អ្នកស្រី ប៊ុន ចាន់និមល នាយិកាប្រតិបត្តិ ផលិតកម្ម សាស្ត្រាហ្វៀម មានប្រសាសន៍ប្រាប់ “កម្ពុជាថ្មី” ថា ជាធម្មតា ទំនាក់ទំនងគូស្រករ ឬជីវិតគូ អាចកើតឡើង ពោលគឺអត់អាចអត់ប៉ះគ្នាសោះទេ ទៅតាមមូលហេតុ ឬរបៀបផ្សេងៗ នៃការប៉ះ ដែលសំខាន់ដៃគូស្វាមីភរិយាគួររកជ្រើសរើស និងកំណត់កម្រិត នៃការប៉ះទង្គិចនោះ។

អ្នកស្រី ប៊ុន ចាន់និមល បញ្ជាក់បន្ថែមថា៖ “រាល់ពេលដែលខ្ញុំមានអារម្មណ៍ថា ពួកយើងអាចនឹងប៉ះទង្គិចពាក្យសម្តីគ្នានៅពេលបន្តិចទៀត ពួកយើងចាប់ផ្ដើមថយ។ នៅពេលយើងជជែកគ្នា ខ្ញុំតែងនិយាយលេងជាមួយស្វាមីខ្ញុំថា ពួកយើងអត់អាចនិយាយជាមួយគ្នា ១ ប្រធានបទ លើសពី ៥នាទី ទេ ព្រោះមូលហេតុនៅពេលយើងចាប់ផ្តើមនិយាយគ្នាចូលដល់នាទី ទី៤ ប៉ិច យើងសង្កេតឃើញចាប់ផ្ដើមមានគំនិតខ្វែងគ្នាកើតឡើង ពួកយើងចាប់ផ្ដើមបន្ថយ ហើយឈប់និយាយ ប្ដូរប្រធានបទ ព្រោះមូលហេតុយើងអត់ចង់ឱ្យទំនាស់កើតឡើង”។

នាយិកាផលិតកម្ម សាស្ត្រាហ្វៀម ខាងលើ មានប្រសាសន៍បន្តថា រឿងប៉ះទង្គិចគ្នាជាមួយស្វាមី បើអ្នកស្រីអត់សប្បាយចិត្តនឹងគ្នា ទោះនៅផ្ទះជាមួយគ្នាក៏ដោយ ក៏អ្នកស្រីសុខចិត្តផ្ញើសារទូរសព្ទប្រាប់ស្វាមី សូម្បីតែនៅក្នុងបន្ទប់ជាមួយគ្នាក្ដី ព្រោះក្នុងបន្ទប់មានកូនចេញចូលលេង។

អ្នកស្រី ប៊ុន ចាន់និមល លើកឡើងបន្តថា៖ “ហើយបើគាត់អត់បានចូលអានសារខ្ញុំ ទោះនៅទល់មុខគ្នា ក៏ខ្ញុំទូរសព្ទទៅគាត់ ប្រាប់គាត់ថា មើលសារៗ ព្រោះខ្ញុំកំពុងសរសេរប្រាប់អ្វីដែលខ្ញុំអត់សប្បាយចិត្តដែលគាត់ធ្វើអ៊ីចឹង។ យើងពិភាក្សាគ្នាភាសាអត់សំឡេង។ អ៊ីចឹង កូនខ្ញុំ អ្នកផ្ទះខ្ញុំក៏អត់ដឹងថា ពួកយើងមានបញ្ហានឹងគ្នាអីដែរ ហើយយើងបានដោះស្រាយជាមួយគ្នាយ៉ាងស្ងប់ស្ងាត់។ ទី១ យើងអត់មានឱកាសដំឡើងសំឡេងដាក់គ្នា ទី២ យើងអត់ប្រកាស ឬបង្ហាញឱ្យអ្នកណាដឹងបញ្ហានោះទេ”។

អ្នកស្រី ប៊ុន ចាន់និមល រំលឹកហេតុការណ៍ជាក់ស្ដែងថា នៅពេលមួយ ពេលគ្រួសារអ្នកស្រីជិះឡានជុំគ្នា ហើយកូនបានធ្វើឱ្យរបស់មួយរបស់ប៉ាកំពប់ ហើយប៉ាខឹង បានបញ្ចេញកាយវិការដែលគាត់មិនដែលបញ្ចេញថា គាត់ខឹងកូន។ ពេលនោះកូនបានអើតមើលមុខប៉ា ហើយនិយាយថា៖ “អាហ្នឹងវាខូច តែយើងអាចជួសជុលបានវិញប៉ា ប៉ាចាំបាច់ខឹងធ្វើអី ប៉ានិយាយធម្មតាក៏បាន”។ តាំងពីពេលនោះមក អ្នកស្រី និងស្វាមីកាន់តែប្រយ័ត្ន ហើយយល់ថា ក្មេងងាយនឹងចាប់បានពីមនុស្សចាស់ណាស់។ ពេលមានបញ្ហាត្រូវដោះស្រាយអ្វីពេលមកដល់ផ្ទះ ប្ដីប្រពន្ធអ្នកស្រីតែងនិយាយថា ម៉ោងរបស់គ្រួសារ គឺតែងព្យាយាមសម្របសម្រួល លេងជាមួយកូន ចំណាយពេលជាមួយកូនៗ។

អ្នកស្រី ប៊ុន ចាន់និមល បញ្ជាក់ថា៖ “ខ្ញុំជម្រាបអ៊ីចឹង នេះវិធីសាស្ត្រផ្ទាល់ខ្លួនខ្ញុំ រាល់ពេលដែលខ្ញុំមានអារម្មណ៍ថា យើងអាចនឹងមានកម្ដៅ ភ្នំភ្លើង ពាក្យសម្ដីអីជាដើម ខ្ញុំចាប់ផ្ដើមបន្ថយ ប្ដូរប្រធានបទ ឈប់និយាយរឿងហ្នឹង។ បើយើងនិយាយទៅវាវាប៉ះគ្នា អ៊ីចឹងយើងប្ដូរជាបបួលគ្នាទៅដើរហាត់ប្រាណ ឬយើងទៅធ្វើអី ឬយើងផ្ញើសារប្រាប់គ្នា ប្រាប់ថា កុំបន្តនិយាយរឿងហ្នឹង តែមួយម៉ោងក្រោយ យើងភ្លេចហើយ។ ម្នាក់ៗចាប់ផ្ដើមរកនឹក តើគួររកវិធីនិយាយអីឱ្យល្អជាងមុន”។

ពិតណាស់ សូម្បី អណ្ដាត និងធ្មេញ របស់យើង ក្នុងមាត់យើងខ្លួនឯង ក៏មានប៉ះទង្គិចគ្នា ចុះទម្រាំមនុស្សផ្សេងគ្នា ចេញពីប្រភព ឬគ្រួសារផ្សេងគ្នា រស់នៅក្នុងមជ្ឈដ្ឋាន ទទួលការអប់រំផ្សេងគ្នា ច្បាស់ជា មានការទាស់ចិត្តគ្នាពុំខាន។ សំខាន់ យើងមានគោលដៅ ឆន្ទះរួម គឺមិនឈ្លោះទាស់ទែង ឬបែកបាក់គ្នា ដើម្បីរក្សាការចាប់ផ្ដើមចាប់ដៃគ្នាដំបូង ពិសេសដើម្បីកូន៕

អត្ថបទ៖ ច័ន្ទ វីរៈ

The post ធ្វើដូចម្ដេចអាចរស់នៅជុំគ្នា បើប្ដីប្រពន្ធនិយាយគ្នាត្រឹម ៥ នាទី ដឹងតែខ្វែងគំនិតគ្នា? appeared first on Kampuchea Thmey Daily.

