កម្មវិធីនេះធ្វើឡើងដើម្បីផ្សព្វផ្សាយទំនៀមទម្លាប់ ប្រពៃណីជាតិខ្មែរទៅកាន់ឆាកអន្តរជាតិក៏ដូចជានៅប្រទេសកូរ៉េខាងត្បូង និងដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ព.ស.២៥៧០ គ.ស.២០២៦។ កម្មវិធីក៏មានការរៀបចំពិធីសាសនា ដើម្បីបួងសួង និងឧទ្ទិសកុសលផលបុណ្យជូនដល់ដួងវិញ្ញាណក្ខន្ធវីរៈកងទ័ពកម្ពុជា ដែលបានពលីក្នុងបុព្វហេតុការពារជាតិមាតុភូមិ ពីការឈ្លានពានរបស់ប្រទេសជិតខាង និងមានការលេងល្បែងប្រជាប្រិយ និងការរាំលេងកម្សាន្តផងដែរ។

កម្មវិធីនេះ មានការចូលរួមគាំទ្រដោយក្រសួងការងារ និងបណ្តុះបណ្តាលវិជ្ជាជីវៈ ស្ថានទូតខ្មែរប្រចាំនៅកូរ៉េខាងត្បូង វត្តខ្មែរហ្វាសង់ សមាគមខ្មែរជួយខ្មែរឆាំងវ៉ុន និងសហគមន៍ខ្មែរជាច្រើនពាន់នាក់ និងមានវត្តមានលោក សេង សក្តា រដ្ឋលេខាធិការ អញ្ជើញជាតំណាងរបស់ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងលោក ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ និងលោកជំទាវ ចូលរួមជាអធិបតីផងដែរ៕

The post ពលករ និងសហគមន៍ខ្មែរជាង ៤០០០នាក់នៅប្រទេសកូរ៉េខាងត្បូង រួមគ្នារៀបចំកម្មវិធីសង្ក្រាន្តឆ្នាំថ្មី អបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ appeared first on Kampuchea Thmey Daily.

រដ្ឋមន្ត្រីក្រសួងការងារ  លោក ហេង សួរ ថ្លែងក្នុងពិធីបិទសន្និបាតក្រសួង នាព្រឹកថ្ងៃទី២៦​នេះ ថា គិតត្រឹមឆ្នាំ២០២៥ នេះ អតីតពលករខ្មែរមកពីប្រទេសថៃសរុបប្រមាណ ៦២ម៉ឺននាក់ បានទទួលការងារធ្វើ ដែលជាប្រែក្លាយបញ្ហាប្រឈមទៅជាការបំពេញតម្រូវការកម្លាំងពលកម្មក្នុងប្រទេស ជំរុញកំណើនសេដ្ឋកិច្ចជាតិ។

បើតាមលោក ហេង សួរ  អតីតពលករប្រមាណ ៦២ម៉ឺននាក់ ទទួលបានការងារធ្វើនោះ គឺអតីតពលករប្រមាណ ៣១ម៉ឺននាក់ បានចូលធ្វើការនៅក្នុងសហគ្រាស ក្រុមហ៊ុន និងរោងចក្រ រីឯប្រមាណ ៣១ម៉ឺននាក់ ផ្សេងទៀត បានទទួលការងារនៅតាមសហគ្រាសធុនតូចនិងមធ្យម ជាសិប្បកម្ម ភោជនីយដ្ឋាន និង នៅតាមការដ្ឋានសំណង់ជាដើម។

ពលករខ្មែរដែលធ្វើការនៅប្រទេសថៃ បានសម្រុកវិលចូលមកប្រទេសកំណើតវិញយ៉ាងច្រើន បន្ទាប់ពីភាពតានតឹនរវាងកម្ពុជា និងថៃ កាន់តែឡើងកម្ដៅខ្លាំង  ព្រោះតែយោធាថៃជាអ្នកបើកការបាញ់សម្លាប់ទាហានកម្ពុជាមួយរូបដែលកំពុងតែឈរជើងនៅលើទឹកដីកម្ពុជាក្នុងតំបន់មុំបី នៃស្រុកជាំក្សាន្ត ខេត្តព្រះវិហារ នៅព្រឹកថ្ងៃទី២៨ ខែឧសភា។ ពលករខ្មែរចាកចេញពីប្រទេសថៃ តាមការអំពាវនាវរបស់សម្ដេច ហ៊ុន សែន ក្រោយពីក្រុមជ្រុលនិយមនៅថៃ បានប្រើប្រាស់អំពើហិង្សាធ្ងន់ធ្ងរលើពលករខ្មែរស្លូតត្រង់។

