ពានរង្វាន់សម្តេចក្រឡាហោម ស ខេង Archives - Kampuchea Thmey Daily

គ្រូបង្វឹកក្រសួងមហាផ្ទៃ៖ លេងបាល់ទះបើខ្លាចដៃគូហើយសមត្ថភាព ១០០% ធ្លាក់មកត្រឹម ៥០-៦០

Sina Noun — Mon, 16 Mar 2026 08:07:09 +0000

លោ អ៊ូ សុផល គ្រូបង្វឹករបស់ក្រុមបាល់ទះក្រសួងមហាផ្ទៃ ថាការប្រកួតប្រសិនបើខ្លាចដៃគូហើយសមត្ថភាពក៏ធ្លាក់ដូចគ្នា ពោលបើមាន ១០០% អាចនឹងធ្លាក់មកសល់ត្រឹម ៥០-៦០ ប៉ុណ្ណោះ ដូច្នេះចិត្តសាស្ត្រលើកីឡាករគឺសំខាន់ក្នុងការប្រជែងជ័យជម្នះ។

ក្រុមបាល់ទះក្រសួងមហាផ្ទៃ

គ្រូបង្វឹករបស់ក្រុមបាល់ទះក្រសួងមហាផ្ទៃខាងលើ បានលើកឡើងថា ការពង្រឹងចិត្តសាស្ត្រកីឡាករគឺសំខាន់ពិសេសក្នុងការប្រកួតប៉ះក្រុមធំៗ និងអាជីពដូចគ្នានេះ។ កីឡាករតែមានចិត្តខ្លាចដៃគូហើយសមត្ថភាពដែលល្អ និងមាន ១០០% ពីមុននឹងធ្លាក់ចុះដូចគ្នា។ ឧទារហណ៍ប្រសិនបើមានលេង ១០០% អាចនឹងធ្លាក់ចុះមកសល់ត្រឹម ៥០-៦០ តែប៉ុណ្ណោះ។

លោក អ៊ូ សុផល បន្ថែមទៀតថា កាលណាចិត្តសាស្ត្រក្រុមខ្លាំងកីឡាករមានចិត្តមោះមុតហើយនោះសមត្ថភាពនៅក្រោមដៃគូបន្តិចបន្តួចក៏អាចខ្លាំង និងដណ្ដើមយកជ័យជម្នះបានដែរ។ មួយវិញទៀតក្នុងនាមជាក្រុមអាជីពហើយ ដូច្នេះការប្រមូលអារម្មណ៍លើការប្រកួតក៏ត្រូវតែល្អ និងស្ថិតក្នុងកម្រិតអាជីពដូចគ្នា។

ក្រុមបាល់ទះក្រសួងមហាផ្ទៃ

បញ្ជាក់ដែរថា លោក អ៊ូ សុផល ជាគ្រូបង្វឹកដែលមានបទពិសោធច្រើនមួយរូប និងបានបង្ហាត់ក្រុមបាល់ទះក្រសួងមហាផ្ទៃនេះជាច្រើនឆ្នាំមកហើយដែរ។ ក្រុមសួងមហាផ្ទៃផ្នែកនារី ទទួលបានចំណាត់ថ្នាក់លេខ៣ នៃពានរង្វាន់សម្ដេច ក្រឡាហោម លើកទី៤ នេះ ខណៈក្រុមបុរសធ្លាក់ត្រឹមវគ្គ ៨ក្រុមចុងក្រោយបន្ទាប់ពីចាញ់ វិសាខា ៕

ក្រុមបាល់ទះក្រសួងមហាផ្ទៃឈ្នះប្រាក់នៅសហរដ្ឋអាមេរិក

អត្ថបទដោយ៖ នួន ស៊ីណា

The post គ្រូបង្វឹកក្រសួងមហាផ្ទៃ៖ លេងបាល់ទះបើខ្លាចដៃគូហើយសមត្ថភាព ១០០% ធ្លាក់មកត្រឹម ៥០-៦០ appeared first on Kampuchea Thmey Daily.

លោក អាំង សិរីពិសិដ្ឋ ឆ្លើយតបយ៉ាងណាចំពោះសំនួរ «ល្អដូច HERRERA ចូលសញ្ជាតិលេងឲ្យជម្រើសជាតិកម្ពុជាបាន ឬទេ»?

Sina Noun — Wed, 04 Mar 2026 02:30:13 +0000

លោក អាំង សិរីពិសិដ្ឋ ដែលជាអនុប្រធានសហព័ន្ធកីឡាបាល់ទះថា កីឡាករ HERRERA គឺមានសមត្ថភាពល្អយូរហើយមិនមែនទើបល្អនៅពានសម្ដេច ក្រឡាហោម នេះទេ ប៉ុន្តែរឿងបញ្ចូលសញ្ជាតិដើម្បីឲ្យជាប់ជាជម្រើសគឺត្រូវតាមដានច្រើនទៀត។

កីឡាករ HERRERA

លោក អាំង សិរីពិសិដ្ឋ អនុប្រធានសហព័ន្ធ និងជាអគ្គលេខាធិការផងនោះបានឲ្យដឹងថា កីឡាករ HERRERA គឺលោកដឹង និងតាមដានសមត្ថភាពយូរហើយគឺរូបគេល្អតាំងពីដើមមកម្ល៉េះមិនមែនទើបល្អក្នុងពានសម្ដេចក្រឡាហោមឆ្នាំ២០២៦ នេះទេ។ លោកបន្ថែមទៀតថា តាមដែលលោកសង្កេតកន្លងមកគឺកីឡាករ HERRERA ល្អហើយបន្ទាប់មកបណ្ដោយខ្លួនវិញៗ ដូច្នេះការជាប់ជាកីឡាករជម្រើសជាតិគឺមានចំណុចច្រើនដែលត្រូវតាមដានពិនិត្យ។