អ្នកស្រី ប៊ុន ចាន់និមល នាយិកាប្រតិបត្តិ ផលិតកម្ម សាស្ត្រាហ្វៀម មានប្រសាសន៍ ប្រាប់ “កម្ពុជាថ្មី” ថាមនស្សយើងគ្រប់គ្នាគប្បីព្យាយាមបណ្ដុះទម្លាប់រស់នៅខ្លួនឯង ហើយដំបូងបំផុតគួរគិតថា តើពាក្យសម្ដីដែលយើងនិយាយទៅ កំពុងតែបំផ្លាញអ្នកណាម្នាក់ ឬកំពុងតែសាបព្រោះសេចក្ដីសុខ សុភមង្គល។ ឯកាយវិការរបស់យើងដែលយើងបង្ហាញចេញទៅ តើកំពុងសាបព្រោះក្ដីស្រលាញ់ ឬបង្កអារម្មណ៍សោកសៅដល់មនុស្សជុំវិញខ្លួនយើង។

អ្នកស្រី ប៊ុន ចាន់និមល បញ្ជាក់បន្ថែមថា៖ “ចំណុចនេះ សំខាន់ខ្លាំងណាស់! បើយើងដឹងថា បើយើងបញ្ចេញអំពើ ឬកាយវិការហ្នឹងទៅ នោះកូនយើង មនុស្សក្នុងផ្ទះយើងប្រាកដជាមានទឹកភ្នែក ឬប្រាកដជាអត់មានសេចក្ដីសុខ។ ប្រសិនយើងពិចារណាឃើញលទ្ធផល ឬរូបភាពបែបហ្នឹងហើយ យើងទប់ស្កាត់ យើងកុំបញ្ចេញ”។

នាយិកាប្រតិបត្តិ ផលិតកម្ម សាស្ត្រាហ្វៀម ខាងលើមានប្រសាសន៍បន្តថា ១ នាទីនៃការបញ្ចេញកាយវិការ ១ ម៉ាត់ នៃពាក្យសម្ដី គួរម្ចាស់សម្ដី ឬម្ចាស់កាយវិការ សាងនូវសេចក្ដីស្រលាញ់ ព្រោះមានតែសេចក្ដីស្រលាញ់ទេ ទើបអាចបង្កើតនូវអ្វីបានទាំងអស់។

អ្នកស្រី ប៊ុន ចាន់និមល លើកឡើងថា៖ “នាងខ្ញុំជឿថា បើយើងសាបព្រោះសេចក្ដីស្រលាញ់ ហើយព្យាយាមបណ្ដុះទម្លាប់បង្កើតសេចក្ដីស្រលាញ់ ទោះបីយ៉ាងជួបបញ្ហា ជួបឧបសគ្គក្នុងការបង្កើតទំនាក់ទំនងជាមួយមនុស្សជុំវិញខ្លួន ឬនៅក្នុងគ្រួសារយ៉ាងណាក៏ដោយ នៅតែមានច្រកចេញ ព្រោះក្ដីស្រលាញ់គឺជាកូនសោរនៃការចាក់ដោះស្រាយបញ្ហាបានគ្រប់យ៉ាង”។

សូមចុចទស្សនាវីដេអូ! សូមប្រយ័ត្ន ១នាទីនៃការបញ្ចេញកាយវិការ ១ម៉ាត់នៃពាក្យសម្ដី

អត្ថបទ៖ ច័ន្ទ វីរៈ

The post អ្នកស្រី ប៊ុន ចាន់និមល៖ សូមប្រយ័ត្ន ១ នាទី នៃការបញ្ចេញកាយវិការ ១ ម៉ាត់ នៃពាក្យសម្ដី appeared first on Kampuchea Thmey Daily.

អ្នកស្រី ប៊ុន ចាន់និមល បានបញ្ជាក់ថា ជាផ្លូវការ ភាពយន្តរឿង ម៉ែក្រឡាភ្លើង បានកំណត់ថ្ងៃចាក់ផ្សាយក្នុងពេលឆាប់ៗខាងមុខគឺ ម៉ាឡេស៊ី និងឥណ្ឌូនេស៊ី។ ជាមួយគ្នានេះ ក៏មានប្រទេសក្នុងតំបន់អាស៊ាន អាស៊ី អឺរ៉ុប ក៏បានទាក់ទងមក សាស្ត្រា ហ្វៀម ក្នុងការទិញសិទ្ធិយកទៅបញ្ចាំងដែរ ប៉ុន្តែល្គឹកណា មិនទាន់ឯកភាព និងមិនទាន់ចុះកិច្ចសន្យាទេនោះ លោកស្រី សូមមិនទាន់បង្ហាញឈ្មោះប្រទេសទាំងនោះទេ។

អ្នកស្រី ប៊ុន ចាន់និមល បានបង្ហើបថា មានភ្នាក់ងារចែកចាយភាពយន្តនៅប្រទេសខ្លះ ខណៈប្រជាពលរដ្ឋរបស់ពួកគេ ជាអ្នកគាំទ្រភាពយន្តប្រទេសជិតខាងកម្ពុជាស្រាប់ ហើយគេស្នើយក ភាពយន្ត ម៉ែក្រឡាភ្លើង ដែលបានបញ្ចូលសំឡេងបរទេសនោះ ទៅបញ្ចាំងដោយដាក់ឃ្លាបកប្រែភាសានៅពីក្រោម។ ប៉ុន្តែលោកស្រី មិនយល់ព្រម គឺសូមឱ្យយកភាពយន្ត ម៉ែក្រឡាភ្លើង សំឡេងដើមរបស់ខ្មែរ។ ភ្នាក់ងារនោះ ក៏យល់ស្របតាម អ្នកស្រី ដើម្បីមានសិទ្ធិយកភាពយន្តខ្មែរនេះ ទៅបញ្ចាំងនៅប្រទេសខ្លួន។

អ្នកស្រី ប៊ុន ចាន់និមល បានឱ្យដឹងថា ទន្ទឹមពេលភាពយន្តខ្នាតធំខ្មែរ រឿង ម៉ែក្រឡាភ្លើង ត្រូវបានប្រទេស ឥណ្ឌូណេស៊ី បានទិញសិទ្ធិចាក់បញ្ចាំងរឿង ក៏ដូចជាទិញសិទ្ធិក្នុងការផលិតខ្សែភាពយន្តនេះឡើងវិញជាទម្រង់របស់ប្រទេសឥណ្ឌូណេស៊ី នោះ ភាពយន្តនេះ ក៏កំពុងត្រៀមផលិត វគ្គ២ ដែលកាន់តែមានអត្ថន័យ មនោសញ្ចេញតនាស៊ីជម្រៅ ព្រមទាំងបង្ហាញវប្បធម៌ប្រពៃណីខ្មែរកាន់តែច្រើនថែមទៀត។

អ្នកស្រី ប៊ុន ចាន់និមល បានលើកឡើងបន្ថែមថា សាស្ត្រា ហ្វៀម ប្ដេជ្ញា និងកំពុងអភិវឌ្ឍខ្លួនបន្ថែម ខណៈគុណភាពរូបភាព សាច់រឿង នៃភាពយន្ត ត្រូវបានចាត់ចូលជាស្តង់ដា ដើម្បីអាចយកចាក់បញ្ចាំងនៅបរទេសបាន។ សាស្ត្រា ហ្វៀម នឹងមានភាពយន្តផ្សេងទៀតដែលត្រៀមចាក់បញ្ចាំងនៅក្នុងប្រទេស និងអន្តរជាតិ ខណៈ សាស្ត្រា ហ្វៀម កំពុងមានទំនាក់ទំនងល្អជាមួយដៃគូចែកចាយភាពយន្តអន្តរជាតិ។

អ្នកស្រី ប៊ុន ចាន់និមល លើកឡើងថា ការរួបរួមគ្នា ទាំងការប្រឹងប្រែងផលិត និងការគាំទ្រលើកទឹកចិត្តពីប្រជាជនក្នុងប្រទេស ទើបធ្វើឱ្យយើងឈានទៅទីផ្សាពិភពលោកបាន។ ភាពយន្តមួយមានតម្លៃពិតប្រាកដ ត្រូវមានការគាំទ្រស្រលាញ់ ពីប្រជាជនក្នុងប្រទេសជាមុន ទើបក្តីស្រលាញ់នេះជ្រួតជ្រាបទៅកាន់អន្តរជាតិបាន។ សូមអរគុណបងប្អូនជនរួមជាតិ ដែលស្រលាញ់ លើកទឹកចិត្តសាស្រ្តាហ្វៀម គ្រប់កាលៈទេសៈ។

គួរបញ្ជាក់ថា សាស្ត្រាហ្វីម ជាក្រុមហ៊ុនផលិតភាពយន្ត បង្កើតដោយកូនខ្មែរ ដែលមានផលិតភាពយន្តភាគ ភាពយន្តអប់រំ ភាពយន្តខ្សែជីវិត ភាពយន្តគំនូរជីវចល ដាក់ទូរទស្សន៍ និង App ផ្ទាល់ខ្លួន។ សាស្ត្រាហ្វីម កំពុងទទួលបានការគាំទ្រពីមហាជន ដោយសារការផលិតភាពយន្តប្លែកៗ មានខ្លឹមសារអប់រំសង្គម និងមានគុណភាពអាចទទួលយកបាន៕

The post ភាពយន្តខ្នាតធំខ្មែរ រឿង ម៉ែក្រឡាភ្លើង គ្រោងចាក់បញ្ចាំងលើសពី ៥ ប្រទេសបន្ថែមទៀត appeared first on Kampuchea Thmey Daily.

