ពុលចំណីអាហារ Archives - Kampuchea Thmey Daily

កម្មកររោងចក្រ ១០ នាក់ ពុលនំបញ្ចុក ត្រូវបានបញ្ជូនទៅមន្ទីរពេទ្យ នៅស្រុកកណ្ដាលស្ទឹង

អ៊ិន ពិសី — Fri, 18 Apr 2025 10:02:13 +0000

កម្មករ-កម្មការិនីរោងចក្រ ចំនួន ១០ នាក់ បានហូបនំបញ្ចុកនៅខាងមុខរោងចក្រ រួចក៏ពុល ត្រូវបានដឹកបញ្ជូនទៅកាន់មន្ទីរពេទ្យ។

ករណីពុលនេះបានកើតឡើងកាលពីវេលាម៉ោង ១១ និង ៣០ នាទីព្រឹក ថ្ងៃទី ១៨ ខែមេសា ឆ្នាំ ២០២៥ នៅចំណុចខាងមុខរោងចក្រផលិតស្បែកជើងមួយកន្លែង ស្ថិតក្នុងភូមិជ័យជំនះ ឃុំសៀមរាប ស្រុកកណ្ដាលស្ទឹង ខេត្តកណ្ដាល។

តាមការបញ្ជាក់ពីសមត្ថកិច្ចបានឲ្យដឹងថា កាលពីវេលាម៉ោង ១១ និង ៣០ នាទីព្រឹក កម្លាំងជំនាញបានទទួលព័ត៌មានពីកម្មកររោងចក្រផលិតស្បែកជើងមួយកន្លែងថាមានមនុស្សប្រុស-ស្រី ចំនួន ១០ នាក់ ពុលចំណីអាហារ ហើយត្រូវបានបញ្ជូនទៅកាន់មន្ទីរពេទ្យដើម្បីសង្គ្រោះ។

សមត្ថកិច្ចបានឲ្យដឹងទៀតថា ភ្លាមៗ កម្លាំងជំនាញស្រុកកណ្តាលស្ទឹង ក៏បានចុះទៅដល់មន្ទីរពេទ្យ និងសាកសួរទៅកាន់ជនរងគ្រោះទាំងអស់ខាងលើ ដោយពួកគាត់បញ្ជាក់ថា ពួកគាត់បានហូបនំបញ្ចុកដែលគេលក់នៅខាងមុខរោងចក្រ សង្ស័យបន្លែលាងមិនស្អាត ឬក៏ការលក់ដូរនោះទំនងមិនមានអនាម័យគ្រប់គ្រាន់ ទើបធ្វើឲ្យពុលបែបនេះ។

បច្ចុប្បន្ន ជនរងគ្រោះទាំង ១០ នាក់ ខាងលើនេះ បានធូរស្រាលហើយ និងកំពុងតែសម្រាកព្យាបាល នៅមណ្ឌលសុខភាពសៀមរាប ដោយមិនមានអ្វីធ្ងន់ធ្ងរនោះឡើយ៕

អត្ថបទ ៖ រដ្ឋា

The post កម្មកររោងចក្រ ១០ នាក់ ពុលនំបញ្ចុក ត្រូវបានបញ្ជូនទៅមន្ទីរពេទ្យ នៅស្រុកកណ្ដាលស្ទឹង appeared first on Kampuchea Thmey Daily.

អ្នកភូមិក្នុងចំណោម ១១នាក់ ពុលត្រី៦នាក់ ត្រូវបញ្ជូនទៅព្យាបាលនៅមណ្ឌលសុខភាព

Kang Tola — Fri, 12 Apr 2024 11:21:33 +0000

ស្ទឹងត្រែង ៖ អ្នកភូមិមួយគ្រួសារចុះនេសាទត្រីតាមដងទន្លេមេគង្គ ដើម្បីយកមកធ្វើម្ហូប បានប្រទះឃើញត្រីអណ្ដែតទឹកដែលជនខិលខូចបានលបលួចដាក់ថ្នាំបំពុលក្នុងសាច់គោត្រីល្អិតកាត់ជាកង់ៗឱ្យត្រីស៊ី ក៏រើសយកមកធ្វើម្ហូបរួមទាំងត្រីនេសាទបណ្ដាលឱ្យបងប្អូនកូនក្មួយមួយគ្រួសារចំនួន១១ពុលខ្លះរាករូស ក្អួត៦នាក់មានសភាពធ្ងន់ធ្ងរ ត្រូវបានបញ្ជូនមកមណ្ឌលសុខភាពបូរីអូស្វាយសែនជ័យ។

ហេតុការណ៍អ្នកភូមិពុលត្រីខាងលើបានកើតឡើងនៅព្រឹកថ្ងៃទី១២ ខែមេសា ឆ្នាំ២០២៤ ត្រង់ចំណុចដងទន្លេមេគង្គ ស្ថិតក្នុងភូមិអូរុន ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង។

អ្នកគ្រូពេទ្យហុងរ៉ាឌីមន្ត្រីពេទ្យមណ្ឌលសុខភាពបុរីអូស្វាយសែនជ័យបានឲ្យដឹងដែរថា ពិតជាមានអ្នកភូមិពុលត្រីពិតប្រាកដមែន ដោយពួកគាត់បានបរិភោគត្រីបានមកពីការនេសាទនិងរើសបានត្រីងាប់នៅក្នុងដងទន្លេ ក្រោយបរិភោគមានអាការៈមិនស្រួលក៏បានបញ្ជូនមកមណ្ឌលសុខភាពចំនួន៥ នាក់ និងម្នាក់នៅព្យាបាលពេទ្យឯកជន។