ឆ្លើយតបនិន្នាការនេះ ក្រសួងការងារបានដាក់ចេញនូវវិធានការ ក្នុងការដោះស្រាយការងារជូនពលករតាមរយៈការពង្រឹងបន្ថែមប្រព័ន្ធឆ្លើយតបបន្ទាន់១២៩៧ ដោយមានអ្នកប្រចាំការ ៧ថ្ងៃ/សប្តាហ៍ និង២៤ម៉ោង/ថ្ងៃ និងយុទ្ធនាការ “ខ្មែរជួយរកការងារឱ្យខ្មែរ”, ការដាក់ចេញយុទ្ធនាការផ្សព្វផ្សាយនៅតាមទីសាធារណៈ និងតាមដងផ្លូវ ដោយបានដំឡើងប៉ាណូផ្សព្វផ្សាយ ការដាក់ដំណើរការប្រព័ន្ធស្វែងរកការងារតាមតេឡេក្រាម, ការរៀបចំវេទិកាការងារ សន្តិសុខសង្គម និងបណ្ដុះបណ្ដាលវិជ្ជាជីវៈ ដោយនាំយកឱកាសការងារ និងវត្តមានតំណាងសហគ្រាស ក្រុមហ៊ុន រោងចក្រ ទៅដល់មូលដ្ឋានឃុំ សង្កាត់ របស់បងប្អូនអតីតពលករផ្ទាល់តែម្តង។

បានចេញសេចក្តីជូនដំណឹងលើកលែងលក្ខខណ្ឌតម្រូវឱ្យភ្ជាប់អត្តសញ្ញាណប័ណ្ណសញ្ជាតិខ្មែរក្នុងការ ដាក់ពាក្យធ្វើការ ដើម្បីសម្រួលជូនពលករវិលត្រឡប់ពីថៃ ហើយគ្មានឯកសារ ឯកសារផុតសុពលភាព អាចចូលធ្វើការបាន និងបានចេញសេចក្តីជូនដំណឹង និងអនុវត្តវិធានការផាកពិន័យចំពោះសហគ្រាស ក្រុមហ៊ុន និងរោងចក្រ ដែលតម្រូវឱ្យភ្ជាប់អត្តសញ្ញាណបណ្ណសញ្ជាតិខ្មែរ ក្នុងការដាក់ពាក្យធ្វើការ ដើម្បីសម្រួលការ ចូលធ្វើការរបស់ពលករដែលមិនមានឯកសារសម្គាល់ខ្លួន និងបានចុះតាមរោងចក្រចំនួន ១ ៦០៤រោងចក្រ ដើម្បីផ្សព្វផ្សាយជួយពន្យល់ដោយផ្ទាល់ដល់អ្នកគ្រប់គ្រង រោងចក្រឱ្យយោគយល់ចំពោះពលករ និងឱ្យជួយបង្ហាត់បង្រៀនពលករដែលទើបចូលធ្វើការ ថ្មីចំនួន ១សប្តាហ៍ផងដែរ។

រដ្ឋមន្ត្រីក្រសួងការងារ សង្កត់ធ្ងន់ថា ៖«បើទោះជាក្នុងបរិការណ៍សកលលោកឆ្នាំ២០២៥ ដែលពោរពេញដោយភាពមិនប្រាកដប្រជា និងការប្រែប្រួលភូមិសាស្ត្រនយោបាយយ៉ាងគំហុក កម្ពុជាមិនត្រឹមតែឈរជើងយ៉ាងរឹងមាំក្នុងរលកនៃវិបត្តិសេដ្ឋកិច្ច និងពាណិជ្ជកម្មអន្តរជាតិប៉ុណ្ណោះទេ ប៉ុន្តែថែមទាំងបានបង្ហាញនូវភាពធន់យ៉ាងមហិមា ចំពោះមុខការរំលោភបំពានអធិបតេយ្យភាព និងបូរណភាពទឹកដីពីសំណាក់យោធាថៃនៅតាមបណ្តោយព្រំដែន។»៕

ដោយ៖ ង៉ិល ណារ៉ាត់

The post ឆ្នាំ២០២៥ អតីតពលករខ្មែរដែលវិលពីថៃមាន៩៥ម៉ឺននាក់ ក្នុងនោះ៦២ម៉ឺននាក់ទទួលបានការងារធ្វើ appeared first on Kampuchea Thmey Daily.

