ពលរដ្ឋខ្មែរនៅអាមេរិក Archives - Kampuchea Thmey Daily

ក្រសួងសង្គមកិច្ចរៀបចំកន្លែងត្រៀមទទួលពលរដ្ឋខ្មែរដែលអាមេរិកបញ្ជូនត្រលប់មកវិញ

hun sirivadh — Fri, 27 Mar 2026 03:02:32 +0000

ក្រសួងសង្គមកិច្ចបានរៀបចំទីតាំងមួយចំនួនដើម្បីត្រៀមទទួលពលរដ្ឋខ្មែរដែលត្រូវបានរដ្ឋាភិបាលអាមេរិកចាប់បញ្ជូនត្រលប់មកកាន់ប្រទេសកំណើតវិញ ដើម្បីស្ដារនីតិសម្បទា និងស្វែងរកការងារឱ្យធ្វើមុននឹងបញ្ជូនចូលក្នុងសហគមន៍វិញ។

អ្នកនាំពាក្យក្រសួងសង្គមកិច្ចលោក តូច ចាន់នី បានឱ្យកម្ពុជាថ្មីដឹងនៅថ្ងៃទី២៦ ខែមីនា ឆ្នាំ២០២៦ ថា ក្រសួងបានរៀបចំមជ្ឈមណ្ឌលត្រៀមទទួលទាំងនេះជាង១ឆ្នាំមកហើយ ដោយមានក្នុងរាជធានីភ្នំពេញ និងនៅតាមខេត្តមួយចំនួនដោយយកមណ្ឌលហ្វឹកហ្វឺនអ្នកថែទាំមនុស្សចាស់ និងស្ដារនីតិសម្បទាជនអនាថារបស់ក្រសួងសង្គមកិច្ចដើម្បីទទួលស្នាក់នៅ បណ្ដុះបណ្ដាល និងស្វែងរកការងារជូន។

លោកថា៖ «ជាការគិតគូររបស់រាជរដ្ឋាភិបាល បើគាត់មានជំនាញហើយយើងរកការងារឱ្យគាត់ធ្វើ បើអ្នកដែលមិនទាន់មានជំនាញយើងឱ្យគាត់រៀនជំនាញតាមការស្ម័គ្រចិត្តរបស់គាត់យើងមានក្រសួងការងារ និងក្រសួងសង្គមកិច្ចសហការគ្នា»។

ទោះជាយ៉ាងណាលោកមិនទាន់អាចបញ្ជាក់បានទេថាមានពលរដ្ឋខ្មែរដែលត្រូវបានអាមេរិកបញ្ជូនមកវិញនោះក្នុងចំនួនប៉ុន្មាន និងនៅពេលណានៅឡើយទេដោយរង់ចាំព័ត៌មានពីសហរដ្ឋអាមេរិកសិន។

កាលពីថ្ងៃទី២៦ ខែមីនា ឆ្នាំ២០២៦ រដ្ឋមន្ត្រីក្រសួងសង្គមកិច្ច លោក ជា សុមេធី បានចុះពិនិត្យទីតាំងមជ្ឈមណ្ឌលត្រៀមសម្រាប់ទទួលពលរដ្ឋខ្មែរមាតុភូមិនិវត្តន៍ពីសហរដ្ឋអាមេរិកនៅទីតាំងមួយកន្លែងក្នុងរាជធានីភ្នំពេញ ដោយលោកបានបញ្ជាក់លើបណ្ដាញសង្គមរបស់លោកថា «មណ្ឌលនេះនឹងទុកដាក់ថែទាំផ្ដល់សេវាសង្គមកិច្ចដល់អ្នកទាំងនោះមុននឹងបញ្ជូនទៅជួបជុំគ្រួសារនៅសហគមន៍វិញ»។

ប្រធានវិទ្យាស្ថានប្រជាធិបតេយ្យកម្ពុជា លោកបណ្ឌិត ប៉ា ច័ន្ទរឿន គាំទ្រចំពោះការរៀបចំរបស់រដ្ឋាភិបាលកម្ពុជាក្នុងការត្រៀមទទួល និងបណ្ដុះបណ្ដាលវិជ្ជាជីវៈ ព្រមទាំងស្វែងរកការងារដល់ពលរដ្ឋខ្មែរដែលត្រូវអាមេរិកបណ្ដេញមកប្រទេសកំណើតវិញនេះ។