អ្នកគ្រូពេទ្យបានបន្តឲ្យដឹងទៀតថា អ្នកភូមិចំនួន៥នាក់ ដែលមកសម្រាកមណ្ឌលសុខភាពមានអាការៈឈឺក្នុងពោះ រាករូសក្អួតចង្អោរ ក្រោយពីពិនិត្យថា ពិតជាពុលដោយសារការហូបត្រីគេបំពុលក្រុមគ្រូពេទ្យបានព្យាបាលដោយដាក់សេរ៉ូមរហូតមកដល់រសៀលថ្ងៃនេះបានធូរស្បើយខ្លះហើយ។

លោកឈន ឆន ប្រធានក្រុមបរិស្ថានប្រចាំស្នាក់ការតំបន់រ៉ាមសារក៏បានបញ្ជាក់នៅរសៀលថ្ងៃ១២ មេសានេះ ឱ្យដឹងដែរថា នៅព្រឹកមិញនេះ ក្រុមរបស់លោកបានចុះល្បាតក៏បានប្រទះឃើញមានត្រីប្រាកែងាប់ណ្ដែតទឹកដោយសារការបំពុលដែរ។ ហើយប៉ុន្មានថ្ងៃមុនក៏យើងបានធ្វើការដកហូតទូកចំនួន ២គ្រឿងនិងត្រីប្រាកែជាច្រើនគីឡូដែលបានមកពីការបំពុល ដោយក្រុមជនសង្ស័យបានរត់ចោល។

សូមបញ្ជាក់ថា កាលពីថ្ងៃទី ២៦ មីនា ឆ្នាំ២០២៤កន្លងមកថ្មីៗនេះ កម្លាំងសមត្ថកិច្ចចម្រុះធ្លាប់បានចុះបង្ក្រាបអ្នកលក់ត្រីនៅផ្សារសាមគ្គីស្ទឹងត្រែងចំនួន ៤នាក់យកមកធ្វើកិច្ចសន្យានិងបានដកហូតត្រីប្រាកែបានមកពីការដាក់លុយបំពុលចំនួន៥០គីឡូក្រាម យកទៅបំផ្លាញចោលផងដែរ។

បច្ចុប្បន្នសមត្ថកិច្ចនៅតែបន្តស្រាវជ្រាវរកមុខជនខិលខូច ដែលលបលួចបំពុលត្រីនៅតាមដងទន្លេមេគង្គ ដើម្បីចាត់ការទៅតាមផ្លូវច្បាប់ផងដែរ៕

ដោយ ៖ ងិនលីម

The post អ្នកភូមិក្នុងចំណោម ១១នាក់ ពុលត្រី៦នាក់ ត្រូវបញ្ជូនទៅព្យាបាលនៅមណ្ឌលសុខភាព appeared first on Kampuchea Thmey Daily.

សិស្សសាលានៅវៀតណាម ៥ នាក់ ពុលតែទឹកដោះគោដែលគ្រូធ្វើឲ្យ

Boa Sokunveary — Mon, 02 Oct 2023 09:56:10 +0000

សិស្សថ្នាក់ទី ៨ នៅសាលា Pom Han ប្រទេសវៀតណាម ៥ នាក់ ពុលតែទឹកដោះគោដែលគ្រូធ្វើសម្រាប់ជាគំរូក្នុងមេរៀនគីមីវិទ្យា រហូតសម្រាកនៅមន្ទីរពេទ្យ ។

ជាក់ស្ដែងសិស្សសរុបមាន ៣៨ នាក់ ប៉ុន្តែក្រោយផឹកតែទឹកដោះគោបាន ១ ម៉ោង មានតែសិស្ស ៥ នាក់ប៉ុណ្ណោះដែលពុលតែនោះ ។ ពួកគេមានរោគសញ្ញាដូចជា ឈឺពោះ ចង់ក្អួត ឈឺក្បាល និងរាកជាដើម ដល់ថ្ងៃចន្ទ ទី២ ខែតុលា សិស្សទាំង ៥ ត្រូវបានអនុញ្ញាតឲ្យទៅផ្ទះវិញដោយសុវត្ថិភាព និងរៀបចំទៅរៀនតាមធម្មតា ។

មុនកើតហេតុ គ្រូបង្រៀនបានប្រាប់ឲ្សសិស្សទាំងអស់រួមគ្នាទិញគ្រឿងពីហាងដែលគាត់ណែនាំ ប៉ុន្តែហាងបានបិទ ទើបពួកគេទៅទិញគ្រឿងធ្វើតែនៅកន្លែងផ្សេងដែលគ្មានប្រភពច្បាស់លាស់វិញ ។ ឥលូវនេះ ហាងទាំងនោះកំពុងត្រូវមន្ត្រីចាត់ការតាមផ្លូវច្បាប់ហើយ ។

លោក Duong Thi Mai Huong ជានាយកសាលា បានឲ្យដឹងថា ការធ្វើតែទឹកដោះគោគឺជាមេរៀនដែលមានគោលបំណងឲ្យសិស្សកើនបទពិសោធន៍ និងមានគំនិតក្នុងការងារនាពេលអនាគត ៕

ប្រែសម្រួល៖ វារី

ប្រភព៖ tuoitrenews

ចុចអាន៖ មនុស្ស ៩១ នាក់ ពុលនំប៉័ងសាច់ពីហាងដ៏ល្បីនៅ វៀតណាម

The post សិស្សសាលានៅវៀតណាម ៥ នាក់ ពុលតែទឹកដោះគោដែលគ្រូធ្វើឲ្យ appeared first on Kampuchea Thmey Daily.

