ប្រទេសអ៊ីរ៉ង់ Archives - Kampuchea Thmey Daily

ក្រុមសម្របសម្រួល ប្រាប់ថា អ៊ីរ៉ង់អត់បានស្នើឲ្យត្រាំផ្អាកវាយប្រហារលើទីតាំងថាមពលទេ

Chheang — Fri, 27 Mar 2026 01:36:59 +0000

ក្រុមអ្នកសម្របសម្រួលបានបញ្ជាក់ថា ប្រទេសអ៊ីរ៉ង់មិនបានស្នើសុំឲ្យផ្អាកការវាយប្រហារលើទីតាំងថាមពលរបស់ខ្លួននោះទេ ដែលនេះគឺផ្ទុយពីការលើកឡើងរបស់ប្រធានាធិបតីអាមេរិកលោក ដូណាល់ ត្រាំ ដែលថា ការផ្អាករហូតដល់ថ្ងៃទី៦ខែមេសាខាងមុខ ធ្វើឡើងតាមសំណើរបស់ទីក្រុងតេហេរ៉ង់។ នេះបើយោងតាមទីភ្នាក់ងារព័ត៌មាន Anadolu ចុះផ្សាយថ្ងៃទី២៧ខែមីនាឆ្នាំ២០២៦។

ដ្បិតមន្ត្រីអ៊ីរ៉ង់បង្ហាញចំណាប់អារម្មណ៍លើការចរចា ប៉ុន្តែមេដឹកនាំប្រទេសនេះមិនទាន់ផ្តល់ចម្លើយចុងក្រោយចំពោះផែនការ១៥ចំណុចរបស់អាមេរិក ដែលផ្តល់ការលើកលែងទណ្ឌកម្មជាថ្នូរនឹងការធ្វើសម្បទាននោះឡើយ។

សំណើរបស់អាមេរិករួមមានលក្ខខណ្ឌពាក់ព័ន្ធនឹងកម្មវិធីនុយក្លេអ៊ែរ សកម្មភាពមីស៊ីល និងការចូលពាក់ព័ន្ធក្នុងតំបន់ ដែលមន្ត្រីអ៊ីរ៉ង់បានពណ៌នាថាជា «ការទាមទារហួសហេតុ»។ ភាគីអ៊ីរ៉ង់បានបដិសេធការយកបញ្ហាមីស៊ីលធ្វើជាចំណុចចាប់ផ្តើមនៃការពិភាក្សា និងមិនចង់សន្យាបញ្ឈប់ការចម្រាញ់អ៊ុយរ៉ាញ៉ូមជាអចិន្ត្រៃយ៍ទេ។ ក្រុមអ្នកសម្របសម្រួលបានលើកឡើងទៀតថា លទ្ធភាពនៃការឈានទៅរកការឈប់បាញ់នៅមានកម្រិតទាប ដោយសារភាគីទាំងពីរនៅតែប្រកាន់ជំហររៀងៗខ្លួនដែលមិនអាចទទួលយកបាន៕

ប្រែសម្រួល៖ ឈាង

ត្រាំ ប្រកាស បន្តផ្អាកវាយប្រហារលើរោងចក្រថាមពលអ៊ីរ៉ង់ ១០ថ្ងៃទៀត

The post ក្រុមសម្របសម្រួល ប្រាប់ថា អ៊ីរ៉ង់អត់បានស្នើឲ្យត្រាំផ្អាកវាយប្រហារលើទីតាំងថាមពលទេ appeared first on Kampuchea Thmey Daily.

មេដឹកនាំ អាមេរិក អ៊ីរ៉ង់ រុស្ស៊ី ចិន និយាយអ្វីខ្លះជុំវិញសង្គ្រាមអ៊ីរ៉ង់នៅថ្ងៃនេះ និង ព្រឹត្តិការណ៍សំខាន់ជុំវិញសង្គ្រាមនេះ

Rann Reuy — Sat, 07 Mar 2026 13:46:59 +0000

សង្គ្រាមនៅអ៊ីរ៉ង់ដោយសារការបើកការវាយប្រហារមុនពីសំណាក់អ៊ីស្រាអែលនិងសហរដ្ឋអាមេរិក បានបណ្តាលឲ្យជនស៊ីវិលអ៊ីរ៉ង់ស្លាប់ប្រមាណ១៤០០នាក់ និង ការវាយប្រហារនៅលីបង់ដែលបណ្តាលឲ្យជនស៊ីវិលលីបង់ជិត៣០០នាក់ត្រូវបានសម្លាប់។

ការវវាយប្រហារដែលផ្តើមឡើងដំបូងកាលពីថ្ងៃសៅរ៍សប្តាហ៍មុន បានបង្កវិនាសកម្មយ៉ាងធ្ងន់ធ្ងរ និងជម្លោះរីករាលដាល់ពាសពេញតំបន់មជ្ឈិមបូព៌ា និង ជម្លោះការទូតជុំវិញពិភពលោក។

ខាងក្រោមនេះជាព្រឹត្តិការណ៍វិវឌ្ឍន៍ចុងក្រោយនៃជម្លោះអ៊ីរ៉ង់តទល់ជាមួយអាមេរិករួមគ្នាជាមួយអ៊ីស្រាអែល

