ប្រឡង Archives - Kampuchea Thmey Daily

បេក្ខជនដែលប្រឡងជាប់ជាមន្ត្រីរាជការនៅមន្ទីរពេទ្យបង្អែកចំនួន២ ក្នុងខេត្តសៀមរាប សរុប ៨១នាក់

អុន ស្រីមាន — Fri, 27 Dec 2024 09:56:49 +0000

នៅព្រឹកថ្ងៃទី២៧ ខែធ្នូ ឆ្នាំ២០២៤ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការរៀបចំការប្រឡងប្រជែង បានពិនិត្យការផ្ទៀងផ្ទាត់ និងចុះហត្ថលេខាសម្រេចលើលទ្ធផលជាប់ជាស្ថាពរ នៃការប្រឡងប្រជែងជ្រើសមន្ត្រីរើសរាជការ ឱ្យបម្រើការងារនៅមន្ទីរពេទ្យបង្អែកកម្រិត១ ប៊ុនរ៉ានី ហ៊ុនសែន រុនតាឯក និងមន្ទីរពេទ្យបង្អែកកម្រិត១ ពាក់ស្នែង នៃរដ្ឋបាលខេត្តសៀមរាប ក្នុងក្របខណ្ឌក្រសួងសុខាភិបាល។

ចំពោះការប្រឡងរើសមន្ត្រីរាជការបម្រើការងារក្នុងក្របខណ្ឌក្រសួងសុខាភិបាលនេះ បេក្ខជនជាប់ជាស្ថាពរ នៅមន្ទីរពេទ្យបង្អែកកម្រិត១ ប៊ុនរ៉ានី ហ៊ុនសែន រុនតាឯក សរុបចំនួន៣៦នាក់ ស្រី១៤នាក់។ បេក្ខជនជាប់ក្នុងក្របខណ្ឌ “ក” ចំនួន ១២នាក់ ស្រី១នាក់ ចំណែកបេក្ខជនជាប់ក្នុងក្នុង ក្របខណ្ឌ “ខ” ចំនួន ២៤នាក់ ស្រី១៣នាក់។ រីឯ បេក្ខជនជាប់ជាស្ថាពរ នៅមន្ទីរពេទ្យបង្អែកកម្រិត១ ពាក់ស្នែង សរុបចំនួន៤៥នាក់ ស្រី២៨នាក់ ក្នុងនោះអ្នកដែលជាប់ក្របខណ្ឌ “ក” ចំនួន ១៧នាក់ ស្រី៧នាក់ និងជាប់ក្នុងក្របខណ្ឌ “ខ” ចំនួន ២៨នាក់ ស្រី២១នាក់។

សូមជម្រាបថា កាលពីថ្ងៃទី២៣ ខែធ្នូ ឆ្នាំ២០២៤ ក្រសួងមុខងារសាធារណៈ បានរៀបចំការប្រឡងប្រជែងជ្រើសមន្ត្រីរើសរាជការ ឱ្យបម្រើការងារនៅមន្ទីរពេទ្យបង្អែកកម្រិត១ ប៊ុនរ៉ានី ហ៊ុនសែន រុនតាឯក េខត្តសៀមរាប ដោយមានបេក្ខជនប្រឡង ៨០៩នាក់ ដោយជ្រើសរើសមន្ត្រីរាជការ ៣៦នាក់ប៉ុណ្ណោះ។

ចំណែក ដំណើរការប្រឡងជ្រើសរើសមន្ត្រីរាជការ ឱ្យចូលបម្រើការងារនៅមន្ទីរពេទ្យបង្អែកកម្រិត១ ពាក់ស្នែង នៃរដ្ឋបាលខេត្តសៀមរាប ធ្វើឡើងកាលពីថ្ងៃទី២៤ ខែធ្នូ ឆ្នាំ២០២៤ ដោយមានបេក្ខជនប្រឡងចំនួន ៨១៩នាក់ (ស្រី៥០២នាក់) ក្នុងចំណោមបេក្ខជនដាក់ពាក្យ១៣០០នាក់ ហើយបេក្ខជនដែលត្រូវជ្រើសរើសសរុបចំនួន ៤៦កន្លែង ដោយប្រភេទក្របខណ្ឌ “ក” ចំនួន១៧នាក់ និងក្របខណ្ឌ “ខ” ចំនួន២៩នាក់៕

