ជាវិធានការការពារពីការកាប់បំផ្លាញព្រៃឈើដោយក្រុមបុគ្គលខិលខូច ឧត្តមសេនីយ៍ទោ សោម ស៊ុន បានគូសបញ្ជាក់ទៅកាន់កម្លាំងយោធាខេត្ត និង​កង​កម្លាំង​ចម្រុះ​ពាក់ព័ន្ធទាំង​អស់ ពីបទបញ្ជាយ៉ាងម៉ឺងម៉ាត់របស់ប្រមុខរាជរដ្ឋាភិបាល ក៏ដូចជាបទបញ្ជារបស់ថ្នាក់ដឹកនាំកងយោធពលខេមរភូមិន្ទ​ ព្រមទាំងការណែនាំដោយផ្ទាល់ពីលោក នួន ផារ័ត្ន អភិបាលខេត្តកំពង់ធំ ដោយត្រូវយកចិត្តទុកដាក់ដោយស្មារតីទទួលខុសត្រូវខ្ពស់ក្នុងការការពារធនធានធម្មជាតិ ឱ្យបានគង់វង្សតជំនាន់សម្រាប់កូនចៅក្រោយៗទៀត។

លោកឧត្តមសេនីយ៍ទោ សោម ស៊ុន បានសង្កត់ធ្ងន់ដល់កងកម្លាំងនៃតំបន់ប្រតិបត្តិការសឹករងខេត្តកំពង់ធំ ត្រូវសហការជាមួយគ្រប់ស្ថាប័នពាក់ព័ន្ធ ដើម្បីចាត់វិធានការយ៉ាងម៉ឺងម៉ាត់ ក្នុងការចាប់ឃាត់ខ្លួនជនប្រព្រឹត្តបទល្មើសជាក់ស្ដែង ក្នុងការកាប់បំផ្លាញព្រៃឡង់ ដែលជាដែនជម្រកសត្វព្រៃ និងជាតំបន់ដែលត្រូវអភិរក្សឱ្យបានជាដាច់ខាត ដើម្បីយកទៅផ្ដន្ទាទោសតាមផ្លូវច្បាប់ ដោយគ្មានការលើកលែងឡើយ។

ឧត្តមសេនីយ៍ទោ ក៏បានអរគុណដល់កងកម្លាំងចម្រុះទាំងអស់ ដែលមានកងកម្លាំងប្រដាប់អាវុធទាំងបី អាជ្ញាធរដែនដី និងមន្ត្រីឧទ្យានុរក្សបរិស្ថានខេត្តកំពង់ធំ ដែលកន្លងមកបានរួមសហការគ្នាយ៉ាងល្អប្រសើរ ក្នុងការការពារ ទប់ស្កាត់ និងបង្ក្រាបបទល្មើសធនធានធម្មជាតិ ជាពិសេសបទល្មើសកាប់ទន្ទ្រានព្រៃឈើយកដីរបស់រដ្ឋធ្វើជាកម្មសិទ្ធិ ក្នុងដែនជម្រកសត្វព្រៃ ព្រៃឡង់ បានយ៉ាងល្អប្រសើរ ដោយគ្មានការកាប់ទន្ទ្រានជាថ្មីទៀតឡើយ​។

តាមការបញ្ជាក់របស់ឧត្តមសេនីយ៍រូបនេះ ផ្ទៃដីព្រៃឈើ ដែលជនល្មេីស​បានលួចកាប់ទន្ទ្រាននាបណ្ដាឆ្នាំកន្លងទៅ ត្រូវបានរឹបអូស ​និង​ដកហូតមកធ្វើជាសម្បត្តិរដ្ឋឡើង​វិញ​ ដែលបច្ចុប្បន្ន​នេះ ដីទាំងនោះបានដុះលូតលាស់ព្រៃឈើធម្មជាតិឡើងវិញបានយ៉ាងឆាប់រហ័សផងដែរ៕

The post កម្លាំងយោធាខេត្តកំពង់ធំបន្តពង្រឹងវិធានការការពារតំបន់ព្រៃឡង់ ដោយព្រមានចាត់វិធានការច្បាប់ចំពោះជនកាប់បំផ្លាញព្រៃ appeared first on Kampuchea Thmey Daily.

លោក ឌិន ប៊ុនធឿន អនុប្រធានមន្ទីរបរិស្ថានខេត្តមណ្ឌលគិរី បានប្រាប់ថា នៅថ្ងៃទី ២៥ ខែមីនា សមត្ថកិច្ចនៅតែបន្តរឹតបន្តឹងការអនុវត្តច្បាប់ក្រមបរិស្ថាន ដើម្បីបង្ក្រាបបទល្មើសធនធានធម្មជាតិ មិនថានៅក្នុងបរិបទណាក៏ដោយ។ លោកបានបន្ថែមថា ក្នុងរយៈពេល ៣ ខែនេះ សមត្ថកិច្ចជំនាញបានបង្ក្រាបបទល្មើសចំនួន ១៨ ករណី ដោយបញ្ជូនជនសង្ស័យ ៦ នាក់ (ក្នុងនោះស្រី ១ នាក់) ទៅតុលាការ ខណៈដែលកំពុងបន្តស្រាវជ្រាវរកជនពាក់ព័ន្ធបន្ថែមទៀត។ ក្នុងចំណោមករណីទាំងនេះ មានការចុះអនុវត្តដីការស៊ើបសួរចំនួន ៥ ករណី ការចូលបំភ្លឺនៅសាលាដំបូងខេត្តចំនួន ៣ ករណី និងការចូលរួមសវនាការចំនួន ១៤ ករណី។

