បើតាមសម្តេចធិបតី អាជ្ញាធររាជធានីភ្នំពេញ​បានប្រើប្រាស់រថយន្តក្រុងចំនួន៩៤៥គ្រឿង ដែលលើសផែនការដើមរៀបចំត្រឹម៦០០គ្រឿង សម្រាប់ការដឹកជញ្ជូនប្រជាពលរដ្ឋធ្វើដំណើរទៅតាមបណ្តាខេត្ត អំឡុងពេលចូលឆ្នាំថ្មីប្រពៃណីជាតិខ្មែរ ​រយៈពេល​៦ថ្ងៃ​ ពីថ្ងៃទី​១២ ដល់ថ្ងៃទី១៧​ ខែមេសា​។ ការធ្វើបែបនេះគឺដើម្បីជួយសម្រួលដល់ការចំណាយរបស់ពលរដ្ឋ។

សម្ដេចធិបតី ហ៊ុន ម៉ាណែត បានឱ្យដឹងតាមរយៈសំណេរលើបណ្ដាញសង្គម នៅថ្ងៃទី២២ ខែមេសា ឆ្នាំ២០២៦នេះ ថា ក្នុងរយៈពេល៦ថ្ងៃមកនេះ មាន​ប្រជាពលរដ្ឋ​ចំនួន​១១៩ ៤៩០នាក់​ បាន​ជឿទុកចិត្ត និងមកទទួល​សេវា​ដឹក​ជញ្ជូន​ ដោយ​ឥតគិតថ្លៃ​ របស់​រដ្ឋាករ​ស្វយ័ត​ដឹក​ជញ្ជូន​សាធារណៈ​រថយន្តក្រុង​ នៃ​រដ្ឋបាល​រាជធានីភ្នំពេញ​​។ តួលេខនេះត្រូវបានសម្ដេចធិបតីនាយករដ្ឋមន្ត្រី បង្ហាញថា បានកើនឡើង​ចំនួន​៣៣ ៦៤១នាក់​ ស្មើនឹង៣៩%។

តាមការបញ្ជាក់របស់សម្ដេចធិបតី មធ្យោបាយដឹកជញ្ជូនឥតគិតថ្លៃនេះ បានជួយសម្រួលបន្ទុកចំណាយសរុបរបស់ប្រជាពលរដ្ឋប្រមាណ១២ពាន់លានរៀល ឬស្មើនឹងប្រមាណ៣លានដុល្លារ ដែលចំនួនទឹកប្រាក់នេះ បានចែករំលែកចូលទៅកាន់សេដ្ឋកិច្ចមូលដ្ឋាន តាមរយៈការចំណាយនានានៅស្រុកកំណើត ជំនួសឱ្យការធ្វើដំណើរតែមួយមុខ។ ខណៈគិតជាមធ្យម ក្នុងពលរដ្ឋម្នាក់ ត្រូវចំណាយថវិកាប្រមាណ១០ម៉ឺន ឬ២៥$ សម្រាប់ការធ្វើដំណើរទៅមក។

សេវាដឹកជញ្ជូនឥតគិតថ្លៃ មិនត្រឹមបានជួយសម្រាលបន្ទុកចំណាយប៉ុណ្ណោះទេ ប៉ុន្តែសម្ដេចប្រមុខរាជរដ្ឋាភិបាល ថា ក៏ជាកាតាលីករជំរុញចរន្តសេដ្ឋកិច្ចមូលដ្ឋានផងដែរ ដោយសំដៅលើកកម្ពស់កំណើនចំណូលរបស់ប្រជាពលរដ្ឋមូលដ្ឋានទាំងមូល៕

The post ចូលឆ្នាំខ្មែរ៖ សេវាដឹកជញ្ជូនឥតគិតថ្លៃជួយសម្រាលបន្ទុកចំណាយពលរដ្ឋជិត១២ម៉ឺននាក់ ដែលស្មើថវិកាខ្ទង់៣លានដុល្លារ appeared first on Kampuchea Thmey Daily.

