នយោបាយអាមេរិក Archives - Kampuchea Thmey Daily

អត្រានៃការគាំទ្រប្រធានាធិបតី ត្រាំ បន្តធ្លាក់ចុះទាបបំផុតដល់៣៩%

Minea Neu — Wed, 17 Dec 2025 07:10:23 +0000

លទ្ធផលនៃការស្ទង់មតិមួយ បានរកឃើញថា ការគាំទ្ររបស់ប្រជាជនអាមេរិកចំពោះ លោកប្រធានាធិបតី ដូណាល់ ត្រាំ បានធ្លាក់ចុះក្នុងពេលថ្មីៗនេះ ដល់កម្រិតមួយដែលទាបបំផុតក្នុងអាណត្តិបច្ចុប្បន្នរបស់លោក ខណៈអ្នកបោះឆ្នោតមកពីគណបក្សសាធារណរដ្ឋរបស់លោកអស់ជំនឿចិត្ត លើការគ្រប់គ្រងសេដ្ឋកិច្ចរបស់រដ្ឋបាលសហរដ្ឋអាមេរិករូបនេះ។ បើយោងតាមការចុះផ្សាយរបស់សារព័ត៌មាន Reuters។

ប្រធានាធិបតីសហរដ្ឋអាមេរិក លោក ដូណាល់ ត្រាំ កាន់បាល់ឱប ដែលហៀបបោះទៅក្មេងប្រុសម្នាក់។ White House

ការស្ទង់មតិរយៈពេលបីថ្ងៃបានបញ្ចប់កាលពីថ្ងៃអាទិត្យ បង្ហាញថា ៣៩%នៃមនុស្សពេញវ័យរបស់សហរដ្ឋអាមេរិកបានយល់ស្រប លើការអនុវត្តការងាររបស់លោក ត្រាំ ធ្លាក់ចុះពី៤១%កាលពីដើមខែធ្នូ។ ការរកឃើញនោះបន្តទៀតថា ចាប់ពីពាក់កណ្តាលខែវិច្ឆិកា ការវាយតម្លៃការងារនានារបស់ប្រធានាធិបតីរូបនេះ កាន់តែធ្លាក់ចុះរហូតដល់ ៣៨% ជាតួលេខដែលទាបបំផុតក្នុងឆ្នាំនេះ។

មេដឹកនាំគណបក្សសាធារណរដ្ឋបានវិលត្រឡប់មកកាន់អំណាចវិញក្នុងខែមករា ជាមួយអត្រាសេដ្ឋកិច្ចចំនួន៤៧% ប៉ុន្តែប្រជាប្រិយភាពរបស់គាត់បានធ្លាក់ចុះចាប់តាំងពីពេលឡើងកាន់អំណាចមកម្ល៉េះ ជាពិសេសទាក់ទងនឹងការគ្រប់គ្រងសេដ្ឋកិច្ចតែម្តង។

ត្រាំ បានឈ្នះការបោះឆ្នោតជាប្រធានាធិបតីកាលពីឆ្នាំមុន ហើយសន្យាថានឹងកែប្រែសេដ្ឋកិច្ចដែលរងនូវអតិផរណាខ្ពស់ ក្រោមការដឹកនាំរបស់អតីតប្រធានាធិបតីលោក Joe Biden ។ ប៉ុន្តែអតិផរណាត្រូវបានកើនឡើងជាបន្តបន្ទាប់នៅក្រោមការដឹកនាំរបស់លោកត្រាំទៅវិញ៕

ណឺ មិនា

The post អត្រានៃការគាំទ្រប្រធានាធិបតី ត្រាំ បន្តធ្លាក់ចុះទាបបំផុតដល់៣៩% appeared first on Kampuchea Thmey Daily.

បិទរដ្ឋាភិបាល៤២ថ្ងៃ អាមេរិកលុបជើងហោះហើរប្រមាណ២០០០០ ត្រាំទាមទារឲ្យកែការបោះឆ្នោតនៅព្រឹទ្ធសភា

Rann Reuy — Thu, 13 Nov 2025 05:19:39 +0000

នៅយប់ថ្ងៃពុធម៉ោងនៅសហរដ្ឋអាមេរិកក្នុងអំឡុងពេលនៃការចុះហត្ថលេខាលើក្រឹត្យប្រធានាធិបតីលើច្បាប់ចំណាយថវិកា និងបើករដ្ឋាភិបាលសហព័ន្ធរបស់សហរដ្ឋអាមេរិកឡើងវិញ ក្រោយពីបិទអស់រយៈពេល៤២ថ្ងៃ ប្រធានាធិបតីអាមេរិក លោក ដូណាល់ ត្រាំ បាននិយាយថា ការបិទរដ្ឋាភិបាលដែលបង្កឡើងដោយព្រឹទ្ធសមាជិកមកពីគណបក្សប្រជាធិបតេយ្យ បានបណ្តាលឲ្យជើងហោះហើរប្រមាណ២០០០០ត្រូវលុបចោល ឬក៏ពន្យារពេល។

លោក ត្រាំ និយាយថា៖«ក្នុងរយៈពេល ៧សប្តាហ៍ចុងក្រោយនេះ ការបិទរបស់គណបក្សប្រជាធិបតេយ្យបានបង្កគ្រោះថ្នាក់យ៉ាងធំធេង។ ពួកគេបានបណ្តាលឱ្យជើងហោះហើរចំនួន ២0,000 ត្រូវបានលុបចោល ឬពន្យារពេល។ ពួកគេបានធ្វើដំណើរជាច្រើនលើក យឺតពេល មនុស្សឈឺចាប់យ៉ាងខ្លាំង»។

លោក ដូណាល់ ត្រាំ បានស្តីបន្ទោសទៅគណបក្សប្រជាធិបតេយ្យដែលធ្វើឲ្យមានការបិទរដ្ឋាភិបាលរយៈពេលយូរជាប្រវត្តិសាស្រ្ត បណ្តាលឲ្យបុគ្គលិករដ្ឋសហព័ន្ធជាច្រើនត្រូវផ្អាកពីការងារ បាត់បង់ចំណូល ហើយមន្ត្រីយោធាក៏មិនទទួលបានប្រាក់ខែពីរដ្ឋសហព័ន្ធ។

ទោះបីជាមានការស្តីបន្ទោសបែបនេះ ប៉ុន្តែគណបក្សប្រជាធិបតេយ្យដែលប្រឆាំងចំពោះការដាក់ស្នើច្បាប់ចំណាយថវិការបស់រដ្ឋបាលដូណាល់ ត្រាំ ដោយការកាត់ចេញនូវកញ្ចប់ថែទាំសុខភាព ដែលគណបក្សនេះយល់ថា វាបានជួយដល់ប្រជាជន និងកម្មករដែលមានចំណូលទាបឲ្យទទួលបានសេវាសុខភាពពេញលេញ។

ច្បាប់ចំណាយថវិកានោះត្រូវរាំងស្ទុះក្នុងព្រឹទ្ធសភាដោយសារតែព្រឹទ្ធសភាអាមេរិកមានសមាជិក១០០រូប ក្នុងនោះគណបក្សសាធារណៈរដ្ឋរបស់ប្រធានាធិបតី ដូណាល់ ត្រាំ មានសមាជិក៥៣ ខណៈព្រឹទ្ធសមាជិកមកពីគណបក្សប្រជាធិបតេយ្យមាន៤៧ រួមទាំងសមាជិកឯករាជ្យពីររូបផង ហើយការបោះឆ្នោតព្រឹទ្ធសភាចាត់ទុកជាបានការនៅពេលដែលព្រឹទ្ធសមាជិកចំនួន៦០រូបបានបោះឆ្នោតគាំទ្រ។

