ប្រធានាធិបតី Yoon Suk Yeol Archives - Kampuchea Thmey Daily

លោក Yoon រងការចោទថា ញុះញង់កូរ៉េខាងជើង ដើម្បីដាក់ចេញច្បាប់អាជ្ញាសឹកមានប្រសិទ្ធភាព

Minea Neu — Mon, 15 Dec 2025 07:32:35 +0000

ទីក្រុងសេអ៊ូល៖ អតីតប្រធានាធិបតីកូរ៉េខាងត្បូង លោក Yoon Suk Yeol បានញុះញង់ឱ្យប្រទេសកូរ៉េខាងជើង បើកការឈ្លានពានដោយអាវុធ ដើម្បីបង្កើតឱ្យមានហេតុផលសមស្រប សម្រាប់ការប្រកាសច្បាប់អាជ្ញាសឹកកាលពីដើមខែធ្នូ ឆ្នាំ ២០២៤ និងដើម្បីលុបបំបាត់ចោលគូប្រជែងនយោបាយរបស់ខ្លួន។

អតីតប្រធានាធិបតីកូរ៉េខាងត្បូង លោក Yoon Suk Yeol។ Reuters

រដ្ឋអាជ្ញាពិសេស លោក Cho Eun-seok បានប្រាប់សន្និសីទសារព័ត៌មានមួយកាលពីថ្ងៃទី១៥ខែធ្នូ ថា ក្រុមរបស់លោកបានចោទប្រកាន់មនុស្ស២៤នាក់ រួមទាំងអតីតប្រធានាធិបតី Yoon និងសមាជិកគណៈរដ្ឋមន្ត្រីចំនួន៥នាក់ផ្សេងទៀត ពីបទជាប់ពាក់ព័ន្ធ អំឡុងពេលនៃការស៊ើបអង្កេតរយៈពេល៦ខែរបស់គាត់លើការចោទប្រកាន់ពីបទ«បះបោរ»។

លោក Cho បាននិយាយថា៖ «យើងបានដឹងច្បាស់ពីបទពិសោធន៍ជាប្រវត្តិសាស្ត្រតរួចហើយថាវាសមហេតុផល ដែលផ្តល់ទៅឱ្យអ្នកកាន់អំណាចសម្រាប់រដ្ឋប្រហារ គឺដើម្បីតែមុខមាត់ប៉ុណ្ណោះ ហើយគោលបំណងតែមួយគត់គឺជាកាន់កាប់ និងរក្សាអំណាចផ្តាច់មុខ»។

រដ្ឋអាជ្ញា លោក Cho បាននិយាយថា ក្រុមរបស់លោកបានបញ្ជាក់ពីគម្រោងធំមួយដែលត្រូវបានចោទប្រកាន់ថា លោក Yoon ជាមេក្លោង និងរដ្ឋមន្ត្រីការពារជាតិរបស់គាត់គឺលោក Kim Yong-hyun ដែលនឹងត្រលប់ទៅខែតុលា ឆ្នាំ ២០២៣ វិញ ដើម្បីព្យួរអំណាចរបស់សភា ហើយជំនួសដោយស្ថាប័ននីតិប្បញ្ញត្តិបន្ទាន់។

លោកបានបន្តថា៖ «ដើម្បីបង្កើតឱ្យសមស្របតាមការប្រកាសច្បាប់អាជ្ញាសឹក ពួកគេបានព្យាយាមជម្រុញឱ្យកូរ៉េខាងជើងបង្កការឈ្លានពានដោយអាវុធ ប៉ុន្តែត្រូវបរាជ័យ ខណៈដែលកូរ៉េខាងជើងមិនបានឆ្លើយតបផ្នែកយោធាណាមួយឡើយ»។

ក្រុមរដ្ឋអាជ្ញាពិសេសធ្លាប់បានចោទប្រកាន់ លោក Yoon និងមេបញ្ជាការយោធារបស់គាត់ថា បានបញ្ជាឱ្យប្រតិបត្តិការយន្តហោះគ្មានមនុស្សបើក លាក់ខ្លួនចូលទៅក្នុងភាគខាងជើង ដើម្បីបង្កភាពតានតឹងដល់ប្រទេសជិតខាង។

លោក Cho បាននិយាយទៀតថា ក្រោយលោក Yoon បានឃុបឃិតដាក់ឈ្មោះអ្នកដែលមាននិន្នាការនយោបាយប្រឆាំង រួមទាំងមេដឹកនាំគណបក្សកាន់អំណាចអភិរក្សនិយមរបស់លោក ជាកងកម្លាំងប្រឆាំងរដ្ឋ និងបានប្រកាសច្បាប់អាជ្ញាសឹក នៅពេលដែលលោកគ្មានភាពមនុស្សធម៌ក្នុងខ្លួន។

លោក Cho ស្ថិតក្នុងចំណោមរដ្ឋអាជ្ញាពិសេសបីរូបដែលត្រូវបានតែងតាំងបន្ទាប់ពីលោកប្រធានាធិបតីកូរ៉េខាងត្បូង លោក Lee Jae Myung ត្រូវបានជាប់ឆ្នោតជាប្រធានាធិបតីក្នុងការបោះឆ្នោតមួយដែលជាការដក លោក Yoon ដោយតុលាការធម្មនុញ្ញក្នុងខែមេសា។

បច្ចុប្បន្ន លោក Yoon កំពុងស្ថិតក្នុងការជាប់ទោសពីបទបះបោរ ដែលបទចោទនេះ អាចត្រូវផ្ដន្ទាទោសដាក់ពន្ធនាគារអស់មួយជីវិត ឬអាចមានទោសប្រហារជីវិត។ អតីតរដ្ឋមន្ត្រី និងមន្ត្រីផ្សេងទៀតរបស់គាត់ប្រឈមមុខនឹងការចោទប្រកាន់ផ្សេងៗដែលកើតចេញពីការប៉ុនប៉ងច្បាប់អាជ្ញាសឹកតែត្រូវបរាជ័យ។

សភាកូរ៉េខាងត្បូងដែលគ្រប់គ្រងដោយគណបក្សប្រជាធិបតេយ្យសេរី បានបោះឆ្នោតលុបចោលក្រឹត្យដាក់ប្រទេសក្នុងគ្រាអាសន្នរបស់ លោក Yoon ក្នុងរយៈពេលប៉ុន្មានម៉ោង បន្ទាប់ពីការប្រកាសរបស់គាត់កាលពីយប់ថ្ងៃទី៣ ខែធ្នូ ឆ្នាំ២០២៤ ហើយក្រោយមកបានចោទប្រកាន់គាត់ពីបទរំលោភអំណាច។

លោក Yoon បានបន្ថែមទៀតថា វាស្ថិតនៅក្នុងអំណាចរបស់លោកក្នុងនាមជាប្រធានាធិបតីក្នុងការប្រកាសច្បាប់អាជ្ញាសឹក ហើយលោកបានធ្វើវា ដើម្បីព្រមានឲ្យដឹងជុំវិញការរំលោភអំណាចរបស់គណបក្សប្រឆាំងលើការគ្រប់គ្រងសភាដែលកំពុងធ្វើឱ្យខូចដល់ការងាររបស់រដ្ឋាភិបាល។ លោកថា គ្មានការបង្កគ្រោះថ្នាក់ដល់ប្រទេសដោយក្រឹត្យប្រធានាធិបតីដែលដាក់ច្បាប់អាជ្ញាសឹកនោះទេ៕

ណឺ មិនា

The post លោក Yoon រងការចោទថា ញុះញង់កូរ៉េខាងជើង ដើម្បីដាក់ចេញច្បាប់អាជ្ញាសឹកមានប្រសិទ្ធភាព appeared first on Kampuchea Thmey Daily.

