ក្នុងឱកាសនេះ លោក ញ៉ែម សំអឿន បានវាយតម្លៃខ្ពស់ចំពោះចំពោះលទ្ធផលនៃការខិតខំប្រឹងប្រែងរបស់មន្ត្រីអប់រំគ្រប់ឋានានុក្រមដែលខិតខំប្រឹងប្រែងប្រកបដោយមនសិការវិជ្ជាជីវៈក្នុងការពង្រីកនិងផ្តល់សេវាអប់រំឱ្យបានខិតដល់មូលដ្ឋានថែមទាំងទទួលបាននូវគុណភាពថែមទៀត។ តួយ៉ាង ឆ្នាំមុនខេត្តរតនគិរីទទួលបានសិស្សពូកែនិទ្ទេសAចំនួន ១៦ នាក់ ស្រី០៦នាក់ ហើយឆ្នាំនេះកើនឡើង០៦នាក់បន្ថែមទៀត។

លោកក៏បានវាយតម្លៃខ្ពស់ចំពោះថ្នាក់ដឹកនាំ និងបុគ្គលិកអប់រំ គ្រប់ឋានានុក្រមនៃមន្ទីរអប់រំ យុវជននិងកីឡា អាជ្ញាធរដែនដីនៃរដ្ឋបាលក្រុង/ស្រុក គណៈកម្មការគ្រប់គ្រងសាលារៀន អង្គការដៃគូអភិវឌ្ឍនានា ដែលខិតខំប្រឹងប្រែងសហការសម្របសម្រួលអភិវឌ្ឍវិស័យអប់រំ។ លោកបញ្ជាក់ថា៖«ទង្វើនិងសកម្មភាពសហប្រតិបត្តិការរបស់អ្នកទាំងអស់គ្នាពិតបានចូលរួមយ៉ាងសកម្មក្នុងការផ្តល់ការគាំទ្រដល់កិច្ចខិតខំប្រឹងប្រែងយ៉ាងប្តូរផ្តាច់របស់រាជរដ្ឋាភិបាល លើការកែទម្រង់ជាតិ ពិសេសកំណែទម្រង់ស៊ីជម្រៅលើវិស័យអប់រំ»។

លោកមានប្រសាសន៍ថា ទោះបីខេត្តរតនគិរី មានភូមិសាស្ត្រនៅឆ្ងាយពីរាជធានីភ្នំពេញ ហើយក៏ជាខេត្តមួយដែលពោពេញទៅដោយពហុវប្បធម៌ ប្រពៃណី ភាសា ពហុជនជាតិដើមភាគតិច មានស្ថានភាព និងលក្ខណៈស្មុគស្មាញយ៉ាងណាក៏ដោយ តែរាជរដ្ឋាភិបាលកម្ពុជាមិនដែលបោះបង់ចោលខេត្តនេះឡើយ។

ផ្ទុយទៅវិញ រាជរដ្ឋាភិបាលបានខិតខំច្នៃប្រឌិតគ្រប់មធ្យោបាយ យុទ្ធសាស្ត្រ ដើម្បីនាំមកនូវសន្តិភាព សុខសុវត្ថិភាព ការអភិវឌ្ឍដែលជាវត្ថុមិនអាចខ្វះបានសម្រាប់ប្រទេសកម្ពុជានិយាយជារួម និង ខេត្តរតនគិរី និយាយដោយឡែក បានបង្កឱកាសលើការផ្តល់សេវាអប់រំប្រកបដោយសមធម៌ គុណភាព និងបរិយាប័ន្នដល់ប្អូនៗក្មួយៗគ្រប់ក្រុមជនជាតិទាំងអស់ ដោយគ្មានការរើសអើងជាតិសាសន៍ និងប្រកាន់និន្នាការនយោបាយឡើយ។ ជាពិសេសការបន្តបង្កើតឱ្យមានសាលារៀនគ្រប់ភូមិសិក្សាឱ្យកាន់តែស្ថិតនៅក្បែរសហគមន៍ដែលក្មួយៗ រស់នៅជិតផ្ទះបំផុតតាមលទ្ធភាពដែលអាចធ្វើទៅបាន៕

ដោយ៖ ខៀវ ចាប

The post ថ្ងៃបើកបវេសនកាល អភិបាលខេត្តរតនគិរី លើកទឹកចិត្តសិស្សកាន់ប៊ិក សៀវភៅ ខំរៀនសូត្រ appeared first on Kampuchea Thmey Daily.

បើតាម​ក្រសួង​អប់រំ​ បាន​បញ្ជាក់ថា​ ក្រោយ​កិច្ចព្រមព្រៀង​សន្តិភាព សាលារៀន​ទាំងអស់​នៅ​ទូទាំង​ប្រទេស រួមទាំង​សាលារៀន​នៅតាម​បណ្តោយ​ព្រំដែន បាន​ត្រៀមខ្លួន​រួចជាស្រេច​ក្នុង​ការ​បើក​បវេសនកាល​ឆ្នាំ​សិក្សា​ ២០២៥-២០២៦។

ជាក់ស្តែង នា​ថ្ងៃទី ០១ ខែ​វិច្ឆិកា ឆ្នាំ​ ២០២៥ លោក​បណ្ឌិត​សភា​ចា​រ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រី​ក្រសួង​អប់រំ យុវជន និង​កីឡា នឹង​អញ្ជើញ​ជា​អធិបតី​ដ៏​ខ្ពង់ខ្ពស់ ក្នុង​ពិធី​បើក​បវេសនកាល​ជា​និមិត្តរូប នៅ​វិទ្យាល័យ ហ៊ុន សែន ចុងកាល់ ស្រុក​ចុងកាល់ ខេត្ត​ឧ​ត្ត​រ​មានជ័យ ដែល​មាន​សមាសភាព​ចូលរួម​ប្រមាណ ១ ៣០០ នាក់។

នៅក្នុង​ឱកាស​នោះ លោក​បណ្ឌិតសភា​ចា​រ្យ​ឧបនាយករដ្ឋមន្ត្រី នឹង​នាំ​យក​នូវ​អំណោយ​ជា​សម្ភារៈ​សិក្សា សៀវភៅ​សិក្សា​គោល​ និង​សៀវភៅ​អំណាន​ផ្សេងៗ ជូន​ដល់​លោកគ្រូ អ្នកគ្រូ និង​សិស្សានុសិស្ស នៃ​សាលារៀន​នៅ​តាម​បណ្តោយ​ព្រំដែន ជាពិសេស​សាលារៀន​ដែល​រងគ្រោះ​ដោយសារ​សង្គ្រាម​ឈ្លានពាន ពី​ប្រទេសជិតខាង រួម​ទាំង​ការ​ប្រគល់​ជូន​បន្ទប់​សិក្សា​ឌីជីថល ជូន​ដល់​វិទ្យាល័យ ហ៊ុន សែន ចុងកាល់ ផង​ដែរ។

