ពង្រីកជើងហោះហើរត្រង់ Archives - Kampuchea Thmey Daily

តំណាងវិស័យឯកជនជំរុញឱ្យក្រុមហ៊ុនអាកាសចរណ៍ធំៗទាំងអស់ពិចារណាហោះហើរត្រង់មកកាន់កម្ពុជា

Din Thary — Thu, 18 Dec 2025 06:35:22 +0000

លោក ធួន ស៊ីណាន ប្រធានសមាគមន៍ទេសចរណ៍កម្ពុជា នៅថ្ងៃទី១៨ ខែធ្នូ ឆ្នាំ២០២៥ នេះ បានស្នើឱ្យក្រុមហ៊ុនអាកាសចរណ៍ធំៗទាំងអស់ពិចារណក្នុងការហោះហើរត្រង់មកកាន់កម្ពុជា ចៀសវៀងហោះហើរឆ្លងកាត់អាកាសយានដ្ឋានថៃ ដែលថៃតែងតែបង្កការលំបាកដល់អ្នកដំណើរទាំងនោះ។

ពាក់ព័ន្ធនឹងវិស័យអាកាសចរណ៍ លោក ធួន ស៊ីណាន មានប្រសាសន៍ថា នេះជារឿងសំខាន់ណាស់ដែលយើងបានស្នើរសុំយ៉ាងទទូចទៅឱ្យមេដឹកនាំក៏ដូចជាប្រជាជននៅក្នុងពិភពលោកថ្កោលទោសទៅកាន់សកម្មភាពដ៏កម្រោលរបស់យោធាថៃដែលឈ្លាន និងបំផ្លាញសុខសន្តិភាពដែលមាននៅកម្ពុជា។

លោកថា ប្រទេសកម្ពុជាកសាងសុខសន្តិភាពយ៉ាងលំបាកណាស់ ទាំងសេដ្ឋកិច្ច ជាពិសេសទេសចរណ៍កម្ពុជាបាននិងកំពុងតែរីកចម្រើនពីមួយថ្ងៃទៅមួយថ្ងៃ ប៉ុន្តែដោយសារតែមហិច្ចតាដ៏ស្មោកគ្រោករបស់ថៃបានធ្វើឱ្យប្រទេសកម្ពុជា ជាពិសេសខេត្តទាំង ៧ ជាប់ព្រំដែនទទួលរងការបំផ្លាញយ៉ាងខ្ទេចខ្ទាំ ប្រជាជនជម្លៀសទៅរកទីទួលសុវត្ថិភាព ធ្វើឱ្យបាត់បង់សន្តិភាព។

ជុំវិញបញ្ហានេះ លោក ធួន ស៊ីណាន ស្នើរសុំឱ្យក្រុមហ៊ុនអាកាសចរណ៍ធំៗទាំងអស់ពិចារណាក្នុងការហោះហើរត្រង់មកកាន់កម្ពុជា។ លោកបានសង្កត់ធ្ងន់ថា «សម្រាប់អ្នកដែលធ្វើដំណើរមកកាន់កម្ពុជា កម្ពុជានៅតែជាគោលដៅដែលមានសុវត្ថិភាព ជាពិសេសខេត្តសៀមរាបនៅតែអាចទទួលភ្ញៀវទេសចរបាន ហើយកម្ពុជាក៏នៅតំបន់ផ្សេងៗជាច្រើនទៀត ពីព្រោះកម្ពុជាមាន ២៥ ខេត្ត-ក្រុង តំបន់ដែលមានសុខសន្តិភាពនៅមានច្រើន»។

លោក ធួន ស៊ីណាន បញ្ជាក់ថា សង្គ្រាមដែលថៃបង្ករឡើងជាមួយកម្ពុជា គឺកើតឡើងនៅជាប់ខេត្តព្រំដែនទាំង ៧ ជាប់ថៃប៉ុណ្ណោះ ដូច្នេះសូមប្រជាជនទាំងអស់នៅជុំវិញពិភពលោកដែលចង់ធ្វើដំណើរមកកាន់កម្ពុជានោះអាចធ្វើដំណើរដោយហោះហើរមកត្រង់មកកាន់កម្ពុជា ឬអាចភ្ជាប់ជើងហោះហើរតាមរយៈ សិង្ហបុរី ម៉ាឡេស៊ី ហុងកុង ចិន ជប៉ុន កូរ៉េ ឬក៏វៀតណាមដែលអាចហោះហើរបានយ៉ាងរីករាយមកកាន់ប្រទេសកម្ពុជា ហើយភ្ញៀវទេសចរបរទេសនានាគួរចៀសវៀងការធ្វើដំណើរតាមជើងហោះហើរតាមប្រទេសថៃ ព្រោះថៃតែងតែបង្កការលំបាកជាច្រើនសម្រាប់អ្នកដែលធ្វើដំណើរឆ្លងកាត់ប្រលានយន្តហោះរបស់ខ្លួន។

សូមជម្រាបថា ការលើកឡើងរបស់លោក ធួន ស៊ីណាន នេះ គឺស្របពេលដែល ស្ថានឯកអគ្គរាជទូតកម្ពុជាប្រចាំប្រទេសបារាំង បានចេញសេចក្តីជូនដំណឹងដល់អ្នកដំណើរ ជាពិសេស អ្នកដំណើរអឺរ៉ុបមួយចំនួនដែលបានធ្វើដំណើរទៅប្រទេសកម្ពុជា បានជួបប្រទះនូវបញ្ហា ធ្ងន់ធ្ងរ ពេលឆ្លងកាត់ (transit) នៅអាកាសយានដ្ឋានទីក្រុងបាងកក (ប្រទេសថៃ) ដូចជា៖ ការសួរសំណួររាប់សិបម៉ោង, ការទាមទារហួសហេតុឱ្យបង្ហាញឯកសារបញ្ជាក់ធនធានហិរញ្ញវត្ថុ, ការត្រួតពិនិត្យឯកសារកក់សណ្ឋាគារនៅកម្ពុជា, បរិយាកាសថប់បារម្ភ និងរងការសង្ស័យដោយមិនសមហេតុផល។ នៅក្នុងករណីខ្លះ អ្នកដំណើរបានបាត់វ៉ាលីថែមទៀត ពេលទៅដល់ទីក្រុងភ្នំពេញ។

