផ្ទៃពោះប៉ះពាល់កូនក្នុងផ្ទៃ។ វេជ្ជបណ្ឌិតរូបនោះបញ្ជាក់ថាផ្សែងធូបធម្មតាស្រូបទៅផលប៉ះពាល់ច្រើនហើយ បើផ្សែងធូបមូសវិញរឹតតែគ្រោះថ្នាក់ជាងផ្សែងធូបធម្មតារាប់ដងឯណោះ៕

អត្ថបទផ្ដល់សិទ្ធសិទ្ធិដោយ ៖ Hellokrupet

ចុចអាន៖ស្វែងយល់ពីការគេងមិនលក់!

ចុចអាន៖គួរញាំអីក្រោយហាត់ប្រាណរួច?

The post កុំចូលចិត្តដុតធូបច្រើនៗពេក ពេលស្រូបផ្សែងចូលទៅមានបញ្ហាច្រើនមុខ ថែមទាំងបង្កជាជំងឺមហារីក appeared first on Kampuchea Thmey Daily.

ធូប Archives - Kampuchea Thmey Daily

អ្នកស្រុកអង្គរ និយមផលិត និងប្រើប្រាស់ធូបខ្មែរ ក្នុងកិច្ចពិធីនានា

កុំចូលចិត្តដុតធូបច្រើនៗពេក ពេលស្រូបផ្សែងចូលទៅមានបញ្ហាច្រើនមុខ ថែមទាំងបង្កជាជំងឺមហារីក