ផ្ទះសំណាក់ Archives - Kampuchea Thmey Daily

បាត់កូនស្រីជិតមួយសប្តាហ៍តាមទាន់មកដេកផ្ទះសំណាក់ជាមួយសង្សារបង្កហិង្សាមកលើស្ត្រីជាម្តាយ

Ung Meng — Wed, 31 Dec 2025 02:22:24 +0000

ម្នាក់បានបាត់កូនស្រីចេញពីផ្ទះអស់រយះពេលជិតមួយសប្តាហ៍ទៅហើយ តាមរកគ្រប់ទីកន្លែងបែជាមកប្រទះឃើញកំពុងតែនៅក្នុងផ្ទះសំណាក់មួយកន្លែង ជាមួយសង្សារ ខណៈកំពុងសួរនាំបែជាមិត្តភក្តិរបស់សង្សារកូនស្រីបង្កហិង្សា វាយទៅស្រ្ដីជាម្ដាយ ហើយរត់គេចខ្លួនបាត់។

ហេតុការណ៍នេះបានកើតឡើងនៅវេលាម៉ោង ៨និង៤០នាទីយប់ ថ្ងៃទី៣០ខែធ្នូ ឆ្នាំ២០២៥ នៅចំនុចផ្ទះសំណាក់យីហោ ដេវីតថ្មី ដែលស្ថិតតាមបណ្ដោយផ្លូវ២៧១ សង្កាត់ផ្សាដើមថ្កូវ ខណ្ឌចំការមន។

បើតាមការរៀបរាប់ពីស្ត្រីជាម្ដាយ បានឲ្យដឹងថា កូនស្រីរបស់គាត់ បានបាត់ចេញពីផ្ទះរយៈពេល៦ថ្ងៃ៧យប់មកហើយ ដោយសារ រូបគាត់ដឹងថា មានបុរសម្នាក់ឈ្មោះ ថា បាននាំកូនស្រីរបស់គាត់ទៅ តែមិនដឹងទៅទីណានោះទេ។

ប្រភពដដែល បន្តទៀតថា ដោយមិនឃើញកូនស្រីត្រលប់មកផ្ទះវិញ រូបគាត់បានតាម រករហូត ឃើញកូនរបស់គាត់កំពុងតែនៅក្នុងបន្ទប់ផ្ទះសំណាក់ជាមួយនិងសង្សារ ទើបផ្អើលឆោឡោសួរនាំរកខុសត្រូវ ពេលនោះ អ្នកមើលការខុសត្រូវផ្ទះសំណាក់ បានឲ្យពួកគាត់ចុះមកក្រោមនិយាយគ្នា ស្រាប់តែបុរសមានម្នាក់ទៀតត្រូវជាមិត្តភក្ដិខាងប្រុស ដែលនៅក្នុងផ្ទះសំណាក់នោះដែរ បានប្រើហិង្សាវាយទៅរូបគាត់ជាម្ដាយ បណ្តាលឲ្យរបួសតិចតួច ហើយក៏នាំគ្នីគ្នារត់ចេញផ្លូវក្រោយបាត់អស់ទៅ។

ស្ត្រីជាម្ដាយបានឲ្យដឹងទៀតថា បន្ទាប់ពីរត់គេចអស់ហើយ រូបគាត់បាននាំកូនស្រីរបស់គាត់ ទៅរកបុរសជាសង្សារ ដល់ផ្ទះនៅក្រោមវត្តច្បារអំពៅ ភូមិដើមស្លែង សង្កាត់ច្បារអំពៅ២ ខណ្ឌច្បារអំពៅ ដើម្បីសួរនាំរកខុសត្រូវ តែពេលទៅដល់មិនឃើញបុរសជាសង្សារនោះទេ ជួបតែក្រុមគ្រួសារតែប៉ុណ្ណោះ។

ចុងក្រោយតំណាងក្រុមគ្រួសារទាំងសងខាងបានសម្របសម្រួល គ្នាដោយខាងស្រីឲ្យសងថ្លៃក្រវិលនិងចិញ្ចៀន តំលៃ៦០០ដុល្លារ ដែលខាងប្រុសលួងលោមយកទៅលក់ស៊ីចាយ តែខាងប្រុសសុំសង៣០០ដុល្លារតែប៉ុណ្ណោះ។ បន្ទាប់មកទើបខាងប្រុសបានសងសំណងទៅខាងស្រីចំនួន៤០០ដុល្លារ បញ្ចប់រឿងដោយមិនប្តឹងផ្តល់អ្វីទៅខាងប្រុសនោះទេ៕អត្ថបទ៖សុខា

The post បាត់កូនស្រីជិតមួយសប្តាហ៍តាមទាន់មកដេកផ្ទះសំណាក់ជាមួយសង្សារបង្កហិង្សាមកលើស្ត្រីជាម្តាយ appeared first on Kampuchea Thmey Daily.

ការកក់បន្ទប់ផ្ទះសំណាក់ សណ្ឋាគារ តាមបណ្ដាខេត្តគោលដៅទេសចរណ៍ ចាប់ផ្ដើមកើនឡើង ក្នុងឱកាសបុណ្យអុំទូក

deth leng — Wed, 29 Oct 2025 05:20:48 +0000

អ្នកស្រី ម៉ាលីស បុគ្គលិកនៅសណ្ឋាគារ La Palmeraie d’Angkor Charming Hotel នៅខេត្តសៀមរាប បានឱ្យដឹងថា ការកក់បន្ទប់ស្នាក់នៅរបស់ភ្ញៀវទេសចរក្នុងស្រុក ក្នុងឱកាសបុណ្យអុំទូកចាប់ផ្ដើមមានបណ្ដើរៗ។

