បាញ់បោះ Archives - Kampuchea Thmey Daily

បុរសម្នាក់ ត្រូវជនមិនស្គាល់មុខបាញ់របួសធ្ងន់ ហូរឈាមស្រោចខ្លួន នៅផ្លូវជាតិលេខ ១ សង្កាត់និរោធ

អ៊ិន ពិសី — Wed, 08 Oct 2025 02:11:42 +0000

បុរសម្នាក់ ត្រូវបានជនមិនស្គាល់មុខបាញ់ បណ្ដាលឲ្យរងរបួសធ្ងន់ធ្ងរ មានហូរឈាមស្រោចខ្លួន ខណៈកំពុងជិះម៉ូតូលើផ្លូវជាតិលេខ ១ គោលដៅត្រឡប់ទៅផ្ទះ។

ហេតុការណ៍នេះបានកើតឡើងកាលពីវេលាម៉ោង ៤ និង ៥០ នាទី ទៀបភ្លឺ ថ្ងៃទី ៨ ខែតុលា ឆ្នាំ ២០២៥ តាមបណ្ដោយផ្លូវជាតិលេខ ១ ក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ។

តាមប្រភពព័ត៌មានពីពលរដ្ឋនៅក្បែរកន្លែងកើតហេតុ បានឲ្យដឹងថា គាត់បានឮសំឡេងកាំភ្លើង ក៏រត់មកមើល ស្រាប់តែឃើញបុរសរងគ្រោះកំពុងអង្គុយផ្អែកកង់បីឥណ្ឌា មានឈាមហូរស្រោចខ្លួននៅផ្នែកខាងក្រោយ។ ខណៈនោះ គាត់បានស្ទុះទៅជួយគ្រា និងទាក់ទងទៅកាន់ប៉ូលិសដែលគាត់ស្គាល់ ដើម្បីសុំការអន្តរាគមន៍ផងដែរ។ ភ្លាមៗ បុរសរងគ្រោះ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យកាល់ម៉ែត។ បន្ទាប់ពីមានការរាយការណ៍ សមត្ថកិច្ច ក៏បានចុះទៅហ៊ុមព័ទ្ធខ្សែប្រតិបត្តិការ និងរើសយកគ្រាប់បន្ទុះ(គ្រាប់កាំភ្លើងខ្លី) ទៅធ្វើការស្រាវជ្រាវបន្ត។

ក្រោយកើតហេតុ សមត្ថកិច្ចជំនាញ បានយកម៉ូតូរក្សាទុកនៅប៉ុស្តិ៍នគរបាលរដ្ឋបាលនិរោធ ដើម្បីរង់ចាំក្រុមគ្រួសារមកទទួល។ ចំពោះជនបង្ក សមត្ថកិច្ចកំពុងបើកការស្រាវជ្រាវ ដើម្បីចាត់ការតាមផ្លូវច្បាប់៕

អត្ថបទ ៖ រដ្ឋា

The post បុរសម្នាក់ ត្រូវជនមិនស្គាល់មុខបាញ់របួសធ្ងន់ ហូរឈាមស្រោចខ្លួន នៅផ្លូវជាតិលេខ ១ សង្កាត់និរោធ appeared first on Kampuchea Thmey Daily.

បាញ់រះជាច្រើនគ្រាប់បណ្តាលឱ្យសមត្ថកិច្ចម្នាក់រងរបួស

Sophal Tuon — Sun, 10 Dec 2023 10:07:47 +0000

ជនសង្ស័យពីរនាក់បានធ្វើសកម្មភាពកាច់សោកម៉ូតូបានសម្រេច ហើយត្រូវបានសមត្ថកិច្ចព្រហ្មទណ្ឌកម្រិតស្រាលប្រទះឃើញឈានដល់ការផ្ទុះអាវុធជាច្រើនគ្រាប់ បណ្តាលឱ្យសមត្ថកិច្ចម្នាក់រងរបួស ចំណែកជនសង្ស័យ២នាក់នោះត្រូវបានសមត្ថកិច្ចឃាត់ខ្លួន។

ហេតុការណ៍នេះបង្កឱ្យមានការភ្ញាក់ផ្អើលឡើងកាលពីវេលាម៉ោង៨ យប់ ថ្ងៃទី០៩ ខែធ្នូ ឆ្នាំ ២០២៣ នៅចំណុចផ្លូវលេខ ២៤៦ កែងផ្លូវសុធារស ភូមិ២ សង្កាត់ចតុមុខ ខណ្ឌដូនពេញ។