ដើម្បីជាការប្រុងប្រយ័ត្ន អ្នកដំណើរជៀសវាងការធ្វើដំណើរឆ្លងកាត់ ប្រទេសថៃ និងការប្រើប្រាស់ក្រុមហ៊ុនអាកាសចរណ៍ថៃ នៅអំឡុងពេលធ្វើដំណើរទៅកម្ពុជា។ មានក្រុមហ៊ុនអាកាសចរណ៍ និងផ្លូវហោះហើរអន្តរជាតិផ្សេងទៀត ដែលផ្តល់សេវាកម្មល្អ ប្រសើរ និងការឆ្លងកាត់ (transit) ដោយពុំមានការរើសអើង និងគោរពដល់អ្នកដំណើរ។

បញ្ហាទាំងនេះកើតឡើងនៅក្រៅទឹកដីរបស់កម្ពុជាក៏ពិតមែន ប៉ុន្តែអាចប៉ះពាល់ដល់បទ ពិសោធន៍នៃការធ្វើដំណើរ។ កម្ពុជានៅតែជាប្រទេសមានសុវត្ថិភាព និងផ្តល់ការស្វាគមន៍យ៉ាងរួសរាយរាក់ទាក់៕

The post តំណាងវិស័យឯកជនជំរុញឱ្យក្រុមហ៊ុនអាកាសចរណ៍ធំៗទាំងអស់ពិចារណាហោះហើរត្រង់មកកាន់កម្ពុជា appeared first on Kampuchea Thmey Daily.

Turkish Airline មើលឃើញភាពវិជ្ជមានកម្ពុជា ៣ ចំណុច នាំឱ្យបើកជើងហោះហើរត្រង់

Din Thary — Mon, 08 Dec 2025 03:48:50 +0000

លោក ស សារិន អគ្គនាយកក្រុមហ៊ុនទេសចរណ៍ Channel ជាក្រុមហ៊ុនលក់សំបុត្រយន្តហោះ បានគូសបញ្ជាក់ថា ក្រុមហ៊ុមអាកាសចរណ៍ Turkish Airline បានមើលឃើញពីភាពវិជ្ជមានរបស់កម្ពុជា ៣ ចំណុចដែលជំរុញឱ្យពួកគេបើកជើងហោះហើរត្រង់មកកាន់ប្រទេសកម្ពុជា។

ថ្លែងប្រាប់ «កម្ពុជាថ្មី» លោក ស សារិន បានឱ្យដឹងថា ជាធម្មតាក្រុមហ៊ុនអាកាសចរណ៍មួយមុនពេលដែលសម្រេចចិត្តចូលទៅកាន់ប្រទេសណាមួយ គេនឹងសម្លឹងមើលទៅលើចំណុចជាច្រើន ដែលអាចជាឱកាសសម្រាប់ក្រុមហ៊ុនអាកាសចរណ៍នោះ។

ទី១ គេអាចសម្លឹងមើលទៅលើបញ្ហានយោបាយ ថាតើប្រទេសនឹងមានស្ថេរភាពនយោបាយ ឬក៏អត់ ទី២ មើលទៅលើសេដ្ឋកិច្ច ថាតើប្រទេសដែលត្រូវហោះចូលមកមានសេដ្ឋកិច្ចបែបណាដែរ និងទី៣ គឺទំនាក់ទំនងរវាងប្រទេស និងប្រទេស ប្រជាជន និងប្រជាជន ជាពិសេសមើលទៅលើវិស័យទេសចរ និងការដឹកជញ្ជូនផ្សេងៗ។

លោកថា៖ «ក្រុមហ៊ុនអាកាសចរណ៍មួយៗ មុនដំណើរការ គឺមាន ២ ចំណុចសំខាន់ ទី១ គឺការដឹកភ្ញៀវទេសចរ ដូច្នេះលុះត្រាតែមានឱកាសនៅក្នុងការដឹកភ្ញៀវទេសចរណ៍បានច្រើន ទើបសម្រេចចិត្តបើក។ ទី២ ការដឹកទំនិញពីប្រទេសមួយ ទៅកាន់ប្រទេសមួយ ដូច្នេះប្រសិនបើគេមើលឃើញថា ប្រទេសកម្ពុជា ជាប្រទេសដែលមានសក្តានុពលក្នុងចំណុចទាំងពីរខាងលើនេះ នោះក្រុមហ៊ុមអាកាសចរណ៍នោះនឹងសម្រេចចិត្តហោះមក»។

ជាក់ស្តែង Turkish Airline មុននឹងសម្រេចចិត្តហោះចូលមកកម្ពុជា គឺបានរៀបចំ និងសម្រេចចិត្តបានដិតដល់ជាទីបំផុត ដែលនេះគឺជាការបើកច្រកដ៏សំខាន់មួយសម្រាប់សេដ្ឋកិច្ចខ្មែរទៅទូទាំងពិភពលោក មិនមែនតែ Turkish មួយនោះទេ ព្រោះក្រុមហ៊ុនអាកាសចរណ៍តួគី ក៏ជាក្រុមហ៊ុនអាកាសចរណ៍អន្តរជាតិដ៏ធំមួយ ដូច្នេះនៅពេលដែល Turkish Airline ហោះមកកាន់កម្ពុជាក៏នឹងនាំមកនូវភ្ញៀវទេសចរពីបណ្តាប្រទេសផ្សេងៗជាច្រើនផងដែរ។

លោកក៏បានបន្ថែមថា នៅពេលដែល Turkish Airline ដឹកភ្ញៀវមកកម្ពុជា កម្ពុជាអាចទទួលបានទាំងភ្ញៀវទេសចរ និងឱកាសវិនិយោគ ព្រោះអ្នកដែលហោះចូលមកមិនមែនជាអ្នកដើរលេងទាំងអស់នោះទេ អាចមានអ្នករកស៊ី មានអ្នកវិនិយោគិនមកបណ្តាក់ទុន ក៏បើកអាជីវកម្មផ្សេងៗនៅកម្ពុជា។

