ប៉ាល់ ឆរស្មី Archives - Kampuchea Thmey Daily

ធ្លាប់ឆ្លងកាត់ស៊ីហ្គេម ៤ដង ប៉ាល់ ឆរស្ម៊ី ថាសៀមធ្វើជាម្ចាស់ផ្ទះលើកនេះអន់បំផុត និងលក់មុខលើឆាកអន្តរជាតិ

Sina Noun — Mon, 29 Dec 2025 08:40:47 +0000

អតីតកីឡាការិនីឆ្នើមរបស់កម្ពុជា ប៉ាល់ ឆរស្ម៊ី ថាខ្លួនធ្លាប់ចូលរួមព្រឹត្តិការណ៍ស៊ីហ្គេមរហូតដល់ទៅ៤ មិនដែលឃើញម្ចាស់ផ្ទះឯណាមិនឲ្យតម្លៃព្រឹត្តិការណ៍ប្រកួត និងរៀបចំអន់បំផុតដូចជាប្រទេសសៀម នៅឆ្នាំ២០២៥ ដូចលក់មុខប្រទេសលើឆាកអន្តរជាតិ។

អ្នកនាង ប៉ាល់ ឆរស្ម៊ី

អ្នកនាង ប៉ាល់ ឆរស្ម៊ី អតីតកីឡាការិនីជម្រើសជាតិកម្ពុជាបានឲ្យដឹងថា រូបគេធ្លាប់ចូលរួមព្រឹត្តិការណ៍ស៊ីហ្គេមរហូតដល់ទៅ ៤ដឹងឯណោះគឺនៅឆ្នាំ២០១១ ឆ្នាំ២០១៣ ឆ្នាំ២០២២ នៅវៀតណាម និងឆ្នាំ២០២៣ នៅកម្ពុជាផ្ទាល់តែម្ដង។ តាំងពីចូលរួមស៊ីហ្គេមមកមិនដែលឃើញម្ចាស់ផ្ទះរៀបចំអន់បំផុតដូចនៅឆ្នាំ២០២៥ ដែលសៀមធ្វើនេះទេ។

តាមការមើលឃើញ ឆរស្ម៊ី បញ្ជាក់ថាសៀមគឺមិនឲ្យតម្លៃលើព្រឹត្តិការណ៍មួយនេះឡើយ ពោលទទួលធ្វើឲ្យតែរួចៗប៉ុណ្ណោះ។ បន្ថែមពីនេះការមានការលំអៀងស្ទើរគ្រប់ប្រភេទកីឡារហូតក្នុងនាមជាអ្នកកីឡាមិនអាចទទួលយកបានឈានដល់ការតវ៉ា បញ្ចេញកាយវិការខឹងសម្បា និងមានការរិះគន់លើការកាត់សេចក្ដីឥតឈប់ឈរ។

ស៊ីហ្គេម 2025 នៅសៀម

ការរៀបចំក្នុងនាមម្ចាស់ផ្ទះដ៏អន់បំផុតបែបនេះ និងការកាត់សេចក្ដីលំអៀងដូចបានឃើញស្រាប់គឺដូចជាការលក់មុខមាត់ប្រទេសជាតិរបស់ខ្លួនចំពោះអន្តរជាតិដែលបានមកចូលរួមផ្ទាល់ផង និងបណ្ដាប្រទេសដែលបានតាមដានដឹងលឺផង។ ការរៀបចំនេះមិនស័ក្តិសមដូចអ្វីដែលប្រទេសខ្លួនអួតថាជាប្រទេសមាន ប្រទេសជឿនលឿននោះឡើយ។

