នៅព្រឹកថ្ងៃទី០៩​ ខែវិច្ឆិកា​ ឆ្នាំ២០២៣ មិនខុសពីរាជធានីភ្នំពេញ ក៏ដូចជាខេត្តដទៃ នៅឯខេត្តស្វាយរៀង​ ក៏បានប្រារព្ធពិធីបុណ្យឯករាជ្យ នៅនឹងវិមានឯករាជ្យខេត្តស្វាយរៀង។ ពិធីដ៏មានអត្ថន័យនេះ គឺមានការចូលរួមពីសំណាក់មន្ត្រីរាជការ សិស្សានុសិស្ស និស្សិត និងប្រជាពលរដ្ឋ។

អង្គពិធីទាំងមូល បានសម្ដែងនូវកត្តញ្ញុតាធម៌ និងដឹងគុណយ៉ាងជ្រាលជ្រៅបំផុតថ្វាយ ព្រះករុណា ព្រះបាទ នរោត្ដម សីហនុ អតីតព្រះមហាវីរក្សត្រ ព្រះវររាជបិតាឯករាជជាតិ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ ដែលព្រះអង្គបានបូជាព្រះកាយពល និងព្រះបញ្ញាញាណជម្នះគ្រប់ឧបសគ្គ ដើម្បីនាំមកនូវសន្តិភាព ការផ្សះផ្សរជាតិ ភាពចម្រុងចម្រើន និងកិត្តិយសដល់មាតុភូមិ និងប្រជារាស្រ្តខ្មែរមកដល់សព្វថ្ងៃ។

ទិវាប្រកបដោយអត្ថន័យនេះគឺជាការរំលឹកខួបអនុស្សាវរីយ៍លើកទី៧០ នៃទិវាបុណ្យឯករាជ្យជាតិ ដែលជាព្រឹត្តិការណ៍ប្រវត្តិសាស្ត្រមួយដ៏សំខាន់នៅថ្ងៃនេះ បានឆ្លុះបញ្ចាំងឲ្យកាន់តែច្បាស់អំពីការរំដោះប្រទេសឲ្យរួចផុតពីរបបអាណានិគមនិយមបារាំង ហើយទិវាបុណ្យឯករាជ្យជាតិឆ្នាំនេះ ស្ថិតក្នុងដំណាក់កាលដែលប្រទេសជាតិមានសុខសន្តិភាពក្រោមការដឹកនាំប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា​ និងសម្តេចមហាបវរធិបតី​ ហ៊ុន​ ម៉ាណែត​ នាយករដ្ឋមន្ត្រី នៃព្រះរាជាណាចក្រកម្ពុជា ដែលប្រជាពលរដ្ឋកំពុងទទួលបាននូវផ្លែផ្កាពីសុខសន្តិភាព​  ប្រទេសជាតិយេីងមានការអភិវឌ្ឍរីកចម្រើនលើគ្រប់វិស័យ ជាមួយនិងការរីកលូតលាស់នៃលទ្ធិប្រជាធិបតេយ្យ រួមទាំងសន្តិសុខ​ សណ្ដាប់ធ្នាប់ល្អក្នុងសង្គម។

ពិធីនេះក៏មានការអញ្ជើញចូលរួមពី លោក អ៊ុយ​ ថន​ សមាជិកក្រុមប្រឹក្សាខេត្ត​ តំណាងលោក​ប្រធានក្រុមប្រឹក្សាខេត្ត និងលោក​ រស់​ ផារិទ្ធ អភិបាលរងខេត្ត តំណាងលោកអភិបាលខេត្ត និងភាគីពាក់ព័ន្ធ សរុបអ្នកចូលរួមប្រមាណ ៣៥០០នាក់ បានអញ្ជើញជាអធិបតីក្នុងពិធីមីទ្ទិញអបអរសាទរខួបអនុស្សាវរីយ៍លើកទី៧០ នៃទិវាបុណ្យឯករាជ្យជាតិ ៩វិច្ឆិកា (៩ វិច្ឆិកា ១៩៥៣ – ៩ វិច្ឆិកា ២០២៣) និងទិវាកំណើត នៃកងយោធពលខេមរភូមិន្ទ៕

អត្ថបទដោយ: ភក្ដី

The post ខេត្តស្វាយរៀង ប្រារព្ធពិធីអបអរសាទរខួបអនុស្សាវរីយ៍លើកទី៧០ នៃទិវាបុណ្យឯករាជ្យជាតិ appeared first on Kampuchea Thmey Daily.

