ផ្ដន្ទាទោស Archives - Kampuchea Thmey Daily

ផ្ដន្ទាទោសជនជាប់ចោទ ២ នាក់ ដាក់ពន្ធនាគារអស់មួយជីវិត និងពិន័យម្នាក់ៗ ៨០ លានរៀល បង់ចូលថវិការដ្ឋ

អ៊ិន ពិសី — Tue, 13 Aug 2024 08:19:20 +0000

កាលពីរសៀលថ្ងៃទី ១២ ខែសីហា ឆ្នាំ ២០២៤ លោក ធាម ច័ន្ទពិសិដ្ឋ ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ បានប្រកាសសាលក្រមផ្ដន្ទាទោសលើជនជាប់ចោទ ទី០១.ឈ្មោះ អ៊ាន រដ្ឋនី ហៅ ណូ ភេទប្រុស អាយុ ៣៨ ឆ្នាំ ជនជាតិខ្មែរ និង ទី០២.ឈ្មោះ ភ័ណ្ឌ សុគុណ ភេទប្រុស អាយុ ៣១ ឆ្នាំ ជនជាតិខ្មែរ ដាក់ពន្ធនាគារម្នាក់ៗ អស់មួយជីវិត និងពិន័យម្នាក់ៗ ៨០ លានរៀល បង់ចូលថវិការដ្ឋ ក្រោមការចោទប្រកាន់ពីបទ រក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀន ទម្ងន់ ៥៨ គីឡូ និង ៨៤៨ ក្រាម និងបទសម្អាតប្រាក់។

ជនជាប់ចោទទាំង ០២ នាក់ ត្រូវបានចាប់ខ្លួននៅចំណុចដីឡូត៍ទុកចោល មហាវិថី ឈ្នះឈ្នះ ភូមិកប់ស្រូវធំ សង្កាត់គោករកា ខណ្ឌព្រែកព្នៅ រាជធានីភ្នំពេញ កាលពីថ្ងៃទី ០២ ខែសីហា ឆ្នាំ ២០២៣។ ចំណែកវត្ថុតាងចាប់យកមានសារធាតុញៀន(ខេតាមីន) ចំនួន ២០ ដុំ ទម្ងន់ ២០ គីឡូក្រាម ដែលលាក់ទុកក្នុងវ៉ាលិសពណ៌ទឹកប៊ិចចំនួន ០១ និងរថយន្តម៉ាក High Lander ចំនួន ០១ គ្រឿង។ បន្ទាប់មក កម្លាំងជំនាញ បានស្រាវជ្រាវរកឃើញសារធាតុញៀន (មេតំហ្វេតាមីន) ចំនួន ១០ ដុំទៀត ទម្ងន់ ១០ គីឡូក្រាម លាក់ទុកក្នុងបាតរថយន្តកែច្នៃសម្រាប់ដឹកគ្រឿងញៀន។

នៅថ្ងៃទី ០៣ ខែសីហា ឆ្នាំ ២០២៣ វេលាម៉ោង ១២ និង ៣០ នាទី លោកឧត្ដមសេនីយ៍ត្រី គល់ យី បានដឹកនាំកម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលរាជធានីភ្នំពេញ ចុះសហការជាមួយកម្លាំង នៃស្នងការដ្ឋាននគរបាលខេត្តបន្ទាយមានជ័យ និងខេត្តបាត់ដំបង ដើម្បីធ្វើការត្រួតពិនិត្យ និងឆែកឆេរគោលដៅស្តុកគ្រឿងញៀន ចំនួន ០៣ ទីតាំង ដកហូតសារធាតុញៀនចម្រុះចំនួន ១៩ មុខ ទម្ងន់ ២៨ គីឡូក្រាម និង ៧៧៨ ក្រាម និងសារធាតុញៀនប្រភេទ MDMA ទម្ងន់ ១០,៤៨ ក្រាម និងកំណត់បានមុខសញ្ញាមេខ្លោងចំនួន ០២ នាក់ និងបក្ខពួកមួយចំនួនទៀត។ សរុបដកហូតសារធាតុចម្រុះ ទម្ងន់ ៥៨ គីឡូ ៨៤៨ ក្រាម មានសារធាតុញៀន ទម្ងន់ ៣០ គីឡូក្រាម និង ០៧ ក្រាម ក្នុងនោះមាន(ប្រភេទ ខេ ចំនួន ១៩ គីឡូ ៩១៥ ក្រាម, ប្រភេទ ICE ចំនួន ១០ គីឡូ ០៥ ក្រាម, ប្រភេទ MDMA ចំនួន ១០,៤៨ ក្រាម, សារធាតុមិនច្បាស់ ទម្ងន់ ២៨ គីឡូ ៧៧៨ ក្រាម)៕

អត្ថបទ ៖ មករា

The post ផ្ដន្ទាទោសជនជាប់ចោទ ២ នាក់ ដាក់ពន្ធនាគារអស់មួយជីវិត និងពិន័យម្នាក់ៗ ៨០ លានរៀល បង់ចូលថវិការដ្ឋ appeared first on Kampuchea Thmey Daily.

