នៅក្នុងរយៈពេលពេញមួយឆ្នាំ ២០២៥ ជលផលនេសាទទឹកសាបរបស់កម្ពុជាសម្រេចបាន ៥១៤ ៨៣០ ​តោន កើនជាង ៤ ​ម៉ឺនតោន ​ធៀបនឹងឆ្នាំ ​២០២៤ ​ក្នុងនោះនេសាទដាយត្រី​សម្រេចបានជិត ២ ម៉ឺនតោន និងនេសាទគ្រួសារប្រមាណ​ ៤០ ម៉ឺនតោន។ ចំណែកឯ ជលផលនេសាទសមុទ្រសម្រេចបាន ១៤ ម៉ឺនតោន កើន ៨៥៣ តោន។

ផលិតផលជលផលសរុបរបស់កម្ពុជាសម្រេចបាន ៩៦៥ ៧៥៨ តោន ក្នុងឆ្នាំ ២០២៥ ដែលធ្វើឱ្យកម្ពុជានៅតែមានលទ្ធភាពផ្គត់ផ្គង់តម្រូវការបរិភោគប្រចាំថ្ងៃរបស់ប្រជាពលរដ្ឋក្នុងស្រុក និងភ្ញៀវទេសចរអន្តរជាតិ។

​លោកបណ្ឌិត ខូវ គួង អនុប្រធានរដ្ឋបាលជលផល ​មានប្រសាសន៍ថា ​ផលត្រីទឹកសាប​បាន​កើន​ឡើង​ជាបន្តបន្ទាប់ ​នៅក្នុងរយៈពេល ​២ ឆ្នាំ កន្លងមកនេះ ដោយសារការ​ខិត​ខំប្រឹងប្រែង​​របស់​ថ្នាក់​ដឹក​នាំ​រដ្ឋាភិ​បាល​ក្នុង​ការ​ការពារ ​និង​អភិរក្សត្រីមេពូជ និង​ទីជម្រកត្រី​ ព្រមទាំង​ទប់​ស្កាត់​បទ​ល្មើស​នេសាទខុសច្បាប់។

​ក្រសួងកសិកម្ម ​រុក្ខាប្រមាញ់ ​និងនេសាទ ​រកឃើញបទល្មើសនេសាទ ​សរុបចំនួន ៣ ១៤៥ ​ករណី ​នៅក្នុងឆ្នាំ ២០២៥ ​ក្នុងនោះសំណុំរឿងទឹកសាប ៣ ០៥៣ ​និងសំណុំរឿងបទល្មើស សមុទ្រ ​៩២ ​ករណី៕

អត្ថបទ៖ ឡេង ដេត

The post ​កម្ពុជា​រកចំណូលបានជាង ​៣ ​លានដុល្លារ ​ពីការនាំចេញ​ជលផលនេសាទ​ appeared first on Kampuchea Thmey Daily.

នៅ​ថ្ងៃ​ទី​១៩ ខែ​ឧសភា ឆ្នាំ​២០២៥ នេះ លោក សរ សុពុត្រា បាន​លើក​ឡើង​ថា ខេត្ត​ស្ទឹង​ត្រែង​ជាខេត្តមួយដែលមានទន្លេ​ចំនួន​ ៤ ហូរកាត់ រួមមាន ទន្លេមេគង្គ ទន្លេសេកុង ទន្លេសេសាន និងទន្លេស្រែពក ដែល​ជាប្រភពធនធានធម្មជាតិជីវៈចម្រុះសម្បូរបែប​ ក៏ដូចជាប្រភព​ទឹក​សម្រាប់​ស្រោចស្រព ប្រើប្រាស់ និងផ្តល់​ថាមពលវារីអគ្គិសនី ព្រមទាំងជាផ្លូវទឹកសម្រាប់ការធ្វើដំណើរ និងដឹក​ជញ្ជូន​របស់​ប្រជាជន​នៅក្នុងមូលដ្ឋាន​​។

ជាមួយគ្នានេះ ខេត្តស្ទឹងត្រែង គឺ​ជា​ខេត្ត​មួយ​ដែល​សម្បូរ​ទៅ​ដោយ​ធនធានត្រី និងជីវៈចម្រុះ ពោល​គឺជា​អាង​ស្តុកធនធាន​មច្ឆជាតិ​ដ៏​សំខាន់​សម្រាប់​រួម​ចំណែក​ឆ្លើយតប​ទៅ​នឹង​បញ្ហាសន្តិសុខស្បៀង និងជា​ជម្រក​នៃសត្វផ្សោតទឹកសាប និង​ពពួកត្រីកម្រជាច្រើនរស់នៅ ជា​ពិសេស​ត្រី​ប៉ាសេអ៊ី ដែល​មាន​រសជាតិឆ្ងាញ់ និង​គេ​និយម​ចូលចិត្ត ហើយ​មានតែនៅខេត្តស្ទឹងត្រែងប៉ុណ្ណោះ។

ដោយ​អំណោយ​ផល​ធនធាន​ត្រី និងជីវៈចម្រុះ លោក អភិបាល​ខេត្ត បាន​អះអាង​ថា «ជាមធ្យម ផលនេសាទ​នៅ​ក្នុងខេត្ត​ស្ទឹងត្រែង​ដែលប្រមូល​បានមាន​ចំនួន​ប្រមាណ ៥ ពាន់តោន ក្នុងមួយឆ្នាំ»។

