នុយក្លេអ៊ែរស៊ីវិល Archives - Kampuchea Thmey Daily

សន្និសញ្ញាមិនរីកសាយភាយអាវុធនុយក្លេអ៊ែរ (NPT) ប្រឈមរំលោភកាន់តែខ្លាំងក្លា

Minea Neu — Thu, 30 Apr 2026 13:30:00 +0000

គិតត្រឹមដើមឆ្នាំ២០២៦ សន្ធិសញ្ញាមិនរីកសាយភាយអាវុធនុយក្លេអ៊ែរ (NPT) ប្រឈមមុខនឹងភាពតានតឹងធ្ងន់ធ្ងរនៃការរំលោភបំពានដោយសារតែជម្លោះប្រដាប់អាវុធដ៏ខ្លាំងក្លាកំពុងបន្ត និងការបែកបាក់នៃជំនឿទុកចិត្តខាងភូមិសាស្ត្រនយោបាយ នាំឱ្យមានការព្រមានថាសន្ធិសញ្ញានេះស្ថិតក្រោមការរស់រានមានជីវិត ឬកំពុងរលាយបាត់។

យោងតាមភ្នាក់ងារសារព័ត៌មានរ៉យទ័រ និងគេហទំព័រ UN ផ្សាយចុងខែមេសា ឆ្នាំ២០២៦ ហានិភ័យនៃការរំលោភបំពានបានកើនឡើង ដោយសារតែការគំរាមកំហែងនៃការប្រើប្រាស់អាវុធនុយក្លេអ៊ែរក្នុងសង្គ្រាម ការដួលរលំនៃការគ្រប់គ្រងអាវុធទ្វេភាគី និងការលើកទឹកចិត្តកាន់តែខ្លាំងឡើងសម្រាប់រដ្ឋដែលមិនមាននុយក្លេអ៊ែរ ដើម្បីបន្តសមត្ថភាពបរមាណូ។

សម័យប្រជុំកំពូលរបស់អង្គការសហប្រជាជាតិ។ រូបភាព៖ Reuters

គួរបញ្ជាក់ថា សន្ធិសញ្ញាមិនរីករាលដាលអាវុធនុយក្លេអ៊ែរ (NPT) ពឹងផ្អែកលើគោលការណ៍ បី គឺការមិនរីកសាយភាយអាវុធ ការរំសាយអាវុធ និងការប្រើប្រាស់ថាមពលនុយក្លេអ៊ែរស៊ីវិល កំពុងត្រូវបានដាក់សម្ពាធតាមវិធីជាច្រើន៖

១. ការគំរាមកំហែងដោយផ្ទាល់ពីសង្គ្រាមក្នុងតំបន់

សង្គ្រាមនៅអ៊ុយក្រែន៖ ការឈ្លានពានរបស់រុស្ស៊ីបានរំលោភលើស្មារតីនៃ NPT ជាពិសេសនៅក្នុងពន្លឺនៃអនុស្សរណៈទីក្រុង Budapest ឆ្នាំ ១៩៩៤ ដែលរុស្ស៊ីបានប្តេជ្ញាគោរពសន្តិសុខរបស់អ៊ុយក្រែន បន្ទាប់ពីខ្លួនបានបោះបង់ចោលឃ្លាំងអាវុធនុយក្លេអ៊ែរ។

អស្ថិរភាពនៅមជ្ឈិមបូព៌ា៖ នៅឆ្នាំ២០២៦ សក្តានុពលសម្រាប់ជម្លោះដោយផ្ទាល់រវាងអ៊ីរ៉ង់និងអ៊ីស្រាអែលបង្កហានិភ័យដ៏ធំមួយ។ អ៊ីរ៉ង់បានខិតទៅជិតកម្រិតអាវុធនុយក្លេអ៊ែរ ដោយកម្រិតខ្ពស់បណ្តាលឱ្យមានការព្រួយបារម្ភយ៉ាងខ្លាំងពី «ការផ្ទុះឡើង» ដែលអាចកើតមាន។

ការពង្រីកឆ័ត្រនុយក្លេអ៊ែរ៖ ដើម្បីឆ្លើយតបទៅនឹងជម្លោះ ប្រទេសនៅអឺរ៉ុប ដូចជាបារាំងបានស្នើឱ្យពង្រីក ឆ័ត្រនុយក្លេអ៊ែររបស់ខ្លួនទៅកាន់សម្ព័ន្ធមិត្តអឺរ៉ុបកាន់តែច្រើន។

