ការលើកឡើងនេះ ធ្វើឡើងក្នុងឱកាសដែលលោកបានអញ្ជើញចូលរួម និងថ្លែងសុន្ទរកថាអបអរសាទរក្នុងពិធីបើកវគ្គបណ្តុះបណ្តាលសមត្ថភាពសម្រាប់មន្ត្រីរាជការកម្ពុជា ស្តីពីបច្ចេកវិទ្យាថ្មីៗ និងការរៀបចំគោលនយោបាយសម្រាប់វិស័យ e-mobility នៅកម្ពុជា។ កម្មវិធីនេះរៀបចំដោយទីភ្នាក់ងារសហប្រតិបត្តិការអន្តរជាតិកូរ៉េ (KOICA) និងវិទ្យាស្ថានជាតិបច្ចេកវិទ្យាបៃតង (NIGT) នៅសណ្ឋាគារ Koreana ក្នុងទីក្រុងសេអ៊ូល។

កម្មវិធីខាងលើ ជាផ្នែកមួយនៃគម្រោងដៃគូអភិវឌ្ឍផ្លូវការ (ODA) របស់ KOICA ដែលមានគោលបំណងគាំទ្រកម្ពុជាក្នុងការកសាងសមត្ថភាពគោលនយោបាយជាតិ និងបង្កើតមូលដ្ឋានស្ថាប័នរឹងមាំសម្រាប់ការគ្រប់គ្រងថ្មយានយន្តអគ្គិសនី ចាប់ពីការផលិត ការប្រើប្រាស់ ការប្រមូល ការកែច្នៃ និងការប្រើប្រាស់ឡើងវិញ។ វគ្គបណ្តុះបណ្តាលនេះ ក៏មានការចូលរួមពីមន្ត្រីជំនាញកម្ពុជានៃក្រសួងសាធារណការ និងដឹកជញ្ជូន ក្រសួងបរិស្ថាន ក្រសួងរ៉ែ និងថាមពល ដែលជាស្ថាប័នស្នូលក្នុងការជំរុញអភិវឌ្ឍវិស័យដឹកជញ្ជូនបៃតងនៅកម្ពុជាផងដែរ។

ក្នុងឱកាសនោះ ឯកអគ្គរាជទូត បានគូសបញ្ជាក់ថា ការអភិវឌ្ឍវិស័យ e-mobility មិនត្រឹមតែជាជំហានសំខាន់សម្រាប់កាត់បន្ថយការបំពុលបរិស្ថាន និងការប្រែប្រួលអាកាសធាតុប៉ុណ្ណោះទេ ប៉ុន្តែថែមទាំងជាចំណុចស្នូលក្នុងការបំប្លែងសេដ្ឋកិច្ចកម្ពុជាទៅរកសេដ្ឋកិច្ចបៃតង និងឌីជីថលថែមទៀត។

លោក ឃួន ផុនរតនៈ ក៏បានលើកឡើងពីសារៈសំខាន់នៃកិច្ចសហប្រតិបត្តិការអន្តរជាតិ ជាពិសេសជាមួយសាធារណរដ្ឋកូរ៉េ ក្នុងការផ្ទេរបច្ចេកវិទ្យា ការចែករំលែកបទពិសោធន៍ និងការកសាងធនធានមនុស្ស ដែលជាមូលដ្ឋានគ្រឹះសម្រាប់ការអភិវឌ្ឍប្រកបដោយចីរភាព និងបង្កើនសមត្ថភាពប្រកួតប្រជែងរបស់កម្ពុជា។

លោកបញ្ជាក់ថា ការខិតខំប្រឹងប្រែងទាំងនេះ ស្របតាមទិសដៅនយោបាយរបស់រាជរដ្ឋាភិបាលកម្ពុជា ក្នុងការសម្រេចឱ្យបាននូវចក្ខុវិស័យអភិវឌ្ឍប្រកបដោយចីរភាព កាត់បន្ថយការបំពុល និងលើកកម្ពស់គុណភាពជីវិតរបស់ប្រជាពលរដ្ឋក្នុងរយៈពេលវែង៕

The post កម្ពុជា ប្តេជ្ញាពង្រឹងកិច្ចសហប្រតិបត្តិការជាមួយកូរ៉េ លើថាមពលស្អាត បច្ចេកវិទ្យាបៃតង និងធនធានមនុស្ស appeared first on Kampuchea Thmey Daily.

