ប្រេង Archives - Kampuchea Thmey Daily

តម្លៃប្រេងអន្តរជាតិ ធ្លាក់ចុះធ្ងន់ម្សិលមិញ ក្រោយ ត្រាំ ប្រកាសពន្ធ

Huon Dina — Fri, 04 Apr 2025 04:20:40 +0000

តម្លៃប្រេងអន្តរជាតិ បានធ្លាក់ចុះក្នុងអត្រាធំបំផុតក្នងរយៈពេលត្រឹម១ថ្ងៃ សម្រាប់ការជួញដូរកាលពីថ្ងៃព្រហស្បតិ៍ ក្រោយប្រធានាធិបតីអាមេរិក ដូណាល់ ត្រាំ បានប្រកាសពន្ធឆ្លើយតបឱ្យស្មើគ្នា ដែលបង្កើនកង្វល់ស្ដីពីវិបត្តិសេដ្ឋកិច្ច។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងនាពេលអនាគត ម៉ាក Brent បានធ្លាក់ចុះ ៤,៨១ ដុល្លារ ឬ ៦,៤២ ភាគរយ ដោយជួញដូរនៅតម្លៃ ៧០,១៤ ដុល្លារ/បារ៉ែល ខណៈតម្លៃប្រេងឆៅនាពេលអនាគតអាមេរិក ម៉ាក West Texas Intermediate (WTI) វិញ បានបញ្ចប់ការជួញដូរនៅតម្លៃ ៦៦,៩៥ ដុល្លារ/បារ៉ែលដោយធ្លាក់ចុះ ៤,៧៦ ដុល្លារ ឬ ៦,៦៤ ភាគរយ។

វាគឺជាការធ្លាក់ចុះធំធ្ងន់បំផុតរាប់តាំងពីខែសីហា ឆ្នាំ ២០២២ សម្រាប់ប្រេងម៉ាក Brent និងតាំងពីខែកក្កដា ២០២២ សម្រាប់ប្រេងម៉ាក WTI។

តម្លៃប្រេងទាំង២ បានធ្លាក់ចុះតិចតួចបន្តទៀតសម្រាប់ការជួញដូរនៅថ្ងៃសុក្រនេះ ដែលជាថ្ងៃបញ្ចប់ការជួញដូរប្រចាំសប្ដាហ៍។

អ្នកជំនាញបានគូសភ្ជាប់ការធ្លាក់ចុះនៃតម្លៃប្រេងនេះ ទៅនឹងវិធានការពន្ធរបស់ ត្រាំ ដែលមានលទ្ធភាពក្នុងការទម្លាក់ទស្សនវិស័យសេដ្ឋកិច្ចសកល បង្កលទ្ធភាពនៃកម្សោយតម្រូវការប្រេង ដែលជាធម្មតា មានឥទ្ធិពលខ្ពស់លើតម្លៃជួញដូរ។

ជាមួយគ្នានោះ ក្នុងកិច្ចប្រជុំថ្នាក់រដ្ឋមន្ត្រីកាលពីថ្ងៃព្រហស្បតិ៍ បណ្តាសមាជិកនៃអង្គការនៃប្រទេសនាំចេញប្រេងកាត និងសម្ព័ន្ធមិត្ត (OPEC +) បានយល់ព្រមជំរុញផែនការរបស់ខ្លួន លើការដំឡើងផលិតកម្មប្រេង ដោយគ្រោងបន្ថែមការផ្គត់ផ្គង់ ៤១០ ០០០ បារ៉ែល/ថ្ងៃ ទៅក្នុងទីផ្សារនៅខែឧសភា ពោគឺបង្កើនពី ១៣៥ ០០០ បារ៉ែល/ថ្ងៃ តាមផែនការពីមុន៕

The post តម្លៃប្រេងអន្តរជាតិ ធ្លាក់ចុះធ្ងន់ម្សិលមិញ ក្រោយ ត្រាំ ប្រកាសពន្ធ appeared first on Kampuchea Thmey Daily.

