នាវាទាំង៣នោះមានដូចជា នាវាចម្បាំង Gromkiy អមជាមួយនាវាមុជទឹក Petropavlovsk-Kamchatsky និងនាវាសណ្តោង ​Andrey Stepanov។

តើនាវានីមួយៗមានលក្ខណៈពិសេសអ្វីខ្លះ?

នាវាចម្បាំង Gromkiy

យោងតាមគេហទំព័រ Naval Technology, Gromkiy គឺជានាវាចម្បាំងធុនស្រាលទំនើបបំផុតមួយរបស់កងទ័ពជើងទឹករុស្ស៊ី ស្ថិតក្នុងថ្នាក់ Steregushchiy។ វាត្រូវបានបង្កើតឡើងដើម្បីបំពេញបេសកកម្មនៅតំបន់សមុទ្រក្បែរឆ្នេរ (Littoral zone) និងមានសមត្ថភាពខ្ពស់ក្នុងការវាយលុកទាំងលើទឹក ក្រោមទឹកនិងលើអាកាស។

នាវានេះត្រូវបានសង់ឡើងដោយប្រើប្រាស់សម្ភារៈសមាសធាតុពិសេស ជាមួយរូបរាងដែលជួយកាត់បន្ថយការចាប់សញ្ញាពីរ៉ាដា ធ្វើឲ្យសត្រូវពិបាករកឃើញ។

Gromkiy មានបណ្តោយ១០៤.៥ ម៉ែត្រ, ទទឹង១៣ម៉ែត្រ និងមានទម្ងន់ផ្ទុកពេញ ប្រហែល ២ ២២០ តោន។ វាអាចផ្ទុកកងទ័ពបានប្រហែល ៩០ ទៅ ១០០ នាក់។

វាមានសមត្ថភាពរត់បានល្បឿនអតិបរមាប្រហែល៥០គីឡូម៉ែត្រ/ម៉ោង ដោយអាចធ្វើដំណើរបានចម្ងាយប្រហែល ៧ ៤០០គីឡូម៉ែត្រ (ក្នុងល្បឿនសន្សំសំចៃ)។

Gromkiy បំពាក់ដោយមីស៊ីលប្រឆាំងនាវា Kh-35 Uran ចំនួន៨គ្រាប់ ដែលមានរយៈចម្ងាយរហូតដល់២៦០គីឡូម៉ែត្រ។ វាមានប្រព័ន្ធការពារអាកាស Redut VLS (១២ បំពង់បាញ់) ដែលអាចបាញ់មីស៊ីលរយៈចម្ងាយមធ្យម និងជិត ដើម្បីកម្ទេចយន្តហោះ ឬមីស៊ីលសត្រូវ។

វាថែមទាំងបំពាក់កាំភ្លើងស្វ័យប្រវត្តិក្បាលនាវាប្រភេទ A-190 ទំហំ ១០០មិល្លីម៉ែត្រ ដែលអាចបាញ់បាន ៨០ គ្រាប់ក្នុងមួយនាទី និងកាំភ្លើងយន្តហោះ AK-630M ចំនួន ២ ដើម សម្រាប់បាញ់កម្ទេចគោលដៅដែលមកក្បែរនាវា ព្រមទាំងប្រព័ន្ធតូរពីដូ (Torpedo) ប្រភេទ Paket-NK ដែលអាចប្រើសម្រាប់កម្ទេចទាំងនាវាមុជទឹក និងការពារពីតូរពីដូរបស់សត្រូវ ផងដែរ។

លើសពីនេះ នាវាចម្បាំងនេះ មានចំណតសម្រាប់ឧទ្ធម្ភាគចក្រ Ka-27 មួយគ្រឿងចុះចត សម្រាប់ជួយក្នុងការរុករក និងវាយប្រហារនាវាមុជទឹកផងដែរ។

នាវាមុជទឹក Petropavlovsk-Kamchatsky

យោងតាមគេហទំព័រ Weapon Systems, នាវាមុជទឹក Petropavlovsk-Kamchatsky ស្ថិតក្នុងថ្នាក់ Improved Kilo ដែលអង្គការណាតូ ដាក់រហស្សនាមឲ្យថា «Black Hole» ព្រោះតែវាមានសមត្ថភាពធ្វើចលនាក្រោមទឹកដោយស្ងាត់បំផុត រហូតដល់រ៉ាដាសត្រូវពិបាកនឹងរកឃើញ។

