ប្រេងឆៅអន្តរជាតិ Archives - Kampuchea Thmey Daily

ច្រកសមុទ្រ Hormuz សំខាន់យ៉ាងណាសម្រាប់ដឹកប្រង និងឧស្ម័នទៅកាន់ពិភពលោក?

Minea Neu — Tue, 03 Mar 2026 10:38:05 +0000

តម្លៃប្រេងបានកើនឡើងចាប់ពីថ្ងៃចន្ទក្រោយការផ្ទុះការប្រយុទ្ធនៅអ៊ីរ៉ង់ ខណៈសង្គ្រាមកាន់តែរីករាលដាលក្នុងប្រទេសអ៊ីរ៉ង់ និងទៅប្រទេសជុំវិញក្នុងតំបន់ រំខានដល់កប៉ាល់ដឹកប្រេងឆ្លងកាត់ច្រកសមុទ្រហ័រមូស ( Hormuz) បង្ហាញពីសារៈសំខាន់នៃច្រកសមុទ្រនេះ ចំពោះការផ្គត់ផ្គង់ប្រេងរបស់ពិភពលោក។

ច្រកសមុទ្រ Hormuz គឺជាមាត់សមុទ្រតូចចង្អៀតនៃឈូងសមុទ្រពែរ្ស៍ ដែលប្រេងប្រហែលមួយភាគប្រាំរបស់ពិភពលោកត្រូវឆ្លងកាត់។

កប៉ាល់ដឹកប្រេងនៅច្រកសមុទ្រ Hormuz ។ រូបភាព៖ Reuters

នាវាដឹកប្រេងធ្វើដំណើរឆ្លងកាត់ច្រកសមុទ្រនេះ មានព្រំប្រទល់ជាប់ភាគខាងជើងជាមួយអ៊ីរ៉ង់ អារ៉ាប៊ីសាអូឌីត គុយវ៉ែត អ៊ីរ៉ាក់ កាតា បារ៉ែន អារ៉ាប់រួម និងអ៊ីរ៉ង់។ ប្រេងភាគច្រើននាំទៅកាន់អាស៊ី។

គួរបញ្ជាក់ថា ការរំខានណាមួយចំពោះចរាចរណ៍ឆ្លងកាត់ច្រកសមុទ្រ Hormuz គឺជាការរំខានយ៉ាងខ្លាំងដល់ពាណិជ្ជកម្មប្រេង។

លោក Hakan Kaya អ្នកគ្រប់គ្រងផលប័ត្រជាន់ខ្ពស់នៅក្រុមហ៊ុនគ្រប់គ្រងការវិនិយោគ Neuberger Berman លើកឡើងថា៖ « ទំហំនៃអ្វីដែលកំពុងប្រឈមមិនអាចនិយាយបំផ្លើសបានទេ។ ការធ្លាក់ចុះដោយផ្នែក មានរយៈពេលមួយឬពីរសប្តាហ៍អាចត្រូវទាញយកដោយក្រុមហ៊ុនប្រេង»។

លោកបន្តថា៖ «ប៉ុន្តែការបិទទ្វារទាំងស្រុង ឬស្ទើរតែទាំងស្រុងដែលមានរយៈពេលមួយខែ ឬច្រើនជាងនេះ នឹងជំរុញឱ្យតម្លៃប្រេងឆៅមានតម្លៃជួញដូរប្រហែល ៧០ដុល្លារនៅថ្ងៃចន្ទ កើនឡើងដល់បីខ្ទង់ និងតម្លៃឧស្ម័នធម្មជាតិអឺរ៉ុបឆ្ពោះទៅខ្ពស់ជាងកម្រិតវិបត្តិដែលបានឃើញក្នុងឆ្នាំ ២០២២»។

គួរឱ្យដឹងថា ច្រកសមុទ្រហ័រមូសគឺជាផ្លូវតូចចង្អៀតមួយមានឥទ្ធិពលលើពិភពលោកយ៉ាងខ្លាំង។ វាជាចំណុចសំខាន់ក្នុងការផ្គត់ផ្គង់ថាមពលភាគច្រើនរបស់ពិភពលោកត្រូវតែហូរឆ្លងកាត់ ហើយការរំខានណាមួយនឹងជះឥទ្ធិពលអាក្រក់ដល់ទីផ្សារអន្តរជាតិ។

តាមប្រវត្តិសាស្ត្រ ច្រកសមុទ្រនេះគឺជាផ្លូវពាណិជ្ជកម្មសម្រាប់ទំនិញដូចជាសេរ៉ាមិច ភ្លុកដំរី សូត្រ និងវាយនភណ្ឌដែលដឹកជញ្ជូនពីប្រទេសចិន និងប្រទេសមួយចំនួនទៀតនៅអាស៊ី។

យ៉ាងណា សព្វថ្ងៃនេះវាត្រូវបានគ្របដណ្ដប់ដោយកប៉ាល់ដឹកប្រេងឆៅ និងឧស្ម័នធម្មជាតិរាវ។

ចំណែកការរំខាន មិនថាមកពីជម្លោះយោធា ការបិទផ្លូវ ឬសូម្បីតែការបិទផ្លូវជាបណ្ដោះអាសន្ន ក៏បណ្តាលឱ្យមានការកើនឡើងម្តងហើយម្តងទៀតនៃតម្លៃថាមពលជាសកល។

ការវាយប្រហាររបស់សហរដ្ឋអាមេរិកនិងអ៊ីស្រាអែលបានធ្វើឱ្យកប៉ាល់ដឹកប្រេងរាប់សិបគ្រឿងជាប់គាំង នៅក្នុងឈូងសមុទ្រពែរ្ស និងបង្ខំឱ្យកប៉ាល់ផ្សេងទៀតរង់ចាំនៅខាងក្រៅ ដែលបង្ហាញពីភាពផុយស្រួយ និងសារៈសំខាន់នៃផ្លូវឆ្លងកាត់នេះ៕

ប្រែសម្រួល៖ ណឺ មិនា

The post ច្រកសមុទ្រ Hormuz សំខាន់យ៉ាងណាសម្រាប់ដឹកប្រង និងឧស្ម័នទៅកាន់ពិភពលោក? appeared first on Kampuchea Thmey Daily.