អ្នកស្រី ម៉ាលីស បញ្ជាក់ថា រាល់ថ្ងៃមានភ្ញៀវខ្មែរខលសួរច្រើន ប៉ុន្តែទីតាំងអ្នកស្រី អត់មានកន្លែងដាក់ ដោយសារពួកគាត់មកជាក្រុមៗច្រើនគ្នា។

បុគ្គលិកសណ្ឋាគារ Rambutan Hotel នៅខេត្តសៀមរាបបានប្រាប់ដែរថា សណ្ឋាគាររបស់លោកភាគច្រើនទទួលភ្ញៀវបរទេស មិនផ្ដោតលើភ្ញៀវក្នុងស្រុកនោះទេ ប៉ុន្តែតាមការអង្កេតមានភ្ញៀវក្នុងស្រុកសួរនាំច្រើន ពីការកក់បន្ទប់ស្នាក់នៅ។

បុគ្គលិកសណ្ឋាគារ SARA VOAN នៅខេត្តកំពត អ្នកស្រី មុំ បានប្រាប់ថា ឆ្នាំនេះ មិនសូវមានភ្ញៀវកក់បន្ទប់ស្នាក់នៅក្នុងពេលបុណ្យអុំទូកនោះទេ ដោយថ្ងៃទី ៤ ខែ ១១ អ្នកស្រីមានភ្ញៀវកក់ចំនួន ១៣ បន្ទប់ ក្នុងចំណោម ១៦ បន្ទប់។ ក្រៅពីថ្ងៃទី០៤ គឺមិនសូវមានភ្ញៀវកក់នោះទេ។

លោក ខៀវ ធី ប្រធានសមាគមន៍មគ្គុទ្ទេសក៏ទេសចរអង្គរជឿជាក់ថា បុណ្យអុំទូកឆ្នាំនេះ ភ្ញៀវទេសចរក្នុងស្រុក នឹងមកលេងនៅខេត្តសៀមរាបច្រើនដូចឆ្នាំមុនដែរ។

ការរៀបចំពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅតាមបណ្តាខេត្តនានានៅឆ្នាំនេះ អាចប្រព្រឹត្តទៅជាធម្មតាតាមទំនៀមទម្លាប់ប្រពៃណី ដែលមានរយៈពេល ៣ ថ្ងៃ ចាប់ពីថ្ងៃទី ០៤-០៦ ខែវិច្ឆិកា ឆ្នាំ ២០២៥៕

អត្ថបទ៖ ឡេង ដេត

The post ការកក់បន្ទប់ផ្ទះសំណាក់ សណ្ឋាគារ តាមបណ្ដាខេត្តគោលដៅទេសចរណ៍ ចាប់ផ្ដើមកើនឡើង ក្នុងឱកាសបុណ្យអុំទូក appeared first on Kampuchea Thmey Daily.

ការកក់បន្ទប់ស្នាក់នៅ មុនពេលបុណ្យចូលឆ្នាំចិន មិនទាន់មាន ខណៈអ្នកជំនាញអះអាងថា ជាទម្លាប់ប្រជាជនមិនចូលចិត្តកក់ទុកមុន

deth leng — Mon, 20 Jan 2025 04:24:20 +0000

បុគ្គលិកផ្ទះសំណាក់ សណ្ឋាគារ នៅតាមគោលដៅទេសចរណ៍ខាន់ៗ ដូចជាខេត្តកែប ខេត្តសៀមរាប ខេត្តព្រះសីហនុបានបង្ហើបប្រាប់កម្ពុជាថ្មីថា មុនពេលពិធីបុណ្យចូលឆ្នាំថ្មីប្រពៃណីចិនរៀបចំធ្វើឡើងនៅថ្ងៃទី ២៨ ខែមករា សប្ដាហ៍ក្រោយ ការកក់បន្ទប់ស្នាក់នៅមិនទាន់មានច្រើននៅឡើយ ខណៈអ្នកជំនាញបានលើកឡើងថា ជាទម្លាប់ប្រជាជនកម្ពុជា មិនចូលចិត្តកក់កន្លែងស្នាក់នៅទុកមុន។

អ្នកនាង ស្រី មុំ បុគ្គលិកនៅសណ្ឋាគារ SARA VOAN ក្នុងខេត្តកែប បានឱ្យដឹងនៅថ្ងៃទី ២០ ខែមករា ឆ្នាំ ២០២៥ នេះថា ការកក់បន្ទប់ស្នាក់នៅសម្រាប់ទេសចរណ៍ក្នុងស្រុកធ្វើដំណើរកម្សាន្តក្នុងឱកាសបុណ្យចូលឆ្នាំចិន ខាងមុខនេះ មិនទាន់មាននោះទេ ទំនងដោយសារប្រជាជនខ្មែរគ្មានទម្លាប់កក់ទុកមុន។

កញ្ញា ម៉ាលីស បុគ្គលិកផ្នែកលក់ នៅសណ្ឋាគារ La Palmeraie d’Angkor Charming Hotel ខេត្តសៀមរាប ប្រាប់ថា៖ «ភ្ញៀវចូលឆ្នាំចិន អត់មានភ្ញៀវខ្មែរណាកក់បន្ទប់ទេ ខណៈមានតែភ្ញៀវបរទេសដែលគាត់មកលេង ព្រោះភ្ញៀវខ្មែរគាត់ចូលចិត្តកក់ភ្លាមមកនៅភ្លាម»។

លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា (PATACC) ប្រាប់កម្ពុជាថ្មីនៅថ្ងៃទី ២០ ខែមករា ឆ្នាំ ២០២៥ ថា ជាទម្លាប់របស់ប្រជាជនកម្ពុជា បុណ្យអ្វីក៏ដោយ នឹងមានភ្ញៀវទេសចរក្នុងស្រុកដើរលេងកម្សាន្តច្រើននៅក្នុងឱកាសបុណ្យចូលឆ្នាំចិនខាងមុខ។