អ្នកស្រី ប៊ុន ចាន់និមល អ្នក​និពន្ធ​ និង​ជា​នាយិកា ផលិតកម្ម សាស្ត្រាហ្វីម​ (Sastra Film) មានប្រសាសន៍បន្ថែមប្រាប់ “កម្ពុជាថ្មី” នៅថ្ងៃនេះថា ឥឡូវជាផ្លូវការ សាស្ត្រាហ្វីម បានលក់ភាពយន្តរឿង “ហាមបិទភ្នែក” ទៅកាន់ប្រទេសចំនួន ៣ហើយ ដែលគេនឹងចាក់បញ្ចាំងឆាប់ៗនៅតាមរោងកុនប្រទេសទាំងនោះ។ ប៉ុន្តែអ្នកស្រីមិនទាន់អាចបញ្ចេញឈ្មោះប្រទេសចំនួន ៣នោះបានទេ ដោយសារត្រូវរង់ចាំការប្រកាសថ្ងៃចាក់បញ្ចាំងជាផ្លូវការសិន។

អ្នកស្រី ប៊ុន ចាន់និមល មានប្រសាសន៍បន្តថា៖ “ដោយសាររឿងនេះ កំពុងលក់បន្តបន្ទាប់ទៅប្រទេសផ្សេងៗទៀត ដោយសារឥឡូវគេចុះកុងត្រាលក់បាន ៣ប្រទេសហើយ ហើយយើងកំពុងរុញបញ្ចេញទៅប្រទេសផ្សេងៗទៀត។ អ៊ីចឹង បន្ទាប់ពីយើងលក់បានប៉ុន្មានប្រទេសហ្នឹងសរុប តាមរោងកុននីមួយៗ គេនឹងចេញថ្ងៃចាក់បញ្ចាំងឱ្យយើង”។

អ្នកស្រី ប៊ុន ចាន់និមល បានឱ្យដឹងថា ភ្នាក់ងារទិញលក់ភាពយន្តអន្តរជាតិ អត់ដែលលក់ភាពយន្តខ្មែរកន្លងមកទេ តែគេចាប់អារម្មណ៍ភាពយន្តរឿង “ហាមបិទភ្នែក” រួចគេទាក់ទង សាស្ត្រាហ្វីម យកភាពយន្តនេះ ទៅលក់នៅទីផ្សារហុងកុងដំបូងគេ កាលពីសប្ដាហ៍កន្លងទៅ។ លោកស្រីបានឱ្យដឹងបន្ថែមថា ព្រោះកាលពីសប្ដាហ៍កន្លងទៅ ថ្ងៃទី១២ ដល់ ១៦ ខែមីនា ឆ្នាំ២០២៣ នៅហុងកុងមានធ្វើពិព័រណ៍ភាពយន្ត ដែលគេដាក់លក់ភាពយន្តមកពីបណ្ដាប្រទេសផ្សេងៗ ក្នុងនោះមានរឿង “ហាមបិទភ្នែក” ត្រូវបានគេជ្រើសរើសដាក់ក្នុងទីផ្សារធំនោះ”។

ចំពោះការជ្រើសរើសភាពយន្តរបស់ សាស្ត្រាហ្វីម ចូលទីផ្សារភាពយន្តអន្តរជាតិ អ្នកស្រី ប៊ុន ចាន់និមល លើកឡើងថា នេះជាដំណាក់កាលនៅក្នុងផែនការរបស់ សាស្ត្រាហ្វីម ព្រោះតាំងពីដើមមក សាស្ត្រាហ្វីម មានគោលការណ៍មួយគឺ ភាពយន្តខ្មែរឆ្ពោះទៅកាន់ពិភពលោក ដោយតែងរកវិធីនានាដើម្បីនាំភាពយន្តខ្មែរទៅដល់ទីផ្សារអន្តរជាតិ។

អ្នកស្រី ប៊ុន ចាន់និមល មានប្រសាសន៍បន្តថា៖ “យើងមានវិធីផ្សេងៗ ក្នុងហ្នឹង App របស់យើង ក៏មានទស្សនិកជនបរទេសចូលមើលច្រើនផងដែរ។ ដោយឡែកការចាក់បញ្ចាំងរឿង “ហាមបិទភ្នែក” ចូលទីផ្សារអន្តរជាតិហ្នឹង ជារូបភាពមួយបែបទៀត គឺជាភាពយន្តបញ្ចាំងតាមរោងកុនវិញម្ដង។ អ៊ីចឹងខ្ញុំគិតថា នេះជាសញ្ញាដ៏ល្អមួយ ជាការបើកទំព័រទីផ្សារភាពយន្តខ្មែរលើទីផ្សារភាពយន្តអន្តរជាតិ ព្រោះកន្លងមកស្ទើរតែមិនមានរឿងខ្មែរលើទីផ្សារអន្តរជាតិ អ៊ីចឹងគេអត់ស្គាល់ខ្មែរ ភាពយន្តខ្មែរទេ។ យើងចាប់ផ្ដើមពីចំណុចហ្នឹងទៅ ជាបន្តបន្ទាប់ទៀតយើងនឹងមានរឿងខ្មែរផ្សេងៗទៀត ដើម្បីឱ្យគេស្គាល់ខ្មែរ ដូចគេស្គាល់ភាពយន្តកូរ៉េអីជាដើម”។

ចំពោះការផលិតភាពយន្តបញ្ចាំងរោងលើកក្រោយៗ អ្នកស្រី ប៊ុន ចាន់និមល បានឱ្យដឹងថា សាស្ត្រាហ្វីម មានផែនការផលិតដោយពង្រឹងគុណភាពឱ្យកាន់តែល្អឡើង ព្រមទាំងសិក្សាពីតម្រូវការទីផ្សារ ជ្រើសរើសប្រភេទភាពយន្តដែលអាចនាំចេញទៅក្រៅប្រទេសបាន ដោយផ្ដោតទីផ្សារក្នុង និងក្រៅប្រទេសកាន់តែច្រើន។

គួរបញ្ជាក់ថា សាស្ត្រាហ្វីម ជាក្រុមហ៊ុនផលិតភាពយន្ត បង្កើតដោយកូនខ្មែរ ដែលមានផលិតភាពយន្តភាគ ភាពយន្តអប់រំ ភាពយន្តខ្សែជីវិត ដាក់ទូរទស្សន៍ និង App ផ្ទាល់ខ្លួន។ សាស្ត្រាហ្វីម កំពុងទទួលបានការគាំទ្រពីមហាជន ដោយសារការផលិតភាពយន្តប្លែកៗ មានខ្លឹមសារអប់រំសង្គម និងមានគុណភាពអាចទទួលយកបាន៕

អត្ថបទ៖ ច័ន្ទ ​វីរៈ

The post ភាពយន្ត​ខ្មែរ​​ចេញ​ទៅ​ទីផ្សារ​អន្តរជាតិ ខណៈ ៣ប្រទេសបានទិញ ប្រទេសផ្សេងកំពុងចរចា appeared first on Kampuchea Thmey Daily.