តម្លៃប្រេងកើនជិត ២ ភាគរយ ពេលបញ្ចប់ការជួញដូរ ជុំវិញបញ្ហាពន្ធ

Huon Dina — Tue, 11 Feb 2025 02:37:00 +0000

តម្លៃប្រេងបានកើនឡើងជិត ២ ភាគរយ ពេលបញ្ចប់ការជួញដូរកាលពីថ្ងៃចន្ទ បន្ទាប់ពីការធ្លាក់ចុះ ៣ សប្តាហ៍ជាប់ៗគ្នា ទោះបីមានការព្រួយបារម្ភថា ប្រធានាធិបតីអាមេរិក លោក ដូណាល់ ត្រាំ អាចបំផ្ទុះសង្រ្គាមសកលជាមួយនឹងគោលនយោបាយពន្ធរបស់លោកក៏ដោយ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងឆៅនាពេលអនាគត ម៉ាក Brent បានកើនឡើង ១,២១ ដុល្លារ ឬ ១,៦ ភាគរយ ដោយបញ្ចប់ការជួញដូរនៅតម្លៃ ៧៥,៨៧ ដុល្លារ/បារ៉ែល។ ចំណែកឯប្រេងឆៅអាមេរិក ម៉ាក West Texas Intermediate (WTI) បានកើនឡើង ១,៣២ ដុល្លារ ឬ ១,៩ ភាគរយ ដោយបញ្ចប់ការជួញដូរនៅតម្លៃ ៧២,៣២ ដុល្លារ/បារ៉ែល។

កំណើននេះ កើតឡើងក្រោយប្រេងឆៅអន្តរជាតិទាំង២ម៉ាក បានធ្លាក់ចុះប្រមាណ ២,៨ ភាគរយ ក្នុងអត្រាប្រចាំសប្ដាហ៍ កាលពីសប្ដាហ៍មុន ដោយសារតែសម្ពាធជុំវិញការព្រួយបាម្ភពាណិជ្ជកម្មសកល។

អ្នកវិភាគរបស់ក្រុមហ៊ុនប្រឹក្សាយោបលទីផ្សារ Onyx Capital លោក Harry Tchilinguiran បាននិយាយថា៖ «ភាពមិនប្រាកដប្រជាអំពីពន្ធគយ ជំរុញអ្វីៗគ្រប់យ៉ាង។ វាធ្វើឱ្យមនុស្សមានការប្រុងប្រយ័ត្នជាងមុន ហើយថែមទាំងប៉ះពាល់ដល់តម្លៃប្រេងផងដែរ។ បន្ទាប់ពីតម្លៃប្រេងធ្លាក់ចុះកាលពីសប្តាហ៍មុន មនុស្សមួយចំនួនអាចនឹងទិញវាវិញហើយឥឡូវនេះ»។

គួរបញ្ជាក់ថា លោក ត្រាំ បានប្រកាសកាលពីថ្ងៃចន្ទអំពីផែនការដំឡើង«ពន្ធសងសឹក» ទៅលើប្រទេសផ្សេងទៀត ដែលដាក់ពន្ធលើទំនិញរបស់សហរដ្ឋអាមេរិក ដែលអាចទាក់ទាញការសងសឹងទៅវិញទៅមកកាន់តែខ្លាំង ពីប្រទេស គោលដៅ។ កាលពីជាងមួយសប្ដាហ៍មុន លោកបានប្រកាសពន្ធលើកាណាដា ម៉ិកស៊ិក និងចិន ប៉ុន្តែបានព្យួរពន្ធទាំងនោះរយៈពេល ៣០ ថ្ងៃសិន។

ជាទូទៅ វិធានការពន្ធអាចបង្អាក់កំណើនសេដ្ឋកិច្ចពិភពលោក ហើយធ្វើឱ្យតម្រូវការប្រេងខ្សោយ រួមចំណែកដល់ការធ្លាក់ចុះនៃតម្លៃប្រេង៕

The post តម្លៃប្រេងកើនជិត ២ ភាគរយ ពេលបញ្ចប់ការជួញដូរ ជុំវិញបញ្ហាពន្ធ appeared first on Kampuchea Thmey Daily.

ប្រេងឆៅអន្តរជាតិ Archives - Kampuchea Thmey Daily

ច្រកសមុទ្រ​ Hormuz ​សំខាន់យ៉ាងណាសម្រាប់​ដឹក​ប្រង ​និង​ឧស្ម័ន​​​ទៅកាន់​​ពិភពលោក?​

តម្លៃប្រេងកើនជិត ២ ភាគរយ ពេលបញ្ចប់ការជួញដូរ ជុំវិញបញ្ហាពន្ធ

ច្រកសមុទ្រ Hormuz សំខាន់យ៉ាងណាសម្រាប់ដឹកប្រង និងឧស្ម័នទៅកាន់ពិភពលោក?