លោក ម៉ៅ ចាន់ថុន អធិការរងទទួលផែនព្រហ្មទណ្ឌបានឱ្យដឹងថា ហេតុការណ៍នេះផ្តើមចេញពីជនសង្ស័យចំនួន០២នាក់ ជាមុខសញ្ញាចាស់ ភេទប្រុស អាយុប្រហែល៣០ឆ្នាំ បានធ្វើសកម្មភាពកាច់សោកម៉ូតូជាក់ស្តែងក៏ត្រូវបានកម្លាំងព្រហ្មទណ្ឌកម្រិតស្រាលក្រសួងកំពុងធ្វើការ ច្បាមនិងបានបើកការបង្រ្កាប ប៉ុន្តែជនសង្ស័យខាងលើក្នុងចំណោមគ្នា២នាក់មានម្នាក់កាន់កាំភ្លើងខ្លីម៉ាក (ប៉េរ៉ូតា- បង់មួយ )បានដកចេញពីចង្កេះបាញ់រះ(ចំនួនប្រហែល១០គ្រាប់)មកលើសមត្ថកិច្ចព្រហ្មទណ្ឌកម្រិតស្រាលបណ្ដាលឱ្យមានរបួសភ្លៅ (អនុប្រធាននាយកដ្ឋានព្រហ្មទណ្ឌ)បញ្ជូនមកមន្ទីរពេទ្យកាល់ម៉ែតភ្លាមៗ ដើម្បីព្យាបាលរបួស។

បច្ចុប្បន្នជនសង្ស័យទាំង០២នាក់ រួមនឹងវត្ថុតាងកាំភ្លើងខ្លី ត្រូវបានកម្លាំងនាយកដ្ឋានព្រហ្មទណ្ឌកម្រិតស្រាលបញ្ជូនទៅនាយកដ្ឋានដើម្បីសាកសួរបន្ត៕

អត្ថបទ៖ សុខា

The post បាញ់រះជាច្រើនគ្រាប់បណ្តាលឱ្យសមត្ថកិច្ចម្នាក់រងរបួស appeared first on Kampuchea Thmey Daily.

បុរសម្នាក់បើករថយន្តមកបាញ់បុរសម្នាក់ទៀតដល់បន្ទប់ជួលជាច្រើនគ្រាប់

អុន ស្រីមាន — Sat, 29 Jul 2023 06:53:12 +0000

បុរសម្នាក់កំពុងឈរលេងនៅមុខបន្ទប់ជួល ស្រាប់តែមានបុរសម្នាក់បេីករថយន្តមួយគ្រឿងមកបាញ់សំដៅជាច្រេីនគ្រាប់ហេីយគេចខ្លួនបាត់។

ហេតុការណ៍នេះ បង្កឱ្យមានការភ្ញាក់ផ្អេីលយ៉ាងខ្លាំង កាលពីវេលាម៉ោង៨:៣០នាទីយប់ ថ្ងៃទី២៨ ខែកក្កដា ឆ្នាំ២០២៣ ស្ថិតនៅតាមបណ្តោយផ្លូវបេតុង កែងផ្លូវ៣៧១ក្នុង ភូមិព្រែកតាគង់១ សង្កាត់ចាក់អង្រែលេី ខណ្ឌមានជ័យ រាជធានីភ្នំពេញ។

តាមសម្តីជនរងគ្រោះបានប្រាប់ឲ្យដឹងថា មុនកេីតហេតុ បុរសជាខ្មាន់កាំភ្លើងតែងតែខឹង និងប្រច័ណ្ឌទៅលើខ្លួនជាមួយនឹងស្រ្តីម្នាក់ជាប្រពន្ធ និងធ្លាប់បានគំរាមទៅលើជនរងគ្រោះទៀតផង។ លុះនៅម៉ោងកើតហេតុ ដោយជនរងគ្រោះបានមកឈរលេងនៅមុខបន្ទប់ជួល ស្រាប់តែលេចមុខបុរសជាជនដៃដល់បានបើករថយន្តម៉ាក Ford មួយគ្រឿង ពាក់ស្លាកលេខ ភ្នំពេញ 2BT-8001 មកចុះពីផ្លូវ៣៧១មកឈប់នៅមុខបន្ទប់ជួលបុរសរងគ្រោះ ហើយក៏បានដកកាំភ្លើងបាញ់សំដៅជាច្រើនគ្រាប់ ប៉ុន្តែសំណាងល្អមិនត្រូវ បង្កឲ្យមានការភ្ញាក់ផ្អើលដល់ពលរដ្ឋរាយការណ៍ទៅសមត្ថកិច្ចមូលដ្ឋានចុះមកជួយអន្តរាគមន៍ភ្លាមៗ។ ចំពោះ បុរសជាខ្មាន់កាំភ្លើង ក្រោយពីបាញ់រួចបានបើករថយន្តគេចខ្លួនបាត់ស្រមោល។