ប្រធានាធិបតីសហរដ្ឋអអាមេរិក លោក ដូណាល់ ត្រាំ (Donald Trump) បានព្រមាននៅថ្ងៃសៅរ៍នេះ អ៊ីរ៉ង់នឹងរងការវាយប្រហារយ៉ាងខ្លាំងមិនធ្លាប់មាននៅថ្ងៃនេះ ដោយតំបន់នានានៃប្រទេសអ៊ីរ៉ង់កំពុងស្ថិតក្រោមការពិចារណាសម្រាប់ «ការបំផ្លិចបំផ្លាញទាំងស្រុង និងការស្លាប់ជាក់លាក់»។
នៅថ្ងៃសៅរ៍នេះដែរ នៅក្នុងសុន្ទរកថាតាមទូរទស្សន៍ដែលបានថតទុកជាមុននៅលើប្រព័ន្ធផ្សព្វផ្សាយនានារបស់រដ្ឋ ប្រធានាធិបតីអ៊ីរ៉ង់ លោក Masoud Pezeshkian បានសុំទោសដល់ប្រទេសជិតខាងនៅតំបន់ឈូងសមុទ្រ ដោយលោកបាននិយាយថា ទីក្រុងតេអេរ៉ង់នឹងបញ្ឈប់ការវាយប្រហាររបស់ខ្លួនលើបណ្តារដ្ឋជិតខាង លុះត្រាតែការវាយប្រហារលើអ៊ីរ៉ង់មានប្រភពមកពីប្រទេសទាំងនោះត្រូវបានបញ្ឈប់ដូចគ្នា។
តាមការផ្សាយរបស់ Al Jazeera បន្ទាប់ពីការចេញផ្សាយវីដេអូរបស់ប្រធានាធិបតីអ៊ីរ៉ង់ លោក Pezeshkian កងកម្លាំងឆ្មាំបដិវត្តន៍អ៊ីរ៉ង់ (IRGC) បានចេញសេចក្តីថ្លែងការណ៍ថា៖«ពួកគេគោរពផលប្រយោជន៍ និងអធិបតេយ្យភាពជាតិរបស់ប្រទេសជិតខាង ហើយរហូតមកដល់ចំណុចនេះ មិនទាន់បានប្រព្រឹត្តការឈ្លានពានប្រឆាំងនឹងពួកគេនៅឡើយទេ»។ ទោះជាយ៉ាងណាក៏ដោយ សេចក្តីថ្លែងការណ៍នោះបានបន្ថែមថា «ប្រសិនបើសកម្មភាពអរិភាពពីមុននៅតែបន្ត» កងកម្លាំងយោធា និងទ្រព្យសម្បត្តិទាំងអស់របស់សហរដ្ឋអាមេរិក និងអ៊ីស្រាអែលនៅក្នុងតំបន់នឹងត្រូវបានចាត់ទុកថាជាគោលដៅចម្បងនៃការវាយប្រហារឆ្លើយតបសងសឹក។
យោង CNN ការវាយប្រហារលើប្រទេសអ៊ីរ៉ង់នៅតែខ្លាំង ដោយការផ្ទុះត្រូវបានគេឮនៅក្នុងទីក្រុងតេហេរ៉ង់ប៉ុន្មានម៉ោងបន្ទាប់ពីវីដេអូបានបង្ហាញពីអាកាសយានដ្ឋាន Mehrabad នៃរដ្ឋធានីអ៊ីរ៉ង់កំពុងឆេះ។
អ៊ីស្រាអែលបាននិយាយថា ខ្លួនបានប្រើប្រាស់យន្តហោះចម្បាំងជាង៨០គ្រឿងដើម្បីធ្វើ «ការវាយប្រហារទ្រង់ទ្រាយធំ» លើអ៊ីរ៉ង់។ ទន្ទឹមនឹងនេះ អ៊ីស្រាអែលកំពុងស្ទាក់ចាប់ការវាយប្រហារជាច្រើនលើកច្រើនសាររបស់អ៊ីរ៉ង់។
យោងតាមអាជ្ញាធររបស់ប្រទេសអារ៉ាប់រួម (UAE) យ៉ាងហោចណាស់មានមីស៊ីលផ្លោងរយៈចម្ងាយឆ្ងាយបាលិស្ទិកចំនួន ១៦គ្រាប់ និងយន្តហោះគ្មានមនុស្សបើកចំនួន ១២១ គ្រឿង ត្រូវបានបាញ់បង្ហោះទៅកាន់ប្រទេសនេះនៅថ្ងៃនេះ។
យោអាអ៊ីស្រាអែលបានបាញ់ប្រហារលើមូលដ្ឋានកងទ័ពមូកខៀវរបស់អង្គការសហប្រជាជាតិ (UNIFIL) មួយនៅភាគខាងត្បូងប្រទេសលីបង់ ដែលបានធ្វើឱ្យកងកម្លាំងរក្សាសន្តិភាពហ្គាណាជាច្រើននាក់រងរបួស។ ប្រទេសអាល្លឺម៉ង់បានចេញសេចក្តីថ្លែងការណ៍ថ្កោលទោសការវាយប្រហារដោយ អះអាងថា «មិនអាចទទួលយកបាន»។
តាមសេចក្តីរាយការណ៍ ប្រជាជនស៊ីវិលលីបង់ជាង៤០នាក់ត្រូវបានសម្លាប់ដោយការវាយប្រហាររបស់អ៊ីស្រាអែលក្នុងប្រទេសលីបង់នៅថ្ងៃសៅរ៍នេះ។
រដ្ឋមន្ត្រីក្រសួងការបរទេសរចិន លោក វ៉ាង យី នឹងធ្វើសន្និសីទសារព័ត៌មានក្នុងជំនួបជាមួយអ្នកកាសែតនៅថ្ងៃទី៨ខែមីនា ដោយបញ្ជាក់ពីជំហរគោលនយោបាយការបរទេសចិន ក្នុងសង្គ្រាមអ៊ីរ៉ង់កំពុងឆាបឆេះ ខណៈមានការចោទប្រកាន់ជាច្រើនលើចំណាត់ការរបស់ចិនគ្មានប្រសិទ្ធភាពក្នុងការជួយសម្ព័ន្ធមិត្តអ៊ីរ៉ង់។
ពាក់ព័ន្ធសង្គ្រាមអ៊ីរ៉ង់នេះដែរ ប្រធានាធិបតីរុស្ស៊ី លោក វ្ល៉ាឌីមៀរ ពូទីន និងសមភាគីអ៊ីរ៉ង់ លោក Masoud Pezeshkian បានជួបសន្ទនាតាមទូរស័ព្ទដ៏កម្រក្នុងកាលៈទេសៈដ៏លំបាក ដោយភាគីទាំងពីរបានយល់ព្រមបន្តទំនាក់ទំនងរវាងប្រទេសរបស់ពួកគេតាមរយៈបណ្តាញផ្សេងៗ។ វិមានក្រឹមឡាំង មិនបានលម្អិតអំពីការពិភាក្សារបស់ប្រមុខរដ្ឋដែលជាសម្ព័ន្ធមិត្តសំខាន់ចុងក្រោយនេះទេ។