លោក ធួន ស៊ីណាន មានប្រសាសន៍ថា៖ «ជាទម្លាប់របស់ប្រជាជនខ្មែរយើង ជាពិសេសអ្នកដែលដើរលេងក្នុងស្រុក ពុំសូវចាប់អារម្មណ៍ពីការកក់បន្ទប់ស្នាក់នៅអីទេ ជួនកាលទៅដល់ដើរចូលភ្លាមៗ វាជាទម្លាប់របស់ជាតិសាសន៍នីមួយៗ វាមិនមែនតែខ្មែរយើងទេ បរទេសដូចជាចិន វៀតណាម និងប្រទេសនៅក្នុងតំបន់ខ្លះទៀតក៏ដូចគ្នាដែរ វាជាទម្លាប់របស់ប្រជាជន អ្នកខ្លះក៏គិតថាអត់ដើរលេងទេ ស្អែកឡើងប្រពន្ធកូនបបួលក៏ចេញវឹងអញ្ចឹងទៅ ព្រឹកឡើងគ្មានផែនការ អង្គុយញាំបាយថ្ងៃត្រង់ជជែកគ្នា ក៏នឹកឃើញក៏ទៅប្រុយអញ្ចឹងទៅ»។

នៅក្នុងរយៈពេល ៣ ថ្ងៃ នៃពិធីបុណ្យចូលឆ្នាំថ្មីប្រពៃណីចិន កាលពីឆ្នាំមុន (ចាប់ពីថ្ងៃទី ០៩ ដល់ថ្ងៃទី ១១ កុម្ភៈ ២០២៤) កម្ពុជាទទួលបានភ្ញៀវទេសចរដើរលេងកម្សាន្តតាមបណ្តាគោលដៅទេសចរណ៍នានា ទូទាំងប្រទេស សរុបចំនួនប្រមាណ ១ លាននាក់ (១ ០៥១ ៤៧២) ក្នុងនោះ អ្នកទេសចរជាតិមានចំនួន ៩៩៣ ៩៩១ នាក់ និងអ្នកទេសចរបរទេសមានចំនួន ៥៧ ៤៨១ នាក់។

ក្នុងនោះខេត្តចំនួន ៥ ទទួបានទេសចរណ៍ច្រើនជាងគេរួមមាន ខេត្តព្រះសីហនុ ជិត ៣០ ម៉ឺននាក់ ខេត្តសៀមរាបជាង ១១ ម៉ឺននាក់ ខេត្តបាត់ដំបងជិត ៩ ម៉ឺននាក់ ខេត្តប៉ៃលិនជិត ៨ ម៉ឺននាក់ និងខេត្តកែបជាង ៧ ម៉ឺននាក់។

សូមជំរាបថា ពិធីបុណ្យចូលឆ្នាំថ្មីប្រពៃណីចិននៅឆ្នាំនេះនឹងត្រូវរៀបចំធ្វើឡើងចាប់ពីថ្ងៃទី ២៨ ខែមករា ដល់ថ្ងៃទី ៣១ ខែមករា ឆ្នាំ ២០២៥៕

អត្ថបទ៖ ឡេង ដេត

The post ការកក់បន្ទប់ស្នាក់នៅ មុនពេលបុណ្យចូលឆ្នាំចិន មិនទាន់មាន ខណៈអ្នកជំនាញអះអាងថា ជាទម្លាប់ប្រជាជនមិនចូលចិត្តកក់ទុកមុន appeared first on Kampuchea Thmey Daily.

ការកក់បន្ទប់ផ្ទះសំណាក់ សណ្ឋាគារ កើនឡើង នៅចំពេលជិតឆ្លងឆ្នាំថ្មី

deth leng — Thu, 26 Dec 2024 07:03:00 +0000

តាមការអះអាងរបស់បុគ្គលិកសណ្ឋាគារ ផ្ទះសំណាក់ នៅតាមតំបន់ទេសចរណ៍ខាន់ៗ ដូចជាខេត្តសៀមរាប ខេត្តព្រះសីហនុ ខេត្តកែប និងតំបន់ទេសចរណ៍មួយចំនួនទៀតបានឱ្យដឹងថា ការកក់បន្ទប់ផ្ទះសំណាក់ សណ្ឋាគារសម្រាប់ស្នាក់នៅមានការកើនឡើងបន្តិច នៅចំពេលជិតឆ្លងឆ្នាំសកលឆ្នាំ ២០២៤ ឆ្លងចូលឆ្នាំ ២០២៥នាចុងសប្តាហ៍នេះ។

កញ្ញា ម៉ាលីស បុគ្គលិកផ្នែកលក់ នៅសណ្ឋាគារ La Palmeraie d’Angkor Charming Hotel ខេត្តសៀមរាប បានឱ្យដឹងថា ការកក់បន្ទប់ស្នាក់នៅមានកំណើនពោលគឺមានភ្ញៀវជិតពេញសម្រាប់ដំណាច់ឆ្នាំនេះ និងដើមឆ្នាំ ២០២៥។

កញ្ញា ទេវី បុគ្គលិកនៅសណ្ឋាគារ Rambutan Hotel & Resort បានឱ្យដឹងដែរថា ការកក់បន្ទប់ស្នាក់នៅ សម្រាប់ដំណាច់ឆ្នាំនេះ មានកំណើនច្រើន ដែលមានទាំងភ្ញៀវក្នុងស្រុក និងបរទេស។

ដោយឡែក អ្នកនាង ស្រី មុំ បុគ្គលិកនៅសណ្ឋាគារ SARA VOAN ក្នុងខេត្តកែប បានប្រាប់ថា ការកក់បន្ទប់ស្នាក់នៅមានកំណើនគួរសម គ្រាន់តែមិនរវល់ជាប់រហូត អ្នកកក់បន្ទប់មានចម្រុះជាតិសាសន៍ មានទាំងបរទេស និងទេសចរណ៍ក្នុងស្រុក។