តម្លៃប្រេងកើនឡើងពេលបើកការជួញដូរ ដោយសុទិដ្ឋិនិយមលើគោលនយោបាយជំរុញកំណើនសេដ្ឋកិច្ចអាមេរិក

Huon Dina — Mon, 23 Dec 2024 04:40:37 +0000

តម្លៃប្រេងបានកើនឡើងតិចតួចសម្រាប់ការជួញដូរនៅថ្ងៃចន្ទនេះ ជុំវិញសុទិដ្ឋិនិយមស្ដីពីគោលនយោបាយជំរុញកំណើនសេដ្ឋកិច្ចរបស់រដ្ឋាភិបាលសហរដ្ឋអាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងឆៅនាពេលអនាគត ម៉ាក Brent បានកើនឡើង ២៦ សេន ឬ ០,៤ ភាគរយ ដល់ ៧៣,២០ ដុល្លារ/បារ៉ែល ខណៈប្រេងឆៅអាមេរិក ម៉ាក West Texas Intermediate (WTI) បានកើនឡើង ៣១ សេន ឬ ០,៥ ភាគរយ ដោយជួញដូរនៅតម្លៃ ៦៩,៧៧ ដុល្លារ/បារ៉ែល។

តម្លៃប្រេងទាំង២បានធ្លាក់ចុះជាង ២ ភាគរយ ក្នុងអត្រាប្រចាំសប្ដាហ៍ ពេលបញ្ចប់ការជួញដូរនៅថ្ងៃសុក្រសប្តាហ៍មុន ដោយសារក្តីបារម្ភអំពីកំណើនសេដ្ឋកិច្ចពិភពលោក និងតម្រូវការប្រេង បន្ទាប់ពីធនាគារកណ្តាលអាមេរិក បានបង្ហាញពីការប្រុងប្រយ័ត្នចំពោះការបន្ធូរបន្ថយគោលនយោបាយរូបិយវត្ថុនៅឆ្នាំក្រោយ។

យ៉ាងណាមិញ សុទិដ្ឋិយមដែលជំរុញតម្លៃប្រេង បានកើតឡើងជុំវិញទិន្នន័យរបស់រដ្ឋាភិបាលអាមេរិកដែលចេញផ្សាយកាលពីថ្ងៃសុក្រ ស្ដីពីសន្ទស្សន៍មួយនៃអតិផរណា។ នៅក្នុងខែវិច្ឆិកា សន្ទស្សន៍ការចំណាយលើការប្រើប្រាស់ផ្ទាល់ខ្លួន (PCE) ដែលដកចេញនូវថ្លៃម្ហូបអាហារ និងថាមពល ហើយរងការតាមដានយ៉ាងជិតស្និទ្ធដោយធនាគារកណ្ដាលអាមេរិក បានកើនឡើងត្រឹម ០,១ ភាគរយ ប៉ុណ្ណោះ ខណៈវាកើនប្រមាណ ០,៣ ភាគរយ នៅខែតុលា។ ប្រសិនបើអតិផរណាថយចុះ នោះនឹងបើកផ្លូវឱ្យធនាគារកណ្ដាលកាត់បន្ថយអត្រាការប្រាក់បន្ថែមទៀត ដែលនេះជាធម្មតាតែងជំរុញសកម្មភាពសេដ្ឋកិច្ច និងតម្រូវការប្រេង។

លើសពីនេះ ប្រធានាធិបតីជាប់ឆ្នោតសហរដ្ឋអាមេរិក លោក ដូណាល់ ត្រាំ កាលពីថ្ងៃសុក្រ បានជំរុញឱ្យសហភាពអឺរ៉ុបបង្កើនការនាំចូលប្រេងពីអាមេរិក បើមិនដូច្នោះទេ នឹងរងនូវពន្ធនាំចូលអាមេរិក។ គណៈកម្មការអឺរ៉ុបបាននិយាយថា ខ្លួនបានត្រៀមខ្លួនរួចជាស្រេចដើម្បីពិភាក្សាជាមួយលោក ត្រាំ ពីរបៀបពង្រឹងទំនាក់ទំនង ទាំងក្នុងវិស័យថាមពល៕

The post តម្លៃប្រេងកើនឡើងពេលបើកការជួញដូរ ដោយសុទិដ្ឋិនិយមលើគោលនយោបាយជំរុញកំណើនសេដ្ឋកិច្ចអាមេរិក appeared first on Kampuchea Thmey Daily.