ផ្ដន្ទាទោសបុរស-ស្ត្រីវៀតណាម ៦ នាក់ ដាក់ពន្ធនាគារពី ១៥ ឆ្នាំ ដល់ ២០ ឆ្នាំ

អ៊ិន ពិសី — Thu, 25 Jul 2024 02:38:36 +0000

បុរស-ស្ត្រីជនជាតិវៀតណាមចំនួន ៦ នាក់ ត្រូវបានតុលាការកម្ពុជាកាត់ទោស និងផ្ដន្ទាទោសដាក់ពន្ធនាគារពី ១៥ ឆ្នាំ ដល់ ២០ ឆ្នាំ ពាក់ព័ន្ធបទល្មើសចាប់ឃុំឃាំង និង បង្ខាំងមនុស្សខុសច្បាប់មានស្ថានទម្ងន់ទោស(ធ្វើទារុណកម្មឃោរឃៅលើជនជាតិវៀតណាមដូចគ្នាដើម្បីជំរិតទារប្រាក់)។ ជនជាប់ចោទទាំងអស់ ក៏ត្រូវបានតុលាការសម្រេចបណ្ដេញចេញពីទឹកដីកម្ពុជា ក្រោយអនុវត្តទណ្ឌកម្មទោសចប់។

ជនជាប់ចោទទាំង ៦ នាក់ ដែលតុលាការសម្រេចផ្ដន្ទាទោសនេះរួមមាន ៖ ទី១/ឈ្មោះ LE MING HAU ភេទប្រុស អាយុ ២៦ ឆ្នាំ ត្រូវផ្ដន្ទាទោសដាក់ពន្ធនាគារកំណត់ ១៨ ឆ្នាំ។ ទី២/ឈ្មោះ TRAN VAN CONG ភេទប្រុស អាយុ ៤៤ ឆ្នាំ ត្រូវផ្ដន្ទាទោសដាក់ពន្ធនាគារកំណត់ ១៨ ឆ្នាំ។ ទី៣/ ឈ្មោះ NGUYEN VAN SANG ភេទប្រុស អាយុ ៥១ ឆ្នាំ ត្រូវផ្ដន្ទាទោសដាក់ពន្ធនាគារកំណត់ ១៨ ឆ្នាំ។ ទី៤/ ឈ្មោះ DO LUONG TRUNG ភេទប្រុស អាយុ ២៥ ឆ្នាំ ត្រូវផ្ដន្ទាទោសដាក់ពន្ធនាគារកំណត់ ១៨ ឆ្នាំ។ ទី៥/ឈ្មោះ NGUYEN VAN DUNG ភេទប្រុស អាយុ ៤០ ឆ្នាំ ត្រូវផ្ដន្ទាទោសដាក់ពន្ធនាគារកំណត់ ២០ ឆ្នាំ។ ទី៦/ឈ្មោះ THANH THUY ភេទស្រី អាយុ ៤១ ឆ្នាំ ត្រូវផ្ដន្ទាទោសដាក់ពន្ធនាគារកំណត់ ១៥ ឆ្នាំ។

លោក កេត សុជាតិ ប្រធានក្រុមប្រឹក្សាជំនុំជម្រះក្នុងរឿងក្ដីនេះបានបញ្ជាក់ថា ក្នុងករណីជនជាប់ចោទកើតទុក្ខមិនសុខចិត្តនឹងសាលក្រមសម្រេចបែបនេះ ពួកគេអាចប្ដឹងសាលាឧទ្ធរណ៍បានតាមកំណត់ច្បាប់។

សូមបញ្ជាក់ថា រឿងក្ដីជនជាតិវៀតណាមចាប់បង្ខាំងជនជាតិវៀតណាមដូចគ្នា ដើម្បីជំរិតទារប្រាក់នេះ ត្រូវបានក្រុមប្រឹក្សាសាលាដំបូងរាជធានីភ្នំពេញ ដឹកនាំដោយលោកចៅក្រម កេត សុជាតិ និងតំណាងអយ្យការ លោក ស៊ីន រក្សា បើកសវនាការ កាលពីថ្ងៃទី ១០ ខែកក្កដា ឆ្នាំ ២០២៤ កន្លងទៅ ហើយទើបតែលើកមកប្រកាសសាលក្រម នារសៀលថ្ងៃទី ២៤ ខែកក្កដា ឆ្នាំ ២០២៤ នេះ។

គួររំលឹកថា នគរបាលការិយាល័យព្រហ្មទណ្ឌកម្រិតស្រាល នៃនាយកដ្ឋានព្រហ្មទណ្ឌក្រសួងមហាផ្ទៃ កាលពីថ្ងៃទី ១៥ ខែឧសភា ឆ្នាំ ២០២៣ បានចាប់ខ្លួនជនជាតិវៀតណាមប្រុស-ស្រីចំនួន ៦ នាក់ បញ្ជូនមកសាលាដំបូងរាជធានីភ្នំពេញ ពាក់ព័ន្ធករណីបង្ខាំងធ្វើទារុណកម្ម និង ជំរិតទារប្រាក់ពីជនរងគ្រោះជាជនជាតិវៀតណាមដូចគ្នា។

តាមរបាយការណ៍របស់តុលាការក្នុងពេលជំនុំជម្រះបានឲ្យដឹងថា ការចាប់ខ្លួនជនសង្ស័យជាក្រុមចាប់ជំរិតខាងលើ ធ្វើឡើងតាមពាក្យបណ្ដឹងរបស់ជនរងគ្រោះឈ្មោះ TRUONG VANCAN ភេទប្រុស ជាជនជាតិវៀតណាមដូចគ្នា បានប្ដឹងចោទប្រកាន់ជនសង្ស័យទាំង ៦ នាក់ ពីបទចាប់បង្ខាំង ធ្វើ ទារុណកម្ម និងជំរិតទារប្រាក់ កាលពីថ្ងៃទី ០៨ ខែឧសភា ឆ្នាំ ២០២៣ ប្រព្រឹត្តនៅរាជធានីភ្នំពេញ។

