ប្រជាពលរដ្ឋរស់នៅក្នុងតំបន់ និងអ្នកដំណើរដែលឧស្សាហ៍ឆ្លងកាត់ សម្តែងក្តីសាទរសប្បាយរីករាយ និងថ្លែងអំណរអរគុណ  ចំពោះអាជ្ញាធររាជធានីភ្នំពេញបានយកចិត្តទុកដាក់ការរៀបចំដងផ្លូវ និងចិញ្ចើមផ្លូវសាធារណៈឲ្យមានសណ្តាប់ធ្នាប់ របៀបរៀបរយ និង សោភ័ណភាពល្អប្រសើរឡើង ដើម្បីបរិស្ថានអនាម័យល្អ ក្នុងទីក្រុង។

ពលរដ្ឋដ៏ដែលបានបញ្ជាក់បន្ថែមថា កន្លងទៅធ្វើដំណើរឆ្លងកាត់តំបន់ផ្សារដើមគរ មានភាពស្ទះចង្អៀត ទាំងថ្ងៃទាំងយប់ ចំណែកចិញ្ជើមផ្លូវមិនមានកន្លែងសម្រាប់អ្នកដើរថ្មើរជើង ដូច្នេះក្រោយរៀបចំមានសភាពស្រឡះល្អ មានសោភ័ណភាពតាមដងផ្លូវ។

កាលពីរសៀលថ្ងៃទី២៤ ខែកុម្ភៈ ឆ្នាំ២០២៦ ក្នុងកិច្ចប្រជុំស្តីពីវឌ្ឍនភាពក្នុងការរៀបចំសណ្តាប់ធ្នាប់ និងការផ្ទេរអាជីវករដែលលក់ដូរនៅលើផ្លូវ និងចិញ្ចើមផ្លូវតំបន់ជុំវិញផ្សារដើមគរ លោក ឃួង ស្រេង អភិបាលរាជធានីភ្នំពេញ បានមានប្រសាសន៍ឲ្យដឹងថា ៖ ផ្លូវជាច្រើនខ្សែនៅតំបន់ជុំវិញផ្សារដើមគរ ពិសេសមហាវិថីព្រះមុនីរ៉េត មហាវិថីម៉ៅសេទុង និងផ្លូវលេខ២៣០ ស្ថិតក្នុងមូលដ្ឋានខណ្ឌទួលគោក និងខណ្ឌបឹងកេងកង មកដល់ពេលនេះ ការរៀបចំសណ្តាប់ធ្នាប់ គឺអនុវត្តបានល្អប្រសើរប្រមាណ៩០%ហើយ ក្រោយពីអាជ្ញាធររាជធានីភ្នំពេញបានចាត់វិធានការមិនឱ្យអាជីវករលក់ដូរលើចិញ្ចេីមផ្លូវ និងទ្រូងផ្លូវ ក្នុងរយៈពេលជាង១ខែកន្លងមកនេះ។

លោក ឃួង ស្រេង បានមានប្រសាសន៍បន្តថា ការសម្រេចបានជោគជ័យដ៏ធំធេងនេះ គឺបានមកពីការយកចិត្តទុកដាក់អស់កម្លាំងកាយចិត្ត មិនថាយប់ ថ្ងៃរបស់អាជ្ញាធរ និងកងកម្លាំង ហើយអ្វីដែលពិសេសថែមទៀតនោះ គឺការចូលរួមគាំទ្រយ៉ាងពេញទំហឹងពីសំណាក់ប្រជាពលរដ្ឋ។ ការគាំទ្រនេះ ក៏ព្រោះតែការអនុវត្តការងារប្រកបដោយភាពទន់ភ្លន់ ស្លូតបូត តែម៉ឺងម៉ាត់ និងធ្វើឡើងដើម្បីផលប្រយោជន៍រួមសម្រាប់ប្រជាពលរដ្ឋ១៧លាននាក់។

ទន្ទឹមនឹងការរៀបចំសណ្តាប់ធ្នាប់នៅតំបន់ខាងលើ លោក ឃួង ស្រេង អភិបាលរាជធានីភ្នំពេញ ក៏បានណែនាំឱ្យអាជ្ញាធរខណ្ឌទាំង១៤ ត្រូវរៀបចំសណ្តាប់ធ្នាប់នៅក្នុងមូលដ្ឋានរបស់ខ្លួនឱ្យបានល្អ និងម៉ឺងម៉ាត់ ដោយមិនអនុញ្ញាតិឱ្យមានការលក់ដូរបំពានលើទ្រូងផ្លូវ និងចិញ្ចើមផ្លូវឡើយ។ ចំពោះការងារដោះស្រាយការកកស្ទះចរាចរណ៍តាមដងផ្លូវវិញក៏ត្រូវរួមគ្នាធ្វើឡើងជាប្រចាំផងដែរ ដោយនៅពេលនេះនៅរាជធានីភ្នំពេញ មានយានជំនិះច្រើនជាងចំនួនមនុស្សទៅហើយ៕ អត្ថបទ ៖សុភា

