ជាក់ស្ដែង​កាលពី​វេលា​ម៉ោង ៨ ព្រឹក ថ្ងៃ​ទី ១៨ ខែ​កុម្ភៈ ឆ្នាំ ២០២៦ នេះ នគរបាល​ខណ្ឌ​មានជ័យ សហការ​ជាមួយ​រដ្ឋបាល​សង្កាត់​ស្ទឹងមានជ័យ​ទី ២ បាន​បន្ត​ចុះ​ផ្សព្វផ្សាយ​ផល​ប៉ះពាល់ នៃ​ការ​ប្រើប្រាស់​សារធាតុ​ញៀន បារី​អេឡិចត្រូនិក បញ្ហា​ក្មេង​ទំនើង ទៅកាន់​សិស្សានុសិស្ស ដើម្បី​ជៀស​ឲ្យ​ឆ្ងាយ​ពី​បញ្ហា​ទាំងអស់​នេះ នៅ​ចំណុច​សាលា​បឋមសិក្សា​ភូមិ​ឫស្សី ផ្លូវ ២១៧ ភូមិ​ឫស្សី សង្កាត់​ស្ទឹងមានជ័យ​ទី ២ ខណ្ឌ​មានជ័យ រាជធានី​ភ្នំពេញ។

លោក​វរសេនីយ៍ត្រី តឹក បូ​រិ​ន មេ​ប៉ុស្តិ៍​ស្ទឹងមានជ័យ​ទី ២ បាន​ឲ្យ​ដឹង​ថា ដោយ​អនុវត្ត​តាម​ទិសដៅ​របស់​លោក​ឧត្ដមសេនីយ៍​ឯក ជួន ណារិន្ទ ស្នងការ​នគរបាល​រាជធានី​ភ្នំពេញ កម្លាំង​ប៉ុស្តិ៍​នគរបាល​រដ្ឋបាល​ស្ទឹងមានជ័យ​ទី ២ សហការ​ជាមួយ លោក​ចៅសង្កាត់ ទូច សំអុល និង លោកគ្រូ​នាយក​សាលា បាន​ចុះ​ធ្វើ​វេទិកា​ផ្សព្វផ្សាយ​អំពី ភូមិ ឃុំ សង្កាត់ មាន​សុវត្ថិភាព ផល​ប៉ះពាល់ នៃ​គ្រឿង​ញៀន បារី​អេឡិចត្រូនិក និង​ក្មេង​ទំនើង ជូន​ដល់​សិស្សានុសិស្ស​ចំនួន ៩៦០ នាក់ ក្នុង​នោះ សិស្ស​ស្រី ៤៧៥ នាក់ ដើម្បី​បញ្ជ្រាប​ការ​យល់ដឹង​ឲ្យ​បាន​ប្រសើរ ជៀសវាង​ដើរ​ផ្លូវ​ខុស ប្រឈម​ការ​ដាក់​ទោស​ទណ្ឌ​ចំពោះ​មុខ​ច្បាប់។

មេ​ប៉ុស្តិ៍​ស្ទឹងមានជ័យ​ទី ២ ក៏បាន​អំពាវនាវ​ដល់​អាណាព្យាបាល​សិស្ស​គ្រប់រូប ត្រូវ​ត្រួតពិនិត្យ​ការ​សិក្សា​របស់​កូនៗ និង​ទូន្មាន​ជៀស​ឲ្យ​ឆ្ងាយ​ពី​គ្រឿងញៀន ដើម្បី​ក្លាយ​ជា​កូន​ល្អ​សម្រាប់​គ្រួសារ និង​ក្លាយ​ជា​យុវជន​គំរូ​របស់​សង្គម៕

អត្ថបទ ៖ រដ្ឋា

The post នគរបាលខណ្ឌមានជ័យ ចុះផ្សព្វផ្សាយបញ្ហាគ្រឿងញៀន ក្មេងទំនើង បារីអេឡិចត្រូនិក ដល់សិស្សបឋមសិក្សាភូមិឫស្សី ជិត ១ ពាន់នាក់ appeared first on Kampuchea Thmey Daily.

លោក​វរសេនីយ៍ត្រី ជ្រេង ធី នាយប៉ុស្តិ៍នគរបាលរដ្ឋបាលកាកាបទី២​ បានឱ្យដឹងថា​ ការចុះផ្សព្វផ្សាយពីផលប៉ះពាល់ពីបញ្ហាគ្រឿងញៀននេះ ធ្វើឡើងក្រោមការចង្អុលបង្ហាញពីលោកវរសេនីយ៍ឯក ម៉ន វុធី អធិការនគរបាលខណ្ឌពោធិ៍សែនជ័យ ដឹកនាំពីលោកវរសេនីយ៍ត្រី ជឿន សារ៉ុម អធិការរងទទួលផែនគ្រឿងញៀន​បានចុះធ្វេីការផ្សព្វផ្សាយបញ្ហាគ្រឿងញៀនដល់សិស្សានុសិស្សដែលរៀននៅសាលាមីគីវ៉េ​ ស្ថិតនៅផ្លូវសហពន្ធ័រុស្សុី ភូមិក្បាលដំរី២ សង្កាត់ កាកាបទី២ ដេីម្បីស្វែងយល់ឱ្យច្បាស់ និងចៀសឱ្យផ្សាយពីគ្រឿងញៀន​ និងការប្រើប្រាស់បារីអេឡិចត្រូនិច។

ជាមួយគ្នានោះផងដែរ​ កម្លាំងសមត្ថកិច្ចក៏បានណែនាំអំពីបញ្ហា​ក្មេងទំនើង ច្បាប់ចរាចរណ៍​ ភូមិឃុំមានសុវត្ថិភាព និងបញ្ហាមួយចំនួនទៀត ដែលមានសិស្សចូលរួមសរុបចំនួន ៦០នាក់ ស្រី ២៦នាក់៕

អត្ថបទ៖ សុខា

The post នគរបាលប៉ុស្តិ៍កាកាបទី២ ចុះផ្សព្វផ្សាយបញ្ហាគ្រឿងញៀនដល់សិស្សានុសិស្សក្នុងមូលដ្ឋាន appeared first on Kampuchea Thmey Daily.

