ប្រទេសចិន Archives - Kampuchea Thmey Daily

ចិនផ្តល់អាហារូបករណ៍ MOFCOM ឆ្នាំ២០២៦ សម្រាប់ថ្នាក់អនុបណ្ឌិត និងបណ្ឌិត

Ken Malis — Wed, 06 May 2026 03:34:03 +0000

រដ្ឋាភិបាលចិន បានផ្តល់អាហារូបករណ៍ MOFCOM ឆ្នាំ២០២៦ សម្រាប់ថ្នាក់អនុបណ្ឌិត និងបណ្ឌិត ទៅសិក្សានៅសាកលវិទ្យាល័យធំៗល្បីៗ នៅសាធារណរដ្ឋប្រជាមានិតចិន។

អាហារូបករណ៍ MOFCOM ឆ្នាំ២០២៦ នេះ រ៉ាប់រងលើ កន្លែងស្នាក់នៅ សំបុត្រយន្តហោះទៅ-មក (១ពេល)។ ចំពោះលក្ខខណ្ឌសម្រាប់បេក្ខជន ត្រូវតែជាពលរដ្ឋកម្ពុជា ដែលមានកម្រិតសិក្សាថ្នាក់អនុបណ្ឌិត(១-២ឆ្នាំ) ឬបណ្ឌិត (៣ឆ្នាំ)។ ត្រូវជ្រើសរើសជំនាញ និងសាកលវិទ្យាល័យ ពីតារាងបញ្ជី MOFCOM 2026 ។

ជាមន្ត្រី ឬយុវជនដែលមានលិខិតទទួលស្គាល់( recommendations letter) ពីក្រសួង ឬស្ថាប័នពាក់ព័ន្ធ និងត្រូវមានលិខិតចាត់តាំង (Nomination Letter) ពីក្រសួងពាក់ព័ន្ធ។ ត្រូវបំពេញឯកសារពាក់ព័ន្ធផ្សេងតាមលក្ខខណ្ឌរបស់សាកលវិទ្យាល័យ និងត្រូវឆ្លងកាត់សម្ភាសន៍នៅស្ថានទូតចិនប្រចាំនៅកម្ពុជា។

បេក្ខជនត្រូវស្វែងរកព័ត៌មាន និងបំពេញបែបបទដោយខ្លួនឯងតាមរយៈគេហទំព័រ៖ https://www.china-aibo.cn/en/info/1005/1497.htm ។ (https://www.china-aibo.cn/en/info/1005/1497.htm) ផុតកំណត់នៅថ្ងៃទី១៥ ឧសភា ២០២៦៕

The post ចិនផ្តល់អាហារូបករណ៍ MOFCOM ឆ្នាំ២០២៦ សម្រាប់ថ្នាក់អនុបណ្ឌិត និងបណ្ឌិត appeared first on Kampuchea Thmey Daily.

លោក ស៊ី កំពុងជួយបញ្ចប់សង្គ្រាមនៅអ៊ីរ៉ង់ និងឱ្យគ្រប់ភាគីឈប់វាយប្រហារកប៉ាល់ឆ្លងកាត់ច្រក Hormuz

Minea Neu — Tue, 21 Apr 2026 04:17:20 +0000

ក្រោយពីមានភាពរកាំរកូសដាក់គ្នាជុំវិញបទឈប់បាញ់រវាងសហរដ្ឋអាមេរិក-អ៊ីរ៉ង់ ច្រកសមុទ្រ Hormuz ក្លាយជាប្រធានបទក្តៅក្នុងជម្លោះនៅមជ្ឈិមបូព៌ា ហើយវានៅតែមិនទាន់បើកចំហឲ្យធ្វើនាវាចរណ៍ដោយសេរីនៅឡើយទេ។

ប្រធានាធិបតីចិន លោក ស៊ី ជីនពីង បានអំពាវនាវឱ្យរក្សាការឆ្លងកាត់របស់កប៉ាល់តាមច្រកសមុទ្រ Hormuz ធ្វើឡើងជាធម្មតា ក្នុងការសន្ទនាតាមទូរស័ព្ទកាលពីថ្ងៃចន្ទជាមួយព្រះអង្គម្ចាស់ប្រទេសអារ៉ាប៊ីសាអូឌីត Mohammed bin Salma ខណៈទីក្រុងប៉េកាំងកំពុងបង្កើនកិច្ចខិតខំប្រឹងប្រែង ជួយបញ្ចប់សង្គ្រាមនៅអ៊ីរ៉ង់។ នេះបើយោងតាមទីភ្នាក់ងារសារព័ត៌មានរ៉យទ័រផ្សាយថ្ងៃទី២០ ខែមេសា ឆ្នាំ២០២៦ ។