The post ការរៀបចំកែលម្អហេដ្ឋារចនាសម្ព័ន្ធដងផ្លូវជុំវិញផ្សារដើមគរចាស់ សម្រេចលទ្ធផលបាន៩០ភាគរយ ពលរដ្ឋ និងអ្នកដំណើរសាទរ appeared first on Kampuchea Thmey Daily.

លោកស្រី ដោ សម្ភស្ស នាយិការងរដ្ឋបាលនិងជាអ្នកនាំពាក្យរដ្ឋបាលរាជធានីភ្នំពេញបានឲ្យដឹងថា បច្ចុប្បន្ន ក្រុមការងារជំនាញបាននឹងកំពុងបន្តការយកចិត្តទុកដាក់ ក្នុងការជួសជុលការ៉ូឡា តាមរយៈការរុះរើចាស់ដាក់ថ្មី និងការស្តារប្រព័ន្ធលូបង្ហូរទឹក ក៏ដូចជាការរៀបចំតុបតែងលម្អរបន្ថែមនូវចំណុចផ្សេងៗទៀត ក្នុងការរៀបចំឲ្យបានស្អាតល្អឡើងវិញ។

លោកស្រីបន្តថា ការរៀបចំនេះ ធ្វើឡើងទៅបាន គឺដោយសារមានការចូលរួមសហការល្អប្រសើរពីសំណាក់ពលរដ្ឋរស់នៅតំបន់ខាងលើ ខណៈអតីតអ្នកលក់ដូរ បាននឹងកំពុងរីករាយក្នុងការលក់ដូរនៅតាមទីតាំងថ្មី ដែលអាជ្ញាធររាជធានីភ្នំពេញ បានរៀបចំជូន ដោយពួកគាត់ពុំមានការវិលត្រឡប់ចូលទៅទីតាំងចាស់វិញនោះឡើយ។

ក្រោយយុទ្ធនាការ នៃការរៀបចំសណ្តាប់ធ្នាប់ទីក្រុង ពិសេសការរៀបចំសណ្តាប់ធ្នាប់នៅតំបន់ជុំវិញផ្សារដើមគរចាស់ តាំងពីកំឡុងថ្ងៃទី១៨ ខែមករា ឆ្នាំ២០២៦ រហូតមកទល់នឹងបច្ចុប្បន្ននេះ មានការចូលរួមសាទរច្រើនពីសំណាក់សាធារណជន និងមជ្ឈដ្ឋានទូទៅ ខណៈតំបន់នេះ ជាតំបន់ដែលកើតមានបញ្ហារុំារៃច្រើនឆ្នាំមកហើយលើការបំពាន់ចិញ្ចើម និងចំណីផ្លូវសាធារណៈធ្វើជាកន្លែងសម្រាប់លក់ដួរ ដើម្បីបំពេញប្រយោជន៍ឯកជនផ្ទាល់ខ្លួន។

គួររំលឹកថា ៖ អាជ្ញាធររាជធានីភ្នំពេញ កាលពីថ្ងៃទី១៨ មករា ឆ្នាំ២០២៦ បានចាប់ផ្តើមការហាមឃាត់ទាំង​ស្រុង ចំពោះការលក់ដូរអាណាធិបតេយ្យរបស់អាជីវករមួយចំនួន ដែលបានយកចិញ្ចើមផ្លូវសាធារណៈ​ជុំវិញតំបន់ផ្សារដើមគរ ដើម្បីប្រកបអាជីវកម្មសម្រាប់តែផ្តល់ផលប្រយោជន៍ឯកជនផ្ទាល់ខ្លួន ។ គិតមកដល់ថ្ងៃទី១៨ ខែកុម្ភៈ ឆ្នាំ២០២៦នេះ មានរយៈពេល០១ខែហើយ នៃយុទ្ធនាការរៀបចំតំបន់នេះ៕ អត្ថបទ ៖សុភា

The post សោភ័ណភាពនៅតំបន់ជុំវិញផ្សារដើមគរចាស់ ត្រូវកែលំអរក្នុងរយៈពេល០២ខែ ខណៈអ្នកលក់ដូរ ពុំមានការវិលត្រឡប់ចូលវិញនោះទេ appeared first on Kampuchea Thmey Daily.