ជាមួយនឹងប្រវែង ៧៤ម៉ែត្រនិងល្បឿន ៣៧.០៤ គីឡូម៉ែត្រ/ម៉ោង, Petropavlovsk-Kamchatsky ដើរដោយម៉ាស៊ីនម៉ាស៊ូត-អគ្គិសនី (Diesel-Electric) មានទម្ងន់ផ្ទុក ២ ៣៥០ តោន (លើទឹក) និង ៣ ៩៥០ តោន (ក្រោមទឹក), មុជបានជម្រៅអតិបរមា ៣០០ ម៉ែត្រ អាចស្ថិតនៅក្រោមទឹកបាន ៤៥ ថ្ងៃជាប់គ្នា ដោយមិនបាច់ឡើងមកលើ។

ចំណុចដែលធ្វើឲ្យ Petropavlovsk-Kamchatsky ខុសពីនាវាមុជទឹក Kilo-class ជំនាន់ចាស់ គឺការបំពាក់អាវុធទំនើបៗជាង។ នាវាមុជទឹកនេះ បំពាក់ដោយមីស៊ីល Kalibr-PL បាញ់ចេញពីបំពង់តូរពីដូ។ មីស៊ីលនេះអាចវាយប្រហារគោលដៅលើដីគោកបានចម្ងាយរហូតដល់ ២ ៥០០ គីឡូម៉ែត្រ។ មិនត្រឹមប៉ុណ្ណឹង វាក៏អាចដឹកមីនសមុទ្របានចំនួន ២៤ គ្រាប់ផងដែរ។

នាវាសណ្តោង Andrey Stepanov

យោងតាមប្រភពពីគេហទំព័រ Marine Traffic, Andrey Stepanov គឺជាប្រភេទនាវាជំនួយពហុបំណងទំនើបបំផុតមួយរបស់កងទ័ពជើងទឹករុស្ស៊ី ស្ថិតក្នុងគម្រោង Project 23470។ វាត្រូវបានរចនាឡើងមិនត្រឹមតែសម្រាប់សណ្តោងនាវាប៉ុណ្ណោះទេ ប៉ុន្តែទាំងសម្រាប់បេសកកម្មសង្គ្រោះ និងផ្គត់ផ្គង់នៅមហាសមុទ្រឆ្ងាយៗផងដែរ។

វាមានបណ្តោយ ៦៩.៧ ម៉ែត្រ, ទទឹង ១៥ ម៉ែត្រ, ល្បឿនអតិបរមាប្រហែល ២៦ គីឡូម៉ែត្រ/ម៉ោង ជាមួយរយៈចម្ងាយប្រតិបត្តិការប្រហែល ១៤ ៨០០ គីឡូម៉ែត្រ។

Andrey Stepanov មានទម្ងន់ផ្ទុកប្រហែល ៣ ២០០ តោន អាចប្រតិបត្តិការនៅកណ្ដាលសមុទ្របាន ៣០ ថ្ងៃ ជាប់ៗគ្នា។

នាវានេះត្រូវបានបំពាក់ដោយបច្ចេកវិទ្យាសម្រាប់បេសកកម្មចម្រុះដូចជាសំបកនាវាប្រភេទ Arc4 ដែលអនុញ្ញាតឲ្យវាធ្វើដំណើរឆ្លងកាត់ទឹកកកដែលមានកម្រាស់រហូតដល់ ០.៦ ម៉ែត្រ (ស័ក្តិសមសម្រាប់តំបន់ប៉ូល)។

វាបំពាក់ដោយកាំភ្លើងបាញ់ទឹកកម្លាំងខ្លាំង សម្រាប់ជួយពន្លត់អគ្គិភ័យលើនាវាផ្សេងទៀត និងមានឧបករណ៍បូមទឹកចេញពីនាវាដែលជិតលិច។ វាមានដងស្ទូចធំនៅផ្នែកខាងក្រោយដែលអាចលើកទម្ងន់បានរហូតដល់ ២០ តោន សម្រាប់លើកដាក់ទំនិញ ឬសម្ភារៈជួសជុល។

Andrey Stepanov មានទាំងទីលានចុះចតឧទ្ធម្ភាគចក្រនៅផ្នែកខាងក្រោយនាវា ដើម្បីដឹកអ្នករបួស ឬដឹកជញ្ជូនសម្ភារៈបន្ទាន់ផងដែរ៕

អត្ថបទ៖ សុខ សុវណ្ណ

The post លក្ខណៈពិសេសរបស់នាវារុស្ស៊ីទាំង៣គ្រឿង ដែលនឹងមកកម្ពុជា នៅចុងសប្តាហ៍នេះ appeared first on Kampuchea Thmey Daily.