កីឡាករ HERRERA

ថ្នាក់ដឹកនាំរបស់សហព័ន្ធរូបនេះបន្ថែមទៀតថា កីឡាករជម្រើសជាតិប្រសិនបើមិនមានសមត្ថភាពគ្រប់គ្រាន់ទេគឺមិនអាចជាប់នោះទេ។ ក្នុងក្រុមជម្រើសជាតិគឺមានការហ្វឹកហាត់តឹងរឹង និងមានវិន័យច្បាស់លាស់ដូចជាថ្ងៃហ្វឹកហាត់ និងការសម្រាក ឬពេលវេលាចុចទូរសព្ទជាដើមមិនអាចសេរីនោះឡើយ។ ដូច្នេះហើយកីឡាករល្អ ប៉ុន្តែអត់មានវិន័យគឺមិនអាចចូលក្នុងក្រុមជម្រើសជាតិនោះឡើយ។

កីឡាករ HERRERA

បញ្ជាក់ដែរថា កីឡាករ កីឡាករសញ្ជាតិគុយបា HERRERA គឺមករស់នៅ និងប្រកបអាជីពបាល់ទះក្នុងប្រទេសកម្ពុជាជាយូរឆ្នាំមកហើយ។ រូបគេធ្លាប់ប្រកួតនៅតាមក្លឹបបាល់ទះធំៗជាច្រើននាពេលកន្លង និងតែងតែបង្ហាញមុខរាល់កម្មវិធីផ្សេងៗនៅកម្ពុជា។ ស្មាត់មានសមត្ថភាពល្អរូបនេះជាកីឡាករតែម្នាក់គត់ដែលធ្លាប់លើកពានសម្ដេច ក្រឡាហោម បាន២ដងម្នាក់ឯងគឺនៅឆ្នាំមុនរូបគេជួយលេងឲ្យស្នងការ ន.ប ខេត្តស្វាយរៀងលើកពាន ១ដង និងលើកទី២ នេះជួយឲ្យស្នងការ ន.ប រាជធានីភ្នំពេញ លើកពានជាថ្មីទៀត។ រូបគេត្រូវបានមហាជនមើលឃើញថាជាកីឡាករឆ្នើមមួយរូបនៅកម្ពុជាទាំងសមត្ថភាពម៉ាត់ផ្ដាច់ វាយសេវា លោតធ្វើរនាំង និងការដឹកនាំក្រុមលេងផងដែរ៕

លោក អាំង សិរីពិសិដ្ឋ (ឆ្វេង)

អត្ថបទដោយ៖ នួន ស៊ីណា

The post លោក អាំង សិរីពិសិដ្ឋ ឆ្លើយតបយ៉ាងណាចំពោះសំនួរ «ល្អដូច HERRERA ចូលសញ្ជាតិលេងឲ្យជម្រើសជាតិកម្ពុជាបាន ឬទេ»? appeared first on Kampuchea Thmey Daily.

ពានសម្តេចក្រឡាហោម ស ខេង រកឃើញក្រុមខ្លាំងប៉ះគ្នាវគ្គ ៨ ក្រុមចុងក្រោយ

Kosal Sem — Tue, 24 Feb 2026 02:19:51 +0000

ការប្រកួតកីឡាបាល់ទះពានរង្វាន់សម្តេចក្រឡាហោម ស ខេង លើកទី៤ បានបញ្ចប់វគ្គ ១៦ ក្រុមចុងក្រោយហើយ ខណៈក្រុមត្រូវជួបគ្នាវគ្គ ៨ ក្រុមចុងក្រោយ សុទ្ធតែជាក្រុមខ្លាំងៗ។

ការប្រកួតវគ្គ ១៦ ក្រុមចុងក្រោយ បានបញ្ចប់ជាស្ថាពរកាលពីថ្ងៃ ចន្ទ ទី ២៤ ខែ កុម្ភៈ ម្សិលមិញនេះ។ ក្រុមទទួលបានកៅអីឡើងមកជួបគ្នានៅវគ្គ ៨ ក្រុមចុងក្រោយ រួមមាន ស្នងការខេត្តព្រះសីហនុ ត្រូវជួបក្រុម ស្នងការខេត្តកោះកុង។ ក្រុមកងពលធំអន្តរាគមន៍លេខ ៣ ត្រូវជួបក្រុម បញ្ជាការដ្ឋានអង្គរក្ស A។ ក្រុមស្នងការរាជធានីភ្នំពេញ ត្រូវជួបក្រុម ស្នងការខេត្តស្វាយរៀង និងចុងក្រោយក្រុមក្រសួងមហាផ្ទៃ ត្រូវជួបក្រុម វិសាខា។

គួរបញ្ជាក់ ថា ការប្រកួតវគ្គ ៨ ក្រុមចុងក្រោយ នឹងធ្វើឡើងនៅថ្ងៃទី ២៥ ខែ កុម្ភៈ ឆ្នាំ ២០២៥ ដោយការប្រកួតនឹងចាប់ផ្តើមពីម៉ោង ១២ ថ្ងៃត្រង់តទៅ នៅសាលបាល់ទះពហុកីឡដ្ឋានជាតិ អូឡាំពិក។

លទ្ធផលវគ្គ ១៦ ក្រុមចុងក្រោយ

ស្នងការខេត្ត ព្រៃវែង ០-៣ ស្នងការខេត្ត កោះកុង
ស្នងការខេត្ត ព្រះសីហនុ ៣-២ ស្នងការខេត្ត កំពង់ឆ្នាំង
កងពលធំអន្តរាគមន៍លេខ៣ ៣-២ ស្នងការខេត្ត ពោធិ៍សាត់
បញ្ជាការដ្ឋានអង្គរក្ស A ៣-២ ស្នងការខេត្ត មណ្ឌលគិរី
ស្នងការរាជធានីភ្នំពេញ ៣-២ ស្នងការខេត្ត ត្បូងឃ្មុំ
ស្នងការខេត្ត ស្វាយរៀង ៣-០ លោកតាឌីព្រះវិហារ
ក្រសួងមហាផ្ទៃ ៣-០ រាជសីអង្គរ សៀមរាប
វិសាខា ៣-១ បញ្ជាការដ្ឋានអង្គរក្ស B