The post មេដឹកនាំ អាមេរិក អ៊ីរ៉ង់ រុស្ស៊ី ចិន និយាយអ្វីខ្លះជុំវិញសង្គ្រាមអ៊ីរ៉ង់នៅថ្ងៃនេះ និង ព្រឹត្តិការណ៍សំខាន់ជុំវិញសង្គ្រាមនេះ appeared first on Kampuchea Thmey Daily.

សមាជិកសភាអាមេរិកឲ្យបញ្ចេញអាវុធដល់អ៊ុយក្រែន ក្រោយរុស្ស៊ីបញ្ជាដ្រូនច្រើនចូលជ្រៅក្នុងទឹកដីប៉ូឡូញ

Rann Reuy — Wed, 10 Sep 2025 05:40:13 +0000

សមាជិកសភាអាមេរិកម្នាក់បានចោទប្រកាន់រុស្ស៊ីជាចំហរថា បានបង្កសង្រ្គាមជាចំហរ និងយ៉ាងខ្លាំងក្លាប្រឆាំងប្រទេសប៉ូឡូញ បន្ទាប់ពីយោធាប៉ូឡូញបាញ់ទម្លាក់យន្តហោះគ្មានមនុស្សបើករបស់រុស្ស៊ីក្នុងដែនអាកាសរបស់ខ្លួនដែលជាសមាជិកអង្គការណាតូ សមាជិកសហភាពអឺរ៉ុប និងជាអ្នកជួយជ្រុមជ្រែងអ៊ុយក្រែនយ៉ាងខ្លាំងនោះ។

លោក Joe Wilson តំណាងរាស្រ្តមកពីគណបក្សសាធារណរដ្ឋ។ (File/Sean Rayford via Getty Images)

សមាជិកសភា លោក Joe Wilson (R-SC) តំណាងរាស្រ្តនៃបក្សសាធារណៈរដ្ឋ មកពីរដ្ឋ South Carolina បានសរសេរបង្ហោះនៅលើបណ្តាញសង្គម X របស់លោក ដោយព្រមានថា ការប្រើប្រាស់យន្តហោះគ្មានមនុស្សបើក ប្រភេទ Shahed ផលិតដោយប្រទេសអ៊ីរ៉ង់ របស់រុស្ស៊ី នៅខាងក្នុងដែនអាកាសប៉ូឡូញ គឺជា «ទង្វើនៃសង្រ្គាម (act of war)»។

លោក Joe Wilson បានសរសេរថា៖«រុស្សីកំពុងវាយប្រហារប្រទេសប៉ូឡូញដែលជាសម្ព័ន្ធមិត្តណាតូជាមួយនឹងយន្តហោះគ្មានមនុស្សបើករបស់អ៊ីរ៉ង់តិចជាងមួយសប្តាហ៍បន្ទាប់ពីប្រធានាធិបតី ត្រាំ ធ្វើជាម្ចាស់ផ្ទះទទួលប្រធានាធិបតីប៉ូឡូញ លោក Nawrocki នៅសេតវិមាន»។

នៅក្នុងសារនោះ លោក Joe Wilson សរសេរបន្តថា៖«ខ្ញុំជំរុញឱ្យប្រធានាធិបតី ត្រាំ ឆ្លើយតបជាមួយនឹងទណ្ឌកម្មជាកាតព្វកិច្ចដែលនឹងធ្វើឱ្យម៉ាស៊ីនសង្រ្គាមរបស់រុស្ស៊ីក្ស័យធន និងផ្តល់អាវុធដល់អ៊ុយក្រែនជាមួយនឹងអាវុធដែលមានសមត្ថភាពវាយប្រហាររុស្ស៊ី»។

ការអំពាវនាវរបស់តំណាងរាស្រ្តរូបនេះ ហាក់បានបង្ហាញយ៉ាងច្បាស់ណាស់ថា សហរដ្ឋអាមេរិកត្រូវតែបង្កើនការគាំទ្រដល់អ៊ុយក្រែន ដោយផ្តល់ឱ្យអ៊ុយក្រែននូវសព្វាវុធដែលពួកគេត្រូវការ ដោយមិនត្រឹមតែដើម្បីការពារទីក្រុងរបស់អ៊ុយក្រែនប៉ុណ្ណោះទេ ថែមទាំងវាយប្រហារគោលដៅយោធាដែលជ្រៅនៅក្នុងប្រទេសរុស្ស៊ី។

ដ្រូនរុស្ស៊ីដែលត្រូវប្រទះឃើញហោះចូលជ្រៅទៅក្នុងទឹកដីប៉ូឡូញ។

ប្រធានាធិបតីសហរដ្ឋអាមេរិក លោក ដូណាល់ ត្រាំ បានបរាជ័យក្នុងការបញ្ចុះបញ្ចូលប្រធានាធិបតីរុស្ស៊ីនិងអ៊ុយក្រែនងាកទៅរកការបញ្ចប់សង្គ្រាម បើទោះបីជា លោក បានជួបសន្ទនាតាមទូរស័ព្ទជាមួយប្រធានាធិបតីរុស្ស៊ី លោក វ៉្លាឌីមៀរ ពូទីន និង ការជួបផ្ទាល់នៅរដ្ឋអាឡាស្កាកាលពីថ្ងៃទី១៥ខែសីហា។