ប្រធានាធិបតីចិន លោក ស៊ី ជីនពីង ។ រូបភាព៖ Reuters

ប្រទេសចិនសម្តែងការព្រួយបារម្ភពីអស្ថិរភាពដែលកើតឡើងវិញ ជុំវិញផ្លូវទឹកយុទ្ធសាស្ត្រនេះ ខណៈបទឈប់បាញ់រវាងសហរដ្ឋអាមេរិកនិងអ៊ីរ៉ង់ស្ថិតក្រោមភាពតានតឹងជាថ្មី បន្ទាប់ពីសហរដ្ឋអាមេរិកបានរឹបអូសកប៉ាល់ដឹកទំនិញអ៊ីរ៉ង់មួយគ្រឿង ហើយទីក្រុងតេហេរ៉ង់ផ្តល់សញ្ញាថាខ្លួននឹងមិនចូលរួមក្នុងកិច្ចចរចាសន្តិភាពជុំទី២ ជាមួយអាមេរិកទេ។

គួរបញ្ជាក់ថា ប្រទេសចិនគឺជាអ្នកទិញប្រេងឆៅដ៏សំខាន់របស់អ៊ីរ៉ង់។ ដោយឡែក អ៊ីរ៉ង់បានបិទច្រកសមុទ្រនេះមិនឱ្យកប៉ាល់ផ្សេងទៀតឆ្លងកាត់ចាប់តាំងពីសហរដ្ឋអាមេរិក និងអ៊ីស្រាអែលចាប់ផ្តើមវាយប្រហារទ្រង់ទ្រាយធំកាលពីថ្ងៃទី២៨ ខែកុម្ភៈ ខណៈទីក្រុងវ៉ាស៊ីនតោនបិទផ្លូវកប៉ាល់អ៊ីរ៉ង់ចាប់តាំងពីសប្តាហ៍មុន។

ទីភ្នាក់ងារសារព័ត៌មានរដ្ឋ Xinhua ដកស្រង់សម្តីរបស់ លោក ស៊ី ថា ប្រទេសចិនគាំទ្របទឈប់បាញ់ជាបន្ទាន់និងទូលំទូលាយ ហើយទទូចឱ្យមានការដោះស្រាយជម្លោះនៅមជ្ឈិមបូព៌ាតាមរយៈបណ្តាញនយោបាយ និងភាសាការទូត។

លោក ស៊ី ប្រាប់ព្រះអង្គម្ចាស់អារ៉ាប៊ីសាអូឌីតថា៖ « ច្រកសមុទ្រ Hormuz គួរតែបើកចំហសម្រាប់ការឆ្លងកាត់របស់កប៉ាល់ធម្មតា ព្រោះវាបម្រើផលប្រយោជន៍រួមរបស់ប្រទេសក្នុងតំបន់ និងសហគមន៍អន្តរជាតិ»។

ការហៅទូរស័ព្ទរបស់ លោក ស៊ី ជាមួយព្រះអង្គម្ចាស់រាជទាយាទអារ៉ាប៊ីសាអូឌីតកើតឡើង បន្ទាប់ពីកិច្ចប្រជុំមួយនៅទីក្រុងប៉េកាំងកាលពីសប្តាហ៍មុនជាមួយព្រះអង្គម្ចាស់រាជទាយាទអាប៊ូដាប៊ី ខណៈ លោក ស៊ី ជំរុញឱ្យភាគីទាំងអស់ប្រកាន់ខ្ជាប់នូវច្បាប់អន្តរជាតិ។

លោក ស៊ី ក៏បានប្រាប់ព្រះអង្គម្ចាស់អារ៉ាប៊ីសាអូឌីតថា៖ « ប្រទេសចិនគាំទ្រប្រទេសនានានៅមជ្ឈិមបូព៌ាចេះក្តោបក្តាប់អនាគត និងវាសនាក្នុងដៃខ្លួនឯង ជាពិសេសលើកកម្ពស់ស្ថិរភាព សន្តិភាពក្នុងតំបន់រយៈពេលវែង»៕

ប្រែសម្រួល៖ ណឺ មិនា

The post លោក ស៊ី កំពុងជួយបញ្ចប់សង្គ្រាមនៅអ៊ីរ៉ង់ និងឱ្យគ្រប់ភាគីឈប់វាយប្រហារកប៉ាល់ឆ្លងកាត់ច្រក Hormuz appeared first on Kampuchea Thmey Daily.

តុលាការចិនលុបចោលទោសប្រហារជីវិត លើបុរសកាណាដាម្នាក់ បន្ទាប់ពីរឿងក្តីនេះតានតឹងច្រើនឆ្នាំ

Minea Neu — Mon, 09 Feb 2026 11:00:00 +0000

តុលាការកំពូលរបស់ប្រទេសចិនបានលុបចោល ការកាត់ទោសប្រហារជីវិតលើបុរសជនជាតិកាណាដាម្នាក់ ពីបទរត់ពន្ធគ្រឿងញៀន កាលពីថ្ងៃចន្ទ។ រឿងក្តីនេះ បានធ្វើឱ្យទំនាក់ទំនងការទូតរវាងទីក្រុង អ៊តាវ៉ា(Ottawa) និងទីក្រុងប៉េកាំងមានភាពតានតឹងអស់ជាច្រើនឆ្នាំ។

អ្នកនាំពាក្យក្រសួងការបរទេសចិន លោក Lin Jian ។ រូបភាព៖ ក្រសួងការបរទេសចិន!