ក្នុងនោះ ផលនេសាទសម្រាប់ខេត្តស្ទឹងត្រែងនៅឆ្នាំ២០២៤ ប្រមូលផលបានប្រមាណ ៤ ៤១៥តោន កើនលើសឆ្នាំ២០២៣ ជាង២០៩តោន ដែលគិតជាភាគរយមានកើនឡើងប្រមាណ៤,៩៧%។

ដោយឡែក គិតត្រឹមចុងឆ្នាំ ២០២៣ មានបរិមាណ​ផល​នេសាទសម្រាប់ខេត្តស្ទឹងត្រែងជាង ៤ ២០០ តោន កើនឡើងជាងឆ្នាំ ២០២២ ប្រមាណ ១០០តោន។

ស្របពេលជាមួយគ្នានេះ ដោយផ្អែក​លើ​សក្តានុពល​នៃ​ទន្លេ​ទាំង ៤ ខេត្តស្ទឹងត្រែង ក៏ជា​ខេត្តមួយដែលមានភាព-អំណោយ​ផលផ្នែក​កសិកម្មដូចគ្នាដែរ។

ជាក់ស្តែង ខេត្ត​​នេះមានផ្ទៃដីបង្កបង្កើនផលដំណាំស្រូវសរុប ២៨.៥០០ ហិកតា ដំណាំសាកវប្បកម្ម ១៩.៤២៩ ហិកតា និងដំណាំកសិ-ឧស្សាហកម្ម ១០៩.៦៩៥ ហិកតា ដែលរួមមាន កៅស៊ូ ស្វាយចន្ទី ស្វាយកែវល្មៀត ចេកអំបូងលឿង ដំឡូងមី ព្រមទាំងដំណាំ ម្នាស់ ល្ង និងសណ្ដែកសៀងជាដើម​៕

The post ខេត្តស្ទឹងត្រែង ប្រមូលផលនេសាទបានជាមធ្យមប្រមាណ ៥ ពាន់តោន ក្នុងមួយឆ្នាំ appeared first on Kampuchea Thmey Daily.

បើតាមលោក ភុំ វិមល នាយខណ្ឌរដ្ឋបាលជនផលពោធិ៍សាត់បានឲ្យដឹងថា ស្ថិតិផលនេសាទចាប់ត្រីបានប្រចាំឆ្នាំ២០២៤ អនុវត្តបានចំនួន ៤១.៩០០ តោន កើន ៤,៥% នៃផែនការឆ្នាំ។ បើប្រៀបធៀប និងឆ្នាំ២០២៣ ផលត្រីចាប់បាន ២.៣០០ តោន ស្មើនឹង ៥,៨% ។ ដោយឡែកផលកំពឹសក្នុងឆ្នាំ២០២៤ អនុវត្តបានចំនួន១៨៥ តោន កើនជាងឆ្នាំ២០២៣ ចំនួន ៦១ តោន ។

ចំពោះផលនេសាទចំនួន ៤១.៩០០ តោន បានមកពី៖ នេសាទគ្រួសារក្នុងដែននេសាទបានចំនួន ២៩.៣០០ តោន នេសាទគ្រួសារតាមវាលស្រែ បានចំនួន ១២.៦០០ តោន។

នៅដើមខែ​ធ្នូ ​ឆ្នាំ​២​០​២៤ នេះ លោក ភុំ វិមល ប្រធានរដ្ឋបាលខណ្ឌជលផលពោធិ៍សាត់ បាន​ដឹកនាំ​ក្រុម​ការងារ​ផ្នែកមន្រ្តីមន្ត្រីជំនាញ និងសមត្ថកិច្ចពាក់ព័ន្ធចម្រុះ​ចុះ​តាមគោលដៅសំខាន់លើ​ផ្ទៃ​បឹង​ទន្លេសាប​ ចាប់ពីភូមិដីរនាថ ឃុំមេទឹក ស្រុកបាកាន រហូតដល់ចំណុច តំបន់កដប ក្នុងឃុំអន្សាចំបក ស្រុកក្រគរ ខេត្ដពោធិ៍សាត់ ជាប់ព្រំទល់ខេត្តកំពង់ធំ និងខេត្តកំពង់ឆ្នាំង មធ្យោបាយកាណូត ចំនួនជាច្រើនគ្រឿង ដើម្បីពិនិតត្យមើលស្ថានភាពមច្ឆាជាតិនារដូវទឹកសម្រកនេះ ជាពិសេសត្រូវទប់ស្កាត់បទល្មើសនេសាទតែម្តង។ 

​លោក ខូយ រីដា អភិបាលខេត្តពោធិ៍សាត់ ​បានលើកឡើងថា ក្នុងអំឡុងខែធ្នូនេះ ត្រីក្នុងបឹងទន្លេសាបបានបន្លាស់ទី ហូរធ្លាក់ពីបឹងបួរ ព្រែក និងដៃទន្លេនានាចូលទៅតាមដងទន្លេសាបត្រឡប់ទៅវិញ ហើយប្រជាពលរដ្ឋក៏ចាប់ផ្ដើមប្រមូលធនធានមច្ឆាជាតិ និងនេសាទត្រី និងប្រជាពលរដ្ឋស្រុកស្រែចំការមកពីទីជិតទីឆ្ងាយ ដើម្បីចាប់ត្រីធ្វើផ្អក ឬប្រហុកទុកដាក់សម្រាប់បរិភោគ ទៅតាមទំនៀមទំលាប់ពីដូនតាខ្មែរ។ 