លោក Yoon Suk Yeol ប្រឈមបទចោទថ្មីចំពោះការបង្កហេតុដល់កូរ៉េខាងជើង

Rann Reuy — Mon, 10 Nov 2025 08:02:14 +0000

រដ្ឋអាជ្ញាពិសេសរបស់ប្រទេសកូរ៉េខាងត្បូងកាលពីថ្ងៃទី១០ខែវិច្ឆិកានេះ បានដាក់ការចោទប្រកាន់បន្ថែម លើអតីតប្រធានាធិបតី យ៉ុន ស៊ុកយោល (Yoon Suk Yeol) ពីបទរំលោភអំណាច និងបង្កអរិភាពទាក់ទងនឹងការដាក់ចេញច្បាប់អាជ្ញាសឹករយៈពេលខ្លីនៅចុងឆ្នាំ២០២៤។

អតីតប្រធានាធិបតី យ៉ុន ស៊ុកយោល (Yoon Suk Yeol)។ AP

អតីតប្រធានាធិបតីកូរ៉េខាងត្បូង បានព្យាយាមបង្កជម្លោះយោធារវាងកូរ៉េខាងត្បូង និងកូរ៉េខាងជើង ដើម្បីប្រកាសច្បាប់អាជ្ញាសឹក។ នេះតាមអ្នកនាំពាក្យរបស់រដ្ឋអាជ្ញា បានប្រាប់សន្និសីទសារព័ត៌មានដោយដកស្រង់ភស្តុតាងដែលរកឃើញនៅលើទូរស័ព្ទដៃរបស់មន្ត្រីយោធា ដែលរួមមានពាក្យមួយចំនួនដែលបង្ហាញពីការបង្កហេតុដែលអាចកើតមានប្រឆាំងនឹងកូរ៉េខាងជើង ដូចជា «យន្តហោះគ្មានមនុស្សបើក» និង «ការវាយប្រហារយោធា (surgical strike)»។

លោក យ៉ុន ត្រូវបានតុលាការធម្មនុញ្ញបញ្ចប់មុខតំណែងពីប្រធានាធិបតីកាលពីខែមេសា ហើយកំពុងស្ថិតក្នុងការកាត់ទោសចំពោះចោទប្រកាន់ពីការបះបោរដែលកើតចេញពីការប្រកាសដាក់ច្បាប់អាជ្ញាសឹកដែលបរាជ័យកាលពីដើមខែធ្នូឆ្នាំ២០២៤។

ក្នុងការចោទប្រកាន់អំពីការបេះបោរនោះ បើរកឃើញថាមានកំហុស លោក យ៉ុន អាចនឹងត្រូវកាត់ទោសប្រហារជីវិត។

ក្រោយពីបរាជ័យនៃការដាក់ច្បាប់អាជ្ញាសឹកនេះ អតីតប្រធានាធិបតីកូរ៉េខាងត្បូងដែលធ្លាប់កាន់តួនាទីជារដ្ឋអាជ្ញាជាង២៧ឆ្នាំ បាននិយាយជាបន្តបន្ទាប់ថា គាត់មិនដែលមានបំណងដាក់ច្បាប់យោធាទេ ប៉ុន្តែបានប្រកាសច្បាប់អាជ្ញាសឹកនាពេលនោះដើម្បីព្រមានដល់ការប្រព្រឹត្តខុសដោយគណបក្សប្រឆាំង និងដើម្បីការពារលទ្ធិប្រជាធិបតេយ្យពីធាតុ «ប្រឆាំងនឹងរដ្ឋ»។

យោងតាមច្បាប់អាជ្ញាសឹកដែលប្រកាសចេញ អតីតប្រធានាធិបតី យ៉ុន អតីតរដ្ឋមន្ត្រីការពារជាតិ លោក Kim Yong-hyun និងអតីតប្រធានចារកម្មយោធា លោក Yeo In-hyung គ្រោងនឹងធ្វើការវាយប្រហារកូរ៉េខាងជើងប្រឆាំងនឹងកូរ៉េខាងត្បូង។ នេះបើតាមអ្នកនាំពាក្យរបស់រដ្ឋអាជ្ញាលោកស្រី Park Ji-young ដែលបញ្ជាក់ពីការបន្ថែមការចោទប្រកាន់។

លោកស្រី Park បាននិយាយថា អ្នកទាំងបីចង់បង្កើតភាពតានតឹងក្នុងប្រទេស ដែលជាលក្ខខណ្ឌមួយសម្រាប់លោកយ៉ុន ដើម្បីប្រកាសច្បាប់អាជ្ញាសឹក។

ព្រះរាជអាជ្ញា បាននិយាយថា Kim និង Yeo ក៏ត្រូវបានចោទប្រកាន់ពីបទចោទប្រកាន់បន្ថែមដូចគ្នា។

ក្រុមរបស់រដ្ឋអាជ្ញាពិសេសបានចោទប្រកាន់លោក យ៉ុន និងមេបញ្ជាការយោធារបស់គាត់ថា បានបញ្ជាឱ្យប្រតិបត្តិការដ្រូនបំបាំងកាយចូលទៅក្នុងប្រទេសកូរ៉េខាងជើង ដើម្បីធ្វើឱ្យភាពតានតឹងរវាងប្រទេសជិតខាងទាំងពីរ និងបង្ហាញពីភាពត្រឹមត្រូវនៃក្រឹត្យច្បាប់អាជ្ញាសឹករបស់គាត់៕

រ៉ាន់ រើយ

The post លោក Yoon Suk Yeol ប្រឈមបទចោទថ្មីចំពោះការបង្កហេតុដល់កូរ៉េខាងជើង appeared first on Kampuchea Thmey Daily.

ធ្លាយវីដេអូលោក Yoon ជាប់ឃុំក្នុងពន្ធធនាគារមួយកន្លែង

សាង ស្រីល័ក្ខ — Thu, 04 Sep 2025 04:16:50 +0000

កាលពីថ្ងៃទី ២ ខែកញ្ញា វីដេអូមួយដែលមានចំណងជើងថា «បែកធ្លាយវីដេអូរបស់ Yoon Suk Yeol នៅក្នុងមន្ទីរឃុំឃាំង» បានផ្សព្វផ្សាយពាសពេញវេទិកាផ្សេងៗ។ ខ្សែអាត់វីដេអូមួយនោះមានរយៈពេលត្រឹមតែ ១៩ វិនាទី បង្ហាញអំពីបុរសម្នាក់ក្នុងឈុតមន្ត្រីឈរនៅខាងក្រៅ ខណៈនៅខាងក្នុង បុរសម្នាក់ដែលស្រដៀងនឹងអតីតប្រធានាធិបតី អាចត្រូវគេមើលឃើញសម្លឹងមើលទៅខាងក្រៅ។ ទោះយ៉ាងណាក៏ដោយ ដោយសារគុណភាពវីដេអូអន់ មុខមាត់ពិតប្រាកដគឺមិនសូវជាច្បាស់ទេ។

វីដេអូរយៈពេល ១៩ វិនាទី ជាវីដេអូឃ្លាំមើលអតីតប្រធានាធិបតី (រូបភាព៖Allkpop)

យោងតាមភ្នាកងារ Allkpop វីដេអូនេះត្រូវគេរាយការណ៍ថា បានបែកធ្លាយកាលពីថ្ងៃទី ១ ខែកញ្ញាមក នៅពេលដែលសមាជិកនៃគណៈកម្មាធិការនីតិកម្ម និងយុត្តិធម៌នៃរដ្ឋសភាបានពិនិត្យវីដេអូតាមដាន និងកំណត់ត្រាផ្សេងទៀតនៃការប្រតិបត្តិដីកាចាប់ខ្លួនលោក Yoon Suk Yeol ។ សមាជិកគណកម្មាធិការបាននិយាយថា Yoon បានទប់ទល់ក្នុងអំឡុងពេលការប៉ុនប៉ងលើកទីមួយ និងលើកទីពីរ ខណៈដែលស្លៀកពាក់តែខោក្នុងរបស់គាត់តែប៉ុណ្ណោះ។