ក្រោយពីទទួលបានពាក្យបណ្ដឹង នាយកដ្ឋាននគរបាលព្រហ្មទណ្ឌ បានដឹកនាំកម្លាំងបើកការស៊ើបអង្កេត និង ស្រាវជ្រាវ រយៈពេលច្រើនថ្ងៃ ទើបឈានដល់ការចាប់ខ្លួនជនសង្ស័យទាំង ៦ នាក់នោះ។

បន្ទាប់ពីចាប់ខ្លួនយោងតាមពាក្យបណ្ដឹង និង ចម្លើយជនសង្ស័យទាំងអស់ស៊ីសង្វាក់ពាក់ព័ន្ធទៅនឹងបទល្មើស សមត្ថកិច្ចបានកសាងសំណុំរឿងបញ្ជូនជនសង្ស័យមកសាលាដំបូងរាជធានីភ្នំពេញ សម្រេចចោទប្រកាន់ឃុំខ្លួនបណ្ដោះអាសន្ន និងផ្ដន្ទាទោសតាមច្បាប់កម្ពុជានាពេលនេះ៕

អត្ថបទ ៖ មករា

The post ផ្ដន្ទាទោសបុរស-ស្ត្រីវៀតណាម ៦ នាក់ ដាក់ពន្ធនាគារពី ១៥ ឆ្នាំ ដល់ ២០ ឆ្នាំ appeared first on Kampuchea Thmey Daily.

ផ្ដន្ទាទោសបុរសម្នាក់ ដាក់ពន្ធនាគារ ១០ ឆ្នាំ ពីបទ«ប៉ុនប៉ងឃាតកម្ម»

អ៊ិន ពិសី — Wed, 06 Sep 2023 06:50:26 +0000

អតីតបុគ្គលិកក្រុមហ៊ុនឯកជនម្នាក់ ត្រូវបានចៅក្រមសាលាដំបូងរាជធានីភ្នំពេញ ប្រកាសសាលក្រមសម្រេចផ្ដន្ទាទោសដាក់ពន្ធនាគារកំណត់ ១០ ឆ្នាំ ក្រោមការចោទប្រកាន់ពីបទ «ប៉ុនប៉ងឃាតកម្ម» យកដែកស្រួចចាក់បុរសម្នាក់ បណ្ដាលឲ្យមានរបួសធ្ងន់ធ្ងរ។

ជនជាប់ចោទដែលតុលាការផ្ដន្ទាទោសនេះ ឈ្មោះ សេន អាត ភេទប្រុស អាយុ ៥៦ ឆ្នាំ រស់នៅចំណុចផ្លូវ ៣៧១ សង្កាត់បឹងទំពន់ទី ២ ខណ្ឌមានជ័យ រាជធានីភ្នំពេញ។

រឿងក្ដីប៉ុនប៉ងឃាតកម្មនេះ ត្រូវបាន លោកស្រីចៅក្រម គឹម សុគន្ធា និងលោក ស៊ន មុនី ជាតំណាងអយ្យការ លើកយកបើកសវនាការ កាលពីថ្ងៃទី ២២ ខែសីហា ឆ្នាំ ២០២៣ កន្លងទៅ និងសម្រេចប្រកាសសាលក្រម នាថ្ងៃទី ០៦ ខែកញ្ញា ឆ្នាំ ២០២៣ នេះ។

នៅក្នុងសវនាការ ជនជាប់ចោទ បានសារភាពថា ខ្លួនពិតជាបានយកដែកស្រួចចាក់ទៅលើជនរងគ្រោះមែន។ ពេលនោះ ដោយសារជនរងគ្រោះមកលួចយកអីវ៉ាន់ពីកន្លែងខ្លួនយាមច្រើនដងមកហើយ លុះដល់ថ្ងៃកើតហេតុ ខ្លួនទាន់កំពុងលួចទៀត ក៏មានការប្រតាយប្រតប់គ្នា ហើយខ្លួនក៏ចាក់ជននោះមួយដែកស្រួច បណ្ដាលឲ្យមានរបួសទៅ នៅចំណុចការ៉ាស់សាំង PTT ផ្លូវ ៣៧១ ភូមិត្នោតជ្រុំ ៤ សង្កាត់បឹងទំពន់ទី ២ ខណ្ឌមានជ័យ រាជធានីភ្នំពេញ កាលពីវេលាម៉ោង ១៩ និង ០០ នាទី ថ្ងៃទី ២៧ ខែមីនា ឆ្នាំ ២០២៣។

ជនរងគ្រោះឈ្មោះ យាន ឡាយ ភេទប្រុស អាយុ ៣៤ ឆ្នាំ ជនជាតិខ្មែរ ស្នាក់នៅផ្ទះជួល ផ្លូវ ៧០៥ ភូមិត្នោតជ្រុំ ៤ សង្កាត់បឹងទំពន់ទី ២ ខណ្ឌមានជ័យ រាជធានីភ្នំពេញ មុខរបររើសអេតចាយ។ ក្រោយកើតហេតុ ក៏ត្រូវប៉ូលិសចាប់ខ្លួនបញ្ជូនឡើងតុលាការឃុំខ្លួនដល់បច្ចុប្បន្ន៕

អត្ថបទ ៖ មករា

The post ផ្ដន្ទាទោសបុរសម្នាក់ ដាក់ពន្ធនាគារ ១០ ឆ្នាំ ពីបទ«ប៉ុនប៉ងឃាតកម្ម» appeared first on Kampuchea Thmey Daily.