ពាក់ព័ន្ធ​នឹង​ការ​បើក​បវេសនកាល​ឆ្នាំ​សិក្សា​ថ្មី​នេះ​ដែរ លោក​បណ្ឌិត​សភាចា​រ្យ ហង់​ជួន ​ណា​រ៉ុ​ន ​ធ្លាប់​បាន​មាន​ប្រសាសន៍​ថា សាលារៀន​ជាប់​ព្រំដែន​ដែល​រង​ការ​ខូចខាត​ដោយសារ​សង្គ្រាម​ឈ្លានពាន​ពី​សំណាក់​ភាគី​ថៃ​ប្រហែលជា​មិន​អាច​បើក​ដំណើរការ​បានទេ​ ដោយសារ​ទីតាំង​សាលា​ទាំងនោះ​មាន​គ្រាប់​មិន​ទាន់​ផ្ទុះ​ និង​អំបែង​គ្រាប់​ដែល​ថៃ​បាន​បាញ់​ ទាមទារ​ឱ្យ​មន្ត្រី​ជំនាញ​ស៊ីម៉ាក់​មក​បោសសំអាត​ជា​មុន​សិន។

ជាមួយ​គ្នា​នេះ​ដែរ ក្រសួង នឹង​រៀបចំ​សាងសង់​អគារ​សិក្សា​បណ្ដោះអាសន្ន​នៅ​ទីតាំង​ផ្សេង​ដែល​មាន​តម្លៃ​ថោក ​ដើម្បី​ជួយ​សម្រួល​ដល់​សិស្ស​ដែល​មិនទាន់មាន​សាលារៀន​ដែល​ខូចខាត​ដោយសារ​សង្គ្រាម​ឈ្លានពាន​ពី​ភាគី​ថៃ​ ខណៈ​ក្រសួង​ត្រៀម​ថវិកា​ ៥០ ​ម៉ឺន​ដុល្លារ ​សម្រាប់​ជួសជុល​សាលារៀន​ខូចខាត​ដោយសារ​សង្គ្រាម​ឈ្លានពាន​ថៃ។

បើតាម​លោក​បណ្ឌិត​សភាចា​រ្យ ហង់​ជួន​ ណា​រ៉ុ​ន មាន​សាលា​ចំនួន​ ៧​ បាន​រង​ការ​ខូចខាត​ទាំងស្រុង និង​ខូចខាត​បន្ទាប់បន្សំ​ ដោយសារ​ការ​ឈ្លានពាន​ពី​សំណាក់​ភាគី​ថៃ៕

អត្ថបទ ៖ សំអឿន

The post ក្រសួងអប់រំ នឹងបើកបវេសនកាលឆ្នាំសិក្សា ២០២៥-២០២៦ នៅវិទ្យាល័យ ហ៊ុន សែន ចុងកាល់ ខេត្តឧត្តរមានជ័យ appeared first on Kampuchea Thmey Daily.

លោកស្រី ឃួន វិច្ឆិកា បានមានប្រសាសន៍នៅរសៀលថ្ងៃទី១១ តុលា នេះថា «ដើម្បីលើកកម្ពស់គុណភាពការអប់រំ ក៏ដូចជាជំរុញឱ្យប្អូនៗ សិស្សានុសិស្សបានចូលរៀន ក្នុងនាមក្រសួងអប់រំ សូមអំពាវនាវដល់មាតាបិតាទាំងអស់នាំប្អូនៗ មកចុះឈ្មោះចូលរៀនឱ្យបានគ្រប់ៗគ្នា និងឱ្យបានទាន់ពេលវេលា ក៏ដូចជាគាំទ្រជំរុញដល់ប្អូនៗក្នុងការចូលរៀនឱ្យទទួលបានលទ្ធផលល្អ និងជោគជ័យនៅក្នុងដំណើរការសិក្សា»។

ជាមួយគ្នានេះដែរ លោកស្រីបានបន្តថា សម្រាប់សិស្សានុសិស្សដែលឆ្លងភូមិសិក្សាកម្រិតបឋមសិក្សាចូលទៅអនុវិទ្យាល័យ ក៏ដូចជាឆ្លងពីកម្រិតថ្នាក់ទី ៩ ទៅថ្នាក់ទី ១០ ក៏សូមចុះឈ្មោះចូលរៀនឱ្យបានទាន់ពេលវេលាផងដែរ។

សម្រាប់ឆ្នាំសិក្សា ២០២៥-២០២៦ ត្រូវចាប់ផ្ដើមដំណើរការនៅថ្ងៃទី ១ ខែវិច្ឆិកា ឆ្នាំ ២០២៥ និងបញ្ចប់ទៅវិញនៅថ្ងៃទី ៣១ ខែសីហា ឆ្នាំ ២០២៦។ ទន្ទឹមនឹងនេះ ក្រសួងក៏បានណែនាំឱ្យសាលារៀនរៀបចំជួសជុលអគារសិក្សា បន្ទប់រៀន តុកៅអី លើកកម្ពស់អនាម័យ និងបរិស្ថានសាលារៀន រៀបចំក្រុមបណ្ដាញសាលារៀន ដើម្បីកសាងឬធ្វើបច្ចុប្បន្នកម្មផែនទីខ្នងផ្ទះ ផែនទីសិក្សា ប្រព័ន្ធ គ្រប់គ្រងរំហូរទិន្នន័យ និងព័ត៌មានកុមារចូលរៀន។

ពាក់ព័ន្ធនឹងការបើកបវេសនកាលឆ្នាំសិក្សាថ្មី លោកបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ធ្លាប់បានមានប្រសាសន៍ថា ក្រសួងគ្រោងបើកបវេសនកាលឆ្នាំថ្មីនៅស្រុកចុងកាល ខេត្តឧត្តរមានជ័យដើម្បីបង្ហាញពីស្មារតីសាមគ្គីភាព និងគាំទ្ររបស់បងប្រជាពលរដ្ឋក៏ដូចជាសិស្សានុសិស្សដល់វីរកងទ័ពជួរមុខ។