ពិធី​ចុះហត្ថលេខា​លើ​អនុស្សរណៈ​ នៃ​ការយោគយល់​គ្នា​ស្តីពី​កម្មវិធី​ពលករ​រដូវ​កាល​បរទេស​នេះ​បាន​ធ្វើ​ឡើង​កាលពី​ថ្ងៃទី ​២៥ ​ខែ​វិច្ឆិកា ​ឆ្នាំ​ ២០២៥​ នៅ​ទីស្ដីការ​ក្រសួង​ការងារ​រវាង​លោក ហេង សួរ រដ្ឋមន្ត្រី​ក្រសួង​ការងារ និង​បណ្តុះបណ្តាល​វិជ្ជាជីវៈ និង​លោក ស៊ីន យ៉ុង​ជេ អភិបាលស្រុក​ហុង​ឆុន ខេត្ត​កាំ​ង​វ៉ុ​ន​ដូ នៃ​សាធារណរដ្ឋ​កូរ៉េ។

លោក ហេង សួរ បាន​ថ្លែងអំណរគុណ​ដល់​លោក ស៊ីន យ៉ុង​ជេ ចំពោះ​ការទទួលយក​ពលករ​ពី​កម្ពុជា និង​ស្នើឱ្យ​រដ្ឋបាល​ស្រុក​ហុង​ឆុន ​ទទួលយក​ពលករ​កម្ពុជា​ឱ្យបាន​ច្រើន​នាពេលខាងមុខ។ ទន្ទឹម​នឹង​នេះ លោក​រដ្ឋមន្ត្រី ក៏បាន​រំលេច​អំពី​សក្តានុពល​របស់​ពលករ​កម្ពុជា​ដែល​តែងតែ​ទទួលបាន​ការ​កោតសរសើរ​ពី​ប្រទេស​ទទួល ជាពិសេស​ពលករ​កម្ពុជា​មាន​ភាព​ស្មោះត្រង់ និង​ខិតខំ​ប្រឹងប្រែង​ធ្វើ​ការងារ។

លោក​រដ្ឋមន្ត្រី ក៏បាន​លើកឡើងថា កម្ពុជា នឹង​បន្ត​កិច្ច​សហ​ប្រតិបត្តិការ​ល្អ​ជាមួយ​ស្រុក​ហុង​ឆុន លើ​ការ​ជ្រើសរើស​ពលករ​ប្រកប​ដោយ​គុណភាព ស្របតាម​តម្រូវការ​របស់​ស្រុក​ហុង​ឆុន។

នៅក្នុង​ជំនួប លោក​អភិបាលស្រុក បាន​បញ្ជាក់​ថា ស្រុក​ហុង​ឆុន មាន​តម្រូវការ​កម្លាំង​ពលកម្ម​ដែល​ជា​ពលករ​រដូវ​កាល​បរទេស​ជាង ១ ៥០០​ នាក់ ជា​រៀងរាល់​ឆ្នាំ និង​បាន​ថ្លែងអំណរគុណ​ចំពោះ លោក​រដ្ឋមន្ត្រី សម្រាប់​កិច្ចសហការ​ប្រកបដោយ​ទំនុក​ចិត្ត​របស់​ក្រសួង។

គួរ​បញ្ជាក់​ថា រាល់​ការ​បញ្ជូន​ពលករ​កម្ពុ​ជា​តាម​កម្មវិធី​ពលករ​រដូវ​កាល​បរទេស​ទៅ​ធ្វើការ​នៅ​សាធារណរដ្ឋ​កូរ៉េ ​ត្រូវ​ឆ្លងកាត់​ក្រសួង​ការងារ​ និង​បណ្តុះបណ្តាល​វិជ្ជាជីវៈ​ តែមួយគត់ ដើម្បី​ធានា​នូវ​ការ​ទៅ​ធ្វើការ​ដោយ​ស្របច្បាប់​ និង​ទទួល​បាន​ការ​គាំពារ​សិទ្ធិ​របស់​ពលករ៕

អត្ថបទ ៖ សំអឿន

The post កូរ៉េខាងត្បូង ជ្រើសរើសពលករខ្មែរទៅធ្វើការជាពលកររដូវកាល នៅសាធារណរដ្ឋកូរ៉េ appeared first on Kampuchea Thmey Daily.

លោក ឌី រ៉ាដូ បានឱ្យដឹងថា បន្ទាប់ពីមានការឈ្លានពានមកលើបូរណភាពទឹកដីកម្ពុជាពីសំណាក់ទាហានសៀម ពលរដ្ឋចំណាកស្រុកបានវិលត្រលប់ពីប្រទេសថៃ ចូលមកកម្ពុជាវិញ។ ការវិលត្រឡប់នេះ រាជរដ្ឋាភិបាលកម្ពុជា ក៏ដូចជាក្រសួងការងារ បានត្រៀមរួចជាស្រេចក្នុងផ្តល់ការបណ្តុះបណ្តាលជំនាញវិជ្ជាជីវៈ ក៏ដូចជាផ្តល់ការងារជូនពួកគាត់។ លោកបន្តថា នៅក្នុងវិបត្តិនៃការឈ្លានពានពីក្រុមទាហានថៃនេះ មានអ្នកបានវិលចូលស្រុកវិញជារួមប្រមាណជាង ១លាននាក់ ក្នុងនោះក្រសួងការងារ បានជួយសម្រួលរកការងារជូនពួកគាត់បានប្រមាណជាង ២០ម៉ឺននាក់រួចមកហើយ។