ព្រោះតែហេតុដូចនេះ ទើបគណបក្សប្រជាធិបតេយ្យមានអំណាចតថ្លៃជាមួយប្រធានាធិបតី ដូណាល់ ត្រាំ ដែលតែងតែតាមយាយីគោលនយោបាយដាក់ចេញរបស់គណបក្សប្រជាធិបតេយ្យ។ ប៉ុន្តែទោះជាបែបណា សមាជិកព្រឹទ្ធសភា៨រូបនៃគណបក្សប្រជាធិបតេយ្យចុងក្រោយបានចេញមកគាំទ្រ ដោយសារតែមានការចរចាកិច្ចព្រមព្រៀងថ្មីមួយដែលលោក ត្រាំ សុខចិត្តបន្តគោលនយោបាយសុខភាពរហូតដល់ខែមករាឆ្នាំ២០២៦។

លោក ដូណាល់ ត្រាំ បាននិយាយថា៖«គ្មាននរណាម្នាក់ធ្លាប់បានឃើញអ្វីដូចនេះទេ។ នេះជាការបន្ថែមដ៏ងាយស្រួលមួយ ប៉ុន្តែពួកគេមិនចង់ធ្វើវាទេ។ អាក្រក់ណាស់ ពួកអ្នកប្រជាធិបតេយ្យបានដកហូតបុគ្គលិករដ្ឋាភិបាលជាង ១លាននាក់ពីការបង់ប្រាក់របស់ពួកគេ និងកាត់ផ្តាច់អត្ថប្រយោជន៍ ស្លាកអាហារសម្រាប់ប្រជាជនអាមេរិករាប់លាន និងរាប់លាននាក់ទៀតដែលត្រូវការប្រាក់ ពួកគេបានបណ្តាលឱ្យអ្នកម៉ៅការសហព័ន្ធ និងអាជីវកម្មខ្នាតតូចរាប់ម៉ឺននាក់មិនបានទទួលប្រាក់ខែ»។

នៅក្នុងការនិយាយនោះ លោក ដូណាល់ ត្រាំ ក៏បានអំពាវនាវឲ្យព្រឹទ្ធសមាជិកគណបក្សសាធារណៈរដ្ឋធ្វើការដើម្បីកែប្រែការបោះឆ្នោតព្រឹទ្ធសភាពី៦០សំឡេង មក៥១សំឡេងវិញ៕

រ៉ាន់ រើយ

The post បិទរដ្ឋាភិបាល៤២ថ្ងៃ អាមេរិកលុបជើងហោះហើរប្រមាណ២០០០០ ត្រាំទាមទារឲ្យកែការបោះឆ្នោតនៅព្រឹទ្ធសភា appeared first on Kampuchea Thmey Daily.

ត្រាំចុះហត្ថលេខាលើក្រឹត្យដាក់ដំណើរការច្បាប់ចំណាយ បើករដ្ឋាភិបាលអាមេរិកពីថ្ងៃនេះ

Rann Reuy — Thu, 13 Nov 2025 03:29:00 +0000

ទីបំផុតរដ្ឋាភិបាលសហព័ន្ធរបសសហរដ្ឋអាមេរិក រៀបចំបើកដំណើរការប្រក្រតីភាពឡើងវិញ បន្ទាប់ពីសមាជិករដ្ឋសភា បានអនុម័តច្បាប់ចំណាយក្រោយជាប់គាំងអស់រយៈពេល៤២ថ្ងៃចាប់តាំងពីដើមខែតុលាមក ដោយព្រឹទ្ធសមាជិកនៃគណបក្សប្រជាធិបតេយ្យមិនគាំទ្រ ព្រោះតែប្រធានាធិបតី ដូណាល់ ត្រាំ បានលុបចោលកញ្ចប់ធានារ៉ាប់រងសុខភាព។

លោក ត្រាំ ផ្សាយផ្ទាល់ពេលចុះហត្ថលេខាលើក្រឹត្យដាក់ឲ្យប្រើច្បាប់។

នៅយប់ថ្ងៃពុធម៉ោងនៅសហរដ្ឋអាមេរិក ត្រូវវេលាព្រឹកថ្ងៃព្រហស្បត្តិ៍ម៉ោងនៅប្រទេសកម្ពុជា សភាសហរដ្ឋអាមេរិកបានបោះឆ្នោតគាំទ្រលើច្បាប់ចំណាយរបស់រដ្ឋាភិបាលសហព័ន្ធ ក្រោយពីមានការយល់ព្រមពីព្រឹទ្ធសភាកាលពី២ថ្ងៃមុន ដោយការចរចាលើកិច្ចព្រមព្រៀងមួយរវាងគណបក្សសាធារណៈរដ្ឋ និង គណបក្សប្រជាធិបតេយ្យ ហើយ សមាជិកព្រឺទ្ធសភា៨រូបបានចេញមកគាំទ្រកិច្ចព្រមព្រៀងនោះ។

កិច្ចព្រមព្រៀងនោះហើយ បានបើកផ្លូវឲ្យសមាជិកសភាបោះឆ្នោតលើច្បាប់ចំណាយនៅថ្ងៃនេះ។

តាមសេចក្តីរាយការណ៍របស់ Fox News ក្រោយការអនុម័តភ្លាមៗ ច្បាប់នោះត្រូវបានបញ្ជូនទៅកាន់វិមានប្រធានាធិបតីយ៉ាងប្រញាប់ ដើម្បីឲ្យប្រធានាធិបតី ដូណាល់ ត្រាំ ចុះហត្ថលេខា និងចូលជាធរមាន ដែលគេឃើញថា ច្បាប់នេះនឹងបញ្ចប់ការបិទរដ្ឋាភិបាលដែលមានរយៈពេលយូរបំផុតក្នុងប្រវត្តិសាស្រ្តអាមេរិករហូតដល់៤២ថ្ងៃ។

ប្រធានាសភាអាមេរិក លោក Mike Johnson បានប្រាប់បណ្តាញសារព័ត៌មាន Fox News ថា ៖«លោកប្រធានាធិបតី ត្រាំធ្វើការងារ២៤ម៉ោង ជារៀងរាល់ថ្ងៃដើម្បីកាត់បន្ថយការឈឺចាប់»។

លោក ត្រាំ ញញឹមពេលចុះហត្ថលេខាលើក្រឹត្យដាក់ឲ្យប្រើច្បាប់ចំណាយថវិកា បើករដ្ឋាភិបាលវិញ។ Fox News

ក្រោយការបោះឆ្នោតសភាបានបញ្ចប់ភ្លាម លោក Mike Johnson បានយកច្បាប់នោះទៅកាន់សេតវិមានដើម្បីឲ្យប្រធានាធិបតី ត្រាំ ចុះហត្ថលេខា។ នេះយោងសេចក្តីរាយការណ៍ដែលបានផ្សាយ៣០នាទីមុននេះ។

