ប្រទេសថៃ Archives - Kampuchea Thmey Daily

កម្ពុជានិងថៃឯកភាពលើ៥ទិដ្ឋភាព ក្នុងកិច្ចប្រជុំត្រីភាគីនៅចិន

Rann Reuy — Mon, 29 Dec 2025 07:05:53 +0000

សារព័ត៌មានស៊ីនហួរ បានផ្សព្វផ្សាយថា កិច្ចប្រជុំត្រីភាគីថ្នាក់រដ្ឋមន្ត្រីការបរទេសចិន-កម្ពុជា-ថៃ បានធ្វើឡើងនៅទីក្រុងយូស៊ី ខេត្តយូណាន បានបញ្ចប់ដោយជោគជ័យ ដោយភាគីកម្ពុជានិងថៃ បានឯកភាពគ្នាលើ៥ទិដ្ឋភាពជាសំខាន់ៗ។

សារព័ត៌មានរដ្ឋចិនដែលយោងតាមសេចក្តីប្រកាសព័ត៌មានពីកិច្ចប្រជុំនោះ បានផ្សាយថា បន្ទាប់ពីកិច្ចប្រជុំត្រីភាគី កម្ពុជា និងថៃ បានឯកភាពគ្នាលើ៥ទិដ្ឋភាព ក្នុងនោះមាន ទី១) នឹងបង្កើនការទំនាក់ទំនងបន្ថែមទៀត, ធ្វើឲ្យការរយោគយល់គ្នាស៊ីជម្រៅជាងមុន, ពង្រឹងស្ថានភាពបទឈប់បាញ់ជាបណ្តើរៗ, ទី២) ស្តារការផ្លាស់ប្តូរគ្នាទៅវិញទៅមក ទី៣) កសាងទំនុកចិត្តគ្នាទៅវិញទៅមកផ្នែកនយោបាយ ទី៤) សម្រេចបានការផ្លាស់ប្តូរទំនាក់ទំនង និងទី៥) រក្សាសន្តិភាពក្នុងតំបន់។

ការឯកភាពគ្នានោះបានកើតឡើងនៅក្នុងកិច្ចប្រជុំរដ្ឋមន្ត្រីការបរទេសត្រីភាគី សម្របសម្រួលដោយរដ្ឋមន្ត្រីការបរទេសចិន លោក វ៉ាង យី ចាប់ពីថ្ងៃទី ២៨ ដល់ថ្ងៃទី ២៩ ខែធ្នូ ក្រោយភាគីជម្លោះចុះហត្ថលេខាលើបទឈប់បាញ់កាលថ្ងៃទី២៧ខែធ្នូ ដើម្បីបើកផ្លូវទៅអនុវត្តកិច្ចព្រមព្រៀងសន្តិភាពទីក្រុងកូឡាឡាំពូដែលបានចុះហត្ថលេខារួចកាលពីចុងខែតុលាឆ្នាំ២០២៥៕

រ៉ាន់ រើយ

The post កម្ពុជានិងថៃឯកភាពលើ៥ទិដ្ឋភាព ក្នុងកិច្ចប្រជុំត្រីភាគីនៅចិន appeared first on Kampuchea Thmey Daily.

ប្រធានបក្សប្រជាជនថៃ ថា មិនគាំទ្រ អានុទីន ឱ្យមានឱកាសក្បត់ទៀតទេ

Rann Reuy — Wed, 24 Dec 2025 08:57:50 +0000

នយោបាយរបស់ប្រទេសថៃកាន់តែឡើងកម្តៅសម្រាប់ការប្រជែងរកការគាំទ្រសម្រាប់ការបោះឆ្នោតនៅដើមខែកុម្ភៈ ខណៈពេលដែលប៉ូលនយោបាយថៃហាក់បែងចែកកាន់តែច្បាស់រវាងបក្សគាំទ្រដោយយោធា និង បក្សប្រឆាំងក្រុមយោធា។

លោកអានុទីន (ឆ្វេង) សើចដាក់លោក ណាតថាផុង ពេលចុះហត្ថលេខាលើកិច្ចព្រមព្រៀងកាលពីដើមខែកញ្ញា។

សម្រាប់បរិបទនយោបាយថៃទៅថ្ងៃអនាគត អាចត្រូវគេបែងចែកកាន់តែច្បាស់លាស់ មានតែពីរក្រុមប៉ុណ្ណោះ នោះគឺក្រុមបក្សនយោបាយដែលប្រកាន់ជំហរទោរទន់ទៅរកយោធានិយមដែលមានអំណាចព្រះមហាក្សត្រជាខ្នងបង្អែក និងក្រុមគណបក្សនយោបាយសេរីនិយមដែលមានទំនោរទៅរកការកែទម្រង់របបរាជានិយម និងរបបយោធា ដែលតែងតែជ្រៀតជ្រែកក្នុងកិច្ចការនយោបាយរបស់រដ្ឋាភិបាលស៊ីវិល។

នៅក្នុងនោះ គណបក្សប្រជាជនថៃដែលជាគណបក្សមានប្រជាប្រិយភាពនិងធ្លាប់ឈ្នះការបោះឆ្នោតកាលឆ្នាំ២០២៣ បានប្រកាសជាថ្មីម្តងទៀតថា សមាជិកសភារបស់គណបក្សនេះនឹងមិនបោះឆ្នោតគាំទ្រលោក អានុទីន ឆានវីរៈគុល ឲ្យឡើងធ្វើជានាយករដ្ឋមន្ត្រីម្តងទៀតទេ នៅក្រោយការបោះឆ្នោតថ្ងៃទី៨ខែកុម្ភៈ។

លោក ណាត់ថាផុង រឿងបញ្ញាវុត (Natthapong Ruangpanyawut) ប្រធានគណបក្សប្រជាជន និងជាបេក្ខភាពនាយករដ្ឋមន្ត្រីឈានមុខនៃគណបក្សនេះ ត្រូវបានស្រង់សម្តីដូចបាននិយាយថា៖«យើងមិនទុកចិត្តនរណាដែលក្បត់យើងជាលើកទី២ទេ»។

