ប្រទេសហ្វាំងឡុង Archives - Kampuchea Thmey Daily

ហ្វាំងឡង់ដកខ្លួនពីសន្ធិសញ្ញាគ្រាប់មីន ធ្វើតាមប្រទេស៤ទៀតដោយត្រៀមខ្លួនសម្រាប់សង្គ្រាម

Rann Reuy — Sun, 13 Jul 2025 02:26:43 +0000

ហ្វាំងឡង់សមាជិកអង្គការណាតូដែលមានព្រំដែនជាប់រុស្ស៊ីវែងជាងគេបំផុត និងជាប្រទេសទី៥ក្នុងអឺរ៉ុបខាងកើត បានប្រកាសជាផ្លូវការដកខ្លួនចេញពីសន្ធិសញ្ញាអូតាវ៉ាដែលហាមប្រាមគ្រាប់មីនប្រឆាំងមនុស្ស ដោយលើកឡើងពីការកើនឡើងនៃការព្រួយបារម្ភផ្នែកសន្តិសុខនៅក្នុងតំបន់។

ប្រទេសហ្វាំងឡង់ដែលទើបក្លាយជាសមាជិករបស់អង្គការណាតូក្នុងឆ្នាំ២០២៣ ក្រោយរុស្ស៊ីលើកទ័ពចូលឈ្លានពានអ៊ុយក្រែន ដោយផ្លាស់ប្តូរពីជំហរអព្យាក្រិត្យរាប់សិបទសវត្សរ៍ បានផ្លាស់ប្តូរគោលជំហរទៅរកការការពារខ្លួន និងការត្រៀមខ្លួនចំពោះសង្គ្រាមដែលអាចកើតមានឡើង។

ទូរទស្សន៍ហ្វាំងឡង់ YLE news បានរាយការណ៍កាលថ្ងៃសៅរ៍ ឲ្យដឹងថា ការប្រកាសដកខ្លួនដោយជូនដំណឹងទៅកាន់អង្គការសហប្រជាជាតិរបស់ប្រទេសហ្វាំងឡង់នេះ នឹងចូលជាធរមាននៅខែមករាក្រោយនេះ។ ប្រទេសហ្វាំងឡង់បានចុះហត្ថលេខាចូលសន្ធិសញ្ញាអូតាវ៉ាក្នុងឆ្នាំ២០១២ ដែលសន្ធិសញ្ញានេះមានគោលដៅ ហាមឃាត់ការប្រើប្រាស់ ការស្តុកទុក ការផលិត និងការផ្ទេរគ្រាប់មីនប្រឆាំងមនុស្ស។

ទោះជាយ៉ាងណាក៏ដោយ ទីក្រុង Helsinki បានចាប់ផ្តើមរៀបចំដើម្បីចាកចេញពីអនុសញ្ញានៅដើមឆ្នាំនេះ ដោយដើរតាមគន្លងនៃប្រទេសជិតខាងដូចជា អេស្តូនី (Estonia) ប្រទេសឡេតូនី (Latvia) ប្រទេសលីទុយអានី (Lithuania) និង ប្រទេសប៉ូឡូញ (Poland) ដែលសុទ្ធតែមានព្រំប្រទល់ជាប់នឹងប្រទេសរុស្ស៊ី។

សំណល់គ្រាប់មីន និងគ្រាប់អាវុធផ្សេងៗទៀត ប្រឆាំងមនុស្សដែលគេដោះបានកន្លងមក។ carnegieendowment.org

ក្រសួងការបរទេសហ្វាំងឡង់ បាននិយាយថា ៖«ការសម្រេចចិត្តដកខ្លួនចេញពីអនុសញ្ញាគឺផ្អែកលើតម្រូវការការពារជាតិរបស់ប្រទេសហ្វាំងឡង់នៅក្នុងបរិយាកាសសន្តិសុខដែលកាន់តែយ៉ាប់យ៉ឺន»។

ក្រសួងការបរទេសហ្វាំងឡង់ បានបន្ថែមថា៖«ការដកខ្លួនចេញពីអនុសញ្ញានេះ នឹងអាចឱ្យប្រទេសហ្វាំងឡង់ដាក់ឱ្យប្រើប្រាស់ឡើងវិញនូវគ្រាប់មីនប្រឆាំងមនុស្ស ដល់កម្រិតនៃមធ្យោបាយការពារដែលមានរបស់ខ្លួន»។