វីដេអូមួយនោះ បានរីករាលដាលយ៉ាងឆាប់រហ័សតាមរយៈ YouTube និងប្រព័ន្ធផ្សព្វផ្សាយសង្គមផ្សេងទៀត ដោយសារតែវាជាឃ្លិបដ៏កម្រមួយដែលអតីតប្រធានាធិបតីជាប់ទោស

លោក Kim Yong Min សមាជិកសភាគណបក្សប្រជាធិបតេយ្យ និងជាលេខាបក្សកាន់អំណាចនៃគណៈកម្មាធិការនេះ បាននិយាយបន្ទាប់ពីមើលវីដេអូថា ក្នុងអំឡុងពេលអនុវត្តដីកាលើកដំបូង អតីតប្រធានាធិបតី Yoon បានដេកស្លៀកតែខោក្នុងប៉ុណ្ណោះ។ ជាពិសេសរូបគាត់ថែមទាំងជំទាស់យ៉ាងខ្លាំងដោយនិយាយថា «គ្មាននរណាម្នាក់អាចប្រើកម្លាំងលើគាត់បានទេ»។ គាត់បានបដិសេធមិនធ្វើតាម ដោយទាមទារកុំឲ្យប៉ះពាល់ និងទទូចសុំជួបមេធាវីថែមទៀត។

សមាជិកសភាគណបក្សប្រជាធិបតេយ្យរូបនេះបាននិយាយបន្ថែមថា ក្នុងអំឡុងពេលអនុវត្តដីកាលើកទីពីរ គាត់នៅតែស្លៀកខោក្នុង អង្គុយអានព្រះគម្ពីរ ហើយបដិសេធមិនធ្វើតាមមន្រ្តីក្នុងពន្ធធនាគារឡើយ។ លោកក៏បានសង្កត់ធ្ងន់ថា ដ្បិតតែវីដេអូនេះ បង្ហាញពីភាពខុសច្បាប់នៅក្នុងផ្នែកនៃទីប្រឹក្សាពិសេស ប៉ុន្តែជាការរារាំងម្តងហើយម្តងទៀត និងចេតនារបស់លោក Yoon នៃការអនុវត្តច្បាប់ស្របច្បាប់ និងសិទ្ធិអំណាចសាធារណៈ។

ទោះជាយ៉ាងណាក៏ដោយ ជាការឆ្លើយតប ក្រុមអ្នកច្បាប់របស់ Yoon បានរុញច្រានមកវិញភ្លាមៗ ដោយចេញសេចក្តីថ្លែងការណ៍មួយថា ទាំំងនោះគឺជាការបំពានលើច្បាប់ស្តីពីការអនុវត្តទោស ច្បាប់ស្តីពីការបង្ហាញព័ត៌មាន និងច្បាប់ស្តីពីការការពារព័ត៌មានផ្ទាល់ខ្លួន។ CCTV អាចប្រើបានក្នុងកម្រិតអប្បបរមាដែលចាំបាច់ដើម្បីត្រួតពិនិត្យអ្នកទោស ឬសម្ភារៈបរិក្ខារ។ វាមិនអាចប្រើប្រាស់ ឬចូលប្រើប្រាស់សម្រាប់គោលបំណងដូចជា ការផ្តល់សិទ្ធិឲ្យមានការស៊ើបអង្កេត ឬការអះអាងរបស់សភា។

ពួកគេបានបន្តទៀតថា ការថតរូបភាព CCTV នៅខាងក្នុងមណ្ឌលអប់រំកែប្រែ គឺជាកម្មវត្ថុនៃគោលការណ៍មិនបង្ហាញ ទាំងការការពារសិទ្ធិមនុស្សរបស់អ្នកទោស និងដើម្បីការពារហានិភ័យសុវត្ថិភាពធ្ងន់ធ្ងរ ប្រសិនបើប្លង់ខាងក្នុង ឬប្រព័ន្ធយាមត្រូវបានលាតត្រដាង។ ភាពស្របច្បាប់នៃការចាប់ខ្លួនស្ថិតនៅក្នុងដែនរបស់តុលាការ មិនមែនជាសិទ្ធិសាធារណៈក្នុងការដឹងនោះទេ៕

សូមទស្សនាវីដេអូខាងក្រោម

អត្ថបទ៖ សាង ស្រីល័ក្ខ

ចុចអាន៖ស្រ្តីកូរ៉េ វ័យ៥០ឆ្នាំ ត្រូវរថភ្លើងបុកដោយមិនដឹងមូលហេតុ

The post ធ្លាយវីដេអូលោក Yoon ជាប់ឃុំក្នុងពន្ធធនាគារមួយកន្លែង appeared first on Kampuchea Thmey Daily.

ឆ្មក់ចូលផ្ទះអតីតមេដឹកនាំគណបក្សប្រឆាំង សង្ស័យពាក់ព័ន្ធច្បាប់អាជ្ញាសឹក

សាង ស្រីល័ក្ខ — Tue, 02 Sep 2025 04:18:26 +0000

ក្រុមទីប្រឹក្សាពិសេសមួយ នៅថ្ងៃអង្គារទី២ ខែកញ្ញានេះ បានវាយឆ្មក់ចូលផ្ទះរបស់តំណាងរាស្រ្ត Choo Kyung-ho នៃគណបក្សអំណាចប្រជាជន (PPP) ដែលជាគណបក្សប្រឆាំងដ៏ធំ ជុំវិញការចោទប្រកាន់ថា គាត់ជាប់ពាក់ព័ន្ធជាមួយច្បាប់អាជ្ញាសឹករបស់អតីតប្រធានាធិបតី Yoon Suk Yeol កាលពីខែធ្នូ ឆ្នាំ២០២៤។

តំណាងរាស្រ្ត Choo Kyung-ho នៃគណបក្សអំណាចប្រជាជន ចូលរួមកិច្ចប្រជុំគណៈកម្មាធិការគោលនយោបាយជាតិនៅរដ្ឋសភា កាលថ្ងៃទី២១ ខែសីហា (រូបភាព៖ YONHAP)

ក្រុមរបស់ទីប្រឹក្សាពិសេស Cho Eun-suk បានធ្វើការឆែកឆេរ និងរឹបអូសផ្ទះរបស់តំណាងរាស្រ្ត Choo ក្នុងទីក្រុងសេអ៊ូល ជុំវិញការចោទប្រកាន់ថា មេដឹកនាំរបស់ PPP នៅពេលនោះ បានរារាំងសមាជិកសភារបស់គណបក្សគាត់ មិនឲ្យចូលរួមការបោះឆ្នោតសភា ដើម្បីលើកចេញក្រឹត្យច្បាប់អាជ្ញាសឹក។

ក្រុមការងារកំពុងពិនិត្យមើលការចោទប្រកាន់ដែលថា លោក Choo Kyung-ho បានផ្លាស់ប្តូរទីកន្លែងសម្រាប់កិច្ចប្រជុំទូទៅ បន្ទាន់នៃសមាជិកសភារបស់ PPP ជាច្រើនដងនៅយប់នៃការប្រកាសរបស់លោក Yoon នៅថ្ងៃទី ៣ ខែធ្នូ តាមសំណើរបស់អតីតប្រធានាធិបតី។

ដោយសារតែការផ្លាស់ប្តូរនេះ សមាជិកសភា PPP ជាច្រើន មិនអាចចូលរួមក្នុងការបោះឆ្នោតបាន ហើយរដ្ឋសភាបានបញ្ចប់ការអនុម័តសំណើលុបចោលក្រឹត្យរបស់លោក Yoon នៅព្រឹកបន្ទាប់ ដោយមានវត្តមានសមាជិកសភាតែ ១៨នាក់ប៉ុណ្ណោះ ក្នុងចំណោមសមាជិកសភា ១០៨រូបរបស់ PPP ។

ក្រុមការងាររបស់លោក Cho ទទួលបានកំណត់ត្រាដែល Choo ហៅលោក Yoon តាមទូរស័ព្ទភ្លាមៗបន្ទាប់ពីការប្រកាសរបស់គាត់។ Choo ត្រូវបានគេរាយការណ៍ថាបានទូរស័ព្ទទៅ Hong Chul-ho ដែលជាជំនួយការជាន់ខ្ពស់របស់ប្រធានាធិបតីនៅពេលនោះ ហើយបន្ទាប់មកនាយករដ្ឋមន្ត្រី Han Duck-soo មុនពេលការហៅរបស់គាត់ជាមួយ Yoon ។

