ក្បាល​​​រថភ្លើង​​​ដឹក​អ្នកដំណើរ​ល្បឿនលឿន ម៉ាក KiHa 183 Series DMU​​​​ចំនួន ១១ គ្រឿង​នេះ​ ​នឹង​ត្រូវ​ដឹកជញ្ជូន​ពី​តំបន់​ហុកកៃដូ មក​កាន់​ប្រទេស​កម្ពុជា ដោយ​បាន​ចាកចេញ​ពី​កំពង់ផែ Hakodate នៅ​ថ្ងៃទី១៥ ខែមេសា ឆ្នាំ២០២៤ ហើយអាចនឹងមកដល់កំពង់ផែក្រុងព្រះសីហនុនៅថ្ងៃទី ២៧ ខែមេសា ឆ្នាំ ២០២៤។

ក្បាលរថភ្លើង​​​​ល្បឿន​លឿន​របស់​ជប៉ុន​ម៉ាក KiHa 183 Series DMU អាច​រត់​បាន​ល្បឿន​ដល់ ១១០គីឡូម៉ែត្រ​ក្នុង​មួយ​ម៉ោង។

​បច្ចុប្បន្ន​កម្ពុជា​មានផ្លូវ​ដែក​ចំនួន​ពីរ​ខ្សែ​រ​ ​គឺ​ភ្នំពេញ​-​ប៉ោយ​ប៉ែត​ ​និង​ភ្នំពេញ​-​ខេត្ត​ព្រះ​សី​ហ​នុ​។​ ​បណ្តាញ​ផ្លូវដែក​នេះ​ស្ថិតនៅ​ក្រោម​ការ​គ្រប់គ្រង​របស់​ក្រុមហ៊ុន​Royal​ ​Railway​ ​ដែល​ជា​ក្រុមហ៊ុន​បុត្រ​ស​ម្ព័ន្ធ​របស់​ក្រុមហ៊ុន​ ​Royal​ ​Group​។រដ្ឋាភិបាល​​គ្រោង​នឹង​កែ​លម្អ​ផ្លូវដែក​ដែល​មានស្រាប់​ទៅជា​ផ្លូវ​រថភ្លើង​ល្បឿន​លឿន​។

តាមព័ត៌មានកន្លងមក ក្រសួងសាធារណការ និងដឹកជញ្ជូនបានសិក្សា គម្រោងលើកកម្រិតផ្លូវរថភ្លើងភាគខាងជើងភ្នំពេញ-ប៉ោយប៉ែត ឱ្យទៅជាផ្លូវរថភ្លើងល្បឿនលឿនដំបូងគេនៅកម្ពុជា។

បើតាមក្រសួងសាធារណការ គម្រោងផ្លូវរថភ្លើងល្បឿនលឿន មានប្រវែង ៣៨២គីឡូម៉ែត្រ ដែលត្រូវការទុនវិនិយោគជាង ៤ពាន់លានដុល្លារអាមេរិក ដោយក្នុងនោះមានរួមបញ្ចូលទាំងក្បាល និងទូរថភ្លើងសម្រាប់ដំណើរការ ដែលប្រើរយៈពេល​សាងសង់ចំនួន ៤ឆ្នាំ។

ផ្លូវនេះ មានខ្នាតទទឹងប្រវែង ១.៤៣៥មីលីម៉ែត្រ ហើយល្បឿនសម្រាប់ធ្វើចរាចរណ៍គឺ ១៦០គីឡូម៉ែត្រក្នុងមួយម៉ោង និងមានស្ថានីយសរុបចំនួន៣៣ សម្រាប់ដំណើរការ។ ក្នុងនោះមានស្ថានីយចំនួន១៩ ក្នុងផែនការរយៈពេលខ្លី និងគ្រោងបន្ថែមចំនួន ១៤ទៀត ក្នុងផែនការរយៈពេលវែង៕

អត្ថបទ៖ ឡេង ដេត

The post ក្រុមហ៊ុន Royal Railway ​ទិញក្បាលរថភ្លើងល្បឿន​លឿន ១១ គ្រឿង ​ពីប្រទេសជប៉ុន កំពុងដឹកមកកម្ពុជា appeared first on Kampuchea Thmey Daily.