លោកឧបនាយករដ្ឋមន្ត្រី ប៉ាន់ស្មានថាសាលារៀនជាប់ព្រំដែនដែលរងការខូចខាតដោយសារសង្គ្រាមឈ្លានពានពី​សំណាក់ភាគីថៃប្រហែលជាមិនអាចបើកដំណើរការបានទេដោយសារទីតាំងសាលាទាំងនោះមានគ្រាប់មិនទាន់ផ្ទុះ និងអំបែងគ្រាប់ដែលថៃបានបាញ់ទាមទារឱ្យមន្ត្រីជំនាញស៊ីម៉ាក់មកបោសសម្អាតជាមុនសិន។

ជាមួយគ្នានេះដែរ ក្រសួងនឹងរៀបចំសាងសង់អគារសិក្សាបណ្តោះអាសន្ននៅទីតាំងផ្សេងដែលមានតម្លៃថោកដើម្បីជួយសម្រួលដល់សិស្សដែលមិនទាន់មានសាលារៀនដែលខូចខាតដោយសារសង្គ្រាមឈ្លានពានពីភាគីថៃ ខណៈក្រសួងត្រៀមថវិកា៥០ម៉ឺនដុល្លារសម្រាប់ជួសជុលសាលារៀនខូចខាតដោយសារសង្គ្រាមឈ្លានពានថៃ។ សាលាចំនួន ៧ បានរងការខូចខាតទាំងស្រុង និងខូចខាតបន្ទាប់បន្សំដោយសារការឈ្លានពានពីសំណាក់ភាគីថៃ៕

អត្ថបទ៖ សំអឿន

The post អ្នកនាំពាក្យអប់រំ អំពាវនាវមាតាបិតានាំកូនទៅចុះឈ្មោះចូលរៀនឱ្យទាន់ពេលវេលាថ្ងៃទី ១៥ តុលា appeared first on Kampuchea Thmey Daily.

របាយ​ការណ៍​បាន​បន្ត​ថា រដ្ឋាភិបាល​ផ្តល់​សៀវភៅ​សិក្សា សៀវភៅ​កត់ត្រា និង​សម្ភារៈ​ការិយាល័យ​ដល់​សិស្ស​ទាំង​អស់​ចាប់​ពី​ថ្នាក់​បឋម​សិក្សា​ដល់​វិទ្យាល័យ រួម​ទាំង​ឯកសណ្ឋាន​​ដោយ​ឥត​គិត​ថ្លៃ​សម្រាប់​សិស្ស​ថ្នាក់​មត្តេយ្យ និង​បឋមសិក្សា។ លើសពីនេះការចុះឈ្មោះយឺតនៅតែបើកសម្រាប់សិស្សដែលមិនអាចចុះឈ្មោះទាន់ពេល ដោយសារកាលៈទេសៈផ្សេងៗ។

ទោះយ៉ាង​ណា បើយោងតាមការចេញផ្សាយរបស់ Mizzima News នៅក្នុងតំបន់មួយចំនួនដូចជានៅទីក្រុង Kyondoe រដ្ឋ Kayin មិនមានសិស្សណាម្នាក់ត្រឡប់មកចូលរៀនវិញនោះទេ ខណៈដែលការប្រយុទ្ធគ្នាយ៉ាងខ្លាំងក្លានៅតែបន្តរវាងកងកម្លាំងយោធា និងក្រុមតស៊ូប្រដាប់អាវុធ។

នៅក្នុងទីក្រុង Kyondoe សាលារៀនចំនួនបីបានបើកដំណើរការឡើងវិញកាលថ្ងៃទី២ ខែមិថុនា ប៉ុន្តែថ្នាក់រៀននៅតែទទេ ខណៈដែលក្រុមគ្រួសារបានភៀសខ្លួនចេញពីតំបន់នោះ។ គ្រូ​បង្រៀន​និយាយ​ថា យោធា​បាន​គំរាម​ចាប់​ខ្លួន​ពី​បទ​មិន​គោរព​តាម សូម្បី​តែ​មន្ត្រី​មូលដ្ឋាន និង​បុគ្គលិក​សាលា​ក៏​ចូល​ទៅ​លាក់​ខ្លួន​ដែរ។

ការបាញ់ផ្លោងរបស់កងកម្លាំងរដ្ឋាភិបាលបានបំផ្លាញផ្ទះ និងសាលារៀន សម្លាប់ជនស៊ីវិលជាង ២០ នាក់ និងជាច្រើនបានផ្លាស់ទីលំនៅ ដែលធ្វើឱ្យការចូលរៀននៅសាលាមិនអាចទៅរួចសម្រាប់អ្នកស្រុកភាគច្រើននៅក្នុងរដ្ឋKayin៕

អត្ថបទ៖ ប៊ុន​ សុភាព

The post សិស្សជាង ៥.៨ លាននាក់ត្រឡប់ចូលរៀនវិញ ខណៈដែលមីយ៉ាន់ម៉ាបើកបវេសនកាលថ្មី appeared first on Kampuchea Thmey Daily.

លោក ម៉ី ភារិទ្ធ នាយកសាខារៀមច្បង សាសារៀនអារីហ្សូន មានប្រសាសន៍ដោយមានការដឹកនាំល្អ ទើបបានធ្វើអោយមានការគាំទ្រ និងចូលរួមសហការដ៏ស្មោះស្ម័គ្រពីសាស្ត្រាចារ្យ លោកគ្រូ-អ្នកគ្រូ បុគ្គលិកជាពិសេសពីសំណាក់មាតាបិតា សហគមជាតិ អន្តរជាតិ និងអាជ្ញាធរដែនដីគ្រប់លំដាប់ថ្នាក់នាឆ្នាំសិក្សា។ កន្លងមកសាលារៀន អារីហ្សូន សាខាខេត្តសៀមរាប បានការយកចិត្តទុកដាក់ ពង្រឹង និងជំរុញលើវិន័យ សណ្តាប់ ធ្នាប់ ក្រមសីលធម៌រស់នៅបានល្អយ៉ាងគួរឲ្យកត់សម្គាល់ ជាពិសេសកម្មវិធីសិក្សាប្រចាំឆ្នាំបានចប់សព្វគ្រប់ត្រឹមត្រូវតាមគោលការណ៍ និងការណែនាំរបស់មន្ទីរអប់រំ យុវជន និងកីឡាផងដែរ។

លោកបន្ថែមថា ពង្រឹង និងជំរុញឲ្យសិស្សកាន់តែយល់បន្ថែមពីកម្មវិធីសិក្សា STEM តាមចក្ខុវិស័យរបស់ក្រសួងអប់រំ យុវជន និងកីឡានាអណត្តិទី៧។ បន្តការទប់ស្កាត់គ្រឿងញៀន E Cigarette អបាយមុខផ្សេងៗ ក្នុងបវេណសាលាឲ្យបានជាដាច់ខាត។