លោកអភិបាលរងខេត្ត បានបញ្ជាក់ថា «សម្រាប់ខេត្តសៀមរាប មានពលករចំណាកស្រុកប្រមាណជាង ៣ម៉ឺននាក់ និងអ្នកដែលបានវិលត្រលប់មកស្រុកវិញប្រមាណជាង ២៦ ០០០នាក់រួចហើយដែរ។ ប៉ុន្តែបញ្ហានៅត្រង់ថា ក្នុងចំណោមអ្នកវិលមកវិញជាង ២ម៉ឺននាក់នេះ មានអ្នកមកចុះឈ្មោះរកការងារធ្វើតែជាង ៣ពាន់នាក់ប៉ុណ្ណោះ។ ដូច្នេះអាជ្ញាធរមូលដ្ឋានត្រូវស្រង់ស្ថិតិពួកគាត់ ដើម្បីដឹងថាពួកគាត់ដែលមកវិញហ្នឹងគាត់ធ្វើអី នៅកន្លែងណា»។ ពាក់ព័ន្ធអ្នកចំណាកស្រុកដែលវិលត្រលប់មកវិញនេះ តាមការឱ្យដឹងពីអាជ្ញាធរស្រុកនានា ក្នុងខេត្តសៀមរាប មួយចំនួនបានចេញពីមូលដ្ឋានដើម្បីស្វែងរកការងារធ្វើដោយខ្លួនឯងនៅរាជធានីភ្នំពេញ និងនៅខេត្តព្រះសីហនុជាដើម។

ចំណែកមួយចំនួនទៀតក៏បានរស់នៅបង្កបង្កើនផល នៅក្នុងភូមិរបស់ពួកគាត់ ដែលអាចជាមូលហេតុធ្វើឱ្យចំនួនអ្នកចុះឈ្មោះសុំការជួយស្វែងរកការងារធ្វើមានចំនួនតិច។ បើទោះជាយ៉ាងនេះក្តី អាជ្ញាធរខេត្ត នៅតែជំរុញឱ្យមានការចុះធ្វើសម្រង់ស្ថិតិនេះឱ្យបានច្បាស់លាស់ ដើម្បីងាយស្រួលក្នុងជួយពួកគាត់ឱ្យចំគោលដៅ ហើយក៏ជាផ្នែកមួយក្នុងការជួយដល់រាជរដ្ឋាភិបាលអនុវត្តគោលនយោបាយកាត់បន្ថយភាពក្រីក្រ លើកកម្ពស់ជីវភាពប្រជាពលរដ្ឋ កាត់បន្ថយការធ្វើចំណាកស្រុកទៅកាន់ប្រទេសដទៃ ជាពិសេសប្រទេសថៃ៕

The post រដ្ឋបាលខេត្តសៀមរាប ឱ្យអាជ្ញាធរមូលដ្ឋានស្រង់ស្ថិតិពលរដ្ឋត្រលប់មកពីថៃ ដើម្បីងាយស្រួលជួយរកការងារធ្វើ appeared first on Kampuchea Thmey Daily.

ជាមួយ​គ្នា​នេះ លោក​រដ្ឋមន្ត្រី ក៏បាន​បញ្ជាក់​ដែរ​ថា ក្រោយពី​ការ​ត្រឡប់​មក​វិញ​របស់​ពលករ ក្រសួង​ការងារ ជា​ដំបូង ផ្តោត​លើ​រោងចក្រ​ធំៗ ដើម្បី​ធានា​ថា ពលករ​ដែល​ត្រឡប់មកវិញ​ទទួល​បាន​ឱកាស​ការងារ​ជាមួយ​នឹង​ស្តង់ដារ និង​លក្ខខណ្ឌ​ការងារ​ល្អ​ប្រសើរ។

លោក​ថ្លែង​ថា “​យើង​ផ្តោត​លើ​រោងចក្រ​ធំៗ ដែល​បម្រើ​ការ​នាំចេញ ដោយសារ​រោងចក្រ​ធំ​ទាំងនោះ​មាន​លក្ខខណ្ឌ​ការងារ​ល្អ មាន​ប្រាក់ខែ​ប្រហាក់ប្រហែល​ថៃ កន្លែង​ធ្វើការ​មាន​ស្តង់ដារ​ប្រហាក់ប្រហែល​ថៃ និង​ទំនើប ដែល​ក្រោយពី​បងប្អូន​បាន​ចូល​ធ្វើ​ការងារ​ហើយ គាត់​នឹង​មិន​ត្រឡប់​ទៅ​វិញ​នោះ​ទេ​”។