ក្រោយកេីតហេតុ សមត្ថកិច្ចមូលដ្ឋានបានចុះមកដល់កន្លែងកេីតហេតុ និងនាំបុរសរងគ្រោះយកទៅប៉ុស្ដិ៍នគរបាលសង្កាត់ចក្រអង្រែលើ ដើម្បីសួរនាំ និងដាក់ពាក្យបណ្តឹងដើម្បីតាមរកជនដៃដល់យកមកផ្ដន្ទាទោសតាមច្បាប់៕

ដោយ៖ សុខា

The post បុរសម្នាក់បើករថយន្តមកបាញ់បុរសម្នាក់ទៀតដល់បន្ទប់ជួលជាច្រើនគ្រាប់ appeared first on Kampuchea Thmey Daily.

តុលាការចេញដីកាឃុំខ្លួនមន្ត្រីនគរបាលបាញ់បោះលើមន្ត្រីគយប៉ុន្មានថ្ងៃមុន

អ៊ិន ពិសី — Thu, 06 Jul 2023 02:18:04 +0000

កាលពីថ្ងៃទី ០៥ ខែកក្កដា ឆ្នាំ ២០២៣ នេះ សាលាដំបូងខេត្តតាកែវ បានសម្រេចចេញដីកាបង្គាប់ឲ្យឃុំខ្លួនមន្ត្រីនគរបាលម្នាក់ ដែលផ្ទុះអាវុធលើមន្ត្រីគយនៅច្រកទ្វារអន្តរជាតិភ្នំដិន កាលពីប៉ុន្មានថ្ងៃមុន និងបានបង្កការភ្ញាក់ផ្អើលទាំងយប់ដល់ប្រជាពលរដ្ឋ។

ក្នុងដីកាបង្គាប់ឲ្យឃុំខ្លួនចេញដោយ លោក គុជ តារ៉ា ចៅក្រមស៊ើបសួរសាលាដំបូងខេត្តតាកែវ បង្ហាញថា ឈ្មោះ ណុប សំបូរ ភេទប្រុស អាយុ ៣១ ឆ្នាំ ជនជាតិខ្មែរ មុខរបរជាមន្ត្រីនគរបាលជាតិ នៃស្នងការដ្ឋាននគរបាលខេត្តតាកែវ ទីលំនៅបច្ចុប្បន្នភូមិកំពង់អំពិល ឃុំបូរីជលសារ ស្រុកបូរីជលសារ ខេត្តតាកែវ ត្រូវបានដាក់ឲ្យស្ថិតនៅក្រោមការពិនិត្យ ពីបទ ៖ ចាត់វិធានការសំដៅរារាំងការអនុវត្តច្បាប់ និងស្ថានទម្ងន់ទោស, បទប្រឆាំងនឹងអ្នករាជការសាធារណៈមានស្ថានទម្ងន់ទោស, បទកាន់កាប់ប្រើប្រាស់អាវុធដោយគ្មានការអនុញ្ញាត និងបទបង្កឧបសគ្គ ឬធ្វើឲ្យរាំងស្ទះដល់ការអនុវត្តច្បាប់របស់មន្ត្រីគយ ប្រព្រឹត្តនៅចំណុចភូមិបន្ទាយ ឃុំជីខ្មា ស្រុកទ្រាំង ខេត្តតាកែវ កាលពីយប់ថ្ងៃទី ០១ ខែកក្កដា ឆ្នាំ ២០២៣។ ដីកានេះ បានសម្រេចឃុំខ្លួនជាបណ្ដោះអាសន្នលេខ ៥១២ / ២០២៣ ចុះថ្ងៃទី ០៥ ខែកក្កដា ឆ្នាំ ២០២៣ នៅពន្ធនាគារខេត្តតាកែវ។