លោកបានបន្តថា ក្នុងប្រតិបត្តិការនេះ ក្រុមការងារបានដកហូតវត្ថុតាងជាច្រើនរួមមាន រថយន្ត ០២គ្រឿង ម៉ូតូ ៣៩គ្រឿង រណាយន្ត ៣៩គ្រឿង អាវុធ AK បាញ់គ្រាប់ពិតចំនួន ០៣ដើម អាវុធកែច្នៃ ០៣ដើម គ្រាប់ AK ០៦គ្រាប់ និងគ្រាប់បាដាង ៥០គ្រាប់។

បន្ថែមពីនេះ ក៏មានឧបករណ៍ឆក់ត្រី ១៦គ្រឿង អាគុយ ០៦គ្រឿង ម៉ាស៊ីនម៉ាស៊ូត ១០គ្រឿង ម៉ាស៊ីនសាំង ០៨គ្រឿង ម៉ាស៊ីនបូមទឹក ០៧គ្រឿង ម៉ាស៊ីនកាត់ស្មៅ ០៦គ្រឿង ក្បាលបូមទឹក ០៨គ្រឿង ក្បាលបូមដី ០២គ្រឿង តាបជ្រៀកឈើ ០១គ្រឿង។ ជាមួយគ្នានេះ ក៏បានដកហូតឈើអារប្រភេទលេខ១ និងឈើមូលចម្រុះ (ស្រឡៅ សុក្រម) សរុបចំនួន ៥២១សន្លឹក/កំណាត់/ដើម មានមាឌ ២២ម៉ែត្រគូប ១០១ (២២.១០១ ម៉ែត្រគូប)។

បន្ថែមទៀត ក្រុមការងារនៃមន្ទីរបរិស្ថាន ក៏បានដោះលែងសត្វព្រៃឲ្យត្រឡប់ទៅរស់នៅក្នុងបរិស្ថានធម្មជាតិវិញចំនួន ០៨ក្បាល រួមមាន សត្វស្វាក្តាម អន្សង ត្រដក់ ទទាល និងមាន់ទឹក។ ក្រៅពីនេះ ក្រុមការងារបានដកហូតអន្ទាក់ខ្សែពួរ និងខ្សែកាប ចំនួន ១៦៩៩ខ្សែ ដកហូតថាសរ៉ែងមាស ១១ឆាង និងបំផ្លាញចោល ០៥ឆាង។ ជាមួយគ្នានេះ ក៏បានរុះរើរោងខុសច្បាប់ ១៦រោង រុះរើទរចាប់មាស ១៤៧ទរ និងរុះរើឡធ្យូង ១២ឡ។

ទន្ទឹមនឹងការបង្ក្រាបនេះ លោក ឌិន ប៊ុនធឿន បានអំពាវនាវដល់ប្រជាពលរដ្ឋដែលរស់នៅក្បែរដែនជម្រកសត្វព្រៃ ក្នុងភូមិសាស្ត្រខេត្តមណ្ឌលគិរី ឲ្យបញ្ឈប់រាល់សកម្មភាពរុករាន ទន្ទ្រាន និងដឹកជញ្ជូនធនធានធម្មជាតិខុសច្បាប់គ្រប់ប្រភេទ ដែលអាចប្រឈមមុខនឹងទោសទណ្ឌតាមផ្លូវច្បាប់៕

អត្ថបទ៖ រៀម សុខហេង

The post រយៈពេល៣ខែ មន្ទីរបរិស្ថានខេត្តមណ្ឌលគិរី បញ្ជូនជនសង្ស័យ៦នាក់ពាក់ព័ន្ធបទល្មើសធនធានធម្មជាតិទៅតុលាការ appeared first on Kampuchea Thmey Daily.

ថ្លែងក្នុងពិធីបិទ «សន្និបាតបូកសរុបលទ្ធផលការងារបរិស្ថានឆ្នាំ២០២៥ និងលើកទិសដៅការងារឆ្នាំ២០២៦» របស់ក្រសួងបរិស្ថាន នាព្រឹកថ្ងៃទី៣០ ខែមករា ឧបនាយករដ្ឋមន្ត្រី នេត សាវឿន សង្កត់ធ្ងន់ដូច្នេះ៖ «ម៉ោងនេះ កុំចាំតែពលរដ្ឋរាយការណ៍កុំចាំតែគេបង្ហោះ! យើងត្រូវទទួលស្គាល់ថា ម៉ោងនេះ ពលរដ្ឋនិងសង្គមទាំងមូល ទទួលយកមិនបានទេ មានបទល្មើសកើតឡើងហើយ អាជ្ញាធរមូលដ្ឋានឆ្លើយថាមិនដឹងនោះ? យើងត្រូវចងចាំថា កិច្ចការពារតំបន់ធនធានធម្មជាតិនេះ គឺជាដង្ហើមធម្មជាតិនៃប្រទេសជាតិរបស់យើង ការបំផ្លិចបំផ្លាញ បំពាន រំលោភលើដី និងតំបន់ ទាំងនោះ គឺជាទោសដ៏ធ្ងន់ធ្ងរមួយ ដែលខ្ញុំសំណូមពរឱ្យក្រសួងបរិស្ថាន និងសមត្ថកិច្ចពាក់ព័ន្ធទាំងអស់ រួមទាំងមន្ត្រីអនុវត្តច្បាប់របស់យើង គឺ សូមកុំមានការពាក់ព័ន្ធឱ្យសោះ នឹងត្រូវចាត់ វិធានការច្បាប់យ៉ាងម៉ឺងម៉ាត់បំផុត។»។