ទោះបីជាបែបនេះក្ដី ភាគីរបស់លោក Choo Kyung-ho បានអះអាងថា លោកមិនបានដឹងពីផែនការរបស់លោក Yoon ក្នុងការប្រកាសច្បាប់អាជ្ញាសឹកជាមុននោះទេ ហើយថាលោកមិនបានពិភាក្សាអំពីការរារាំងសមាជិកសភាពីការចូលរួមក្នុងការបោះឆ្នោតជាមួយអតីតប្រធានាធិបតីនោះទេ។

យ៉ាងណាក៏ដោយ ក្រុមរបស់លោក Choo Kyung-ho ត្រូវបានគេរំពឹងថា នឹងហៅទៅកាន់ តំណាងរាស្រ្តខ្លួនក្នុងពេលឆាប់ៗនេះ ដើម្បីសាកសួរគាត់អំពីការចោទប្រកាន់ដ៏ធំនេះផងដែរ៕

អត្ថបទ៖ សាង ស្រីល័ក្ខ

ចុចអាន៖ប្រធានគណៈកម្មការមួយរូប លាលែងតំណែង ព្រោះចង់ពាក់ព័ន្ធនឹងអតីតជំទាវទីមួយ

The post ឆ្មក់ចូលផ្ទះអតីតមេដឹកនាំគណបក្សប្រឆាំង សង្ស័យពាក់ព័ន្ធច្បាប់អាជ្ញាសឹក appeared first on Kampuchea Thmey Daily.

តើ លោក Lee Jae-myung ឬ លោក Kim Moon-soo នឹងក្លាយជាប្រធានាធិបតីកូរ៉េខាងត្បូង?

Rann Reuy — Tue, 03 Jun 2025 06:36:15 +0000

វាមានរយៈកន្លះឆ្នាំគត់នៃវិបត្តិនយោបាយរបស់ប្រទេសកូរ៉េខាងត្បូងដែលជាប្រទេសមានសេដ្ឋកិច្ចរីកលួតលាស់ខាំងបំផុតមួយនៅអាស៊ីបូព៌ា ចាប់តាំងពីការប្រកាសច្បាប់អាជ្ញាសឹករបស់អតីតប្រធានាធិបតី Yoon Suk Yeol រហូតដល់ថ្ងៃបោះឆ្នោតប្រធានាធិបតីថ្មីនៅថ្ងៃទី៣ខែមិថុនានេះ។

លោក Kim Moon-soo (ស្តាំ) ចាប់ដៃជាមួយគូប្រជែង លោក Lee Jae-myung ក្រោយពេលការជជែកលើទូរទស្សន៍កាលថ្ងៃទី២៣ខែឧសភា។ Reuters

ក្នុងវិបត្តិនយោបាយកន្លះឆ្នាំមកនេះ ភាពមិនប្រាកដប្រជា និងការបែកបាក់គ្នា ក្នុងសង្គមកូរ៉េខាងត្បូង បានកើតឡើងយ៉ាងខ្លាំងមិនធ្លាប់មាន ហើយការសម្រេចសេចក្តីដោយតុលាការធម្មនុញ្ញដោយការបោះឆ្នោតជាឯកច្ឆ័នក្នុងចំណោមចៅក្រម៨រូបនៃសមាជិកចៅក្រម៩រូបនៃតុលាការធម្មនុញ្ញ ដើម្បីដកហូតអំណាច លោក Yoon Suk Yeol ដែលជាអតីតមេដឹកនាំដ៏អាម៉ាស់ ដែលបានទម្លាក់ប្រទេសប្រជាធិបតេយ្យទៅក្នុងភាពវឹកវរដោយការប្រកាសច្បាប់អាជ្ញាសឹកកាលពីថ្ងៃតី៣ខែខែធ្នូឆ្នាំ២០២៤។

លោក Yoon Suk Yeol ជាអតីតអ្នកច្បាប់កាន់កិច្ចការច្បាប់ក្នុងសំណុំរឿងចោទប្រកាន់អតីតប្រធានាធិបតីមុនៗរបស់គាត់ ក្នុងនាមជាអគ្គរដ្ឋអាជ្ញាធររយៈពេល២៧ឆ្នាំ មុនការហក់ចូលប្រឡូកក្នុងឆាកនយោបាយរយៈពេលខ្លី និងឈ្នះការបោះឆ្នោតដ៏ស្តួចស្តើងក្លាយជាប្រធានាធិបតីនៅឆ្នាំ២០២២។

ការសម្រេចរបស់តុលាការធម្មនុញ្ញកូរ៉េខាងត្បូងកាលពីថ្ងៃទី៤ខែមេសាឆ្នាំនេះ បានបើកផ្លូវឲ្យប្រទេសកូរ៉េរៀបចំការបោះឆ្នោតជ្រើសរើសប្រធានាធិបតីថ្មីនៅថ្ងៃទី៣ខែមិថុនានេះ ដើម្បីបញ្ចប់នូវការប្រជែងប្រជែងប្រជាប្រិយភាពនយោបាយរបស់គណបក្សប្រជាជាធិបតេយ្យកូរ៉េ (DPK) ដែលមាន លោក Lee Jae-myung ជាបេក្ខភាពប្រធាធិបតី និង គណបក្សអំណាចប្រជាជន (PPP) ដែលមាន លោក Kim Moon-soo ជាបេក្ខភាពប្រធានាធិបតីនាពេលខាងមុខនេះ។

ថ្វីត្បីតតែមានបេក្ខជនរហូតដល់៥ តំណាងគណបក្សដែលចូលរួមការបោះឆ្នោតប្រធានាធិបតីនៅថ្ងៃអង្គារទី៣ខែមិថុនា ក៏មានការកត់សម្គាល់ជាពិសេស មានតែបេក្ខជនប្រធានាធិបតីតែពីររូបប៉ុណ្ណោះនឹងក្លាយជាអ្នកប្រកួតប្រជែងឈានទៅឈ្នះការបោះឆ្នោត ក្លាយជាប្រធានាធិបតីប្រទេសកូរ៉េខាងត្បូង។ បេក្ខជនទាំង២នោះ គឺមាន លោក Lee Jae-myung តំណាងគណបក្សប្រជាជាធិបតេយ្យកូរ៉េ (DPK) និង លោក Kim Moon-soo តំណាងគណបក្សអំណាចប្រជាជន (PPP) ដែលជាបក្សរបស់អតីតប្រធានាធិបតី លោក Yoon Suk Yeol។

តើបេក្ខជនឈានមុខទាំងពីរ មានលក្ខណៈសម្បត្តិខុសគ្នាយ៉ាងដូចម្តេច?

