ប្រាក់ Archives - Kampuchea Thmey Daily

តម្លៃមាស ប្រាក់ កើនឡើងបំបែកកំណត់ត្រាខ្ពស់មិនធ្លាប់មានក្នុងប្រវត្តិសាស្ត្រ

deth leng — Thu, 29 Jan 2026 02:36:31 +0000

តម្លៃមាស និងប្រាក់ បានកើនឡើងបំបែកកំណត់ត្រាខ្ពស់បំផុត មិនធ្លាប់មានក្នុងប្រវត្តិសាស្ត្រ ដោយសារវិបត្តិសេដ្ឋកិច្ច, ភូមិសាស្ត្រនយោបាយ និងការប្រឈមមុខនៃសម្ពាធពន្ធរបស់សហរដ្ឋអាមេរិក។

គិតត្រឹមម៉ោង ៩ ព្រឹកថ្ងៃទី ២៩ ខែមករា ឆ្នាំ ២០២៦ តម្លៃហាងឆេងមាសបានហក់ឡើងដល់ ៦ ៦៧៥ ដុល្លារ ក្នុងមួយតម្លឹង។ ចំណែកឯ តម្លៃប្រាក់នៅលើទីផ្សារអន្តរជាតិ បានកើនឡើងដល់ ១១៧ ដុល្លារ ក្នុងមួយអោន។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន PP Link securities ប្រាប់កម្ពុជាថ្មី នៅព្រឹកថ្ងៃព្រហស្បតិ៍នេះថា ដោយសារវិបត្តិសេដ្ឋកិច្ច និងសម្ពាធពន្ធរបស់លោក ដូណាល់ ត្រាំ ប្រធានាធិបតីអាមេរិក ជាមួយបណ្ដាប្រទេសមួយចំនួន បានរុញច្រានឱ្យតម្លៃមាស និងលោហៈផ្សេងៗកើនឡើង។

ម្យ៉ាងទៀត លោក ដូណាល់ ត្រាំ ចង់ទម្លាក់អត្រាការប្រាក់ ដើម្បីទាញវិនិយោគិន ប៉ុន្តែធនាគារកណ្ដាលធ្វើតាមគោលនយោបាយរបស់ខ្លួន ខណៈមិនមានការទម្លាក់អត្រាការប្រាក់អាមេរិកនោះទេ ពោលគឺនៅ ៣.៧៥% ដដែល ដើម្បីទប់ស្កាត់ថ្លៃអតិផរណាដែលបានឡើងដោយសារតែពន្ធលោក ដូណាល់ ត្រាំ បានដាក់សម្ពាធពន្ធលើបណ្ដាប្រទេសមួយចំនួន។

បើតាមលោក ឡុង សំណាង និន្នាការតម្លៃមាសអាចនឹងកើនឡើងដល់ ៧ ពាន់ដុល្លារ ក្នុងមួយតម្លឹងត្រឹមពាក់កណ្ដាលឆមាស ទី១ឆ្នាំ ២០២៦ ។ ប៉ុន្តែមុននឹងឡើងដល់នោះ មាសអាចនឹងមានការធ្លាក់ចុះវិញនៅមុនពេលខែ ៦ ខាងមុខនេះ។

លោកបានបន្ថែមថា៖ «ក្នុងឆ្នាំ ២០២៦ តម្លៃមាសនឹងឡើងដល់ ៧២០០ ទៅ ៧៥០០ ក្នុងមួយតម្លឹង ដោយសារយើងឃើញក្រុមប្រឹក្សាសន្តិភាពមួយដែលអាចធ្វើឱ្យតម្លៃហាងឆេងមាសធ្លាក់ចុះ ហើយក៏អាចធ្វើឱ្យលំនឹងសេដ្ឋកិច្ចពិភពលោកត្រឡប់មកធម្មតាវិញ»។

ចំពោះតម្លៃប្រាក់វិញ លោក ឡុង សំណាង បានឱ្យដឹងថា សហរដ្ឋអាមេរិកបានប្រកាសយកប្រាក់ធ្វើជាទុនបម្រុង ប៉ុន្តែមិនទាន់បានចុះឱ្យស្របច្បាប់នៅក្នុងរដ្ឋបាលអាមេរិកទេ ដែលរុញច្រានឱ្យប្រាក់កើនឡើង។

លោក ឡុង សំណាង បញ្ជាក់ថា៖ « បើសិនជាអាមេរិក ប្រកាស ឬគាត់ត្រូវបានអនុញ្ញាតពីសភាដាក់បញ្ចូលប្រាក់ជាធរមាននៅក្នុងច្បាប់របស់អាមេរិក ជាទុនបម្រុង ខ្ញុំជឿថា ប្រទេសដ៏ទៃទៀតក៏ចាត់ទុកប្រាក់ជាទុនបម្រុងដែរ វានៅលើតែធនាគារអាមេរិក បើធនាគារអាមេរិកសម្រេចយ៉ាងម៉េច គេនឹងដើរតាមដែរ»៕

The post តម្លៃមាស ប្រាក់ កើនឡើងបំបែកកំណត់ត្រាខ្ពស់មិនធ្លាប់មានក្នុងប្រវត្តិសាស្ត្រ appeared first on Kampuchea Thmey Daily.

តើការប្រើប្រាស់ក្រដាសប្រាក់ថយចុះ មានផលវិជ្ជមាន និងអវិជ្ជមានអ្វីខ្លះ?

Sophal Tuon — Tue, 11 Jul 2023 03:46:18 +0000

ការទូទាត់តាមប្រព័ន្ធអេឡិចត្រូនិច កំពុងពេញនិយមខ្លាំងនៅកម្ពុជា ខណៈការចាយវាយតាមក្រដាសប្រាក់មានការថមថយ ជាពិសេសនៅតំបន់ទីក្រុង ទីប្រជុំជន និងផ្សារជាដើម។ ប៉ុន្តែ ទោះយ៉ាងណា នៅមានការចាយវាយក្រដាសប្រាក់ច្រើននៅឡើយនៅតាមទីជនបទ។

តើការប្រើប្រាស់ក្រដាសប្រាក់កាន់តែថយចុះ ជំនួសដោយការទូទាត់តាមប្រព័ន្ធអេឡិចត្រូនិចនេះ មានផលវិជ្ជមាន និងអវិជ្ជមានដូចម្តេចដែរ?