លោក នេត សាវឿន ប្រាប់ទៅកាន់មន្ត្រីពាក់ព័ន្ធថា បន្ថែមពីលើកិច្ចការងារអភិរក្សការពារតំបន់ការពារធនធានធម្មជាតិ ក៏មិនត្រូវភ្លេចពីការងារអភិវឌ្ឍផងដែរ។ ក្នុងន័យនេះ ក្រសួងបរិស្ថានត្រូវគិតគូរការរស់នៅអាស្រ័យផល របស់ប្រជាសហគមន៍មូលដ្ឋាន ដែលរស់នៅក្បែរ ឬក្នុងតំបន់ការពារធម្មជាតិទាំងនោះ សំដៅធ្វើយ៉ាងណាប្រែក្លាយជាតំបន់ លំហែបៃតងធម្មជាតិ ដែលអាចលើកស្ទួយជីវភាពសេដ្ឋកិច្ចប្រចាំថ្ងៃរបស់ពួកគាត់ ប៉ុន្តែរក្សាបាននូវ គុណតម្លៃធម្មជាតិ សង្គមនិងវប្បធម៌ ស្របតាមអនុសាសន៍ណែនាំរបស់ សម្តេចធិបតី ដែលលោកបានចុះផ្ទាល់ដល់តំបន់ខ្នងផ្សា នាពេលកន្លងមក។

ក្រៅពីការងារការពារអភិរក្សតំបន់ព្រៃឈើ ឧបនាយករដ្ឋមន្ត្រី នេត សាវឿន ថ្លែងថាប្រាប់មន្ត្រីក្រសួងបរិស្ថានថា មិនត្រូវមើលរំលង ការគ្រប់គ្រង និងអភិរក្សបឹងធម្មជាតិ និងព្រៃលិចទឹកឡើយ។ ក្នុងន័យនេះ លោកស្នើក្រសួង បរិស្ថាន និងក្រសួង ស្ថាប័នពាក់ព័ន្ធ ផ្តោតជាអាទិភាពពង្រឹងកិច្ចសហប្រតិបត្តិការលើការគ្រប់គ្រង និងការអភិរក្សបឹងទន្លេសាប ទន្លេមេគង្គ និងព្រៃលិចទឹក ដែលមានសារៈសំខាន់ខ្លាំងសម្រាប់ សេដ្ឋកិច្ច សង្គម វប្បធម៌ និងបរិស្ថានកម្ពុជា ទាំងក្នុងតំបន់ និងសកល ជាពិសេសជាប្រភពនៃ សន្តិសុខស្បៀង និងអាហារូបត្ថម្ភសម្រាប់ប្រជាសហគមន៍មូលដ្ឋាន។ បឹងទន្លេសាប និងទន្លេមេគង្គ ផ្តល់ផលនេសាទរាប់ម៉ឺនតោនក្នុងមួយឆ្នាំៗ រួមទាំង សេវាកម្មអេកូឡូស៊ីផ្សេងៗទៀត ដែលផល ប្រយោជន៍ទាំងនេះកើតឡើងដោយធម្មជាតិ ដោយមិនចាំបាច់ដាក់ទុនវិនិយោគ។ ក្នុងន័យនេះ ចូរអភិរក្ស និងអភិវឌ្ឍតំបន់បឹងទន្លេសាប ទន្លេសាប និងទន្លេមេគង្គ ឱ្យមានតុល្យភាពគ្នា សំដៅធានាឱ្យបាននូវអរិយភាពនៃអេកូវប្បធម៌នៅតំបន់ទាំងនោះ។

ឧបនាយករដ្ឋមន្ត្រី នេត សាវឿន ណែនាំឱ្យពង្រឹងសេដ្ឋកិច្ចបៃតងរបស់កម្ពុជា តាមរយៈការស្តារព្រៃកោងកាង ស្មៅសមុទ្រ និងថ្មប៉ប្រះទឹក នៅតាមបណ្តាខេត្ត តំបន់ឆ្នេរ និងសមុទ្រ និង ត្រូវពង្រីកបន្ថែមនូវតំបន់ការពារធម្មជាតិសមុទ្រ និងលើកកម្ពស់លំហែបៃតងប្រកបដោយនិរន្តរភាព ដើម្បីធានាឱ្យបាននូវការអភិវឌ្ឍសេដ្ឋកិច្ច តាមរយៈការប្រើប្រាស់ធនធានធម្មជាតិ ដោយឈ្លាសវៃ និងមាននិរន្តរភាព សំដៅលើកកម្ពស់ភាពរុងរឿងនៃសេដ្ឋកិច្ចមូលដ្ឋាន៕

ដោយ៖ ង៉ិល ណារ៉ាត់

The post ឧប. នេត សាវឿន ឱ្យអាជ្ញាធរការពារធនធានធម្មជាតិ កុំចាំតែពលរដ្ឋបង្ហោះហ្វេសប៊ុក ព្រោះពលរដ្ឋទទួលយកមិនបានទេ ពេលមានបទល្មើសតែអាជ្ញាធរឆ្លើយមិនដឹង appeared first on Kampuchea Thmey Daily.