ក្នុងសារបង្ហោះលើបណ្តាញសង្គម X នៅថ្ងៃព្រហស្បតិ៍ទី៥ខែមីនាឆ្នាំ២០២៦ រដ្ឋមន្ត្រីការបរទេសអ៊ីរ៉ង់ Abas Araghchi ចោទប្រកាន់ចំៗទៅអាមេរិកថា បានប្រព្រឹត្ត «អំពើឃោរឃៅ» តាមរយៈការបាញ់ពន្លិចនាវាចម្បាំងរបស់កងទ័ពជើងទឹកអ៊ីរ៉ង់នៅក្បែរឆ្នេរសមុទ្រស្រីលង្កា ហើយព្រមានខ្លាំងៗថា ទីក្រុងវ៉ាស៊ីនតោន នឹង «ស្តាយក្រោយបំផុត» ចំពោះការបង្កើតឲ្យមានបុទម្លាប់វាយប្រហារបែបនេះ។

លោកសរសេរថា៖ «សហរដ្ឋអាមេរិកបានប្រព្រឹត្តអំពើឃោរឃៅនៅលើលំហសមុទ្រ ដែលមានចម្ងាយរហូតដល់ទៅ ២ ០០០ ម៉ាយល៍ ពីឆ្នេររបស់ប្រទេសអ៊ីរ៉ង់។ នាវាចម្បាំង Dena ដែលជាភ្ញៀវរបស់កងទ័ពជើងទឹកឥណ្ឌា និងមានផ្ទុកនាវិកជិត ១៣០ នាក់ ត្រូវរងការវាយប្រហារនៅក្នុងដែនទឹកអន្តរជាតិទាំងគ្មានការព្រមានជាមុន។ ចាំសម្ដីខ្ញុំទុកចុះ! សហរដ្ឋអាមេរិកនឹងស្តាយក្រោយ ចំពោះរឿងដែលខ្លួនធ្វើនេះ»។

មុននេះ បញ្ជាការដ្ឋានកណ្តាលអាមេរិក (CENTCOM) បានបញ្ជាក់ពីការបាញ់ពន្លិចនាវាអ៊ីរ៉ង់ជាង២០គ្រឿង ក្នុងនោះរួមមានដូចជានាវាចម្បាំងខ្នាតធំ នាវាល្បាតល្បឿនលឿន និងនាវាដឹកជញ្ជូនភស្តុភារ។

ក្នុងនោះដែរ នាវា Iris Dena គឺជាការបាត់បង់ដ៏ធំបំផុតមួយ ដែលត្រូវបាននាវាមុជទឹកអាមេរិកបាញ់ពន្លិចដោយមីស៊ីល Torpedo ក្នុងមហាសមុទ្រឥណ្ឌា បណ្តាលឲ្យនាវិកយ៉ាង ៨៧ នាក់បាត់បង់ជីវិត។

នាវានេះត្រូវបាញ់ពន្លិចក្បែរឆ្នេរសមុទ្រស្រីលង្កា ដែលនេះបង្ហាញថា អាមេរិកកំពុងប្រើប្រាស់ប្រព័ន្ធស៊ើបការណ៍កម្រិតខ្ពស់ ដើម្បីតាមដាននិងកម្ទេចរាល់ទ្រព្យសម្បត្តិយោធាអ៊ីរ៉ង់ដែលព្យាយាមចាកចេញពីមូលដ្ឋាន ឬព្យាយាមបង្កើតសមរភូមិថ្មីនៅឆ្ងាយពីដែនទឹកខ្លួនឯង៕

អត្ថបទ៖ សុខ សុវណ្ណ

The post លោក Araghchi៖ «ចាំសម្តីខ្ញុំទុក! អាមេរិកនឹងស្តាយក្រោយដែលហ៊ានបាញ់ពន្លិចនាវាចម្បាំងអ៊ីរ៉ង់» appeared first on Kampuchea Thmey Daily.

តាមការផ្សាយរបស់ CBS News នៅថ្ងៃសុក្រទី១៣ខែកុម្ភៈឆ្នាំ២០២៦, ហេតុការណ៍នេះគឺពាក់ព័ន្ធជាមួយនាវាចម្បាំង USS Truxtun (DDG-103) បានបើកបុកជាមួយនាវា USNS Supply (T-AOE-6) ដែលមានតួនាទីដឹកជញ្ជូនស្បៀង យុទ្ធភណ្ឌ និងប្រេងឥន្ធនៈ។

លោកវរសេនីយ៍ឯក Emmanuel Ortiz នៃបញ្ជាការដ្ឋានភាគខាងត្បូង (SOUTHCOM) បានចេញសេចក្តីថ្លែងការណ៍ថា៖ នាវាទាំងពីរ បានបុកគ្នាក្នុងអំឡុងពេលផ្ទេរស្បៀង និងប្រេងនៅកណ្តាលសមុទ្រ។ បុគ្គលិកចំនួនពីរនាក់ ត្រូវរបួសស្រាល ហើយកំពុងទទួលការព្យាបាល ខណៈហេតុការណ៍នេះកំពុងស្ថិតក្រោមការស៊ើបអង្កេត។