បន្ថែម​ពី​នេះ លោក ហេង សួរ បាន​លើក​ឡើង​ថា ក្រសួង​ការងារ ប្រមូល​បាន​ឱកាស​ការងារ​រាប់​សិន​ម៉ឺន​កន្លែង​ជា​រៀងរាល់​សប្ដាហ៍ ឯ​ការ​ប្រែប្រួល​ពី​ព័ត៌មាន​ទីផ្សារ​ការងារ​ដោយសារ​តម្រូវការ​ការងារ​ជា​ច្រើន​ពី​សំណាក់​ពលករ​ខ្មែរ ហើយ​វា​ក៏​បង្ហាញ​ពី​ការ​ខិតខំ នៃ​តួអង្គ​ពាក់ព័ន្ធ​ក្នុង​ការ​ជួយ​រក​ការងារ​ជូន​ពួកគាត់។

សូម​បញ្ជាក់​ថា ការ​ទទួល​បាន​ឱកាស​ការងារ​របស់​ពលករ​ខ្មែរ​ជាង ១៣ ម៉ឺន​នាក់ ដោយសារ​វិធានការ​ពីរ​សំខាន់ៗ គឺ វិធានការ​ដែល​ដាក់​ចេញ​ដោយ​ក្រសួង​ការងារ និង​ការ​ចូលរួម​ពី​ក្រុមហ៊ុន​ឯកជន​ផង​ដែរ៕

The post ពលករខ្មែរត្រឡប់មកពីថៃប្រមាណជាង ១៣ ម៉ឺននាក់ ទទួលបានឱកាសការងារ appeared first on Kampuchea Thmey Daily.

ចាប់​តាំងពី​ពលករ​ខ្មែរ​ត្រឡប់​មក​ស្រុក​កំណើត​វិញ ក្រសួង​ការងារ បាន​ដាក់​ចេញ​វិធានការ​សំខាន់ៗ ចំនួន ១១ ចំណុច រួមមាន ៖ ១.ការ​ដាក់​ចេញ​នូវ​សេចក្ដីជូនដំណឹង​ស្ដីពី​ឱកាស​ការងារ និង​ការ​បណ្ដុះ​បណ្ដាល​ជំនាញ​បច្ចេកទេស និង​វិជ្ជាជីវៈ ដល់​ប្រជាពលរដ្ឋ និង​ពលករ​ខ្មែរ​នៅ​ប្រទេស​ថៃ ដែល​មាន​បំណង​វិល​ត្រឡប់​មក​ស្រុកកំណើត​វិញ។ ២.ការ​ដាក់​ពង្រាយ​នូវ​មណ្ឌល​សំចត និង​កន្លែង​ទទួល​ពលករ​នៅ​តាម​ច្រក​អន្តរជាតិ​កម្ពុជា​-​ថៃ ទាំង ៦ ច្រក។ ៣.ការ​ដាក់​ចេញ​នូវ​វេទិកា​ការងារ​តាម​ភូមិ​-​ស្រុក ជុំ​ទី ១ និង​ជុំ​ទី ២។ ៤.សេចក្តីអំពាវនាវ​អំពី​ការទប់ស្កាត់​ការរើសអើង និង​ការ​ប្រើ​ហិង្សា​លើ​ប្រជាពលរដ្ឋ និង​ពលករ​ខ្មែរ​នៅ​ប្រទេស​ថៃ។ ៥.លិខិត​ចំហ​ជូន​ម្ចាស់​ម៉ាក អ្នកបញ្ជា​ទិញ​ដែល​ទិញ​ទំនិញ​ពី​ប្រទេស​ថៃ និង​អ្នកប្រើប្រាស់​ផលិតផល និង​សេវាកម្ម​ថៃ អំពី​ការ​កើន​ឡើង​នូវ​អំពើ​ហិង្សា​មក​លើ​ពលករ​ទេសន្តរប្រវេសន៍​នៅ​ប្រទេស​ថៃ ដែល​ប្រព្រឹត្ត​ដោយ​ក្រុម​ជ្រុលនិយម​ថៃ។ ៦.សេចក្ដី​ជូន​ដំណឹង​ស្ដីពី​អំពើ​ល្មើសច្បាប់​ពាក់ព័ន្ធ​នឹង​ការ​ទារ​ប្រាក់​ពី​ប្រជាពលរដ្ឋ​ជា​ថ្នូរ​នឹង​ការ​ទទួល​បាន​ការងារ​ធ្វើ​នៅ​ក្នុង​ព្រះរាជាណាចក្រ​កម្ពុជា។ ៧.សេចក្ដីជូនដំណឹង​ស្ដីពី​ការ​លើកលែង​លក្ខខណ្ឌ​តម្រូវ​ឱ្យ​ភ្ជាប់​អត្តសញ្ញាណប័ណ្ណ​សញ្ជាតិ​ខ្មែរ​ក្នុង​ការ​ដាក់ពាក្យ​ធ្វើការ​ចំពោះ​ពលករ​ខ្មែរ​ដែល​ត្រឡប់​មកពី​ប្រទេស​ថៃ។ ៨.សេចក្តីណែនាំ​ស្តីពី​ការ​សហការ​ផ្ដល់​ព័ត៌មាន​ឱកាស​ការងារ​ជូន​ពលករ​ខ្មែរ​ដែល​ទើប​ត្រឡប់​មកពី​ប្រទេស​ថៃ។ ៩.ប្រជុំពិភាក្សា​ជាមួយ​ក្រសួងមហាផ្ទៃ​អំពី​ការ​ផ្សព្វផ្សាយ​ឱកាស​ការងារ​ជូន​ដល់​ប្រជាពលរដ្ឋ​ខ្មែរ​ដែល​វិលត្រឡប់​មកពី​ប្រទេស​ថៃ​វិញ។ ១០.វេទិកា​ជាមួយ​សហជីព និង​ប្រតិភូ​បុគ្គលិក ដើម្បី​ជំរុញ​ការ​ផ្សព្វផ្សាយ​ឱកាស​ការងារ​ជូន​ពលករ​ខ្មែរ​ដែល​ទើប​ត្រឡប់​មកពី​ប្រទេស​ថៃ។ ១១.យុទ្ធនាការ​ជំរុញ​ការ​ចុះ​ឈ្មោះ​ស្វែងរក​ការងារ​ជូន​ពលករ​ខ្មែរ​ដែល​ទើប​វិលត្រឡប់​មកពី​ប្រទេស​ថៃ ដោយ ស​.​ស​.​យ​.​ក ជា​ភ្នាក់ងារ​ព័ត៌មាន​ទីផ្សារ​ការងារ នៃ​ក្រសួង​ការងារ និង​បណ្ដុះបណ្ដាល​វិជ្ជាជីវៈ។