យោងតាមរបាយការណ៍របស់មន្ទីរទេសចរណ៍ខេត្តសៀមរាប បានបង្ហាញថា រយៈពេល ៣ ថ្ងៃ នៃពិធីបុណ្យចូលឆ្នាំថ្មី ប្រពៃណីជាតិខ្មែរ ចាប់ពីថ្ងៃទី ១៤-១៦ ខែមេសា ឆ្នាំ ២០២៦ ចំនួនភ្ញៀវទេសចរជាតិ-អន្តរជាតិ និងប្រជាពលរដ្ឋដើរលេងកម្សាន្តក្នុងខេត្តសៀមរាបមានប្រមាណ ១ លាន ៨៤២ ពាន់ ៤៣០ នាក់។ ក្នុងនោះ ទេសចរជាតិ និងប្រជាពលរដ្ឋ មានចំនួនជាង ១ លាន ៨៣ ម៉ឺននាក់ និង ភ្ញៀវទេសចរបរទេស ៥ ពាន់ ៤៣៨ នាក់។

ព្រឹត្តិការណ៍សៀមរាបសង្ក្រាន្ត ឆ្នាំ ២០២៦ នេះ ប្រារព្ធធ្វើឡើងរយៈពេល ៤ ថ្ងៃ ពីថ្ងៃទី ១៣ ដល់ថ្ងៃទី ១៦ ខែមេសា ឆ្នាំ ២០២៦ ដើម្បីអបអរសាទរ បុណ្យចូលឆ្នាំថ្មី ប្រពៃណីជាតិខ្មែរ។ ក្នុងព្រឹត្តិការណ៍នេះ មានការរៀបចំកម្មវិធីជាច្រើន រួមមាន ៖ ពិធីសាសនា កម្មវិធីតាំងបង្ហាញវត្ថុសិល្បៈនានា និងកម្មវិធីកម្សាន្តជាច្រើនផងដែរ ជាពិសេស ការប្រណាំងទូកផ្កាចារ ទូកនាគ និងទូក-ង លក្ខណៈមិត្តភាព នៅដងស្ទឹងសៀមរាប បានក្លាយជាផ្ទាំងទស្សនីយភាពមួយដែលមានភាពទាក់ទាញ ភ្ញៀវទេសចរជាតិ និងអន្តរជាតិ អញ្ជើញមកទស្សនាកម្សាន្តបានច្រើនកុះករ។ ក្រៅពីការកម្សាន្តនៅសៀមរាបសង្ក្រាន្ត ក្នុងក្រុងសៀមរាប ប្រជាពលរដ្ឋ ភ្ញៀវទេសចរជាតិ អន្តរជាតិ បានអញ្ជើញទៅទស្សនាកម្សាន្តនៅតាម រមណីយដ្ឋានវប្បធម៌ ប្រាង្គប្រាសាទនានា រមណីយដ្ឋានធម្មជាតិ ភ្នំគូលែន និង រមណីយដ្ឋានកែច្នៃ ដែលមាននៅក្នុងភូមិសាស្ត្រខេត្តសៀមរាបទៀតផង៕
អត្ថបទ ៖ គឿនវេត

The post ៣ ថ្ងៃ នៃពិធីបុណ្យចូលឆ្នាំប្រពៃណីជាតិខ្មែរ ខេត្តសៀមរាប ទទួលបានភ្ញៀវទេសចរជាង ១ លាន ៨ សែននាក់ appeared first on Kampuchea Thmey Daily.