បញ្ជាក់ដែរថា ព្រឹត្តិការណ៍ស៊ីហ្គេម លើកទី៣៣ ឆ្នាំ២០២៥ ដែលសៀមធ្វើជាម្ចាស់ផ្ទះទើបបញ្ចប់ទៅថ្មីៗនេះគឺពោរពេញទៅដោយបញ្ហា និងការរិះគន់ច្រើនបំផុតពីប្រទេសចូលរួម និងសាធារណៈជនលើបណ្ដាញសង្គមហ្វេសបុក Tik Tok ជាដើម។ ការរិះគន់ទាំងនោះមានដូចជាពិធីបើកការប្រកួតធ្វើឡើងមិនបានល្អ ខុសបច្ចេកទេសច្រើនកន្លែង ការរៀបចំទៀតសោធសាមញ្ញាៗមិនសមព្រឹត្តិការណ៍ធំ និងការលំអៀងទៅលើម្ចាស់ផ្ទះសៀម។ ថ្មីៗនេះគេឃើញមានកីឡាករខ្លួនឯងចាប់ផ្ដើមបញ្ចេញអារម្មណ៍អន់ចិត្តចំពោះរដ្ឋាភិបាលខ្លួនឯងដែលមិនគោរពតាមការសន្យាទៀតផង។ ចំពោះក្រុមកម្ពុជាបន្ទាប់ពីទៅចូលរួមក្នុងពិធីបើកការប្រកួតហើយនោះស្អែកឡើងក៏វិលត្រឡប់មកមាតុភូមិវិញ ព្រោះតែស្ថានការណ៍ព្រំដែនកំពុងក្ដៅខ្លាំងខ្លាចប៉ះពាល់ដល់សុវត្ថិភាពប្រតិភូ គ្រូបង្វឹក កីឡាករ កីឡាការិនី៕

ការរិះគន់កាលស៊ីហ្គេម 2025 នៅសៀម

អត្ថបទដោយ៖ នួន ស៊ីណា

The post ធ្លាប់ឆ្លងកាត់ស៊ីហ្គេម ៤ដង ប៉ាល់ ឆរស្ម៊ី ថាសៀមធ្វើជាម្ចាស់ផ្ទះលើកនេះអន់បំផុត និងលក់មុខលើឆាកអន្តរជាតិ appeared first on Kampuchea Thmey Daily.

អតីតកីឡាការិនី ប៉ាល់ ឆរស្ម៊ី៖ យើងលឺសូរគ្រាប់ភ័យព្រួយប៉ុណ្ណឹង ចុះទម្រាំកងទ័ពជួរមុខមិនដឹងលំបាកយ៉ាងណា

Sina Noun — Fri, 26 Dec 2025 04:12:20 +0000

អតីតកីឡាការិនីឆ្នើមរបស់កម្ពុជា ប៉ាល់ ឆរស្ម៊ី សង្វេគអាណិតដល់ជនភៀសសឹក និងវីរកងទ័ពជាខ្លាំងចំពោះទុក្ខវេទនាអំឡុងពេលសត្រូវឈ្លានពាន ស្របពេលម្នាក់ៗគ្រាន់តែឃើញដ្រូនហោះ ឬឃើញដោយប្រយោលភិតភ័យប៉ុណ្ណឹងទៅហើយ។

សកម្មភាពឧបត្ថម្ភកន្លងទៅ

អតីតកីឡាការិនីជម្រើសជាតិ ប៉ាល់ ឆរស្ម៊ី បានឲ្យដឹងថា អំឡុងពេលដឹកស្បៀង និងសម្ភារទៅជួយជនភៀសសឹក កងទ័ព កន្លងទៅនេះគឺបានឃើញដ្រូនហោះ និងជួបការលំបាកខ្លះៗដែរ ប៉ុន្តែមិនបានបង្អាក់សកម្មភាពសប្បុរសធម៌របស់ក្រុមខ្លួនបានឡើយ។ ម្នាក់ៗគ្រាន់តែលឺ ឬឃើញប៉ុណ្ណឹងមានការភ័យខ្លាចទៅហើយចុះទម្រាំកងទ័ពជួរមុខដែលជួបផ្ទាល់ទៀតនោះប្រឈមគ្រោះថ្នាក់យ៉ាងណាខ្លះទៅ។

កីឡាការិនីឆ្នើមប្រចាំស៊ីហ្គេម ឆ្នាំ២០២៣ រូបនេះបន្តទៀតថា ខ្លួនពិតជាគោរពដឹងគុណចំពោះការលះបង់គ្រប់យ៉ាងរបស់កងទ័ពមានទាំងការភ័យខ្លាច ការប្រឈមគ្រោះថ្នាក់ដល់អាយុជីវិត ការរងទុក្ខវេទនាផ្សេងៗអំឡុងការឈ្លានពានរបស់សៀមនៅពេលនេះ។