ក្រោយជំនួបនោះ ភាគីសហរដ្ឋអាមេរិក និង រុស្ស៊ីហាក់បានបង្ហាញសញ្ញាវិជ្ជមានខ្លះក្នុងការបន្តការចរចា ដែលភាគីសហរដ្ឋអាមេរិកអះអាងថា អាចធ្វើឡើងក្នុងរង្វង់២សប្តាហ៍ក្នុងការចរចាត្រីភាគី ដែលមាន សហរដ្ឋអាមេរិក រុស្ស៊ី និង អ៊ុយក្រែន ប៉ុន្តែរហូតដល់ពេលនេះ គ្មានឡើយព័ត៌មានអំពីលទ្ធភាពនៃ«ការចរចាត្រីភាគី។

ក្នុងរយៈពេលមួយឆ្នាំកន្លងមក កាំជ្រួចផ្លោង និងយន្តហោះគ្មានមនុស្សបើករបស់រុស្ស៊ី បានរំលោភលើដែនអាកាសរបស់ប្រទេសជាសមាជិកអង្គការណាតូម្តងហើយម្តងទៀត។ ប៉ុន្តែរាល់ពេលដែលលោកខាងលិចបានឆ្លើយតប គឺបានត្រឹមតែសម្តែងក្តីព្រួយបារម្ភ ការព្រមាន និងការជូនដំណឹងបណ្តោះអាសន្ន។

បស្ចឹមលោក បានចាត់ទុកទង្វើបង្ហោះដ្រូនចូលដែនអាកាសនេះ ជាសញ្ញានៃការបង្កហេតុរបស់ក្រុងមូស្គូដោយចេតនាពេញទី ហើយវាគឺជាការសាកល្បង ដែលត្រូវបានរៀបចំឡើងដើម្បីរុញច្រានព្រំដែននៃអ្វីដែលណាតូនឹងអត់ធ្មត់លែងបាន។

នៅពេលដែលយន្តហោះគ្មានមនុស្សបើកចូលទៅក្នុងដែនអាកាសរបស់ប៉ូឡូញ វាមិនមែនគ្រាន់តែជាអ៊ុយក្រែនដែលកំពុងរងការវាយប្រហារនោះទេ ប៉ុន្តែវាគឺជាអឺរ៉ុប និងជាអង្គការណាតូ ហើយវាជាបញ្ជាសន្តិសុខអន្តរអាត្លង់ទិក៕

រ៉ាន់ រើយ

The post សមាជិកសភាអាមេរិកឲ្យបញ្ចេញអាវុធដល់អ៊ុយក្រែន ក្រោយរុស្ស៊ីបញ្ជាដ្រូនច្រើនចូលជ្រៅក្នុងទឹកដីប៉ូឡូញ appeared first on Kampuchea Thmey Daily.

TASS ៖ អ៊ីរ៉ង់ត្រៀមខ្លួនទទួលយកកិច្ចព្រមព្រៀងនុយក្លេអ៊ែរ ក្រោយ៣ថ្ងៃនៃការផ្ទុះអាវុធ

Rann Reuy — Sun, 15 Jun 2025 12:05:46 +0000

ក្រោយ៣ថ្ងៃនៃការផ្លោងដាក់គ្នារវាងអ៊ីរ៉ង់ និងអ៊ីស្រាអែលដែលត្រូវបានគេចោទថា សហរដ្ឋអាមេរិកជួយអ៊ីស្រាអែលក្នុងការវាយប្រហារ ប៉ុន្តែហាក់ធ្វើពើមិនជាប់ពាក់ព័ន្ធ រដ្ឋមន្ត្រីការបរទេសអ៊ីរ៉ង់ចេញមកអះអាងពីការត្រៀមខ្លួនទទួលយកលក្ខខណ្ឌកិច្ចព្រមព្រៀងនុយក្លេអ៊ែរដែលខ្លួនបានចរចា៥លើករួចមកហើយ។

ការលើកឡើងរបស់រដ្ឋមន្ត្រីការបរទេសអ៊ីរ៉ង់នេះកើតឡើង១ថ្ងៃ ក្រោយប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយតាមទូរស័ព្ទជាមួយប្រធានាធិបតីរុស្ស៊ី លោក វ៉្លាឌីមៀរ ពូទីន ដែលជាសម្ព័ន្ធមិត្តជិតស្និទ្ធបំផុតរបស់អ៊ីរ៉ង់ ដោយអាមេរិកទាមទារ លោកពូទីន បញ្ចប់សង្គ្រាមនៅអ៊ុយក្រែន និង ការផ្ទុះអាវុធនៅអ៊ីរ៉ង់គួរបញ្ចប់ដូចគ្នា។

រដ្ឋមន្ត្រីការបរទេសអ៊ីរ៉ង់ លោក Abbas Araghchi។ Reuters

ការវាយប្រហាររបស់អ៊ីស្រាអែលលើប្រទេសអ៊ីរ៉ង ត្រូវបានប្រកាសថា សំដៅលើហេដ្ឋារចនាសម្ព័ុន្ធចម្រាញ់ធាតុអ៊ុយរ៉ាញ៉ូមដែលនឹងផលិតអាវុធមហាប្រល័យនុយក្លេអ៊ែរ ដែលអ៊ីស្រាអែលនិងសហរដ្ឋអាមេរិកយល់ថា ជាការគំរាមកំហែងដល់សន្តិសុខរបស់ពួកគេ។

ទីភ្នាក់ងារសារព័ត៌មានរុស្សី TASS បានផ្សាយនៅរសៀលថ្ងៃទី១៥មិថុនានេះថា អ៊ីរ៉ង់ត្រៀមខ្លួនជាស្រេចសម្រាប់កិច្ចព្រមព្រៀងធានាពីការគ្មានអាវុធនុយក្លេអ៊ែររបស់សាធារណរដ្ឋអ៊ីស្លាមនៅតំបន់មជ្ឈិមបូព៌ាមួយនេះ ដោយសម្ភាសរដ្ឋមន្ត្រីក្រសួងការបរទេសអ៊ីរ៉ង់ លោក លោក Abbas Araghchi ក៏ប៉ុន្តែអឺរ៉ង់នឹងមិនទទួលយកនូវលក្ខខណ្ឌទាំងឡាយណាដែលបិទសិទ្ធិអ៊ីរ៉ង់ក្នុងការទទួលបានសិទ្ធិស្របច្បាប់ក្នុងដំណើរការថាមពលនុយក្លេអ៊ែរនោះទេ។