លោកបានបន្ថែមទៀតថា ឥឡូវនេះ តាមការចុះត្រួតពិនិត្យជាក់ស្ដែងឃើញមានប្រភេទត្រីភាគច្រើន ជាប្រភេទត្រីរៀល និងត្រីចម្រុះចាប់ផ្ដើមចុះបន្តបន្ទាប់ អញ្ចឹងការប្រមូលផលនេសាទរួមមាន៖ ខេត្តពោធិ៍សាត់, កំពង់ឆ្នាំង និងខេត្តកណ្ដាល ស្ថិតនៅប៉ែកខាងត្បូងបឹងទន្លេសាប ត្រង់ចំណុច ច្រកកដបនេះប្រសិនជាសមត្ថកិច្ច និងអាជ្ញាធរបណ្ដែតបណ្ដោយតាមចិត្តឲ្យប្រជាពលរដ្ឋរកផលនេសាទ គឺអ្នកនៅប៉ែកខាងក្រោមមិនបានត្រីធ្វើផ្អកប្រហុកច្រើនឡើយ ហេតុដូចនេះក្នុងនាមលោកជាអាជ្ញាធរត្រូវដឹកនាំកម្លាំងជំនាញចុះមកផ្ទាល់ និងបន្តចុះមកទៀត ប្រសិនបើផលត្រីអ្នកខាងក្រោមរកផលនេសាទមិនបាន។ 

លោក ខូយ រីដា អភិបាលនៃគណៈអភិបាលខេត្តពោធិ៍សាត់ បានបញ្ជាក់ថា មន្ត្រីជំនាញ និងសមត្ថកិច្ចពាក់ព័ន្ធ ត្រូវពិនិត្យមើលលើការប្រើឧប្បករណ៍នេសាទរបស់ប្រជាពលរដ្ឋ ថាវាត្រឹមត្រូវតាមច្បាប់រដ្ឋបាលជលផល ឬអត់ ហើយនេះករណីច្រើនលើកមកហើយ ដែលលោកចុះមកត្រួតពិនិត្យក្នុងឆ្នាំនេះ ហើយក៏បានឃើញសម្រាប់ការប្រព្រឹត្តបទល្មើសនេសាទ និងប្រើឧប្បករណ៍នេសាទខុសច្បាប់មានកាថយចុះច្រើនណាស់ ដូច្នេះ បើបទល្មើសថយចុះដោយសារប្រជានេសាសាទមានកាយល់ដឹងច្រើនជាងឆ្នាំមុនៗ រីឯផលត្រីក៏មានការកើនឡើងទៅតាមហ្នឹងដែរ។

សូមបញ្ជាក់ផងដែរថា បើតាមប្រជានេសាទបានឲ្យដឹងថា ពួកគាត់សប្បាយរីករាយយ៉ាងខ្លាំងដោយត្រីឆ្នាំនេះមានភាពសំបូរជាងឆ្នាំទៅ ដោយក្នុងឆ្នាំនេះពួកគាត់អាចចាប់ត្រីបានច្រើនសម្រាប់ធ្វើប្រហុក ផ្អក និងលក់ត្រីស្រស់ ទៅកាន់ទីផ្សារ ដែលធ្វើឲ្យពួកគាត់រកកម្រៃបានច្រើន។

គេបានសង្កេតឃើញថា ប្រជាពលរដ្ឋជាច្រើនគ្រួសារ មកពីខេត្តនានា នៅទូទាំងប្រទេស ដូចជា ខេត្តសៀមរា ខេត្តបាត់ដំបង ខេត្តពោធិ៍សាត់ ខេត្តកំពង់ធំ ខេត្តកំពង់ឆ្នាំង កំពង់ស្ពឺ ព្រៃវែង និងខេត្តតាកែវ បានប្រមូលផ្តុំគ្នានៅតាមចំណុចទីតាំងឡូត៍នីមួយៗ តាមបណ្តោយទន្លេសាប ដើម្បីធ្វើប្រហុក ផ្អក ឲ្យបានទាន់ពេលវេលានៅឆ្នាំនេះ។

ប្រជាពលរដ្ឋមានការសប្បាយរីករាយ ហើយក៏សូមអរគុណដល់ថ្នាក់ដឹកនាំប្រទេស ពិសេសសម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលសម្តេចបានធ្វើឲ្យផលត្រីនៅបឹងទន្លេរសាប បឹងបួរ អូរត្រពាំង និងតាមវាលស្រែសម្បូរឡើងវិញ។ ហើយការកើនឡើងនូវទិន្នផលត្រីនេះ ត្រូវបានគេមើលឃើញ ដោយសារចំណាត់ការយ៉ាងម៉ឺងម៉ាត់ របស់រាជរដ្ឋាភិបាលក្នុងការបង្ក្រាបបទល្មើសនេសាទ នៅទូទាំងប្រទេស ជាពិសេសនៅខេត្តជុំវិញបឹងទន្លេសាប៕

អត្ថបទ៖ លាន គ្រន

The post ការប្រមូលផលនេសាទធ្វើផ្អកប្រហុកនៅខេត្តពោធិ៍សាត់ឆ្នាំនេះ មានការកើនឡើងជាងឆ្នាំមុន appeared first on Kampuchea Thmey Daily.

