បណ្ដុះបណ្ដាល Archives - Kampuchea Thmey Daily

ក្រសួងការងារ ពង្រីកវេនសិក្សាមានលក្ខណៈបត់បែនសម្រួលដល់កម្មករ និងអ្នកសេដ្ឋកិច្ចក្រៅប្រព័ន្ធបានសិក្សាជំនាញបន្ថែម

អ៊ិន ពិសី — Tue, 17 Jun 2025 02:47:29 +0000

ក្រសួងការងារ និងបណ្ដុះបណ្ដាលវិជ្ជាជីវៈ បានរៀបចំពង្រីកវេនសិក្សាឱ្យកាន់តែមានលក្ខណៈបត់បែន ដើម្បីជួយសម្រួលដល់យុវជន កម្មករ-និយោជិត និងអ្នកនៅក្នុងសេដ្ឋកិច្ចក្រៅប្រព័ន្ធ បានចូលរៀនជំនាញផ្សេងៗ បន្ថែម ទទួលបានឱកាសការងារល្អ មានប្រាក់ខែសមរម្យសម្រាប់ចិញ្ចឹមជីវិតប្រចាំថ្ងៃកាន់តែប្រសើរ។

ថ្លែងក្នុងទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ លើកទី ៨ ក្រោមប្រធានបទ «TVET បង្កើតឱកាសការងារ សាងក្តីសង្ឃឹមដល់យុវជន» រយៈពេល ២ ថ្ងៃ ចាប់ពីថ្ងៃទី ១៥ ដល់ថ្ងៃទី ១៦ ខែមិថុនា លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា ដើម្បីបង្កលក្ខណៈងាយស្រួលសម្រាប់សិស្សយុវជនមកពីគ្រួសារក្រីក្រ និងងាយរងហានិភ័យដូចជា កម្មករ-និយោជិត និងអ្នកនៅក្នុងសេដ្ឋកិច្ចក្រៅប្រព័ន្ធមានលទ្ធភាព ពេលវេលា និងឱកាសចូលរៀនក្នុងកម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេស ក្រសួងការងារ បានពង្រីកវេនសិក្សាឱ្យកាន់តែមានលក្ខណៈបត់បែនដែលមានច្រើនជម្រើសរហូតដល់ ៧ វេន ផ្សេងៗ គ្នា រួមមាន ថ្ងៃចន្ទ-សុក្រ ចំនួន ៥ វេន (វេនពេញមួយថ្ងៃ , វេនព្រឹក , វេនរសៀល , វេនល្ងាច/យប់ រៀន ៣ ម៉ោង , វេនល្ងាច/យប់ រៀន ២ ម៉ោង) , ការសិក្សាថ្ងៃសៅរ៍-អាទិត្យពេញម៉ោង ចំនួន ១ វេន និងការសិក្សាតែថ្ងៃអាទិត្យពេញមួយថ្ងៃ ចំនួន ១ វេន។

លោករដ្ឋមន្ត្រី បានបន្តថា វគ្គសិក្សានីមួយៗ មានរយៈពេលខុសគ្នា ចាប់ពី ៤ ដល់ ១២ ខែ និងមានវេនល្ងាច/យប់ និងចុងសប្ដាហ៍ និងអនុញ្ញាតឱ្យយុវជន និងកម្មករ-និយោជិត អាចចុះឈ្មោះវេនណាមួយដែលសមស្រប និងងាយស្រួលសម្រាប់ខ្លួន ខណៈដែលពួកគេនៅតែអាចបន្តធ្វើការងារ និងធានាបាននូវស្ថិរភាព នៃប្រភពចំណូលរបស់ខ្លួន។

លោករដ្ឋមន្ត្រី បានបន្តទៀតថា ចាប់តាំងពីរាជរដ្ឋាភិបាលបានដាក់ឱ្យប្រើប្រាស់កម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ១ លាន ៥ សែននាក់ កាលពីថ្ងៃទី ១៤ ខែវិច្ឆិកា ឆ្នាំ ២០២៣ រហូតមកដល់ខែឧសភា ឆ្នាំ ២០២៥ នេះ មានអ្នកចុះឈ្មោះចូលរៀនប្រមាណ ១២ ម៉ឺន ១ ពាន់នាក់ សិស្សកំពុងសិក្សា និងបញ្ចប់ការសិក្សា ៧ ម៉ឺន ៣ ពាន់នាក់ និងសិស្សទទួលបានការងារធ្វើ ១ ម៉ឺន ៨ ពាន់នាក់។

លោករដ្ឋមន្ត្រី បានបន្ថែមថា យុវជនមកពីគ្រួសារក្រីក្រ និងងាយរងហានិភ័យ ពេលចុះឈ្មោះចូលរៀន គឺ ទទួលបានការសិក្សាដោយឥតគិតថ្លៃ និងទទួលបានប្រាក់ឧបត្ថម្ភពីរាជរដ្ឋាភិបាលក្នុង ១ ខែ ចំនួន ២៨ ម៉ឺនរៀល។ ចំពោះយុវជន ឬកម្មករ-និយោជិត មកពីគ្រួសារទូទៅ មិនទទួលបានប្រាក់ឧបត្ថម្ភទេ តែទទួលបានការសិក្សាដោយឥតគិតថ្លៃនៅតាមគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈសាធារណៈ ចំនួន ៣៧។

លោករដ្ឋមន្ត្រី បានបញ្ជាក់ថា គិតត្រឹមខែឧសភា ឆ្នាំ ២០២៥ ក្រសួង បានអភិវឌ្ឍន៍កញ្ចប់ស្តង់ដារបណ្តុះបណ្តាលផ្អែកលើសមត្ថភាពបានចំនួន ២២២ គុណវុឌ្ឍិ លើ ៩៦ មុខជំនាញ និងអភិវឌ្ឍន៍កញ្ចប់សិក្សាផ្អែកលើសមត្ថភាពបានចំនួន ១ ៩៧៩ មេរៀន លើ ៤៥ គុណវុឌ្ឍិ (CI) នៃ ៤៥ មុខជំនាញ លើវិស័យអាទិភាពទាំង ១០ ក្នុងកម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ៕

អត្ថបទ ៖ សំអឿន

The post ក្រសួងការងារ ពង្រីកវេនសិក្សាមានលក្ខណៈបត់បែនសម្រួលដល់កម្មករ និងអ្នកសេដ្ឋកិច្ចក្រៅប្រព័ន្ធបានសិក្សាជំនាញបន្ថែម appeared first on Kampuchea Thmey Daily.