ពួកគេបានបើកប្រាក់ខែឲ្យកងទ័ព, ផ្តល់មូលនិធិដល់ WIC, ទាំងអស់ផ្សេងទៀត។ ពួកគេនឹងធ្វើការ២៤ម៉ោងលើ២៤ម៉ោងដើម្បីឲ្យរដ្ឋាភិបាលដំណើរការវិញកាន់តែឆាប់ធ្វើទៅបាន ហើយ យើងនឹងផ្តល់ឲ្យពួកគេនូវរាល់ជំនួយដែលយើងអាចផ្តល់បាន ពីសភានិងព្រឹទ្ធសភា»។

តាមការស្រង់សម្តី លោក Mike Johnson និយាយថា៖«នេះជាភាពជាអ្នកដឹកនាំ! នេះជាការរួបរួមគ្នា! នេះគឺជ័យជម្នះ!»។

ការបិទរដ្ឋាភិបាលជាង១ខែកន្លងមកនេះ បានប៉ះពាល់ដល់ការងាររបស់រដ្ឋាភិបាល ប៉ះពាល់ការងារនៅតាមស្ថានទូត ជាពិសេសប៉ះពាល់ដល់វិស័យអាកាសចរណ៍ដែលបុគ្គលិកប្រមាណ៥០ភាគរយត្រូវបានផ្អាក ធ្វើឲ្យការធ្វើដំណើរតាមផ្លូវអាកាសត្រូវលុបចោលយ៉ាងច្រើន៕

រ៉ាន់ រើយ

The post ត្រាំចុះហត្ថលេខាលើក្រឹត្យដាក់ដំណើរការច្បាប់ចំណាយ បើករដ្ឋាភិបាលអាមេរិកពីថ្ងៃនេះ appeared first on Kampuchea Thmey Daily.

ព្រឹទ្ធសភាអាមេរិកបន្តរាំងខ្ទប់ច្បាប់ចំណាយរបស់លោក ត្រាំ ដែលលុបកញ្ចប់សុខាភិបាល

Rann Reuy — Tue, 07 Oct 2025 02:55:04 +0000

ព្រឹទ្ធសភាអាមេរិកនៅល្ងាចថ្ងៃចន្ទម៉ោងនៅសហរដ្ឋអាមេរិក (ត្រូវព្រឹកថ្ងៃអង្គារម៉ោងនៅទីក្រុងភ្នំពេញ) បានរាំងខ្ទប់ច្បាប់ចំណាយរបស់ប្រធានាធិបតី ដូណាល់ ត្រាំ ដោយការទាមទារឲ្យលោក ត្រាំ ដាក់បញ្ចូលកញ្ចប់សុខភាពទៅកម្មវិធីជាតិឡើងវិញជាថ្នូរទទួលបានការគាំទ្រនោះ។

ប្រធានាធិបតីសហរដ្ឋអាមេរិក លោក ដូណាល់ ត្រាំ។ Reuters

ការបិទរដ្ឋាភិបាលរបស់សហរដ្ឋអាមេរិក បានឈានដល់ថ្ងៃទី៦ រហូតដល់ថ្ងៃអង្គារនេះ ខណៈការបោះឆ្នោតនៅក្នុងព្រឹទ្ធសភាជាលើកទី២ មិនទទួលបានបានការគាំទ្រគ្រប់គ្រាន់សម្រាប់ការយល់ព្រមលើច្បាប់ចំណាយថវិកាប្រចាំឆ្នាំរបស់រដ្ឋាភិបាលសហរដ្ឋអាមេរិកនោះទេ។

ការបោះឆ្នោតនៅក្នុងព្រឹទ្ធសភាដែលអាចអនុញ្ញាតឲ្យច្បាប់អនុវត្តបាន គឺត្រូវទទួលបានការគាំទ្រយ៉ាងតិចបំផុត៦០សំឡេង ក្នុងចំណោមចំនួនព្រឹទ្ធសមាជិកសរុប១០០រូប។ ខណៈពេលនេះ ព្រឹទ្ធសមាជិកមកពីគណបក្សសាធារណរដ្ឋរបស់លោក ដូណាល់់ ត្រាំ មានចំនួន៥៣ ហើយ ព្រឹទ្ធសមាជិកមកពីគណបក្សប្រជាធិបតេយ្យចំនួន៤៥ ហើយសមាជិកព្រឹទ្ធសភា២រូបទៀត ជាអ្នកឯករាជ្យ ដែលត្រូវបានគេដឹងថា បានចូលដៃជាមួយគណបក្សប្រជាធិបតេយ្យដើម្បីជំទាស់ចំនួនច្បាប់ថវិការបស់រដ្ឋបាលដូណាល់ ត្រាំ។

សំណើច្បាប់ថវិកាលើកទី២ របស់ រដ្ឋាភិបាលត្រាំ ដែលស្នើទៅកាន់ព្រឹទ្ធសភា បានទទួលការបោះឆ្នោត ៥២ទល់៤២ ប៉ុណ្ណោះនៅថ្ងៃចន្ទ ដែលមិនគ្រប់កូរ៉ុមសម្រាប់ចូលជាធរមានទេ។

អ្វីជាការទាមទារដាច់ខាតរបស់ព្រឹទ្ធសមាជិកមកពីគណបក្សប្រជាធិបតេយ្យជាថ្នូរសម្រាប់ការគាំទ្រច្បាប់ថវិការបស់រដ្ឋាភិបាលសហរដ្ឋអាមេរិក គឺ ការបន្តកម្មវិធីថែរក្សាសុខភាព ឬហៅថា Obamacare ដែលគេមើលឃើញថា បានជួយប្រជាជនដែលមានចំណូលទាបនិងមធ្យមទទួលបានសេវាសុខភាពដោយស្មើភាព។

ប៉ុន្តែសម្រាប់ប្រធានាធិបតីសហរដ្ឋអមេរិក លោក ដូណាល់ ត្រាំ កម្មវិធីថែទាំងសុខភាពរបស់គណបក្សប្រជាធិបតេយ្យ គឺជាការខ្ទះខ្ជាយថវិការដ្ឋយ៉ាងធំសម្បើមដែលទាញទម្លាក់សេដ្ឋកិច្ចរបស់សហរដ្ឋអាមេរិក ដោយធ្វើឲ្យនិយោជក (ថៅកែ) ចំណាយប្រាក់ច្រើនណាស់សម្រាប់ការទិញធានារ៉ាប់រងសុខភាពសម្រាប់និយោជិត (កម្មករ)របស់ពួកគេ។

កាលឃោសនារកសំឡេងគាំទ្រកាលឆ្នាំ២០២៤ លោក ដូណាល់ ត្រាំ បានចាត់ទុក កញ្ចប់ថែទាំសុខភាពនេះ ជា អ្នកសម្លាប់វិស័យការងារនៅសហរដ្ឋអាមេរិកទៀតផង។

នៅមុននេះប្រមាណ២ម៉ោង លោក ដូណាល់ ត្រាំ ទាមទារឲ្យគណបក្សប្រជាធិបតេយ្យបើករដ្ឋាភិបាលរបស់លោកឡើងវិញ ហើយ លោកគម្រាមថា ការងាររដ្ឋសហព័ន្ធច្រើនថែមទៀតនឹងត្រូវផ្អាក៕

រ៉ាន់ រើយ

ព្រឹទ្ធសមាជិក លោក Chuck Schumer មកពីគណបក្សប្រជាធិបតេយ្យដែលដឹកនាំប្រឆាំងច្បាប់ចំណាយរបស់លោក ត្រាំ។ Reuters

The post ព្រឹទ្ធសភាអាមេរិកបន្តរាំងខ្ទប់ច្បាប់ចំណាយរបស់លោក ត្រាំ ដែលលុបកញ្ចប់សុខាភិបាល appeared first on Kampuchea Thmey Daily.