លោក អានុទីន ឆានវីរៈគុល បានក្បត់ជាមួយគណបក្សប្រជាជនដែលសមាជិកសភានៃគណបក្សនេះបានបោះឆ្នោតសភាគាំទ្រលោកអានុទីនឲ្យឡើងជានាយករដ្ឋមន្ត្រីទី៣២ពេញសិទ្ធិរបស់ប្រទេសថៃ ដោយលោកអានុទីន បានចុះហត្ថលេខាលើកិច្ចព្រមព្រៀងដឹកនាំរដ្ឋាភិបាលត្រឹមតែ៤ខែ ហើយ កិច្ចការស្នូលដែលលោកត្រូវធ្វើគឺ ដឹកនាំការធ្វើប្រជាមតិដើម្បីធ្វើវិសោធនកម្មរដ្ឋធម្មនុញ្ញ ដែលគេជឿថា ផ្តោតសំខាន់លើ «ការកែប្រែរដ្ឋធម្មនុញ្ញបន្ថយអំណាចស្តេច និង ដាក់យោធានៅក្រៅឆាកនយោបាយ»។

តាមការស្រង់សម្តីរបស់សារព័ត៌មាន ខាវសុត លោក រឿងបញ្ញាវុត បាននិយាយក្នុងកម្មវិធី Kamkon Khao Khun Nok Chao ថា៖«ខ្ញុំអាចនិយាយឲ្យច្បាស់ម្តងទៀតថា បន្ទាប់ពីការបោះឆ្នោតបន្ទាប់នេះ មិនថាលទ្ធផលយ៉ាងណាទេ គឺគ្មានសមាជិកសភាពីគណបក្សប្រជាជននឹងបោះឆ្នោតឲ្យលោកអានុទីនជានាយករដ្ឋមន្ត្រីម្តងទៀតដាច់ខាត។ គ្មានកើតឡើងម្តងទៀតទេ! ក្នុងន័យម្យ៉ាងទៀតថា យើងមិនត្រូវទុកចិត្តនរណាដែលក្បត់យើងជាលើកទី២ទេ»៕

រ៉ាន់ រើយ

លោក ណាតថាផុង រឿងបញ្ញាវុត (ឆ្វេង) និង លោក អានុទីន ឆានវីរៈគុល។ Thai Enquirer

The post ប្រធានបក្សប្រជាជនថៃ ថា មិនគាំទ្រ អានុទីន ឱ្យមានឱកាសក្បត់ទៀតទេ appeared first on Kampuchea Thmey Daily.

សារព័ត៌មានថៃ៖ ការកំណត់តម្រុយព្រំដែនរួមគ្នា រីកចម្រើន

Rann Reuy — Sun, 23 Nov 2025 02:25:43 +0000

សារព័ត៌មានថៃបានផ្សព្វផ្សាយពីការរីកចម្រើនលើក្រុមការងារកំណត់បោះបង្គោលព្រំដែនថៃ-កម្ពុជា នៅក្នុងតំបន់ខេត្តត្រាតដល់ខេត្តចន្ទបូរីក្នុងភាគីថៃ ប្រឈមខេត្តកោះកុង ពោធិសាត់ ប៉ៃលិន រហូតដល់ខេត្តបាត់ដំបងរបស់ប្រទេសកម្ពុជា។

រូបភាពនៃការកំណត់តម្រុយព្រំដែនរវាងថៃនិងកម្ពុជា។ Khaosod

នៅក្នុងសេចក្តីរាយការណ៍របស់សារព័ត៌មានថៃ Khaosod ការកំណត់តម្រុយបោះបង្គោលព្រំដែននៅស្រុក Pong Nam Ron ក្នុងខេត្តចន្ទបូរីនៃប្រទេសថៃ ប្រឈមខេត្តប៉ៃលិនរបស់ប្រទេសកម្ពុជា ក្នុងចម្ងាយជាង៨គីឡូម៉ែត្រ សម្រេចបានរហូតដល់៨៩,៧៦ភាគរយ ដែលមានចម្ងាយ ៧.៤៥ គីឡូម៉ែត្រ។

សេចក្តីរាយការណ៍ក៏បានលើកឡើងថា កងកម្លាំងចម្រុះរបស់ថៃ៦០នាក់ បានធ្វើការជាមួយកងកម្លាំងចម្រុះរបស់កម្ពុជា៤០នាក់ ចុះស្រាវជ្រាវ និងដាំបង្គោលបណ្តោះអាសន្នចំនួន១៣ នៅចម្លោះបង្គោលព្រំដែនលេខ៥៧ និង ៥៨។

តាមសេចក្តីរាយការណ៍នោះ ការកំណត់តម្រុយបង្គោល ចំនួន១៤៩ នៃ ១៦៦ បានបញ្ចប់រួចរាល់ ហើយកិច្ចការដែលនៅសេសសល់នឹងបន្តធ្វើនៅថ្ងៃចន្ទទី២៤ខែវិច្ឆិកានេះ ចាប់ពីម៉ោង៩ព្រឹក ដោយមានការណាត់ធ្វើការងាររួមគ្នាជាមួយភាគីកម្ពុជា៕

ភូមិសាស្រ្ត ស្រុក Pong Nam Ron ខេត្តចន្ទបូរីប្រទេសថៃ។ Google Map

The post សារព័ត៌មានថៃ៖ ការកំណត់តម្រុយព្រំដែនរួមគ្នា រីកចម្រើន appeared first on Kampuchea Thmey Daily.

[វិចារណកថា] ក្រោមហេតុផលអ្វីក៏ដោយ អានុទីន មិនអាចគេចវេសពីការចុះហត្ថលេខាសន្តិភាពជាមួយកម្ពុជា នោះទេ

Rann Reuy — Sat, 25 Oct 2025 06:39:26 +0000

មន្ត្រីរដ្ឋាភិបាលថៃ និងសារព័ត៌មានថៃជាច្រើនហាក់ព្យាយាមលេងល្បែងចិត្តសាស្ត្រចុងក្រោយ ដោយការបញ្ចេញ និងផ្សព្វផ្សាយព័ត៌មានជាច្រើនជុំវិញភាពមិនច្បាស់លាស់នៃដំណើរចូលរួមកិច្ចប្រជុំកំពូលអាស៊ានរបស់នាយករដ្ឋមន្ត្រីថៃ លោក អានុទីន ចានវីរៈគុល (Anutin Charnvirakul) ដែលមើលទៅទំនងគេចផុតពីការចុះហត្ថលេខាលើកិច្ចព្រមព្រៀងសន្តិភាពជាមួយប្រទេសកម្ពុជា។