ការចេញមកបញ្ជាក់ជាថ្មីម្ដងទៀតនេះ គឺបន្ទាប់ពីនៅតែមានស្កាត់មកសួរ ពីគម្រោងរៀបចំសណ្ដាប់ធ្នាប់ជុំវិញផ្សារដើមគ នេះពិតទេ ? អាចត្រឡប់ក្រោយទេ? ក្នុងន័យនេះ អ្នកនាំពាក្យសាលារាជធានីភ្នំពេញ ស្នើឲ្យក្រុមអាជីវករស្ងប់ចិត្ត ហើយប្រឹងប្រែងប្រកបរបររកស៊ីនៅទីតាំងថ្មីដោយមានទំនុកចិត្ត កុំគិតរារែកទៀត រដ្ឋបាលរាជធានីភ្នំពេញ នឹងមិនអនុញ្ញាតឲ្យទៅលក់នៅលើដងផ្លូវ ចិញ្ចើមផ្លូវ ដោយគ្មានសណ្ដាប់ធ្នាប់ទៀតនោះឡើយ។

សូមបញ្ជាក់ថា រហូតមកដល់បច្ចុប្បន្ននេះតាមមហាវិថីធំៗ រួមមានមហាវិថីព្រះមុន្នីរ៉េត មហាវិថីម៉ៅសេទុង ផ្លូវលេខ២៣០ ដែលកន្លងមកអាជីវករបានតាំងលក់បន្លែផ្លែឈើនៅលើផ្លូវនោះត្រូវបានអាជ្ញាធរនៃរាជធានីភ្នំពេញបាននិងកំពុងរៀបចំផ្លាស់ប្ដូដាក់ការ៉ូឡាថ្មីថ្មីឡើងវិញដើម្បីសោភណ្ឌភាពផ្លូវហើយស្អាតសមនឹងរាជធានីភ្នំពេញស៊ីវីល័យហើយក៏មិនអនុញ្ញាតឲ្យមានអាជីវករវិលត្រឡប់មកលក់លើផ្លូវវិញនោះដែរ។

បច្ចុប្បន្នអាជីវករមួយចំនួនធំបានកំពុងបន្តអាជីវកម្មរបស់ខ្លួនលក់ដូរបន្លែផ្លែឈើនៅ ឯផ្សារតាម៉ាប់ព្រែកជ្រៃ និង មួយចំនួនទៀតបាននិងកំពុងបន្តអាជីវកម្មរបស់ខ្លួននៅផ្សារដើមគរថ្មី៕ អត្ថបទ៖ សុភា

The post អ្នកស្រី ដោ សម្ផស្ស ៖ គ្មានការវិលថយក្រោយណាមួយអាចកើតឡើងវិញដាច់ខាត ចំពោះយុទ្ធនាការរៀបចំសណ្ដាប់ធ្នាប់នៅជុំវិញផ្សារដើមគរ appeared first on Kampuchea Thmey Daily.

លោកស្រី ដោ សម្ផស្ស មាន​ប្រសាសន៍​ថា «ពេលវេលា​ដែល​ក្រុម​អ្នកលក់​ទាំងនោះ លួច​ធ្វើ​សកម្មភាព​បំពាន​បម្រាម​របស់​អាជ្ញាធរ គឺ​ភាគច្រើន ចាប់ពី​វេលា​ម៉ោង​ ១២ ​យប់ ដល់​ម៉ោង ​៥ ​ភ្លឺ​។ វិធានការ​ដែល​យើង​កំពុង​ធ្វើ​នេះ គឺ​ដោយសារ​បងប្អូន​អាជីវករ​មួយចំនួន​តូច​ពួកគាត់​នៅតែ​ចិញ្ចឹមចិត្ត ក្រែង​អាជ្ញាធរ​ភ្លេចខ្លួន ពួកគាត់​មក​តាំង​លក់​លើ​ទ្រូងផ្លូវ​ចិញ្ចើមផ្លូវ​ដូចដើម​វិញ​។​ សព្វថ្ងៃនេះ​ ពួកគាត់​នៅតែ​បន្ត​លួច​ធ្វើ​សកម្មភាព ​ពិសេស​នៅ​ម៉ោង​ ១២ ​យប់ ម៉ោង ​១​ យប់ ម៉ោង ​២ ​ឬ​ ៣​ យប់ ម៉ោង ៥ ភ្លឺ​ ក៏មាន តែ​ជា​ចំនួន​តូច​នោះ​ទេ​។ ពួកយើង​នៅតែ​កំពុង​តាមដាន»។

