ប្រព័ន្ធភាពស៊ាំ Archives - Kampuchea Thmey Daily

ក្រុមអាហារ ៥ យ៉ាង ផ្ទុកសារធាតុ Phytonutrients ជួយបង្កើនភាពស៊ាំ ប្រឆាំងនឹងកូវីដ បច្ចុប្បន្ននេះ

សាង ស្រីល័ក្ខ — Thu, 04 Nov 2021 00:58:00 +0000

ប្រព័ន្ធភាពស៊ាំនឹងជួយប្រយុទ្ធប្រឆាំងមេរោគ ឬជំងឺគ្រុនផ្តាសាយ។ ប៉ុន្តែតើយើងអាចមានភាពស៊ាំល្អ ដោយរបៀបណា? ប្រសិនបើមិនជ្រើសរើសអាហារ ដែលមានសារធាតុចិញ្ចឹម ដើម្បីជួយពង្រឹងប្រព័ន្ធការពាររាងកាយឲ្យដំណើរការ ប្រកបដោយប្រសិទ្ធភាព។

សាស្ត្រាចារ្យ បណ្ឌិត Sirichai Adisakwatana នាយកដ្ឋានអាហារូបត្ថម្ភ និងរបបអាហារ មហាវិទ្យាល័យវិទ្យាសាស្ត្រសុខាភិបាលសម្ព័ន្ធ សាកលវិទ្យាល័យ Chulalongkorn បានណែនាំនូវរឿង ៥ ដែលគួរដឹងអំពីសារធាតុ phytochemicals ឬ phytonutrients ដែលមានសារៈសំខាន់ សម្រាប់ពង្រឹងប្រព័ន្ធការពាររាងកាយក្នុងដំណើរការប្រកបដោយប្រសិទ្ធភាព ដើម្បីទប់ទល់នឹងការរីករាលដាលនៃកូវីដ តាមរបៀបសាមញ្ញដូចខាងក្រោម៖

១ ពណ៌ក្រហមមានផ្ទុកអាស៊ីត lycopene និង ellagic

អត្ថប្រយោជន៍៖ ជួយប្រឆាំងរ៉ាឌីកាល់សេរី ជួយពន្យឺតការយារធ្លាក់នៃកោសិកា។ បង្កើនភាពស៊ាំក្នុងរាងកាយ កាត់បន្ថយហានិភ័យនៃជំងឺសរសៃឈាមបេះដូង ជួយកែលំអសុខភាពនៃក្រពេញប្រូស្តាត បេះដូង និងសរសៃឈាម។ វាត្រូវបានរកឃើញនៅក្នុងផ្លែឈើ និងបន្លែភាគច្រើនដូចជា ប៉េងប៉ោះ ផ្លែស្ត្របឺរី ឪឡឹក និងផ្លែប៉ោមក្រហម ក្នុងចំណោមរបស់ផ្សេងៗទៀត។

២ ពណ៌ទឹកក្រូចមានផ្ទុកសារធាតុ beta-carotene ។ និង Hesperidin

អត្ថប្រយោជន៍៖ ជួយការពារកោសិកាពីរ៉ាឌីកាល់សេរី ជួយថែរក្សាសុខភាពភ្នែក រារាំងការចុះខ្សោយនៃកោសិកា បន្ថយភាពចាស់ និងពង្រឹងប្រព័ន្ធការពាររាងកាយ។ មាននៅក្នុងបន្លែ និងផ្លែឈើ៖ ក្រូច ក្រូចឆ្មា អំពិល ល្ហុង និងការ៉ុត។ល។

៣ ពណ៌ បៃតងមានផ្ទុកសារធាតុ isoflavones, gCG, lutein/zeaxanthin និង isothiocyanate

អត្ថប្រយោជន៍៖ ជួយប្រឆាំងរ៉ាឌីកាល់សេរី។ ពង្រឹងសុខភាពកោសិកា ឬជួយពន្យឺតការចុះខ្សោយនៃកោសិកា។ គាំទ្រមុខងារសរសៃឈាម សុខភាពសួត និងលើកកម្ពស់មុខងារថ្លើម។ រកឃើញនៅក្នុងបន្លែ និងផ្លែឈើ៖ ប្រខូលី ស្ពៃក្តោប ត្រកួន ខាត់ណា និង ល្ហុង។ល។

៤ ពណ៌ស្វាយមានផ្ទុកសារធាតុ anthocyanin និងសារធាតុ resveratrol

អត្ថប្រយោជន៍៖ សារធាតុប្រឆាំងអុកស៊ីតកម្ម ប្រព័ន្ធចងចាំ សុខភាពបេះដូង គាំទ្រដល់ដំណើរការនៃសរសៃឈាម។ មាននៅក្នុងផ្លែឈើ និងបន្លែ ៖ ស្ពៃក្ដោបពណ៌ស្វាយ ទំពាំងបាយជូ និងផ្លែព្រូន ក្នុងចំណោមរបស់ផ្សេងៗទៀត។

៥ ពណ៌សមានផ្ទុកសារធាតុ allicin និង quercetin

អត្ថប្រយោជន៍៖ ជួយពង្រឹងសុខភាពឆ្អឹង។ ធ្វើឲ្យប្រសើរឡើងនូវចរន្តឈាម គាំទ្រដល់ដំណើរការនៃសរសៃឈាម វាជាសារធាតុរ៉ាឌីកាល់សេរីដ៏ល្អ ដែលមានប្រសិទ្ធិភាព ពង្រឹងភាពស៊ាំប្រឆាំងនឹងមេរោគ បាក់តេរី ផ្សិត និងរារាំងកោសិកាមហារីក។មាននៅក្នុងផ្លែឈើ និងបន្លែ៖ ខ្ទឹមស ខ្ទឹមបារាំង និងស្លឹកខ្ទឹម ក្នុងចំណោមរបស់ផ្សេងៗទៀត។

គេអាចសង្កេតឃើញថា សារធាតុ Phytonutrients ផ្សំឡើងពីសារធាតុដែលកើតចេញពីបន្លែ និងផ្លែឈើដែលមាន ៥ ពណ៌ជាមួយគ្នា។ ការជ្រើសរើសទទួលទានបន្លែ និងផ្លែឈើដែលមានពណ៌ផ្សេងៗគ្នាជារៀងរាល់ថ្ងៃ នឹងជួយឲ្យយើងទទួលបានអត្ថប្រយោជន៍ទាំងអស់នៃសារធាតុ Phytonutrients រួមទាំងជួយពង្រឹងប្រព័ន្ធការពាររាងកាយឲ្យរឹងមាំ និងមានប្រសិទ្ធភាព៕

ប្រែម្រួល៖ សាង ស្រីល័ក្ខ

ចុចអាន៖ពង្រឹងប្រព័ន្ធភាពស៊ាំនៅរដូវភ្លៀង ជាមួយអាហារទាំង ៦ ប្រភេទ

ចុចអាន៖៦ យ៉ាងគួរធ្វើ ដើម្បីពង្រឹងភាពស៊ាំទប់ទល់នឹងកូវីដ រួមទាំងវីរុសបំប្លែងខ្លួន Delta

The post ក្រុមអាហារ ៥ យ៉ាង ផ្ទុកសារធាតុ Phytonutrients ជួយបង្កើនភាពស៊ាំ ប្រឆាំងនឹងកូវីដ បច្ចុប្បន្ននេះ appeared first on Kampuchea Thmey Daily.