[វិចារណកថា] តើជម្លោះរវាង ដូណាល់ ត្រាំ និង Elon Musk ជាអវសាននយោបាយត្រាំឬ?

Rann Reuy — Sat, 07 Jun 2025 03:15:51 +0000

ជម្លោះថ្មីៗដែលទើបផ្ទុះឡើងក្នុងប៉ុន្មានថ្ងៃចុងក្រោយរវាងប្រធានាធិបតីសហរដ្ឋអាមេរិក និង កំពូលមហាសេដ្ឋី លោក Elon Musk ដែលជាមនុស្សជំនិតបំផុតរបស់ដូណាល់ ត្រាំ គឺជាការបន្ទច់បង្អាក់យ៉ាងខ្លាំងចំពោះគោលនយោបាយនានារបស់ប្រធានាធិបតីអាមេរិកដែលនិយាយលឿនជាងទង្វើរូបនេះ។

លោក Elon Musk និងប្រធានាធិបតី ដូណាល់ ត្រាំ ក្នុងពេលល្អូកល្អិនអំឡុងពេលឃោសនារកការគាំទ្រ។ Reuters

លោក ដូណាល់ ត្រាំ បានទទួលការវាយប្រហារលើប្រជាប្រិយភាពជាលោកដំបូងក្នុងរារាំងដំណើរឆ្ពោះទៅមុខរបស់គោលនយោបាយរបស់លោក គឺ នៅពេលដែល ការចាញ់ឆ្នោតក្នុងការបោះឆ្នោតជ្រើសរើសប្រធានចៅក្រមតុលាការកំពូល នៅរដ្ឋ Wisconsin កាលថ្ងៃទី១ខែមេសា ដោយការចាញ់ឆ្នោតចៅក្រម លោកស្រី Susan Crawford ដែលជាបេក្ខនារីតំណាងពីគណបក្សប្រជាធិបតេយ្យ។

ការចាញ់ឆ្នោតសម្រាប់តំណែងប្រធានចៅក្រមនៃតុលាការកំពូលនោះ គឺជាការរារាំងគោលនយោបាយរបស់លោក ដូណាល់ ត្រាំ យ៉ាងខ្លាំង។ ម្យ៉ាងវិញទៀត ការដូរជំហររបស់ប្រពលរដ្ឋអាមេរិកក្នុងរដ្ឋ Wisconsin ពីការគាំទ្រគណបក្សសាធារណៈរដ្ឋដែលលោក ត្រាំ ទើបឈ្នះឆ្នោតប្រធានាធិបតីកាលពីខែវិច្ឆិកា គឺជាការបង្ហាញការមិនពេញចិត្តចំពោះគោលនយោបាយរបស់លោក ដូណាល់ ត្រាំ ដែលធ្វើទុក្ខបុកម្នេញ ទាំងប្រជាពលរដ្ឋខ្លួនឯង និង អុកឡុកអន្តរជាតិ។

ក្នុងការបោះឆ្នោតនោះ គណបក្សសាធារណៈរដ្ឋ ដោយមានការជ្រុមជ្រែងពីមហាសេដ្ឋីកំពូល Elon Musk បានរៃអង្គាសប្រាក់រហូតដល់ប្រមាណ១០០លានដុល្លារសម្រាប់ការឃោសនាគាំទ្រ លោក Brad Schimel ដែលជាបេក្ខជនតំណាងដោយគណបក្សសាធារណៈរដ្ឋ សម្រាប់តំណែងប្រធានចៅក្រមតុលាការកំពូលនោះ។

ក្នុងជម្លោះជាមួយប្រធានាធិបតី ដូណាល់ ត្រាំ ចុងក្រោយរបស់មហាសេដ្ឋី Elon Musk គឺជាសញ្ញាបង្ហាញថា នយោបាយរបស់លោក ដូណាល់ ត្រាំ ធ្លាក់ប្រជាប្រិយភាពខ្លាំង ដែលអាចនាំទៅដល់ការបាត់បង់អំណាចនៅចុងឆ្នាំ២០២៦ ពេលដែលសហរដ្ឋអាមេរិករៀបចំបោះឆ្នោតសភាជាន់ទាប ឬហៅថា ការបោះឆ្នោតពាក់កណ្តាលអាណត្តិ។

បច្ចុប្បន្ននេះ សភាជាតិសហរដ្ឋអាមេរិក បានគ្រប់គ្រងដោយគណបក្សសាធារណៈរដ្ឋរបស់លោក ដូណាល់ ត្រាំ ដែលមើលទៅសភាស្របទៅនឹងអ្វីដែលលោក ដូណាល់ ត្រាំ បានស្នើ ប៉ុន្តែក្នុងករណី ការបោះឆ្នោតពាក់កណ្តាលអាណត្តិនៅខែវិច្ឆិកាឆ្នាំ២០២៦ បានធ្លាក់ទៅលើគណបក្សប្រជាធិបតេយ្យ នោះលោក ត្រាំ នឹងប្រឈមការចោទសួរដេញដោលច្រើន រហូតដល់ការបោះឆ្នោតទម្លាក់ពីអំណាចថែមទៀត។

នៅក្នុងជម្លោះឆ្លងឆ្លើយគ្នាតាមបណ្តាញសង្គម លោក Elon Musk បានទាំងរិះគន់សមាជិកសភាអាមេរិកដែលបានបោះឆ្នោតគាំទ្រគម្រោងថវិកាលោកត្រាំ ដែលលោកចាត់ថា ជាការជំរុញអោយសហរដ្ឋអាមេរិកជាប់បំណុល «វណ្ឌ ក» ហើយសន្យាថានឹងជំរុញអោយពួកសមាជិកសភាសាធារណរដ្ឋដែលបោះឆ្នោតគាំទ្រគម្រោងថវិកាលោកត្រាំនេះអោយបាត់កៅអី នៅក្នុងពេលបោះឆ្នោតពាក់កណ្តាលអាណត្តិឆ្នាំ ២០២៦។

មានមតិខ្លះលើកឡើងថា ជម្លោះពាក្យសម្តីតាមរយៈការបង្ហោះសារឌឺដងគ្នារវាង ប្រធានាធិបតីសហរដ្ឋអាមេរិក លោក ដូណាល់ ត្រាំ និង លោក Elon Musk គឺជាល្បិចកិចកលក្នុងឈុតឆាកនយោបាយ ដើម្បីក្រឡុកទីផ្សារភាគហ៊ុនឲ្យមានការប្រែប្រួលប៉ុណ្ណោះ ព្រោះពួកគេទាំងពីរគឺជាអ្នកទទួលបានអត្ថប្រយោជន៍ពីការប្រែប្រួលនោះ៕

ដោយ រ៉ាន់ រើយ

The post [វិចារណកថា] តើជម្លោះរវាង ដូណាល់ ត្រាំ និង Elon Musk ជាអវសាននយោបាយត្រាំឬ? appeared first on Kampuchea Thmey Daily.