លោកស្រី ដោ សម្ផស្ស បន្ត​ថា «ម្យ៉ាងវិញទៀត ចំពោះ​អាជីវករ​ដែល​លក់​នៅក្នុង​ផ្ទះ ពួកគាត់​សហការ​ជាមួយ​យើង តែ​នៅពេលដែល​ពួកយើង​ចុះ​រៀបចំ​តែប៉ុណ្ណោះ តែ​នៅពេល​យើង​ដកឃ្លា ពួកគាត់ បន្ត​លក់​មកលើ​ចិញ្ចើមផ្លូវ​ដដែល ដែល​សកម្មភាព​នេះ​យើង​នៅតែ​បន្ត​តាមដាន​អប់រំ ណែនាំ​ជាមួយនឹង​ការ​ធ្វើ​កំណត់ហេតុ​ពួកគាត់​ជា​រៀងរាល់​យប់។ ចំពោះ​សកម្មភាព​នេះ បន្តិច​ទៀត​បងប្អូន​យល់ ទើប​យើង​បន្ធូរបន្ថយ​រាប់ទាំង​ការ​បើក​ផ្លូវ​នៅ​ពេលយប់​ឡើងវិញ​ផង​ដែរ ព្រោះ​ពួកគាត់​នៅតែ​បន្ត​លប​លួច​លក់ដូរ​នៅ​ពី​យប់ ពិសេស​នៅ​ពេល​កណ្ដាល​អធ្រាត្រ ដោយ​មក​ផ្ទេរផ្ទូរ សម្រុកចូល​មក​ដល់​គោលដៅ​ដែល​ពួកគាត់​ធ្លាប់​លក់។ យើង​នៅតែ​ធ្វើការ​ជាមួយ​ពួកគាត់ ដោយ​យើង​បាន​កំណត់​មុខសញ្ញា​ពួកគាត់​បាន និង​បាន​បញ្ជូន​គាត់​ទៅ​លក់​នៅ​ទីតាំង​ដែល​ពួកគាត់​ចង់​ទៅ​លក់​។ អ្វី​ដែល​អាជ្ញាធរ​បាន​កំពុង​ធ្វើ គឺ​ប្រើប្រាស់​នូវ​វិធានការ​អប់រំ​ណែនាំ​ពួកគាត់​។​ តែ​បើសិនជា​ពួកគាត់​នៅតែ​ប្រឆាំង​បម្រាម​នេះ ម្ដង ពីរ​ដង ឬ​បី​ដង យើង​អាច​នឹង​មាន​វិធានការ​រដ្ឋបាល​ហើយ»។

លោកស្រី ដោ សម្ផស្ស បញ្ជាក់​ថា ចំពោះ​អាជីវករ​មួយ​ចំនួន​ធំ​កន្លងមក​លក់ដូរ​នៅ​លើ​ផ្លូវ​ម៉ៅ​សេទុង មហាវិថី​មុន្នី​រ៉េត​ផ្លូវ​ ២៣០​ និង​តំបន់​ផ្លូវ​មួយ​ចំនួន​ ជុំវិញ​ផ្សារ​ដើមគ បាន​សម្រេច​ចិត្ត​ទៅ​លក់​នៅ​ផ្សារ​ដែល​ពួកគាត់​ចង់​ទៅ​លក់​ហើយ ដូចជា នៅ​ផ្សារ​ដើម​គរ​ថ្មី​ ផ្សារ​តា​ម៉ាប់​ព្រែក​ជ្រៃ​ និង​ផ្សារ​មួយ​ចំនួន​ទៀត។

គួរ​បញ្ជាក់​ផង​ដែរ​ថា គិត​មកដល់ពេលនេះ​មាន​រយៈពេល ​២​ សប្ដាហ៍​ហើយ ដែល​រដ្ឋបាល​រាជធានី​ភ្នំពេញ​ បាន​ដាក់​បម្រាម​មិន​ឲ្យ​អាជីវករ​លក់​រំលោភ​លើ​ទ្រូងផ្លូវ ​ចិញ្ចើម​ផ្លូវ​ នៅ​តំបន់​ជុំវិញ​ផ្សារ​ដើម​គ ក្រោម​ហេតុផល​លើក​សោភណភាព​រាជធានី រៀបចំ​ហេដ្ឋារចនាសម្ព័ន្ធ សណ្ដាប់ធ្នាប់ របៀប​រៀបរយ​សាធារណៈ​។ ចំណាត់​ការ​នេះ ទទួល​បាន​ការ​គាំទ្រ​ពី​សំណាក់​ប្រជាពលរដ្ឋ​យ៉ាង​ច្រើន​លើសលប់។ ប្រជាពលរដ្ឋ ចង់​ឃើញ​រដ្ឋបាល​រាជធានី​អនុវត្ត​វិធានការ​នេះ​ឲ្យ​មាន​ប្រសិទ្ធភាព៕