សូមរំឭកថា កាលពីយប់ថ្ងៃទី ០១ ខែកក្កដា ឆ្នាំ ២០២៣ ឈ្មោះ ណុប សំបូរ ជាមន្ត្រីប៉ូលិសសេដ្ឋកិច្ចប្រចាំការនៅច្រកទ្វារអន្តរជាតិភ្នំដិន ស្រុកគីរីវង់ បានបង្កការផ្ទុះអាវុធ ចំពេលមន្ត្រីគយចល័តកំពុងបំពេញការងារ ដែលមហាជនមើលឃើញថា ជាករណីកាងរថយន្តដឹកទំនិញ ហើយមិនព្រមបង់ពន្ធទៅគយចល័ត ទើបកើតមានជម្លោះនឹងគ្នា រហូតមានការផ្ទុះអាវុធបែបនេះទៅ៕

អត្ថបទ ៖ វីរៈ

The post តុលាការចេញដីកាឃុំខ្លួនមន្ត្រីនគរបាលបាញ់បោះលើមន្ត្រីគយប៉ុន្មានថ្ងៃមុន appeared first on Kampuchea Thmey Daily.

ឃាត់ខ្លួនបុរសម្នាក់ ករណីបាចគ្រាប់កាំភ្លើងចូលក្នុងហាងកាត់សក់ និងគំរាមបាញ់ នៅបឹងត្របែក

អ៊ិន ពិសី — Wed, 03 May 2023 09:44:25 +0000

សមត្ថកិច្ចចាប់ឃាត់ខ្លួនបុរសម្នាក់ ដែលស្រែកជេរឡូឡា គំរាមប្រើប្រាស់អាវុធលើជាងកាត់សក់ យកគ្រាប់កាំភ្លើងទៅបោះគំរាមគេ ហើយត្រូវបានគេបង្ហោះព្រោងព្រាតលើបណ្ដាញទំនាក់ទំនងសង្គមហ្វេសប៊ុក តាមរយៈវីដេអូឃ្លីប។

សូមបញ្ជាក់ថា ហេតុការណ៍នេះបានកើតឡើងកាលពីថ្ងៃទី ០២ ខែឧសភា ឆ្នាំ ២០២៣ តែទើបបង្កការភ្ញាក់ផ្អើលតាមបណ្ដាញទំនាក់ទំនងសង្គមហ្វេសប៊ុក និងគេហទំព័រ នៅថ្ងៃទី ០៣ ខែឧសភា ឆ្នាំនេះ។

ជនសង្ស័យខាងលើឈ្មោះ លឹម សុងឆ័យ អាយុ ៣៣ ឆ្នាំ មុខរបរអាជីវករ ស្នាក់នៅសង្កាត់ទួលទំពូង ១ ខណ្ឌចំការមន រាជធានីភ្នំពេញ។ ជនទំនើងនេះ បានជិះរថយន្តមួយគ្រឿង ម៉ាក Lexus 570 ពណ៌ស ពាក់ស្លាកលេខភ្នំពេញ 2AG-2222។ ក្នុងនោះ សមត្ថកិច្ចដកហូតបានអាវុធខ្លីមួយដើម ម៉ាក Glock19 ពណ៌ខ្មៅ (ប្រើហ្គាស) និងគ្រាប់កាំភ្លើងមួយចំនួន។

របាយការណ៍របស់សមត្ថកិច្ចខណ្ឌចំការមនដែលសារព័ត៌មានទទួលបាននៅថ្ងៃទី ០៣ ខែឧសភា ឆ្នាំ ២០២៣ នេះ បានបញ្ជាក់ថា ហេតុការណ៍នេះបានបង្កឲ្យមានការភ្ញាក់ផ្អើលនៅថ្ងៃទី ០២ ខែឧសភា ឆ្នាំ ២០២៣ ប៉ុន្តែក្រោយកើតហេតុភ្លាមៗ កម្លាំងសមត្ថកិច្ចបានចុះទៅអន្តរាគមន៍ និងឃាត់ខ្លួនជនសង្ស័យតែម្ដង។