២. ការបំបែកការគ្រប់គ្រងអំណាចសំខាន់ៗឆ្នាំ២០២៦

ការផុតកំណត់នៃសន្ធិសញ្ញា New START៖ សន្ធិសញ្ញា New START រវាងសហរដ្ឋអាមេរិកនិងរុស្ស៊ី កំណត់ឃ្លាំងអាវុធនុយក្លេអ៊ែរធំជាងគេបំផុតរបស់ពិភពលោកបានផុតកំណត់នៅខែកុម្ភៈ ឆ្នាំ២០២៦។ ការដួលរលំនេះ ទំនងគ្មានការជំនួស នឹងលុបបំបាត់របាំងការពារដ៏សំខាន់ ដែលអនុញ្ញាតឱ្យមានការពង្រីកក្បាលគ្រាប់នុយក្លេអ៊ែរដោយគ្មានការត្រួតពិនិត្យ។

ទំនើបកម្ម និងការពង្រីក៖ រដ្ឋដែលមានអាវុធនុយក្លេអ៊ែរមិនត្រឹមតែមានទំនើបកម្មប៉ុណ្ណោះទេ ប៉ុន្តែក្នុងករណីខ្លះកំពុងពង្រីកឃ្លាំងអាវុធ ដោយប្រទេសចិនកំពុងបង្កើនសមត្ថភាពរបស់ខ្លួនយ៉ាងឆាប់រហ័ស។

ការរិចរិលនៃការផ្អាក៖ រុស្ស៊ី និងសហរដ្ឋអាមេរិកបានពិភាក្សាអំពីការបន្តការធ្វើតេស្តនុយក្លេអ៊ែរ ដោយគំរាមកំហែងដល់ការផ្អាករយៈពេល ៣០ឆ្នាំ។

៣. ហានិភ័យនៃការរីកសាយភាយអាវុធនុយក្លេអ៊ែរកើនឡើង និងការមិនពេញចិត្តចំពោះ NPT

ការកើនឡើងនៃការការពារសុវត្ថិភាពនុយក្លេអ៊ែរ៖ ការបរាជ័យនៃការធានាសន្តិសុខអន្តរជាតិ (ដូចនៅអ៊ុយក្រែន) ជំរុញឱ្យប្រទេសដូចជាកូរ៉េខាងត្បូង និងអារ៉ាប៊ីសាអូឌីត ជជែកវែកញែកយ៉ាងសកម្ម ឬឆ្ពោះទៅរកការទទួលបានសមត្ថភាពវដ្តឥន្ធនៈនុយក្លេអ៊ែរ។

ការឯកភាពគ្នាដ៏តានតឹង៖ សន្និសីទពិនិត្យឡើងវិញនៃ NPT ឆ្នាំ ២០២៦ កំពុងប្រព្រឹត្តទៅក្រោមភាពតានតឹងខ្លាំង ដោយប្រទេសជាច្រើន ជាពិសេសប្រទេសនៅភាគខាងត្បូង កំពុងសួរថាហេតុអ្វីបានជាពួកគេគួរតែប្រកាន់ខ្ជាប់នូវបទដ្ឋានមិនរីកសាយភាយអាវុធ ខណៈមហាអំណាចមិនអាចបំពេញកាតព្វកិច្ចរំសាយអាវុធរបស់ពួកគេផង។

៤. បញ្ហាប្រឈមផ្នែកបច្ចេកទេសនិងនយោបាយ

ការបញ្ចូលបច្ចេកវិទ្យាថ្មីៗនិងមិនអាចគ្រប់គ្រង៖ ការរួមបញ្ចូលគ្នានៃបញ្ញាសិប្បនិម្មិត (AI) និងបច្ចេកវិទ្យាល្បឿនលឿនជាងសំឡេង (Hypersonic) ធ្វើឱ្យ កាន់តែពិបាកក្នុងការបែងចែករវាងប្រព័ន្ធអាវុធធម្មតានិងអាវុធនុយក្លេអ៊ែរ បង្កើនហានិភ័យនៃការគណនាខុស អំឡុងពេលមានវិបត្តិ។

ការធ្វើអាវុធនីយកម្មថាមពលនុយក្លេអ៊ែរស៊ីវិល៖ តម្រូវការថាមពលនុយក្លេអ៊ែរកើនឡើង ផ្តល់ឱកាសសម្រាប់ប្រទេសនានាក្នុងការប្រើប្រាស់កម្មវិធីថាមពលស៊ីវិលជាគម្រប សម្រាប់ការកសាងសមត្ថភាព ដើម្បីផលិតសម្ភារៈកម្រិតអាវុធ៕

ប្រែសម្រួល៖ ណឺ មិនា

The post សន្និសញ្ញាមិនរីកសាយភាយអាវុធនុយក្លេអ៊ែរ (NPT) ប្រឈមរំលោភកាន់តែខ្លាំងក្លា appeared first on Kampuchea Thmey Daily.