​លោក ស៊ឺ ម៉ៅ ម្ចាស់ដាយលេខ ១៥ E ស្ថិតក្នុងភូមិតាពៅ ឃុំកោះចិន ស្រុកពញាឮ ខេត្តកណ្ដាល ​ប្រាប់​កម្ពុជាថ្មីនៅថ្ងៃទី ១៧ ខែមករា ឆ្នាំ ២០២៤ នេះថា ក្នុងមួយម៉ោងអាចកៀរត្រីបានប្រមាណ ៥០០ ទៅ ៧០០ គីឡូក្រាម ឬអាចតិចជាងនេះ ខណៈថ្ងៃខ្លះ​បានត្រឹមតែ ១ តោនក៏មាន។ ចំពោះ​ត្រីដែលបាន លោកបញ្ជាក់ថា គឺជាប្រភេទត្រីរៀល និងត្រីស្លឹកឬស្សី។

​លោក ឈុន ហាំងតុង ប្រធានអង្គភាពនេសាទរដ្ឋកណ្តាលស្ទឹង នៃក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា ​ជាមធ្យមក្នុងមួយម៉ោងអាចកៀរបានចន្លោះពី ២០០ ទៅ ៤០០ គីឡូ ខណៈខែនេះត្រីដើរជាហ្វូង ដែលម្ចាស់ដាយគេកៀរមិនលើកដូចមុននោះទេ។

លោកបញ្ជាក់ថា ត្រីដែល​បាន គឺមានទំហំធំជាងខែមុន ដែលអាចនឹងត្រូវដល់ថ្ងៃទី ២១ ខែមករា នេះ ដែលលោក​បញ្ជាក់ថា លើកទី២ នេះ អាចនឹងបានច្រើនជាងលើកមុន ខណៈតម្លៃជាមធ្យម ត្រឹមតែ ១ ២០០ រៀល ក្នុង១ គីឡូក្រាម។

លោក ហេង គង់ ប្រធានវិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាបបានឱ្យដឹងដែរថា ត្រីត្រូវលើកទី២ ចាប់ពីថ្ងៃ ទី ១៤ ខែមករា នៅតាមគន្លងដាយនៅខាងលើ ខេត្តកណ្ដាល អាចកៀរម្ដងបានប្រមាណ ៣០០ ទៅ ៤០០ គីឡូ ក្នុងមួយម៉ោង ខណៈខ្នើតខែបុស្សនេះ មានវត្តមានត្រីរៀលច្រើនជាងត្រីស្លឹកឬស្សី។

រដ្ឋបាលជលផល​ នៃក្រសួងកសិកម្មបានប្រកាសថា រដូវត្រីប្រហុកចាប់ផ្ដើមត្រូវច្រើនលើកទី២ ចាប់ពីថ្ងៃទី១៥ ដល់ថ្ងៃទី២១ ខែមករា ឆ្នាំ២០២៤ ខណៈត្រីបន្តបន្លាស់ទីចេញពីបឹងទន្លេសាប បឹង ស្ទឹង និងព្រែកនានា ចូលទន្លេសាប ទន្លេមេគង្គ និងទន្លេបាសាក់។

រដ្ឋបាលជលផលក៏បានអំពាវនាវឱ្យប្រជាពលរដ្ឋដែលមានបំណងធ្វើប្រហុក ផ្អក ត្រីឆ្អើរ ឬទឹកត្រី សូមរួសរាន់អញ្ជើញទៅទិញត្រី តាមពេលវេលា។

បើ​យោងតាមរបាយការណ៍លទ្ធផលបូកសរុប​ការងារវិស័យជលផលប្រចាំឆ្នាំ ២០២៣ រដ្ឋបាលជលផលសម្រេចបានផលនេសាទទឹកសាប ៤២៦ ៧៥០ តោន។ ប្រាក់ចំណូលបានពីវិស័យជលផលមានចំនួនជាង ៨២៨​លានរៀល កើនលើសឆ្នាំមុនចំនួនជាង ២០៥លានរៀល ស្មើនឹង ២២៣,៥៩ ភាគរយ៕

អត្ថបទ៖ ឡេង ដេត

The post ​ម្ចាស់ដាយនៅខេត្តកណ្ដាល អាចកៀរត្រីបាន ប្រមាណ ៥០០ គីឡូ ក្នុង១ ម៉ោង appeared first on Kampuchea Thmey Daily.

​លោក ពុំ សុថា អគ្គនាយករដ្ឋបាលជលផល​បានឱ្យដឹងថា ​ត្រីតាមដាយដែលត្រូវប៉ុន្មានថ្ងៃកន្លងមក ​បានថមថយទៅវិញ ​ខណៈលើកទី ២ អាចនឹងត្រូវនៅខែខ្នើតក្រោយចំ​ថ្ងៃ ៤ កើតដល់ ៧ កើត ​ដែល​អាស្រ័យលើស្ថានភាពទឹកហូរ និងអាកាសធាតុ។​

​លោក ពុំ សុថា បញ្ជាក់ថា ត្រីតាមដាយ​ដែលត្រូវប៉ុន្មានថ្ងៃកន្លងមក ​បានថមថយទៅវិញហើយ​ ខណៈ​តាមការសន្និដ្ឋាន ផលនេសាទនៅឆ្នាំនេះអាចនឹង​ទទួលបានច្រើនជាងឆ្នាំមុន​។ ​

​មន្ត្រីដដែលរូបនេះ បានបញ្ជាក់ថា នៅឆ្នាំនេះ​ត្រីត្រូវលើកទី១ ជាប្រភេទត្រីស្លឹកឬស្សី​ ខណៈ​ត្រី​រៀល​មានតិច ប៉ុន្តែនៅខែខ្នើតក្រោយ អាចសន្និដ្ឋានថា ត្រីរៀលនឹងត្រូវបានខ្លះទៀត​ ដោយ​អាស្រ័យ​លើទឹកនៅហូរ ​និងអាកាសធាតុល្អ។​