លោកថា៖ «នេះគឺជាគម្រោងចាំបាច់និងជាជំនួយវិជ្ជមានផងដែរ សម្រាប់ពលរដ្ឋដែលត្រូវបានគេបញ្ជូនពីអាមេរិកមកវិញហ្នឹង។ ព្រោះការរៀបចំបែបនេះជាការឆ្លើយតបនឹងតម្រូវការមូលដ្ឋានសម្រាប់ពួកគាត់នៅពេលដែលត្រលប់មកដល់ស្រុកខ្មែរវិញ»។

ទោះជាយ៉ាងណាលោកបណ្ឌិត ប៉ា ច័ន្ទរឿន បានឱ្យជាយោបល់ដល់រដ្ឋ គួរមានការគិតគូរបន្ថែមលើការគាំពារផ្លូវចិត្ត ព្រមទាំងយកចិត្តទុកដាក់តម្រង់ទិសពីជំនាញនិងការងារ ឬបណ្ដុះបណ្ដាលជំនាញថ្មីដែលអាចប្រើប្រាស់បាននៅកម្ពុជា ធ្វើការរៀបចំឱ្យមានឯកសាររដ្ឋបាលជូនពួកគាត់ ជាពិសេសគឺការបង្កើតឱ្យមានបណ្ដាញពលរដ្ឋខ្មែរដែលត្រូវបានអាមេរិកបញ្ជូនមកវិញពីមុនៗដើម្បីឱ្យពួកគេអាចចែករំលែកបទពិសោធន៍ជួយគ្នាបាន ក៏ដូចជាត្រូវបង្កើតឱ្យមានទំនាក់ទំនងជាមួយវិស័យឯកជនដើម្បីងាយស្រួលស្វែងរកការងារជូនពួកគាត់ផងដែរ។

យោងតាមឯកសាររបស់ភ្នាក់ងារអនុវត្តច្បាប់អន្តោប្រវេសន៍ និងគយរបស់អាមេរិកកាលពីដើមឆ្នាំ២០២៥ បានឱ្យដឹងថាមានពលរដ្ឋកម្ពុជាចំនួន ១ ៧៤៧នាក់ ស្ថិតក្នុងតារាងដែលសហរដ្ឋអាមេរិកនឹងចាប់បញ្ជូនមកកម្ពុជាបន្ទាប់ពីប្រទេសនេះបញ្ចប់នីតិវិធីចុងក្រោយនៃការបញ្ជូនចេញ៕

អត្ថបទដោយ ហ៊ុន សិរីវឌ្ឍន៍

The post ក្រសួងសង្គមកិច្ចរៀបចំកន្លែងត្រៀមទទួលពលរដ្ឋខ្មែរដែលអាមេរិកបញ្ជូនត្រលប់មកវិញ appeared first on Kampuchea Thmey Daily.

អណិកជនខ្មែរម្នាក់ចង់កសាងវត្តធំជាងគេមួយនៅអាមេរិក

hun sirivadh — Sat, 28 Dec 2024 03:14:52 +0000

ស្ថាបនិកមូលនិធិព្រះពុទ្ធសាសនាខ្មែរលោកស្រី Lyna Lam បានជម្រាបប្រធានព្រឹទ្ធសភា សម្ដេចតេជោ ហ៊ុន សែន ថាលោកស្រីនិងក្រុមគ្រួសារចង់កសាងវត្តធំជាងគេមួយកន្លែងនៅទីក្រុងសាន ហូស៊េ (San Jose) រដ្ឋកាលីហូ័រញ៉ា សហរដ្ឋអាមេរិកដើម្បីចូលរួមលើកកម្ពស់ពុទ្ធសាសនា។

លើកឡើងក្នុងជំនួបជាមួយសម្ដេចតេជោកាលពីព្រឹកថ្ងៃទី២៧ ខែធ្នូ នៅវិមាន៧មករា រាជធានីភ្នំពេញ លោកស្រី Lyna Lam ថាគោលបំណងសំខាន់នៃការកសាងវត្តនេះ គឺសម្រាប់ទុកប្រើប្រាស់ជាប្រយោជន៍រួមដល់សហគមន៍ខ្មែរគោរពប្រតិបត្តិព្រះពុទ្ធសាសនា សម្រាប់ជាកន្លែងបណ្តុះបណ្តាលព្រះសង្ឃខ្មែរ សម្រាប់កម្មវិធីផ្លាស់ប្តូរព្រះសង្ឃ ជាពិសេសព្រះសង្ឃនិមន្តមកពីកម្ពុជា និងសម្រាប់ដាក់តម្កល់និងថែរក្សាឯកសារពាក់ព័ន្ធនឹងវប្បធម៌ប្រពៃណីខ្មែរ។