រដ្ឋបាលត្រាំជូនដំណឹងពីការបិទការិយាល័យការពារហិរញ្ញវត្ថុអ្នកប្រើប្រាស់ (CFPB)

Rann Reuy — Mon, 10 Feb 2025 05:33:51 +0000

រដ្ឋបាលប្រធានាធិបតីសហរដ្ឋអាមេរិក លោក ដូណាល់ ត្រាំ បានបញ្ជាឲ្យ ការិយាល័យការពារហិរញ្ញវត្ថុអ្នកប្រើប្រាស់ (Consumer Financial Protection Bureau) បញ្ឈប់ការងារស្ទើរទាំងអស់របស់ខ្លួន ដែលជាការបិទដ៏មានប្រសិទ្ធភាពនូវភ្នាក់ងារដែលត្រូវបានបង្កើតឡើងក្នុងរដ្ឋបាល Barak Obama ដើម្បីការពារអ្នកប្រើប្រាស់ បន្ទាប់ពីវិបត្តិហិរញ្ញវត្ថុ និងរឿងអាស្រូវក្នុងការផ្តល់កម្ចីទិញលំនៅឋាន។

ការិយាល័យការពារហិរញ្ញវត្ថុអ្នកប្រើប្រាស់ CFPB។ FB

សារព័ត៌មាន AP បានផ្សាយដោយស្រង់ការបញ្ជាក់របស់លោក Russell Vought ដែលទើបតែងតាំងថ្មីជានាយកនៃការិយាល័យគ្រប់គ្រងនិងថវិកា ដោយ លោកដូណាល់ ត្រាំ សម្រាប់ការដឹកនាំ CFPB បានអះអាងពី ការបញ្ឈប់ការងារលើនីតិវិធីដែលបានស្នើឡើង ដែលនឹងឈានទៅបញ្ចប់នីតិវិធីផ្សេងៗទៀតដែលមិនទាន់បានបញ្ចប់។

តាមរយៈការអះអាងនោះ ការងារណាកំពុងស៊ើបអង្កេតត្រូវបញ្ចប់ ហើយក៏មិនលើកករណីស៊ើបអង្កេតថ្មីនោះដែរ។ ទីភ្នាក់ងារនេះគឺជាគោលដៅរបស់បក្សសាធារណៈរដ្ឋ ដែលគេចាត់ទុកថាជាក្រុមអភិរក្ស ចាប់តាំងពីលោកប្រធានាធិបតីបារ៉ាក់ អូបាម៉ា បានជំរុញឱ្យបញ្ចូលវាទៅក្នុងបទបញ្ញត្តិកំណែទម្រង់ហិរញ្ញវត្ថុឆ្នាំ២០១០ ក្រោយវិបត្តិហិរញ្ញវត្ថុឆ្នាំ ២០០៧-២០០៨។

លោក Russell Vought ដែលទើបតែងតាំងថ្មីជានាយកនៃការិយាល័យគ្រប់គ្រងនិងថវិកា បញ្ជាឲ្យបុគ្គលិកធ្វើការពីចម្ងាយ។ USA Today

នៅថ្ងៃអាទិត្យ មន្ត្រីរដ្ឋបាលរបស់លោក ដូណាល់ ត្រាំ បានផ្ញើអ៊ីម៉ែល បញ្ជាក់ច្បាស់ៗថា ការិយាល័យកណ្តាលរបស់ CFPB ក្នុងទីក្រុងវ៉ាស៊ីនតោន DC នឹងត្រូវបិទក្នុងសប្តាហ៍នេះចន្លោះពីថ្ងៃទី១០ដល់ថ្ងៃទី១៤ខែកុម្ភៈ ប៉ុន្តែបរាជ័យក្នុងការបញ្ជាក់ពីមូលហេតុដែលនាំទៅដល់ការបិទនោះទេ។

AP បានផ្សាយថា យោងតាមអ៊ីម៉ែលដែលផ្ញើទៅកាន់បុគ្គលិកនៅការិយាល័យកណ្តាលរបស់ CFPB បានលើកឡើងថា៖«បុគ្គលិកនិងអ្នកម៉ៅការបន្ត ត្រូវធ្វើការពីចម្ងយ ដរាបណាមានការជូនដំណឹងថ្មី»។

បទបញ្ជានេះស្រដៀងគ្នាទៅនឹងការខិតខំប្រឹងប្រែងរបស់ប្រធានាធិបតីដូណាល់ ត្រាំ ដើម្បីរំលាយចោលនូវភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ ( USAID) ដែលកំពុងក្លាយជាដំបៅសង្គមអាមេរិក ដោយសារបុគ្គលិកនិងព្រឹទ្ធសភា ក៏ដូចជាសមាជិករដ្ឋសភាអាមេរិកកំពុងតវ៉ាប្រឆាំងការសម្រេចចិត្តនេះ។

សេចក្តីរាយការណ៍នោះ បានលើកឡើងថា ដោយសារតែ CFPB បង្កើតឡើងដោយការអនុម័តរបស់រដ្ឋសភា វាក៏ត្រូវទាមទារនៅការអនុម័តបញ្ចប់ដោយរដ្ឋសភាដែរដើម្បីឲ្យវាស្របតាមនីតិវិធីច្បាប់។ ប៉ុន្តែប្រមុខដឹកនាំភ្នាក់ងារនេះមានឆន្ទានុសិទ្ធិលើវិធានការអនុវត្តច្បាប់ណាដែលត្រូវធ្វើប្រសិនបើមាន។

ការបញ្ជាឲ្យបិទនេះកើនឡើងក្រោយលោក Elon Musk បានបង្ហោះសារនៅលើបណ្តាញសង្គម X កាលថ្ងៃសុក្រ ដោយសរសេរថា «CFPB RIP» ហើយ គេហទំព័ររបស់ CFPB លើបណ្តាញអ៊ីនធឺណែត ត្រូវបានបិទនៅថ្ងៃអាទិត្យ ដោយជំនួសមកវិញនៅសារថា «ទំព័រនោះរកមិនឃើញ (page not found)»។

កាលពីល្ងាចថ្ងៃសៅរ៍ផងដែរ Vought បាននិយាយនៅក្នុងការបង្ហោះប្រព័ន្ធផ្សព្វផ្សាយសង្គមថា CFPB នឹងមិនដកប្រាក់ជុំបន្ទាប់របស់ខ្លួនពី មូលនិធីបម្រុងសហព័ន្ធ (Federal Reserve) ដោយបន្ថែមថា ទុនបម្រុងបច្ចុប្បន្នរបស់ខ្លួន មានចំនួន ៧១១.៦ លានដុល្លារគឺ «លើស»។ សភាបានបញ្ជាឱ្យការិយាល័យនេះត្រូវបានផ្តល់មូលនិធិដោយ Fed ដើម្បីការពារខ្លួនពីសម្ពាធនយោបាយ។

លោក Vought បាននិយាយនៅលើ X ថា «ការញែកចេញនេះ ដែលជាការចូលរួមដ៏វែងចំពោះ ការមិនទទួលខុសត្រូវរបស់ CFPB ដល់ពេលនេះត្រូវបានបិទបញ្ចប់»។

CFPB និយាយថាខ្លួនទទួលបានជំនួយផ្នែកហិរញ្ញវត្ថុជិត ២០ពាន់លានដុល្លារសម្រាប់អ្នកប្រើប្រាស់អាមេរិកចាប់តាំងពីការបង្កើតរបស់ខ្លួនក្នុងទម្រង់នៃការលុបចោលបំណុល ផ្តល់សំណង និងប្រាក់កម្ចីកាត់បន្ថយ។ កាលពីខែមុន ការិយាល័យបានប្តឹងក្រុមហ៊ុន Capital One ពីបទចោទថាបានបំភាន់អតិថិជនអំពីការផ្តល់ជូនគណនីសន្សំការប្រាក់ខ្ពស់របស់ខ្លួន និង «បោកប្រាស់» អតិថិជនពីការបង់ការប្រាក់ដែលបាត់បង់ជាង២ពាន់លានដុល្លារ៕

ដោយ រ៉ាន់ រើយ

The post រដ្ឋបាលត្រាំជូនដំណឹងពីការបិទការិយាល័យការពារហិរញ្ញវត្ថុអ្នកប្រើប្រាស់ (CFPB) appeared first on Kampuchea Thmey Daily.