ការក្លែងបន្លំតាមបណ្តាញសង្គម (Social Media Fraud) គឺជាការវាយប្រហារទៅលើគណនីបណ្តាញសង្គម ដូចជា Facebook Instagram Tiktok Linkedin ជាដើម ក្នុងគោលបំណងលួចព័ត៌មានផ្ទាល់ខ្លួន ឬគ្រប់គ្រងគណនីបណ្តាញសង្គមរបស់អ្នកប្រើប្រាស់។ ជនឆបោកបានប្រើប្រាស់ប្រវត្តិរូប ឬតំណភ្ជាប់ក្លែងក្លាយ វិធីសាស្ត្របោកប្រាស់ផ្សេងៗ ដើម្បីក្លែងបន្លំជាមិត្តភក្កិ ឬបុគ្គលដែលគួរឱ្យទុកចិត្តបាន រួចផ្ញើសារមកដាក់សម្ពាធលើអ្នកឱ្យធ្វើសកម្មភាពអ្វីមួយឱ្យបានឆាប់រហ័ស។

តើគួរធ្វើដូចម្តេចដើម្បីចៀសវាងការក្លែងបន្លំតាមបណ្តាញសង្គម?

ដើម្បីជៀសវាងការក្លែងបន្លំតាមបណ្តាញសង្គម ក្រសួងប្រៃសណីយ៍ និងទូគមនាគមន៍ តាមរយៈ Telegram កម្ពុជាឆ្ពោះទៅឌីជីថល បានណែនាំដូចខាងក្រោម៖

• មិនគួរយល់ព្រមតាមសំណើស្នើសុំជាមិត្តពីអ្នកមិនស្គាល់ក្នុងបណ្តាញសង្គម។
• គួរស្រាវជ្រាវប្រភពឱ្យបានច្បាស់លាស់មុននឹងចុចលើតំណភ្ជាប់ណាមួយ។
• គួរផ្ទៀងផ្ទាត់អត្តសញ្ញាណបុគ្គលឱ្យបានច្បាស់លាស់ ដើម្បីជៀសវាងការបន្លំអត្តសញ្ញាណ។
• គួរប្រើពាក្យសម្ងាត់ខុសៗគ្នាចំពោះគណនីបណ្តាញសង្គមផ្សេងៗគ្នា។
• គួរបើកមុខងារផ្ទៀងផ្ទាត់ពហុកត្តា (MFA) សម្រាប់គណនីបណ្តាញសង្គមអ្នក។
• គួរកំណត់ឯកជនភាពដើម្បីគ្រប់គ្រងអ្នកដែលអាចមើលឃើញព័ត៌មានរបស់អ្នក។
• គួរធ្វើបច្ចុប្បន្នភាពគណនីបណ្តាញរបស់អ្នកជាប្រចាំ។
• ស្វែងយល់ និងរៀនអំពីវិធីសាស្ត្រក្លែងបន្លំថ្មីៗដែលគេបានផ្សព្វផ្សាយតាមបណ្តា្ញសង្គមអំពីវិធីការពារខ្លួន៕

The post ឈ្វេងយល់អំពីការក្លែងបន្លំតាមបណ្តាញសង្គម និងវិធីការពារ appeared first on Kampuchea Thmey Daily.

១.ជួយជំរុញដល់ការត្រៀមខ្លួនសម្រាប់បដិវត្តន៍ឧស្សាហកម្ម ៤.០

ការលើកទឹកចិត្តឱ្យក្មេងស្រីចាប់ជំនាញក្នុងផ្នែកបច្ចេកវិទ្យា និងវិទ្យាសាស្ត្រពិតជាមានសារសំខាន់ណាស់ក្នុងការបង្កើនធនធានមនុស្សក្នុងវិស័យនេះ ដើម្បីអាចឱ្យកម្ពុជាត្រៀមខ្លួនសម្រាប់ការផ្លាស់ប្តូរយ៉ាងឆាប់រហ័សនៅក្នុងសម័យកាលបដិវត្តឧស្សាហកម្ម ៤.០។

២.ជួយដោះស្រាយបញ្ហានានានៅក្នុងសង្គម

ការចូលរួមរបស់ស្ត្រីក្នុងវិស័យបច្ចេកវិទ្យាពិតជាមានសារសំខាន់ណាស់ ព្រោះពួកគេអាចផ្តល់នូវគំនិត្តថ្មីៗក្នុងការដោះស្រាយបញ្ហានានានៅក្នុងសង្គម។

៣.ជួយដល់កំណើនសេដ្ឋកិច្ច

ការចូលរួមរបស់ស្ត្រីក្នុងវិស័យបច្ចេកវិទ្យាអាចជួយបំពេញបន្ថែមនូវកង្វះធនធាន ព្រមទាំងបង្កើនផលិតភាពស្ទើរគ្រប់វិស័យ មិនថាវិស័យឧស្សាហកម្ម ឬសេវាកម្ម ដែលអាចជួយជំរុញដល់ការសម្រចបាននូវចក្ខុវិស័យក្នុងការអភិវឌ្ឍកម្ពុជា ជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។

៤.ជួយដល់ការស្រាវជ្រាវ និងអភិវឌ្ឍន៍

ស្រ្តី និងបុរសមានគំនិត្តខុសគ្នាច្រើន ដូច្នេះការចូលរួមរបស់ស្រ្តីក្នុងវិស័យបច្ចេកវិទ្យា អាចជួយបំពេញបន្ថែមនូវគំនិត និងទស្សនៈថ្មីៗក្នុងការស្រាវជ្រាវដែលអាចជួយដល់ការអភិវឌ្ឍចំណេះដឹង និងបច្ចេកវិទ្យាថ្មីៗ៕

The post យល់ដឹងពីសារសំខាន់នៃការចូលរួមរបស់ស្ត្រី ក្នុងវិស័យបច្ចេកវិទ្យានៅកម្ពុជា appeared first on Kampuchea Thmey Daily.

លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅថ្ងៃទី ២៤ ខែកុម្ភៈ ឆ្នាំ ២០២៦ បានទទួលជួបតំណាងក្រុមហ៊ុន Informa Markets ដឹកនាំដោយលោក Gerard Leeuwenburgh ប្រធានតំបន់ប្រចាំប្រទេសម៉ាឡេស៊ី និងកម្ពុជា ដើម្បីពិភាក្សាអំពីកិច្ច​សហការ​លើការរៀបចំពិព័រណ៍បច្ចេកវិទ្យាអាហារកម្ពុជា ​ឆ្នាំ២០២៦។

លោក Leeuwenburgh បានបង្ហាញអំពីគម្រោងរៀបចំ ពិព័រណ៍បច្ចេកវិទ្យាអាហារកម្ពុជា​ឆ្នាំ២០២៦ នៅថ្ងៃទី​២៨-៣០ ខែកញ្ញា ឆ្នាំ២០២៦ ក្នុងរាជធានីភ្នំពេញ ដែលនឹងផ្តល់ជាវេទិកាអន្តរជាតិ​ដំបូងបង្អស់​នៅកម្ពុជា សម្រាប់ឧស្សាហកម្មកែច្នៃអាហារ បច្ចេកវិទ្យាវេចខ្ចប់ និងការផ្គូផ្គងពាណិជ្ជកម្មក្នុងវិស័យនេះ។

លោក Leeuwenburgh បានលើកឡើងថា៖ “ក្រុមហ៊ុនមានបំណងវិនិយោគរយៈពេលវែងនៅ​កម្ពុជា និងផ្សារភ្ជាប់គោលនយោបាយរាជរដ្ឋាភិបាលជាមួយនឹងធុរកិច្ចតាមរយៈពិព័រណ៍។”

លោកក៏បានស្នើសុំការគាំទ្រពីក្រសួងឧស្សាហកម្ម ដើម្បីពង្រឹងទំនុកចិត្ត និងទាក់ទាញក្រុមហ៊ុនផ្តល់បច្ចេកវិទ្យាអន្តរ​ជាតិ​មកកាន់ប្រទេសកម្ពុជាកាន់តែច្រើន។

លោក ហែម វណ្ណឌី បានស្វាគមន៍ចំពោះគំនិតផ្តួចផ្តើមរបស់ក្រុមហ៊ុន ដោយលើកឡើងថា ពិព័រណ៍​នេះ​ស្របនឹងរបៀបវារៈជំរុញការធ្វើទំនើបកម្មឧស្សាហកម្មរបស់កម្ពុជា។

លោករដ្ឋមន្ត្រីបានបន្ថែមថា៖ “ក្រសួងគាំទ្រគ្រប់វេទិកាដែលជួយ​សម្រួល​ដល់ការផ្ទេរបច្ចេកវិទ្យា លើកកម្ពស់សហគ្រាសធុនតូច និងមធ្យម និងបង្កើនភាពប្រកួតប្រជែងក្នុងការនាំចេញនៃឧស្សាហកម្មកែច្នៃអាហារ។”

លោករដ្ឋមន្ត្រីក៏បានលើកទឹកចិត្តឱ្យក្រុមហ៊ុន បញ្ចូលបច្ចេកវិទ្យាវេចខ្ចប់ និងដំណោះស្រាយដែលឆ្លើយ​តបនឹងតម្រូវការជាក់ស្តែងរបស់ផលិតករក្នុងស្រុក ជាពិសេសសហគ្រាសធុនមីក្រូ តូច និងមធ្យម។

ភាគីទាំងពីរបានឯកភាពបន្តកិច្ចសហការសម្របសម្រួល និងកៀរគរការចូលរួមរបស់វិស័យឯកជន ដើម្បី​ធានាថាព្រឹត្តិការណ៍នេះនឹងរួមចំណែកសំខាន់ដល់បរិវត្តកម្មឧស្សាហកម្មអាហាររបស់កម្ពុជា។

ក្រុមហ៊ុន Informa Markets គឺជាផ្នែកមួយនៃ Informa PLC ជាក្រុមហ៊ុនរៀបចំពិព័រណ៍ឈានមុខ​មួយលើពិភពលោក ដោយមានបុគ្គលិករាប់ពាន់នាក់ និងមានប្រតិបត្តិការពិព័រណ៍ជាមួយក្រុមហ៊ុន និងម៉ាកយីហោអន្តរជាតិជាច្រើន៕

The post ក្រុមហ៊ុនលំដាប់អន្តរជាតិនៅម៉ាឡេស៊ី មានបំណងវិនិយោគ​បច្ចេក​វិទ្យា​ឧស្សាហកម្មនៅកម្ពុជា appeared first on Kampuchea Thmey Daily.