លោក អានួទីន ចានវីរៈគុល នាយករដ្ឋមន្ត្រីថៃ។ FB

ព័ត៌មាននៃការលេងចិត្តសាស្រ្តចុងក្រោយនេះ ដោយយកលេសនៃការសោយទិវង្គតរបស់ព្រះមហាក្សត្រិយានី សិរិគិត (Sirikit) ដែលជាព្រះមាតារបស់មហាក្សត្រថៃបច្ចុប្បន្ននៅថ្ងៃទី២៤ខែតុលានេះ ក្រោយការបញ្ជាក់និងការផ្សព្វផ្សាយជាសាធារណៈ ខណៈដែលដំណឹងសោយទិវង្គតនេះត្រូវបានអ្នកសារព័ត៌មានជនជាតិអៀកឡង់ដែលស្និទ្ធនឹងរាជវាំងថៃធ្លាប់បានបង្ហាញជាច្រើនខែកន្លងមកហើយ។

ក្នុងរយៈពេលដ៏ខ្លីបន្ទាប់ពីការផ្សព្វផ្សាយជាសាធារណៈនៃការសោទិវង្គតនេះ សារព័ត៌មានថៃជាច្រើនបានផ្សព្វផ្សាយដោយសំអាងលើការអះអាងពីការបញ្ជាក់ពីមន្ត្រីរដ្ឋាភិបាលថៃ ប៉ុន្តែគ្មានសម្រង់សម្តីផ្ទាល់នោះទេ អំពីលទ្ធភាពដែលនាយករដ្ឋមន្ត្រី អានុទីន លុបចោលដំណើរទៅចូលរួមកិច្ចប្រជុំកំពូលអាស៊ាននៅទីក្រុងកូឡាឡាំពូ និងជាពិសេសបំផុតនោះ គឺការមិនចូលរួមចុះហត្ថលេខាលើកិច្ចព្រមព្រៀងសន្តិភាពជាមួយកម្ពុជា ដែលមានប្រធានាធិបតីសហរដ្ឋអាមេរិក លោក ដូណាល់ ត្រាំ ជាសាក្សី និង មានការរៀបចំសម្របសម្រួលដោយរដ្ឋាភិបាលម៉ាឡេស៊ី។

ដំណើរការចរចារកដំណោះស្រាយក្នុងជម្លោះព្រំដែនរវាងថៃនិងកម្ពុជា បានប្រព្រឹត្តទៅក្រោមការតាមដានដ៏យកចិត្តទុក្ខបំផុតពីរដ្ឋបាលរបស់រដ្ឋបាលរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ដែលប្រាថ្នាចង់ឃើញកិច្ចព្រមព្រៀងសន្តិភាពផ្លូវការដំបូងនៅតំបន់អាស៊ីអាគ្នេយ៍(ASEAN) ប្រព្រឹត្តទៅក្រោមវត្តមានរបស់លោក។

ការចរចាសន្តិភាពរវាងប្រទេសកម្ពុជានិងថៃ បានប្រព្រឹត្តទៅក្នុងពេលវេលាដ៏តានតឹងបំផុតនិងរយៈពេលខ្លី មុនឈានដល់ការចុះហត្ថលេខាជាផ្លូវការនៅថ្ងៃទី២៦ខែតុលា។ ការចរចារកដំណោះស្រាយដែលថៃមិនចង់ធ្វើ គ្មានឆន្ទៈធ្វើ ប៉ុន្តែថៃមិនអាចគេចវេសរួចនេះ គឺដោយសារតែការដាក់សម្ពាធរបស់រដ្ឋបាលរបស់ប្រធានាធិបតី ដូណាល់ ត្រាំ ដែលតែងតែពោលថា «បញ្ឈប់ការសម្លាប់ជីវិតមនុស្ស»។

វាជាសំណាងល្អមួយសម្រាប់កិច្ចព្រមព្រៀងសន្តិភាពដែលកម្ពុជាចង់បានបំផុត ក្នុងនាមជាប្រទេសតូចជាងថៃ មានសេដ្ឋកិច្ចខ្សោយជាងថៃ និងធ្លាប់ជួបសង្គ្រាមរ៉ាំរៃច្រើនទសវត្សរ៍ ដោយសារតែចាប់តាំងពីសម្រាប់បានកិច្ចព្រមព្រៀងបទឈប់បាញ់កាលថ្ងៃទី២៨ខែកក្កដា គឺសហរដ្ឋអាមេរិកជំរុញឲ្យម៉ាឡេស៊ីរៀបចំកិច្ចប្រជុំចរចាជាបន្តបន្ទាប់ ដើម្បីឈានទៅរកដំណោះស្រាយសន្តិភាពយូរអង្វែង។

ក្រោយការផ្សព្វផ្សាយរបស់បណ្តាញសារព័ត៌មានថៃអំពីការលុបចោលដំណើររបស់អានុទីនមិនបានប៉ុន្មានផង លោក អានុទីនខ្លួនឯង ក៏បានអះអាងតាមសារព័ត៌មានថៃដដែលនៅថ្ងៃទី២៥ តុលា ថា លោកនឹងធ្វើដំណើរទៅប្រទេសម៉ាឡេស៊ី ដើម្បីចុះហត្ថលេខាលើកិច្ចព្រមព្រៀងសន្តិភាពជាមួយកម្ពុជា។

យោងតាមការផ្សព្វផ្សាយរបស់ The Straits Times លោក អានុទីន បានប្រាប់អ្នកសារព័ត៌មានថា លោកនឹងនៅទីក្រុងកូឡាឡាំពួ ដើម្បីចុះហត្ថលេខាលើកិច្ចព្រមព្រៀងនេះនៅថ្ងៃទី ២៦ខែតុលា ហើយនឹងត្រឡប់ទៅប្រទេសថៃវិញបន្ទាប់ពីនោះ សម្រាប់រៀបចំពិធីបុណ្យកាន់ទុក្ខដោយការសោយទីវង្គត់របស់ព្រះមហាក្សត្រិយានី សិរីគិត។