មើមឈូកជួយសុខភាពស្បែក ខួរក្បាល និងប្រព័ន្ធភាពស៊ាំ

Sonya — Sun, 24 Oct 2021 02:28:00 +0000

គ្នាយើងភាគច្រើនប្រើប្រាស់មើមឈូកសម្រាប់ការបន្ថែមរសជាតិក្នុងអាហារ តែមិនសូវជាមានគ្នាយើងច្រើនទេដែលដឹងពីអត្ថប្រយោជន៍របស់វា។ មើមឈូកជាប្រភេទបន្លែដែលមានរសជាតិឆ្ងាញ់ និងមានផ្ទុកនូវសារធាតុប្រឆាំងអុកស៊ីតកម្មដ៏ខ្លាំងក្លាជួយការពារយើងពីជំងឺផងដែរ។ សារធាតុចិញ្ចឹមរបស់មើមឈូកក៏ជួយពង្រឹងសុខភាពប្រព័ន្ធរំលាយអាហារនិងប្រព័ន្ធសរសៃឈាមបេះដូងរបស់យើងបានទៀតផង។

១.ជួយដល់ស្បែក

មើមឈូក គឺជាប្រភពបន្លែមានវីតាមីនC និងសារធាតុប្រឆាំងអុកស៊ីតកម្ម ផ្ដល់ផលប្រយោជន៍ដល់ស្បែក។ ស្បែករបស់យើងត្រូវការវីតាមីនC ដើម្បីសំយោគខូឡាជែន ការពារស្បែកប្រឆាំងនឹងការខូចខាតដែលបណ្ដាលមកពីរ៉ាឌីកាល់សេរី និងការប៉ះជាមួយនឹងកាំរស្មី UV ។ ដូចនេះហើ់យ មើមឈូកអាចជួយបញ្ចៀសពីភាពចាស់ ហើយក៏ជួយកាត់បន្ថយការឡើងស្នាមអុជខ្មៅ និងការប្រែពណ៌នៃស្បែកផងដែរ។

២.ជួយពង្រឹងសុខភាពខួរក្បាល

មើមឈូក ថ្លើមគោ គ្រាប់ផ្កាឈូករ័ត្ននិងគ្រាប់ស្វាយចន្ទីត្រូវបានគេដឹងថាអាហារសម្បូរទៅដោយសារជាតិទង់ដែង ហើយមិនត្រឹមតែជួយពង្រឹងសុខភាពឆ្អឹងនិងជួយដល់ការរំលាយអាហារប៉ុណ្ណោះទេ វាក៏ជួយបង្កើនសុខភាពខួរក្បាលដោយធ្វើឱ្យមុខងារនៃប្រព័ន្ធប្រសាទដំណើរការបានល្អផងដែរ។ តាមការស្រាវជ្រាវបានបង្ហាញថាកង្វះសារជាតិទង់ដែងអាចទាក់ទងជាមួយនឹងការចាប់ផ្ដើមនៃជំងឺប្រព័ន្ធប្រសាទ ដូចជាជំងឺភ្លេចភ្លាំង។ ដើម្បីការពារនូវបញ្ហានេះគ្នាយើងគួរញាំមើមឈូក និងអាហារដទៃទៀតដែលសម្បូរទៅដោយសារជាតិទង់ដែង ព្រោះអាចជួយដល់សុខភាពប្រព័ន្ធប្រសាទ។

៣.ជួយបង្កើនថាមពល

ការញាំមើមឈូកអាចជួយបង្កើនកម្រិតជាតិដែកក្នុងខ្លួនរបស់យើង ទ្រទ្រង់នូវថាមពល និងនាំយកអុកស៊ីសែនទៅក្នុងកោសិកា។ ប្រសិនបើគ្នាយើងខ្វះជាតិដែក ច្រើនតែមានអារម្មណ៍អស់កម្លាំង ងងុយគេង និងមានបញ្ហាជាមួយនឹងការផ្ដោតអារម្មណ៍។ ការញាំអាហារសម្បូរជាតិដែក ក៏អាចជួយបង្កើនកម្រិតអុកស៊ីសែននៅក្នុងកោសិកា សាច់ដុំ ជួយជំរុញដល់ការរំលាយប្រូតេអ៊ីន និងស្រូបយកសារធាតុចិញ្ចឹមពីអាហារផងដែរ។

៤.ជួយការរំលាយអាហារ និងការគ្រប់គ្រងទម្ងន់

មើមឈូកផ្ដល់នូវសារធាតុសរសៃល្អក្នុងការជួយរំលាយអាហារ សម្រួលបញ្ហាទល់លាមកនិងបញ្ហាប្រព័ន្ធរំលាយអាហារ។ លើសពីនេះការញាំអាហារដែលមានជាតិសរសៃខ្ពស់អាចធ្វើឱ្យយើងមានអារម្មណ៍ថាឆ្អែតក្នុងរយៈពេលយូរដែលអាចជួយកាត់បន្ថយការញ់ាំអាហារក្រៅពេលច្រើននាំឲ្យឡើងទម្ងន់។

៥.ពង្រឹងសុខភាពសរសៃឈាមបេះដូង

មើមឈូក សម្បូរទៅដោយសារធាតុចិញ្ចឹម និងជាតិសរសៃ ជួយដល់សុខភាពសរសៃឈាមបេះដូង ហើយក៏ជាប្រភពដ៏ល្អនៃប៉ូតាស្យូមផងដែរ។ ប៉ូតាស្យូមទទួលខុសត្រូវចំពោះការធ្វើឱ្យចង្វាក់បេះដូងដំណើរការបានល្អ។ គ្នាយើងដែលមានកម្រិតប៉ូតាស្យូមទាបអាចមានហានិភ័យខ្ពស់នៃជំងឺបេះដូង ជាពិសេសទទួលរងពីជំងឺគ្រោះថ្នាក់ដាច់សរសៃឈាមខួរក្បាល។