លោក កាំង តុងងី ប្រធាននាយកដ្ឋានទំនាក់ទំនង និងជាអ្នកនាំពាក្យសមាគមមីក្រូហិរញ្ញវត្ថុកម្ពុជា បានប្រាប់កម្ពុជាថ្មីថា និន្នាការនៃការប្រើប្រាស់ ទូទាត់ ឬផ្ទេរប្រាក់តាមប្រព័ន្ធអេឡិចត្រូនិច មានការវិត្តន៍ទូទាំងពិភពលោក មិនមែនតែនៅកម្ពុជានោះទេ។ ដោយឡែកនៅកម្ពុជា ការទូទាត់ប្រាក់តាមប្រព័ន្ធអេឡិចត្រូនិច មានការស្ទុះឡើងខ្លាំងគឺនៅអំឡុងពេលវិបត្តិកូវីដ-១៩។ លោកមើលឃើញថា ទៅថ្ងៃខាងមុខ សន្ទុះនៃការទូទាត់តាមប្រព័ន្ធអេឡិចត្រូនិចកាន់តែមានកំណើនខ្លាំង ខណៈការចាយវាយក្រដាសប្រាក់កាន់តែថយចុះ។

បើតាមលោក តុងងី ការកើនឡើងនៃការទូទាត់តាមប្រព័ន្ធអេឡិចត្រូនិច គឺជានិន្នាការល្អសម្រាប់កម្ពុជា ដើម្បីជួយឱ្យការប្រើប្រាស់ហិរញ្ញវត្ថុក្នុងវិស័យសេដ្ឋកិច្ចទៅក្នុងប្រព័ន្ធផ្លូវការដែលមានភាពងាយស្រួល និងអត្ថប្រយោជន៍សម្រាប់អតិថិជន ប្រកបដោយសុវត្ថិភាព។

លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានលើកឡើងថា ការទូទាត់តាមប្រព័ន្ធអេឡិចត្រូនិច គឺផ្តល់ភាពងាយស្រួលដល់រាជរដ្ឋាភិបាល ទី១ ក្នុងការប្រមូលពន្ធ និងទី២ កាត់បន្ថយការបោះពុម្ពក្រដាសប្រាក់។ លោកបណ្ឌិតបានបន្ថែមថា ការទូទាត់តាមបច្ចេកវិទ្យានេះ នឹងធ្វើឱ្យមានប្រតិបត្តិការលំហូរហិរញ្ញវត្ថុកាន់តែច្រើនជាងមុន ជួយជំរុញកំណើនសេដ្ឋកិច្ចជាតិផងដែរ។

បើតាមលោកបណ្ឌិត គី សេរីវឌ្ឍន៍ ការចាយវាយតាមប្រព័ន្ធអេឡិចត្រូនិច មិនមានផលប៉ះពាល់អ្វីច្រើនោះទេ គ្រាន់តែថា មនុស្សលែងសូវស្រឡាញ់ និងកាន់ក្រដាសប្រាក់។ ចំណែកការចាយវាយក្រដាសប្រាក់ គឺត្រូវចំណាយលុយដើម្បីបោះពុម្ព ហើយក្រដាសប្រាក់ប្រើតែងតែសឹកខូចត្រូវបោះថ្មីជានិច្ច។

ទោះយ៉ាងណា លោក កាំង តុងងី ក៏កត់សម្គាល់ឃើញថា ការទូទាត់ប្រាក់តាមបច្ចេកវិទ្យា ឬឌីជីថលនេះ ក៏មានបញ្ហាប្រឈមនឹងហានិភ័យខ្លះដែរ ដែលតម្រូវឱ្យអ្នកប្រើប្រាស់ត្រូវស្វែងយល់ឱ្យបានច្បាស់ និងត្រូវប្រុងប្រយ័ត្នខ្ពស់ ដោយត្រូវទុកដាក់លេខគណនី និងលេខសម្ងាត់ឱ្យមានសុវត្ថិភាពបំផុត ជាពិសេសកុំមានការចែករំលែកទិន្នន័យផ្ទាល់ខ្លួនទៅឱ្យអ្នកដទៃ៕

The post តើការប្រើប្រាស់ក្រដាសប្រាក់ថយចុះ មានផលវិជ្ជមាន និងអវិជ្ជមានអ្វីខ្លះ? appeared first on Kampuchea Thmey Daily.

ហេតុអ្វីមនុស្សជាច្រើនប្រើជីវិតខុសព្រោះរត់តាមភាពលោភលន់?

សាង ស្រីល័ក្ខ — Wed, 05 May 2021 02:06:12 +0000

ពាក្យមួយឃ្លារបស់ទស្សនវិទូអេហ្សីបប្រាប់មកអ្នកជំនាន់ក្រោយគេថា “ មិនមែនឲ្យភ្លឺរលោងសុទ្ធតែជាមាសសុទ្ធទេ” ហើយលោកពន្យល់ទៀតថា «ភាពលោភលន់» បានលួចឆក់បំបាត់ចោលសម្បត្តិដ៏ស្រស់ស្អាតនៃជីវិតមនុស្សជាច្រើន នោះគឺជា សុភមង្គល ។

ចង់រក្សាសុភមង្គលសូមគិតរឿងទាំងនេះ៖

១. កុំឲ្យតម្លៃទៅលើទ្រព្យសម្បត្តិហួសហេតុពេក

លុយផ្ដល់ឲ្យយើងនូវអំណាចទទួលបានភ្លាមៗនូវគ្រប់យ៉ាងដែលគេដាក់លក់។ មានលុយកាន់តែច្រើន ក៏អាចទិញបានកាន់តែច្រើនដូចគ្នា។ តែចៃដន្យមានកាន់តែច្រើន កាន់តែចង់បានទៀត។ នេះជាចរិតមនុស្សភាគច្រើនដែលប្ដូរសុភមង្គលពិត រើសយករបស់ដែលគ្មានប្រយោជន៍ ហើយបញ្ចប់លទ្ធផលជីវិតដោយភាពលិចលង់ នៅក្នុងការចង់ឈ្នះចាញ់ពីបុគ្គលដែលគេឈ្នានីស។

២. ចូរវាយតម្លៃខ្ពស់ចំពោះអ្វីដែលយើងមានមិនមែនអ្វីដែលយើងចង់បានទេ

តើយើងយល់ថាខ្លួនឯងចង់បានអ្វីឲ្យប្រាកដ?