យុវជនខេត្តកោះកុង ទទួលបានការបណ្តុះបណ្តាលបច្ចេកទេសវិជ្ជាជីវៈពីប្រទេសថៃ

Kang Tola — Mon, 09 Sep 2024 14:45:00 +0000

កោះកុង ៖ ក្រុមយុវជននៅខេត្តកោះកុង បានទទួលការជួយបណ្តុះបណ្តាលជំនាញវិជ្ជាជីវៈចំនួន៣ជំនាញពីមន្ទីរការងារខេត្តត្រាត ប្រទេសថៃ ដោយលោកស្រីអភិបាលខេត្តកោះកុងក៏ជំរុញឱ្យសិក្សាជំនាញវិស័យទេសចរណ៍ផងដែរ។

ថ្នាក់ដឹកនាំក្រុមការងារនៃមជ្ឈមណ្ឌលបណ្តុះបណ្តាលបច្ចេកទេស និងអភិវឌ្ឍន៍ជំនាញខេត្តត្រាត បានស្មោះចិត្តគាំទ្រដល់ការចែករំលែកចំណេះដឹងជំនាញសំខាន់ៗដល់យុវជនខេត្តកោះកុង ដើម្បីធ្វើជាទុនរកការងារធ្វើបានសមរម្យ និងទទួលប្រាក់ចំណូលបានច្រើន។

លោកស្រី ផ្លងមង្គល ប្រធានមជ្ឈមណ្ឌលបណ្តុះបណ្តាលបច្ចេកទេស និងអភិវឌ្ឍន៍ជំនាញខេត្តត្រាត និយាយនៅថ្ងៃទី៩ ខែកញ្ញា ឆ្នាំ២០២៤ថា ជំនាញចំនួន៣ នឹងត្រូវផ្តល់ចំណេះដឹងដល់យុវជនខេត្តកោះកុង គឺទី១-ជំនាញការប្រើកម្មវិធី កម្មវិធី Microsoft office កម្រិតខ្ពស់ (Microsoft Excel Advance) ទី២-ជំនាញរៀបចំសណ្ឋាគារ និងទី៣-ជំនាញជាងជួសជុលខ្នាតតូចដើម្បីកសិកម្ម។

លោកស្រី ផ្លងមង្គល លើកឡើងទៀតថា គម្រោងកសាងសម្ថភាព និងអភិវឌ្ឍន៍ជំនាញសម្រាប់ការងារ កម្ពុជា/ឡាវ/មីយ៉ាន់ម៉ា នេះអាចជួយបង្កើនចំណេះដឹងវិជ្ជាជីវៈពិតប្រាកដដល់ប្រជាជនកម្ពុជា មានមុខរបរការងារ មានប្រាក់ចំណូល ដែលអាចផ្គត់ផ្គង់ខ្លួនឯង និងក្រុមគ្រួសារ បានយ៉ាងប្រសើរ។ ទៀតសោត ការអភិវឌ្ឍសេដ្ឋកិច្ចក្នុងតំបន់ឲ្យមានការរីកចម្រើន និងពង្រឹងទំនាក់ទំនងអន្តរជាតិ។

ប្រធានមជ្ឈមណ្ឌលបណ្តុះបណ្តាលបច្ចេកទេស និងអភិវឌ្ឍន៍ជំនាញខេត្តត្រាត ក៏បានរម្លឹកដែរថា ឆ្នាំ២០២៣ ខេត្តត្រាតបានចាត់ឱ្យវិទ្យាស្ថានអភិវឌ្ឍន៍ជំនាញ ៣៣ ខេត្តត្រាត បានប្រជុំពិភាក្សាអំពីតម្រូវការឲ្យមានការបណ្តុះបណ្តាល ដើម្បីអភិវឌ្ឍប្រជាជនខេត្តកោះកុងអោយមានសក្ដានុពល និងអាចបង្កើនជំនាញក្នុងការប្រកបអាជីពបាន។

អ្នកអង្គម្ចាស់បណ្ឌិត ស៊ីសុវត្ថិ ឬទ្ធីរ៉ាវង្ស នាយកវិទ្យាស្ថានពហុបច្ចេកទេសខេត្តកោះកុង បានចាត់ទុកការជួយជ្រោមជ្រែងរបស់ភាគីថៃលើការអប់រំសិក្សាជំនាញបច្ចេកទេសថា ជាការរួមចំណែកមួយយ៉ាងធំធេងសម្រាប់កិច្ចសហប្រតិបត្តិការយ៉ាងស្អិតរមួត ដើម្បីពង្រឹងលើការសិក្សាផ្នែកធនធានមនុស្សលើជំនាញបច្ចេកទេសវិជ្ជាជីវៈនៅខេត្តកោះកុង។

នាយកវិទ្យាស្ថានពហុបច្ចេកទេសខេត្តកោះកុង បានបន្តថា វគ្គសិក្សានេះមានរយៈពេល៣០ម៉ោង ដែលធ្វើឡើងក្នុងចន្លោះថ្ងៃទី៩ ដល់ថ្ងៃទី១៣ ខែកញ្ញា ឆ្នាំ២០២៤ សរុបចំនួន៥ថ្ងៃ ដោយមានសិក្ខាកាមចូលរួមចំនួន ២០នាក់ ក្នុងមួយជំនាញសរុបចំនួន៦០នាក់ នៅវិទ្យាស្ថានពហុបច្ចេកទេសខេត្តកោះកុង។

អ្នកអង្គម្ចាស់បណ្ឌិត សម្លឹងឃើញថា វិស័យការងារ និងបណ្តុះបណ្តាលវិជ្ជាជីវៈ ជាវិស័យអាទិភាពមួយដែលយកចិត្តទុកដាក់ពីរាជរដ្ឋាភិបាលកម្ពុជា ក្នុងន័យជំរុអភិវឌ្ឍន៍វិស័យការងារ និងកំណើនសេដ្ឋកិច្ចជាតិទាំងមូល។ ម្យ៉ាងទៀត ក៏ជាការរក្សាបានកំលាំងពលកម្មដែលមានជំនាញពិតប្រាកដអោយរីកដុះដាលក្នុងវិស័យរដ្ឋ និងឯកជន។

ដោយឡែកលោកស្រី មិថុនា ភូថង អភិបាលខេត្តកោះកុង ស្វាគមន៍ចំពោះភាគីថៃដែលមានបំណងចង់ជួយពង្រឹងសមត្ថភាពដល់យុវជនក្នុងខេត្តកោះកុង តាមរយៈការទទួលចំណេះដឹងជំនាញច្បាស់លាស់។ លោកជំទាវ មើលឃើញថា វិស័យទេសចរណ៍ក៏កំពុងមានការរីកចម្រើនផងដែរ ដោយស្នើសុំដល់យុវជនចាប់អារម្មណ៍សិក្សាជំនាញនេះ ព្រោះឱកាសការងារក៏មានច្រើនសម្រាប់ទាញយកប្រាក់ចំណូល៕

អត្ថបទ ៖ សិរីវឌ្ឍនៈ

The post យុវជនខេត្តកោះកុង ទទួលបានការបណ្តុះបណ្តាលបច្ចេកទេសវិជ្ជាជីវៈពីប្រទេសថៃ appeared first on Kampuchea Thmey Daily.