អត្ថបទ ៖ ស្រីរ័ត្ន

The post មកដឹងមូលហេតុ អាជ្ញាធរ នៅតែបន្តបិទផ្លូវមួយចំនួនជុំវិញតំបន់ផ្សារដើមគ នាពេលយប់ appeared first on Kampuchea Thmey Daily.

តាមរយៈសកម្មភាពលក់ដូរជាក់ស្ដែងនៅផ្សារតាម៉ាប់ព្រែកជ្រៃ សង្កាត់ព្រែកកំពឹសខណ្ឌដង្កោទឹកមុខបងប្អូន អាជីវករ ញញឹម សប្បាយរីករាយ ដោយមានកន្លែងលក់ដូរសមរម្យ និងមានអតិថិជន មកទិញបណ្តើរៗ ជាហូរហែ ហើយអ្នកខ្លះត្រឹមម៉ោង ជិត១១យប់បានលក់អស់ និងកំពុងរៀបចំចេញទៅផ្ទះវិញ ផងដែរ។ នេះបើតាមការឱ្យដឹងពីលោកស្រី ដោ សម្ផស្ស នាយិការងនិងជាអ្នកនាំពាក្យរដ្ឋបាលរាជធានីភ្នំពេញនាថ្ងៃ២៤មករានេះ។

លោកស្រីអ្នកនាំពាក្យបញ្ជាក់ដែរថា ក្រុមអាជីវករក៏បានលើកឡើងថា ពួកគាត់លែងបារម្ភហើយព្រោះឃើញអ្នកលក់មកច្រើន ចំណែកម៉ូយចាប់ផ្ដើមមកទិញច្រើនដែរ។

យ៉ាងណាមិញ ក្រុមអាជីវករក៏បានថ្លែងអំណរគុណដល់ការ ខិតខំប្រឹងប្រែងរបស់លោក ឃួង ស្រេង អភិបាល នៃ គណ:អភិបាលរាជធានី ភ្នំពេញ និងសហការីដែលបានជួយជ្រោមជ្រែងដល់ពួកគាត់ដើម្បីមានទីតាំងប្រកបអាជីវកម្មសមរម្យត្រឹមត្រូវមួយដោយមិនបាច់ភ័យខ្លាចត្រូវហាលខ្យល់ ហាលភ្លៀង ឬប្រឈម គ្រោះថ្នាក់ ជាយថាហេតុណាមួយ ទៀតឡើយ។

គួរបញ្ជាក់ដែរថា កាលពីរាត្រីថ្ងៃទី២៣ ខែមករា២០២៦នេះ លោកស្រី ដោ សម្ផស្ស អ្នកនាំពាក្យរដ្ឋបាលរាជធានីភ្នំពេញ និង លោកស្រី គឹម ញឹប អភិបាលខណ្ឌដង្កោ រួមទាំងសហការីបានចុះទៅដល់ផ្ទាល់កន្លែងលក់ដូរនៅផ្សារតាម៉ាប់ព្រែកជ្រៃបានឃើញសកម្មភាពលក់ដូរ និងទិញលក់របស់អាជីវករនៅទីនោះយ៉ាងរស់រវើកហើយ ផងដែរ៕

អត្ថបទ ៖​ ស្រីរ័ត្ន

The post អាជីវករផ្សារដើមគរផ្លាស់ទៅលក់នៅផ្សារតាម៉ាប់ព្រែកជ្រៃកំពុងមានអតិថិជនមកទិញជាហូរហែ appeared first on Kampuchea Thmey Daily.