សកម្មភាពឧបត្ថម្ភកន្លងទៅ

ទាំងនេះហើយដែលធ្វើឲ្យខ្លួនត្រូវតែតបស្នង និងជួយគ្រប់យ៉ាងដែលខ្លួនអាចធ្វើបានសម្រាប់អ្នកនៅជួរក្រោយនេះដូចជាកៀរគររកជំនួយ រកស្បៀង រកសម្ភារប្រើប្រាស់ចាំបាច់ ថ្នាំសង្កូវ និងថវិកាជាដើម។ ការជួយទាំងនេះគឺបានសម្រាលទុក្ខលំបាករបស់ជនភៀសសឹកផង ជួយដល់ការច្បាំងទប់ទល់សត្រូវផង និងជាការសាមគ្គីគ្នារបស់ប្រជាជនខ្មែររួមគ្នាប្រឆាំការឈ្លានពានពីសត្រូវរហូតដណ្ដើមឲ្យបានជ័យជម្នះ។

ក្រុមសប្បុរសធម៌របស់ ប៉ាល់ ឆរស្ម៉ី

បញ្ជាក់ដែរថា អំឡុងការឈ្លានពានរបស់សៀមមកលើកម្ពុជាពីរលើកនេះអតីតកីឡាការិនី ប៉ាល់ ឆរស្ម៊ី និងក្រុមការងារស្ម័គ្របានចុះជូយដល់ជនភៀសសឹកជាច្រើនលើកបានសម្រាលទុក្ខលំបាកមួយចំនួនធំ។ ការឈ្លានពានជាលើកទី២ របស់សៀមមកលើកម្ពុជាតាំងពីថ្ងៃទី៧ ខែធ្នូ ឆ្នាំ២០២៥ រហូតដល់ថ្ងៃទី២៦ ខែធ្នូ ឆ្នាំ២០២៥ នេះនៅមិនទាន់បញ្ឈប់នៅឡើយទេ។ នៅថ្ងៃទី២៨ ខែធ្នូ ២០២៥ ខាងមុខនេះ ក្រុមសប្បុរសធម៌របស់ ប៉ាល់ ឆរស្ម៊ី នឹងត្រូវយកជំនួយទៅជួយជនភៀសសឹកជាថ្មីទៀត៕

ក្រុមសប្បុរសធម៌របស់ ប៉ាល់ ឆរស្ម៉ី

ប៉ាល់ ឆរស្ម៉ី

អត្ថបទដោយ៖ នួន ស៊ីណា

The post អតីតកីឡាការិនី ប៉ាល់ ឆរស្ម៊ី៖ យើងលឺសូរគ្រាប់ភ័យព្រួយប៉ុណ្ណឹង ចុះទម្រាំកងទ័ពជួរមុខមិនដឹងលំបាកយ៉ាងណា appeared first on Kampuchea Thmey Daily.

ម្ចាស់មេដាយស៊ីហ្គេម ៦គ្រឿងនៅកម្ពុជា ប៉ាល់ ឆរស្ម៊ី ទៅជួយឧបត្ថម្ភជនភៀសសឹកមុនមួយថ្ងៃទើបសៀមទម្លាក់គ្រាប់តាមផ្លូវនោះ

Sina Noun — Thu, 25 Dec 2025 02:38:03 +0000

ម្ចាស់មេដាយស៊ីហ្គេម ៦គ្រឿង ឆ្នាំ២០២៣ នៅកម្ពុជា ប៉ាល់ ឆរស្ម៊ី អំឡុងសង្គ្រាមឈ្លានពានរបស់ប្រទេសសៀមពីរលើកនេះអ្នកនាង និងក្រុមស្ម័គ្រចិត្តបានចុះជួយជនភៀសសឹក និងវីរកងទ័ពយ៉ាងសកម្មដោយមិនសូវបារម្ភពីសុវត្ថិភាពផ្ទាល់ខ្លួននោះឡើយ។

អ្នកនាង ប៉ាល់ ឆរស្ម៊ី

អតីតកីឡាការិនីឆ្នើមរបស់កម្ពុជា ប៉ាល់ ឆរស្ម៊ី បានឲ្យដឹងថា អំឡុងសង្គ្រាមឈ្លានពានរបស់សៀមមកលើកម្ពុជានេះគឺក្រុមស្ម័គ្រចិត្តដែលដឹកនាំដោយលោក យ៉ាំ ថៃសាន រួមទាំងខ្លួនផ្ទាល់បានចុះទៅជួយដល់ជនភៀសសឹក និងវីរកងទ័ពបាន ៥ដងហើយ និងគម្រោងទៅជាថ្មីទៀតអំឡុងថ្ងៃទី២៨ ខែធ្នូ ខាងមុខទៀត។