លោក ឡុង ប៉ុណ្ណាស៊ីរីវត្ថ  រដ្ឋលេខាធិការ  និងជាអ្នកនាំពាក្យ ក្រសួងវប្បធម៌  និងវិចិត្រសិល្បៈ មានប្រសាសន៍ ប្រាប់ “កម្ពុជាថ្មី” នៅថ្ងៃនេះថា ក្រុមប្រឹក្សាពិន័យ និងលើកសរសើរ របស់ក្រសួងវប្បធម៌ និងវិចិត្រសិល្បៈ និងអន្តរក្រសួង បានរៀបចំកោះហៅ ខាងផលិតកម្ម សាស្ត្រាហ្វីម ដើម្បីបកស្រាយទាក់ទងនឹងការផលិត ភាពយន្តដាក់បញ្ចាំងលើ App របស់ផលិតកម្ម ដែលមានចំណងជើងថា “ស្នេហា ល្ងង់ + ល្ងង់”។ ចំពោះលទ្ធផលយ៉ាងណា លោកមិនទាន់អាចផ្ដល់បានទេ ដោយសាររបាយការណ៍មិនទាន់បានបញ្ជូនដល់លោក។

ជាមួយគ្នានេះ លោក ជា ច័ន្ទបរិបូរណ៍ ​រដ្ឋ​លេខាធិ​ការ​ក្រសួង​ព័ត៌មាន បានលើកឡើង លើបណ្ដាញសង្គមហ្វេសប៊ុករបស់លោក នៅថ្ងៃនេះថា៖ “វិស្វករសំណង់គណនាខុស និងរំលំអាគារតែមួយ ហើយគ្រោះថ្នាក់ត្រឹមតែទំហំនៃអាគារនោះតែប៉ុណ្ណោះ ក៏ប៉ុន្តែវិស្វករព្រលឹង ប្រសិនបើគណនាខុស គឺរលំការគិត គំនិត មនសិការ សិលធម៌សង្គមអស់មួយនគរ និងបន្តជាច្រើនជំនាន់”។

ទន្ទឹមនឹងមានមតិរិះគន់ពីមហាជន ក៏មានការគាំទ្រចំពោះការផលិតភាពយន្តខ្មែរបែប ១៨+ ដោយលើកឡើងថា ប្រទេសក្នុងតំបន់អាស៊ី និងប្រទេសជិតខាងកម្ពុជា មានថៃជាដើម ក៏មានការផលិតភាពយន្តបែបនេះ និងថតឃើញភាពស្រើបស្រាលជាងរឿង “ស្នេហា ល្ងង់ + ល្ងង់” នេះទៅទៀត។

“កម្ពុជាថ្មី” បានទាក់ទង ម្ចាស់ផលិតកម្ម សាស្ត្រាហ្វីម ដើម្បីសុំការបំភ្លឺបកស្រាយ ប៉ុន្តែមិនទាន់មានការឆ្លើយតប ដោយម្ចាស់ផលិតកម្ម លើកឡើងថា កំពុងនៅជាប់ប្រជុំមួយ។ បន្ទាប់ពីមានការឆ្លើយតបយ៉ាងណានោះ “កម្ពុជាថ្មី” នឹងផ្សាយបន្ត។

ចំណែកនៅលើ ទំព័រហ្វេសប៊ុក របស់ អ្នកស្រី ប៊ុន ចាន់និមល ​ជា​នាយិកា ផលិតកម្ម​ Sastra Film បានបង្ហោះសេចក្ដីបំភ្លឺថា ខ្សែភាពយន្តភាគ រឿង “ស្នេហា ល្ងង់ + ល្ងង់” ដែលបានចាក់ផ្សាយនៅលើកម្មវិធីទូរសព្ទ Sastra Film App មានការចែកចាយសាច់រឿងពេញ តាមបណ្ដាញសង្គមដោយគ្មានការអនុញ្ញាត និងមានការកាត់ប្លង់កែប្រែប្លង់ បញ្ចេញបញ្ចូលបន្ថែម ដែលធ្វើឱ្យអត្ថន័យនៃសាច់រឿង ខុសពីអ្វីនៃការផលិតឡើង។

ដើម្បីការពារដល់កិត្តិយសរបស់តួសម្ដែង និងការពារតម្លៃការផលិត ក្រុមហ៊ុន សាស្ត្រា ឯ.ក បានបកស្រាយដូចតទៅ៖

ទី១. ខ្សែភាពយន្ដភាគ “ស្នេហា ល្ងង់ + ល្ងង់” មានចាក់ផ្សាយតែក្នុង Sastra Film App តែ ១ប៉ុណ្ណោះ ហើយសរុបទាំងអស់ ៤ភាគគត់។

ទី២. ខ្សែភាពយន្ដភាគ “ស្នេហា ល្ងង់ + ល្ងង់” បានចាក់ផ្សាយតាំងពីខែវិច្ឆិកា ឆ្នាំ២០២១ បើគិតទៅគឺរយៈពេល ១ឆ្នាំជាង។

ទី៣. ខ្សែភាពយន្តភាគ “ស្នេហា ល្ងង់ + ល្ងង់” មិនមែនជារឿង អាសអាភាស ដែលផលិតឡើងក្នុងគោលបំណងពង្វក់សង្គម ឬជាន់ពន្លិចវប្បធម៌ និងសីលធម៌នោះទេ។ គ្រប់សាច់រឿងតែងតែបង្កប់នូវតម្លៃអប់រំ ប្រទាក់ក្រឡា ក៏ដូចជាការបកស្រាយចម្ងល់នូវចុងបញ្ចប់នៃសាច់រឿងដូចគ្នា។

ទី៤. កម្មវិធីទស្សនា Sastra Film App បានបែងចែកការវាយតម្លៃ (Rating) ទៅលើ ៣ប្រភេទផ្សេងៗគ្នា៖

– Rated-All ដែលអាចទស្សនាបានគ្រប់វ័យ

– Rated-13+ ដែលតម្រូវឲ្យមានអាយុ ១៣ឆ្នាំ ឡើងទៅ

–  Rated-18+ ដែលតម្រូវឲ្យមានអាយុ ១៨ឆ្នាំ ឡើងទៅ

ទី៥. ខ្សែភាពយន្តភាគ “ស្នេហា ល្ងង់ + ល្ងង់” បានកំណត់អាយុទស្សនាចាប់ពី ១៨ឆ្នាំឡើង (Rated-18+) ដែលជាទូទៅ នឹងមានសាច់រឿងដែលលើសពីប្រភេទសាច់រឿងប្រភេទ Rated-13+ និង Rated-All ដែលមិនអនុញ្ញាតជាដាច់ខាតឱ្យក្មេងៗទស្សនានោះទេ។

ទី៦. ខ្សែភាពយន្ដភាគ “ស្នេហា ល្ងង់ + ល្ងង់” បានផលិតឡើង ដោយទាញយកពីសាច់រឿងពិតមួយនៅក្នុងសង្គម ដែលអ្នកនិពន្ធ និងអ្នកដឹកនាំបានផលិតឱ្យក្លាយទៅជាសាច់រឿងពេញលេញ។ ការនិពន្ធ និងដឹកនាំនេះ ចេញពីស្នាដៃនៃអ្នកដឹកនាំរឿងដ៏ឆ្នើមម្នាក់ ប្រចាំក្រុមហ៊ុន ដែលគាត់បានផលិតជាង ១០០ ចំណងជើង ដែលរួមមានទាំង រឿង បដាចារ (រឿងភាគបុរាណ) រឿង កាំជណ្តើរទី៣ (រឿងក្នុងសម័យប៉ុលពត) រឿង ការចងចាំ ដែលបានថតដោយទូរសព្ទដៃ 100% ក៏ដូចជារឿងក្នុងសម័យបច្ចុប្បន្នជាច្រើនរឿងទៀត។ សង្ឃឹមថាបងប្អូន អាចបញ្ឈប់ការវាយតម្លៃដោយមិនទាន់បានស្វែងយល់ពីហេតុផល និងអត្ថន័យពីក្រោយសាច់រឿង។

គួរបញ្ជាក់ថា កន្លងមក ផលិតកម្មសាស្ត្រាហ្វីម​ បានផលិតភាពយន្តខ្មែរទាំងរឿងភាគ រឿងខ្លី ភាពយន្តបញ្ចាំងរោងកុន បែបតថភាពសង្គម និងបែបអប់រំ ព្រមទាំងរឿងជាតក បានជាង ៤០០រឿង និងទទួលការគាំទ្រពីមហាជនផងដែរ៕

The post ក្រុមប្រឹក្សាពិន័យ និងលើកសរសើរ កោះហៅ សាស្ត្រាហ្វីម បកស្រាយ រឿង “ស្នេហា ល្ងង់ + ល្ងង់” appeared first on Kampuchea Thmey Daily.