ដោយឡែក សម្រាប់ដើមចមដែលនាំឲ្យបុរសខាងលើខឹងស្រែកឡូឡា និងគំរាមប្រើប្រាស់អាវុធនេះ ដោយសារតែបុគ្គលិកនៅក្នុងហាងកាត់សក់ ហាមឃាត់កុំឲ្យសើចឮពេក ព្រោះរំខានភ្ញៀវដទៃដែលនៅក្បែរនោះ។

តាមរយៈវីដេអូដែលត្រូវបានចែកចាយលើបណ្ដាញសង្គម នៅថ្ងៃទី ០៣ ខែឧសភា ឆ្នាំ ២០២៣ នេះ បានបង្ហាញថា បុរសម្នាក់ស្លៀកខោខោវប៊យ ពាក់អាវយឺតពណ៌លឿង បានស្រែកជេរឡូឡាទៅកាន់ជាងកាត់សក់ម្នាក់។ លុះមួយសន្ទុះក្រោយមក បុរសខាងលើបានដើរចេញទៅក្រៅ ទំនងចូលទៅក្នុងរថយន្ត ហើយយកគ្រាប់កាំភ្លើងមកបាច់នៅក្នុងហាង បង្កឲ្យមានការភ័យខ្លាចដល់ជាងកាត់សក់ និងភ្ញៀវដទៃទៀត កំពុងអង្គុយលើកៅអីកាត់សក់។ ក្រោយមកទៀត បុរសដដែលនោះបានដើរចេញទៅក្រៅ យកកាំភ្លើងសៀតចង្កេះខាងស្ដាំ រួចសោយអាវឡើងលើដើម្បីគំរាមទៅកាន់ជាងកាត់សក់ ទំនងចង់បញ្ជាក់ថា ខ្លួនមានកាំភ្លើង។

តាមរយៈសកម្មភាពក្នុងវីដេអូនេះ បានបញ្ជាក់ថា ទាំងជាងកាត់សក់ និងភ្ញៀវ មានការភ័យខ្លាចយ៉ាងខ្លាំង។ រហូតជាងកាត់សក់នោះលើកម្រាមដៃ ១០ សំពះសុំទោសម្ដងហើយម្ដងទៀត ខណៈភ្ញៀវដទៃ បានរត់ចេញក្រៅទាំងជាប់កន្សែងកាត់សក់គ្របលើខ្លួនថែមទៀតផង។

ករណីនេះ សូមសមត្ថកិច្ចចាត់វិធានការ បន្តនីតិវិធីដើម្បីធ្វើការសាកសួរ កសាងសំណុំរឿងបញ្ជូនទៅតុលាការ៕

អត្ថបទ ៖ សុខា

The post ឃាត់ខ្លួនបុរសម្នាក់ ករណីបាចគ្រាប់កាំភ្លើងចូលក្នុងហាងកាត់សក់ និងគំរាមបាញ់ នៅបឹងត្របែក appeared first on Kampuchea Thmey Daily.

អ្នកនាំពាក្យអគ្គស្នងការនគរបាលជាតិ ៖ ករណីបាញ់សម្លាប់មនុស្ស៣នាក់ នៅពោធិ៍សែនជ័យ កំពុងស្ថិតក្នុងការស្រាវជ្រាវ និងស៊ើបអង្កេត

Kang Tola — Fri, 12 Feb 2021 10:59:28 +0000

លោកឧត្តមសេនីយ៍ ឆាយ គឹមឃឿន អ្នកនាំពាក្យអគ្គស្នងការនគរបាលជាតិបានប្រាប់កម្ពុជាថ្មី ឲ្យដឹងនារសៀលថ្ងៃទី១២ ខែកុម្ភៈ នេះថា ករណីឃាតកម្ម បាញ់សម្លាប់គ្នា ដែលបង្កឡើងដោយជនមិនស្គាល់អត្តសញ្ញាណមួយក្រុម នៅពោធិ៍សែនជ័យ កំពុងស្ថិតនៅក្នុងនីតិវិធីស្រាវជ្រាវ និងស៊ើបអង្កេត ដូច្នេះមិនទាន់អាចសន្និដ្ឋានអ្វីទាំងអស់។