តម្លៃប្រេងកើនឡើងពេលបញ្ចប់ការជួញដូរ ជាមួយអត្រាប្រចាំសប្ដាហ៍ខ្ពស់បំផុតតាំងពីខែវិច្ឆិកា

Huon Dina — Sun, 15 Dec 2024 07:00:00 +0000

តម្លៃប្រេងបានកើនឡើងជាង ១ ភាគរយ ពេលបញ្ចប់ការជួញដូរកាលពីថ្ងៃសុក្រ (១៣ ធ្នូ) ជាមួយនឹងអត្រាប្រចាំសប្ដាហ៍ខ្ពស់បំផុត ក្នុងរយៈពេល៣សប្ដាហ៍ ដែលជំរុញដោយការរំពឹងទុកថានឹងមានការដាក់ទណ្ឌកម្មបន្ថែមលើរុស្ស៊ី និងអ៊ីរ៉ង់ ដោយនឹងរឹតបន្តឹងការផ្គត់ផ្គង់ ខណៈការកាត់បន្ថយអត្រាការប្រាក់នៅអឺរ៉ុប និងសហរដ្ឋអាមេរិក អាចជំរុញតម្រូវការប្រេងឥន្ធនៈ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងឆៅនាពេលអនាគត ម៉ាក Brent បានកើនឡើង ១,០៨ ដុល្លារ ឬ ១,៥ ភាគរយ ដោយបញ្ចប់ការជួញដូរនៅតម្លៃ ៧៤,៤៩ ដុល្លារ/បារ៉ែល។ ចំណែកឯប្រេងឆៅអាមេរិក ម៉ាក West Texas Intermediate (WTI) បានកើនឡើង ១,២៧ ដុល្លារ ឬ ១,៨ ភាគរយ ដោយបញ្ចប់ការជួញដូរនៅតម្លៃ ៧១,២៩ ដុល្លារ/បារ៉ែល។

វាគឺជាតម្លៃបិទការជួញដូរខ្ពស់បំផុតសម្រាប់ប្រេងម៉ាក Brent ចាប់តាំងពីថ្ងៃទី ២២ ខែវិច្ឆិកា ដែលធ្វើឱ្យអត្រាកំណើនប្រចាំសប្ដាហ៍មានប្រមាណ ៥ ភាគរយ។ តម្លៃប្រេងម៉ាក WTI វិញ បានកើនឡើង ៦ ភាគរយ ក្នុងអត្រាប្រចាំសប្ដាហ៍ ខណៈតម្លៃបិទកាលពីថ្ងៃសុក្រ គឺជាចំនួនខ្ពស់បំផុតរាប់តាំងពីថ្ងៃទី ៧ វិច្ឆិកា។

អ្នកជំនាញបានលើកឡើងថា កំណើនតម្លៃនេះត្រូវបានជំរុញដោយ ការរំពឹងទុកដែលថាលោកខាងលិចនឹងដាក់ទណ្ឌកម្មកាន់តែតឹងរ៉ឹងបន្ថែមប្រឆាំងនឹងរុស្ស៊ី និងអ៊ីរ៉ង់ គោលនយោបាយជំរុញសេដ្ឋកិច្ចនៅចិន ដែលជាអ្នកនាំចូលប្រេងដ៏ធំបំផុតមួយរបស់ពិភពលោក ជម្លោះនៅមជ្ឈិមបូព៌ា និងការរំពឹងទុកសម្រាប់ការកាត់បន្ថយអត្រាការប្រាក់របស់ធនាគារកណ្ដាលអាមេរិក និងសហភាពអឺរ៉ុប ជាដើម។ ការកាត់បន្ថយអត្រាការប្រាក់អាចជំរុញសកម្មភាពសេដ្ឋកិច្ច និងបង្កើនតម្រូវការប្រេង។

ជាមួយគ្នានោះ ទីភ្នាក់ងារថាមពលអន្តរជាតិ (IEA) បានបង្កើនការព្យាកររបស់ខ្លួន លើកំណើនតម្រូវការប្រេងពិភពលោកឆ្នាំ ២០២៥ ដល់ ១,១ លានបារ៉ែល/ថ្ងៃ ពីត្រឹម ៩៩០ ០០០ លានបារ៉ែល/ថ្ងៃ ក្នុងការព្យាករកាលពីខែមុន ជុំវិញសុទិដ្ឋិនិយមអំពីគោលនយោបាយជំរុញសេដ្ឋកិច្ចនៅចិន ខណៈអង្គការនៃប្រទេសនាំចេញប្រេងកាត និងសម្ព័ន្ធមិត្ត (OPEC+) បានប្រកាសពីការបន្តកាត់បន្ថយផលិតកម្មប្រេង៕

The post តម្លៃប្រេងកើនឡើងពេលបញ្ចប់ការជួញដូរ ជាមួយអត្រាប្រចាំសប្ដាហ៍ខ្ពស់បំផុតតាំងពីខែវិច្ឆិកា appeared first on Kampuchea Thmey Daily.