ផ្ដន្ទាទោសឈ្មួញគ្រឿងញៀន ២ នាក់ ម្នាក់ជាប់គុក ១ ជីវិត និងម្នាក់ទៀតជាប់ ២៥ ឆ្នាំ

អ៊ិន ពិសី — Thu, 29 Jun 2023 03:49:57 +0000

លោក សុង ប៊ុណ្ណារិទ្ធិ ចៅក្រមជំនុំជម្រះសាលាដំបូងរាជធានីភ្នំពេញ កាលពីព្រឹកថ្ងៃទី ២៨ ខែមិថុនា ឆ្នាំ ២០២៣ បានប្រកាសសាលក្រមផ្ដន្ទាទោសលើសំណុំរឿងឈ្មួញគ្រឿងញៀន ២ នាក់ ដោយម្នាក់ដាក់គុកអស់មួយជីវិត និងម្នាក់ទៀតឲ្យជាប់ក្នុងពន្ធនាគារ ២៥ ឆ្នាំ និងពិន័យជាប្រាក់ចូលថវិការដ្ឋ ក្នុងម្នាក់ ៤០ លានរៀល ពីបទ«រក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀន»។

សាលក្រមបានប្រកាសធ្វើឡើងជាសាធារណៈ និងទុកសិទ្ធិឲ្យប្ដឹងឧទ្ធរណ៍តាមកំណត់ច្បាប់ បើសិនភាគីណាមួយកើតទុក្ខមិនសុខចិត្តចំពោះក្ដីនេះ។ ជនជាប់ចោទ ២ នាក់ ម្នាក់ឈ្មោះ ហ៊ីម ឆេងហ៊ួរសុដាវីដ ភេទប្រុស អាយុ ២២ ឆ្នាំ ត្រូវបានសាលក្រមផ្ដន្ទាទោសដាក់ពន្ធនាគារអស់មួយជីវិត និងពិន័យជាប្រាក់ចំនួន ៤០ លានរៀល។ ចំណែកម្នាក់ទៀតឈ្មោះ ហ៊ាត រ៉ូ ហៅ តោ ភេទប្រុស អាយុ ២៧ ឆ្នាំ សាលក្រមផ្ដន្ទាទោសដាក់ពន្ធនាគារ ២៥ ឆ្នាំ និងពិន័យជាប្រាក់ចំនួន ៤០ លានរៀល។

សូមជម្រាបថា កាលពីថ្ងៃទី ៧ ខែសីហា ឆ្នាំ ២០២២ កម្លាំងសមត្តកិច្ចកងរាជអាវុធហត្ថរាជធានីភ្នំពេញ បានបញ្ជូនឈ្មួញគ្រឿងញៀន ២ នាក់ និងសារធាតុញៀនជាង ២៦ គីឡូក្រាម ទៅតុលាការ ដើម្បីចោទប្រកាន់ជាផ្លូវការ និងឃុំខ្លួនជនសង្ស័យដាក់ពន្ធនាគារជាបណ្ដោះអាសន្ន។

ទាក់ទិននឹងការនាំខ្លួនឈ្មួញគ្រឿងញៀន ២ នាក់ ទៅតុលាការនោះ ដោយអនុវត្តតាមការណែនាំរបស់លោកនាយឧត្ដមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស និងក្រោមការបញ្ជាផ្ទាល់ពីលោកឧត្ដមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស មេបញ្ជាការ កងរាជអាវុធហត្ថរាជធានីភ្នំពេញ សារធាតុញៀនជាច្រើនប្រភេទ សរុប ២៦ គីឡូ ២ ខាំ (២៦.១៩៩៨ គីឡូក្រាម) ត្រូវបានអាវុធហត្ថរាជធានីភ្នំពេញ និងខណ្ឌពោធិ៍សែនជ័យ ដឹកនាំផ្ទាល់ដោយលោកវរសេនីយ៍ឯក ជឹម ឬទ្ធី មេបញ្ជាការ អាវុធហត្ថខណ្ឌពោធិ៍សែនជ័យ បានបើកការស៊ើបអង្កេតស្រាវជ្រាវអស់រយៈពេលជាច្រើនខែ ទើបមានភស្តុតាងកំណត់មុខសញ្ញាបានជាក់លាក់ ឈានដល់ការបង្ក្រាបជាក់ស្ដែង កាលពីវេលាម៉ោង ២០ និង ៤៥ នាទីយប់ ថ្ងៃទី ០៤ ខែសីហា ឆ្នាំ ២០២២ នៅចំណុចផ្ទះលេខ A6-1577 ផ្លូវបេតុង ភូមិព្រៃល្វា សង្កាត់ចោមចៅ ២ ខណ្ឌពោធិ៍សែនជ័យ រាជធានីភ្នំពេញ និងបានឃាត់ខ្លួនជនសង្ស័យ ២ នាក់ ម្នាក់ឈ្មោះ ហ៊ីម ឆេងហ៊ួរសុដាវីដ និង ឈ្មោះ ហ៊ាត រ៉ូ ហៅតោ នេះ។ ពេលឃាត់ខ្លួនជនសង្ស័យ សមត្ថកិច្ចបានធ្វើការដកហូតវត្ថុតាងរួមមាន ៖ សារធាតុញៀនចម្រុះសរុបជាង ២៦ គីឡូក្រាម, សារធាតុផ្សំជាវត្ថុរាវ ចំនួន ១៥ ដប, ជញ្ជីងថ្លឹងចំនួន ០៥, ម៉ាស៊ីនសម្រាប់លាយថ្នាំញៀន ចំនួន ០២ គ្រឿង, ម៉ាស៊ីនសម្រាប់អ៊ុតថង់ប្លាស្ទិកចំនួន ០៥ គ្រឿង, និងឧបករណ៍វេចខ្ចប់មួយចំនួនទៀត។