យោងតាមក្រសួងទេសចរណ៍ ក្នុងរយៈពេល ១១ ខែ ឆ្នាំ ២០២៤ កម្ពុជាទទួលបានទេសចរអន្តរជាតិសរុបប្រមាណ ៦ លាននាក់ កើន ២២% និងទេសចរជាតិបានធ្វើដំណើរកម្សាន្តនៅទូទាំងប្រទេសប្រមាណ ២០ លាននាក់ កើនឡើង ១៩,៧% ក្នុងនោះតំបន់ឆ្នេរសមុទ្រមានទេសចរជាតិប្រមាណ ៨ លាននាក់ កើន ១២,៥% និងទេសចរបរទេសប្រមាណ ៤២ ម៉ឺននាក់ កើន ១០,៦% ធៀបនឹងរយៈពេលដូចគ្នាកាលពីឆ្នាំ ២០២៣៕

អត្ថបទ៖ ឡេង ដេត

The post ការកក់បន្ទប់ផ្ទះសំណាក់ សណ្ឋាគារ កើនឡើង នៅចំពេលជិតឆ្លងឆ្នាំថ្មី appeared first on Kampuchea Thmey Daily.

ផ្ទះសំណាក់ និងសណ្ឋាគារមួយចំនួនក្នុងខេត្តមណ្ឌលគិរី ត្រូវបានភ្ញៀវកក់បណ្តើៗហើយ សម្រាប់ថ្ងៃឆ្លងឆ្នាំខាងមុខ

Ken Malis — Thu, 26 Dec 2024 02:42:55 +0000

នៅសល់តែប៉ុន្មានថ្ងៃទៀតប៉ុណ្ណោះ បុណ្យឆ្លងឆ្នាំសកលនឹងឈានចូលមកដល់ ដាច់ឆ្នាំចាស់២០២៤ ផ្លាស់ចូលឆ្នាំថ្មី២០២៥ ពិតណាស់ភ្ញៀវទេសចរ និងសម្រុកមកកម្សាន្តក្នុងខេត្តមណ្ឌលគិរី តាមតំបន់ទេសចរណ៍ និងរមណីយដ្ឋានមួយចំនួន។ យ៉ាងណាមិញ សេវាកម្មស្នាក់នៅ ដូចជាផ្ទះសំណាក់ សណ្ឋាគារមួយចំនួនក្នុងខេត្តមណ្ឌលគិរី ត្រូវបានភ្ញៀវខ្លះបានមុនបណ្តើៗហើយ ដោយខ្លះទៀតភ្ញៀវកក់លើស៥០% រីឯផ្ទះសំណាក់ផ្សេងទៀតបានកក់១០០%តែម្តង។

ការកក់ទុកមុននេះ ផ្ទះសំណាក់ និងសណ្ឋាគារមួយចំនួនបានឡើងថ្លៃ រីឯខ្លះទៀតមិនបានឡើងថ្លៃនោះទេពេលដែលមានកម្មវិធីបុណ្យម្តងៗ។ ម្ចាស់ផ្ទះសំណាក់ និងសណ្ឋាគារចំនួន ៦កន្លែង បានប្រាប់«កម្ពុជាថ្មី» នៅថ្ងៃទី២៥ ខែធ្នូឆ្នាំនេះថា សម្រាប់ផ្ទះសំណាក់ សម្បត្តិគិរី គឺជួលក្នុងថ្ងៃធម្មតាតម្លៃ ១បន្ទប់គ្រែ២ ម៉ាស៊ីនត្រជាក់ តម្លៃ ១៥ដុល្លារ ចំណែកបន្ទប់គ្រែ ២ដែរ តែធំទូលាយជាងអាច២០ដុល្លារ ឡើងទៅ។ ប៉ុន្តែបើ ថ្ងៃឆ្លងឆ្នាំខាងមុខនេះ មិនចំថ្ងៃប្រូម៉ូសិនរបស់ផ្ទះសំណាក់នោះទេ គឺអាចឡើងមួយបន្ទប់ ៥ដុល្លារ បន្ថែមទៀត ដែលមានទីតាំងទល់មុខសួនដំរីដែក។

ចំណែក សណ្ឋាគារ អឿនសកុណា ដែលមានចំនួន ៤៦បន្ទប់ ថ្ងៃធម្មតាតម្លៃ១៥ល្លារ តែថ្ងៃបុណ្យធំៗម្ដងៗអាចឡើងលើសនឹងបន្តិចបន្តួច ឬអាចឡើងទ្វេដងករមាន ដោយមានចម្ងាយប្រហែល ២០០ម៉ែត្រ ពីរង្វង់មូលគោព្រៃ។ រីឯផ្ទះសំណាក់ រតនៈមុនីឧត្តម មានចំនួន ១៥បន្ទប់ តម្លៃចន្លោះចាប់ពី១៥ ទៅ ២៥ដុល្លារ ឡើងទៅក្នុងមួយថ្ងៃ ប៉ុន្តែបើចំថ្ងៃបុណ្យអាចឡើងលើសនឹង ៥ដុល្លារ ផងដែរ ដែលមានទីតាំងក្បែមន្ទីពេទ្យបង្អែកខេត្ត។