ទោះបីជាមានការដកថយក៏ដោយ ក៏ហ្វាំងឡង់បាននិយាយថា ខ្លួននៅតែប្តេជ្ញាចិត្តចំពោះគោលដៅមនុស្សធម៌នៃសន្ធិសញ្ញា ហើយនឹងបន្តគាំទ្រដល់កិច្ចខិតខំប្រឹងប្រែងដោះមីនជាសកល។

សភាហ្វាំងឡង់បានអនុម័តសំណើររបស់រដ្ឋាភិបាលក្នុងការចាកចេញពីសន្ធិសញ្ញាកាលពីខែមិថុនាដោយសំឡេង ១៥៧ទល់សំឡេងប្រឆាំង១៨ ។

ប្រធានាធិបតី Alexander Stubb បានទទួលស្គាល់ការរិះគន់ចំពោះការសម្រេចចិត្តនេះ ប៉ុន្តែបានការពារវិធានការនេះជាការចាំបាច់សម្រាប់សន្តិសុខជាតិ។ លោកបាននិយាយថា «ហ្វាំងឡង់មិនប្រឈមមុខនឹងការគំរាមកំហែងផ្នែកយោធាភ្លាមៗនោះទេ ប៉ុន្តែការផ្លាស់ប្តូរនៅក្នុងបរិយាកាសប្រតិបត្តិការទាមទារឱ្យយើងពង្រឹងការការពាររបស់យើង»។

លោកបានបន្ថែមថា៖«យើងមានព្រំដែនដ៏វែងជាមួយរុស្ស៊ី ដែលមិនមែនជាភាគីនៃកិច្ចព្រមព្រៀងអូតាវ៉ា។ យើងបានមើលឃើញពីរបៀបដែលរុស្ស៊ីធ្វើសង្រ្គាមនៅថ្ងៃនេះ» ដោយសំដៅទៅលើជម្លោះដែលកំពុងបន្តនៅក្នុងប្រទេសអ៊ុយក្រែន និងភាពតានតឹងក្នុងតំបន់កាន់តែទូលំទូលាយ។

ហ្វាំងឡង់មានព្រំដែនវែងជាងគេជាមួយរុស្ស៊ីនៃប្រទេសណាតូដែលលាតសន្ធឹង ១៣០០គីឡូម៉ែត្រ។

នៅឆ្នាំ ១៩៣៩-១៩៤០ ហ្វាំងឡង់បានប្រយុទ្ធនិងចាញ់សង្រ្គាមបីខែប្រឆាំងនឹងសហភាពសូវៀតដែលបានបញ្ជូនកងកម្លាំងរបស់ខ្លួនឆ្លងកាត់ព្រំដែនហ្វាំងឡង់នៅដើមសង្រ្គាមលោកលើកទីពីរ៕

រ៉ាន់ រើយ

The post ហ្វាំងឡង់ដកខ្លួនពីសន្ធិសញ្ញាគ្រាប់មីន ធ្វើតាមប្រទេស៤ទៀតដោយត្រៀមខ្លួនសម្រាប់សង្គ្រាម appeared first on Kampuchea Thmey Daily.

រដ្ឋមន្ត្រីការពារជាតិហ្វាំងឡង់តឿនអឺរ៉ុបកាន់តែខ្លាំងឲ្យគិតគួរការពារជាតិដោយគ្មានអាមេរិក

Rann Reuy — Sat, 05 Apr 2025 09:25:11 +0000

លោក Antti Hakkanen រដ្ឋមន្ត្រីការពារជាតិហ្វាំងឡង់ ដែលជាប្រទេសទើបចូលជាសមាជិករបស់អង្គការណាតូកាលឆ្នាំ២០២៣ ក្រោយក្តីបារម្ភអំពីការឈ្លានពានរបស់រុស្ស៊ី បានជំរុញឲ្យអឺរ៉ុបខ្លួនឯងបង្កើតផែនទីបង្ហាញផ្លូវច្បាស់លាស់សម្រាប់វិស័យការពារជាតិអឹរ៉ុប ដោយងាកចេញពីការពឹងផ្អែកលើអាមេរិកជាបណ្តើរៗ។