តម្លៃប្រេងធ្លាក់ចុះជាង ១ ភាគរយ ពេលបញ្ចប់ការជួញដូរ ជុំវិញកង្វល់ផ្គត់ផ្គត់លើសតម្រូវការ

Huon Dina — Sat, 07 Dec 2024 06:00:00 +0000

តម្លៃប្រេងបានធ្លាក់ចុះជាង ១ ភាគរយ កាលពីថ្ងៃសុក្រ ដែលជាថ្ងៃបញ្ចប់ការជួញដូរប្រចាំសប្ដាហ៍ ខណៈអ្នកវិភាគបានព្យាករអំពីការផ្គត់ផ្គង់លើសតម្រូវការនៅឆ្នាំក្រោយចំពេលដែលតម្រូវការខ្សោយ បើទោះអង្គការនៃប្រទេសនាំចេញប្រេងកាត និងសម្ព័ន្ធមិត្ត (OPEC +) បានសម្រេចចិត្តបន្តកាត់បន្ថយផលិតកម្មប្រេងរហូតដល់ចុងឆ្នាំ ២០២៦ ក៏ដោយ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងឆៅនាពេលអនាគត ម៉ាក Brent បានធ្លាក់ចុះ ៩៧ សេន ឬ ១,៤ ភាគរយ ដោយបញ្ចប់ការជួញដូរនៅតម្លៃ ៧១,១២ ដុល្លារ/បារ៉ែល។ ចំណែកប្រេងឆៅនាពេលអនាគតរបស់អាមេរិក West Texas Intermediate (WTI) វិញ បានធ្លាក់ចុះ ១,១០ ដុល្លារ ឬ ១,៦ ភាគរយ ដោយបញ្ចប់ការជួញដូរនៅតម្លៃ ៦៧,២០ ដុល្លារ/បារ៉ែល។

សម្រាប់អត្រាប្រចាំសប្តាហ តម្លៃប្រេង Brent បានធ្លាក់ចុះច្រើនជាង ២,៥ ភាគរយ ខណៈតម្លៃរបស់ WTI បានធ្លាក់ចុះ ១,២ ភាគរយ។

អ្នកវិភាគលើកឡើងថា កំណើននៃចំនួនអណ្តូងប្រេង និងឧស្ម័ននៅសហរដ្ឋអាមេរិកក្នុងសប្តាហ៍នេះ បង្ហាញអំពីការកើនឡើងនៃផលិតកម្មប្រេងរបស់អាមេរិក ដែលរួមចំណែកដល់ការធ្លាក់ចុះនៃតម្លៃប្រេង។ ជាមួយគ្នានោះ ធនាគារអាមេរិកបានព្យាករថា ការបង្កើនការផ្គត់ផ្គង់ប្រេង នឹងជំរុញឱ្យតម្លៃប្រេង Brent ជួញដូរជាមធ្យម ត្រឹម ៦៥ ដុល្លារ/បារ៉ែល។

កាលពីថ្ងៃព្រហស្បតិ៍ OPEC+ បានប្រកាសបន្តវិធានការកាត់បន្ថយផលិតកម្មរបស់ខ្លួន ដើម្បីធ្វើឱ្យប្រេងឡើងថ្លៃមកវិញ។ យ៉ាងណាមិញ អ្នកវិភាគខ្លះលើកឡើងថា ការសម្រេចចិត្តរបស់ប្លុកដដែល ក៏គូសបញ្ជាក់ផងដែរថា តម្រូវការប្រេងកំពុងធ្លាក់ចុះ៕

The post តម្លៃប្រេងធ្លាក់ចុះជាង ១ ភាគរយ ពេលបញ្ចប់ការជួញដូរ ជុំវិញកង្វល់ផ្គត់ផ្គត់លើសតម្រូវការ appeared first on Kampuchea Thmey Daily.