បើតាម KYODO NEWS, ក្រុម​ហ៊ុន Toto បាន​ចេញនូវ​ម៉ូដែល​ថ្មី​ចំនួន​២​ នៃ​ស៊េរី Neorest ដែល​ជា​ស៊េរី​ខ្ពស់​របស់​ខ្លួន​នៅ​ក្នុង​ខែ​សីហា ឆ្នាំ២០២៥​ ​បំពាក់​ដោយ​​ឧបករណ៍​ចាប់​សញ្ញា​នៅ​ក្នុង​ចាន​បង្គន់​​ដែល​អាច​ស្កែន​កាក​សំណល់​ ​និង​​ការ​បំពាក់​​ឧបករណ៍​ LED ​ដើម្បី​​វាស់ ​រូប​រាង កម្រិត​សំឡេង​ និង​ពណ៌​បាន​។

​នេះវ​​ជា​ផលិត​ផល​ដំបូង​គេ​ដែល​រចនា​ឡើង​សម្រាប់​ប្រើ​ប្រាស់​តាម​ផ្ទះ​នៅ​ក្នុង​ប្រទេស​ជប៉ុន។ ប្រព័ន្ធ​នេះ​បែង​ចែក​រូបរាង​លាមក ទៅ​តាម​ប្រភេទនីមួយៗ ​​​​ទៅ​ជា​ប្រាំពីរ​ចំណែក​ ខណៈ​ដែល​បរិមាណ និង​ពណ៌​ត្រូវ​បាន​កត់​ត្រា​ជា​បី​កម្រិត​ផ្សេង​គ្នា​។

មិន​តែ​ប៉ុណ្ណោះ អ្នក​ប្រើ​ប្រាស់​អាច​តាម​ដាន​ស្ថាន​ភាព​លាមក​របស់​ពួក​គេ​នៅ​លើ​​ទូរស័ព្ទដៃ​​ឆ្លាតវៃ​​ [Smartphone] ហើយ​ថែម​ទាំង​ទទួល​បាន​ការ​ណែ​នាំ​អំពី​របប​អាហារ​ ដោយ​ផ្អែក​លើ​ការ​វិ​ភាគ​ចលនា​ពោះវៀន​ ក៏​ដូច​ជា​ការណែ​នាំ​ដើម្បី​បង្កើន​ការ​ទទួល​ទាន​បន្លែ​ជា​ដើម​។​

ប្រធាន​​​ក្រុម​ហ៊ុន​​បាន​​និយាយ​​ថា​៖«ផលិត​ផល​​ថ្មី​​នេះ​​មាន​​គោល​​បំណង​​ជួយ​​អ្នក​​ប្រើ​​ប្រាស់ឱ្យ​ប្រែ​ក្លាយ​​ទម្លាប់​​នៃ​​ការ​​ប្រើ​​ប្រាស់​​បង្គន់​​ប្រចាំ​​ថ្ងៃ​​ ឆ្ពោះ​ទៅកាន់​បង្កន់​ដែល​អាច​កំណត់​ពី​​​​សុខ​ភាព​​កាន់​​តែ​​ប្រសើរ»។

ទន្ទឹម​នឹង​នេះ​ផង​ដែរ​ ក្រុមហ៊ុន Panasonic បាន​បង្កើត​ឧបករណ៍​មួយ​ដែល​មាន​ឈ្មោះ​ថា Toirepo ជា​​កន្លែង​ថែទាំ ដែល​កត់​ត្រា​ពេល​វេលា ចំនួន​​ និង​បរិមាណ​នៃ​ការ​បន្ទោរ​បង់​របស់​អ្នកប្រើ​ប្រាស់​ ជា​មួយ​នឹង​ឧបករណ៍​ចាប់​សញ្ញា​ភ្ជាប់​ទៅ​នឹង​បង្គន់​ផង​ដែរ​។

