អ្នកស្រី មន ធីតា កម្មការិនីរោងចក្រ សេឌូណូ នៅខណ្ឌដង្កោ រាជធានីភ្នំពេញ បានឱ្យដឹងនៅថ្ងៃទី២១ ខែមីនាថា ការផ្តល់ប្រាក់ឧបត្ថម្ភនេះមានសារៈសំខាន់ណាស់សម្រាប់ជីវភាព របស់កម្មករនិយោជិតត្បិតចំនួនទឹកប្រាក់មិនច្រើន តែតួលេខនេះអាចទទួលយកបាន ហើយវានឹងក្លាយជាចំណូលប្រចាំខែថ្មីបន្ថែមទៀត សម្រាប់ផ្គត់ផ្គង់គ្រួសាររបស់ខ្លួនបន្ថែមពីលើអត្ថប្រយោជន៍ផ្សេងៗទៀតដែលកំពុងទទួលបានស្រាប់។

អ្នកស្រីនិយាយថា «ខ្ញុំមានអារម្មណ៍ថាសប្បាយចិត្ត និយាយទៅពេលបានជួយលុយន្ថែមចឹងទៅ យើងវាបានជួយកាត់បន្ថយថ្លៃចំណាយ ព្រោះឥឡូវសាំងថ្លៃ អីៗឡើងថ្លៃ ពេលបានអាហ្នឹងមកថែមទៀតនិយាយទៅថ្លៃចំណាយរបស់យើងមិនសូវពិបាក។ ទោះមានការលំបាកប្រទេសជាតិយ៉ាងណាក៏ដោយ រដ្ឋាភិបាលគាត់អត់ដែលភ្លេចកម្មករ និងប្រជាជនទេ» ។

ស្រដៀងគ្នានេះ អ្នកស្រី ឈា ផល្លា កម្មការិនីរោងចក្រ សេឌូណូ ម្នាក់ទៀត ប្រាប់ថា៖ «លឺដំណឹងថាអ៊ីចឹង គឺសប្បាយចិត្ត ហើយត្រេកអរចំពោះរាជរដ្ឋាភិបាល ក៏ដូចជាថៅកែដែលគាត់មានទឹកចិត្តជួយកម្មករកម្មការិនីទាំងអស់ ទោះបីស្ថិតក្នុងស្ថានភាពពិបាកដែលប្រេងសាំងឡើងថ្លៃក៏ដោយ»។

ចំណែកកម្មការិនីម្នាក់ទៀត គឺអ្នកស្រី ចិត្ត លីណា មើលឃើញថា ការផ្តល់ប្រាក់សោហ៊ុយនេះ នឹងក្លាយជាបង្អែកថ្មីមួយទៀតសម្រាប់កម្មករនិយោជិត ហើយវានឹងចូលរួមចំណែកយ៉ាងសំខាន់ក្នុងជីវភាពប្រចាំថ្ងៃរបស់បងប្អូនកម្មករនិយោជិតនៅកម្ពុជា។

អ្នកស្រីលើកឡើងថា «មានអារម្មណ៍រំភើបសប្បាយរីករាយ ពីព្រោះការផ្តល់ប្រាក់សោហ៊ុយនេះនឹងជួយកាត់បន្ថយការចំណាយរបស់កម្មករទាំងអស់គ្នា សារៈសំខាន់សម្រាប់ខ្ញុំជួយកាត់បន្ថយចំណាយរបស់ខ្ញុំ ការធ្វើដំណើរ ថ្លៃផ្ទះជួល»។

គួរបញ្ជាក់ថា ក្រោយមានអនុសាសន៍ណែនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កាលពីថ្ងៃទី១៩ ខែមីនា ក្រុមប្រឹក្សាជាតិប្រាក់ឈ្នួលអប្បបរមាបានបើកកិច្ចប្រជុំបន្ទាន់នៅថ្ងៃទី២០ ខែមីនា ឆ្នាំ២០២៦ ដោយអង្គប្រជុំបានឯកភាពផ្តល់ប្រាក់សោហ៊ុយធ្វើដំណើរបណ្តោះអាសន្នចំនួន ២,៥០ ដុល្លារអាម៉េរិកក្នុងមួយខែ ចាប់ពីថ្ងៃទី១ ខែមេសា ឆ្នាំ២០២៦ បន្ថែមលើប្រាក់សោហ៊ុយធ្វើដំណើរនិងស្នាក់នៅ ដែលក្រុមហ៊ុន រោងចក្រ សហគ្រាសកំពុងអនុវត្ត រហូតដល់ស្ថានភាពតម្លៃប្រែងឥន្ទនៈ វិលមករកភាពប្រក្រតីវិញ៕

The post កម្មករនិយោជិតសប្បាយចិត្ត និងអរគុណរដ្ឋាភិបាល​ក្នុងការជួយសម្រាលបន្ទុកថ្លៃធ្វើដំណើរអំឡុងពេលមានវិបត្តិប្រេងឥន្ទនៈជាសកល appeared first on Kampuchea Thmey Daily.