ឆ្លៀតឱកាសនោះដែរលោកបានសំណូមពរដល់សិស្សានុសិស្សទាំងអស់ត្រូវខិតខំយកចិត្តទុកដាក់ត្រង់ត្រាប់ ស្តាប់គ្រូពន្យល់ក្នុងការរៀនសូត្រ ដោយស្មារតីភ្ញាក់រលឹក ត្រូវបង្កើនការស្វ័យសិក្សាដោយខ្លួនឯង ដើម្បីក្រេបយកចំណេះ ដឹងអោយបានល្អប្រសើរ។ សិស្សានុសិស្សត្រូវចេះរក្សាទំនាក់ទំនងល្អក្នុងចំណោមសិស្សានុសិស្សត្រូវគោរពអនុវត្តទៅតាម បទបញ្ជាផ្ទៃក្នុងសាលា គោរពតាមឱវាទរបស់គណៈគ្រប់គ្រងសាលា លោកគ្រូ-អ្នកគ្រូ ចាស់ព្រឹទ្ធាចារ្យ ព្រះសង្ឃ និងឪពុក ម្តាយ ដើម្បីកសាងខ្លួនអោយក្លាយជា កុមារ និងយុវជនសុភាពរាបសារ មានសុជីវធម៌ល្អ ក្នុងការរស់នៅមានចំណេះដឹងខ្ពង់ខ្ពស់ល្អទៅថ្ងៃអនាគត និងក្លាយជាមនុស្ស ឬពលរដ្ឋល្អដែលប្រទេសជាតិកំពុងត្រូវការជាទីបំផុត ដើម្បីអភិវឌ្ឍ ប្រទេសអោយមានការរីកចម្រើនឡើងក្លាយទៅជាប្រទេសដ៏រុងរឿងមួយនាពេលខាងមុខនេះ។

លោកស្រី ម៉ននី រង្សី អភិបាលរងខេត្តសៀមរាប បានមានប្រសាសន៍ថា វិស័យអប់រំ មានតួនាទីយ៉ាងសំខាន់ក្នុងការរួមចំណែកដល់ការអភិវឌ្ឍជាតិ ដោយកុមារ យុវជន និងមនុស្សពេញវ័យត្រូវទទួលបានការសិក្សា និងការអប់រំពេញមួយជីវិត ដើម្បីឆ្លើយតបទៅនឹងតម្រូវការទីផ្សារការងារប្រកបដោយគុណភាពខ្ពស់។ ជាមួយគ្នានោះ ការអប់រំត្រូវផ្តោតលើការ កសាងជំនាញ និងការផ្តល់ឱកាសដល់សិស្សគ្រប់រូប ក្នុងការទទួលបាននូវចំណេះដឹងមូលដ្ឋាន ដើម្បីឈានទៅសិក្សា​លើចំណេះជំនាញបច្ចេកទេស និងជំនាញឯកទេសផ្សេងៗទៀត ដើម្បីសម្រេចបានការអភិវឌ្ឍ ដែលផ្តល់អត្ថប្រយោជន៍ពេញលេញដល់គ្រប់ស្រទាប់យុវជន ក្នុងការកសាងអនាគតរបស់ខ្លួនប្រកបដោយគុណភាព។

លោកស្រីអភិបាលរងបន្ដថា ការរីកចម្រើនលើវិស័យអប់រំ និងវិស័យផ្សេងៗទៀត ក្នុងខេត្តសៀមរាប ក៏ដូចជានៅទូទាំងប្រទេស គឺផ្តើមចេញពីឆន្ទៈដ៏មោះមុតរបស់រាជរដ្ឋាភិបាល ទើបប្រទេសជាតិយើងបន្តរីកចម្រើន ជឿនលឿន មានស្ថេរភាព សន្តិភាព និងមានកិត្តិនាមលើឆាកអន្តរជាតិ។ លោកស្រី ក៏បានកោតសរសើរដល់សាលារៀនអារីហ្សូន ដែលបានបញ្ចប់ការសិក្សាទទួលបានលទ្ធផលល្អប្រសើរនាពេលនេះ ប៉ុន្តែទោះបីជាបានវាយតម្លៃថា លទ្ធផលគួរជាទីគាប់ចិត្តសម្រាប់មាតាបិតា អាណាព្យាបាល យ៉ាងណាក៏ដោយ ក៏ភាពជោគជ័យពិតប្រាកដមិនមែនត្រឹមតែមានចំណេះដឹងសម្រាប់ខ្លួនប៉ុណ្ណោះទេ ថែមទាំងមានលទ្ធផលការងារសីលធម៌ល្អ សុជីវធម៌ល្អ គុណធម៌ គឺជាលក្ខណៈសម្បត្តិ និងជាលក្ខ ខណ្ឌចាំបាច់មិនអាចខ្វះបាន ដែលជាពិន្ទុសម្រាប់វាស់ស្ទង់ នូវភាពជោគជ័យពិតប្រាកដ។

លោកស្រីបានស្នើរឱ្យយុវជន ត្រូវខិតខំហ្វឹកហ្វឺនរៀនសូត្របន្តថែមទៀត លើមុខវិជ្ជាផ្សេងៗ ដើម្បីបង្កើន សមត្ថភាព ចំណេះដឹង ចំណេះធ្វើ ឈានឱ្យទាន់សភាពការណ៍វិវត្តន៍រីកចម្រើនរបស់សង្គមជាតិ ហើយស្របពេលគ្នានេះដែរ ក៏ត្រូវប្រកាន់ខ្ជាប់នូវវិន័យ សេចក្តីថ្លៃថ្នូរ និងរក្សាសាមគ្គីភាពនៅក្នុងគ្រប់មជ្ឈដ្ឋានជីវភាពរស់នៅ ដើម្បីក្លាយខ្លួនជាពលរដ្ឋល្អមានប្រយោជន៍សម្រាប់សង្គជាតិយើង៕

អត្ថបទ៖ ជុន កុសល

The post សាលាអារីហ្សូន សាខាខេត្តសៀមរាប ប្រារព្ធពិធីបើកបវេសនកាលឆ្នាំសិក្សាថ្មី និងប្រគល់វិញ្ញាបន​បត្រ​បញ្ចប់ការសិក្សាដល់សិស្សពូកែប្រចាំឆ្នាំ appeared first on Kampuchea Thmey Daily.