​យោងតាមរបាយការណ៍របស់រដ្ឋបាលជលផល​ត្រីត្រូវលើកទី១ រយៈពេល ៦ ថ្ងៃនេះ ​ទទួល​បានប្រមាណ​ជាង ៤ ពាន់តោន។

គិតចាប់ពីខែតុលា រហូតដល់ខែធ្នូ ឆ្នាំ ២០២៣ (សម្រាប់រដូវនេសា ២០២៣-២០២៤) ​ផលនេសាទទទួលបានប្រមាណ ​១១ ពាន់តោន (១១ ០៧៤) ប្រៀបធៀបឆ្នាំមុនគឺកើនឡើង ​១ ពាន់តោន ដែលមាន ១០ ពាន់តោន (១០ ០៨២)។

នៅឆ្នាំ២០២៣នេះ ទិន្នផលត្រីប្រហុកកើនលើសឆ្នាំមុនប្រមាណ ៥ ភាគរយ បើប្រៀបធៀបនឹងឆ្នាំមុន។ កំណើននេះ ទទួលបានតាមរយៈការទប់ស្កាត់ និងបង្ក្រាបបទល្មើសនេសាទបានច្រើននាពេលកន្លងទៅ។

ស្ថិតិផលចាប់ការធ្វើអាជីវកម្មនេសាទដាយត្រី កើនឡើង៣ឆ្នាំជាប់គ្នា គិតចាប់ពីឆ្នាំ២០២១មក។ ក្នុងឆ្នាំ២០២១ ផលនេសាទដាយត្រីទទួលបានចំនួន ៨ ៧០០តោន ឆ្នាំ២០២២ទទួលបានផលត្រីចំនួន ១៣ ០០០តោន ហើយនៅឆ្នាំ២០២៣នេះ ផលនេសាទដាយត្រីរំពឹងថា នឹងកើនដល់ ១៣ ៦៥០តោន៕

The post ​ពេលវេលាត្រីប្រហុក ត្រូវលើកទី២ នៅដើមខែខ្នើតក្រោយ​ appeared first on Kampuchea Thmey Daily.

លោក ស្រី សមវិចិត្រ នាយខណ្ឌរដ្ឋបាលជលផលស្ទឹងត្រែងបានឲ្យដឹងនៅថ្ងៃទី ២៥ ខែធ្នូនេះថា ផលនេសាទសម្រាប់ខេត្តស្ទឹងត្រែងគិតត្រឹមចុងឆ្នាំ ២០២៣ មានបរិមាណជាង ៤ ២០០ តោន កើនឡើងជាងឆ្នាំ ២០២២ ប្រមាណ ១០០តោន។

លោកថា ផលត្រីនេះគឺបានផ្ដត់ផ្គង់ចែកចាយនៅក្នុងខេត្តខ្លះ និងលក់ទៅបណ្ដាខេត្តផ្សេងៗ តាមរយៈភ្ញៀវទេសចរ និងតម្រូវការប្រជាជនតាមបណ្ដារាជធានីខេត្តផ្សេងៗ ដូចជា រាជធានីភ្នំពេញ ខេត្តកណ្ដាល កំពង់ចាម ត្បូងឃ្មុំ កំពង់ធំ សៀមរាប រតនៈគីរី និងខេត្តព្រះវិហារជាដើម ហើយជាពិសេសគឺទិញតាមប្រព័ន្ធទំនាក់ទំនងសង្គម (online)។

លោកនាយខណ្ឌជលផលបានបញ្ជាក់ថា លទ្ធផលដែលយើងទទួលបានច្រើននៅឆ្នាំនេះក៏ដោយសារការខិតខំប្រឹងប្រែងរបស់អ្នកពាក់ព័ន្ធគ្រប់ស្ថាប័ន ទាំងអាជ្ញាធរ កងកម្លាំង ឆ្មាំទន្លេ និងសហគមន៍នេសាទ រួមផ្សំនឹងការខិតខំបង្ក្រាប និងទប់ស្កាត់បទល្មើសជលផលនៅបឹងទន្លេសាប និងខេត្តផ្សេងៗ ក្នុងរយៈពេលបិទនេសាទ និងពេលត្រីធ្វើចរាចរឡើងមកតំបន់ទន្លេមេគង្គប៉ែកខាងលើនៃខេត្តក្រចេះ និងស្ទឹងត្រែង។

លោកនាយខណ្ឌរដ្ឋបាលជលផល កោតសរសើរ លើកទឹកចិត្ត និងសំណូមពរដល់អាជ្ញាធរ កងកម្លាំង ឆ្មាំទន្លេ និង​សហគមន៍នេសាទ ព្រមទាំងអ្នកពាក់ព័ន្ធផ្សេងៗទៀត បន្តចូលរួមទប់ស្កាត់បទល្មើសជលផលគ្រប់ប្រភេទដោយស្មារតីទទួលខុសត្រូវ ជួយការពារកន្លែងអភិរក្សផ្សេងៗ កុំនេសាទផ្ទុយពីច្បាប់ស្ដីពីជលផល និងលិខិតបទដ្ឋាន​គតិយុត្តិពាក់ព័ន្ធ រួមគ្នាលែងនូវត្រីមេពូជ និងប្រភេទធនធានជលផលកម្រកំពុងរងគ្រោះថ្នាក់ចូលទៅក្នុងដែនទឹកធម្មជាតិវិញ ដើម្បីឲ្យធន​ធានជលផលយើងមាននិរន្តរភាពដល់កូនចៅជំនាន់ក្រោយតម្រូវការអាហារប្រចាំថ្ងៃ។