លោក Lee Jae-myung និងលោក Kim Moon-soo។ REUTERS

តំណាងគណបក្សប្រជាជាធិបតេយ្យកូរ៉េ (DPK) លោក Lee Jae-myung អាយុ ៦០ ឆ្នាំមកពីគណបក្សប្រជាធិបតេយ្យ ដែលគេដឹងថា ជាគណបក្សសេរីនិយម និងមានទំនោរទន់ភ្លន់ជាមួយកូរ៉េខាងជើង។

ក្នុងការកត់ត្រាជីវប្រវត្តិរបស់បេក្ខជនប្រធានាធិបតីរូបនេះ លោក Lee គឺជា អតីតកម្មកររោងចក្រមិនទាន់គ្រប់អាយុមកពីគ្រួសារក្រីក្រ ហើយ លោកបានក្លាយជាមេធាវីសិទ្ធិមនុស្សមុនចូលប្រឡូកក្នុងឆាកនយោបាយ។ គាត់គឺជាអតីតអភិបាលក្រុង ហើយថ្មីៗនេះបានបម្រើការជាតំណាងរាស្រ្តបន្ទាប់ពីចាញ់ឆ្នោតដ៏ស្តួចស្តើងតទល់ នឹង លោក Yoon ក្នុងការបោះឆ្នោតប្រធានាធិបតីឆ្នាំ២០២២។

ប៉ុន្តែក្នុងការបោះឆ្នោតតំណាងរាស្ត្រកាលពី ខែតុលាឆ្នាំ ២០២៤ គណបក្សប្រជាជាធិបតេយ្យកូរ៉េ (DPK) របស់ លោក Lee Jae-myung បានទទួលការកើនឡើងប្រជាប្រិយភាពយ៉ាងខ្លាំង ដោយឈ្នះអាសន្នរហូតដល់ទៅជាង១៧០ ក្នុងចំណោមអាសនៈសភាកូរ៉េចំនួន៣០០ ដោយគណបក្សអំណាចប្រជាជនទទួលបានអាសនតែ១០៨ ប៉ុណ្ណោះ ហើយអាសនៈសេសសល់គឺបានទៅលើគណបក្សផ្សេងៗ។

លោក Lee Jae-myung បានរួចរស់ជីវិតពីការប៉ុនប៉ងធ្វើឃាតក្នុងខែមករា ឆ្នាំ ២០២៤ នៅពេលដែលបុរសម្នាក់បានចាក់គាត់ចំកអំឡុងពេលព្រឹត្តិការណ៍សាធារណៈមួយ។

លោក Lee បានក្លាយជាគោលដៅនៃការធ្វើចាប់ខ្លួនក្នុងការប្រកាសច្បាប់អាជ្ញាសឹកកាលថ្ងៃទី៣ ខែធ្នូឆ្នាំ២០២៤ ដែលអតីតប្រធានាធិបតី Yoon បញ្ជាបានបញ្ជូនទាហានទៅកាន់រដ្ឋសភា។ លោក Lee ស្ថិតក្នុងចំណោមសមាជិកសភាដែលប្រញាប់ប្រញាល់ទៅកាន់សភា ហើយបានប្រឈមទាហាន មុនឲ្យធ្វើការបោះឆ្នោតបន្ទាន់ដើម្បីលើកច្បាប់អាជ្ញាសឹក។

យោងតាម CNN គាត់បានផ្សាយផ្ទាល់ (Live) ដោយបង្ហាញពីការលោតពីលើរបងដើម្បីចូលអាគារ ដោយក្នុងវីដេអូដែលល្បីមានអ្នកចូលមើលរាប់សិបលានដង។

នៅលើផ្លូវនៃយុទ្ធនាការនេះ លោក Lee បានសន្យាថា នឹងធ្វើកំណែទម្រង់នយោបាយ និងសេដ្ឋកិច្ច រួមទាំងការគ្រប់គ្រងបន្ថែមទៀតលើសមត្ថភាពរបស់ប្រធានាធិបតីក្នុងការប្រកាសច្បាប់អាជ្ញាសឹក និងកែសម្រួលរដ្ឋធម្មនុញ្ញដើម្បីអនុញ្ញាតឱ្យប្រធានាធិបតីកាន់អំណាចត្រឹម៤ឆ្នាំក្នុង១អាណត្តិ និងមានត្រឹម២អាណត្តិ ជំនួសឱ្យអាណត្តិប្រាំឆ្នាំតែមួយបច្ចុប្បន្ន។

លោកបានសង្កត់ធ្ងន់លើការបន្ធូរបន្ថយភាពតានតឹងនៅឧបទ្វីបកូរ៉េ ខណៈពេលដែលកំពុងបន្តគោលដៅយូរអង្វែងនៃការលុបបំបាត់នុយក្លេអ៊ែររបស់កូរ៉េខាងជើង។ គាត់ក៏គាំទ្រការជំរុញអាជីវកម្មខ្នាតតូច និងការរីកលូតលាស់ឧស្សាហកម្ម AI ។

ប៉ុន្តែ លោក Lee ក៏ត្រូវបានជាប់គាំងដោយសំណុំរឿងផ្លូវច្បាប់ រួមទាំងការកាត់ក្តីដែលកំពុងបន្តជាច្រើនសម្រាប់ការសូកប៉ាន់ និងការចោទប្រកាន់ពាក់ព័ន្ធនឹងរឿងអាស្រូវអភិវឌ្ឍន៍អចលនទ្រព្យ។

ដោយឡែក លោកត្រូវបានកាត់ទោសពីបទល្មើសច្បាប់បោះឆ្នោតក្នុងសំណុំរឿងបន្តមួយទៀត ដែលត្រូវបានបញ្ជូនទៅសាលាឧទ្ធរណ៍។

លោក Lee បដិសេធរាល់ការចោទប្រកាន់លើលោក។ ថ្លែងទៅកាន់ទូរទស្សន៍ CNN កាលពីខែធ្នូ លោកបានអះអាងថា លោកត្រូវបានចោទប្រកាន់លើបទចោទប្រកាន់ជាច្រើន «ដោយគ្មានភស្តុតាង ឬមូលដ្ឋានណាមួយឡើយ» ហើយថាការចោទប្រកាន់នេះមានហេតុផលនយោបាយ។

លោក Kim Moon-soo នៃគណបក្សអំណាចប្រជាជនអភិរក្ស (PPP)

លោក Kim Moon Soo។ REUTERS

នៅពេលដែលលោក Yoon បានត្រូវតុលាការធម្មនុញ្ញដកហូតដំណែងនៅដើមខែមេសា ហើយលោកបានចាកចេញពីគណបក្សនៅក្នុងខែឧសភា ដើម្បីបើកផ្លូវឲ្យមានបេក្ខជនថ្មីសម្រាប់តំណែងប្រធានាធិបតីពីគណបក្សអំណាចប្រជាជន។ ក្នុងពេលចាកចេញ អតីតប្រធានាធិបតីដែលបាត់បង់ប្រជាប្រិយ បានជំរុញឱ្យអ្នកគាំទ្រគាំទ្រលោក Kim Moon-soo ដែលជាអតីតរដ្ឋមន្ត្រីក្រសួងការងារអាយុ៧៣ឆ្នាំ។

លោក Kim Moon-soo ក៏បានយកឈ្នះក្នុងការបោះឆ្នោតក្នុងផ្ទៃក្នុងបក្សអំណាចប្រជាជន លើអតីតនាយករដ្ឋមន្ត្រី Han Duck-soo ដែលបានលាលែងពីតំណែងប្រធានាធិបតីស្តីទី ដើម្បីប្រជែងតំណែងក្នុងបេក្ខជនប្រធានាធិបតីពីក្នុងបក្សវិញ។

លោក Kim Moon-soo ជាសកម្មជនការងារដ៏លេចធ្លោនៅសាកលវិទ្យាល័យ សូម្បីតែត្រូវបានបណ្តេញចេញ និងដាក់គុកសម្រាប់ការតវ៉ារបស់គាត់។ នៅទីបំផុតគាត់បានចូលរួមជាមួយគណបក្សអំណាចប្រជាជន ដែលជាបក្សអភិរក្សនិយមមួយ ហើយបានឈានជើងចូលទៅក្នុងការតែងតាំងបន្ទាប់ពីការប៉ះទង្គិចគ្នាជាច្រើនជុំនៃគណបក្ស។

គណបក្សអំណាចប្រជាជន ដំបូងបានជ្រើសរើស Kim ជាបេក្ខភាពរបស់ខ្លួន។ បន្ទាប់មកទម្លាក់គាត់ ដោយសម្លឹងមើលអតីតនាយករដ្ឋមន្ត្រី Han Duck-soo ជំនួសវិញ។ ទីបំផុតគណបក្សបានជ្រើសរើសលោក Kim វិញ បន្ទាប់ពីលោកបានប្តឹងជំទាស់តាមផ្លូវច្បាប់។