យោងតាមរ៉យទ័រ នៅថ្ងៃទី៩ ខែកុម្ភៈ លោក Robert Schellenberg ត្រូវបានចាប់ខ្លួន ក្នុងប្រទេសចិនក្នុងឆ្នាំ ២០១៤ពីបទសង្ស័យរត់ពន្ធគ្រឿងញៀន ហើយកាត់ទោសក្នុងឆ្នាំ ២០១៨ ជាលើកដំបូងឱ្យជាប់គុក ១៥ ឆ្នាំ។ ជាពិសេសត្រូវកាត់ទោសប្រហារជីវិតជាបន្តបន្ទាប់ នៅខែមករា ឆ្នាំ ២០១៩ ពោលគឺមួយខែបន្ទាប់ពីនាយកប្រតិបត្តិក្រុមហ៊ុន Huawei លោក Meng Wanzhou ត្រូវបានចាប់ខ្លួននៅទីក្រុង Vancouver តាមដីការបស់សហរដ្ឋអាមេរិក។

មេធាវីមូលដ្ឋាននៅទីក្រុងប៉េកាំង លោក Zhang Dongshuo បានប្រាប់រ៉យទ័រថា តុលាការប្រជាជនកំពូលរបស់ប្រទេសចិន កាលពីថ្ងៃសុក្រ បានកាត់ក្តីប្រឆាំងនឹងការកាត់ទោសប្រហារជីវិត និងអនុម័តដោយតុលាការជាន់ទាប។

លោកបានបន្តថា សំណុំរឿងនេះនឹងត្រូវបញ្ជូនទៅតុលាការប្រជាជននៅខេត្ត Liaoning ដើម្បីធ្វើជំនុំជម្រះឡើងវិញ។

ការធ្វើឡើងនេះ កើតឡើងតិចជាងមួយខែបន្ទាប់ពីនាយករដ្ឋមន្រ្តីកាណាដា លោក Mark Carney បានធ្វើទស្សនកិច្ចរយៈពេលបួនថ្ងៃ មកកាន់ប្រទេសចិន។ ជាកន្លែងដែលខ្លួនអបអរ ចំពោះភាពប្រសើរឡើងវិញនៃទំនាក់ទំនងរបស់ប្រទេសទាំងពីរ បន្ទាប់ពីមានភាពជូរចត់នៅក្រោមការដឹកនាំមុនរបស់កាណាដា លោក Justin Trudeau។

ចំណែកអ្នកនាំពាក្យក្រសួងការបរទេសកាណាដា បានប្រាប់រ៉យទ័រថា ពួកគេដឹងពីសេចក្តីសម្រេចរបស់តុលាការកំពូលរួចហើយ។ លើសពីនេះ នឹងបន្តផ្តល់សេវាផ្លូវច្បាប់ដល់ លោក Schellenberg និងគ្រួសាររបស់គេ។ តែលោកមិនបានបញ្ជាក់លម្អិតពីការសម្រេចចិត្តនេះនៅឡើយទេ។

លោកបានបន្តថា៖ « តាមការវិនិច្ឆ័យពីសុន្ទរកថាផ្លូវការរបស់ប្រទេសទាំងពីរ មានលទ្ធភាពល្អច្រើននៃការសម្រេចចិត្តរបស់តុលាការកំពូល។ បន្ទាប់ពីនាយករដ្ឋមន្ត្រីកាណាដាបានធ្វើទស្សនកិច្ចមកកាន់ប្រទេសចិន នេះបើយោងតាមបទពិសោធន៍របស់ខ្ញុំ»។

ចំណែកអ្នកនាំពាក្យក្រសួងការបរទេសចិន លោក Lin Jian បានថ្លែងអំឡុងសន្និសីទខ្លីមួយកាលពីថ្ងៃចន្ទ ពីករណីរបស់ លោក Schellenberg ថា៖ «ស្ថាប័នតុលាការរបស់ចិនបានស្តាប់ដោយឯករាជ្យ នូវករណីពាក់ព័ន្ធ និងបានចេញសាលក្រមស្របតាមផ្លូវច្បាប់»៕

ប្រែសម្រួល៖ ណឺ មិនា

The post តុលាការចិនលុបចោលទោសប្រហារជីវិត លើបុរសកាណាដាម្នាក់ បន្ទាប់ពីរឿងក្តីនេះតានតឹងច្រើនឆ្នាំ appeared first on Kampuchea Thmey Daily.

វិទ្យាស្ថានពហុបច្ចេកទេសយ៉ាងចូវ ផ្តល់អាហារូបករណ៍ថ្នាក់បរិញ្ញាបត្ររង ១០កន្លែង សម្រាប់ឆ្នាំសិក្សា២០២៥

Ken Malis — Fri, 30 May 2025 09:13:31 +0000

សម្រាប់ឆ្នាំសិក្សា ២០២៥ វិទ្យាស្ថានពហុបច្ចេកទេសយ៉ាងចូវ ខេត្តជាំងស៊ូ សាធារណៈរដ្ឋប្រជាមានិតចិន បានបន្តផ្តល់អាហារូបករណ៍ថ្នាក់បរិញ្ញាបត្ររង ចំនួន ១០កន្លែងទៀត ជូនដល់រដ្ឋបាលខេត្តសៀមរាប ដើម្បីផ្សព្វផ្សាយជ្រើសរើសសិស្សនិស្សិតដែលមានលក្ខណសម្បតិ្តសមស្របទៅតាមលក្ខខណ្ឌ។ នេះបើតាមសេចក្តីជូនដំណឹងរបស់រដ្ឋបាលខេត្តសៀមរាប ចុះថ្ងៃទី២៨ ខែឧសភា ឆ្នាំ២០២៥។