ការបង្ក្រាបឈានដល់ឃាត់ខ្លួនជនសង្ស័យទាំង ២ នាក់នេះ ត្រូវបានសមត្ថកិច្ចមូលដ្ឋានអាវុធហត្ថខណ្ឌពោធិ៍សែនជ័យ សហការជាមួយកម្លាំងជំនាញ នៃការិយាល័យប្រឆាំងបទល្មើសគ្រឿងញៀន កងរាជអាវុធហត្ថរាជធានីភ្នំពេញ និងកម្លាំងមូលដ្ឋានកងរាជអាវុធហត្ថខណ្ឌ ៧ មករា ក្រោយការសម្របសម្រួលពីស្ថាប័នអយ្យការអមសាលាដំបូងរាជធានីភ្នំពេញផងដែរ៕

អត្ថបទ ៖ មករា

The post ផ្ដន្ទាទោសឈ្មួញគ្រឿងញៀន ២ នាក់ ម្នាក់ជាប់គុក ១ ជីវិត និងម្នាក់ទៀតជាប់ ២៥ ឆ្នាំ appeared first on Kampuchea Thmey Daily.

ផ្ដន្ទាទោសបុរសជនជាតិថៃម្នាក់ និងខ្មែរម្នាក់ ដាក់ពន្ធនាគារអស់មួយជីវិត

អ៊ិន ពិសី — Wed, 15 Mar 2023 06:34:24 +0000

លោក ញឹម ពិសាល ប្រធានក្រុមប្រឹក្សាជំនុំជម្រះ សាលាដំបូងរាជធានីភ្នំពេញ និងលោក សម ឬទ្ធីវាសនា ជាតំណាងអយ្យការ កាលពីព្រឹកថ្ងៃទី ១៥ ខែមីនា ឆ្នាំ ២០២៣ នេះ បានប្រកាសសាលក្រមសម្រេចផ្ដន្ទាទោសបុរសជនជាតិថៃម្នាក់ និងខ្មែរម្នាក់ ដាក់ពន្ធនាគារកំណត់អស់មួយជីវិត និងពិន័យប្រាក់ក្នុងម្នាក់ៗចំនួន ៦០ លានរៀល ក្រោមការចោទប្រកាន់ពីបទ«រក្សាទុក ដឹកជញ្ជូន និងជួញដូរសារធាតុញៀន និងបទ កាន់កាប់ ប្រើប្រាស់អាវុធគ្មានការអនុញ្ញាត»។

ជនជាប់ចោទទាំង ២ នាក់ ដែលតុលាការកម្ពុជាផ្ដន្ទាទោសយ៉ាងធ្ងន់ធ្ងរនេះ ទី១/ ឈ្មោះ គឹម សំភោគ ភេទប្រុស អាយុ ៣៨ ឆ្នាំ ជនជាតិខ្មែរ។ ទី២/ ឈ្មោះ ប្រាក់ សឺត ភេទប្រុស អាយុ ៥៤ ឆ្នាំ ជនជាតិថៃ។ តុលាការ សម្រេចបើកផ្លូវប្ដឹងឧទ្ធរណ៍តាមកំណត់ច្បាប់ បើមិនសុខចិត្ត។

ពួកគេទាំង ២ នាក់ ត្រូវបានតុលាការបើកសវនាការសួរដេញដោលជាច្រើនលើកចាប់តាំងពីថ្ងៃទី ២០ ខែធ្នូ ឆ្នាំ ២០២២ រហូតដល់ពាក់កណ្ដាលខែមីនា ឆ្នាំ ២០២៣ នេះ ដោយតុលាការបានចោទប្រកាន់ពួកគេ ពីបទ រក្សាទុក ដឹកជញ្ជូន និង ជួញដូរ ដោយខុសច្បាប់នូវសារធាតុញៀន និងបទកាន់កាប់ប្រើប្រាស់អាវុធដោយគ្មានការអនុញ្ញាត តាមមាត្រា ៤០ និង មាត្រា ២០ នៃច្បាប់ ស្ដីពីការត្រួតពិនិត្យគ្រឿងញៀន និងច្បាប់ស្ដីពីការគ្រប់គ្រងអាវុធ គ្រឿងផ្ទុះ និងគ្រាប់រំសេវ។