តាមការចេញផ្សាយដដែល នាយករដ្ឋមន្ត្រីថៃ លោក អានុទីន ដែលឡើងកាន់អំណាចក្រោមការដាក់លក្ខខណ្ឌរបស់គណបក្សប្រឆាំងឲ្យរំលាយសភាក្នុងរយៈពេល៤ខែនោះ ក៏បាននិយាយដែរថា លោកនឹងមិនចូលរួមកិច្ចប្រជុំកំពូល Apec នៅសប្តាហ៍ក្រោយដែលរៀបចំឡើងនៅប្រទេសកូរ៉េខាងត្បូងនោះទេ។

ជាការពិតកិច្ចព្រមព្រៀងសន្តិភាពរវាងកម្ពុជានិងថៃ គឺគ្មានភាគីណាមួយអាចលុបចោលដោយចិត្តឯងចង់បាននោះទេ ពីព្រោះថា ក្នុងរយៈពេលដ៏ខ្លីកិច្ចប្រជុំគ្រប់លំដាប់ថ្នាក់ ចាប់តាំងកម្រិតយោធភូមិភាគ (RBC) គណៈកម្មការព្រំដែនចម្រុះ ((JBC) គណៈកម្មការព្រំដែនទូទៅ (GBC) និងកិច្ចប្រជុំកម្រិតអន្តរជាតិចតុភាគី ដោយមានសហរដ្ឋអាមេរិក ម៉ាឡេស៊ី និងភាគីជម្លោះទាំងពីរ គឺសុទ្ធតែបានធ្វើរួចរាល់ និង បានសម្រេចចុះហត្ថលេខាលើកិច្ចព្រមព្រៀងរៀងរាល់លើក។ ដូចនេះ ភាគីថៃ ឬនាយករដ្ឋមន្ត្រីថៃ គ្មានហេតុផលណាគេចវេសពីការចុះហត្ថលេខាលើឯកសារផ្លូវការនេះទេ៕

រ៉ាន់ រើយ

The post [វិចារណកថា] ក្រោមហេតុផលអ្វីក៏ដោយ អានុទីន មិនអាចគេចវេសពីការចុះហត្ថលេខាសន្តិភាពជាមួយកម្ពុជា នោះទេ appeared first on Kampuchea Thmey Daily.

អ្នកនយោបាយជើងចាស់ Chusak Sirinil ដឹកនាំបក្សភឿថៃបណ្តោះអាសន្ន

Rann Reuy — Wed, 22 Oct 2025 04:39:50 +0000

គណៈកម្មាធិការប្រតិបត្តិនៃគណបក្សភឿថៃ បានជ្រើសរើសលោក Chusak Sirinil ដែលជាសមាជិកបក្សមានវ័យចំណាស់ឲ្យដឹកនាំការចាត់ចែងការងារបណ្តោះអាសន្ន រហូតដល់មានការជ្រើសរើសមេដឹកនាំថ្មីរបស់គណបក្ស បន្ទាប់ពីការលាលែងរបស់លោកស្រី ផែថងថា ស៊ីណាវ៉ាត្រ នៅព្រឹកថ្ងៃទី២២ខែតុលានេះ។

យោងសេចក្តីរាយការណ៍របស់សារព័ត៌មានថៃ Khaosod ការសម្រេចនេះបានកើតឡើងភ្លាមៗនៅស្នាក់ការកណ្តាលរបស់គណបក្សភឿថៃនៅថ្ងៃទី២២ខែតុលានេះ ដែល លោក Chusak Sirinil នឹងបន្តដឹកនាំគណបក្សភឿថៃក្នុងនាមជាប្រធានស្តីទីរហូតដល់ការបោះឆ្នោតជ្រើសរើសមេដឹកនាំថ្មី។

អំឡុងពេលគណបក្សភឿថៃកាន់អំណាច លោក Chusak Sirinil បានកាន់តូនាទីស្នូលជារដ្ឋមន្ត្រីនៃទីស្តីការគណៈរដ្ឋមន្ត្រី ហើយ ក្នុងតួនាទីនេះ លោកក៏ធ្លាប់មើលការខុសត្រូវលើនាយកដ្ឋានស៊ើបអង្កេតពិសេស (DSI) បន្ទាប់ពីតុលាការធម្មនុញ្ញបានបណ្តេញរដ្ឋមន្ត្រីក្រសួងយុត្តិធម៌ Tawee Sodsong ពីតួនាទីត្រួតពិនិត្យនេះកាលពីខែឧសភា២០២៥។ យោង thaipbsworld។

តាមសេចក្តីរាយការណ៍នេះ គណបក្សភឿថៃដែលបង្កើតឡើងដោយក្រុមគ្រួសាររបស់លោក ថាក់ស៊ីន ស៊ីណាវ៉ាត្រ ដែលកំពុងជាប់ពន្ធនាគារនោះ គ្រោងរៀបចំសមាជវិសាមញ្ញនៅថ្ងៃទី៣១ខែតុលានេះ ដើម្បីសម្រេចជ្រើសរើសអ្នកដឹកនាំថ្មី។

គណបក្សនានាក្នុងប្រទេសថៃ បានចាប់ផ្តើមរៀបចំរចនាសម្ព័ន្ធថ្មីរបស់ពួកគេ ដើម្បីត្រៀមបោះឆ្នោតនៅសកលដែលគេរំពឹងទុកថា នឹងរៀបចំឡើងនៅក្នុងខែមេសាឆ្នាំ២០២៦ ប៉ុន្តែដោយសារតែការប្រកាសពីបំណងរំលាយសភាមុនកាលកំណត់៤ខែទៀតនោះ ការបោះឆ្នោតនៅប្រទេសថៃអាចនឹងធ្វើឡើងនៅមុនពេលវេលាជាក់ស្តែងដែលបានព្រមព្រៀងរវាងនាយករដ្ឋមន្ត្រី អានុទីន ចានវីរៈគុល និងគណបក្សប្រជាជន ដែលជាបក្សប្រឆាំងធំបំផុត៕

រ៉ាន់ រើយ

The post អ្នកនយោបាយជើងចាស់ Chusak Sirinil ដឹកនាំបក្សភឿថៃបណ្តោះអាសន្ន appeared first on Kampuchea Thmey Daily.