ស្របតាមយុទ្ធសាស្ត្ររបស់អាជ្ញាធរ ក្នុងការរៀបចំសណ្តាប់ធ្នាប់ និងសោភណ្ឌភាពទីក្រុង អាជីវករដែលធ្លាប់លក់ដូរលើចិញ្ចើមផ្លូវ និងទ្រូងផ្លូវ ជុំវិញផ្សារដើមគរ និងអាជីវករនានា អាចមានជម្រើសកាន់តែច្រើន តួរយ៉ាងផ្សារដើមគរថ្មី នៅទិសខាងជើង ដោយឡែកផ្សារបោះដុំបន្លែរលួស ក៏កំពុងកសាងឡើងស្ថិតនៅទិសខាងត្បូង ដែលជាផ្នែកមួយយ៉ាងសំខាន់ ក្នុងការស្តុកទុក និងបោះដុំ ចែកចាយបន្លែ ផ្លែឈើ ត្រី សាច់ជាដើម។

លោក ឆឹង ឆាវហ្ស៊ាង ប្រធានផ្សារបោះដុំរលួស បានឱ្យដឹងនៅថ្ងៃទី២៤ ខែមករា ឆ្នាំ២០២៦នេះថា ផ្សារបោះដុំរំលួស ស្ថិតនៅភូមិកណ្តាល សង្កាត់រលួស ខណ្ឌដង្កោ រាជធានីភ្នំពេញ លើផ្លូវជាតិលេខ២ ជាប់ជាមួយផ្លូវ-ស្ពានអាកាសក្រវ៉ាត់ក្រុងទី៣ ដែលងាយស្រួលដល់ការដឹកជញ្ជូន បន្លែ ផ្លែឈើ ត្រីសាច់មកពីបណ្តាខេត្ត ចូលមករាជធានីភ្នំពេញ ដើម្បីចែកចាយបន្តដល់អតិថិជនរបស់ខ្លួន។

លោក ឆឹង ឆាវហ្ស៊ាង បានបន្តថា អ្វីដែលជាចំណុចសំខាន់ ការលក់ដូរនៅផ្សារបោះដុំរលួស អាចឱ្យអាជីវករ លក់ដូរ ងាយស្រួល ជាមួយតូបលក់មានទំហំធំ ៥ម៉ែត្រគុណ១០ម៉ែត្រ ក្នុងមួយតូប និងត្រូវបានកសាងឡើងដោយមានការរៀបចំបណ្តាញហេដ្ឋារចនាសម្ព័ន្ធត្រឹមត្រូវ ទាំងអគ្គិសនីរដ្ឋ ទឹកស្អាត និងលូបង្ហូទឹកកង្វក់ធំៗ ចំណែកផ្លូវក្នុងផ្សារមានទទឹងរហូតដល់ ១៦ម៉ែត្រ ងាយស្រួលទាំងរថយន្តធន់ធំចូលដាក់ និងលើកឡើងរថយន្ត។

លោក ឆឹង ឆាវហ្ស៊ាង បានគូសបញ្ជាក់ថា បច្ចុប្បន្នផ្សារនេះ សាងសង់បានជាង៨០% ក្នុងជំហ៊ានទី១ មានចំនួន៥០០តូប ដែលសាងសង់លើផ្ទៃដីជាង២០ហិកតា។ ក្នុងរយៈពេល១៥ថ្ងៃខាងមុខ ផ្សារនេះ នឹងបើកដំណើរការ ខណៈពេលនេះ អាជីវករអាចទាក់ទង កក់ទុក និងទទួលបានឱកាសជាច្រើន ដូចជាតម្លៃជួលទាបរួមទាំងមានបន្ទប់ទឹកតាមតូបនីមួយៗរៀងៗខ្លួន និងលក់ដូរហ្រ្វីរយៈ១ឆ្នាំខាងមុខផ្សារពេលយប់ អ្វីដែលម្ចាស់ផ្សារគិតគូរដល់ជាជីវករថែមទៀត ប្រសិនបើលក់ដូរបន្លែនៅសល់ នឹងជួយទិញយក សម្រាប់កែឆ្នៃជាចំណីសត្វ ក្នុងតម្លៃសមរម្យពីអាជីវករផងដែរ។

សូមបញ្ជាក់ថា ផ្សារបន្លែបោះដុំរលួសនេះ ត្រូវបានវិនិយោគដោយជនជាតិចិន ដែលរស់នៅកម្ពុជា ជាង១០ឆ្នាំមកហើយ ក្នុងទុនវិនិយោគជាង៣លានដុល្លារ លើផ្ទៃដីជាង២០ហិកតា៕

អត្ថបទ៖ ស្រីរ័ត្ន

The post អាជីវករនៅជុំវិញតំបន់ផ្សារដើមគរ កាន់តែមានជម្រើសច្រើនសម្រាប់ការលក់ដូរ ក្រោយផ្សារបោះដុំបន្លែរលួស សាងសង់រួចរាល់ appeared first on Kampuchea Thmey Daily.