ទន្ទឹមនេះ លោក ខៀវ ធី ប្រធានសមាគមន៍មគ្គុទេសករខេត្តសៀមរាប បានឱ្យដឹងថា នេះគឺជាឱកាសល្អដែលជាបន្តបន្ទាប់ប្រទេសកម្ពុជាទទួលបានជើងហោះហើរត្រង់ពីបណ្តាប្រទេសសំខាន់ៗ ដូចជាពី ឥណ្ឌ មកកាន់ក្រុងសៀមរាប ជើងហោះត្រង់ពីតួគី មកកាន់ក្រុងភ្នំពេញ នេះសុទ្ធសឹងតែជាការរួមចំណែកក្នុងការអភិវឌ្ឍន៍វិស័យទេសចរណ៍។

លោក ខៀវ ធី បានមានប្រសាសន៍ថា ការហោះហើរត្រង់ពីតួគីមកកាន់ក្រុងភ្នំពេញ គឺជាកត្តាល្អ ដោយសារតែមិនមែនមានតែភ្ញៀវទេសចរណ៍តួកគីប៉ុណ្ណោះទេ តែថែមទាំងមានភ្ញៀវជាជនជាតិអឺរ៉ុបនាំមកកាន់កម្ពុជាដូចគ្នាដែរ។

ទន្ទឹមនេះ កម្ពុជាក៏ត្រូវតែធ្វើការផ្សព្វផ្សាយពីសក្តានុពលទេសចរណ៍ និងកត្តាសុវត្តិភាព ព្រោះបច្ចុប្បន្នយើងឃើញមានការនិយាយមិនល្អពីប្រទេសកម្ពុជាពាក់ព័ន្ធនឹងការចាប់ជម្រិតជាដើម ដែលនេះជារឿងមិនល្អ ជាការទទួលបាននូវព័ត៌មានមិនពិត។ ដូច្នេះ បញ្ហានេះ លោកសំណូមពរដល់ក្រសួងទេសចរណ៍ ក្រសួងការបរទេស ក្រសួងមហាផ្ទៃធ្វើយុទ្ធាការណ៍ទស្សនាកម្ពុជាក្នុងលក្ខណៈសុវត្ថិភាព ១០០% ដើម្បីនាំភ្ញៀវទេសចរមកកាន់កម្ពុជា ស្របពេលដែលយើងកំពុងតែមានជើងហោះហើរត្រង់ជាបន្តបន្ទាប់។

ក្រុមហ៊ុនអាកាសចរណ៍តួកគី Turkish Airline នឹងតភ្ជាប់ជើងហោះហើរត្រង់ពីទីក្រុង អ៊ីស្តង់ប៊ូល (Istanbul) មកកាន់រាជធានីភ្នំពេញ ចាប់ពីថ្ងៃទី ១១ ខែធ្នូ ឆ្នាំ២០២៥ ខាងមុខនេះ ដើម្បីពង្រឹងទំនាក់ទំនងទេសចរណ៍ ធុរកិច្ច និងវិនិយោគ។

ការតភ្ជាប់ជើងហោះហើរថ្មីនេះ នឹងជួយលើកកម្ពស់វិស័យទេសចរណ៍ និងបើកឱកាសថ្មីៗ សម្រាប់ការផ្លាស់ប្តូរវប្បធម៌ និងសហប្រតិបត្តិការសេដ្ឋកិច្ចរវាងប្រទេសទាំងពីរ ក៏ដូចជាពង្រីកជើងមេឃកម្ពុជាឱ្យកាន់តែទូលាយ ពង្រឹងនូវចំណងការទូតរវាងរាជរដ្ឋាភិបាលកម្ពុជា និងតួគី៕

The post Turkish Airline មើលឃើញភាពវិជ្ជមានកម្ពុជា ៣ ចំណុច នាំឱ្យបើកជើងហោះហើរត្រង់ appeared first on Kampuchea Thmey Daily.

អាកាសចរស៊ីវិល៖ ស្ថានភាពជើងហោះហើរតាមដែនអាកាសនៅបន្តប្រក្រតីជាធម្មតា

Din Thary — Tue, 29 Jul 2025 04:53:00 +0000

លោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិល បានបញ្ជាក់ថា គិតមកដល់ម៉ោង ៤:៥៥ នាទី ត្រូវនិងថ្ងៃទី២៨ ខែកក្កដា ស្ថានភាពនៃការហោះហើរជើងហោះហើរភ្នំពេញ-បាងកក បាងកក-ភ្នំពេញ ក៏ដូចជា បាងកក-សៀមរាប គឺនៅរក្សាប្រក្រតីភាពជាធម្មតាមិនមានអ្វីផ្លាស់ប្ដូរនោះទេ។

ពាក់ព័ន្ធការហោះហើរតាមដែនអាកាស លោក ស៊ិន ចាន់សិរីវុត្ថា ថ្លែងប្រាប់«កម្ពុជាថ្មី» នៅថ្ងៃទី២៨ ខែកក្កដា ថា ស្ថានភាពជើងហោះហើរភ្នំពេញ-បាងកក ក៏ដូចជា បាងកក-សៀមរាប នៅរក្សាប្រក្រតីជាធម្មតា លើកលែងតែជើងហោះហើរ Thai Airways ដែលធ្លាប់ហោះហើរក្នុងមួយថ្ងៃពីរជើង ថយមកនៅត្រឹមក្នុងមួយថ្ងៃមួយជើងវិញ គិតពីថ្ងៃទី២៧ ដល់ថ្ងៃទី៣១ ខែកក្កដា នេះ ដោយសារតែចំនួនភ្ញៀវមិនគ្រប់ទៅតាមទីផ្សារ។

ជុំវិញបញ្ហានេះ លោកបានគូសបញ្ជាក់ដែរថា «នេះជាឱកាសសម្រាប់ក្រុមហ៊ុនអាកាសចរណ៍ខ្មែរដែលត្រូវពង្រឹងដើម្បីចាប់យកចំណែកទីផ្សារទាំងអស់នេះមកវិញ»។

ទន្ទឹមនោះ សម្រាប់ជើងហោះហើរ និងការគ្រប់គ្រងដែនអាកាសក៏មិនមានអ្វីប្រែប្រួលដែរ គឺស្ថានភាពនៅរក្សាជាធម្មតា។