សូមរំលឹកថា សមត្ថកិច្ច នៃមន្ទីរប្រឆាំងគ្រឿងញៀន បានបង្ក្រាបឈ្មោះ ប្រាក់ សឺត និង ឈ្មោះ គឹម សំភោគ ហើយពួកគេបានបាញ់តដៃជាមួយសមត្ថកិច្ច កាលពីរសៀលថ្ងៃទី ១៨ ខែសីហា ឆ្នាំ ២០២១។ ពេលនោះសមត្ថកិច្ចចាប់យកវត្ថុតាងសារធាតុញៀនប្រភេទមេតំហ្វេតាមីន (ICE) ចំនួន ២៤ កញ្ចប់ធំ ទម្ងន់ប្រមាណជាង ២៤ គីឡូក្រាម។

ថ្នាំញៀនប្រភេទអ៊ិចស្តាស៊ី (MDMA) ១៤ កញ្ចប់ ទម្ងន់ប្រមាណ ៤ គីឡូក្រាម ព្រមទាំងសម្ភារៈចាប់យកមាន រថយន្ត ៤ គ្រឿង, ទូរស័ព្ទ ៦ គ្រឿង អាវុធខ្លីម៉ាករ៉ូឡូ ១ ដើម សំបកគ្រាប់ ៣ គ្រាប់ និង គ្រាប់មិនទាន់បាញ់ ៣ គ្រាប់៕

អត្ថបទ ៖ មករា

The post ផ្ដន្ទាទោសបុរសជនជាតិថៃម្នាក់ និងខ្មែរម្នាក់ ដាក់ពន្ធនាគារអស់មួយជីវិត appeared first on Kampuchea Thmey Daily.

ផ្ដន្ទាទោសឃាតកស្រលាញ់ភេទដូចគ្នាសម្លាប់គូស្នេហ៍ ដាក់ពន្ធនាគារអស់មួយជីវិត

អ៊ិន ពិសី — Mon, 30 Jan 2023 07:00:13 +0000

លោក ទីវ គឹមពិសាល ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ កាលពីព្រឹកថ្ងៃទី ៣០ ខែមករា ឆ្នាំ ២០២៣ នេះ បានប្រកាសសាលក្រមសម្រេចផ្ដន្ទាទោសឃាតកស្រលាញ់ភេទដូចគ្នាដាក់ពន្ធនាគារអស់មួយជីវិត ក្រោមការចោទប្រកាន់ពីបទ ឃាតកម្មគិតទុកជាមុន តាមមាត្រា ២០០ នៃក្រមព្រហ្មទណ្ឌ។

ជនជាប់ចោទក្នុងរឿងក្ដីដែលតុលាការផ្ដន្ទាទោសយ៉ាងធ្ងន់ធ្ងរនេះឈ្មោះ ភូ សៀងឡាង ហៅលាង ភេទប្រុស អាយុ ២៧ ឆ្នាំ។

អំពើឃាតកម្មនេះកើតឡើងកាលពីថ្ងៃទី ២៤ ខែមេសា ឆ្នាំ ២០២២ វេលាម៉ោង ១៦ និង ០០ នាទី នៅចំណុចក្នុងបន្ទប់ជួលលេខ ៥ បេ ផ្លូវបេតុង ក្រុម ៥ ភូមិដំណាក់ធំ ២ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ បង្កឡើងដោយជនល្មើសខាងលើ បានធ្វើសកម្មភាពសម្លាប់ជនរងគ្រោះឈ្មោះ ខុម វ៉ានឌី ភេទប្រុស អាយុ ២១ ឆ្នាំ។

សូមបញ្ជាក់ថា កាលពីថ្ងៃទី ២៨ ខែមេសា ឆ្នាំ ២០២២ នាយកដ្ឋាននគរបាលព្រហ្មទណ្ឌ បានដឹកនាំសហការជាមួយស្នងការដ្ឋាននគរបាលរាជធានីភ្នំពេញ និងស្នងការដ្ឋាននគរបាលខេត្តព្រះវិហារ បានធ្វើការឃាត់ខ្លួនជនសង្ស័យដែលពាក់ព័ន្ធក្នុងករណីឃាតកម្មខាងលើឈ្មោះ ភូ សៀងឡាង ភេទប្រុស អាយុ ២៧ ឆ្នាំ ជនជាតិខ្មែរ ចំណុចភូមិសែនរុងរឿង ១ ឃុំទឹកក្រហម ស្រុកជាំក្សាន្ត ខេត្តព្រះវិហារ មកកាន់នាយកដ្ឋាននគរបាលព្រហ្មទណ្ឌ។

ជនដៃដល់បានសារភាពនៅដំណាក់កាលសមត្ថកិច្ចថា កាលពីថ្ងៃទី ២៤ ខែមេសា ឆ្នាំ ២០២២ ខ្លួនពិតជាបានធ្វើសកម្មភាពសម្លាប់ទៅលើឈ្មោះ ខុម វ៉ាន់ឌី (ភេទទី ៣) ពិតប្រាកដមែន ដោយសារតែជនរងគ្រោះមានទំនាក់ទំនងប្រុសផ្សេង ជាហេតុធ្វើឲ្យខ្លួនផ្ទុះការប្រច័ណ្ឌ ហើយក៏យកខ្សែភ្លើងរឹត.ក សម្លាប់។

ក្រោយពីធ្វើសកម្មភាពសម្លាប់រួចហើយ ខ្លួនបានយកទូរស័ព្ទ និងម៉ូតូមួយគ្រឿងម៉ាក សេ ១២៥ ជិះគេចខ្លួនទៅស្រុកកំណើតនៅខេត្តកំពត រួចបន្តគេចទៅលាក់ខ្លួននៅខេត្តព្រះវិហារ ហើយក៏ត្រូវសមត្ថកិច្ចឃាត់ខ្លួនតែម្ដង។