មន្ត្រីអាស៊ាន ៦ ប្រទេស ទទួលបានការបណ្ដុះបណ្ដាលការគ្រប់គ្រងស្វ័យប្រវត្តិកម្មលើកកម្ពស់ជំនាញដើរឱ្យទាន់ឧស្សាហកម្ម ៤.០

អ៊ិន ពិសី — Sat, 31 Aug 2024 01:12:17 +0000

មន្ត្រីសមាជិកអាស៊ានមកពី ៦ ប្រទេស រួមមានឥណ្ឌូណេស៊ី, ប្រ៊ុយណេ, ម៉ាឡេស៊ី, មីយ៉ាន់ម៉ា, ហ្វីលីពីន និងកម្ពុជា ចំនួន ១៥ រូប ទទួលបានការបណ្ដុះបណ្ដាលជំនាញសរសេរកម្មវិធី PLC program ដើម្បីធ្វើឱ្យប្រតិបត្តិការ នៃប្រព័ន្ធគ្រប់គ្រងស្វ័យប្រវត្តិកម្មនៅក្នុងគម្រោងឧស្សាហកម្ម ឬខ្សែចង្វាក់ផលិតកម្មប្រកបដោយប្រសិទ្ធភាព ចំណេញពេលវេលា និងសន្សំសំចៃ ពិសេសដើម្បីលើកកម្ពស់ជំនាញបច្ចេកទេសឱ្យដើរទាន់ឧស្សាហកម្មបួនចុចសូន្យ( ៤.០)។

ថ្លែងបើកវគ្គបណ្តុះបណ្តាលស្តីពី “Sequence Control”ក្រោមគម្រោង ASEAN-ROK TVET Mobility Programme កាលពីថ្ងៃទី ៣០ សីហា នេះ លោក ហ៊ីង ស៊ីដេត អគ្គនាយក នៃអគ្គនាយកដ្ឋានអប់រំបណ្ដុះបណ្ដាលបច្ចេកទេស និងវិជ្ជាជីវៈ មានប្រសាសន៍ថា វគ្គបណ្តុះបណ្តាលនេះ ត្រូវបានរៀបចំឡើងតាមស្មារតី នៃកិច្ចព្រមព្រៀងរវាងក្រសួងការងារ និងបណ្ដុះបណ្ដាលវិជ្ជាជីវៈ និងសភាពាណិជ្ជកម្ម និងឧស្សាហកម្មកូរ៉េ និងវិទ្យាស្ថានពហុបច្ចេកទេសព្រះកុសុមៈ ហើយនេះជាជំនាន់ទី ៣ ហើយ ដែលគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ នៃក្រសួងការងារ និងបណ្តុះបណ្តាលវិជ្ជាជីវៈ ត្រូវបានជ្រើសរើសជាដៃគូក្នុងក្របខណ្ឌអាស៊ាន-កូរ៉េ ក្នុងការបណ្តុះបណ្តាលសិស្ស សិក្ខាកាម មកពីបណ្តាប្រទេសអាស៊ាន ដើម្បីកាត់បន្ថយគម្លាត នៃសមត្ថភាពការងារក្នុងចំណោមប្រទេសនានា នៃតំបន់អាស៊ាន។

លោកបានបន្តថា វគ្គបណ្តុះបណ្តាលនេះមានរយៈពេល ៣ ខែ ចាប់ពីថ្ងៃទី ១៩ ខែសីហា ឆ្នាំ ២០២៤ ដល់ថ្ងៃទី ១១ ខែវិច្ឆិកា ឆ្នាំ ២០២៤ ក្នុងនោះរយៈពេល ២ ខែ សិក្សានៅវិទ្យាស្ថានពហុបច្ចេកទេសព្រះកុសុមៈ និងរយៈពេល ១ ខែ ត្រូវអនុវត្តការងារជាក់ស្តែងនៅតាមរោងចក្រ/ សហគ្រាស។

គួរបញ្ជាក់ថា សិក្ខាកាមចំនួន ១៥ នាក់ មកពី ៦ ប្រទេសផ្សេងគ្នារួមមាន ៤ នាក់ មកពីកម្ពុជា ១ នាក់មកពីប្រ៊ុយណេ ២ នាក់ មកពីឥណ្ឌូណេស៊ី ២ នាក់ មកពីម៉ាឡេស៊ី ៣ នាក់ មកពីហ្វីលីពីន និង ៣នាក់ មកពីប្រទេសមីយ៉ាន់ម៉ា៕

អត្ថបទ ៖ សំអឿន

The post មន្ត្រីអាស៊ាន ៦ ប្រទេស ទទួលបានការបណ្ដុះបណ្ដាលការគ្រប់គ្រងស្វ័យប្រវត្តិកម្មលើកកម្ពស់ជំនាញដើរឱ្យទាន់ឧស្សាហកម្ម ៤.០ appeared first on Kampuchea Thmey Daily.

ឯកឧត្ដម ហ៊ុន ម៉ានី អញ្ជើញបើកវគ្គបណ្ដុះបណ្ដាលស្ដីពី «ភាពជាអ្នកដឹកនាំ និងនវានុវត្តន៍ ជំនាន់ទី ៦»

អ៊ិន ពិសី — Wed, 20 Mar 2024 06:43:07 +0000

កាលពីព្រឹកថ្ងៃទី ២០ ខែមីនា ឆ្នាំ ២០២៤ នេះ ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមប្រឹក្សាសាលាភូមិន្ទរដ្ឋបាល បានអញ្ជើញជាអធិបតីដ៏ខ្ពង់ខ្ពស់ក្នុងពិធីបើកវគ្គបណ្ដុះបណ្ដាល ស្ដីពី «ភាពជាអ្នកដឹកនាំ និងនវានុវត្តន៍ ជំនាន់ទី ៦»។

កម្មវិធីព្រឹកនេះ មានវត្តមានចូលរួមពីសំណាក់ថ្នាក់ដឹកនាំក្រសួងមុខងារសាធារណៈ គណៈគ្រប់គ្រង នៃសាលាភូមិន្ទរដ្ឋបាល តំណាងសហភាពអឺរ៉ុបប្រចាំប្រទេសកម្ពុជា តំណាងស្ថានទូតអូស្ត្រាលីប្រចាំប្រទេសកម្ពុជា តំណាងធនាគារពិភពលោក គ្រូបង្គោល និងសិក្ខាកាម សរុបប្រមាណ ១៥០ នាក់។