រដ្ឋមន្ត្រីការពារជាតិហ្វាំងឡង់ លោក Antti Hakkanen។ topwar.ru

សេចក្តីរាយការណ៍របស់សារព័ត៌មាន Financial Times (FT) ដែលមានមូលដ្ឋាននៅទីក្រុងឡុងដ៍នៃប្រទេសអង់គ្លេសថា បានស្រង់សម្តីរដ្ឋមន្ត្រីការពារជាតិហ្វាំងឡង់ ដែលនិយាយថា តំបន់អឹរ៉ុបត្រូវតែបង្កើតផែនទីបង្ហាញផ្លូវឱ្យបានច្បាស់លាស់មួយក្នុងការសម្របសម្រួលជាមួយសហរដ្ឋអាមេរិក ដើម្បីទទួលយកបន្តិចម្តងៗនូវទំនួលខុសត្រូវការពារជាតិរបស់ទ្វីបនេះ។

លោករដ្ឋមន្ត្រី Hakkanen បានកត់សម្គាល់ថា អឺរ៉ុបមិនអាចសម្របខ្លួនចំពោះការផ្លាស់ប្តូរដែលដាច់គ្នាក្នុងសមត្ថភាពការពារ ដែលអាចផ្តល់ឱ្យរុស្ស៊ីនូវឱកាសដើម្បីទាញយកចន្លោះប្រហោងណាមួយនៅក្នុងសន្តិសុខក្នុងតំបន់អឺរ៉ុប។

ប្រទេសនៅក្នុងតំបន់អឺរ៉ុបហាក់បានងាកចេញពីការពឹងផ្អែកសហរដ្ឋអាមេរិក និងបង្កើនការរួមកម្លាំងគ្នាកាន់តែខ្លាំងជាងមុន បន្ទាប់ពី ប្រធានាធិបតី ដូណាល់ ត្រាំ បានងាកទៅចរចាជាមួយវិមានក្រឹមឡាំងលើជម្លោះនៅអ៊ុយក្រែន ដោយផាត់ចោលភាគីអឺរ៉ុបដែលតែងតែរួមកម្លាំងជាមួយសហរដ្ឋអាមេរិកក្រោមរដ្ឋបាលរបស់អតីតប្រធានាធិបតី ចូ បៃដិន។

រដ្ឋបាលលោក ដូណាល់ ត្រាំ បានធ្វើឲ្យសម្ព័ន្ធមិត្តអឺរ៉ុបរងារយ៉ាងខ្លាំង ចាប់តាំងពី ខ្លួនចូលកាន់តំណែងជាប្រធានាធិបតីអាមេរិកលើកទី២ កាលពីថ្ងៃទី២០ខែមករាឆ្នាំ២០២៥ នឹងបានងាកទៅចរចាទ្វេភាគីជាមួយរុស្ស៊ីលើការបញ្ចប់ជម្លោះនៅអ៊ុយក្រែន។

សារព័ត៌មាន Kyiv Independent បានរាយការណ៍ថា អគ្គលេខាធិការអង្គការណាតូ លោក Mark Rutte បានធានាដល់សម្ព័ន្ធមិត្តក្នុងតំបន់អឺរ៉ុបថា សហរដ្ឋអាមេរិកមិនមានផែនការសម្រាប់ការដកខ្លួនភ្លាមៗពីអឺរ៉ុបនោះទេ ប៉ុន្តែការកាត់បន្ថយកម្លាំងណាមួយនឹងត្រូវបានសម្របសម្រួលជាមួយដៃគូអឺរ៉ុប។

ជាមួយគ្នានោះ រដ្ឋមន្ត្រីការបរទេសអាមេរិក លោក Marco Rubio ក៏បានបញ្ជាក់ផងដែរថា ខណៈដែលប្រធានាធិបតី ដូណាល់ ត្រាំ គាំទ្រអង្គការណាតូ លោករំពឹងថា សម្ព័ន្ធមិត្តអឺរ៉ុបនឹងបង្កើត «ផ្លូវច្បាស់លាស់» ដើម្បីកាត់បន្ថយការពឹងផ្អែកលើអ្នកបង់ពន្ធអាមេរិក។