បើមនុស្សគ្រប់គ្នាយល់ថា លុយគ្រាន់តែជាក្រដាសគ្មានជីវិត ជានិមិត្តរូបនៃការចង់បាន មិនមែនត្រូវការ ហើយក៏កុំដាក់តម្លៃលើក្រដាសនោះពេក ។

ឈប់ស្វែងរកអ្វីដែលមិនបានផ្ដល់ឲ្យ ត្រឡប់មកវិញហើយចាប់ផ្ដើមដាក់កិច្ចខិតខំប្រឹងប្រែង ដើម្បីបង្ហាញសេចក្ដីស្រឡាញ់ចំពោះអ្នកដែលនៅជុំវិញខ្លួនឯង។ បើកភ្នែករបស់យើង នោះនឹងមើលឃើញសម្រស់នៅក្នុងពិភពលោកនេះមិនខាន។ កុំមើលតែជ្រុងម្ខាង ហើយវាយតំលៃជារួម ត្រូវរក្សាចិត្តទូលាយមិនផ្អៀងផ្អង់ទៅខាងណា ទើបអ្នកមានសុភមង្គលពិតកើតឡើងក្នុងជិវិតដូចគ្នា។

៣. ប្រាថ្នាចង់ការរស់នៅដែលល្អល្មមចងចាំ តែមិនមែនលុយ

ដើម្បីអនុវត្តវិធីរីករាយក្នុងជីវិត ត្រូវបញ្ឈប់ការប្រើប្រាស់ដោយឥតប្រយោជន៍ ទៅលើរបស់ដែលមិនត្រូវការ។ ដូចជាទូរស័ព្ទថ្មីទាំងដែលខ្លួនឯងមានប្រើរួចទៅហើយ តែចង់ឡូយឆាយតាមគេតាមឯង ក្នុងសង្គមស៊ីវិល័យនេះ។ អ្វីដែលយើងត្រូវការ គឺចេញទៅខាងក្រៅមើលពិភពលោកនេះ ដោយផ្ទាល់ភ្នែកទាំងគូរបស់យើង ឬជជែកផ្ទាល់ទល់មុខនឹងមនុស្សដ៏សំខាន់។ គ្រប់យ៉ាងលើលោកនេះសុទ្ធតែជារបស់ក្រៅកាយ មានតែខ្លួនយើងទេដែលទៅវិញតាមរូបកាយនេះ។

ចិត្តមួយទៀតដែលមនុស្សត្រូវការ គឺអាផាតមិនធំជាងនេះ ឬផ្ទះធំជាងនេះ។ អ្វីដែលយើងត្រូវការគឺត្រូវកោតសរសើរចំពោះខ្លួនឯង ដែលមានដំបូលជ្រក មានអាហារញុំា មានគ្រែកក់ក្ដៅសម្រាប់គេង មានទូរទឹកកកពេញដោយរបស់ញុំា និងមានកន្លែងសម្រាប់ហៅទៅផ្ទះ នៅពេលយើងមានអារម្មណ៍ថាហត់នឿយគ្រប់យ៉ាង។

ហត់នឿយនៅពេលប្រណាំងប្រជែងនៅទីក្រុងដ៏អស្ចារ្យនេះមែនទេ?

ត្រលប់ទៅផ្ទះរបស់យើង ដែលមានអ្នកមានគុណទាំងពីរចាំមើលផ្លូវគ្រប់ពេល។ បន្ទាប់មកដេកចងអង្រឹងក្រោមដើមស្វាយ អានសៀវភៅ ស្រូបយកក្លិនផ្អែមនៃខ្យល់ ឬក្លិនទឹកភ្លៀង ស្ដាប់សំឡេងសើចរបស់ក្មេងៗក្នុងភូមិជាប់របង គឺជាថ្នាំទិព្វដែលមិនអាចមានថ្នាំណាជំនួសបាន។ គ្រប់យ៉ាងទាំងអស់នេះសុទ្ធតែប្រាក់មិនអាចទិញបាន។

អ្នកមានពិតប្រាកដមិនមែនជាអ្នកដែលមានលុយរាប់លានដុល្លារ ឡានដប់ និងដីរាប់ហិចតាទេ។ អ្នកមានពិតប្រាកដ បានបើកភ្នែករបស់ពួកគេទៅរកភាពសម្បូរបែបនៃជីវិត ហើយហួសពីទ្រព្យសម្បត្តិដែលមិនអាចយកទៅតាមខ្លួនបាន៕

ប្រែសម្រួល៖ សាង ស្រីល័ក្ខ

ចុចអាន៖ពេលជីវិតក្លាយជាអ្នកមាន ការប្រែប្រួលទាំង ៦ នេះនឹងកើតឡើង

ចុចអាន៖ចិត្តសាស្ត្រ! សង្កេតកាយវិការសម្គាល់អារម្មណ៍មនុស្ស

The post ហេតុអ្វីមនុស្សជាច្រើនប្រើជីវិតខុសព្រោះរត់តាមភាពលោភលន់? appeared first on Kampuchea Thmey Daily.

កំហុសនៃការចំណាយមួយចំនួនដែលថៅកែៗគួរចាប់អារម្មណ៍

សាង ស្រីល័ក្ខ — Tue, 23 Mar 2021 03:25:04 +0000

អាជីវកម្មរមែងតែងត្រូវការការចំណាយ ទើបរំពឹងទទួលបានផលចំណេញមកវិញ ក្នុងនោះការចំណាយខ្លះត្រូវបានខ្ជះខ្ជាយនិងខាតបង់ប្រយោជន៍ដោយសារ៖

ធ្វើទីផ្សារមិនត្រឹមត្រូវ

ដើម្បីធ្វើទីផ្សារយើងត្រូវដឹងច្បាស់ពីផលិតផល ឬសេវាកម្មរបស់ខ្លួន ហើយក៏ត្រូវដឹងពីប្រភេទអតិថិជនរបស់ខ្លួនដែរ ព្រោះបើយើងមិនយល់ថាអតិថិជនដែលខ្លួនចង់បានជាមនុស្សប្រភេទណាទេនោះ យើងក៏មិនអាចធ្វើទីផ្សារឲ្យចំគោលដៅបានឡើយ រីឯលទ្ធផលលុយដែលចំណាយលើការធ្វើទីផ្សារនោះប្រៀបដូចជាយកទៅកប់ចោលអ៊ីចឹង។

ប្រើប្រាស់សម្ភារៈមិនចាំបាច់

ពេលខ្លះយើងអាចទិញសម្ភារៈប្រើប្រាស់លើសពីតម្រូវការក្នុងអាជីវកម្ម។ សម្ភារៈប្រើប្រាស់ខ្លះអាចរកទិញបានរបស់មួយទឹក ឬ ម៉ាកធម្មតាដែលមានគុណភាពមិនអន់ជាងគ្នាប៉ុន្មាន ហើយអាចប្រើប្រាស់បានដូចគ្នា។យើងអាចនឹងគិតថា បើប្រើរបស់គុណភាពល្អៗទាំងនោះនឹងធ្វើឲ្យអតិថិជនទុកចិត្ត តែតាមពិតពួកគេមើលទៅលើលទ្ធផលដែលអាជីវកម្មយើងផ្ដល់ឲ្យទៅវិញទេ។ បើសិនសេវាកម្ម ឬទំនិញយើងល្អ ទោះយើងប្រើសម្ភារៈថោកប៉ុនណាក៏ភ្ញៀវមិនខ្វល់ដែរ។