តម្លៃប្រេងធ្លាក់ចុះពេលបញ្ចប់ការជួញដូរ ដោយហានិភ័យផ្គត់ផ្គង់ស្រាកស្រាន្ត

Huon Dina — Sat, 30 Nov 2024 04:39:34 +0000

តម្លៃប្រេងបានធ្លាក់ចុះនៅពេលបញ្ចប់ការជួញដូរកាលពីថ្ងៃសុក្រ ខណៈអត្រាតម្លៃប្រចាំសប្ដាហ៍បានធ្លាក់ចុះគួរឱ្យកត់សម្គាល់ ចំពេលដែលហានិភ័យនៃការផ្គត់ផ្គង់ប្រេងសកលជុំវិញជម្លោះមជ្ឈិមបូព៌ាបានស្រាកស្រាន្ត ជាមួយនឹងការរំពឹងទុកដែលថាផលិតកម្មប្រេងនឹងកើនឡើង។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងម៉ាក Brent បានធ្លាក់ចុះ ៣៤ សេន ឬ ០,៤៦ ភាគរយ ដោយបញ្ចប់ការជួញដូរនៅតម្លៃ ៧២,៩៤ ដុល្លារ/បារ៉ែល ខណៈតម្លៃប្រេងម៉ាក West Texas Intermediate (WTI) បានធ្លាក់ចុះ ៧២ សេន ឬ ១,០៥ ភាគរយ ដោយបញ្ចប់នៅតម្លៃ ៦៨ ដុល្លារ/បារ៉ែល។

តម្លៃប្រេងម៉ាក Brent បានធ្លាក់ចុះ ៣,១ ភាគរយ ក្នុងអត្រាប្រចាំសប្ដាហ៍ ខណៈតម្លៃប្រេង WTI ធ្លាក់ចុះប្រមាណ ៤,៨ ភាគរយ។

អ្នកវិភាគបានគូសភ្ជាប់នឹងការធ្លាក់ចុះនេះ ទៅនឹងការធូរស្បើយនៃជម្លោះមជ្ឈិមបូព៌ា ក្រោមកិច្ចព្រមព្រៀងបទឈប់បាញ់រវាងអ៊ីស្រាអែល និងក្រុមហេសប៊ូឡារបស់លីបង់កាលពីថ្ងៃពុធ ទោះបីជាកិច្ចព្រមព្រៀងត្រូវបានបំពានដោយភាគីទាំង២បន្តបាញ់គ្នាក៏ដោយ។ នេះមានន័យថា ហានិភ័យនៃការរំខានផ្នែកផ្គត់ផ្គង់ ត្រូវបានស្រកស្រាន្ត។

លើសពីនេះ ទីភ្នាក់ងារថាមពលអន្តរជាតិបានចេញរបាយការណ៍ថា ការផ្គត់ផ្គង់ប្រេងនឹងកើនឡើងនៅឆ្នាំក្រោយ ទោះបីជាគេរំពឹងថា អង្គការនៃប្រទេសនាំចេញប្រេងកាត និងសម្ព័ន្ធមិត្ត (OPEC+) នឹងបន្តកាត់បន្ថយទិន្នផលរបស់ខ្លួន ដើម្បីជំុរញឱ្យប្រេងឡើងថ្លៃវិញក៏ដោយ៕

The post តម្លៃប្រេងធ្លាក់ចុះពេលបញ្ចប់ការជួញដូរ ដោយហានិភ័យផ្គត់ផ្គង់ស្រាកស្រាន្ត appeared first on Kampuchea Thmey Daily.

តម្លៃប្រេងកើនជាង ១ ភាគរយ ពេលបញ្ចប់ការជួញដូរ ដោយកម្ដៅនៃសង្រ្គាមអ៊ុយក្រែន

Huon Dina — Sat, 23 Nov 2024 01:45:00 +0000

តម្លៃប្រេងលើទីផ្សារអន្តរជាតិ បានកើនឡើងជាង ១ ភាគរយ ពេលបញ្ចប់ការជួញដូរកាលពីថ្ងៃសុក្រ ដែលជំរុញដោយភាពកាន់តែតានតឹងនៃសង្រ្គាមឈ្លានពានអ៊ុយក្រែនរបស់រុស្ស៊ី។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងឆៅនាពេលអនាគត ម៉ាក Brent បានកើនឡើង ៩៤ សេន ឬ ១,៣ ភាគរយ ដោយបញ្ចប់ការជួញដូរនៅតម្លៃ ៧៥,១៧ ដុល្លារ/បារ៉ែល។ ចំណែកឯតម្លៃប្រេងឆៅអាមេរិក West Texas Intermediate (WTI) វិញ បានកើនឡើង ១,១៤ ដុល្លារ ឬ ១,៦ ភាគរយ ដល់ ៧១,២៤ ដុល្លារ/បារ៉ែល។