បើតាមការបញ្ជាក់ពីលោក ស៊ិន ចាន់សិរីវុត្ថា កាលពីថ្ងៃទី២៦ ខែកក្កដា នេះអាកាសចរស៊ីវិលកម្ពុជាបានប្រកាសបិទការហោះហើរឆ្លងកាត់តំបន់ដែលកំពុងផ្ទុះអាវុធជាមួយថៃទាំងស្រុង និងពង្រីកវិសាលភាពកម្ពស់ហោះហើរមកតំបន់ប៉ោយប៉ែត ប៉ៃលិន និងសៀមរាប ដើម្បីសុវត្ថិភាពអ្នកដំណើរតាមផ្លូវអាកាស។

បន្ថែមពីនេះ អាកាសចរស៊ីវិលកម្ពុជា បានប្រកាសឱ្យជើងហោះហើរ ដែលហោះរំលងប្រទេសកម្ពុជា កម្ពស់ក្រោម ១១ គីឡូម៉ែត្រ ប្ដូរទិស ត្រង់ចំណុច ដែលមានទំនាស់រវាងកម្ពុជា-ថៃ៕

The post អាកាសចរស៊ីវិល៖ ស្ថានភាពជើងហោះហើរតាមដែនអាកាសនៅបន្តប្រក្រតីជាធម្មតា appeared first on Kampuchea Thmey Daily.

សម្ដេចតេជោ បន្តស្នើឱ្យរុស្ស៊ីភ្ជាប់ជើងហោះហើរត្រង់ពីមូស្គូមកកម្ពុជា ដើម្បីជំរុញទំនាក់ទំនងប្រជាជនទាំងពីរ និងភ្ញៀវទេសចរណ៍

Ngoeul Narath — Tue, 27 May 2025 07:05:34 +0000

ក្នុងគោលដៅពង្រីកទំនាក់ទំនងឱ្យកាន់តែជិតស្និទ្ធរវាងកម្ពុជា-រុស្ស៊ី សម្ដេចតេជោ ហ៊ុន សែន ប្រធានព្រឹទ្ធសភា បន្តស្នើ និងជំរុញឱ្យរុស្ស៊ីបង្កើតជើងហោះហើរត្រង់ពីមូស្គូ មកកម្ពុជាឱ្យបានឆាប់ៗនៅពេលខាងមុខ ព្រោះការភ្ជាប់ជើងហោះហើរត្រង់ នឹងកាន់តែជំរុញបន្ថែមទៀតនូវទំនាក់ទំនងរវាងប្រទេសទាំងពីរ ក៏ដូចជាទំនាក់ទំនងរវាងប្រជាជន និងប្រជាជន និងបង្កើនទេសចរណ៍ផងដែរ។ នេះបើតាមលោក ជា ធីរិទ្ធ អ្នកនាំពាក្យព្រឹទ្ធសភា ប្រាប់ក្រុមអ្នកសារព័ត៌មានអំពីលទ្ធផលជំនួបរវាងសម្ដេចតេេជោ និងលោក Igor Krasnov អគ្គរដ្ឋអាជ្ញារុស្សី នាព្រឹកថ្ងៃទី២៧ ខែឧសភា នេះ។

រូបថតសម្ដេចតេជោ ហ៊ុន សែន អនុញ្ញាតឱ្យ អគ្គរដ្ឋអាជ្ញារុស្សី Igor Krasnov ចូលជួបសម្ដែងការគួរសម និងពិភាក្សាការងារនៅវិមានព្រឹទ្ធសភា នាព្រឹកថ្ងៃទី២៧ ខែឧសភា។

តាមលោក ជា ធីរិទ្ធ, ជាការឆ្លើយតប អគ្គរដ្ឋអាជ្ញារុស្ស៊ី សន្យានឹងសម្ដេចតេជោ ថា នឹងរាយការណ៍ទៅកាន់ថ្នាក់ដឹកនាំរបស់រុស្ស៊ី ធ្វើយ៉ាងណាជម្រុញឱ្យមានការហោះហើរត្រង់ពីមូស្គូ មកកាន់ប្រទេសកម្ពុជាឱ្យបានឆាប់់។ ជាមួយគ្នា អគ្គរដ្ឋអាជ្ញារុស្ស៊ី ដាក់ក្ដីសង្ឃឹមថា ក្រុមហ៊ុនហោះហើររបស់រុស្ស៊ី និងសិក្សាបន្ថែមទៀត ដើម្បីធ្វើយ៉ាងណាជំរុញឱ្យមានការហោះហើរត្រង់ពីរុស្ស៊ី មកកាន់ប្រទេសកម្ពុជាឱ្យបានឆាប់ ដើម្បីជំរុញអ្នកដំណើរ ក៏ដូចជាការដោះដូរទេសចរណ៍រវាងប្រទេសទាំងពីរទៅវិញទៅមក និងទំនាក់ទំនងរវាងប្រជាជន និងប្រជាជន ឱ្យកាន់តែល្អប្រសើរបន្ថែមទៀត ។

នេះមិនមែនជាលើកទី១ ដែលសម្ដេចតេជោ ហ៊ុន សែន ស្នើរុស្ស៊ីឱ្យភ្ជាប់ជើងហោះត្រង់មកកម្ពុជា ដើម្បីប្រយោជន៍ជូនប្រជាជន និងវិស័យទេសចរណ៍កម្ពុជា។ កន្លងមកនៅក្នុងជំនួបជាមួយឯកអគ្គរដ្ឋទូតរុស្ស៊ីប្រចាំកម្ពុជា កាលពីឆ្នាំ២០២៤ កន្លងទៅ សម្ដេចតេជោ ហ៊ុន សែន ក៏ធ្លាប់បានស្នើឱ្យរុស្ស៊ីភ្ជាប់ជើងហោះហើរត្រង់ឱ្យបានឆាប់ ពីព្រោះសម្ដេចយល់ថាដល់ពេលវេលាដែលត្រូវជំរុញវិស័យទេសចរណ៍របស់រុស្ស៊ីមកកាន់ប្រទេសកម្ពុជាហើយ។

រូបថតឯកសារ៖សម្ដេចតេជោ ហ៊ុន សែន អនុញ្ញាតឱ្យ ឯកអគ្គរដ្ឋទូតរុស្សីប្រចាំកម្ពុជាAnatoly Borovik ចូលជួបសម្ដែងការគួរសម និងពិភាក្សាការងារនៅវិមានព្រឹទ្ធសភា កាលពីខែមិថុនា ឆ្នាំ២០២៤។