៦.បង្កើនប្រព័ន្ធភាពស៊ាំ

មើមឈូក ជាប្រភពនៃវីតាមីនC និងមានតួនាទីប្រឆាំងអុកស៊ីតកម្មនិងជួយបង្កើនប្រព័ន្ធភាពស៊ាំក្នុងរាងកាយ។ បើយោងតាមការស្រាវជ្រាវដែលបានចុះផ្សាយក្នុងទស្សនាវដ្ដី Nutrients វីតាមីន C បានរួមចំណែកក្នុងការការពារប្រព័ន្ធភាពស៊ាំដោយការគាំទ្រមុខងារកោសិកាផ្សេងៗ រួមបញ្ចូលទាំងការគាំទ្រមុខងាររបាំង epithelial ដែលប្រឆាំងនឹងការបង្ករោគ លើកកម្ពស់សកម្មភាពកម្ចាត់អុកស៊ីតកម្ម និងជំរុញការសម្លាប់មីក្រុប។ កង្វះវីតាមីន C អាចបណ្ដាលឱ្យប្រព័ន្ធភាពស៊ាំចុះខ្សោយនិងងាយឆ្លងមេរោគផងដែរ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ គុណប្រយោជន៍ក្រមួនឃ្មុំ មិនសូវមានអ្នកដឹង

ចុចអាន៖ គ្រាប់ផ្កាឈូករ័ត្ន មុខងារឱសថព្យាបាលជំងឺរ៉ាំរ៉ៃបានច្រើនមុខ ជាពិសេសទាក់ទងនឹងសួត

The post មើមឈូកជួយសុខភាពស្បែក ខួរក្បាល និងប្រព័ន្ធភាពស៊ាំ appeared first on Kampuchea Thmey Daily.

មិនលេងសើចទេ ស្ត្រេសច្រើន អាចវាយប្រហារប្រព័ន្ធភាពស៊ាំចុះខ្សោយ ងាយមានជំងឺ

Sonya — Sat, 23 Oct 2021 03:24:00 +0000

គ្នាយើងធ្លាប់ឆ្ងល់ទេថាហេតុអ្វីពេលមនុស្សយើងបាក់ទឹកចិត្ត ឬមានអារម្មណ៍ថាស្ត្រេសខ្លាំង ងាយនឹងធ្លាក់ខ្លួនឈឺ ឬបើឈឺហើយមិនងាយជា? គ្នាយើងត្រូវដឹងថាពេលមានអារម្មណ៍ស្ត្រេសខ្លាំង ក៏អាចមានឥទ្ធិពលដល់ប្រព័ន្ធភាពស៊ាំ និងធ្វើឲ្យយើងងាយឈឺទៀតផង។ ហេតុអ្វី?

១. ឥទ្ធិពលស្រ្តេសលើប្រព័ន្ធភាពស៊ាំ

ប្រព័ន្ធភាពស៊ាំយើងបង្កើតឡើងដោយកោសិការាប់ពាន់លាន ដែលធ្វើដំណើរជាប្រចាំតាមចរន្តឈាមទៅគ្រប់កន្លែងនៃរាងកាយ។ ប្រព័ន្ធភាពស៊ាំការពាររាងកាយយើងប្រឆាំងនឹងអង់ទីហ្សែន ដូចជាពពួកបាក់តេរី វីរុស និងកោសិកាមហារីក។ ពេលមនុស្សយើងកើតស្ត្រេសរាងកាយរបស់យើងនឹងបញ្ចេញអ័រម៉ូនម្យ៉ាងហៅថា corticosteroid ដែលអ័រម៉ូននេះអាចធ្វើឲ្យដំណើរការរបស់ប្រព័ន្ធភាពស៊ាំចុះខ្សោយ ដោយបានបន្ថយចំនួនកោសិកាមួយប្រភេទដែលតែតែងប្រឆាំងនឹងមេរោគឆ្លងផ្សេងៗ។

បើយើងមានបញ្ហាស្ត្រេសតែក្នុងរយៈពេលខ្លី រាងកាយយើងអាចទប់ទល់បាន ប៉ុន្តែបើយើងកើតស្ត្រេសរយៈពេលវែង ឬស្ត្រេសរ៉ាំរ៉ៃ នឹងធ្វើឲ្យប៉ះពាល់ដល់ប្រព័ន្ធភាពស៊ាំមិនខាន។ ស្ត្រេសរ៉ាំរ៉ៃ អាចបន្ថយសមត្ថភាពប្រព័ន្ធភាពស៊ាំ និងអាចធ្វើឲ្យយើងប្រឈមនឹងជំងឺផ្សេងៗ។ ការមានបញ្ហាស្ត្រេសរ៉ាំរ៉ៃ ត្រូវតែស្វែងរកវិធីដោះស្រាយ និងគ្រប់គ្រងឲ្យបានទាន់ពេលវេលា។

ស្ត្រេសចេះតែបន្តកើតមានរយៈពេលវែង គឺមានន័យថារាងកាយយើងធ្វើការគ្មានពេលសម្រាក និងមិនអាចដំណើរការបានដូចប្រក្រតី។ បើយើងក្នុងដំណាក់កាលនេះ បានន័យថាប្រព័ន្ធភាពស៊ាំកំពុងស្ថិតក្នុងហានិភ័យហើយ។

២. ឥទ្ធិពលស្ត្រេសលើការទទួលបានសារធាតុចិញ្ចឹម

ស្ត្រេសមិនត្រឹមតែរារាំងមិនឲ្យមានការផលិតកោសិកាប្រព័ន្ធភាពស៊ាំនោះទេ តែវាក៏រារាំងដល់ពោះវៀនមិនឲ្យស្រូបយកសារធាតុចិញ្ចឹមល្អៗពីអាហារដែលយើងបានញ៉ាំសម្រាប់បង្កើនប្រព័ន្ធភាពស៊ាំ ដូចគ្នា។

អ្នកជំនាញខាងប្រព័ន្ធរំលាយអាហារពន្យល់ថា ស្ត្រេសរ៉ាំរ៉ៃ អាចកាត់បន្ថយការស្រូបយកសារធាតុចិញ្ចឹម ព្រោះវាមានឥទ្ធិពលលើប្រព័ន្ធរំលាយអាហារ។ ការណ៍នេះ កើតឡើងដោយសារតែពោះវៀនមិនអាចធ្វើការបានត្រឹមត្រូវ ពេលមនុស្សយើងកើតស្ត្រេស។ ដូចនេះហើយ កិច្ចការសំខាន់ដែលពោះវៀនត្រូវបញ្ជូនសារធាតុចិញ្ចឹមទៅកាន់កន្លែងដែលត្រូវទៅ ត្រូវបានរអាក់រអួល។