បច្ចុប្បន្ននេះគេសង្កេតឃើញថា នៅក្នុងក្រុងបាត់ដំបងទាំងមូលទាំងខាងលិចដងស្ទឹង និងខាងកើតដងស្ទឹងសង្កែ ត្រូវបាន​ធ្វើការគាស់កកាយទាំងយប់ទាំងថ្ងៃ ដោយប្រើប្រាស់គ្រឿងចក្ររាប់សិបគ្រឿង ដើម្បីធ្វើការលើ​គម្រោងនេះ ដែលនេះគឺជាគម្រោងភ្ជាប់បណ្ដាញទុយោបង្ហូរលាមកគ្រប់លំនៅឋាន ដើម្បីបូមយកទៅកាន់ស្ថានីយ៍ដែលបានកំណត់ ដូច្នេះគ្រប់ច្រកល្ហកទាំងអស់ចាំបាច់ត្រូវតែកាយដើម្បីបង្កប់ទុយោចូលទៅប្រព័ន្ធទុយោធំដែលស្ថិតនៅកណ្ដាលទ្រូងផ្លូវ។

បើតាមការលើកឡើងពីក្រុមជំនាញបានអះអាងថា ស្ថានីយបូមលាមកនៅប៉ែកខាងកើតស្ទឹងគឺទីតាំងស្ថិតនៅខាងក្រោយផ្សារអន្លង់វិលលើទឹកដីស្រុកសង្កែ ដោយឡែកនៅប៉ែកខាងលិចស្ទឹង ដែលជាតំបន់ស្មុគស្មាញនិងជាទីក្រុងដ៏សំខាន់គឺទីតាំងស្ថានីយ៍ស្ថិតនៅកន្លែងអង្គការសាវ៉ាក្នុងភូមិសាស្ត្រឃុំចំការសំរោងដែលទីតាំងទាំងពីរខាងលើនេះមានតួនាទីយ៉ាងសំខាន់ក្នុងការស្រូបទាញបូមយកលាមកនៅទូទាំងក្រុងបាត់ដំបង។

យោងតាមផែនការរបស់គម្រោងគឺក្រុមការងារកាយប្រព័ន្ធលូផ្សេង និងក្រុមធ្វើថ្នល់ចាក់កៅស៊ូផ្សេង គឺត្រូវរង់ចាំការបញ្ចប់លើការកាយប្រព័ន្ធលូឲ្យរួចរាល់ទើបការងារធ្វើផ្លូវ និងចាប់ផ្ដើមចាក់កៅស៊ូដើម្បីបញ្ចប់។

លោក ព្រួញ រិទ្ធថា ប្រធានមន្ទីរសាធារណការនិងដឹកជញ្ជូនខេត្តបាត់ដំបង បានមានប្រសាសន៍ថា ផ្លូវខ្វាត់ខ្វែងក្នុងក្រុងបាត់ដំបងទាំងមូល សរុបដែលមានប្រវែងប្រមាណ ៦០ គីឡូម៉ែត្រនេះ គឺជាតួនាទីរបស់ ADB ដែលក្រុមការងារនេះកំពុងសម្រុកទាំងយប់ទាំងថ្ងៃជាពិសេសគឺនៅប៉ែកខាងលិចស្ទឹងតែម្ដង បើតាមការប៉ាន់ប្រមាណគឺអាចរួចរាល់ជាស្ថាពរនៅពាក់កណ្ដាលឆ្នាំ ២០២៥ ហើយមន្ទីរសាធារណៈការគ្រាន់តែជាអ្នកសហការ និងសម្របសម្រួលតែប៉ុណ្ណោះ តែទោះបីជាយ៉ាងណាក្តី ក៏មន្ទីរនៅតែឈ្មូសឈ្មុលប្រឹងប្រែងធ្វើយ៉ាងណាឲ្យការងារនេះដើរដោយរលូន និងសម្រេចដល់គោលដៅឆាប់ៗហើយក៏សូមអធ្យាស្រ័យ ទៅលើបងប្អូនប្រជាពលរដ្ឋផងដែរដែលមានការប៉ះពាល់ដោយសារល្អងធូលី៕

អត្ថបទ៖ សោនិយមរ័ត្ន

The post គម្រោងបង្កប់ប្រព័ន្ធលូ និងធ្វើផ្លូវក្នុងក្រុងបាត់ដំបងអាចសម្រេចពាក់កណ្ដាលឆ្នាំ ២០២៥ appeared first on Kampuchea Thmey Daily.

នៅក្នុងបទបង្ហាញ តំណាងក្រុមហ៊ុនCRBC បានលើកយកនូវចំណុចសំខាន់ៗដែលបានសិក្សា មកបង្ហាញជូន​អង្គប្រជុំដែលដឹកនាំដោយ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន  រួមមានដូចជា៖ (១)ទិដ្ឋភាពទូទៅនៃគម្រោង (២) ការវិភាគលើទំហំសេដ្ឋកិច្ច និងទំហំចរាចរណ៍ (៣) ផែនការនៃការសាងសង់ (៤) ស្តង់ដារបច្ចេកទេសគោលនៃខ្សែផ្លូវដែក (៥)ការរៀបចំការដឹកជញ្ជូន (៦) រយៈពេលនៃការសាងសង់ និងការវិនិយោគសរុប (៧)ការវាយតម្លៃលើផ្នែកហិរញ្ញវត្ថុ និង (៨) ការបញ្ជាក់អំពីបញ្ហាសំខាន់ៗមួយចំនួន។