The post បេក្ខជនដែលប្រឡងជាប់ជាមន្ត្រីរាជការនៅមន្ទីរពេទ្យបង្អែកចំនួន២ ក្នុងខេត្តសៀមរាប សរុប ៨១នាក់ appeared first on Kampuchea Thmey Daily.

ឯកឧត្ដម ហ៊ុន ម៉ានី អញ្ជើញកាត់វិញ្ញាសាប្រឡងគ្រូបឋមសិក្សា ជូនបេក្ខជនជិត ៦ ពាន់នាក់

អ៊ិន ពិសី — Mon, 15 Jul 2024 07:39:26 +0000

ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការប្រឡងប្រជែង បានអញ្ជើញក្នុងពិធីកាត់វិញ្ញាសានៅមណ្ឌលប្រឡងសាកលវិទ្យាល័យភូមិន្ទភ្នំពេញសម្រាប់ការប្រឡងប្រជែងជ្រើសរើសគ្រូបឋមសិក្សា។

ពិធីនេះមានការចូលរួមពីតំណាងក្រសួងអប់រំ យុវជន និងកីឡា តំណាងក្រសួងសេដ្ឋកិច្ច និងហិរញ្ញវត្ថុ តំណាងអង្គភាពប្រឆាំងអំពើពុករលួយ តំណាងអ្នកសង្កេតការណ៍មកពីសាកលវិទ្យាល័យនានា មហាជនដែលបានចុះឈ្មោះជាអ្នកសង្កេតការណ៍ និងតំណាងសហភាពសហព័ន្ធយុវជនកម្ពុជា(ស.ស.យ.ក)។

ការប្រឡងប្រជែង នារសៀលនេះ មានការបែងចែកចេញជា ២ វេន ៖ វេនទី ១-មានបេក្ខជនសរុបចំនួន ៥,៩៤១ នាក់ (ស្រី ៤,៥៥១ នាក់) មកពីរាជធានីភ្នំពេញ និងខេត្ត ចំនួន ៣ គឺ ខេត្តប៉ៃលិន, ខេត្តសៀមរាប និងខេត្តពោធិ៍សាត់ ដោយប្រើប្រាស់ ១៤៩ បន្ទប់។ វេនទី ២-មានបេក្ខជនសរុបចំនួន ៦,៤៦៧ នាក់ (ស្រី ៤,៩៣១ នាក់) មកពីបណ្ដាខេត្ត ចំនួន ៣ គឺ ខេត្តបន្ទាយមានជ័យ, ខេត្តឧត្តរមានជ័យ និងខេត្តបាត់ដំបង ដោយប្រើប្រាស់ ១៥១ បន្ទប់៕

The post ឯកឧត្ដម ហ៊ុន ម៉ានី អញ្ជើញកាត់វិញ្ញាសាប្រឡងគ្រូបឋមសិក្សា ជូនបេក្ខជនជិត ៦ ពាន់នាក់ appeared first on Kampuchea Thmey Daily.

ឯកឧត្ដម ហ៊ុន ម៉ានី អញ្ជើញមានវត្តមាននៅមណ្ឌលប្រឡងគ្រូបឋមសិក្សា ខណៈបេក្ខជនចូលរួមប្រឡងជាង ២ ម៉ឺននាក់

អ៊ិន ពិសី — Sun, 14 Jul 2024 05:00:04 +0000

ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការប្រឡងប្រជែង បានអញ្ជើញមានវត្តមាននៅមណ្ឌលប្រឡងជ្រើសរើសគ្រូបឋមសិក្សា ដើម្បីតាមដានការតាក់តែងវិញ្ញាសា និងជ្រើសរើសប្រធានវិញ្ញាសា សម្រាប់ប្រឡងប្រជែងទាំងពីរវេន នារសៀលនេះ ដែលមានបេក្ខជនចូលរួមប្រឡងចំនួន ២១,៥៣៨ នាក់។