ដូចគ្នាដែរ អ្នកមានជំងឺ ក៏អាចកើតមានស្ត្រេស ដោយសារតែជំងឺរបស់ខ្លួនដែរ ហើយការណ៍នេះនឹងធ្វើប្រព័ន្ធភាពស៊ាំចុះខ្សោយបន្ថែមទៀត។ ដូចនេះ ដើម្បីបង្កើនប្រព័ន្ធភាពស៊ាំឲ្យរឹងមាំ គ្នាយើងប្រហែលជាត្រូវកាត់បន្ថយបញ្ហាស្រ្តេសក្នុងជីវិតឲ្យបាននៅទាបបំផុតដែរ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ បើភ្ញាក់ពីគេង ហើយអស់កម្លាំងខ្លាំង មានន័យថា យើងស្ត្រេសដល់កំពូលហើយ

ចុចអាន៖ យុវវ័យស្ត្រេសច្រើន កុំទៅផឹកស្រាបន្លប់ទុក្ខ ប្រើវិធីនេះវិញ ហុចផលល្អខ្លាំង

The post មិនលេងសើចទេ ស្ត្រេសច្រើន អាចវាយប្រហារប្រព័ន្ធភាពស៊ាំចុះខ្សោយ ងាយមានជំងឺ appeared first on Kampuchea Thmey Daily.

មនុស្ស ៥ក្រុមនេះ ត្រូវប្រញាប់ចាក់វ៉ាក់សាំងកូវីដដូសជំរុញឱ្យបានមុនគេ

Sonya — Tue, 12 Oct 2021 03:34:41 +0000

យោងតាមការស្រាវជ្រាវរបស់មជ្ឈមណ្ឌលគ្រប់គ្រងនិងបង្ការជំងឺឆ្លង (CDC) អាមេរិក មនុស្សដែលមានសុខភាពមួយចំនួន ត្រូវប្រញាប់ចាក់វ៉ាក់សាំងដូសជំរុញឱ្យបានឆាប់ជាទីបំផុត ព្រោះតែពួកគេងាយរងគ្រោះពីវីរុសកូវីដ-១៩ និងវីរុសបំប្លែងខ្លួនដទៃទៀតខ្លាំងជាងអ្នកផ្សេង។

CDC អាមេរិក ទូន្មានឱ្យបុគ្គលដែលមានបញ្ហាសុខភាព ពិសេសមនុស្សដែលមានជំងឺប្រចាំកាយ ត្រូវប្រញាប់ទៅចាក់វ៉ាក់សាំងដូសជំរុញឱ្យបានមុនគេ ដោយសារសុខភាពអ្នកទាំងនោះខ្សោយស្រាប់ ដូច្នេះពួកគេងាយប្រឈមហានិភ័យជាងបុគ្គលមានសុខភាពល្អ។ បុគ្គលទាំងនោះរួមមាន៖

១. មនុស្សវ័យចំណាស់៖ កម្រិតគ្រោះថ្នាក់នៃជំងឺកូវីដ-១៩ កើនឡើងទៅតាមវ័យ បើវ័យកាន់តែចាស់ ហានិភ័យសុខភាពក្នុងការធ្លាក់ខ្លួនឈឺធ្ងន់ក៏កាន់តែខ្ពស់ ជាពិសេសមនុស្សចាស់មានអាយុ ៨៥ឆ្នាំឡើងទៅ។ ហេតុនេះមនុស្សវ័យចំណាស់ គួរតែទៅទទួលវ៉ាក់សាំងដូសទី៣ ឱ្យបានមុនក្មេងៗ។

២. ជំងឺសួត៖ ជំងឺកូវីដ-១៩ វាយប្រហារទៅលើសួតរបស់អ្នកជំងឺ ហេតុនេះហើយ អ្នកដែលមានបញ្ហាសួតដូចជា ហឺត រលាកសួតរ៉ាំរ៉ៃ ឬជំងឺមហារីកសួត អាចប្រឈមនឹងបញ្ហាធ្ងន់ពេលកើតជំងឺកូវីដ-១៩។

៣. ជំងឺបេះដូង៖ បញ្ហាបេះដូងមួយចំនួនអាចបណ្ដាលឲ្យអ្នកជំងឺធ្លាក់ខ្លួនឈឺធ្ងន់ បើឆ្លងជំងឺកូវីដ-១៩ ពិសេសអ្នកមានជំងឺខ្សោយបេះដូង ត្រូវប្រញាប់ទៅចាក់វ៉ាក់សាំងដូសបន្ថែមឱ្យបានលឿន។

៤. ជំងឺទឹកនោមផ្អែម និងធាត់៖ ជំងឺទឹកនោមផ្អែមប្រភេទ១ និងប្រភេទ២ អាចធ្វើឲ្យអ្នកជំងឺមានរោគសញ្ញាធ្ងន់ធ្ងរពេលឆ្លងកូវីដ-១៩ ហើយជំងឺធាត់ ឬអ្នកធាត់លើសទម្ងន់ក៏ប្រឈមបញ្ហាធ្ងន់ធ្ងរពេលឆ្លងកូវីដ-១៩ដូចគ្នា។ ផ្អែកតាមការសិក្សាកន្លងមក អ្នកលើសទម្ងន់ក៏ងាយនឹងបាត់បង់ប្រសិទ្ធភាពវ៉ាក់សាំងក្នុងខ្លួនជាងបុគ្គលទូទៅផងដែរ។

៥. ប្រព័ន្ធភាពស៊ាំខ្សោយ៖ ប្រសិនបើមានប្រព័ន្ធភាពស៊ាំខ្សោយ ច្បាស់ណាស់ថា សុខភាពប្រឈមនឹងបញ្ហាធ្ងន់ធ្ងរ។ ដូច្នេះ បើមិនប្រញាប់ទៅចាក់វ៉ាក់សាំងដូសជំរុញឱ្យបានលឿនទេ មុខតែពិបាកជាងអ្នកដែលមានសុខភាពល្អ។

ក្រៅពីជំងឺប៉ុន្មានខាងលើនេះ ជំងឺកូវីដ-១៩ក៏វាយលុកលើសុខភាពចំពោះអ្នកជំងឺតម្រងនោម ជំងឺលើសសម្ពាធ ជំងឺថ្លើម ជំងឺក្រិនសរសៃឈាម ស្រ្តីពពោះ និងស្ត្រីកំពុងបំបៅកូនដោយទឹកដោះ៕

ប្រែសម្រួល៖ សន្យា

ចុចអាន៖ មានចំណុច ៣ ខ្លឹមនេះក្នុងខ្លួន ធានាថាដូសជំរុញ នឹងមានប្រសិទ្ធភាពកាន់តែខ្លាំងក្លាលើសមុន

ចុចអាន៖ អ្នកមានជំងឺ៧មុខនេះត្រូវចាក់វ៉ាក់សាំងកូវីដដាច់ខាត ព្រោះបើឆ្លងហើយ គ្រោះថ្នាក់ដល់ជីវិត

The post មនុស្ស ៥ក្រុមនេះ ត្រូវប្រញាប់ចាក់វ៉ាក់សាំងកូវីដដូសជំរុញឱ្យបានមុនគេ appeared first on Kampuchea Thmey Daily.