ការផ្ទេរស្បៀងនិងប្រេងនៅកណ្តាលសមុទ្រគឺជាប្រតិបត្តិការដ៏គ្រោះថ្នាក់បំផុតមួយ ដែលទាមទារឲ្យនាវាពីរគ្រឿងបើកក្បែរគ្នាបំផុតជាមួយល្បឿនដូចគ្នា។

តាមរយៈវីដេអូដែលគេចែករំលែកលើបណ្ដាញសង្គម បង្ហាញឲ្យឃើញថា នាវា USS Truxtun បានបើកចូលទៅកៀកនាវា USNS Supply ក្នុងមុំមួយដែលចោទខ្លាំងពេក រហូតធ្វើឲ្យផ្នែកខាងមុខនៃនាវា ប៉ះកកិតយ៉ាងខ្លាំងជាមួយចំហៀងនាវាស្បៀង បង្កឲ្យមានសម្លេងកកិតលោហៈលាន់សន្ធឹក។

នាវាទាំងពីរនេះគឺជាផ្នែកមួយនៃការពង្រាយកម្លាំងយោធាទ្រង់ទ្រាយធំរបស់រដ្ឋបាលលោក ដូណាល់ ត្រាំ នៅសមុទ្រការ៉ាប៊ីន ដើម្បីបង្ក្រាបការរត់ពន្ធគ្រឿងញៀន និងតាមដានបណ្តាញឧក្រិដ្ឋកម្មឆ្លងដែន។

ដ្បិតការបុកគ្នារវាងនាវាចម្បាំងអាមេរិកគឺជាករណីកម្រក៏ដោយ ប៉ុន្តែធ្លាប់មានហេតុការណ៍ដែលបណ្តាលឲ្យមនុស្សស្លាប់ជាច្រើនករណីរួចមកហើយ។ ដូចជាកាលពីខែមិថុនា ឆ្នាំ២០១៧, នាវាចម្បាំង USS Fitzgerald បានបុកគ្នាជាមួយនាវាដឹកកុងតឺន័រ ACX Crystal នៅចម្ងាយប្រហែល ១៤៤ គីឡូម៉ែត្រ ពីឆ្នេរសមុទ្រនៃប្រទេសជប៉ុន ដែលបណ្តាលឲ្យនាវិកកងទ័ពជើងទឹកអាមេរិក ៧ នាក់បាត់បង់ជីវិត និង ៣ នាក់ទៀតរងរបួស។

ពីរខែក្រោយមក នាវាដឹកប្រេង Alnic MC បានបុកជាមួយនាវាចម្បាំង USS John S. McCain នៅច្រកសមុទ្រម៉ាឡាកា ក្បែរប្រទេសសិង្ហបុរី។ គ្រោះថ្នាក់នេះបានសម្លាប់នាវិកចំនួន ១០ នាក់នៅលើនាវា USS John S. McCain ហើយនាវាចម្បាំងអាមេរិកមួយនេះ ក៏បានរងការធ្លាយប្រហោងយ៉ាងធំនៅផ្នែកខាងឆ្វេងនៃតួនាវាផងដែរ៕

អត្ថបទ៖ សុខ សុវណ្ណ

The post នាវាកងទ័ពជើងទឹកអាមេរិក២គ្រឿង បុកគ្នាក្នុងសមុទ្រការ៉ាប៊ីន appeared first on Kampuchea Thmey Daily.

យោងតាមប្រភពព័ត៌មានក្នុងស្រុក នាវានេះនឹងចូលសំចតនៅកម្ពុជា ចាប់ពីថ្ងៃទី២៤ដល់២៨ខែមករា ដោយនាំមកជាមួយនូវនាវិក១០០នាក់ ដឹកនាំដោយមេបញ្ជាការ Andrew J. Rigem។

ដូចនេះតើ USS CINCINNATI មានលក្ខណពិសេសអ្វីខ្លះ?

គេហទំព័រ US Carriers ផ្សាយថា USS CINCINNATI មានទម្ងន់ប្រហែល ៣ ០០០តោន ជាមួយប្រវែង១៣០ម៉ែត្រ និងទទឹង៣១.៦ម៉ែត្រ ដែលធ្វើឲ្យផ្ទៃនាវាធំទូលាយសម្រាប់ចុះចតឧទ្ធម្ភាគចក្របាន។

USS CINCINNATI អាចធ្វើដំណើរក្នុងល្បឿនប្រហែល ៧៤ គីឡូម៉ែត្រក្នុងមួយម៉ោង ដោយប្រើប្រាស់ម៉ាស៊ីន Waterjet ចំនួន៤គ្រឿង ជួយឲ្យវាមានភាពបត់បែននិងរក្សាលំនឹងបានល្អទោះនៅក្នុងផ្ទៃទឹកមានរលកធំៗ។