មនុស្ស ៩១ នាក់ ពុលនំប៉័ងសាច់ពីហាងដ៏ល្បីនៅ វៀតណាម

Boa Sokunveary — Fri, 15 Sep 2023 06:59:06 +0000

យោងតាមរបាយការណ៍ពីអាជ្ញាធរសុខាភិបាលក្នុងតំបន់បានឱ្យដឹងថា មនុស្ស ៩១ នាក់ រួមទាំងជនបរទេស ៣៤ នាក់ ក្លាយជាជនរងគ្រោះនៃការពុលអាហារ នៅខេត្ត Quang Nam ភាគកណ្តាលប្រទេស វៀតណាម ។

មន្ទីរសុខាភិបាលខេត្តបានរាយការណ៍កាលពីល្ងាចថ្ងៃពុធ ទី១៣ ខែកញ្ញា ថា ជនរងគ្រោះ ៣២ នាក់អាចទៅផ្ទះវិញបាន បន្ទាប់ពីសម្រាកនៅមន្ទីរពេទ្យ ។ ហើយម្នាក់ទៀតត្រូវបានបញ្ជូនទៅមន្ទីរពេទ្យ Da Nang ខណៈជនបរទេស ៤ នាក់ក្នុងនោះជាសះស្បើយ និងអាចដកដង្ហើមខ្លួនឯង ដោយគ្មានម៉ាស៊ីនខ្យល់ ។

ជនរងគ្រោះទាំង ៩១ នាក់ត្រូវបានបញ្ជូនទៅកាន់មន្ទីរពេទ្យកាលពីថ្ងៃអង្គារ ទី១២ ខែកញ្ញា ព្រោះមានអាការៈគ្រុនក្តៅ ក្អួត ឈឺពោះ និងរាកពីរបីម៉ោង បន្ទាប់ពីញ៉ាំនំប៉័ងសាច់នៅ Banh Mi Phuong ដែលជាហាងនំប៉័ងដ៏ពេញនិយមក្នុងទីក្រុង Hoi An ។

ពេលនេះហាង Banh Mi Phuong ត្រូវបានផ្អាកដំណើរការ បន្ទាប់ពីឧបទ្ទវហេតុ ហើយមណ្ឌលសុខភាពក្នុងតំបន់ក៏បានយកគំរូអាហារពីហាងនំប៉័ងដើម្បីធ្វើតេស្តផងដែរ ។

យោងតាមសារព័ត៌មាន VTC ហាង Banh Mi Phuong បានបរាជ័យក្នុងការបំពេញតាមស្តង់ដារអនាម័យចំណីអាហារដែលកំណត់ដោយអនុនាយកដ្ឋានសុវត្ថិភាព និងអនាម័យចំណីអាហារ ក្រោមមន្ទីរសុខាភិបាលខេត្ត ៕

ប្រែសម្រួល៖ វារី

ប្រភព៖ tuoitrenews

ចុចអាន៖ អ្នកនេសាទ ៣ នាក់នៅវៀតណាម ពុលត្រីក្រពត រហូតស្លាប់ម្នាក់

The post មនុស្ស ៩១ នាក់ ពុលនំប៉័ងសាច់ពីហាងដ៏ល្បីនៅ វៀតណាម appeared first on Kampuchea Thmey Daily.

មន្ត្រីជំនាញសុខាភិបាល ណែនាំពលរដ្ឋបង្កើនការប្រុងប្រយ័ត្នខ្ពស់ ចំពោះការពុលចំណីអាហារក្នុងពិធីសែនក្បាលទឹក

អ៊ិន ពិសី — Wed, 30 Aug 2023 02:22:20 +0000

លោកវេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លង និងជាអ្នកនាំពាក្យក្រសួងសុខាភិបាល បានណែនាំដល់ប្រជាពលរដ្ឋ ពិសេសអ្នកជាប់ខ្សែស្រឡាយកាត់ចិន ត្រូវបង្កើនការប្រុងប្រយ័ត្នខ្ពស់ចំពោះការពុលចំណីអាហារ និងគ្រោះអគ្គិភ័យនៅក្នុងពិធីសែនក្បាលទឹកនេះ។

ថ្លែងប្រាប់កម្ពុជាថ្មី នៅព្រឹកថ្ងៃទី ៣០ សីហានេះ លោកវេជ្ជបណ្ឌិត លី សូវ៉ាន់ បានមានប្រសាសន៍ថា ពិធីសែនក្បាលទឹកតែងតែមានរៀបចំសែនព្រេនគ្រឿងដង្វាយ និងម្ហូបអាហារពោរពាស ដែលអាចបណ្ដាលឲ្យមានការពុលចំណីអាហារ ប្រសិនបើអាហារទាំងនោះរៀបចំមិនមានអនាម័យត្រឹមត្រូវទេនោះ។

លោកវេជ្ជបណ្ឌិត បានណែនាំថា ដើម្បីចៀសវាងការពុលចំណីអាហារនៅក្នុងពិធីសែនក្បាលទឹកនេះ ប្រជាពលរដ្ឋត្រូវអនុវត្តវិធានការមួយចំនួនដូចជា ត្រូវលាងដៃមុននឹងចាប់កាន់ចំណីអាហារ មុនពេលរៀបចំចំណីអាហារ និងក្រោយពេលចេញពីបន្ទោបង់ ព្រមទាំងសម្ភារៈឧបការប្រើប្រាស់សម្រាប់រៀបចំចំណីអាហារ។ ត្រូវទុកដាក់អាហារឆៅ និងឆ្អិន ដាច់ដោយឡែកពីគ្នា ព្រោះថាអាហារឆៅ ជាពិសេសសាច់សត្វស្លាប ស៊ុត និងគ្រឿងសមុទ្រ អាចមានមេរោគបង្កគ្រោះថ្នាក់ ដែលអាចឆ្លងចូលទៅក្នុងចំណីអាហារផ្សេងទៀតនៅពេលរៀបចំ និងទុកដាក់អាហារទាំងនេះ។ ត្រូវចម្អិនអាហារឲ្យបានឆ្អិនល្អ ជាពិសេស សាច់ សត្វស្លាប ស៊ុត និងគ្រឿងសមុទ្រ។ លើសពីនេះ ត្រូវការទុកដាក់អាហារនៅក្នុងសីតុណ្ហភាពសុវត្ថិភាព ព្រោះថាមេរោគអាចបំបែកខ្លួនយ៉ាងឆាប់រហ័ស ប្រសិនបើអាហារត្រូវបានរក្សាទុកក្នុងសីតុណ្ហភាពធម្មតា។