ទន្ទឹមនឹងនេះក្រុមការងាររដ្ឋបាលរាជធានីភ្នំពេញ ក៏កំពុងអនុវត្តគម្រោងរៀបចំកែលម្អចិញ្ចេីមផ្លូវតាមបណ្ដោយមហាវិថីម៉ៅសេទុង មហាវិថីព្រះមុន្នីរ៉េត ផ្លូវ២៣០ និងតំបន់ជុំវិញពាក់ព័ន្ធ ដើម្បីកែលម្អហេដ្ឋារចនាសម្ព័ន្ធជុំវិញនោះ។ រដ្ឋបាលរាជធានីភ្នំពេញ ក៏សូមឲ្យប្រជាពលរដ្ឋចូលរួមសហការ និងធ្វេីការអធ្យាស្រ័យ ដោយក្តីអនុគ្រោះបំផុត។
ប្រជាពលរដ្ឋបានសម្ដែងការសាទរចំពោះការរៀបចំសណ្តាប់ធ្នាប់នៅតំបន់ជុំវិញផ្សារដើមគរ ដោយរដ្ឋបាលរាជធានីភ្នំពេញបានរៀបចំយ៉ាងល្អប្រសើរនៅពេលនេះ។

លោក អោម សាអ៊ុត ជាប្រជាពលរដ្ឋ ខណៈកំពុងដើរហាត់ប្រាណនៅតាមចិញ្ចើមផ្លូវសាធារណបានបង្ហាញអារម្មណ៍ថា អាជ្ញាធររាជធានីភ្នំពេញ រំដោះផ្លូវជុំវិញផ្សារដើមគរនេះបាន ខ្ញុំមានការធូរចិត្តណាស់ ព្រោះលែងមានការកកស្ទះចរាចរណ៍ ហើយមានចិញ្ចើមផ្លូវសម្រាប់ដើរ និងហាត់កីឡា មានអនាម័យ ជាពិសេសគឺបង្ហាញពីភាពស៊ីវីល័យរបស់រាជធានីភ្នំពេញ ទៅកាន់អ្នកទេសចរ និងពិភពលោកផងដែរ៕

អត្ថបទ៖ ស្រីរ័ត្ន

The post រដ្ឋបាលរាជធានី បេីកឲ្យចរាចរណ៍ផ្លូវព្រះមុនីរ៉េត ពេលថ្ងៃ ដេីម្បីសម្រួលលំហូរចរាចរណ៍អ្នកធ្វើដំណេីរ appeared first on Kampuchea Thmey Daily.

ការ​បញ្ឈប់​ និង​ជំរុញ​ឲ្យ​អាជីវករ​ប្ដូរទីតាំងលក់ដូរ​ទៅ​ផ្សារដើមគរថ្មី ដើម្បីចូលរួម​ក្នុង​ការ​រៀបចំសណ្តាប់ធ្នាប់ របៀបរៀប​រយ ក៏ដូចជាការកែលម្អ​សោភ័ណ្ឌភាពទីក្រុង។

លោក​ តាន់ វណ្ណា តំណាង​ម្ចាស់​ផ្សារ​ដើម​គរ​ថ្មី​បាន​ប្រាប់​អ្នក​សារព័ត៌មាន​ថា ផ្សារ​ដើម​គរ​ថ្មី​​មានលក្ខណៈអំណោយ​ផល​ បរិស្ថានល្អ​ស្អាត ទាំងតូបលក់ដូរធំទូលាយ រួមទាំងផ្លូវចរាចរណ៍ខ្វាត់ខ្វែងងាយស្រួលធ្វើដំណើរមិនកក​ស្ទះ។

ផ្សារដើមគរ​ថ្មី ត្រូវបានរៀបចំឡើងដើម្បីទទួលអាជីវករពីផ្សារដើមគរចាស់ ដែលមានតូប​ជាង ៨០០ តូប ដែល​តូបនីមួយៗមានទំហំ ២ ម៉ែត្រ គុណ ៤ ម៉ែត្រ ដែលមានទំហំធំទូលាយជាងមុន។

តាមប្លង់មេ ផ្សារដើមគរ​ថ្មី​ត្រូវ​អភិវឌ្ឍ​នៅ​លើផ្ទៃដី​ទំហំ​ជាង ២០ ហិចតា ប៉ុន្តែ​បច្ចុប្បន្ន​បានដំណើរការ​លើផ្ទៃដី​ទំហំ ១២ ហិចតា។ នេះបើតាមលោក តាន់ វណ្ណា