នាវានេះ ត្រូវបានរចនាឡើងតាមប្រព័ន្ធ «ម៉ូឌុល» ដែលមានន័យថា វាអាចប្តូរគ្រឿងបំពាក់ទៅតាមបេសកកម្មនានា។ វាអាចបំពាក់កាំភ្លើង Mk 110 ៥៧មិល្លីម៉ែត្រនៅផ្នែកខាងមុខ ដែលអាចបាញ់បាន ២២០គ្រាប់ក្នុងពេលត្រឹមមួយនាទី។

លើសពីនេះ USS CINCINNATI បំពាក់ជាមួយមីស៊ីល Rolling Airframe Missile (RAM) សម្រាប់បាញ់ស្ទាក់មីស៊ីល ឬយន្តហោះសត្រូវ។ វាក៏អាចបំពាក់ផងដែរនូវ Naval Strike Missile (NSM) ដែលជាមីស៊ីលបាញ់ចេញពីផ្ទៃទឹកទៅផ្ទៃទឹកកម្រិតខ្ពស់។

អ្វីដែលកាន់តែអស្ចារ្យជាងនេះទៅទៀតនោះគឺ USS CINCINNATI អាចផ្ទុកឧទ្ធម្ភាគចក្រ MH-60R/S Seahawk ចំនួន ២ គ្រឿង ឬដ្រូន MQ-8 Fire Scout បានផងដែរ។

សូមជម្រាបថា នាវា USS Cincinnati កំពុងត្រូវបានដាក់ពង្រាយនៅក្នុងតំបន់ឥណ្ឌូប៉ាស៊ីហ្វិក ដើម្បីចូលរួមក្នុងសមយុទ្ធយោធានិងការល្បាត «សេរីភាពនៃការធ្វើនាវាចរណ៍»៕

អត្ថបទ៖ សុខ សុវណ្ណ

The post មកដឹងលក្ខណៈពិសេសរបស់នាវាចម្បាំងអាមេរិក USS CINCINNATI ដែលចូលសំចត នៅកំពង់ផែរាម appeared first on Kampuchea Thmey Daily.

Victory ជានាវាថ្មីដំបូងក្នុងចំណោមនាវាថ្មី ៦ គ្រឿងដែលនឹងជំនួសនាវាចាស់ៗរបស់ប្រទេសសិង្ហបុរីដែលបានប្រើប្រាស់តាំងពីឆ្នាំ ១៩៨៩មកម្លេះ។ នាវាថ្មីទាំងនេះកាន់តែទំនើប និងមានសមត្ថភាពជាងមុន។ ចំពោះនាវាចំនួន ៥ ដែលនៅសល់ត្រូវបានព្យាការណ៍ថានឹងចូលរួមជាមួយកងទ័ពជើងទឹកសិង្ហបុរីបណ្តើរៗចាប់ពីឆ្នាំ ២០២៨ តទៅ ។

វាគឺជានាវាចម្បាំងពិសេស ត្រូវបានរចនាឡើងជា «Mothership» សម្រាប់គ្រប់គ្រងយន្តហោះគ្មានមនុស្សបើកសម្រាប់បេសកកម្មតាមអាកាស ទូកគ្មានមនុស្សបើកសម្រាប់ល្បាតសមុទ្រ និងដ្រូនបើកនៅក្រោមទឹកសម្រាប់ស្វែងរកនាវាមុជទឹក ឬគ្រាប់បែក។ វាមានកន្លែងផ្ទុក និងកន្លែងសាកថ្មសម្រាប់ប្រតិបត្តិការយានជំនិះទាំងនេះ ហើយធ្វើឱ្យនាវានេះតែមួយអាចបំពេញបេសកកម្មដែលជាធម្មតាត្រូវការនាវាចម្បាំងជាច្រើនបាន។ នាវានេះនឹងធ្វើឱ្យប្រតិបត្តិការកងទ័ពជើងទឹកមានសុវត្ថិភាព និងមានប្រសិទ្ធភាពជាងមុន។

យោងតាមក្រសួងការពារជាតិ (MINDEF) វាគឺជានាវាចម្បាំងដ៏ធំ និងទំនើបបំផុតមិនធ្លាប់មាននៅក្នុងប្រទេសសិង្ហបុរី ដែលបង្កើតឡើងដើម្បីការពារផ្លូវសមុទ្រសំខាន់ៗនៅក្នុងសមុទ្រចិនខាងត្បូង និងច្រកសមុទ្រម៉ាឡាកា។ សាងសង់ឡើងដោយក្រុមបច្ចេកវិទ្យា ការពារជាតិ និងវិស្វកម្មសកល ST Engineering នាវានេះមានទម្ងន់ ៨ពាន់ តោន មានប្រវែង ១៥០ ម៉ែត្រ ហើយត្រូវបានរចនាឡើងឲ្យដំណើរការតាមប្រព័ន្ធបច្ចេកវិទ្យា។ បច្ចេកវិទ្យានេះបានជួយកាត់បន្ថយការចំណាយ សន្សំសំចៃសម្ភារៈ និងបង្កើនល្បឿននៃការសាងសង់។ បន្ទាប់ពីការបើកដំណើរការនៅឯរោងចក្រផលិតនាវា Benoi នោះ Victory នឹងត្រូវផ្លាស់ប្តូរទៅកាន់ Gul Yard ដើម្បីសាកល្បងលើសមុទ្របន្ថែមទៀត។