តាមការឱ្យថ្លែងដោយអ្នកនាំពាក្យរងក្រសួងមហាផ្ទៃ លោក ទូច សុខៈ នៅទូទាំងប្រទេសកម្ពុជា មានគ្រោះថ្នាក់ចរាចរណ៍កើតឡើង២៧ករណី ក្នុងរយៈពេលចូលឆ្នាំខ្មែរ៣ថ្ងៃមកនេះ។

លោក ទូច សុខៈ បានឱ្យដឹងបន្ថែមទៀតថា បើធៀបនឹងឆ្នាំមុន ករណីគ្រោះថ្នាក់ចរាចរណ៍បានថយចុះ៣ករណី ដោយអ្នកស្លាប់ថយចុះ៩នាក់ និងអ្នករបួសថយចុះ២នាក់។ មូលហេតុនាំឱ្យកើតមានគ្រោះថ្នាក់ចរាចរណ៍នេះ លោកបញ្ជាក់ថា ដោយសារអ្នកបើកបរលើសល្បឿនកំណត់ មិនគោរពសិទ្ធិអាទិភាព មិនប្រកាន់ស្ដាំ បត់មិនប្រយ័ត្ន ស្រវឹង និងកត្តាយានយន្ត។

គួររម្លឹកថា ក្នុងរយៈពេល៣ថ្ងៃ នៃពិធីបុណ្យចូលឆ្នាំថ្មីប្រពៃណីជាតិខ្មែរ កាលពីឆ្នាំ២០២៥ មានគ្រោះថ្នាក់ចរាចរណ៍នៅទូទាំងប្រទេស បានកើតឡើង៣០ករណី បណ្ដាលឱ្យមនុស្សស្លាប់ចំនួន២៦នាក់ និងរបួសធ្ងន់ស្រាលចំនួន៤៧នាក់។

អ្នកនាំពាក្យ បានអំពាវនាវយ៉ាងទទូចដល់អ្នកដំណើរទាំងអស់ ជាពិសេសពេលវិលត្រឡប់មករាជធានី និងទៅកាន់ទីតាំងរស់នៅ ឬបំពេញការងារផ្សេងៗត្រូវបើកបរគោរពច្បាប់ និងរក្សាស្មារតីប្រុងប្រយ័ត្នជានិច្ច៕

The post ចូលឆ្នាំខ្មែរ៣ថ្ងៃ មានមនុស្ស១៧នាក់បានបាត់បង់ជីវិត ក្នុងគ្រោះថ្នាក់ចរាចរណ៍ appeared first on Kampuchea Thmey Daily.

ក្នុងចំនួនភ្ញៀវទេសចរសរុបខាងលើ មានភ្ញៀវអន្តរជាតិចំនួន៧៧០នាក់ កើនឡើង១៣.១%។ ដោយឡែក បើតាមរបាយការណ៍ដដែលនេះ គឺមានប្រជាពលរដ្ឋក្នុងខេត្តបានដើរលេងកម្សាន្តថ្ងៃចូលឆ្នាំថ្មីប្រពៃណីជាតិខ្មែរ ចំនួន១០៣ ៧៦១នាក់ កើនឡើង៦.៦%។ សរុបជារួម ទាំងភ្ញៀវទេសចរជាតិ-អន្តរជាតិ និងប្រជាពលរដ្ឋ មានចំនួន១៥២ ១៨៦នាក់ ដោយកើនឡើង៤.៧៤%។

លោក ង៉ែត ពិទូ ប្រធានមន្ទីរទេសចរណ៍ខេត្តរតនគិរី បានថ្លែងឱ្យដឹងថា រយ:ពេល៣ថ្ងៃ ចាប់ពីថ្ងៃទី១៤ ដល់ថ្ងៃទី១៦ ខែមេសា ២០២៦ នៃពិធីបុណ្យចូលឆ្នាំថ្មីប្រពៃណីជាតិខ្មែរ សេវាកម្មស្នាក់នៅ និងសេវាកម្មម្ហូបអាហារ ពុំមានការតំឡើងថ្លៃឡើយ។ សម្រាប់សោភ័ណ្ឌភាពទីប្រជុំជន និងទីក្រុង និងអនាម័យតាមតំបន់រមណីយដ្ឋាន ក៏រក្សាបានល្អប្រសើរ ពិសេសនៅតំបន់ជុំវិញបឹងកន្សែង ដែលមានទេសចរណ៍សំខាន់ៗ រួមមាន សួនច្បារ សួនកម្សាន្ត ទូរទស្សន៍ LED ខ្សែរ៉ត និងរូបសំណាក់គ្រួសារ សត្វអក និងសត្វដំរី។