អំឡុងពេលចុះទៅជួយជនភៀសសឹកនោះដែរកាលពីថ្ងៃទី១៨ ខែធ្នូ ក្រុមការងារទៅទម្លាក់សម្ភារនៅឯខេត្តឧត្តរមានជ័យមុនមួយថ្ងៃស្អែកឡើងថ្ងៃទី១៩ ខែធ្នូ នៅតាមផ្លូវដែលខ្លួនបានជិះក៏ត្រូវបានដ្រូនរបស់សៀមទម្លាក់ផងដែរ។ ពោលការទម្លាក់នោះគឺខុសត្រូវគ្នាតែមួយថ្ងៃប៉ុណ្ណោះនៅពេលដែលក្រុមការងារបានចុះទៅទីនោះ។

ទិដ្ឋភាពផ្ដល់ជំនួយ

ម្ចាស់មេដាយស៊ីហ្គេម ៦គ្រឿងខាងលើបន្តទៀតថា ពេលដែលចុះទៅដល់ផ្ទាល់ជនភៀសសឹកជួបការលំបាកខ្លាំងក្នុងការរស់នៅទាំងការសម្រាក អាហារហូបចុក សម្ភារប្រើប្រាស់ផ្សេងៗ និងអនាម័យជាដើម។

ប៉ាល់ ឆរស្ម៊ី បន្ថែមទៀតថា ទិដ្ឋភាពលំបាកវេទនាត្រូវរត់ចេញពីផ្ទះសម្បែង និងការឈ្លានពានយ៉ាងឃោរឃៅរបស់សៀមនេះបានធ្វើឲ្យខ្លួនរួមទាំងក្រុមស្ម័គ្រផ្សេងៗឈឺចាប់ និងមានភាពអាណិតអាសូរខ្មែរគ្នាឯងរហូតមិនអាចនៅស្ងៀមសំងំសុខបានទើបនាំគ្នារៃអង្គាស និងស្វែងរកជំនួយជួយគ្នាក្នុងគ្រាលំបាកមួយនេះ។

ទិដ្ឋភាពផ្ដល់ជំនួយ

បញ្ជាក់ដែរថា អំឡុងការឈ្លានពានរបស់សៀមមកលើកម្ពុជាពីរលើកនេះអតីតកីឡាការិនីកម្ពុជា ប៉ាល់ ឆរស្ម៊ី និងក្រុមការងារស្ម័គ្របានចុះជូយដល់ជនភៀសសឹកជាសម្ភារ ថ្នាំសង្កូវ អាហារ និងរបស់ប្រើប្រាស់បានជាច្រើនជួយសម្រាលទុក្ខលំបាកតាមបណ្ដោយព្រំដែនកន្លងមក។ ការឈ្លានពានជាលើកទី២ របស់សៀមមកលើកម្ពុជាតាំងពីថ្ងៃទី៧ ខែធ្នូ ឆ្នាំ២០២៥ រហូតដល់ថ្ងៃទី២៥ ខែធ្នូ ឆ្នាំ២០២៥ នេះនៅមិនទាន់បញ្ឈប់នៅឡើយទេ ស្របពេលជនភៀសសឹកឡើងដល់ជាង ៥០ម៉ឺននាក់មកហើយ៕

អ្នកនាង ប៉ាល់ ឆរស្ម៊ី

អត្ថបទដោយ៖ នួន ស៊ីណា

The post ម្ចាស់មេដាយស៊ីហ្គេម ៦គ្រឿងនៅកម្ពុជា ប៉ាល់ ឆរស្ម៊ី ទៅជួយឧបត្ថម្ភជនភៀសសឹកមុនមួយថ្ងៃទើបសៀមទម្លាក់គ្រាប់តាមផ្លូវនោះ appeared first on Kampuchea Thmey Daily.