ក្នុងជំនួបជាមួយសម្ដេចតេជោ កាលពីឆ្នាំ២០២៤ នោះ, លោក Anatoly Borovik ឯកអគ្គរដ្ឋទូតរុស្ស៊ីប្រចាំកម្ពុជា បានអះអាងថា ព្រោះតែចំនួនភ្ញៀវទេសចរណ៍រុស្ស៊ីមកកាន់កម្ពុជា មានការកើនឡើងជាបន្តបន្ទាប់ ដូច្នេះរុស្ស៊ីនឹងពិចារណាឱ្យមានជើងហោះហើរផ្ទាល់ពីរុស្ស៊ីមកកាន់កម្ពុជា ដើម្បីបង្កើនការផ្លាស់ប្តូរអ្នកទេសចររវាងប្រទេសទាំងពីរ។

សម្រាប់នៅក្នុងជំនួបជាមួយអគ្គរដ្ឋអាជ្ញារុស្ស៊ី នាព្រឹកថ្ងៃទី២៧ ខែឧសភា នេះវិញ សម្ដេចតេជោ ក៏បានឆ្លៀតរំលេចអំពីគុណបំណាច់របស់រុស្ស៊ី ដែលបានដើរតួនាទីយ៉ាងសំខាន់ក្នុងការជួយដល់កម្ពុជា ជាពិសេស ក្នុងអំឡុងពេលកម្ពុជាជួបការលំបាកកាលពីអតីតកាល ដែលរុស្សីតែងតែផ្ដល់ជំនួយមកកម្ពុជា។ បន្ថែមលើនោះ រុស្ស៊ី ក៏បានចូលរួមចំណែកជួយអភិវឌ្ឍន៍ធនធានមនុស្ស តាមរយៈការបណ្ដុះបណ្ដាលនិស្សិតកម្ពុជាជាច្រើន ហើយមកដល់ពេលនេះ ធនធានមនុស្សកម្ពុជា ដែលបានទៅសិក្សានៅប្រទេសរុស្ស៊ី បានត្រឡប់មកកម្ពុជា ហើយបានចូលរួមចំណែកក្នុងការអភិវឌ្ឍជាមួយនឹងរាជរដ្ឋាភិបាលកម្ពុជា។ សម្ដេច ហ៊ុន សែន អះអាងថា កម្ពុជា នឹងចងចាំចំពោះជាគុណបំណាច់របស់រុស៊ីជានិច្ច។សម្ដេចតេជោ ក៏បានរំលេចបន្ថែមឱ្យរុស្ស៊ីយកចិត្តទុកដាក់ទៅលើការជំរុញសេដ្ឋកិច្ច ដូចជា ការធ្វើវិនិយោគ ពាណិជ្ជកម្មជាមួយគ្នាឱ្យបានមានការកើនឡើងបន្ថែមទៀត។

គួរឱ្យដឹងថាកម្ពុជា និងរុស្ស៊ីបានចងភ្ជាប់នូវចំណងទាក់ទងការទូតជាផ្លូវការនៅឆ្នាំ ១៩៥៦។ ទំនាក់ទំនងនៃប្រទេសទាំងពីរត្រូវបានកាត់ផ្ដាច់នៅក្នុងពេលដែលកម្ពុជាធ្លាក់ក្នុងរបបប្រល័យពូជសាសន៍ប៉ុលពត។ទំនាក់ទំនងប្រទេសទាំងពីរ ត្រូវបានស្តារឡើងវិញនៅក្នុងឆ្នាំ១៩៧៩៕

ដោយ៖ង៉ិល ណារ៉ាត់

The post សម្ដេចតេជោ បន្តស្នើឱ្យរុស្ស៊ីភ្ជាប់ជើងហោះហើរត្រង់ពីមូស្គូមកកម្ពុជា ដើម្បីជំរុញទំនាក់ទំនងប្រជាជនទាំងពីរ និងភ្ញៀវទេសចរណ៍ appeared first on Kampuchea Thmey Daily.

ជើងហោះហើរត្រង់កម្ពុជា-កូរ៉េខាងត្បូង ត្រូវបានផ្អាកបណ្តោះអាសន្នដោយសារព្យុះព្រិល

Samean Lay — Fri, 29 Nov 2024 09:26:34 +0000

ជើងហោះហើរត្រង់រវាងកម្ពុជា និងកូរ៉េខាងត្បូង (ភ្នំពេញ-សេអ៊ូល) ត្រូវបានផ្អាកជាបណ្តោះអាសន្ន ដោយសារព្យុះព្រិលធ្លាក់ខ្លាំងក្លាបំផុតក្នុងប្រវត្តិសាស្ត្ររបស់ប្រទេសកូរ៉េខាងត្បូង។ អាកាសធាតុធ្ងន់ធ្ងរបែបនេះបានរំខានដល់ការធ្វើដំណើរតាមផ្លូវអាកាស ផ្លូវគោក និងផ្លូវទឹក ក្នុងទីក្រុងសេអ៊ូល។

លោក ស៊ិន ចាន់សេរីវុត្ថា អ្នកនាំពាក្យអាកាសចរណ៍ស៊ីវិល ប្រាប់កម្ពុជាថ្មីនៅថ្ងៃទី ២៩ ខែវិច្ឆិកានេះថា ដោយសារកូរ៉េខាងត្បូងជួបព្យុះព្រិល បានបង្ខំឱ្យលុបចោលការហោះហើរជាមួយកម្ពុជា និងប្រទេសមួយចំនួនទៀតជាបណ្ដោះអាសន្ន។ លោកថ្លែងថា៖«បើតាមការទទួលបានព័ត៌មាន អាកាសធាតុនៅកូរ៉េមិនល្អ ទើបគេផ្អាកជើងហោះហើរ ។ មិនមែនតែផ្អាកការហោះហើរជាមួយកម្ពុជានោះទេ ផ្អាកជាមួយបណ្តាប្រទេសជាច្រើនទេ។ យើងគិតទៅ បើកូរ៉េគេផ្អាកហោះមកស្រុកខ្មែរហើយ តើយើងហោះទៅគេម៉េចកើត ព្រោះអាកាសយានដ្ឋានគេផ្អាកអស់ហើយ ព្រោះចុះចតអត់បាន»។

បើតាមលោក ស៊ិន ចាន់សេរីវុត្ថា ពេលនេះមិនទាន់មានការកំណត់ពេលវេលាសម្រាប់ការហោះហើរឡើងវិញនោះទេ ព្រោះអាស្រ័យលើអាកាសធាតុនៅក្នុងប្រទេសកូរ៉េធូរស្បើយ។