Victory អាចធ្វើដំណើរបានជាង ១ ម៉ឺន៣ពាន់គីឡូម៉ែត្រ និងដំណើរការបានលើសពី ២១ ថ្ងៃដោយមិនចាក់ប្រេង ហើយផ្លាស់ទីក្នុងល្បឿនលើស ៤១ គីឡូម៉ែត្រក្នុងមួយម៉ោង។ វាផ្ទុកសព្វាវុធទំនើបៗដូចជាកាំភ្លើង Strales 76mm និងមីស៊ីល ASTER ដែលអនុញ្ញាតឱ្យវាគ្រប់គ្រងបេសកកម្មប្រយុទ្ធដ៏លំបាក និងបញ្ជានាវាផ្សេងទៀត។ នាវាថ្មីនេះត្រូវការសមាជិកនាវិកតិចជាងមុន ហើយវាអាចផ្លាស់ប្តូរបានយ៉ាងឆាប់រហ័សសម្រាប់ការប្រើប្រាស់ផ្សេងទៀត ដូចជាជំនួយសង្គ្រោះគ្រោះមហន្តរាយ ឬជំនួយមនុស្សធម៌ផងដែរ។

នៅក្នុងពិធីសាកល្បង រដ្ឋមន្ត្រីការពារជាតិសិង្ហបុរី លោក Chan Chun Sing ថាការដំណើរការនាវាដ៏ធំសម្បើមនេះ បង្ហាញពីការរៀបចំមធ្យោបាយរបស់កងទ័ពជើងទឹកដើម្បីដោះស្រាយបញ្ហាប្រឈមស្មុគស្មាញរបស់កងទ័ព។ លោកបានបន្ថែមថា MRCV នឹងត្រូវបានអភិវឌ្ឍតាមពេលវេលា ដើម្បីបំពេញតម្រូវការនាពេលអនាគត។

ជាមួយគ្នានេះ លោកវរសេនីយ៍ទោ Karl Su មេបញ្ជាការទីមួយរបស់នាវាបានហៅនាវានេះថា «ទីក្រុងតូចមួយ» ព្រោះមានរោងចក្រថាមពល និងមជ្ឈមណ្ឌលទិន្នន័យផ្ទាល់ខ្លួន ហើយ​អាច​ផលិត​ថាមពល​បាន ៣០ មេហ្គាវ៉ាត់ ដែលអាច​ផ្គត់ផ្គង់​ផ្ទះ​ជាង ៥ ម៉ឺន​ខ្នងឯណោះ៕

អត្ថបទ៖ ប៊ុន សុភាព

The post សិង្ហបុរី បញ្ចេញនាវាចម្បាំងពហុមុខងារដ៏ធំដំបូងបង្អស់របស់ខ្លួន appeared first on Kampuchea Thmey Daily.

នាវាកងទ័ពជើងទឹកចិនចំនួន២គ្រឿង ដែលចូលសំចតនៅកំពង់ផែស្វយ័តក្រុងព្រះសីហនុនោះ គឺនាវា Qi Jiguang (PLAN 83) និងនាវា Yi Mengshan (PLAN 988) ដើម្បីធ្វើទស្សនកិច្ចនៅកម្ពុជា រយៈពេល៥ថ្ងៃ ចាប់ពីថ្ងៃទី១០ ដល់ថ្ងៃទី១៤ ខែតុលា ឆ្នាំ២០២៥។

លក្ខណៈ​បច្ចេកទេសរបស់​នាវា QI JIGUANG (PLANS 83) គឺជាប្រភេទនាវាហ្វឹកហ្វឺន មានទម្ងន់ផ្ទុក ៩ ០០០តោន បណ្ដោយ ១៦៥.៣ម៉ែត្រ ទទឹង ២២.២ម៉ែត្រ ​ជម្រៅ​ទឹក ៦.៨ម៉ែត្រ។ ខណៈនាវាឈ្មោះ YIMENG SHAN (PLANS 988) ជាប្រភេទនាវាបុកច្រាំងដែលមានទម្ងន់ផ្ទុក ២៥ ០០០តោន បណ្ដោយ ២១០ម៉ែត្រ ទទឹង ២៨ម៉ែត្រ និងជម្រៅ​ទឹក ៧ម៉ែត្រ។ សរុបនាវឹកលើនាវាទាំងពីរនេះមានចំនួន១ ២០៧នាក់។