សម្តេចតេជោ ហ៊ុន សែន ថាសម្ដេចពិតជារីករាយ និងវាយតម្លៃខ្ពស់ ចំពោះគំនិតផ្តួចផ្តើម និងសកម្មភាពរបស់លោកស្រី និងក្រុមគ្រួសារ ក្នុងការថែរក្សាអភិរក្ស លើកកម្ពស់ និងអភិវឌ្ឍវប្បធម៌ ទំនៀមទម្លាប់ និងប្រពៃណីដើមដ៏ចំណាស់របស់ខ្មែរ ដើម្បីទុកជាកេរ្តិ៍មរតកសម្រាប់បងប្អូនខ្មែរ។

សម្ដេចថា៖ «ទោះបីយើងរស់នៅទីណាកន្លែងណាក៏ដោយ យើងរួមគ្នា និងជួយគ្នា ក្នុងនាមជាជនជាតិខ្មែរតែមួយ»។

លោកស្រី Lyna Lam ជាជនភៀសខ្លួនពីរបបខ្មែរក្រហមទៅនៅអាមេរិក។ លោកស្រីជាស្ថាបនិកមូលនិធិព្រះពុទ្ធសាសនាខ្មែរ និងជាភរិយារបស់លោក Chris Larseen នាយកប្រតិបត្តិក្រុមហ៊ុនបច្ចេកវិទ្យាហិរញ្ញវត្ថុប្លុកឆេនអាមេរិក Ripple Inc.។

បច្ចុប្បន្ននៅសហរដ្ឋអាមេរិកមានវត្តខ្មែរចំនួន១៤១វត្ត៕

អត្ថបទដោយ ហ៊ុន សិរីវឌ្ឍន៍

The post អណិកជនខ្មែរម្នាក់ចង់កសាងវត្តធំជាងគេមួយនៅអាមេរិក appeared first on Kampuchea Thmey Daily.

ទូតខ្មែរនៅអាមេរិក ឱ្យពលរដ្ឋរស់នៅទីនោះ សាមគ្គី រក្សាវប្បធម៌ ប្រពៃណី កសាងសហគមន៍ខ្មែរឱ្យកាន់តែរឹងមាំ

Ngoeul Narath — Wed, 18 Sep 2024 07:42:40 +0000

ឯកអគ្គរាជទូតកម្ពុជា ប្រចាំសហរដ្ឋអាមេរិក លោក កែវ ឈា លើកទឹកចិត្តឱ្យពលរដ្ឋខ្មែរទាំងអស់ដែលរស់នៅលើទឹកដីសហរដ្ឋអាមេរិក បន្តរួបរួម សាមគ្គីគ្នាជាធ្លុងមួយ ថែរក្សាមរតកវប្បធម៌ និងប្រពៃណីជាតិខ្មែរ ដើម្បីកសាងសហគមន៍ខ្មែរឱ្យកាន់តែមានភាពរឹងមាំ។ នេះបើតាមលិខិតមួយច្បាប់ ចុះថ្ងៃទី១៧ ខែកញ្ញា ដែលលោក កែវ ឈា ប្រកាសជូនជនរួមជាតិដែលរស់នៅលើទឹកដីសហរដ្ឋអាមេរិក មុនពេលលោកបញ្ចប់អាណត្តិបេសកកម្មការងារជាឯកអគ្គរាជទូត នៃកម្ពុជាប្រចាំសហរដ្ឋអាមេរិក និងសហរដ្ឋម៉ិកស៊ិក។

កាលពីដើមឆ្នាំ២០២២ រាជរដ្ឋាភិបាលកម្ពុជា បានតែងតាំងលោក កែវ ឈា ជាឯកអគ្គរាជទូតវិសាមញ្ញ និងពេញសមត្ថភាព នៃព្រះរាជាណាចក្រកម្ពុជាប្រចាំសហរដ្ឋអាមេរិក និងសហរដ្ឋម៉ិកស៉ិក។