សម្រាប់ផ្ទះសំណាក់ ពេជ្យគិរី ម៉ូតែល ឯណេះវិញ គឺតម្លៃចន្លោះពី១៥ ទៅ ២៥ដុល្លារ តែបើថ្ងៃបុណ្យធំល្មមៗ គឺផ្ទះសំណាក់នេះ មិនឡើងតម្លៃនោះទេ គឺរក្សាតម្លៃដដែលជូនភ្ញៀវ។ ដោយឡែក ផ្ទះសំណាក់ ប៊ូស្រា គឺមានបន្ទប់តូចល្មមតម្លៃក្នុង១ថ្ងៃត្រឹមតែ ៣០ ០០០រៀល តែប៉ុណ្ណោះ ដែលមានចម្ងាយ ៦០ម៉ែត្រ ពីរង្វង់មូលគោព្រៃ។ ផ្ទះសំណាក់ បក្សីមាសវិញ មានចំនួន ១៨បន្ទប់ តម្លៃចន្លោះ ១០ ទៅ ២៥ដុល្លារ ប៉ុន្តែត្រូវបានភ្ញៀវកក់មុន១០០% អស់ហើយនៅថ្ងៃឆ្លងឆ្នាំខាងមុខនេះ៕

ដោយ៖ សុខ ហេង

The post ផ្ទះសំណាក់ និងសណ្ឋាគារមួយចំនួនក្នុងខេត្តមណ្ឌលគិរី ត្រូវបានភ្ញៀវកក់បណ្តើៗហើយ សម្រាប់ថ្ងៃឆ្លងឆ្នាំខាងមុខ appeared first on Kampuchea Thmey Daily.

វិស័យសណ្ឋាគារផ្ទះសំណាក់ និងក្រុមហ៊ុនភ្នាក់ងារទេសចរណ៍នៅសៀមរាបបន្តរួចពន្ធបីខែទៀត

Sophal Tuon — Mon, 30 Jan 2023 13:54:06 +0000

ស្ថានភាពសង្គម-សេដ្ឋកិច្ចនៅបន្តទទួលរងនូវហានិភ័យ និងភាពមិនប្រាកដប្រជាខ្ពស់ពីការប្រែប្រួលនិន្នាការតំបន់ និងសកល។ ក្រោមស្មារតីបុរេសកម្ម និងទទួលខុសត្រូវខ្ពស់ រាជរដ្ឋាភិបាលបានដាក់ចេញនូវវិធានការចាំបាច់ជាបន្តបន្ទាប់ ក្នុងគោលបំណងបន្តកាត់បន្ថយផលប៉ះពាល់មកលើស្ថានភាពសង្គម-សេដ្ឋកិច្ច ព្រមទាំងបន្តជួយទ្រទ្រង់ និងស្ដារអាជីវកម្ម និងធុរកិច្ច ឱ្យងើបឡើងវិញ ។ ជាក់ស្ដែង, សេដ្ឋកិច្ចកម្ពុជាបាននិងកំពុងមានសម្ទុះងើបឡើងវិញ លើស្ទើរគ្រប់វិស័យ ទាំងក្នុងវិស័យកាត់ដេរ, វិស័យកម្មន្តសាលមិនមែនកាត់ដេរ និងវិស័យសេវាកម្ម ។ ជាមួយគ្នានេះ, សកម្មភាពអាជីវកម្មក្នុងគោលដៅទេសចរណ៍ជាច្រើនរួមទាំងរាជធានីភ្នំពេញ, ខេត្តក្នុងតំបន់ឆ្នេរ និងខេត្តមួយចំនួនទៀត មានកំណើនគួរឱ្យកត់សម្គាល់ ដោយសារការកើនឡើងយ៉ាងគំហុកនៃភ្ញៀវទេសចរជាតិ, ធុរជន និងវិនិយោគិន ។

ទោះជាយ៉ាងនេះក្ដី, កំណើននៃភ្ញៀវទេសចរអន្តរជាតិអាចនឹងនៅបន្តមានភាពយឺតយ៉ាវក្នុងរយៈពេលខ្លីទៅមធ្យមខាងមុខ ដោយសារភាពមិនប្រាកដប្រជានៃស្ថានភាពសេដ្ឋកិច្ចសកល ដែលបន្តចោទជាសម្ពាធដល់វិស័យទេសចរណ៍ក្នុងគោលដៅមួយចំនួន ដែលតែងតែអាស្រ័យលើភ្ញៀវទេសចរអន្តរជាតិ ។

ក្នុងបរិការណ៍នេះ ដោយពិនិត្យលើស្ថានភាពសង្គម-សេដ្ឋកិច្ច និងពាណិជ្ជកម្មទាំងក្នុងក្របខណ្ឌសកលលោក តំបន់ និងក្នុងប្រទេស រាជរដ្ឋាភិបាលសម្រេចដាក់ចេញនូវវិធានការបន្ថែមសម្រាប់បន្តគ្រប់គ្រងផលប៉ះពាល់ និងគាំទ្រការងើបឡើងវិញនៃវិស័យទេសចរណ៍ក្នុងកាលៈទេសៈប្រកបដោយភាពមិនប្រាកដប្រជានេះ។ ក្នុងន័យនេះ ក្រោមកិច្ចសហការយ៉ាងទូលំទូលាយជាមួយវិស័យឯកជន និងក្រសួង ស្ថាប័នពាក់ព័ន្ធ រាជរដ្ឋាភិបាលសម្រេចដាក់ចេញនូវវិធានការបន្ថែមជូនវិស័យទេសចរណ៍ មានដូចដូចជា បន្តលើកលែងការបង់ពន្ធប្រចាំខែគ្រប់ប្រភេទ លើកលែងតែអាករលើតម្លៃបន្ថែម ចំពោះសណ្ឋាគារ, ផ្ទះសំណាក់, និងក្រុមហ៊ុនភ្នាក់ងារទេសចរណ៍ ដែលបានចុះបញ្ជីជាមួយអគ្គ-នាយកដ្ឋានពន្ធដារ និងមានសកម្មភាពអាជីវកម្ម នៅខេត្តសៀមរាប សម្រាប់រយៈពេល ៣ ខែ គឺពីខែ មករា ដល់ខែ មីនា ឆ្នាំ ២០២៣ ។ អាជីវកម្មទាំងអស់នេះនៅតែមានកាតព្វកិច្ចដាក់លិខិតប្រកាសពន្ធអាករ និងប្រើប្រាស់ប្រព័ន្ធអនឡាញសម្រាប់ការគ្រប់គ្រងអាករលើតម្លៃបន្ថែម (E-VAT) ជារៀងរាល់ខែ ក្នុងអំឡុងពេលនេះ ។ បន្តផ្ដល់ការសម្របសម្រួលតាមរយៈការបង្កកតួលេខបំណុលត្រឹមចុងឆ្នាំ២០១៩ និងមិនគិតការពិន័យសម្រាប់ឆ្នាំ២០២៣ សម្រាប់វិស័យទេសចរណ៍ ។ បន្តជំរុញអាជីវកម្មក្នុងវិស័យទេសចរណ៍ រៀបចំកម្មវិធីអភិវឌ្ឍន៍ជំនាញជូនដល់បុគ្គលិករបស់ខ្លួន ដោយខ្លួនឯង និងមានលទ្ធភាពស្នើសុំការគាំទ្រហិរញ្ញប្បទាន ពីសំណាក់គម្រោងមូលនិធិអភិវឌ្ឍន៍ជំនាញ (SDF) តាមការចាំបាច់ ។