តាមលោកប្រធានមន្ទីរ រដ្ឋបាលខេត្តបានរៀបចំឱ្យមានព្រឹត្តិការណ៍សង្ក្រាន្តរតនគិរី និងការប្រគុំតន្ត្រី ពិសេសបានរៀបចំភ្លើងបំភ្លឺទីសាធារណៈ តាមបណ្តាអង្គភាពរបស់រដ្ឋ និងវិស័យឯកជន ដើម្បីលើកស្ទួយសោភ័ណភាពទីក្រុងក្នុងការផ្តល់សេវាកម្មជូនប្រជាពលរដ្ឋក្នុងខេត្ត ក៏ដូចជាភ្ញៀវទេសចរជាតិ និងអន្តរជាតិ ដែលបានមកទស្សនានៅខេត្តរតនគិរី។ ចំពោះសុវត្ថិភាពតាមតំបន់រមណីយដ្ឋានមានការគ្រប់គ្រងបរិស្ថាន សណ្តាប់ធ្នាប់បានល្អប្រសើរ ដោយមានរៀបចំណតរថយន្ត និងម៉ូតូ មានរបៀបរៀបរយល្អ។

លោក ង៉ែត ពិទូ បញ្ជាក់បន្ថែមថា រយ:ពេល៣ថ្ងៃនេះ ប្រជាពលរដ្ឋក្នុងខេត្តរតនគិរី មានភាពសប្បាយរីករាយ និងសាទរចំពោះរដ្ឋបាលខេត្តរតនគិរី ដែលបានរៀបចំព្រឹត្តិការណ៍សង្ក្រាន្តរតនគិរី ហើយពលរដ្ឋភាគច្រើន ក៏មានការជប់លៀងនៅតាមគេហដ្ឋានជាលក្ខណៈគ្រួសារ ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ៕

The post ខេត្តរតនគិរីទទួលបានភ្ញៀវទេសចរខ្ទង់ជិត៥ម៉ឺននាក់ ក្នុងពេលពិធីចូលឆ្នាំខ្មែរ៣ថ្ងៃ appeared first on Kampuchea Thmey Daily.

នៅព្រឹកថ្ងៃទី១៧ ខែមេសា ឆ្នាំ២០២៦ លោក សុខ លូ អភិបាល នៃគណៈអភិបាលខេត្តបាត់ដំបង បានអញ្ជើញជួបសំណេះសំណាលសួរសុខទុក្ខ និងជូនដំណើរប្រជាពលរដ្ឋវិលត្រឡប់ទៅរាជធានីភ្នំពេញវិញរថយន្តក្រុងដែលរាជរដ្ឋាភិបាលផ្ដល់ឱ្យជិះដោយមិនបង់ប្រាក់ ដើម្បីបន្តប្រកបរបរបន្ទាប់ពីធ្វើដំណើរមកស្រុកកំណើតក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំមមី អដ្ឋស័ក ពុទ្ធសករាជ ២៥៧០ គ.ស២០២៦ ដែលទីតាំងចំណតនៅផ្សារទំនើប ភួ ពុយ ក្រុងបាត់ដំបង។

ប្រជាពលរដ្ឋដែលបានធ្វើដំណើរទៅមកលើផ្លូវជាតិលេខ៥ពីភ្នំពេញ-បាត់ដំបង និងបាត់ដំបង-ភ្នំពេញបានបង្ហាញអារម្មណ៍សប្បាយរីករាយក្រៃលែង និងថ្លែងអំណរគុណយ៉ាងជ្រាលជ្រៅជូនចំពោះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលបានផ្ដល់រថយន្តក្រុងឱ្យធ្វើដំណើរទៅមកដោយមិនបង់ប្រាក់ក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ ។