ដោយឡែកនាវារបស់កងទ័ពជើងទឹកអូស្រ្តាលី ដែលមានឈ្មោះថា HMAS Ballarat -FFH155 (Anzac Class FFH) ក៏បានចូលសំចតនៅកំពង់ផែស្វយ័តក្រុងព្រះសីហនុនេះដែរ ដឹកនាំដោយវរនាវីទោ Dean Uren ជាមេបញ្ជាការនាវា។ លក្ខណៈបច្ចេកទេសនៃនាវា HMAS Ballarat -FFH155 គឺមានទម្ងន់ផ្ទុក៣៩០០តោន បណ្ដោយ១១៨ម៉ែត្រ ប្រវែងទទឹង១៤.៨ម៉ែត្រ និងជម្រៅទឹក៦.៤ម៉ែត្រ។

នាវាយោធានេះនឹងធ្វើទស្សនកិច្ចនៅកម្ពុជា រយៈពេល៤ថ្ងៃ ចាប់ពីថ្ងៃទី១០ ដល់ថ្ងៃទី១៣ ខែតុលា ក្នុងគោលបំណងដើម្បីពង្រឹងកិច្ចសហប្រតិបត្តិការល្អ បង្កើនទំនាក់ទំនង និងរឹតចំណងមិត្តភាព សាមគ្គីភាពឱ្យកាន់តែល្អទ្វេឡើងថែមទៀតរវាងកម្ពុជា-អូស្ត្រាលី៕

អត្ថបទ៖ ធឿន វ៉ាន់សុង

The post នាវាទ័ពជើងទឹកចិន និងទ័ពជើងទឹកអូស្រ្តាលីចូលសំចតនៅដែនសមុទ្រកម្ពុជា appeared first on Kampuchea Thmey Daily.

តាមការផ្សាយរបស់ CNN នៅថ្ងៃពុធទី១ខែតុលាឆ្នាំ២០២៥, នាវានេះបានចាកចេញពីមូលដ្ឋាន Yokosuka កាលពីចុងសប្តាហ៍ ដោយនឹងត្រូវធ្វើដំណើរចម្ងាយ ​១០ ១០០គីឡូម៉ែត្រ ឆ្ពោះទៅកាន់មូលដ្ឋានទ័ពអាមេរិក​នៅទីក្រុង San Diego រដ្ឋកាលីហ្វ័រញ៉ា។

យ៉ាងណា នាវានេះនឹងបន្តនៅមូលដ្ឋានអាមេរិក រយៈពេល១ឆ្នាំសិន ដើម្បីធ្វើទំនើបកម្មនិងហ្វឹកហ្វឺនសម្រាប់ការប្រើប្រព័ន្ធមីស៊ីល Tomahawk ខណៈការសាលល្បងបាញ់គ្រាប់ពិត គ្រោងធ្វើឡើងនៅរដូវក្តៅឆ្នាំ២០២៦។

JS Chokai បានក្លាយជានាវាចម្បាំងជប៉ុនដំបូងបង្អស់ដែលធ្វើដំណើរទៅអាមេរិកដើម្បីបំពាក់មីស៊ីល Tomahawk ហើយកាលណា គ្រប់យ៉ាងធ្វើរួចរាល់ហើយនោះ វានឹងមានសមត្ថភាពវាយប្រហារបានចម្ងាយ១ ៦០០គីឡូម៉ែត្រ អាចបាញ់ចូលជ្រៅក្នុងដីចិនឬកូរ៉េខាងជើងបាន។

សូមជម្រាបថា រឿងនេះកើតឡើងបន្ទាប់ពីជប៉ុន សម្រេចកិច្ចព្រមព្រៀងទិញមីស៊ីល Tomahawk ៤០០ គ្រាប់ក្នុងទំហំទឹកប្រាក់១.៧ពាន់លានដុល្លារពីសហរដ្ឋអាមេរិក។

ការទិញមីស៊ីលវាយប្រហារដីគោករយៈចម្ងាយឆ្ងាយទាំងនេះ គឺជារបត់គោលនយោបាយការពារជាតិដ៏សំខាន់របស់ប្រទេសជប៉ុន ដែលពីមុនមិនធ្លាប់ដាក់បញ្ចូលអាវុធវាយលុកប្រភេទនេះទេ។

យ៉ាងណាក្តី សកម្មភាពនេះត្រូវបានគេមើលឃើញយ៉ាងច្បាស់ថា គឺជាការឆ្លើយតបទៅនឹងបរិយាកាសសន្តិសុខកាន់តែឡើងកម្តៅខ្លាំងទៅៗ ដែលបង្កឡើងដោយទីក្រុងប៉េកាំងនិងព្យុងយ៉ាង៕