យោងតាមអគ្គលេខាធិការអង្គការណាតូ បច្ចុប្បន្ននេះ អឺរ៉ុបពឹងផ្អែកយ៉ាងខ្លាំងលើសហរដ្ឋអាមេរិកសម្រាប់ផលិតផលការពារជាតិសំខាន់ៗ ដូចជាប្រព័ន្ធការពារដែនអាកាស និងមីស៊ីល កាំជ្រួចមីស៊ីលរយៈចម្ងាយឆ្ងាយ និងហេដ្ឋារចនាសម្ព័ន្ធបញ្ជា និងគ្រប់គ្រង។

សម្ព័ន្ធមិត្តណាតូក៏ពឹងផ្អែកលើសហរដ្ឋអាមេរិកសម្រាប់យន្តហោះដឹកធ្ងន់ៗដែលចាំបាច់សម្រាប់ការផ្លាស់ប្តូរកងកម្លាំងពាសដែកយ៉ាងឆាប់រហ័ស។

ដោយការងាកចេញពីបន្ទុកអ្នកបង់ពន្ធអាមេរិក បន្ទុកនៃសមត្ថភាពការពារជាតិកម្រិតធម្មតាត្រូវតែត្រូវបានផ្លាស់ប្តូរទៅឱ្យអ្នកបង់ពន្ធអឺរ៉ុបវិញ។ នេះបើតាម លោករដ្ឋមន្ត្រីការពារជាតិហ្វាំងឡង់ Hakkanen ដែលលោកជឿថា ដើម្បីធានាឱ្យមានការចែករំលែកបន្ទុកដែលមានតុល្យភាពបន្ថែមទៀតជាមួយសហរដ្ឋអាមេរិក ខណៈដែលរដ្ឋធានីអឺរ៉ុបចូលរួមពិភាក្សាអំពីការបង្កើនសមត្ថភាពយោធារបស់ពួកគេ មានការព្រួយបារម្ភថា សហរដ្ឋអាមេរិកអាចនឹងកាត់បន្ថយការគាំទ្ររបស់ខ្លួនលឿនជាងអឺរ៉ុបអាចបង្កើនការចំណាយលើវិស័យការពារជាតិរបស់ខ្លួន៕

ដោយ រ៉ាន់ រើយ

The post រដ្ឋមន្ត្រីការពារជាតិហ្វាំងឡង់តឿនអឺរ៉ុបកាន់តែខ្លាំងឲ្យគិតគួរការពារជាតិដោយគ្មានអាមេរិក appeared first on Kampuchea Thmey Daily.

ហ្វាំងឡង់ ជ្រើសរើសបានប្រធានាធិបតីថ្មី ជាអតីតនាយករដ្ឋមន្ត្រី

Bun sopheap — Mon, 12 Feb 2024 10:09:08 +0000

អតីតនាយករដ្ឋមន្ត្រីហ្វាំងឡង់លោក Alexander Stubb កាលពីថ្ងៃអាទិត្យបានឈ្នះតំណែងប្រធានាធិបតីលើអតីតរដ្ឋមន្ត្រីការបរទេស Pekka Haavisto ក្នុងការប្រជែងគ្នាយ៉ាងប្រកៀកប្រកិត ។ នេះបើយោងតាមការចេញផ្សាយរបស់សារពត៌មាន AP កាលពីថ្ងៃទី១១ ខែកុម្ភៈកន្លងទៅ ។

លទ្ធផលនៃការរាប់សន្លឹកឆ្នោតទាំងអស់គឺបេក្ខជនស្តាំនិយមលោក Stubb មកពីគណបក្សសម្ព័ន្ធជាតិ ទទួលបានសំឡេងឆ្នោតគាំទ្រ ៥១.៦ ភាគរយ ខណៈប្រធានសមាជិកគណបក្សបៃតងសេរីលោក Haavisto ទទួលបានសំឡេង ៤៨.៤ ភាគរយ ។

លោក Stubb វ័យ ៥៥ ឆ្នាំដែលធ្លាប់កាន់ការជានាយករដ្ឋមន្ត្រីក្នុងឆ្នាំ ២០១៤ ដល់ ២០១៥ និងបានចាប់ផ្តើមអាជីពនយោបាយរបស់គាត់ជាសមាជិកសភានៅសភាអឺរ៉ុបក្នុងឆ្នាំ ២០០៤ នឹងក្លាយជាប្រធានាធិបតីទី១៣ របស់ប្រទេសហ្វាំងឡង់ ខណៈលោក Haavisto អាយុ ៦៥ ឆ្នាំអតីតរដ្ឋមន្ត្រីការបរទេស ក៏បានទទួលស្គាល់ការបរាជ័យនេះផងដែរ ។

