និវត្តជន Archives - Kampuchea Thmey Daily

និវត្តជន សម្ដែងក្ដីរីករាយ និងកាន់តែទទួលភាពកក់ក្ដៅខ្ពស់ ពេលបានជ្រកក្រោមដំបូលរួមជាមួយសមាគមអតីតយុទ្ធជន

អ៊ិន ពិសី — Fri, 26 Sep 2025 04:20:59 +0000

និវត្តជន កាន់តែមានអារម្មណ៍ទទួលបានភាពកក់ក្ដៅខ្ពស់ នៅពេលពួកគាត់បានទៅជ្រកក្រោមដំបូលរួមតែមួយជាមួយសមាគមអតីតយុទ្ធជនកម្ពុជា ឆាប់ៗ ខាងមុខ ពោល នាថ្ងៃទី ២៩ ខែកញ្ញា ឆ្នាំ ២០២៥ ដើមសប្ដាហ៍ក្រោយនេះ។

លោក ស៊ឹម ប៊ុនធឿន និវត្តជន ជាអតីតមន្ត្រីរាជការស៊ីវិលក្របខណ្ឌក្រសួងមហាផ្ទៃ នៅថ្នាក់មូលដ្ឋាន បានបង្ហាញនូវក្តីពេញចិត្ត និងថ្លែងអំណរគុណជាខ្លាំងចំពោះការគិតគូររបស់ សម្តេចតេជោ ហ៊ុន សែន ដោយចាត់ទុកការគិតគូររបស់ សម្តេច ថាជាការនៅមើលថែទាំយ៉ាងដិតដល់ចំពោះមន្ត្រីរាជការដែលមានអតីតភាព និងស្នាដៃក្នុងបុព្វហេតុជាតិមាតុភូមិ មិនព្រងើយកន្តើយនោះឡើយ។

សមាគមអតីតយុទ្ធជនកម្ពុជា បានកែប្រែលក្ខន្តិកៈថ្មីរបស់ខ្លួន រួមទាំងការប្ដូរឈ្មោះសមាគមអតីតយុទ្ធជនកម្ពុជា ទៅជាសមាគមអតីតយុទ្ធជន និងនិវត្តជនកម្ពុជា (អ.ន.ក)។ ការធ្វើវិសោធនកម្មលក្ខន្តិកៈថ្មីរបស់សមាគម ដើម្បីឱ្យសមាជិកជាអតីតយុទ្ធជន និងនិវត្តជនទាំងអស់ បានទទួលការយកចិត្តទុកដាក់ និងឧត្តមប្រយោជន៍កាន់តែល្អប្រសើរស្របតាមការណែនាំរបស់ សម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា ដែលបានស្នើដាក់បញ្ចូលទាំងអតីតយុទ្ធជន មន្ត្រីរាជការ គ្រូបង្រៀន និងកងកម្លាំងប្រដាប់អាវុធគ្រប់ប្រភេទដែលចូលនិវត្តន៍។

គួរបញ្ជាក់ថា ការធ្វើវិសោធនកម្មលក្ខន្តិកៈពីសមាគមអតីតយុទ្ធជនកម្ពុជា ទៅជាសមាគមអតីតយុទ្ធជន និងនិវត្តជនកម្ពុជា (អ.ន.ក) បានកែសម្រួលមកនៅត្រឹម ១៦ ជំពូក និង ៤៤ ប្រការ។ លក្ខន្តិកៈថ្មីនេះ នឹងត្រូវសម្រេចអនុម័តដោយមហាសន្និបាតវិសាមញ្ញតំណាងសមាគមអតីតយុទ្ធជន និងនិវត្តជនកម្ពុជាទូទាំងប្រទេស នៅថ្ងៃទី ២៩ ខែកញ្ញា ឆ្នាំ ២០២៥ ខាងមុខនេះ ដែលនឹងធ្វើឡើងក្រោមអធិបតីភាពដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ធជនកម្ពុជា៕

អត្ថបទ ៖ សុភា

The post និវត្តជន សម្ដែងក្ដីរីករាយ និងកាន់តែទទួលភាពកក់ក្ដៅខ្ពស់ ពេលបានជ្រកក្រោមដំបូលរួមជាមួយសមាគមអតីតយុទ្ធជន appeared first on Kampuchea Thmey Daily.