អត្ថបទ៖ សុខ សុវណ្ណ

ចុចអាន៖ ក្រសួងការពារជាតិអាមេរិក៖ នាវាចម្បាំងកងទ័ពអាមេរិកអាចនឹងចូលចតនៅមូលដ្ឋានសមុទ្ររាមចុងឆ្នាំនេះ  

The post នាវាចម្បាំង ជប៉ុន ទៅអាមេរិកដើម្បីបំពាក់មីស៊ីល Tomahawk ដែលអាចបាញ់ចូលជ្រៅក្នុងដីចិននិងកូរ៉េខាងជើង appeared first on Kampuchea Thmey Daily.

តាមការចុះផ្សាយរបស់ Vietnam Plus, នាវាចម្បាំង Frigate 016 – Quang Trung និងគណៈប្រតិភូកងទ័ពជើងទឹកវៀតណាមដឹកនាំដោយមេតំបន់យោធាជើងទឹក៤ Nguyen Vinh Nam បានចេញដំណើរពីកំពង់ផែយោធា Cam Ranh ក្នុងខេត្ត Khanh Hoa កាលពីរសៀលថ្ងៃអាទិត្យ។

តាមការអះអាងពីវៀតណាម, ការចូលរួមរបស់ខ្លួនក្នុងសមយុទ្ធ AMNEX 3 លើកនេះ គឺបង្ហាញពីការប្តេជ្ញាចិត្តក្នុងនាមជាសមាជិកនៃកិច្ចប្រជុំមេទ័ពជើងទឹកអាស៊ាន (ANCM) និងឆ្លើយតបទៅនឹងការអញ្ជើញរបស់កងនាវាចរម៉ាឡេស៊ី ដែលបង្ហាញពីការគាំទ្រចំពោះសកម្មភាពអន្តរជាតិពហុភាគី។

សូមជម្រាបថា Frigate 016 – Quang Trung គឺជាប្រភេទនាវាចម្បាំងទំនើបថ្នាក់ Gepard 3.9 ដែលត្រូវបានផលិតនៅប្រទេសរុស្ស៊ី ហើយកំពុងបម្រើការក្នុងកងទ័ពជើងទឹកវៀតណាម។ នាវានេះត្រូវបានគេចាត់ទុកថាជាផ្នែកមួយនៃនាវាចម្បាំងដ៏មានឥទ្ធិពលបំផុតនៅក្នុងកងទ័ពជើងទឹកវៀតណាម។

នាវានេះត្រូវបានបំពាក់ដោយប្រព័ន្ធអាវុធទំនើបៗជាច្រើនដូចជា៖ មីស៊ីលប្រឆាំងនាវា Uran-E (Kh-35) ចំនួន៨គ្រាប់ ដែលអាចបំផ្លាញនាវារហូតដល់ទម្ងន់ ៥ ០០០ តោន។ វាក៏បំពាក់ដោយកាំភ្លើងធំប្រភេទ AK-176MA ទំហំ ៧៦.២ ម.ម និងកាំភ្លើងយន្តការពារខ្លួនរយៈចម្ងាយជិត AK-630M ទំហំ ៣០ ម.ម ចំនួន២ដើមផងដែរ។

មិនត្រឹមប៉ុណ្ណឹង វាមានប្រព័ន្ធមីស៊ីលការពារអាកាសរយៈចម្ងាយខ្លី និងមធ្យម, មានជើងបាញ់មីស៊ីលប្រឆាំងនាវាមុជទឹក និងជើងបាញ់គ្រាប់បែកជម្រៅ (Torpedo Launchers)។

Frigate 016 – Quang Trung មានទម្ងន់ប្រហែល ២ ១០០ តោន (ផ្ទុកពេញ) និងមានប្រវែងប្រហែល ១០២ ម៉ែត្រ។ វាអាចធ្វើដំណើរល្បឿនប្រហែល ៥២ គីឡូម៉ែត្រក្នុងមួយម៉ោង និងអាចបំពេញបេសកកម្មនៅសមុទ្របានរហូតដល់ ២០ ថ្ងៃជាប់គ្នា៕

អត្ថបទ៖ សុខ សុវណ្ណ

ចុចអាន៖ ​វៀតណាម​បង្ហាញសម្ភារៈយោធាទំនើប​ៗ​ផលិត​ក្នុងស្រុក ក្នុងពិធីហាត់សម​​​ព្យុហយាត្រាយោធា​​​​

The post វៀតណាម បញ្ជូននាវាចម្បាំងទៅម៉ាឡេស៊ី ចូលរួមសមយុទ្ធជើងទឹកអាស៊ាន appeared first on Kampuchea Thmey Daily.