វិធានការ​ទាំងនេះ បាន​បង្ហាញ​ពី​កិច្ច​ខិតខំ​ប្រឹងប្រែង​របស់​ក្រសួង​ការងារ​ក្នុង​ការ​ជួយ​រក​ការងារ​ធ្វើ និង​ផ្តល់​កិច្ច​គាំពារ​ផ្សេងៗ ដល់​ប្រជាជន​ខ្មែរ ជាពិសេស​ពលករ​ខ្មែរ​ដែល​បាន​ត្រឡប់​មក​កម្ពុជា​វិញ។

ជាមួយ​គ្នា​នេះ លោក ស៊ុន មេសា អ្នកនាំពាក្យ​ក្រសួង​ការងារ និង​បណ្ដុះបណ្ដាល​វិជ្ជាជីវៈ បាន​លើក​ឡើង​ថា វិធានការ​ទាំងអស់​នេះ បង្ហាញ​យ៉ាង​ជាក់ច្បាស់​អំពី​ការ​គិតគូរ​យ៉ាង​យកចិត្តទុកដាក់​របស់​ក្រសួង​ការងារ។

អ្នកនាំពាក្យ​រូប​នេះ បាន​គូស​បញ្ជាក់​ថា “​ការ​ដាក់​ចេញ​នូវ​វិធានការ​ជាច្រើន​នេះ គឺ​បាន​បង្ហាញ​ពី​ការ​គិតគូរ​យ៉ាង​យកចិត្តទុកដាក់​របស់​ក្រសួង​ការងារ ក្រោម​ការ​ដឹកនាំ​របស់ ឯកឧត្ដម​រដ្ឋមន្ត្រី ដែល​ជា​សេនាធិការ​របស់​រាជរដ្ឋាភិបាល​កម្ពុជា ដោយ​ធ្វើ​យ៉ាងណា​ជួយ​ពលករ​ដែល​មកពី​ថៃ​រក​ការងារ​ធ្វើ​ឱ្យ​បាន​”។

លោក​បាន​បន្ថែម​ថា ក្រោយពី​បាន​ដាក់​ចេញ​នូវ​វិធានការ​ជា​បន្តបន្ទាប់​ក្នុង​ការ​ជួយ​ពលករ​ខ្មែរ ក្រសួង​ការងារ បាន​និង​កំពុង​ដាក់​ចេញ និង​អនុវត្ត​វិធានការ​សំខាន់ៗ បន្ថែម​មួយ​ចំនួន​ទៀត​ផង​ដែរ។

អ្នកនាំពាក្យ ថ្លែង​ថា “​ក្រសួង​ការងារ បាន​និង​កំពុង​បំពេញ​វិធានការ​សំខាន់ៗ ៣ បន្ថែម​ទៀត ដូចជា ការ​បើក​វេទិកា​ការងារ​ប្រចាំថ្ងៃ​នៅ​តាម​បណ្តា​គ្រឹះស្ថាន​បណ្ដុះបណ្ដាល​បច្ចេកទេស និង​វិជ្ជាជីវៈ និង​ទីស្នាក់ការ​បេឡា​ជាតិ​សន្តិសុខ​សង្គម​នៅ​តាម​បណ្តា​ខេត្ត-ក្រុង ការ​ចុះ​វេទិកា​ការងារ​ជុំ​ទី ៣ និង​ការ​ចុះ​ឈ្មោះ​ស្វែងរក​ការងារ​ធ្វើតាម​លេខ Hotline ១២៩៧”។