តាមសេចក្តីរាយការណ៍នោះ រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយថា ប្រទេសអ៊ីរ៉ង់បានត្រៀមខ្លួនរួចរាល់ហើយ ដើម្បីបញ្ចប់កិច្ចព្រមព្រៀងមួយក្នុងគោលបំណងទប់ស្កាត់ការទទួលបានអាវុធនុយក្លេអ៊ែរ ប៉ុន្តែនឹងមិនទទួលយកលក្ខខណ្ឌដែលកំណត់សិទ្ធិស្របច្បាប់របស់សាធារណរដ្ឋក្នុងការអភិវឌ្ឍថាមពលនុយក្លេអ៊ែរដោយសន្តិវិធីនោះទេ។

លោករដ្ឋមន្ត្រី Abbas Araghchi ត្រូវបានស្រង់សម្តីដូចបាននិយាយថា៖«យើងបានត្រៀមខ្លួនរួចជាស្រេចសម្រាប់កិច្ចព្រមព្រៀងណាមួយដែលមានគោលបំណងទប់ស្កាត់អ៊ីរ៉ង់ពីការទទួលបានអាវុធនុយក្លេអ៊ែរ។ ទោះបីជាយ៉ាងណាក៏ដោយ ប្រសិនបើគោលបំណងនៃកិច្ចព្រមព្រៀងនេះគឺដើម្បីដកហូតសិទ្ធិស្របច្បាប់របស់ខ្លួន [ដើម្បីបង្កើតអាតូមដោយសន្តិវិធី] នោះយើងមិនទាន់ត្រៀមខ្លួនសម្រាប់កិច្ចព្រមព្រៀងបែបនេះទេ»។

លោក Araqchi បានបន្ថែមថា នៅក្នុងជុំទីប្រាំមួយនៃការចរចានុយក្លេអ៊ែរជាមួយសហរដ្ឋអាមេរិក ទីក្រុងតេអេរ៉ង់ នឹងបង្ហាញសំណើររបស់ខ្លួន។ យោងតាមរដ្ឋមន្ត្រី ការបរទេស វាអាចបើកចំហមធ្យោបាយឆ្ពោះទៅរកកិច្ចព្រមព្រៀងមួយ។

អ៊ីរ៉ង់ និងសហរដ្ឋអាមេរិកបាននឹងកំពុងធ្វើការចរចាសម្របសម្រួលដោយប្រទេសអូម៉ង់ ដើម្បីដោះស្រាយបញ្ហានុយក្លេអ៊ែររបស់អ៊ីរ៉ង់ចាប់តាំងពីខែមេសា។ បន្ទាប់ពីការប៉ុនប៉ងជាច្រើនដើម្បីសម្រេចបាននូវកិច្ចព្រមព្រៀងថ្មីមួយ ការចរចាបានឈានដល់ភាពជាប់គាំងជុំវិញការខ្វែងគំនិតគ្នាលើការចម្រាញ់សារធាតុអ៊ុយរ៉ាញ៉ូម។ ជុំទីប្រាំមួយត្រូវបានកំណត់ពេលសម្រាប់ថ្ងៃទី១៥ខែមិថុនានៅប្រទេសអូម៉ង់ ប៉ុន្តែបន្ទាប់ពីការវាយប្រហាររបស់អ៊ីស្រាអែលលើអ៊ីរ៉ង់វាត្រូវបានលុបចោល។

ក្រោយការវាយប្រហាររបស់អ៊ីស្រាអែល កាលព្រឹកព្រលឹមថ្ងៃសុក្រដោយផ្លោងលើកទីតាំងដែលសង្ស័យថា អ៊ីរ៉ង់តំឡើងសម្ភារៈចម្រាញ់ធាតុអ៊ុយរ៉ាញ៉ូម ប្រធានាធិបតីសហរដ្ឋអាមេរិក លោក ដូណាល់ ត្រាំ បានព្រមានអឺរ៉ង់ឲ្យទទួយកកិច្ចព្រមព្រៀងនុយក្លេអ៊ែរ មុនអ្វីៗត្រូវបាត់បង់ទាំងស្រុង។

ក្នុងការវាយប្រហាររបស់អ៊ីស្រាអែល មេបញ្ជាការកំពូលអឺរ៉ង់យ៉ាងហោច៣រូបត្រូវបានសម្លាប់ ហើយអ្នកវិទ្យាសាស្រ្តនុយក្លេអ៊ែរយ៉ាងហោច៦រូបត្រូវបានសម្លាប់។ ក្នុងការវាយប្រហារ៣ថ្ងៃកន្លងមកនេះ យ៉ាងហោចណាស់មនុស្សជិត១០០នាក់ត្រូវបានសម្លាប់ និងជាង៣០០នាក់រងរបួសនៅខាងភាគីអ៊ីរ៉ង់។

ចំណែកភាគីអ៊ីស្រាអែល ក៏រងការវាយប្រហារស្រោចមីស៊ីលបាលិស្ទិកពីភាគីអឺរ៉ង់ដោយសម្លាប់មនុស្សជាង១០នាក់ និងជាង២០០នាករងរបួស ដែលសុទ្ធសឹងជាជនស៊ីវិល៕

មេដឹកនាំអន្តរជាតិជាច្រើន អំពាវនាវឲ្យភាគីអ៊ីស្រាអែល និងអ៊ីរ៉ង់បង្កើនការអត់ធ្មត់ឲ្យដល់កំពូល និងងាកទៅរកការចរចាតាមមធ្យោបាយការទូតវិញ៕

ដោយ រ៉ាន់ រើយ

ការវាយប្រហាររបស់អ៊ីស្រាអែលលើទីតាំងចម្រាញ់ប្រេងរបស់អ៊ីរ៉ង់។ REUTERS

The post TASS ៖ អ៊ីរ៉ង់ត្រៀមខ្លួនទទួលយកកិច្ចព្រមព្រៀងនុយក្លេអ៊ែរ ក្រោយ៣ថ្ងៃនៃការផ្ទុះអាវុធ appeared first on Kampuchea Thmey Daily.