៦ យ៉ាងគួរធ្វើ ដើម្បីពង្រឹងភាពស៊ាំទប់ទល់នឹងកូវីដ រួមទាំងវីរុសបំប្លែងខ្លួន Delta

សាង ស្រីល័ក្ខ — Fri, 08 Oct 2021 02:18:00 +0000

ខណៈដែលកូវីដនិងវីរុសបំប្លែងខ្លួន Delta កំពុងរាលដាលក្នុងប្រទេសកម្ពុជា យើងគួរតែមានវិធីការពារខ្លួនឲ្យបានប្រសើរជាងនេះ ដើម្បីចៀសវាងនៅការឆ្លងជំងឺដ៏សាហាវ នាំពិបាកដល់គ្រួសារនិងខ្លួនឯង។

១. លាងដៃឲ្យបានត្រឹមត្រូវតាមការណែនាំ (កុំលាងឲ្យតែបានៗ)

វីរុសកូវីដក៏ដូចជាវីរុសដទៃទៀត ភាគច្រើនត្រូវបានសម្លាប់ដោយការលាងដៃឲ្យបានត្រឹមត្រូវ រយៈពេល ២០ វិនាទី ជាមួយសាប៊ូឬប្រើទឹកអនាម័យដែលមានជាតិអាល់កុលច្រើនជាង ៦០ ភាគរយ។

២. កុំជក់បារី

អ្នកជក់បារីមានការកើនឡើងហានិភ័យនៃការឆ្លងរោគ និងទទួលរងនូវផលវិបាកធ្ងន់ធ្ងរ ពីការបង្ករោគទាំងនោះ ។ ដូច្នេះសូមកុំជក់បារីឲ្យសោះ!

៣. គេងឲ្យបានគ្រប់គ្រាន់

ការគេងមានសារសំខាន់សម្រាប់សុខភាពជាទូទៅ ហើយវាក៏អាចផ្ដល់អត្ថប្រយោជន៍ដល់មុខងារ នៃប្រព័ន្ធភាពស៊ាំរបស់យើងផងដែរ។ ជាពិសេស ធ្វើឲ្យប្រព័ន្ធភាពស៊ាំក្នុងខ្លួនមានសុខភាពល្អ ក្នុងខណៈដែលមានជំងឺរាតត្បាត។

៤. ហាត់ប្រាណ

ការសិក្សាបង្ហាញថា អ្នកដែលហាត់ប្រាណ ភាគច្រើនតែងទទួលរងការឆ្លងតិចជាងអ្នកដែលមិនធ្វើលំហាត់ប្រាណសោះ។ ខណៈពេលដែលការសិក្សាទាំងនោះមានបម្រែបម្រួលអថេរ ការមូលមតិគ្នាបានបញ្ជាក់ថា ត្រូវតែធ្វើលំហាត់ប្រាណ មិនថា ជាលំហាត់ប្រាណអ្វីឡើយ។

៥. គ្រប់គ្រងស្ត្រេស

យើងមិនអាចធ្វើឲ្យស្ថានភាពស្ត្រេសបាត់បង់ទេ ប៉ុន្តែយើងអាចចាត់វិធានការដើម្បីគ្រប់គ្រងការឆ្លើយតបរបស់យើង ចំពោះស្ត្រេស។ លំហាត់សមាធិ និងការដើរលំហែឃួក្បាល គឺជាឧទាហរណ៍មួយនៃសកម្មភាពដែលអ្នកងាយស្រួលក្នុងការធ្វើ។ សូមចាប់ផ្ដើមជាមួយនឹងការធ្វើសមាធិពេលព្រឹក ដ៏សាមញ្ញរាល់ថ្ងៃពីឥឡូវនេះ។

៦. បំប៉នវីតាមីន

នេះជាអ្វីដែលយើងដឹងអំពីថ្នាំបំប៉នជាក់លាក់មួយចំនួន ដែលត្រូវបានគេរាយការណ៍ថា មានមុខងារបង្កើនប្រព័ន្ធភាពស៊ាំបានខ្លះៗ។ វាគឺជាវីតាមីន C ដែលអាចជាជំនួយនៃការ ការពារជំងឺផ្ដាសាយទូទៅផងដែរ។ មិនត្រឹមប៉ុណ្ណេះទេ វីតាមីននេះ អាចជួយថែរក្សាស្បែកឲ្យមានសុខភាពល្អ នឹងជាឧបសគ្គដល់មេរោគដែលព្យាយាមលុកលុយប្រព័ន្ធភាពសាំរបស់អ្នកផងដែរ៕

ប្រែសម្រួល៖ សាង ស្រីល័ក្ខ

ចុចអាន៖ក្រោយជា បើមានរោគសញ្ញានេះបញ្ជាក់ថា អ្នកមានកូវីដរយៈពេលវែង ត្រូវជួបពេទ្យបន្ទាន់

ចុចអាន៖៦ សំនួរ មុន-ក្រោយចាក់វ៉ាក់សាំងកូវីដ អាចធ្វើអ្វីបាននិងមិនអាច

The post ៦ យ៉ាងគួរធ្វើ ដើម្បីពង្រឹងភាពស៊ាំទប់ទល់នឹងកូវីដ រួមទាំងវីរុសបំប្លែងខ្លួន Delta appeared first on Kampuchea Thmey Daily.

សុខភាពខ្សោយ មិនទាន់បានចាក់វ៉ាក់សាំងដូសជំរុញ គួរមើលថែខ្លួន តាមវិធីនេះ

Sonya — Fri, 01 Oct 2021 09:35:36 +0000

នៅបរទេស ការចាក់វ៉ាក់សាំងដូសជំរុញ គេផ្ដល់អទិភាពឱ្យបុគ្គលមានប្រព័ន្ធភាពស៊ាំខ្សោយ ឬបុគ្គលដែលមានជំងឺរ៉ាំរ៉ៃ ត្បិតអ្នកទាំងនោះងាយធ្លាក់ខ្លួនឈឺ ហើយប្រឈមការចម្លងនៃវីរុសកូវីដ-១៩ ឬវីរុសបំប្លែងខ្លួនដទៃទៀតខ្ពស់ជាងអ្នកផ្សេង។