ជាកិច្ចចាប់ផ្ដើម ឯកឧត្ដម Igor Driesmans ឯកអគ្គរាជទូតសហភាពអឺរ៉ុបប្រចាំនៅព្រះរាជាណាចក្រកម្ពុជា និងជាតំណាងដៃគូអភិវឌ្ឍន៍ បានមានមតិស្វាគមន៍គណៈធិបតី និងអង្គសិក្ខាកាម ដោយធ្វើការរៀបរាប់ពីសាវតារ នៃកិច្ចសហប្រតិបត្តិការ ព្រមទាំងគម្រោងកន្លងមកដែលធ្លាប់បានរៀបចំក្រោមកិច្ចសហការជាមួយក្រសួងមុខងារសាធារណៈ និងសាលាភូមិន្ទរដ្ឋបាល។

បន្ទាប់មក ឯកឧត្ដម យក់ ប៊ុនណា រដ្ឋលេខាធិការប្រចាំការ និងជានាយកសាលាភូមិន្ទរដ្ឋបាល បានរៀបរាប់ក្នុងរបាយការណ៍ថា សាលាភូមិន្ទរដ្ឋបាល បានរៀបចំវគ្គបណ្ដុះបណ្ដាលនេះជូនដល់សិក្ខាកាមជាន់ខ្ពស់បានចំនួន ៥ ជំនាន់ មកហើយ ដែលជាលទ្ធផល សិក្ខាកាមចំនួន ៨៥១ នាក់ (ស្រី ១៤០ នាក់) បានឆ្លងកាត់វគ្គបណ្ដុះបណ្ដាលដោយជោគជ័យស្មើនឹង ៩៨%។ ដោយឡែកសម្រាប់«វគ្គបណ្ដុះបណ្ដាលភាពជាអ្នកដឹកនាំ និងនវានុវត្តន៍» ជំនាន់ទី ៦ នាពេលនេះ នឹងធ្វើការបណ្ដុះបណ្ដាលសិក្ខាកាមជាន់ខ្ពស់ដែលមានមុខតំណែងចាប់ពីប្រធាននាយកដ្ឋាន រហូតដល់រដ្ឋលេខាធិការ ឬ មុខតំណែងប្រហាក់ប្រហែល អភិបាលក្រុង ស្រុក នាយករដ្ឋបាល ខេត្ត ឬមុខតំណែងប្រហាក់ប្រហែល តាមបណ្ដាក្រសួង-ស្ថាប័ន ចំនួន ៣០ គណៈកម្មការជាតិដឹកនាំការដ្ឋានកែទម្រង់ទាំង ៥ និងរដ្ឋបាលថ្នាក់ក្រោមជាតិចំនួន ២៥ រាជធានី-ខេត្ត ព្រមទាំងមានមន្ត្រីជាន់ខ្ពស់ នៃស្ថានទូតអូស្ត្រាលី ចំនួន ១ រូប សរុបចំនួន ១៦២ នាក់ (ស្រី ២៩ នាក់)។ ការបណ្ដុះបណ្ដាលមានរយៈពេល ៧ សប្ដាហ៍ ដោយ ៦ សប្ដាហ៍ សិក្សាតាមប្រព័ន្ធអនឡាញ និង ១ សប្ដាហ៍ សិក្សាផ្ទាល់នៅសាលាភូមិន្ទរដ្ឋបាល។

ក្រោយបានស្តាប់របាយការណ៍របស់វាគ្មិនទាំងពីរខាងលើ ឯកឧត្ដមឧបនាយករដ្ឋមន្ត្រី បានកោតសរសើរសាលាភូមិន្ទរដ្ឋបាល និងដៃគូអភិវឌ្ឍន៍ ដែលបានវិវឌ្ឍខ្លួនជាបន្តបន្ទាប់ក្នុងបេសកកម្ម បណ្ដុះបណ្ដាលអនាគតអ្នកដឹកនាំ ទាំងថ្នាក់ជាតិ និងថ្នាក់ក្រោមជាតិ ឲ្យទទួលបាននូវចំណេះដឹង និងបទពិសោធន៍ថ្មីៗ បន្ថែមទៀត ដើម្បីឆ្លើយតបក្នុងការអភិវឌ្ឍសមត្ថភាពក្នុងពេលបច្ចុប្បន្ន និងអនាគត ស្របតាមតម្រូវការចាំបាច់របស់ប្រជាពលរដ្ឋ និងសង្គម។

ជាមួយគ្នានេះ ឯកឧត្ដមឧបនាយករដ្ឋមន្ត្រី ក៏បានគូសបញ្ជាក់សង្កត់ធ្ងន់ថា ការរៀបចំវគ្គបណ្ដុះបណ្ដាលនាពេលនេះ រៀបចំឡើងដើម្បីឆ្លើយតបនឹងអាទិភាពគន្លឹះទី ១ នៃយុទ្ធសាស្ត្របញ្ចកោណ ដំណាក់កាលទី ១ គឺ មនុស្ស ហើយក៏ស្របទៅនឹងការងារអាទិភាពដែលមានចែងក្នុងមុំទី ១ មុំទី ២ នៃស្នូលយុទ្ធសាស្ត្របញ្ចកោណ សំដៅដល់ការពង្រឹង និងការកែទម្រង់ស្ថាប័ន តាមរយៈការពង្រឹងសមត្ថភាព នៃភាពជាអ្នកដឹកនាំ និងការរៀបចំសម្រាប់អ្នកដឹកនាំ ព្រមទាំងការលើកកម្ពស់សមត្ថភាពធនធានមនុស្សប្រកបដោយ សមត្ថភាព ជំនាញ ឆន្ទៈ ម្ចាស់ការ ក្រមសីលធម៌ វិជ្ជាជីវៈ ស្របតាមតួនាទី និងការទទួលខុសត្រូវខ្ពស់៕

The post ឯកឧត្ដម ហ៊ុន ម៉ានី អញ្ជើញបើកវគ្គបណ្ដុះបណ្ដាលស្ដីពី «ភាពជាអ្នកដឹកនាំ និងនវានុវត្តន៍ ជំនាន់ទី ៦» appeared first on Kampuchea Thmey Daily.