អ៊ីស្រាអែល អាចវាយប្រហាររោងចក្រនុយក្លេអ៊ែរអ៊ីរ៉ង់ នៅប៉ុន្មានខែទៀត

Sok Sovann — Fri, 14 Feb 2025 02:05:42 +0000

តាមព័ត៌មានដែលទទួលបានដោយ Wall Street Journal និង Washington Post បានបង្ហាញថា អ៊ីស្រាអែលអាចវាយប្រហាររោងចក្រនុយក្លេអ៊ែរអ៊ីរ៉ង់ ក្នុងរង្វង់៦ខែទៀតនៃឆ្នាំ២០២៥នេះ។

(រូបថត៖ AP)

ដ្បិតមិនបកស្រាយលម្អិត តែប្រភពខាងលើអះអាងថា របាយការណ៍នានាត្រូវបានទីភ្នាក់ងារចារកម្មអាមេរិក លាតត្រដាងជាបន្តបន្ទាប់ ដែលបង្ហាញថា មេដឹកនាំអ៊ីស្រាអែល កំពុងពិចារណាវាយប្រហាររោងចក្រនុយក្លេអ៊ែរអ៊ីរ៉ង់ក្នុងឆ្នាំនេះតែម្តង។ ក្នុងនោះរោងចក្រធំទាំង២ដូចជា Fordow និង Natanz អាចនឹងត្រូវកំណត់គោលដៅក្នុងរង្វង់ពេល៦ខែដំបូងនៃឆ្នាំ២០២៥។

ចំពោះការវាយប្រហារវិញ អ៊ីស្រាអែល អាចបាញ់មីស៊ីលបាលីស្ទិកចេញពីខាងក្រៅដែនអាកាសអ៊ីរ៉ង់ ឬអាចទម្លាក់គ្រាប់បែកពីយន្តហោះចម្បាំង ហើយអ្វីដែលសំខាន់គឺថា ប្រតិបត្តិការនោះក៏អាចមានជំនួយពីសហរដ្ឋអាមេរិកផងដែរ។

ម្យ៉ាងវិញទៀត ប្រភពដដែលលើកឡើងថា ពេលនេះនាយករដ្ឋមន្ត្រីអ៊ីស្រាអែល Benjamin Netanyahu កំពុងមានទំនុកចិត្តខ្ពស់មែនទែនចំពោះប្រធានាធិបតីអាមេរិកលោក ដូណាល់ ត្រាំ ព្រោះជឿជាក់ថា បុរសម្នាក់នេះ មានការគាំទ្រអ៊ីស្រាអែល ម៉ឺងម៉ាត់ជាងលោក ចូ បៃដិន ទៅទៀត។

(រូបថត៖ Getty)

ទោះបីជាយ៉ាងណាក៏ដោយ ជុំវិញបញ្ហានេះ ភាគីខាងអ៊ីស្រាអែល មិនទាន់ចេញមុខនិយាយអ្វីនោះទេ។

ប្រសិនបើការវាយប្រហារនេះកើតឡើងមែននោះ ស្ថានការណ៍នៅតំបន់មជ្ឈិមបូព៌ានឹងកាន់តែក្តៅរោលរាលជាក់ជាមិនខានឡើយ ព្រោះ អ៊ីរ៉ង់បានព្រមានរួចទៅហើយថា សង្គ្រាមធំច្បាស់ជានឹងផ្ទុះឡើងបើសិនជាទីក្រុងហ្ស៊េរុយសាឡិម បើកការវាយប្រហារទីក្រុងតេហេរ៉ង់។

សូមជម្រាបថា កាលពីឆ្នាំ២០២៤ អ៊ីរ៉ង់និងអ៊ីស្រាអែល បានផ្ទុះអាវុធដាក់គ្នាជាច្រើនលើកច្រើនសា ធ្វើឲ្យស្ថានការណ៍ក្នុងតំបន់មជ្ឈិមបូព៌ាឡើងកម្តៅ ប្រៀបបាននឹងគ្រាប់បែករៀបនឹងផ្ទុះ។

(រូបថត៖ Reuters)

នៅថ្ងៃទី១ខែមេសា អ៊ីស្រាអែលបានវាយប្រហារតាមអាកាស លើស្ថានកុងស៊ុលអ៊ីរ៉ង់នៅទីក្រុង ដាម៉ាស នៃប្រទេសស៊ីរី បណ្តាលស្លាប់ឧត្តមសេនីយ៍អ៊ីរ៉ង់ពីរនាក់ និងមន្រ្តីកងឆ្មាំបដិវត្តឥស្លាម (IRGC) ជាច្រើននាក់ទៀត។

១២ថ្ងៃក្រោយមក អ៊ីរ៉ង់ក៏សងសឹកវិញ ដោយបញ្ជូនយន្តហោះគ្មានមនុស្សបើករាប់រយគ្រឿង និងមីស៊ីលរាប់រយគ្រាប់ បាញ់សន្ធាប់លើអ៊ីស្រាអែល ក្នុងទំហំដែលគេមិនធ្លាប់ឃើញពីមុន។

(រូបថត៖ Reuters)

លុះមកដល់ថ្ងៃទី៣១ខែកក្កដា មេដឹកនាំនយោបាយក្រុមហាម៉ាសលោក Ismail Haniyeh ត្រូវគេធ្វើឃាតនៅទីក្រុងតេហេរ៉ង់ ក្នុងការវាយប្រហារដែលគេសន្មតថាជាស្នាដៃអ៊ីស្រាអែល។