មិនកត់ត្រាការចំណាយ

ទោះបីជាការចំណាយរបស់យើងតិចតួចប៉ុនណាក៏ដោយ ក៏គួរតែកត់ត្រាទុកដែរដើម្បីមើលថាវាចាំបាច់ ឬមិនចាំបាច់ ព្រោះការចំណាយតូចតាចទាំងនោះនៅពេលបូកបញ្ចូលគ្នាអាចក្លាយទៅជាការចំណាយធំមួយ។ នៅពេលយើងកត់ត្រាការចំណាយបានល្អ លុះចុងដល់ខែយើងអាចមើលថា ការចំណាយណាខ្លះដែលមិនសូវចាំបាច់ ដើម្បីកាត់បន្ថយការចំណាយប្រភេទនោះទៀតនៅខែក្រោយ។

បុគ្គលិកច្រើនពេក

អាជីវកម្មខ្លះបែងចែកមុខងារជាច្រើនក្នុងកន្លែងការងាររបស់ខ្លួន រួចក៏ជួលបុគ្គលិកច្រើននាក់តាមផ្នែកនីមួយៗ។ ការធ្វើបែបនេះនឹងកាត់បន្ថយផលិតភាពក្នុងការងារ ព្រោះពាក្យចាស់ពោលថា “គ្នាច្រើនអន្សមឆៅ” ដែលអាចធ្វើឲ្យបុគ្គលិកមិនចុះសម្រុងគ្នា រីឯការចំណាយទៅលើប្រាក់ខែក៏ច្រើន។ ក្នុងនាមជាម្ចាស់អាជីវកម្មបើគិតថា ខ្លួនជួលបុគ្គលិកមកដូចជាលើសពីតម្រូវការហើយ យើងអាចពិនិត្យមើលឡើងវិញថា តើមានផ្នែកណាខ្លះដែលអាចបង្រួមចូលគ្នាបាន ហើយចាប់ផ្ដើមជម្រុះបុគ្គលិកដែលលើសនោះចេញ។

ជួលគេមកពីក្រៅដើម្បីធ្វើការងារដែលអាចធ្វើខ្លួនឯងបាន

ការរកស៊ីជួញដូរនីមួយៗពិតជាពិបាក និងមានការងារជាច្រើនដែលត្រូវធ្វើដើម្បីដំណើរវាឲ្យការល្អទៅបាន។ ដើម្បីភាពងាយស្រួលម្ចាស់អាជីវកម្មមួយចំនួនចូលចិត្តហៅគេមកពីក្រៅសម្រាប់ធ្វើកិច្ចការធម្មតាមួយខ្លះដោយមិនព្រមធ្វើខ្លួនឯង ឬឲ្យបុគ្គលិករបស់ខ្លួនដែលចេះធ្វើ។ ជាការពិតការងារមួយចំនួនទៀត យើងចាំបាច់ត្រូវតែហៅអ្នកជំនាញមកពីក្រៅដើម្បីធ្វើវា ប៉ុន្ដែបើការងារដែលបុគ្គលិកយើងអាចធ្វើបានគួរតែឲ្យពួកគេជួយធ្វើដើម្បីកាត់បន្ថយចំណាយ៕

ប្រែសម្រួល៖ សន្យា

ប្រភព៖ Entrepreneur

ចុចអាន៖បង្កើតវប្បធម៌«ស្ដាប់បុគ្គលិកនិយាយ»បានប្រយោជន៍អីខ្លះ?

ចុចអាន៖ក្រុមហ៊ុនដែលភាន់ច្រឡំគ្នារវាង ទីផ្សារនិងផ្នែកលក់តែងតែបរាជ័យ! ហេតុអ្វី?

The post កំហុសនៃការចំណាយមួយចំនួនដែលថៅកែៗគួរចាប់អារម្មណ៍ appeared first on Kampuchea Thmey Daily.

វត្ថុ ៨ យ៉ាងទោះមានលុយវាល់លានក៏មិនអាចទិញបានដែរ

សាង ស្រីល័ក្ខ — Fri, 22 Jan 2021 07:35:41 +0000

លុយធ្វើឲ្យជីវិតកាន់តែងាយស្រួល។ លុយអាចទិញវត្ថុច្រើនយ៉ាងណាស់លើលោកនេះ។

ប៉ុន្តែមានរបស់មួយចំនួន ទោះបីមានលុយវាល់លានដុល្លារ ឬមាសទាំងក្រឡក៏ដោយ ក៏មិនអាចទិញបានដែរ។

១. ក្ដីស្រឡាញ់

លុយអាចទិញភាពទាក់ទាញ ទិញតណ្ហា តែមិនអាចទិញក្ដីស្រឡាញ់ទេ។ ស្នេហាបង្កប់ដោយភាពស្និទ្ធស្នាល ភាពស្មោះត្រង់ ការលះបង់ ដែលមានជម្រៅអាថ៌កំបាំងណាស់ ខណៈលុយមិនអាចវាស់ឡើយ។ លុយត្រឹមតែទិផលិតផលឬសេវាកម្មដោយផ្ដល់នូវផាសុកភាពនិងភាពប្រណីត ប៉ុន្តែអ្វីៗទាំងអស់នោះត្រឹមជាចំណែកតូចមួយដែលមនុស្សចង់បានប៉ុណ្ណោះ វាមិនអាចប្ដូរបាននូវការស្រឡាញ់ពិតឡើយ។

២. សេចក្ដីពិត

លុយអាចទិញឥទ្ធិពលនៃភាពក្លែងក្លាយឲ្យប្រែជាត្រឹមត្រូវចំពោះមនុស្សមួយចំនួន ប៉ុន្តែការពិតនៅតែជាការពិត ទោះប្រឹងបិទបាំង វាបានត្រឹមតែបំភ្លៃ គ្មានថ្ងៃអាចប្ដូរបានឡើយ។

៣. ពេលវេលា

រាល់នាទីដែលដើរទៅ មានតម្លៃណាស់ ព្រោះវាមិនត្រឡប់ថយក្រោយទេ។ មិនថា វិទ្យាសាស្ត្រឬវេជ្ជសាស្ត្រជឿនលឿនយ៉ាងណាក៏ដោយ ក៏គ្មានវិធីណាដែលអាចពន្យារអាយុជីវិតមនុស្សដូចអ្វីដែលគេចង់បាននោះដែរ។ រាល់បំណងដើម្បីពង្រីកជីវិតរបស់ខ្លួនសុទ្ធតែគ្មានប្រយោជន៍ ពីព្រោះជីវិតនឹងត្រូវបញ្ចប់នៅអាយុកំណត់មួយ។