សន្ទស្សន៍តម្លៃប្រេងឆៅទាំង២ បានកើនឡើងប្រហែល ៦ ភាគរយ ក្នុងអត្រាប្រចាំសប្ដាហ៍ ដែលធ្វើឱ្យវាខ្ពស់បំផុតរាប់តាំងពីថ្ងៃទី ៧ ខែវិច្ឆិកា ក្រោយរុស្ស៊ីបង្កើនការវាយលុយអ៊ុយក្រែន បន្ទាប់ពីចក្រភពអង់គ្លេស និងសហរដ្ឋអាមេរិក បានអនុញ្ញាតឱ្យទីក្រុងកៀវប្រើប្រាស់មីស៊ីលរយៈចម្ងាយឆ្ងាយរបស់ពួកគេ ដើម្បីវាយប្រហារកាន់តែជ្រៅទៅក្នុងទឹកដីរបស់រុស្ស៊ី។

អ្នកជំនាញខ្លះលើកឡើងថា ស្ថានភាពចុងក្រោយនៃសង្រ្គាមឈ្លានពានអ៊ុយក្រែនរបស់រុស្ស៊ី បានធ្វើឱ្យភាពតានតឹងនៃជម្លោះភូមិសាស្រ្តនយោបាយកាន់តែតានតឹងជាងពេលណាៗទាំងអស់នៃសង្រ្គាមអ៊ីស្រាអែល-ហាម៉ាស់ចុងក្រោយ ដែលអូសបន្លាយអស់រយៈពេលជាង១ឆ្នាំមកនេះ។ ដោយហេតុថា រុស្ស៊ីគឺជាអ្នកផ្គត់ផ្គង់ប្រេងដ៏ធំមួយរបស់ពិភពលោក ទើបក្ដីបារម្ភពីការរំខានផ្នែកផ្គត់ផ្គង់កើនឡើង ដែលធ្វើឱ្យតម្លៃប្រេងហក់ឡើងជាថ្មី។

កំណើនតម្លៃក៏ពាក់ព័ន្ធផងដែរ ទៅនឹងសុទិដ្ឋិនិយមពីការស្ទុះងើបនៃតម្រូវការនៅចិន និងឥណ្ឌា ដែលជាប្រទេសប្រើប្រាស់ប្រេងដ៏ធំបំផុត២របស់ពិភពលោក។ ចិន បានប្រកាសវិធានការគោលនយោបាយក្នុងសប្តាហ៍នេះ ដើម្បីជំរុញពាណិជ្ជកម្ម រួមទាំងការគាំទ្រសម្រាប់ការនាំចូលផលិតផលថាមពល ចំពេលមានការព្រួយបារម្ភចំពោះការគំរាមកំហែងពីគោលនយោបាយដំឡើងពន្ធរបស់ប្រធានាធិបតីជាប់ឆ្នោតអាមេរិក លោក ដូណាល់ ត្រាំ៕

The post តម្លៃប្រេងកើនជាង ១ ភាគរយ ពេលបញ្ចប់ការជួញដូរ ដោយកម្ដៅនៃសង្រ្គាមអ៊ុយក្រែន appeared first on Kampuchea Thmey Daily.

តម្លៃប្រេងឡើងពេលបញ្ចប់ការជួញដូរ ប៉ុន្តែធ្លាក់ចុះក្នុងអត្រាប្រចាំសប្ដាហ៍

Huon Dina — Sat, 02 Nov 2024 06:39:33 +0000

តម្លៃប្រេងឆៅសកលបានកើនឡើងតិចតួច នៅពេលបញ្ចប់ការជួញដូរកាលពីថ្ងៃសុក្រ ជុំវិញសេចក្ដីរាយការណ៍ថា អ៊ីរ៉ង់ត្រៀមវាយប្រហារអ៊ីស្រាអែលជាថ្មី ខណៈអត្រាប្រចាំសប្ដាហ៍បានបន្តធ្លាក់ចុះ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងឆៅនាពេលអនាគត ម៉ាក Brent បានកើនឡើង ២៩ សេន ឬ ០,៤ ភាគរយ ដោយបញ្ជប់ការជួញដូរនៅតម្លៃ ៧៣,១០ ដុល្លារ/បារ៉ែល។ ចំណែកឯតម្លៃប្រេងឆៅនាពេលអនាគតអាមេរិក ម៉ាក West Texas Intermediate (WTI) វិញ បានកើនឡើង ២៣ សេន ឬ ០,៣ ភាគរយ ដោយជួញដូរនៅ ៦៩,៤៩ ដុល្លារ/បារ៉ែល។