គូប្រកួតវគ្គ ៨ ក្រុមចុងក្រោយ

ស្នងការខេត្ត កោះកុង vs ស្នងការខេត្ត ព្រះសីហនុ
កងពលធំអន្តរាគមន៍លេខ៣ vs បញ្ជាការដ្ឋានអង្គរក្ស A
ស្នងការរាជធានីភ្នំពេញ vs ស្នងការខេត្ត ស្វាយរៀង
វិសាខា vs ក្រសួងមហាផ្ទៃ

វគ្គពាក់កណ្តាលផ្តាច់ព្រ័ត្រ

ស្នងការខេត្ត កោះកុង vs ស្នងការខេត្ត ព្រះសីហនុ / កងពលធំអន្តរាគមន៍លេខ៣ vs បញ្ជាការដ្ឋានអង្គរក្ស A
ស្នងការរាជធានីភ្នំពេញ vs ស្នងការខេត្ត ស្វាយរៀង / វិសាខា VS ក្រសួងមហាផ្ទៃ

អត្ថបទ៖ សេម កុសល

The post ពានសម្តេចក្រឡាហោម ស ខេង រកឃើញក្រុមខ្លាំងប៉ះគ្នាវគ្គ ៨ ក្រុមចុងក្រោយ appeared first on Kampuchea Thmey Daily.

វ័យត្រឹម ១៩ឆ្នាំផ្ញើសារលើកទឹកចិត្តដល់នារីៗឲ្យលេងកីឡាពី ម៉ីម៉ីៗ ថាអ្នកខ្លាំងៗក៏ចាប់ផ្ដើមពីអត់ចេះដែរ

Sina Noun — Mon, 23 Feb 2026 03:31:22 +0000

អតីតកីឡាការិនីលីប្រូរបស់ក្រុមបាល់ទះក្រសួងមហាផ្ទៃ ម៉ីម៉ី ថាអ្នកដែលស្រឡាញ់ចូលចិត្តកីឡាបាល់ទះគួរសាកចាប់ផ្ដើមហ្វឹកហាត់បាន កុំខ្លាច កុំខ្មាស់គេ ព្រោះអ្នកខ្លាំងៗក៏ចាប់ផ្ដើមពីអត់ចេះសោះដូចគ្នាដែរ។

ម៉ីម៉ី ប្រកួតកន្លងទៅ (រូបភាពផេក Castor)

កីឡាការិនី ខូវ វីវៀន (ម៉ីម៉ី) បានឲ្យដឹងថា ប្រសិនបើយុវជនពិសេសនារីៗដែលស្រឡាញ់វិស័យបាល់ទះនេះគួរសាកចាប់ផ្ដើមហ្វឹកហាត់បានកុំខ្លាច កុំមានការខ្មាសអៀន កុំគិតថាខ្លួនមិនអាចធ្វើបានឲ្យសោះ។ ការខ្មាសអៀនគឺធ្វើឲ្យម្នាក់ៗមិនរីកចម្រើនទៅមុខនោះឡើយ។

កីឡាករ ឬអ្នកខ្លាំងខាងបាល់ទះនេះមុនមានសមត្ថភាពបែបនេះក៏ឆ្លងកាត់ការចាប់ផ្ដើមពីមិនចេះសោះដូចគ្នា ប៉ុន្តែការខំប្រឹងប្រែងតស៊ូទើបធ្វើឲ្យសមត្ថភាពកើនឡើងពីមួយកម្រិតទៅមួយកម្រិតបាន។ យ៉ាងណាប្រសិនបើស្រឡាញ់កីឡាមួយហើយឆ្លៀតចូលលេងទៅ និងចេះសួរពីរបៀបលេងរបស់រៀមច្បងលេងធ្វើដូចម្ដេចបានល្អ ធ្វើដូចម្ដេចលោតបានខ្ពស់ ឬធ្វើដូចម្ដេចទើបកើនឡើងសមត្ថភាពទៅបាន។

ម៉ីម៉ី ប្រកួតកន្លងទៅ

ការលេងកីឡាបាល់ទះគឺល្អសម្រាប់សុខភាព និងល្អលើស្មារតីទៀតផង។ លេងបាល់ទះបានធ្វើឲ្យខ្លួនមានការផ្ចង់អារម្មណ៍ ផ្ដោតលើការងារច្បាស់លាស់បានល្អណាស់ជាក់ស្ដែងមិនថានៅពេលប្រកួតបាល់ទះគឺផ្តោតតែបាល់ទះប៉ុណ្ណោះ។ ងាកមកការសិក្សាដូចគ្នាគឺមានការផ្ដោតអារម្មណ៍បានល្អតែការសិក្សាដែលវាបញ្ជាក់ពីការខុសគ្នាដាច់មុនការហ្វឹកហាត់។

ម៉ីម៉ី លីប្រូក្រសួងមហាផ្ទៃ

បញ្ជាក់ដែរថា កីឡាការិនី ខូវ វីវៀន (ម៉ីម៉ី) ជាអ្នកស្រឡាញ់កីឡា និងមានសមត្ថភាពលេងកីឡាបានច្រើនប្រភេទផងដែរ។ រូបគេលេងកីឡាមិនក្រោមឆ្នាំនោះទេបើទោះជាខ្លួននៅក្មេង និងកំពុងសិក្សារៀនសូត្រយ៉ាងណាក្ដី។ ម៉ីម៉ី ជាអតីតកីឡាការិនីក្រុមបាល់ទះក្រសួងមហាផ្ទៃ។ រូបគេលេងក្នុងតំណែងលីប្រូ។ ដោយសារតែជាប់ទៅបន្តការសិក្សានៅអូស្ត្រាលីអតីតលីប្រូម្នាក់នេះត្រូវផ្អាកការលេងបាល់ះ និងបានចេញដំណើរទៅអូស្ត្រាលី តាំងពីថ្ងៃទី២០ ខែកុម្ភៈ ឆ្នាំ២០២៦ នេះមកម្ល៉េះ៕

ម៉ីម៉ី ប្រកួតកន្លងទៅ

អត្ថបទដោយ៖ នួន ស៊ីណា

The post វ័យត្រឹម ១៩ឆ្នាំផ្ញើសារលើកទឹកចិត្តដល់នារីៗឲ្យលេងកីឡាពី ម៉ីម៉ីៗ ថាអ្នកខ្លាំងៗក៏ចាប់ផ្ដើមពីអត់ចេះដែរ appeared first on Kampuchea Thmey Daily.