នៅក្នុងយុទ្ធនាការបោះឆ្នោតរបស់ហ្វាំងឡង់រយៈពេលជាច្រើនខែមកនេះឃើញថាមានភាពរលូន និងមិនមានការប្រឈមមុខដាក់គ្នានោះឡើយ ពោលស្របតាមគោលការណ៍បោះឆ្នោតរបស់ហ្វាំងឡង់ គឺដោយឯកច្ឆន្ទ គ្មានការវាយប្រហារពីបេក្ខជនណាមួយ និងជាការប្រកួតប្រជែងប្រកបដោយភាពត្រឹមត្រូវ ។

គួរបញ្ជាក់ថា លោក Stubb និងលោក Haavisto គឺជាគូប្រជែងដ៏សំខាន់នៅក្នុងការបោះឆ្នោតប្រធានាធិបតីដែលមានម្ចាស់ឆ្នោតជាង ៤ លាននាក់ បន្ទាប់ពីអាណត្តិប្រធានាធិបតីដ៏មានប្រជាប្រិយលោក Sauli Niinistö នឹងផុតនៅខែមីនាខាងមុខ ខណៈលោកក៏មិនមានសិទ្ធិឈរឈ្មោះបោះឆ្នោតឡើងវិញនោះដែរ ៕

អត្ថបទ ៖ ប៊ុន សុភាព

The post ហ្វាំងឡង់ ជ្រើសរើសបានប្រធានាធិបតីថ្មី ជាអតីតនាយករដ្ឋមន្ត្រី appeared first on Kampuchea Thmey Daily.

ថ្ងៃនេះ អង្គការ ណាតូ បន្ថែមសមាជិកថ្មីទី ៣១

Sok Chivon — Tue, 04 Apr 2023 03:19:34 +0000

អគ្គលេខាធិការអង្គការណាតូ លោក Jens Stoltenberg បាននិយាយថា ប្រទេសហ្វាំងឡង់នឹងចូលរួមជាមួយអង្គការណាតូនៅថ្ងៃអង្គារនេះ ក្រោយមានការឯកភាពគ្នាពីសំណាក់ប្រទេសជាសមាជិកទាំង ៣០ ។

លោក Stoltenberg បាននិយាយថា “នេះគឺជាសប្តាហ៍ប្រវត្តិសាស្ត្រ យើងនឹងស្វាគមន៍ហ្វាំងឡង់ ក្នុងនាមជាសមាជិកទី ៣១ របស់អង្គការណាតូ ជាពិសេសវានឹងធ្វើឲ្យហ្វាំងឡង់មានសុវត្ថិភាព ហើយសម្ព័ន្ធភាពរបស់យើងកាន់តែរឹងមាំផងដែរ” ។

ប្រមុខអង្គការណាតូរូបនេះបន្ថែមទៀតថា “នៅល្ងាចថ្ងៃអង្គារនេះ យើងក៏នឹងធ្វើពិធីលើកទង់ជាតិហ្វាំងឡង់ជាលើកដំបូងនៅឯទីស្នាក់ការរបស់យើង ខណៈប្រទេសស៊ុយអែត ដែលបានដាក់ពាក្យចូលជាសមាជិកក្នុងពេលតែមួយជាមួយហ្វាំងឡង់ ក៏នឹងអាចចូលរួមជាមួយអង្គការណាតូក្នុងប៉ុន្មានខែខាងមុខនេះផងដែរ” ។

លោក Stoltenberg បានបញ្ជាក់ថា ការចូលជាសមាជិករបស់ហ្វាំងឡង់ អាចសម្រេចទៅបាន ដោយសារតែប្រទេសតួកគីបានផ្ដល់សច្ចាប័នជាផ្លូវការទៅឲ្យរដ្ឋមន្ត្រីការបរទេសអាមេរិក លោក Antony Blinken នៅថ្ងៃអង្គារនេះ ។

គួរបញ្ជាក់ថា ប្រធានាធិបតីហ្វាំងឡង់លោក Sauli Niinistö និងរដ្ឋមន្ត្រីការពារជាតិ Antti Kaikkonen រួមជាមួយរដ្ឋមន្ត្រីការបរទេសលោក Pekka Haavisto ក៏នឹងអញ្ជើញចូលរួមក្នុងពិធីដ៏ប្រវត្តិសាស្ត្រនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ ធ្លាយព័ត៌មាន បង្ហាញ អ្នកឡើងកាន់តំណែងជាប្រមុខអង្គការ ណាតូ បន្ទាប់ពីលោក Stoltenberg

The post ថ្ងៃនេះ អង្គការ ណាតូ បន្ថែមសមាជិកថ្មីទី ៣១ appeared first on Kampuchea Thmey Daily.