លោក យិន សុភាព ជានាយក និងជាស្ថាបនិកសាលារៀនគ្រូយើង បានឱ្យដឹងថា ក្នុងឆ្នាំសិក្សាថ្មី ២០២៤-២០២៥នេះ សាលាបានបញ្ចូលកម្មវិធីសិក្សាថ្មីមួយចំនួនដល់សិស្សានុសិស្សដូចជា ការពិភាក្សាគ្នា ផ្លាស់ប្តូរ និងចែករំលែកបទពិសោធគ្នាទៅវិញទៅមករបស់សិស្សដែលរស់នៅតំបន់ផ្សេងៗគ្នា។ ក្រៅពីចែករំលែកបទពិសោធរបស់សិស្សនៅក្នុងស្រុក សាលាក៏គ្រោងនឹងដាក់កម្មវិធីសិក្សាចែករំលែកបទពិសោធជាមួយសិស្សនៅប្រទេសអូស្ត្រាលី ដែលជាដៃគូរបស់សាលារៀនគ្រូយើង តាមរយៈអនឡាញ ដើម្បីឱ្យសិស្សមានឱកាសរៀនជាមួយគ្រូនៅបរទេសតាមរយៈការបណ្តុះបណ្តាលពីចម្ងាយនេះ។ បន្ថែមពីនេះ ក៏មានកម្មវិធីប្រកួតប្រជែងជជែកដេញដោលលក្ខណៈទន់ភ្លន់ ដែលខុសប្លែកពីការជជែកដេញដោលទូទៅ ពោល គឺជាការជជែករកហេតុផល រកពីចំណុចល្អ ដែលសិស្សអាចរៀនសូត្របានដោយប្រើកាយវិការ និងភាសាប្រកបដោយក្រមសីលធម៌។ មិនតែប៉ុណ្ណោះ សាលាក៏មានបង្កើនកម្មវិធីសិក្សាក្រៅថ្នាក់ឱ្យបានច្រើនថែមទៀត ដើម្បីឱ្យសិស្សមានឱកាសសិក្សានៅខាងក្រៅ និងទទួលបានបទពិសោធថ្មីៗ។

ក្រៅពីពង្រឹងការសិក្សា លោក យិន សុភាព បានបញ្ជាក់ថា សាលារៀនគ្រូយើង មានចក្ខុវិស័យធំមួយជាមូលដ្ឋានគ្រឹះ គឺការកសាងទម្លាប់ និងអត្តចរិតល្អ ព្រោះសាលាមើលឃើញថា ដើម្បីឱ្យមានធនធានមនុស្សល្អ ជាប្រយោជន៍ដល់សង្គម និងមានលក្ខណៈគ្រប់គ្រាន់ លុះត្រាពួកគេមានទម្លាប់ល្អ និងអត្តចរិតល្អ មកជាមួយនឹងចំណេះដឹងដូចគ្នា។ លោកនាយកសាលារៀនគ្រូយើង បានផ្តាំផ្ញើដល់អាណាព្យាបាលគ្រប់រូបថា ប្រសិនមាតាបិតាកំពុងស្វែងរកសាលារៀនឱ្យកូន គួរជ្រើសរើសសាលាណាដែលព្យាយាមកសាងកូនពីទម្លាប់ អត្តចរិត និងមានគុណធម៌ ព្រោះនេះគឺជារឿងចម្បងដែលត្រូវពិចារណាទីមួយ ជាជាងការឱ្យតម្លៃលើចំណេះដឹងច្រើនជាងអត្តចរិត ព្រោះបច្ចុប្បន្ន ផ្នែកភាសាបរទេសងាយស្រួលរៀនណាស់ អ្វីដែលសំខាន់ តើនៅពេលដែលកូនមានចំណេះដឹងល្អហើយ អត្តចរិតរបស់ពួកគេល្អទន្ទឹមគ្នាដែរឬទេ?

ក្នុងឱកាសបើកបវេសនកាលនេះ លោក សំ សយ ជាមន្ត្រីបម្រើការងារនៅអង្គការមិនមែនរដ្ឋាភិបាល និងជាអាណាព្យាបាលដែលមានកូនសិក្សានៅសាលារៀនគ្រូយើង តាំងពីថ្នាក់មត្តេយ្យ ដល់ថ្នាក់ទី២ បានឱ្យដឹងថា មូលហេតុដែលលោកសម្រេចចិត្តបញ្ជូនកូនមករៀននៅសាលារៀននេះ គឺលោកមើលឃើញពីការរៀបចំ និងគុណតម្លៃរបស់សាលារៀន និងកម្មវិធីសិក្សាផ្សេងៗ រួមជាមួយនឹងគ្រូបង្រៀនផង ដែលធ្វើឱ្យលោកកក់ក្តៅ និងសម្រេចចិត្តឱ្យកូនរៀននៅទីនេះ។

រីឯអ្នកស្រី កុយ សុគន្ធា និយាយថា កូនរបស់អ្នកស្រីពីរនាក់បានរៀននៅទីនេះ២ឆ្នាំមកហើយ និងមូលហេតុដែលធ្វើឱ្យអ្នកស្រីបញ្ជូនកូនមកសិក្សានៅទីនេះ ព្រោះឃើញពីគុណភាពរបស់សាលានៅខេត្តស្ទឹងត្រែង និងរតនគិរីកន្លងមក។ រយៈពេល២ឆ្នាំដែលកូនអ្នកស្រីរៀននៅទីនេះ ឃើញថាកូនៗចេះនិយាយច្រើនជាងមុន ផ្តោតអារម្មណ៍សិក្សាបានច្រើន ហើយក៏ចេះសិក្សានៅផ្ទះដោយខ្លួនឯងដែរ។ ជាមួយគ្នានេះ អ្នកស្រីសង្កេតឃើញថា កូនអ្នកស្រីមានអត្តចរិតល្អជាងមុន និងដឹងខុសត្រូវជាងមុនដូចគ្នា។

ចំណែកអ្នកស្រី ឈឹម សាលី ជាអាណាព្យាបាលសិស្សម្នាក់ទៀត លើកឡើងថា កូនរបស់អ្នកស្រីបានសិក្សានៅទីនេះរយៈពេលជាង២ឆ្នាំមកហើយ បន្ទាប់ពីអ្នកស្រីបានផ្លាស់ប្តូរកូនមកពីសាលាផ្សេង។ ដោយមើលឃើញពីទីធ្លាធំទូលាយ ការអប់រំរបស់គ្រូបង្រៀនដល់សិស្សានុសិស្សប្រកបដោយក្តីស្រឡាញ់ និងកម្មវិធីសិក្សាផ្សេងៗ ធ្វើឱ្យកូនអ្នកស្រីផ្លាស់ប្តូរ និងអភិវឌ្ឍន៍ខ្លួនបានច្រើនជាងមុន ទាំងភាសាខ្មែរ និងបរទេស។ អ្នកស្រីសំណូមពរឱ្យអាណាព្យាបាលគ្រប់រូប គួរយកកូនមកសិក្សានៅសាលារៀនគ្រូយើងឱ្យបានច្រើន ព្រោះក្រៅពីការសិក្សា សាលាក៏បានអប់រំកូនៗឱ្យមានអត្តចរិតល្អនៅក្នុងគ្រួសារ និងសង្គមទៀតផង។