រាជរដ្ឋាភិបាលនឹងបន្តតាមដានយ៉ាងខ្ជាប់ខ្ជួននូវស្ថានភាពនៃវិបត្តិនៃជំងឺកូវីដ-១៩ ជាពិសេសការប្រែប្រួលនិន្នាការតំបន់ និងសកលលើសង្គម-សេដ្ឋកិច្ច និងត្រៀមដាក់ចេញនូវវិធានការបន្ថែមទៀត សំដៅស្តារ និង ជំរុញកំណើនសេដ្ឋកិច្ចជាតិឡើងវិញ ប្រកបដោយភាពធន់, ចីរភាព និងបរិយាបន្ន ក្រោមក្របខណ្ឌយុទ្ធសាស្រ្ត និងកម្មវិធីស្តារ និងជំរុញកំណើនសេដ្ឋកិច្ចក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ ២០២១-២០២៣៕

The post វិស័យសណ្ឋាគារផ្ទះសំណាក់ និងក្រុមហ៊ុនភ្នាក់ងារទេសចរណ៍នៅសៀមរាបបន្តរួចពន្ធបីខែទៀត appeared first on Kampuchea Thmey Daily.

ភ្ញៀវកក់បន្ទប់សណ្ឋាគារ ផ្ទះសំណាក់ តាមគោលដៅទេសចរណ៍ប្រមាណ ៦០ភាគរយហើយ

Sophal Tuon — Fri, 09 Dec 2022 05:24:40 +0000

គិតត្រឹមថ្ងៃនេះ មានភ្ញៀវកក់សណ្ឋាគារ ផ្ទះសំណាក់ ឬកន្លែងស្នាក់នៅតាមគោលដៅទេសចរណ៍សំខាន់ៗប្រមាណ ៦០ភាគរយហើយ ដើម្បីត្រៀមដំណើរកម្សាន្តនាថ្ងៃឆ្លងឆ្នាំសកល។ នេះបើតាមបញ្ជាក់លោក ភួង ចាន់រាតា អ្នកចាត់ការទូទៅនៅរីសតរបស់ក្រុមហ៊ុនវីរៈប៊ុនថាំ។

លោក ភួង ចាន់តារា បានលើកឡើថា នៅតាមរីសតរបស់ក្រុមហ៊ុនវីរៈប៊ុនថាំជាង១០ ទទួលបានភ្ញៀវកក់សេវាស្នាក់នៅកើនឡើងជាបណ្តើរៗហើយ ពោលបើគិតត្រឹមថ្ងៃទី០៩ ខែធ្នូនេះ មានភ្ញៀវកក់ខ្ទង់ ៦០ភាគរយហើយ។ ដោយឡែកនៅអាទិត្យទី២ ទី៣ឬទី៤ ចុងខែ នឹងមានភ្ញៀវទេសចរកក់បន្ទប់ស្នាក់នៅអស់ ដើម្បីត្រៀមដំណើរកម្សាន្តឆ្លងឆ្នាំសកល។

បើតាមលោក ចាន់តារា រីសតរបស់លោកឧកញ៉ា សួរ វីរៈ អគ្គនាយកក្រុមហ៊ុនវីរៈប៊ុនថាំ មានជាង ១០ទីតាំង នៅគោលដៅទេសចរណ៍នានា រួមមាន នៅកោះស្តេច ១កន្លែង, តាតៃ១កន្លែង, កោះរ៉ុងសន្លឹមមាន ៦កន្លែង, ខេត្តមណ្ឌលគិរី ១កន្លែង និងឧទ្យានជាតិព្រះសុរាម្រិតកុសុមៈគិរីរម្យ ៥កន្លែង។

លោកស្រី ឆាយ ស៊ីវលីន ប្រធានសមាគមទេសចរណ៍កម្ពុជា CATA បានលើកឡើងថា គិតរហូតមកដល់ពេលនេះ មានភ្ញៀវចាប់ផ្តើមកក់កន្លែងស្នាក់នៅតាមគោលដៅទេសចរណ៍ផ្សេងៗ តាមរយៈទីភ្នាក់ងារទេសចរណ៍បណ្តើរៗហើយ។ បើតាមលោកស្រី ស៊ីវលីន តាមរយៈការកក់សណ្ឋាគារផ្ទះសំណាក់នេះ ធ្វើឱ្យទីតាំង និងសេវាកម្មនៅក្នុងស្រុកកំពុងមានភាពមមាញឹកខ្លាំង ក្នុងនោះភាគច្រើនជាភ្ញៀវបរទេស។