ពូទីន ថ្កោលទោស ណាតូ ថែមទាំងគំរាម ស៊ុយអែត និង ហ្វាំងឡង់ (មានវីដេអូ)

Sok Sovann — Thu, 30 Jun 2022 01:42:22 +0000

កាលពីថ្ងៃពុធទី២៩ខែមិថុនា ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានថ្កោលទោសចំពោះ “មហិច្ឆតាអធិរាជ” របស់អង្គការណាតូ ដោយចោទប្រកាន់សម្ព័ន្ធមិត្តយោធានេះថា កំពុងព្យាយាមបង្ហាញ “ឧត្តមភាព” របស់ខ្លួន តាមរយៈជម្លោះអ៊ុយក្រែន។

មេដឹកនាំរុស្ស៊ីរូបនេះក៏បាននិយាយដែរថា លោកនឹងឆ្លើយតប ប្រសិនបើណាតូដាក់ពង្រាយកងទ័ព និងហេដ្ឋារចនាសម្ព័ន្ធនៅក្នុងប្រទេសហ្វាំងឡង់ និងស៊ុយអែត បន្ទាប់ពីប្រទេស Nordic ទាំងពីរ ចូលរួមសម្ព័ន្ធភាពយោធានេះ។

លោក ពូទីន បានធ្វើអត្ថាធិប្បាយមួយថ្ងៃ បន្ទាប់ពីសមាជិកណាតូ គឺ តួកគី បានដកការប្រឆាំងរបស់ខ្លួនជុំវិញការប៉ុនប៉ងដោយហ្វាំងឡង់និងស៊ុយអែត ដើម្បីចូលរួមអង្គការណាតូ ក្រោយពេលប្រទេសទាំងបី យល់ព្រមក្នុងការការពារសន្តិសុខរបស់គ្នាទៅវិញទៅមក។

ការចូលរួមរបស់ទីក្រុង ហែលស៊ិនគី និង ស្តុកខុល ក្នុងអង្គការណាតូ សម្គាល់ជាការផ្លាស់ប្តូរដ៏ធំបំផុតមួយនៅក្នុងសន្តិសុខអឺរ៉ុប នារយៈពេលជាច្រើនទសវត្សរ៍មកនេះ។

លោក ពូទីន បានប្រាប់ទូរទស្សន៍រដ្ឋរុស្ស៊ី បន្ទាប់ពីកិច្ចពិភាក្សាជាមួយមេដឹកនាំតំបន់ ក្នុងរដ្ឋអតីតសហភាពសូវៀតនៅអាស៊ីកណ្តាលគឺប្រទេស តួកម៉េនីស្ថាន ថា “ជាមួយស៊ុយអែត និងហ្វាំងឡង់ យើងមិនមានបញ្ហាដូច ជាមួយអ៊ុយក្រែនទេ។ ពួកគេចង់ចូលណាតូ សូមចូលទៅចុះ។ ប៉ុន្តែពួកគេត្រូវតែយល់ថា នឹងមិនមានការគំរាមកំហែងទេ។ ប្រសិនបើឧបសម្ព័ន្ធយោធា និងហេដ្ឋារចនាសម្ព័ន្ធត្រូវបានដាក់ពង្រាយនៅទីនោះ យើងនឹងឆ្លើយតប និងបង្កការគំរាមកំហែងដល់ប្រទេសទាំង២នេះ ដូចដែលការគំរាមកំហែងដែលពួកគេបង្កចំពោះយើង”។