គួរ​ឱ្យ​ដឹង​ថា ឧស្សាហកម្ម​បង្គន់​របស់​ប្រទេស​ជប៉ុន​ត្រូវ​បាន​គេ​ស្គាល់​ថា​បាន​បង្កើត​ផលិត​ផល​ជា​ច្រើន​ប្រភេទ​ ដើម្បី​បំពេញ​តម្រូវ​ការ​សង្គម​ដែល​ជា​ការ​ផ្លាស់​ប្តូរ​មួយ​ដ៏​ប្រសើរ​ ដូចជា​បង្គន់​អនាម័យ​ដែល​ផ្តោត​លើ​ភាព​ស្អាត​ និងផាសុខភាព​ បន្ទាប់​ពី​បង្កន់​បែប​លោក​ខាង​លិច​បាន​ក្លាយ​ជា​រឿង​សំខាន់​នៅ​ក្នុង​ប្រទេស​ ជា​ពិសេស​ការ​រចនា​បែប​សន្សំ​សំចៃ​ទឹក ដោយ​សារ​ការ​យល់​ដឹង​អំពី​បរិស្ថាន​បាន​រីក​ចម្រើន​កាន់​តែ​ច្រើន​ឡើង​។

ទោះ​ជា​យ៉ាង​ណា​ ​មិន​ទាន់មាន​ការ​​បញ្ចេញ​ទេ​ថា​ បង្គន់​នេះ​មាន​តម្លៃ​ប៉ុន្មាន៕

ប្រែសម្រួល៖ ណឺ មិនា

The post ក្រុមហ៊ុន​ជប៉ុន​បញ្ចេញ​បង្គន់​​ទំនើប​​ចុង​ក្រោយ​​​​​ ​ដែល​អាច​វិភាគ​​លា​មក​ និង​ដឹងបញ្ហា​សុខភាព​​ appeared first on Kampuchea Thmey Daily.

ក្រុមហ៊ុន​បច្ចេក​វិទ្យា​យក្សរបស់ apple បាននិយាយថា គុណ​វិបត្តិ​ចម្បង​ចំនួនពីរត្រូវបានរកឃើញនៅក្នុង​ WebKit ម៉ាស៊ីន​កម្ម​វិធី​រុក​រក​(browser) ដែល​ផ្តល់​ថាមពល​ដល់​កម្មវិធី​ Safari និង​កម្ម​វិធី​រុក​រក​ទាំង​អស់​នៅ​លើ​ iOS និយាយ​​ថា​ពួក​វា​ជាផ្នែក​មួយ​នៃការ​វាយ​ប្រហារ​ដ៏​ស្មុគស្មាញ​បំផុតដែល​​ផ្តោត​លើ​បុគ្គលណា​ម្នាក់​​ជាក់​លាក់​។

ហា​និ​ភ័យ​កើត​ចេញ​ពី​គេ​ហ​នានា ​ ដែល​អាច​បញ្ឆោតឱ្យ​កម្មវិធីមួយ​ចំនួន​​របស់​អ្នក​ប្រើ​ប្រាស់​ដំណើរឱ្យ​មាន​​ការ​រអាក់​រអួល​ដែល​នាំ​ឱ្យ​គ្រោះ​ថ្នាក់​។ ​ក្នុង​ន័យ​នេះ​ មាន​ន័យ​ថា​ពួក Hacker ប្រហែល​ជា​អាច​គ្រប់​គ្រង iPhone ឬ iPad របស់​អ្នក​ប្រើប្រាស់​ ឬ​ដំណើរ​ការ​កូដ​ដោយ​គ្មាន​ការ​អនុញ្ញាត​ពី​នរណា​ម្នាក់​ឡើយ​។

សម្រាប់​អ្នក​ប្រើ​ប្រាស់​ដែល​បាន​បើក​ការ​អាប់ដេត​ដោយ​ស្វ័យ​ប្រវត្តិ​ ដែល​មាន​កម្មវិធី​​ដែល​ត្រូវបាន​​ដំឡើង​រួច​ហើយ​ ខណៈ​ដែល​អ្នក​ផ្សេង​ទៀត​នឹង​ត្រូវ​ទាញ​យក​ iOS ២៦.២ ឬ iPadOS ២៦.២ ដោយ​ដៃ​តាម​រយៈ​ការ​កំណត់​ឧបករណ៍ឆ្លាត​វៃ​​របស់​ពួក​គេ។​

ឧបករណ៍​​ដែល​មាន​ហា​និភ័យ​បំផុត​រួមមានទូរសព្ទ iPhone ១១ ជំនាន់​មុន​និងក្រោយ, iPad Pro ១២.៩ អ៊ីញ (ជំនាន់ទី 3 និងក្រោយ) និង iPad Pro ១១ អ៊ីញ​ (ជំនាន់ទី 1 និងក្រោយ)និង​ឧបករណ៍​មួយ​ចំនួន​ផ្សេង​ទៀត​ដែល​ពាក់​ពន្ធ័។

គុណ​វិបត្តិ​នេះ​ត្រូវ​បាន​ចាត់​ថ្នាក់​ថា​ជា​ភាព​ងាយ​រងគ្រោះគ្មាន​ថ្ងៃ​ត្រឡប់​​​ ដែល​មាន​ន័យ​ថា​ពួក​គេ​មិន​ស្គាល់​អ្នក​បង្កើត​កម្ម​វិធី ហើយ​អាច​ត្រូវ​បាន​កេង​ប្រវ័ញ្ច​ដោយ​ពួក Hacker មុន​ពេល​មាន​ដំណោះ​ស្រាយ​។