ប៉ុន្តែ PPP នៅតែបែកបាក់គ្នាយ៉ាងខ្លាំង ហើយបេក្ខជនរបស់ខ្លួនមានប្រជាប្រិយភាពអន់ជាង បេក្ខជនប្រធានាធិបតីមកពីបក្សប្រជាធិបតេយ្យ លោក Lee Jae-myung នៅក្នុងការស្ទង់មតិមុនការបោះឆ្នោត។

លោក Kim ក៏បានសន្យាថានឹងធ្វើកំណែទម្រង់នយោបាយ ប្រព័ន្ធតុលាការ និងប្រព័ន្ធគ្រប់គ្រងការបោះឆ្នោតរបស់ប្រទេស ដើម្បីកសាងទំនុកចិត្តសាធារណៈឡើងវិញ។ យុទ្ធនាការរបស់គាត់បានសង្កត់ធ្ងន់លើការធ្វើឱ្យប្រទេសកូរ៉េខាងត្បូងមានភាពស្និទ្ធស្នាលនឹងអាជីវកម្មតាមរយៈការកាត់បន្ថយពន្ធ និងបន្ធូរបន្ថយការរឹតបន្តឹង និងដោយការលើកកម្ពស់បច្ចេកវិទ្យាថ្មីៗ និងថាមពលនុយក្លេអ៊ែរ។

បេក្ខជនភាគីទីបី និងឯករាជ្យមួយចំនួនក៏កំពុងឈរឈ្មោះជាប្រធានាធិបតីដែរ។ ពួកគេរាប់បញ្ចូលទាំងលោក Lee Jun-seok ដែលជាអតីតមេដឹកនាំ PPP ដែលបានបង្កើតគណបក្សកំណែទម្រង់ថ្មីអភិរក្សផ្ទាល់ខ្លួនរបស់គាត់កាលពីឆ្នាំមុន៕

ដោយ រ៉ាន់ រើយ

ប្រជាជនកូរ៉េខាងត្បូងចេញទៅបោះឆ្នោតនៅថ្ងៃទី៣ខែមិថុនានេះ។ REUTERS

The post តើ លោក Lee Jae-myung ឬ លោក Kim Moon-soo នឹងក្លាយជាប្រធានាធិបតីកូរ៉េខាងត្បូង? appeared first on Kampuchea Thmey Daily.

លោក Yoon លាលែងពីតំណាងបក្ស PPP បើកផ្លូវឲ្យបេក្ខជនថ្មី Kim Moon-soo

Rann Reuy — Sat, 17 May 2025 07:23:51 +0000

អតីតប្រធានាធិបតីកូរ៉េខាងត្បូង លោក Yoon Suk Yeol ដែលត្រូវបានបណ្តេញចេញពីអំណាចដោយអំណាចសាលក្រមតុលាការធម្មនុញ្ញ កាលដើមខែមេសា បានប្រកាសលាលែងពីតំណាងគណបក្សអំណាចប្រជាជន (PPP) សម្រាប់តំណែងប្រធានាធិបតី ដើម្បីបើកផ្លូវឲ្យ Kim Moon-soo តំណាងបក្សនេះប្រកួតសម្រាប់តំណែងប្រធានាធិបតីសម្រាប់ការបោះឆ្នោតនៅថ្ងៃ៣ខែមិថុនាខាងមុខនេះ។

លោក Yoon Suk Yeol លាលែងពីតំណាងបក្សអំណាចប្រជាជនសម្រាប់តំណែងប្រធានាធិបតី។ Reuters

លោក Yoon Suk Yeol បានតំណាងគណបក្សអំណាចប្រជាជន People Power Party (PPP) សម្រាប់តំណែងប្រធានាធិបតីកាលពីឆ្នាំ២០២២ ហើយ ក៏បានឈ្នះការបោះឆ្នោតក្នុងចំនួនតិចតួចធៀបជាមួយគណបក្សប្រជាធិបតេយ្យតំណាងដោយ លោក Lee Jae-myung។

លោក Yoon Suk Yeol បានដឹកនាំប្រទេសកូរ៉េខាងត្បូងជាង២ឆ្នាំ ចាប់តាំងពីខែមិថុនាឆ្នាំ២០២២ និងត្រូវបានរកឃើញកំហុសដោយសារតែការច្បាប់អាជ្ញាសឹកកាលថ្ងៃទី៣ខែធ្នូឆ្នាំ២០២៤ ដែលនាំឲ្យមានភាពវឹកវរផ្នែកនយោបាយយ៉ាងជ្រៅនៅប្រទេសកូរ៉េ។ រដ្ឋសភាជាតិកូរ៉ ដឹកនាំដោយគណបក្សប្រជាធិបតេយ្យរួមជាមួយសមាជិកសភារបស់គណបក្សកាន់អំណាចផង បានបោះឆ្នោតប្រឆាំងការដាក់បញ្ជាអាជ្ញាសឹកនោះ ហើយ១៤ថ្ងៃក្រោយមក រដ្ឋសភាជាតិក៏បានឆ្នោតសេចក្តីស្នើព្យួរតំណែងប្រធានាធិបតី រហូតដល់តុលាការធម្មនុញ្ញសម្រាប់ជាឯកច្ឆ័ន្ទដកលោកចេញពីអំណាចនៅថ្ងៃទី៤ខែមេសា២០២៥។

លោក .Yoon Suk Yeol បានបង្ហោះសារនៅលើគណនីបណ្តាញសង្គមហ្វេសប៊ុករបស់លោក ថា៖«ថ្ងៃនេះខ្ញុំចាកចេញពីគណបក្សអំណាចប្រជាជន។ ខ្ញុំសូមជូនពរបេក្ខជនប្រធានាធិបតី លោក Kim Moon-soo ឲ្យឈ្នះការបោះឆ្នោតប្រធានាធិបតី ដែលជាវាសនាសាធារណៈរដ្ឋកូរ៉េពឹងផ្អែកនេះ»។

លោក Kim Moon-soo បេក្ខជនប្រធានាធិបតីតំណាងគណបក្សអំណាចប្រជាជន (PPP) សម្រាប់ការបោះឆ្នោតប្រធានាធិបតីនៅដើមខែមិថុនាខាងមុខនេះ ដោយត្រូវប្រជែងជាមួយបេក្ខជនមកពីបក្ស៦ផ្សេងទៀត ប៉ុន្តែការប្រជែងធំបំផុតគឺ លោក Lee Jae-myung ដែលតំណាងរបស់បក្សប្រជាធិបតេយ្យដែលជាបក្សប្រឆាំងដ៏មានប្រជាប្រិយភាព។

យោងការផ្សាយរបស់រ៉យទ័រ ដែលបានដកស្រង់ការស្ទង់មតិធ្វើឡើងដោយ Gallup Korea ការគាំទ្របេក្ខជនតំណាងបក្សអំណាចប្រជាជន លោក Kim Moon-soo មានត្រឹមតែ២៩ភាគរយ ប្រៀបធៀបការគាំទ្រ លោក Lee Jae-myung មានរហូតដល់៥១ភាគរយឯណោះ៕

ដោយ រ៉ាន់ រើយ

លោក Kim Moon-soo តំណាងបក្សអំណាចអំណាចប្រជាជនជំនួសលោក Yoon Suk Yeol សម្រាប់ការបោះឆ្នោតប្រធានាធិបតីនៅថ្ងៃទី៣ខែមិថុនា។ Reuters

The post លោក Yoon លាលែងពីតំណាងបក្ស PPP បើកផ្លូវឲ្យបេក្ខជនថ្មី Kim Moon-soo appeared first on Kampuchea Thmey Daily.