លុយកាក់អាចទិញបានតែនាឡិកា តែមិនអាចទិញពេលឲ្យដើរយឺតឬលឿន ឬថយក្រោយបានឡើយ។

៤. សន្តិភាព

សន្តិភាពពិត កើតចេញពីផ្លូវចិត្តសុខសាន្ត។ គំនិតទទួលយករឿងអាក្រក់ នឹងប្រែក្លាយវាទៅជាបទពិសោធន៍អវិជ្ជមាន រីឯបុគ្គលគិតល្អៗ នឹងអាចទទួលបានសុភមង្គល។

ពលរដ្ឋនិងរដ្ឋាភិបាលក្នុងសង្គមខ្លះសុខចិត្តចំណាយលុយយ៉ាងច្រើនសន្ធឹកសន្ធាប់ដើម្បីទិញសន្តិភាព ប៉ុន្តែត្រូវចាំរឿងនេះថា សង្គ្រាមរមែងផ្ទុះចេញពីគំនិតរបស់មនុស្សដែលលោភ និងគំនិតមិនចុះសម្រុង។ ដូច្នេះទោះមានលុយប៉ុន្មានក៏មិនអាចទិញសន្តិភាពបានដែរ លើកតែមនុស្សបើកចិត្តទូលាយប៉ុណ្ណោះ។

៥. ទេពកោសល្យ

ទេពកោសល្យពីកំណើតនិងសមត្ថភាពរបស់បុគ្គលម្នាក់ មានតម្លៃមិនអាចកាត់ថ្លៃបានទេ។ លុយអាចជួយអភិវឌ្ឍទេពកោសល្យ ប៉ុន្តែមិនអាចទិញយកទៅបញ្ចូលក្នុងខ្លួនអ្នកដទៃបានឡើយ។

៦. សុខភាព

មានលុយអាចទិញអ្នកថែទាំសុខភាពនិងថ្នាំផ្សេងៗ ប៉ុន្តែនៅពេលសុខភាពធម្មជាតិ បាត់បង់ វានឹងមិនអាចជំនួសទេ។ ផ្ទុយទៅវិញសកម្មភាពបង្ការពិតប្រាកដគឺ ការធ្វើលំហាត់ប្រាណ និងការថែរក្សាខ្លួនឯងដោយទទួលទានអាហារល្អៗ។ ដូចនេះ អ្នករាល់គ្នាគួរបញ្ឈប់ទង្វើបំផ្លាញខ្លួនឯងតទៅទៀត ព្រោះពេលអ្នកឈឺដល់កម្រិត ទោះមានគ្រូពេទ្យទេវតា ក៏ពិបាកជួយដែរ។

៧. មិត្តពិត

ពេលមានទ្រព្យសម្បត្តិច្រើន ច្បាស់ណាស់ថាអាចទាក់ទាញមនុស្សឲ្យចង់ធ្វើជាមិត្តរបស់យើង ប៉ុន្តែតើមានមនុស្សប៉ុន្មាននាក់ដែលនឹងក្លាយជាមិត្តពិត? ដូចគ្នានឹងស្រឡាញ់ដែរ ទោះមានលុយវាល់លានមែន តែមិនអាចទិញមិត្តភាពពិតបាននោះឡើយ។

៨. ចំណេះដឹង

មិនខុសគ្នានឹងទេពកោលសល្យប៉ុន្មានដែរ ចំណេះដឹងអាចប្រើដើម្បីរកលុយ ហើយលុយក៏អាចជួលមនុស្សចេះដឹងឲ្យធ្វើការ ប៉ុន្តែគេពិតជាមិនអាចទិញចំណេះដឹងរបស់បុគ្គលម្នាក់ទៅជំនួសឲ្យបុគ្គលម្នាក់ទៀតដែលមិនបានរៀនសូត្រសោះឲ្យចេះដឹងដែរនោះឡើយ។ បើលុយពិតជាអាចទិញចំណេះបានមែន ម្លេះសមអ្នកមានៗមិនចាំបាច់បញ្ជូនកូនទៅសាលាទេ ពួកគេរង់ចាំតែទិញវាទុកជាការស្រេចបាត់ទៅហើយ។

ចំណេះដឹងមានតម្លៃមិនអាចកាត់ថ្លៃបានឡើយ ហើយសមត្ថភាពក្នុងការប្រើប្រាស់វាឲ្យត្រឹមត្រូវ នោះពិតជាអាចបង្កើតលុយមហាសាលបាន៕

ប្រែសម្រួល៖ សន្យា

ប្រភព៖ Useful Gen

ចុចអាន៖ស្ត្រី ដែលអាចបង្កើតម៉ាកយីហោដោយជោគជ័យ ទាំងខ្លួនមានជំងឺប្រចាំកាយ

ចុចអាន៖កំពូលអ្នកបង្ហាញម៉ូដស៊ីថ្លៃជាងគេក្នុងលោកជាអ្នកណា?

The post វត្ថុ ៨ យ៉ាងទោះមានលុយវាល់លានក៏មិនអាចទិញបានដែរ appeared first on Kampuchea Thmey Daily.

ស្មុគស្មាញរឿងប្រាក់កាក់បន្ទាប់ពីរៀបការរួចមែនទេ? អនុវត្តវិធីនេះភ្លាម!

សាង ស្រីល័ក្ខ — Wed, 20 Jan 2021 03:45:25 +0000

រៀបការគឺជាពេលវេលាដ៏រំភើបសម្រាប់គូស្នេហ៍។ ប៉ុន្តែមានផលវិបាកខ្លះ សម្រាប់អាពាហ៍ពិពាហ៍ថ្មីថ្មោង ដូចជាការសម្របខ្លួនរស់នៅជាមួយគ្នា និងទម្លាប់ផ្ទះរៀងៗខ្លួន។ ចំណែករឿងមួយទៀតដែលពិបាកនិយាយបន្តិច គឺហិរញ្ញវត្ថុក្នុងគ្រួសារ។

នៅក្នុងអត្ថបទនេះយើងនឹងចែករំលែកជាមួយអ្នក នូវគន្លឹះល្អៗ អំពីការធ្វើផែនការហិរញ្ញវត្ថុ សម្រាប់អ្នកដែលទើបរៀបការហើយ។

១. និយាយអំពីហិរញ្ញវត្ថុទល់មុខគ្នា

ដើម្បីទទួលបានសុភមង្គលក្នុងគ្រួសារ ប្ដីប្រពន្ធត្រូវតែមានឆន្ទៈបើកចំហពីហិរញ្ញវត្ថុរៀងខ្លួន។ វាពិតជាមានប្រយោជន៍ណាស់ ការដែលនិយាយអំពីទម្លាប់ចំណាយនិងសន្សំរបស់យើង និងរបៀបដែលយើងធំឡើងក្នុងការមើលប្រាក់របៀបម៉េច។
សម្រាប់កាលៈទេសៈខ្លះបំណុលរបស់យើងក្នុងនាមជាប្ដីប្រពន្ធ ត្រូវតែជាបំណុលរួមគ្នា បន្ទាប់ពីរៀបការរួច។