ក្រុម​សន្តិ​សុខ​ប្រព័ន្ធ​បច្ចេក​វិទ្យា រួម​ទាំង​ក្រុមវិភាគ​ការ​គំរាម​កំហែង​របស់ Apple និង Google បាន​រក​ឃើញ​ចំណុច​ខ្សោយ ដោយ​ព្រមាន​ថា​កំហុស​នេះ​អាច​បើក​ការ​វាយ​ប្រហារ​តាម​អ៊ីនធឺណិត​ដែល​អាច​បំផ្លិច​បំផ្លាញ​បាន​។​

ដើម្បី​ការពារ​អតិថិជន​របស់ Apple ក្រុមហ៊ុន​មិន​បង្ហាញ​ ពិភាក្សា ឬ​បញ្ជាក់​ពី​សុវត្ថិ​ភាព​ទេ រហូត​ទាល់​តែ​មាន​ការ​ស៊ើប​អង្កេត​កើត​ឡើង ហើយមាន​​ការ​ដោះ​ស្រាយ​ ឬ​ការ​ចេញ​ផ្សាយណា​​ដែល​អាចរកមក​ធ្វើ​ភស្តុតា​ង​បាន។

អ្នក​ជំនាញ​ផ្នែក​សន្តិ​សុខ​តាម​អ៊ីន​ធឺណិត លោក Kurt Knutsson បាន​ចែក​រំលែក​ពីរ​បៀប​ដែល​អ្នក​ប្រើ​ប្រាស់ iPhone អាច​ការពារ​ខ្លួន​ពី​ភាព​ងាយ​រង​គ្រោះ​មួយ​ចំនួន​​បាន​។

លោក Knutsson បាន​សរសេរ​នៅ​លើ​សារព័ត៌មាន​ FOX News ថា​​ការ​អាប់​ដេតកម្មវិធី​មួយ​ចំនួន​​ភ្លាមៗ​គឺ​មាន​សារៈ​សំខាន់​ណាស់ ពីព្រោះ​ការ​វាយ​ប្រហារ​ដែល​គ្មាន​ថ្ងៃ​ត្រឡប់​តែង​តែ​ណែនាំ​ឱ្យ​​​អ្នក​ប្រើ​ប្រាស់​ប្រុង​ប្រយ័ត្ន​ជា​មួយ​នឹង​កម្ម​វិធី​ដែល​ហួស​សម័យ។

ដើម្បី​រក្សា​សុវត្ថិ​ភាព ជៀស​វាង​ការ​ចុច​លើ​តំណ​ដែល​មាន​អ្នក​ផ្ញើ​ឱ្យ​តាមរយៈ SMS, WhatsApp, Telegram ឬអ៊ីមែលជា​ដើម​។

លោក Knutsson បាន​ពន្យល់​ទៀត​ថា ប្រសិន​បើ​តំណ​ភ្ជាប់​ហាក់​ដូច​ជា​គួរ​ឱ្យ​សង្ស័យ គួរ​វាយ​អាសយដ្ឋាន​គេហទំព័រដោយផ្ទាល់​ទៅ​ក្នុង​កម្ម​វិធី​រុក​រក​របស់​អ្នក​ប្រើ​ប្រាស់​ ជំនួស​ឱ្យ​ការ​ចុច​លើវា។

កម្ម​វិធី​សុវត្ថិភាព​ល្អ​ក៏​អាច​ព្រមាន​អ្នក​អំពី email phishing និង ransomware ដោយ​ជួយ​រក្សា​ទិន្ន​ន័យ​ផ្ទាល់​ខ្លួន និង​ទ្រព្យ​សម្បត្តិ​ឌីជីថល​របស់​អ្នក​ឱ្យ​មាន​សុវត្ថិភាព​។

លោក Knutsson បាននិយាយថា ទោះបីជាគ្មានសេវាកម្មណាមួយអាចលុបព័ត៌មានរបស់អ្នកចេញពីអ៊ីនធឺណិតបានទាំងស្រុង ការប្រើសេវាកម្មដកទិន្នន័យខ្លះ​ចេញ​គឺជាជម្រើសដ៏ឆ្លាតវៃ។

តាម​រយៈ​ការ​បង្រួម​ទិន្នន័យ​របស់​​អ្នក​ឱ្យ​តិច​បំផុត វា​កាន់​តែ​ពិបាក​សម្រាប់​អ្នក​បោក​ប្រាស់​ក្នុង​ការ​បញ្ចូល​គ្នា​នូវ​ព័ត៌​មាន​ដែល​បំពាន​ជា​មួយ​នឹង​អ្វី​​ជា​សាធារណៈ​នៅ​លើ​អ៊ីន​ធឺណិត ដោយ​កាត់​បន្ថយ​ហា​និភ័យ​នៃ​ការ​ក្លាយ​ជាគោល​ដៅ​របស់ជន​បោក​ប្រាស់​អនឡាញ​៕​

ប្រែសម្រួល​៖ ណឺ មិនា​

The post ក្រុមហ៊ុន Apple ដាស់តឿន​​ដល់​អ្នកប្រើប្រាស់​​ អំពី​​កម្មវិធី​ថ្មី​​ដើម្បីសុវត្ថិភាព​ appeared first on Kampuchea Thmey Daily.