តាមការកត់សម្គាល់ ក្នុងអាណត្តិបេសកម្មការទូតរបស់ខ្លួន លោក កែវ ឈា បានបំពេញការងារលើការលើកកម្ពស់ទំនាក់ទំនង មិត្តភាព និងកិច្ចសហប្រតិបត្តិការលើគ្រប់វិស័យរវាងព្រះរាជាណាចក្រកម្ពុជា-សហរដ្ឋអាមេរិក សំដៅការពារផល ប្រយោជន៍ជាតិ និងប្រជាជនកម្ពុជា ព្រមទាំងបានពង្រឹង និងពង្រីកទំនាក់ទំនងជាមួយសហគមន៍ខ្មែរនៅតាមរដ្ឋ និងក្រុងនានាក្នុងសហរដ្ឋអាមេរិក ស្របទៅតាមគោលនយោបាយរបស់រាជរដ្ឋាភិបាលកម្ពុជា។ ជាមួយគ្នានេះ លោក ក៏បានដើរតួនាទី ក្នុងកិច្ចការងារបញ្ជូនរតនសម្បតិជាតិ រូបសំណាកវត្ថុបុរាណ គ្រឿងអលង្ការ ដែលត្រូវបានជន លួចចេញពីប្រទេសកម្ពុជាក្នុងអំឡុងសម័យសង្គ្រាម។

នៅក្នុងលិខិតដដែល លោក កែវ ឈា ក៏បានអរគុណចំពោះជនរួមជាតិខ្មែរទាំងអស់ ដែលតែងតែផ្តល់កិច្ចសហការយ៉ាងជិតស្និទ្ធ ប្រកបដោយសាមគ្គីភាព នៅក្នុងសកម្មភាពការងាររបស់ស្ថានទូតក្នុងអាណត្តិរបស់លោក។

យ៉ាងណា គេនៅមិនទាន់ដឹងថា អ្នកការទូតរូបណា នឹងត្រូវទទួលភារកិច្ចជាឯកអគ្គរាជទូតវិសាមញ្ញ និងពេញសមត្ថភាព នៃព្រះរាជាណាចក្រកម្ពុជាប្រចាំសហរដ្ឋអាមេរិក និងសហរដ្ឋម៉ិកស៉ិកជំនួសលោក កែវ ឈា ឡើយ។

ដោយហេតុ ក្នុងអាណត្តិការងារ ពលរដ្ឋខ្មែររស់នៅលើដីអាមេរិកបានចូលរួម និងគាំទ្រលើកិច្ចការរបស់ខ្លួននាពេលកន្លងមក លោក កែវ ឈា ដាក់ក្ដីរំពឹងថាពលរដ្ឋខ្មែររស់នៅអាមេរិក នឹងចូលរួម និងផ្ដល់កិច្ចគាំទ្រការងាររបស់ឯកអគ្គរាជទូតថ្មី ដែលនឹងចូលបំពេញភារកិច្ចជាឯកអគ្គរាជទូតកម្ពុជាប្រចាំសហរដ្ឋអាមេរិកនាពេលឆាប់ៗខាងមុខ៕

ដោយ៖ ង៉ិល ណារ៉ាត់

The post ទូតខ្មែរនៅអាមេរិក ឱ្យពលរដ្ឋរស់នៅទីនោះ សាមគ្គី រក្សាវប្បធម៌ ប្រពៃណី កសាងសហគមន៍ខ្មែរឱ្យកាន់តែរឹងមាំ appeared first on Kampuchea Thmey Daily.

មិនទាន់ជាន់ដីអាមេរិកផង សម្តេច ហ៊ុន ម៉ាណែត ត្រូវបានពលរដ្ឋខ្មែរនៅទីនោះ ប្រកាសស្វាគមន៍ទៅហើយ!

vann sokunthea — Wed, 20 Sep 2023 08:03:58 +0000

នៅព្រឹកថ្ងៃទី២១ ខែកញ្ញា ស្អែកនេះ សម្តេចមហាបវរធិបតី ហ៊ុន ម៉ាណែត នឹងដឹកនាំគណៈប្រតិភូជាន់ខ្ពស់កម្ពុជាអញ្ជើញទៅកាន់សហរដ្ឋអាមេរិក ដើម្បីចូលរួមសម័យប្រជុំលើកទី ៧៨ នៃមហាសន្និបាតអង្គការសហប្រជាជាតិ នៅក្នុងទីក្រុង ញូវយ៉ក។ ប៉ុន្តែ មិនទាន់នឹងទៅដល់ផង ប្រជាពលរដ្ឋខ្មែរនៅអាមេរិក និងកាណាដា បានប្រកាសស្វាគមន៍យ៉ាងកក់ក្តៅចំពោះវត្តមាននាយករដ្ឋមន្រ្តីថ្មីកម្ពុជា និងថា ពួកគេ នឹងទៅចូលរួមក្នុងពិធីសំណេះសំណាលផ្ទាល់ជាមួយសម្តេចធិបតី ហ៊ុន ម៉ាណែត។