២. រកមើលប្រព័ន្ធគ្រប់គ្រងប្រាក់

តើដំបូន្មានហិរញ្ញវត្ថុអ្វី ដែលយើងធ្វើតាមទាក់ទងនឹងការគ្រប់គ្រងប្រាក់ ឬយើងចង់ទុកគណនីធនាគារដាច់ដោយឡែកពីគ្នា? មានគុណសម្បត្តិនិងគុណវិបត្តិក្នុងការមានគណនីធនាគាររួមគ្នា ទល់នឹងការរក្សារបស់របរដាច់ដោយឡែកពីគ្នា។

ប្ដីប្រពន្ធត្រូវការស្វែងយល់ថា តើមួយណាល្អបំផុតសម្រាប់គ្រួសារ។ ប្រសិនបើសម្រេចចិត្តរក្សាគណនីនិងប្រាក់ចំណូលដាច់ដោយឡែក យើងត្រូវសម្រេចថាតើនឹងបែងចែកវិក្កយបត្រ ប្រាក់កម្ចីទិញផ្ទះ ធានារ៉ាប់រងនិងការបង់ប្រាក់ប្រចាំខែផ្សេងៗទៀត សម្រាប់គេហដ្ឋានអាពាហ៍ពិពាហ៍របស់អ្នកយ៉ាងដូចម្ដេច។

៣. គិតលើប្រាក់ចំណាយថវិកាប្រចាំខែ

ដើម្បីឲ្យមានការរួមបញ្ចូលគ្នានៃហិរញ្ញវត្ថុប្រកបដោយជោគជ័យ ត្រូវសម្រេចចិត្តគិតគូលើថវិកាប្រចាំខែ។ កត់ចំណាំនូវប្រាក់ចំណូលប្រចាំខែរួមគ្នា ក៏ដូចជាបញ្ជីនៃការចំណាយប្រចាំខែរបស់អ្នក។ ដូចជាគ្រឿងទេស ហ្គាស និងអាហារហូបចុកផ្សេៗ ហើយយកមកផ្គូផ្គងលើប្រាក់ប្រចាំខែរបស់អ្នកទាំងពីរ។

បន្ទាប់ពីកាត់ការចំណាយប្រចាំខែរួច គឺដល់វេនរបៀបបែងចែករបបដែលនៅសល់ម្ដង។

៤. បម្រុងទុកប្រាក់សម្រាប់គ្រាអាសន្ន

យើងមិនដឹងថាពេលណាមានអាសន្នឡើយ រឿងអាក្រក់មិនអាចមើលឃើញទុកជាមុន ដូចជាជំងឺ គ្រោះមហន្តរាយធម្មជាតិ ការជួសជុលផ្ទះ ឬការបាត់បង់ការងារភ្លាមៗ នឹងប៉ះពាល់ដល់ប្រាក់ចំណូលគ្រួសារ។ ការដែលយើងមានប្រាក់សន្សំសម្រាប់ការរំពឹងទុក នឹងជួយប្ដីប្រពន្ធមានអារម្មណ៍សុវត្ថិភាពអំពីអនាគតក្នុងគ្រួសារ។

៥. រក្សាការប្រាស្រ័យទាក់ទងដោយបើកចំហ

ត្រូវប្រាកដថាគ្រប់គ្នាបានអនុវត្តការប្រាស្រ័យទាក់ទងគ្នាដោយបើកចំហ ហើយមិនត្រូវខ្មាសអៀន ក្នុងការនិយាយជាមួយដៃគូពីបញ្ហាប្រាក់កាក់ឡើយ។

ការដែលយើងត្រួតពិនិត្យប្រាក់ប្រចាំខែរបស់គ្នារៀងៗខ្លួន ក៏ជាឱកាសមួយដើម្បីមើលប្រាក់ចូលនិងចេញពីក្រុមគ្រួសារ។

វាអាចជួយបញ្ជាក់ពីតំបន់ណាមួយដែលយើងបានប្រើប្រាស់ប្រាក់ និងអាចកែលំអប្រសិនបើប្រើប្រាក់ខ្ជះខ្ជាយ៕

ប្រែសម្រួល៖ សាង ស្រីល័ក្ខ

ចុចអាន៖មេរៀនពីសហគ្រិនហ្វីលីពីនដែលតស៊ូបង្កើតយីហោហាងអាហារសម្រន់តតាំងជាមួយប្រេនបរទេស

ចុចអាន៖មកពិនិត្យសិក្សាលើបរាជ័យធំៗរបស់មហាសេដ្ឋី Bill Gates វិញម្តង

The post ស្មុគស្មាញរឿងប្រាក់កាក់បន្ទាប់ពីរៀបការរួចមែនទេ? អនុវត្តវិធីនេះភ្លាម! appeared first on Kampuchea Thmey Daily.

ប្រវត្តិធំៗ ៥ យ៉ាងអំពីលោហធាតុ «ប្រាក់»

សាង ស្រីល័ក្ខ — Fri, 25 Dec 2020 07:25:26 +0000

ប្រាក់ជាលោហធាតុកម្រមួយក្នុងចំណោមវត្ថុមានតម្លៃនានារបស់ពិភពលោក។ លោហធាតុនេះមិនត្រូវបានប្រើប្រាស់ច្រើននោះទេ និងមានរឿងរ៉ាវជាច្រើនដែលមិនសូវមានអ្នកដឹងអំពីវា។

នៅក្នុងវិទ្យសាស្ត្រ ប្រាក់ជាអង្គធាតុគីមីមាននិមិត្តសញ្ញា Ag និងលេខអាតូម ៤៧ ។ ផ្ទុយពីវិទ្យាសាស្ត្រ ជនជាតិភាគតិចអាហ្វ្រិកដើមជឿថា ប្រាក់បានមកពីទឹកភ្នែករបស់ព្រះចន្ទ ហើយមាសជាញើសនៃព្រះអាទិត្យ ។

ចំណែកខាងក្រោមនេះ ជាការពិត ៥ យ៉ាងលាក់ពីក្រោយប្រាក់ដែលមិនសូវមានអ្នកដឹង៖

១. មនុស្សប្រើប្រាស់ប្រាក់តាំងពី ៣០០០ ឆ្នាំមុនគ្រិស្តសករាជ

កំណត់ត្រាបុរាណវិទ្យាបង្ហាញថា មនុស្សបានជីកនិងប្រើប្រាក់យ៉ាងហោចណាស់ ៥០០០ ឆ្នាំមកហើយ ទល់នឹងបច្ចុប្បន្ននេះ។ គំនរដានប្រាក់ត្រូវបានរកឃើញនៅអណ្តូងរ៉ែប្រទេសទួរគី និងក្រិក។ រីឯរ៉ែប្រាក់ត្រូវបានរកឃើញក្នុងប្រទេសចិន កូរ៉េ ជប៉ុន និងអាមេរិកខាងត្បូង។