រុស្ស៊ីផ្ដល់អាហារូបករណ៍៣កន្លែងសម្រាប់ជំនាញទាក់ទងនឹងនុយក្លេអ៊ែរស៊ីវិលដល់និស្សិតកម្ពុជា

hun sirivadh — Mon, 06 Jan 2025 10:34:45 +0000

រដ្ឋសហព័ន្ធរុស្ស៊ីបានសម្រេចផ្ដលអាហារូបករណ៍ចំនួន៤០កន្លែងដល់សិស្ស និស្សិតកម្ពុជា ទៅសិក្សាជំនាញឯកទេស បរិញ្ញាបត្រ បរិញ្ញាបត្រជាន់ខ្ពស់ និងបណ្ឌិតនៅប្រទេសរុស្ស៊ី។

ក្នុងសេចក្ដីជូនដំណឹងស្ដីពីការជ្រើសរើសនិស្សិតអាហារូបករណ៍ទៅសហព័ន្ធរុស្ស៊ី សម្រាបឆ្នាំសិក្សា ២០២៥-២០២៦ ក្រសួងអប់រំឱ្យដឹងថាក្នុងអាហារូបករណ៍៤០កន្លែងនោះ មាន១កន្លែងសម្រាប់ជំនាញទាក់ទងនឹងសិល្បៈ ៣កន្លែងទាក់ទងនឹងជំនាញនុយក្លេអ៊ែរស៊ីវិល និង៣៦កន្លែងទាក់ទងនឹងវេជ្ជសាស្ត្រ វិស្វកម្មយន្តហោះ មេកានិក ស្ថាបត្យកម្ម នីតិសាស្ត្រ កសិកម្មជាដើម។

បេក្ខជនដែលមានបំណងចូលរួមកម្មវិធីអាហារូបករណ៍នេះត្រូវចុះឈ្មោះតាមរយៈ https://education-in-russia.com រហូតដល់ថ្ងៃទី១៥ ខែមករា ឆ្នាំ២០២៥ ឬអាចទាក់ទងទៅកាន់មជ្ឈមណ្ឌលវិទ្យាសាស្ត្រ និងវប្បធម៌រុស្ស៊ីនៅមហាវិថីព្រះនរោត្តម ទល់មុខក្រុងអប់រំបាន៕

The post រុស្ស៊ីផ្ដល់អាហារូបករណ៍៣កន្លែងសម្រាប់ជំនាញទាក់ទងនឹងនុយក្លេអ៊ែរស៊ីវិលដល់និស្សិតកម្ពុជា appeared first on Kampuchea Thmey Daily.

អ្នកការទូតមហាអំណាចអឺរ៉ុបនិងអ៊ីរ៉ង់ជួបគ្នាលើកដំបូងថ្ងៃនេះ ដើម្បីស្ទង់ប្រតិកម្មពីលោក ត្រាំ

Rann Reuy — Fri, 29 Nov 2024 05:46:39 +0000

អ្នកការទូតអ៊ឺរ៉ុប និងអ៊ីរ៉ង់ជួបប្រជុំគ្នានៅថ្ងៃសុក្រនេះដើម្បីពិភាក្សាថាតើពួកគេអាចចូលរួមក្នុងកិច្ចពិភាក្សាស៊ីជម្រៅផ្សេងៗទៀតនៅក្នុងសប្តាហ៍ក្រោយៗនេះ ដើម្បីបន្ថយភាពតានតឹងនៅក្នុងតំបន់ រួមទាំងការពិភាក្សាជុំវិញកម្មវិធីនុយក្លេអ៊ែរដែលមានជម្លោះរបស់ទីក្រុងតេអេរ៉ង់ មុនពេលដែលលោក ដូណាល់ ត្រាំ វិលត្រឡប់ទៅកាន់សេតវិមាននៅដើមឆ្នាំ២០២៥។

អនុរដ្ឋមន្ត្រីការបរទេសអ៊ីរ៉ង់ និងអ្នកចរចានុយក្លេអ៊ែរជាន់ខ្ពស់ Majid Takhteravanchi។ tehrantimes

ការវិលត្រឡប់មកកាន់អំណាចរបស់លោក ដូណាល់ ត្រាំ នៅក្នុងអាណត្តិថ្មីខាងមុខនេះ បានធ្វើឲ្យពិភពលោកហាក់ប្រែប្រួលលើវិស័យការទូត ដែលមានទំនោរទៅរកដំណោះស្រាយលើបញ្ហាដែលជាប់គាំងនាំឲ្យពិភពលោកមានវិបត្តិសង្គ្រាម។ ប៉ុន្តែ កម្មវិធីនុយក្លេអ៊ែរអ៊ីរ៉ង់ដែលលោកដូណាល់ ត្រាំ ប្រកាសដកខ្លួនកាលឆ្នាំ២០១៨ គឺជាទំនោរមួយនាំឲ្យអ៊ីរ៉ង់ងាកទៅរករុស្ស៊ីកាន់តែខ្លាំង។