លោកបានលើកឡើងបែបនេះ ក្នុងពិធីផ្សព្វផ្សាយច្បាប់ ស្ដីពីច្បាប់ចរាចរណ៍ផ្លូវគោក និងគ្រឿងញៀន ដើម្បីជំរុញការធានាសុវត្ថិភាព សណ្ដាប់ធ្នាប់ចរាចរណ៍ សុខភាពសាធារណៈ និងបង្ការទប់ស្កាត់ប្រយុទ្ធប្រឆាំងបទល្មើសគ្រឿងញៀន លើកកម្ពស់សុខុមាលភាពសង្គម និងជំរុញឱ្យជីវភាពប្រជាពលរដ្ឋក្នុងសហគមន៍កាន់តែល្អប្រសើរ ដែលសហការរៀបចំដោយ មន្ទីរអធិការកិច្ចខេត្តសៀមរាប និងអាជ្ញាធរក្រុងរុនតាឯកតេជោសែន នៅថ្ងៃទី០៤ ខែមិថុនា ឆ្នាំ២០២៥។

លោក ម៉ៅ ឧស្សាហ៍ បានលើកឡើងបន្តថា ត្រូវនិយាយថាទេចំពោះគ្រឿងញៀន កាត់បន្ថយគ្រោះថ្នាក់ចរាចរណ៍ គឺចូលរួមកាត់បន្ថយភាពក្រីក្រ។ ពាក្យស្លោកទាំងពីរនេះ បានឆ្លុះបញ្ចាំងអំពីការចូលរួមរបស់ប្រជាពលរដ្ឋ ក្នុងការចៀសឱ្យឆ្ងាយពីគ្រឿងញៀន គោរពច្បាប់ចរាចរណ៍ ដើម្បីកែលម្អគុណភាពជីវិតដែលជាគោលដៅរួមនៃការ អភិវឌ្ឍន៍សង្គមជាតិប្រកបដោយចីរភាព ស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ដែលមានបាវចនា៥ គឺកំណើន ការងារ សមធម៌ ប្រសិទ្ធភាព និងចីរភាព។

ចំណែក លោក លឹម ភក្តី ប្រធានមន្ទីរអធិការកិច្ចខេត្ត មានប្រសាសន៍ថា ច្បាប់ស្ដីពីចរាចរណ៍ផ្លូវគោកមាន១២ជំពូក និង៩២មាត្រា មានសារៈសំខាន់ណាស់សម្រាប់ប្រជាពលរដ្ឋ ដែលត្រូវតែគោរព និងប្រតិបត្តិឱ្យបានខ្ជាប់ខ្ជួន ព្រោះបើយើងគ្រប់រូបធ្វេសប្រហែសតែបន្តិច អាចនឹងបាត់បង់ជីវិត រងរបួស ពិការ ឬក៏អាចមានទោស និងខាតបង់ថវិកា។ ហេតុនេះលោកស្នើដល់អ្នកបើកបរទាំងអស់ត្រូវមានការយោគយល់ និងអធ្យាស្រ័យ បើកបរត្រូវគោរពសិទ្ធិអាទិភាព គោរពផ្លាកសញ្ញា ភ្លើងសញ្ញាគ្រប់ពេលវេលា ដើម្បីកាត់បន្ថយនូវហានិភ័យដោយសារគ្រោះថ្នាក់។

លោកបន្តថា ស្របនឹងបញ្ហាគ្រោះថ្នាក់ចរាចរណ៍ បញ្ហាគ្រឿងញៀន គឺជាអន្ទាក់ក៏គ្រោះថ្នាក់ សម្រាប់មនុស្សគ្រប់រូប ផ្ដល់ផលអាក្រក់ចំពោះអ្នកប្រព្រឹត្តិ គ្រួសារ សហគមន៍ និងសង្គមជាតិ។ ដូច្នេះលោកសូមអំពាវនាវដល់គ្រប់បណ្ដាមន្ទីរស្ថាប័ន ជាពិសេសអង្គភាពជំនាញ ត្រូវមានផែនការគ្រប់គ្រង និងអនុវត្តច្បាប់ឱ្យបានច្បាស់លាស់គ្រប់ជ្រុងជ្រោយ ព្រមទាំងជួយផ្សព្វផ្សាយបន្តដល់ប្រជាពលរដ្ឋឱ្យបានយល់ដឹងអំពីច្បាប់នេះ ហើយសូមឱ្យសិស្សានុសិស្ស ត្រូវជៀសឱ្យឆ្ងាយពីគ្រឿងញៀន ត្រូវខិតខំរៀនសូត្រ ដើម្បីក្លាយខ្លួនទៅជាមិត្តល្អ សិស្សល្អ កូនល្អ និងដើម្បីធ្វើជាទំពាំងដ៏ល្អ ក្នុងការស្នងឫស្សីនាពេលអនាគត៕

ដោយ៖ គឿនវេត

The post បញ្ហាគ្រោះថ្នាក់ចរាចរណ៍ និងគ្រឿងញៀន ជាបញ្ហាសង្គមជាតិទាំងមូល ដែលតម្រូវឱ្យគ្រប់ភាគីពាក់ព័ន្ធចូលរួមលុបបំបាត់ appeared first on Kampuchea Thmey Daily.