ទោះជាយ៉ាងណា លោកបានកត់សម្គាល់ថា ការផ្អាកជើងហោះហើរទាំងនេះ បានប៉ះពាល់ដល់វិស័យទេសចរណ៍ និងអ្នកជំនួញតិចតួច។ លោកពន្យល់ថា៖«ជាទូទៅការផ្អាកបែបនេះ តែងតែប៉ះពាល់ការធ្វើដំណើររបស់ភ្ញៀវទេសចរ និងអ្នកជំនួញ ព្រោះពេលខ្លះគាត់ត្រូវមកប្រជុំ ខ្លះមកកម្សាន្ត ប៉ុន្តែត្រូវលើកពេលទៅពេលក្រោយ រហូតដល់អាកាសធាតុធូរស្បើយ»។ គួរជម្រាបថា ការហោះហើរត្រង់កម្ពុជា-កូរ៉េខាងត្បូង មួយថ្ងៃហោះហើរចំនួន ២ជើង ។

ក្នុងរយៈពេល២ថ្ងៃមកនេះ ប្រទេសកូរ៉េខាងត្បូង បានជួបប្រទះព្យុះព្រិលលខ្លាំងក្លាបំផុត ដោយរំខានដល់ការធ្វើដំណើរតាមផ្លូវអាកាស ផ្លូវគោក និងផ្លូវទឹក ខណៈគិតត្រឹមថ្ងៃសុក្រទី២៩ខែវិច្ឆិកាឆ្នាំ២០២៤ មានសេចក្តីរាយការណ៍ថា មានមនុស្សចំនួន៥នាក់ហើយ ដែលបាត់បង់ជីវិតដោយសារគ្រោះធម្មជាតិនេះ។

ទីក្រុងសេអ៊ូល ជាកន្លែងដែលរងគ្រោះខ្លាំង ដោយមានព្រិលធ្លាក់កម្ពស់ដល់ទៅ៤០សង់ទីម៉ែត្រ ហើយនៅទូទាំងប្រទេសជើងហោះហើរជាង១៤០ជើងត្រូវលុបចោល ខណៈសេវាដឹកជញ្ជូនតាមស្រឡាង ក៏ត្រូវផ្អាកផងដែរ។

នៅអាកាសយានដ្ឋានអន្តរជាតិ Incheon ដែលជាមជ្ឈមណ្ឌលមមាញឹកបំផុតរបស់ប្រទេសកូរ៉េខាងត្បូង, អ្នកដំណើរត្រូវប្រឈមនឹងការពន្យារពេលជាមធ្យមពីរម៉ោង ខណៈទិន្នន័យពី Flightradar24 បង្ហាញថា ៣១% នៃជើងហោះហើរគឺត្រូវពន្យារពេល ហើយ១៦% បានសម្រេចលុបចោល៕

The post ជើងហោះហើរត្រង់កម្ពុជា-កូរ៉េខាងត្បូង ត្រូវបានផ្អាកបណ្តោះអាសន្នដោយសារព្យុះព្រិល appeared first on Kampuchea Thmey Daily.

កម្ពុជា-ចិន ចង់បង្កើតចំនួនជើងហោះហើរត្រង់ពីហុងកុងមកខេត្តសៀមរាប

Thoeun Vansong — Wed, 31 Jul 2024 08:20:12 +0000

កម្ពុជា បន្តជំរុញកិច្ចសហប្រតិបត្តិការជាមួយតំបន់រដ្ឋបាលពិសេសហុងកុងរបស់ចិនលើវិស័យសក្តានុពល ជាពិសេសវិស័យធុរកិច្ច និងវិនិយោគ រួមទាំងការពិនិត្យលទ្ធភាពបង្កើតចំនួនជើងហោះហើរត្រង់ពីហុងកុងមកខេត្តសៀមរាបរបស់កម្ពុជា។ នេះជាលើកឡើងនៅក្នុងជំនួបរបស់សម្ដេចធិបតី និងប្រធានប្រតិបត្តិតំបន់រដ្ឋបាលពិសេសហុងកុង។

ជំនួបពិភាក្សាការងារ ដែលបានធ្វើឡើងនៅវិមានសន្តិភាព នាព្រឹកថ្ងៃទី៣១ ខែកក្កដា ឆ្នាំ២០២៤នេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោក John KC LEE ប្រធានប្រតិបត្តិនៃតំបន់រដ្ឋបាលពិសេសហុងកុង បានចាត់ទុកថា នេះជាកាលានុវត្តភាពថ្មីបន្ថែមទៀតសម្រាប់ធុរជន និងវិនិយោគិននៃកិច្ចសហប្រតិបត្តិការរវាងកម្ពុជា និងតំបន់រដ្ឋបាលពិសេសហុងកុង។

លោក John KC LEE ប្រធានប្រតិបត្តិតំបន់រដ្ឋបាលពិសេសហុងកុង បានជម្រាបជូនសម្តេចធិបតី អំពីគោលបំណងនៃដំណើរទស្សនកិច្ចមកកម្ពុជាពេលនេះ គឺដើម្បីពង្រឹង និងពង្រីកចំណងទំនាក់ទំនងរវាងតំបន់រដ្ឋបាលពិសេសហុងកុង និងកម្ពុជា ជាពិសេសក្នុងវិស័យធុរកិច្ច វិនិយោគ និងការតភ្ជាប់រវាងប្រជាជន និងប្រជាជន។ តំណាងក្រុមហ៊ុនហុងកុងធំៗក៏បានចូលរួមក្នុងដំណើរទស្សនកិច្ចនាពេលនេះជាមួយលោកផងដែរ ហើយបានអរគុណរាជរដ្ឋាភិបាលកម្ពុជាដែលបានគាំទ្រវិនិយោគិន និងធុរជនហុងកុង នាពេលកន្លងមក។