គិត​មកដល់ពេលនេះ មាន​ប្រជាពលរដ្ឋ​ខ្មែរ ប្រមាណ ៩២ ម៉ឺន​នាក់ បាន​វិលត្រឡប់​មកដល់​កម្ពុជា​វិញ ក្នុង​នោះ​មាន​ក្មេង ៥ ម៉ឺន​នាក់ និង​អ្នកមាន​អាយុ ៤៥ ឆ្នាំ ឡើង ចំនួន ២៥ ម៉ឺន​នាក់។ តាមរយៈ​យុទ្ធនាការ​របស់​ក្រសួង​ការងារ មាន​ពលរដ្ឋ​រាប់​ម៉ឺន​នាក់ បាន​ទទួល​បាន​នូវ​ឱកាស​ការងារ​ជា​បន្តបន្ទាប់។

យ៉ាងណាក៏ដោយ ក្រសួង​ការងារ​ដែល​ជា​សេនាធិការ​ជូន​រាជរដ្ឋាភិបាល បាន​ប្ដេជ្ញា​ចិត្ត​ខ្ពង់​ក្នុង​ការ​ផ្តល់​ឱកាស​ការងារ​ជូន​ប្រជាពលរដ្ឋ ជាពិសេស​ពលករ​ដែល​បាន​វិល​ត្រឡប់​មក​ប្រទេស​កម្ពុជា​វិញ និង​សូម​ស្នើ​ដល់​ប្រជាពលរដ្ឋ​ចូលរួម​ផ្សព្វផ្សាយ​លេខ ១២៩៧ ឬ ជួយ​ចុះឈ្មោះ​ចូល​ធ្វើការ​ជូន​ពលករ ឬ ប្រជាជន​ខ្មែរ មិន​ទាន់​មាន​ការងារ​ធ្វើ​តាមរយៈ​តេ​ឡេ​ក្រាម​របស់​ក្រសួង៕

The post វិធានការសំខាន់ៗ ១១ ចំណុច ក្រសួងការងារ ដាក់ចេញក្នុងការជួយ ពលករខ្មែរត្រឡប់មកពីថៃ ឱ្យមានការងារធ្វើ appeared first on Kampuchea Thmey Daily.

លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានថ្លែងប្រាប់ក្រុមអ្នកសារព័ត៌មានថា លេខទូរសព្ទ ១២៩៧ គឺជាបច្ចេកវិទ្យាមួយក្នុងការជួយសម្រួលដល់ប្រជាពលរដ្ឋទើបមកពីថៃឱ្យឆាប់ទទួលបានការងារធ្វើ ហើយក៏បើកផ្លូវទំនាក់ទំនងរវាងអ្នកស្វែងរកការងារធ្វើ និងអ្នកដែលត្រូវការមនុស្សធ្វើការ ក្រោមការសម្របសម្រួលពីក្រសួងការងារ។ ខណៈក្រុម​ការងារ Hotline ១២៩៧ កំពុង​មមាញឹក​ក្នុងការផ្ដល់ព័ត៌មានផ្គូរផ្គងនេះ។

តាមការឱ្យដឹងដោយលោករដ្ឋមន្ត្រី ហេង សួរ ជាមធ្យមក្នុងមួយថ្ងៃ មានចន្លោះ៤ ទៅ៥ពាន់នាក់ដែលទទួលបានឱកាសការងារធ្វើ តាមរយៈប្រព័ន្ធ ១២៩៧នេះ ខណៈពាក្យចុះឈ្មោះរបស់ពលករខ្ទង់ម៉ឺននាក់ត្រូវបានបញ្ជូនចេញទៅតាមរោងចក្រសហគ្រាសនៅកម្ពុជាជាច្រើន។

លោករដ្ឋមន្ត្រី ថា ក្រុមការងាររបស់ក្រសួងការងារ នឹងខិតខំបន្ថែមទៀត ដើម្បីជំរុញចំនួនសម្រាប់ពលករឱ្យបានកាន់តែច្រើន ហើយលឿនឆាប់បានការងារធ្វើ ធ្វើយ៉ាងណាជួយសម្រួលដល់ជីវភាពប្រចាំរបស់ពួកគាត់។