លោក អ៊ាន ស៊ាងអន អភិបាលរងស្រុកពេជ្រាដា បានប្រាប់កម្ពុជាថ្មីនៅថ្ងៃទី១៥ ខែវិច្ឆិកានេះថា ក្រោពីទទួលដំណឹងថា មានបទល្មើសក្នុងដែនសមត្ថកិច្ចរបស់ខ្លួន បានដឹកនាំកម្លាំងគណៈបញ្ជាការឯកភាពស្រុកសរុបចំនួន៣១នាក់ចុះល្បាត ទប់ស្កាត់ និងបង្ក្រាបបទល្មើសធនធានធម្មជាតិនៅក្នុងព្រៃសហគមន៍ត្រពាំងក្អើម ដែលស្ថិតនៅឃុំពូជ្រៃ ស្រុកពេជ្រាដា ខេត្តមណ្ឌលគិរី។

លោក ថា បន្ទាប់ពីពិនិត្យដល់ទីតាំងជាក់ស្តែង សមត្ថកិច្ចបានប្រទះឃើញមានការលួចចូលទៅកាប់ផ្តួលព្រៃសហគមន៍ចំនួន២ទីតាំផ្សេងគ្នា ទំហំប្រមាណ ៣៥អា។ ទីតាំងទី១ត្រង់និយាមកា 740966.1413794 មានការកាប់រំលំឈើទំហំប្រមាណ ២០អា និងទីតាំងទី២ និយាមកា 739929.1412289 កាប់រំលំឈើទំប្រមាណ ១៥អា។ យ៉ាណាមិញ ក្រោយជំនាញបានពិនិតយ៉ាងយកចិតទុកដាក់នៅទីតាំងខាងលើនោះ គឺមិនប្រទះឃើញមានជនសង្ស័យស្ថិតនៅទីតាំងនោះទេ ពោលគឺពួកជនបានប្រព្រឹត្តរួចរត់គេចបាត់អស់ទៅហើយ។

លោកអភិបាលរងស្រុករូបនេះ បញ្ជាក់ថា ក្រោយកម្លាំងចម្រុះបានពិនិតយ៉ាងល្អិតល្អន់​ និងយកចិតទុកដាក់បំផុត បានសន្និដ្ឋានរួមគ្នាថា មានជនសង្ស័យប្រព្រឹត្តបទល្មើសមកពីក្រៅឃុំប្រមាណពី១០ ទៅ២០នាក់ មានការប្រើប្រាស់អាវុធចូលទៅចំណុចទីតាំងនោះ ដើម្បីធ្វើសកម្មភាពកាប់ព្រៃដើម្បីព័ទ្ធចាប់សត្វស្វាយកទៅលក់ឲ្យឈ្មួញបន្ត។

បើទោះបីសមត្ថកិច្ចក្នុងប្រតិបត្តិការនោះមិនបានឃាត់ខ្លួនជនល្មើសយ៉ាងណាក្តី តែក្រុមការងារជំនាញកំពុងតាមដានស្រាវជ្រាវរកជនបង្ក និងអ្នកពាក់ព័ន្ធ ដើម្បីអនុវត្តនីតិវិធីច្បាប់៕

អត្ថបទ៖រៀម សុខហេង

The post សមត្ថកិច្ចចម្រុះចុះបង្ក្រាបបទល្មើសសង្ស័យរំលំព្រៃព័ទ្ធចាប់សត្វស្វាក្នុងដែនជម្រកស្រែពក appeared first on Kampuchea Thmey Daily.

អ្នកនាំពាក្យបន្ថែមថា តាមរយៈវិធានការនេះ ក្រសួងក៏បានអភិវឌ្ឍន៍សមត្ថភាព បច្ចេកទេស ពង្រឹងចំណេះដឹង ក្រោមរូបកិច្ចការផ្ដល់ការគាំទ្រទៅដល់សហគមន៍មូលដ្ឋាន ភាគីពាក់ព័ន្ធក្នុងការគ្រប់គ្រងធនធានធម្មជាតិ ដូចជាការផ្ដល់សម្ភារៈ ផែនទីតំបន់ការពារធនធានធម្មជាតិដល់សហគមន៍មូលដ្ឋាន អាជ្ញាធរ រដ្ឋបាលថ្នាក់ក្រោមជាតិ ផែនទីផ្កាយរណប ដើម្បីងាយស្រួលពិនិត្យផ្ទៀងផ្ទាត់ ក្នុងពេលមានបទល្មើសកើតឡើង។