ចំពោះសិស្ស និស្សិត ដែលមានចំណាប់អារម្ម អាចធ្វើការទាក់ទង និងផ្តល់ឯកសារពាក់ព័ន្ធទៅការិយាល័យកសាងសមត្ថភាព នៃទីចាត់ការគ្របគ្រងធនធានមនុស្សសាលាខេត្ត ឬតាមរយៈលេខទូរសព្ទ ០៧៧ ៣៤៩ ៩៣៦/ ០៩៣ ៣៤៩ ៩៣៦ ឱ្យបានមុនថ្ងៃទី១០ ខែមិថុនា ឆ្នាំ២០២៥ ដើម្បីការិយាល័យជំនាញរៀបចំបញ្ជីឈ្មោះស្នើសុំការពិនិត្យសម្រេចមុននឹងបញ្ជូនបន្តទៅភាគីចិន។ បន្ទាប់មកត្រូវធ្វើការចុះឈ្មោះនៅវិទ្យាស្ថានផ្ទាល់ទៅតាមការណែនាំ និងលក្ខខណ្ឌនានាដែលភ្ជាប់មកជាមួយ។

សូមជម្រាបដែរថា ចាប់តាំងពីឆ្នាំ ២០១៩ វិទ្យាស្ថានពហុបច្ចេកទេសយ៉ាងចូវ ខេត្តជាំងស៊ូ សាធារណៈរដ្ឋប្រជាមានិតចិន បានផ្តល់អាហារូបករណ៍ថ្នាក់បរិញ្ញាបត្ររង ចំនួន ១០កន្លែង ដល់រដ្ឋបាលខេត្តសៀមរាប ដើម្បីបន្តជូនដល់សិស្ស និស្សិតរស់នៅក្នុងខេត្តសៀមរាប លើថ្លៃសិក្សា និងការស្នាក់នៅ (សម្រាប់ថ្លៃសំបុត្រយន្តហោះ និងការចំណាយផ្សេងៗជាបន្ទុករបស់សាមីខ្លួន)៕

The post វិទ្យាស្ថានពហុបច្ចេកទេសយ៉ាងចូវ ផ្តល់អាហារូបករណ៍ថ្នាក់បរិញ្ញាបត្ររង ១០កន្លែង សម្រាប់ឆ្នាំសិក្សា២០២៥ appeared first on Kampuchea Thmey Daily.

អ៊ីរ៉ង់ រុស្ស៊ី ចិន នឹងធ្វើសមយុទ្ធយោធារួមគ្នាចាប់ពីថ្ងៃអង្គារក្នុងដែនសមុទ្រអ៊ីរ៉ង់

Bun sopheap — Mon, 10 Mar 2025 03:09:38 +0000

កងទ័ពជើងទឹកនៃប្រទេសអ៊ីរ៉ង់ រុស្ស៊ី និងចិន នឹងធ្វើសមយុទ្ធរួមគ្នានៅឆ្នេរសមុទ្រអ៊ីរ៉ង់ក្នុងសប្តាហ៍នេះ ក្នុងគោលបំណងជំរុញកិច្ចសហប្រតិបត្តិការក្នុងវិស័យយោធាឲ្យកាន់តែរឹងមាំនិងស៊ីជម្រៅជាមួយគ្នា។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី១០ខែមីនានេះ។

(រូបភាព៖ Shutterstock)

ប្រទេសទាំងបីនេះ មានបំណងប្រាថ្នាគ្រោងធ្វើសមយុទ្ធរួមគ្នា ដើម្បីប្រឆាំងនឹងការពង្រីកឧត្តមភាពរបស់អាមេរិកដែលបានធ្វើសមយុទ្ធស្រដៀងគ្នានៅក្នុងតំបន់ក្នុងប៉ុន្មានឆ្នាំថ្មីៗនេះ។

ទីភ្នាក់ងារសារព័ត៌មាន Tasnim របស់អ៊ីរ៉ង់ បានឲ្យដឹងថា សមយុទ្ធ«Security Belt-2025» នឹងចាប់ផ្តើមនៅថ្ងៃអង្គារសប្ដាហ៍នេះ នៅក្នុងកំពង់ផែ Chabahar ដែលមានទីតាំងនៅភាគអាគ្នេយ៍ប្រទេសអ៊ីរ៉ង់ នៅលើឈូងសមុទ្រអូម៉ង់ ដោយមិនបានបញ្ជាក់អំពីរយៈពេលនៃលំហាត់សមយុទ្ធរួមគ្នានោះទេ។