ថ្លែងនៅក្នុងពិធីប្រកាសសមាសភាពគណៈកម្មា​ធិការសម្របសម្រួលជំរុញ អនុវត្ត និងត្រួតពិនិត្យការងារប្រយុទ្ធប្រឆាំងគ្រឿងញៀន នៃក្រសួងមហាផ្ទៃ កាលពីរសៀលថ្ងៃទី៣០ ខែកក្កដា ឆ្នាំ២០២៤ លោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ បានបញ្ជាក់ថា ការងារប្រយុទ្ធប្រឆាំងគ្រឿងញៀន គឺជាការងារអាទិភាពរបស់រាជរដ្ឋាភិបាល នីតិកាលទី៧ ដោយត្រូវតែឈានដល់ការបោសសម្អាតគ្រឿងញៀននៅកម្ពុជា ពិសេសការដាក់ចេញនូវបទបញ្ជាម៉ឺងម៉ាត់ ០១បប «សម្អាតចកចេញពីបឹង» របស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា។

ជាការកត់សម្គាល់របស់លោកឧបនាយករដ្ឋមន្ត្រី ស សុខា ស្ថានភាពគ្រឿងញៀននៅកម្ពុជាមានការវិវត្តប្រែប្រួលយ៉ាងខ្លាំងគួរឱ្យកត់សម្គាល់ និងព្រួយបារម្ភ ដោយបរិមាណគ្រឿងញៀនដែលសមត្ថកិច្ចបង្ក្រាបបានមានចំនួនកាន់តែច្រើនជារៀងរាល់ឆ្នាំ។ ឯការកែច្នៃផលិតក្នុងរូបភាពទ្រង់ទ្រាយធំ ក៏ត្រូវបានរកឃើញ និងបង្ក្រាបបានជាបន្តបន្ទាប់ ខណៈប្រភេទគ្រឿងញៀន ដែលបានកែច្នៃផលិត និងប្រើប្រាស់ភាគច្រើនជាប្រភេទ ICE មិនមែនប្រភេទគ្រាប់ដូចមុន។

លោក បញ្ជាក់ថា ការថយចុះនូវវត្តមានប្រភេទគ្រាប់ និងកើនឡើងនូវវត្តមានប្រភេទ ICE គឺកាន់តែបង្កគ្រោះថ្នាក់ធ្ងន់ធ្ងរសម្រាប់អ្នកប្រើប្រាស់។

ដើម្បីប្រយុទ្ធប្រឆាំងគ្រឿងញៀននៅកម្ពុជា លោក ស សុខា លើកឡើងថា រាជរដ្ឋាភិបាល ក៏ដូចជាអាជ្ញាធរជាតិប្រយុទ្ធប្រឆាំងគ្រឿងញៀន និងអគ្គស្នងការដ្ឋាននគរបាលជាតិ បានដាក់ចេញនូវបទបញ្ជាគោលការណ៍ណែនាំ និងផែនការនានាសំដៅធ្វើឱ្យការងារប្រយុទ្ធប្រឆាំងគ្រឿងញៀនឱ្យមានប្រសិទ្ធភាព ក្នុងនោះរួមមាន៖ ផែនការជាតិស្ដីពីការប្រយុទ្ធប្រឆាំងគ្រឿងញៀន គោលនយោបាយភូមិឃុំសង្កាត់មានសុវត្ថិភាព សេចក្ដីណែនាំស្តីពីការរៀបចំយន្តការត្រួតពិនិត្យគ្រឿងញៀនថ្នាក់រាជធានីខេត្ត ដល់ខណ្ឌក្រុងស្រុក និងសង្កាត់/ឃុំ បទបញ្ជាលេខ០១បបរបស់រាជរដ្ឋាភិបាលស្តីពីការពង្រឹងវិធានការប្រយុទ្ធប្រឆាំងគ្រឿងញៀន និងផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ និងសេចក្តីព្រាងគោលនយោបាយភូមិ ឃុំ ស គ្មានគ្រឿងញៀន។

លោករដ្ឋមន្ត្រីក្រសួងមហាផ្ទៃ ថែមទាំងបានណែនាំឱ្យថ្នាក់ដឹកនាំ និងមន្ត្រីទាំងអស់ ត្រូវបន្តយកចិត្តទុកដាក់អនុវត្តឱ្យមានប្រសិទ្ធភាពខ្ពស់នូវខ្លឹមសារបទបញ្ជាលេខ០១បប ស្តីពីការដាក់ចេញវិធានការម៉ឺងម៉ាត់ក្នុងការប្រយុទ្ធប្រឆាំងគ្រឿងញៀនខុសច្បាប់នៅតាមក្រសួងស្ថាប័ន និងរដ្ឋបាលថ្នាក់ក្រោមជាតិ​។ ទន្ទឹមនេះត្រូវបន្តយកចិត្តទុកដាក់អនុវត្តគោលនយោបាយភូមិឃុំសង្កាត់មានសុវត្ថិភាព គឺគ្មានបទល្មើសលួច ឆក់ ប្លន់ គ្រឿងញៀន ល្បែងស៊ីសងខុសច្បាប់ និងបទល្មើសគ្រប់ប្រភេទ ស្របតាមទិសស្លោក ៣កុំ ១រាយការណ៍ គឺកុំពាក់ព័ន្ធ កុំអន្តរាគមន៍ កុំបន្ធូរបន្ថយ និងត្រូវរាយការណ៍។