លោក Yoon ចូលតុលាការក្រុងសេអ៊ូលពាក់ព័ន្ធការចោទប្រកាន់បទឧក្រិដ្ឋ«បះបោរ»

Rann Reuy — Mon, 14 Apr 2025 05:03:05 +0000

យោងតាមទីភ្នាក់ងារសារព័ត៌មានយ៉ុនហាប់ (Yonhap) ព័ត៌មានខាងលើត្រូវបានចែករំលែកដោយមន្ត្រីតុលាការមួយចំនួន កាលពីថ្ងៃទី១៣ខែមេសា។ តុលាការក្រុងសេអ៊ូល បានបើកសវនាការលើការចោទប្រកាន់ពីបទបះបោររបស់ អតីតប្រធានាធិបតីកូរ់េខាងត្បូង លោក Yoon Suk Yeol នៅព្រឹកថ្ងៃទី១៤ខែមេសា ដោយក្នុងនាមជាចុងចោទ អតីតប្រធានាធិបតី Yoon ត្រូវតែមានវត្តមានដើម្បីចូលរួមសវនាការ។

លោក Yoon Suk Yeol ក៏ជាអតីតប្រធានាធិបតីកូរ៉េខាងត្បូងទីប្រាំដែលបង្ហាញខ្លួនក្នុងការកាត់ទោសឧក្រិដ្ឋកម្ម។ លោក Yoon ដែលតុលាការធម្មនុញ្សម្រេចបញ្ចប់អំណាចកាលថ្ងៃទី៤ខែមេសា បន្ទាប់ពីរដ្ឋសភាជាតិបានបោះឆ្នោតព្យួរអំណាចកាលថ្ងៃទី១៤ខែធ្នូឆ្នាំ២០២៤ ដោយសារតែការប្រកាសច្បាប់អាជ្ញាសឹកកាលថ្ងៃទី៣ខែធ្នូឆ្នាំមុន។

តាមសេចក្តីរាយការណ៍នៅព្រឹកថ្ងៃចន្ទនេះរបស់ទីភ្នាក់ងារព័ត៌មានកូរ៉៉េខាងត្បូង លោក Yoon នឹងត្រូវបានអនុញ្ញាតឱ្យចូលក្នុងតុលាការតាមរយៈយានដ្ឋានចំណតក្រោមដី បន្ទាប់ពីវិធានការសន្តិសុខត្រូវបានដាក់ដើម្បីការពារការតវ៉ាដែលអាចកើតមាននៅជិតតុលាការ។ ប្រព័ន្ធផ្សព្វផ្សាយនឹងមិនត្រូវបានអនុញ្ញាតឱ្យថតរូបនៅក្នុងបន្ទប់សវនាការទេ មុនពេលសវនាការចាប់ផ្តើម។

តាមនីតិវិធីតុលាការ លោក Yoon នឹងត្រូវប្រកាសឈ្មោះ ថ្ងៃខែឆ្នាំកំណើត មុខរបរ និងទីកន្លែងរស់នៅនៅដើមដំបូងនៃអង្គសវនាការ។ បន្ទាប់មក អយ្យការនឹងបង្ហាញការចោទប្រកាន់លើលោក Yoon ដែលត្រូវបានរំពឹងថានឹងបដិសេធការចោទប្រកាន់ទាំងអស់។ អតីតប្រធានាធិបតីកូរ៉េខាងត្បូងក៏អាចសុំចៅក្រមអនុញ្ញាតឱ្យគាត់បង្ហាញទស្សនៈផ្ទាល់ខ្លួនផងដែរ។

សាក្សីពីរនាក់ដែលនឹងបង្ហាញខ្លួននៅតុលាការនៅថ្ងៃទី ១៤ខែមេសាគឺ លោក Cho Sung Hyun មេបញ្ជាការក្រុមសន្តិសុខទី១ នៃទីបញ្ជាការការពាររាជធានីនិង លោក Kim Hyung Ki មេបញ្ជាការកងវរសេនាតូចប្រតិបត្តិការពិសេសទី១ នៃបញ្ជាការប្រតិបត្តិការពិសេស។

ក្នុងអំឡុងពេលសវនាការចោទប្រកាន់លោក Yoon នៅតុលាការធម្មនុញ្ញមុននេះ លោក Cho បានផ្តល់សក្ខីកម្មថា លោកបានទទួលបញ្ជាពីលោក Lee Jin-woo មេការពាររដ្ឋធានីសេអ៊ូល នៅពេលនោះ ឱ្យបញ្ជូនទ័ពទៅជម្លៀសសមាជិកសភាចេញពីរដ្ឋសភា បន្ទាប់ពីលោក Yoon បានប្រកាសច្បាប់អាជ្ញាសឹកកាលពីថ្ងៃទី៣ខែធ្នូ។ Hyung Ki ក៏ត្រូវបានគេនិយាយថា បានទទួលបញ្ជាស្រដៀងគ្នាពីថ្នាក់លើរបស់លោកនៅយប់នោះ។

តាមសេចក្តីរាយការណ៍ រដ្ឋអាជ្ញាក្នុងសំណុំរឿងព្រហ្មទណ្ឌបានរៀបចំឯកសារចំនួន ៧ម៉ឺនទំព័រជាភស្តុតាងដើម្បីចោទប្រកាន់បទឧក្រិដ្ឋ។ កាលពីខែមីនា លោក Yoon បន្ទាប់ពីត្រូវបានដោះលែង បន្ទាប់ពីបានប្រកួតប្រជែងដោយជោគជ័យនូវភាពស្របច្បាប់នៃដីកាចាប់ខ្លួនរបស់គាត់ បានក្លាយជាប្រធានាធិបតីកូរ៉េខាងត្បូងដំបូងគេដែលត្រូវបានកាត់ទោសពីបទឧក្រិដ្ឋ។

បើត្រូវកាត់ទោស គាត់អាចប្រឈមនឹងការជាប់ពន្ធនាគារអស់មួយជីវិត ឬសូម្បីតែមាន«ទោសប្រហារជីវិត»ទៀតផង។ ទោះយ៉ាងណាក៏ដោយ ករណីនេះអាចអូសបន្លាយដំណើរការរឿងក្តីរាប់ឆ្នាំ។ ហើយទោះបីជាគាត់ត្រូវបានកាត់ទោសក៏ដោយ គាត់អាចត្រូវបានលើកលែងទោស ឬឱ្យការកាត់ទោសរបស់គាត់ដោយអ្នកស្នងតំណែងរបស់គាត់ ដូចករណីអតីតប្រធានាធិបតីផ្សេងទៀតដែលត្រូវបានកាត់ទោសនៅក្នុងប្រទេសកូរ៉េខាងត្បូង៕

ដោយ រ៉ាន់ រើយ

The post លោក Yoon ចូលតុលាការក្រុងសេអ៊ូលពាក់ព័ន្ធការចោទប្រកាន់បទឧក្រិដ្ឋ«បះបោរ» appeared first on Kampuchea Thmey Daily.

ផ្លូវការហើយ! កូរ៉េខាងត្បូងនឹងរៀបចំបោះឆ្នោតប្រធានាធិបតីថ្មីនៅថ្ងៃទី៣មិថុនា

Rann Reuy — Tue, 08 Apr 2025 03:08:05 +0000

ប្រធានាធិបតីស្តីទីរបស់ប្រទេសកូរ៉េខាងត្បូង លោក Han Duck-soo ដែលទើបរួចផុតពីការចោទប្រកាន់ទម្លាក់អំណាច បានប្រកាសនៅព្រឹកថ្ងៃអង្គារនេះថា ប្រទេសកូរ៉េខាងត្បូងនឹងរៀបចំការបោះឆ្នោតប្រធានាធិបតីនៅថ្ងៃទី៣ខែមិថុនា គឺមានរយៈពេល៥៩ថ្ងៃ បន្ទាប់ពីអតីតប្រធានាធិបតី លោក Yoon Suk Yeol ត្រូវបានដកចេញពីតំណែងដោយតុលាការធម្មនុញ្កាលថ្ងៃទី៤ខែមេសានេះ។