សមយុទ្ធនេះនឹងមានការចូលរួមពីនាវាកងកម្លាំងជើងទឹកចិន និងរុស្ស៊ី ក៏ដូចជា នាវាចម្បាំងនៃកងនាវាចររបស់កងទ័ពជើងទឹក និងឆ្មាំបដិវត្តន៍ ដែលជាកងកម្លាំងដ៍សំខាន់នៃយោធាអ៊ីរ៉ង់។ សមយុទ្ធនេះនឹងប្រព្រឹត្តទៅនៅភាគខាងជើងមហាសមុទ្រឥណ្ឌា។

ផែនការសមយុទ្ធនេះ រួមមានសមយុទ្ធលើគោលដៅនាវាចរណ៍ ការគ្រប់គ្រងការខូចខាត ក៏ដូចជាការស្វែងរក និងជួយសង្គ្រោះរួមគ្នា និងមានគោលបំណងគឺដើម្បីពង្រឹងទំនុកចិត្តគ្នាទៅវិញទៅមកខាងយោធា និងជំរុញកិច្ចសហប្រតិបត្តិការជាក់ស្តែងក្នុងចំណោមកងកម្លាំងជើងទឹកនៃប្រទេសដែលចូលរួមទាំងបី។

ជាមួយគ្នានេះប្រទេសអាស៊ែបៃហ្សង់ អាហ្រ្វិកខាងត្បូង អូម៉ង់ កាហ្សាក់ស្ថាន ប៉ាគីស្ថាន កាតា អ៊ីរ៉ាក់ អារ៉ាប់រួម និងស្រីលង្កា នឹងចូលរួមជាអ្នកសង្កេតការណ៍៕

(រូបភាព៖ INP)

អត្ថបទ៖ ប៊ុន សុភាព

The post អ៊ីរ៉ង់ រុស្ស៊ី ចិន នឹងធ្វើសមយុទ្ធយោធារួមគ្នាចាប់ពីថ្ងៃអង្គារក្នុងដែនសមុទ្រអ៊ីរ៉ង់ appeared first on Kampuchea Thmey Daily.

ក្តៅគគុក! ចិននិងអាមេរិក សុទ្ធតែប្រកាសត្រៀមខ្លួនរួចរាល់ ច្បាំងគ្នាក្នុងសង្គ្រាម

Sok Sovann — Thu, 06 Mar 2025 00:27:31 +0000

សហរដ្ឋអាមេរិក បានប្រកាសត្រៀមខ្លួនរួចជាស្រេចដើម្បីច្បាំងក្នុងសង្គ្រាមជាមួយចិន ខណៈភាគីចិនឯណោះក៏ប្រកាសហើយដែរថា ខ្លួនស្វាគមន៍អាមេរិក ចង់មកធ្វើក្នុងសង្គ្រាមអ្វីក៏បានដែរ កុំថាឡើយត្រឹមសង្គ្រាមពាណិជ្ជកម្ម។

ទ័ពអាមេរិកនិងទ័ពចិន (រូបថត៖ Getty)

សេចក្តីប្រកាសរបស់អាមេរិក ធ្វើឡើងដោយរដ្ឋមន្ត្រីការពារជាតិ Pete Hegseth ក្នុងបទសម្ភាសជាមួយ Fox News ដើម្បីឆ្លើយតបទៅការគំរាមរបស់ទីក្រុងប៉េកាំង ដោយនិយាយថា «យើងត្រៀមខ្លួនរួចរាល់អស់ហើយ។ អ្នកដែលចង់បានសន្តិភាព ត្រូវតែត្រៀមលក្ខណៈច្បាំងសង្គ្រាម»។

លោកអះអាងថា «យើងរស់នៅក្នុងពិភពលោកដ៏គ្រោះថ្នាក់ជាមួយនឹងប្រទេសអំណាច ដែលមានមនោគមវិជ្ជាខុសគ្នាទាំងស្រុង។ ពួកគេកំពុងបង្កើនការចំណាយលើវិស័យការពារជាតិយ៉ាងឆាប់រហ័សនិងធ្វើទំនើបកម្មវិស័យបច្ចេកវិទ្យា ពួកគេចង់កាត់មុខសហរដ្ឋអាមេរិក។ ការរក្សាកម្លាំងយោធា គឺជាកូនសោដើម្បីបញ្ចៀសជម្លោះ។ ប្រសិនបើយើងចង់កំញើញសង្គ្រាមជាមួយចិនឬប្រទេសដទៃ យើងត្រូវតែមានភាពរឹងមាំ»។

រដ្ឋមន្ត្រីការពារជាតិអាមេរិក Pete Hegseth (រូបថត៖ Nur Photo)

ស្របពេលជាមួយគ្នានោះ លោកសង្កត់ធ្ងន់ថា នេះហើយគឺជាមូលហេតុដែលសហរដ្ឋអាមេរិក កំពុងកសាងកងទ័ពរបស់ខ្លួនឡើងវិញ និងពង្រឹងស្មារតីអ្នកប្រយុទ្ធរបស់ខ្លួនឲ្យកាន់តែខ្លាំង។

សេចក្តីប្រកាសរបស់ប្រមុខមន្ទីរបញ្ជកោណរូបនេះ កើតឡើងភ្លាមៗបន្ទាប់ពីក្រសួងការបរទេសចិនគំរាមថា «កុំថាឡើយសង្គ្រាមពន្ធ សង្គ្រាមពាណិជ្ជកម្ម ឬសង្គ្រាមប្រភេទណាក៏ដោយឲ្យតែអាមេរិកចង់ ចិនកំដបានជានិច្ចហើយនឹងប្រយុទ្ធដល់ទីបញ្ចប់»។