ដោយឡែក នៅក្នុងក្របខណ្ឌអង្គភាពចំណុះក្រសួងមហាផ្ទៃ និងរដ្ឋបាលរាជធានីខេត្តទាំងអស់ លោក ស សុខា បានណែនាំដល់មន្រ្តីទាំងអស់ ទាំងស៊ីវិល នគរបាលជាតិ និងមន្ត្រីពន្ធនាគារ បានយល់ដឹងពីផលប៉ះពាល់ និងគ្រោះថ្នាក់នៃគ្រឿងញៀន ដើម្បីការពារទាំងខ្លួនឯង និងសមាជិកក្រុមគ្រួសារពីអន្ទាក់នៃគ្រឿងញៀន និងធ្វើយុទ្ធនាការផ្សព្វផ្សាយអប់រំនៅតាមគោលដៅកម្សាន្តនានាដែលជាទីពេញនិយមរបស់យុវវ័យ ជាអាទិ៍ តាមផ្សារទំនើប ក្លឹបកម្សាន្ត KTV និងរោងភាពយន្តជាប់ប្រចាំ ដើម្បីបញ្ជ្រាបនូវការយល់ដឹងអំពីឥទ្ធិពលអវិជ្ជមានពីការប្រើប្រាស់គ្រឿងញៀន៕

The post រដ្ឋមន្ត្រីមហាផ្ទៃ ឱ្យប្រកាន់គោលការណ៍សម្អាតផ្ទះ -សម្អាតបឹង ក្នុងការបោសសម្អាតគ្រឿងញៀន appeared first on Kampuchea Thmey Daily.

ជាមួយនឹងការបន្តអនុវត្តអភិក្រម «ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់» របស់សម្តេចតេជោ ហ៊ុន សែន អតីតនាយករដ្ឋមន្ត្រី រាជរដ្ឋាភិបាលក៏បានដាក់ចេញគោលការណ៍ «សម្អាតផ្ទះយើង» ដើម្បីឱ្យក្រសួងស្ថាប័នពង្រឹងគុណភាពធនធានមនុស្សប្រកបដោយគុណាធិបតេយ្យ ភាពស្អាតស្អំ និងភាពជាគំរូនៃការអនុវត្តច្បាប់ តាមរយៈបទបញ្ជាក្នុងការមានវិធានការម៉ឺងម៉ាត់ចំពោះមន្ត្រីរាជការស៊ីវិល មន្ត្រីនគរបាលជាតិ យោធិន និងមន្ត្រីជាប់កិច្ចសន្យា ដែលជាប់ពាក់ព័ន្ធនឹងការប្រើប្រាស់ និងបទល្មើសគ្រឿងញៀនខុសច្បាប់ ដើម្បី «សម្អាតចកកខ្វក់ចេញពីផ្ទៃបឹង និងរក្សាផ្ទៃបឹងឱ្យថ្លាជាប្រចាំ»។ នេះជាសាររបស់សម្ដេចធិបតី ហ៊ុន ម៉ាណែត ក្នុងឱកាសទិវាអន្តរជាតិប្រយុទ្ធប្រឆាំងគ្រឿងញៀន ថ្ងៃទី២៦ ខែមិថុនា ឆ្នាំ២០២៤។

សម្ដេចធិបតី បញ្ជាឱ្យគ្រប់ភាគីពាក់ព័ន្ធត្រូវបន្តអនុវត្តគោលការណ៍ «សម្អាតផ្ទះយើង» និង «សម្អាតចកចេញពីផ្ទៃបឹង» ដោយត្រូវបង្កើនការត្រួតពិនិត្យជាប្រចាំមន្ត្រីនៃក្រសួងស្ថាប័នថ្នាក់ជាតិ និងរដ្ឋបាលថ្នាក់ក្រោមជាតិ និងមានវិធានការម៉ឺងម៉ាត់ចំពោះការពាក់ព័ន្ធនឹងគ្រឿងញៀន ដើម្បីលើកកម្ពស់ទំនុកចិត្ត ប្រសិទ្ធភាពការងារ អភិបាលកិច្ចល្អ និងភាពស្អាតស្អំ។ ចំពោះគណៈបញ្ជាការឯកភាពរាជធានីខេត្ត ត្រូវបន្តពង្រឹងអនុវត្តគោលនយោបាយ «ភូមិឃុំសង្កាត់មានសុវត្ថិភាព» ដោយត្រូវលុបបំបាត់ការចែកចាយ និងប្រើប្រាស់គ្រឿងញៀនក្នុងសហគមន៍ ជាពិសេសតាមក្លឹបកម្សាន្ត និងទីតាំងសប្បាយដ្ឋាននានា ដោយត្រូវឈរលើស្មារតី «៣កុំ និង១រាយការណ៍» គឺកុំពាក់ព័ន្ធ កុំអន្តរាគមន៍ កុំបន្ធូរបន្ថយ និងត្រូវរាយការណ៍។

សម្ដេចធិបតី ហ៊ុន ម៉ាណែត ក៏បានណែនាំដល់គណៈបញ្ជាការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ ត្រូវបន្តយកចិត្តទុកដាក់ពង្រឹងតួនាទី និងភារកិច្ចរបស់ខ្លួន ដោយអនុវត្តតាមភារកិច្ច និងការទទួលខុសត្រូវរបស់ក្រសួង ស្ថាប័ន និងអង្គភាពពាក់ព័ន្ធទាំងនៅថ្នាក់ជាតិ និងថ្នាក់ក្រោមជាតិ ដើម្បីម្ចាស់ការអនុវត្តតាមដែនសមត្ថកិច្ចរបស់ខ្លួនឱ្យមានប្រសិទ្ធភាពខ្ពស់។