ភាពកម្ររបស់ប្រាក់ផ្តល់ឲ្យវានូវតម្លៃដ៏ខ្ពស់។ ក្នុងនោះក្រុង Athens របស់ក្រិកបុរាណបានប្រើកាក់ប្រាក់ជំនួសដុំមាសក្នុងការដោះដូរទំនិញ។

២. ប្រាក់ចម្លងចរន្តអគ្គិសនីបានល្អជាងលោហធាតុផ្សេងទៀត

ក្នុងចំណោមលោហធាតុទាំងអស់ ប្រាក់ជាអ្នកចម្លងកម្ដៅនិងអគ្គិសនីល្អបំផុត។ ដូច្នេះវាត្រូវបានប្រើក្នុងតម្រូវការជាច្រើន។ ដែកផ្សារ គ្រឿងបន្លាស់អគ្គិសនី បន្ទះសៀគ្វី បន្ទះពុម្ពព្រីន និងអាគុយ សុទ្ធតែធ្វើពីប្រាក់។ ប៉ុន្តែដោយវាថ្លៃពេក នៅក្នុងខ្សែភ្លើងអគ្គីសនីគេប្រើស្ពាន់ជំនួសវិញ។

៣. ការថតរូបដំបូង ធ្វើឡើងរវាងប្រតិកម្មរបស់ប្រាក់និងពន្លឺព្រះអាទិត្យ

នៅទសវត្សឆ្នាំ ១៧២០ រូបវិទូជនជាតិអាល្លឺម៉ង់ឈ្មោះ Johann Heinrich Schulze បានបង្កើតរូបភាពដំបូងជាមួយប្រាក់។ អ្នករូបវិទ្យារូបនេះ បានរកឃើញថា បំណែកដីសមួយដុំដែលធ្លាក់ក្នុងនីត្រាតប្រាក់នឹងប្រែទៅជាខ្មៅ នៅពេលដែលប៉ះនឹងពន្លឺព្រះអាទិត្យ បង្កើតបានរូបភាពនៅលើបន្ទះលោហៈ។

មួយសតវត្សរ៍ក្រោយមក វិចិត្រករបារាំង Louis-Jacques-Mandé Daguerre បានបង្កើតការព្រីនរូបថតនៅលើបន្ទះស្ពាន់ធ្វើពីប្រាក់។ ទន្ទឹមនឹងនេះអ្នកវិទ្យាសាស្ត្រអង់គ្លេស William William Fox Talbot បានបង្កើតវិធីសាស្រ្តបង្ហាញរូបភាពនៅលើក្រដាសអ៊ីយ៉ូដប្រាក់ដែលមានជាតិអាស៊ីត gallic ។

បច្ចុប្បន្ន អ៊ីយ៉ូដប្រាក់នៅតែត្រូវបានប្រើដើម្បីបង្ហាញរូបភាពមានគុណភាពខ្ពស់ក្នុងការថតកុន និងថតរូប។

៤. ប្រាក់មានលក្ខណៈសម្បត្តិអាចប្រឆាំងនឹងមេរោគ

យោងតាមរបាយការណ៍ត្រួតពិនិត្យឆ្នាំ ២០០៩ ប្រាក់ជាឧបករណ៍ប្រឆាំងនឹងអតិសុខុមប្រាណដ៏សំខាន់មួយ មុនពេលគេរកឃើញថ្នាំអង់ទីប៊ីយ៉ូទិក ទំនើបនាទសវត្សឆ្នាំ ១៩៤០ ។

អ្នកស្រុកម៉ាសេដូន ប្រទេសក្រិកនាសម័យបុរាណប្រើបន្ទះប្រាក់ដើម្បីវះកាត់របួស ខណៈដែលគ្រូពេទ្យនៅសង្គ្រាមលោកលើកទី ១ បានប្រើប្រាក់ដើម្បីការពារការឆ្លងមេរោគពេលរងរបួសនៅសមរភូមិ។

ប្រាក់អាចសម្លាប់បាក់តេរី ប៉ុន្តែបើត្រូវបានប្រើប្រាស់ក្នុងបរិមាណច្រើនជ្រុល មនុស្សក៏អាចប៉ះពាល់ដែរ។ ប្រាក់ច្រើនពេកក្នុងរាងកាយអាចបណ្តាលឲ្យស្បែកប្រែទៅជាពណ៌ប្រផេះឬខៀវជារៀងរហូត នេះក៏ព្រោះតែប្រតិកម្មប្រាក់ជាមួយនឹងពន្លឺ។

ការសិក្សាឆ្នាំ ២០១៣ លើវេជ្ជសាស្ត្របានបង្ហាញថា ប្រាក់ធ្វើឲ្យកោសិកាបាក់តេរីងាយនឹងបែកខ្ញែក។ ប្រសិនបើដាក់ប្រាក់ចំនួនតិចតួចផ្សំក្នុងថ្នាំអង់ទីប៊ីយ៉ូទិកក៏ដោយ ក៏អាចសម្លាប់បាក់តេរីបានពី ១០-១០០០ ដងខ្លាំងជាងថ្នាំដែលគ្មានសារធាតុលោហៈនេះ។

៥. អ៊ីយ៉ូដប្រាក់ជួយធ្វើឲ្យមានភ្លៀង

នៅពេលដែលតំបន់នានាត្រូវការទឹកភ្លៀង បន្ទាប់ពីគ្រោះរាំងស្ងួតយូរ អ្នកវិទ្យាសាស្ត្រអាចបង្កើត “ពពក” ដោយបាញ់អ៊ីយ៉ូដប្រាក់ចូលទៅក្នុងបរិយាកាស។

នៅទសវត្សឆ្នាំ ១៩៤០ លោក Bernard Vonnegut បានបង្ហាញនៅក្នុងមន្ទីរពិសោធន៍ថា អ៊ីយ៉ូដប្រាក់ធ្វើឲ្យម៉ូលេគុលទឹកអាចបង្កក នឹងនាំទៅរករបបទឹកភ្លៀងនៅក្នុងទំរង់បែបព្រិល។

ដោយឡែកការសិក្សាឆ្នាំ ២០១៨ អ្នកស្រាវជ្រាវមកពីសាកលវិទ្យាល័យ Colorado និងស្ថាប័នផ្សេងទៀតបានពិសោធន៍រឿងនេះដូចគ្នា។ ពួកគេបានបញ្ជូនយន្តហោះចំនួនពីរគ្រឿងទៅលើអាកាស មួយដើម្បីបាញ់អ៊ីយ៉ូដប្រាក់ និងមួយទៀតដើម្បីតាមដានទិសដៅរបស់វានិងវាស់របបទឹក។ លទ្ធផលឃើញថា អ៊ីយ៉ូដប្រាក់ ពិតជាអាចបង្កកទឹកក្នុងពពកបានពិតមែន៕

ប្រែសម្រួល៖ សន្យា

ប្រភព៖ MENTAL FLOSS

ចុចអាន៖ទំនោរសង្គមដែលចង់ជោគជ័យហួសហេតុពេក មនុស្សក្លាយជាបរាជ័យជាមួយបីយ៉ាងនេះ

The post ប្រវត្តិធំៗ ៥ យ៉ាងអំពីលោហធាតុ «ប្រាក់» appeared first on Kampuchea Thmey Daily.