នេះ គឺជាលើកទី១ហើយសម្រាប់សម្តេចធិបតី ហ៊ុន ម៉ាណែត ក្នុងនាមជានាយករដ្ឋមន្រ្តីកម្ពុជាអញ្ជើញទៅកាន់សហរដ្ឋអាមេរិក និងជាលើកដំបូងដែលអញ្ជើញចូលរួមក្នុងកិច្ចប្រជុំកំពូលរបស់អង្គការសហប្រជាជាតិ។ ក៏មិនខុសពីសម្តេចតេជោ ហ៊ុន សែន ដែរ គឺសម្តេចធិបតី ហ៊ុន ម៉ាណែត មានគម្រោងជួបសំណេះសំណាលជាមួយប្រជាពលរដ្ឋខ្មែរនៅអាមេរិក និងមកពីប្រទេសផ្សេងទៀត នៅពេលដែលសម្តេចអញ្ជើញទៅដល់សហរដ្ឋអាមេរិកនោះ។ ជំនួបរវាងថ្នាកដឹកនាំកំពូលប្រទេស និងប្រជាពលរដ្ឋនៅឯនាយសមុទ្រនេះ គឺដើម្បីសួរសុខទុក្ខគ្នាទៅវិញទៅមក បង្ខិតភាពស្និតស្នាលទៅរកគ្នា និងជាការសបញ្ជាក់យ៉ាងច្បាស់ពីសន្តានចិត្តមេដឹកនាំកម្ពុជាពី«ការយកចិត្តទុកដាក់ និងមិនបោះបង់ពលរដ្ឋខ្មែរ ទោះបីរស់នៅទីណាក៏ដោយ»។

ត្បិតថា សម្តេចមហាបរវធិបតី ហ៊ុន ម៉ាណែត ទើបនឹងធ្វើជានាយករដ្ឋមន្រ្តីនៃកម្ពុជា និងមានភាពថ្មីថ្មោងក្នុងការដឹកនាំកាច់បង្កូចប្រទេសក៏ដោយ ប៉ុន្តែ សម្តេចទទួលបានការស្រឡាញ់ ចូលចិត្ត និងគាំទ្រយ៉ាងភ្លូកទឹកភ្លូកដីពីសំណាក់ប្រជាពលរដ្ឋនៅក្នុងប្រទេស។ ចំណែក ប្រជាពលរដ្ឋនៅក្រៅប្រទេស ក៏គោរពស្រឡាញ់សម្តេចធិបតី ហ៊ុន ម៉ាណែត យ៉ាងច្រើនផងដែរ។ តួយ៉ាង ប្រជាពលរដ្ឋខ្មែរនៅសហរដ្ឋអាមេរិក និងប្រទេសកាណាដា ក្បែរខាងអាមេរិក។

មុនដំណើរទស្សនកិច្ចរបស់សម្តេចធិបតី ហ៊ុន ម៉ាណែត គឺប្រជាពលរដ្ឋនៅអាមេរិក និងប្រទេសកាណាដា ជាច្រើននាក់ បានធ្វើវីដេអូឃ្លីបខ្លីបង្ហាញពីទឹកចិត្តស្រឡាញ់ គាំទ្រ និងចង់ជួបដោយផ្ទាល់សម្តេច នាយករដ្ឋមន្រ្តីកម្ពុជា។ តាមរយៈវីឌីអូឃ្លីបដែលផ្សព្វផ្សាយនៅក្នុងបណ្តាញតេឡេក្រាមរបស់សម្តេចតេជោ ហ៊ុន សែន ប្រជាពលរដ្ឋដែលទន្ទឹងរង់ចាំទទួលស្វាគមន៍សម្តេចធិបតី ហ៊ុន ម៉ាណែត គឺមកពីរដ្ឋនានានៅទូទាំងសហរដ្ឋអាមេរិក និងតាមបណ្តាខេត្តនានានៅក្នុងប្រទេសកាណាដា។ ពួកគេសុទ្ធតែសម្តែងការគាំទ្រដំណើរទស្សនកិច្ចរបស់សម្តេចធិបតី ហ៊ុន ម៉ាណែត ហើយថា នឹងទៅចូលរួមក្នុងពិធីជួបសំណេះសំណាលដោយផ្ទាល់ជាមួយសម្តេច នៅលើទឹកដីអាមេរិកថែមទៀតផង។

សម្តេចធិបតី ហ៊ុន ម៉ាណែត ជួបជាមួយអគ្គលេខាធិការUN លោក António Guterres នៅឥណ្ឌូនេស៊ី