សេចក្តីរាយការណ៍លោកខាងលិច បានលើកឡើងថា កិច្ចប្រជុំការទូតអឺរ៉ុបនិងអ៊ីរ៉ង់ នៅទីក្រុងហ្សឺណែវនៃប្រទេសស្វីស ជាកន្លែងដែលមហាអំណាចពិភពលោក និងអ៊ីរ៉ង់បានសម្រេចដោយជោគជ័យលើកដំបូងក្នុងកិច្ចចរចានុយក្លេអ៊ែរកាលពីជាងមួយទសវត្សរ៍មុន មុនពេលឈានដល់កិច្ចព្រមព្រៀងក្នុងឆ្នាំ២០១៥។

អនុរដ្ឋមន្ត្រីការបរទេសអ៊ីរ៉ង់ និងអ្នកចរចានុយក្លេអ៊ែរជាន់ខ្ពស់ Majid Takhteravanchi ជួបជាមួយអ្នកការទូតកំពូលមកពីចក្រភពអង់គ្លេស អាល្លឺម៉ង់ និងបារាំង ដែលហៅថា E3 នៅថ្ងៃសុក្រ បន្ទាប់ពីបានជួបជាមួយប្រធានសម្របសម្រួលសហភាពអឺរ៉ុបកាលពីល្ងាចថ្ងៃព្រហស្បតិ៍។

កម្រិតនៃការមិនទុកចិត្តគ្នារវាងភាគីទាំងពីរត្រូវបានគូសបញ្ជាក់នៅពេលដែលប្រទេស E3 កាលពីថ្ងៃទី២១ខែវិច្ឆិកាបានជំរុញទៅមុខជាមួយនឹងដំណោះស្រាយប្រឆាំងនឹងអ៊ីរ៉ង់ដែលបានប្រគល់ភារកិច្ចឱ្យអង្គការឃ្លាំមើលបរមាណូរបស់អង្គការសហប្រជាជាតិ ក្នុងការរៀបចំរបាយការណ៍ «គ្រប់ជ្រុងជ្រោយ» ស្តីពីសកម្មភាពនុយក្លេអ៊ែររបស់អ៊ីរ៉ង់នៅនិទាឃរដូវឆ្នាំ ២០២៥ ទោះបីមានភាពមិនត្រូវគ្នាខ្លះក៏ដោយ ប៉ុន្តែដាក់កម្ហិតការសន្យារបស់អ៊ីរ៉ង់ដើម្បីទប់ស្កាត់ការចម្រាញ់សារធាតុអ៊ុយរ៉ាញ៉ូម។

E3 ដែលជាភាគីអ៊ឺរ៉ុបនៃកិច្ចព្រមព្រៀងឆ្នាំ២០១៥ បានប្រកាន់ជំហរតឹងរ៉ឹងលើអ៊ីរ៉ង់ក្នុងរយៈពេលប៉ុន្មានខែថ្មីៗនេះ ជាពិសេសចាប់តាំងពីទីក្រុងតេអេរ៉ង់បង្កើនការគាំទ្រផ្នែកយោធាដល់រុស្ស៊ីសម្រាប់សង្គ្រាមនៅអ៊ុយក្រែន។ ទោះជាយ៉ាងណាក៏ដោយ ពួកគេតែងតែទទូចថាពួកគេចង់រក្សាគោលនយោបាយសម្ពាធ និងការសន្ទនា។

មន្ត្រីអ៊ីរ៉ង់បីនាក់បាននិយាយថា គោលបំណងចម្បងរបស់ទីក្រុងតេអេរ៉ង់ នឹងត្រូវស្វែងរកមធ្យោបាយដើម្បីធានា «ការដកទណ្ឌកម្ម» ដែលបានដាក់តាំងពីឆ្នាំ២០១៨បន្ទាប់ពីប្រធានាធិបតី ត្រាំ បានបដិសេធកិច្ចព្រមព្រៀងនុយក្លេអ៊ែរឆ្នាំ២០១៥រវាងអ៊ីរ៉ង់ និងមហាអំណាចទាំងប្រាំមួយ៕

ដោយ រ៉ាន់ រើយ

The post អ្នកការទូតមហាអំណាចអឺរ៉ុបនិងអ៊ីរ៉ង់ជួបគ្នាលើកដំបូងថ្ងៃនេះ ដើម្បីស្ទង់ប្រតិកម្មពីលោក ត្រាំ appeared first on Kampuchea Thmey Daily.