លោករដ្ឋមន្ត្រី បាននិយាយថា ពេលនេះ អ្នកត្រូវការមនុស្សធ្វើការ ក៏មាន ហើយអ្នកកំពុងរកការងារ ក៏មាន ដោយលោក អះអាងថា គិតមកដល់ពេលនេះ រោងចក្រសហគ្រាសបានចុះឈ្មោះស្វែងរកអ្នកធ្វើការច្រើនដដែល ក្នុងរង្វង់ជាង២០ម៉ឺនការងារជាប្រចាំ។

ដូច្នេះ បើប្រជាពលករខ្មែរទើបវិលត្រឡប់មកពីប្រទេសថៃវិញដែលកំពុងស្វែងរកការងារអាចទំនាក់ទំនងសួរព័ត៌មានទីផ្សារការងារ តាមរយៈលេខទូរសព្ទ ១២៩៧ ដោយឥតគិតថ្លៃ ដោយក្រុមការងាររបស់ក្រសួងការងារ នឹងសម្របសម្រួលផ្ដល់ឱកាសការងារជូន៕

ដោយ៖ ធឿន វ៉ាន់សុង

The post ១២៩៧ ប្រព័ន្ធផ្ដល់ព័ត៌មានក្នុងការស្វែងរកការងារធ្វើសម្រាប់ពលករខ្មែរទើបមកពីថៃ appeared first on Kampuchea Thmey Daily.

សមាជិកសភា​ និងជាអនុប្រធានបក្ស PP លោក​ Rangsiman Rome ដែលជាប្រធានគណៈកម្មាធិការសភាសន្តិសុខជាតិផងដែរនោះ ​បាន​ប្រាប់អ្នកកាសែតកាលពីថ្ងៃពុធ ក្រោយ​កិច្ចប្រជុំរបស់គណៈកម្មាធិការថា គណៈកម្មាធិការបាន​ផ្ដោតលើផលប៉ះពាល់ដែលកើតចេញពីការវិលត្រឡប់ចូលស្រុករបស់ពលករកម្ពុជា។

លោកថា មានតែប្រហែល ១០ ភាគរយ​ នៃពលករខ្មែរប្រមាណ ៣០០ ០០០ នាក់ ប៉ុណ្ណេះ ដែល​បន្តនៅក្នុងប្រទេសថៃ ខណៈតួលេខពិតប្រកដអាចខ្ពស់ជាងនេះ បើរាប់ទាំងពលករដែលគ្មាន​ឯកសារធ្វើការត្រឹមត្រូវ។ ​តួលេខនេះ តិចជាង​តួលេខរបស់ក្រសួងការងារកម្ពុជាដែលថា ពលករខ្មែរជិត ៩០០ ០០០ នាក់បាន​វិលចូលស្រុក គិតត្រឹមថ្ងៃ ៨ សីហា។

យ៉ាងណាក៏ដោយ​ លោក​ Rangsiman បាន​និយាយថា មាតុភូមិនិវត្តន៍របស់ពលករខ្មែរ កំពុងបង្ក​ផល​​ប៉ះពាល់​ខ្លាំង​ដល់​វិស័យ​ផលិតកម្ម​​​ថៃ ជា​ពិសេស​វិស័យ​កសិកម្ម និង​សំណង់ ដែល​នេះហើយ​ទាមទារ​ឱ្យរដ្ឋាភិបាល​មាន​ដំណោះស្រាយបន្ទាន់។

កាលពីថ្ងៃអង្គារ​ គណៈរដ្ឋមន្រ្តីថៃបាន​អនុម័តលើផែនការនាំយកពលករពីស្រីលង្កា ដើម្បីបំពេញកង្វះខាតកម្លាំងពលកម្ម ខណៈក្រសួងការងារថៃលើកឡើងពីការយកពលករពីប្រទេសផ្សេងៗទៀត​ផងដែររួមទាំងវៀតណាម ឡាវ មីយ៉ាន់ម៉ា ហ្វីលីពីន ឥណ្ឌូណេស៊ី និងបង់ក្លាដែស ជាដើម។ ប៉ុន្តែអ្នកជំនាញមើលឃើញថា បញ្ហា​នេះមិនអាច​ដោះស្រាយភ្លាមៗបាន​ទេ។

លោក Rangsiman បាន​និយាយថា ផលប៉ះពាល់សេដ្ឋកិច្ចពីជម្លោះព្រំដែនកម្ពុជា-ថៃ វាធ្ងន់ធ្ងររួច​ស្រាប់ទៅហើយ ហើយ​ប្រសិន​បើ​ភាព​ប្រសើរឡើង​តាមព្រំដែន​ត្រូវបាន​ជាប់គាំងនោះ នោះនឹង​បង្កឱ្យ​មាន​ការខូចខាតរយៈពេលយូរ៕

​

The post បក្សប្រឆាំងថៃបង្ហាញកង្វល់សេដ្ឋកិច្ច ជុំវិញមាតុភូមិនិវត្តន៍របស់ពលករខ្មែរ appeared first on Kampuchea Thmey Daily.