ចាប់តាំងពីចាប់ខ្លួនឃុំឃាំងមកដល់ថ្ងៃទី ១៦ ខែមករា ឆ្នាំ ២០២៣ ទើបតុលាការកាត់ទោស ហើយប្រកាសសាលក្រមកាលពីព្រឹកថ្ងៃទី ៣០ ខែមករា ឆ្នាំ ២០២៣ ដោយសម្រេចផ្ដន្ទាទោសជនដៃដល់ដាក់ពន្ធនាគារអស់មួយជីវិត៕

អត្ថបទ ៖ មករា

The post ផ្ដន្ទាទោសឃាតកស្រលាញ់ភេទដូចគ្នាសម្លាប់គូស្នេហ៍ ដាក់ពន្ធនាគារអស់មួយជីវិត appeared first on Kampuchea Thmey Daily.

ពិធីករ ប៉ែន ចំរុង និង ង៉ាន់ ពិសី ត្រូវតុលាការផ្ដន្ទាទោសដាក់ពន្ធនាគារ ១០ ខែ

អ៊ិន ពិសី — Fri, 09 Dec 2022 03:28:38 +0000

ពិធីករល្បីឈ្មោះលោក ប៉ែន ចំរុង និង ង៉ាន់ ពិសី ត្រូវបានតុលាការសាលាដំបូងរាជធានីភ្នំពេញ សម្រេចផ្ដន្ទាទោសដាក់ពន្ធនាគារក្នុងម្នាក់ៗ កំណត់រយៈពេល ១០ ខែ និងពិន័យជាប្រាក់ក្នុងម្នាក់ៗចំនួនមួយលានរៀល ចូលជាថវិការដ្ឋ ពីបទបរិហារបង្កាច់កេរ្តិ៍ប្រព្រឹត្តនៅរាជធានីភ្នំពេញ កាលពីអំឡុងឆ្នាំ ២០២១ តាមមាត្រា ៣១១ និងមាត្រា ៣១២ នៃក្រមព្រហ្មទណ្ឌ។ នេះបើយោងតាមប្រភពព័ត៌មានដែលបង្ហោះនៅលើគណនីហ្វេសប៊ុករបស់លោក San prum។

ប្រភពបានបន្តថា ក្នុងនោះដែរតុលាការក៏បង្គាប់ឲ្យ ឈ្មោះ ប៉ែន ចំរុង និងឈ្មោះ ង៉ាន់ ពិសី រួមគ្នាសងសំណងទៅឲ្យដើមបណ្ដឹងឈ្មោះ គាន ណារិត ចំនួន ៦០ លានរៀល នៅពេលសាលក្រមនេះចូលស្ថាពរ។ សាលក្រមនេះជំនុំជម្រះជាសាធារណៈកាលពីថ្ងៃទី ១៦ ខែសីហា ឆ្នាំ ២០២២ ចំពោះមុខមេធាវីតំណាងឲ្យដើមបណ្ដឹងរដ្ឋប្បវេណីកំបាំងមុខជនជាប់ចោទឈ្មោះ ប៉ែន ចំរុង ,ឈ្មោះ ង៉ាន់ ពិសី និងប្រកាសជាសាធារណៈកាលពីថ្ងៃទី ០៧ ខែកញ្ញា ឆ្នាំ ២០២២ ដោយទុកសិទ្ធិឲ្យប្ដឹងទាស់ និងប្ដឹងឧទ្ធរណ៍តាមកំណត់ច្បាប់។

តុលាការបានទទួលបណ្ដឹងតាមដីកាបញ្ជូនរឿងមកជម្រះផ្ទាល់ លេខ ១០១ អ.យ. ចុះថ្ងៃទី ០៤ ខែកក្កដា ឆ្នាំ ២០២២ របស់តំណាងអយ្យការអមសាលាដំបូងរាជធានីភ្នំពេញ ដែលបានសម្រេចបញ្ជូនជនជាប់ចោទឈ្មោះ ប៉ែន ចំរុង ភេទប្រុស អាយុ ៤០ ឆ្នាំ ជនជាតិខ្មែរ និងឈ្មោះ ង៉ាន់ ពិសី ភេទប្រុស អាយុ ៣៤ ឆ្នាំ ជនជាតិខ្មែរ មកជំនុំជម្រះផ្ទាល់ ពីបទបរិហារបង្កាច់កេរ្តិ៍ប្រព្រឹត្តនៅរាជធានីភ្នំពេញ កាលពីអំឡុងឆ្នាំ ២០២១ បទល្មើសដែលមានចែងឲ្យផ្ដន្ទាទោសតាមបញ្ញត្តិមាត្រា ៣១១ និងមាត្រា ៣១២ នៃក្រមព្រហ្មទណ្ឌ។

ទាក់ទងព័ត៌មានខាងលើនេះ កម្ពុជាថ្មី នៅថ្ងៃទី ០៩ ខែធ្នូ ឆ្នាំ ២០២២ នេះ មិនទាន់អាចទាក់ទង ដើម្បីសុំការបកស្រាយពីតារាប្រុសលោក ប៉ែន ចំរុង បាននៅឡើយទេ ជុំវិញព័ត៌មានដ៏រសើបនេះ។ សង្ឃឹមថា នឹងមានការចេញមុខបំភ្លឺពីសាមីខ្លួនលោក ប៉ែន ចំរុង ឆាប់ៗនេះ៕

អត្ថបទ ៖ ចាន់រ៉ា

The post ពិធីករ ប៉ែន ចំរុង និង ង៉ាន់ ពិសី ត្រូវតុលាការផ្ដន្ទាទោសដាក់ពន្ធនាគារ ១០ ខែ appeared first on Kampuchea Thmey Daily.