ដោយការងារផ្សព្វផ្សាយ និងអប់រំ គឺជាកម្លាំងចលករមិនអាចខ្វះបានផងនោះ សម្ដេចធិបតីនាយករដ្ឋមន្ត្រី បានណែនាំឱ្យមានការចូលរួមផ្សព្វផ្សាយ ជំរុញលើកទឹកចិត្តដល់សិស្ស និស្សិត យុវជន មាតាបិតា អាណាព្យាបាល កម្មករ និយោជិត និយោជក វិស័យឯកជន និងសាធារណជនទូទៅ ឱ្យបានយល់ដឹងស៊ីជម្រៅកាន់តែច្បាស់អំពីផលប៉ះពាល់ គ្រោះថ្នាក់ និងវិនាសកម្មនៃគ្រឿងញៀន ដោយ «ត្រូវនិយាយថាទេដាច់ខាតចំពោះគ្រឿងញៀន»។ ក្នុងនោះ សម្រាប់គ្រួសារ ដែលមានអ្នកញៀនគ្រឿងញៀន និងក្រសួងស្ថាប័ន ដែលមានមន្ត្រីជាអ្នកញៀនគ្រឿងញៀន ត្រូវលើកទឹកចិត្តឱ្យទៅទទួលការបន្សាប ព្យាបាល និងស្តារនីតិសម្បទា ដើម្បីមានឱកាសធ្វើសមាហរណកម្មចូលក្នុងសង្គមវិញ។

លើសពីនេះ ចូលរួមទាញយក និងប្រើប្រាស់ឱ្យបានទូលាយនូវកម្មវិធីទូរសព្ទដៃ NoDrug របស់អាជ្ញាធរជាតិប្រយុទ្ធប្រឆាំងគ្រឿងញៀន ដើម្បីទទួលបានការអប់រំ ខ្លឹមសារមេរៀន ព័ត៌មាន សេវាព្យាបាលនិងស្តារនីតិសម្បទា និងរាយការណ៍មកសមត្ថកិច្ចក្នុងករណីមានការប្រើប្រាស់ ឬចែកចាយគ្រឿងញៀនក្នុងសហគមន៍៕

The post បញ្ហាគ្រឿងញៀន៖ សម្ដេច ហ៊ុន ម៉ាណែត ឱ្យបន្តអនុវត្តគោលការណ៍ «សម្អាតផ្ទះយើង» និង «សម្អាតចកចេញពីផ្ទៃបឹង» appeared first on Kampuchea Thmey Daily.

រាជរដ្ឋាភិបាល ស្ថិតក្រោមការដឹកនាំរបស់សម្ដេចធិបតី ហ៊ុន ម៉ាណែត បានប្តេជ្ញាចិត្តបន្តដើរតាមមាគ៌ារបស់សម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា ដោយបន្តចាត់ទុកការងារប្រយុទ្ធប្រឆាំងគ្រឿងញៀន ជាទិសដៅអាទិភាពតាម រយៈការដាក់បញ្ចូលការងារប្រយុទ្ធប្រឆាំងគ្រឿងញៀន ក្នុងបរិស្ថានគ្របដណ្តប់នៃស្នូលយុទ្ធសាស្ត្របញ្ចកោណ ដំណាក់កាលទី១ វិធានការគន្លឹះទាំង៥ និងគោលនយោបាយភូមិ ឃុំ សង្កាត់ មានសុវត្ថិភាព ដើម្បីបន្តពង្រឹងសន្តិភាព ស្ថិរភាពនយោបាយ សន្តិសុខសង្គម និងសណ្តាប់ធ្នាប់សាធារណៈ លើកកម្ពស់សុខុមាលភាពពលរដ្ឋ និងភាពសុខុដុមរមនាក្នុងសង្គមជាតិ ព្រមទាំងបានបន្តចូលរួមយ៉ាងសកម្មក្នុងគ្រប់យន្តការអន្តរជាតិ ទាំងក្នុងក្របខ័ណ្ឌ ទ្វេភាគី ពហុភាគី នៅក្នុងអនុតំបន់ តំបន់ និងលើសកលលោក។

នេះជាការបញ្ជាក់ជាថ្មីពីការប្តេជ្ញាចិត្ត និងឆន្ទៈដ៏មោះមុតបំផុតរបស់ប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត ក្នុងឱកាសនៃទិវាអន្តរជាតិប្រយុទ្ធប្រឆាំងគ្រឿងញៀន ថ្ងៃទី២៦ ខែមិថុនា ឆ្នាំ២០២៤។ តាមរយៈសារលិខិត ចុះថ្ងៃទី២០ ខែមិថុនា សម្ដេចធិបតី បានលើកឡើងថា «ក្នុងនាមជាភាគីហត្ថលេខីនៃអនុសញ្ញា និងពិធីសារនានា ខ្ញុំសូមធ្វើការប្តេជ្ញាចិត្ត និងបង្ហាញពីឆន្ទៈដ៏មោះមុតបំផុត ដោយតម្កល់ការងារប្រយុទ្ធប្រឆាំងគ្រឿងញៀន ជាអាទិភាពខ្ពស់មួយរបស់រាជរដ្ឋាភិបាល នីតិកាលទី៧ នៃរដ្ឋសភា ដើម្បីឈានទៅសម្រេចទស្សនវិស័យច្បាស់លាស់ក្នុងការកសាងកម្ពុជា ទៅជាប្រទេសមួយដែលគ្រឿងញៀនលែងជាឧបសគ្គនិងបញ្ហារបស់សង្គមជាតិ»។

សម្ដេចធិបតី បានបញ្ជាក់បន្តថា អាជ្ញាធរជាតិប្រយុទ្ធប្រឆាំងគ្រឿងញៀន អាណត្តិថ្មីនេះ ត្រូវបានមតិជាតិ និងអន្តរជាតិទទួលស្គាល់ថា ជាយន្តការដ៏រឹងមាំនិងប្រកបដោយវិសាលភាពធំធេង តាមរយៈការធ្វើកំណែទម្រង់ក្បាលម៉ាស៊ីនដឹកនាំ ដោយមានការដឹកនាំដោយឧបនាយករដ្ឋមន្ត្រីចំនួន៤រូប ជាប្រធាន អនុប្រធាន រួមជាមួយថ្នាក់ដឹកនាំក្រសួងស្ថាប័នមួយចំនួនទៀត ជាសមាជិក និងបានបង្កើតគណៈបញ្ជាការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ ដើម្បីឱ្យការងារប្រយុទ្ធប្រឆាំងគ្រឿងញៀនមានភាពរឹងមាំ មុតស្រួច ស៊ីជម្រៅ ទូលំទូលាយ និងគ្រប់ជ្រុងជ្រោយ ឆ្លើយតបប្រកបដោយប្រសិទ្ធភាពនិងស័ក្តិសិទ្ធិភាពទៅនឹងស្ថានភាពជាក់ស្តែងនៃបញ្ហាគ្រឿងញៀន ទាំងនៅកម្រិតថ្នាក់ជាតិនិងអន្តរជាតិ។