អ៊ីរ៉ង់រំពឹងចរចាកម្មវិធីនុយក្លេអ៊ែរឡើងវិញឆាប់ៗ ក្រោយអាក់ខានជាងកន្លះទសវត្សរ៍រួតរឹតដោយវិបត្តិ

Rann Reuy — Sun, 17 Nov 2024 13:25:56 +0000

រដ្ឋមន្ត្រីការបរទេសអ៊ីរ៉ង់ បានអះអាងថា ការចរចាកម្មវិធីនុយក្លេអ៊ែរអ៊ីរ៉ង់នឹងត្រូវចាប់ផ្តើមឡើងវិញបន្ទាប់ពីជាប់គាំងអស់រយៈពេលជាង៦ឆ្នាំ ក្រោយសហរដ្ឋអាមេរិកដកខ្លួនចេញជាឯកតោភាគីកាលឆ្នាំ២០១៨ ក្រោមរដ្ឋបាលលោកប្រធានាធិបតី ដូណាល់ ត្រាំ។

លោក Abbas Araghchi រដ្ឋមន្ត្រីការបរទេសអ៊ីរ៉ង់។ AP

លោក Abbas Araghchi រដ្ឋមន្ត្រីការបរទេសអ៊ីរ៉ង់ បាននិយាយថា អ៊ីរ៉ង់ និងបណ្តាប្រទេសនៅអឺរ៉ុបនឹងចាប់ផ្តើមការចរចាឡើងវិញឆាប់ៗនេះលើផែនការសកម្មភាពគ្រប់ជ្រុងជ្រោយរួមឆ្នាំ ២០១៥ (JCPOA) ស្តីពីកម្មវិធីនុយក្លេអ៊ែរអ៊ីរ៉ង់ ដែលបានក្លាយជាមិនអាចអនុវត្តតាមបាន បន្ទាប់ពីប្រធានាធិបតីសហរដ្ឋអាមេរិកលោក ដូណាល់ ត្រាំ បានសម្រេចចិត្តដកខ្លួនជាឯកតោភាគីចេញពីកិច្ចព្រមព្រៀងនេះរួចបន្តដាក់ទណ្ឌកម្មសេដ្ឋកិច្ចអ៊ីរ៉ង់ និងបង្កឲ្យមានភាពតានតឹងកើតឡើង។

លោក Araghchi បាននិយាយតាមទូរទស្សន៍រដ្ឋអ៊ីរ៉ង់ថា៖«ឥឡូវនេះ បណ្តាប្រទេសនៅអឺរ៉ុបបង្ហាញចំណាប់អារម្មណ៍របស់ពួកគេក្នុងការបន្តការចរចា។ យើងទំនងជានឹងចាប់ផ្តើមធ្វើការលើរឿងនេះក្នុងពេលឆាប់ៗនេះ»។

ប្រទេសអ៊ីរ៉ង់បានបង្កើតអរិភាពយ៉ាងខ្លាំងជាមួយប្រទេសអ៊ីស្រាអែលក្នុងរយៈពេលជាង១ឆ្នាំចុងក្រោយ បន្ទាប់ពីក្រុមសកម្មប្រយុទ្ធហាម៉ាសដែលអ៊ីរ៉ង់ឧបត្ថម្ភគាំទ្រ បានវាយប្រហារអ៊ីស្រាអែលនៅថ្ងៃទី៧ខែតុលាឆ្នាំ២០២៣ ដោយសម្លាប់មនុស្សយ៉ាងហោច១២០០នាក់និងចាប់ចំណាប់ខ្មាំងជាង២៤០នាក់។ ចាប់តាំងពីពេលនោះមក អ៊ីស្រាអែលបានបង្កើនការវាយប្រហារតាមរយៈការប្រកាសសង្គ្រាមជាមួយក្រុមហាម៉ាស ព្រមទាំងពង្រីកសង្គ្រាមទៅកាន់ប្រទេសលីបង់ និង វាយប្រហារអ៊ីរ៉ងម្តងម្កាលផងដែរ។

យោងតាមការចុះផ្សាយរបស់សារព័ត៌មាអីរ៉ង់ អឺរ៉ុបនិងសហរដ្ឋអាមេរិកបានស្វាគមន៍ចំពោះសំណើរបស់ប្រទេសអ៊ីរ៉ង់ដែលចង់បានការចរចាកម្មវិធីនុយក្លេអ៊ែរនោះបន្តដំណើរការឡើងវិញ។

យោងតាមរដ្ឋមន្ត្រីការបរទេសអ៊ីរ៉ង ចាប់តាំងពីលោក Ebrahim Raisi ដែលគ្រោះថ្នាក់ដោយសារការធ្លាក់យន្តហោះកាលខែឧសភាឆ្នាំនេះ ឡើងកាន់តំណែងជាប្រធានាធិបតី កិច្ចចរចារវាងអ៊ីរ៉ង់ និងអាមេរិកត្រូវបានធ្វើឡើងតាមរយៈការសម្រុះសម្រួលរបស់អូម៉ង់ ប៉ុន្តែដំណើរការនេះត្រូវបានផ្អាក។

រដ្ឋាភិបាលនៃ[ប្រធានាធិបតីអ៊ីរ៉ង់ Masoud Pezeshkian បានស្នើឱ្យចាប់ផ្តើមកិច្ចចរចាឡើងវិញនៅទីក្រុងញូវយ៉ក [នៅខាងក្រៅនៃមហាសន្និបាតអង្គការសហប្រជាជាតិ (UNGA) នៅថ្ងៃទី ២៤-៣០ខែកញ្ញាឆ្នាំនេះ៕

The post អ៊ីរ៉ង់រំពឹងចរចាកម្មវិធីនុយក្លេអ៊ែរឡើងវិញឆាប់ៗ ក្រោយអាក់ខានជាងកន្លះទសវត្សរ៍រួតរឹតដោយវិបត្តិ appeared first on Kampuchea Thmey Daily.