ការណ៍ដែលកម្ពុជាតែងតែប្រារព្ធពិធីបុណ្យឯករាជ្យនេះ គឺក្រោមគោលបំណង ដើម្បីរំលឹកដល់ថ្ងៃជាប្រវត្តិសាស្ត្រ នៃការដណ្តើមបានមកវិញនូវសិទ្ធិសេរីភាព និងភាពជាម្ចាស់ទឹកដីនៃប្រទេសកម្ពុជា ក្រោយប្រទេសបារាំងដាក់អាណានិគមលើប្រទេសកម្ពុជារយៈពេល៩០ឆ្នាំ (១១ សីហា ១៨៦៣ – ៩ វិច្ឆិកា ១៩៥៣)។

នៅមួយថ្ងៃមុននៃការប្រារព្ធពិធីនេះ ពោលនៅរសៀលថ្ងៃទី០៨ ខែវិច្ឆិកា ក៏មានការរៀបចំឱ្យមន្ត្រីជាន់ខ្ពស់នៃរាជរដ្ឋាភិបាលកម្ពុជា មកពីតាមបណ្តាក្រសួងស្ថាប័ននានា បានចូលគោរពព្រះវិញ្ញាណក្ខន្ធព្រះបរមរតនកោដ្ឋ នរោត្តម សីហនុ នៅមណ្ឌបព្រះបរមរូបក្បែរវិមានឯករាជ្យផងដែរ។ ការចូលគោរពព្រះវិញ្ញាណក្ខន្ធនេះ គឺសំដៅដល់ការរលឹកគុណូបការៈ និងវីរភាពដ៏ធំធេងរបស់សម្តេចព្រះបរមរតនកោដ្ឋ ដែលបានយាងបំពេញព្រះរាជបូជនីយកិច្ច និងបូជាអស់កម្លាំងព្រះកាយពល បញ្ញាញាណ ក្នុងការដណ្តើមឯករាជ្យពីប្រទេសបារាំង។

ក្នុងថ្ងៃទី០៩ ខែវិច្ឆិកា ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ទ្រង់យាងអុជទៀននៅវិមានឯករាជ្យក្នុងរាជធានីភ្នំពេញ ជាមួយនឹងការដង្ហែរដោយក្រុមប្រឹក្សាផ្ទាល់ព្រះមហាក្សត្រ ប្រធានព្រឹទ្ធសភា ប្រធានរដ្ឋសភា នាយករដ្ឋមន្ត្រី មន្ត្រីរាជការគ្រប់ជាន់ថ្នាក់ ប្រជាពលរដ្ឋ និងសិស្សានុសិស្ស។

ជាមួយគ្នានេះ កម្ពុជា ក៏បានសាងសង់វិមានឯករាជ្យ ដែលជាទីតាំងនិមិត្តរូបនៃឯករាជ្យភាពជាតិចំនួន១៦ទីតាំងផ្សេងគ្នា នៅតាមបណ្ដារាជធានី ខេត្ត។ សម្រាប់រាជធានីខេត្តដែលមានវិមានឯករាជ្យមានដូចជា រាជធានីភ្នំពេញ ខេត្តតាកែវ ខេត្តកំពង់ស្ពឺ ខេត្តកែប ខេត្តស្វាយរៀង ខេត្តកំពង់ឆ្នាំង ខេត្តព្រះសីហនុ ខេត្តព្រះវិហារ ខេត្តកំពង់ចាម ខេត្តកំពង់ធំ ខេត្តក្រចេះ ខេត្តឧត្ដរមានជ័យ ខេត្តប៉ៃលិន ខេត្តមណ្ឌលគិរី ខេត្តបាត់ដំបង និងខេត្តរតនៈគិរី។

កម្ពុជា ក៏បានកំណត់ជារៀងរាល់ថ្ងៃទី៩ ខែវិច្ឆិកា តាមឆ្នាំនីមួយៗឱ្យមន្ត្រីរាជការ កម្មករ កម្មការនី សិស្សនិស្សិត ទាំងអស់ឈប់សម្រាកពីការងារ ដើម្បីអបអរពិធីបុណ្យដ៏មានអត្ថន័យមួយនេះ៕

The post កម្ពុជា ប្រារព្ធខួបអនុស្សាវរីយ៍លើកទី៧០ នៃទិវាបុណ្យឯករាជ្យជាតិ ៩ វិច្ឆិកា appeared first on Kampuchea Thmey Daily.