[វិចារណកថា] តើកត្តាអ្វីខ្លះនឹងរារាំង ផែថងថាន ស៊ីណាវ៉ាត្រ ទទួលបានអំណាចវិញ?

Rann Reuy — Wed, 02 Jul 2025 13:22:10 +0000

តុលាការធម្មនុញ្ញរបស់ប្រទេសថៃបានព្យួរតំណែងនាយករដ្ឋមន្ត្រី ផែថងថាន ស៊ីណាវ៉ាត្រ (Paetongtarn Shinawatra) ពីតួនាទីរបស់លោកស្រីដោយរង់ចាំការសម្រេចថាតើលោកស្រីបានរំលោភលើបទដ្ឋានសីលធម៌ក្នុងការរំលោភរដ្ឋធម្មនុញ្ញដែរឬទេ បន្ទាប់ពីមានការសន្ទនាតាមទូរស័ព្ទដ៏ចម្រូងចម្រាសជាមួយ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា។

នាយករដ្ឋមន្ត្រី ផែថងថាន ចុះទៅយកចិត្តមេយោធាភូមិភាគ២ Boonsin Phaklang ក្រោយបែកសារសំឡេង។ FB

ការព្យួរតំណែងនាយករដ្ឋមន្ត្រីថៃនាពេលនេះ គឺជារបត់នយោបាយថ្មីមួយទៀត បន្ទាប់ពីមានរឿងរ៉ាវជាហូរហែរក្នុងការដឹកនាំរបស់លោកស្រី ផែថងថាន ស៊ីណាវ៉ាត្រក្នុងរយៈពេលត្រឹម១០ខែ ហើយរលកនៃនយោបាយថៃ ទំនងជាមិនអាចឲ្យលោកស្រី ផែថងថាន វិលទៅកាន់អំណាចដឹកនាំរដ្ឋាភិបាលជាថ្មីម្តងទៀតទេក្នុងអាណត្តិនេះ។

តើកត្តាអ្វីខ្លះដែលធ្វើឲ្យលោកស្រី ផែថងថាន មិនអាចវិលមកកាន់តួនាទីជានាយករដ្ឋមន្ត្រីវិញ?

មកដល់ពេលនេះ សំណុំរឿងនាយករដ្ឋមន្ត្រីថៃ ផែថងថាន ស៊ីណាវ៉ាត្រ ស្ថិតនៅក្នុងកណ្តាប់ដៃនៃតុលាការធម្មនុញ្ញដែលត្រូវការពេលវេលា១៥ថ្ងៃ ដើម្បីត្រួតពិនិត្យពាក្យបណ្តឹងរបស់ក្រុមសមាជិកព្រឹទ្ធសភា៣៦រូប បន្ទាប់ពីតុលាការធម្មនុញ្ញ បានសម្រេចទទួលយក និងផ្អាកតួនាទីនាយករដ្ឋមន្ត្រី បណ្តោះអាសន្ន មុនការសម្រេចសាលក្រមជាផ្លូវការនៅពាក់ខែកក្កដានេះ។

សាលដីកាតុលាការធម្មនុញ្ញដែលគេរំពឹងថា នឹងមិនអាចប្រគល់តូនាទីដល់លោកស្រី ផែថងថាន ឲ្យវិលត្រឡប់ទៅកាន់អំណាចវិញនោះទេ ដោយសំអាងលើកត្តាមួយចំនួនដែលលេចធ្លោរក្នុងនយោបាយថៃដែលនាំទៅដល់ភាពវឹកវរ។

ការលេចធ្លាយសំឡេងសន្ទនា

សម្រាប់អ្នកនយោបាយថៃ និងមជ្ឈដ្ឋានប្រជាជនថៃ វាជាករណីដ៏ធ្ងន់ធ្ងរបំផុត ដែលនាយករដ្ឋមន្ត្រីនៃប្រទេសដែលមានសេដ្ឋកិច្ចរីកលួតលាស់លំដាប់លេខ២ក្នុងអាស៊ាន ទៅចរចាជាសម្ងាត់ជាមួយមេដឹកនាំនៃប្រទេសមួយទៀត ដែលតូចជាងខ្លួន ក្នុងលក្ខណៈចាញ់ប្រៀប ដែលនាំទៅដល់ការបាក់មុខបាក់មាត់ក្នុងឆាកអន្តរជាតិ។ ប៉ុន្តែផ្អែកតាមការពិតជាក់ស្តែង នាយករដ្ឋមន្ត្រី ដែលមិនមានអំណាចគ្រប់គ្រាន់ ក្តោបអំណាចពេញលេញក្នុងដៃ មិនអាចបញ្ជាទាហានរបស់ខ្លួន គឺតែងតែប្រើរបៀបចរចាសម្ងាត់ដើម្បីឲ្យភាគីម្ខាងទៀតយោគយល់ល់ខ្លួន ដើម្បីធ្វើឲ្យយ៉ាងឲ្យជីវិតនយោបាយរបស់ខ្លួនបន្តរស់។

ការដាក់សម្ពាធពីគណបក្សនយោបាយប្រឆាំង

គណបក្សនយោបាយក្នុងរដ្ឋាភិបាលចម្រុះ Bhumjaithai បានប្រកាសដកខ្លួនចេញពីរដ្ឋាភិបាល ដោយដាក់ការទាមទារឲ្យនយោបាយរដ្ឋមន្ត្រីចុះចេញពីអំណាច គឺជាទម្ងន់នយោបាយមួយដ៏ធ្ងន់ និងជាបន្ទុកដែលពិបាកដោះខ្លួនរបស់លោកស្រី ផែថងថាន ដោយសារតែគណបក្សដកខ្លួនចេញនេះ ជាគណបក្សដ៏ធំទី២ក្នុងរដ្ឋាភិបាលចម្រុះ។ ក្រៅពីគណបក្សនេះ គណបក្ស United Thai Nation ដែលជាគណបក្សធំលេខ៣ក្នុងរដ្ឋាភិបាលចម្រុះក៏បានទាមទារដាច់ខាតឲ្យ លោកស្រី ផែថងថាន ចុះចេញពីអំណាច បើទោះបីជាខ្លួនបង្ហាញជំហរបន្តរួមរស់ជាមួយរដ្ឋាភិបាលចម្រុះ។ ក្នុងបុព្វហេតុនេះ ធ្វើឲ្យរដ្ឋាភិបាលចម្រុះប្រឈមការដួលរលំដោយសារតំណាងរាស្រ្តក្នុងរដ្ឋាភិបាលចម្រុះតិចជាងក្រៅរដ្ឋាភិបាល។