រាល់ការប្រឡងនីមួយៗ ជម្រើសវិញ្ញាសា ត្រូវបានតាក់តែងលើសពីចំនួនដែលនឹងត្រូវជ្រើសរើស។ ជាក់ស្ដែងការប្រឡងប្រជែងជ្រើសរើសគ្រូបឋមសិក្សាថ្ងៃនេះ វិញ្ញាសាវប្បធម៌ទូទៅ ត្រូវបានតាក់តែងយ៉ាងតិចចំនួន ៤៥ សំណួរ និងផ្នែកវិញ្ញាសាគណិតវិទ្យា យ៉ាងតិចចំនួន ១០០ សំណួរ តាមវេននីមួយៗ។

បន្ទាប់មក ឯកឧត្ដម ហ៊ុន ម៉ានី បានធ្វើការជ្រើសរើសប្រធានវិញ្ញាសា ក្នុងចំណោមជម្រើសទាំងអស់។ ប្រធានវិញ្ញាសាដែលត្រូវបានជ្រើសរើសរួមមាន ៖ សំណួរវប្បធម៌ទូទៅ ចំនួន ៣០ សំណួរ និងគណិតវិទ្យា ៧០ សំណួរ។

ប្រធានវិញ្ញាសា ចំនួន ១០០ សំណួរ ត្រូវបានអនុគណៈកម្មការកណ្ដាល បន្តនីតិវិធីនានា សម្រាប់ការប្រឡងប្រជែងជ្រើសរើសគ្រូបង្រៀននៅបឋមសិក្សា វេនទី ៣ និងទី ៤ នៅមណ្ឌលប្រឡងសាកលវិទ្យាល័យភូមិន្ទភ្នំពេញ នារសៀលថ្ងៃនេះ។

គួរបញ្ជាក់បន្ថែមថា រាល់ដំណើរការរៀបចំតាក់តែង និងជ្រើសរើសវិញ្ញាសា ព្រមទាំងនីតិវិធីនានា តែងតែមានវត្តមានតាមដានដោយអ្នកសង្កេតការណ៍ នៃអង្គភាពប្រឆាំងអំពើពុករលួយ សហភាពសហព័ន្ធយុវជនកម្ពុជា តំណាងសាកលវិទ្យាល័យនានា និងសាធារណជនដែលបានចុះឈ្មោះចូលរួមដោយស្ម័គ្រចិត្ត៕

The post ឯកឧត្ដម ហ៊ុន ម៉ានី អញ្ជើញមានវត្តមាននៅមណ្ឌលប្រឡងគ្រូបឋមសិក្សា ខណៈបេក្ខជនចូលរួមប្រឡងជាង ២ ម៉ឺននាក់ appeared first on Kampuchea Thmey Daily.

បើមិនប្រែប្រួល ការប្រឡងជ្រើសរើសគ្រូបង្រៀនបឋមសិក្សា លើកទី ១ ដើម្បីសម្រាំងបេក្ខជន នឹងប្រព្រឹត្តិទៅនៅខែកក្កដា ខាងមុខនេះ

អ៊ិន ពិសី — Fri, 21 Jun 2024 02:29:48 +0000

ក្រោយពីបានសិក្សា និងរៀបចំការងារបច្ចេកទេសជាច្រើនដំណាក់កាលរួចមក ការប្រឡងប្រជែងជ្រើសរើសគ្រូបង្រៀនបឋមសិក្សា ត្រូវបានកំណត់នៅខែកក្កដា ឆ្នាំ ២០២៤។