ពេលចូលរួមកម្មវីធី លោកស្រី ប៊ុន ចាន់និមល បានឃើញគ្រប់គ្នា បរិច្ចាគឈាមដោយទឹកមុខញញឹម ញ៉ាំងឱ្យលោកស្រីនឹកឃើញដល់មេរៀនជីវិតមួយចំនួន ដែលយើងអាចរៀនសូត្រពី “ឈាម”៖

១. ពណ៌ក្រហមនៃឈាម ជានិមិត្តរូបនៃក្ដីស្រឡាញ់៖ ឈាមជាសារធាតុតែមួយគត់ ដែលអាចធ្វើដំណើរឆ្លងកាត់បេះដូង ហើយហូរទៅកាន់គ្រប់កន្លែងនៃសារពាង្គកាយរបស់យើង។ ដូចនេះហើយ ទើបគេយកពណ៌ក្រហមនៃឈាមជាតំណាងនៃសេចក្ដីស្រឡាញ់។ សូម្បីតែវិចិត្រករ ដែលគូររូបបេះដូង ដើម្បីជានិមិត្តរូបនៃសេចក្ដីស្រឡាញ់ ក៏ប្រើក្រហមដូចឈាម មកផាត់ពណ៌លើវាដែរ។ លើសពីនេះ ពណ៌ក្រហមនៃឈាម ក៏ត្រូវគេប្រើនៅលើទង់ជាតិ នៃប្រទេសជាច្រើន ដើម្បីតំណាងឱ្យសេចក្តីស្រឡាញ់ និងភក្ដីភាពចំពោះជាតិមាតុភូមិ។ ដូចនេះសូមចាំថា ដរាបណាអ្នកមានឈាមនៅក្នុងខ្លួន អ្នកត្រូវតែមានក្ដីស្រឡាញ់នៅក្នុងខ្លួនដូចគ្នា។

២. ទឹកដោះម្ដាយ គឺជាឈាម៖ ពេលបំបៅដោះកូនមានន័យថា ម្ដាយកំពុងផ្ទេរឈាមពីក្នុងខ្លួនរបស់គាត់ឱ្យទៅកូន។ ក្ដីស្រឡាញ់ដ៏បរិសុទ្ធ ជាមួយនឹងដើមទ្រូងដ៏កក់ក្ដៅរបស់អ្នកម្ដាយ អាចកែប្រែឈាមក្រហមឆ្អាបទៅជាទឹកដោះ ដ៏ឈ្ងុយឆ្ងាញ់សម្រាប់ចិញ្ចឹមកូនគ្រប់រូប។ ដូចនេះ សូមចងចាំថា អ្នកបានធំធាត់ដូចពេលនេះ គឺដោយសារ តែតំណក់ឈាមរបស់ម្ដាយអ្នក។ សូមកុំភ្លេចគុណរបស់គាត់ ទោះក្នុងកាលៈទេសៈណាក៏ដោយ។

៣. ឈាមអាចផ្ទេរបាន៖ ក្នុងវិស័យសុខាភិបាល អ្នកអាចបរិច្ចាគឈាមទៅអ្នកដទៃ ហើយក៏អាចទទួលបានឈាមពីអ្នកដទៃដូចគ្នា។ ចំពោះក្ដីស្រឡាញ់ ក៏មិនខុសពីឈាមដែរ អ្នកអាចផ្ទេរទៅឱ្យអ្នកដទៃ ហើយក៏អាចទទួលពីអ្នកដទៃបានដូចគ្នា ពោលគឺ ក្ដីស្រឡាញ់ អាចចែករំលែកទៅវិញទៅមកបាន។

៤. ឈាមមានប្រភេទ និងលទ្ធភាពខុសៗគ្នា៖ ឈាមរបស់មនុស្សយើងមានប្រភេទខុសៗគ្នា ដូចជា៖ A, B, AB និង O ជាដើម។ ប្រភេទឈាមខ្លះ អាចជួយសង្គ្រោះគេបាន ដោយមិនរើសប្រភេទឡើយ។ ប្រភេទឈាមខ្លះទៀតមិនអាចជួយសង្គ្រោះគេបានទេ គឺអាចជួយសង្គ្រោះបានតែប្រភេទដូចខ្លួនប៉ុណ្ណោះ។ មនុស្សយើង ក៏មិនខុសពីប្រភេទឈាមទេ អ្នកខ្លះអាចជួយគេបានគ្រប់គ្នា តែមិនអាចឱ្យអ្នកដទៃមកជួយខ្លួនបាន។ អ្នកខ្លះទៀត មិនអាចជួយគេបាន តែអាចទទួលជំនួយពីអ្នកដទៃបាន។ ដូចគ្នានេះដែរ ការរស់នៅក្នុងសង្គម អ្នកត្រូវត្រៀមចិត្តថា អ្នកនឹងជួបមនុស្សជាច្រើនប្រភេទ ដូចប្រភេទនៃឈាមដែរ។ តែកុំបារម្ភអី បើមិនអ្នកណាអាចជួយអ្នកបាន អ្នកអាចជួយខ្លួនឯង បៀបដូចប្រភេទឈាម ដែលតែងតែអាចជួយសង្គ្រោះប្រភេទខ្លួនឯងជានិច្ច។ ផ្ដល់ឈាម ផ្ដល់ក្ដីសង្ឃឹម ផ្ដល់ជីវិតថ្មី។

គួរបញ្ជាក់ថា នៅឆ្នាំ ២០២២នេះ មជ្ឈមណ្ឌលជាតិផ្ដល់ឈាម មានតម្រូវការឈាមប្រមាណ ១១ ម៉ឺនប្លោក ដើម្បីជួយសង្គ្រោះជីវិតមនុស្ស ខណៈក្នុងឆ្នាំ ២០២១ កន្លងមក មជ្ឈមណ្ឌលជាតិផ្ដល់ឈាមទទួលបានឈាម ត្រឹមតែ ៩ ម៉ឺនប្លោកប៉ុណ្ណោះ។

លោកវេជ្ជបណ្ឌិត ខៃ សុខហេង អនុប្រធានការិយាល័យបច្ចេកទេសរបស់មជ្ឈមណ្ឌលជាតិផ្តល់ឈាម នៃក្រសួងសុខាភិបាល បានឱ្យដឹងថា បរិច្ចាគឈាម មិនត្រឹមតែជួយសង្គ្រោះជីវិតមនុស្សនោះទេ តែបានផ្ដល់អត្ថប្រយោជន៍ដល់សុខភាព គឺជួយកាត់បន្ថយនូវហានិភ័យជំងឺមហារីកនានា កាត់បន្ថយកំហាប់ឈាម និងការលើសជាតិដែក ដែលធ្វើឱ្យមានការប៉ះពាល់ដល់ថ្លើម និងលំពែង, ជួយធ្វើឱ្យប្រសើរឡើងនូវសុខភាពបេះដូង, បន្ថយការឡើងទម្ងន់, ជំងឺដាច់សរសៃឈាមក្នុងខួរក្បាល និងធ្វើឱ្យមានភាពសប្បាយរីករាយផងដែរ៕

អត្ថបទ៖ ច័ន្ទ វីរៈ

The post ផលិតករភាពយន្ត លោកស្រី ប៊ុន ចាន់ និមល បរិយាយ មេរៀនជីវិតពីការបរិច្ចាគឈាម appeared first on Kampuchea Thmey Daily.