សម្ដេចនាយករដ្ឋមន្ត្រី បានសង្កត់ធ្ងន់ថា ជាមួយនឹងការបន្តអនុវត្តមរតកអភិក្រម «ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់» របស់សម្តេចតេជោ ហ៊ុន សែន រាជរដ្ឋាភិបាល ក៏បានដាក់ចេញគោលការណ៍ «សម្អាតផ្ទះយើង» ដើម្បីឱ្យក្រសួង ស្ថាប័ន ពង្រឹងគុណភាពធនធានមនុស្សប្រកបដោយគុណាធិបតេយ្យ ភាពស្អាតស្អំ និងភាពជាគំរូ នៃការអនុវត្តច្បាប់ តាមរយៈបទបញ្ជាលេខ០១ បប ក្នុងវិធានការម៉ឺងម៉ាត់ និងបទបញ្ជាដាច់ខាតចំពោះមន្ត្រីរាជការស៊ីវិល នគរបាលជាតិ យោធិន និងមន្ត្រីជាប់កិច្ចសន្យា ដែលជាប់ពាក់ព័ន្ធនឹងការប្រើប្រាស់ និងបទល្មើសគ្រឿងញៀនខុសច្បាប់។ ក្នុងនោះ បើករណីមានរកឃើញថា មន្ត្រីរដ្ឋមានជាប់ពាក់ព័ន្ធនឹងបញ្ហាគ្រឿងញៀន ត្រូវចាត់វិធានការបញ្ចប់មុខតំណែង និងបណ្តេញចេញពីក្របខ័ណ្ឌដោយគ្មានការលើកលែង ព្រមទាំងទទួលការអនុវត្តទណ្ឌកម្មព្រហ្មទណ្ឌ តាមច្បាប់ជាធរមាន ដើម្បី «សម្អាតចកកខ្វក់ចេញពីផ្ទៃបឹង និងរក្សាផ្ទៃបឹងឱ្យថ្លាជាប្រចាំ»។

ជាការកត់សម្គាល់ តាមរយៈយន្តការ និងវិធានការទាំងនេះ បទល្មើសគ្រឿងញៀនជាច្រើនពាន់ករណីត្រូវបានបង្ក្រាបក្នុងឆ្នាំ២០២៣ និងដើមឆ្នាំ២០២៤ កន្លងទៅនេះ ដោយចាប់បានគ្រឿងញៀន និងឧបករណ៍ពាក់ព័ន្ធគ្រប់ប្រភេទ ព្រមទាំងសារធាតុគីមីផ្សំ ជាច្រើនតោនត្រូវបានចាប់យក ហើយជនសង្ស័យជាច្រើនពាន់នាក់ត្រូវបានឃាត់ខ្លួន និងបញ្ជូនទៅតុលាការ ដើម្បីផ្តន្ទាទោសតាមច្បាប់៕

The post សម្ដេចធិបតី ប្ដេជ្ញាកសាងកម្ពុជា ទៅជាប្រទេសដែលគ្រឿងញៀនលែងជាឧបសគ្គ និងបញ្ហារបស់សង្គមជាតិ appeared first on Kampuchea Thmey Daily.

លោករដ្ឋមន្ត្រីបានថ្លែងថា តាមពិតកន្លងមក រាជរដ្ឋាភិបាល ដែលមានអាជ្ញាធរជាតិប្រយុទ្ធប្រឆាំងគ្រឿងញៀន និងគណៈបញ្ជាការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ ជាសេនាធិការ ព្រមទាំងមានក្រសួង ស្ថាប័ន អង្គភាព និងគណៈកម្មាធិការត្រួតពិនិត្យគ្រឿងញៀនរាជធានីខេត្ត ជាសមាជិក បានយកចិត្តទុកដាក់ប្រើប្រាស់គ្រប់យុទ្ធសាស្រ្ត និងវិធានការ ក្នុងការបង្ការ ទប់ស្កាត់ បង្រ្កាប និងដោះស្រាយរាល់បញ្ហាដែលមានការពាក់ព័ន្ធនឹងគ្រឿងញៀន រហូតទទួលបានលទ្ធផលជោគជ័យគួរជាទីកត់សំគាល់។ ប៉ុន្តែ ទោះបីជាយ៉ាងណាក៏ដោយ ដោយសារស្ថានភាព និងនិន្នាការនៃការដាំដុះ ការផលិត ការចរាចរ និងការជួញដូរគ្រឿងញៀននៅលើសកលលោក នៅក្នុងនិងក្រៅតំបន់ នៅតែមានការសកម្មភាពខ្លាំង រួមផ្សំជាមួយវិបត្តិសេដ្ឋកិច្ច វិបត្តិភូមិសាស្រ្តនយោបាយ ក៏ដូចជាភាពអសន្តិសុខ និងសង្រ្គាមនៅក្នុងនិងក្រៅតំបន់ ធ្វើឱ្យកម្ពុជានៅតែបន្តប្រឈមទៅនឹងបញ្ហាគ្រឿងញៀនដដែល។