អ្នកលក់ត្រីនៅផ្សារសាមគ្គីខេត្តស្ទឹងត្រែងបាននិយាយស្រដៀងគ្នាថា ត្រីទន្លេខេត្តស្ទឹងត្រែងមានរសជាតិឆ្ងាញ់ដោយសារ​វារស់តាមបែបធម្មជាតិត្រីតូចធំតម្លៃក៏មិនខុសគ្នាពីតម្លៃសាច់ជ្រូក សាច់គោប៉ុន្មានដែរវាប្រហាក់ប្រហែលគ្នា ដូចជាត្រីឆ្ពិន ១គីឡូ ១០.០០០ ម៉ឺន ទៅ ១៥.០០០រៀល ត្រីព្រួល ២០.០០០ ម៉ឺន ទៅ៣០០០០រៀលក្នុងមួយគីឡូក្រាម។ លើកលែង​តែត្រីប៉ាវ៉ាមុខពីរ និងត្រីប៉ាសុីអ៊ីធំៗទេវាមានតម្លៃខ្ពស់។

លោក ពក វណ្ណៈ សហគមន៍កោះសំពាយ ស្រុកសៀមបូក បានរៀបរាប់ឲ្យដឹងថា បច្ចុប្បន្ននេះក្នុងសហគមន៍របស់លោកសង្កេតឃើញមានវត្តមានត្រីច្រើនជាងឆ្នាំកន្លងទៅលេចមុខប្រភេទត្រីឆ្ពិន ត្រីព្រួល និងត្រីប៉ាវ៉ាមុខពីរជាពិសេសត្រីប៉ាស៊ីអ៊ីក៏មានធំដែរ។

ចំពោះការកើនឡើងត្រីបែបនេះលោកយល់ថា អាចបណ្ដាលមកពីកក្តាជាច្រើន សមត្ថកិច្ចពាក់ព័ន្ធមានវិធានការតឹងរឹងនៅពេលរដូវបិទនេសាទ។ ប្រជាពលរដ្ឋនៅក្នុងសហគមន៍យល់ដឹងកាន់តែច្រើនពីការប្រើប្រាស់ឧបករណ៍ល្មើសច្បាប់បំផ្លាញធនធានជលផល។

លោក ពក វណ្ណៈបាននិយាយទៀតថា ក្នុងនាមលោកផ្ទាល់ក៏ធ្លាប់ប្រើឧបករណ៍ឆក់ត្រីផងដែរកាលពីច្បាប់នៅធូររលុងប៉ុន្តែក្រោយមកលោកបោះបង់ការនេសាទខុសច្បាប់ហើយងាកមកចូលរួមដោយស្ម័គ្រចិត្តការពារសម្បត្តិធនធានធម្មជាតិដើម្បីឲ្យវាសម្បូរគង់វង្សរក្សាទុកដល់ក្មេងជំនាន់ក្រោយ។

ម្យ៉ាងវិញទៀតកន្លងមកនេះ មន្ត្រីជំនាញជលផលដឹកនាំការងារដោយផ្ទាល់ជាមួយសហគមន៍ចុះល្បាតបានច្រើនលើកហើយក៏មានការសហការល្អជាមួយកម្លាំងប៉ុស្តិ៍រដ្ឋបាលនៅតាមមូលដ្ឋាន។

ក្រៅពីនេះអង្គការក៏បានជួយជ្រោមជ្រែងជាថវិកា ប្រេងដែលជាមធ្យោបាយដ៏សំខាន់បំផុតទៅដល់សហគមន៍ទើបធ្វើឲ្យមានលទ្ធភាពចុះល្បាតញឹកញាប់នៅក្នុងរដូវបិទនេសាទត្រីបន្តពូជ។

ការផ្សព្វផ្សាយអប់រំដល់ប្រជាពលរដ្ឋ និងការល្បាតញឹកញាប់ធ្វើឲ្យបទល្មើសមានការថយចុះ។ ផលត្រីក៏ចាប់ផ្ដើមមានសន្ទុះកើតឡើងវិញក្នុងឆ្នាំនេះ។

លោក ពក វណ្ណៈ រំពឹងយ៉ាងមុតមាំថា បើសិនជាមានការចូលរួមទាំងអស់គ្នាមិនប្រើប្រាស់នូវឧបករណ៍ល្មើសច្បាប់ផ្សេងៗធ្វើឲ្យប៉ះពាល់ទៅដល់ធនធានជល និងមានការចូលរួមអភិរក្សទាំងអស់គ្នានោះត្រីធម្មជាតិនឹងកាន់តែសម្បូរឡើងវិញនៅឆ្នាំបន្តបន្ទាប់ទៀត។ ធនធានធម្មជាតិនេះបានជួយលើកស្ទួយសេដ្ឋកិច្ចគ្រួសារនិងសង្គមរបស់អ្នកខេត្តស្ទឹងត្រែង៕

អត្ថបទ៖ ងិនលីម

The post ផលនេសាទ ​នៅខេត្តស្ទឹងត្រែង ​ទទួលបានជាង​ ៤ ២០០ តោន ​កើនឡើងជាងឆ្នាំមុន appeared first on Kampuchea Thmey Daily.