លោក ដូណាល់ ត្រាំ ផ្តាច់របបទទួលបានព័ត៌មានសន្តិសុខជាតិរបស់អតីតមន្ត្រីកំពូលៗ

Rann Reuy — Sun, 09 Feb 2025 04:31:28 +0000

ទីភ្នាក់ងារព័ត៌មាន Reuters បានរាយការណ៍ដោយដកស្រង់ប្រភពពីសេតវិមាន បានឲ្យដឹងថា ប្រធានាធិបតីអាមេរិក លោក ដូណាល់ ត្រាំ (Donald Trump) បានបញ្ចប់ការទទួលបានព័ត៌មានសន្តិសុខ សម្រាប់មន្ត្រីកំពូលរបស់រដ្ឋបាលអតីតប្រធានាធិបតី ចូ បៃដិន ដែលលោក ត្រាំ អះអាងថា ជា«ការសងសឹក» ។

ប្រធានាធិបតីសហរដ្ឋអាមេរិក លោក ដូណាល់ ត្រាំ។ Reuters

ការបញ្ចប់ការទទួលបានការសង្ខេបព័ត៌មានសន្តិសុខជាតិ សម្រាប់ថ្នាក់ដឹកនាំកំពូលៗក្នុងរដ្ឋបាលរបស់អតីតប្រធានាធិបតី ចូ បៃដិន រួមមាន លោក Antony Blinken អតីតរដ្ឋមន្ត្រីការបរទេស និងលោក Jake Sullivan ដែលជាអតីតទីប្រឹក្សាសន្តិសុខជាតិ។

តាមសេចក្តីរាយការណ៍នោះ លោក Lisa Monaco អគ្គមេធាវីរងរបស់អតីតប្រធានាធិបី ចូ បៃដិន និងដែលបានជួយសម្របសម្រួលការឆ្លើយតបរបស់ក្រសួងយុត្តិធម៌ចំពោះការវាយប្រហារកាលពីថ្ងៃទី៦ខែមករា ឆ្នាំ២០២១ មកលើវិមានរដ្ឋសភា ឬហៅថាវិមាន Capitol របស់សហរដ្ឋអាមេរិក។

លោ Letitia James អគ្គមេធាវីក្រុង ញូវយ៉ក និង Alvin Bragg មេធាវីប្រចាំតំបន់ Manhattan ដែលអ្នកទាំងពីរជាអ្នកចេញមុខដាក់ពាក្យបណ្តឹងប្រឆាំងលោកដូណាល់ ត្រាំ ក្នុងហេតុការណ៍ហិង្សាកាលថ្ងៃទី៦ខែមករានោះ ក៏ត្រូវលោក ដូណាល់ ត្រាំ ផ្តាច់ចោលរបបក្នុងការទទួលបានព័ត៌មានសន្តិសុខដែរ។

ការផ្លាស់បូរចុងក្រោយនេះបានកើតឡើងមួយថ្ងៃបន្ទាប់ពី លោក ដូណាល់ ត្រាំ បានលុបចោលរបបទទួលបានព័ត៌មានសន្តិសុខរបស់អតីតប្រធានាធិបតីចូបៃដិន ដែលជាផ្នែកនៃការសងសឹកចំពោះលោក ចូ បៃដិន ដែលបានផ្តាច់របបលោក ដូណាល់ ត្រាំ ក្រោយឡើងកាន់អំណាចដូចគ្នា។

លោក ចូ បៃដិន បានផ្តាច់របបទទួលបានសង្ខេបស្តីពីព័ត៌មានសន្តិសុខ ដោយសារតែយោងទៅលើហេតុការណ៍ដែលលោក ត្រាំ ត្រូវបានចោទថា បានញុះញុងបង្កហិង្សានៅវិមានរដ្ឋសភាក្នុងថ្ងៃដែលសមាជិកសភា និង ព្រឹទ្ធសភាអង្គុយប្រជុំរួមគ្នាដើម្បីបញ្ជាក់ថា លោក ចូ បៃដិន ឈ្នះឆ្នោតកាលពីខែវិច្ឆិកាឆ្នាំ២០២០។

ទោះបីផ្តាច់របបនោះ លោក ដូណាល់ ត្រាំ ត្រូវបានរកឃើញថា ទទួលបានព័ត៌មានសន្តិសុខក្នុងគេហដ្ឋានរបស់លោក ហើយ បង្កទៅជាក្តីក្តាំនៅពេលក្រោយមកទៀត។

មានការព្រួយបារម្ភថា ការសងសឹកគ្នារបស់មេដឹកនាំអាមេរិក បានធ្វើឲ្យបាត់បង់ប្រពៃណីដែលអតីតប្រធានាធិបតីនិងមន្ត្រីកំពូលៗ ត្រូវទទួលបានការសង្ខេបពីព័ត៌មានសន្តិសុខជាតិ និងផ្តល់យោបល់ដល់ប្រធានាធិបតីដែលកំពុងកាន់តំណែង៕

ដោយ រ៉ាន់ រើយ

The post លោក ដូណាល់ ត្រាំ ផ្តាច់របបទទួលបានព័ត៌មានសន្តិសុខជាតិរបស់អតីតមន្ត្រីកំពូលៗ appeared first on Kampuchea Thmey Daily.

ហេតុអ្វី ដូណាល់ ត្រាំ ជាសត្រូវរបស់ភ្នាក់ងារអន្តរជាតិចំនួន៤?

Rann Reuy — Fri, 07 Feb 2025 08:21:00 +0000

ក្រោយកាន់អំណាចជិត២០ថ្ងៃ រហូតមកដល់ពេលនេះ ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បានបង្គាប់ឲ្យមន្ត្រីនៃរដ្ឋបាលរបស់លោកដកខ្លួនចេញពីភ្នាក់ងារនៃអង្គការសហប្រជាជាតិយ៉ាងហោចណាស់ចំនួន៤ ដែលបង្កការរំជើបរំជួលយ៉ាងខ្លាំងក្នុងសកលលោក ហើយការដកខ្លួនទំនងមានច្រើនទៀតក្រោមរដ្ឋបាលលោក។

ប្រធានាធិបតីសហរដ្ឋអាមេរិក ដូណាល់ ត្រាំ នៃគណបក្សសាធារណៈរដ្ឋ បានចុះហត្ថលេខាលើបទបញ្ជាប្រតិបត្តិ (Executive Order) ក្រោយគ្រងតំណែងកៅអីសេតវិមាន។ Reuters