ដើម្បីពិនិត្យលើវឌ្ឍនភាព និងតម្រង់ទិសការងារបន្ថែម ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការប្រឡងប្រជែងជ្រើសរើសមន្ត្រីរាជការ បានដឹកនាំកិច្ចប្រជុំអន្តរក្រសួង កាលពីរសៀលថ្ងៃទី ២០ ខែមិថុនា ឆ្នាំ ២០២៤ នៅសាលាភូមិន្ទរដ្ឋបាល ដោយមានការចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ តំណាងក្រសួងអប់រំ យុវជន និងកីឡា តំណាងអង្គភាពប្រឆាំងអំពើពុករលួយ ព្រមទាំងថ្នាក់ដឹកនាំ និងមន្ត្រីជំនាញ នៃគណៈកម្មការរៀបចំការប្រឡងប្រជែងជ្រើសរើសគ្រូបង្រៀននៅបឋមសិក្សាជាច្រើនរូប។

កិច្ចប្រជុំនេះ ប្រព្រឹត្តិទៅដោយមានការធ្វើរបាយការណ៍ពីក្រុមការងារបច្ចេកទេស រួមជាមួយការពិភាក្សាពីទិដ្ឋភាពនានា ដើម្បីឱ្យការប្រឡងប្រជែងប្រព្រឹត្តទៅកាន់តែល្អប្រសើរ ស្របតាមនិយាមដែលបានដាក់ចេញ និងស្របតាមគោលការណ៍ធ្លាប់អនុវត្តកន្លងមក។

ស្របពេលជាមួយគ្នានេះ ឯកឧត្ដមឧបនាយករដ្ឋមន្ត្រី ក៏បានលើកឡើងថា បេក្ខជនចំនួន ៤,០៤១ នាក់ ឬ ស្មើបីដង នៃចំនួនដែលត្រូវជ្រើសរើសជាប់ស្ថាពរចុងក្រោយ (១,៣៤៧ នាក់) នឹងត្រូវបានជ្រើសរើសសម្រាប់ការប្រឡងលើកទី ១ ដើម្បីជ្រើសសម្រាំងបេក្ខជនចេញពីបេក្ខជនដែលមានសិទ្ធប្រឡងចំនួនសរុប ៣៨,១៦៨ នាក់។

តាមការគ្រោងទុក អង្គប្រជុំបានកំណត់កាលបរិច្ឆេទសម្រាប់ការប្រឡងនៅថ្ងៃទី ១៣-១៤ និង ថ្ងៃទី ២០-២១ ខែកក្កដា ឆ្នាំ ២០២៤ តាមមណ្ឌលប្រឡងផ្សេងៗ គ្នា៕

The post បើមិនប្រែប្រួល ការប្រឡងជ្រើសរើសគ្រូបង្រៀនបឋមសិក្សា លើកទី ១ ដើម្បីសម្រាំងបេក្ខជន នឹងប្រព្រឹត្តិទៅនៅខែកក្កដា ខាងមុខនេះ appeared first on Kampuchea Thmey Daily.

២ ថ្ងៃទៀត ការប្រឡងជ្រើសរើសគ្រូបង្រៀននៅអនុវិទ្យាល័យ សម្រាប់វិញ្ញាសាសរសេរលើកទី ២ នឹងឈានមកដល់

អ៊ិន ពិសី — Thu, 16 May 2024 06:07:49 +0000

ជាទម្លាប់ នៅមុនពេលការប្រឡងនីមួយៗ ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការប្រឡងប្រជែង តែងតែដឹកនាំកិច្ចប្រជុំធ្វើវឌ្ឍនភាពការងារ និងជម្រះមន្ទិល ឬបញ្ហាប្រឈមនានា ឆ្ពោះទៅកាន់ការប្រឡងប្រជែងនីមួយៗ។