បើទោះបីកន្លងទៅ​អាជ្ញាធរខេត្តចាត់វិធានការបង្ក្រាបការ​នេសាទ​ខុស​ច្បាប់ជាបន្តបន្ទាប់ តែបទល្មើសនៅតែកើត​ឡើង​ដោយពលរដ្ឋ​លើក​ជា​សំនួរថា តើមកពីកត្តាអ្វី?

ពាក់ព័ន្ធករណីខាងលើនេះ លោក ពុំ ចិន មេឃុំកោះជីវាំង បានប្រាប់កម្ពុជាថ្មីឲ្យដឹងនៅរសៀលថ្ងៃទី៣០ ខែមករានេះថា ឆ្នាំនេះផល​នេសាទ​បានប្រសើរជាងឆ្នាំមុនបន្តិចប៉ុណ្ណោះ គឺរកបានខ្លះនៅមានទឹកច្រើនដល់ពេលទឹកស្រកគឺរកមិនបាននោះទេ។

លោកបានលើកឡើងប្រហាក់ប្រហែលប្រជាសហគមន៍ដែរថា ផល​ត្រី​នៅ​តែ​មិន​សូវ​សំបូរ​ដោយសារ​បទល្មើសនេសាទ​នៅតែកើតមាន បើទោះបីមានសកម្មភាពបង្ក្រាបខ្លះ ក៏ឈ្មួញខិលខូចនៅតែបន្តសកម្មភាពដដែល។

ការលើកឡើងពីលោកមេឃុំរូបនេះ ក៏មិនខុសពីការលើកឡើងរបស់លោក តុន ណៃ ប្រធានសហគមន៍អេកូទេសចរណ៍​បឹងទន្លេសាប​នោះទេ ដោយលោកមើលឃើញថា ផលត្រី​សម្រាប់​ធ្វើ​ប្រហុកផ្អកឆ្នាំនេះមានការខ្វះខាតដូច​ឆ្នាំកន្លងទៅ​ដែរ ខណះបទល្មើសនៅតែកើតមានឡើងមិនឈប់ឈរ ដែលធ្វើឲ្យប៉ះពាល់ដល់កំណើនមច្ចាជាតិយ៉ាងធ្ងន់ធ្ងរ។

យ៉ាងណាមិញ លោក ជួង សុភា នាយខ័ណ្ឌរដ្ឋបាលជល់ផលខេត្តបានឲ្យកម្ពុជាថ្មីបញ្ជាក់ថា ក្រោយ​ពីមានការបង្ក្រាបជាបន្តបន្ទាប់ចំនួនត្រីបានកើនឡើងប្រមាណ ១៥ភាគរយក្នុងឆ្នាំ២០២២។

លោកបន្តថា កត្តាដែលធ្វើឲ្យចំនួនត្រីកើនឡើងគឺលោកបានសម្គាល់លើ៣ចំណុចគឺទី១-ទប់ស្កាត់បទល្មើសតាមរយះការដកហូតដីព្រៃអភិរក្សពីប្រជាកសិករដែលបានកាប់ដុតទន្ទ្រានកន្លងទៅ។ ទី២-ទប់ស្កាត់បទល្មើសដោយចុះបង្ក្រាបជាបន្តបន្ទាប់លើគោលដៅសំខាន់ៗ និងទី៣-គឺកត្តាទឹកធំដែលបង្កឲ្យត្រីមានកំណើន ហើយរដូវដែលប្រជានេសាទប្រមូលផលត្រីធ្វើប្រហុកផ្អកគឺមានតែ២ខែប៉ុណ្ណោះគឺក្នុងខែ១១និងខែ១២រហូតដល់ខែ១នេះត្រីបានស្បើយហើយរកមិនសូវបានទេ។

លោកបន្តថា ការពង្រឹងបទល្មើសនេសាទនៅតែជាប្រធានបទក្តៅនៅឡើយ។ ខាងមន្ត្រីជំនាញពាក់ព័ន្ធនៅតែបន្តចុះបង្ក្រាប​​ខណះដែលក្រសួងនៅតែរឹតបន្តឹង ដោយ​ខាងក្រសួងបានអញ្ជើញអាជ្ញាធរខេត្តនិងមន្ត្រីនៃមន្ទីរជំនាញនៅជាប់បឹងទន្លេសាបទាំងអស់ជួបប្រជុំដាក់ផែនការពង្រឹងបន្ថែមទៀតលើបទល្មើសពាក់ព័ន្ធផងដែរ៕

អត្ថបទ៖ សៅ សារិទ្ធ

The post ប្រជានេសាទលក្ខណៈគ្រួសារ​ខេត្ត​បាត់ដំបង នៅតែខ្វះខាតត្រីធ្វើប្រហុកផ្អក appeared first on Kampuchea Thmey Daily.