ការដាក់សម្ពាធពីក្រុមអ្នកតវ៉ាប្រឆាំងរដ្ឋាភិបាល

ក្រុមអ្នកតវ៉ាបានប្រកាសរួចជាស្រេចទៅហើយក្នុងថ្ងៃតវ៉ាលើកដំបូងកាលថ្ងៃទី២៨ខែមិថុនា ពីការទាមទារដាច់ខាតឲ្យលោកស្រី ផែថងថាន ស៊ីណាវ៉ាត្រ ចុះចេញពីអំណាចដាច់ខាត ហើយការតវ៉ារបស់ពួកគេគឺជាផ្នែកមួយនៃការដាក់សម្ពាធលើការសម្រេចរបស់តុលាការធម្មនុញ្ញ។ ក្នុងពេលតវ៉ានោះ ពួកគេបានបេ្តជ្ញាថា «ការតវ៉ារបស់ពួកគេនឹងកាន់តែធំ នៅពេលដែលនាយករដ្ឋមន្ត្រីបដិសេធចុះចេញពីអំណាច»។ បន្ទាប់ពីការតវ៉ានោះ តុលាការធម្មនុញ្ញ បានព្យួរតំណែងនាយករដ្ឋមន្ត្រី ផែថងថាន ដូចការរំពឹងទុក ហើយ លោកស្រី ផែថងថាន ក៏មិនបានរឹងទទឺងបដិសេធការសម្រេចនោះដែរ ដែលជាការបង្ហាញថា លោកស្រី ផែថងថាន ដឹងខ្លួនរួចជាស្រេចអំពីអំណាចដ៏ទន់ខ្សោយរបស់ខ្លួន។

អំណាចព្រឹទ្ធសភា

បណ្តឹងរបស់ព្រឹទ្ធសមាជិកថៃទៅកាន់តុលាការធម្មនុញ្ញមិនមែនជាលើកទី១ទេ សម្រាប់ការបញ្ឈរជើងនាយករដ្ឋមន្ត្រីនោះ។ កាលឆ្នាំមុន អតីតនាយករដ្ឋមន្ត្រីថៃ លោក សេដ្ឋា ថាវីស៊ីន មកពីគណបក្សភឿថៃដូចគ្នា បានរងបណ្តឹងរំលោភរដ្ឋធម្មនុញ្ញនេះ ដោយសារតែការតែងតាំងអតីតមេធាវីដែលស្និទ្ធជាមួយអតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រឲ្យចូលបម្រើការក្នុងគណៈរដ្ឋមន្ត្រីរបស់លោក។ ពេលនោះ តុលាការធម្មនុញ្ញ បានសម្រេចព្យួរតំណែងនាយករដ្ឋមន្ត្រី លោក សេដ្ឋា ថាវីស៊ីន និងឈានទៅបណ្តេញចេញជាផ្លូវការកាលខែសីហាឆ្នាំ២០២៤ ដោយចោទប្រកាន់ពីការខ្វះសុចរិភាព។ ក្នុងន័យនេះ កំហុសរបស់លោក សេដ្ឋា ថាវីស៊ីន ហាក់តូចតាចណាស់ធៀបនឹងអ្វីដែលកើតមានចំពោះលោស្រី ផែថងថាន ស៊ីណាវ៉ាត្រនៅពេលនេះ។

ជម្លោះជាមួយក្រុមយោធា

នៅក្នុងប្រទេសថៃ គេដឹងយ៉ាងទូលំទូលាយថា ក្រុមមេដឹកនាំយោធាមានទំនាក់ទំនងជិតស្និទ្ធនឹងព្រះរាជវាំងថៃ ដែលមិនអាចអនុញ្ញតឲ្យបុគ្គល ឬគណបក្សណាមួយប្រឆាំងបានឡើយ។ ក្នុងសារសំឡេងបែកធ្លាយ ច្បាស់ណាស់ថា លោកស្រី ផែថងថាន បានទម្លាក់កំហុសទៅលើមេដឹកនាំយោធាថៃ ដែលបង្កភាពល្អក់កករ បង្កអរិភាពនៅតាមព្រំដែនថៃនិងកម្ពុជា ដែលនាំទៅដល់ជម្លោះបង្ហូរឈាមផ្ទុះឡើង និងរាលដាលដល់ជម្លោះពាណិជ្ជកម្មឆ្លងដែន និងជម្លោះផ្សេងៗផ្ទុះឡើងជាបន្តបន្ទាប់។ នៅក្នុងស្ថាប័ន ព្រឹទ្ធសភា និងចៅក្រមតុលាការធម្មនុញ្ញ សុទ្ធតែមានឥទ្ធិពលយ៉ាងខ្លាំងពីក្រុមយោធា ព្រោះថាមេយោធាសំខាន់ៗដែលចូលនិវត្តន៍ គឺបានតួនាទីជាសមាជិកព្រឹទ្ធសភា។

រ៉ាន់ រើយ

The post [វិចារណកថា] តើកត្តាអ្វីខ្លះនឹងរារាំង ផែថងថាន ស៊ីណាវ៉ាត្រ ទទួលបានអំណាចវិញ? appeared first on Kampuchea Thmey Daily.