ពិធីសម្ពោធនេះ រៀបចំឡើង កាលពីថ្ងៃទី ១៥ ខែវិច្ឆិកា ឆ្នាំ ២០២៥ ដែលមជ្ឈមណ្ឌលបច្ចេកវិទ្យាព័ត៌មានបង្កើតឡើងក្រោមការគាំទ្រពីរដ្ឋាភិបាលឥណ្ឌា ក្នុងគម្រោង ផ្តល់ផលរហ័ស។ ពិធីនេះមានការអញ្ជើញចូលរួមពី សម្ដេចព្រះមង្គលទេព្វាចារ្យ វង្ស អានេតា ដែលជាសម្តេចព្រះសង្ឃនាយករង នៃគណៈធម្មយុត្តិកនិកាយ នៃព្រះរាជាណាចក្រកម្ពុជា និងជាសាកលវិទ្យាធិការនៃ សាកលវិទ្យាល័យសម្តេចព្រះមហាសង្ឃរាជបួរគ្រី ក៏ដូចជាវត្តមានដ៏ខ្ពង់ខ្ពស់របស់លោក សុខ ចិន្តាសោភា ឧបនាយករដ្ឋមន្ត្រី និងលោក វ៉ាន់ឡាល់វ៉ាវណា ប៊យធ្លុង (Vanlalvawna Bawitlung) ឯកអគ្គរដ្ឋទូតឥណ្ឌាប្រចាំកម្ពុជា ព្រះថេរានុត្ថេរៈ ភ្ញៀវកិត្តិយស សាស្ត្រាចារ្យ និងនិស្សិតជាច្រើនអង្គ/នាក់។

នាឱកាសនោះ លោកឯកអគ្គរដ្ឋទូត បានគូសបញ្ជាក់ថា ការបង្កើតមជ្ឈមណ្ឌលបច្ចេកវិទ្យាព័ត៌មាននេះ ឆ្លុះបញ្ចាំងពីការប្តេជ្ញាចិត្តជាបន្តបន្ទាប់របស់ឥណ្ឌា ក្នុងការគាំទ្រដល់ការអភិវឌ្ឍវិស័យអប់រំរបស់កម្ពុជា និងពង្រឹងចំណងមិត្តភាពយូរអង្វែងរវាងប្រទេសទាំងពីរ។ លោកបានសង្កត់ធ្ងន់ទៀតថា ព្រះពុទ្ធសាសនា អស់រយៈពេលជាច្រើនសតវត្សមកហើយ បានបម្រើជាស្ពានតភ្ជាប់ចិត្តគំនិត និងវប្បធម៌រវាងប្រទេសឥណ្ឌា និងប្រទេសកម្ពុជា ដែលធ្វើឱ្យការសម្ពោធមជ្ឈមណ្ឌលបច្ចេកវិទ្យានៅក្នុងសាកលវិទ្យាល័យពុទ្ធសាសនាមួយមានអត្ថន័យពិសេស។

លោកបានបន្តទៀតថា មជ្ឈមណ្ឌលនេះនឹងផ្តល់ជូនជំនាញឌីជីថលសំខាន់ៗ ដល់ព្រះសង្ឃ គ្រូបង្រៀន និងនិស្សិត ដើម្បីពង្រីកលទ្ធភាពទទួលបានធនធានសិក្សាសកល និងគាំទ្រដល់ការធ្វើសមាហរណកម្មចំណេះ ជាមួយនឹងបច្ចេកវិទ្យាទំនើប។ លោកឯកអគ្គរដ្ឋទូត ក៏បានរំលឹកផងដែរថា ប្រទេសឥណ្ឌាធ្លាប់បានគាំទ្រដល់ការបង្កើតមជ្ឈមណ្ឌលព័ត៌មានវិទ្យានៅសាកលវិទ្យាល័យពុទ្ធសាសនាសីហមុនីរាជនៅភ្នំពេញ និងបាត់ដំបង ព្រោះថាមជ្ឈមណ្ឌលសិក្សាឌីជីថលអាចជួយលើកកម្ពស់ការផ្តល់ចំណេះដឹងផ្នែកបច្ចេកវិទ្យានៅកម្ពុជាផងដែរ។