សម្តេចធិបតី ហ៊ុន ម៉ាណែត នឹងអញ្ជើញទៅកាន់ទីក្រុង ញូវយ៉ក សហរដ្ឋអាមេរិក នៅថ្ងៃទី២១ ខែកញ្ញា ឆ្នាំ២០២៣ ដើម្បីចូលរួមសម័យប្រជុំលើកទី ៧៨ នៃមហាសន្និបាតអង្គការសហប្រជាជាតិ។ នៅទីនោះ សម្តេចធិបតី ហ៊ុន ម៉ាណែត គ្រោងនឹងជួបជាមួយមន្ត្រីជាន់ខ្ពស់ និងធុរកិច្ចជននានារបស់អាមេរិក និងជួបពិភាក្សាការងារជាមួយអគ្គលេខាធិការអង្គការសហប្រជាជាតិ លោក António Guterres ផងដែរ។

សម្តេចធិបតី ហ៊ុន ម៉ាណែត ជួបជាមួយលោកស្រី Kamala Harris អនុប្រធានាធិបតីអាមេរិកនៅឥណ្ឌូនេស៊ី

សម្តេចធិបតី ហ៊ុន ម៉ាណែត ធ្លាប់បានមានប្រសាសន៍ថា៖ «ពេលខ្ញុំទៅប្រជុំ UN ខាងមុខនេះ ត្រូវជួបជាមួយថ្នាក់ដឹកនាំ ឯកឧត្តម អគ្គលេខាធិការអង្គការសហប្រជាជាតិ ជួបជាមួយនឹងមន្ត្រីជាន់ខ្ពស់របស់សហរដ្ឋអាមេរិក ជួបជាមួយនឹងអ្នកធុរកិច្ចអាមេរិក និងមន្ត្រីមួយចំនួនទៀត ដែលយើងមិនទាន់បានជួបនៅពេលនេះ ដើម្បីបញ្ជាក់ជំហរ និងការទំនាក់ទំនងរបស់យើង បញ្ជាក់ឲ្យច្បាស់ថា ប្រទេសយើងមិនធំទេ តែយើងក៏ជាប្រទេសមិនតូចដែរ ប៉ុន្តែសំឡេងរបស់ប្រជាពលរដ្ឋកម្ពុជា សំឡេងរបស់កម្ពុជា គឺជាប្រទេសមួយឯករាជ្យ អធិបតេយ្យភាព និងមានអំណាច និងមានស្មើភាព ជាមួយបណ្តាប្រទេសផ្សេងៗ។ អញ្ចឹងគ្រប់គោលនយោបាយរបស់ ត្រូវតែបញ្ចេញឲ្យអន្តរជាតិដឹង»៕

ដោយ៖ វណ្ណ សុគន្ធា

The post មិនទាន់ជាន់ដីអាមេរិកផង សម្តេច ហ៊ុន ម៉ាណែត ត្រូវបានពលរដ្ឋខ្មែរនៅទីនោះ ប្រកាសស្វាគមន៍ទៅហើយ! appeared first on Kampuchea Thmey Daily.

សម្ដេចតេជោ ហ៊ុន សែន អំពាវនាវពលរដ្ឋខ្មែរនៅអាមេរិក មិនចាំបាច់ធ្វើបាតុកម្មតបតជាមួយអ្នកធ្វើបាតុកម្មប្រឆាំងសម្ដេចទេ

sopheak khoun — Tue, 03 May 2022 04:13:11 +0000

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវដល់ប្រជាពលរដ្ឋខ្មែរ នៅសហរដ្ឋអាមេរិក ដែលរង់ចាំទទួលស្វាគមន៍សម្ដេចអញ្ជើញទៅទីនោះ មិនចាំបាច់ធ្វើបាតុកម្មតបតជាមួយអ្នកធ្វើបាតុកម្មប្រឆាំងសម្ដេច នោះទេ។ ការអំពាវនាវ របស់សម្ដេចតេជោនាយករដ្ឋមន្ត្រី បានធ្វើឡើងក្នុងវេទិកាជួបសំណេះសំណាល ព្រមទាំងផ្តល់រង្វាន់លើកទឹកចិត្តដល់សិស្សប្រលងជាប់និទ្ទេស A ក្នុងឆ្នាំសិក្សា២០២០-២០២១ សរុប ១,៧៥៣នាក់ នៅព្រឹកថ្ងៃទី ៣ ខែឧសភា ឆ្នាំ ២០២២នេះ។