ខណៈសាស្ត្រាហ្វីម នៅតែមានដំណើរការល្អតាមរយៈការផលិតភាពយន្តតាមស្ថានីយ៍ទូរទស្សន៍នានា ប៉ុន្តែរយៈពេលជាយូរមកហើយ ជាង ២ ឆ្នាំមកនេះ សាស្ត្រាហ្វីម មិនមានភាពយន្តបញ្ចាំងរោង ថ្មីបន្តទៀត។ នៅដើមខែថ្មី ខែកញ្ញានេះ សាស្ត្រាហ្វីម បានទម្លាយផែនការថ្មី របស់ខ្លួន តាមរយៈ “កម្ពុជាថ្មី”។

អ្នកស្រី ប៊ុន ចាន់និមល អ្នក​និពន្ធ​ និង​ជា​នាយិកា ផលិតកម្ម​ Sastra Film​ មានប្រសាសន៍ប្រាប់ “កម្ពុជាថ្មី” ថា ការណ៍ដែល សាស្ត្រាហ្វីម មិនដាក់ភាពយន្តបញ្ចាំងរោងជាបន្តនោះ ដោយសារក្រុមហ៊ុនមានយុទ្ធសាស្ត្រក្នុងការធ្វើទីផ្សារភាពយន្តរបស់ខ្លួន។

លោកស្រី ប៊ុន ចាន់និមល មានប្រសាសន៍បន្តថា៖ “យើងមើលឃើញថា តើយើងគួរចាប់ទីផ្សារណាទៅមុន។ ផលិតកម្មនៅក្នុងស្រុក ពេលបើកផលិតកម្ម គាត់ចាប់ទីផ្សារ រឿងដាក់រោងភាពយន្ត ដោយឡែក សាស្ត្រាហ្វីម មានយុទ្ធសាស្ត្ររបស់ខ្លួន។ ចាប់ផ្ដើមដំបូង មិនមែនរឿងដាក់រោងកុនទេ គឺយើងចាប់ផ្ដើមជាមួយទូរទស្សន៍ បណ្ដាញសង្គម និងទម្រង់ផ្សេងៗ យើងមានជំហានដើររបស់យើង”។

CEO ផលិតកម្ម Sastra Film រូបនេះ លើកឡើងថា តាមរយៈការដាក់ភាពយន្តខ្នាតធំមួយរឿង គឺរឿង “ពោះធំ” ដាក់បញ្ចាំងតាមរោងភាពយន្តកន្លងមកនោះ គឺជាការពិសោធន៍ ការស្ទាបស្ទង់ និងការមើលទីផ្សារ។

លោកស្រី ប៊ុន ចាន់និមល មានប្រសាសន៍បន្តថា៖ “ឥឡូវនេះ យើងកំពុងរៀបចំផែនការ ចាប់ពីខែ៩ នេះទៅ សាស្ត្រានឹងមានរឿងរបស់ខ្លួនចេញរៀងរាល់១ខែម្ដង នៅតាម រោងភាពយន្ត។ ដល់ពេលដែលយើងអាចបង្កើតទីផ្សារថ្មីបន្ថែមទៀត លើទីផ្សារដែលយើងមានស្រាប់នៅពេលបច្ចុប្បន្ន”។

លោកស្រី ប៊ុន ចាន់និមល បានឱ្យ “កម្ពុជាថ្មី” ដឹងបន្ថែមថា ភាពយន្តបញ្ចាំងរោងបន្ទាប់ដែលសាស្ត្រាត្រៀមនោះ មានចំណងជើង រឿង “ថ្ងៃនេះ ថ្ងៃស្អែក នៅតែស្រឡាញ់” ឬ “Today Tomorrow I love you” ជាភាពយន្តផលិតថ្មីមិនដែលផ្សាយ។

គួរបញ្ជាក់ថា សាស្ត្រាហ្វីម ជាក្រុមហ៊ុនផលិតភាពយន្ត បង្កើតដោយកូនខ្មែរ ដែលមានផលិតភាពយន្តភាគ ភាពយន្តអប់រំ ភាពយន្តខ្សែជីវិត ដាក់ទូរទស្សន៍ និង App ផ្ទាល់ខ្លួន។ សាស្ត្រាហ្វីម កំពុងទទួលបានការគាំទ្រពីមហាជន ដោយសារការផលិតភាពយន្តប្លែកៗ និងមានគុណភាពអាចទទួលយកបាន៕

អត្ថបទ៖ ច័ន្ទ ​វីរៈ

The post ដើមខែថ្មី អ្នកស្រី ប៊ុន ចាន់និមល ទម្លាយផែនការពិសេសថ្មី របស់ Sastra Film appeared first on Kampuchea Thmey Daily.

ទន្ទឹមពេលវិស័យភាពយន្តកម្ពុជាមិនទាន់រីកចម្រើន ឬមិនអាចចំណាយប្រហែលពាក់កណ្ដាលនៃភាពយន្តប្រទេសជិតខាង តើភាពយន្តខ្មែរគួរមានចំណុចទាក់ទាញអ្វីដើម្បីប្រជែងលើសមរភូមិផ្ទាំងសំពត់សនេះ?

ស្ថាបនិក គេហទំព័រ ឧស្សាហកម្មភាពយន្តខ្មែរ និងជាកវីនិពន្ធឆ្នើមដែលធ្លាប់មានស្នាដៃសរសេរប្រលោមលោក ភាពយន្តភាគ ភាពយន្តអប់រំខ្លី ទទួលជ័យលាភីជាច្រើននោះ លោក យូ សុភា បានឱ្យ “កម្ពុជាថ្មី” ដឹងថា ដើម្បីប្រឡងប្រជែងជាមួយភាពយន្តបរទេស ជាពិសេសគឺប្រទេសថៃ ផលិតករខ្មែរយើងគួរតែផលិតរឿងមានលក្ខណៈបែបវប្បធម៌ ឆ្លុះបញ្ចាំងពីអ្វីដែលយើងមានប្រៀបលើជាតិគេ ហើយគេធ្វើមិនបាន ហើយពុំមានដូចជាយើង ដូចជាប្រាសាទអង្គរវត្ត ប្រាសាទព្រះវិហារ បឹងទន្លេសាប ជាពិសេសទឹកចិត្តដ៏ទូលាយរបស់ជនជាតិខ្មែរយើងដែលមិនរើសអើងចំពោះអ្នកជំងឺកូវីដ​ដែលធ្វើដំណើរតាមកប៉ាល់នោះជាដើម។

លោក យូ សុភា មានប្រសាសន៍ថា៖ “ភាពយន្តមួយល្អត្រូវពឹងផ្អែកលើ៖ អត្ថបទរឿង ការដឹកនាំរឿង តួអង្គ ការចាប់ប្លង់ថត ការតុបតែងមុខ សម្លៀកបំពាក់ ការប្រើប្រាស់សំឡេងរបស់តួអង្គទៅតាមសាច់រឿង ការកាត់ត ការបញ្ចូលភ្លេងប្រកប បទចម្រៀងស្របតាមដំណើររឿង។ល។ ចំណែកអត្ថបទរឿងដុំមួយដែលល្អត្រូវមានឈុត៖ កម្សត់ កំប្លែង រន្ធត់ញាប់ញ័រ ការអប់រំ។ ការចំណាយទុនក៏ជាកត្តាសំខាន់មួយដែលអាចញ៉ាំងឱ្យភាពយន្តមានគុណភាពកាន់តែល្អដែរ ជាពិសេសត្រូវតែមានធាតុថ្មី ប្លែកភ្នែកមិនធ្លាប់មាន បង្កប់ក្នុងរឿងដើម្បីទាក់ទាញទស្សនិកជន”។

សាស្តាចារ្យអក្សរសាស្ត្រខ្មែរ នៅសាកលវិទ្យាល័យ ភូមិន្ទភ្នំពេញ រូបនេះយល់ឃើញថា ភាពយន្តខ្នាតធំកម្ពុជាបច្ចុប្បន្ន ពុំសូវមានដំណើរការល្អទេ ព្រោះផលិតករពុំហ៊ានចំណាយទុនទៅលើវិស័យនេះ ដោយខ្លាចពុំទទួលបានផលចំណេញមកវិញសមតាមបំណង ជាពិសេសការមើលឃើញពីចំនួនអ្នកនិយមទស្សនាភាពយន្តតាមរោងមានចំនួនតិចតួច ក៏ជាឧបសគ្គដែលនាំឱ្យរាំងស្ទះដល់ឆន្ទៈរបស់ផលិតករ។ លើសពីនេះទៀត ការបែងចែកផលកម្រៃទៅឱ្យខាងរោងភាពយន្តក៏ជាបញ្ហាមួយដែលនាំឱ្យមានការកាន់តែថយចុះនៃផលចំណេញពីវិស័យនេះផងដែរ។