កីឡាការិនីឆ្នើម ប៉ាល់ ឆរស្មី រៀបរាប់ពីការចាប់អាជីពថតរូប

chean virakbot — Thu, 21 Mar 2024 01:08:00 +0000

កីឡាការិនីវ៉ូវីណាមជម្រើសជាតិកម្ពុជា ប៉ាល់ ឆរស្មី កំពុងចាប់អាជីពជាអ្នកសារព័ត៌មានកីឡាដោយកំពុងផ្តោតលើជំនាញថតរូប បន្ទាប់ពីបានចូលក្របខណ្ឌរដ្ឋនៅក្នុងអង្គភាពកីឡារបស់ក្រសួងមហាផ្ទៃ។

នៅពេលទទួលកីឡាករ ឈឿង ល្វៃ មកពីទីក្រុងហុងកុង ប៉ាល់ ឆរស្មី អត្តពលិកឆ្នើមប្រចាំព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ បានប្រាប់សារព័ត៌មាន«កម្ពុជាថ្មី»ថា មុនពេលចាប់អាជីពកីឡា រូបនាងស្រឡាញ់ការងារសារព័ត៌មានជាពិសេសផ្នែករូបតាំងពីតូច ប៉ុន្តែមិនមានឱកាស ដោយសារជាប់ដៃនឹងអាជីពកីឡា។ ទោះជាយ៉ាងណា បន្ទាប់ពីចូលក្របខណ្ឌរដ្ឋ ស្ថិតនៅក្រុមប្រឹក្សាកីឡារបស់ក្រសួងមហាផ្ទៃការិយាល័យព័ត៌មាន ដូច្នេះក៏ជ្រើសរើសយកផ្នែកថតរូបស្របតាមក្តីស្រឡាញ់របស់ខ្លួន។

«ឥឡូវនេះ ខ្ញុំចេញទៅយកព័ត៌មានជាមួយក្រុមការងារ ស្របពេលក្រសួងមហាផ្ទៃមានការប្រកួតបាល់ទាត់ពានរង្វាន់របស់ក្រសួង។ ជាដំបូងខ្ញុំចាប់យកផ្នែកថតរូប ដោយមានបងៗជួយបង្ហាត់បង្រៀនផ្នែកថត»។ ប៉ាល់ ឆរស្មី បានរៀបរាប់ និងបានបញ្ជាក់ថា បន្ទាប់ពីយល់ដឹងពីរបៀបថតរូបបានច្រើន រូបនាងនឹងរៀនពីរបៀបសរសេរអត្ថបទថែមទៀត។

ម្ចាស់មេដាយមាសស៊ីហ្គេម អាស៊ី និងពិភពលោកច្រើនគ្រឿងបានបន្តថា សម្រាប់ការចាប់ផ្តើមការងារផ្នែកថតរូបនេះមិនមែនមានអ្វីពិបាកខ្លាំងសម្រាប់រូបនាងឡើយ ពីព្រោះជាការងារដែលខ្លួនស្រឡាញ់តាំងពីតូច។ អ្វីដែលប្លែកគឺអារម្មណ៍ធ្លាប់តែត្រូវបានគេសម្ភាស និងថត ប៉ុន្តែពេលនេះមានអារម្មណ៍ប្លែកមួយទៀតដែលតាមថត និងសម្ភាសគេវិញ។

ប៉ាល់ ឆរស្មី បានប្រាប់ថា ៖«ខ្ញុំអត់មានភ័យខ្លាចអីទេ តែអារម្មណ៍ប្លែក ព្រោះខ្ញុំធ្លាប់តែដើរចេញមក គេសម្ភាសយើង តែឥឡូវនេះ ខ្ញុំតាមថត តាមសម្ភាសគេវិញ មានអារម្មណ៍ពិសេសប្លែក»។ ទោះបីជាយ៉ាងណា មិនថាក្លាយជាអ្នកសារព័ត៌មាន ឬជាអ្នកកីឡាទេ កីឡាការិនីរូបនេះនៅតែបន្តឆន្ទៈដើម្បីរួមចំណែកអភិវឌ្ឍកីឡានៅក្នុងប្រទេសកម្ពុជាដដែល។