ដោយឡែកនៅខេត្តសៀមរាប ពុំទាន់មានការកក់បន្ទប់ស្នាក់ច្រើននៅឡើយសម្រាប់ភ្ញៀវទេសចរជាតិ ដោយសារភ្ញៀវជាតិភាគច្រើន ពួកគេកក់នៅមុនពិធីបុណ្យប្រមាណតែ ១០ថ្ងៃប៉ុណ្ណោះ ខុសពីភ្ញៀវបរទេសមានការកក់ច្រើន ពិសេសទេសចរមកពីប៉ែកអឺរ៉ុប បានកក់បន្ទប់ស្នាក់នៅមុនកម្មវិធីយូរថ្ងៃមកហើយ ដោយសារនៅអឺរ៉ុបរដូវនេះរងារខ្លាំង ដូច្នេះទេសចរបានចេញដំណើរកម្សាន្តទៅតំបន់ផ្សេងៗ។ នេះជាការបញ្ជាក់របស់លោក នួន ច័ន្ទតារា នាយកគ្រប់គ្រងសណ្ឋាគារ ស្តារី អង្គរ នៅខេត្តសៀមរាប។ លោក បានប៉ាន់ស្មានថា បើគិតត្រឹមថ្ងៃនេះ មានអ្នកកក់បន្ទាប់ស្នាក់នៅត្រឹម ៥០% ទៅ ៦០%ប៉ុណ្ណោះ បើធៀបនឹងពេលដែលមិនទាន់មានវិបត្តិកូវីដ-១៩។

លោក នួន ច័ន្ទតារា បានបន្តថា «ខេត្តសៀមរាបមុនកូវីដ ឱ្យតែដល់ចុងខែ១២ ឬខែ១ ទទួលបានភ្ញៀវទេសចរច្រើន ប៉ុន្តែនាពេលនេះ ទើបចប់កូវីដថ្មីៗ ទេសចរមិនទាន់ខ្លាំងដូចកាលឆ្នាំ ២០១៩នោះទេ តែយើងក៏ឃើញមានការហោះហើរចូលខេត្តសៀមរាប ជាបន្តបន្ទាប់ មានមកពីវៀតណាម សាំងហ្កាពួ ថៃជាដើម»។

ដោយឡែកអាជីវកម្មវិស័យសណ្ឋាគារ ផ្ទះសំណាក់ នៅខេត្តសៀមរាប គិតមកដល់ពេលនេះ ទើបតែបើកដំណើការបានប្រមាណ ៤៨ភាគរយប៉ុណ្ណោះ បើធៀបនឹងមុនវិបត្តិកូវីដ។ នេះជាការបន្ថែមរបស់លោក ច័ន្ទតារា ថ្លែងតាមរយៈរបាយការណ៍របស់មន្ទីរទេសចរណ៍ខេត្ត។

យោងតាមរបាយការណ៍របស់ក្រសួងទេសចរណ៍រយៈពេល ១០ខែ ឆ្នាំ ២០២២នេះ នៅទូទាំងប្រទេសទទួលបានភ្ញៀវទេសចរអន្តរជាតិប្រមាណ ១.៥៧លាននាក់ កើនឡើង ៩៩១ភាគរយ ធៀបនឹងឆ្នាំ ២០២១។ ចំណែកភ្ញៀវទេសចរផ្ទៃក្នុងមានចំនួនជាង ១០.៨៦លាននាក់ កើនឡើង ២៣៤ភាគរយ ធៀបនឹងរយៈពេលដូចគ្នា កាលពីឆ្នាំ ២០២១៕

The post ភ្ញៀវកក់បន្ទប់សណ្ឋាគារ ផ្ទះសំណាក់ តាមគោលដៅទេសចរណ៍ប្រមាណ ៦០ភាគរយហើយ appeared first on Kampuchea Thmey Daily.

ឆ្មក់បង្ក្រាបអាហារដ្ឋាន និងផ្ទះសំណាក់មួយកន្លែងដែលលួចបង្កប់បម្រើសេវាកម្មផ្លូវភេទ

Sokhom Khon — Fri, 21 Oct 2022 03:43:22 +0000

អាហារដ្ឋាន និងផ្ទះសំណាក់មួយកន្លែងក្នុងក្រុងច្បារមន ត្រូវបានកម្លាំងនគរបាលប្រឆាំងការជួញដូរមនុស្ស និងការពារអនីតិជន នៃស្នងការនគរបាលខេត្តកំពង់ស្ពឺ រកឃើញមានប្រព្រឹត្តបទល្មើសសញ្ចាកម្មដោយឃាត់ខ្លួនមេការ ០២នាក់ និងរំដោះនារីបម្រើសេវាកម្មចំនូន០៨នាក់ ។

តាមប្រភពពីមន្ត្រីនគរបាលការិយាល័យជួញដូរផ្លូវភេទ បានប្រាប់ឲ្យដឹងនៅថ្ងៃទី២០ ខែតុលា ឆ្នាំ២០២២នេះថា ករណីអាហារដ្ឋានដែលមានបើកផ្ទះសំណាក់ហើយលួចលាក់បម្រើសេវាកម្មជួញដូរផ្លូវភេទនោះ សមត្ថកិច្ចជំនាញកំពុងធ្វើការសាកសួរមេការ និងនារីៗដើម្បីស្វែងរកមេខ្លោងផ្តន្ទាទោសតាមច្បាប់ ។

ប្រភពបន្តទៀតថា ការបង្ក្រាបទីតាំងដែលពាក់ព័ន្ធបទល្មើសសញ្ចាកម្មខាងលើ ធ្វើឡើងកាលពីរសៀលថ្ងៃទី១៩ ខែតុលា ឆ្នាំ២០២២ ស្ថិតក្នុងអាហារដ្ឋានលក់គ្រឿងក្លែម និងបើកផ្ទះសំណាក់យីហោ ម្លប់ពោធិ៍រំលេចធំ នៅភូមិព្រៃក្ដី សង្កាត់ស្វាយក្រវ៉ាន ក្រុងច្បារមន ខេត្តកំពង់ស្ពឺ ។