គួរបញ្ជាក់ផងដែរថា ក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរឆ្នាំ២០២៦នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានផ្ដល់រថយន្តក្រុងសម្រាប់ខេត្តបាត់ដំបងមានរថយន្តចំនួន ៧៥គ្រឿងសម្រាប់ដឹកជញ្ជូនបងប្អូនកម្មករ និយោជិត និងប្រជាពលរដ្ឋទៅមកភ្នំពេញ-បាត់ដំបង និងពីបាត់ដំបង-ភ្នំពេញដែលមានរយៈពេល ៦ថ្ងៃ ចាប់ពីថ្ងៃទី១២ ខែមេសា ដល់ថ្ងៃទី១៧ ខែមេសា ឆ្នាំ២០២៦ ដោយធ្វើដំណើរដោយមិនបង់ប្រាក់ដើម្បីជួយសម្រួលដល់ការចំណាយជូនបងប្អូនកម្មករ កម្មការិនី និយោជិត សិស្ស និស្សិត និងប្រជាពលរដ្ឋក្នុងការធ្វើដំណើរទៅលេងស្រុកកំណើតជួបជុំបងប្អូនក្រុមគ្រួសារ៕

The post អាជ្ញាធរខេត្តបាត់ដំបង អញ្ជើញសំណេះសំណាលនិងជូនដំណើរប្រជាពលរដ្ឋវិលត្រឡប់ទៅរាជធានីភ្នំពេញ appeared first on Kampuchea Thmey Daily.

គួររម្លឹកថា កាលពីខែមីនា កន្លងទៅ នាយករដ្ឋមន្ត្រីកម្ពុជា សម្ដេច ហ៊ុន ម៉ាណែត បានប្រកាសថា មិនឱ្យយករថយន្តពន្លត់អគ្គិភ័យទៅបាញ់ទឹកលេង ក្នុងថ្ងៃចូលឆ្នាំខ្មែរឡើយ ទន្ទឹមនេះ សម្ដេចក៏ស្នើឱ្យយុវជនផ្អាកលេងបាញ់ទឹក និងប៉ាតម្សៅ ហើយងាកមកលេងល្បែងប្រជាប្រិយខ្មែរឱ្យបានផុសផុល។​

ក្នុងកិច្ចប្រជុំដដែល អភិបាលខេត្តតាកែវ ជំរុញឱ្យអាជ្ញាធរ និងអ្នករៀបចំកម្មវិធីតាមវត្តអារាម និងទីសាធារណៈ ត្រូវរៀបចំឱ្យមានការលេងល្បែងប្រជាប្រិយខ្មែរ ដែលក្នុងនោះរួមមានបោះអង្គញ់ ចោលឈូង ទាញព្រ័ត្រ លាក់កន្សែងជាដើម។ឯកឧត្តមបានលើកទឹកចិត្តឱ្យមានការរាំតាមចង្វាក់ប្រពៃណីដូចជា រាំវង់ រាំក្បាច់ សារ៉ាវ៉ាន់ និងឡាំលាវ ដែលជានិមិត្តរូបនៃភាពទន់ភ្លន់ និងសាមគ្គីភាពរបស់ខ្មែរ។

អភិបាលខេត្តតាកែវ លោក វ៉ី សំណាង ក៏បានអំពាវនាវដល់បងប្អូនប្រជាពលរដ្ឋទាំងអស់ ត្រូវចូលរួមសហការជាមួយសមត្ថកិច្ច និងអាជ្ញាធរ ដើម្បីធ្វើឱ្យព្រឹត្តិការណ៍ «តាកែវសង្ក្រាន្ត ឆ្នាំ២០២៦» ក្លាយជាការចងចាំដ៏ល្អ សប្បាយរីករាយ និងពោរពេញដោយមោទនភាពជាតិខ្មែរ។

ព្រឹត្តិការណ៍សង្ក្រាន្តខេត្តតាកែវឆ្នាំនេះ រដ្ឋបាលខេត្តតាកែវរំពឹងថានឹងទាក់ទាញភ្ញៀវទេសចរយ៉ាងច្រើនកុះករ មកទស្សនាកម្សាន្តនៅតាមតំបន់រមណីយដ្ឋាន និងទីតាំងសំខាន់ៗក្នុងខេត្ត ក្រោមការយកចិត្តទុកដាក់ខ្ពស់លើផ្នែកសន្តិសុខ និងអនាម័យបរិស្ថាន៕