យ៉ាងណាមិញ នៅសិង្ហបុរី ម៉ាឡេស៊ី ថៃ រួមទាំងកម្ពុជា ការចាក់វ៉ាក់សាំងដូសជំរុញ ត្រូវបានផ្ដល់ជូនបុគ្គលជួរមុខ ព្រោះបុគ្គលទាំងនោះងាយគ្រោះជាងអ្នកមានប្រព័ន្ធភាពស៊ាំខ្សោយទៅទៀត។

ដូច្នេះសម្រាប់អ្នកមានសុខភាពខ្សោយ ឬជាបុគ្គលងាយនឹងឈឺ ប្រសិនមិនទាន់ទទួលបានវ៉ាក់សាំងដូសទី៣ទេ អ្នកអាចបំប៉នសុខភាពខ្លួនឯងឱ្យរឹងមាំបានដោយ៖

១. ញ៉ាំបន្លែ ផ្លែឈើឲ្យបានច្រើន ព្រោះវាជាប្រភពនៃវីតាមីន និងសម្បូរជាតិរ៉ែល្អៗ។

២. បើរកផ្លែឈើញ៉ាំមិនបាន អាចញ៉ាំជាទឹកផ្លែឈើស្រស់ជំនួសក៏បានដូចជា ក្រូចច្របាច់ ទឹកប៉ោម ឬទឹកផ្លែទទឹម។ល។ វាក៏អាចជំនួយកម្លាំងបានដែរ។

៣. មុនពេលចូលគេង គួរញ៉ាំទឹកដោះគោមួយកែវ ព្រោះវាជួយដល់ឆ្អឹង និងកម្ចាត់អាការអស់កម្លាំង។

៤. បន្ថែមអាហារសម្បូរប្រូតេអ៊ីន ជាតិកាកសរសៃ និងសារធាតុប្រឆាំងអុកស៊ីដកម្ម ទៅក្នុងរបបអាហារប្រចាំថ្ងៃ។ អាហារប្រភេទនេះក៏ងាយស្រួលក្នុងការរំលាយ មិនពិបាកដល់រាងកាយត្រូវប្រើថាមពលច្រើនដើម្បីរំលាយអាហារទាំងនោះ។

៥. បន្ថែមថ្នាំ ឬវីតាមីនបំប៉នដូចជា Vitamin C និងជាតិស័ង្កសី ដើម្បីជួយទ្រទ្រង់រាងកាយចៀសផុតពីភាពខ្សោយ។

៦. ញ៉ាំទឹកឲ្យបានច្រើន តាមដែលរាងកាយត្រូវការ ចៀសវាងពីបញ្ហាខ្វះជាតិទឹក។

៧. ហាមចូលគេងយូរពេក ឬយប់ជ្រៅលើសម៉ោង ១០យប់ ធ្វើយ៉ាងណាសម្រាកឱ្យគ្រប់ ៧-៨ម៉ោងក្នុងមួយថ្ងៃ។

៨. ទម្លាប់ហាត់ប្រាណជាប្រចាំ ទោះបីតិចតួច ក៏គួរធ្វើឱ្យបានយ៉ាងហោច ១៥-៣០ នាទីក្នុងមួយថ្ងៃដែរ។

៩. ប្រកាន់ខ្ជាប់នូវវិធានការសុខាភិបាល ៣ការពារ ៣កុំ មុនដល់វេនអ្នកទៅទទួលវ៉ាក់សាំងការពារកូវីដ-១៩ ដូសទី៣៕

ប្រែសម្រួល៖ សន្យា

ចុចអាន៖ ចាក់វ៉ាក់សាំងកូវីដដូសជំរុញរួចរាល់ អាចធ្វើដំណើរដោយសេរីឬយ៉ាងណា?

ចុចអាន៖ អ្នកឆ្លងកូវីដ កុំបាក់ទឹកចិត្ត! ពង្រឹងស្មារតីឱ្យមាំ អនុវត្តប៉ុន្មានចំណុចនេះ ទើបឆាប់ជាសះស្បើយ

The post សុខភាពខ្សោយ មិនទាន់បានចាក់វ៉ាក់សាំងដូសជំរុញ គួរមើលថែខ្លួន តាមវិធីនេះ appeared first on Kampuchea Thmey Daily.

ប្រព័ន្ធភាពស៊ាំជួយការពាររាងកាយ ចុះបើវាប្រឆាំងនឹងខ្លួនឯងវិញ មានអ្វីកើតឡើង?

សាង ស្រីល័ក្ខ — Tue, 21 Sep 2021 09:05:37 +0000

ប្រព័ន្ធភាពស៊ាំ ជាទូទៅជួយការពាររាងកាយយើង ប្រឆាំងនឹងការបង្ករោគផ្សេងៗ។ ប៉ុន្តែពេលប្រព័ន្ធភាពស៊ាំមានការភ័ន្តច្រឡំបង្កើតប្រូតេអ៊ីន ទៅជាអង់ទីគ័រដើម្បីប្រឆាំងរាងកាយខ្លួនឯង ពេលនោះត្រូវចាត់ទុកជាជំងឺ ហើយសរីរាង្គប៉ះពាល់ញឹកញាប់បំផុតពីជំងឺនេះមានសន្លាក់ និងស្បែក។

ជំងឺប្រព័ន្ធភាពស៊ាំប្រឆាំងនឹងខ្លួនឯង ពេលខ្លះប៉ះពាល់លើសរីរាង្គតែមួយមុខប៉ុណ្ណោះ ដូចជាអ្នកកើតជំងឺទឹកនោមផ្អែមប្រភេទទី១ អាចប៉ះពាល់លំពែង ប៉ុន្តែមានមួយប្រភេទទៀត ប៉ះពាល់ស្ទើរគ្រប់សរីរាង្គទាំងអស់ហៅថាជំងឺ Lupus ( Systemic Lupus Erythematosus ឬ Lupus) ខណៈប្រភេទនៃជំងឺទាំងនេះមានដូចជា៖

– ជំងឺរលាកសន្លាក់( Rheumatoid arthritis )៖ ដោយសារអង់ទីករទៅប្រឆាំងផ្ទាល់លើសន្លាក់ បង្កឲ្យហើមរលាក និងឈឺចាប់។ ករណីព្យាបាលពេលយឺតពេល សន្លាក់នឹងខូចខាតធ្ងន់ធ្ងរមិនអាចកែកុនបានឡើយ។

– ជំងឺលូផឹស Lupus )៖ ករណីនេះអង់ទីករមិនទៅប្រឆាំងលើតែកោសិកាសន្លាក់ប៉ុណ្ណោះទេ ថែមទាំងប្រឆាំងទៅនឹងសួត គ្រាប់ឈាម សរសៃប្រសាទ ក៏ដូចជាតម្រងនោមជាដើម។