សាលារៀនគ្រូយើង បានបើកដំណើរការរយៈពេល២៤ឆ្នាំហើយ មានបីសាខា គឺនៅខេត្តរតនគិរី មានសិស្ស៣០០០នាក់ ខេត្តស្ទឹងត្រែង មានសិស្ស១២០០នាក់ និងនៅភ្នំពេញមានសិស្សប្រមាណ៤០០នាក់ ព្រមទាំងបង្រៀនបីភាសាគឺ ខ្មែរ អង់គ្លេស និងចិន។ ក្នុងបវេសនកាលថ្មីនេះ លោក យិន សុភាព នាយកសាលារៀនគ្រូយើង រំពឹងថា នៅភ្នំពេញនឹងមានសិស្សចុះឈ្មោះក្នុងសិក្សាឆ្នាំថ្មីនេះ កើនឡើងដល់ ៥០០នាក់៕

(អត្ថបទពាណិជ្ជកម្ម)

The post សាលារៀនគ្រូយើង បើកបវេសនកាល ២០២៤-២០២៥ ដោយនាំយកកម្មវិធីសិក្សាថ្មីៗជាច្រើន appeared first on Kampuchea Thmey Daily.

លោក ស្រី ឃួន វិច្ឆិកា អ្នកនាំពាក្យ​ក្រសួង​អប់រំ​យុវជន​និង​កីឡា​បាន​មានប្រសាសន៍​នៅ​រសៀល​ថ្ងៃទី​២០​តុលា​នេះ​ថា ​សម្រាប់​ការសិក្សា​ក្នុង​ឆ្នាំ​សិក្សា​នេះ នឹង​ត្រូវ​បញ្ចប់​នៅ​ថ្ងៃទី​២០ វិច្ឆិកា និង​បើក​បវេសនកាល​ថ្មី​ គឺ​នឹង​ចាប់ផ្តើម​នៅ​ថ្ងៃទី​១ ខែធ្នូ​ ឆ្នាំ២០២៣​។

លោកស្រី​បាន​បន្ថែម​ថា​ ឆ្នាំនេះ​សិស្ស​ឈប់​សម្រាក​បាន​ត្រឹម​១០​ថ្ងៃ​ ព្រោះ​ក្រសួង​ចង់​រំកិល​ពេល​ចូល​កង​ខិត​មក​មុខ​វិញ​។

លោកស្រី​បានបញ្ជាក់​ថា ​« យើង​នឹង​ពិនិត្យ​លទ្ធភាព​ជាក់ស្តែង ដើម្បីឱ្យ​អ្វីៗ​អាច​វិល​មក​ភាពប្រក្រតី​វិញ​បាន​ព្រោះ​ក្រសួង​មើលឃើញថា​ការចូល​រៀន​យឺត នាំឱ្យ​ចប់​យឺត សាលា​រង​ហានិភ័យ​នឹង​ទឹកជំនន់​ដែល​ក្រសួង​ធ្លាប់​លើក​ការ​ចូល​រៀន​ពី​ខែ​៩​មក​ខែ​១១ គឺ​ដើម្បី​ជៀសវាង​ហានិភ័យ តែ​បញ្ហា​កូ​វីដ​ធ្វើឱ្យ​យើង​ត្រូវអនុវត្ត​ការចូល​រៀន​ខុសពី​ពេលមុនៗ​។​ដូច្នេះ យើង​កំពុង​ព្យាយាម​ឱ្យ​អ្វីៗ​វិល​មកកាន់​ប្រក្រតីភាព​»​។

គួរ​បញ្ជាក់​ថា ​កន្លងមក​ក្រសួង​អប់រំ​យុវជន​និង​កីឡា​បាន​កំណត់​ការ​ឈប់​វិស្សមកាល​តូច​រយៈពេល​១៥​ថ្ងៃ​និង​វិស្សមកាល​ធំ​រយៈពេល​៣​ខែ​។ ​ប៉ុន្តែ​ដោយសារ​បញ្ហា​ផ្សេងៗ​ពិសេស​ការ​រាតត្បាត​ជំងឺ​កូ​វីដ​១៩​បានធ្វើឱ្យ​ដំណើរការ​សិក្សា​ត្រូវ​បាន​លើក​ពេល​ជា​បន្តបន្ទាប់​និង​ត្រូវអនុវត្ត​វ៉ា​កង​ធំ​និង​តូច​ខុសពី​ធម្មតា​ដូចជា​វ៉ា​កង​តូច​ឈប់​១​សប្តាហ៍​និង​វ៉ា​កង​ធំ​ជាង​១​ខែ​ជាដើម​៕

ដោយ ៖ សំអឿន

The post ក្រសួង​អប់រំ​នឹង​បញ្ចប់​ឆ្នាំ​សិក្សា​២០២៣​នៅ​ថ្ងៃ​ទី​២០​វិច្ឆិកា​ និង​បើក​បវេសនកាល​ឆ្នាំ​ថ្មី​នៅ​ថ្ងៃ​ទី​១​ធ្នូ​ appeared first on Kampuchea Thmey Daily.