លោក អ៊ឹង ទ្រី អនុប្រធាន​រដ្ឋបាល​ជលផល មានប្រសាសន៍ប្រាប់កម្ពុជាថ្មី នៅថ្ងៃទី ៣ ខែមករា ឆ្នាំ ២០​២៣នេះថា ការនេសាទត្រីប្រហុក និងការធ្វើត្រីប្រហុក មិនទាន់ការបញ្ចប់ទេ មកទល់នឹងថ្ងៃអង្គារនេះ គ្រាន់តែទិន្នផលត្រីមានការថយចុះប៉ុណ្ណោះ។

លោក អ៊ឹង ទ្រី បានឲ្យដឹងយ៉ាងដូច្នេះថា «គេអត់និយាយរឿងបញ្ចប់ គឺអត់បញ្ចប់ទេ ព្រោះអីនេះស៊ីសងត្រីវាឡើងដល់ត្រឹមណា ជាទូទៅខ្នើតហ្នឹងវាមានតែ ៣ថ្ងៃទេ ដែលវាត្រូវច្រើនជាងគេ អញ្ចឹងគឺខ្នើតហ្នឹងវាចាប់ផ្ដើមតាំងពីថ្ងៃនេះហ្នឹង (២៩ ធ្ន ២០២២) ឥឡូវនេះ ថ្ងៃនេះ ហាក់ដូចជាត្រីរាងថយចុះហើយ អញ្ចឹងត្រីប្រហុក មួយខ្នើតវាត្រូវ ៣ថ្ងៃហ្នឹង អាហ្នឹងគេហៅថា ដល់កំពូលតែប៉ុណ្ណឹងឯង»។

លោកអនុប្រធាន​រដ្ឋបាល​ជលផល បានឲ្យដឹងបន្តថា មកដល់ថ្ងៃទី ៣ ខែមករា ឆ្នាំ ២០២៣នេះ ប្រជានេសាទ នៅតែអាចបន្តនេសាទបាន ​និងអ្នកចង់ធ្វើត្រីប្រហុក នៅតែអាចបន្តធ្វើបានទៀត គ្រាន់តែទិន្នផលមានការថយចុះជាងមុន តែមិនមែនមានន័យថា ការនេសាទ និងការធ្វើត្រីប្រហុក ត្រូវបញ្ចប់នោះទេ។

លោក អ៊ឹង ទ្រី បានឲ្យដឹងទៀតថា សម្រាប់នៅខ្នើតក្រោយ ប្រសិនបើផ្ទៃមេឃស្រឡះល្អ​ មិនមានភ្លៀងធ្លាក់ទេនោះ ការនេសាទត្រីសម្រាប់ធ្វើប្រហុក នឹងត្រូវចាប់ផ្ដើមម្ដងទៀត។ សម្រាប់ខ្នើតដំបូងនារដូវនេសាទឆ្នាំ ២០២២-២០២៣នេះ ទិដ្ឋផលត្រីប្រហុក ឬផ្អក ​មានការកើនឡើងជាងឆ្នាំកន្លងទៅ។ រាជធានី-ខេត្ត ដែលអាចនេសាទត្រីប្រហុក និងធ្វើត្រីប្រហុកបាន រួមមាន៖ រាជធានីភ្នំពេញ, ខេត្តកណ្ដាល, តាកែវ, និងខេត្តកំពង់ឆ្នាំង ជាដើម។

សូមជម្រាបថា កាលពីថ្ងៃទី ២៨ ខែធ្នូ​ ឆ្នាំ ២០២២កន្លងទៅនេះ រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានជូនដំណឹងថា ក្នុងរដូវនេសាទឆ្នាំ ២០២២-២០២៣ តាមការសង្កេត ត្រីចាប់ផ្តើមបន្លាស់ ទីចេញពីបឹងទន្លេសាប បឹង ស្ទឹង និងព្រែកនានា ចូលទន្លេសាប ទន្លេមេគង្គ និងទន្លេបាសាក់ ដែលអំណោយផលដល់ការធ្វើនេសាទបានត្រីច្រើន ជាពិសេសគន្លងដាយត្រីតាមដងទន្លេ​សាប នៅក្នុងភូមិសាស្ត្រខេត្តកណ្តាល និងរាជធានីភ្នំពេញ ពីថ្ងៃ ៧កើត ដល់ថ្ងៃ ១២កើត ខែបុស្ស ត្រូវនឹងថ្ងៃទី ២៩ ខែធ្នូ ឆ្នាំ ២០២២ ដល់ថ្ងៃទី ៣ ខែមករា ឆ្នាំ ២០២៣ ក្នុងករណីមេឃស្រឡះល្អ គ្មានភ្លៀងកក់ខែ ឬមិនទទួលរងឥទ្ធិពលព្យុះភ្លៀង។

រដ្ឋបាលជលផល បានជម្រាបជូនប្រជាពលរដ្ឋ ដែលមានបំណងធ្វើប្រហុក ផ្អក ត្រីឆ្អើរ ឬទឹកត្រី សូមរួសរាន់អញ្ជើញ មកទិញត្រី តាមពេលវេលា និងទីកន្លែងដូចមានក្នុងសេចក្តីជូនដំណឹងនេះ។ ទន្ទឹមនេះរដ្ឋបាលជលផល ក៏បានសំណូម ពរដល់អាជ្ញាធរមូលដ្ឋាន ឬសមត្ថកិច្ចពាក់ព័ន្ធ សូមបង្កលក្ខណៈងាយស្រួល ជូនដល់ប្រជាពលរដ្ឋបានធ្វើដំណើរ ស្នាក់នៅ និងដឹកជញ្ជូនផល ផលិតផលត្រី ផងដែរ៕

អត្ថបទ៖ ឃួន សុភ័ក្រ

The post មន្ត្រីរដ្ឋបាល​ជលផល ៖ ទិន្នផលនេសាទត្រី សម្រាប់ធ្វើត្រីប្រហុកមានការថយចុះបន្តិច តែមិនទាន់បញ្ចប់នៅឡើយទេ appeared first on Kampuchea Thmey Daily.