លោកបានបន្ថែមថា ទំនាក់ទំនងរបស់ទីក្រុងមូស្គូជាមួយទីក្រុង ហែលស៊ិនគី និង ស្តុកខុល នឹងមានភាពជូរចត់ដោយចៀសមិនរួច ជុំវិញសមាជិកភាពអង្គការណាតូរបស់ពួកគេ។ អ្វីគ្រប់យ៉ាងគឺល្អរវាងយើង ប៉ុន្តែឥឡូវនេះ អាចនឹងមានភាពតានតឹងខ្លះ វាប្រាកដជាមាន។ ចៀសមិនរួចទេ បើមានការគំរាមកំហែងមកលើយើង”៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Al Jazeera

ចុចអាន៖ អាមេរិក ប្រកាសបង្កើនវត្តមានយោធាទូទាំងទ្វីបអឺរ៉ុប ដើម្បីទប់ទល់រុស្ស៊ី

The post ពូទីន ថ្កោលទោស ណាតូ ថែមទាំងគំរាម ស៊ុយអែត និង ហ្វាំងឡង់ (មានវីដេអូ) appeared first on Kampuchea Thmey Daily.

ណាតូ កំពុងធ្វើការជាមួយសម្ព័ន្ធមិត្តទាំង ៣០ ឲ្យយល់ព្រមលើសមាជិកភាព របស់ស៊ុយអែត និងហ្វាំងឡង់

Sok Chivon — Thu, 26 May 2022 03:23:47 +0000

អគ្គលេខាធិការអង្គការណាតូលោក Jens Stoltenberg បាននិយាយកាលពីថ្ងៃពុធថា អង្គការណាតូកំពុងធ្វើការជាមួយសម្ព័ន្ធមិត្តទាំង ៣០ ដើម្បីឲ្យមានការយល់ព្រម និងសម្រួលលើសមាជិកភាពរបស់ប្រទេសស៊ុយអែត និងហ្វាំងឡង់ ។

លោក Stoltenberg បាននិយាយថា “ខ្ញុំមានទំនុកចិត្ត យើងនឹងស្វែងរកដំណោះស្រាយមួយ ហើយសម្ព័ន្ធមិត្តទាំងអស់នឹងយល់ព្រមគោលនយោបាយបើកចំហររបស់អង្គការណាតូ ហើយបើសម្រេចមែននោះវានឹងជាជោគជ័យជាប្រវត្តិសាស្ត្រដ៏អស្ចារ្យរបស់យើង ។

លោក Stoltenberg បាននិយាយទៀតថា ពួកគេកំពុងធ្វើការលើបញ្ហានេះនៅគ្រប់កម្រិតទាំងអស់ ចាប់ពីកម្រិតប្រធានាធិបតី និងនាយករដ្ឋមន្ត្រី រហូតដល់កម្រិតឯកអគ្គរដ្ឋទូត បន្ទាប់ពីហ្វាំងឡង់ និងស៊ុយអែតបានដាក់ពាក្យសុំក្នុងថ្ងៃតែមួយ ។

អស់រយៈពេលជាច្រើនទសវត្សរ៍មកហើយ ស៊ុយអែត និងហ្វាំងឡង់បានប្រកាន់ជំហរនយោបាយការបរទេសអព្យាក្រឹតនៅក្នុងតំបន់ ប៉ុន្តែសង្រ្គាមរុស្ស៊ី-អ៊ុយក្រែនដែលបានចាប់ផ្តើមនៅថ្ងៃទី ២៤ ខែកុម្ភៈបានបង្កឲ្យមានការផ្លាស់ប្តូរវិធីសាស្រ្តរបស់ពួកគេ ដោយទាំងសាធារណៈជន និងអ្នកនយោបាយភាគច្រើនពេញចិត្តក្នុងការចូលរួមក្នុងសម្ព័ន្ធភាពណាតូ ។

ទោះបីជាយ៉ាងណាក៏ដោយ ប្រទេសស៊ុយអែត និងហ្វាំងឡង់ ដែលបានបញ្ជាក់អំពីចេតនារបស់ពួកគេក្នុងការស្វែងរកសមាជិកភាពរបស់អង្គការណាតូ មិនបានឆ្លើយតបជាវិជ្ជមានចំពោះសំណើរបស់ប្រទេសតួកគីដែលជាសមាជិកណាតូអស់រយៈពេលជាង ៧០ ឆ្នាំសម្រាប់ការធ្វើបត្យាប័នភេរវករសរុបចំនួន ៣៣ នាក់នោះទេ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ហ្វាំងឡង់ ហ៊ានធានារឿងនេះដល់ តួកគី ដើម្បីចូល ណាតូ