សម្ដេចតេជោ ហ៊ុន សែន បានថ្លែងថា នៅថ្ងៃទី ១០ ខែឧសភា ឆ្នាំ ២០២២ សម្ដេចនឹងចេញដំណើរទៅសហរដ្ឋអាមេរិក ដើម្បីចូលរួមកិច្ចប្រជុំកំពូលពិសេសអាស៊ាន-សហរដ្ឋអាមេរិក ដែលនឹងប្រព្រឹត្តទៅចាប់ពីថ្ងៃទី ១២ ដល់ថ្ងៃទី ១៣ ខែឧសភា ឆ្នាំ ២០២២ខាងមុខ។ សម្ដេចតេជោ បានអរគុណដល់ប្រជាពលរដ្ឋខ្មែរ រស់នៅសហរដ្ឋអាមេរិក ដែលបានចេញវីដេអូរង់ចាំទទួលស្វាគមន៍សម្ដេចអញ្ជើញទៅទីនោះ។

សម្ដេចតេជោនាយករដ្ឋមន្ត្រី បានឲ្យដឹងបន្តថា សម្ដេចនឹងអញ្ជើញជួបសំណេះសំណាល ជាមួយប្រជាពលរដ្ឋខ្មែររស់នៅសហរដ្ឋអាមេរិក ដើម្បីសាកសួរសុខទុក្ខពួកគាត់នៅទីនោះ ក្រោយពីខកខានប៉ុន្មានឆ្នាំដោយសារការរាតត្បាតជំងឺកូវីដ-១៩។ បើតាមសម្ដេចតេជោ ហ៊ុន សែន នៅក្នុងជំនួបនោះ នឹងមានប្រជាពលរដ្ឋខ្មែរជាង ១ពាន់នាក់ចូលរួម។

សម្ដេចតេជោ ហ៊ុន សែន មានប្រសាសន៍ថា «ដោយសារយើងសាលប្រជុំនៅទីនោះ វាមិនច្រើន ដូច្នេះមនុស្សប្រហែលជាង ១ពាន់នាក់ប៉ុណ្ណឹង ហើយខ្ញុំក៏រង់ចាំមើលដែរ ថាតើអ្នកធ្វើបាតុកម្មប្រឆាំងខ្ញុំ វាមានគ្នាប៉ុន្មាន? ឯខ្ញុំមិនលើកទឹកចិត្ត ឲ្យបងប្អូនដែលមកទទួលខ្ញុំ ធ្វើបាតុកម្មតបតជាមួយគេទេ សុំអង្វរកចំពោះបងប្អូន បងៗ ឬប្អូន ឬក្មួយ ឬចៅ ដែលមកទទួលខ្ញុំនោះ មិនចាំបាច់ឃើញគេធ្វើបាតុកម្មមកប្រឆាំងខ្ញុំ ហើយយើងទៅធ្វើបាតុកម្មតបតទេ គ្មានការចាំបាច់ ដើម្បីធ្វើរឿងបែបនេះទេ»។

ជាមួយគ្នានេះ សម្ដេចតេជោនាយករដ្ឋមន្ត្រី បានបញ្ជាក់ថា គណបក្សប្រជាជនកម្ពុជា ឬរាជរដ្ឋាភិបាល មានមនុស្សគាំទ្រនៅក្រៅប្រទេស ដែលជានិច្ចកាលមានចំនួនច្រើនជាង ចំនួនអ្នកដែលធ្វើបាតុកម្មប្រឆាំងសម្ដេច។

សូមជម្រាបថា លោក ចូ បៃឌិន ប្រធានាធិបតីសហរដ្ឋអាមេរិក បានសរសេរលិខិតអញ្ជើញសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ទៅចូលរួមកិច្ចប្រជុំកំពូលពិសេសអាស៊ាន-សហរដ្ឋអាមេរិក ដែលគ្រោងធ្វើឡើងនៅថ្ងៃទី ១២-១៣ ខែឧសភា ឆ្នាំ ២០២២ខាងមុខនេះ។

ជាការឆ្លើយតបសម្តេចតេជោនាយករដ្ឋមន្ត្រី បានអះអាងថា នឹងចូលរួមកំពូលពិសេសអាស៊ាន-សហរដ្ឋអាមេរិកនេះ ដោយក្តីសោមនស្សរីករាយ ពីព្រោះកិច្ចប្រជុំកំពូលពិសេសនេះ ជាឱកាសដ៏ប្រសើរពិភាក្សាពីការជំរុញកិច្ចសហប្រតិបតិ្តការ ព្រមទាំងផ្លាស់ប្តូរយោបល់គ្នាលើបញ្ហានានា ដែលជាក្តីបារម្ភ និងជាប្រយោជន៍រួមរបស់អាស៊ាន និងសហរដ្ឋអាមេរិក៕

អត្ថបទ៖ ឃួន សុភ័ក្រ

The post សម្ដេចតេជោ ហ៊ុន សែន អំពាវនាវពលរដ្ឋខ្មែរនៅអាមេរិក មិនចាំបាច់ធ្វើបាតុកម្មតបតជាមួយអ្នកធ្វើបាតុកម្មប្រឆាំងសម្ដេចទេ appeared first on Kampuchea Thmey Daily.