រដ្ឋបាលសហរដ្ឋអាមេរិកហាក់មើលឃើញខុសគ្នាចំពោះឥទ្ធិពលរបស់ពួកគេក្នុងពិភពលោកតាមរយៈការសម្រេចចិត្តរបស់ដ្ឋបាលនិមួយៗ។ រដ្ឋបាលដឹកនាំដោយលោក ដូណាល់ ត្រាំ នៃគណបក្សសាធារណៈរដ្ឋ បានមើលឃើញភ្នាក់ងារអន្តរជាតិមួយចំនួនជាសត្រូវរបស់សហរដ្ឋអាមេរិក ប៉ុន្តែរដ្ឋបាលដឹកនាំដោយគណបក្សប្រជាធិបតេយ្យវិញ មើលឃើញថា ការដកខ្លួនរបស់អាមេរិកចេញពីភ្នាក់ងារនៃអង្គការសហប្រជាជាតិធ្វើឲ្យឥទ្ធិពលនៃប្រទេសមហាអំណាចដែលជាគូប្រជែងកើនឡើងខ្លាំងទៅវិញ។

រហូតដល់ពេលនេះ ថ្វីត្បិតតែសហរដ្ឋអាមេរិកមិនទាន់ដកខ្លួនចេញពីទីភ្នាក់ងារទាំងអស់របស់ស្ថាប័នពហុភាគីនៃរបស់អន្តជាតិ និងអង្គការសហប្រជាជាតិ ប៉ុន្តែរដ្ឋបាលរបស់លោកដូណាល់ ត្រាំ បានដកខ្លួនចេញពីអង្គការអន្តរជាតិមួយចំនួនរួចទៅហើយ និងកិច្ចព្រមព្រៀងសំខាន់ៗមួយចំនួនដែលពាក់ព័ន្ធជាមួយអង្គការសហប្រជាជាតិ។

អង្គការសុខភាពពិភពលោក (WHO)៖ លោក ដូណាល់ ត្រាំ នៅចុងអាណត្តិទី១របស់គាត់ ពោលគឺនៅឆ្នាំ២០២០ បានប្រកាសដកសហរដ្ឋអាមេរិកពី WHO ដោយបានចោទប្រកាន់អង្គការអន្តរជាតិមួយនេះថា លម្អៀងទៅរកចិនចំពោះការគ្រប់គ្រងស្ថានភាពការរីករាលដាលជំងឺកូវីដ១៩ និងលាក់បាំងពីប្រភពនៃវីរុសឆ្លងដែលលោកចោទថា មានប្រភពចេញពីប្រទេសចិន ប៉ុន្តែអង្គការនេះបរាជ័យក្នុងការអះអាងដូចអ្វីដែលអាមេរិកចង់បាន។ ក៏ប៉ុន្តែ ក្រោយលោកចាញ់ឆ្នោតក្នុងឆ្នាំខែវិច្ឆិកាឆ្នាំ២០២០ និងត្រូវផ្ទេរអំណាចទៅឲ្យលោក ចូ បៃដិន ថ្ងៃទី២០ខែមករាឆ្នាំ២០២១ លោកប្រធានាធិបតី ចូ បៃដិន បានបដិសេធការសម្រេចចិត្តរបស់លោកដូណាល់ ដោយបញ្ចូលអាមេរិកទៅអង្គការនេះវិញក្រោយលោកចូលកាន់តំណែង។
ក្រុមប្រឹក្សាសិទ្ធិមនុស្សរបស់អង្គការសហប្រជាជាតិ (UNHRC) – លោក ដូណាល់ ត្រាំ បានប្រកាសដកសហរដ្ឋអាមេរិកបានចាកចេញស្ថាប័ននេះនៅឆ្នាំ២០១៨ក្នុងពាក់កណ្តាលអាណត្តិទី១របស់គាត់ ដោយរិះគន់ក្រុមប្រឹក្សានេះថាលម្អៀងប្រឆាំងនឹងអ៊ីស្រាអែល និងអនុញ្ញាតឱ្យមានការរំលោភសិទ្ធិមនុស្សក្នុងរដ្ឋជាសមាជិក ក៏ដូចជា ក្នុងប្រទេសចិន វ៉េណេហ្ស៊ុយអេឡា និង គុយបា ជាដើម។ ប៉ុន្តែរដ្ឋបាលរបស់ប្រធានាធិបតី ចូ បៃដិន ក្រោយចូលកាន់អំណាចភ្លាមៗ បានបញ្ចូលអាមេរិកជារដ្ឋអង្កេតការណ៍ ក្នុងខែកុម្ភៈឆ្នាំ២០២១ និងក្លាយជាសមាជិកពេញសិទ្ធិវិញក្នុងខែមករាឆ្នាំ២០២២ ដោយសំអាងថា អាមេរិកគួរតែមានសំឡេងក្នុងការជជែកអំពីសិទ្ធិមនុស្សជាសកល។ រដ្ឋបាលរបស់លោក ចូ បៃដិន យល់ថា ទំនាក់ទំនង UNHRC នឹងធ្វើឲ្យសហរដ្ឋអាមេរិកជំរុញឲ្យមានកំណែទម្រង់ក្នុងបញ្ហាសិទ្ធិមនុស្ស ប្រសើរជាជាងចាកចេញ ដែលទុកឲ្យប្រទេសដែលមានប្រវត្តិរំលោភសិទ្ធិមនុស្សកាន់តែបានដៃ។ ទោះយ៉ាងណា ក្រោយទទួលបានអំណាចវិញ រឿងដែលលោកដូណាល់ ត្រាំ ធ្វើបន្ទាន់បំផុត គឺដកអាមេរិកចេញពីអង្គការអន្តរជាតិមួយនេះ។
អង្គការអប់រំ វិទ្យាសាស្ត្រ និងវប្បធម៌ របស់អង្គការសហប្រជាជាតិ (UNESCO)៖ រឿងរ៉ាវនៅអង្គការយូណេស្កូដែលមានមូលដ្ឋាននៅទីក្រុងប៉ារីស ហាក់ស្មុគស្មាញបន្តិចសម្រាប់សហរដ្ឋអាមេរិក។ ការចេញបញ្ជារបស់លោកដូណាល់ ត្រាំ រដ្ឋបាលរបស់លោកដកសិក្សាដកខ្លួនពីអង្គការនេះក្នុងរយៈពេល៩០ថ្ងៃហាក់ដូចជាកក្រើក និងរំជើបរំជួលក្នុងអាណត្តិថ្មីរបស់គាត់ ប៉ុន្តែលោកដូណាល់ត្រាំ បានធ្លាប់ទាញអាមេរិកចេញពីអង្គការនេះកាលពីខែមករាឆ្នាំ២០១៩ម្តងហើយ ដោយលើកឡើងពីភាពលំអៀងប្រឆាំងនឹងអ៊ីស្រាអែល និងការគ្រប់គ្រងមិនត្រឹមត្រូវ។ ប៉ុន្តែបើសិក្សាតាមប្រវត្តិ ប្រធានាធិបតីអាមេរិកមុនៗ ក៏ធ្លាប់អនុវត្តបែបនេះដែរ ដូចជា អតីតប្រធានាធិបតី Ronald Reagan ដែលបានប្រកាសដកអាមេរិកចេញនៅក្នុងឆ្នាំ១៩៨៤ ដោយចោទថា អង្គការនេះថា គ្រប់គ្រងមិនត្រឹមត្រូវ និងលម្អៀងប្រឆាំងនិងបស្ចឹមប្រទេស ប៉ុន្តែអតីតប្រធានាធិបតី George W. Bush បានបញ្ចូលអាមេរិកជាសមាជិកវិញនៅឆ្នាំ២០០៣។ សហរដ្ឋអាមេរិកឈប់បង់វិភាគទានដល់អង្គការនេះតាំងពីឆ្នាំ២០១១ ពេលដែលអង្គការនេះទទួលស្គាល់និងបញ្ចូលប៉ាឡេស្ទីនជារដ្ឋសមាជិកពេញសិទ្ធិ។ រហូតដល់ពេលនេះអាមេរិកនៅជំពាក់អង្គការយូណេស្កូជាង៦០០លានដុល្លារទៀត។ ទោះយ៉ាងណា រដ្ឋបាល ចូ បៃដិន បានបញ្ចូលអាមេរិកជាសមាជិកវិញនៅឆ្នាំ២០២៣ ដោយលើកឡើងពីកង្វល់ដែលចិនមានឥទ្ធិពលខ្លាំងលើអង្គការនេះ។
កិច្ចព្រមព្រៀងអាកាសធាតុទីក្រុងប៉ារីស (Paris Climate Agreement)៖ ទោះបីជាមិនមែនជាទីភ្នាក់ងាររបស់អង្គការសហប្រជាជាតិក៏ដោយ ប៉ុន្តែកិច្ចព្រមព្រៀងនេះត្រូវបានគាំទ្រដោយអង្គការសហប្រជាជាតិ។ លោក ដូណាល់ ត្រាំ បានដកសហរដ្ឋអាមេរិកនៅឆ្នាំ ២០១៧ ដោយលើកហេតុផលថាវាមិនយុត្តិធម៌ចំពោះអាជីវកម្មអាមេរិក។ ដោយចង់មានឥទ្ធិពលសហរដ្ឋអាមេរិកក្នុងសកលជាពិសេសសង្កត់មហាអំណាចចិនលើសកម្មភាពអភិវឌ្ឍប៉ះពាល់ដល់បរិស្ថាន ប្រធានាធិបតី ចូ បៃដិន បានចូលរួមវិញនៅឆ្នាំ ២០២១ ក្រោយឡើងកាន់កៅអីសេតវិមាន។