ពិធី​ប្រគល់​សញ្ញាប័ត្រ​នេះ បានធ្វើ​ឡើង​ក្រោម​អធិបតីភាព ឧកញ៉ា​វេជ្ជបណ្ឌិត ជា សុខ​ឃាង ស្ថាបនិក និង​ប្រធាន​នាយក​ប្រតិបត្តិ នៃ​ស្ថាប័ន​អប់រំ​អេ​ជី និង​លោកជំទាវ ព្រមទាំង លោក ម៉ី ភា​រិ​ទ្ធ នាយក​សាខា​រៀមច្បង លោកគ្រូ អ្នកគ្រូ និង​សិស្សានុសិស្ស​ជាច្រើន​នាក់ នៃ​សាលារៀន អា​រី​ហ្សូ​ន​។

លោក​ម៉ី ភា​រិ​ទ្ធ នាយក​សាលារៀន​អា​រី​ហ្សូ​ន សាខា​ខេត្តសៀមរាប បាន​មានប្រសាសន៍ថា ដោយមាន​ការដឹកនាំ និង​ចាត់ចែង​ដ៏​ល្អ​របស់​ឧកញ៉ា​វេជ្ជបណ្ឌិត ជា សុខ​ឃាង ស្ថាបនិក និង​ជា​ប្រធាន​នាយក ប្រតិបត្តិ នៃ​ស្ថាប័ន​អប់រំ អេ​ជី បានធ្វើ​ឱ្យ​មានការ​គាំទ្រ និង​ចូលរួម​សហការ​ដ៏​ស្មោះស្ម័គ្រ​ពី សាស្ត្រាចារ្យ លោកគ្រូ​-​អ្នកគ្រូ បុគ្គលិក​ជាពិសេស​ពី​សំណាក់​មាតាបិតា សហគមន៍​ជាតិ អន្តរជាតិ និង​អាជ្ញាធរ​ដែនដី​គ្រប់​លំដាប់​ថ្នាក់​នា​ឆ្នាំ​សិក្សា កន្លងមក សាលារៀន អា​រី​ហ្សូ​ន សាខា​ខេត្តសៀមរាប បានការ​យកចិត្តទុកដាក់ ពង្រឹង និង​ជំរុញ​លើ​វិន័យ សណ្តាប់ ធ្នាប់ ក្រមសីលធម៌​រស់នៅ​បាន​ល្អ​យ៉ាង​គួរ​ឲ្យ​កត់សម្គាល់ ជាពិសេស​កម្មវិធីសិក្សា​ប្រចាំ​ឆ្នាំ​បាន​ចប់សព្វគ្រប់​ត្រឹមត្រូវ​តាម គោលការណ៍ និង​ការណែនាំ​របស់​មន្ទីរអប់រំ យុវជន និង​កីឡា​ផងដែរ​។

លោក​បន្ថែមថា ក្នុងនាម​ខ្ញុំបាទ​ជា នាយក​សាខា ក៏ដូចជា​ជំនួសមុខ​អោយ​លោក​ប្រធាន​សូម​ការអនុញ្ញាត​លើកឡើង​នូវ​ផែនការ សម្រាប់​ឆ្នាំ​សិក្សា​ថ្មី ២០២៣-២០២៤ ដូច​ខាងក្រោម យកចិត្តទុកដាក់​បន្ថែ​ម​ក្នុងការ​អនុវត្ត​ការសិក្សា​ដោយ​សម្រេច​ឱ្យ​បាន​ជោគជ័យ​នូវ​ទិសដៅ​អប់រំ​ក្នុង​ឆ្នាំ​សិក្សា ២០២៣-២០២៤​ខាងមុខនេះ។ ​បង្កើន​ការ​យកចិត្តទុកដាក់ និង​ជំរុញ​សិស្ស​ខ្សោយ​ឲ្យ​ទៅ​សិស្ស​មធ្យម សិស្ស​មធ្យម​ទៅ​ល្អ​បង្គួរ ល្អ​បង្គួរ​ទៅ​ល្អ។ បង្កើន​ការ​យកចិត្តទុកដាក់ លើ​ការងារ​គ្រប់គ្រង​ការបង្រៀន និង​រៀន របស់​លោក​គ្រូ​-​អ្នកគ្រូ សាស្ត្រាចារ្យ និង សិស្សានុសិស្ស ដើម្បី​ចូលរួម​ចលនា​ប្រលងប្រណាំង ការ​បង្រៀន​ល្អ និង​ការរៀនសូត្រ​ល្អ ឱ្យបាន ផុសផុល និង​មាន​ប្រសិទ្ធភាព​ខ្ពស់​។ ​បង្កើន​ការយកចិត្តទុកដាក់​ត្រួតពិនិត្យ តាមដាន និង​ការ​ប្រឹក្សា​យោបល់​ផ្នែក វិន័យ​សណ្តាប់ធ្នាប់ ក្រម សីលធម៌ និង​ការសិក្សា​របស់​សិស្ស ជាមួយ​លោក លោកស្រី ជា​មាតាបិតា ឬ​អ្នកអាណាព្យាបាល​ឲ្យ​បាន ខ្ជាប់ខ្ជួន​។​ពង្រឹង និង​ជំរុញ​ក្រុម​ប្រឹក្សាបច្ចេកទេស គរុកោសល្យ រដ្ឋបាល និង​វិធីសាស្ត្រ​បង្រៀន សម្រាប់​លោកគ្រូ​-​អ្នកគ្រូ សាស្ត្រាចារ្យ ក្នុង​ដំណើរ​ការបង្រៀន​ឲ្យ​កាន់​តែមាន​ប្រសិទ្ធភាព​។ ពង្រឹង​និង ជំរុញ​កិច្ចសហការ និង​ទំនាក់ទំនង​ល្អ រវាង​សាលា គ្រួសារ និង​សង្គម​ជាពិសេស​ជាមួយ សហគមន៍​ជាតិ អន្តរជាតិ និង​មន្ទីរ អប់រំ យុវជន និង កីឡា ដើម្បី​សំដៅ​សម្រេច​ឱ្យបាន​ជោគជ័យ​នូវ ការអប់រំ​ថ្នាក់ជាតិ​ប្រចាំ សាលារៀន​អា​រី​ហ្សូ​ន សាខា​ខេត្តសៀមរាប​នេះ​ផងដែរ​។​

​ពង្រឹង និង​ជំរុញ​ឲ្យ​សិស្ស​កាន់តែ​យល់​បន្ថែម​ពី​កម្មវិធីសិក្សា STEM តាម​ចក្ខុវិស័យ​របស់​ក្រសួង​អប់រំ យុវជន និង​កីឡា​នា​អាណ​ត្តិ​ទី​៧។ ​បន្ត​ការទប់ស្កាត់​គ្រឿងញៀន E Cigarette អបាយមុខ​ផ្សេងៗ ក្នុង​បរិវេណ​សាលា​ឲ្យ​បានជា​ដាច់ខាត​។​ បន្ត​ការ​ផ្តល់​ប្រាក់ខែ និង​អាហារូបករណ៍​ជូន​ដល់​សិស្ស​ឆ្នើម​ប្រចាំខែ​ក្នុង​ឆ្នាំ​សិក្សា​២០២៣-២០២៤ ។ ​បន្ត​ការផ្តល់​អាហារូបករណ៍​គ្រប់​កម្មវិធីសិក្សា​ដល់​កូន​មន្ត្រីរាជការ​ថ្នាក់ក្រោម​ជាតិ​។ ឆ្លៀត​ឱកាស​នោះ​ដែរ​លោក​បាន​សំណូមពរ​ដល់ កូនៗ​សិស្សានុសិស្ស​ទាំងអស់​ត្រូវ​ខិតខំ​យកចិត្តទុកដាក់​ត្រង់ត្រាប់ ស្តាប់​គ្រូ​ពន្យល់​ក្នុង​ការ​រៀន​សូត្រ ដោយ​ស្មារតី​ភ្ញាក់រលឹក ត្រូវ​បង្កើន​ការ​ស្វ័យ​សិក្សា​ដោយ​ខ្លួនឯង ដើម្បី​ក្រេប​យកចំណេះ ដឹង​ឱ្យ​បាន​ល្អប្រសើរ​។