ការចំណាយប្រាក់ខ្ជះខ្ជាយក្នុងជីវិតដែលគ្រប់គ្នាគួរផ្លាស់ប្ដូរ

សាង ស្រីល័ក្ខ — Sat, 27 Jun 2020 08:50:42 +0000

ពិភពលោកកំពុងតែទទួលឥទ្ធិពលពីជំងឺរាតត្បាត វាមិនត្រឹមប៉ះពាល់ដល់សុខភាពរាងកាយនិងផ្លូវចិត្ត តែមួយប៉ុណ្ណោះទេ តែវាក៏បានជះឥទ្ធិពលដល់ហិរញ្ញវត្ថុ និងសេដ្ឋកិច្ចរបស់យើងផងដែរ។

ក្នុងគ្រាលំបាកនេះ ប្រាក់ពិតជាសារៈសំខាន់ណាស់ ដូច្នេះហើយត្រូវធ្វើការសម្រេចចិត្តឲ្យច្បាស់ មុនចង់ទិញអ្វីតាមចិត្ត។

ខាងក្រោមនេះ គឺការចំណាយឥតប្រយោជន៍ ទៅលើរបស់ដែលមិនចាំបាច់មួយចំនួន ៖

១. ទិញឆ្នោត

ឆ្នោតគឺជាល្បែងមួយដែលបំផ្លាញប្រាក់របស់យើង វាឲ្យយើងសប្បាយ តែក៏ជាល្បែងដែលគ្រោះថ្នាក់។ ទោះជាយ៉ាងណាក៏ដោយ ហាងឆេងពិតប្រាកដនៃការឈ្នះ ទល់នឹងការចំណាយសក្ដានុពលនេះ គឺមិនច្បាស់លាស់នោះទេ។ វាជាការចំណាយឥតប្រយោជន៍ និងខ្ជះខ្ជាយបំផុតក្នុងកាលៈទេសៈនេះ។

២. កាស៊ីណូអនឡាញនិងការភ្នាល់

ការលេងល្បែងភ្នាល់បាល់ ឬល្បែងស៊ីសងផ្សេងៗ សុទ្ធតែជាការបំផ្លាញប្រាក់ទាំងអស់។ យ៉ាងណាមិញ អ្នកចូលចិត្តលេងល្បែង ហើយអាចមានឱកាសឈ្នះធំ ប៉ុន្តែផ្នែកហិរញ្ញវត្ថុ របស់អ្នក អាចនឹងបាត់បង់ទៅដូចគ្នា។

ចងចាំថា កាស៊ីណូគឺជាអាជីវកម្មដែលទទួលបានប្រាក់ចំណេញ គួរឱ្យស្អប់ខ្ពើមបំផុត។

៣. ចំណាយការធ្វើដំណើរថ្លៃៗ

ការធ្វើដំណើរ ទោះបីអន្តរជាតិឬក្នុងស្រុកក៏ដោយ មានតម្លៃថ្លៃណាស់។ ដូចជាការហោះហើរ កក់សណ្ឋាគារ រថភ្លើង អាហារនិងភេសជ្ជៈ រួមទាំងព្រឹត្តិការណ៍នៃការទាក់ទាញណាមួយ តាមប្រទេសដែលអ្នកទៅ។ នេះគឺសុទ្ធតែជាអ្វី ដែលអ្នកចំណាយច្រើនជាងគេ។

ដូច្នេះបើសិនជាអ្នកអាចរៀបចំផែនការជាមុន និងរៀបចំអ្វីមួយ ដើម្បីទទួលទាននៅផ្ទះអាចជួយអ្នកសន្សំសំចៃក្នុងរយៈពេលវែង ជាពិសេសបើអ្នកធ្វើដំណើរចេញក្រៅញឹកញាប់។

៤. អាហារពេលល្ងាចតាមហាងទំនើបៗ

នៅតាមផ្សារទំនើប ពោរពេញទៅដោយអាហារដែលបានរៀបចំរួចហើយ។ មនុស្សជាច្រើនបានទិញរបស់អស់នោះមានស្រាប់ព្រោះតែខ្ជិលធ្វើ។

ប្រសិនបើអ្នកយកចិត្តទុកដាក់ក្នុងការសន្សំប្រាក់ខ្លះ ដូចជាចូលខ្លួនទៅក្នុងផ្ទះបាយធ្វើម្ហូប ជំនួសឲ្យការទិញអាហារស្រាប់ៗតាមហាងដែលលក់ទំនិញថ្លៃៗ។

៥. ថ្លៃសេវាលើសកំណត់ផ្សេងៗ

ថ្លៃសេវាលើសកំណត់ផ្សេងៗដែលមាន គឺកាតឥណទាន ថ្លៃទូរទស្សន៍ អ៊ីនធឺណិត អគ្គិសនី និងទូរស័ព្ទជាដើម។ មិនថាសេវាបែបណាឡើយ វាសុទ្ធតែរួមចំណែកក្នុងការបំផ្លាញប្រាក់យើងដោយឥតដឹងខ្លួន៕

ប្រែសម្រួល៖ សាង ស្រីល័ក្ខ

ចុចអាន៖៣យ៉ាងគួរធ្វើ បើសិនបណ្ដាញសង្គមធ្វើឲ្យយើងឈឺចាប់ព្រោះរឿងដែលមិនចង់ឃើញ

ចុចអាន៖ទម្លាប់ខ្លះ ដែលប្រៀបដូចកំពុងដុតកម្ទេចចោលចំណូលដែលរកបានដោយពិបាក

The post ការចំណាយប្រាក់ខ្ជះខ្ជាយក្នុងជីវិតដែលគ្រប់គ្នាគួរផ្លាស់ប្ដូរ appeared first on Kampuchea Thmey Daily.