ប្រាក់សោធនិវត្តន៍ទាបបំផុតត្រឹមខែមេសា ឆ្នាំ២០២៥ មានជាង៨០ម៉ឺនរៀល

hun sirivadh — Sat, 24 May 2025 08:15:19 +0000

រដ្ឋមន្ត្រីសង្គមកិច្ចលោក ជា សុមេធី ឱ្យដឹងថាប្រាប់សោធនិវត្តន៍ទាបបំផុតដល់មន្ត្រីចូលនិវត្តន៍ត្រឹមខែមេសា ឆ្នាំ២០២៥ មានចំនួន ៨៤៥ ០០០រៀលដែលស្មើប្រមាណ២១០ដុល្លារក្នុងមួយខែ នេះនៅមិនទាន់គិតដល់ប្រាក់របបសន្ដិសុខសង្គម និងការឧបត្ថម្ភសង្គមផ្សេងទៀតនោះទេ។

លោក ជា សុមេធី បានលើកឡើងក្នុងវេទិការផ្សព្វផ្សាយស្ដីពីប្រព័ន្ធគាំពារសង្គមនៅកម្ពុជាកាលពីថ្ងៃទី១៩ ខែឧសភា ឆ្នាំ២០២៥ នៅអាគាររដ្ឋបាលសភាថ្មីថា ក្រៅពីប្រាក់សោធនិវត្តន៍ទាបបំផុតដែលមានប្រមាណជាង២០០ដុល្លារដល់មន្ត្រីចូលនិវត្តន៍នេះ រដ្ឋក៏មានបើកផ្ដល់តាមមូលនិធិជាតិជំនួយសង្គមលើរបបសន្តិសុខសង្គមចំនួន២លើកក្នុងមួយខែ រួមនឹងការផ្ដល់ប្រាក់ធានារ៉ាប់រងសង្គម និងប្រាក់បូជាសពក្នុងពេលមរណភាពដល់មន្ត្រីចូលនិវត្តន៍ផងដែរ។

លោកថា៖ «ការដាក់អនុវត្តន៍នូវរបបសន្តិសុខសង្គមនេះគឺជាការគិតគូរនិងឆ្លើយតបពីសំណាក់រាជរដ្ឋាភិបាលចំពោះគុណូបការៈរបស់អតីតមន្ត្រីរាជការស៊ីវិល និងអតីតយុទ្ធជន ដែលបានខិតខំប្រឹងប្រែងបំពេញការងារកន្លងមក ក៏ដូចជាធ្វើពលិកម្មបូជាសាច់ស្រស់ឈាមស្រស់ សម្រាប់បុព្វហេតុសង្គមជាតិ ក្នុងស្មារតីរួមចំណែកកសាង និងអភិវឌ្ឍនប្រទេសជាតិឱ្យមានភាពរីកចម្រើន និងមានសុខសន្តិភាពដូចសព្វថ្ងៃនេះ»។

បើតាមរដ្ឋមន្ត្រីសង្គមកិច្ចបច្ចុប្បន្នមានអតីតមន្ត្រីរាជការស៊ីវិលសរុបចំនួន ៥៦ ៤៧៥នាក់ និងអតីតយុទ្ធជនសរុបចំនួន ១១៥ ២៩៦នាក់។ ថ្មីៗនេះប្រធានព្រឹទ្ធសភា និងប្រធានសមាគមអតីយុទ្ធជនកម្ពុជា សម្ដេចតេជោ ហ៊ុន សែន ក៏បានផ្ដល់អនុសាសន៍ឱ្យធ្វើពង្រាងវិសោធនកម្មលក្ខន្តិកៈសមាគមអតីតយុទ្ធជន ឲ្យមានវិសាលភាពគ្របដណ្តប់ទៅលើនិវត្តជនទាំងអស់ដែលមានន័យថាទាំងមន្ត្រីរាជការស៊ីវិល និងប្រដាប់អាវុធ ក៏នឹងទទួលបានការគាំទ្រពីសមាគមបន្ថែមទៀតដែរ៕

អត្ថបទដោយ ហ៊ុន សិរីវឌ្ឍន៍

The post ប្រាក់សោធនិវត្តន៍ទាបបំផុតត្រឹមខែមេសា ឆ្នាំ២០២៥ មានជាង៨០ម៉ឺនរៀល appeared first on Kampuchea Thmey Daily.