លើសពីនេះ អ្នកនាំពាក្យអះអាងថា ក្រសួងបានផ្ដល់ការបណ្ដុះបណ្ដាលដល់មន្ត្រីឧទ្យាននុរក្ស ឱ្យចេះប្រើប្រាស់បច្ចេកវិទ្យាទំនើបដូចជាការប្រើប្រាស់យន្តហោះគ្មានមនុស្សបើក, ការប្រើប្រាស់បច្ចេកវិទ្យាឆ្លាតវៃ ក្នុងការគ្រប់គ្រងតំបន់ការពារធនធានជាតិ។

តាមរយៈការវិធានការ និងការបណ្ដុះបណ្ដាល ការប្រើប្រាស់បច្ចេកវិទ្យាលើការងារល្បាតព្រៃនេះ គឺបានសម្រួលដល់ការងារគ្រប់គ្រងធនធានធម្មជាតិរបស់មន្ត្រីជំនាញឱ្យមានភាពងាយស្រួល ទប់ស្កាត់បានទាន់ពេលវេលា ដើម្បីផ្ទៀងផ្ទាត់ថា ទីតាំងណាមួយក្នុងតំបន់ការពារធនធានធម្មជាតិ មានបទល្មើសណាមួយកើតឡើង ឬមិនមាន។ នេះជាការបន្ថែមរបស់អ្នកនាំពាក្យក្រសួងបរិស្ថាន។

លោក ខ្វៃ អាទិត្យា ឱ្យដឹងថា រយៈពេល២ឆ្នាំចុងក្រោយ  ក្រសួងបានប្រគល់ជូនយន្តហោះគ្មានមនុស្សបើក(ដ្រូន)ជិត៥០គ្រឿង ដល់ខេត្តមួយចំនួនដែលស្ថិតក្នុងតំបន់ការពារធនធានធម្មជាតិ ដើម្បីប្រើប្រាស់សម្រាប់ល្បាត និងទប់ស្កាត់បទល្មើសព្រៃឈើ ហើយតាមរយៈនេះ  បទល្មើសធនធានធម្មជាតិមានការថយចុះគួរឱ្យកត់សម្គាល់។

អ្នកនាំពាក្យ ខ្វៃ អាទិត្យា ថ្លែងសង្កត់ធ្ងន់ដូច្នេះ៖« »។

លោកបានចាត់ទុកការប្រើប្រាស់បច្ចេកវិទ្យាទំនើប និងការប្រើប្រាស់យន្តហោះគ្មានមនុស្សបើកសម្រាប​់ការងារល្បាតព្រៃនេះ គឺមានសារសំខាន់ណាស់ ព្រោះបានជួយឱ្យការបង្ក្រាបបានទាន់ពេល ចំណេញពេលវេលា ពោលគឺចំណេញពេលតិច លឿនរហ័ស អន្តរាគមន៍ចំពោះបទល្មើសធនធានធម្មជាតិបានទាន់ពេលវេលា ចំគោលដៅបានល្អជាងការល្បាតថ្មើរជើង។​

ក្រោយទទួលបានលទ្ធផលល្អលើការការពារធនធានធម្មជាតិតាមរយៈបច្ចេកវិទ្យា អ្នកនាំពាក្យ បញ្ជាក់ថា ក្រសួងគឺបានបន្តពង្រឹងសមត្ថភាពមន្ត្រីជំនាញ ឧទ្យាននុរក្សលើការប្រើប្រាស់បច្ចេកវិទ្យាបន្ថែមទៀត ដើម្បីការគ្រប់គ្រងធនធានធម្មជាតិឱ្យបានកាន់តែល្អប្រសើរជាងមុន។

លោក រស់ លីដា មានតួនាទីជាប្រធានស្នាក់ការរងពូគង់ ទួលពង្រនៃដែនជម្រកសត្វព្រៃកែវសីមា ខេត្តមណ្ឌលគិរី បានឱ្យដឹងថា ដ្រូន មានសារៈសំខាន់ខ្លាំងណាស់សម្រាប់មន្ត្រីឧទ្យានុរក្ស និងភ្នាក់ងារល្បាតនៅក្នុងដែនជម្រកសត្វព្រៃកែវសីមា។ ដ្រូន មានវិសាលភាពឃ្លាំមើលទីតាំងបានធំទូលាយល្អ ជាពិសេសនៅទីតាំងតំបន់ដែលមានព្រៃក្រាស​ តំបន់ភ្នំ និងអូរជាដើម ខណៈនៅខែខ្លះមន្ត្រីឧទ្យានុរក្សមិនអាចធ្វើដំណើរដោយផ្ទាល់ចុះទៅល្បាតនៅតាមគោលដៅមួយចំនួនបាននោះទេ ប៉ុន្តែ ដ្រូនបានចូលរួមចំណែកយ៉ាងខ្លាំងឃ្លាំមើលបទល្មើសជាដើម។

មន្ត្រីឧទ្យានុរក្សរូបនេះ បានបញ្ជាក់យ៉ាងដូច្នេះថា៖ «បើមានបទល្មើសកើតឡើងទាន់ហេតុការណ៍ណាមួយ គឺយើងបញ្ជាដ្រូននេះហោះទៅឃ្លាំមើល និងពិនិត្យស្ថានភាពទីតាំងដោយផ្ទាល់ដែលពលរដ្ឋផ្តល់ព័ត៌មានឱ្យដើម្បីពិនិត្យឱ្យច្បាស់លាស់នូវព័ត៌មានដែលទទួលបានពីពលរដ្ឋ។ មានដ្រូនបានចូលរួមកាត់បន្ថយបទល្មើសបានជាច្រើន ដ្រូនជួយបានច្រើនមែនទែន»។