លោកវេជ្ជបណ្ឌិត លី សូវ៉ាន់ បន្ថែមថា ជាមួយគ្នានេះ ប្រជាពលរដ្ឋគួរតែប្រុងប្រយ័ត្នចំពោះភ្លើងទៀនធូប និងការដុតក្រដាសសែនពេលសែនព្រេន។ ហើយពេលធ្វើដំណើរទៅណាមកណា ត្រូវប្រាកដថា ភ្លើងទៀនធូបរលត់អស់ហើយ ដើម្បីការពារកុំឲ្យមានកើតគ្រោះអគ្គិភ័យកើតឡើងជាយថាហេតុ។

លោកវេជ្ជបណ្ឌិត បញ្ជាក់ថា ក្នុងករណីប្រជាពលរដ្ឋមានអាការរាករូស សូមប្រញាប់ទាក់ទងទៅកាន់លេខ ១១៥ ដើម្បីឲ្យមន្ត្រីជំនាញចុះទៅស្រាវជ្រាវ និងទប់ស្កាត់បានទាន់ពេលវេលា៕

អត្ថបទ ៖ សំអឿន

The post មន្ត្រីជំនាញសុខាភិបាល ណែនាំពលរដ្ឋបង្កើនការប្រុងប្រយ័ត្នខ្ពស់ ចំពោះការពុលចំណីអាហារក្នុងពិធីសែនក្បាលទឹក appeared first on Kampuchea Thmey Daily.

មន្ត្រីមន្ទីរសុខាភិបាលខេត្តសៀមរាប បញ្ជាក់ករណីមនុស្សជាង២០នាក់ពុលអាហារនៅអាហារដ្ឋាន ប៊ូហ្វេ ស្រីខួចខិនថេនើរ

Sokhom Khon — Wed, 19 Jul 2023 03:55:30 +0000

ជុំវិញករណីពលរដ្ឋក្មេងចាស់នាំគ្នាចូលទៅហូបអាហារនៅអាហារដ្ឋាន ប៊ូហ្វេ ស្រីខួចខិនថេនើរ រួចក៏មានអាការៈរាគរុះ ក្អួតចង្អោរ ដោយសង្ស័យថា ពុលអាហារនៅទីនោះរួចក៏បញ្ជូនទៅមន្ទីរពេទ្យនោះ ត្រូវបានមន្ត្រីជំនាញនៃមន្ទីរសុខាភិបាលខេត្តសៀមរាប សន្និដ្ឋានថា មិនមានករណីពុលអាហារនៅខេត្តសៀមរាបទេ។ ករណីខាងលើ គឺអាចបណ្តាលមកពីភាពមិនអាចទទួលយកបានចំពោះចំណីអាហាររបស់អ្នកទទួលទាន(Intolerant Alimentary) ទើបបណ្តាលឲ្យមានចេញរោគសញ្ញារាត ក្អួត។

លោកស្រី លី វណ្ណៈ ប្រធានការិយាល័យនិយ័តកម្មសុខាភិបាល នៃមន្ទីរសុខាភិបាលខេត្តសៀមរាប បានអោយដឹងនៅថ្ងៃទី១៨ ខែកក្កដា ឆ្នាំ២០២៣ថា ពេលចុះផ្ទាល់ទៅហាងអាហារប៊ូហ្វេ ស្រី ខួច ម្ចាស់ហាងឈ្មោះ ជា លីដា និងឈោ្មះ ស៊ាន សុផល បានអោយដឹងថា នៅថ្ងៃទី១៤ ខែកក្កដា ឆ្នាំ២០២៣ មានភ្ញៀវចូលហូបអាហារសរុបប្រហែល៧០០នាក់ តែមានភ្ញៀវក្រុមធំចំនួន២ក្រុម គឺ១ក្រុម២៩នាក់ និងមួយក្រុមទៀតមាន៤៥នាក់។ ម្ចាស់ហាងប្រាប់ថា ព្រឹកថ្ងៃ១៥ ខែកក្កដា ឆ្នាំ២០២៣ ខាងក្រុមភ្ញៀវចំនួន២៩នាក់ បានខលប្រាប់គាត់ថា មានអាការៈក្អួត រាគ ចុកពោះ និងចុកចុងដង្ហើមរួចហើយ បានចូលសំរាកពេទ្យប្រហែលម៉ោង៩ព្រឹក ដោយសង្ស័យថា ពុលចំណីអាហារនៅហាងរបស់គាត់ ដែលបានចូលពីថ្ងៃទី១៤នោះ និងអោយជួយចេញថ្លៃសេវាព្យាបាល។ លោកស្រីបន្តថា ថ្ងៃទី១៥ដដែល ពេលរសៀលតំណាងខាងក្រុមភ្ញៀវ២៩នាក់បានមកជួប និងទាមទារថ្លៃសេវាព្យាបាល ។

