ផ្តល់ឈាម Archives - Kampuchea Thmey Daily

២០២៥ មជ្ឈមណ្ឌលជាតិផ្តល់ឈាម គ្រោងនឹងប្រមូលឈាមឱ្យបាន ១ សែន ៨ ម៉ឺនប្លោក ជួយសង្គ្រោះជីវិតមនុស្ស

អ៊ិន ពិសី — Tue, 11 Mar 2025 04:37:09 +0000

សម្រាប់ឆ្នាំ ២០២៥ នេះ មជ្ឈមណ្ឌលជាតិផ្តល់ឈាម គ្រោងនឹងប្រមូលឈាមឱ្យបាន ១ សែន ៨ ម៉ឺនប្លោក ដើម្បីជួយសង្គ្រោះអាយុជីវិតមនុស្សមានការកើនឡើង ២០% បើធៀបទៅនឹងឆ្នាំ ២០២៤ ប្រមូលបាន ១ សែន ៧ ម៉ឺនប្លោក។

លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាម បានមានប្រសាសន៍នៅព្រឹកថ្ងៃទី ១១ មីនា នេះថា តាមផែនការឆ្នាំ ២០២៥ នេះ យើងគ្រោងនឹងប្រមូលឈាមឱ្យបាន ១ សែន ៨ ម៉ឺនប្លោក កើនឡើង ២០% បើធៀបទៅនឹងឆ្នាំ ២០២៤ កន្លងទៅ ប្រមូលបាន ១ សែន ៧ ម៉ឺនប្លោក ស្មើនឹង ១% នៃចំនួនប្រជាពលរដ្ឋទូទាំងប្រទេស ១៧ លាននាក់ ដែលជាចំនួនមួយឈានដល់កម្រិតឆ្លើយតបទៅនឹងសូចនាកររបស់អង្គការសុខភាពពិភពលោកដែលបានដាក់ជូនមជ្ឈមណ្ឌលផ្តល់ឈាម។

លោកវេជ្ជបណ្ឌិត បានបន្តថា ឆ្នាំមុន ការប្រមូលឈាមមានកំណើនប្រមាណ ២៥% ហើយឈាមទាំងនោះបានយកទៅប្រើប្រាស់ក្នុងការជួយសង្គ្រោះអាយុជីវិតអ្នកជំងឺពាក់ព័ន្ធទៅនឹងគ្រោះថ្នាក់ចរាចរណ៍ ស្ត្រីឆ្លងទន្លេ ការវះកាត់ធំៗ ដូចជាវះកាត់ជំងឺបេះដូង ជំងឺមិនឆ្លងរួមមានជំងឺមហារីក និងជំងឺលាងឈាមជាដើម។

លោកវេជ្ជបណ្ឌិត បានបន្តទៀតថា ការទទួលបានអំណោយឈាមច្រើននេះដោយសារមានការចូលរួមការបរិច្ចាគឈាមពីសំណាក់យុវជនយ៉ាងផុលផុស។ ជាក់ស្តែងដូចជានៅក្នុងទិវា នៃក្តីស្រលាញ់ដែលមានអ្នកចូលរួមបរិច្ចាគឈាមជាង ១ ពាន់ប្លោក និងនៅថ្ងៃទី ១៨ កុម្ភៈ ដែលរៀបចំឡើងដោយក្រុមពិធីករកីឡាមានអ្នកចូលរួមបរិច្ចាគឈាម ១ ២៥៨ ប្លោក ដែលមានការចូលរួមពីសហភាពសហព័ន្ធយុវជនកម្ពុជា យុវជនកាកបាទក្រហម យុវជនកាយរឹទ្ធិជាដើម។