សារគំរាមនេះ គឺជាការប្រើពាក្យខ្លាំងៗបំផុតរបស់ចិនមិនធ្លាប់មានសោះ ចាប់តាំងពីលោក ដូណាល់ ត្រាំ ចូលកាន់តំណែងជាប្រធានាធិបតីអាមេរិក ហើយវាគឺជាការគំរាមសងសឹកចំពោះការយកពន្ធកាន់តែខ្លាំងរបស់លោក ត្រាំ លើទំនិញចិន។

សូមជម្រាបថា សង្គ្រាមពាណិជ្ជកម្មរវាងសហរដ្ឋអាមេរិកនិងចិនក៏បានផ្ទុះឡើងដែរនៅឆ្នាំ២០១៨ ក្នុងអំឡុងអាណត្តិដំបូងរបស់លោក ត្រាំ ដោយពេលនោះ លោកបានដាក់ពន្ធលើទំនិញចិន ដោយលើកឡើងពីភាពអយុត្តិធម៌ផ្នែកពាណិជ្ជកម្មនិងការលួចកម្មសិទ្ធិបញ្ញា។ សង្គ្រាមនោះ បង្កឲ្យមានការសងសឹកគ្នារំខានដល់ទីផ្សារពិភពលោកនិងខ្សែសង្វាក់ផ្គត់ផ្គង់ជាសកល៕

អត្ថបទ៖ សុខ សុវណ្ណ

ចុចអាន៖ ចិន បង្កើនចំណាយយោធាឡើងដល់ជាង ២៤៥ពាន់លានដុល្លារ

The post ក្តៅគគុក! ចិននិងអាមេរិក សុទ្ធតែប្រកាសត្រៀមខ្លួនរួចរាល់ ច្បាំងគ្នាក្នុងសង្គ្រាម appeared first on Kampuchea Thmey Daily.

ភាគបូព៌ាប្រទេសចិនរងការវាយប្រហារដោយព្យុះព្រឹលផង និងកម្ដៅខ្លាំងផង

Bun sopheap — Mon, 03 Mar 2025 07:57:34 +0000

ភាគបូព៌ានៃប្រទេសចិន បានជួបប្រទះទាំងព្យុះព្រឹលផងនិងកម្ដៅដ៏ខ្លាំងមិនធ្លាប់មានផង ដោយវាយប្រហារតំបន់នេះកាលពីចុងសប្តាហ៍មុន។ នេះបើយោងតាមការចេញផ្សាយរបស់សារព័ត៌មាន CNN នៅថ្ងៃទី៣ខែមីនានេះ។

(រូបភាព៖ Getty)

ព្យុះកំបុតត្បូងកាលពីថ្ងៃអាទិត្យបានបោកបក់ពាសពេញខេត្តភាគខាងកើតនៃខេត្តសានទុង (Shandong) ភាគខាងត្បូងនៃទីក្រុងប៉េកាំង ជាមួយនឹងព្រឹលធ្លាក់រហូតដល់ជម្រៅ១៣សង់ទីម៉ែត្រនៅក្នុងតំបន់មួយចំនួន។ នេះបើយោងតាមការចេញផ្សាយរបស់កាសែត The Global Times។

អាជ្ញាធរក្រុងបានចេញសេចក្តីជូនដំណឹងដែលកំណត់កម្រិតគ្រោះថ្នាក់ដល់«ពណ៌ក្រហម» ចំនួនពីរ សម្រាប់គ្រោះថ្នាក់ដោយសារទឹកកកលើផ្លូវ និងខ្យល់ព្យុះ ខណៈដែលសាលាជាច្រើនត្រូវបានផ្អាកថ្នាក់រៀននៅថ្ងៃចន្ទនេះ។ ការធ្វើដំណើរក៏ត្រូវបានរំខាន ដោយមានការពន្យារពេលខ្សែរថភ្លើងល្បឿនលឿនជាច្រើនខ្សែកាត់តាមខេត្តផងដែរ។

ប៉ុន្តែ ប្រហែល៦៤៤គីឡូម៉ែត្រពីទីក្រុងសៀងហៃ អ្នកស្រុកបានជួបប្រទះនឹងកម្ដៅខ្លាំងទៅវិញកាលថ្ងៃចុងសប្តាហ៍។

ទីក្រុងដែលមានប្រជាជនជិត២៥លាននាក់នេះ បានកត់ត្រាកម្តៅក្តៅបំផុតនៅដើមខែមីនាក្នុងរយៈពេលជាង១៥០ឆ្នាំមិនធ្លាប់មាន។ សីតុណ្ហភាពបានឈានដល់កំណត់ត្រាថ្មីកាលពីថ្ងៃសៅរ៍ បន្ទាប់មកបានកើនឡើងកាន់តែខ្លាំងនៅថ្ងៃអាទិត្យសប្ដាហ៍មុនរហូតដល់ ២៨.៥អង្សាសេ។