យុវតីមកពីគ្រួសារក្រីក្រនៅខេត្តស្វាយរៀង ពេញចិត្តវគ្គបណ្ដុះបណ្ដាលបច្ចេកទេសរបស់រាជរដ្ឋាភិបាល

អ៊ិន ពិសី — Tue, 30 Jan 2024 03:54:22 +0000

យុវតី ឈឹម រចនា ដែលកំពុងរៀនជំនាញការដំឡើងបណ្ដាញអគ្គិសនីក្នុងអគារ នៅវិទ្យាស្ថានពហុបច្ចេកទេសភូមិភាគតេជោសែន ស្វាយរៀង បានលើកឡើងថា ខ្លួនពេញចិត្តយ៉ាងខ្លាំងក្នុងការសិក្សាជំនាញវិជ្ជាជីវៈ និងបច្ចេកទេសរបស់រាជរដ្ឋាភិបាល ហើយរូបគេសង្ឃឹមថា ការរៀនជំនាញវិជ្ជាជីវៈ នឹងអាចផ្លាស់ប្ដូរស្ថានភាពគ្រួសាររបស់គេនាពេលអនាគត។

យុវតីរូបនេះ ថា «ដោយសារតែខ្ញុំពេញចិត្ត ពីព្រោះវាជាឱកាសសម្រាប់យុវជនដែលមានជីវភាពខ្វះខាតអាចរៀនជំនាញបច្ចេកទេសដោយឥតគិតថ្លៃ ថែមទាំងមានប្រាក់ឧបត្ថម្ភថែមទៀត»។

យុវតីរូបនេះ បន្ថែមថា ក្នុងរយៈពេល ៣ សប្ដាហ៍ ក្នុងការចាប់ផ្ដើមរៀនជំនាញវិជ្ជាជីវៈ និងបច្ចេកទេសនេះ ខ្លួនបានសិក្សានូវជំនាញទន់ ប្រមុម ការតចរន្តក្នុងគេហដ្ឋាន និងការសិក្សាការវាស់តង់ស្យុងផ្សេងៗ ជាច្រើនទៀត។ កម្មវិធីសិក្សាទាំងនេះ កញ្ញា សង្ឃឹមថា សិក្ខាកាមអាចស្រូបយកចំណេះជំនាញបានឆាប់រហ័ស និងអាចទាក់ទាញចំណាប់អារម្មណ៍យុវជនឱ្យមកសិក្សាបានគ្រប់ៗ គ្នាផងដែរ។

យុវតី ឈឹម រចនា ថា «ក្រៅពីសិក្សាលើមុខវិជ្ជាទាក់ទងនឹងជំនាញ ក្នុងនោះដែរ គ្រូបង្រៀន ក៏បានផ្តោតលើការបង្រៀនការធ្វើការងារជាក្រុម ឱ្យចេះសហការគ្នា ស្រលាញ់គ្នា និងមានទំនាក់ទំនងល្អជាមួយគ្នាផងដែរ ត្បិតការចុះកម្មសិក្សា និងការចូលរោងជាងអនុវត្តមិនទាន់បានចាប់ផ្ដើមនៅឡើយ»។ យុវតី រចនា បន្ថែមថា នារី ក៏អាចរៀនជំនាញដំឡើងបណ្ដាញអគ្គិសនីបានដែរ ត្បិតជំនាញនេះភាគច្រើនសំបូរតែបុរសរៀននាពេលកន្លងមក។ យុវតីរូបនេះ បានសម្រេចចិត្តរៀនជំនាញដំឡើងបណ្ដាញអគ្គិសនីក្នុងអគារនេះដោយខ្លួនឯង ហើយសង្ឃឹមយ៉ាងមុតមាំថា គាត់អាចធ្វើបាន និងជោគជ័យលើជំនាញនេះ។

ជាមួយគ្នានេះ យុវតី ឈឹម រចនា ក៏បានបន្តទៀតថា កម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេស ១,៥ លាននាក់ របស់រាជរដ្ឋាភិបាល ជាក្តីសង្ឃឹមតែមួយគត់ អាចឱ្យខ្លួនបានសិក្សាជំនាញទាំងដែលគ្រួសារមានជីវភាពក្រីក្រ ហើយអាចមានជំនាញមួយច្បាស់លាស់ អាចរកការងារបានធ្វើ មានប្រាក់ចំណូលសមរម្យ។ យុវតីរូបនេះ រំពឹងថា ខ្លួននឹងជាអ្នកស្រោចស្រង់ជីវភាពគ្រួសារបានប្រសើរជាងពេលបច្ចុប្បន្ន ខណៈឪពុកម្ដាយកាន់តែជរាពីមួយថ្ងៃទៅមួយថ្ងៃ។

គួរជម្រាបថា កម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ដែលបានដាក់ឱ្យអនុវត្តជាផ្លូវការ កាលពីថ្ងៃទី ១៤ ខែវិច្ឆិកា ឆ្នាំ ២០២៣ កន្លងទៅ បានបោះជំហានទៅមួយដំណាក់កាលទៀតហើយ ដោយកាលពីថ្ងៃទី ១៥ ខែមករា ឆ្នាំ ២០២៤ ក្រសួងការងារ និងបណ្ដុះបណ្ដាលវិជ្ជាជីវៈ បានប្រកាសបើកបវេសនកាលចូលរៀនជាផ្លូវការនៅទូទាំងប្រទេស៕

The post យុវតីមកពីគ្រួសារក្រីក្រនៅខេត្តស្វាយរៀង ពេញចិត្តវគ្គបណ្ដុះបណ្ដាលបច្ចេកទេសរបស់រាជរដ្ឋាភិបាល appeared first on Kampuchea Thmey Daily.

យុវជនជាង ៤ រយនាក់ កំពុងសិក្សាជំនាញវគ្គខ្លី នៅវិទ្យាស្ថានពហុបច្ចេកទេសភូមិភាគតេជោសែនតាកែវ

អ៊ិន ពិសី — Sun, 28 Jan 2024 03:06:28 +0000

គិតត្រឹមចុងខែមករា ឆ្នាំ ២០២៤ នេះ មានយុវជន ៥១២ នាក់ បានមកដាក់ពាក្យសុំចូលរៀនជំនាញឯកទេសវិជ្ជាជីវៈនៅវិទ្យាស្ថានពហុបច្ចេកទេសភូមិភាគតេជោសែនតាកែវ ក្នុងនោះសិស្សដែលកំពុងសិក្សាក្នុងជំនាញរបស់ខ្លួនមានចំនួន ៤៤៥ នាក់។ នេះបើតាមការបញ្ជាក់ពី លោក មៀច បូរិទ្ធ នាយករងវិទ្យាស្ថានពហុបច្ចេកទេសតេជោសែនតាកែវ។