ក្រោមក្របខ័ណ្ឌកិច្ចសហប្រតិបត្តិការមេគង្គ-គង្គា ប្រទេសឥណ្ឌាផ្តល់ជំនួយឥតសំណងដើម្បីអនុវត្តគម្រោងផលប៉ះពាល់រហ័សចំនួន ១០ គម្រោងជារៀងរាល់ឆ្នាំនៅក្នុងប្រទេសកម្ពុជា ផ្តោតលើវិស័យអាទិភាពដូចជា ការអប់រំ សុខភាព ការផ្តល់អំណាចដល់ស្ត្រី អនាម័យ និងកសិកម្ម។ រហូតមកដល់បច្ចុប្បន្ន ប្រទេសឥណ្ឌាបានផ្តល់ជំនួយឥតសំណងជាសរុបចំនួន ៦៤ គម្រោងនៅកម្ពុជាដែលក្នុងនោះ ៤៧ គម្រោងត្រូវបានបញ្ចប់ដោយជោគជ័យ ខណៈដែល ១៧ គម្រោងទៀតស្ថិតក្នុងការអនុវត្ត៕

The post សាកលវិទ្យាល័យសម្តេចព្រះមហាសង្ឃរាជបួរគ្រី សម្ពោធមជ្ឈមណ្ឌលបច្ចេកវិទ្យាព័ត៌មាន ផ្តល់ជំនាញឌីជីថលដល់គ្រូបង្រៀន និងនិស្សិត appeared first on Kampuchea Thmey Daily.

សម្រាប់លក្ខខណ្ឌចូលរួម ក្រសួងបញ្ជាក់ថា គ្រូបង្រៀនគ្រឹះស្ថានសាធារណៈ, មានពេលវេលាគ្រប់គ្រាន់សម្រាប់សិក្សា, មានចំណេះដឹងផ្នែកការប្រើប្រាស់អ៊ិនធឺណិត អ៊ីម៉ែល និងកុំព្យូទ័រ និងមានឧបករណ៍ សិក្សាដូចជា កុំព្យូទ័រ កុំព្យូទ័របន្ទះ ទូរសព្ទដៃឆ្លាតវៃ និងអ៊ិនធឺណិត។

សម្រាប់គ្រូបង្រៀនដែលមានចំណាប់អារម្មណ៍ អាចចុះឈ្មោះចូលរៀន ចាប់ពីថ្ងៃជូនដំណឹងរហូតដល់ថ្ងៃទី១៦ ខែកក្កដា ឆ្នាំ២០២៥ វេលាម៉ោង ១៧:០០ នាទី។ កាលបរិច្ឆេទរៀន នៅថ្ងៃទីថ្ងៃទី១៧ ខែកក្កដា ឆ្នាំ២០២៥ ចាប់ពីវេលាម៉ោង ៨:០០ ព្រឹក។ បន្ទាប់ពីបញ្ចប់ វគ្គបណ្ដុះបណ្ដាលដោយជោគជ័យសិក្ខាកាម នឹងទទួលបានវិញ្ញាបនបត្របញ្ជាក់ការសិក្សា ចេញដោយនាយកដ្ឋានបរិវត្តកម្មឌីជីថល នៃក្រសួងអប់រំ យុវជន និងកីឡា។

ហេតុនេះអ្នកដែលមានចំណាប់អារម្មណ៍ អាចចុះឈ្មោះតាមរយៈ (https://link.moeys.gov.kh/onlinecourse )។ សម្រាប់ព័ត៌មានបន្ថែម អាចទាក់ទងតាមតេឡេក្រាម  066 901 800 ឬ អ៊ីមែល៖ dit.ecd@moeys.gov.kh ។

សូមជម្រាបថា វគ្គបណ្តុះបណ្តាលនេះ នឹងផ្តល់ប្រយោជន៍ដល់សិក្ខាកាមដូចជា ណែនាំវិធីសាស្ត្រនៃការប្រើប្រាស់ថ្នាលអប់រំឌីជីថលផ្លូវការរបស់ក្រសួង សម្រាប់ជំនួយស្វ័យអភិវឌ្ឍន៍សមត្ថភាពគ្រូបង្រៀន, ពង្រឹងសមត្ថភាពលោកគ្រូ អ្នកគ្រូ ក្នុងការលើកកម្ពស់វិធីសាស្ត្របង្រៀនដោយផ្សារភ្ជាប់ជាមួយបច្ចេកវិទ្យាឌីជីថល, រៀន និងបង្រៀនជាមួយកម្មវិធីថ្មីៗដើម្បីទទួលបានប្រសិទ្ធភាពកាន់តែប្រសើរ និងមានភាពងាយស្រួល៕

The post ក្រសួងអប់រំ ជ្រើសរើសគ្រូបង្រៀនចូលរួមវគ្គបណ្ដុះបណ្ដាល ពីបច្ចេកវិទ្យាឌីជីថល ដើម្បីជំនួយដល់ការបង្រៀន appeared first on Kampuchea Thmey Daily.