– រលាកពោះវៀនរ៉ាំរ៉ៃ ( IBD )៖ ដោយសារប៉ះពាល់លើជាលិកាភ្នាសពោះវៀន អាការៈមួយចំនួននឹងបង្ហាញដូចជា រាកញឹកញាប់ បន្ទោរបង់មានឈាម ឧស្សាហ៍ផោម ឈឺពោះ ក្ដៅខ្លួន និងស្រកទម្ងន់។ ជំងឺក្រុណ្ហ( Crohn’s disease ) និងដំបៅពោះវៀនឧស្សាហ៍ជួបប្រទះបំផុត។

– ជំងឺក្រិនសរសៃប្រសាទ ( Multiple Sclerosis )៖ វាធ្វើឲ្យបាត់មុខងារនៃប្រព័ន្ធប្រសាទ ធ្វើឲ្យមានរោគសញ្ញាដូចជា ឈឺចាប់ ពិការភ្នែក ខ្សោយ មិនមានលំនឹងដងខ្លួន និងគាំងសាច់ដុំជាដើម។

– ជំងឺទឹកនោមផ្អែមប្រភេទទី ១៖ ប្រព័ន្ធភាពស៊ាំរាងកាយបំផ្លាញកោសិកាដែលផលិតអ័រម៉ូនអាំងស៊ុយលីននៅលើលំពែង ដែលនាំឲ្យអ្នកជំងឺប្រភេទនេះតែងតែត្រូវការចាក់អាំងស៊ុយលីនដើម្បីរស់នៅបានធម្មតា។

តាមការសិក្សាស្ត្រីអាចប្រឈមហានិភ័យកើតជំងឺនេះខ្ពស់ជាងបុរសដល់ទៅ ២ដង ព្រោះអត្រាកើតជំងឺលើស្ត្រីមានដល់ទៅ ៦,៤ភាគរយ ខណៈអត្រាកើតលើបុរសមានត្រឹម ២,៧ភាគរយ ហើយជារឿយៗស្រីៗវ័យចន្លោះពី ១៤–៤៤ ឆ្នាំប្រឈមខ្ពស់នឹងជំងឺនេះ។

រោគសញ្ញាឧស្សាហ៍ជួបប្រទះមាន៖

– ហត់ និងអស់កម្លាំងជាប្រចាំ
– ឈឺចុកចាប់សាច់ដុំ
– ឡើងក្រហមរោល និងហើម
– ក្ដៅខ្លួនស្ទិញៗ
– ពិបាកប្រមូលអារម្មណ៍ធ្វើការ
– ស្ពឹកៗ ព្រឺៗ ចុងដៃជើង
– ជ្រុះសក់
– រមាស់ស្បែក

យើងម្នាក់ៗអាចបង្ហាញរោគសញ្ញាខុសៗគ្នា ដូចជាអ្នករលាកពោះវៀនរ៉ាំរ៉ៃ អាច ហើមពោះ ឈឺពោះ និងរាក ជាដើម ចំណែកអ្នកទឹកនោមផ្អែមប្រភេទទី ១ អាច ស្រេកទឹកខ្លាំង ស្រកទម្ងន់ និងអស់កម្លាំង។

ថ្វីបើគ្មានថ្នាំព្យាបាលជំងឺនេះឲ្យជាដាច់ក៏ពិតមែន តែយើងអាចគ្រប់គ្រងស្ថានភាពជំងឺកុំឲ្យធ្ងន់ធ្ងរជាងនេះតាមរយៈ៖

– ថ្នាំបំបាត់ការឈឺចាប់
– ប្រថ្នាំមាស់ស្បែក និងថ្នាំកម្លាំងជាដើម
– ថ្នាំបន្ថយសកម្មភាពប្រព័ន្ធភាពស៊ាំ និងថ្នាំព្យាបាលបន្ទាប់បន្សំដទៃទៀតដូចជា ថ្នាំបំបាត់ហើម ជាដើម។

ដើម្បីបង្ការ និងគ្រប់គ្រងជំងឺនេះ យើងត្រូវផ្លាស់ប្តូរទម្លាប់រស់នៅ ដូចជា ហាត់ប្រាណបញ្ចេញកម្លាំងកាយច្រើន និងរបបអាហារដែលមានតុល្យភាព គឺបង្ហាញថាមានឥទ្ធិពលវិជ្ជមានទៅលើជំងឺនេះ៕

អត្ថបទផ្ដល់ដោយ៖ Hello Krupet

ចុចអាន៖ពង្រឹងប្រព័ន្ធភាពស៊ាំនៅរដូវភ្លៀង ជាមួយអាហារទាំង ៦ ប្រភេទ

ចុចអាន៖រលាកសួតនិងកូវីដ មានរោគសញ្ញាដូចគ្នា ធ្វើយ៉ាងម៉េចទើបដឹងថាមួយណាជាជំងឺអ្វី?

The post ប្រព័ន្ធភាពស៊ាំជួយការពាររាងកាយ ចុះបើវាប្រឆាំងនឹងខ្លួនឯងវិញ មានអ្វីកើតឡើង? appeared first on Kampuchea Thmey Daily.

អ្នកវិទ្យាសាស្រ្ត៖ ប្រព័ន្ធភាពស៊ាំអ្នកធ្លាប់ឆ្លងកូវីដ អាចការពារវីរុសបំប្លែងខ្លួន Delta ខ្លាំងអ្នកចាក់វ៉ាក់សាំងពេញលេញ

Sonya — Fri, 27 Aug 2021 03:06:10 +0000

ការសិក្សាស្រាវជ្រាវថ្មីមួយរបស់ប្រទេសអ៊ីស្រាអែល បង្ហាញថា ប្រព័ន្ធភាពស៊ាំរបស់អ្នកធ្លាប់ឆ្លងវីរុសកូវីដ-១៩ អាចផ្តល់ការការពារទៅនឹងកូវីដបំប្លែងខ្លួនប្រភេទ Delta ខ្លាំងជាងអ្នកចាក់វ៉ាក់សាំងពេញលេញជាង ១០ដង។

ក្នុងការសិក្សា អ្នកស្រាវជ្រាវមកពីសាកលវិទ្យាល័យ Tel Aviv បានប្រៀបធៀបមនុស្សដែលចាក់វ៉ាក់សាំង Pfizer-BioNTech ចំនួនពីរដូសទៅនឹងបុគ្គលដែលមិនធ្លាប់ចាក់វ៉ាក់សាំង តែជាអ្នកដែលបានជាសះស្បើយពីជំងឺកូវីដ-១៩។

ពួកគេបានរកឃើញថា អ្នកធ្លាប់កើតជំងឺកូវីដ-១៩ មានឱកាសឆ្លងតិចជាងអ្នកដែលបានចាក់វ៉ាក់សាំងពីរដូសរហូតដល់ ១៣ដងឯណោះ។