ខណៈពេលដែលលោក ដូណល់ ត្រាំ រិះគន់ស្ថាប័នអង្គការសហប្រជាជាតិ និងសកលលោក សហរដ្ឋអាមេរិកនៅតែជាសមាជិកនៃអង្គការសហប្រជាជាតិ និងទីភ្នាក់ងារជាច្រើនរបស់អង្គការសហប្រជាជាតិ រួមទាំងក្រុមប្រឹក្សាសន្តិសុខ និងមហាសន្និបាតផងដែរ។ រហូតមកទល់ពេលនេះ អាមេរិកនៅបន្តជាសមាជិកពេញសិទ្ធិនៅក្នុង

អង្គការសហប្រជាជាតិ (UN)
ក្រុមប្រឹក្សាសន្តិសុខអង្គការសហប្រជាជាតិ (UNSC)
មូលនិធិរូបិយវត្ថុអន្តរជាតិ (IMF)
ក្រុមធនាគារពិភពលោក (WB Group)
កម្មវិធីស្បៀងអាហារពិភពលោក (WFP)
ទីភ្នាក់ងារថាមពលបរមាណូអន្តរជាតិ (IAEA)
ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR)
អង្គការអាកាសចរណ៍ស៊ីវិលអន្តរជាតិ (ICAO)
មូលនិធិកុមាររបស់អង្គការសហប្រជាជាតិ (UNICEF)
អង្គការពាណិជ្ជកម្មពិភពលោក (WTO) ទោះបីជាវាមិនមែនជាទីភ្នាក់ងាររបស់អង្គការសហប្រជាជាតិក៏ដោយ វាត្រូវបានភ្ជាប់ទៅនឹងកិច្ចព្រមព្រៀងរបស់អង្គការសហប្រជាជាតិ៕

ដោយ រ៉ាន់ រើយ

The post ហេតុអ្វី ដូណាល់ ត្រាំ ជាសត្រូវរបស់ភ្នាក់ងារអន្តរជាតិចំនួន៤? appeared first on Kampuchea Thmey Daily.

នយោបាយអាមេរិក Archives - Kampuchea Thmey Daily

អត្រា​នៃ​ការ​គាំទ្រ​​ប្រធានាធិបតី ត្រាំ បន្ត​​ធ្លាក់ចុះទាប​បំផុត​ដល់៣៩%​

​​​ត្រាំ​​ចុះ​ហត្ថលេខា​លើក្រឹត្យ​​ដាក់​ដំណើរការ​​ច្បាប់ចំណាយ បើក​រដ្ឋាភិបាល​អាមេរិកពីថ្ងៃនេះ​​

ព្រឹទ្ធសភា​អាមេរិក​​បន្ត​​​រាំង​ខ្ទប់​​​ច្បាប់ចំណាយ​របស់​លោក ត្រាំ​ ដែលលុប​​​កញ្ចប់​សុខាភិបាល​

​[វិចារណ​កថា] តើជម្លោះ​រវាង​​ ដូណាល់ ត្រាំ និង​​ Elon Musk ជាអវសាន​នយោបាយត្រាំឬ?

​​រដ្ឋបាល​ត្រាំជូនដំណឹងពីការ​បិទ​​ការិយាល័យ​​ការពារហិរញ្ញវត្ថុ​​អ្នកប្រើប្រាស់​ (CFPB)

លោក ដូណាល់ ត្រាំ ផ្តាច់របប​ទទួលបាន​ព័ត៌មាន​សន្តិសុខ​ជាតិ​​របស់​អតីត​មន្ត្រី​កំពូលៗ​

ហេតុអ្វី​​ ដូណាល់ ​ត្រាំ ជាសត្រូវ​របស់​​ភ្នាក់ងារ​អន្តរជាតិ​​ចំនួន​៤​​?​

អត្រានៃការគាំទ្រប្រធានាធិបតី ត្រាំ បន្តធ្លាក់ចុះទាបបំផុតដល់៣៩%

ត្រាំចុះហត្ថលេខាលើក្រឹត្យដាក់ដំណើរការច្បាប់ចំណាយ បើករដ្ឋាភិបាលអាមេរិកពីថ្ងៃនេះ

ព្រឹទ្ធសភាអាមេរិកបន្តរាំងខ្ទប់ច្បាប់ចំណាយរបស់លោក ត្រាំ ដែលលុបកញ្ចប់សុខាភិបាល

[វិចារណកថា] តើជម្លោះរវាង ដូណាល់ ត្រាំ និង Elon Musk ជាអវសាននយោបាយត្រាំឬ?

រដ្ឋបាលត្រាំជូនដំណឹងពីការបិទការិយាល័យការពារហិរញ្ញវត្ថុអ្នកប្រើប្រាស់ (CFPB)

លោក ដូណាល់ ត្រាំ ផ្តាច់របបទទួលបានព័ត៌មានសន្តិសុខជាតិរបស់អតីតមន្ត្រីកំពូលៗ

ហេតុអ្វី ដូណាល់ ត្រាំ ជាសត្រូវរបស់ភ្នាក់ងារអន្តរជាតិចំនួន៤?