លោកស្រី លី វណ្ណៈ បន្តថា ជាមួយគ្នានេះដែរក្រុមការងារសុខាភិបាលក៏បានចុះជួបផ្ទាល់ជាអ្នកមានរោគសញ្ញាក្រោយពេលហូបអាហារនៅអាហារដ្ឋានប៊ូហ្វេស្រីខួច សរុប១៩នាក់ (ស្រី១១នាក់) ក្នុងនោះបានរកឃើញថា មាន២ករណី និងបានទៅសម្រាកព្យាបាលនៅពេទ្យ២កន្លែងខុសគ្នា។ ករណីទី១ ឈ្មោះ អ៊ា លីណា ភេទស្រី អាយុ៣៤ឆ្នាំ បានចូលសម្រាកព្យាបាលនៅមន្ទីរពេទ្យនាគទេព គ្រូពេទ្យធ្វើរោគវិនិច្ឆ័យថា ជាជំងឺរលាកក្រពះ ពោះវៀន និងបាត់បង់ជាតិទឹកបន្តិចបន្តួច។ ករណីទី២ ម្តាយរបស់ក្មេងឈ្មោះ ពិសី សុវណ្ណ ភេទប្រុស អាយុ១ឆ្នាំបានទៅព្យាបាលនៅបន្ទប់ពិគ្រោះព្យាបាលបវរមានរិទ្ធ គឺដោយមានអាការៈ ក្តៅខ្លួន រាគ ក្អួត ហើយរោគវិនិច្ឆ័យគ្រូពេទ្យ គឺ ឈឺបំពង់ក។ ករណីផ្សេងៗទៀតគាត់ប្រាប់ថា មិនបានទៅពេទ្យទេ គឺទិញថ្នាំពីឱសថស្ថានលេបសរុបទាំងអស់១០លេប ហើយពិនិត្យជាក់ស្ដែងលេបអស់៥លេប។ ក្រុមភ្ញៀវ២៩នាក់ បានមកជួបក្រុមការងារមន្ទីរសុខាភិបាលជាក់ស្ដែង មិននៅមានរោគសញ្ញាដូចខាងលើទៀតទេ(ធូរស្រាល) និងមានអ្នកខ្លះបានទៅធ្វើការងារនៅក្រុមហ៊ុនធម្មតាផងដែរ។

បន្ទាប់ពីជួបភាគីទាំងសងខាងក្រុមការងារមន្ទីរសុខាភិបាល បានបន្តចុះទៅត្រួតពិនិត្យបញ្ហាអាម័យនៅភោជនីយដ្ឋានម្តងទៀតសង្កេតឃើញថា អនាម័យក្នុងកន្លែងចំអិនអាហារមិនមានបញ្ហា អនាម័យនៅក្នុងកន្លែងបរិភោគមិនមានបញ្ហា សម្ភារៈប្រើប្រាស់មានអាម័យសមស្រប គ្រឿងឧបភោគបរិភោគបានធ្វើការលាងសំអាតបានសមស្រប។

សេចក្តីសន្និដ្ឋានសរុបមក គឺមិនមានករណីពុលអាហារនៅខេត្តសៀមរាបទេ។ ករណីខាងលើ គឺអាចបណ្ដលមកពី ”ភាពមិនអាចទទួលយកបានចំពោះចំណីអាហាររបស់អ្នកទទួលទាន(Intolerant Alimentary)” ទើបបណ្តាលឲ្យមានចេញរោគសញ្ញារាគ ក្អួត ចង្អោជាដើម។

ពលរដ្ឋបានសម្តែងការអស់សំណើចជុំវិញការលើកឡើងរបស់គ្រូពេទ្យជំនាញនៃខេត្តសៀមរាប ខាងលើ ហើយពួកគាត់បន្តថា គាត់សុំចុះចាញ់គេហើយដោយម៉្យាងរវល់ធ្វើការរកស៊ីផងក៏ខ្ចិលវែងឆ្ងាយទៀតសុំបញ្ចប់ត្រឹមហ្នឹងចុះ៕

អត្ថបទ៖ កុសល

The post មន្ត្រីមន្ទីរសុខាភិបាលខេត្តសៀមរាប បញ្ជាក់ករណីមនុស្សជាង២០នាក់ពុលអាហារនៅអាហារដ្ឋាន ប៊ូហ្វេ ស្រីខួចខិនថេនើរ appeared first on Kampuchea Thmey Daily.

ពលរដ្ឋជាង២០នាក់ពុលអាហារនៅអាហារដ្ឋានប៊ូហ្វេ ស្រីខួច ក្រុងសៀមរាប

Sokhom Khon — Mon, 17 Jul 2023 03:30:59 +0000

ពលរដ្ឋក្មេងចាស់នាំគ្នាចូលទៅញ៉ាំអាហារនៅអាហារដ្ឋានប៊ូហ្វេ ស្រី ខួច ខិនថេនើរ រួចក៏មានអាការៈរាគក្អួតចង្អោរ
ដោយសង្ស័យថា ពុលអាហារនៅទីនោះរួចក៏បញ្ជូនទៅមន្ទីរពេទ្យដើម្បីជួយសង្គ្រោះ។

ប្រភពពីពលរដ្ឋដែលទៅញ៉ាំអាហារនៅទីនោះបានឲ្យដឹងថា ពួកគាត់ និងគ្រួសារមានគ្នាប្រមាណ៣០នាក់ បាននាំគ្នាមកញ៉ាំអាហារដ្ឋានប៊ូហ្វេ ស្រី ខួច ខិនថេនើរ ដោយក្នុងម្នាក់ត្រូវបង់លុយអស់៧ដុល្លារ រួចក៏មានអាការៈរាគ និងក្អួតចង្អោរដោយមិនដឹងមូលហេតុ។ ហើយក៏ទៅសម្រាកព្យាបាលនៅមន្ទីរពេទ្យឯកជនមួយកន្លែងរហូតបានធូរស្រាលខ្លះៗហើយ ដោយម្នាក់ៗត្រូវព្យាបាលអស់ជិត២០០ដុល្លារ។ តែម្ចាស់ហាងខាងលើនិយាយយករួចខ្លួនដោយមិនទទួលខុសត្រូវ
ហើយនិយាយថា ជួយចេញថ្លៃពេទ្យម្នាក់២០ដុល្លារ។