កម្ពុជាមានតំបន់ការពារធម្មជាតិរហូតដល់ ៧លានហិកតា ស្របពេលមន្រ្តីឧទ្យានុរក្សបានថយចុះពី ១,២០០នាក់ មកនៅប្រហែល ១,០០០នាក់ប៉ុណ្ណោះ។ ការថយចុះនេះបណ្ដាលមកពីភាពចាស់ជរា ជាពិសេស ការលបបាញ់សម្លាប់ពីសំណាក់ជនល្មើស៕

ដោយ៖ ង៉ិល ណារ៉ាត់

The post មន្ត្រី៖ បទល្មើសធនធានធម្មជាតិមានការថយចុះ ក្រោយការប្រើយន្តហោះគ្មានមនុស្សបើកល្បាតព្រៃ appeared first on Kampuchea Thmey Daily.

ប្រតិបត្តិការបង្រ្កាបនេះដឹកនាំដោយលោក ឃន់ អូន អភិបាលរងស្រុកអូររាំង សហការជាមួយកម្លាំងស្នាក់ការបរិស្ថានរងស្រុកអូររាំង បានចុះទប់ស្កាត់ និងបង្ក្រាបបទល្មើសធនធានធម្មជាតិនៅត្រង់ចំណុចផ្លូវក្រោយខ្ទមអ្នកតា ស្ថិតនៅភូមិពូហ្យាម ឃុំសែនមនោរម្យ ស្រុកអូររាំង ខេត្តមណ្ឌលគិរី។ ឈើ​ដែល​រឹបអូស​បាន​ត្រូវ​ឈ្មួញ​រក្សាទុក​ដោយ​ខុសច្បាប់​នៅ​ទីតាំង​នេះ​។ សកម្មភាពនេះគឺជាផ្នែកមួយនៃកិច្ចខិតខំប្រឹងប្រែងជាបន្តបន្ទាប់ក្នុងការទប់ស្កាត់ និងបង្ក្រាបសកម្មភាពធនធានធម្មជាតិខុសច្បាប់នៅក្នុងខេត្ត។

ក្នុងប្រតិបត្តិការបង្ក្រាបនេះ ឈើដែលបានរឹបអូសនោះជាឈើ ស្រឡៅ ប្រភេទលេខ១ មានចំនួន១៨ ដុំ ដែលជនមិនស្គាល់អត្តសញ្ញាណយកលាក់ទុកចោលក្នុងព្រៃ។ ក្រោយពីការបង្រ្កាបនោះ ក្រុមការងារជំនាញបានដឹកជញ្ជូនវត្ថុតាងជាឈើខាងលើយកមករក្សាទុកនៅស្នាក់ការរងអូររាំង ដើម្បីចាត់ការទៅតាមនីតិវីធីច្បាប់។

នៅក្នុងខេត្តមណ្ឌលគិរី ដែលសម្បូរទៅដោយធនធានធម្មជាតិ និងព្រៃឈើ ត្រូវបានមន្រ្តីជំនាញនៃមន្ទីរបរិស្ថានខេត្ត និងអាជ្ញាធរពាក់ព័ន្ធបានធ្វើការអប់រំពលរដ្ឋជារឿយៗ និងព្រមានចាត់វិធានការមិនចំពោះមុខ ទៅលើបុគ្គលណាដែលប្រព្រឹត្តបទល្មើសធនធានធម្មជាតិ និងកាប់ព្រៃឈើដោយខុសច្បាប់។ ជាមួយនឹងការព្រមាននេះ មន្រ្តីបន្តអំពាវនាវដល់ប្រជាពលរដ្ឋ និងឈ្មួញ ត្រូវបញ្ឈប់ជាបន្ទាន់រាល់សកម្មភាពប្រព្រឹត្តបទល្មើសព្រៃឈើផ្សេងៗ ដែលប៉ះពាល់ទៅដល់សម្បត្តិធនធានធម្មជាតិ។

ទោះបីជាមានការរឹតបន្តឹងច្បាប់ និងការព្រមានក្តី ក៏បទល្មើសព្រៃឈើបានបន្តកើតមាននៅក្នុងតំបន់មួយចំនួនក្នុងខេត្តមណ្ឌលគិរីនាពេលថ្មីៗនេះ។ សកម្មភាពខុសច្បាប់ដែលកំពុងបន្តទាំងនេះត្រូវបានជំរុញដោយក្រុមឈ្មួញ និងបុគ្គលមួយចំនួនគប់គិតគ្នាប្រើមធ្យោបាយផ្សេងៗ និងរថយន្តក្នុងការដឹកជញ្ជូនឈើខុសច្បាប់៕

អត្ថបទ៖ រៀម សុខហេង

The post កម្លាំងនគរបាលចម្រុះខេត្តមណ្ឌលគិរី រឹបអូសបានឈើប្រណិតខុសច្បាប់ជិត ២០ កំណាត់ appeared first on Kampuchea Thmey Daily.