នៅវេលាម៉ោង៧និង៤០នាទីយប់ ថ្ងៃទី១១ ខែកុម្ភៈ ឆ្នាំ២០២១នេះ នៅចំណុចមុខហាងលក់ទូរសព្ទ័ពន្លកថ្មី ក្នុងបុរីប៊ុនហួរ ភូមិព្រៃព្រីងខាងត្បូង១ សង្កាត់ចោមចៅ២ ខណ្ឌពោធិ៍សែនជ័យ មានករណីឃាតកម្ម បាញ់សម្លាប់គ្នាមួយ បង្កឡើងដោយជនសង្ស័យមួយក្រុម មិនស្គាល់អត្តសញ្ញាណ។ ដែលករណីនេះ បណ្តាលឲ្យជនរងគ្រោះ៣នាក់បានស្លាប់ ។

ជនរងគ្រោះដែលស្លាប់មានឈ្មោះ សៀក លីម ភេទប្រុស អាយុ២៥ឆ្នាំ និងឈ្មោះ សុខ ស៊ីដេត ភេទប្រុស អាយុ៤០ឆ្នាំ ទាំងពីរនាក់ស្លាប់នៅពេទ្យលោកសង្ឃ និងស្លាប់ម្នាក់ទៀតឈ្មោះ បូ រ៉ាភី ភេទប្រុស អាយុ៤៦ឆ្នាំ។

តាមការបំភ្លឺរបស់ឈ្មោះ ឈីវ ហៃ ភេទស្រីអាយុ៣២ឆ្នាំ មុខរបរលក់ផ្លែឈើបានឲ្យដឹងថា នៅមុនពេលកើតហេតុ ប្តីរបស់គាត់ឈ្មោះ អាត់ ផា អាយុ៣៣ឆ្នាំ បានបើករថយន្តមកឈប់មុខផ្ទះបំណងយកកូនទៅពេទ្យ លុះឈប់បានបន្តិចក៏មានម៉ូតូកង់បីមួយគ្រឿង ពណ៌ស បើកមកទល់មុខឡាន ហើយស៊ីផ្លេ២ទៅ៣ដង ដើម្បីឲ្យប្តីគាត់ បើកឡានចេញ ហើយប្តីគាត់បាននិយាយថា គាត់អែបខាងហើយ បងឯងបើកគេចទៅខាងណោះទៅ បន្ទាប់មកក៏មានទំនាស់គ្នា រួចក៏បែកគ្នាទៅ។ អ្នកស្រីបន្តថា មួយសន្ទុះក្រោយមក ជនបង្កបានបើកកង់បីត្រឡប់មកវិញ ដោយមានបក្ខពួកមកជាមួយផង រួមនឹងម៉ូតូ២គ្រឿង បានបង្កទំនាស់ម្តងទៀតរហូតដល់មានការប្រតាយប្រតប់គ្នា ឈានដល់ការបាញ់ប្រហារគ្នាតែម្តង ដោយឡែកប្តីរបស់គាត់បានគេចចេញពីកន្លែងកើតហេតុ។

សូមបញ្ជាក់ថា ករណីខាងលើនេះ ម្ចាស់រថយន្តមានទំនាស់ដំបូងជាមួយក្រុមខ្មាន់កាំភ្លើង រងរបួសបន្ដិចបន្តួចប៉ុណ្ណោះ ព្រោះបានគេចចេញពេលកំពុងប្រតាយប្រតប់គ្នា ខណៈអ្នកជនរងគ្រោះដែលស្លាប់២នាក់ និងរបួសធ្ងន់ម្នាក់នោះ ជាមិត្តភ័ក្ររបស់ជនរងគ្រោះ ដែលនៅជួបជុំគ្នានៅកន្លែងកើតហេតុ។ ក្រោយកើតហេតុ បានបន្សល់ទុកសំបកគ្រាប់កាំភ្លើងប្រភេទ៩មីលីម៉ែត្រចំនួន២គ្រាប់ នៅកន្លែងកើតហេតុ ហើយនគរបាលបានយករក្សាទុក៕

ដោយ ៖ កោះកែវ

The post អ្នកនាំពាក្យអគ្គស្នងការនគរបាលជាតិ ៖ ករណីបាញ់សម្លាប់មនុស្ស៣នាក់ នៅពោធិ៍សែនជ័យ កំពុងស្ថិតក្នុងការស្រាវជ្រាវ និងស៊ើបអង្កេត appeared first on Kampuchea Thmey Daily.