មកស្គាល់កីឡាករឆ្នើមៗ ក្នុងពានរង្វាន់សម្តេចក្រឡាហោម ស ខេង លើកទី៤

chean virakbot — Tue, 10 Feb 2026 01:50:41 +0000

ការប្រកួតកីឡាបាល់ទះ ពានរង្វាន់សម្តេចក្រឡាហោម ស ខេង លើកទី៤ កំពុងទទួលបានការចាប់អារម្មណ៍ខ្លាំង បន្ទាប់ពីបានចាប់ផ្តើមប្រកួតតាំងពីថ្ងៃទី៧ ខែកុម្ភៈ ឆ្នាំ ២០២៦។ ក្នុងនោះក្រុមមានក្រុមខ្លះបានឡើងទៅកាន់វគ្គ ១៦ ក្រុមចុងក្រោយហើយ។

ថ្ងៃនេះសូមបង្ហាញកីឡាករស្មាត់សំខាន់ៗ អ្នកប៉ះសេល្អៗ និងក្រុមដែលត្រូវបានចាត់ទុកជាក្រុមខ្លាំងក្នុងការប្រជែងជើងឯក។

ក្រុមបាល់ទះវិសាខា

ក្លិបបាល់ទះ វិសាខា អាចត្រូវបានចាត់ទុកជាក្រុមមានកម្រិតគុណភាពល្អជាងគេនៅក្នុងពានរង្វាន់សម្តេចក្រឡាហោម ស ខេង លើកទី៤ ដោយសារពួកគេមានកីឡាករល្អស្ទើរស្មើគ្នា។

កីឡាករវាយផ្តាច់លេចធ្លោរបស់ វិសាខា គឺ គួន ម៉ុម ជាស្មាត់ស្លាបស្តាំ និង ពិន សារ៉ុន ជាស្មាត់ស្លាបឆ្វេង។ កីឡាករទាំងពីរពិតជាធ្វើបានល្អណាស់ បន្ទាប់ពីមានអ្នកប៉ះសេបរទេសគឺកីឡាករ Retamar សញ្ជាតិហ្វីលីពីន។ កីឡាករទាំង ៣ នាក់នេះគឺ ជាកីឡាករតាមច្បាប់អនុញ្ញាតគឺ ជម្រើសជាតិកម្រិត A ពីរនាក់ និងកីឡាករបរទេស ១នាក់។

ប៉ុន្តែបើមើលបញ្ជីឈ្មោះកីឡាករផ្សេងទៀតក៏សុទ្ធតែល្អដែរមានដូចជា សឿន ហេង, ផុល រតនៈ, មួន និមល, សេង គីមហាប់, ខេង ថុនា និង លឹម ចិត្រា ដែលសុទ្ធតែកីឡាករធ្លាប់ជាប់ជម្រើសជាតិកម្ពុជា។

ក្រុមស្នងការខេត្តស្វាយរៀង

ក្រុមបាល់ទះស្នងការដ្ឋានខេត្ត ស្វាយរៀង ក៏ជាក្រុមគួរឲ្យចាប់អារម្មណ៍មួយដោយសារពួកគេមានកីឡាករបរទេស ២ នាក់ និងជម្រើសជាតិកម្ពុជា ១នាក់។ កីឡាករសញ្ជាតិវៀតណាម ង្វៀន វ៉ាន់ងុកដុយ លេងតួនាទីជាស្មាត់ឆ្វេង និងកីឡាករឥណ្ឌា Prafu លេងតួនាទីជាស្មាត់ស្តាំ ខណៈអ្នកប៉ះសេជម្រើសជាតិកម្ពុជា សួន ចាន់ណារ៉ូ។

ក្រៅពីកីឡាករសំខាន់ទាំង ៣ ដែលកំណត់តាមច្បាស់ ក្រុមខេត្តស្វាយរៀង ក៏មានកីឡាករសំខាន់គួរឲ្យចាប់អារម្មណ៍ដែរមានដូចជា ខឹម សុវណ្ណារ៉ា ជាអតីតលីប៊ើរ៉ូ ជម្រើសជាតិកម្ពុជា ស្មាត់ មី រស្មី និង ជុក សោភ។

ក្រុមបាល់ទះក្រសួងមហាផ្ទៃ

ក្រុមបាល់ទះក្រសួងមហាផ្ទៃ ក៏ជាក្រុមគួរឲ្យចាប់អារម្មណ៍ដែរ ពីព្រោះពួកគេមានកីឡាករល្អៗជាច្រើន។ ពួកគេមិនមានកីឡាករបរទេស ប៉ុន្តែពួកគេមានកីឡាករជម្រើសជាតិកម្ពុជា ៣នាក់គឺ មឿង ម៉េងឡាយ ជាស្មាត់ស្តាំ និង ធី ម៉េងហួង ជាស្មាត់ឆ្វេង ព្រមទាំងអ្នកប៉ះ កែវ ស្រេងលីហួរ។

ជាមួយគ្នានេះ ពួកគេក៏មានកីឡាករមានបទពិសោធច្រើនដែរដូចជា ខុម ហុងទ្រី, ឆោម ទីណា និង ឈួន ប្រសិទ្ធ។

បញ្ជាការដ្ឋានអង្គរក្ស A

ក្រុមបាល់ទះបញ្ជាការដ្ឋានអង្គរក្ស A ប្រើប្រាស់កីឡាករក្នុងស្រុកទាំងអស់ ប៉ុន្តែកីឡាករក៏សុទ្ធតែមានបទពិសោធច្រើនដែរ។ ស្មាត់គួរឲ្យចាប់អារម្មណ៍ ស៊ុយ ខន និង រ៉េន ឆាយហុង។ ក្នុងនោះក៏មានកីឡាករ ឡេក លាងហុង, ទុយ កុសល និង នួន វិចិត្រ ជាដើម។