ផ្ដន្ទាទោសចោរឆក់វ័យក្មេង ដាក់ពន្ធនាគារ១០ឆ្នាំ

Kang Tola — Wed, 19 Oct 2022 15:09:37 +0000

ភ្នំពេញ ៖ ចៅក្រមសាលាដំបូងរាជធានីភ្នំពេញ នៅព្រឹកថ្ងៃទី១៩ ខែតុលាឆ្នាំ២០២២ បានប្រកាសសាលក្រមផ្តន្ទាទោសជនជាប់ចោទម្នាក់ឈ្មោះ ជុំ សុខបញ្ញា ភេទប្រុស អាយុ១៤ឆ្នាំ មុខរបរជាសិស្ស លំនៅភូមិត្រពាំងគល់ សង្កាត់កន្ទោក ខណ្ឌកំបូល រាជធានីភ្នំពេញ ដាក់ពន្ធនាគារចំនួន១០ឆ្នាំ ពីបទលួចមានស្ថានទម្ងន់ទោស ដោយសារមរណភាពនៃជនរងគ្រោះ(ឆក់កាបូប)។

សូមបញ្ជាក់ថា កាលពី ថ្ងៃទី២៩ ខែមករា ឆ្នាំ២០២២ ដោយកម្លាំងប៉ុស្តិ៍នគរបាលរដ្ឋបាលកាកាបទី១ បានសហការជាមួយកម្លាំងផ្នែកជំនាញ នគរបាលខណ្ឌពោធិ៍សែនជ័យ ចុះឃាត់មុខសញ្ញាជនសង្ស័យម្នាក់ នៅចំណុចផ្លូវរថភ្លើង ភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ពាក់ព័ន្ធនឹងករណីលួចមានស្ថានទម្ងន់ទោស (ឆក់កាបូបបណ្ដាលឱ្យជនរងគ្រោះស្លាប់ពេលបញ្ជូនទៅសង្គ្រោះ) នៅឯមន្ទីរពេទ្យកើតហេតុកាលពីថ្ងៃទី១៥ ខែមករា ឆ្នាំ២០២២ និងវេលាម៉ោង ៩.៣០នាទីព្រឹក នៅតាមបណ្ដោយផ្លូវសហព័ន្ធរុស្ស៊ី មុខព្រលានយន្តហោះអន្តរជាតិភ្នំពេញ ស្ថិតនៅភូមិតាងួន១ សង្កាត់កាកាបទី១ ខណ្ឌពោធិ៍សែនជ័យ បណ្ដាលជនរងគ្រោះដួលបោកក្បាលរបួសធ្ងន់ និងបានស្លាប់ពេលដែលបញ្ជូនទៅសង្គ្រោះនៅឯមន្ទីរពេទ្យ ជនរងគ្រោះឈ្មោះ អ៊ុក កន្និកា ភេទស្រី ៕

ដោយ ៖ មករា

The post ផ្ដន្ទាទោសចោរឆក់វ័យក្មេង ដាក់ពន្ធនាគារ១០ឆ្នាំ appeared first on Kampuchea Thmey Daily.

ផ្ដន្ទាទោស Archives - Kampuchea Thmey Daily

ផ្ដន្ទាទោសជនជាប់ចោទ ២ នាក់ ដាក់ពន្ធនាគារអស់មួយជីវិត និងពិន័យម្នាក់ៗ ៨០ លានរៀល បង់ចូលថវិការដ្ឋ

ផ្ដន្ទាទោសបុរស-ស្ត្រីវៀតណាម ៦ នាក់ ដាក់ពន្ធនាគារពី ១៥ ឆ្នាំ ដល់ ២០ ឆ្នាំ

ផ្ដន្ទាទោសបុរសម្នាក់ ដាក់ពន្ធនាគារ ១០ ឆ្នាំ ពីបទ«ប៉ុនប៉ងឃាតកម្ម»

ផ្ដន្ទាទោសឈ្មួញគ្រឿងញៀន ២ នាក់ ម្នាក់ជាប់គុក ១ ជីវិត និងម្នាក់ទៀតជាប់ ២៥ ឆ្នាំ

ផ្ដន្ទាទោសបុរសជនជាតិថៃម្នាក់ និងខ្មែរម្នាក់ ដាក់ពន្ធនាគារអស់មួយជីវិត

ផ្ដន្ទាទោសឃាតកស្រលាញ់ភេទដូចគ្នាសម្លាប់គូស្នេហ៍ ដាក់ពន្ធនាគារអស់មួយជីវិត

ពិធីករ ប៉ែន ចំរុង និង ង៉ាន់ ពិសី ត្រូវតុលាការផ្ដន្ទាទោសដាក់ពន្ធនាគារ ១០ ខែ

ផ្ដន្ទាទោស​ចោរឆក់​វ័យក្មេង ​ដាក់​ពន្ធនាគារ​១០​ឆ្នាំ

ផ្ដន្ទាទោសចោរឆក់វ័យក្មេង ដាក់ពន្ធនាគារ១០ឆ្នាំ