លោកវេជ្ជបណ្ឌិត បានបន្ថែមថា សន្ទុះ នៃការចូលរួមបរិច្ចាគឈាមកើនឡើងនេះបានធ្វើឱ្យមជ្ឈមណ្ឌលជាតិផ្តល់ឈាមអាចមានលទ្ធភាពស្តុកឈាមបានគ្រប់គ្រាន់ជួយកាត់បន្ថយការបរិច្ចាគឈាមជំនួសសាច់ញាតិ និងបងប្អូនរបស់អ្នកជំងឺបានមួយកម្រិត ខណៈបច្ចុប្បន្នក្នុង ១ ថ្ងៃ យើងមានតម្រូវការឈាមនៅទូទាំងប្រទេសបានកើនឡើងដល់ ៤០០ ប្លោក ក្នុងនោះ នៅរាជធានីភ្នំពេញមានតម្រូវការឈាមដល់ ៣៥០ ប្លោក និងតាមខេត្ត ៥០ ប្លោក ដោយសារនៅតាមខេត្តការវះកាត់មានតិចជាងនៅរាជធានីភ្នំពេញ ពោលគឺក្នុង ១ នាទី ត្រូវការឈាម ១ ប្លោក។

លោកវេជ្ជបណ្ឌិត បានលើកឡើងថា «តាងនាមឱ្យមជ្ឈមណ្ឌលជាតិ សូមកោតសរសើរយុវជនកម្ពុជាដែលបានចូលរួមបរិច្ចាគឈាមយ៉ាងផុលផុស និងបានបំបែកឯកទគ្គកម្មការបរិច្ចាគឈាមដែលមានចំនួនច្រើនមិនធ្លាប់មានពីមុនមកដែលធ្វើឱ្យកំណើនការបរិច្ចាគឈាមដោយស្ម័គ្រចិត្តកើនឡើងខ្ពស់។ សូមយុវជនបន្តចូលរួមការបរិច្ចាគឈាមនេះឱ្យបានផុលផុសបន្ថែមទៀត ដើម្បីឱ្យមជ្ឈមណ្ឌលជាតិមានស្តុកឈាមគ្រប់គ្រាន់សម្រាប់ជួយសង្គ្រោះអាយុជីវិតអ្នកជំងឺដែលត្រូវការឈាមជាចាំបាច់ ពិសេសជំងឺមិនឆ្លងដែលមានការកើនឡើង»៕

អត្ថបទ ៖ សំអឿន

The post ២០២៥ មជ្ឈមណ្ឌលជាតិផ្តល់ឈាម គ្រោងនឹងប្រមូលឈាមឱ្យបាន ១ សែន ៨ ម៉ឺនប្លោក ជួយសង្គ្រោះជីវិតមនុស្ស appeared first on Kampuchea Thmey Daily.

៥ ខែនេះ មជ្ឈមណ្ឌលផ្តល់ឈាម ទទួលបានអំណោយឈាមជាង ៥ ម៉ឺនប្លោក នៅទូទាំងប្រទេស

អ៊ិន ពិសី — Fri, 24 May 2024 04:46:29 +0000

នៅក្នុងរយៈពេល ៥ ខែ ឆ្នាំ ២០២៤ នេះ មជ្ឈមណ្ឌលជាតិផ្តល់ឈាម បានទទួលអំណោយឈាមទាំងអ្នកផ្តល់ជំនួស និងអ្នកស្ម័គ្រចិត្តប្រមាណជាង ៥ ម៉ឺនប្លោក សម្រាប់ជួយដល់អ្នកជំងឺដែលត្រូវការឈាមជាចាំបាច់ក្នុងការសង្គ្រោះអាយុជីវិត។

ថ្លែងក្នុងពិធីប្រគល់ទទួល និងសម្ពោធដាក់ឱ្យប្រើប្រាស់ជាផ្លូវការ “អគារចុះឈ្មោះ និងបន្ទប់រង់ចាំបរិច្ចាគឈាម” នៅព្រឹកថ្ងៃទី ២៤ ឧសភានេះ លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាម បានមានប្រសាសន៍ថា ក្នុងចំណោមអំណោយឈាមជាង ៥ ម៉ឺនប្លោក ក្នុងនោះមជ្ឈមណ្ឌលជាតិទទួលបាន ៤១ ០០០ ប្លោក និងតាមបណ្តាខេត្តទទួលបានជាង ១ ម៉ឺនប្លោក សរុបជាង ៥ ម៉ឺនប្លោក និងបានផ្គត់ផ្គង់ឈាមប្រមាណជាង ៦ ម៉ឺនប្លោក ទៅតាមមន្ទីរពេទ្យនានាទូទាំងប្រទេស។