The post ខេត្តតាកែវមិនអនុញ្ញាតឱ្យលេងប៉ាតម្សៅ បាញ់ទឹកតាមទីតាំងសង្ក្រាន្ត ដងផ្លូវឡើយ ដើម្បីបញ្ចៀសការប៉ះទង្គិចគ្នា និងគ្រោះថ្នាក់ចរាចរណ៍ appeared first on Kampuchea Thmey Daily.

ស្របពេលដែលពលរដ្ឋខ្មែរទូទាំងកម្ពុជាកំពុងត្រៀមខ្លួនអបអរពិធីបុណ្យចូលឆ្នាំថ្មីនៅព្រឹកថ្ងៃទី១៤ ខែមេសា ខាងមុខ, ក្រសួងមហាផ្ទៃកម្ពុជា បានចេញសេចក្ដីប្រកាសព័ត៌មាន ស្ដីពីស្ថានភាពពលរដ្ឋភៀសសឹក និងផលប៉ះពាល់លើតំបន់ស៊ីវិល គិតត្រឹមព្រឹកថ្ងៃទី១៣ ខែមេសា​​ ឱ្យដឹងថា៖«ក្នុងចំណោមពលរដ្ឋភៀសសឹកសរុបជាង៦សែន៤ម៉ឺននាក់ មានជាង៦សែន ១ម៉ឺននាក់ ឬ ជាង៩៤% បានវិលត្រឡប់ទៅលំនៅឋានវិញ។ នៅមានពលរដ្ឋចំនួន៣៤.៤៣៩នាក់ទៀត (ស្ត្រី ១៧.៨៦០នាក់ និងកុមារ១១.៤៤៩នាក់) ពុំទាន់អាចវិលទៅលំនៅឋានវិញ។ »។

ពលរដ្ឋភៀសសឹកដែលមិនអាចត្រឡប់ទៅផ្ទះសម្បែងវិញទាំងនេះ​ គឺជាពលរដ្ឋដែលរស់នៅក្នុងផ្ទះដ៏កក់ក្ដៅនៅក្នុងតំបន់ថ្មដា ខេត្តពោធិ៍សាត់, ភូមិព្រៃចាន់ និងភូមិជោគជ័យ នៅឃុំអូរបីជាន់​ ស្រុកអូរជ្រៅ  និងតំបន់បឹងត្រកួន ស្រុកថ្មពួក ខេត្តបន្ទាយមានជ័យ, ពលរដ្ឋរស់នៅតំបន់អូរស្មាច់ ក្នុងខេត្តឧត្ដរមានជ័យ និងពលរដ្ឋរស់នៅក្នុងតំបន់កៀកនឹងបន្ទាត់ព្រំដែនដែលរងការគំរាមកំហែងពីសំណាក់យោធាថៃឈ្លានពាន។

ពលរដ្ឋដែលមិនអាចត្រឡប់ទៅផ្ទះសម្បែងវិញបានទាំងនេះ បច្ចុប្បន្នស្នាក់នៅជម្រកបណ្ដោះអាសន្នដែលរាជរដ្ឋាភិបាលកម្ពុជាបានសាងសង់ជូនភ្ជាប់ជាមួយហេដ្ឋារចនាស​ម្ព័ន្ធខ្វាត់ខ្វែង មានបណ្ដាញទឹកស្អាត អគ្គិសនី ផ្លូវថ្នល់ សាលារៀន មន្ទីរពេទ្យ។ ជនភៀសសឹកដែលបានចូលទៅរស់នៅផ្ទះបណ្ដោះអាសន្នបានប្រាប់កម្ពុជាថ្មីថា ក្រោយបានផ្លាស់ចេញពីការរស់នៅក្នុងតង់នៅមណ្ឌលសុ​វត្ថិភាព មករស់នៅផ្ទះបណ្ដោះអាសន្ន ពួកគាត់ហាក់​​មានអារម្មណ៍ធូរស្រាលពីការលំបាកក្នុងការរស់នៅជាងមុន ព្រោះផ្ទះបណ្ដោះអាសន្នគឺងាយស្រួលសម្រាក ផ្ទះមានផាកសុខភាព មានខ្យល់ចេញចូល និងមានឯកជនភាពជាងមុន ព្រោះមានបន្ទប់ទឹកផ្ទាល់ខ្លួន ប៉ុន្តែយ៉ាងណាពួកគាត់នៅតែនឹកផ្ទះធ្្លាប់រស់នៅយ៉ាងសុខសាន្ត ឥឡូវត្រូវយោធាថៃព័ទ្ធយក។