ជារួម សម្ដេចធិបតី នាយករដ្ឋមន្ត្រី និងលោកប្រធានប្រតិបត្តិនៃតំបន់រដ្ឋបាលពិសេសហុងកុង បានពិភាក្សាគ្នាអំពីការបន្តជំរុញការពង្រឹងពង្រីកទំនាក់ទំនង និងកិច្ចសហប្រតិបត្តិការរវាងកម្ពុជា និងតំបន់រដ្ឋបាលពិសេសហុងកុង ដោយផ្ដោតលើវិស័យសក្តានុពលជាច្រើន ជាអាទិ៍៖ ពាណិជ្ជកម្ម និងវិនិយោគ ហិរញ្ញវត្ថុ និងធនាគារ បច្ចេកវិទ្យា និងសេដ្ឋកិច្ចឌីជីថល វិស័យទេសចរណ៍ ការអប់រំ និងការតភ្ជាប់ប្រជាជន និងប្រជាជន រួមទាំងការពិនិត្យលទ្ធភាពបង្កើតចំនួនជើងហោះហើរត្រង់ពីហុងកុងមកខេត្តសៀមរាបរបស់កម្ពុជា។

សម្តេចធិបតី បានគូសបញ្ជាក់ពីគោលនយោបាយ និងយន្តការនានារបស់រាជរដ្ឋាភិបាលកម្ពុជាក្នុងការបង្កើត និងបង្កើនបរិយាកាសអំណោយផល និងការលើកទឹកចិត្តដល់ការវិនិយោគនៅកម្ពុជា។

ឆ្លៀតនៅក្នុងជំនួបនេះដែរ សម្ដេចធិបតី នាយករដ្ឋមន្ត្រី និងលោកប្រធានប្រតិបត្តិនៃតំបន់រដ្ឋបាលពិសេសហុងកុង ក៏បានចូលរួមជាសាក្សីក្នុងការផ្លាស់ប្តូរអនុស្សរណៈនៃការយោគយល់គ្នាចំនួន២ គឺ៖ ទី១) អនុស្សរណៈនៃការយោគយល់គ្នាស្តីពីកិច្ចសហប្រតិបត្តិការរវាងវិនិយោគហុងកុងនៃតំបន់រដ្ឋបាលពិសេសហុងកុង នៃប្រទេសចិន និងក្រុមប្រឹក្សាអភិវឌ្ឍន៍កម្ពុជា (CDC) និងទី២) អនុស្សរណៈនៃការយោគយល់គ្នារវាងក្រុមប្រឹក្សាអភិវឌ្ឍន៍ពាណិជ្ជកម្មហុងកុង និងក្រុមប្រឹក្សាអភិវឌ្ឍន៍កម្ពុជា។

សម្ដេចធិបតី បានសម្ដែងក្ដីរីករាយចំពោះការសម្រេចបាននូវការចុះអនុស្សរណៈនៃការយោគយល់គ្នារវាងទីភ្នាក់ងារមួយចំនួនរបស់តំបន់រដ្ឋបាលពិសេសហុងកុង ជាមួយក្រុមប្រឹក្សាអភិវឌ្ឍន៍កម្ពុជា។ សម្ដេចធិបតី ចាត់ទុកថា ការណ៍នេះនឹងបង្កើតបន្ថែមទៀតនូវយន្តការជំរុញវិនិយោគ និងធុរកិច្ច ដែលរួមចំណែកដល់ការពង្រឹងទំនាក់ទំនងដ៏រឹងមាំរវាងកម្ពុជា-ចិន ហើយសម្ដេចបានវាយតម្លៃខ្ពស់ចំពោះវិនិយោគិនហុងកុង ដែលបានបោះទុនវិនិយោគនៅកម្ពុជា៕

The post កម្ពុជា-ចិន ចង់បង្កើតចំនួនជើងហោះហើរត្រង់ពីហុងកុងមកខេត្តសៀមរាប appeared first on Kampuchea Thmey Daily.

សម្ដេចតេជោ ស្នើរុស្ស៊ីបង្កើតជើងហោះហើរត្រង់ និងដោះស្រាយបំណុលដែលកម្ពុជាជំពាក់

Ngoeul Narath — Thu, 06 Jun 2024 10:31:30 +0000

តាមរយៈជំនួបជាមួយទូតរុស្ស៊ីប្រចាំកម្ពុជា នាព្រឹកថ្ងៃព្រហស្បត្តិ៍ សម្ដេចតេជោ ហ៊ុន សែន ប្រធានព្រឹទ្ធសភា ស្នើឱ្យរុស្ស៊ីបង្កើតការហោះហើរត្រង់ ដើម្បីជំរុញទេសចរណ៍រុស្ស៊ីមកកាន់កម្ពុជា និងជំរុញការដោះស្រាយបំណុលដែលកម្ពុជាទន្ទឹងចាំ។ នេះបើតាមសេចក្ដីប្រកាសព័ត៌មានដែលចេញផ្សាយលើគេហទំព័រហ្វេសប៊ុកផ្លូវការសម្ដេចតេជោ នារសៀលថ្ងៃទី០៦ ខែមិថុនា។

សម្ដេចតេជោ ហ៊ុន សែន ថ្លែងបែបនេះ ៖«សូមឱ្យជំរុញនូវអ្វីដែលអាចធ្វើទៅបាន ជាពិសេស សូមឱ្យរុស្ស៊ីយកចិត្តទុកដាក់ក្នុងការបង្កើតជើងហោះហើរត្រង់ ពីព្រោះ សម្ដេចតេជោ បានចាត់ទុកថា ដល់ពេលវេលាដែលត្រូវជំរុញវិស័យទេសចរណ៍របស់រុស្ស៊ីមកកាន់ប្រទេសកម្ពុជាហើយ ហើយក៏ជំរុញការដោះស្រាយបំណុលដែលរង់ចាំជាយូរមកហើយនោះ ឱ្យបានឆាប់រួសរាន់ផងដែរ»។

ពាក់ព័ន្ធនឹងការភ្ជាប់ជើងហោះហើរត្រង់ពីរុស្ស៊ីមកកាន់កម្ពុជា លោក Anatoly Borovik ឯកអគ្គរដ្ឋទូតរុស្ស៊ីប្រចាំកម្ពុជា បានអះអាងថា ព្រោះតែចំនួនភ្ញៀវទេសចរណ៍រុស្ស៊ីមកកាន់កម្ពុជា មានការកើនឡើងជាបន្តបន្ទាប់ ដូច្នេះរុស្ស៊ីនឹងពិចារណាឱ្យមានជើងហោះហើរផ្ទាល់ពីរុស្ស៊ីមកកាន់កម្ពុជា ដើម្បីបង្កើនការផ្លាស់ប្តូរអ្នកទេសចររវាងប្រទេសទាំងពីរ។ លោកក៏បានថ្លែងអំណរគុណកម្ពុជា ដែលបានធានាសុវតិ្ថភាពភ្ញៀវទេសចរ ដែលមកទស្សនាកម្ពុជា ជាពិសេសភ្ញៀវទេសចរ។ ចំណែកពាក់ព័ន្ធនឹងបញ្ហាបំណុល លោក Anatoly Borovik បានអះអាងថា ការចរចាគឺមានជំហានទៅមុខជាវិជ្ជមាន។