បាតុករថៃផ្តើមប្រមូលផ្តុំនៅក្រុងបាងកកទាមទារនាយករដ្ឋមន្ត្រីចុះចេញ

Rann Reuy — Sat, 28 Jun 2025 06:02:24 +0000

សារព័ត៌មានថៃបានផ្សាយថា បាតុករថៃមកពីទីក្រុងបាងកក និងខេត្តមួយចំនួនកំពុងសម្រុកចូលតំបន់ប្រមូលផ្តុំនៅកណ្តាលក្រុងបាងកក ចាប់តាំងពីពេលព្រឹក ដើម្បីចូលរួមបាតុកម្មមួយដែលរៀបចំឡើងក្នុងបំណងទាមទារឲ្យនាយករដ្ឋមន្ត្រីថៃ ផែថងថាន លាលែងពីដំណែង ចំថ្ងៃដែលនាយករដ្ឋមន្ត្រីថៃ ធ្វើដំណើរទៅកាន់ខែឈាងរ៉ៃភាគខាងជើងប្រទេសដើម្បីពិនិត្យមើលស្ថានភាពទឹកជំនន់ដែលកំពុងបង្កការលិចលង់។

សារព័ត៌មានថៃ PBS World បានផ្សាយនៅមុននេះថា ការជួបជុំដែលគ្រោងនឹងចាប់ផ្តើមនៅម៉ោង ៤រសៀល ត្រូវបានប្តូរទៅកាន់វេលាព្រឹកវិញជាមួយកម្មវិធីផ្សេងៗ រួមមានការថ្លែងសុន្ទរកថារបស់មេដឹកនាំតវ៉ា និងការរៀបចំការប្រគុំតន្ត្រី។

ដំណាក់កាលដំបូងនៃការតវ៉ាត្រូវបានរៀបចំឡើងទល់មុខផ្លូវ Phahonyothin ដើម្បីកាត់បន្ថយការរំខានដល់អ្នកជំងឺនៅក្នុងមន្ទីរពេទ្យក្បែរនោះ។ គំនូសចរាចរណ៍មួយជុំវិញវិមានក្នុងរដ្ឋធានីបាងកក ត្រូវបានបិទមិនឱ្យធ្វើចរាចរណ៍ ហើយតង់ស្នាក់នៅត្រូវបានដំឡើងសម្រាប់ផ្ទុកក្រុមបាតុករដែលប្រហែលជាត្រូវការសម្រាកក្នុងអំឡុងពេលបាតុកម្មពេញមួយថ្ងៃ ដែលគ្រោងនឹងបញ្ចប់នៅម៉ោង៩យប់។

តាមសេចក្តីរាយការណ៍ដដែល ការជួបជុំស្រដៀងគ្នានេះកំពុងត្រូវបានរៀបចំឡើងក្នុងខេត្តប្រហែលដប់។

លោកនាយឧត្តមសេនីយ៍ Archayon Kraithong អ្នកនាំពាក្យនៃអគ្គស្នងការនគរបាលជាតិថៃ ត្រូវបានស្រង់សម្តីដោយសារសារព័ត៌មានថៃ បាននិយាយថា អាជ្ញាធរមិនមានគម្រោងបិទតំបន់តវ៉ានោះទាំងមូលទេ ដើម្បីធ្វើចរាចរណ៍ ប៉ុន្តែអ្នកបើកបរត្រូវបានណែនាំឲ្យជៀសវាងតំបន់នោះ។

ឯកទៅ នាយករដ្ឋមន្ត្រី ផែថងថាន ស៊ីណាវ៉ាត្រ (Paetongtarn Shinawatra) ដែលបានធ្វើ់ដំណើរកាន់ខេត្តឈាងរ៉ៃភាគខាងជើងប្រទេសដើម្បីធ្វើសកម្មភាពជួយសង្គ្រោះទឹកជំនន់ បាននិយាយនៅព្រឹកនេះថា លោកស្រីបានត្រៀមខ្លួនរួចជាស្រេចដើម្បីពិភាក្សាជាមួយមេដឹកនាំបាតុកម្ម ប្រសិនបើពួកគេចង់ ដូចដែលលោកស្រីសង្ឃឹមថាការតវ៉ានឹងប្រព្រឹត្តទៅដោយសន្តិភាព។

លោកស្រីបានបន្ថែមថា លោកស្រីបានណែនាំដល់មន្ត្រីពាក់ព័ន្ធឱ្យធានានូវសន្តិភាព និងសណ្តាប់ធ្នាប់ក្នុងពេលមានបាតុកម្ម។

នាយករដ្ឋមន្ត្រី ផែថងថាន កំពុងប្រឈមសម្ពាធឲ្យចុះចេញពីអំណាចបន្ទាប់ពីបែកធ្លាយសារសំឡេងសន្ទនាជាមួយសម្តេច ហ៊ុន សែន ប្រធានព្រឹទ្ធសភាកម្ពុជា ជុំវិញបញ្ហាព្រំដែន ដែលលោកស្រី ស្នើឲ្យភាគីកម្ពុជាបើកទ្វាច្រកព្រំដែននៅមុនដូចគ្នា និងដូចមុន ខណៈសម្តេច ហ៊ុន សែន បានទាមទារថា ភាគីណាបិទមុន ត្រូវតែបើកមុន ហើយ កម្ពុជាត្រៀមតែធ្វើតាមប៉ុណ្ណោះ។

ដោយសារសារសំឡេងសន្ទនានោះហើយ ទាំងលោកស្រីផែថងថានផ្ទាល់ និង រដ្ឋាភិបាលចម្រុះរបស់លោកស្រី ប្រឈមហានិភ័យក្នុងការបាត់បង់អំណាច និងរំលាយសភា ឬអាចឈានទៅដល់ការធ្វើរដ្ឋប្រហារយោធាទៀតផង៕

រ៉ាន់ រើយ

The post បាតុករថៃផ្តើមប្រមូលផ្តុំនៅក្រុងបាងកកទាមទារនាយករដ្ឋមន្ត្រីចុះចេញ appeared first on Kampuchea Thmey Daily.

បេក្ខជននាយករដ្ឋមន្ត្រីទី៣នៃបក្សភឿថៃ បានត្រៀមខ្លួនរួចរាល់ ចំពេលវិបត្តិនយោបាយ

Rann Reuy — Fri, 27 Jun 2025 03:23:12 +0000

យោងសេចក្តីរាយការណ៍របស់សារព័ត៌មានថៃ Khaosod នៅព្រឹកថ្ងៃសុក្រនេះ បេក្ខជននាយករដ្ឋមន្ត្រីទីបីរបស់គណបក្សភឿថៃ លោក ឆៃក្សេម នីតិសិរិ (Chaikasem Nitisiri) បានប្រាប់កម្មវិធីទូរទស្សន៍ក្នុងស្រុកផ្សាយនៅព្រឹកថ្ងៃសុក្រនេះថា លោកបានត្រៀមខ្លួនជាស្រេចដើម្បីក្លាយជានាយករដ្ឋមន្ត្រីបន្ទាប់ ប្រសិនបើវាចាំបាច់សម្រាប់ប្រទេសថៃដែលធ្លាក់ចូលក្នុងវិបត្តិនយោបាយដ៏ធ្ងន់ធ្ងរ។