ក្រុមស្នងការដ្ឋានរាជធានីភ្នំពេញ

ក្រុមស្នងការដ្ឋានរាជធានីភ្នំពេញ ជាក្រុមមួយដែលអាចប្រជែងជើងឯកដែរ។ ពួកគេមានស្មាត់បរទេសគឺកីឡាករគុយបា Raciel Herrera ដែលមានបទពិសោធច្រើននៅកម្ពុជា។ ជាមួយគ្នានេះ ពួកគេមានកីឡាករ រុន សុខជា និង ចាន់ វាសនា ព្រមទាំងអ្នកប៉ះសេជាប់ជម្រើសជាតិកម្ពុជា យុន ខេមរៈ។

ក្រៅពីនេះ ពួកគេក៏មានកីឡាករល្អៗជាច្រើននាក់ទៀតដែរដូចជា ឡាង រាសីកែវ, ឧក រដ្ឋា និង សាន ចនវិរៈ ជាដើម។

ក្រុមស្នងការខេត្តព្រៃវែង

ក្រុមបាល់ទះខេត្តព្រៃវែង បាននាំចូលកីឡាករបរទេស ២ នាក់គឺ Viko និង Amin ដែលជាកីឡាករឥណ្ឌូណេស៊ី។ កីឡាករទាំងពីរនាក់នេះគឺ Amin ជាស្មាត់វាយផ្តាច់ស្លាបស្តាំង ខណៈ Viko ជាអ្នកប៉ះសេ ប៉ុន្តែរូបគេក៏អាចលេងប្រយុទ្ធស្លាបបានដែរ។ ចំណែកកីឡាករផ្សេងៗទៀតមិនសូវមានកេរ្តិ៍ឈ្មោះបោះសំឡេងទេ ដូច្នេះពួកគេមិនមានជាកីឡាករធ្លាប់ជម្រើសជាតិឡើយ។

ចំណែក ក្រុមផ្សេងៗទៀតក៏មានកីឡាករល្អច្រើនដែរ ប៉ុន្តែពួកគេមិនមានកីឡាករបរទេសលេចធ្លោ ឬកីឡាករជម្រើសជាតិកម្ពុជាកម្រិត A ដែរ៕

អត្ថបទ៖ វិរបុត្រ

The post មកស្គាល់កីឡាករឆ្នើមៗ ក្នុងពានរង្វាន់សម្តេចក្រឡាហោម ស ខេង លើកទី៤ appeared first on Kampuchea Thmey Daily.

ក្រុមបាល់ទះខេត្តស្វាយរៀង ដាក់បរទេស ២ នាក់ ចាប់ដៃ ចាន់ណារ៉ូ ការពារជើងឯកសម្តេច ស ខេង

chean virakbot — Tue, 03 Feb 2026 06:56:37 +0000

ក្រុមបាល់ទះស្នងការដ្ឋានខេត្តស្វាយរៀងបានកំពុងពង្រឹងសមត្ថភាពដើម្បីត្រៀមខ្លួនការពារជើងឯកសម្តេចក្រឡាហោម ស ខេង លើកទី៤ ចាប់ពីថ្ងៃទី៧ ខែកុម្ភៈ ដល់ទី១ ខែមីនា ឆ្នាំ ២០២៦។

ក្រុមស្នងការដ្ឋានខេត្តស្វាយរៀងជាជើងឯកឆ្នាំ ២០២៤

ក្រុមស្នងការដ្ឋានខេត្តស្វាយរៀង នឹងក្លាយជាក្រុមគួរឲ្យចាប់អារម្មណ៍មួយនៅក្នុងឆ្នាំនេះ បន្ទាប់ពីបាននាំចូលកីឡាករបរទេស ២ នាក់ជាអ្នកវាយផ្តាច់ស្លាបឆ្វេង និងស្តាំ ដើម្បីចាប់ដៃជាមួយអ្នកប៉ះសេឆ្នើម សួន ចាន់ណារ៉ូ។

កីឡាករឥណ្ឌា Sherigar Praful អាយុ ២៧ ឆ្នាំ កម្ពស់ ១.៩៧ម៉ែត្រ ជាអ្នកវាយផ្តាច់ស្លាបស្តាំ។ កីឡាករអាចលោតវាយបានកម្ពស់ ៣.៤៧ម៉ែត្រ និងលោតការពារបានកម្ពស់ ៣.២១ម៉ែត្រ។ កីឡាករឥណ្ឌារូបនេះធ្លាប់លេងក្រុមស្នងការដ្ឋានខេត្តស្វាយរៀង ម្តងហើយក្នុងពាន«តេជោលីគ» ឆ្នាំ ២០២៥ ដែលរូបគេបានឈ្នះពានឯកត្តជនគឺ កីឡាករការពារកណ្តាលល្អបំផុត។

កីឡាករឥណ្ឌា Sherigar Praful

កីឡាករបរទេសម្នាក់ទៀតគឺកីឡាករវៀតណាម Nguyễn Văn Quốc Duy អាយុ ២៤ ឆ្នាំ កម្ពស់ ១.៨៥ម៉ែត្រ លេងក្នុងតួនាទីជាអ្នកវាយផ្តាច់ស្លាបឆ្វេង។ កីឡាករលោតវាយបានកម្ពស់ ៣.៣៥ម៉ែត្រ និងលោតបាំងការពារបានកម្ពស់ ៣.៣០ម៉ែត្រ។ កីឡាករបាល់ទះជម្រើសជាតិវៀតណាមរូបនេះមានបទពិសោធច្រើនទាំងនៅក្រុមជម្រើសជាតិ និងក្លិប។

គិតចាប់ពីឆ្នាំ ២០២០ ដល់ ២០២៥ កីឡាករធ្លាប់បានលេងឲ្យក្រុមជាច្រើនដូចជា ក្រុម The Cong, Trang An Ninh Binh, Tra Vinh U23, The Cong Tan Cang, Sport Center 3, Cong An TP Ho Chi Minh និង ក្រុម XSKT Vinh Long។ កីឡាកររូបនេះធ្លាប់បានឈ្នះពានឯកត្តជនចំនួន ៣ គឺ កីឡាកររកបានពិន្ទុច្រើនជាង ១ លើកនៅឆ្នាំ ២០២៤ និងកីឡាករវាយផ្តាច់ស្លាបឆ្វេងល្អបំផុត ២ លើកគឺ ឆ្នាំ ២០២១ និង ២០២២ នៅលីគបាល់ទះវៀតណាម។