ម្យ៉ាងវិញទៀត ប្រជាពលរដ្ឋមួយចំនួន ដែលបានធ្លាក់ខ្លួនទៅប្រើប្រាស់ ហើយក្លាយទៅជាអ្នកញៀនគ្រឿងញៀន រួមផ្សំជាមួយអ្នកមួយចំនួនទៀត ដែលពុំទាន់យល់ច្បាស់ពីផលប៉ះពាល់ និងគ្រោះថ្នាក់នៃគ្រឿងញៀន ធ្វើឱ្យកម្ពុជានៅតែជាទីផ្សារនៃតម្រូវការមួយ ដែលធ្វើឱ្យក្រុមឧក្រិដ្ឋជន និងក្រុមជនខិលខូចបន្តប្រើប្រាស់គ្រប់ល្បិចកល និងមធ្យោយោបាយ  ដើម្បីលួចលាក់ចរាចរគ្រឿងញៀនពីក្រៅចូលមកកម្ពុជាជាបន្តទៀត។ ដូច្នេះ ដើម្បីដោះស្រាយបញ្ហានេះ គឺត្រូវតែបន្តសកម្មភាពផ្សព្វផ្សាយអប់រំឱ្យបានកាន់តែសកម្ម និងទូលំទូលាយថែមទៀត។

លោក នេត្រ ភក្ត្រា បានបញ្ជាក់ថា ការរៀបចំពិធីថ្ងៃនេះ គឺចង់បង្ហាញពីសមិទ្ធផលថ្មីមួយទៀត កើតចេញពីកិច្ចខំប្រឹងប្រែងច្នៃប្រឌិតរបស់ក្រុមការងារ គឺកម្មវិធីទូរស័ព្ទដៃ ឬហៅថា APP ដែលមានឈ្មោះថា NO DRUGS  ហើយតាមរយៈកម្មវិធីទូរស័ព្ទដៃនេះ អាចពង្រឹង និងពង្រីកវិសាលភាពនៃការផ្សព្វផ្សាយអប់រំ ឱ្យបានទៅដល់ប្រជាពលរដ្ឋស្ទើរគ្រាប់អ្នកដែលមានទូរស័ព្ទដៃប្រើ មិនថាចាស់ ឬក្មេង នៅទីប្រជុំជន នៅជនបទ ឬនៅក្រៅប្រទេសឡើយ ពួកគាត់អាចទទួលបានព័ត៌មាន ទទួលបានការអប់រំ និងទទួលបានការកំសាន្តសប្បាយ។

ជាពិសេស អាចចូលរួមជាយោបល់ លើកជាសំណូមពរ ផ្តល់ជាព័ត៌មាន ឬរាយការណ៍ជូនសមត្ថកិច្ចពាក់ព័ន្ធនឹងបទល្មើសគ្រឿងញៀន ដើម្បីទទួលបានការឆ្លើយតប ឬកិច្ចអន្តរាគមន៍តាមបញ្ហាដែលពួកគាត់បានជួបប្រទះ។ ក្នុងនោះរួមទាំងការឆ្លើយតបចំពោះអ្នកដែលមានកូនចៅ ឬញាត្តមិត្តញៀនគ្រឿងញៀន ក៏អាចស្វែងរកព័ត៌មាន និងស្នើសុំកិច្ចអន្តរាគមន៍តាមរយៈកម្មវិធីទូរស័ព្ទដៃនេះផងដែរ។

លើសពីនេះ អ្នកចូលមើល ក៏អាចទទួលបាននូវចំណេះដឹងទូទៅពាក់ព័ន្ធនឹងគ្រឿងញៀន និងចំណេះដឹងពាក់ព័ន្ធនឹងការពង្រឹងសមត្ថភាពបំណិនជីវិត ដែលជាមូលដ្ឋានក្នុងការបង្ការ និងការពារខ្លួន ការពារគ្រួសារ ក៏ដូចជាមិត្តភក្តិ កុំឱ្យពាក់ព័ន្ធ ឬចាញ់ការបោកបញ្ឆោទឱ្យទៅប្រើប្រាស់គ្រឿងញៀន។ រីឯនិស្សិត និងសិស្សានុសិស្ស អាចប្រមូលបានព័ត៌មានជាច្រើន ដែលទៅថ្ងៃខាងមុខនេះ ការយល់ដឹងអំពីគ្រឿងញៀននឹងក្លាយទៅជាវិញ្ញាសារមួយ ដែលត្រូវប្រលងយកពិន្ទុរដែរផងដែរ។ ព្រោះរាល់ឯកសារពាក់ព័ន្ធនឹងគ្រឿងញៀន ពិសេស ឯកសារដែលបានរៀបចំដោយក្រសួងអប់រំ យុវជន និងកីឡា សហការជាមួយអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀននាពេលកន្លងមក គឺបានត្រូវដាក់បញ្ចូលទៅក្នុងកម្មវិធីទូរស័ព្ទដៃនោះ។

គួរជម្រាបថា ការប្រកាសដាក់ឱ្យប្រើប្រាស់កម្មវិធីទូរស័ព្ទដៃ របស់អាជ្ញាធរជាតិប្រយុទ្ធប្រឆាំងគ្រឿងញៀននាពេលនេះ គឺដើម្បីពង្រឹង និងពង្រីកវិសាលភាពនៃការ​ផ្សព្វផ្សាយអប់រំអំពីផលប៉ះពាល់ និងគ្រោះថ្នាក់នៃគ្រឿងញៀនឱ្យបានកាន់តែទូលំទូលាយ និងជ្រូតជ្រាប​​ដល់ប្រជាពលរដ្ឋគ្រប់មជ្ឈដ្ឋាននៅទូទាំងព្រះរាជាណាចក្រកម្ពុជា។ សំដៅ ធ្វើយ៉ាងណាឱ្យពួកគាត់បានយល់ដឹងកាន់តែច្បាស់ និងមានសមត្ថភាពកាន់តែរឹងមាំក្នុងការបង្ការការពារខ្លួន ការពារក្រុមគ្រួសារ និងមិត្តភក្តិ ហើយជាងនេះទៀត គឺដើម្បីឱ្យពួកគាត់បានយល់ដឹង និងអាចចូលរួមជាមួយអាជ្ញាធរមូលដ្ឋាន និងសមត្ថកិច្ច​​អនុវត្តច្បាប់ ក្នុងការបង្ការ ទប់ស្កាត់ បង្រ្កាប និងដោះស្រាយរាល់បញ្ហាដែលមានការពាក់ព័ន្ធ​​នឹងគ្រឿងញៀន៕