លោក មៀច បូរិទ្ធ បញ្ជាក់ថា នេះជាគោលនយោបាយរបស់រាជរដ្ឋាភិបាលកម្ពុជា អាណត្តិទី ៧ ដែលដឹកនាំដោយ សម្ដេចធិបតី ហ៊ុន ម៉ាណែត នាយករដ្ឋមន្ត្រី ដើម្បីផ្តល់ឱកាសស្មើគ្នាជូនដល់យុវជនមកពីគ្រួសារមានបណ្ណសមធម៌ បណ្ណសម្គាល់គ្រួសារងាយរងហានិភ័យ ទទួលបានការបណ្ដុះបណ្ដាលវិជ្ជាជីវៈ និងបច្ចេកទេស ហើយមានឱកាសការងារកាន់តែល្អប្រសើរក្នុងការបង្កើនប្រាក់ចំណូល និងជីវភាពរស់នៅ។

លោក មៀច បូរិទ្ធ បន្ថែមថា សម្រាប់ការបណ្ដុះបណ្ដាលជំនាញវគ្គខ្លីគឺត្រូវបានផ្តល់ជូននូវការសិក្សាមិនគិតកម្រៃនោះទេ ថែមទាំងមានប្រាក់ឧបត្ថម្ភ ២៨ ម៉ឺនរៀល ក្នុងមួយខែ ទៀតផង ដល់សិស្សដែលមកពីគ្រួសារក្រីក្រ។ លោកបញ្ជាក់ថា សម្រាប់ជំហានទី ១ គិតត្រឹមថ្ងៃទី ២៦ ខែមករា ឆ្នាំ ២០២៤ នេះ មានយុវជនមកពីគ្រួសារក្រីក្រ ១៤៣ នាក់ ក្នុងនោះ គ្រួសារក្រីក្រប្រភេទ ១ មាន ១៦ នាក់ ស្រី ៥ នាក់។ គ្រួសារក្រីក្រប្រភេទ ២ មាន ៦៤ នាក់ ស្រី ១៤ នាក់។ គ្រួសារងាយរងហានិភ័យមាន ៦៣ នាក់ ស្រី ១៦ នាក់ និងយុវជនពិកាមាន ២ នាក់ ផងដែរ។

ក្រៅពីទទូចសុំឲ្យយុវជនមិនទាន់មានចំណេះជំនាញច្បាស់លាស់ មកចុះឈ្មោះចូលរៀនជំនាញបច្ចេកទេសនេះ ថ្នាក់ដឹកនាំវិទ្យាស្ថាន បានជំរុញដល់យុវជនកំពុងសិក្សា ត្រូវខិតខំក្រេបយកចំណេះដឹង ជំនាញដែលខ្លួនកំពុងចាប់យក ដើម្បីក្លាយខ្លួនជាអ្នកមានចំណេះជំនាញច្បាស់លាស់សម្រាប់ប្រកបរបរចិញ្ចឹមជីវិត និងមានជីវភាពរីកចម្រើនគ្រប់ក្រុមគ្រួសារ ស្របតាមគោលនយោបាយរាជរដ្ឋាភិបាលបានដៅទុក។

សូមបញ្ជាក់ថា កម្មវិធីបណ្ដុះបណ្ដាលថ្នាក់ជាតិស្ដីពីការបណ្ដុះបណ្ដាលជំនាញវិជ្ជាជីវៈ និងបច្ចេកទេស ១,៥ លាននាក់ ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ដែលបានបើកជាផ្លូវការ កាលពីខែវិច្ឆិកា ឆ្នាំ ២០២៣ និងបានបោះជំហានមួយដំណាក់កាលទៀតហើយពោលគឺ កាលពីថ្ងៃទី ១៥ ខែមករា ឆ្នាំ ២០២៤ កន្លងទៅថ្មីៗនេះ ក្រសួងការងារ និងបណ្ដុះបណ្ដាលវិជ្ជាជីវៈ បានប្រកាសបើកបវេសនកាលការបណ្ដុះបណ្ដាលជំនាញវិជ្ជាជីវៈវគ្គដំបូងជាផ្លូវការ៕

អត្ថបទ ៖ វីរៈ

The post យុវជនជាង ៤ រយនាក់ កំពុងសិក្សាជំនាញវគ្គខ្លី នៅវិទ្យាស្ថានពហុបច្ចេកទេសភូមិភាគតេជោសែនតាកែវ appeared first on Kampuchea Thmey Daily.

នាយកសាលាបច្ចេកទេសខេត្តរតនគីរី ៖ ជនជាតិដើមភាគតិច ចាប់អារម្មណ៍ជំនាញសម្អាងកាយ ភាគច្រើន

អ៊ិន ពិសី — Mon, 22 Jan 2024 04:10:43 +0000

លោក សែម ប៉ាត នាយក នៃមជ្ឈមណ្ឌលបណ្ដុះបណ្ដាលវិជ្ជាជីវៈខេត្តរតនគីរី បានលើកឡើងថា ជនជាតិដើមភាគតិចខេត្តរតនគីរី បានចាប់អារម្មណ៍លើជំនាញសម្អាងកាយជាងគេក្នុងចំណោមជំនាញទាំង ៥ របស់មជ្ឈមណ្ឌលវិជ្ជាជីវៈ ដែលបានដាក់ចេញសម្រាប់កម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេស ១,៥ លាននាក់ របស់រាជរដ្ឋាភិបាល។

ការលើកឡើងនេះ បន្ទាប់ពី ក្រសួងការងារ និងបណ្ដុះបណ្ដាលវិជ្ជាជីវៈ កាលពីថ្ងៃទី ១៥ ខែមករា ឆ្នាំ ២០២៤ កន្លងទៅ បានបើកបវេសនកាលជាផ្លូវការការបណ្ដុះបណ្ដាលជំនាញវិជ្ជាជីវៈ និងបច្ចេកទេស ១,៥ លាននាក់ ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ។

បើតាម លោក សែម ប៉ាត មជ្ឈមណ្ឌលបណ្ដុះបណ្ដាលវិជ្ជាជីវៈខេត្តរតនគីរី ទទួលបានយុវជនជាជនជាតិដើមភាគតិចចុះឈ្មោះរៀនជំនាញវិជ្ជាជីវៈ និងបច្ចេកទេស ប្រមាណ ៦១ នាក់។ ភាគច្រើនជនជាតិទាំងនោះ មកពីជនជាតិ ព្រៅ កាវ៉ែត ទំពួន គ្រឹង ចារ៉ាយ កាចក់ និងឡាវ។ ពួកគេភាគច្រើន បានចុះឈ្មោះចូលរៀនជំនាញសម្អាងកាយ និងបន្ទាប់មកទៀតមានមុខជំនាញរចនាក្រាហ្វិកដោយកុំព្យូទ័រ ដំឡើងបណ្ដាញអគ្គិសនី សេវាកម្មសម្អាងកាយ និងសេវាកម្មកាត់សក់។