ជាក់ស្ដែង នាព្រឹកថ្ងៃទី ១៦ ខែឧសភា ឆ្នាំ ២០២៤ នេះ កិច្ចប្រជុំដើម្បីធ្វើវឌ្ឍនភាពត្រូវបានប្រព្រឹត្តទៅដោយមានការអញ្ជើញចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ តំណាងក្រសួងអប់រំ យុវជន និងកីឡា តំណាងអង្គភាពប្រឆាំងអំពើពុករលួយ ព្រមទាំងថ្នាក់ដឹកនាំ និងមន្ត្រីជំនាញ ដែលជាប្រធាន អនុប្រធាន និងសមាជិក នៃគណៈកម្មការ និងអនុគណៈកម្មការការប្រឡងប្រជែងជ្រើសរើសគ្រូបង្រៀននៅអនុវិទ្យាល័យ វិញ្ញាសាសរសេរលើកទី ២។

ស្របពេលជាមួយនឹងការធ្វើរបាយការណ៍វឌ្ឍនភាព អង្គប្រជុំក៏បានចែករំលែកនូវមតិយោបល់ប្រហាក់ប្រហែលគ្នាថា កន្លងមកគណៈកម្មការរៀបចំការប្រឡងប្រជែង ក៏ដូចជាក្រុមការងារ នៃក្រសួងមុខងារសាធារណៈ បានអនុវត្តការងារយ៉ាងល្អិតល្អន់ និងទទួលបានការសាទរពីប្រជាពលរដ្ឋ ជាពិសេសបេក្ខជន និងអាណាព្យាបាល ដែលបានចូលរួមប្រឡងប្រជែង ស្របនឹងគោលការណ៍ថ្មីនេះ។ ទោះបីជាយើងមានការគិតគូរល្អិតល្អន់យ៉ាងណាក៏ដោយ បញ្ហាប្រឈមនានាតែងតែកើតឡើងចំពោះមុខ ជាពិសេសការប្រឡងលើកចុងក្រោយនេះ ដែលមានបរិមាណបេក្ខជនចូលរួមយ៉ាងច្រើនដែលយើងមិនធ្លាប់ជួបប្រទះ ធ្វើឱ្យយើងជួបបញ្ហាប្រឈមត្រូវដោះស្រាយជាបន្តបន្ទាប់។ ដូច្នេះលទ្ធផល នៃកិច្ចប្រជុំនេះ មានសារៈសំខាន់ចំពោះការងារឆ្ពោះទៅមុខ ទៅលើការរៀបចំប្រឡងប្រជែងលើកទី ២ ក្នុងការប្រឡងប្រជែងជ្រើសរើសបេក្ខជនចំនួន ៤៤១ នាក់ ឱ្យចូលបង្រៀននៅអនុវិទ្យាល័យ ក្នុងក្របខណ្ឌក្រសួងអប់រំ យុវជន និងកីឡា។

តាមរយៈកិច្ចប្រជុំនេះ ឯកឧត្ដមឧបនាយករដ្ឋមន្ត្រី បានធ្វើការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងក្រុមការងារបច្ចេកទេសទាំងអស់ ដែលមាននៅក្នុងគណៈកម្មការ និងអនុគណៈកម្មការនីមួយៗ ប្រកបដោយសាមគ្គីភាព និងការសហការគ្នាបានល្អប្រសើររវាងក្រុមការងារ ដែលបានធ្វើឱ្យដំណើរការប្រឡងសម្រាំងលើកទី ១ កាលពីថ្ងៃទី ២ ដល់ទី ៥ ខែឧសភា ឆ្នាំ ២០២៤ កន្លងមក ដែលមានបេក្ខជនសរុប ៣៣ ៣១៤ នាក់ ដោយទទួលបានសម្រាំងបេក្ខជនចំនួន ១ ៣៧៩ នាក់ សម្រាប់ប្រឡងវិញ្ញាសាសរសេរលើទី ២ បានបញ្ចប់ដោយរលូន ដូចការគ្រោងទុក។ ឯកឧត្ដម ក៏បានថ្លែងអំណរគុណដល់ក្រសួងអប់រំ យុវជន និងកីឡា, ក្រសួងសេដ្ឋកិច្ច និងហិរញ្ញវត្ថុ និងអង្គភាពប្រឆាំងអំពើពុករលួយ ចំពោះកិច្ចសហការនាពេលកន្លងមក ជាពិសេសការចែករំលែកនូវបទពិសោធក្នុងការគាំទ្រការរៀបចំដំណើរការប្រឡងមួយនេះ៕