The post រដ្ឋមន្រ្តីក្រសួងព័ត៌មាន៖ ដើម្បីដោះស្រាយបញ្ហាគ្រឿងញៀន ត្រូវបន្តផ្សព្វផ្សាយអប់រំឱ្យកាន់តែសកម្ម និងទូលំទូលាយ appeared first on Kampuchea Thmey Daily.

ថ្លែងនៅក្នុងពិធីបើកមហាសន្និបាតបូកសរុបលទ្ធផលការងារលើវិស័យយុត្តិធម៌ទូទាំងប្រទេស នៅព្រឹកថ្ងៃទី២៧ ខែមីនា​ ឆ្នាំ២០២៤នេះ លោកឧបនាយករដ្ឋមន្ត្រី កើត រិទ្ធ រដ្ឋមន្ត្រីក្រសួងយុត្តិធម៌ បានលើកឡើងថា ដើម្បីរួមគ្នាអនុវត្តវិធានការគន្លឹះទី៤ របស់សម្ដេចធិបតី ហ៊ុន ម៉ាណែត គឺក្នុងវិស័យយុត្តិធម៌ ត្រូវតែប្រឆាំងដាច់ខាតលើបញ្ហាគ្រឿងញៀន ដោយប្រកាន់ឱ្យបានខ្ជាប់នូវគោលការណ៍មួយច្បាស់លាស់ពាក់ព័ន្ធនឹងបញ្ហានេះ។

ទាក់ទងបញ្ហាគ្រឿងញៀននេះទៀតសោត លោកឧបនាយករដ្ឋមន្ត្រី កើត រិទ្ធ ក៏បានប្រកាសចាត់វិធានការច្បាប់ចំពោះមន្ត្រីក្នុងវិស័យុត្តិធម៌ណាដែលបានជាប់ពាក់ព័ន្ធបទល្មើសគ្រឿងញៀន។ លោកឧបនាយករដ្ឋមន្ត្រី បានប្រកាសយ៉ាងដូច្នេះថា៖ «បើរកឃើញថា ជាប់ពាក់ព័ន្ធនឹងផលប្រយោជន៍បទល្មើសគ្រឿងញៀន ខ្ញុំសូមទោស ខ្ញុំអត់មានជម្រើសអី ក្រៅពីបញ្ជូនសំណុំរឿងទៅអង្គភាពប្រឆាំងអំពើពុករលួយទេ»។ ត្រង់ចំណុចនេះ លោក បញ្ជាក់ថា បញ្ហាគ្រឿងញៀនមិនមែនបំផ្លាញត្រឹមតែសន្តិសុខមួយទេ ប៉ុន្តែគ្រឿងញៀននឹងបំផ្លាញនូវធនធានមនុស្សរបស់កម្ពុជាទៀតផង បើមិនមានការរួមគ្នាទប់ស្កាត់ បង្ក្រាប និងប្រយុទ្ធប្រឆាំងទាន់ពេលវេលាប្រកបដោយប្រសិទ្ធភាពទេនោះ។

ថ្លែងចំពោះមុខថ្នាក់ដឹកនាំ និងមន្ត្រីនៃសាលាជម្រះក្ដីគ្រប់ជាន់ថ្នាក់ លោក កើត រិទ្ធ ក៏បានសង្កត់ធ្ងន់អំពីការចូលរួមដ៏ចាំ បាច់នៃតួនាទីរបស់ចៅក្រម ក្នុងការប្រឆាំងប្រយុទ្ធដាច់ខាតលើបញ្ហាគ្រឿងញៀនដែលកំពុងក្លាយជាក្ដីព្រួយបារម្ភយ៉ាងខ្លាំងនៅកម្ពុជា។ លោករដ្ឋមន្ត្រី ចាត់ទុកចៅក្រម ជាតួអង្គដ៏សំខាន់ ដែលត្រូវមានការទទួលខុសត្រូវខុសមួយ មិនមែនត្រឹមជាអ្នកអនុវត្តច្បាប់នោះទេ ប៉ុន្តែត្រូវមានការទទួលខុសត្រូវរួមក្នុងនាមជាពលរដ្ឋ ក្នុងនាមជាបញ្ញាវន្ត ដែលមានទំនួលខុសត្រូវចំពោះប្រទេសជាតិ និងប្រជាជន។

លោករដ្ឋមន្ត្រី បន្តថា ភាពប្ដូរផ្ដាច់របស់អង្គចៅក្រម គឺជាអាទិភាពមួយសម្រាប់វិស័យយុត្តិធម៌កម្ពុជា ក្នុងការពង្រឹងភាពម៉ឺងម៉ាត់លើបញ្ហាគ្រឿងញៀន ស្របតាមវិធានការគន្លឹះទី៤ ដែលប្រកាសដាក់ចេញដោយប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត៕

The post រដ្ឋមន្ត្រីក្រសួងយុត្តិធម៌ ថា ចៅក្រម ជាតួអង្គដ៏សំខាន់ក្នុងការចូលរួមប្រយុទ្ធប្រឆាំងនឹងបញ្ហាគ្រឿងញៀន appeared first on Kampuchea Thmey Daily.