លោក សែម ប៉ាត បន្តថា ចាប់តាំងពី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានប្រកាសដាក់ឱ្យអនុវត្តជាផ្លូវការនូវវគ្គបណ្ដុះបណ្ដាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ១.៥ លាននាក់ កាលពីថ្ងៃទី ១៤ ខែវិច្ឆិកា ឆ្នាំ ២០២៣ កន្លងទៅ មជ្ឈមណ្ឌលបណ្ដុះបណ្ដាលវិជ្ជាជីវៈខេត្តរតនគីរី បានទទួលយុវជនមកចុះឈ្មោះចូលរៀនចំនួន ២៤០ នាក់ ស្រី ៩៧ នាក់ លើជំនាញចំនួន ៥ ដែលជាជំនាញមានតម្រូវការទីផ្សារការងារខ្ពស់ តាមបណ្ដាក្រុមហ៊ុនសហគ្រាស និងទទួលប្រាក់ចំណូលសមរម្យនាពេលបច្ចុប្បន្ននេះ។ មជ្ឈមណ្ឌល ត្រៀមខ្លួនរួចជាស្រេច ដើម្បីទទួលសិស្សចូលរៀនតាំងតែពីថ្ងៃទី ១៥ ខែមករា មកម្ល៉េះ។

សូមបញ្ជាក់ថា កាលពីថ្ងៃទី ១៤ ខែវិច្ឆិកា ឆ្នាំ ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានដាក់ឱ្យអនុវត្តជាផ្លូវការនូវការបណ្ដុះបណ្ដាលជំនាញវិជ្ជាជីវៈ និងបច្ចេកទេស ទៅដល់គ្រួសារក្រីក្រ និងគ្រួសារងាយរងហានិភ័យ ចំនួន ១ លាន ៥ សែននាក់ ដែលមានរយៈពេល ៤ ខែ សិក្សាដោយឥតគិតថ្លៃ។ ម្យ៉ាងវិញទៀត យុវជនដែលមកពីគ្រួសារក្រីក្រ និងគ្រួសារងាយរងហានិភ័យ នឹងទទួលបានប្រាក់ឧបត្ថម្ភប្រចាំខែចំនួន ២៨ ម៉ឺនរៀល រហូតដល់បញ្ចប់ការសិក្សា៕

The post នាយកសាលាបច្ចេកទេសខេត្តរតនគីរី ៖ ជនជាតិដើមភាគតិច ចាប់អារម្មណ៍ជំនាញសម្អាងកាយ ភាគច្រើន appeared first on Kampuchea Thmey Daily.

១ សប្ដាហ៍ ក្រសួងការងារ បើកវគ្គបណ្ដុះបណ្ដាលយុវជនក្រីក្រ និងងាយរងហានិភ័យ ជាង ៦៧០ ថ្នាក់ មានសិស្សជិត ២ ម៉ឺននាក់

អ៊ិន ពិសី — Mon, 22 Jan 2024 03:06:25 +0000

រយៈពេល ១ សប្ដាហ៍ ពោល ចាប់ពីថ្ងៃទី ១៥ រហូតដល់ថ្ងៃទី ២១ ខែមករា ឆ្នាំ ២០២៤ ក្រសួងការងារ និងបណ្ដុះបណ្ដាលវិជ្ជាជីវៈ បានបើកវគ្គបណ្ដុះបណ្ដាលដល់យុវជនមកពីគ្រួសារក្រីក្រ គ្រួសារងាយរងហានិភ័យ និងយុវជនមកពីសេដ្ឋកិច្ចក្នុង និងក្រៅប្រព័ន្ធ ឬ កម្មករ-និយោជិត ប្រមាណជាង ៦៧០ ថ្នាក់ ទៅលើមុខជំនាញចំនួន ១០ ដែលមានសិស្សប្រមាណជិត ២ ម៉ឺននាក់។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍នៅព្រឹកថ្ងៃទី ២២ មករា នេះថា គិតត្រឹមថ្ងៃទី ២១ មករានេះ ក្រសួង បានបើកវគ្គបណ្ដុះបណ្ដាលដល់យុវជនមកពីគ្រួសារក្រីក្រ គ្រួសារងាយរងហានិភ័យ និងយុវជនមកពីសេដ្ឋកិច្ចក្នុង និងក្រៅប្រព័ន្ធ ឬ កម្មករ-និយោជិត សរុបចំនួន ៦៧៣ ថ្នាក់ ដែលមានសិស្សចូលរៀនសរុប ១៩ ៨០៦ នាក់ (ស្រី ៧ ០៧៤ នាក់) ទៅលើវិស័យចំនួន ១០ ក្នុងនោះផ្នែកសំណង់ ចំនួន ១៨៩ ថ្នាក់ អគ្គិសនី និងថាមពល ចំនួន ១៤ ថ្នាក់, អេឡិចត្រូនិកចំនួន ៤១ ថ្នាក់, កម្មន្តសាលចំនួន ៥៣ ថ្នាក់, មេកានិកទូទៅ/មេកានិករថយន្ត ចំនួន ១០៤ ថ្នាក់, ធុរកិច្ច និងព័ត៌មានវិទ្យា ១០១ ថ្នាក់, សេវាកម្មចំនួន ៣២ ថ្នាក់, បរិក្ខារត្រជាក់ និងកម្តៅ ចំនួន ៦០ ថ្នាក់ ទេសចរណ៍ចំនួន ៤១ ថ្នាក់, និង កសិកម្ម និង កសិ-ឧស្សាហកម្មចំនួន ៣៨ ថ្នាក់។