នាយករដ្ឋមន្ត្រី និងជាប្រធានាធិបតីស្តីទី លោក Han Duck-soo បាននិយាយកាលពីថ្ងៃអង្គារថា រដ្ឋាភិបាលបានពិភាក្សាជាមួយគណៈកម្មាធិការជាតិរៀបចំការបោះឆ្នោត និងទីភ្នាក់ងារពាក់ព័ន្ធដទៃទៀត រួចរាល់ហើយ ដើម្បីគិតគូរពីតម្រូវការក្នុងការធានាឱ្យដំណើរការបោះឆ្នោតប្រព្រឹត្តទៅដោយរលូន និងទុកពេលគ្រប់គ្រាន់សម្រាប់គណបក្សនយោបាយក្នុងការរៀបចំចូលរួមការប្រកួតប្រជែង។ យោងបណ្តាញសារព័ត៌មានសំខាន់ៗរបស់កូរ៉េខាងត្បូងផ្សាយនៅព្រឹកថ្ងៃអង្គារនេះ។

ក្រោយការពិភាក្សា ពួកគេបានសម្រេចចិត្ត «កំណត់ថ្ងៃទី ៣ខែមិថុនា ជាកាលបរិច្ឆេទសម្រាប់ការបោះឆ្នោតប្រធានាធិបតីទី២១របស់កូរ៉េខាងត្បូង» ដោយលោកបានបន្ថែមថា ថ្ងៃនោះនឹងត្រូវកំណត់ជាថ្ងៃឈប់សម្រាកសាធារណៈបណ្តោះអាសន្ន ដើម្បីសម្រួលដល់ការបោះឆ្នោត។ នេះបើយោងតាម AFP។

លោក Han បានអំពាវនាវដល់ក្រសួង និងគណៈកម្មាធិការជាតិរៀបចំការបោះឆ្នោត «ធ្វើឱ្យមានភាពហ្មត់ចត់ ដើម្បីធានាឱ្យមានការបោះឆ្នោតមួយប្រកបដោយភាពយុត្តិធម៌ និងតម្លាភាពជាងពេលណាៗទាំងអស់ និងមួយដែលអាចទទួលបានទំនុកចិត្តពីប្រជាពលរដ្ឋ»។

មិនដូចការបោះឆ្នោតប្រធានាធិបតីដែលប្រព្រឹត្តទៅតាមធម្មតាទេ ប្រធានាធិបតីជាប់ឆ្នោតដែលកើតចេញពីការបោះឆ្នោតក្នុងរយៈពេលអន្តរកាលពីរខែនេះ បេក្ខភាពដែលឈ្នះការបោះឆ្នោតថ្ងៃទី៣ខែមិថុនា នឹងត្រូវធ្វើពិធីឡើងកាន់អំណាចភ្លាមៗនៅថ្ងៃបន្ទាប់ពីការប្រកាសលទ្ធផលតែម្តង។

ចៅក្រមតុលាការធម្មនុញ្ញ៨រូបក្នុងចំណោម៩រូប បានបោះឆ្នោតសម្រេចទម្លាក់លោកYoon Suk Yeol តាមការចោទប្រកាន់របស់សភា។ Reuters

តុលាការធម្មនុញ្ញកូរ៉េខាងត្បូងដែលមានចៅក្រម៨រូបក្នុងចំណោម៩រូប ស្ថិតនៅក្នុងតំណែងកាលពីថ្ងៃសុក្រទី៤ខែមេសាសប្តាហ៍មុន បានសម្រេចជាឯកច្ឆ័ន្ទដកតំណែងលោក Yoon Suk Yeol តាមការចោទប្រកាន់របស់សភា សម្រាប់ការប្រកាសច្បាប់អាជ្ញាសឹករយៈពេលខ្លីរបស់គាត់កាលថ្ងៃទី៣ខែធ្នូឆ្នាំ២០២៤។

ការចេញសាលក្រមដកលោក Yoon Suk Yeol ចេញពីអំណាចនេះ បន្ទាប់ពីតុលាការធម្មនុញ្ញរកឃើញកំហុសលើការរំលោភលើកាតព្វកិច្ចផ្លូវការរបស់គាត់ដោយការចេញក្រឹត្យច្បាប់អាជ្ញាសឹកកាលពីថ្ងៃទី៣ខែធ្នូ និងការចល័តកងទ័ពដើម្បីបញ្ឈប់ដំណើរការសភា។

ច្បាប់ធម្មនុញ្ញរបស់ប្រទេសកូរ៉េខាងត្បូងតម្រូវឱ្យមានការបោះឆ្នោតប្រធានាធិបតីថ្មីក្នុងរយៈពេល៦០ថ្ងៃ ប្រសិនបើអ្នកកាន់អំណាចស្លាប់ ឬត្រូវដកចេញពីតំណែង៕

ដោយ រ៉ាន់ រើយ

នាយករដ្ឋមន្ត្រី និងជាប្រធានាធិបតីស្តីទី លោក Han Duck-soo ទៅកាន់វិមានរដ្ឋាភិបាល ក្រោយតុលាការធម្មនុញ្ញច្រានចោលការចោទប្រកាន់របស់សភា និងប្រគល់អំណាចឲ្យគាត់វិញ។ REUTERS

The post ផ្លូវការហើយ! កូរ៉េខាងត្បូងនឹងរៀបចំបោះឆ្នោតប្រធានាធិបតីថ្មីនៅថ្ងៃទី៣មិថុនា appeared first on Kampuchea Thmey Daily.

ប្រធានាធិបតី Yoon Suk Yeol Archives - Kampuchea Thmey Daily

លោក Yoon រង​ការ​ចោទ​ថា ញុះញង់​កូរ៉េខាងជើង ដើម្បី​​​​ដាក់ចេញ​ច្បាប់​អាជ្ញាសឹក​មានប្រសិទ្ធភាព​

លោក Yoon Suk Yeol ប្រឈម​​បទចោទ​​ថ្មីចំពោះ​ការ​បង្កហេតុដល់​កូរ៉េខាងជើ​ង​​

ធ្លាយវីដេអូលោក Yoon ជាប់ឃុំក្នុងពន្ធធនាគារមួយកន្លែង

ឆ្មក់ចូលផ្ទះអតីតមេដឹកនាំគណបក្សប្រឆាំង សង្ស័យពាក់ព័ន្ធច្បាប់អាជ្ញាសឹក

តើ​ លោក Lee Jae-myung ឬ​ លោក Kim Moon-soo នឹង​ក្លាយ​ជា​ប្រធានាធិបតី​កូរ៉េខាងត្បូង?​

លោក Yoon លាលែង​ពី​តំណាងបក្ស​​​ PPP​ បើកផ្លូវ​ឲ្យ​បេក្ខជន​ថ្មី Kim Moon-soo

​លោក Yoon ចូល​តុលាការ​ក្រុងសេអ៊ូល​​ពាក់​ព័ន្ធ​ការ​ចោទ​ប្រកាន់​​បទឧក្រិដ្ឋ​«បះបោរ» ​

​ផ្លូវការហើយ​! កូរ៉េខាងត្បូង​នឹងរៀបចំបោះឆ្នោត​ប្រធានាធិបតីថ្មីនៅថ្ងៃ​ទី​៣មិថុនា​​

លោក Yoon រងការចោទថា ញុះញង់កូរ៉េខាងជើង ដើម្បីដាក់ចេញច្បាប់អាជ្ញាសឹកមានប្រសិទ្ធភាព

លោក Yoon Suk Yeol ប្រឈមបទចោទថ្មីចំពោះការបង្កហេតុដល់កូរ៉េខាងជើង

តើ លោក Lee Jae-myung ឬ លោក Kim Moon-soo នឹងក្លាយជាប្រធានាធិបតីកូរ៉េខាងត្បូង?

លោក Yoon លាលែងពីតំណាងបក្ស PPP បើកផ្លូវឲ្យបេក្ខជនថ្មី Kim Moon-soo

លោក Yoon ចូលតុលាការក្រុងសេអ៊ូលពាក់ព័ន្ធការចោទប្រកាន់បទឧក្រិដ្ឋ«បះបោរ»

ផ្លូវការហើយ! កូរ៉េខាងត្បូងនឹងរៀបចំបោះឆ្នោតប្រធានាធិបតីថ្មីនៅថ្ងៃទី៣មិថុនា