ក្រោយចប់កីឡាស៊ីហ្គេម លើកទី៣២ ឆ្នាំ២០២៣ កីឡាការិនី ប៉ាល់ ឆរស្មី បានពិចារណាឈប់ពីកីឡាការិនីដើម្បីក្លាយជាគ្រូបង្វឹកដើម្បីចែករំលែកចំណេះជំនាញដល់ក្មេងជំនាន់ក្រោយ ដោយសារមានវ័យកាន់ច្រើន។ ប៉ុន្តែរហូតដល់ពេលនេះ រូបនាងនៅមិនទាន់ឈប់ពីអាជីពកីឡាការិនីទេគឺនៅតែបន្តដោយសារខាងសហព័ន្ធមិនទាន់មានផែនការបង្កើនចំនួនគ្រូបង្វឹកទេ។

ប៉ាល់ ឆរស្មី បានប្រាប់ថា ៖«ត្រៀមប្រមូលផ្តុំជាថ្មីខាងមុខ ខ្ញុំនៅតែជាកីឡាការិនីដដែល ដោយសារឆ្នាំនេះមានផែនការកាត់បន្ថយកីឡាករ កីឡាការិនី គ្រូបង្វឹក ហើយខាងសហព័ន្ធក៏អត់មានលើកបេក្ខភាពគ្រូបង្វឹកដែរ»។

ប៉ាល់ ឆរស្មី បានឈ្នះមេដាយមាស៤គ្រឿង ប្រាក់១គ្រឿង និងសំរិទ្ធ១គ្រឿង ក្នុងកីឡាស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ និងក្លាយជាអត្តពលិកឆ្នើមប្រចាំព្រឹត្តិការណ៍។ ក្រៅពីកីឡាស៊ីហ្គេម ឆ្នាំ២០២៣ រូបនាងបានឈ្នះមេដាយមាស ប្រាក់ និងសំរិទ្ធ ពីកីឡាស៊ីហ្គេម ជើងឯកអាស៊ី និងជើងឯកពិភពលោកជាច្រើនទៀតក្នុងរយៈពេលប៉ុន្មានឆ្នាំកន្លងទៅនេះ៕

អត្ថបទ៖ វីរបុត្រ

The post កីឡាការិនីឆ្នើម ប៉ាល់ ឆរស្មី រៀបរាប់ពីការចាប់អាជីពថតរូប appeared first on Kampuchea Thmey Daily.

ច្បាស់មុនគេ កម្ពុជានឹងធ្វើរូបសំណាកកីឡាការិនី ប៊ូ សំណាង និង ប៉ាល់ ឆរស្មី

chean virakbot — Wed, 06 Sep 2023 03:56:08 +0000

កីឡាការិនីរត់ប្រណាំង ប៊ូ សំណាង និងកីឡាការិនីវ៉ូវីណាម ប៉ាល់ ឆរស្មី ស្ថិតក្នុងចំណោមអត្តពលិកជម្រើសជាតិកម្ពុជាដែលត្រូវបានជ្រើសរើសដើម្បីធ្វើរូបសំណាកតំណាងឲ្យវីរភាពរបស់ពួកគេសម្រាប់តម្កល់ទុកនៅវិមានឈ្នះឈ្នះ។

លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជាបានឲ្យដឹងថា បន្ទាប់ពីរៀបចំព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ប្រកបដោយជោគជ័យ កម្ពុជានឹងជ្រើសរើសអត្តពលិកឆ្នើមៗដែលមានស្នាដៃជូនជាតិដើម្បីធ្វើសំណាក់របស់ពួកគេ។

លោកមានប្រសាសន៍ថា ៖«ឥឡូវនេះ កំពុងស្ថិតក្នុងនីតិវិធីរៀបចំនៅឡើយ។ ក្នុងនោះវីរភាពដ៏លេចធ្លោជាងគេគឺមានកីឡាការិនី ប៊ូ សំណាង ម្នាក់ហើយ។ ក្រៅពីនោះ យើងនឹងជ្រើសរើសយកអត្តពលិកដែលឈ្នះមេដាយមាសលេចធ្លោជាងគេ និងអ្នកដែលឈ្នះមេដាយមាសច្រើនជាងគេ។ អីចឹងយើងមាន២រូបហើយគឺកីឡាការិនី ប៉ាល់ ឆរស្មី និងកីឡាការិនី ប៉ូ សំណាង ដែលទទួលបានរង្វាន់ស៊ីហ្គេមនៅពេលបិទ»។