នៅថ្ងៃទី១ខែតុលា អ៊ីរ៉ង់បានបើកការវាយប្រហារដោយផ្ទាល់ជាលើកទីពីរលើអ៊ីស្រាអែល ដោយបាញ់មីស៊ីលផ្លោងប្រមាណ២០០គ្រាប់។ យ៉ាងណា នៅថ្ងៃទី២៦ខែតុលា អ៊ីស្រាអែលក៏បើកការវាយប្រហារតាមអាកាសទ្រង់ទ្រាយធំលើហេដ្ឋារចនាសម្ព័ន្ធយោធាអ៊ីរ៉ង់វិញ ដោយបង្កការខូចខាតយ៉ាងដំណំលើបន្ទាយទ័ព៕

អត្ថបទ៖ សុខ សុវណ្ណ

ចុចអាន៖ អ៊ីស្រាអែល ក៏ដកខ្លួនចេញពីក្រុមប្រឹក្សាសិទ្ធិមនុស្ស UN តាមអាមេរិក ដែរ

The post អ៊ីស្រាអែល អាចវាយប្រហាររោងចក្រនុយក្លេអ៊ែរអ៊ីរ៉ង់ នៅប៉ុន្មានខែទៀត appeared first on Kampuchea Thmey Daily.

អ៊ីរ៉ង់ កោះហៅអ្នកខ្លាំងៗក្នុងជួរកងឆ្មាំបដិវត្តន៍នៅ ស៊ីរី ឲ្យចូលប្រទេសវិញ

Sok Chivon — Thu, 18 Apr 2024 07:35:49 +0000

កងឆ្មាំបដិវត្តន៍អ៊ីរ៉ង់ (IRGC) បានកោះហៅទីប្រឹក្សាយោធាកំពូលៗរបស់ខ្លួនពីគ្រប់ទីកន្លែងនៅស៊ីរីឲ្យចូលមកប្រទេសវិញ ស្របពេលដែលរដ្ឋាភិបាលទីក្រុងតេហេរ៉ង់កំពុងរៀបក្បាច់ទប់ទល់នឹងការវាយប្រហារសងសឹកថ្មីមួយទៀតរបស់អ៊ីស្រាអែល ។ នេះបើយោងតាមការចេញផ្សាយដោយកាសែតអាមេរិក The Wall Street Journal (WSJ) កាលពីថ្ងៃទី១៧ ខែមេសាកន្លងទៅ ។

ដំណឹងនេះកើតឡើង បន្ទាប់ពីអ៊ីរ៉ង់បានបាញ់បង្ហោះយន្តហោះគ្មានមនុស្សបើកប្រមាណ ៣០០ គ្រឿង និងមីស៊ីលរាប់រយគ្រាប់ទៅលើគោលដៅក្នុងប្រទេសអ៊ីស្រាអែលកាលពីចុងសប្ដាហ៍ ដើម្បីជាការសងសឹកទៅលើរដ្ឋាភិបាលរបស់លោកនាយករដ្ឋមន្ត្រី Benjamin Netanyahu ដែលថ្លើមធំហ៊ានបើកការវាយប្រហារសម្លាប់មន្ត្រីរបស់ IRGC ចំនួន ៧ រូបដែលកំពុងស្នាក់នៅស្ថានកុងស៊ុលអ៊ីរ៉ង់ក្នុងទីក្រុងដាម៉ាសប្រទេសស៊ីរីកាលពីថ្ងៃទី១ ខែមេសាកន្លងទៅ ។

កាសែត WSJ បានរាយការណ៍ទៀត អ៊ីរ៉ង់កំពុងរៀបផែនចំនួន ២ សម្រាប់ក្បួនយុទ្ធសាស្ត្រទប់ទល់នឹងការវាយប្រហារថ្មីមួយទៀតរបស់អ៊ីស្រាអែល ក្នុងនោះរដ្ឋាភិបាលទីក្រុងតេហេរ៉ង់បញ្ជាឲ្យរៀបចំកងកម្លាំងដែនអាកាសរបស់ខ្លួនប្រុងជើងការសម្រាប់ស្ទាក់ចាប់មីស៊ីល ខណៈផែនមួយទៀតគឺកងទ័ពជើងទឹកត្រូវការពារនាវាពាណិជ្ជកម្មអ៊ីរ៉ង់នៅក្នុងសមុទ្រក្រហម ។

ទោះយ៉ាងណា រហូតមកដល់ពេលនេះ មន្ត្រីខាងអ៊ីស្រាអែលមិនទាន់បានធ្វើអត្ថាធិប្បាយអំពីលក្ខណៈនៃការសងសឹកដ៏មានសក្តានុពលណាមួយមកលើអ៊ីរ៉ង់នោះទេ ប៉ុន្តែបានចេញការធានាដល់មិត្តភក្តិបរទេសដូចជា អាមេរិក និងអឺរ៉ុបថា រាល់ថ្នាំខ្លាំងដែលអ៊ីស្រាអែលឲ្យអ៊ីរ៉ង់ភ្លក់ នឹងមិនបង្កគ្រោះថ្នាក់ដល់សន្តិសុខរបស់ពួកគេនោះទេ ហើយទំនងជាក៏មិនមានវិសាលភាពធំធេងនោះដែរ ។

លោក Ebrahim Raisi

ម៉្យាងវិញទៀត ទីក្រុងតេហេរ៉ង់ក៏បានព្រមានទៅដល់អ៊ីស្រាអែលផងដែរថា កុំឲ្យធ្វើការវាយប្រហារសងសឹកណាមួយមកលើអ៊ីរ៉ង់ឲ្យសោះ ខណៈលោកប្រធានាធិបតី លោក Ebrahim Raisi បញ្ជាក់ច្បាស់ៗថា “បើអ៊ីស្រាអែលហ៊ានវាយប្រហារចូលទឹកដីអ៊ីរ៉ង់សូម្បីប៉ុនក្រចកដៃ សូមពួកគេត្រៀមខ្លួនទទួលយកការសងសឹកដ៏ចាស់ដៃទៅវិញទៅ” ។