(រូបភាព៖ Reuters)

សីតុណ្ហភាពនៅទីក្រុងសៀងហៃ ត្រូវបានរំពឹងថា នឹងធ្លាក់ចុះក្នុងរយៈពេលប៉ុន្មានថ្ងៃខាងមុខនេះ។ ប៉ុន្តែលក្ខខណ្ឌអាកាសធាតុខុសគ្នាយ៉ាងធំធេងនៅទូទាំងប្រទេសឆ្លុះបញ្ចាំងពីការមិនអាចទាយទុកមុនបានកាន់តែខ្លាំងឡើង ដែលក្នុងប៉ុន្មានឆ្នាំថ្មីៗនេះ បាននាំមកនូវសីតុណ្ហភាពកើនឡើង គ្រោះរាំងស្ងួតយូរ និងទឹកជំនន់ដ៏បំផ្លិចបំផ្លាញ។

គួរម្លឹកថា កាលពីឆ្នាំមុនគឺជាឆ្នាំក្តៅបំផុតរបស់ប្រទេសចិន ចាប់តាំងពីកំណត់ត្រាទូទាំងប្រទេសបានចាប់ផ្តើមជាង៦០ឆ្នាំមុន ហើយនៅទីក្រុងសៀងហៃវិញ ឆ្នាំមុនជាឆ្នាំដែលក្តៅបំផុតចាប់តាំងពីរាជវង្ស Qing មក។ នេះបើតាមការរាយការណ៍ដោយទីភ្នាក់ងារសារព័ត៌មាន Reutersដែលដកស្រង់សម្តីអាជ្ញាធរក្នុងតំបន់៕

(រូបភាព៖ Getty)

(រូបភាព៖ Reuters)

អត្ថបទ៖ ប៊ុន សុភាព

The post ភាគបូព៌ាប្រទេសចិនរងការវាយប្រហារដោយព្យុះព្រឹលផង និងកម្ដៅខ្លាំងផង appeared first on Kampuchea Thmey Daily.

អ្នកវិទ្យាសាស្ត្រចិន បង្កើតពូជស្រូវដែលជួយដល់សុខភាពបេះដូង

Bun sopheap — Wed, 19 Feb 2025 09:32:12 +0000

អ្នកវិទ្យាសាស្ត្រចិនបានប្រើការកែសម្រួលហ្សែនដើម្បីបង្កើតពូជស្រូវដែលអាចផលិត កូអង់ស៊ីម CoQ10 ដែលផ្តល់ឱ្យអ្នកទទួលទាននូវសារធាតុចិញ្ចឹមជំនួយដល់សុខភាពបេះដូង។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Xinhua នៅថ្ងៃទី១៩ខែកុម្ភៈឆ្នាំ២០២៥។

(រូបភាព៖ Xinhua)

CoQ10 គឺជាសារធាតុប្រឆាំងអុកស៊ីតកម្មដែលរាងកាយរបស់យើងផលិតដោយធម្មជាតិ ហើយវាមានសារៈសំខាន់សម្រាប់សុខភាពទូទៅ ជាពិសេសសុខភាពបេះដូងតែម្តង។ នៅពេលមនុស្សកាន់តែចាស់ សមត្ថភាពរបស់រាងកាយក្នុងការផលិតសារធាតុប្រឆាំងអុកស៊ីតកម្មដែលរលាយក្នុងខ្លាញ់នេះកាន់តែថយចុះ ដែលមានន័យថាការបន្ថែមសារធាតុបន្ថែមទៅក្នុងរបបអាហារអាចមានប្រយោជន៍។

ជាធម្មតាដំណាំអាហារធញ្ញជាតិដូចជាអង្ករ ក៏ដូចជាបន្លែ និងផ្លែឈើមួយចំនួន គឺសំយោគបានត្រឹម CoQ9 ប៉ុណ្ណោះ ប៉ុន្តែបន្ទាប់ពីធ្វើការវិភាគវិវត្តន៍នៃបម្រែបម្រួលធម្មជាតិនៅក្នុងអង់ស៊ីម Coq1 លើប្រភេទរុក្ខជាតិលើដីជាង ១ ០០០ ប្រភេទ និងអនុវត្តម៉ាស៊ីនរៀនបច្ចេកទេស អ្នកស្រាវជ្រាវក្នុងការសិក្សានេះបានប្រើការកែសម្រួលហ្សែនដើម្បីកែប្រែអាស៊ីតអាមីណូសំខាន់ៗចំនួន ៥ នៃអង់ស៊ីម Coq1 នៅក្នុងអង្ករ បង្កើតពូជស្រូវថ្មីដែលមានសមត្ថភាពសំយោគ CoQ10 ។

ចុះផ្សាយក្នុងទស្សនាវដ្តី Cell កាលពីថ្ងៃសុក្រ ការសិក្សានេះបង្ហាញថា ការកើនឡើងបរិមាណ CoQ10 មិនមានផលប៉ះពាល់ដល់ទិន្នផលស្រូវទេ។