«អ្នកផ្សេងទៀត យើងកំពុងតែបន្តធ្វើការជ្រើសរើស។ យើងនឹងធ្វើការជាមួយក្រសួងការពារជាតិអំពីការឆ្លាក់រូបសំណាក និងប្រវត្តិរូបរបស់ពួកគាត់នៅក្នុងផ្ទាំងជាប្រវត្តិសាស្ត្រ នៅវិមានឈ្នះឈ្នះដែលទទួលបានការឯកភាពពីសម្តេចតេជោរួចហើយ ហើយសម្តេចពិជ័យសេនា ទៀ បាញ់ ជាប្រធានគណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម CAMSOC ក៏បានខិតខំប្រឹងធ្វើកិច្ចការនេះ ហើយកិច្ចការនេះនឹងធ្វើឲ្យបានរួចរាល់ក្នុងពេលឆាប់ៗ»។

នៅពេលសួរថា តើជ្រើសរើសអត្តពលិកប៉ុន្មាននាក់ និងមានការជ្រើសរើសថ្នាក់ដឹកនាំ ឬគ្រូបង្វឹកដើម្បីធ្វើសំណាកដែរឬទេ? លោក វ៉ាត់ ចំរើន បានឆ្លើយថា ៖«យើងមិនទាន់បានកំណត់ចំនួនអត្តពលិកទេ ពីព្រោះកំពុងពិនិត្យមើលទីកន្លែងដែលរៀបចំដាក់រូបសំណាក។ នៅក្នុងប្រវត្តិកីឡាគឺគេយកវីរភាពរបស់កីឡាករ កីឡាការិនីជាធំ»។

ប៊ូ សំណាង ជាកីឡាការិនីរត់ប្រណាំងជម្រើសជាតិកម្ពុជាដែលធ្វើឲ្យពិភពលោកចាប់អារម្មណ៍យ៉ាងខ្លាំងតាមរយៈឆន្ទៈ និងការតស៊ូក្រោមដំណក់ទឹកភ្លៀងដោយមិនបោះបង់ចោលការប្រកួត បើទោះបីជាដឹងថា ខ្លួនស្ថិតនៅចុងក្រោយគេ។ នេះហើយជាស្មារតីកីឡា ស្មារតីអូឡាំពិក និងស្មារតីជីវិតនៃការតស៊ូដែលធ្វើឲ្យពិភពលោករំជួលចិត្តយ៉ាងខ្លាំង និងមានមនុស្សរាប់ពាន់លាននាក់បានចាប់អារម្មណ៍មកកម្ពុជាក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣។

ប៉ាល់ ឆរស្មី ជាកីឡាការិនីវ៉ូវីណាមជម្រើសជាតិកម្ពុជាដែលបានឈ្នះមេដាយមាសច្រើនជាងគេបំផុតក្នុងចំណោមម្ចាស់មេដាយមាសស៊ីហ្គេមរបស់កម្ពុជា។ វីរកីឡាការិនីរូបនេះទទួលបានពានរង្វាន់ជាអត្តពលិកឆ្នើមប្រចាំព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ បន្ទាប់ពីបានឈ្នះមេដាយចំនួន៦គ្រឿងគឺមាស៤ ប្រាក់១ និងសំរិទ្ធ១៕

អត្ថបទ៖ វីរបុត្រ

The post ច្បាស់មុនគេ កម្ពុជានឹងធ្វើរូបសំណាកកីឡាការិនី ប៊ូ សំណាង និង ប៉ាល់ ឆរស្មី appeared first on Kampuchea Thmey Daily.

ប៉ាល់ ឆរស្មី Archives - Kampuchea Thmey Daily

ធ្លាប់ឆ្លងកាត់ស៊ីហ្គេម ៤ដង ប៉ាល់ ឆរស្ម៊ី ថាសៀមធ្វើជាម្ចាស់ផ្ទះលើកនេះអន់បំផុត និងលក់មុខលើឆាកអន្តរជាតិ

កីឡាការិនីឆ្នើម ប៉ាល់ ឆរស្មី រៀបរាប់ពីការចាប់អាជីពថតរូប

ច្បាស់​មុន​គេ កម្ពុជានឹងធ្វើរូបសំណាកកីឡាការិនី ប៊ូ សំណាង និង ប៉ាល់ ឆរស្មី

ច្បាស់មុនគេ កម្ពុជានឹងធ្វើរូបសំណាកកីឡាការិនី ប៊ូ សំណាង និង ប៉ាល់ ឆរស្មី