ស្របពេលជាមួយគ្នានេះ អង្គការសហប្រជាជាតិបានសម្ដែងក្ដីភ័យព្រួយចំពោះវោហារសាស័ព្ទដុតបញ្ឆេះជម្លោះនៅមជ្ឈិមបូព៌ា ខណៈសម្ព័ន្ធមិត្តអ៊ីស្រាអែលដូចជា សហរដ្ឋអាមេរិក និងចក្រភពអង់គ្លេសក៏បានជំរុញឲ្យរដ្ឋាភិបាលរបស់លោក Netanyahu អត់ធ្មត់ និងត្រជាក់ចិត្តកុំវាយតបតទៅអ៊ីរ៉ង់ឲ្យសោះ ជាពិសេសទីក្រុងវ៉ាស៊ីនតោនលើកឡើងហើយថា នឹងមិនលូកដៃចូលក្នុងភ្នក់ភ្លើងមួយនេះឡើយ ៕

ដោយ ៖ សុខ ជីវ័ន្ត

ចុចអាន ៖ អ៊ីស្រាអែល កំពុងរៀបជើងព្រួលត្រៀមភ្លក់រសជាតិសងសឹករបស់ អ៊ីរ៉ង់

The post អ៊ីរ៉ង់ កោះហៅអ្នកខ្លាំងៗក្នុងជួរកងឆ្មាំបដិវត្តន៍នៅ ស៊ីរី ឲ្យចូលប្រទេសវិញ appeared first on Kampuchea Thmey Daily.

ក្រុមប្រទេស G7 ព្រមានដល់ អ៊ីរ៉ង់ កុំឲ្យផ្ដល់មីស៊ីលផ្លោងទៅ រុស្ស៊ី

Bun sopheap — Sat, 16 Mar 2024 08:16:11 +0000

ក្រុមប្រទេស G7 បានចេញសេចក្តីថ្លែងការណ៍រួមដោយព្រមានថា ការឆ្លើយតបរបស់សហគមន៍អន្តរជាតិនឹងរួមបញ្ចូល វិធានការថ្មីប្រឆាំងនឹងអ៊ីរ៉ង់ ប្រសិនបើប្រទេសនេះបញ្ជូនមីស៊ីលផ្លោងទៅកាន់ប្រទេសរុស្ស៊ី ដើម្បីប្រើប្រាស់ក្នុងភ្លើងសង្គ្រាមប្រឆាំងនឹងអ៊ុយក្រែន ។ នេះបើយោងតាមការចេញផ្សាយរបស់សារពត៌មាន CNN នៅថ្ងៃទី១៦ ខែមីនានេះ ។

យោងតាមសេចក្តីថ្លែងការណ៍បានឲ្យដឹងថា G7 មានការព្រួយបារម្ភយ៉ាងខ្លាំងចំពោះរបាយការណ៍ដែលថា អ៊ីរ៉ង់កំពុងពិចារណាផ្ទេរមីស៊ីលផ្លោង និងបច្ចេកវិទ្យាពាក់ព័ន្ធទៅឲ្យរុស្ស៊ី បន្ទាប់ពីបានផ្គត់ផ្គង់យន្តហោះមិនមានមនុស្សបើកទៅឲ្យរុស្ស៊ីប្រើប្រាស់ក្នុងការវាយប្រហារឥតដកដៃប្រឆាំងនឹងប្រជាជនស្លូតត្រង់នៅអ៊ុយក្រែន ។

ប្រសិនបើប្រទេសអ៊ីរ៉ង់បន្តផ្តល់មីស៊ីលផ្លោង ឬបច្ចេកវិទ្យាពាក់ព័ន្ធដល់រុស្ស៊ីមែននោះ, ក្រុមប្រទេស G7 នឹងមិនទុកមុខឲ្យឡើយ ហើយត្រៀមខ្លួនដើម្បីឆ្លើយតបយ៉ាងចាស់ដៃប្រឆាំងនឹងអ៊ីរ៉ង់ ខណៈជម្រើសដំបូងដែលត្រូវបានពិភាក្សាជាមធ្យោបាយឆ្លើយតប គឺការបញ្ចប់ជើងហោះហើរពីក្រុមហ៊ុនអាកាសចរណ៍រដ្ឋ Iran Air ទៅកាន់អឺរ៉ុប ។

គួរបញ្ជាក់ថា អ៊ីរ៉ង់បានផ្តល់ឲ្យរុស្ស៊ីនូវយន្តហោះគ្មានមនុស្សបើកជាច្រើនគ្រឿង រួមទាំងគ្រាប់បែកទម្លាក់ពីលើអាកាស និងគ្រាប់កាំភ្លើងធំផងដែរ ហើយការព្រួយបារម្ភកាន់តែខ្លាំងឡើងអំពីអ៊ីរ៉ង់ផ្ដល់ការគាំទ្រផ្នែកយោធាបន្ថែមដល់រុស្ស៊ីនេះបានកើតឡើង នៅពេលដែលរុស្ស៊ីកំពុងមានកម្លាំងសន្ទុះប្រយុទ្ធនៅលើសមរភូមិ ខណៈកញ្ចប់ជំនួយចំនួន ៦០ ពាន់លានដុល្លាររបស់អាមេរិកផ្ដល់ឲ្យអ៊ុយក្រែននៅជាប់គាំងក្នុងសភានៅឡើយ ៕

អត្ថបទ ៖ ប៊ុន សុភាព

The post ក្រុមប្រទេស G7 ព្រមានដល់ អ៊ីរ៉ង់ កុំឲ្យផ្ដល់មីស៊ីលផ្លោងទៅ រុស្ស៊ី appeared first on Kampuchea Thmey Daily.

​ប្រទេសអ៊ីរ៉ង់ Archives - Kampuchea Thmey Daily