យោងតាមសហអ្នកនិពន្ធដំបូងរបស់ការសិក្សានេះ លោក Xu Jingjing អ្នកស្រាវជ្រាវរងនៅសួនរុក្ខសាស្ត្រ Shanghai Chenshan ក្រោមបណ្ឌិត្យសភាវិទ្យាសាស្ត្រចិន (CAS) ការសិក្សាពីមុនបានបង្ហាញថា CoQ10 នៅតែមានស្ថិរភាពក្នុងកំឡុងពេលមានកម្ដៅ ដែលបង្ហាញថាការចម្អិនអាហារមិនប៉ះពាល់ដល់កម្រិត CoQ10 ខ្លាំងឡើយ។

(រូបភាព៖ rice and heart health)

គួរកត់សម្គាល់ថា ប្រសិនបើមនុស្សញ៉ាំបាយដែលមាន CoQ10 ជារៀងរាល់ថ្ងៃ ពួកគេអាចបន្ថែម CoQ10 ប្រហែល ១ ទៅ ២ មីលីក្រាម ក្នុងមួយថ្ងៃ។ ជាធម្មតាមនុស្សទទួលទានជាមធ្យមនៃ CoQ10 ពីសាច់គឺប្រហែល ២ ទៅ ៣ មីលីក្រាម ក្នុងមួយថ្ងៃ ដូចនេះ CoQ10 នៅក្នុងអង្ករដែលទើបបង្កើតថ្មីនេះគឺអាចប្រៀបធៀបទៅនឹង CoQ10 ដែលមាននៅក្នុងសាច់ ដែលមានន័យថាវាអាចបម្រើជាអាហារបំប៉នដ៏មានប្រសិទ្ធភាពសម្រាប់របបអាហារប្រចាំថ្ងៃ។

ជាមួយគ្នានេះលោក Zhao Qing អ្នកស្រាវជ្រាវនៅសួនរុក្ខសាស្ត្រ Shanghai Chenshan ដែលចូលរួមក្នុងការស្រាវជ្រាវនេះ ជឿជាក់ថា សមិទ្ធិផលនៃការបង្កើតពូជស្រូវថ្មីនេះ មិនត្រឹមតែអាចអនុវត្តបានតែ CoQ10 ប៉ុណ្ណោះទេ ប៉ុន្តែថែមទាំងផ្តល់នូវវិធីសាស្រ្តជាសាកលដល់ការស្រាវជ្រាវជីវសាស្ត្រផ្សេងៗទៀតផងដែរ៕

(រូបភាព៖ Getty)

អត្ថបទ៖ ប៊ុន សុភាព

The post អ្នកវិទ្យាសាស្ត្រចិន បង្កើតពូជស្រូវដែលជួយដល់សុខភាពបេះដូង appeared first on Kampuchea Thmey Daily.

ប្រទេសចិន Archives - Kampuchea Thmey Daily

ចិនផ្តល់អាហារូបករណ៍ MOFCOM ឆ្នាំ២០២៦ សម្រាប់ថ្នាក់អនុបណ្ឌិត និងបណ្ឌិត

តុលាការ​ចិន​លុប​ចោល​ទោស​ប្រហារជីវិត លើ​បុរស​​កាណាដាម្នាក់ ​បន្ទាប់ពីរឿងក្តីនេះតានតឹងច្រើនឆ្នាំ

វិទ្យាស្ថានពហុបច្ចេកទេសយ៉ាងចូវ ផ្តល់អាហារូបករណ៍ថ្នាក់បរិញ្ញាបត្ររង ១០កន្លែង សម្រាប់ឆ្នាំសិក្សា២០២៥

អ៊ីរ៉ង់ រុស្ស៊ី ចិន នឹងធ្វើសមយុទ្ធយោធារួមគ្នាចាប់​ពីថ្ងៃអង្គារ​ក្នុងដែន​សមុទ្រ​អ៊ីរ៉ង់​

ក្តៅគគុក! ចិននិងអាមេរិក សុទ្ធតែប្រកាសត្រៀមខ្លួនរួចរាល់ ច្បាំងគ្នាក្នុងសង្គ្រាម

​ភាគបូព៌ា​ប្រទេស​ចិន​រង​ការ​វាយ​ប្រហារ​ដោយ​ព្យុះ​ព្រឹល​ផង និង​កម្ដៅ​ខ្លាំង​ផង​​

អ្នក​វិទ្យាសាស្ត្រ​ចិន​ បង្កើត​ពូជ​ស្រូវ​ដែល​ជួយ​ដល់​សុខភាព​បេះដូង

តុលាការចិនលុបចោលទោសប្រហារជីវិត លើបុរសកាណាដាម្នាក់ បន្ទាប់ពីរឿងក្តីនេះតានតឹងច្រើនឆ្នាំ

អ៊ីរ៉ង់ រុស្ស៊ី ចិន នឹងធ្វើសមយុទ្ធយោធារួមគ្នាចាប់ពីថ្ងៃអង្គារក្នុងដែនសមុទ្រអ៊ីរ៉ង់

ភាគបូព៌ាប្រទេសចិនរងការវាយប្រហារដោយព្យុះព្រឹលផង និងកម្ដៅខ្លាំងផង

អ្នកវិទ្យាសាស្ត្រចិន បង្កើតពូជស្រូវដែលជួយដល់សុខភាពបេះដូង