សម្ដេចតេជោណែនាំឱ្យដាក់បញ្ចូលនិវត្តជនទាំងអស់ទៅក្នុងក្របខ័ណ្ឌសមាគមអតីតយុទ្ធជន

hun sirivadh — Thu, 22 May 2025 04:58:17 +0000

ប្រធានព្រឹទ្ធសភា និងជាប្រធានសមាគមអតីយុទ្ធជនកម្ពុជា សម្ដេចតេជោ ហ៊ុន សែន បានផ្ដល់អនុសាសន៍ឱ្យធ្វើពង្រាងវិសោធនកម្មលក្ខន្តិកៈ សមាគមអតីតយុទ្ធជន ឲ្យមានវិសាលភាពគ្របដណ្តប់ទៅលើនិវត្តជនទាំងអស់។

ការផ្ដល់អនុសាសន៍នេះធ្វើឡើងក្នុងកិច្ចប្រជុំការងារព័ត៌មានផ្សព្វផ្សាយរបស់ សមាគមអតីតយុទ្ធជនកម្ពុជានៅវិមាន៧មករា រាជធានីភ្នំពេញ នាព្រឹកថ្ងៃព្រហស្បតិ៍ ទី២២ ខែឧសភា ឆ្នាំ២០២៥នេះ។

អ្នកនាំពាក្យគណបក្សប្រជាជនលោក ជា ធីរិទ្ធ បានឱ្យអ្នកសារព័ត៌មានដឹងថាការកែប្រែលក្ខន្តិកៈនេះគឺជាការគិតគូរដល់និវត្តន៍ទាំងអស់ទាំងមន្ត្រីរាជការស៊ីវិល និងប្រដាប់អាវុធ ដើម្បីទទួលបានការជួយគាំទ្រ។ លោកក៏បានឱ្យដឹងដែរថាការកែប្រែនេះក៏អាចនឹងកែឈ្មោះសមាគមដើម្បីពង្រីកវិសាលភាពផងដែរ។

លោកថា៖ «ការធ្វើបែបនេះរបស់សម្ដេចតេជោក្នុងគោលដៅនៃដំណើរគ្រប់គ្រងលើនិវត្តន៍ជនទូទៅដោយមិនទុកពួកគាត់ចោលដោយយកចិត្តទុកដាក់ជ្រោមជ្រែង ឧបត្ថម្ភ តាមការពិនិត្យជាក់ស្ដែងដោយមិនគិតតែលើអតីតយុទ្ធជននោះទេ»។

ជាមួយគ្នានោះសម្ដេចក៏បញ្ជាឱ្យដាក់ដំណើរការនូវបណ្ដាញសង្គមរបស់សមាគមអតីតយុទ្ធជនកម្ពុជាដើម្បីផ្សព្វផ្សាយឱ្យបានផុលផុសជូនដល់ប្រជាពលរដ្ឋ។

សមាគមអតីតយុទ្ធជនកម្ពុជាត្រូវបានបង្កើតឆ្នាំ ២០០៧ ដើម្បីជួយលើកកម្ពស់ជីវភាពរបស់អតីតយុទ្ធជន និងគ្រួសាររបស់ពួកគេ។ ជារៀងរាល់ឆ្នាំនៅថ្ងៃទី២១ ខែមិថុនា កម្ពុជាតែងបានប្រារព្ធទិវាអតីតយុទ្ធជនដើម្បីរម្លឹកដឹងគុណដល់ការលះបង់របស់អតីតយុទ្ធជនចំពោះជាតិមាតុភូមិនេះដែរ៕

អត្ថបទដោយ ហ៊ុន សិរីវឌ្ឍន៍

The post សម្ដេចតេជោណែនាំឱ្យដាក់បញ្ចូលនិវត្តជនទាំងអស់ទៅក្នុងក្របខ័ណ្ឌសមាគមអតីតយុទ្ធជន appeared first on Kampuchea Thmey Daily.

និវត្តជន Archives - Kampuchea Thmey Daily

និវត្តជន សម្ដែងក្ដីរីករាយ និងកាន់តែទទួលភាពកក់ក្ដៅខ្ពស់ ពេលបានជ្រកក្រោមដំបូលរួមជាមួយសមាគមអតីតយុទ្ធជន

ប្រាក់សោធនិវត្តន៍ទាបបំផុតត្រឹមខែមេសា ឆ្នាំ២០២៥ មានជាង៨០ម៉ឺនរៀល

សម្ដេចតេជោណែនាំឱ្យដាក់បញ្ចូលនិវត្តជន​ទាំង​អស់ទៅ​ក្នុង​ក្របខ័ណ្ឌសមាគមអតីតយុទ្ធជន

សម្ដេចតេជោណែនាំឱ្យដាក់បញ្ចូលនិវត្តជនទាំងអស់ទៅក្នុងក្របខ័ណ្ឌសមាគមអតីតយុទ្ធជន