បើគិតក្នុងអត្រាតម្លៃប្រចាំសប្ដាហ៍ ប្រេងម៉ាក Brent បានធ្លាក់ចុះប្រហែល ៤ ភាគរយ ខណៈម៉ាក WTI បានធ្លាក់ចុះប្រហែល ៣ ភាគរយ។

ការឡើងថ្លៃតិចតួចនេះ កើតឡើងនៅពេលមានសេចក្ដីរាយការណ៍ថា អ៊ីរ៉ង់ត្រៀមវាយប្រហារសងសឹកអ៊ីស្រាអែលចេញពីប្រទេសអ៊ីរ៉ាក់ ក្នុងរយៈពេលប៉ុន្មានថ្ងៃខាងមុខ ខណៈសត្រូវទាំង២វាយប្រហារគ្នាទៅវិញទៅមកក្នុងបរិបទជម្លោះមជ្ឈិមបូព៌ានៅហ្គាហ្សា។

យ៉ាងណាមិញ កំណើនតម្លៃប្រេងមានកម្រិតដោយសារតែរបាយការណ៍ពីទិន្នផលប្រេងនៅអាមេរិកកើនឡើង ដល់ប្រមាណ ១៣,៤ លានបារ៉ែល/ថ្ងៃ។

ទោះបីបែបនេះក្ដី អ្នកវិនិយោគនៅតែចាំមើលលទ្ធផលនៃការបោះឆ្នោតនៅអាមេរិក ដែលអាចនឹងបង្កភាពស្រពិចស្រពិលច្រើនសម្រាប់ទីផ្សារជួញដូរ៕

The post តម្លៃប្រេងឡើងពេលបញ្ចប់ការជួញដូរ ប៉ុន្តែធ្លាក់ចុះក្នុងអត្រាប្រចាំសប្ដាហ៍ appeared first on Kampuchea Thmey Daily.

តម្លៃប្រេងធ្លាក់ចុះជាង ៤ ភាគរយ ដោយការ សងសឹកអ៊ីរ៉ង់របស់អ៊ីស្រាអែលហាក់ធូរស្រាល

Huon Dina — Mon, 28 Oct 2024 03:02:00 +0000

តម្លៃប្រេងបានធ្លាក់ចុះជាង ៣ ដុល្លារ/បារ៉ែលនៅព្រឹកថ្ងៃចន្ទនេះ ក្រោយពេលភាពតានតឹងនៃជម្លោះភូមិសាស្រ្តនយោបាយនៅមជ្ឈិមបូព៌ាហាក់បង្ហាញភាពស្រាកស្រាន្ត បន្ទាប់ពីអ៊ីស្រាអែលសងសឹកអ៊ីរ៉ង់ដោយកំណត់គោលដៅលើហេដ្ឋារចនាសម្ព័ន្ធយោធា ជាជាងវាយប្រហារលើហេដ្ឋារចនាសម្ព័ន្ធប្រេង និងនុយក្លេអ៊ែររបស់ទីក្រុងតេអេរ៉ង់ ដែលអាចរំខានដល់ការផ្គត់ផ្គង់ប្រេងជាសកល។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

តម្លៃប្រេងនាពេលអនាគត ម៉ាក Brent និង US West Texas Intermediate (WTI) បានធ្លាក់ចុះដល់កម្រិតទាបបំផុតរាប់តាំងពីដើមខែតុលា នៅពេលបើកការជួញដូរនាព្រឹកថ្ងៃចន្ទនេះ ដោយប្រេងម៉ាក Brent ជួញដូរនៅ ៧២,៧០ ដុល្លារ/បារ៉ែល ធ្លាក់ចុះ ៣,៣៥ ដុល្លារ ឬ ៤,៤ ភាគរយ ខណៈប្រេងម៉ាក WTI ធ្លាក់ចុះ ៣,២៧ ដុល្លារ ឬ ៤,៦ ភាគរយ ដោយជួញដូរនៅ ៦៨,៥១ ដុល្លារ/បារ៉ែល។

