ផ្លូវជាតិទាំងអស់ដែលគ្រប់គ្រងដោយមន្ទីរសាធារណការខេត្តព្រះវិហារ ទាំងផ្លូវកៅស៊ូ និងផ្លូវក្រួសក្រហម ត្រូវបានថែរក្សាយ៉ាងល្អ

អ៊ិន ពិសី — Sat, 29 Nov 2025 07:51:40 +0000

ផ្លូវជាតិទាំងអស់ដែលស្ថិតក្រោមការគ្រប់គ្រងរបស់ មន្ទីរសាធារណការ និងដឹកជញ្ជូនខេត្តព្រះវិហារ មានទាំងផ្លូវក្រាលកៅស៊ូ និងផ្លូវក្រាលក្រួសក្រហម ពិសេសផ្លូវតាមបណ្តោយខ្សែក្រវាត់ព្រំដែន កម្ពុជា-ថៃ-ឡាវ ត្រូវបានថែរក្សាយ៉ាងល្អប្រសើរ។

នេះបើតាមការបញ្ជាក់ឱ្យដឹងពីលោក សំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារ កាលពីថ្ងៃទី ២៨ ខែវិច្ឆិកា ឆ្នាំ ២០២៥ ក្នុងកិច្ចប្រជុំបូកសរុបលទ្ធផលការងារប្រចាំខែវិច្ឆិកា និងដាក់ចេញនូវទិសដៅអនុវត្តបន្តសម្រាប់ខែធ្នូ ឆ្នាំ ២០២៥។

ក្នុងឱកាសបើកកិច្ចប្រជុំនោះ លោក សំ លាងទ្រី បានសម្តែងនូវក្តីមោទនភាពយ៉ាងជ្រាលជ្រៅចំពោះកិច្ចខិតខំប្រឹងប្រែងរបស់ក្រុមការងារទាំងអស់ រហូតសម្រេចបាននូវស្នាដៃគួរជាទីកត់សម្គាល់។

លោកប្រធានមន្ទីរ គូសបញ្ជាក់ថា ផ្លូវជាតិទាំងអស់ដែលស្ថិតក្រោមការគ្រប់គ្រងរបស់មន្ទីរ រួមមានទាំងផ្លូវក្រាលកៅស៊ូ និងផ្លូវក្រាលក្រួសក្រហម ពិសេសផ្លូវតាមបណ្តោយខ្សែក្រវាត់ព្រំដែន កម្ពុជា-ថៃ-ឡាវ គឺត្រូវបានថែរក្សាយ៉ាងល្អប្រសើរ។ បច្ចុប្បន្ន ស្ថានភាពផ្លូវទាំងនោះ មិនមានរណ្ដៅ ជង្ហុក ឬសំបុកមាន់ គួរឱ្យកត់សម្គាល់នោះទេ ដែលជាកត្តាដ៏សំខាន់អនុញ្ញាតឱ្យប្រជាពលរដ្ឋអាចធ្វើដំណើរឆ្លងកាត់បានយ៉ាងរលូន និងមានសុវត្ថិភាពខ្ពស់។

ជាមួយគ្នានេះ លោកប្រធានមន្ទីរ បានថ្លែងអំណរគុណដល់មន្ត្រីគ្រប់រូបដែលបានបំពេញតួនាទី និងភារកិច្ចរបស់ខ្លួនដោយស្មារតីទទួលខុសត្រូវខ្ពស់ និងភាពជាម្ចាស់ការ ទៅតាមជំនាញរៀងៗ ខ្លួន រួមចំណែកក្នុងការផ្តល់សេវាសាធារណៈជូនប្រជាពលរដ្ឋ។

លើសពីនេះទៅទៀត លោក សំ លាងទ្រី ក៏បានផ្តល់ការណែនាំបន្ថែមដោយសង្កត់ធ្ងន់ទៅលើការពង្រឹងការងាររដ្ឋបាលផ្ទៃក្នុង។ មន្ត្រីជំនាញនៅតាមការិយាល័យទាំងអស់ ត្រូវតែបង្កើនការយកចិត្តទុកដាក់យ៉ាងហ្មត់ចត់ទៅលើការរៀបចំ និងគ្រប់គ្រងឯកសារ (បញ្ជីស្នាម)។ ត្រូវចៀសវាងដាច់ខាតការកើតឡើងនូវកំហុសឆ្គងដដែលៗ ក្នុងការងាររដ្ឋបាល ដើម្បីធានាបានប្រសិទ្ធភាព ភាពត្រឹមត្រូវ និងគណនេយ្យភាពរបស់មន្ទីរ៕