សិក្សាជំនាញនុយក្លេអ៊ែរស៊ីវិល មិនមែនដើម្បីផលិតអាវុធទេ តែមានគុណតម្លៃរបស់វា

Chan Sotheavy — Fri, 14 Jul 2023 05:17:00 +0000

ក្នុងនាមជានិស្សិត ដែលទើបតែនឹងបញ្ចប់ការសិក្សាផ្នែកជំនាញនុយក្លេអ៊ែរស៊ីវិល យុវតី ស៊ីវ គឹមលី យល់ឃើញថា នេះជាជំនាញមួយដែលល្អ ព្រោះជំនាញនុយក្លេអ៊ែរ មិនផ្តោតតែអាវុធនុយក្លេអ៊ែរទេ គឺវាទាក់ទងនឹងអ្វីផ្សេងៗទៀត ដូចជាការសិក្សាទាក់ទងនឹងវិទ្យុសកម្មចំណីអាហារ កសិកម្ម និង សុខាភិបាលជាដើម។ នេះបើតាមនិស្សិតដែលទើបតែបញ្ចប់ការសិក្សាជំនាញនុយក្លេអ៊ែរស៊ីវិលរូបនេះ ផ្តល់បទសម្ភាសជាមួយ កម្ពុជាថ្មី ។

កញ្ញា ស៊ីវ គឹមលី និស្សិតម្នាក់ក្នុងចំណោម៤នាក់ ដែលទើបនឹងបញ្ចប់ថ្នាក់បរិញ្ញាប័ត្រ ជំនាញនុយក្លេអ៊ែរស៊ីវិល ពីសាលា Bauman Moscow State Technical University សហព័ន្ធរុស្ស៊ី បង្ហាញចំណាប់អារម្មណ៍ថា “ខ្ញុំពិតជាមានអារម្មណ៍រំភើប និងសប្បាយចិត្ត បន្ទាប់ពីបញ្ចប់ការសិក្សាជំនាញនេះ ហើយទទួលបានការទទួលស្គាល់ពីមហាជន ដោយសារតែខ្ញុំជាមនុស្សស្រី សិក្សាជំនាញនេះ”។

បន្ទាប់ពីបញ្ចប់ការសិក្សាជំនាញដែលកម្ពុជាទើបតែមាននិស្សិត ៦រូបប៉ុណ្ណោះ បញ្ចប់ការសិក្សាដោយជោគជ័យ យុវតីរូបនេះ លើកឡើងដែរថា ប្អូនចង់យកចំណេះដឹងដែលខ្លួនមាន ទៅបម្រើការងារដែលជាតម្រូវការសង្គមជាតិ ក៏ដូចជាស្រាវជ្រាវបន្ថែមលើនុយក្លេអ៊ែរស៊ីវិល ដើម្បីអាចចែករំលែកដល់ពលរដ្ឋខ្មែរ បានយល់បន្ថែមពាក់ព័ន្ធនឹងជំនាញនេះ។

គួរឱ្យដឹងដែរថា «ជំនាញនុយក្លេអ៊ែរស៊ីវិល» គ្រាន់តែលឺឈ្មោះ យើងប្រហែលជានឹកគិតដល់ការផលិតអាវុធ ប៉ុន្តែថាមពលនុយក្លេអ៊ែរ ត្រូវបានគេស្គាល់ថាជាថាមពលអាតូមិច ជាអ្វីដែលទទួលបានពីប្រតិកម្មនុយក្លេអ៊ែរ ហើយប្រតិកម្មនេះ អាចកើតឡើងដោយឯកឯង ឬបង្កដោយមនុស្ស។ ថាមពលនេះ មានប្រយោជន៍សម្រាប់ការផលិតអគ្គិសនី រួមនឹងវិស័យផ្សេងទៀតផងដែរ ដូចជា ឱសថឧស្សាហកម្ម ឬអាវុធជាដើម។ ចំពោះការប្រើប្រាស់ថាមពលនេះវិញ គឺមានទាក់ទងនឹងហានិភ័យមួយចំនួនដែរ ហេតុនេះហើយ ត្រូវដឹងឱ្យបានស៊ីជម្រៅលើថាមពលមួយនេះ ដើម្បីរក្សាសុវត្ថិភាព។