តម្លៃប្រេងទាំង២ បានកើនឡើងប្រហែល ៤ ភាគរយ ក្នុងអត្រាប្រចាំសប្ដាហ៍កាលពីសប្ដាហ៍មុន ដោយសារតែក្ដីបារម្ភពីភាពកាន់តែតានតឹងនៃជម្លោះមជ្ឈិមបូព៌ា ជុំវិញលទ្ធភាពដែលអ៊ីស្រាអែលកំណត់គោលដៅលើហេដ្ឋារចនាសម្ព័ន្ធប្រេងរបស់អ៊ីរ៉ង់ និងភាពស្រពិចស្រពិលនៃការបោះឆ្នោតនៅសហរដ្ឋអាមេរិក។

យ៉ាងណាមិញ អ៊ីស្រាអែលបានបើកការវាយប្រហារលើអ៊ីរ៉ង់កាលពីថ្ងៃសៅរ៍ លើរោងចក្រមីស៊ីល និងទីតាំងផ្សេងៗទៀតក្បែរទីក្រុងតេហេរ៉ង់ និងនៅភាគខាងលិចនៃប្រទេសអ៊ីរ៉ង់ ដែលបានផ្លោងមីស៊ីលជិត ២០០ ដើមលើអ៊ីស្រាអែលកាលពីដើមខែ។ អ្នកជំនាញលើកឡើងថា ការកំណត់គោលដៅខុសពីហេដ្ឋារចនាសម្ព័ន្ធប្រេងនេះ គឺជាដែនកំណត់មួយនៃការប្រហាររបស់អ៊ីស្រាអែល ដែលផ្ដល់ក្ដីសង្ឈឹមលើការបន្ធូរបន្ថយភាពតានតឹងរវាងគូសត្រូវទាំង២ ខណៈជម្លោះមជ្ឈិមបូព៌ានៅតែបន្តអូសបន្លាយ។

ទោះបីជាយ៉ាងណាក៏ដោយ អ្នកជំនាញលើកឡើងថា វិនិយោគិនទីផ្សារនៅតែតាមដានលើស្ថានភាព ឬលទ្ធភាពដែលអ៊ីរ៉ង់វាយបកទៅអ៊ីស្រាអែលវិញ ដែលអាចធ្វើឱ្យតម្លៃទំនិញ រួមមានទាំងប្រេងឆៅ ឡើងតម្លៃជាថ្មី៕

The post តម្លៃប្រេងធ្លាក់ចុះជាង ៤ ភាគរយ ដោយការ សងសឹកអ៊ីរ៉ង់របស់អ៊ីស្រាអែលហាក់ធូរស្រាល appeared first on Kampuchea Thmey Daily.

ប្រេង​ Archives - Kampuchea Thmey Daily

តម្លៃប្រេងអន្តរជាតិ ​ធ្លាក់ចុះធ្ងន់ម្សិលមិញ ក្រោយ ត្រាំ ប្រកាសពន្ធ

តម្លៃប្រេង​កើនឡើងពេលបើក​ការជួញដូរ​ ដោយ​សុទិដ្ឋិនិយម​លើ​គោលនយោបាយជំរុញកំណើនសេដ្ឋកិច្ចអាមេរិក​

តម្លៃប្រេង​កើន​ឡើងពេលបញ្ចប់ការជួញដូរ ជាមួយ​អត្រាប្រចាំសប្ដាហ៍ខ្ពស់បំផុតតាំងពី​ខែ​វិច្ឆិកា

តម្លៃប្រេង​ធ្លាក់ចុះជាង ១ ភាគរយ​ ពេលបញ្ចប់ការជួញដូរ ​ជុំវិញ​កង្វល់ផ្គត់ផ្គត់លើសតម្រូវការ

តម្លៃប្រេង​ធ្លាក់ចុះ​ពេល​បញ្ចប់ការ​ជួញដូរ​ ដោយ​ហានិភ័យផ្គត់ផ្គង់ស្រាកស្រាន្ត​

តម្លៃប្រេង​កើនជាង​ ១ ភាគរយ ពេល​បញ្ចប់ការ​ជួញដូរ​ ដោយ​កម្ដៅនៃ​សង្រ្គាមអ៊ុយក្រែន

តម្លៃ​ប្រេង​ឡើង​ពេល​បញ្ចប់​ការ​ជួញដូរ​ ប៉ុន្តែ​ធ្លាក់ចុះ​ក្នុង​អត្រា​ប្រចាំ​សប្ដាហ៍​

តម្លៃ​ប្រេង​ធ្លាក់ចុះ​ជាង​ ៤ ភាគរយ​ ​​​ដោយ​ការ សង​សឹកអ៊ីរ៉ង់របស់​អ៊ីស្រាអែល​ហាក់ធូរស្រាល