សម្ដេចតេជោ ហ៊ុន សែន គ្រោងជួបសំណេះសំណាលជាមួយពលរដ្ឋខ្មែរ រស់នៅសហរដ្ឋអាមេរិកប្រមាណ ១ពាន់នាក់

sopheak khoun — Thu, 28 Apr 2022 03:00:27 +0000

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ថា សម្ដេចគ្រោងជួបសំណេះសំណាលជាមួយប្រជាពលរដ្ឋខ្មែរ ដែលរស់នៅសហរដ្ឋអាមេរិកប្រមាណ ១ពាន់នាក់ មុនកិច្ចប្រជុំកំពូលអាស៊ាន-អាមេរិក នៅទីនោះ។

នៅក្នុងពិធីជួបសំណេះសំណាល និងផ្តល់អនុសាសន៍ដល់កីឡាករ កីឡាការិនី និងអត្តពលិក មុនពេលចេញទៅប្រកួតកីឡាស៊ីហ្គេម (SEA Games) លើកទី ៣១ នៅប្រទេសវៀតណាម នាព្រឹកថ្ងៃទី ២២ ខែមេសានេះ សម្ដេចតេជោនាយករដ្ឋមន្ត្រី បានថ្លែងថា សម្ដេចបានឃើញលិខិតរបស់ប្រធានាធិបតីអាមេរិកលោក ចូ បៃឌិន រួចហើយ ពាក់ព័ន្ធនឹងកិច្ចប្រជុំកំពូលអាស៊ាន-អាមេរិក ដែលនឹងត្រូវធ្វើឡើងនៅរដ្ឋធានីវ៉ាស៊ីនតោន សហរដ្ឋអាមេរិក ហើយសម្ដេក៏នឹងចុះហត្ថលេខាទទួល នៅថ្ងៃនេះផងដែរ។

សម្ដេចតេជោ ហ៊ុន សែន បានថ្លែងបន្តថា នៅល្ងាចថ្ងៃទី ១០ ខែឧសភា ឆ្នាំ ២០២២ សម្ដេច និងគណៈប្រតិភូជាន់ខ្ពស់នៃរាជរដ្ឋាភិបាលកម្ពុជា នឹងអញ្ជើញទៅដល់សហរដ្ឋអាមេរិក ហើយក៏នឹងជួបសំណេះសំណាលទ្រង់ទ្រាយធំជាមួយប្រជាពលរដ្ឋខ្មែរប្រមាណ ១ពាន់នាក់ ដែលរស់នៅទីនោះផងដែរ។

សម្ដេចតេជោនាយករដ្ឋមន្ត្រី មានប្រសាសន៍យ៉ាងដូច្នេះថា «ល្ងាចថ្ងៃ ១០ ខ្ញុំជួបបងប្អូនខ្មែរយើងមួយចំនួន ដល់ថ្ងៃ ១១ ជួបទ្រង់ទ្រាយធំប្រមាណជា ១ពាន់នាក់ ព្រោះពិបាករកកន្លែងដែរ ដល់ថ្ងៃ ១២, ១៣ អាហ្នឹង គឺប្រជុំពីរថ្ងៃ ថ្ងៃ ១៤ ហោះមកវិញ ថ្ងៃ ១៥ មកដល់ណេះ»។

សូជម្រាបថា ក្រសួងការបរទេសកម្ពុជា កាលពីថ្ងៃទី ១៦ ខែមេសាកន្លងទៅនេះ បានប្រកាសឲ្យដឹងថា កិច្ចប្រជុំកំពូលអាស៊ាន-អាមេរិក នឹងត្រូវធ្វើឡើងនៅរដ្ឋធានីវ៉ាស៊ីនតោន សហរដ្ឋអាមេរិក នៅថ្ងៃទី ១២ និងទី ១៣ ខែឧសភា ឆ្នាំ ២០២២ ខាងមុខនេះ។ កិច្ចប្រជុំកំពូលពិសេសនេះ ធ្វើឡើងដើម្បីអបអរសាទរទំនាក់ទំនងដៃគូ សន្ទនាអាស៊ាន-អាមរិក ដែលមានអាយុកាល ៤៥ឆ្នាំមកហើយ៕