កីឡាករវៀតណាម Nguyễn Văn Quốc Duy

កីឡាករជម្រើសជាតិវៀតណាមរូបនេះនឹងដើរតួនាទីសំខាន់សម្រាប់ការផ្តាច់ស្វែងរកពិន្ទុនៅស្លាបឆ្វេង ខណៈនៅស្លាបស្តាំមានកីឡាករឥណ្ឌា Sherigar Praful ដែលមានអ្នកលើកបាល់ឲ្យពួកគេដ៏ឆ្នើមគឺកីឡាករ សួន ចាន់ណារ៉ូ។

កីឡាករ សួន ចាន់ណារ៉ូ

បន្ថែមលើកម្លាំងសំខាន់ទាំង ៣ ខាងលើនេះ ក្រុមស្នងការដ្ឋានខេត្តស្វាយរៀង មាន ខឹម សុវណ្ណដារ៉ា ដែលជាលីប៊ើរ៉ូច្រើន ព្រមទាំងកីឡាករវាយផ្តាច់ មី រស្មី និង ឌិន ស៊ីដែន។

សូមបញ្ជាក់ថា ក្រុមស្នងការដ្ឋានខេត្តស្វាយរៀង ស្ថិតនៅពូល F ជាមួយក្រុម ស្នងការដ្ឋានខេត្តកំពត ក្រុមស្នងការដ្ឋានខេត្តមណ្ឌលគិរី និងក្រុមបាល់ទះខេត្តស្ទឹងត្រែង ក្នុងពានរង្វាន់សម្តេចក្រឡាហោម ស ខេង លើកទី៤ ឆ្នាំ ២០២៦៕

កីឡាករ ខឹម សុវណ្ណដារ៉ា

អត្ថបទ៖ វិរបុត្រ

The post ក្រុមបាល់ទះខេត្តស្វាយរៀង ដាក់បរទេស ២ នាក់ ចាប់ដៃ ចាន់ណារ៉ូ ការពារជើងឯកសម្តេច ស ខេង appeared first on Kampuchea Thmey Daily.

ការប្រកួតបាល់ទះពានសម្តេច ស ខេង លើកទី៤ មានវិញ្ញាសានារីដើម្បីអនាគតជម្រើសជាតិ

chean virakbot — Thu, 15 Jan 2026 01:17:11 +0000

ព្រឹត្តិការណ៍ប្រកួតកីឡាបាល់ទះថ្នាក់ជាតិ ពានរង្វាន់សម្តេចក្រឡាហោម ស ខេង លើកទី៤ នឹងចាប់ផ្តើមពីថ្ងៃទី៧ ខែកុម្ភៈ ដល់ ថ្ងៃទី១ ខែមីនា ឆ្នាំ ២០២៦ នៅវិមានពហុកីឡដ្ឋានជាតិអូឡាំពិក។

អ្នកឧកញ៉ា លាង ម៉េង និងលោក អាំង សិរីពិសិដ្ឋ

ការប្រកួតលើកទី៤នេះកាន់តែពិសេសជាងលើកមុនៗដោយមានវិញ្ញាសានារីថែមទៀត។ នេះជាលើកដំបូងដែលមានការប្រកួតជើងឯកថ្នាក់ជាតិផ្លូវការសម្រាប់នារី។ ក្នុងពិធីចាប់ឆ្នោតកាលពីរសៀល ថ្ងៃទី១៤ ខែមករា ឆ្នាំ ២០២៦ នៅផ្សារជីប ម៉ុង បានបង្ហាញថា វិញ្ញាសាបុរសមានចំនួន ៣២ ក្រុមចូលរួមប្រកួត និងវិញ្ញាសានារីមានចំនួន ៨ ក្រុមចូលរួមប្រកួត។

អ្នកឧកញ៉ា លាង ម៉េង សហស្ថាបនិក និងប្រធានក្រុមអគ្គនាយក ជីប ម៉ុង បានលើកឡើងថា តាមប្រភេទកីឡានីមួយៗមានច្រើនវិញ្ញាសា ក្នុងនោះកីឡាបាល់ទះក៏មានវិញ្ញាសាច្រើនដែរ ដូច្នេះការពង្រឹង និងអភិវឌ្ឍកីឡាត្រូវតែមានច្រើនវិញ្ញាសាដែរទើបអាចមានធនធានកីឡាករ កីឡាការិនីច្រើនសម្រាប់ការប្រកួតលើឆាកអន្តរជាតិ។ កន្លងមក ក្រុមហ៊ុនបានឧបត្ថម្ភតែផ្នែកបុរសសម្រាប់ការប្រកួតកកីឡាបាល់ទះនេះ ប៉ុន្តែឆ្នាំនេះឧបត្ថម្ភឲ្យមានការប្រកួតផ្នែកនារីទៀត។

អ្នកឧកញ៉ាបានសង្កត់ធ្ងន់ថា ៖«ប្រសិនបើមិនរៀបចំឲ្យមានការប្រកួតវិញ្ញាសានារីនៅពេលនេះ តើចាំពេលណា? ហើយតើពេលណាទើបមានក្រុមបាល់ទះនារី ឬក្រុមជម្រើសជាតិនារីមានសមត្ថភាពខ្ពស់អាចប្រកួតលើឆាកអន្តរជាតិ? ដូច្នេះយើងរៀបចំចាប់ពីពេលនេះទៅ ៤ទៅ៥ ឆ្នាំ ឬ ១០ឆ្នាំខាងមុខ យើងនឹងមានក្រុមបាល់ទះនារីល្អៗ។ នេះហើយជាចក្ខុវិស័យរបស់ក្រុមហ៊ុនដើម្បីអភិវឌ្ឍកីឡាកម្ពុជាយូរអង្វែង»។

ជាមួយគ្នានេះ លោក អាំង សិរីពិសិដ្ឋ អនុប្រធាន និងជាអគ្គលេខាធិការនៃសហព័ន្ធកីឡាបាល់ទះកម្ពុជា បានថ្លែងក្នុងពិធីចាប់ឆ្នោតថា ការប្រកួតពានរង្វាន់សម្តេចក្រឡាហោម ស ខេង លើកទី៤នេះមានប្រាក់រង្វាន់សរុបចំនួន ១២៧លានរៀល។