The post ២ ថ្ងៃទៀត ការប្រឡងជ្រើសរើសគ្រូបង្រៀននៅអនុវិទ្យាល័យ សម្រាប់វិញ្ញាសាសរសេរលើកទី ២ នឹងឈានមកដល់ appeared first on Kampuchea Thmey Daily.

ឯកឧត្ដម ហ៊ុន ម៉ានី ៖ បេក្ខជនប្រឡងចូលគ្រូបង្រៀនអនុវិទ្យាល័យមានសមត្ថភាពលើសគេ នឹងក្លាយជាមន្ត្រីរាជការស៊ីវិលដ៏មានគុណភាពរបស់កម្ពុជា

អ៊ិន ពិសី — Sat, 04 May 2024 08:10:41 +0000

ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការប្រឡងប្រជែង បានគូសបញ្ជាក់ថា បេក្ខជនប្រឡងចូលគ្រូបង្រៀនអនុវិទ្យាល័យដែលមានសមត្ថភាពពិតប្រាកដលើសគេ នឹងទទួលបានជោគជ័យលើការប្រឡងប្រជែងនេះ ហើយនឹងក្លាយជាមន្ត្រីរាជការស៊ីវិលដ៏មានគុណភាពរបស់កម្ពុជា។

នៅរសៀលថ្ងៃទី ០៤ ខែឧសភា ឆ្នាំ ២០២៤ នេះ តាមរយៈទំព័រហ្វេសប៊ុក ឯកឧត្ដម ហ៊ុន ម៉ានី បានលើកឡើងថា នៅក្រៅមណ្ឌលប្រឡង មិនថាអាកាសធាតុក្តៅយ៉ាងណា ក៏ ឪពុកម្ដាយ អាណាព្យាបាល រង់ចាំលើកទឹកចិត្តបេក្ខជនដែលកំពុងប្រឡងប្រជែងនៅខាងក្នុងមណ្ឌល ប្រកបដោយក្តីស្រឡាញ់។

ឯកឧត្ដម ហ៊ុន ម៉ានី បានលើកឡើងបន្តថា សូមអាណាព្យាបាលបេក្ខជនប្រឡងចូលគ្រូបង្រៀនអនុវិទ្យាល័យទាំងអស់ ទុកចិត្តលើប្រព័ន្ធប្រឡងប្រជែង ហើយសូមកុំមានការព្រួយបារម្ភលើភាពមិនប្រក្រតីណាមួយជុំវិញការប្រឡង។

ឯកឧត្ដម ហ៊ុន ម៉ានី ក៏បានគូសបញ្ជាក់ដែរថា «ប្អូនៗ ក្មួយៗ ជាបេក្ខជនដែលមានសមត្ថភាពពិតប្រាកដលើសគេ នឹងទទួលបានជោគជ័យលើការប្រឡងប្រជែងនេះ ហើយនឹងក្លាយជាមន្ត្រីរាជការស៊ីវិលដ៏មានគុណភាពរបស់កម្ពុជា»។

សូមបញ្ជាក់ថា ការប្រឡងប្រជែងជ្រើសរើសគ្រូអនុវិទ្យាល័យ របស់ ក្រសួងអប់រំ យុវជន និងកីឡា ប្រព្រឹត្តទៅមានរយៈពេល ៤ ថ្ងៃ ជាប់គ្នា គឺ ចាប់ពីថ្ងៃទី ២ ដល់ទី ៥ ខែឧសភា ឆ្នាំ ២០២៤ មណ្ឌលប្រឡងស្ថិតនៅសាកលវិទ្យាល័យភូមិន្ទភ្នំពេញ សាកលវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ច និងសាលាភូមិន្ទរដ្ឋបាល៕

អត្ថបទ ៖ ពិសី

The post ឯកឧត្ដម ហ៊ុន ម៉ានី ៖ បេក្ខជនប្រឡងចូលគ្រូបង្រៀនអនុវិទ្យាល័យមានសមត្ថភាពលើសគេ នឹងក្លាយជាមន្ត្រីរាជការស៊ីវិលដ៏មានគុណភាពរបស់កម្ពុជា appeared first on Kampuchea Thmey Daily.