តាមរយៈការសិក្សាបឋមនេះ បានបញ្ជាក់ថា គម្រោងនេះមានប្រវែងសរុបប្រមាណ ៣៨២គីឡូម៉ែត្រ ត្រូវការទុនវិនិ​យោគប្រមាណជាង ៤ពាន់លានដុល្លារអាមេរិក ដោយរួមបញ្ចូលទាំងក្បាល និងទូរថភ្លើងសម្រាប់ដំណើរការ និងប្រើប្រាស់រយៈពេលសាងសង់ប្រមាណ ៤ឆ្នាំ។ ផ្លូវរថភ្លើងល្បឿនលឿននេះ មានខ្នាតទទឹងប្រវែង ១.៤៣៥ មម ល្បឿនសម្រាប់ធ្វើចរាចរណ៍គឺ ១៦០គ.ម/ម៉ និងមានស្ថានីយសរុបចំនួន៣៣ សម្រាប់ដំណើរការ (ស្ថានីយចំនួន១៩ ក្នុងផែនការរយៈពេលខ្លី និងគ្រោងបន្ថែមចំនួន ១៤ទៀត ក្នុងផែនការរយៈពេលវែង)។ ក្នុងនោះដែរ ខ្សែររថភ្លើង​ត្រូវបំពាក់ប្រភេទក្បាលរថភ្លើង ដែលដំណើរការដោយថាមពលអគ្គិសនី ដោយមានការសាងសង់ផ្លូវ​អាកាសរំលង​កាត់ទទឹងផ្លូវប្រមាណជាង ៣០០កន្លែង ដើម្បីបញ្ចៀសគ្រោះថ្នាក់ចរាចរណ៍ត្រង់ចំណុចប្រសព្វជាមួយផ្លូវថ្នល់ និងមានបែងចែកដាច់ពីគ្នា រវាងស្ថានីយអ្នកដំណើរ និងស្ថានីយលើកដាក់ទំនិញ នៅភូមិសាស្ត្ររាជធានីភ្នំពេញ (មួយនៅស្ថានីយភ្នំពេញសម្រាប់អ្នកដំណើរ និងមួយទៀតនៅស្ថានីយសំរោងសម្រាប់លើកដាក់ទំនិញ)។

យោងតាមសំណើសុំធ្វើការសិក្សាសមិទ្ធិលទ្ធភាពគម្រោងលើកកម្រិតផ្លូវរថភ្លើងភាគខាងជើង ភ្នំពេញ-ប៉ោយប៉ែត ឱ្យទៅជាផ្លូវរថភ្លើងល្បឿនលឿន របស់ក្រុមហ៊ុនសាជីវកម្មស្ពាន និងថ្នល់ចិន (CRBC) កាលពីថ្ងៃទី១៧ ខែធ្នូ ឆ្នាំ២០២១ ក្រសួងសាធារណការ និងដឹកជញ្ជូន បានសម្រេចផ្ដល់គោលការណ៍អនុញ្ញាតឱ្យមានការសិក្សាគម្រោងនេះ នៅថ្ងៃទី០៦ ខែមករា ឆ្នាំ២០២២កន្លងទៅ។

គម្រោងលើកកម្រិតផ្លូវរថភ្លើងភាគខាងជើង ភ្នំពេញ-ប៉ោយប៉ែត ឱ្យទៅជាផ្លូវរថភ្លើងល្បឿនលឿន គឺជាគម្រោងដែលផ្តោត​ចម្បងលើសេវាដឹកជញ្ជូនអ្នកដំណើរ និងដឹកទំនិញអន្តរជាតិ រវាងប្រទេសកម្ពុជា និងប្រទេសថៃ ក៏ដូចជាការដឹក​ជញ្ជូនអ្នកដំណើរ និងទំនិញតាមខ្សែបណ្ដោយ ពីរាជធានីភ្នំពេញ ទៅក្រុងប៉ោយប៉ែត ដោយឆ្លងកាត់ខេត្តកណ្តាល កំពង់ឆ្នាំង ពោធិសាត់ បាត់ដំបង និងខេត្តបន្ទាយមានជ័យ។ គម្រោងនេះនឹងក្លាយជាផ្លូវដែកល្បឿនលឿន​ស្ដង់ដារដំបូង​គេបំផុត នៅក្នុងប្រទេសកម្ពុជា ហើយនឹងក្លាយទៅជាខ្សែផ្លូវដឹកជញ្ជូនអ្នកដំណើរ និងដឹកទំនិញដ៏សំខាន់​ទាំងនៅ​ក្នុងប្រទេស និងភ្ជាប់ទៅក្រៅប្រទេសផងដែរ៕

The post មកដឹងតម្លៃសាងសង់ផ្លូវរថភ្លើងល្បឿនលឿនដំបូងគេនៅកម្ពុជា ភ្នំពេញ-ប៉ោយប៉ែត appeared first on Kampuchea Thmey Daily.