ការណែនាំរបស់លោកអភិបាលខេត្តកំពង់ធំ ធ្វើឡើងកាលពីថ្ងៃទី១១ ខែកុម្ភៈ ឆ្នាំ២០២៥ ក្នុងឱកាសដឹកនាំកិច្ចប្រជុំគណៈបញ្ជាការឯកភាពខេត្ត។ លោក នួន ផារ័ត្ន អភិបាល និងជាប្រធានគណៈបញ្ជាការឯកភាពខេត្តកំពង់ធំ បានជំរុញគណៈបញ្ជាការឯកភាពខេត្ត ពិសេសក្រុង ស្រុក ទាំងអស់បង្កើនសកម្មភាពរបស់ខ្លួន លើកិច្ចការងារអនុវត្តគោលនយោបាយ ភូមិ ឃុំ មានសុវត្ថិភាព និងបង្កើនការទប់ស្កាត់បង្រាបបទល្មើសធនធានធម្មជាតិប្រកប ដោយការទទួលខុសត្រូវខ្ពស់។

លោកអភិបាលខេត្ត បន្តថា គណៈបញ្ជាការឯកភាពគ្រប់ក្រុង ស្រុក ទាំង៩ ត្រូវយកបង្កើនសកម្មភាពការងាររបស់ខ្លួន ដែលត្រូវសហការគ្នារួមទប់ស្កាត់បទល្មើសធនធានធម្មជាតិ បទល្មើសគ្រឿងញៀន ក្មេងទំនើង ល្បែងស៊ីសងគ្រប់ប្រភេទ ជាពិសេសការដាក់វេន្តប្រចាំបញ្ជារទៅតាមគោលដៅ ដែលក្នុងនោះ កម្លាំងនៅតាមទីបញ្ជាការស្រាលតាមគោលដៅដីតំបន់៣ ដែលជាដីរក្សាទុករបស់រដ្ឋ ក៏ចាំចាប់ត្រូវបង្កើន ការយកចិត្តទុកដាក់។

លោក បន្ថែមថា សម្តេចធិបតី ហ៊ុន ម៉ាណែត បានកំណត់ដែនគ្រប់គ្រងដីតំបន់៣ ដើម្បីជាដីរក្សាទុករបស់រដ្ឋ ទន្ទឹមនេះ គណៈកម្មការគ្រប់គ្រងបទល្មើសធនធានធម្មជាតិខេត្ត ក៏បានដាក់ទីបញ្ជាការស្រាលចំនួន១៣ទីតាំង ទាំងដីតំបន់៣ និងដីគម្របព្រៃឈើរបស់រដ្ឋ ព្រមទាំងតំបន់ការពារផ្សេងៗ។

បើតាមការគូសបញ្ជាក់របស់លោកអភិបាលខេត្ត គណៈកម្មការការពារគ្រប់គ្រង និងបង្ក្រាបបទល្មើសធនធានធម្មជាតិខេត្តកំពង់ធំ កន្លងមកបានរកឃើញផ្ទៃដីគម្របព្រៃ និងដីការពារទន្ទ្រានដោយខុសច្បាប់ ប្រមាណជាង១ ០០០ហិកតា ដែលមានពីរផ្នែក គឺមួយផ្នែកគ្រប់គ្រងដោយមន្ទីរបរិស្ថាន ដែលមានការទន្ទ្រានជាង ៣២១ហិកតា និងមួយផ្នែកទៀតគ្រប់គ្រងដោយខ័ណ្ឌរដ្ឋបាលព្រៃឈើកំពង់ធំ ស្ថាប័នមន្ទីរកសិកម្ម និងរុក្ខាប្រមាញ់ខេត្ត ចំនួនប្រមាណ ៧៥៤ហិកតា។ បច្ចុប្បន្នផ្ទៃដីខ្លះត្រូវបានចេញដីកាដកហូត និងផ្នែកខ្លះត្រូវបានប្រគល់ឱ្យទៅដែនសមត្ថកិច្ចគ្រប់របស់អង្គភាពដើមវិញ ដើម្បីការពារផងដែរ៕ អត្ថបទ៖ ឈាង មករា

The post អាជ្ញាធរខេត្តកំពង់ធំបង្កើនសកម្មភាពទប់ស្កាត់បង្រ្កាបបទល្មើសធនធានធម្មជាតិ appeared first on Kampuchea Thmey Daily.

លោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ បានព្រមានធ្ងន់ៗថា ជនទាំងឡាយណា ទោះមន្ត្រីក្ដី ឈ្មួញក្ដី ដែលធ្លាប់ និងដែលព្យាយាមប៉ុនប៉ងធ្វើសកម្មភាពដោយផ្ទាល់ ឬឈរពីក្រោយប្រជាជនមកពីតំបន់ផ្សេង ក្នុងចេតនាកាប់បំផ្លាញព្រៃឈើ ទន្ទ្រានដីរដ្ឋ ដីព្រៃលិចទឹក និងបទល្មើសនេសាទ ជាដើម ត្រូវប្រញាប់ដកខ្លួនចេញជាបន្ទាន់ បើមិនចង់អស់លក្ខណ៍ ខូចអនាគត និងកិត្តិយស។

ការព្រមានរបស់ប្រមុខក្រសួងមហាផ្ទៃខាងលើ ធ្វើឡើងក្នុងឱកាសអញ្ជើញជាអធិបតីភាពនៅក្នុងពិធីប្រកាសចូលកាន់មុខតំណែងអភិបាលខេត្តកំពង់ធំថ្មី កាលពីរសៀលថ្ងៃ៨ ខែកក្កដា ឆ្នាំ២០២៤។ ជាមួយនឹងការព្រមាននេះ លោកឧបនាយករដ្ឋមន្ត្រី ស សុខា ក៏បានរម្លឹកថ្នាក់ដឹកនាំ មន្ត្រី និងកម្លាំងចម្រុះចំណុះឱ្យរដ្ឋបាលខេត្តទាំងអស់នូវបទបញ្ជាដ៏ម៉ឺម៉ាត់របស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ពាក់ព័ន្ធនឹងកិច្ចការពារធនធានធម្មជាតិ។

ជាការកត់សម្គាល់ ថ្លែងក្នុងឱកាសអញ្ជើញជាអធិបតីបិទសន្និបាតក្រសួងបរិស្ថាន កាលពីខែធ្នូ ឆ្នាំ២០២៣ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានដាក់ចេញបទបញ្ជាយ៉ាងម៉ឹងម៉ាត់ឱ្យគ្រប់បណ្តាសមត្ថកិច្ចពាក់ព័ន្ធទាំងអស់ត្រូវអនុវត្តច្បាប់ឱ្យបានតឹងរ៉ឹងបំផុតចំពោះអ្នកប្រព្រឹត្តបទល្មើសព្រៃឈើ និងធនធានធម្មជាតិ។ សម្តេចធិបតី បានបញ្ជាឱ្យគណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ ក្រោមការដឹកនាំដោយនាយឧត្តមសេនីយ៍ សៅ សុខា និងក្រសួងស្ថាប័នពាក់ព័ន្ធ អាជ្ញាធរព័ន្ធ ត្រូវរួមគ្នាបង្កើនប្រសិទ្ធភាព ដើម្បីប្រយុទ្ធប្រឆាំងបទល្មើសព្រៃឈើគ្រប់ទម្រង់។

សម្ដេចធិបតី ហ៊ុន ម៉ាណែត ក៏បានព្រមានដកហូតតំណែងមន្ដ្រីរាជការ កងកម្លាំងប្រដាប់អាវុធទាំងឡាយណា ប្រសិន បើរកឃើញមានការជាប់ពាក់ព័ន្ធជាមួយសកម្មភាពទន្ទ្រានដីព្រៃរបស់រដ្ឋ ធ្វើជាកម្មសិទ្ធិដោយខុសច្បាប់នៅតាមមូលដ្ឋាននានាផងដែរ។ ក្នុងឱកាសអញ្ជើញសម្ពោធសមិទ្ធផលនានា នៅវត្តមណីរតនារាម ក្នុងខេត្តពោធិ៍សាត់ កាលពីខែមីនា ឆ្នាំ ២០២៤ សម្ដេចធិបតី បានសង្កត់ធ្ងន់ថា រាជរដ្ឋាភិបាលនីតិកាលថ្មី ក៏មិនខុសពីនីតិកាលចាស់នោះទេ ពោលនៅតែបន្ដអនុវត្តយ៉ាងម៉ឺងម៉ាត់ចំពោះសកម្មភាពខុសច្បាប់ ក្នុងការទៅទន្ទ្រានដីព្រៃរបស់រដ្ឋមកធ្វើជាកម្មសិទ្ធិបែបនេះ។

សម្ដេចធិបតី ហ៊ុន ម៉ាណែត អះអាងថា ការទប់ស្កាត់ និងបង្ក្រាបបទល្មើសធនធានធម្មជាតិ គឺរដ្ឋបាលថ្នាក់ក្រោមជាតិគឺជាមេទ័ពជួរមុខដ៏សំខាន់ក្នុងការទប់ស្កាត់ ប៉ុន្តែកន្លងមក សម្ដេច សង្កេតឃើញថា រាល់ប្រតិបត្តិការបង្ក្រាប គឺសុទ្ធតែកម្លាំងមកពីថ្នាក់ជាតិ។ ត្រង់ចំណុចនេះ សម្ដេចធិបតី បានដាក់ចេញវិធានការថ្មី ដោយប្រគល់ការទទួលខុសត្រូវលើការ ងារបង្ការ ទប់ស្កាត់បទល្មើសនេះ ទៅរដ្ឋបាលថ្នាក់ក្រោមជាតិតែម្ដង ហើយប្រសិនបើអនុវត្តមិនមានប្រសិទ្ធភាពទេនោះ សម្ដេច នឹងពិចារណាក្នុងការផ្លាស់ប្ដូរ ឬតែងតាំងអ្នកថ្មីជំនួស៕

The post រដ្ឋមន្ត្រីក្រសួងមហាផ្ទៃ ព្រមានជននៅពីក្រោយបទល្មើសធនធានធម្មជាតិឱ្យប្រញាប់ដកខ្លួន appeared first on Kampuchea Thmey Daily.