សព្វថ្ងៃយើងឃើញថា ទស្សនិកជន ជា​ពិសេស​យុវជន​ខ្មែរ កាន់​តែ​ចាប់​អារម្មណ៍​ទស្សនា​ភាពយន្តកម្ពុជា​ជា​បន្ត​បន្ទាប់ ទន្ទឹម​នឹង​កិច្ច​ខិត​ខំ​ប្រឹង​ប្រែង​របស់​ផលិតករ​ខ្មែរ​ បង្កើនគុណភាពភាពយន្តរបស់ខ្លួន។

ចំណែក CEO ផលិតកម្ម Sastra Film អ្នកស្រី ប៊ុន ចាន់និមល មានប្រសាសន៍ប្រាប់ “កម្ពុជាថ្មី” ថា បច្ចុប្បន្ន លោកស្រីសង្កេតឃើញភាពយន្តភាគខ្មែរមានសំទុះគាំទ្រពីប្រជាជនច្រើន បើប្រៀបធៀបជាង ៥ ឆ្នាំមុន។ ប៉ុន្តែចំពោះភាពយន្តបញ្ចាំងរោង បរិមាណនៅមានចំនួនតិច ហើយគុណភាពមានការឡើងចុះ មិនទាន់ឋេរ ពោលមានរឿងខ្លះល្អ មានរឿងខ្លះគុណភាពនៅទាប។

លោកស្រី ប៊ុន ចាន់និមល មានប្រសាសន៍ថា៖ “ភាពយន្តល្អ អាស្រ័យលើគុណភាពផលិត។ គុណភាពនៃការផលិតនេះ យើងមិនអាស្រ័យថាទាល់តែរឿងនោះចំណាយលុយច្រើនទេ គុណភាពគឺសំដៅភាពសមរម្យដែលអាចទទួលយកបាន ដូចជាគុណភាពរូបភាពដែលមានកម្រិតត្រជាក់ភ្នែក ការថតត្រូវក្បួនខ្នាតកុន Script (អត្ថបទភាពយន្ត) ដំណើររបស់រឿងមានភាពទាក់ទាញ តួសម្ដែងលេងមិនឆ្គង ការផលិតយកចិត្តទុកដាក់ខ្ពស់។ ជារួម ខ្ញុំចង់និយាយថា ធ្វើការដោយយកចិត្តទុកដាក់គ្រប់ជ្រុងជ្រោយនៃភាពយន្ត វាអត់ទាក់ទងនឹងលុយទេ គឺវាទាក់ទងនឹងការយកចិត្តទុកដាក់ខ្ពស់ពីមនុស្សគ្រប់ផ្នែក”។

អ្នក​និពន្ធ​ និង​ជា​ម្ចាស់​ក្រុមហ៊ុន​ Sastra Film​ រូបនេះ លើកឡើងថា ភាពយន្តខ្មែរមិនចាំបាច់ប្រជែងជាមួយភាពយន្តគេទេ ព្រោះបើយើងប្រជែងជាមួយគេ គឺពិបាក ប៉ុន្តែយើងគួរបង្កើតអ្វីជារបស់ខ្លួនឯង ហើយមានលក្ខណៈពិសេស។

លោកស្រី ប៊ុន ចាន់និមល បញ្ជាក់បន្ថែមថា៖ “យើងគួរគិតថា តើយើងអាចធ្វើអ្វីបាន? យើងមើលលើសមត្ថភាពយើង ហើយខ្ញុំគិតថា រឿងរបស់យើងមានអ្វីច្រើនដែលយើងអាចបញ្ចេញបាន ហើយមែនទែន មិនបាច់ចាំទាល់តែដូចគេទេ។ ខ្ញុំឧទាហរណ៍អ៊ីចេះ បើធ្វើឱ្យដូចគេ ទស្សនិកជនខ្មែរទៅមើលរឿងថៃហើយ អ៊ីចឹងយើងត្រូវធ្វើអ្វីដែលជារបស់ខ្មែរ ហើយយើងធ្វើឱ្យមានគុណភាពចេញពីការយកចិត្តទុកដាក់”។

ថ្វីដ្បិត​ការ​ផលិត​ភាពយន្ត​កម្ពុជា​មាន​ការ​កើន​ឡើង ប៉ុន្តែគេ​សង្កេត​ឃើញ​ថា និន្នាការ​នៃ​ការ​ផលិត​កុន​របស់​ផលិតករ​ខ្មែរ ហាក់​ដូច​ជា​មិន​មាន​ភាព​សម្បូរ​បែប​នៅ​ឡើយ​។ ភាពយន្ត​ខ្មែរ​ដែល​ត្រូវ​បាន​ផលិត ​និង​ដាក់​បញ្ចាំង​នៅ​តាម​រោង​កុន ភាគ​ច្រើន​គឺ​ជា​រឿង​ខ្មោច និង​រឿង​កំប្លែង។

សមាគមផលិតករភាពយន្តខ្មែរ បង្កើតឡើងដោយមានគោលបំណង កែប្រែវិស័យភាពយន្ដកម្ពុជាឱ្យក្លាយទៅជាឧស្សាហកម្មភាពយន្ដ។ នៅក្នុងឱកាសប្រកាសបើកសមាគម លោក លៀក លីដា ប្រធានសមាគម បានថ្លែងថា ដើម្បីអាចកែប្រែវិស័យភាពយន្តកម្ពុជាបាន គឺត្រូវស្វែងរកទុនទៅដាក់ជាមួយផលិតករពិតប្រាកដ ឬអ្នកមានជំនាញផលិតភាពយន្ដច្បាស់លាស់។ លោកលើកឡើងថា ម្ចាស់ទុនដែលមានធនធានខ្លាំង គួរផ្ដល់ឱកាសសម្រាប់ផលិតករភាពយន្ដខ្មែរឱ្យបានច្រើន។

លោក លៀក លីដា មានប្រសាសន៍ថា៖ “ដូចជាផលិតកម្មខ្ញុំ ចេញក្នុង ១ ឆ្នាំ ៣ ទៅ ៤ រឿង ហើយផលិតកម្មផ្សេងគេប្រហែលជាគិតថា អូហ៍! ម្ចាស់ផលិតកម្មដឹកទាំងអស់ហើយ។ តែអត់ទេ ក្រោយពីយើងសន្សំបាន យើងមានធនធាន យើងជឿជាក់លើផលិតករដទៃទៀត ហើយផ្ដល់់ឱកាសឱ្យគាត់ដឹកបានច្រើន”។

ផលិតករ និងជាចាងហ្វាងផលិតកម្ម LD Picture និងជាសមាគមផលិតករភាពយន្តខ្មែរ រូបនេះ លើកឡើងថា ក្នុងរយៈពេល ៣ ឆ្នាំដំបូង សមាគមផលិតករភាពយន្តខ្មែរ មិនត្រូវឱ្យសមាជិកបង់ប្រាក់វិភាគទាននោះទេ តែតម្រូវឱ្យមានការចូលរួមយ៉ាងសកម្មពីសមាជិកគ្រប់រូប ដើម្បីរកយុទ្ធសាស្ដ្រថ្មី រុញឱ្យវិស័យភាពយន្ដខ្មែរដើរលឿនទៅមុខ។

ពិតណាស់បច្ចុប្បន្ន វិស័យ​ភាពយន្ត​ខ្មែរមាន​សំទុះ​ឡើង​ជាង​មុន​ ​ទាំង​ចំនួន​អ្នក​ទស្សនា​ ព្រមទាំង​ចំនួន​ភាពយន្ត។ ប៉ុន្តែ​បើ​និយាយ​ពី​គុណភាព​វិញ គឺ​នៅ​មាន​កម្រិត​នៅ​ឡើយ បើ​ធៀប​ទៅ​នឹង​ភាពយន្ត​​ប្រទេស​ដទៃក្នុង​តំបន់ ដូច​ជា​ភាពយន្តចិន ​កូរ៉េ និង​ថៃ​ជា​ដើម។