គួរគូសបញ្ជាក់ថា កាលពីចុងខែមីនា កន្លងទៅ សហភាពសហព័ន្ធយុវជនកម្ពុជា ក៏បានរៀបចំកម្មវិធសង្ក្រាន្តតាមជំរុំភៀសសឹក ដើម្បីផ្ដល់ស្នាមញញឹម និងរំលែកទុក្ខលំបាកជូនជនភៀសសឹក និងជាការនាំយកកម្លាំងចិត្តបន្ថែមពីជួរក្រោយទៅប្រាប់ថា «អ្នកនៅជួរក្រោយ មិនភ្លេចអ្នកនៅជួរមុខឡើយ»។ សង្ក្រាន្តតាមជំរុំភៀសសឹក ធ្វើឡើងនៅខេត្តសៀមរាប បន្ទាយមានជ័យ ឧត្ដរមានជ័យ និងខេត្តព្រះវិហារ ដោយមានសកម្មភាពដូចជា ពិធីសូត្រមន្ត ការប្រគុំភ្លេងរាំចង្វាក់ប្រជាប្រិយ ការលេងល្បែងប្រជាប្រិយខ្មែរ ព្រមទាំងពិសារអាហារសាមគ្គីយ៉ាងកក់ក្តៅជាទីបំផុត។

ប្រមុខរាជរដ្ឋាភិបាលកម្ពុជា សម្ដេច ហ៊ុន ម៉ាណែត កាលពីថ្ងៃទី១១ ខែមេសា ថ្លែងពីទុក្ខលំបាករបស់ពលរដ្ឋភៀសសឹក រងគ្រោះព្រោះសង្គ្រាមឈ្លានពាន ផ្ទះកើតចេញពីការសន្សំរាប់ឆ្នាំ ត្រូវយោធាថៃរាយបន្លាលួស ដាក់ទូកុងតឺន័រព័ទ្ធយក ត្រូវបន្តស្នាក់នៅជម្រកបណ្ដោះអាសន្ន ប៉ះទង្គិចផ្លូវចិត្ត។ សម្ដេចនាយករដ្ឋមន្ត្រី បានលើកទឹកចិត្តពលរដ្ឋភៀសសឹក និងស្នើឱ្យថែរក្សាផ្លូវចិត្តឱ្យបានរឹងមាំ ខណៈដែលរាជរដ្ឋាភិបាលកំពុងទាមទារយកមកវិញនូវទឹកដីដែលយោធាថៃកំពុងកាន់កាប់។

នៅថ្ងៃទី១៣ ខែមេសា​ នេះ សម្ដេច ហ៊ុន ម៉ាណែត ក៏បានផ្ញើក្ដីនឹករលឹកដល់ជនភៀសសឹក ជូនពរឱ្យមានសេចក្ដីសុខ សុវត្ថិភាព និងមានសុខភាពល្អ៕

ដោយ៖ ង៉ិល ណារ៉ាត់

The post ពលរដ្ឋខ្មែរជាជនភៀសសឹកជាង៣ម៉ឺននាក់ មិនអាចជួបជុំគ្រួសារក្នុងផ្ទះដ៏កក់ក្ដៅនាថ្ងៃចូលឆ្នាំខ្មែរដូចឆ្នាំមុនឡើយ ព្រោះទង្វើយោធាថៃឈ្លានពាន appeared first on Kampuchea Thmey Daily.