ពលរដ្ឋបន្ថែមថា ម្ចាស់ហាងខាងលើគួរតែទទួលយកនូវការរិះគន់ដើម្បីស្ថាបនារបស់ពលរដ្ឋមិនគួរនិយាយបំភ្លើសការពិតដើម្បីតែផលប្រយោជន៍ខ្លួនឯងនោះឡើយ។ ពលរដ្ឋក៏សំណូមពរឱ្យអាជ្ញាធរពាក់ព័ន្ធជួយចុះពិនិត្យមើលហាងខាងលើផងព្រោះអាចប៉ះពាល់ដល់សុខភាព និងអាយុជីវិតរបស់ពលរដ្ឋ។ ចំណែកថៅកែអាហារប៊ូហ្វេ ស្រីខួច ខិនថេនើរ នៅល្ងាចថ្ងៃទី១៦ ខែកក្កដា ឆ្នាំ២០២៣នេះបានបំភ្លឺថា បុគ្គលិកប្រមូលសំរាមរបស់ក្រុមហ៊ុនសិនទ្រីជាង២០នាក់ទៅពិសារអាហារនៅហាងរបស់គាត់ រួមទាំងភ្ញៀវផ្សេងៗរាប់សិបនាក់ទៀត។ តែនៅព្រឹកថ្ងៃទី១៦ ខែដដែល ក៏ស្រាប់តែបុគ្គលិកប្រមូលសំរាមទាំងនោះ ខលទូរសព្ទ័មកគាត់ថា មានពួកគេជាង១០នាក់មានអាការ:ក្អួតចង្អោរ ហើយនាំគ្នាចោទថា ពុលអាហារ
ទាំងភ្ញៀវផ្សេងៗទៀតមិនមាននរណាម្នាក់កើតអី។ លុះពេលរូបគាត់សាកសួរបុគ្គលិកទើបដឹងថា ពួកគាត់ (បុគ្គលិកក្រុមហ៊ុនសុនទ្រី) ពិសារខុសលក្ខណ: ខុសពីការណែនាំ (ខ្យងសំរាប់អាំង ពួកគាត់ដាក់ស្ងោរក្នុងទឹកស៊ុប ក្តាមដែលបានចងកៅស៊ូ ពួក គាត់ស្ងោរទាំងកៅស៊ូ មិនបកស្រកីចេញ) ហើយបែជាមកចោទថា ពុលអាហារទៅវិញ។

ម្ចាស់អាហារដ្ឋានប៊ូហ្វេបន្ថែមថា មិនតែប៉ុណ្ណោះ ពួកគេទាមទារតម្រូវអោយគាត់(ម្ចាស់ហាង)ដោះស្រាយថ្លៃពេទ្យ២២០ដុល្លារទៀត។ ស្រីខួច បញ្ជាក់ទៀតថា ការញាំគ្រឿងសមុទ្រ ក៏អាចទាក់ទងនឹងសុខភាពផងដែរ ពេលខ្លះសុខភាពរបស់គាត់អាចប្រតិកម្ម និងមុខម្ហូបណាមួយក៏អាចបង្កអោយមានអាការ:ផងដែរ។ ក្នុងនាមជាម្ចាស់ហាង ស្រីខួចខិនថេនើរ សូមបញ្ជាក់ជូនថា មិនមានអាហារណាមួយពុលនៅក្នុងហាងរបស់ខ្លួនឡើយ។

ពាក់ព័ន្ធនឹងករណីពុលអាហារខាងលើនេះដែរ មន្ត្រីមន្ទីរសុខាភិបាលខេត្តសៀមរាបបានឲ្យដឹងថា ករណីនេះលោកមិនទាន់មានរបាយការណ៍ពីក្រុមការងារនៅឡើយទេ។ ហើយលោកបញ្ជាក់ថា ប្រសិនបើមានករណីយ៉ាងដូច្នេះមែន លោកនឹងចាត់ឲ្យមន្ត្រីចុះទៅពិនិត្យមើលជាក់ស្ដែងតែម្ដង។

មន្ត្រីសមត្ថកិច្ចដែលទទួលខុសត្រូវលើការងារចំណីអាហារនៅក្នុងខេត្តសៀមរាបក៏បានឲ្យដឹងដែរថា លោកនឹងសុំគោលការណ៍ថ្នាក់លើដើម្បីធ្វើការរឿងនេះឲ្យបានច្បាស់លាស់ កុំឲ្យមានមន្ទិលសង្ស័យតទៅទៀត។ ជុំវិញករណីខាងលើនេះដែរ មហាជនស្នើឲ្យអាជ្ញាធរពាក់ព័ន្ធនៃខេត្តសៀមរាបជួយពិនិត្យមើលហាងប៊ូហ្វេខាងលើដែលគេសង្ស័យថា មានដាក់ម្ហូបអាហារដែលគ្មានអនាម័យឲ្យពលរដ្ឋពិសារទើបធ្វើឲ្យមានអាការៈរាគរុះ ក្អួតចង្អោរ យ៉ាងដូច្នេះ៕

អត្ថបទ៖ កុសល

The post ពលរដ្ឋជាង២០នាក់ពុលអាហារនៅអាហារដ្ឋានប៊ូហ្វេ ស្រីខួច ក្រុងសៀមរាប appeared first on Kampuchea Thmey Daily.