ការប្រឡងប្រជែងជ្រើសរើសគ្រូបង្រៀនអនុវិទ្យាល័យ ថ្ងៃទី ៣ ចាប់ផ្ដើម

អ៊ិន ពិសី — Sat, 04 May 2024 06:32:12 +0000

នាវេលាម៉ោង ១២ ថ្ងៃត្រង់ ថ្ងៃទី ០៤ ខែឧសភា ឆ្នាំ ២០២៤ ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការប្រឡងប្រជែង អញ្ជើញបើកវិញ្ញាសាសរសេរ សម្រាប់ការប្រឡងប្រជែងជ្រើសរើសគ្រូបង្រៀនសម្រាប់បង្រៀននៅអនុវិទ្យាល័យ។ នៅមណ្ឌលប្រឡងសាលាភូមិន្ទរដ្ឋបាល និងសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច។

មិនខុសពីការប្រឡងម្សិលមិញទេ ការប្រឡងប្រជែង នឹងត្រូវប្រព្រឹត្តិទៅចំនួន ២ វេន ដោយវេនទី ១ ចាប់ពីម៉ោង ១២ ដល់ ម៉ោង ២ រសៀល និង វេនទី ២ ចាប់ពីម៉ោង ៤ រសៀល ដល់ម៉ោង ៦ ល្ងាច លើមុខវិជ្ជាឯកទេស ជីវវិទ្យា, ជីវវិទ្យា-ផែនដីវិទ្យា, និងគណិតវិទ្យា-រូបវិទ្យា៕

The post ការប្រឡងប្រជែងជ្រើសរើសគ្រូបង្រៀនអនុវិទ្យាល័យ ថ្ងៃទី ៣ ចាប់ផ្ដើម appeared first on Kampuchea Thmey Daily.

ការប្រឡងប្រជែងជ្រើសរើសគ្រូអនុវិទ្យាល័យ លើកទី ១ បានបន្តដល់ថ្ងៃទី ២

អ៊ិន ពិសី — Fri, 03 May 2024 01:27:12 +0000

សម្រាប់ការប្រឡងនៅថ្ងៃទី ០៣ ខែឧសភា ឆ្នាំ ២០២៤ នេះ ត្រូវបានបែងចែកជា ២ មណ្ឌល ៖ មណ្ឌលទី ១ សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច និង មណ្ឌលទី ២ សាលាភូមិន្ទរដ្ឋបាល។

ដូចសព្វមួយដង ការប្រឡងប្រជែងប្រជែង នឹងត្រូវអនុវត្តតាមនិយាមនីតិវិធីប្រតិបត្តិ នៃការប្រឡងប្រជែងជ្រើសរើសមន្ត្រីរាជការស៊ីវិល គណៈកម្មការមេប្រយោគធ្វើការរៀបចំតាក់តែងវិញ្ញាសានៅពេលព្រឹក ហើយប្រឡងនៅពេលរសៀល។

សម្រាប់ការប្រឡងនៅពេលរសៀល ត្រូវបានបែងចែកជា ២ វេន ហើយវេននីមួយៗ មានបេក្ខជនចូលរួមប្រឡងប្រជែងផ្សេងៗ គ្នា វិញ្ញាសាផ្សេងៗ គ្នា៕

The post ការប្រឡងប្រជែងជ្រើសរើសគ្រូអនុវិទ្យាល័យ លើកទី ១ បានបន្តដល់ថ្ងៃទី ២ appeared first on Kampuchea Thmey Daily.