ជាក់ស្តែងកាលពីព្រឹកថ្ងៃទី១២ ខែមេសា ឆ្នាំ២០២៦នេះ ការធ្វើដំណើររបស់ប្រជាពលរដ្ឋបានកើនឡើងយ៉ាងច្រើន បន្ទាប់ពីរោងចក្រ សហគ្រាស និងក្រុមហ៊ុនមួយចំនួន បានចាប់ផ្តើមឈប់សម្រាកចាប់តាំងពីល្ងាចថ្ងៃទី១១ ខែមេសា។ ប្រជាពលរដ្ឋមួយចំនួនបានធ្វើដំណើរចេញមុនគេ ខណៈមួយចំនួនទៀតកំពុងត្រៀមធ្វើដំណើរបន្តបន្ទាប់ ដែលធ្វើឲ្យតាមដងផ្លូវសំខាន់ៗចេញពីរាជធានី មានសភាពកកស្ទះជាបន្តបន្ទាប់។

យានយន្តគ្រប់ប្រភេទ រួមមានម៉ូតូ រថយន្តផ្ទាល់ខ្លួន និងរថយន្តដឹកអ្នកដំណើរ ត្រូវបានគេឃើញធ្វើដំណើរចេញពីភ្នំពេញយ៉ាងច្រើនកុះករ ទិសដៅទៅកាន់បណ្តាខេត្តនានាទូទាំងប្រទេស។ សកម្មភាពនេះបង្ហាញពីទំនៀមទម្លាប់ដ៏រឹងមាំរបស់ប្រជាជនខ្មែរ ដែលតែងតែវិលត្រឡប់ទៅស្រុកកំណើត ដើម្បីជួបជុំគ្រួសារនៅឱកាសបុណ្យចូលឆ្នាំ។

ក្នុងឱកាសនេះ ប្រជាពលរដ្ឋបានរៀបចំទុកជាមុននូវម្ហូបអាហារ ភេសជ្ជៈ និងថវិកា ដើម្បីយកទៅជូនឪពុកម្តាយ និងអ្នកមានគុណ ព្រមទាំងរៀបចំកម្មវិធីជួបជុំ សប្បាយរីករាយជាមួយសាច់ញាតិ។ ការជួបជុំបែបនេះ មិនត្រឹមតែបង្ហាញពីការគោរពក្តីស្រឡាញ់ក្នុងគ្រួសារប៉ុណ្ណោះទេ ប៉ុន្តែថែមទាំងជួយបន្តរក្សាប្រពៃណីវប្បធម៌ជាតិឲ្យនៅរឹងមាំផងដែរ។

គួរបញ្ជាក់ថា បុណ្យចូលឆ្នាំខ្មែរ គឺជាបុណ្យប្រពៃណីដ៏សំខាន់មួយក្នុងព្រះពុទ្ធសាសនា ដែលប្រជាជនខ្មែរទូទាំងប្រទេសគោរពអនុវត្តជារៀងរាល់ឆ្នាំ។ បុណ្យនេះ១៤ ១៥ និង ១៦ ខែមេសា ឆ្នាំ ២០២៦ ខាងមុខនេះ ។ មិនត្រឹមតែជាពេលវេលាសម្រាកពីការងារប៉ុណ្ណោះទេ ប៉ុន្តែថែមទាំងជាឱកាសដ៏មានតម្លៃសម្រាប់ការជួបជុំគ្រួសារ បង្កើនសាមគ្គីភាព និងបន្តប្រពៃណីល្អៗរបស់ជាតិ៕ អត្ថបទ សំណាង

The post ប្រជាពលរដ្ឋនាំគ្នាសម្រុក ចេញពីរាជធានីភ្នំពេញទៅ លេងស្រុកកំណើត នាឱកាសបុណ្យចូលឆ្នាំខ្មែរ appeared first on Kampuchea Thmey Daily.