ក្នុងប្រតិបត្តិការចុះបង្ក្រាបទីតាំងលួចលាក់ចិញ្ចឹមនារីក្មេងៗ ដើម្បីបម្រើសេវាកម្មផ្លូវភេទនេះ សមត្ថកិច្ចឃាត់ខ្លួនមេការនារី ០២នាក់ ព្រមទាំងរំដោះនារីបម្រើសេវាចំនួន០៨នាក់ ក្នុងនោះមានក្មេងស្រីជាអនីតិជន០៦នាក់ផងដែរ ។

មុនពេលឈានដល់ការបង្រ្កាយអាហារដ្ឋាន និងផ្ទះសំណាក់យីហោ ម្លប់ពោធិ៍រំលេចធំ ដែលលួចប្រព្រឹត្តបទល្មើសសញ្ចាកម្ម គឺមានសេចក្តីរាយការណ៍ពីប្រជាពលរដ្ឋ ទើបកម្លាំងការិយាល័យប្រឆាំងការជួញដូរមនុស្ស និងការពារអនីតិជន នៃស្នងការនគរបាលខេត្ដកំពង់ស្ពឺ ដោយមានការសម្របសម្រួលនីតិវិធីពីតំណាងអយ្យការលោក រ៉ែន នរិទ្ធ ព្រះរាជអាជ្ញារង តុលាការខេត្តកំពង់ស្ពឺ បានចុះស្រាវជ្រាវ និងពិនិត្យជាក់ស្ដែងរកឃើញវត្ថុតាងជាច្រើនពាក់ព័ន្ធករណីជួញដូរផ្លូវភេទពិតប្រាកដមែន ។

នគរបាលបានបញ្ជាក់ថា ក្នុងប្រតិបត្តិការសមត្ថកិច្ចបានឃាត់ខ្លួនមនុស្ស០២នាក់ជាអ្នកគ្រប់គ្រងអាហារដ្ឋាន និងផ្ទះសំណាក់ដែលមានឈ្មោះទី១-លួន សុខខួច ភេទស្រី អាយុ៣៧ឆ្នាំ ជាមេការ, ទី២-ឈ្មោះ ឃឺន ផាត ភេទស្រី៣១ឆ្នាំ ជាមេការ និងបានរំដោះនារីបម្រើសេវាកម្មចំនួន០៨នាក់ ក្នុងនោះជាអនីតិជនចំនួន០៦នាក់ ។

ស្ត្រីមេការឈ្មោះ លួន សុខខួច បានសារភាពថា ទីតាំងអាហារដ្ឋាន និងផ្ទះសំណាក់យីហោ ម្លប់ពោធិ៍រំលេចធំ ខាងលេី ពិតជាទទួលបម្រើសេវាកម្មផ្លូវភេទមែននៅពេលភ្ញៀវចូលមកផឹកស៊ីនិយាយត្រូវរ៉ូវតម្លៃនាំគ្នាចូលបន្ទប់ផ្ទះសំណាក់ ។ ម្យ៉ាងទៀត បើភ្ញៀវចង់យកនារីចេញក្រៅក៏បានអាស្រ័យលើតម្លៃ និងសាម៉ីខ្លួនដោយទទួលភាគរយពីនារីៗដែលចេញទៅរួមភេទជាមួយភ្ញៀវ ។

បច្ចុប្បន្នជំនាញបានកសាងសំណុំរឿង និងបញ្ជូនជនរងគ្រោះទៅរកកិច្ចការជួយសង្រ្គោះ និងមុខរបរ ។ រីឯមេការទាំង ០២ នាក់សមត្ថកិច្ចជំនាញកំពុងរៀបចំកសាងសំណុំរឿងបញ្ជូនទៅតុលការដើម្បីចំណាត់ការនីតិវិធីបន្ដ៕

អត្ថបទ៖ ភួង រដ្ឋា

The post ឆ្មក់បង្ក្រាបអាហារដ្ឋាន និងផ្ទះសំណាក់មួយកន្លែងដែលលួចបង្កប់បម្រើសេវាកម្មផ្លូវភេទ appeared first on Kampuchea Thmey Daily.

ផ្ទះសំណាក់ Archives - Kampuchea Thmey Daily

បាត់កូនស្រីជិតមួយសប្តាហ៍តាមទាន់មកដេកផ្ទះសំណាក់ជាមួយសង្សារបង្កហិង្សាមកលើស្ត្រីជាម្តាយ

ការកក់បន្ទប់ផ្ទះសំណាក់ សណ្ឋាគារ កើនឡើង នៅចំពេលជិតឆ្លងឆ្នាំថ្មី

វិស័យសណ្ឋាគារផ្ទះសំណាក់ និងក្រុមហ៊ុនភ្នាក់ងារទេសចរណ៍​នៅសៀមរាប​បន្តរួចពន្ធបីខែទៀត

ភ្ញៀវកក់បន្ទប់សណ្ឋាគារ ផ្ទះសំណាក់ តាមគោលដៅទេសចរណ៍ប្រមាណ ៦០ភាគរយហើយ

ឆ្មក់បង្ក្រាបអាហារដ្ឋាន និងផ្ទះសំណាក់មួយកន្លែង​ដែលលួចបង្កប់បម្រើសេវាកម្មផ្លូវភេទ

វិស័យសណ្ឋាគារផ្ទះសំណាក់ និងក្រុមហ៊ុនភ្នាក់ងារទេសចរណ៍នៅសៀមរាបបន្តរួចពន្ធបីខែទៀត

ឆ្មក់បង្ក្រាបអាហារដ្ឋាន និងផ្ទះសំណាក់មួយកន្លែងដែលលួចបង្កប់បម្រើសេវាកម្មផ្លូវភេទ