ងាកមកជួប ប្រធាននាយកដ្ឋានសិល្បៈភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ លោក ប៉ុក បូរក្ស មានប្រសាសន៍ប្រាប់ “កម្ពុជាថ្មី” ថា កត្តាចម្បងនៃគុណភាពភាពយន្តគឺ ការសរសេរ និពន្ធអត្ថបភាពយន្ត ឱ្យមានភាពទាក់ទាញ ធ្វើឱ្យទស្សនិកជនចង់មើល មានភាពចង់តាមដាន។ ដើម្បីសរសេរអត្ថបទភាពយន្តមួយល្អ មិនមែនសរសេរតែមួយខែ ឬពីរខែទេ គឺត្រូវការពេលច្រើនសរសេរ ត្រូវការកែសម្រួល ត្រូវការការប្រឹក្សាយោបល់ច្រើន រួមទាំងកត្តាដើមទុន។

លោក ប៉ុក បូរក្ស មានប្រសាសន៍ថា៖ “ការកសាងភាពយន្តមួយនៅក្នុងស្រុកបច្ចុប្បន្ននេះ [ទុន] មិនលើសទេពី ៦ ម៉ឺន ទៅ ៧ ម៉ឺន​ [ដុល្លារ] ឬអាចចន្លោះពី ៣ ម៉ឺន [ដុល្លារ] ទៅអីហ្នឹង។ អ៊ីចឹងយើងសួរទៅវិញថា រឿងគេចាយអស់ប៉ុន្មាន? រឿងខ្លះចាយអស់រាប់លានដុល្លារ សូម្បីតែប្រទេលជុំវិញយើងនៅក្នុងតំបន់ហ្នឹងគេចាយរាប់​លាន​ដុល្លារ។ តើកម្រិតគុណភាពនៃការផលិត ការផ្ចិតផ្ចង់គុណភាព គេប៉ុនណា? ទី២ តួអង្គក៏ដូចគ្នា គេចំណាយច្រើន គេខំជ្រើសរើសតួអង្គ សាកកាមេរ៉ា យកមកបណ្តុះបណ្តាលហាត់សមជាច្រើនដង។ តែខាងភាពយន្តកម្ពុជាយើងអត់ទេ ពេលខ្លះត្រូវការថត ជូនតែប៉ារ៉ូលទៅតួអង្គ ដល់ថ្ងែថត ក៏មកថតលេងតាមតែលទ្ធភាពទៅរួច”។

ប្រធាននាយកដ្ឋានសិល្បៈភាពយន្ត និងផ្សព្វផ្សាយវប្បធម៌ រូបនេះមើលឃើញថា បច្ចុប្បន្នផលិតករភាពយន្តខ្មែរបាន និងកំពុងខិតខំ ផលិតកសាងគុណភាពភាពយន្តរបស់ខ្លួន ដោយមានការហ៊ានបង្កើនទុនចំណាយលើសពី ២០-៣០ ម៉ឺនដុល្លារ ហើយទទួលបានកម្រិតបច្ចេកទេសល្អ រូបភាពល្អ ខ្លឹមសារក៏ធ្វើបានល្អច្រើន រហូតដល់ ប្រទេសជិតខាងទទួលយកទៅចាក់បញ្ចាំង។

លោក ប៉ុក បូរក្ស មានប្រសាសន៍បន្ត៖ “ឥឡូវយើងឧទាករណ៍ដូចជារឿង The Clock របស់ផលិតកម្ម LD ចុះ ដែលជារឿងទទួលបានពានរង្វាន់នៅក្នុងមហោស្រពភាពយន្តជាតិ របស់យើង។ យើងបានយកទៅចាក់ដោយស្មើមុខស្មើមាត់ជាលក្ខណៈ Commercial (ការធ្វើពាណិជ្ជកម្ម) នៅប្រទេស សិង្ហបុរី នៅឥណ្ឌូនេស៊ី នៅម៉ាឡេស៊ី ហើយឥឡូវនេះឥណ្ឌាកំពុងទាក់ទង ភូមាក៏កំពុងទាក់ទង។ អ៊ីចឹងមានន័យថា វាអាស្រ័យលើដើមទុនហ្នឹងឯង គួបផ្សំនឹងសមត្ថភាពអ្នកផលិត ធ្វើឱ្យរឿងនឹងកាន់តែល្អ ហើយអាចងាយស្រួលក្នុងការពង្រីកទីផ្សារទៅក្រៅប្រទេសបាន”។

លោក ប៉ុក បូរក្ស លើកឡើងថា ភាពយន្តទាំងអស់ដែលបញ្ចាំងនៅបរទេសក៏ដូចកម្ពុជា គឺមានមួយភាពយន្តចំនួនក៏អត់មានទទួលការគាំទ្រដែរ មិនមែនភាពយន្តគេទាំងអស់ទទួលបានការគាំទ្រទេ។ ពេលខ្លះ ដល់ថ្នាក់ផលិតករនៅក្នុងតំបន់ប្រើពាក្យមួយថា ជោគជ័យនៃភាពយន្ត ដូច Lucky draw (ការចាប់ឆ្នោតផ្សងសំណាង) បើសំណាងគឺធ្វើទៅបានជោគជ័យ ជួនកាលផលិតករខ្លះធ្វើរឿងមួយមានខ្លឹមសារល្អ ប៉ុន្តែទស្សនិកជនអត់ទទួលយក ក៏មិនជោគជ័យដែរ។

ពិតណាស់ ភាពយន្តកម្ពុជា​ត្រូវ​ការភាពរីក​ចម្រើន​ប្រកប​ដោយ​គុណភាព​ល្អ​បន្តទៀត ដើម្បី​រក្សាវត្តមានរបស់ខ្លួន ក៏ដូចជាដណ្ដើមទីផ្សារក្នុងស្រុកជាមួយបណ្ដាភាពយន្តបរទេសល្បី​។ ទស្សនិកជន គប្បីគាំទ្រ ជួយជាវសំបុត្រទស្សនា ដោយទុកឱកាស និងលទ្ធភាពដើម្បីភាពយន្តជាតិបានវិវឌ្ឍទៅមុខបន្ត គួរយោគយល់ពីភាពខ្វះខាត និងការខិតខំប្រឹងប្រែងរបស់ផលិតករ កុំប្រៀបធៀបជាមួយភាពយន្តបរទេសដែលមានទីផ្សារធំ និងមានទុនផលិតលើសភាពយន្តខ្មែររាប់សិប ឬរយដង ឬត្រូវសួរថា តើបរទេសទាំងនោះអាចផលិតភាពយន្តបានពាក់កណ្ដាលខ្មែរទេ បើគេមានទុនផលិតដូចយើង? ត្រូវមោទភាពដែលខ្លួនជាខ្មែរ មានភាពយន្តខ្មែររសជាតិខ្មែរ ទស្សនា លើមាតុភូមិរបស់ខ្លួន។​ ជាមួយគ្នានេះ ស្ថាប័ន​ពាក់ព័ន្ធ​ត្រូវជួយសម្រួលនូវតម្រូវការ និងបញ្ហាប្រឈមនានា ឯផលិតករ​ភាពយន្ត​​ជំនាញត្រូវ​ចែករំលែក រួម​គ្នា​បង្កើន​ការ​បណ្ដុះ​បណ្ដាល​​វិស័យ​ភាពយន្ត​ ទៅ​​ផលិតករ​ភាពយន្ត​នានា​ដែល​នៅ​ខ្វះ​ខាត​។ ចំណែក​ផលិតករ​ភាពយន្ត​ខ្មែរ​ថ្មីៗក៏​ត្រូវ​​បើក​ចិត្ត ទទួល​យក​ការ​កែលម្អ ការបណ្ដុះ​បណ្ដាល​បន្ថែម ដើម្បី​បង្កើន​គុណភាព​ភាពយន្ត​របស់​ខ្លួន ​ក្នុងពិភពទីផ្សារសេរី​សាកលភាវូបនីយកម្ម៕

អត្ថបទ៖ ច័ន្ទ វីរៈ

The post បទយកការណ៍៖ ចំណុចពិសេស ដែលភាពយន្តខ្មែរអាចប្រជែង ជាមួយភាពយន្តបរទេស appeared first on Kampuchea Thmey Daily.