អត្ថបទ ៖ ស្រីរ័ត្ន

The post ផ្លូវជាតិទាំងអស់ដែលគ្រប់គ្រងដោយមន្ទីរសាធារណការខេត្តព្រះវិហារ ទាំងផ្លូវកៅស៊ូ និងផ្លូវក្រួសក្រហម ត្រូវបានថែរក្សាយ៉ាងល្អ appeared first on Kampuchea Thmey Daily.

ផ្លូវក្រាលក្រួសក្រហមប្រវែងជាង ៦ ពាន់ម៉ែត្រ នៅស្រុកសេសាន សម្ពោធដាក់ឲ្យប្រើប្រាស់

អ៊ិន ពិសី — Fri, 30 Jun 2023 02:04:04 +0000

គម្រោងជួសជុលផ្លូវក្រាលក្រួសក្រហមប្រវែង ៦,៥៨០ ម៉ែត្រ និងទទឹង ៦ ម៉ែត្រ (ផ្លូវជាតិលេខ ៧៨ ចាស់) ត្រូវបានសម្ពោធដាក់ឲ្យប្រើប្រាស់ ដោយប្រើមូលនិធិស្រុក ឆ្នាំ ២០២៣ ស្ថិតនៅភូមិច្រប់ ឃុំក្បាលរមាស ស្រុកសេសាន ខេត្តស្ទឹងត្រែង។

កាលពីថ្ងៃទី ២៩ ខែមិថុនា ឆ្នាំ ២០២៣ លោក ស្វាយ សំអ៊ាង អភិបាល នៃគណៈអភិបាលខេត្តស្ទឹងត្រែង អមដំណើរដោយ អភិបាលរងខេត្ត គណៈអភិបាលស្រុកសេសាន និងមន្ទីរអង្គភាពពាក់ព័ន្ធជុំវិញខេត្តជាច្រើន បានអញ្ជើញក្នុងពិធីសម្ពោធដាក់ឲ្យប្រើប្រាស់នូវគម្រោងជួសជុលផ្លូវក្រាលក្រួសក្រហមប្រវែង ៦,៥៨០ ម៉ែត្រ ទទឹង ៦ ម៉ែត្រ (ដែលជាផ្លូវជាតិលេខ ៧៨ ចាស់) ដោយប្រើប្រាស់មូលនិធិស្រុក ឆ្នាំ ២០២៣ ស្ថិតនៅភូមិច្រប់ ឃុំក្បាលរមាស ស្រុកសេសាន ខេត្តស្ទឹងត្រែង។

លោក ស្វាយ សំអ៊ាង បន្ទាប់ពីសម្ពោធដាក់ឲ្យប្រើប្រាស់នូវគម្រោងជួសជុលផ្លូវក្រាលក្រួសក្រហមរួចមក ក៏បានបន្តដំណើរចុះត្រួតពិនិត្យលទ្ធភាពជាក់ស្ដែង ក្នុងការសាងសង់ស្ពានមួយកន្លែង ដើម្បីសម្រួលដល់ការធ្វើដំណើររបស់ប្រជាពលរដ្ឋដែលអាស្រ័យផលលើផ្លូវមួយខ្សែនេះ ក្នុងការដឹកជញ្ជូនកសិផលពួកគាត់ទៅកាន់ទីផ្សារ៕

អត្ថបទ ៖ ពិសី

The post ផ្លូវក្រាលក្រួសក្រហមប្រវែងជាង ៦ ពាន់ម៉ែត្រ នៅស្រុកសេសាន សម្ពោធដាក់ឲ្យប្រើប្រាស់ appeared first on Kampuchea Thmey Daily.

ផ្លូវជាតិ​ Archives - Kampuchea Thmey Daily

ផ្លូវក្រាលក្រួសក្រហមប្រវែងជាង ៦ ពាន់ម៉ែត្រ នៅស្រុកសេសាន សម្ពោធដាក់ឲ្យប្រើប្រាស់

ផ្លូវជាតិ Archives - Kampuchea Thmey Daily