កូនៗ​ត្រូវ​ចេះ​រក្សា​ទំនាក់ទំនង​ល្អ​ក្នុងចំណោម​សិស្សានុសិស្ស​ត្រូវ​គោរព​អនុវត្ត​ទៅតាម បទបញ្ជាផ្ទៃក្នុង​សាលា គោរព​តាម​ឳ​វាទ​របស់​គណៈ​គ្រប់គ្រង​សាលា លោកគ្រូ​-​អ្នកគ្រូ ចាស់ព្រឹទ្ធាចារ្យ ព្រះសង្ឃ និង​ឪពុក ម្តាយ ដើម្បី​កសាង​ខ្លួន​ឱ្យ​ក្លាយជា កុមារ និង យុវជន​សុភាពរាបសារ មាន​សុជីវធម៌​ល្អ ក្នុង​ការរស់នៅ​មានចំណេះ​ដឹង​ខ្ពង់ខ្ពស់​ល្អ​ទៅ​ថ្ងៃ​អនាគត និង​ក្លាយជា​មនុស្ស ឬ​ពលរដ្ឋ​ល្អ​ដែល​ប្រទេសជាតិ​យើង កំពុង​ត្រូវការ​ជាទីបំផុត ដើម្បី​អភិវឌ្ឍ ប្រទេស​ឱ្យមាន​ការរីកចម្រើន​ឡើង​ក្លាយទៅជា​ប្រទេស​ដ៏​រុងរឿង​មួយ​នាពេល​ខាងមុខនេះ​។

លោកស្រី ថុ​ន ស៊ីណា អនុប្រធាន​មន្ទីរអប់រំ​យុវជន​និង​កីឡា​ខេត្តសៀមរាប បាន​មានប្រសាសន៍ថា ចំពោះ​លោកគ្រូ អ្នកគ្រូ ត្រូវ​ពិចារណា​ដែរ​នូវ​អ្វី​ដែល​បាន​អនុវត្ត​ល្អ និង​បញ្ហា​ខ្វះខាត​នានា​ក្នុង​ការ​គ្រប់គ្រង​សាលារៀន ហើយ​ត្រូវ​អភិវឌ្ឍន៍​ឲ្យ​បាន​នូវ​កង្វះខាត​ទាំងនោះ ដើម្បី​ក្លាយទៅជា​ចំណុច​ល្អ​ប្រសើរ​សម្រាប់​ជា​បទពិសោធន៍ និង​គំរូ​ដល់​អ្នក​ជំនាន់ក្រោយ​។ រីឯ​ក្មួយ​សិស្សានុសិស្ស​ត្រូវ​ភ្ញាក់​រលឹក​ឲ្យ​បាន​ខ្លាំងក្លា​ថែមទៀត និង​កែប្រែ​ខ្លួន​ខិតខំ​រៀប​អត្តចរិត​ឲ្យ​បាន​សមស្រប​ជា​កុលបុត្រ កុលធីតា នៃ​មាតុភូមិ​អង្គរ ដែល​ជា​ប្រទេស​មាន​អរិយធម៌​ចំណាស់​ថ្លៃថ្លា​ និង​ខ្ពង់ខ្ពស់​តាំងពី​បុព្វបុរស​យើង​រៀងមក​និង​ត្រូវ​ខិតខំ​បន្ត​ក្រេបជញ្ជក់​យកចំណេះ​វិជ្ជា​តាម​ការ​បង្ហាត់​បង្ហាញ​ពី​សំណាក់ លោកគ្រូ អ្នកគ្រូ ដើម្បី​ក្លាយខ្លួន​ទៅជា​កូន​ល្អ សិស្ស​ល្អ មិត្ត​ល្អ​។

ក្នុង​ឱកាស​នោះ​ដែរ ​លោក​ឧកញ៉ា​វេជ្ជបណ្ឌិត ជា សុខ​ឃាង ស្ថាបនិក និង​ជា​ប្រធាន​នាយក ប្រតិបត្តិ នៃ​ស្ថាប័ន​អប់រំ អេ​ជី បាន​មានប្រសាសន៍ថា គណៈ​គ្រប់គ្រង​លោកគ្រូ អ្នកគ្រូ​នៅ សាលារៀន អា​រី​ហ្សូ​ន ត្រូវមាន​ចក្ខុវិស័យ បេសកកម្ម និង​គោលដៅ​ផ្តោត​លើ​ការអប់រំ​បណ្តុះបណ្តាល​ឲ្យ​សិស្សានុសិស្ស​មាន​សមត្ថភាព​ពេញលេញ និង​ត្រៀមខ្លួន​រួចជាស្រេច​សម្រាប់​ការសិក្សា​បន្ត​នៅ​ថ្នាក់​បន្ទាប់ ពោល​គឺ​សមត្ថភាព​សិក្សា​ឲ្យ​បាន​ពូកែ​ជា​បន្តបន្ទាប់។ ទន្ទឹម​នឹង​នេះ​ការអប់រំ​សិស្សានុសិស្ស​ត្រូវផ្តោត​ការយកចិត្តទុកដាក់​នូវ​វិជ្ជា​ទាំង​បី គឺ​វិជ្ជា​សម្បទា បំ​ណិ​ន​សម្បទា និង​ចរិយា​សម្បទា​៕

ដោយ ៖ កុសល

The post សាលារៀន អា​រី​ហ្សូ​ន រៀបចំ​កម្ម​ពិធី​បើក​បវេសនកាល​ថ្មី ឆ្នាំ​សិក្សា ២០២៣-២០២៤ និង​ពិធី​ប្រគល់​វិញ្ញាបនបត្រ​បញ្ចប់​ឆ្នាំ​សិក្សា ២០២២-២០២៣ appeared first on Kampuchea Thmey Daily.