គួរឱ្យដឹងថា កាលពីទសវត្សរ៍៨០ កម្ពុជាបានជំពាក់បំណុលរុស្ស៊ី ចំនួន១ ៥០០លានដុល្លារអាមេរិក ដែលកាលណោះយកមកទិញអាវុធ និងដោះស្រាយសេដ្ឋកិច្ចនៅកម្ពុជា។ ក្រោយមកនៅឆ្នាំ២០០៩ រុស្ស៊ីសម្រេចលុបចោលបំណុល៧០ភាគរយ។ ក្នុងន័យនេះបំណុលដែលកម្ពុជាជំពាក់រុស្ស៊ី នៅសល់ត្រឹម៣០ភាគរយ ដែលគិតជាទឹកប្រាក់នៅសល់ចំនួន៤៥០លានដុល្លារ៕

The post សម្ដេចតេជោ ស្នើរុស្ស៊ីបង្កើតជើងហោះហើរត្រង់ និងដោះស្រាយបំណុលដែលកម្ពុជាជំពាក់ appeared first on Kampuchea Thmey Daily.

សម្ដេច ហ៊ុន ម៉ាណែត៖ កម្ពុជា នឹងមានការហោះហើរត្រង់ពីបណ្ដាប្រទេសមួយចំនួនទៀត

sopheak khoun — Tue, 12 Mar 2024 02:41:50 +0000

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអះអាងថា នាពេលខាងមុខ កម្ពុជា នឹងមានការហោះហើរត្រង់ពីបណ្ដាប្រទេសមួយចំនួនទៀត ខណៈកម្ពុជា បានចុះកិច្ចព្រមព្រៀងបើកច្រកផ្លូវអាកាសជាមួយបណ្ដាប្រទេសនានា ជាបន្តបន្ទាប់។

ការអះអាងនេះ ធ្វើឡើងក្នុងពិធីសំណេះសំណាល និងចុះត្រួតពិនិត្យវឌ្ឍនភាព នៃគម្រោងសាងសង់អាកាសយានដ្ឋានអន្តរជាតិតេជោ លំដាប់ថ្នាក់ 4F ដំណាក់កាលទី១ នាព្រឹកថ្ងៃទី ១២ ខែមីនា ឆ្នាំ ២០២៤នេះ។

សម្ដេចធិបតី ហ៊ុន ម៉ាណែត មានប្រសាសន៍ថា ក្នុងពេលបំពេញការងារនៅប្រទេសអូស្ត្រាលី កាលពីពេលថ្មីៗនេះ ប្រទេសកម្ពុជា បានចុះកិច្ចព្រមព្រៀងជាមួយប្រទេសអូស្ត្រាលី ទៅលើការបើកច្រកទំនាក់ទំនងផ្នែកផ្លូវអាកាស ដែលនាពេលខាងមុខ អាចនឹងមានហោះហើរត្រង់ពីអូស្ត្រាលីមកកម្ពុជាតែម្ដង។ ប៉ុន្តែ នាពេលបច្ចុប្បន្ន គឺត្រូវចុះចតនៅប្រទេសផ្សេងសិន មុននឹងមកដល់កម្ពុជា។

សម្ដេចនាយករដ្ឋមន្ត្រី បានថ្លែងថា «ជួបប្រជាជនអូស្ត្រាលីថ្ងៃមុនថា ថ្ងៃណាបានយើងហោះត្រង់ ខ្ញុំថា អត់អីទេព្រលាន យន្ដហោះយើងធ្វើ ឥឡូវយើងចុះហត្ថលេខាកិច្ចព្រមព្រៀងជាមួយអូស្ត្រាលី ថ្ងៃក្រោយអាចបើកច្រកនៅពេលដែលមានចំនួនមនុស្សធ្វើដំណើរ»។

សម្ដេចធិបតី ហ៊ុន ម៉ាណែត បានឲ្យដឹងដែរថា នាពេលខាងមុខ កម្ពុជា នឹងមានការហោះហើរត្រង់ច្រើនថែមទៀត ហើយថ្មីៗនេះ ក៏មានការចចារបើកការហោះហើរត្រង់ពីឥណ្ឌាមកកម្ពុជា។

«ថ្ងៃមុនយើងទើបនឹងចចារបើកជាមួយនឹងប្រទេសឥណ្ឌា ដើម្បីឲ្យមានការហោះហើរ Direct ហើយនឹងបើកច្រក Direct ផ្សេងៗទៀត សូម្បីតែជាប្រទេសដែលមានស្រាប់ ខ្ញុំទៅឥណ្ឌូណេស៊ី ខ្ញុំទៅថៃ ជួបជាមួយហ្វីលីពីន គឺយើងចចារដើម្បីបើកច្រកហោះហើរត្រង់ផ្សេងៗទៀត»។ នេះជាការបញ្ជាក់បន្ថែមរបស់សម្ដេចធិបតី ហ៊ុន ម៉ាណែត។

ប្រមុខរាជរដ្ឋាភិបាល បានលើកឡើងថា ការរៀបចំហេដ្ឋារចនាសម្ព័ន្ធ និងការបណ្ដុះបណ្ដាលធនធានមនុស្សបម្រើដល់វិស័យទេសចរណ៍ ត្រូវតែរៀបចំព្រមគ្នាតែម្ដង ដើម្បីឲ្យវិស័យទេសចរណ៍កម្ពុជាកាន់តែរីកចម្រើន៕

The post សម្ដេច ហ៊ុន ម៉ាណែត៖ កម្ពុជា នឹងមានការហោះហើរត្រង់ពីបណ្ដាប្រទេសមួយចំនួនទៀត appeared first on Kampuchea Thmey Daily.