ទន្ទឹមនេះ និស្សិតបញ្ចប់ការសិក្សាជំនាញថាមពលនុយក្លេអ៊ែររូបនេះ បញ្ជាក់ឱ្យដឹងដែរថា ដើម្បីសិក្សាលើមុខជំនាញនេះ គឺតម្រូវឱ្យមានមូលដ្ឋានគ្រឹះខ្លាំងលើគណិតវិទ្យា គីមីវិទ្យា និងរូបវិទ្យា ដែលសំដៅលើរូបវិទ្យាទំនើប។ បើចំពោះថា ធ្វើយ៉ាងណា ដើម្បីអាចដឹង ឬស្នើរអាហាររូបករណ៍ទៅសិក្សានៅសហព័ន្ធលើជំនាញនេះបាន ប្អូនស្រីបានឱ្យដឹងថា ការតាមដានពីព័ត៌មានអាហាររូបករណ៍គឺជារឿងចម្បង ដែលភាគច្រើននៅអំឡុងខែមីនា នឹងមានដំណឹងអាហាររូបករណ៍។

ចំពោះឯកសារដែលត្រូវត្រៀម សម្រាប់អ្នកដែលមានបំណងចង់សិក្សាលើជំនាញនេះ គឺត្រូវមានលិខិតឆ្លងដែន
សំបុត្របញ្ជាក់សុខភាពដែលបញ្ជាក់ថា មិនមានជំងឺថ្លើម និងជំងឺអេសដ៍ រួចភ្ជាប់ជាមួយនឹងឯកសារអាហាររូបករណ៍ ដែលត្រូវបំពេញ។

គួរបញ្ជាក់ថា រាជរដ្ឋាភិបាលកម្ពុជាក្រោមកិច្ចសហប្រតិបត្តិការជាមួយសហព័ន្ធរុស្ស៊ីនាពេលកន្លងមក មានផែនការបង្កើត មជ្ឈមណ្ឌលព័ត៌មាននុយក្លេអ៊ែរ ដើម្បីលើកកម្ពស់ការយល់ដឹងជាសាធារណៈ អំពីបច្ចេកវិទ្យានុយក្លេអ៊ែរសម្រាប់ការសិក្សាស្រាវជ្រាវ និងបណ្តុះបណ្តាលធនធានមនុស្សនាពេលអនាគត៕

The post សិក្សាជំនាញនុយក្លេអ៊ែរស៊ីវិល មិនមែនដើម្បីផលិតអាវុធទេ តែមានគុណតម្លៃរបស់វា appeared first on Kampuchea Thmey Daily.

មកទល់ពេលនេះ និស្សិតខ្មែរ ៦រូបហើយ បានបញ្ចប់ការសិក្សាផ្នែកនុយក្លេអ៊ែរស៊ីវិល នៅរុស្ស៊ី

Chan Sotheavy — Wed, 12 Jul 2023 23:56:46 +0000

ដោយសារតែមានសុខសន្តិភាពពេញលេញ កម្ពុជាមានឱកាសគ្រប់គ្រាន់ដើម្បីបណ្តុះបណ្តាលធនធានមនុស្ស លើវិស័យផ្សេងៗ ដើម្បីចូលរួមបង្កើនល្បឿនអភិវឌ្ឍជាតិ ហើយការសិក្សាស្រាវជ្រាវការអនុវត្ត និងការលើកកម្ពស់ការយល់ដឹងអំពីវិទ្យាសាស្ត្រ និងបច្ចេកវិទ្យានុយក្លេអ៊ែរនេះ ក៏មានសារៈសំខាន់ដែរ សម្រាប់ការអភិវឌ្ឍសេដ្ឋកិច្ចសង្គមកម្ពុជា។ នេះបើតាមរដ្ឋមន្ត្រីក្រសួងបរិស្ថាន ធ្លាប់បានលើកឡើងកាលពីពេលកន្លងទៅ ក្នុងឱកាសអបអរចំពោះនិស្សិត ២រូប ដែលបានបញ្ចប់ការសិក្សាផ្នែកនេះ ក្នុងឆ្នាំ២០២១។

គួររំលឹកថា កាលពីថ្ងៃទី១៥ ខែកក្កដា ឆ្នាំ២០២១ អតីតនិសិ្សតសាលាតិចណូ ២រូប គឺលោក កែវ មករា និងលោក កឹម ចាន់ប៉ាលី បានបញ្ចប់ការសិក្សាថ្នាក់បរិញ្ញាប័ត្រ ជំនាញនុយក្លេអ៊ែរស៊ីវិល (ជំនាន់ទី១) ដោយជោគជ័យ ពីសាកលវិទ្យាល័យ Peter the Great St.Petersburg Polytechnic University ទីក្រុង St.Petersburg សហព័ន្ធរុស្ស៊ី។