លោកបានបន្តថា គិតត្រឹមល្ងាចថ្ងៃទី ២១ ខែមករា ឆ្នាំ ២០២៤ កម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ មានអ្នកចុះឈ្មោះសរុបចំនួន ២៥ ៩០៧ នាក់ (ស្រី ៩ ០១១ នាក់) ក្នុងនោះ រាជធានីភ្នំពេញចំនួន ៩ ៧២៩ នាក់ (ស្រី ៣ ២៤០ នាក់), បាត់ដំបង ៣ ៣៤៥ នាក់ (ស្រី ១ ៤២៣ នាក់), សៀមរាប ១ ៨៤៦ នាក់ (ស្រី ៥០៥ នាក់), ព្រះសីហនុ ១ ០០៧ នាក់ (ស្រី ៣៥៥ នាក់), កណ្ដាល ៩២៤ នាក់ (ស្រី ២៤៣ នាក់), និងបណ្ដាខេត្តផ្សេងៗចំនួន ៩ ០៥៦ នាក់ (ស្រី ៣ ២៤៥ នាក់)។ ក្នុងនោះផ្នែកសំណង់សរុបមានចំនួន ៣ ៩៨៩ នាក់ (ស្រី ៥៩៤ នាក់), អគ្គិសនី និងថាមពល ៥៩៥ នាក់ (ស្រី ៥៦ នាក់), អេឡិចត្រូនិក ៤៩០ នាក់ (ស្រី ៩១ នាក់), កម្មន្តសាល ១៨០ នាក់ (ស្រី ១៣ នាក់), មេកានិចទូទៅ/មេកានិចរថយន្ត ៣ ៩១៦ នាក់ (ស្រី ១៦២ នាក់), ធុរកិច្ច និងព័ត៌មានវិទ្យា ៨ ៣៨១ នាក់ (ស្រី ៤ ៤០៦ នាក់) , សេវាកម្ម ១ ៤៨២ នាក់ (ស្រី ១ ២៧២ នាក់), បរិក្ខារត្រជាក់ និងកម្តៅ ៣ ៩៣០ នាក់ (ស្រី ១២៩ នាក់), ទេសចរណ៍ ១ ៧៣៩ នាក់ (ស្រី ១ ៣៤១ នាក់), និង កសិកម្ម និង កសិ-ឧស្សាហកម្ម ១ ២០៥ នាក់ (ស្រី ៩៤៧ នាក់)។

កម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យប្រមាណ ១ លាន ៥ សែននាក់ របស់រាជរដ្ឋាភិបាល បានបើកវគ្គជាលើកដំបូងនៅថ្ងៃទី ១៥ ខែមករា ឆ្នាំ ២០២៤ ដោយមានយុវជនចុះឈ្មោះចូលរៀនប្រមាណជិត ២ ម៉ឺននាក់ បន្ទាប់ពីរាជរដ្ឋាភិបាលបានប្រកាសដាក់ឱ្យអនុវត្តកម្មវិធីនេះជាផ្លូវការ កាលពីថ្ងៃទី ១៤ ខែវិច្ឆិកា ឆ្នាំ ២០២៤ កន្លងទៅ។

លោក កត្តា អ៊ន បានជំរុញឱ្យយុវជនមកពីគ្រួសារក្រីក្រ និងគ្រួសារងាយរងហានិភ័យ បន្តចុះឈ្មោះចូលរៀនជំនាញវិជ្ជាជីវៈ និងបច្ចេកទេស ជាបន្តបន្ទាប់ទៀត ដើម្បីទទួលបាននូវជំនាញមួយច្បាស់លាស់សម្រាប់ចិញ្ចឹមជីវិតប្រចាំថ្ងៃ និងក្រុមគ្រួសារ។

លោក កត្តា អ៊ន បានបន្ថែមថា ការចុះឈ្មោះចូលរៀនមិនតម្រូវឱ្យបង់ប្រាក់ទេ ហើយចំពោះយុវជនមកពីគ្រួសារក្រីក្រ និងគ្រួសារងាយរងហានិភ័យ នឹងទទួលបានថវិកាឧបត្ថម្ភបន្ថែមចំនួន ២៨ ម៉ឺនរៀល ក្នុង ១ ខែ។ ប៉ុន្តែយុវជនមកពីសេដ្ឋកិច្ចក្នុង ឬ ក្រៅប្រព័ន្ធ ឬ កម្មករ-និយោជិត ដែលមានបំណងចង់រៀនជំនាញបន្ថែម ក៏អាចចុះឈ្មោះចូលរៀនដោយឥតគិតថ្លៃបានដែរ តែមិនទទួលបានប្រាក់ឧបត្ថម្ភដូចយុវជនមកពីគ្រួសារក្រីក្រ និងងាយរងហានិភ័យទេ។

លោកបានបញ្ជាក់ថា យុវជន អាចចុះឈ្មោះចូលរៀននៅតាមសាលាបណ្ដុះបណ្ដាលវិជ្ជាជីវៈរបស់ក្រសួងការងារ ឬ តាមរយៈ TVET 1.5M ដោយអាចទាញយកកម្មវិធីនេះពី APPSTORE (IOS) និងPlayStore និងពី APPGallery ផងដែរ៕

អត្ថបទ ៖ សំអឿន

The post ១ សប្ដាហ៍ ក្រសួងការងារ បើកវគ្គបណ្ដុះបណ្ដាលយុវជនក្រីក្រ និងងាយរងហានិភ័យ ជាង ៦៧០ ថ្នាក់ មានសិស្សជិត ២ ម៉ឺននាក់ appeared first on Kampuchea Thmey Daily.

បណ្ដុះបណ្ដាល Archives - Kampuchea Thmey Daily

យុវជន​ខេត្តកោះកុង ទទួលបាន​ការបណ្តុះបណ្តាល​បច្ចេកទេស​វិជ្ជាជីវៈ​ពី​ប្រទេស​ថៃ​

ឯកឧត្ដម ហ៊ុន ម៉ានី អញ្ជើញបើកវគ្គបណ្ដុះបណ្ដាលស្ដីពី «ភាពជាអ្នកដឹកនាំ និងនវានុវត្តន៍ ជំនាន់ទី ៦»

យុវតីមកពីគ្រួសារក្រីក្រនៅខេត្តស្វាយរៀង ពេញចិត្តវគ្គបណ្ដុះបណ្ដាលបច្ចេកទេស​របស់រាជរដ្ឋាភិបាល

យុវជនជាង ៤ រយនាក់ កំពុងសិក្សាជំនាញវគ្គខ្លី នៅវិទ្យាស្ថានពហុបច្ចេកទេស​ភូមិភាគតេជោសែនតាកែវ

នាយកសាលាបច្ចេកទេសខេត្តរតនគីរី ៖ ជនជាតិដើមភាគតិច ចាប់អារម្មណ៍ជំនាញសម្អាងកាយ ភាគច្រើន

យុវជនខេត្តកោះកុង ទទួលបានការបណ្តុះបណ្តាលបច្ចេកទេសវិជ្ជាជីវៈពីប្រទេសថៃ

យុវតីមកពីគ្រួសារក្រីក្រនៅខេត្តស្វាយរៀង ពេញចិត្តវគ្គបណ្ដុះបណ្ដាលបច្ចេកទេសរបស់រាជរដ្ឋាភិបាល

យុវជនជាង ៤ រយនាក់ កំពុងសិក្សាជំនាញវគ្គខ្លី នៅវិទ្យាស្ថានពហុបច្ចេកទេសភូមិភាគតេជោសែនតាកែវ