ពូលក្រុមបុរស

លោកបានលើកឡើងថា កាលពីមុនៗ ក្រុមចំណាត់ថ្នាក់លេខ ៤ មិនមានប្រាក់រង្វាន់ទេ។ ពួកគេខិតខំណាស់ឈានដល់វគ្គ ៤ ក្រុមចុងក្រោយ។ ពេលប្រកួតដណ្តើមចំណាត់ថ្នាក់លេខ៣មិនបានជោគជ័យ ហើយទទួលបានលេខ៤ដោយគ្មានប្រាក់រង្វាន់។ សហព័ន្ធបានយកប្រាក់ផ្ទាល់ខ្លួនជូនដល់ក្រុមចំណាត់ថ្នាក់លេខ៤ដើម្បីជាការលើកទឹកចិត្ត ប៉ុន្តែលើកនេះ ក្រុមហ៊ុនបានសម្រេចផ្តល់ប្រាក់រង្វាន់ដល់ក្រុមចំណាត់ថ្នាក់លេខ៤ចំនួន ៨លានរៀល។

លោកអគ្គលេខាធិការរូបនេះបានបន្តថា ចំពោះវិញ្ញាសានារីវិញដោយសារទើបតែចាប់ផ្តើមលើកដំបូង សមត្ថភាពក្រុម និងកម្រិតគុណភាពនៃការប្រកួតមិនទាន់ខ្ពស់ទេ ដូច្នេះប្រាក់រង្វាន់ក៏មិនទាន់ខ្ពស់ដែរ។ ទោះបីជាយ៉ាងណា នៅពេលខាងមុខ ប្រសិនបើកម្រិតគុណភាពផ្នែកនារីល្អគឺច្បាស់ណាស់នឹងបង្កើនប្រាក់រង្វាន់ជាបន្តបន្ទាប់។

ពូលក្រុមនារី

ប្រាក់រង្វាន់ផ្នែកបុរស

លេខ១៖ ពាន មេដាយមាស និងថវិកា ៥០ លានរៀល
លេខ២៖ មេដាយប្រាក់ និងថវិកា ២០ លានរៀល
លេខ៣៖ មេដាយសំរិទ្ធ និងថវិកា ១២ លានរៀល
លេខ៤៖ ថវិកា ៨ លានរៀល
ពានឯកត្តជន ចំនួន ៨ ពាន ដែលម្នាក់ៗទទួលបានថវិកា ១ លានរៀលដូចគ្នា

ប្រាក់រង្វាន់ផ្នែកនារី

លេខ១៖ ពាន មេដាយមាស និងថវិកា ១៥ លានរៀល
លេខ២៖ មេដាយប្រាក់ និងថវិកា ៨ លានរៀល
លេខ៣៖ មេដាយសំរិទ្ធ និងថវិកា ៨ លានរៀល
លេខ៤៖ ថវិកា ៤ លានរៀល

អត្ថបទ៖ វិរបុត្រ

The post ការប្រកួតបាល់ទះពានសម្តេច ស ខេង លើកទី៤ មានវិញ្ញាសានារីដើម្បីអនាគតជម្រើសជាតិ appeared first on Kampuchea Thmey Daily.

គួន ម៉ុម នឹងលេងឲ្យក្រុមខេត្តតាកែវក្នុងពានរង្វាន់សម្តេចក្រឡាហោម ស ខេង

chean virakbot — Fri, 20 Sep 2024 01:15:48 +0000

តារាបាល់ទះជម្រើសជាតិកម្ពុជាដ៏ឆ្នើម គួន ម៉ុម មិនបានលេងឲ្យក្លិបបាល់ទះវិសាខាទេក្នុងពានរង្វាន់សម្តេចក្រឡាហោម ស ខេង លើកទី៣ ឆ្នាំ២០២៤ ដែលគ្រោងនឹងធ្វើនៅខែវិច្ឆិកាខាងមុខ។

ក្នុងបទសម្ភាសក្រោយពេលចប់ព្រឹត្តិការណ៍បាល់ទះអាស៊ានលំដាប់ទី២ SEA V. League Challenge កាលពីពេលកន្លងទៅ គួន ម៉ុម ដែលបានជួយក្រុមបាល់ទះជម្រើសជាតិកម្ពុជាឡើងទៅកម្រិត១ប្រចាំតំបន់អាស៊ានបានទម្លាយឲ្យដឹងថា រូបគេនឹងលេងឲ្យក្រុមខេត្តតាកែវក្នុងពានរង្វាន់សម្តេចក្រឡាហោម ស ខេង ឆ្នាំ២០២៤។ ជាមួយគ្នានេះ រូបគេក៏នឹងចេញទៅលេងឲ្យក្លិប Long An នៅក្នុងលីគបាល់ទះកំពូលវៀតណាមជុំទី២ បន្ទាប់ពីរូបគេមានកុងត្រារួចរាល់តាំងពីជុំទី១។

ក្លិបបាល់ទះវិសាខាទំនងជាលំបាកក្នុងការចូលរួមប្រកួតពានរង្វាន់សម្តេចក្រឡាហោម ស ខេង ឆ្នាំនេះ បន្ទាប់ពីលក្ខខណ្ឌត្រូវបានកំណត់ឲ្យក្រុម B ចូលរួមប្រកួត ហើយក្នុងក្រុមកម្រិត B ទាំងខេត្ត និងក្លិបអាជីពនៅរាជធានីភ្នំពេញអាចដាក់កីឡាករកម្រិត A ចូលរួមបាន២រូប និងកីឡាករបរទេស១រូប។