លោក​បណ្ឌិត អ៊ិត សំហេង រដ្ឋមន្ត្រី​ក្រសួង​ការងារ និង​បណ្ដុះបណ្ដាល​វិជ្ជាជីវៈ បាន​ឲ្យ​ដឹង​កាលពី​ពេល​ថ្មីៗ​នេះ​ថា ការ​សម្រេច​ផ្ដល់​អត្ថប្រយោជន៍​បន្ថែម​ពី​កម្មវិធី​ឧបត្ថម្ភ​សាច់ប្រាក់​ជូន​កម្មករ​និយោជិត​ស្ត្រី​មាន​ផ្ទៃពោះ និង​កុមារ ក្រោម​អាយុ ២ ឆ្នាំ ចាប់ពី​ខែ​សីហា ឆ្នាំ ២០២៣ បន្ទាប់ពី​ប្រមុខ​រដ្ឋាភិបាល​កម្ពុជា បាន​ប្រកាស​កាលពី​ថ្ងៃ​ទី ២២ ខែ​ឧសភា ឆ្នាំ ២០២៣ កន្លងទៅ ក្នុង​នោះ​មុន​ពេល​សម្រាល​កូន កម្មករ​និយោជិត​ស្ត្រី​មាន​ផ្ទៃពោះ​ទទួល​បាន​ប្រាក់​ឧបត្ថម្ភ​ចំនួន ៤ លើក ដោយ ១ លើក ទទួល​បាន​ថវិកា ៨ ម៉ឺន​រៀល។

លោក​រដ្ឋមន្ត្រី បាន​បន្ត​ថា ពេល​សម្រាលកូន កម្មករ​និយោជិត​ស្ត្រី​មាន​ផ្ទៃពោះ ទទួល​បាន​ប្រាក់​ឧបត្ថម្ភ ដោយ​កូន​ចំនួន ១ ទទួល​បាន​ថវិកា ៨០ ម៉ឺន​រៀល កូនភ្លោះ ២ ទទួល​បាន ១ លាន ២ សែន​រៀល និង​កូនភ្លោះ ៣ ទទួល​បាន ១ លាន ៦ សែន​រៀល និង​ទទួល​បាន​ការ​ឧបត្ថម្ភ​ពិសេស​បន្ថែម​ពី សម្ដេច​អគ្គ​មហា​សេនា​បតី​តេ​ជោ ហ៊ុន សែន និង​សម្ដេច​កិត្តិ​ព្រឹទ្ធ​បណ្ឌិត ចំនួន ៥ លាន​រៀល ទៀត​ផង​ដែរ។

លោក​រដ្ឋមន្ត្រី បាន​បន្ត​ទៀត​ថា ក្រោយ​ពេល​សម្រាលកូន កម្មករ​និយោជិត​ស្ត្រី​មាន​ផ្ទៃពោះ ទទួល​បាន​ប្រាក់​ឧបត្ថម្ភ​ចំនួន ១០ លើក ដោយ ១ លើក ទទួល​បាន ៨ ម៉ឺន​រៀល ក្នុង​នោះ ៣ លើក នៅ​ពេល​ទៅ​ទទួល​សេវា​ពិនិត្យ​សុខភាព​ក្រោយពេល​សម្រាលកូន និង ៧ លើក​ទៀត ពេល​យក​កូន​ទៅ​ទទួល​ថ្នាំ​បង្ការ​រហូតដល់​អាយុ ២ ឆ្នាំ។

គួរ​រំលឹក​ឲ្យ​ដឹង​ថា បច្ចុប្បន្ន​នេះ ស្ត្រី​ជា​កម្មការិនី​សម្រាលកូន​បាន​កូន ១ ទទួល​បាន​ប្រាក់ឧបត្ថម្ភ​ចំនួន ៤០ ម៉ឺន​រៀល សម្រាល​បាន​កូន​ភ្លោះ ២ ទទួល​បាន ៨០ ម៉ឺន​រៀល និង​សម្រាល​បាន​កូន​ភ្លោះ ៣ ទទួល​បាន​ប្រាក់​ឧបត្ថម្ភ​ចំនួន ១ លាន ២ សែន​រៀល និង​ទទួល​បាន​ប្រាក់​ឧបត្ថម្ភ​ពិសេស​បន្ថែម​ពី សម្ដេច​អគ្គ​មហា​សេនា​បតី​តេ​ជោ ហ៊ុន សែន និង​សម្ដេច​កិត្តិ​ព្រឹទ្ធ​បណ្ឌិត ចំនួន ៥ លាន​រៀល ទៀត​ផង​ដែរ៕

អត្ថបទ ៖ សំអឿន

The post រាជរដ្ឋាភិបាល នឹងផ្ដល់ប្រាក់អត្ថប្រយោជន៍បន្ថែមជូនកម្មការិនីមានផ្ទៃពោះ និងកុមារក្រោមអាយុ ២ ឆ្នាំ ចាប់ពីខែសីហា តទៅ appeared first on Kampuchea Thmey Daily.