ចំណែកឯការស្រាវជ្រាវមួយទៀតដែលបោះពុម្ពផ្សាយនៅលើគេហទំព័រវិទ្យសាស្រ្តសុខភាព medRxiv.org បានរកឃើញថា អ្នកចាក់វ៉ាក់សាំងពេញលេញទំនងជាប្រឈមនឹងការឆ្លងវីរុសកូវីដ-១៩ និងវីរុសបំប្លែងខ្លួនផ្សេងៗច្រើនជាងមនុស្សដែលធ្លាប់វិជ្ជមានវីរុសកូវីដ ព្រោះសរីរាង្គរបស់អ្នកជាសះស្បើយអាចបង្កើតភាពស៊ាំដោយធម្មជាតិ ក្រោយឆ្លងជំងឺនេះ។

ដោយឡែក វេជ្ជបណ្ឌិត Andrew Croxford អ្នកជំនាញខាងប្រព័ន្ធភាពស៊ាំមកពីចក្រភពអង់គ្លេសក៏បានចង្អុលបង្ហាញស្រដៀងគ្នាដែរថា មនុស្សដែលធ្លាប់តេស្តវិជ្ជមានជំងឺកូវីដ-១៩ ពីមុនមក ទំនងជាមិនមានលទ្ធភាពឆ្លងវីរុសនេះម្ដងទៀតទេ។

ជាមួយគ្នាដែរ ការសិក្សាស្រាវជ្រាវបង្ហាញថា អង់ទីគ័រធម្មជាតិរបស់អ្នកកើតកូវីដ-១៩ ផ្តល់នូវការការពារយូរអង្វែង និងរឹងមាំជាងមុន ជាពិសេសមានសមត្ថភាពប្រឆាំងនឹងការឆ្លងសារជាថ្មី ហើយប្រសិនបើឆ្លងក៏មិនមានអាការធ្ងន់ធ្ងរ ឬត្រូវចូលព្យាបាលនៅមន្ទីរពេទ្យឡើយ។

បន្ថែមពីលើនេះ ប្រសិនបុគ្គលនោះធ្លាប់ឆ្លងមេរោគ SARS-CoV-2 រួមទាំងធ្លាប់បានចាក់វ៉ាក់សាំង១ដូសផង ពួកគេនឹងទទួលបានការការពារកាន់តែខ្លាំងពីវីរុសបំប្លែងខ្លួន Delta៕

ប្រែសម្រួល៖ សន្យា

ប្រភព៖ Daily Mail

ចុចអាន៖ វ៉ាក់សាំងដូសជំរុញ អាចបង្កើនកម្រិតអង់ទីគ័រខ្ពស់ ប្រឆាំង Delta និងវីរុសបំប្លែងខ្លួនថ្មីផ្សេងទៀត

ចុចអាន៖ អ្នកជំងឺស្រាល មានអង់ទីគ័រប្រឆាំងវីរុសបាន ១១ខែ ឬមួយជីវិតតែម្ដង ក្រោយជាសះស្បើយពីកូវីដ

The post អ្នកវិទ្យាសាស្រ្ត៖ ប្រព័ន្ធភាពស៊ាំអ្នកធ្លាប់ឆ្លងកូវីដ អាចការពារវីរុសបំប្លែងខ្លួន Delta ខ្លាំងអ្នកចាក់វ៉ាក់សាំងពេញលេញ appeared first on Kampuchea Thmey Daily.

ប្រព័ន្ធភាពស៊ាំ Archives - Kampuchea Thmey Daily

ក្រុមអាហារ ៥ យ៉ាង ផ្ទុកសារធាតុ Phytonutrients ជួយបង្កើនភាពស៊ាំ ប្រឆាំងនឹងកូវីដ បច្ចុប្បន្ននេះ

មើម​ឈូក​ជួយ​សុខភាពស្បែក ខួរ​ក្បាល​ និង​​ប្រព័ន្ធ​ភាព​ស៊ាំ

១.ជួយ​ដល់​ស្បែក

២.ជួយ​ពង្រឹង​សុខភាព​ខួរ​ក្បាល

៣.ជួយ​បង្កើន​ថាមពល

៤.ជួយ​​ការ​រំលាយ​អាហារ​ និង​ការ​គ្រប់​គ្រង​ទម្ងន់

៥.ពង្រឹង​​សុខភាព​សរសៃ​ឈាម​បេះដូង

៦.បង្កើន​ប្រព័ន្ធ​ភាព​ស៊ាំ

មិនលេងសើចទេ ស្ត្រេសច្រើន អាចវាយប្រហារប្រព័ន្ធភាពស៊ាំចុះខ្សោយ ងាយមានជំងឺ

១. ឥទ្ធិ​ពល​ស្រ្តេស​លើ​ប្រព័ន្ធ​ភាព​ស៊ាំ

២. ឥទ្ធិ​ពល​ស្ត្រេស​លើ​ការ​ទទួល​បាន​សារធាតុ​ចិញ្ចឹម​

មនុស្ស ៥ក្រុមនេះ ត្រូវប្រញាប់ចាក់វ៉ាក់សាំងកូវីដដូសជំរុញឱ្យបានមុនគេ

៦ យ៉ាង​គួរធ្វើ ដើម្បី​ពង្រឹង​ភាព​ស៊ាំ​ទប់ទល់នឹងកូវីដ រួមទាំងវីរុសបំប្លែងខ្លួន Delta

សុខភាពខ្សោយ មិនទាន់បានចាក់វ៉ាក់សាំងដូសជំរុញ គួរមើលថែខ្លួន តាមវិធីនេះ

ប្រព័ន្ធភាពស៊ាំជួយការពាររាងកាយ ចុះបើវាប្រឆាំងនឹងខ្លួនឯងវិញ មានអ្វីកើតឡើង?

មើមឈូកជួយសុខភាពស្បែក ខួរក្បាល និងប្រព័ន្ធភាពស៊ាំ

១.ជួយដល់ស្បែក

២.ជួយពង្រឹងសុខភាពខួរក្បាល

៣.ជួយបង្កើនថាមពល

៤.ជួយការរំលាយអាហារ និងការគ្រប់គ្រងទម្ងន់

៥.ពង្រឹងសុខភាពសរសៃឈាមបេះដូង

៦.បង្កើនប្រព័ន្ធភាពស៊ាំ

១. ឥទ្ធិពលស្រ្តេសលើប្រព័ន្ធភាពស៊ាំ

២. ឥទ្ធិពលស្ត្រេសលើការទទួលបានសារធាតុចិញ្ចឹម

៦ យ៉ាងគួរធ្វើ ដើម្បីពង្រឹងភាពស៊ាំទប់ទល់នឹងកូវីដ រួមទាំងវីរុសបំប្លែងខ្លួន Delta