អ្នកជំនាញសុខាភិបាល ណែនាំឱ្យអនុវត្តគន្លឹះ ៥ យ៉ាង ដើម្បីចៀសផុតការពុលចំណីអាហារ ក្នុងពិធីកាន់បិណ្ឌ និងភ្ជុំបិណ្ឌ

Sorn Phanith — Sat, 10 Sep 2022 04:16:02 +0000

លោកវេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លងនិងជាអ្នកនាំពាក្យក្រសួងសុខាភិបាល បានណែនាំដល់ប្រជាពលរដ្ឋអនុវត្តកូនសោគន្លឹះ ៥ យ៉ាង ដើម្បីធ្វើឱ្យចំណីអាហារមានសុវត្ថិភាពល្អចៀសផុតពីការពុលចំណីអាហារ នៅក្នុងពិធីកាន់បិណ្ឌនិងភ្ជុំបិណ្ឌនេះ។

ការណែនាំនេះបានធ្វើឡើង ខណៈពិធីបុណ្យកាន់បិណ្ឌនិងភ្ជុំបិណ្ឌ នៅឆ្នាំនេះនឹងប្រព្រឹត្តទៅពីថ្ងៃ ១រោចដល់ថ្ងៃ ១៥ រោច ខែភទ្របទ ត្រូវនឹងថ្ងៃទី ១១ ដល់ថ្ងៃទី ២៥ ខែកញ្ញា ឆ្នាំ ២០២២ ហើយពិធីបុណ្យដ៏ធំនេះ ជារៀងរាល់ឆ្នាំតែងតែមានការពុលចំណីអាហារមួយចំនួនកើតឡើងដោយសារតែចំណីអាហារមិនមានអនាម័យត្រឹមត្រូវ។

ថ្លែងប្រាប់កម្ពុជាថ្មីនៅព្រឹកថ្ងៃទី ១០ កញ្ញានេះ លោកវេជ្ជបណ្ឌិត បានប្រសាសន៍ថា កូនសោគន្លឹះ ៥ យ៉ាងសម្រាប់ធ្វើឲ្យចំណីអាហារមានសុវត្ថិភាពនោះរួមមាន ទី១. រក្សាភាពស្អាត៖ ត្រូវលាងដៃរបស់អ្នក មុននឹងចាប់កាន់ចំណីអាហារ និងមុនពេលរៀបចំចំណីអាហារ។ ចូរលាងដៃរបស់អ្នកក្រោយពេលចេញពីបន្ទោបង់ ចូរលាងសម្អាត និងធ្វើអនាម័យលើផ្ទៃរាបទាំងអស់ និងសម្ភារៈឧបករណ៍ប្រើប្រាស់សម្រាប់រៀបចំចំណីអាហារ។ ការពារផ្ទះបាយ និងចំណីអាហារពីសត្វល្អិត កណ្តុរ និងសត្វផ្សេងៗ។ ការធ្វើបែបនេះព្រោះមានមេរោគបង្កគ្រោះថ្នាក់ជាច្រើនត្រូវបានរកឃើញនៅក្នុងធូលីដី ទឹក សត្វ និងមនុស្ស។ មេរោគទាំងនេះ បានតោងជាប់នៅនឹងដៃមនុស្ស ក្រណាត់ជូត និងសម្ភារៈផ្ទះបាយ ជាពិសេសជ្រុញ ទោះជាការប៉ះពាល់តិចតួចក៏ដោយ ក៏អាចចម្លងពួកមេរោគទាំងនោះទៅក្នុងចំណីអាហាររួចវាបណ្តាលឲ្យមានជំងឺនៅពេលបរិភោគចំណីអាហារទាំងនេះ។

ទី២. ការទុកដាក់អាហារឆៅ និងឆ្អិនដាច់ដោយឡែកពីគ្នា៖ ត្រូវទុកដាក់ដោយឡែកពីគ្នានូវសាច់ឆៅ សាច់មាន់-ទា និងគ្រឿងសមុទ្ទពីអាហារផ្សេងៗ។ ប្រើប្រាស់ឧបករណ៍ និងសម្ភារៈផ្ទះបាយដោយឡែកពីគ្នា ដូចជា កាំបិត និងជ្រុញសម្រាប់ហាន់អាហារឆៅ។ ទុកដាក់អាហារក្នុងកន្លែងរបស់វាដើម្បីចៀសវាងការប៉ះពាល់គ្នារវាងអាហារឆៅ និងអាហារឆ្អិន ព្រោះថាអាហារឆៅ ជាពិសេសសាច់សត្វស្លាប ស៊ុត និងគ្រឿងសមុទ្រ និងទឹកររបស់វា អាចមានមេរោគបង្កគ្រោះថ្នាក់ ដែលអាចឆ្លងចូលទៅក្នុងចំណីអាហារផ្សេងទៀតនៅពេលរៀបចំ និងទុកដាក់អាហារទាំងនេះ។