លោក អាំង សិរីពិសិដ្ឋ អគ្គលេខាធិការ និងជាអនុប្រធានសហព័ន្ធកីឡាបាល់ទះកម្ពុជាបានឲ្យថា តាមបណ្តាក្លិបដែលត្រូវបានរាយនាមកីឡាករទាំង២៧ដែលបានចែកជូននោះគឺចាត់ទុកជាកីឡាករមានគុណផលខ្ពស់កម្រិត A ដូច្នេះក្រុមអាចប្រើប្រាស់កីឡាករកម្រិតA បានតែ២នាក់ប៉ុណ្ណោះ។ ជាក់ស្តែងកាលពីឆ្នាំមុន ក្រុមវិសាខា A ដែលចាត់ទុកជាជម្រើសជាតិអត់បានលេង តែឆ្នា២០២៤នេះ ពួកគាត់អាចលេងបាន ប៉ុន្តែមិនមែនក្នុងនាមក្រុមវិសាខា។ លក្ខខណ្ឌបានបើកទីផ្សារដោះដូរឲ្យខ្ចីជើង។ អីចឹងបណ្តាក្រុម២៥រាជធានី-ខេត្តអាចខ្ចីជើងកីឡាករលំដាប់ A ពីវិសាខា ពីក្លិបលំដាប់ A ផ្សេងទៀត។ ការបំបែកកីឡាករដែលមានគុណផលខ្ពស់ឲ្យទៅតាមតាមបណ្តាក្រុមរាជធានី-ខេត្ត ធ្វើឲ្យការប្រកួតប្រជែងផុសផុលខ្លាំង។

លោក សិរីពិសិដ្ឋ បានលើកឡើងថា ៖«ទីពីរយើងបើកលទ្ធភាពឲ្យក្រុមទាំងអស់អាចនាំចូលកីឡាករបរទេស១នាក់។ ក្រុមដែលមានធនធានអាចនាំចូលកីឡាករបរទេសចូលរួមប្រកួតពានសម្តេចក្រឡាហោម ស ខេង បាន១នាក់។ ខ្ញុំចង់ឃើញពានរង្វាន់នេះបានទៅក្រុមថ្នាក់ខេត្តច្រើនជាង។ ដោយឡែកក្រុមយុវជនជម្រើសជាតិកម្ពុជាអាយុ២០ឆ្នាំដាក់ឲ្យលេងពានសម្តេចក្រឡាហោម ហើយពួកគេមានកៅអីដោយស្វ័យប្រវត្តិទៀតលេងតេជោលីគ»។ លោក អាំង សិរីពិសិដ្ឋ បានរៀបរាប់។

កាលពីឆ្នាំ២០២៣ ពានរង្វាន់សម្ដេចក្រឡាហោម ស ខេង លើកទី២ បានរៀបចំប្រកួតពីថ្ងៃទី១០-១៩ ខែវិច្ឆិកា ដោយក្រុមចំនួន២៩ចូលរួមប្រកួតប្រជែង។ ក្រុមបាល់ទះក្រសួងមហាផ្ទៃ B បានក្លាយជាជើងឯកជាមួយប្រាក់រង្វាន់៥០លានរៀល ខណៈលេខ២បានទៅក្រុមរដ្ឋបាលរាជធានីភ្នំពេញទទួលបានប្រាក់រង្វាន់២០លានរៀល និងក្រុមបញ្ជាការដ្ឋានកងអង្គរក្សទទួលបានលេខ៣ប្រាក់រង្វាន់១២លានរៀល៕

អត្ថបទ៖ វីរបុត្រ

The post គួន ម៉ុម នឹងលេងឲ្យក្រុមខេត្តតាកែវក្នុងពានរង្វាន់សម្តេចក្រឡាហោម ស ខេង appeared first on Kampuchea Thmey Daily.

ពាន​រង្វាន់​សម្តេចក្រឡាហោម ស ខេង Archives - Kampuchea Thmey Daily

គ្រូ​បង្វឹក​ក្រសួង​មហាផ្ទៃ​៖ លេង​បាល់ទះ​បើ​ខ្លាច​ដៃគូ​ហើយ​សមត្ថភាព​ ១០០%​ ធ្លាក់​មក​ត្រឹម​ ៥០-៦០​

ពានសម្តេចក្រឡាហោម ស ខេង រកឃើញក្រុមខ្លាំងប៉ះគ្នាវគ្គ ៨ ក្រុមចុងក្រោយ

មក​ស្គាល់​​កីឡាករ​ឆ្នើម​ៗ ក្នុង​ពាន​រង្វាន់​សម្តេច​ក្រឡាហោម ស ខេង លើក​ទី​៤

ក្រុម​បាល់ទះ​ខេត្ត​ស្វាយរៀង ដាក់បរទេស ២ នាក់ ចាប់ដៃ ចាន់ណារ៉ូ ការពារ​ជើង​ឯក​​សម្តេច ស ខេង

ការ​ប្រកួតបាល់ទះពាន​សម្តេច​ ស ខេង លើក​ទី​៤ មាន​​វិញ្ញាសា​នារី​ដើម្បី​អនាគត​ជម្រើស​ជាតិ

គួន ម៉ុម​ នឹង​លេងឲ្យក្រុម​ខេត្តតាកែវ​ក្នុង​ពាន​រង្វាន់​សម្តេចក្រឡាហោម ស ខេង

ពានរង្វាន់សម្តេចក្រឡាហោម ស ខេង Archives - Kampuchea Thmey Daily

គ្រូបង្វឹកក្រសួងមហាផ្ទៃ៖ លេងបាល់ទះបើខ្លាចដៃគូហើយសមត្ថភាព ១០០% ធ្លាក់មកត្រឹម ៥០-៦០

មកស្គាល់កីឡាករឆ្នើមៗ ក្នុងពានរង្វាន់សម្តេចក្រឡាហោម ស ខេង លើកទី៤

ក្រុមបាល់ទះខេត្តស្វាយរៀង ដាក់បរទេស ២ នាក់ ចាប់ដៃ ចាន់ណារ៉ូ ការពារជើងឯកសម្តេច ស ខេង

ការប្រកួតបាល់ទះពានសម្តេច ស ខេង លើកទី៤ មានវិញ្ញាសានារីដើម្បីអនាគតជម្រើសជាតិ

គួន ម៉ុម នឹងលេងឲ្យក្រុមខេត្តតាកែវក្នុងពានរង្វាន់សម្តេចក្រឡាហោម ស ខេង