​លោក តាន់ វណ្ណា បន្ថែម​ថា ផ្សារដើមគរថ្មី​​ក្រៅពីមាន​តូបសម្រាប់អាជីវករ​ជាង ៨០០ តូប ក៏​មាន​ទាំង​ផ្ទះល្វែង​សម្រាប់​ស្នាក់នៅ និង​អគារ​សម្រាប់​លក់ដូរ ដែល​បង្ក​លក្ខណៈ​ងាយ​ស្រួល​ដល់​អាជីវករ​អាច​សម្រាក​នៅនឹង​កន្លែងបាន។

លោក តាន់ វណ្ណា បន្ថែម​ថា ទីតាំងផ្សារ​ដើមគរ​​ថ្មីនេះ​មានបរិស្ថានស្អាត​ល្អ មិនមានដីហុយ ឬភក់ឡើយ ទោះបីជា​មាន​ខ្យល់ឬ​ភ្លៀង​ក៏​ដោយ​។ លើសពីនេះ ក៏មានការរៀបចំប្រព័ន្ធទឹក ភ្លើង និងសេវា​អនាម័យ​សម្អាត​បាន​យ៉ាង​ត្រឹមត្រូវ។

​

ទាក់ទង​ទីតាំង​ផ្សារ​ដែល​អាជីវករ​ថា​ឆ្ងាយ​ពី​ទីប្រជុំជន លោក តាន់ វណ្ណា បាន​ឆ្លើយតប​ថា ​ផ្សារ​នេះ​ស្ថិត​នៅ​ក្នុង​ខណ្ឌព្រែក​ភ្នៅនៅ​ជាប់​នឹង​ផ្លូវ​ក្រវាត់​ក្រុង​។ ទីតាំងមិនឆ្ងាយពេកទេ ការ​ធ្វើ​ដំណើរ​លឿន​ដោយសារ​មានផ្លូវខ្វាត់ខ្វែង ហើយ​មិនមាន​ការ​ក​ក​ស្ទះ​ចរាចរណ៍​ដូចនៅតំបន់ផ្សារ​ដើម​គ​រចាស់​ឡើយ​។

​ជុំវិញ​ការ​ផ្លាស់ប្តូរ​អាជីវករ​លក់ដូរ​នៅតាមចិញ្ចើម​ផ្លូវ​នៅផ្សារដើមគចាស់​មកទីតាំងថ្មី​ តំណាង​ផ្សាររូបនេះអះអាង​ថា ​ទទួល​បាន​ការគាំទ្រយ៉ាងខ្លាំងពីមហាជន និង​សាលា​រាជធានីភ្នំពេញ។ ជាមួយ​គ្នា​នេះ អាជីវករជាច្រើន​ក៏​បាន​បង្ហាញ​ការ​ពេញចិត្ត និង​បាន​ចូលរួម​ចាប់​ឆ្នោត​យកទីតាំង​និង​ចាប់ផ្តើម​ចូល​លក់​បណ្តើរៗ​ផង​ដែរ។

អាជ្ញាធររាជធានី​ភ្នំពេញ បាន​​ណែនាំ​ឲ្យ​អាជីវករដែលលក់ដូរនៅតាមចិញ្ចើម​ផ្លូវ និងទ្រូងផ្លូវនៅតំបន់ជុំវិញផ្សារដើមគរ ឱ្យ​ទៅ​លក់ដូរនៅផ្សារ​ដើម​គថ្មីស្ថិត​នៅតាមមហាវិថីឈ្នះឈ្នះ ក្នុង​ខណ្ឌព្រែកព្នៅ។ ការ​ផ្លាស់ទៅទីតាំងថ្មី ទទួលបាន​ការអនុគ្រោះ​ថ្លៃឈ្នួល​តូប​រយៈពេល ២ ​ឆ្នាំ រួមទាំងកភ្លើងប្រើប្រាស់​ឥតគិត​ថ្លៃ​​រយៈពេល ៦ ខែ ព្រមទាំង​អត្ថប្រយោជន៍​​ផ្សេងៗ​​ជា​ច្រើន​ទៀត៕

The post ផ្សារ​ដើម​គ​រថ្មី​មាន​លក្ខណៈ​ពិសេស​អ្វី​ខ្លះ ខុស​ពី​ផ្សារ​ដើម​​គ​​រចាស់ ជំរុញអាជីវករ​​ផ្លាស់​ទៅ​លក់ដូរ? appeared first on Kampuchea Thmey Daily.