លោកវេជ្ជបណ្ឌិត បានបន្តថា តម្រូវការឈាមមានការកើនឡើងជាបន្តបន្ទាប់ដោយសារអ្នកជំងឺត្រូវការឈាមសម្រាប់សង្គ្រោះអាយុជីវិតក៏មានច្រើន។ ជាក់ស្តែងនៅឆ្នាំ ២០២៣ កន្លងទៅ ទទួលបានឈាមចំនួន ១៤៣ ១៤៣ ប្លោក។ ប៉ុន្តែយើងបានផ្គត់ផ្គង់ប្រមាណ ១៥ ម៉ឺនប្លោក មានការកើនឡើងប្រមាណ ៣០% ដែលការកើនឡើងនេះវាជាបញ្ហាប្រឈមរបស់ក្រសួងផងដែរ ព្រោះបើកាលណាតម្រូវការឈាមកើនឡើង យើងក៏ត្រូវស្វែងរកឈាមដើម្បីបំពេញទៅតាមតម្រូវការនោះដែរ។

លោកវេជ្ជបណ្ឌិត បានបន្តទៀតថា ចំពោះផែនការយើងមានច្រើនរហូតមកដល់ពេលនេះយើងមានការផ្សព្វផ្សាយដល់ប្រជាពលរដ្ឋឱ្យមានការយល់ដឹងពីសារៈសំខាន់ នៃការបរិច្ចាគឈាម ដើម្បីឱ្យចូលរួមផ្តល់ឈាមឱ្យបានច្រើនបន្ថែមទៀត ខណៈបច្ចុប្បន្នការផ្តល់ឈាមដោយការស្ម័គ្រចិត្តមានត្រឹម ២០% ប៉ុណ្ណោះ ខណៈប្រទេសជិតខាងមានរហូតដល់ទៅជាង ៩០%។ ក្រៅពីនេះមជ្ឈមណ្ឌលបានសហការជាមួយក្រសួងចំនួន ១២ ដែលនឹងជួយផ្តល់ឈាមទៀងទាត់ ហើយគ្រោងនឹងបន្តសហការជាមួយក្រសួងដែលនៅសេសសល់ឱ្យចូលរួមជាបន្តបន្ទាប់ទៀត ក៏ដូចជាសហការជាមួយវិស័យឯកជន ធនាគារ សាកលវិទ្យាល័យ ស្ថាប័នរដ្ឋ និងសហភាពសហព័ន្ធយុវជនកម្ពុជា។

លោកវេជ្ជបណ្ឌិត រំពឹងថា នៅបំណាច់ឆ្នាំ ២០២៤ នេះ សង្ឃឹមថា នឹងទទួលបានអំណោយឈាមប្រមាណ ១ សែន ៦ ម៉ឺនប្លោក។ លោកវេជ្ជបណ្ឌិត បានអំពាវនាវប្រជាពលរដ្ឋចូលរួមបរិច្ចាគឈាមដោយស្ម័គ្រចិត្តឱ្យបានផុសផុលដើម្បីអត្ថប្រយោជន៍ផ្ទាល់ខ្លួននិងសង្គម។ ព្រោះថាការបរិច្ចាគឈាមដោយស្ម័គ្រចិត្តមានសារប្រយោជន៍ច្រើនដូចជាកាត់បន្ថយជាតិដែក សម្រួលសរសៃឈម ស្ត្រូក មហារីកឈាម និងចូលរួមសង្គ្រោះជីវិតអ្នកជំងឺជាមួយគ្រូពេទ្យ ពិសេសទទួលបានបុណ្យកុសលមិនអាចកាត់ថ្លៃបានក្នុងនាមពលរដ្ឋជាកាន់ព្រះពុទ្ធសាសនា៕

អត្ថបទ ៖ សំអឿន

The post ៥ ខែនេះ មជ្ឈមណ្ឌលផ្តល់ឈាម ទទួលបានអំណោយឈាមជាង ៥ ម៉ឺនប្លោក នៅទូទាំងប្រទេស appeared first on Kampuchea Thmey Daily.