ក្នុងឆ្នាំ២០២៣ នេះវិញ ក៏មាននិស្សិតខ្មែរ ៤រូបផ្សេងទៀត ជានិស្សិតជំនាញនុយក្លេអ៊ែរស៊ីវិល (ជំនាន់ទី២) បញ្ចប់ការសិក្សាផ្នែកថាមពលនុយក្លេអ៊ែរដោយជោគជ័យនោះ រួមមាន លោក ញូង ម៉ានិត, កញ្ញា គី ទិត្យម៉ារីណែត, កញ្ញា សុីវ គីមលី និង កញ្ញា ណោង ជាលីណា ។ បញ្ញវន្តទាំង៤រូបនោះ បានបញ្ចប់ការសិក្សាថ្នាក់បរិញ្ញាប័ត្រជំនាញនេះ ពីសាកលវិទ្យាល័យលំដាប់កំពូលទាំងពីររបស់រុស្សី ។

គួរបញ្ជាក់ដែរថា ស្របតាមផែនការនៃការបង្កើតមជ្ឈមណ្ឌលព័ត៌មាននុយក្លេអ៊ែររបស់រាជរដ្ឋាភិបាល ដើម្បីលើកកម្ពស់ ការយល់ដឹងជាសាធារណៈ អំពីបច្ចេកវិទ្យានុយក្លេអ៊ែរសម្រាប់ការសិក្សាស្រាវជ្រាវ និងបណ្តុះបណ្តាលធនធានមនុស្ស នាពេលអនាគត។ បច្ចុប្បន្ន កម្ពុជានៅមាននិស្សិតខ្មែរប៉ុន្មានរូបទៀត ដែលកំពុងសិក្សាជំនាញ Nuclear Power Engineering and Thermal Physics នៅរុស្ស៊ី ៕

The post មកទល់ពេលនេះ និស្សិតខ្មែរ ៦រូបហើយ បានបញ្ចប់ការសិក្សាផ្នែកនុយក្លេអ៊ែរស៊ីវិល នៅរុស្ស៊ី appeared first on Kampuchea Thmey Daily.

យុវតីខ្មែរដំបូង ៣រូប បញ្ចប់ការសិក្សាផ្នែកនុយក្លេអ៊ែរស៊ីវិល ដោយជោគជ័យ

Chan Sotheavy — Wed, 12 Jul 2023 00:18:01 +0000

យុវតី ៣រូប ក្នុងចំណោមបញ្ញវន្តខ្មែរ ៤រូប បានបញ្ចប់ការសិក្សាថ្នាក់បរិញ្ញាប័ត្រ ជំនាញ Nuclear Power Engineering and Thermal Physics (ជំនាញនុយក្លេអ៊ែរស៊ីវិល ជំនាន់ទី២) ដោយជោគជ័យ ពីសាកលវិទ្យាល័យលំដាប់កំពូលទាំងពីរបស់ រុស្សី គឺសាកលវិទ្យាល័យ Bauman Moscow State Technical University ទីក្រុង Moscow និងសាកលវិទ្យាល័យ National Research Nuclear University MEPhI ទីក្រុង Obninsk ប្រទេសរុស្ស៊ី ។ នេះបើតាមការផ្សព្វផ្សាយរបស់ មជ្ឈមណ្ឌល CAM-ATOM ។

បញ្ញវន្តខ្មែរទាំងនេះ រួមមាន កញ្ញា គី ទិត្យម៉ារីណែត, កញ្ញា សុីវ គីមលី, កញ្ញា ណោង ជាលីណា ដោយឡែកមួយរូបទៀត ភេទប្រុស គឺលោក ញូង ម៉ានិត សុទ្ធសឹងតែបានបញ្ចប់ការសិក្សាផ្នែកនុយក្លេអ៊ែរស៊ីវិល ជំនាញថាមពលនុយក្លេអ៊ែរស៊ីវិល ជំនាន់ទី២ នៃគម្រោងអភិវឌ្ឍធនធានមនុស្សរបស់រាជរដ្ឋាភិបាលកម្ពុជា ដើម្បីអាចឈានទៅសម្រេចបានការអភិវឌ្ឍន៍វិស័យ ថាមពលនុយក្លេអ៊ែរស៊ីវិល នៅកម្ពុជានាពេលខាងមុខ។

គួរបញ្ជាក់ដែរថា រាជរដ្ឋាភិបាលកម្ពុជាក្រោមកិច្ចសហប្រតិបត្តិការជាមួយសហព័ន្ធរុស្ស៊ីនាពេលកន្លងមក មានផែនការបង្កើតមជ្ឈមណ្ឌលព័ត៌មាននុយក្លេអ៊ែរ ដើម្បីលើកកម្ពស់ការយល់ដឹងជាសាធារណៈ អំពីបច្ចេកវិទ្យានុយក្លេអ៊ែរសម្រាប់ការសិក្សាស្រាវជ្រាវ និងបណ្តុះបណ្តាលធនធានមនុស្សនាពេលអនាគត និងធ្លាប់មានបញ្ញវន្តខ្មែរប៉ុន្មានរូបហើយ ដែលបានបញ្ចប់ការសិក្សាដោយជោគជ័យ៕