ទី៣.ការចម្អិនអាហារឲ្យបានឆ្អិនល្អ៖ ត្រូវចម្អិនអាហារឲ្យបានឆ្អិនល្អ ជាពិសេស សាច់ សត្វស្លាប ស៊ុត និងគ្រឿងសមុទ្រ។ ចូរយកអាហារដូចជាស៊ុប និងសម្ល ទៅដាំឲ្យពុះឡើងវិញ និងបញ្ជាក់ច្បាស់ថាវាក្តៅឡើងដល់ ៧០ អង្សាសេ។ ចំពោះសាច់ និងសត្វស្លាប ត្រូវប្រាកដថា ទឹករបស់វាឡើងថ្លា មិនមែនពណ៌ក្រហមព្រឿងៗនោះទេ។ តាមពិត ត្រូវប្រើសីតុណ្ហមាត្រ ដើម្បីវាស់កម្តៅនេះ។ កម្តៅអាហារដែលឆ្អិនរួចហើយនោះឡើងវិញឲ្យបានត្រឹមត្រូវ ព្រោះថាការចម្អិនត្រឹមត្រូវ អាចសម្លាប់មេរោគដែលបង្កគ្រោះថ្នាក់បានស្ទើរតែទាំងអស់។ ការសិក្សាបានបង្ហាញថា ការចម្អិនអាហារដល់សីតុណ្ហភាព ៧០ អង្សាសេ អាចជួយធានាថាវាពិតជាមានសុវត្ថិភាពសម្រាប់បរិភោគ។ ចំណីអាហារដែលទាមទារការប្រុងប្រយ័ត្នជាពិសេសមានសាច់ហាន់ស្តើង សាច់ជាប់សន្លាក់ឆ្អឹង និងសាច់សត្វស្លាបទាំងមូល។

ទី៤. ការទុកដាក់អាហារនៅក្នុងសីតុណ្ហភាពសុវត្ថិភាព៖ កុំទុកអាហារឆ្អិនស្រាប់ នៅក្នុងសីតុណ្ហភាពធម្មតាក្នុងបន្ទប់លើសពីពីរម៉ោង។ ត្រូវដាក់ចំណីអាហារដែលងាយស្អុយ ឬខូច និងអាហារដែលចម្អិនរួចទៅក្នុងធុងទឹកកក ឬទូរទឹកកកភ្លាមក្នុងកម្រិតសីតុណ្ហភាពតិចជាង ៥ អង្សាសេ និងទុកអាហារឆ្អិនឲ្យនៅក្តៅជានិច្ច ក្នុងកម្រិតសីតុណ្ហភាពលើសពី ៦០ អង្សាសេ និងកុំទុកចំណីអាហារយូរពេក ទោះបីដាក់ក្នុងធុងទឹកកក ឬទូរទឹកកកក៏ដោយ ព្រោះថាមេរោគអាចបំបែកខ្លួនយ៉ាងឆាប់រហ័សប្រសិនបើអាហារ ត្រូវបានរក្សាទុកក្នុងសីតុណ្ហភាពធម្មតា។ ការលូតលាស់របស់មេរោគ អាចថយចុះ ឬត្រូវបញ្ឈប់នៅសីតុណ្ហភាពក្រោម ៥ អង្សាសេ ឬលើសពី ៦០ អង្សាសេ មេរោគគ្រោះថ្នាក់មួយចំនួន នៅតែអាចលូតលាស់បានក្រោមសីតុណ្ហភាពទាបជាង ៥ អង្សាសេ។

ទី៥.ការប្រើប្រាស់ទឹកស្អាត និងវត្ថុធាតុដើមឆៅល្អ៖ ត្រូវប្រើប្រាស់ទឹកស្អាត ឬកែច្នៃវាឲ្យមានសុវត្ថិភាពមុនប្រើប្រាស់វា។ ជ្រើសរើសអាហារដែលនៅស្រស់ និងនៅទាំងមូល។ ជ្រើសរើសចំណីអាហារដែលរៀបចំដោយសុវត្ថិភាព ដូចជាទឹកដោះគោ ដែលបានធ្វើការសម្លាប់មេរោគរួច។ លាងបន្លែ ផ្លែឈើឲ្យបានស្អាតល្អ ជាពិសេសប្រសិនបើត្រូវរៀបចំញុំាឆៅ។ កុំប្រើប្រាស់ចំណីអាហារដែលហួសថ្ងៃខែឆ្នាំកំណើត។ព្រោះវត្ថុធាតុដើមឆៅ មានទឹក និងទឹកកក អាចចម្លងមេរោគ និងសារធាតុគីមីគ្រោះថ្នាក់។ សារធាតុគីមីពុល អាចកើតមានក្នុងអាហារខូច ឬរលួយ។ ចូរយកចិត្តទុកដាក់ក្នុងការជ្រើសរើសចំណីអាហារឆៅ និងអនុវត្តវិធានការអនាម័យសាមញ្ញ ដូចជាការលាងសម្អាត ការចិតសំបក អាចកាត់បន្ថយការប្រឈមមុខនឹងគ្រោះថ្នាក់បាន។

លោកវេជ្ជបណ្ឌិត លីសូវ៉ាន់ បានបញ្ជាក់ថា ក្នុងករណីពុទ្ធបរិស័ទតាជីយាយជីពេលត្រឡប់មកពីចូលរួមកាន់បិណ្ឌ ឬភ្ជុំបិណ្ឌមានអាការៈនិងរោគសញ្ញាដូចជាគ្រុនក្តៅ ក្អក ឈឺកឬរាករួសសូមប្រញាប់ទាក់ទងទៅកាន់លេខ ១១៥ ដើម្បីឱ្យមន្ត្រីជំនាញចុះទៅស្រាវជ្រាវនិងទប់ស្កាត់ឱ្យបានទាន់ពេលវេលា៕

អត្ថបទ៖ សំអឿន

The post អ្នកជំនាញសុខាភិបាល ណែនាំឱ្យអនុវត្តគន្លឹះ ៥ យ៉ាង ដើម្បីចៀសផុតការពុលចំណីអាហារ ក្នុងពិធីកាន់បិណ្ឌ និងភ្ជុំបិណ្ឌ appeared first on Kampuchea Thmey Daily.