ការលើកឡើងនេះ ចំពេលមានសម្ពាធកើនឡើងចំពោះនាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រ ឲ្យចុះចេញពីអំណាច បន្ទាប់ពីមានរឿងអាស្រូវលេចធ្លាយការសន្ទនាជាមួយប្រធានព្រឹទ្ធសភាកម្ពុជា សម្តេចតេជោ ហ៊ុន សែន និង ការដាក់សម្ពាធពីបក្សប្រឆាំង និងស្ថាប័នជាតិសំខាន់ៗរបស់ប្រទេសថៃ។

ប្រវត្តិខ្លីៗរបស់ លោក Chaikasem Nitisiri ដែលទំនងក្លាយជានាយករដ្ឋមន្ត្រីបន្ទាប់របស់ថៃ?

លោក Chaikasem Nitisiri កើតនៅថ្ងៃទី ២៦ ខែសីហា ឆ្នាំ ១៩៤៨ មានអាយុ ៧៧ឆ្នាំ។ គាត់គឺជាអតីតទីប្រឹក្សារបស់អតីតនាយករដ្ឋមន្ត្រី សេដ្ឋា ថាវីស៊ីន (Srettha Thavisin) និង ប្រធានគណៈកម្មាធិការដឹកនាំយុទ្ធសាស្ត្រ និងតម្រង់ទិសនយោបាយ។

លោក Chaikasem Nitisiri ធ្លាប់កាន់តំណែងជារដ្ឋមន្ត្រីក្រសួងយុត្តិធម៌ ក្នុងរដ្ឋបាលរបស់ លោកស្រី យីងឡាក់ ស៊ីណាវ៉ាត្រ ដែលបានកាន់អំណាចចន្លោះឆ្នាំ២០១១ ដល់២០១៤ ជាពេលដែលក្រុមយោធាដឹកនាំដោយ ឧត្តមសេនីយ៍ ប្រាយុធ ចាន់អូចា បានធ្វើរដ្ឋប្រហារទម្លាក់ ហើយប្រកាសដាក់ប្រទេសក្នុងគ្រាអាសន្ន។

លោក Chaikasem Nitisiri ធ្លាប់ជាទីប្រឹក្សាមជ្ឈមណ្ឌលសម្រាប់ដំណោះស្រាយស្ថានការណ៍គ្រាអាសន្នក្រោមការគ្រប់គ្រងរបស់ អតីតនាយករដ្ឋមន្ត្រី លោកស្រី យីងឡាក់ ស៊ីណាវ៉ាត្រ។ គាត់ក៏ជាអតីតសមាជិកសភា អតីតអគ្គមេធាវី និងជាអតីតព្រះរាជអាជ្ញាជាន់ខ្ពស់ (ទីប្រឹក្សាអគ្គមេធាវី) នៅការិយាល័យអគ្គមេធាវី៕

The post បេក្ខជននាយករដ្ឋមន្ត្រីទី៣នៃបក្សភឿថៃ បានត្រៀមខ្លួនរួចរាល់ ចំពេលវិបត្តិនយោបាយ appeared first on Kampuchea Thmey Daily.

ប្រទេស​ថៃ Archives - Kampuchea Thmey Daily

​​កម្ពុជា​និង​ថៃ​​​ឯកភាព​​​​លើ​​៥ទិដ្ឋ​​ភាព​​ ក្នុងកិច្ច​ប្រជុំ​ត្រីភាគី​នៅ​ចិន​​

​ប្រធានបក្ស​ប្រជាជន​ថៃ​ ថា មិន​គាំទ្រ​​ អានុទីន​ ឱ្យ​មានឱកាសក្បត់​ទៀតទេ​​

​សារ​ព័ត៌មានថៃ៖ ការកំណត់តម្រុយ​ព្រំ​ដែនរួ​មគ្នា​ រីកចម្រើន​

អ្នកនយោបាយជើងចាស់ ​​​Chusak Sirinil ដឹកនាំ​បក្ស​​ភឿថៃ​​​បណ្តោះអាសន្ន​​

[វិចារណកថា​] តើ​កត្តាអ្វីខ្លះ​នឹងរារាំង​ ផែថងថាន ស៊ីណាវ៉ាត្រ ​ទទួល​បាន​​អំណាចវិញ​​?​

​​បាតុករ​ថៃ​​​​​ផ្តើម​ប្រមូលផ្តុំ​នៅ​ក្រុង​បាងកក​ទាមទារ​​​នាយករដ្ឋមន្ត្រី​ចុះ​ចេញ​

​​បេក្ខជន​នាយករដ្ឋមន្ត្រី​ទី៣​នៃ​បក្សភឿថៃ បាន​ត្រៀម​ខ្លួន​​​រួច​រាល់ ចំពេលវិបត្តិនយោបាយ​​​

ប្រទេសថៃ Archives - Kampuchea Thmey Daily

កម្ពុជានិងថៃឯកភាពលើ៥ទិដ្ឋភាព ក្នុងកិច្ចប្រជុំត្រីភាគីនៅចិន

ប្រធានបក្សប្រជាជនថៃ ថា មិនគាំទ្រ អានុទីន ឱ្យមានឱកាសក្បត់ទៀតទេ

សារព័ត៌មានថៃ៖ ការកំណត់តម្រុយព្រំដែនរួមគ្នា រីកចម្រើន

អ្នកនយោបាយជើងចាស់ Chusak Sirinil ដឹកនាំបក្សភឿថៃបណ្តោះអាសន្ន

[វិចារណកថា] តើកត្តាអ្វីខ្លះនឹងរារាំង ផែថងថាន ស៊ីណាវ៉ាត្រ ទទួលបានអំណាចវិញ?

បាតុករថៃផ្តើមប្រមូលផ្តុំនៅក្រុងបាងកកទាមទារនាយករដ្ឋមន្ត្រីចុះចេញ

បេក្ខជននាយករដ្ឋមន្ត្រីទី៣នៃបក្សភឿថៃ បានត្រៀមខ្លួនរួចរាល់ ចំពេលវិបត្តិនយោបាយ